ಗರ್ಭ]

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ -’ದಾಯ್ಜ್ ’-ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ದಾಯ್ಜ್ ಸಾಹಿತಿಕ್ ಸ್ಪರ್ಧೊ - 2006 ಫಳಿತಾಂಶ್

[ಇನಾಮಾಂ ಮೆಳ್‌ಲ್ಲಿಂ ಸರ್ವ್ ಬರ್ಪಾಂ ದಾಯ್ಜ್.ಕೊಮ್‌ಚೆರ್ ತಶೆಂಚ್ ಮಾಯ್ ಪಯ್ಲ್ಯಾ ಹಾಫ್ತ್ಯಾಂತ್ ಪರ್ಗಟೊನ್ ಯೆಂವ್ಚ್ಯಾ ಮಿತ್ರ್-ದಾಯ್ಜ್ ವಿಶೇಸ್ ಆಂಖ್ಯಾಚೆರ್ ಪರ್ಗಟ್ತೆಲಿಂ. ತಶೆಂಚ್ ಸಪ್ತೆಂಬ್ರಾಂತ್ ಮೂಡ್‌ಬಿದ್ರಿಂತ್ ಚಲೊಂಕ್ ಆಸ್ಚಾ ವಾರಾಡ್ಯಾವಾರ್ ದಾಯ್ಜ್ ಸಾಹಿತಿಕ್ ಶಿಭಿರಾವೆಳಾರ್ ವಾಂಟ್ತೆಲ್ಯಾಂವ್.] - ಸಂ.

ಮಟ್ವ್ಯಾ ಕಾಣ್ಯಾಂಚೊ ವಿಭಾಗ್: (ಸ್ಪರ್ಧ್ಯಾಕ್ ಆಯಿಲ್ಲ್ಯೊ ಕಾಣ್ಯೊ 24)

ಕೆವಿನ್ ಡಿ’ಮೆಲ್ಲೊ, ಕಾರ್ಕಳ್

[ಪಯ್ಲೆಂ ಇನಾಮ್ Rs.5000 ಆನಿ ಸರ್ಟಿಫಿಕೆಟ್]

[ಕಾಣಿ: ಚಂಡ ಆನಿ ಗರ್ಭ]

ಮೆಲ್ವಿನ್ ಪಿಂಟೊ ನೀರುಡೆ

[ದುಸ್ರೆಂ ಇನಾಮ್ Rs.3000 ಆನಿ ಸರ್ಟಿಫಿಕೆಟ್]

[ಕಾಣಿ: ದಿವೊಡ್]

ಕ್ಯಾಥರಿನ್ ರೊಡ್ರಿಗಸ್, ಕಟ್ಪಾಡಿ

[ತಿಸ್ರೆಂ ಇನಾಮ್ Rs.2000 ಆನಿ ಸರ್ಟಿಫಿಕೆಟ್]

[ಕಾಣಿ: ಏಕ್ ಫೊಡ್ ದುಕ್ರಾಮಾಸ್]

ಭುಜಾವಣೆಚಿಂ ಇನಾಮಾಂ: (Rs.1000ಚಿಂ ಇನಾಮಾಂ ಆನಿ ಸರ್ಟಿಫಿಕೆಟ್): ಡಾ|ಎಡ್ವರ್ಡ್ ನಜ್ರೆತ್ (ಕಾಣಿ: ಕೋಮಲ್), ಎಚ್ಚೆಮ್ (ಕಾಣಿ: ಬೀಗ್ ಆನಿ ಬ್ಹಿಗಾದ್) ಆನಿ ನಂದಿನಿ (ಕಾಣಿ: ಭಾಲೊ).

ಹ್ಯಾ ಸಕಯ್ಲ್ಯಾ ವ್ಹೊರಾಯ್ಣಾರಾಂಕ್ ದೇವ್ ಬರೆಂ ಕರುಂ

ಎಡ್ವಿನ್ ಜೆ. ಎಫ್.

ಸಿಜ್ಯೆಸ್ ತಾಕೊಡೆ

ಸ್ಟೇನ್ ಅಗೇರಾ

ಕ್ಲೆರೆನ್ಸ್ ಕೈಕಂಬ

ವಲ್ಲಿ ಕ್ವಾಡ್ರಸ್

ವ್ಹೊರಾಯ್ಣಾರಾಂಚೊ ಶ್ಹರೊ: (ಕಾಣ್ಯೊ)

ಕಾಣ್ಯೆಂ ಧ್ವಾರಿಂ ಉಡಿಯೆಚೊ ಸ್ಪರ್‍ಶ್?

ಜಿಣ್ಯೆಚಾ ಸತಾಂಚಿ ಮಿರ್‍ಸಾಂಗ್ ಲೇಕಕಾಚಾ ಕಲ್ಪನಾಕ್ ಆದಾಳ್ತಾನಾ ಪೆಟ್ಚಾ ಕಿಟಾಳಾಂನಿ ಕಾಣಿಯೊಂ ಜಲ್ಮ್ ಘೆತಾತ್ ಮಣ್ ಸಾಂಗ್ಚಾಂತ್ ಚೂಕ್ ನಾ. ಕಾಣಿ ಸಂಪೂರ್‍ಣ್ ವಾಸ್ತವಿಕ್ ಆಸೊಂ ಯಾ ಫಟಿಂಚೆಂ ಸಾರೆಂ ಯಾ ಸರ್‍ಶಿ-ಭರ್‍ಶಿಕ್, ರಾಜಾಂವಿಕ್ ಯಾ ಬಂಡಲ್, ತಾಂತ್ರಿಕ್ ವೇದಿರ್ ಸಫಲ್ ಯಾ ನಿರ್‍ಫಳ್ ಕಾಣಿ ತಿ ಕಶಿಯಿ ಆಸೊಂ ಕಾಣಿ ತಿ ಕಾಣಿಂಚ್. ಖಂಚಿಯಿ ಕಾಣಿ ತಿ ಕಾಣಿ ನ್ಹಂಯ್ ಮಣ್ಚ್ಯಾಕ್ ಅರ್ಥ್ ನಾ. ಕಾಣಿ ಆಶಿಚ್ ಆಸಾಜಾಯಿ ಮಣ್ಚೆಂ ನಿಯಮ್ ನಾ.

ನಿಯಾಮಾಂ ಆಸಾತ್ ತರ್ ಅಪಾಪ್ಲೆ ವಿಚಾರ್ ಆನಿ ಸೂತ್ರಾಂ ಆಮಿ, ಆಮ್ಚೆರ್-ಚ್ ಥಾಪ್ಲ್ಯಾಂತ್. ಆಶೆಂ ಆನ್ಬೋಗಿ ಬರವ್ಪ್ಯಾಂನಿ ತರ್‍ನೆಂ ಲೇಕಕಾಂಚೆರ್ ಅಪ್ಲೆಂ ನಿಯಂತ್ರಣ್ ದವರ್‍ಲಾಂ. ಮಜಾ ಸೂತ್ರಾಂಕ್ ಸರಿ ಜಾವ್ನ್ ದುಸ್ರೊ ಕಾಣಿ ಬರಯ್ತಾ ತರ್ ತೊ ಕ್ರಿಯಾತ್ಮಕ್ ಆನಿ ಉದೆವ್ನ್ ಯೆಂವ್ಚೊ ಬರವ್ಪಿ. ಮಾಕಾ ಸಮ್ಜಾನಾತ್‌ಲ್ಲೆ ವಿಚಾರಾಂನಿ ಕೋಣಾಯ್ಚಿ ಕಾಣಿ ದಿಷ್ಟಿಕ್ ಪಡ್ಲಿ ತರ್ ತಾಚೆ ಕಾಣ್ಯೆಂನಿ ಧಮ್ಮ್ ನಾ. ಅಸಲ್ಯಾ ಅಶೀರ್ ಮನೋಭಾವಾನ್ ಆಮಿ ದುಸ್ರ್ಯಾ ಲೇಕಕಾಂಕ್ ತುಕ್ತಾಂವ್ ಆನಿ ಜಾಯ್ತೆ ಪಾವ್ಟಿಂ ’ಥುಕ್ಕ್’ ಕರ್‍ತಾಂವ್.

ದೆಕುನ್ ಹಾಂವ್ ಪರತ್ ಸಾಂಗ್ತಾಂ ಕಾಣಿ ಆಶಿಚ್ ಆಸಾಜಾಯಿ ಮಣೊನ್ ನಿಯಮ್ ನಾ. ಸತ್ ಇತ್ಲೆಂಚ್ ಹಾಂವ್ ಕಾಣಿ ಮಜೆಖಾತಿರ್ ಬರಯ್ನಾಂ. ಹೆರಾಂನಿ ವಾಚುನ್ ಲೊಕಾಮೊಗಾಳ್ ಜಾಲಿ ತರ್ ಹಾಂವ್ ಖುಶ್. ವಾಚ್ಪ್ಯಾಂನಿ ತಿರಸ್ಕಾರ್ ಕೆಲಿ ತರ್ ವಾಚ್ಪ್ಯಾಂಕ್ ಸಮ್ಜಾಲಿ ನಾ ಮಣೊನ್ ಹಾಂವ್ ಮಾಕಾಚ್ ಸಮಧಾನ್ ಕರ್‍ತಾಂ ತರೀ ವಾಚ್ಪ್ಯಾಕ್ ಪಸಂದ್ ಜಾಲಿನಾ ಮಣ್ಚಾ ವಿರಾರಾಯೆ ಥಾವ್ನ್ ಏಕಾ ಲೇಕಕಾಚೆಂ ಮನ್ ಬಚಾವ್ ಜಾಂವ್ಕ್ ಸಕಾನಾ. ಪಯ್ಶೆ ದೀವ್ನ್ ಯಾ ಫುಕಟಾಕ್ ವಾಸ್ಚಾ ವಾಚ್ಪ್ಯಾಕ್ ಮನೋರಂಜನ್ ದೀವ್ನ್ ಮನ್ ಜಿಕ್ಚಿ ಏಕ್ ಅವಶ್ಯ್ ಗರ್‍ಜ್ ಜಾಂವ್ಕ್ ಪಾವ್ತಾ ಕಾಣಿ ಬರಯಿಲ್ಲ್ಯಾ ಬರವ್ಪ್ಯಾಚಿ.

ವಾಚ್ಪ್ಯಾನ್ ಕಾಣಿ ಪಸಂದ್ ಕರಿಜಾಯಿ ತರ್ ಮಜಿಂ ಸತಾಂ ಆನಿ ಫಟಿಂಚಿ ಕಿಟಾಳಾಂ ಥೊಡ್ಯಾ ಮಟ್ಟಾಕ್ ತರೀ ತಾಚೆ ಶಿರಾಂಚಾ ಉಡ್ಯೆಕ್ ಸ್ಪರ್‍ಶ್ ಜಾಯ್ಜಾಯಿ. ಹೆಂ ಲೇಕಕ್ ಆನಿ ವಾಚ್ಪ್ಯಾಚಾ ಸಂಬಂಧಾಚೆಂ ಅಪುಟ್ಟ್ ಆನಿ ಏಕ್‌ಚ್ ಸತ್. ವಾಚ್ಪ್ಯಾಕ್ ಖುಶ್ ಕರುಂಕ್ ಏಕ್ ಲೇಕಕ್ ಅಪ್ಲ್ಯಾ ಫಟಿಂಕ್ ವಾಸ್ತವಿಕತೆಚೊ, ತಾಂತ್ರಿಕಾತೆಚೊ, ಭಾಸೆಚೊ, ಉತ್ರಾಂಚೊ ಆನಿ ರಾಜಾಂವಾಚೊ ಲೇಪ್ ಲಾಯ್ತಾ. ಕಿತ್ಲ್ಯಾ ಮಟ್ಟಾಕ್ ಯಶಸ್ವಿ ಜಾಲೊಯಿ ತೆಂ ಫಕತ್ ವಾಚ್ಪಿ ಸಾಂಗ್ತಾ.

ದಾಯ್ಜ್ ಸ್ಪರ್ಧ್ಯಾಕ್ ಆಯಿಲ್ಲ್ಯಾ ಕಾಣ್ಯೊ ವಾಚ್ತಚ್ ಥೊಡ್ಯಾ ಮಟ್ಟಾಕ್ ತರೀ ಹ್ಯಾ ದಾಯ್ಜಾಂತ್ ವಾಚ್ಪ್ಯಾಂಚಿ ಉಡಿ ಸ್ಪರ್‍ಶ್ ಕರ್‍ಚಿ ಸಕತ್ ಆಸಾ ಮಣ್ಚೆಂ ದಿಸೊನ್ ಯೆತಾ. ಬರವ್ಪ್ಯಾಂನಿ ಚಡಿತ್ ಮಿನತ್ ಆಟಯ್ಲಿ ತರ್ ಕೊಂಕ್ಣಿ ಸಾಹಿತ್ಯಾಂತ್ ತಾಂಕಾಂ ಭವಿಶ್ಯ್ ಉಜ್ವಲ್ ಆಸ್ತೆಲೆಂ ಮಾತ್ರ್ ನ್ಹಂಯ್ ತಾಂಚೆ ದ್ವಾರಿಂ ಕೊಂಕ್ಣಿ ಸಾಹಿತ್ಯಾಕ್‌ಯಿ ಬರೆಂ ಭವಿಶ್ಯ್ ಜರೂರ್ ಮೆಳ್ತೆಲೆಂ ಮಣ್ ಧಯ್ರಾನ್ ಸಾಂಗ್ಯೆತ್. ಪುಣ್ ಮೆಟಾಂ ಮೆಟಾಂಕ್ ಸುಧಾರಣ್ ಅಟಾಪ್ಚಿ ಬದ್ಲಾವಣ್ ಅವಶ್ಯ್. ಏಕಾ ವಾಚ್ಪಿ ಜಾವ್ನ್ ಇಲ್ಲೆಶೆಂ ತಜ್ವೀಜ್ ಕರುಂಕ್ ಸಕ್ತಾಂ.

ಹಾಂವೆ ಪಯ್ಲೆಂ ವಾಚ್ಪಿ, ಲೇಕಕ್ ಜಾಲಾಂ ತರ್ ಫರಾಮಶೆನ್. ವಾಚ್ಪ್ಯಾಚಾ ನದ್ರೆನ್ ಅಭಿಪ್ರಾಯಿ ದಿಲಿ ತರ್ ಕಾಣ್ಯೆಂನಿ ಸಹಜ್ ಜಾವ್ನ್ ಗುಣ್ ಆನಿ ಅವ್ಗುಣ್ ದೀಷ್ಟಿಕ್ ಯೆತಾತ್. ದೊಡ್ಯಾ ಅರ್‍ಥಾನ್ ವಿಣ್ಲೆಲಿ ಕತಾ ’ಭಾಲೊ’, ವಾಚ್ಪ್ಯಾಚಾ ಚಿಂತ್ನಾಂಕ್ ಜಾಯ್ತೆಂ ಧೊಸ್ತಾ, ಸಾಂಗೊಂಕ್ ಕಿತೆಂಗಿ ಆಶೆತಾ ತರೀ ಅಕ್ರೇಕ್ ಅಸ್ಪಷ್ಟ್ ಸೊಡ್ತಾ. ದೋನ್ ವೆವೆಗ್ಳ್ಯಾ ಸನ್ನಿವೇಶ್ ಆನಿ ಪಾತ್ರ್ (ಜಶೆಂ ಮನಿಸ್ ಆನಿ ಮನ್ಜಾತ್) ನಿರ್‍ಮಾಣಾ ದ್ವಾರಿಂ ಏಕಾ ಧಾರಿಚೊ ಸಂಬಂಧ್ ರುತಾ ಕರ್‍ನ್ ಏಕಾ ನಿಶ್ಚಿತ್ ಶೆವೊಟಾಚೆರ್ ದೋನ್‌ಯಿಂ ಸನ್ನೀವೇಶ್ ಅಂತ್ಯ್ ಜಾಂವ್ಚೊ ಕತಾ ಜಾವ್ನಾಸಾತ್ ’ದಿವೊಡ್’ ಆನಿ ’ಚಂಡ ಆನಿ ಗರ್‍ಭಾ.’ ದೋನ್ ವೆವೆಗ್ಳ್ಯಾ ಸನ್ನಿವೇಶ್ ಆನಿ ಪಾತ್ರಾಂಚೆಂ ಸಮಾತೋಲನ್ ’ಚಂಡ ಆನಿ ಗರ್‍ಭಾಂತ್’ ಚಡ್ ಪರಿಣಾಮ್‌ಕಾರಿ ಜಾಲಾಂ. ಪುಣ್ ಲೇಕಕ್ ಜಾಯ್ತೆಂ ಸಾಂಗ್ಚಾ ಪ್ರಯತ್ನಾರ್ ವಾಚ್ಪ್ಯಾಚೆಂ ಸಂಯಮ್ ಪರೀಕ್ಷೇಕ್ ಘಾಲ್ತಾ. ವಿವರಣ್ ಮಟ್ವೆಂ ಜಾಲ್ಲೆಂ ತರ್ ಮತಿಕ್ ನಾಟ್ವೊನ್ ರಾಂವ್ಚಿ ಸಕತ್ ಚಡ್ತಾ ಆಸ್‌ಲ್ಲಿ.

ದಿವೊಡಾಚೆಂ ಅಂತ್ಯ್ ಸಲ್ವಲಾಂ. ಇಲ್ಲಿಶಿ ಬದ್ಲಾವಣ್ ಕರ್‍ನ್ ಶಿವುನ್ ತಾಚೆ ಅಕ್ಕಾ ಆನಿ ರಮೇಶಣ್ಣಾಚಿ ಕಾಮ ಕ್ರಿಯಾ ದೆಕ್ಚಾ ಬದ್ಲಾಕ್ ಶಿವುನ್ ದಿವ್ಡಾಚೆಂ ಮಿಲನ್ ಶೆರ್‍ಮೆವ್ನ್ ದೆಕ್ತಾನಾ ದುಸ್ರ್ಯಾ ಬೊಲ್ಯಾ ಥಾವ್ನ್ ಅಕ್ಕಾ ಆನಿ ರಮೇಶಣ್ಣಾ ಹಾಸೊನ್ ಭಾಯ್ರ್ ಯೆಂವ್ಚೆಂ ಚಿತ್ರಿತ್ ಜಾಲ್ಲೆಂ ತರ್ ಆನಿ ತ್ಯಾಚ್ ದ್ರಶ್ಯಾ ಸವೆಂ ಕಾಣಿ ಅಂತ್ಯ್ ಜಾಲ್ಲಿ ತರ್ ಬಹುಶಾ ಕಾಣಿ ಚಡ್ ಪ್ರಭಾವಿತ್ ಆನಿ ಮನೋರಂಜನ್‌ಕಾರಿ ಜಾತಿ. ದೋನ್ ಸನ್ನಿವೇಶ್ ಏಕ್ ಕಥಾವಸ್ತುಚೊ ಆಧಾರ್ ಜಾವ್ನ್ ಚಲ್ತಾನಾ ಸಾಂಗೊಂಕ್ ಚಡ್ಪಡ್ಚಾ ಸನ್ನಿವೇಶಾಚೆಂ ಅಂತ್ಯ್ ಲಿಪವ್ನ್ ಸಾಂಗಾತಿ ಸನ್ನೀವೇಶಾಚೆಂ ಅಂತ್ಯ್ ದಾಕಯ್ಲೆಂ ತರ್ ವಾಚ್ಪ್ಯಾಕ್ ಸಲೀಸಾಯೆನ್ ಲೇಕಕಾಚೊ ಇರಾದೊ ಸಮ್ಜಾತಾ.

ಸಾಂಗಾತಾಚ್ ಆನ್ಯೇಕ್ ದುಬಾವ್ ಯಾಂತ್ರಿಕ್ ಜಾವ್ನ್ ಉದೆತಾ. ಆಮ್ಚಾ ಲೇಕಕಾಂಕ್ ದೋನ್ ಕ್ಷೇತ್ರ್ ಏಕಾ ಧಾರಿಚೆರ್ ರಚ್ಚೆಂ ಪ್ರಯತನ್ ಕರ್‍ತಾನಾ ಲೈಂಗೀಕ್ ಆಕರ್‍ಶಣಾ ಭಾಯ್ಲೆ ವಿಷಯಿ ಮೆಳಾನಾಂತ್? ಮನಿಸ್, ದಿವೊಡ್, ಕೊಂಬೊ, ಕೊಂಬಿ, ಪಾಡೊ ಯಾ ಪಾಡಿ ಮಣ್ಚಾ ಪಾತ್ರಾಂನಿ ಫಕತ್ ಲೈಂಗಿಕ್ ಮಿಲನಾ ಶಿವಾಯಿ ಹೆರ್ ಖಂಚಾಯಿ ವೆಗ್ಳ್ಯಾ ವರ್ಗಾಚಿ ಸಾಮಾನ್ಯತಾ ನಾ? ಇರಾದೆ ನಾಂತ್? ಸೆಕ್ಸಾ ಥಾವ್ನ್ ಭಾಯ್ರ್ ಯೇವ್ನ್ ಹಗೆಂ, ಮೊಸೊರ್, ಘಾತ್, ಸಲ್ವಣ್, ಜೀಕ್, ಲೂಟ್, ಸಂತೊಸ್, ಫಟಿ, ನಿರಾಶಾ ಯಾ ಇತರ್ ಖಂಚಾಯಿ ಭೊಗ್ಣಾಂ/ಕರ್‍ನೆಂಕ್ ಲಾಗಿಂ ವೋಡ್ನ್ ದೋನ್ ವೆವೆಗ್ಳೆ ಕ್ಶೇತ್ರ್, ಪಾತ್ರ್ ಆನಿ ವಿಷಯಾಂಕ್ ಏಕಾ ಶಿಖರಾಚೆರ್ ಅಂತ್ಯ್ ಕರ್‍ಚೊ ಪ್ರಯೋಗ್ ಗರ್‍ಜ್ ಮಣ್ ದಿಸಾನಾ? ಕಾಮ ಕ್ರಿಯಾ ಪಾಡ್ ಮಣ್ ಹಾಂವ್ ಸಾಂಗಾನಾ. ಪುಣ್ ಕಾಮಾ ಕ್ರಿಯೆಂ ಶಿವಾಯಿ ಹೆರ್ ಸಾಮಾನ್ಯ್ ವಿಷಯಿ ನಾಂತ್?

’ಏಕ್ ಫೊಡ್ ದುಕ್ರಾ ಮಾಸ್’ ಧೈರಾದೀಕ್ ಬೊಂದೆರಾಚಿ ಕಾಣಿ. ’ಲ್ಹಾರಾಂ’ ಸಂಪ್ಯಾ ಪಾತ್ರಾಂನಿ ಜಿಕ್ತಾ ತರ್, ’ಕೋಮಲ್’ ಕುತೂಹಲ್‌ಭರಿತ್ ಕರ್‍ತಾ. ತೀನ್ ಕಾಣ್ಯೆಂಚೆಂ ವಿವರಣ್ ನಾಟಕೀಯಿ ಜಾವ್ನ್ ಜಾಯ್ತ್ಯಾ ಮುಳಾಂನಿ ರಾಜಾಂವ್ ಹೊಗ್ಡಾಯ್ತಾ. ಪಾತ್ರಾಂನಿ ಸಹಜತಾ ಗರ್‍ಜ್. ಘಡಿತಾಂ ಮಧ್ಲ್ಯಾ ಗಾಂಚಾಂನಿ ಸ್ವಾಭವಿಕಾತಾ ಮಹತ್ವಾಚಿ. ಚಡಿತ್ ಮಿನತ್ ಘಾಲ್ಲಿ ತರ್ ’ಕೋಮಲ್’ ಏಕ್ ಭೋವ್ ಸೊಭಿತ್ ಥ್ರಿಲ್ಲರ್ ಜಾವ್ನ್ ಪರಿವರ್‍ತಿತ್ ಕರ್‍ಯೆತ್ ಆಸ್‌ಲ್ಲಿ.

’ಜುದಾಸಾಚೆಂ ರುದಾನ್’ ಏಕ್ ಬರೆಂ ಪ್ರಯತನ್, ವಿಷಯಾ ಭಿತರ್ ಆಸಾ. ಪುಣ್ ಅಸಲೆ ವಿಷಯ್ ಬರಯ್ತಾನಾ ವಾಚ್ಪ್ಯಾಂಕ್ ತದೇಕ್ ಕರ್‍ಚೆಂ ಏಕ್ ನವೆಂ ದ್ರಷ್ಟೀಕೋನ್ ಅವಶ್ಯ್. ಅಪೇಕ್ಷುಂಚೆಂ ನವೆಂಸಾಂವ್ ಝಳ್ಕಾನಾ. ’ಬೀಗ್ ಆನಿ ಭಿಗಾತ್’, ’ಅಗ್ಟೆಂ’, ’ಗುಪಿತ್ ಮೋಗ್’, ’ಹುಲೊಪ್’ ಆನಿ ’ಶ್ರದ್ದಾಂಜಾಲಿ’ ತಸಲ್ಯಾ ಕಾಣ್ಯೆಂನಿ ಅಪಾಪ್ಲೆಂ ಪ್ರಯತನ್ ದಾಕಯ್ಲಾಂ. ಪುಣ್ ಕಥಾವಸ್ತ್, ಸನ್ನೀವೇಶ್, ಪಾತ್ರ್ ನಿರ್‍ಮಾಣ್, ವಿವರಣ್, ಘಡಿತಾಂಚೆ ಗಾಂಚ್, ಭಾಸ್, ಸಂಭಾಷಣ್, ತಾಂತ್ರಿಕತಾ ಆನಿ ಕಾಣಿ ಖಂಚಾ ರೀತಿನ್ ಚಡ್ ಸೊಭಿತ್, ನೈಜ್ ಆನಿ ಕುತೂಹಲ್ಭರಿತ್ ಕರ್‍ಯೆತ್ ನವೆಂಸಾಂವ್ ಹಾಡ್ಯೆತ್ ಮಣ್ ಫಕತ್ ಹ್ಯಾ ಲೇಕಕಾಂನಿ ಮಾತ್ರ್ ನ್ಹಂಯ್ ಸರ್‍ವ್ ಲೇಕಕಾಂನಿ ತವಳ್ ತವಳ್ ಅಧ್ಯಯನ್ ಕರ್‍ಚೆಂ ಭೋವ್ ಗರ್‍ಜೆಚೆಂ. ಹೆಂ ನಿಯಮ್ ಮ್ಹಾಕಾಯಿ ಲಾಗು ಜಾತಾ. ತವಳ್ ಮಾತ್ರ್ ಕಾಣಿಯೊಂ ವಾಚ್ಪ್ಯಾಂಚಾ ಶಿರಾಂಚಿ ಉಡಿ ಸ್ಪರ್‍ಶ್ ಕರುಂಕ್ ಸಕ್ತಾತ್ ಮಣ್ ಹಾಂವ್ ಪಾತ್ಯೆತಾಂ.

-ಸ್ಟೇನ್ ಅಗೇರಾ, ಮುಲ್ಕಿ

ಲೇಖನಾಂಚೊ ವಿಭಾಗ್: [ವಿಶಯ್: ಕೊಂಕ್ಣಿ ಪ್ರಕಾಶನಾಂ ಆನಿ ಬೂಕ್] (ಸ್ಪರ್ಧ್ಯಾಕ್ ಆಯಿಲ್ಲಿಂ ಲೇಖನಾಂ 7)

ಶ್ಹರೊ: ಆಧ್ಲ್ಯಾ ದೋನ್ ವರ್ಸಾಂಚ್ಯಾಕೀ ಚಡಿತ್ ಬರ್ಪಾಂ ಹ್ಯಾ ಪಾವ್ಟಿಂಚ್ಯಾ ಸ್ಪರ್ಧ್ಯಾಕ್ ಆಯಿಲ್ಲಿಂ ತರ್‌ಯೀ ಲೇಖನಾಂ ಬರಂವ್ಚೆ ಉಣೆ ಜಾಲ್ಲಿ ನಿಜಾಯ್ಕ್‌ಯೀ ಬೆಜಾರಾಯೆಚಿ ಗಜಾಲ್. ಆಯಿಲ್ಲ್ಯಾ ಚಡ್ತಾವ್ ಲೇಖನಾಂನಿ ಕಸಲಿಚ್ಚ್ ಮಿನತ್ ದಿಸೊನ್ ಯೇನಾಸ್ತಾಂ, ಫಕತ್ತ್ ಉತ್ರಾಂಚಿ ರಾಸ್ ಮಾತ್ರ್ ದಿಸೊನ್ ಯೆತಾ. ಫಕತ್ತ್ ಏಕ್ ಲೇಖನ್ ಮಾತ್ರ್ ಮಿನತ್ ಕರ್ನ್, ಅಧ್ಯಯನ್ ಕರ್ನ್ ಬರಯಿಲ್ಲೆಂ ಜಾವ್ನಾಸಾ. ತ್ಯಾ ದೆಖುನ್ ಹ್ಯಾ ಪಾವ್ಟಿಂಚೊ ಲೇಖನ್ ಬರಂವ್ಚೊ ಸ್ಪರ್ಧೊ ಆಮಿ ರದ್ದ್ ಕೆಲಾಂ. ಭುಜಾವಣೆಚಿಂ ಇನಾಮಾಂ ಜೊಡ್‌ಲ್ಲಿಂ;

ಭುಜಾವಣೆಚಿಂ ಇನಾಮಾಂ: (Rs.1000ಚಿಂ ಇನಾಮಾಂ ಆನಿ ಸರ್ಟಿಫಿಕೆಟ್): ಡಾ|ಎಡ್ವರ್ಡ್ ನಜ್ರೆತ್, ಲುವಿ ಪಿರೇರಾ ಮಂಡ್ಯ, ಪ್ರಸನ್ನ್ ನಿಡ್ಡೋಡಿ. ಲೇಖನಾಂಕ್ ದಿಲ್ಲೊ ವಿಶಯ್: ’ಕೊಂಕ್ಣಿ ಪ್ರಕಾಶನಾಂ ಆನಿ ಬೂಕ್’.

ಕವಿತಾಂಚೊ ವಿಭಾಗ್: (ಸ್ಪರ್ಧ್ಯಾಕ್ ಆಯಿಲ್ಲಿಂ ಕವಿತಾ 27)

ಎಲ್ಯೆರ್ ತಾಕೊಡೆ

[ಪಯ್ಲೆಂ ಇನಾಮ್ Rs.5000 ಆನಿ ಸರ್ಟಿಫಿಕೆಟ್]

[ಕವಿತಾ: ದೇಶಾಚೆ ಖಂತಿನ್]

ಎಚ್ಚೆಮ್

[ದುಸ್ರೆಂ ಇನಾಮ್ Rs.3000 ಆನಿ ಸರ್ಟಿಫಿಕೆಟ್]

[ಕವಿತಾ: ಸುಮಂಗಳೆಚೊ ಸ್ವಗತ್]

ಮೆಲ್ವಿನ್ ಪಿಂಟೊ, ನೀರುಡೆ

[ತಿಸ್ರೆಂ ಇನಾಮ್ Rs.2000 ಆನಿ ಸರ್ಟಿಫಿಕೆಟ್]

[ಕವಿತಾ: ನಾಚ್]

ಭುಜಾವಣೆಚಿಂ ಇನಾಮಾಂ: (Rs.1000ಚಿಂ ಇನಾಮಾಂ ಆನಿ ಸರ್ಟಿಫಿಕೆಟ್): ವಿಲ್ಸನ್ ಕಟೀಲ್ (ಕವಿತಾ: ಆಟೆವಿಟೆ), ಆಂಟನಿ ಬಾರ್ಕುರ್ (ಕವಿತಾ: ಕಾಟ್ ತುಟ್ಚೊ ವೇಳ್), ರಿಚ್ಚಿ ಪಿರೇರ್ (ಕವಿತಾ: ಸಾಹಿತಿಚೆ ಸಂಕಷ್ಟ್) ಆನಿ ಮೆಲಿಟಾ ಪಿಂಟೊ (ಕವಿತಾ: ಕವಿತೆಚೆಂ ಸ್ವಪಾಣ್).

ಹ್ಯಾ ಸಕಯ್ಲ್ಯಾ ವ್ಹೊರಾಯ್ಣಾರಾಂಕ್ ದೇವ್ ಬರೆಂ ಕರುಂ

ಮೆಲ್ವಿನ್ ರೊಡ್ರಿಗಸ್

ಆಂಡ್ರು ಡಿ’ಕುನ್ಹಾ

ಆನ್ಸಿ ಪಾಲಡ್ಕಾ

ಮೆಲ್ವಿನ್ ವಾಸ್

ವಲ್ಲಿ ಕ್ವಾಡ್ರಸ್

ವ್ಹೊರಾಯ್ಣಾರಾಂಚೊ ಶ್ಹರೊ: (ಕವಿತಾ)

ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2006 ಹಾಕಾ ನೊಂದಿತ್ ಜಾಲ್ಲ್ಯಾ ಕವಿತೆಂ ಪಯ್ಕಿ ವಿಂಚ್ಣಾರ್ ಧಾ ಕವಿತಾ ವೊರವ್ಣೆಕ್ ಧಾಡುನ್ ದಿಲ್ಲ್ಯೊ. ಕವಿತಾ ವೊರವ್ನ್ ಪಳೆತಾನಾ ಮ್ಹಾಕಾ ಭೋವ್ ಖುಶಿ ಜಾಲಿ. ಕಿತ್ಯಾಕ್ ಮ್ಹಳ್ಯಾರ್ ಎಕಾ ಪ್ರಾಸ್ ಏಕ್ ಕವಿತಾ ಊಂಚ್ಲ್ಯಾ ಮಟ್ಟಾಚಿ ಆಸ್‌ಲ್ಲಿ. ಆದ್ಲ್ಯಾ ಕವಿತೆಂಕ್ ತುಲನ್ ಕೆಲ್ಯಾರ್ ಆತಾ’ತಾ ಕವಿ ಚಡ್ ತರ್ಭೆತ್ ಜಾಲ್ಯಾತ್ ತೆಂ ದಿಸ್ತಾ. ತ್ರಾಸ್ ಘೆವ್ನ್ ಪ್ರಾಸ್ ಭರುನ್ ಕಿತೇಂಯ್ ಚ್ಯಾರ್ ವೋಳಿ ಬರಯ್ಲ್ಯಾರ್ ಕವಿತಾ ಜಾತಾ ಮ್ಹಳ್ಳೆಂ ಚಿಂತಾಪ್ ಸವ್ಕಾಸ್ ಮಾಜ್ವೊನ್ ವೆತಾ. ಹಾಕಾ ಆಯ್ಲೆವಾರ್ ಜಾಯ್ತ್ಯಾ ಕವಿತಾ ಪ್ರೇಮಿಂನಿ ಪ್ರಮುಖ್ ಜಾವ್ನ್ ಅಂತರ್ ಜಾಳಾಂಧ್ವಾರಿಂ ಉಟಯಿಲ್ಲಿ ಜಾಗೃತಿ ಕಾರಾಣ್ ಜಾಂವ್ಕ್ ಪುರೊ. ಆಯ್ಲೆವಾರ್ ರಾಶಿಂನಿ ಪ್ರಕಟ್ ಜಾಲ್ಲಿಂ ಕವಿತಾಂ ಸಂಕಲನಾಂಯೀ ಪೂರಕ್ ಜಾಂವ್ಕ್ ಪುರೊ. ಆಯ್ಚ್ಯಾ ದಿಸಾಂನಿ ಕೊಂಕ್ಣೆಂತ್ ಕವಿತಾ ಬರಂವ್ಕ್ ಆಶೆತೆಲ್ಯಾಂನಿ ಚಡಿತ್ ತ್ರಾಸ್ ಘೆಂವ್ಚಿ ಗರ್ಜ್ ನಾ. ಕೊಂಕ್ಣೆಚ್ಯಾ ಥೊಡ್ಯಾ ಅಂತರ್‍ಜಾಳಾಂನಿ ಸಂಗಣಾಚೊ ಉಂದಿರ್ ಭೊಂವ್ಡಾಯ್ಲ್ಯಾರ್ ಭರ್ಪೂರ್ ಕವಿತೆಂಚೊ ದಾಳೊಚ್ ಚಿವೊಂಕ್ ಮೆಳ್ತಾ. ಹೊ ದಾಳೊ ಫಾವೊ ಕೆಲ್ಲ್ಯಾ ಕಾರಣ್ ಕರ್ತಾಂಕ್ ಹೊಗ್ಳಿಕ್ ಫಾವೊ.

ಖುಶೆಚಿ ಗಜಾಲ್ ಮ್ಹಳ್ಯಾರ್ ಆಯ್ಚೆ ಕವಿ ಶಿಕ್ಷಿತ್ ಜಾಲ್ಯಾತ್. ಆಯ್ಚಿಂ ಪತ್ರಾಂಯ್ ಜಾಗಿಂ ಜಾಲ್ಯಾಂತ್. ಆಜ್ ಕವಿತೆಕ್ ಮಾನಾಚೊ ಜಾಗೊ ಮೆಳ್ಳಾ ತೆಂ ಪಳೆತಾನಾ ಖುಶಿ ಜಾತಾ.

ತಶೆಂ ಪಳೆಂವ್ಕ್ ಗೆಲ್ಯಾರ್ ಸಾಹಿತ್ಯಾಂತ್ ಶ್ರೇಷ್ಠ್ ಸಾಹಿತ್ಯ್‌ಚ್ಚ್ ಕವಿತಾ. ಕವಿ ಜಾಲ್ಲೊ ಎಕ್ಲೊ ಇತರ್ ಖಂಚೇಂಯೀ ಸಾಹಿತ್ಯ್ ರಚುಂಕ್ ಸಕ್ತಾ. ಪುಣ್ ಇತರ್ ಸಾಹಿತ್ಯ್ ರಚ್ಚೊ ಹರ್ಯೆಕ್ಲೊ ಕವಿತಾ ಬರಂವ್ಕ್ ಸಕತ್ ಮ್ಹಣ್ ಸಾಂಗೊಂಕ್ ಜಾಯ್ನಾ.

ಕವಿತಾ ಭೋವ್ ಪ್ರಭಾವ್‌ಕಾರಿ ಹಾತೆರ್ ಕಿತ್ಯಾಕ್ ಕವಿತಾ ಹರ್ಯೆಕ್ಲ್ಯಾ ಥಂಯ್ ವಿವಿಂಗಡ್ ರಿತಿಚಿಂ ಭೊಗ್ಣಾಂ ಉಬ್ಜಾಯ್ತಾ. ಕವಿತೆಂತ್ ವಿಶೇಸ್ ಸಕತ್ ಆಸ್ತಾ. ಕವಿತೆಂತ್ಲೆಂ ಫಕತ್ ದೋನ್/ತೀನ್ ಸಬ್ಧ್ ಪಾಸೂನ್ ವಾಚ್ಪ್ಯಾಂ ಥಂಯ್ ಹಜಾರ್ ಭೊಗ್ಣಾಂ ಉಟಂವ್ಕ್ ಸಕ್ತಾತ್.

ಕವಿತೆಧ್ವಾರಿಂ ಉಚಾರುಂಕ್ ಜಾಯ್ನಾತ್‌ಲ್ಲೆಂ ಕಾಂಯ್ ಆಸಾ? ಖಂಡಿತ್ ನಾ. ಕವಿತೆಧ್ವಾರಿಂ ಸೊಭಾಯ್ ವರ್ಣಿಯೆತ್, ಮೋಗ್ ಪಾಚಾರ್ಯೆತ್, ಭೊಗ್ಣಾಂ ಉಚಾರ್ಯೆತ್, ಜ್ಞಾನ್ ವಾಡವ್ಯೆತ್, ಮನೋರಂಜನ್ ದಿವ್ಯೆತ್. ಅಶೆಂ ಕವಿತೆಧ್ವಾರಿಂ ದೀಂವ್ಕ್ ಜಾಯ್ನಾತ್‌ಲ್ಲೆಂ ಖಂಚೆಂಚ್ ನಾ. ಕೊಣಾಯ್ಚ್ಯಾ ತುಜ್ಯಾ ಇಷ್ಟಾಚ್ಯಾ ಜಲ್ಮಾ ದೀಸಾಕ್ ಏಕ್ ಬರಿ ಕಾಣಿ ಬರವ್ನ್ ಧಾಡುಂಕ್ ಜಾತಾಯೆ? ನಾ. ಪುಣ್ ಏಕ್ ಸೊಭಿತ್ ಕವಿತಾ ಬರಯ್ಶಿ ತರ್ ತ್ಯಾ ಇಷ್ಟಾಕ್ ಕಿತ್ಲೊ ಸಂತೊಸ್ ಜಾಯ್ತ್?

ಕವಿತಾ ಕಶಿ ಘಡ್ತಾ ಮ್ಹಳ್ಳೆಂ ಆಪುರ್ಭಾಯೆನ್ ವರ್ಣಿಲಾಂ ಎಕಾ ಕವಿನ್ ಸ್ಪರ್ಧ್ಯಾಕ್ ದಾಡ್‌ಲ್ಲ್ಯಾ ಕವಿತೆಧ್ವಾರಿಂ. ತ್ಯಾ ಕವಿತೆಚೆಂ ನಾಂವ್ ಆಸಾ ಕಾಟ್ ತುಟ್ಚೊ ವೇಳ್.

’ನಿಮಾಣೆ ಭೊಗ್ಣಾಂಚೊ ತುಟ್ತಾನಾ ಕಾಟ್

ಆಂಗಾಂತ್ ಶಿರ್ಶಿರೊ ಲ್ಹೊವಾಂ ಸರ್ವ್ ನೀಟ್

ಕಲ್ಪನಾ ದೆಖುನ್ ಆಸ್ತಾನಾ ಅಶೆಂಚ್ ಜಾತಾ

ಶೆಕಿಂ ಲಿಖ್ಣೆಂತ್ ದೆವೊನ್ ಯೆತಾ ಜಿವಿ ಕವಿತಾ’

ಹ್ಯಾ ಕವಿತೆಧ್ವಾರಿಂ ಕವಿ ಅಶೆಂ ಸಾಂಗೊಂಕ್ ಆಶೆತಾ. ಏಕಾ ಉದ್ಕಾಚ್ಯಾ ಕಾಟಾಭಿತರ್ ಎಕೇಕ್‌ಚ್ಚ್ ಭಗ್ಣಾಚೊ ಥೆಂಬೊ ಜಮೊ ಜಾತಾ. ನಿಮಾಣೆ ಕಾಟಾಂತ್ ಉದಾಕ್ ಭರ್ತಾ. ಕಾಟಾಕ್ ತಿತ್ಲೆಂ ಉದಾಕ್ ತಾಂಡುನ್ ಘೆಂವ್ಚಿ ಸಕತ್ ನಾ. ಅಶೆಂ ಕಾಟಾಂತ್ ಭಗ್ಣಾಂಚ್ಯಾ ಉದ್ಕಾಚೆ ಥೆಂಬೆ ಭರೊನ್ ಏಕ್ ಸಂದರ್ಭ್ ಉದೆತಾ ಆನಿ ಎಕಾಚ್ಚಾಣೆ ಕಾಟ್ ತುಟ್ತಾ. ಅಶೆಂ ಎಕಾಚ್ಚಾಣೆ ತುಟ್‌ಲ್ಲ್ಯಾ ಕಾಟಾ ಥಾವ್ನ್ ಉದ್ಕಾಚೊ ವ್ಹಾಳೊ ವ್ಹಾಳೊಂಕ್ ಲಾಗ್ತಾ. ಆನಿ ತಶೆಂ ಸುಲಲಿತ್ ಜಾವ್ನ್ ವಾಳ್ಚೊ ವ್ಹಾಳೊಚ್ಚ್ ಕವಿತಾ.

ಕವಿತಾ ಬರಂವ್ಚಿಚ್ ತಶಿ. ಕವಿತಾ ಬರಂವ್ಚ್ಯಾ ಪಯ್ಲೆಂ ಕವಿನ್ ಬರಂವ್ಕ್ ಚಿಂತ್ಚ್ಯಾ ಕವಿತೆಚೊ ವಿಶಯ್ ಮತಿಂತ್ ಘೊಳಂವ್ಕ್ ಜಾಯ್. ಅಶೆಂ ಘೊಳಯ್ತಾನಾ ಕವಿ ತ್ಯಾ ವಿಶಯಾಚ್ಯಾ ಗುಂಡಾಯೆಕ್ ಆನಿ ಗುಂಡಾಯೆಕ್ ವೆತಾ. ಅಯಸ್ಕಾಂತಾ ಭಾಶೆನ್ ತ್ಯಾ ವಿಶಯಾಂ ಲಗ್ತಿಂ ಭೊಗ್ಣಾಂಚಿ ರಾಸ್‌ಚ್ಚ್ ಸಾಂಗಾತಾ ಮೆಳ್ತಾ. ಅಶೆಂ ತ್ಯಾ ಭೊಗ್ಣಾಂಚ್ಯಾ ಸಾಗೊರಾಚ್ಯಾ ಗೂಂಡಾಯೆಂತ್ ಬುಡೊನ್ ಆಸ್ತಾನಾ ಕವಿ ಥಂಯ್ ಅಸಲಿ ಏಕ್ ಘಡಿ ಉದೆತಾ ತಿ ಜಾವ್ನಾಸಾ ಕಾಟ್ ತುಟ್ಚೊ ವೇಳ್. ಆನಿ ಹ್ಯಾ ಕಾಟ್ ತುಟ್ಚ್ಯಾ ವೇಳಾ ಸಗ್ಳಿ ಕವಿತಾ ಕವಿಚ್ಯಾ ಮತಿಂತ್ ಸುಲಲಿತ್ ಜಾವ್ನ್ ವ್ಹಾಳೊನ್ ವೆತಾ. ಆನಿ ಜೆದ್ನಾ ಜರ್ ತೊ ಕವಿ ತಿ ಕವಿತಾ ತಿಂತೆರಾನ್ ಬರವ್ನ್ ಘಾಲಿತ್ ತರ್ ತಿ ಏಕ್ ಬರಿ ಕವಿತಾ ಜಾತಾ. ಪರತ್ ವಾಚ್ತಾನಾ ತ್ಯಾ ಕವಿಕ್ ತ್ಯಾ ಕವಿತೆಂತ್ ಬದ್ಲಾವಣ್ ಕರ್ಚೆಂ ಕಿತೆಂಚ್ ದಿಸೊನ್ ಯೇನಾ. ಕಿತ್ಯಾ ತೊ ಏಕ್ ಭಗ್ಣಾಂಚೊ ವ್ಹಾಳೊ ಉತ್ರಾಂ ರೂಪಾರ್ ವ್ಹಾಳೊನ್ ಆಯಿಲ್ಲೊ.

ಮನ್ ಮಜೆಂ ಪಿಶೆಂ ಜಾತಾ ಕವಿತೆಂತ್ ಕವಿ ಸೊರ್‍ಯಾಕ್ ಏಕಾ ಚೆಡ್ವಾಚಿ ಉಪಮಾ ದೀವ್ನ್ ತುಲನ್ ಕರ್ತಾ ಆನಿ ಮ್ಹಣ್ತಾ "ತುಜೆ ವೋಂಟ್ ಚಿಂವೊನ್ ಕಾಡ್ಚಿ ಆಶಾ ಜಾತಾ. ಫುಡೆಂ ತೊ ಅಶೆಂ ಮ್ಹಣ್ತಾ "ತುಜೆ ಗೊಪಾಂತ್ ಮರಣ್ ದೆಕ್ಚಿ ಆಶಾಚ್ ಜಯ್ತ್ ವರ್ತಾ." ಜರ್ ಸೊರ್‍ಯಾಚ್ಯಾ ಮೊಗಾರ್ ಪಡ್ಚೊ ದಾದ್ಲೊ ತ್ಯಾಚ್ ಭಾಶೆನ್ ಆಪ್ಲ್ಯಾ ಬಾಯ್ಲೆಚ್ಯಾ ಮೊಗಾರ್ ಪಡ್‌ಲ್ಲೊ ತರ್ ಕಿತ್ಲೆಂ ಬರೆಂ ಆಸ್ಲೆಂ?

"ನಾಚ್" ಏಕ್ ಭೋವ್ ಆಪುರ್ಭಾಯೆಚಿ ಕವಿತಾ. ನಾಚ್ ಕಶೆಂ ಘಡ್ತಾ ತೆಂ ಕವಿ ಅಶೆಂ ವರ್ಣಿತಾ.

’ಮೊಡಾಂ ನಕ್ತಿರಾಂ ಮಧೆಂ ಅಪಾಲಿಪಾ ಖೆಳೊನ್

ಚಂದ್ರಾ ಹೊರೆತ್ ದರ್ಯಾಕ್ ಗರ್ಭೆಸ್ತ್ ಕರ್ತಾನಾ

ನಾಚ್ ಘಡ್ತಾ.’

ಪುಣ್ ಹಾಯ್ ಕಟಾ ಕಟಾ. ನಾಚ್ ಕಸೊ ರಾವ್ತಾ ತೆಂ ಕವಿ ವರ್ಣಿನ್ ವಾಚ್ತಾನಾ ಲೋಂವ್ ಉಭಿ ಜಾತಾ

’ದರ್ಯಾ ಜಾಗ್ ವಾರ್‍ಯಾ ವೇಗ್

ಅಡ್ಕಳ್ಯಾಂನಿ ಅಸ್ತವ್ಯಸ್ತ್ ಜಲ್ಲ್ಯಾ ದಿಸಾ

ಗುಲೊಬಾಂತ್ಲೊ ಭೊಂವರ್ ನಂಯ್ತ್‌ಲೊ ತಿಗುರ್

ಭಲತ್ಕಾರಾನ್ ವಿಂಗಡ್ ಕರ್ಚೆಂ ಪ್ರಯತ್ನ್ ಚಲ್ತಾನಾ

ಜಿವಿತ್ ಫುಲಂವ್ಚೊ ಸೃಷ್ಠಿ ಚಲಂವ್ಚೊ ನಾಚ್ ರಾವ್ತಾ!!!’

"ಸಾಹಿತಿಚೆ ಸಂಕಷ್ಟ್" ಕವಿತೆಂತ್ ಕವಿ ವಾಚ್ಪ್ಯಾಕ್ ಪಕ್ವಾನ್ ವಾಂಟುನ್ ಆಪುಣ್ ಕಶೆಂ ನೀಸ್-ಪೇಜ್ ಪಾಸುನ್ ನಾಸ್ತಾನಾ ಭಾಗ್ಲಾಂ ತೆಂ ವರ್ಣಿತಾ.

’ವಾಚ್ತೆಲ್ಯಾಕ್ ನಾಚ್ತೆಲ್ಯಾಕ್ ಕಿತೆಂ ಕಳಿತ್

ಸಿಂತಿಮೆಂತಾಂನಿ ದುಃಖಾಂನಿ ಖಿರವ್ನ್

ಕೊಡು ಕಾಲ್ಸ್ ನಿರಾಳ್ ಪೊಟಾರ್ ಪಿಯೆವ್ನ್

ಮಾರ್‌ಲ್ಲಿಂ ಉತ್ರಾಂ ತೊಪ್‌ಲ್ಲೆ ಭಾಲೆ

ಝೆಲೆ ಕರ್ನ್ ಗಳ್ಯಾಕ್ ಘಾಲೆ’

ನಿಮಾಣೆ ಕವಿ ಅಶೆಂ ಮ್ಹಣ್ತಾ

ವಿಣ್ಗ್ಯಾ ಪಾಂಯಾನಿ ಪಾವ್ಲಾಂ ಉಮ್ಕಾಳ್ತಾತ್ ಕಾತಿ

ತರ್ನ್ಯಾ ತೊಂಡಾರೀ ಪಿಕ್ಯಾ ಖಾಡಾಚಿ ಕುತಿ!’

"ದೇಸಾಚೆ ಖಂತಿಂತ್" ಏಕ್ ನವೀನ್ ರಿತಿಚಿ ಕವಿತಾ. ಅಸಲ್ಯಾ ನವ್ಯ್ ರೀತಿಚ್ಯಾ ಜ್ಞಾನಾಂನಿ ಭರ್‌ಲ್ಲ್ಯಾ ಕವಿತೆಂಚಿ ಗರ್ಜ್ ಆಯ್ಚ್ಯಾ ಕೊಂಕ್ಣೆಕ್ ಗರ್ಜ್ ಆಸಾ. ಕವಿ ಮ್ಹಣ್ತಾ;

’ಮ್ಹಜ್ಯಾ ದೇಸಾಂತ್

ಸತಾಂಚಿ ಸುನ್ನತ್ ಜಾತಾ

ಫಟಿಂಚೆ ಘಾಂಟಿಕ್ ಕೊಂಡಮ್ ಶಿರ್ಕಾವ್ನ್

ನೀತಿಂಚೆರ್ ಸಂಬೋಗ್ ಚಲ್ತಾ

ಲೊಂಚಾಚೆ ಈದ್ರ್ ಪಿಯೆವ್ನ್

ಲೇಲೆ ಘಾಲುನ್ ದಾಂವ್ತಾ

ಹ್ಯಾ ದೇಸಾಚೊ ಪೊಲಿಟಿಕ್ಸ್

ತಾಚೆ ಪಾಟ್ಲ್ಯಾನ್

ಕೆಸಾಂಚಿಂ ಝಾಂಟಾ ಶಿರ್ಕಾಲ್ಲ್ಯಾ

ಲೆಗುನ್ ತಲ್ಕಾಂಬರಿಂ

ಕೋಡ್ತ್, ವಕಿಲ್, ಪೊಲಿಸ್.

ತ್ಯಾ ದೆಕುನ್ ಕವಿ ಜಾಗೊ ಜಾಲಾ

ಮಾನೆಸ್ತಾಂಕ್ ಡ್ರಗ್ಸಾಂತ್ ಬುಡಂವ್ನ್

ಗಿರೆಸ್ತಾಂಕ್ ಸೆಕ್ಸಾಂತ್ ನಿದಾಂವ್ನ್

ಗರೀಬಾಂಚಿ ರಕ್ಷಾ ಕರುಂಕ್ ತೊ ಆಜ್ ನಕ್ಸಲೈಟ್ ಜಾಲಾ.’

ಕವಿತೆಚೆಂ ಸಪಾಣ್ ಕವಿತೆಂತ್ ಕೊಂಕ್ಣೆಚ್ಯಾ ಮೋಗಾ-ಅಭಿಮಾನಾನ್ ಫುಗ್‌ಲ್ಲೊ ಕವಿ ಆಶಾವಾದಾನ್ ಅಶೆಂ ಮ್ಹಣ್ತಾ;

’ಸುರ್ಯಾಚೆಂ ಕೀರ್ಣ್ ಜಾಯ್ತ್ ಆಂದ್ಳೆಂ

ಚಂದ್ರಾಚೆಂ ಚಾಮ್ಡೆಂ ಜಾಯ್ತ್ ಸಾವ್ಳೆಂ

ಮೊಳಾಬ್ ರಾವಯ್ತ್ ಪಾವ್ಸಾ ಪಾವ್ಳೆ

ತರೀ ಕೊಂಕ್ಣಿ

ಭಾಸ್ ಲಿಪ್ಚಿನಾ, ಲಜೆರ್ ಪಡ್ಚಿನಾ

ದಣ್ಸಣೆಕ್ ಧಂಡಲ್ಚಿನಾ, ಹಿಣ್ಸೊಣೆಕ್ ರಡ್ಚಿನಾ

ಸ್ಥಾನ್-ಮಾನ್ ಹೊಗ್ಡಾಂವ್ಚಿನಾ

ಮಾಂಯ್‌ಭಾಸ್ ಕೆದಿಂಚ್ ಸರ್ಚಿನಾ

ಕೊಂಕ್ಣಿ ಭಾಸ್ ಕೆದಿಂಚ್ ಮೊರ್ಚಿನಾ’

ತಶೆಂಚ್ ಜಾಂವ್.

- ಆನ್ಸಿ ಪಾಲಡ್ಕಾ

ದಾಯ್ಜ್ ಕೊಂಕ್ಣಿ ಸಾಹಿತಿಕ್ ಸ್ಪರ್ಧೊ - 2006 [ಭಾಗ್ ಘೆಯಾ ಆನಿ 40,000 ರುಪ್ಯಾಂಚಿಂ ಇನಾಮಾಂ ಜೊಡಾ]

ಕೊಂಕ್ಣಿ ಸಾಹಿತ್ಯಾಂತ್ಲೆಂ ಅಮೊಲಿಕ್ ಸಾಹಿತ್ಯ್ ಆನಿ ಸಾಹಿತ್‌ಕಾರಾಂಕ್ ಪ್ರೋತ್ಸಾಹ್ ದಿಂವ್ಚಾ ಇರಾದ್ಯಾನ್, ದಾಯ್ಜ್.ಕೊಮ್ ಪಂಗ್ಡಾನ್ ಪಾಟ್ಲ್ಯಾ ದೋನ್ ವರ್ಸಾಂ (2004, 2005) ಥಾವ್ನ್ ಮಾಂಡುನ್ ಹಾಡ್‌ಲ್ಲೆಪರಿಂ ಹ್ಯಾ ವರ್ಸಾಚೊ ಸ್ಪರ್ಧೊ ’ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2006’ ಆಸಾ ಕರುಂಕ್ ಯೆವ್ಜಣ್ ಘಾಲ್ಯಾ. ಕಾನಡಿ ಲಿಪಿಯೆಂತ್ಲ್ಯಾ ಹ್ಯಾ ’ದಾಯ್ಜ್ ಸಾಹಿತಿಕ್ ಸ್ಪರ್ಧೊ’ ಹಾಂತುಂ ಎದೊಳ್‌ಚ್ ಕೊಂಕ್ಣೆಚಾ ಪ್ರತಿಭಾವಂತ್ ತಶೆಂಚ್ ಉದೆವ್ನ್ ಯೆಂವ್ಚಾ ಸಾಹಿತಿಂನಿ ಭಾಗ್ ಘೆವ್ನ್ ’ಸಾಠ್ ಹಜಾರ್’ ರುಪ್ಯಾಂಚಿಂ ಇನಾಮಾಂ ಆಪ್ಣಾಯ್ಲ್ಯಾಂತ್. ಹ್ಯಾ ವರ್ಸಾಚೊ ಸ್ಪರ್ಧೊ ’ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2006’ ಕೊಂಕ್ಣೆಂತ್ಲ್ಯಾ ವಿಂಚ್ಣಾರ್ ಸಾಹಿತಿಂಕ್ ಪ್ರೋತ್ಸಾಹ್ ಕರ್ಚಾ ಇರಾದ್ಯಾನ್ ಆಮಿ ಹ್ಯಾ ಸಕಯ್ಲ್ಯಾ ವಿಭಾಗಾಂನಿ ಆಸಾ ಕೆಲಾ;

1. ಲೇಖನ್ ಬರಂವ್ಚೊ ಸ್ಪರ್ಧೊ [ವಿಶಯ್: ಕೊಂಕ್ಣಿ ಪ್ರಕಾಶನಾಂ ಆನಿ ಬೂಕ್] (ಫುಲ್ ಸ್ಕೇಪಾಚಾ 4-6 ಪಾನಾಂಕ್ ಮಿಕ್ವನಾಯೆ)

2. ಮಟ್ವಿ ಕಾಣಿ ಬರಂವ್ಚೊ ಸ್ಪರ್ಧೊ (ಫುಲ್ ಸ್ಕೇಪಾಚಾ 8 ಪಾನಾಂಕ್ ಮಿಕ್ವನಾಯೆ)

3. ಕವಿತಾ ಬರಂವ್ಚೊ ಸ್ಪರ್ಧೊ (ಫುಲ್ ಸ್ಕೇಪಾಚಾ 1-2 ಪಾನಾಂಕ್ ಮಿಕ್ವನಾಯೆ)

ಹರ್‍ಯೆಕಾ ವಿಭಾಗಾಂನಿ ಹಿ ಇನಾಮಾಂ ಆಸ್ತೆಲಿಂ;

ಪಯ್ಲೆಂ ಇನಾಮ್ ರು.5000 (ಭಾರತೀಯ್ ರುಪಯ್ ಪಾಂಚ್ ಹಜಾರ್ ಮಾತ್ರ್)

ದುಸ್ರೆಂ ಇನಾಮ್ ರು.3000 (ಭಾರತೀಯ್ ರುಪಯ್ ತೀನ್ ಹಜಾರ್ ಮಾತ್ರ್)

ತಿಸ್ರೆಂ ಇನಾಮ್ ರು.2000 (ಭಾರತೀಯ್ ರುಪಯ್ ದೋನ್ ಹಜಾರ್ ಮಾತ್ರ್)

ಭುಜಾವಣೆಚಿಂ ಇನಾಮಾಂ - 3 [ಭಾರತೀಯ್ ರುಪಯ್ 1000 ಮೊಲಾಚೆ ಕೊಂಕ್ಣಿ ಬೂಕ್ ಆನಿ ಪ್ರಶಸ್ಥಿ ಪತ್ರ್]

ರೆಗ್ರೊ:

1. ಹ್ಯಾ ಸ್ಪರ್ಧ್ಯಾಂತ್ ಕೊಣೆಂಯ್ ಭಾಗ್ ಘೆವ್ಯೆತ್. ಪುಣ್ ಎಕ್ಲ್ಯಾನ್ ಎಕಾ ವಿಭಾಗಾಂತ್ ಎಕ್‌ಚ್ಚ್ ಬರಾಪ್ ಧಾಡ್ಯೆತಾ.
2. ಬರಾಪ್ ಬರವ್ಪ್ಯಾಚೆಂ ಸ್ವಂತ್ ಆಸೊನ್ ಎದೊಳ್ ಖಂಯ್ಸರ್‌ಯೀ ಪರ್ಗೊಟೊಂಕ್ ನಾತ್‌ಲ್ಲೆಂ ವಾ ಪರ್ಗಟ್ಣೆಕ್ ದೀನಾತ್‌ಲ್ಲೆಂ ಜಾವ್ನ್ ಆಸೊಂಕ್ ಜಾಯ್.
3. ಬರ್ಪಾಂ ಧಾಡುಂಕ್ ಅಖ್ರೇಚಿ ತಾರಿಕ್ ದಸೆಂಬ್ರ್ 31, 2006 ಇಸ್ವಿ.
4. ಬರವ್ಪ್ಯಾನ್ ಆಪ್ಲೆಂ ನಾಂವ್, ವಿಳಾಸ್ ಆನಿ ಏಕ್ ತಸ್ವೀರ್ ವೆಗ್ಳ್ಯಾಚ್ಚ್ ಪೆಪರಾಂತ್ ಬರವ್ನ್ ಧಾಡ್ಚೆಂ. (ಹ್ಯಾ ಅಧ್ಲ್ಯಾ ದಾಯ್ಜ್ ಸಾಹಿತಿಕ್ ಸ್ಪರ್ಧ್ಯಾಕ್ ತಸ್ವೀರ್ ಧಾಡ್ಲೆಲ್ಯಾಂನಿ ಪರತ್ ತಸ್ವೀರ್ ಧಾಡಿಜಾಯ್ ಮ್ಹಣ್ ನಾ, ಪುಣ್ ತಸ್ವೀರ್ ಧಾಡಿನಾತ್‌ಲ್ಲಿಂ ಬರ್ಪಾಂ ಆಮಿಂ ಲೆಖಾಕ್ ಧರಿನಾಂವ್)
5. ರೆಗ್ರೊ ಪಾಳಿನಾತ್‌ಲ್ಲಿಂ ವಾ ಬರ್ಪಾಸವೆಂ ಬರವ್ಪ್ಯಾಚೆಂ ನಾಂವ್ ಆಸ್‌ಲ್ಲಿಂ ಬರ್ಪಾಂ ಆಮಿಂ ಸ್ಪರ್ಧ್ಯಾಕ್ ಘೆಂವ್ಚಿಂನಾಂವ್.
6. ಸ್ಪರ್ಧ್ಯಾ ಬಾಬ್ತಿಂ ಕಸಲ್ಯಾಚ್ ಪತ್ರ್‌ವೆವ್ಹಾರಾಕ್ ಆವ್ಕಾಸ್ ಆಸ್ಚೊನಾ.
7. ಬರ್ಪಾಂಕ್ ವ್ಹೊರಾವ್ಣಿ ಕರ್ಚಿ ಜವಾಬ್ಧಾರಿ ’ದಾಯ್ಜ್ ವ್ಹೊರಾಯ್ಣಾರಾಂಚಿ’ ಆನಿ ಇನಾಮಾಂ ಜಿಕ್ಪ್ಯಾಂಚಿಂ ನಾಂವಾಂ ಸಾಯ್ಟಾಂನಿ ತಶೆಂಚ್ ಕೊಂಕ್ಣಿ ಪತ್ರಾಂನಿ ಪರ್ಗಟ್ ಜಾತೆಲಿಂ.
8. ಇನಾಮಾಂ ಜಿಕ್‌ಲ್ಲಿಂ ಬರ್ಪಾಂ ಆಮಿಂ ದಾಯ್ಜ್ ಸಾಯ್ಟಿಚೆರ್, ಮಿತ್ರ್ ಹಾಫ್ತ್ಯಾಳ್ಯಾಚೆರ್ ತಶೆಂಚ್ ದಾಯ್ಜ್ ವಿಶೇಷ್ ಅಂಕೊ 2007 ಹಾಂತುಂ ಪರ್ಗಟ್ ಕರ್ತೆಲ್ಯಾಂವ್. 
9. ಬರ್ಪಾಂ ಧಾಡುಂಕ್ ವಿಳಾಸ್: DAAIZ LITERARY COMPETITION 2006. C/O Mithr Konkanni Weekly, Saangaathi Media, 23 3rd Floor, Emporium Complex, Kankanady, Mangalore 575 002. ಯಾ ಇಮೇಯ್ಲಾ ಮುಖಾಂತ್ರ್ ಬರ್ಪಾಂ ಧಾಡುಂಕ್ ವಿಳಾಸ್ daaiz@daaiz.com.
10. ಇನಾಮಾಂ ಜಿಕ್ಪ್ಯಾಂಚಿಂ ನಾಂವಾಂ ಆಮಿಂ 2007 ಇಸ್ವೆಚಾ ಎಪ್ರಿಲಾಂತ್ ಪರ್ಗಟ್ ಕರ್ತೆಲ್ಯಾಂವ್ ತಶೆಂಚ್ ತಾಂಕಾಂ ಇನಾಮಾಂ ಮಾಯ್/ಜೂನ್ ಮಯ್ನ್ಯಾಂತ್ ದಿತೆಲ್ಯಾಂವ್.

ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2004

ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2005

ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed, hosted and maintained by Ashawadi Publications