News - Daaiz

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ -’ದಾಯ್ಜ್ ’-ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2005 ಹಾಚೆಂ ಪೋಶಕ್‌ಪಣ್ ಘೆತ್ಲಾಂ - ಆಶಾವಾದಿ ಪ್ರಕಾಶನ್. ಹಾಂಕಾಂ ದೇವ್ ಬರೆಂ ಕರುಂ.

ದಾಯ್ಜ್ ಸಾಹಿತಿಕ್ ಸ್ಪರ್ಧೊ - 2005 ಫಳಿತಾಂಶ್

ಮಟ್ವ್ಯಾ ಕಾಣ್ಯಾಂಚೊ ವಿಭಾಗ್: (ಸ್ಪರ್ಧ್ಯಾಕ್ ಆಯಿಲ್ಲ್ಯೊ ಕಾಣ್ಯೊ 21)

ಎಚ್ಚೆಮ್, ಮುಂಬಯ್

[ಪಯ್ಲೆಂ ಇನಾಮ್ Rs.5000]

[ಕಾಣಿ: ನಶಿಬಾಚಿ ರಾತ್]

ಡಾ|ಎಡ್ವರ್ಡ್ ನಜ್ರೆತ್

[ದುಸ್ರೆಂ ಇನಾಮ್ Rs.3000]

[ಕಾಣಿ: ಜುಬ್ಲೆವ್]

ಕೆವಿನ್ ಡಿ’ಮೆಲ್ಲೊ

[ತಿಸ್ರೆಂ ಇನಾಮ್ Rs.2000]

[ಕಾಣಿ: ಅನ್ವೇಷಣ್]

ಲೇಖನಾಂಚೊ ವಿಭಾಗ್: [ವಿಶಯ್: ಆಯ್ಚೊ ಕೊಂಕ್ಣಿ ಲೋಕ್ ಆನಿ ಕೊಂಕ್ಣಿ ಪರಿಗತ್] (ಸ್ಪರ್ಧ್ಯಾಕ್ ಆಯಿಲ್ಲಿಂ ಲೇಖನಾಂ 10)

[ಪಯ್ಲೆಂ ಇನಾಮ್ Rs.5000]

[ಸ್ಪರ್ಧ್ಯಾಚೊ ರೆಗ್ರೊ ಪಾಳುಂಕ್ ನಾತ್‌ಲ್ಲ್ಯಾನ್ ರದ್ದ್ ಕೆಲಾಂ]

ಡಾ|ಎಡ್ವರ್ಡ್ ನಜ್ರೆತ್

[ದುಸ್ರೆಂ ಇನಾಮ್ Rs.3000]

ಲೇಖನ್

ಸ್ಟೀವನ್ ಕ್ವಾಡ್ರಸ್, ಪೆರ್ಮುದೆ

[ತಿಸ್ರೆಂ ಇನಾಮ್ Rs.2000]

ಲೇಖನ್

ಕವಿತಾಂಚೊ ವಿಭಾಗ್: (ಸ್ಪರ್ಧ್ಯಾಕ್ ಆಯಿಲ್ಲಿಂ ಕವಿತಾ 23)

ಎಚ್ಚೆಮ್, ಮುಂಬಯ್

[ಪಯ್ಲೆಂ ಇನಾಮ್ Rs.5000]

[ಕವಿತಾ: ಮಾತ್ಯೆಚೆಂ ರುದಾನ್]

ಮೆಲ್ವಿನ್ ಪಿಂಟೊ, ನೀರುಡೆ

[ದುಸ್ರೆಂ ಇನಾಮ್ Rs.3000]

[ಕವಿತಾ: ದುಕಾಳ್ ಗಿತಾಂ ಆನಿ..]

ವಿಲ್ಸನ್ ಕಟೀಲ್

[ತಿಸ್ರೆಂ ಇನಾಮ್ Rs.2000]

[ಕವಿತಾ: ಏಕ್ ಕವಿತಾ ಅಶಿ]

ಸ್ಪರ್ಧ್ಯಾಚೆ ವ್ಹೊರಾಯ್ಣಾರ್: (ತುಮ್ಕಾಂ ಸಮೇಸ್ತಾಂಕ್ ದೇವ್ ಬರೆಂ ಕರುಂ):

ವ್ಹೊರಾಯ್ಣಾರಾಂಚೊ ಶರೊ:

2005 ವರ್ಸಾಂಚೊ ದಾಯ್ಜ್ ಸಾಹಿತಿಕ್ ಸ್ಪರ್ಧೊ:

2004 ವರ್ಸಾಂಚಾ ದಾಯ್ಜ್ ಸಾಹಿತಿಕ್ ಸ್ಪರ್ಧ್ಯಾಕ್ 2005 ವರ್ಸಾಂಚಾ ಸ್ಪರ್ಧ್ಯಾಕ್ ತುಲನ್ ಕರ್ತಾನಾ ಖಂಡಿತ್ ಜಾವ್ನ್ ಭೋವ್ ಸಂತೊಸ್ ಜಾತಾ, ಪಯ್ಲೆಂ ಹ್ಯಾ ಸ್ಪರ್ಧ್ಯಾಕ್ ಆಯಿಲ್ಲ್ಯಾ ಬರ್ಪಾಂಚೆಂ ಸಾಹಿತಿಕ್ ಮಟ್ಟ್, ದುಸ್ರೆಂ ಕೊಂಕ್ಣೆಂತ್ಲೆ ನಾಮ್ಣೆಚಾ ಸಾಹಿತಿಂನಿ ಭಾಗ್ ಘೆತ್ಲಾ. ತಾಚೆಸವೆಂ ಏಕ್ ನಿರಾಶೆಚಿ ಗಜಾಲ್ ಖಂಯ್ಚಿಗೀ ಮ್ಹಳ್ಯಾರ್ ಹ್ಯಾ ಸ್ಪರ್ಧ್ಯಾಕ್ ಲಗ್ಭಗ್ ಸಾಟ್ ಬರವ್ಪ್ಯಾಂನಿ ಭಾಗ್ ಘೆತ್ಲಾ ತರ್‌ಯ್ ಆಪ್ಲ್ಯಾ ಬರ್ಪಾಸವೆಂ ’ದಾಯ್ಜ್ ವಾವ್ರಾಡಿ 2005’ ಪ್ರಶಸ್ತೆಕ್ ಆನಿ 10000 ರುಪ್ಯಾಂಚಾ ಇನಾಮಾಕ್ ಜೊಕ್ತೆ ಮ್ಹಣ್ ದಿಸ್ಚಾ ಯುವಜಣಾಂಕ್ ವಳ್ಕೊಂಕ್ ಸಕ್‌ಲ್ಲೆ ಫಕತ್ ದೋಗ್ ಮಾತ್ರ್!!

ಆಮ್ಚಾ ಬರವ್ಪ್ಯಾಂಚಿ ನದರ್‌ಚ್ ಜೆನ್ನಾ ಆಪ್ಲ್ಯಾ ತಳಾಥಾಪರ್‍ಯಾಂತ್ ಆಸಾ ತರ್ ಹೆರಾಂಕ್ ಕಶೆಂ ದುರ್ಸೊಂವ್ಚೆಂ? ಆಮ್ಚಾ ಕೊಂಕ್ಣೆಂತ್ ಉರ್ಭೆಂತ್ ವಾವ್ರ್ ಕರ್ನ್ ಆಸ್ಚೆ ಸಭಾರ್ ಯುವಜಣ್ ಆಸತ್, ಕೊಂಕ್ಣೆಚಿ ಜರ್ ನೀಜ್ ಬರೆಂಪಣ್ ಜಾಯ್ಜಯ್ ತರ್ ಅಸಲ್ಯಾ ಉರ್ಭೆವಂತಾಂಚಿ ಕೊಂಕ್ಣೆಕ್ ಭೋವ್ ಗರ್ಜ್ ಆಸ್ತಾನಾ ಹಿ ಕಸಲಿ ಜೆಮ್ ಆಮ್ಚಾ ಬರವ್ಪ್ಯಾಂಕ್ ತೆಂ ಮ್ಹಾಕಾ ಸಮ್ಜಾನಾ. ಜೊಕ್ತಿಂ ನಾಂವಾಂ ಯೇಂವ್ಕ್ ನಾತ್‌ಲ್ಲ್ಯಾನ್ ಆಮಿ ’ದಾಯ್ಜ್ ವಾವ್ರಾಡಿ 2005’ ಪ್ರಶಸ್ತಿ ಹ್ಯಾ ಪಾವ್ಟಿಂ ರದ್ದ್ ಕೆಲಾ.

ಸ್ಪರ್ಧ್ಯಾಕ್ ಬರ್ಪಾಂ ಧಾಡ್‌ಲ್ಲ್ಯಾ ಸಭಾರಾಂನಿ ಸ್ಪರ್ಧ್ಯಾಚೊ ರೆಗ್ರ್ಯೊ ಪಾಳುಂಕ್ ನಾಂತ್, ಥೊಡ್ಯಾಂನಿ ತಸ್ವೀರ್ ಧಾಡುಂಕ್ ನಾಂತ್ ತರ್ ಥೊಡ್ಯಾಂನಿ ಗರ್ಜೆಭಾಯ್ಲ್ಯೊ ತಸ್ವೀರ್‍ಯೊ ಅಪ್ಲ್ಯಾ ಬರ್ಪಾಂಸವೆಂ ಲಗ್ತಿ ಕೆಲ್ಯಾತ್ - ಉಡಾಸ್ ಆಸೊಂ - ಸಾಹಿತ್ಯ್ ಲಿಖಿತಾಂತ್ ಆಸ್ತಾ ಶಿವಾಯ್ ಪಿಂತುರಾಂನಿ ನ್ಹಯ್, ದೆಖುನ್ ಆಮಿ ಸೊಭಾಯೆಕ್ ಚಡ್ ಪ್ರಾಮುಖ್ಯತಾ ದಿಂವ್ಚಾ ಬದ್ಲಾಕ್ ಬರ್ಪಾಚಾ ಮೌಲ್ಯಾಂಕ್ ಚಡಿತ್ ಮಹತ್ವ್ ದೀಂವ್ಕ್ ಜಾಯ್. ರೆಗ್ರೊ ಪಾಳುಂಕ್ ನಾಂತ್ ತರ್‌ಯ್ ಆಮಿ ಹ್ಯಾಪಾವ್ಟಿಂಯ್ ಇಲ್ಲಿ ಸೊಡ್‌ದೊಡ್ ಕರ್ನ್ ಜೊಕ್ತೆಂ ಇನಾಮ್ ಫಾವೊ ಜಾಲ್ಲ್ಯಾಂಕ್ ತಿಂ ಇನಾಮಾಂ ದಿಲ್ಯಾಂತ್. ಪುಣ್ ಲೇಖನ್ ಸ್ಪರ್ಧ್ಯಾಂಕ್ ಇನಾಮಾಂ ಜೊಡ್‌ಲ್ಲ್ಯಾನಿ ರೆಗ್ರೊ ಪಾಳುಂಕ್ ನಾಂತ್, ಇತ್ಲೆಂಚ್ ನ್ಹಯ್, ದಿಲ್ಲೊ ವಿಶಯ್ ಘುಂವ್ಡಾಯ್ಲಾ ದೆಖುನ್ ಪಯ್ಲೆಂ ಇನಾಮ್ ಆಮಿಂ ಹ್ಯಾ ಪಾವ್ಟಿಂ ರದ್ದ್ ಕೆಲಾಂ.

ಕಾಣ್ಯಾಂಚೊ ವಿಭಾಗ್ ಭೋವ್ ಆತುರಾಯೆಚೊ ಜಾಂವ್ಕ್ ಪಾವ್ಲೊ, ಕೊಂಕ್ಣೆಂತ್ ಮಟ್ವ್ಯಾ ಕಾಣ್ಯಾಂಕ್ ಫಾಮಾದ್ ಜಾಲ್ಲ್ಯಾ ಚಡ್ತಾವಾಂನಿ ಅಪ್ಲ್ಯೊ ಕಾಣ್ಯೊ ಧಾಡ್‌ಲ್ಲ್ಯೊ, ಇನಾಮಾಂ ಜೊಡ್‌ಲ್ಲ್ಯಾ ಕಾಣ್ಯಾಂಕ್ ತಶೆಂಚ್ ಶಿಫಾರಸೆಕ್ ಪಾತ್ರ್ ಜಾಲ್ಲ್ಯಾ ಕಾಣ್ಯ್ಂಕ್ ಭಾರಿಚ್ ಉಣೊ ಅಂತರ್ ಆಸಾ ಮ್ಹಳ್ಳೆಂ ಫುಡೆಂ ತ್ಯೊ ಕಾಣ್ಯೊ ವಾಚ್ತಾನಾಂಚ್ ತುಮ್ಕಾಂ ಗೊಮ್ತೆಲೆಂ. 

ಶರೊ: ಕೊಂಕ್ಣಿ ಸಾಹಿತ್ಯಾಚೆಂ ಮಟ್ಟ್ ಜರ್ ಉಂಚಾಯೆಕ್ ಪಾವಾಜಯ್ ತರ್ ಕಸಲಿಂಚ್ ಪಿಸಾಂಟ್ ಸಿಂತಿಮೆಂತಾಂ ಆಸಾನಾಯೆ ಮ್ಹಳ್ಳ್ಯಾ ಇರಾದ್ಯಾನ್ ಹ್ಯಾ ಸ್ಪರ್ಧ್ಯಾಂತ್ ಭಾಗ್ ಘೆಂವ್ಕ್ ಕೊಣಾಕ್‌ಯ್ ಕಸಲಿಚ್ ಬಂದಡ್ ಘಾಲುಂಕ್ ನಾ, ಫುಡೆಂಯ್ ಘಾಲಿನಾಂವ್. ಹೊ ಏಕ್ ಸ್ಪರ್ಧೊ ಉಗ್ತೊ ದೆಖುನ್ ಕೊಣೆಂಯ್ ಹ್ಯಾ ಸ್ಪರ್ಧ್ಯಾಂತ್ ಭಾಗ್ ಘೆವ್ಯೆತಾ.. ಆಮ್ಚೊ ಸ್ಪರ್ಧೊ ತಾಲೆಂತಾಚೊ ಶಿವಾಯ್ ಹೆರ್ ಕಸಲ್ಯಾಯ್ ಸಂಗ್ತೆಚೊ ನ್ಹಯ್.

ದಾಯ್ಜ್ ಸಾಹಿತಿಕ್ ಸ್ಪರ್ಧ್ಯಾಚಿ ವಾಂಟ್ಣೆಚೆಂ ಕಾರ್‍ಯೆಂ ಮಾಯ್ ಮಯ್ನ್ಯಾಚಾ 20 ತಾರಿಕೆರ್ ಅತ್ತೂರ್ ಫಿರ್ಗಜೆಂತ್ ಚಲೊಂಕ್ ಆಸ್ಚಾ ಕಾರ್ಕೊಳ್ ವಾರಾಡ್ಯಾಚಾ ಸಾಹಿತಿಕ್ ಶಿಭಿರಾವೆಳಾರ್ ಆಸ್ತೆಲೆಂ. ಇನಾಮಾಂ ಜಿಕ್ಪ್ಯಾಂಕ್ ಇನಾಮಾಚೊ ಐವಜ್ ತಶೆಂಚ್ ಶಿಫಾರಸ್ ಪತ್ರ್ (ಸರ್ಟಿಫಿಕೆಟ್) ಮೆಳ್ತೆಲಿ. ಸ್ಪರ್ಧ್ಯಾಂಕ್ ಪಾತ್ರ್ ಘೆತ್‌ಲ್ಲ್ಯಾ ವಿಂಚ್ಣಾರ್ ಬರವ್ಪ್ಯಾಂಕ್ ಶಿಫಾರಸ್ ಪತ್ರ್ (ಸರ್ಟಿಫಿಕೆಟ್) ಮೆಳ್ತೆಲಿ.

ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2005 ಚಿಂ ವಿಂಚ್ಣಾರ್ ಬರ್ಪಾಂ ದಾಯ್ಜ್ ಸಾಯ್ಟಿಚೆರ್, ಮಿತ್ರ್ ಹಾಫ್ತ್ಯಾಳ್ಯಾಚೆರ್ ತಶೆಂಚ್ ದಾಯ್ಜ್ ವಿಶೇಷ್ ಅಂಕೊ 2005 ಚೆರ್ ತುಮ್ಕಾಂ ವಾಚುಂಕ್ ಮೆಳ್ತೆಲಿಂ. ಹ್ಯಾ ಸ್ಪರ್ಧ್ಯಾಕ್ ಪಾಟಿಂಬೊ ದಿಲ್ಲ್ಯಾ ಸರ್ವಾಂಕ್ ದೇವ್ ಬರೆಂ ಕರುಂದಿ, ಸಾಂಗಾತಿ ಮೀಡಿಯಾಕ್ ಪ್ರತ್ಯೇಕ್‌ಪಣಿ ವಿತೊರಿ ಕಾರ್ಕಳ್ ಹಾಕಾ, ದಾಯ್ಜ್ ಸಹ-ಸಂಪಾದಕ್ ಮೆಲ್ವಿನ್ ಜೆ. ವಾಸ್ ಹಾಕಾ, ತಶೆಂಚ್ ಸಮೇಸ್ತ್ ವ್ಹೊರಾಯ್ಣಾರಾಂಕ್ ದೇವ್ ಬರೆಂ ಕರುಂ..

- ವಲ್ಲಿ ಕ್ವಾಡ್ರಸ್, ಅಜೆಕಾರ್

ದಾಯ್ಜ್ ಕವಿತಾ ಸ್ಪರ್ಧೊ - ಸೊಭಾಯೆಚಿ ವೋಡ್ತ್:

2005 ಇಸ್ವೆಚಾ ದಾಯ್ಜ್ ಸ್ಪರ್ದ್ಯಾಚಿಂ ಕವಿತಾಂ ವಾಚುನ್ ಅಸ್ತಾನಾ ಎಕಾ ಸೊಭಾಯೆಚಾ ವೊಡ್ತಾಕ್ ಪಾವ್‌ಲ್ಲೊ ಸುಖಾಳ್ ಅನ್ಭೊಗ್ ಜಾಲೊ. ವೆವೆಗ್ಳ್ಯಾ ಫುಲಾಕ್ ವೆವೆಗ್ಳೊ ಫರ್‍ಮಳ್. ಕೊಂಕ್ಣಿ ಕವಿತಾ ಫುಲೊನ್ ಫರ್ಮಳೊಂಕ್ ಲಾಗ್ಲ್ಯಾ. ಕೊಂಕ್ಣಿ ಕವಿತೆಚಾ ವ್ಹಾಡಾವಳಿಚಿಂ ಖುಣಾಂ ಸ್ವಶ್ಟ್ ದಿಸ್ತಾತ್. 

ಕವಿ ಜಿಣ್ಯೆಚೊ ಅನ್ಭೊಗ್ ಆಪ್ಣಾಭಿತರ್ ಅಟವ್ನ್, ಜಿರವ್ನ್ ತ್ಯಾ ಅನ್ಭೊಗಾಕ್ ಪುನರ್ ಜನ್ಮ್ ಆನಿ ನವೆಂಚ್ ರೂಪ್ ದಿತಾ. ಹ್ಯಾಚ್ ಖಾತಿರ್ ಕವಿತಾ ಕವಿಚಾ ವೆಕ್ತಿತ್ವಾಚಿ ವಳೊಕ್ ಕರ್ನ್ ದಿತಾ. ಜಿಣ್ಯೆಚಾ ಗುಂಡಾಯೆಕ್ ತೀಳ್ನ್ ಪಳೆಂವ್ಚೆಂ ಮನ್ ಆನಿ ಧಯ್ರ್ ಘೆತ್‌ಲ್ಲ್ಯಾ ಕವಿಂಚಿ ಕವಿತಾ ಮ್ಹಜಾ ಕಾಳ್ಜಾಕ್ ನಾಟ್ವಲ್ಯಾಂತ್. ದಾಖ್ಲ್ಯಾಕ್ "ಮಾತ್ಯೆಚೆಂ ರುದಾನ್". ಜಿಣ್ಯೆಚಾ ಅನ್ಭೊಗಾಕ್ ಆನಿ ಕಾವ್ಯಾಳ್ ಅನ್ಭೊಗಾಕ್ ಫರಕ್ - ಕವಿನ್ ಆಪ್ಲ್ಯಾ ಅನ್ಭೊಗಾಕ್ ದಿಂವ್ಚಿ ಅಲಂಕಾರಿಕ್ ಸೊಭಾಯ್. "ದುಕಾಳ್ ಗಿತಾಂ ಆನಿ..." ಕವಿತೆಂತ್ ಕವಿನ್ ವಿಂಚ್‌ಲ್ಲ್ಯೊ ವೆವೆಗ್ಳ್ಯೊ ಇಮಾಜ್ಯೊಚ್ ಕವಿತೆಚೊ ತಾಳೊ ಜಾವ್ನ್ ಉಲಂವ್ಚೊ ದಿಸ್ತಾತ್. ಕವಿಚ್ ಸಮಾಕಾಲೀನ್ ಪ್ರಜ್ನಾಂಯ್ ಕವಿತೆಂತ್ ಪರ್ಜಳ್ತಾ. 

ಸ್ಪೂರ್ತಿ ಆನಿ ಭುದ್ವಂತ್ಕಾಯೆಚೆಂ ಮಿಲನ್ ಕವಿತೆಂತ್ ಘಡ್ತಾನಾ ಕಾವ್ಯೆಂ "ಏಕ್ ಕವಿತಾ ಅಶಿ" ಕವಿತಾಪರಿಂ ಬಳ್ವಂತ್ ಜಾತಾ. ಎಕಾ ಕವಿತಾಚಿ ಠರಾವಣ್ ಉಂಚ್ಲಿ ಆಸ್ಲ್ಯಾರ್‌ಯಿ, ಕವಿನ್ ಭುದ್ವಂತ್ಕಾಯ್ ವಾಪರ್ನ್ ಅಭಿವ್ಯಕ್ತೆಕ್ ಬಳ್ ದೀನಾ ತರ್ ಕವಿತಾ ವೆಗ್ಗಿಂ ಬಾವ್ತಾ. ಸ್ಪರ್‍ಧ್ಯಾಕ್ ಆಯಿಲ್ಲ್ಯಾ ಥೊಡ್ಯಾ ಕವಿತೆ ಥಂಯ್ ಅಶೆಂ ಘಡ್ಲಾಂ. ಭುದ್ವಂತ್ಕಾಯೆಚೆಂ ಚಡ್ ಪ್ರದರ್ಶನ್ ಕರ್‍ನ್, ತಂತ್ರಚಾ ತ್ರಪ್ತೆಖಾತಿರ್ ಚಡಿತ್ ಧ್ಯಾನ್ ದಿತಾನಾ ಕಾವ್ಯಾಚಾ ತೀರ್ಳಾಚೆಂ ಮೊಲ್ ಉಸ್ಳಾನಾತ್‌ಲ್ಲ್ಯಾಪರಿಂ ಪಳೆಂವ್ಚೆಂ ಗರ್‍ಜೆಚೆಂ. 

ನಿಮಾಣೆಂ, ಶಿಕಾಪ್, ಜ್ನಾನ್ ಕವಿತೆಂತ್ ದೆಂವವ್ನ್ ಸಂಕೀರ್‍ಣ್ ಕವಿತಾ ಬರಂವ್ಕ್ ಆಶೆತೆಲ್ಯಾಂಕ್ ಮ್ಹಜೆಂ ಏಕ್ ಸವಾಲ್. ತುಮ್ಚಿ ಕವಿತಾ ಕೊಣಾ ಖಾತಿರ್? 

- ಆಂಡ್ರು ಎಲ್. ಡಿ’ಕುನ್ಹಾ, ಕಿನ್ನಿಕಂಬ್ಳ

ದಾಯ್ಜ್ ಸಾಹಿತಿಕ್ ಸ್ಪರ್ಧೊ - 2005

ದಾಯ್ಜ್ (ಬೆಳ್ಳೆವಿಶನ್ ಗ್ಲೋಬಲ್ ಪಂಗ್ಡಾಚೆಂ ಕೊಂಕ್ಣಿ ಮಿಸಾಂವ್) ಅಪ್ಲೊ ದುಸ್ರೊ ಕನ್ನಡ ಲಿಪಿಯೆಚೊ ಕೊಂಕ್ಣಿ ಸಾಹಿತಿಕ್ ಸ್ಪರ್ಧೊ ’ದಾಯ್ಜ್ ಸಾಹಿತಿಕ್ ಸ್ಪರ್ಧೊ - 2005’ ಆಸಾ ಕರುಂಕ್ ಭೋವ್ ಚಡ್ ಅಭಿಮಾನ್ ಆನಿ ಸಂತೊಸ್ ಪಾವ್ತಾ. ತಶೆಂಚ್ ಕೊಂಕ್ಣಿ ಸಾಹಿತ್ಯ್/ಪತ್ರಿಕೋಧ್ಯಮಾಂತ್ ವಿಶೇಷ್ ರಿತಿನ್ ವಾವ್ರ್ ಕರ್ಚಾಕ್ ’ದಾಯ್ಜ್ ಕೊಂಕ್ಣಿ ವಾವ್ರಾಡಿ 2005’ ಪ್ರಶಸ್ಥಿಕ್ ಉಲೊ ದಿತಾ. ತೀಸ್ ಹಜಾರ್ ರುಪ್ಯಾಂಚೊ ’ದಾಯ್ಜ್ ಸಾಹಿತಿಕ್ ಸ್ಪರ್ಧೊ’ ಕೊಂಕ್ಣೆಂತ್ಲ್ಯಾ ವಿಂಚ್ಣಾರ್ ಸಾಹಿತ್ಯಾಕ್ ಪ್ರೋತ್ಸಾಹಿತ್ ಕರ್ಚಾ ಇರಾದ್ಯಾನ್ ಹ್ಯಾ ಸಕಯ್ಲ್ಯಾ ವಿಭಾಗಾಂನಿ ಆಸಾ ಕೆಲಾ;

1. ಲೇಖನ್ ಬರಂವ್ಚೊ ಸ್ಪರ್ಧೊ [ವಿಶಯ್: ಕೊಂಕ್ಣಿ ಭಾಸ್ ಆನಿ ಲಿಪಿ] (ಫುಲ್ ಸ್ಕೇಪಾಚಾ 4-6 ಪಾನಾಂಕ್ ಮಿಕ್ವನಾಯೆ)

2. ಮಟ್ವಿ ಕಾಣಿ ಬರಂವ್ಚೊ ಸ್ಪರ್ಧೊ (ಫುಲ್ ಸ್ಕೇಪಾಚಾ 8 ಪಾನಾಂಕ್ ಮಿಕ್ವನಾಯೆ)

3. ಕವಿತಾ ಬರಂವ್ಚೊ ಸ್ಪರ್ಧೊ (ಫುಲ್ ಸ್ಕೇಪಾಚಾ 1-2 ಪಾನಾಂಕ್ ಮಿಕ್ವನಾಯೆ)

ಹರ್‍ಯೆಕಾ ವಿಭಾಗಾಂನಿ ಹಿ ಇನಾಮಾಂ ಆಸ್ತೆಲಿಂ;

ಪಯ್ಲೆಂ ಇನಾಮ್ ರು.5000 (ಭಾರತೀಯ್ ರುಪಯ್ ಪಾಂಚ್ ಹಜಾರ್ ಮಾತ್ರ್)

ದುಸ್ರೆಂ ಇನಾಮ್ ರು.3000 (ಭಾರತೀಯ್ ರುಪಯ್ ತೀನ್ ಹಜಾರ್ ಮಾತ್ರ್)

ತಿಸ್ರೆಂ ಇನಾಮ್ ರು.2000 (ಭಾರತೀಯ್ ರುಪಯ್ ದೋನ್ ಹಜಾರ್ ಮಾತ್ರ್)

ರೆಗ್ರೊ:

1. ಹ್ಯಾ ಸ್ಪರ್ಧ್ಯಾಂತ್ ಕೊಣೆಂಯ್ ಭಾಗ್ ಘೆವ್ಯೆತ್. ಪುಣ್ ಎಕ್ಲ್ಯಾನ್ ಎಕಾ ವಿಭಾಗಾಂತ್ ಎಕ್‌ಚ್ಚ್ ಬರಾಪ್ ಧಾಡ್ಯೆತಾ.

2. ಬರಾಪ್ ಬರವ್ಪ್ಯಾಚೆಂ ಸ್ವಂತ್ ಆಸೊನ್ ಎದೊಳ್ ಖಂಯ್ಸರ್‌ಯೀ ಪರ್ಗೊಟೊಂಕ್ ನಾತ್‌ಲ್ಲೆಂ ವಾ ಪರ್ಗಟ್ಣೆಕ್ ದೀನಾತ್‌ಲ್ಲೆಂ ಜಾವ್ನ್ ಆಸಾಜಯ್.

3. ಬರ್ಪಾಂ ಧಾಡುಂಕ್ ಅಖ್ರೇಚಿ ತಾರಿಕ್ ದಸೆಂಬ್ರ್ 31, 2005.

4. ಬರವ್ಪ್ಯಾನ್ ಆಪ್ಲೆಂ ನಾಂವ್, ವಿಳಾಸ್ ಆನಿ ಏಕ್ ತಸ್ವೀರ್ ವೆಗ್ಳ್ಯಾಚ್ಚ್ ಪೆಪರಾಂತ್ ಬರವ್ನ್ ಧಾಡ್ಚೆಂ. ಬರ್ಪಾಸವೆಂ ನಾಂವ್ ಆಸ್‌ಲ್ಲಿಂ ಬರ್ಪಾಂ ಆಮಿಂ ಸ್ಪರ್ಧ್ಯಾಕ್ ಘೆಂವ್ಚಿಂನಾಂವ್.

5. ಸ್ಪರ್ಧ್ಯಾ ಬಾಬ್ತಿಂ ಕಸಲ್ಯಾಚ್ ಪತ್ರ್‌ವೆವ್ಹಾರಾಕ್ ಆವ್ಕಾಸ್ ಆಸ್ಚೊನಾ.

6. ಬರ್ಪಾಂಕ್ ವ್ಹೊರಾವ್ಣಿ ಕರ್ಚಿ ಜವಾಬ್ಧಾರಿ ’ದಾಯ್ಜ್ ವ್ಹೊರಾಯ್ಣಾರಾಂಚಿ’ ಆನಿ ಇನಾಮಾಂ ಜಿಕ್ಪ್ಯಾಂಚಿಂ ನಾಂವಾಂ ಸಾಯ್ಟಾಂನಿ ತಶೆಂಚ್ ಕೊಂಕ್ಣಿ ಪತ್ರಾಂನಿ ಪರ್ಗಟ್ ಜಾತೆಲಿಂ.

7. ಇನಾಮಾಂ ಜಿಕ್‌ಲ್ಲಿಂ ಬರ್ಪಾಂ ಆಮಿಂ ದಾಯ್ಜ್ ಸಾಯ್ಟಿಚೆರ್, ಮಿತ್ರ್ ಹಾಫ್ತ್ಯಾಳ್ಯಾಚೆರ್ ತಶೆಂಚ್ ದಾಯ್ಜ್ ವಿಶೇಷ್ ಅಂಕೊ ೨೦೦೬ ಹಾಂತುಂ ಪರ್ಗಟ್ ಕರ್ತೆಲ್ಯಾಂವ್.

8. ಬರ್ಪಾಂ ಧಾಡುಂಕ್ ವಿಳಾಸ್: DAAIZ LITERARY COMPETITION 2005. C/O Mithr Konkanni Weekly, Saangaathi Media, 23 3rd Floor, Emporium Complex, Kankanady, Mangalore 575 002. ಯಾ ಇಮೇಯ್ಲಾ ಮುಖಾಂತ್ರ್ ಬರ್ಪಾಂ ಧಾಡುಂಕ್ ವಿಳಾಸ್ daaiz@daaiz.com.

9. ಇನಾಮಾಂ ಜಿಕ್ಪ್ಯಾಂಚಿಂ ನಾಂವಾಂ ಆಮಿಂ 2006 ಇಸ್ವೆಚಾ ಎಪ್ರಿಲಾಂತ್ ಪರ್ಗಟ್ ಕರ್ತೆಲ್ಯಾಂವ್ ತಶೆಂಚ್ ತಾಂಕಾಂ ಇನಾಮಾಂ 2006 ಇಸ್ವೆಚಾ ಮಾಯ್/ಜೂನ್ ಮಯ್ನ್ಯಾಂತ್ ದಿತೆಲ್ಯಾಂವ್.

ದಾಯ್ಜ್ ಕೊಂಕ್ಣಿ ವಾವ್ರಾಡಿ - 2005 ಪ್ರಶಸ್ಥಿ [ಜೊಕ್ತಿಂ ನಾಂವಾಂ ನಾತ್‌ಲ್ಲ್ಯಾನ್ ರದ್ದ್ ಕೆಲಾ]

ದಾಯ್ಜ್ ಪಂಗಡ್ ವ್ಹಡಾ ಅಭಿಮಾನಾನ್ ಆನಿ ಸಂತೊಸಾನ್ ಆಪವ್ಣೆಂ ದಿತಾ ದಾಯ್ಜ್ ಕೊಂಕ್ಣಿ ವಾವ್ರಾಡಿ - 2005  ಪ್ರಶಸ್ತಿ, ಜಿ ಮೆಳ್ತೆಲಿ ಕೊಂಕ್ಣಿ ಸಾಹಿತ್ಯ್/ಪತ್ರಿಕೋಧ್ಯಮಾಕ್ ದೇಣ್ಗಿ ದಿಂವ್ಚಾ ಉರ್ಭೆವಂತ್ ಯುವಜಣಾಕ್.

ರೆಗ್ರೊ:

1. ಕೊಣೆಂಯ್ ಹ್ಯಾ ಪ್ರಶಸ್ತೆಕ್ ಫಾವೊ ಮ್ಹಣ್ ದಿಸ್ಚ್ಯಾ ಜೊಕ್ತ್ಯಾ ತೆಗಾಂಚಿಂ ನಾಂವಾಂ ಧಾಡ್ಯೆತಾ, ಅಪ್ಲ್ಯಾ ಸಂಪೂರ್ಣ್ ನಾಂವ್, ವಿಳಾಸ್ ಆನಿ ಸಂಪರ್ಕ್ ವಿವರಾಸವೆಂ. [ಫಟ್ಕಿರ್‍ಯಾ ಪತ್ರ್ ವೆವ್ಹಾರಾಂಕ್ ಆಮಿ ಲೆಕಾಕ್ ದರಿನಾಂವ್]

2. ಕೊಣೆಂಯ್ ಅಪ್ಣಾಚೆಂ ನಾಂವ್ ಅಪ್ಣಾನ್ಂಚ್ ಧಾಡಿನಾಯೆ.

3. ದಾಯ್ಜ್ ಕೊಂಕ್ಣಿ ವಾವ್ರಾಡಿ - 2005 ಪ್ರಶಸ್ಥೆಸವೆಂ ಮಾನ್‌ಪತ್ರ್ ಆನಿ ರು.10,000 [ಭಾರತೀಯ್ ರುಪಯ್ ಧಾ ಹಜಾರ್ ಮಾತ್ರ್] ನಗ್ದೆನ್ ಆಸ್ತೆಲೆ.

4. ಪ್ರಶಸ್ಥೆಕ್ ಯೋಗ್ಯ್ ಜಾಲ್ಲ್ಯಾಚಿ ಪ್ರಾಯ್ 30 ಯಾ 33 ವರ್ಸಾಂಕ್ ಮಿಕ್ವಾನಾಯೆ.

5. ದಾಯ್ಜ್ ವ್ಹೊರಾಯ್ಣಾರ್ ಸೂಚಿತ್ ಜಾಲ್ಲ್ಯಾ ಯುವಜಣಾಂ ಮಧೆಂ ಫಾವೊ ಮ್ಹಣ್ ದಿಸ್ಚಾಕ್ ಹ್ಯಾ ಪ್ರಶಸ್ಥೆಕ್ ವಿಂಚ್ತೆಲಿ. ಹ್ಯಾ ಬಾಬ್ತಿಂ ಕೊಣಾಯ್ಚಾಯ್ ಕಸಲ್ಯಾಚ್ ಪತ್ರ್‌ವೆವ್ಹಾರಾಕ್ ಆವ್ಕಾಸ್ ಆಸ್ಚೊನಾ.

6. ನಾಂವಾ ವಯ್ರ್ ದಿಲ್ಲ್ಯಾ ವಿಳಾಸಾಕ್ ಧಾಡುನ್ ದಿವ್ಯೆತಾ ವ daaiz@daaiz.com ವಿಳಾಸಾಕ್ ಇಮೇಯ್ಲ್ ಕರ್‍ಯೆತಾ.

7. ನಾಂವಾಂ ಧಾಡುಂಕ್ ಅಖ್ರೇಚಿ ತಾರಿಕ್ ಜಾವ್ನಾಸ್ತೆಲಿ 2005 ಇಸ್ವೆಚಾ ದಸೆಂಬ್ರಾಚಿ 31 ತಾರಿಕ್.

ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2004

ಪಾಟಿಂ ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed, hosted and maintained by Ashawadi Publications