ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಲ್ಸನ್ ಕಟೀಲ್
ವಿಲ್ಸನ್ ಕಟೀಲ್ ಲಿಖ್ಣೆ ನಾಂವಾರ್ ದಿಸಾನ್ ದೀಸ್ ಲೊಕಾಮೊಗಾಳ್ ಜಾವ್ನ್ ಯೆಂವ್ಚೊ ವಿಲ್ಸನ್ ಸಿಕ್ವೇರಾ ಕೊಂಕ್ಣೆಚೊ ಫುಡಾರಾಚೊ ಏಕ್ ಪ್ರಭುದ್ದ್ ಸಾಹಿತಿ, ಚಿಂತ್ಪಿ, ಕವಿ, ವಿಮರ್ಶಕ್, ಕಾಣ್ಯೆಗಾರ್ ಜಾಂವ್ಚಿಂ ಲಕ್ಶಣಾಂ ಮ್ಹಾಕಾ ದಿಸೊನ್ ಯೆತಾತ್. ಕೊಂಕ್ಣಿ ಸಾಹಿತ್ಯಾಚೆಂ ಮಟ್ಟ್ ಜರ್ ಚಡಾಜಯ್, ತರ್ ಅಸಲೆಂ ಸಾಹಿತ್ಯ್ ಭೋವ್ ಗರ್ಜೆಚೆಂ ಮ್ಹಳ್ಳಿ ಆಮ್ಚಿ ಅಭಿಪ್ರಾಯ್. ಹ್ಯಾ ಅಂಕಣಾಚೆರ್ ತುಮ್ಚೆ ಉಗ್ತ್ಯಾಮನಾಚೆ ವಿಚಾರ್ ಆಮಿ ಅಶೆತಾಂವ್.
ಹೆಂ ಅಂಕಣ್ ಮಿತ್ರ್ ಹಾಫ್ತ್ಯಾಳ್ಯಾಚೆರ್ ಪರ್ಗಟ್ ಜಾತೆಲೆಂ - ಮಿತ್ರ್ ಆಮ್ಚೆಂ ಪತ್ರ್ - ಆಜ್ಚ್ ವರ್ಗಣ್ದಾರ್ ಜಾಯಾ. ಕೊಂಕ್ಣಿ ಪತ್ರಾಂಕ್ ಪಾಟಿಂಬೊ ದಿಯಾ.
ಎಲ್ಯೆರಾಚಿ ’ಸ್ವಾಧಿಕ್ ಸಾಕ್ರಾಮೆಂತ್’ ಕವಿತಾ
ಆಯ್ಲೆವಾರ್ ಕೊಂಕ್ಣಿ ಶೆತಾಂತ್ ವಯ್ರ್ ಪಡ್ಲ್ಲೊ ಕುಂಡೊ ಝಾಡ್ಚಿ ತಾಂಕ್ ಕಾಂಯ್ ಸಾಧಾರ್ಣೆಚ್ಯಾಕ್ ಆಸ್ಚಿ ನಾ. ಕೊಣೆ ತರೀ ಝಾಡುಂಕ್ ಪ್ರೇತನ್ ಕೆಲ್ಯಾರೀ ಕುಂಡ್ಯಾಕ್ಚ್ ವ್ಹಾರೆಂ ಘಾಲುನ್ ಝಾಡ್ತೆಲ್ಯಾಕ್ ಕಾಲುಬುಲೊ ಕರಯ್ತೆಲಿಂಯ್ ಕಾಂಯ್ ಉಣೆಂ ನಾಂತ್. ಹ್ಯಾ ಸರ್ವ್ ಕುಂಡ್ಯಾ ಮಧೆಂ ಮೆಳ್ಲ್ಲೊ ಆಮೊಲಿಕ್ ಉಂಡೊ ಎಲ್ಯೆರಾಚಿ ’ಸ್ವಾಧಿಕ್ ಸಾಕ್ರಾಮೆಂತ್’ ಕವಿತಾ. ಹ್ಯಾ ಕವಿತೆಚೊ ವಿಶಯ್ ಸಯ್ತ್ ಉಂಡೊಚ್. ಬರ್ಯೊ ಕವಿತಾ ಅಶ್ಯೊಚ್ ಆಸ್ತಾತ್. ಖೊಡ್ ಕಾಡ್ತೆಲ್ಯಾಂಚಿ ಜೀಬ್ ಕಾಪುನ್ ಸೊಡ್ತಾತ್. ಆನಿ ಆಪ್ಲೊ ವಿಚಾರ್ ಒಪ್ವೊನ್ ಘೆಶೆಂ ವಿಮರ್ಶಕಾಕ್ ಫ಼ರ್ಮಾಯ್ತಾತ್.
ನಾಂವ್ ’ಸ್ವಾಧಿಕ್ ಸಾಕ್ರಾಮೆಂತ್’ ತರೀ ಸಾಕ್ರಾಮೆಂತಾಚೊ ಪೊಕೊಳ್ ದರ್ಬಾರ್, ಗತ್ತ್ ಸರ್ವ್ ನಾಗ್ಡೆಂ ಕರುನ್ ಆಪುಣ್ ಮಾತ್ರ್ ಸ್ವಾಧಿಕ್ ಜಾತೆ ವೆತಾ. ಎಕಾಚ್ ಉತ್ರಾನ್ ಸಾಂಗ್ಚೆಂ ತರ್, ಸಾಕ್ರಾಮೆಂತಾಕ್ ಅಸ್ಪ್ರಶ್ಯ್ ಜಾವ್ನ್ ಆಸ್ಚಿಂ ಸಮಾಜೆಂತ್ಲ್ಯಾ ಸಬಾರ್ ಜಿವ್ಯಾ ಜಿವ್ಯಾ ರುಪಾಂಕ್ ಕವಿತೆನ್ ಆಪ್ಲ್ಯಾ ಆಲ್ತಾರಿರ್ ಚಡಯ್ಲ್ಯಾಂತ್. ಸವೆಂ, ಆಲ್ತಾರಿರ್ ದರ್ಬಾರ್ ಚಲಯ್ತೆಲ್ಯಾ ಸುಕ್ಯಾ ಉಂಡ್ಯಾಕ್ ರಸ್ತ್ಯಾಕ್ ಉಡಯ್ಲಾ.
ತಿಂ ಜಿವಿಂ ಜಿವಿಂ ರುಪಾಂ ಮ್ಹಳ್ಯಾರೀ ಕಸಲಿಂ.... ನಿರಾಳ್ ಪೊಟಾಚೆರ್ ಮ್ಹೆಳೆಂ ಕರುಂಕ್ ಬಸ್ಲ್ಲಿಂ ಭುರ್ಗಿಂ, ಸುಖ್ ಭೊಗ್ಚ್ಯಾ ಸುಣ್ಯಾಂಕ್ ಪಳೆವ್ನ್ ಬಸ್ಲ್ಲಿಂ ಹಾಡ್ಕುಟಿಂ ಬಾಯ್ಲಾಂ, ಸರ್ಕಾರಿ ಥೊಟೊ ಮಾರುನ್ ತ್ಯಾ ನಶೆಂತ್ ಗುಟಿಯೊ ಖೆಳ್ಚೆ ಬೆಕಾರಿ ದಾದ್ಲೆ... ಆಸಲಿಂ ರುಪಾಂ ಸದಾನೀತ್ ರಾಸ್ ದೆಕ್ತಾಂವ್ ಆಮಿ. ಕಾಳಿಜ್ ಪಿಳ್ಚಿಂ ಜಿವಿಂ ಜಿವಿಂ ದೃಶ್ಯಾಂ:
ಕೊಣೆಂಗೀ ಅರ್ದ್ಯಾ ವಾಟೆರ್ ಸೊಡ್ಲ್ಲೆಂ, ಪಾವ್ಸಾಕ್ ಭಿಜೊನ್ ಸಗ್ಳೆಂಚ್ ಕಾಂಪ್ಚೆಂ, ದಯಾಳಾಯೆಚಿ ಊಬ್ ಮೆಳತ್ಗಿ ಮ್ಹಳ್ಳ್ಯಾ ಪಾತ್ಯೆಣೆನ್ ಮನಿಸ್ ಝಳ್ಕಾತಾನಾ ಪಿಂರ್ಗಂವ್ಚೆಂ ಮಾಜ್ರಾ ಪೀಲ್... ಮ್ಹನ್ಶಾಪಣಾಕ್ ಹುಂಕೊನ್ ಪಾಟ್ಲ್ಯಾನ್ಂಚ್ ಯೆಂವ್ಚೊ ಕುಕುರ್... ತಾಪ್ಲ್ಲಿ ಜೀಣ್ ಥಂಡೆವ್ಚ್ಯಾ ಹೊರ್ಬೊಸಾನ್ ನಾಕ್ಭರ್ ಪಿಯೆವ್ನ್ ಉದಾರೊಚ್ ಪಡ್ಲ್ಲೊ ನಿರಾಸ್ ದಾದ್ಲೊ... ಖಚ್ರ್ಯಾ ಡಬ್ಬ್ಯಾಂತ್ ಕೊಣಾಚೆಂಗಿ ಉಶ್ಟೆಂ ಲೆಂವ್ಚೊ ಮಾನಸಿಕ್ ಪಿಡೇಸ್ತ್... ಮಿಸಾಕ್ ವೆಚ್ಯಾ ಆಮ್ಸೊರಾನ್ ಹೆಂ ಪೂರಾ ಮತಿಕ್ ಘೆನಾಂವ್ ಆಮಿ.
"ಹರ್ಯೆಕ್ ವೆಳಾ ಸರ್ವ್ಯ್ ಕಾಳಾ ಹೊಗ್ಳಿಕ್ ಆಶೆಂವ್ಚ್ಯಾ ದೆವಾಕ್ ಪಾತ್ಯೆನಾ ಹಾಂವ್" ಅಶೆಂ ಮ್ಹಣ್ತಾ ಎಕ್ಲೊ ಚಿಂತ್ಪಿ. ಹಾಂಗಾಸರ್ಯಿ ತಶೆಂಚ್ ಸಾಕ್ರಾಮೆಂತ್ ವ್ಹಡಾ ದಾಬಾಜಾನ್ ಪುರ್ಶಾಂವಾರ್ ವೆತಾ. ವಿಲಾಯ್ತೆ ಕಾರಾಂನಿ, ಸುಗಂಧ್ ದ್ರವ್ಯ್ ಲೆಪುನ್, ನಾಕ್ ದೊಳೆ ಧಾಂಪುನ್ ಬೊಂಗ್ಲ್ಯಾಕ್ ವೆತಾ... ದುಕ್ಲ್ಲ್ಯಾಂಕ್ ಹಾಸೊ ದೀನಾಶೆಂ, ಧಣ್ಸಲ್ಲ್ಯಾಂಕ್ ಭುಜಾವಣ್ ದೀನಾಶೆಂ.
ಅಶೆಂ ದರ್ಬಾರಾನ್ ಪುರ್ಶಾಂವ್ ವೆಚ್ಯಾ ಸಾಕ್ರಾಮೆಂತಾಕ್ ಆವ್ಚಿತ್ ’ಆಕ್ಸಿಡೆಂಟ್’ ಜಾತಾ. ಆಸಲೆಂ ಏಕ್ ’ಆಕ್ಸಿಡೆಂಟ್’ ಜಾಯ್ಜೆಚ್. ಘೆಟೆ ಜಾಲ್ಲೆಂ ಪಾಡ್ ರಗತ್ ಭಾಯ್ರ್ ವ್ಹಾಳಜೆಚ್. ನಾ ತರ್ ಹೊ ಭದ್ರ್ ಉಂಡೊ ರಸ್ತ್ಯಾಕ್ ದೆಂವೊಂಕ್ ಸಾದ್ಯ್ಚ್ ನಾ. ಜೆನ್ನಾ ಆಸಲೆಂ ಆಕ್ಸಿಡೆಂಟ್ ನೈಸರ್ಗಿಕ್ ಥರಾನ್ ಜಾಯ್ನಾ ತೆನ್ನಾ ಭಲಾತ್ಕಾರಾನ್ ಕರಯ್ಜೆ ಪಡ್ತಾ. ಏಕ್ ಕ್ರಾಂತಿ ಜಾಯ್ಜೆ ಪಡ್ತಾ. ಸೂಕ್ಶಿಮಾಯೆನ್ ಪಳಯ್ಲ್ಯಾರ್ ಮಾರ್ಕ್ಸ್, ಮಾವೊ ವಾ ನಕ್ಸಲಿಸಮ್ಚೆಂ ಧೋರಣ್ ಹೆಂಚ್. ವ್ಹಡಾಂಗೆಲೊ ದರ್ಬಾರಾಚೊ ಉಂಡೊ ಮೊಡುನ್ ಸಾದ್ಯಾ ಲೊಕಾಕ್ ವಾಂಟ್ಚೆಂ.
ಹಾಂಗಾಸರ್ ಜಾಂವ್ಚ್ಯಾ ಆಕ್ಸಿಡೆಂಟಾಂತ್ಯೀ ಪಾದ್ರಿಚೆಂ ರಗತ್ ಫುಟ್ತಾ. ಪುಣ್ ಪುರ್ತೆಂ ಭಾಯ್ರ್ ವ್ಹಾಳ್ಚಾ ಆದಿಂಚ್ ಬಾಯ್ಲಾಂ ಕಾಪ್ಡಾಂ ಪಿಂಜುನ್ ತೀರ್ ಬಾಂದ್ತಾತ್. ದಾದ್ಲೆ ಪಾದ್ರಿಕ್ ಖಾಂದಿ ಘೆವುನ್ ಬೊಂಗ್ಲ್ಯಾಕ್ ಧಾಂವ್ತಾತ್. ಹ್ಯಾ ಅಕ್ಸಿಡೆಂಟಾಂತ್ ಸಮಾಜೆಕ್ ಕಿತೆಂ ತರೀ ಉಪ್ಕಾರ್ ಜಾಯ್ತ್ ಮ್ಹಣ್ ಚಿಂತಾನಾ ಎಕಾಚ್ಚಾಣೆಂ ಹ್ಯಾ ಚಿಂತ್ಪಾಕ್ ಕುರಾಡ್ ಪಡ್ತಾ.
ಹಾ! ಕಸ್ಲೊ ವಿಪಾರ್ಯಾಸ್. ಪಾದ್ರಿಚೊ ಘಾಯ್ ಬಾಂಧುಂಕ್ ಗಿರೆಸ್ತಾಂಚೊ ರಶೀಮ್ ಪಾಲಂವ್ ಪಿಂಜನಾ. ಆನಿ ವಾಡ್ಯಾಚೆ ಗುರ್ಕಾರ್ ಯೇನಾಂತ್ ಖಾಂದ್ ಮಾರುಂಕ್. ಬಗಾರ್, ಹಾಡ್ಕುಟ್ಯಾ ಬಾಯ್ಲಾಂಚ್ಯಾ ಇರ್ಲ್ಲ್ಯಾ ಕಾಪ್ಡಾಚೊಚ್ ತೀರ್ ಪಾದ್ರಿಚೆಂ ರಗತ್ ಉರಯ್ತಾ. ಆನಿ ಪಾದ್ರಿಚಿ ಕೂಡ್ ಖಾಂದಿ ಘೆವ್ನ್ ಧಾಂವೊಂಕ್ಯಿ ಬೆಕಾರಿ ದಾದ್ಲೆಚ್ ಪಾವ್ತಾತ್. ರಶೀಮ್ ಪಾಲಂವ್ ಪಿಂಜುಂಕ್ ಸುರಾತ್ ಭಗ್ಲೊ ಆಸ್ತಲೊ ಗಿರೆಸ್ತಾಂಕ್. ಆನಿ ಗುರ್ಕಾರಾಂನಿ ಆಪ್ಲೊ ಅಧಿಕಾರ್ ವಾಪಾರುನ್ ಹ್ಯಾ ಲಾಚಾರ್ ದಾದ್ಲ್ಯಾಂಕ್ಚ್ ಫರ್ಮಾಯ್ಲೆಂ ಆಸ್ತಲೆಂ ಖಾಂದ್ ಮಾರುಂಕ್. ಹಾಂಗಾಸರ್ ಉಟೊನ್ ದಿಸ್ಚೆಂ ದುಬ್ಳ್ಯಾಂ ದಾಕ್ಟ್ಯಾಂಚೆಂ ಶೋಶಣ್ ಭುಕೆಲ್ಲ್ಯಾ ಬಾಳಾಂಚ್ಯಾ ಪೊಟಾಕ್ ಪಾಂವ್ಚ್ಯಾ ಉಂಡ್ಯಾಚೊ ಸಂತೊಸ್ ಪುಸುನ್ ವರ್ತಾ. ಆಕ್ರೇಕ್ ಕವಿತಾ ಸಂಪ್ತಾನಾ ಇತ್ಲೆಂಚ್ ಉರ್ತಾ...
ಸುಕ್ಯಾ ಉಂಡ್ಯಾಂನಿ ಭುಕ್ ಥಾಂಬನಾತ್ಲಿಂ ಬಾಳಾಂ... ಆಸ್ಲ್ಲೆಂ ಇರ್ಲ್ಲೆಂ ಕಾಪಡ್ಯೀ ಪಿಂಜುನ್ ಗೆಲ್ಲಿಂ ಹಾಡ್ಕುಟಿಂ ಬಾಯ್ಲಾಂ... ಆನಿ ಚರ್ಬಲ್ಲಿ ಕೂಡ್ ವ್ಹಾವವ್ನ್ ಖರ್ಶೆಂವ್ಚೆ ನಿತ್ರಾಣ್ ದಾದ್ಲೆ.
[ಎಲ್ಯೆರ್ ತಾಕೊಡೆಚೆಂ ’ಸ್ವಾದಿಕ್ ಸಾಕ್ರಾಮೆಂತ್’ ಕವಿತಾ ಕವಿತಾಪಾಠ್-25 ಚೆರ್ ಪರ್ಗಟ್ಲಾಂ]
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications