ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮೆಲ್ವಿನ್ ಜೆರಾಲ್ಡ್ ವಾಸ್: ಕೆಲರಾಯ್ ಫಿರ್ಗಜೆಜೊ, ಪಾಟ್ಲ್ಯಾ ಭಾರಾ ವರ್ಸಾಂ ಥಾವ್ನ್ ಕುವೆಯ್ಟಾಂತ್ ವಾವ್ರ್ ಕರುನ್ ಆಸಾ. ಚಡುಣೆಂ ಪಂದ್ರಾ-ಸೊಳಾ ವರ್ಸಾಧಿಂ ಸಾಹಿತ್ಯಾಚಿ ಸುರ್ವಾತ್ ಕರುನ್, 35 ಮಟ್ವ್ಯೊ ಕಾಣ್ಯೊ ಆನಿ ಏಕ್ ಕಾದಂಬರಿ ಬರಯಿಲ್ಲಿ ತರ್ಯೀ ಸಭಾರ್ ವರ್ಸಾಂನಿ ತಿ ಜಿವಾಳ್ ದವ್ರುಂಕ್ ಸಕಾನಾಸ್ತಾಂ ರಾವ್ಲೊ ತರ್ಯ್ ಕೊಂಕ್ಣಿ ಸಾಹಿತ್ಯಾಚೆರ್ ತೊಚ್ಚ್ ಮೋಗ್ ಆನಿ ಹುಸ್ಕೊ ಅಸೊನ್, ಆಯ್ಲೆವಾರ್ ಸರಾಗ್ ರಿತಿನ್ ವೆವೆಗ್ಳ್ಯಾ ಪ್ರಕಾರಾಚಿ ಸಾಹಿತಿಕ್ ಕೃಷಿ ಕರುನ್ ಕೊಂಕ್ಣಿ ವರ್ತುಲಾಂತ್ ನಾಂವಾಡ್ದಿಕ್ ಜಾಲಾ. ಕಾಣ್ಯಾಂಶಿವಾಯ್ 4 ನಾಟ್ಕುಳೆ, 75 ಕವಿತಾ, 10 ಲೇಖನಾಂ, 20 ವಿಮರ್ಶೆ/ಸಮೀಕ್ಶಾ ಬರಯ್ಲ್ಯಾತ್. ಹಾಚೊ ಸ್ವತಾಚೊ ( ಫುಡ್ಲದ್) ಕವಿತಾಜಮೊ ’ಆಟ್ವ್ಯಾ ರಂಗಾಚೊ ಧೊಣು’ ವೆಗಿಂಚ್ ’ಆಶಾವಾದಿ ಪ್ರಕಾಶನ್’ ಪರ್ಗಟ್ಚಾರ್ ಆಸಾ. ಹಾಚ್ಯಾಧಿಂ ಹಾಚಿಂ ಕವಿತಾಂ/ಲೇಕನಾಂ ’ಮೊತಿಯಾಂ ಆನಿ ತಾರಾಂ’, ’ಸಾಗೊರಾಚ್ಯಾ ವಾಟೆಚ್ಯೊ ಝರಿ’, ’ಕವಿತಾಪಾಠ್’ ಆನಿ ’ದರ್ಯಾಕ್ ಉದಾಕ್’ ಬುಕಾಂನಿ ಪರ್ಗಟ್ಲ್ಯಾಂತ್. ಪಾಟ್ಲ್ಯಾ ದೋನ್ ವರ್ಸಾಂ ಥಾವ್ನ್ ದಾಯ್ಜ್.ಕೊಮ್ ಸಾಯ್ಟಿಚೊ ಸಹ-ಸಂಪಾದಕ್ಯೀ ಹೊ ಜಾವ್ನಾಸಾ.
ಭ್ರಮಿದೆಂತ್ಲ್ಯೊ ಸಾವ್ಳ್ಯೊ: ಏಕ್ ಸಾಮಾಜಿಕ್ ಕಾದಂಬರಿ, ಪ್ರಮುಖ್ ಜಾವ್ನ್ ತೆಗಾಂಚ್ಯಾ ತೀನ್ ರಿತಿಚಾ ಸಂಭಂಧಾಂಚೆ ಎಕಾಮೆಕಾಚೆ ಗಾಂಚ್ ಮ್ಹಣ್ಯೆತಾ. ವಾಚ್ಪ್ಯಾಂಕ್ ಸಿಂತಿಮೆಂತಾಂ, ಚಿಂತಾಪ್, ಭಗ್ಣಾಂ, ಉಮಾಳೆ ಜಾಗಂವ್ಕ್ ಜರೂರ್ ಸಕ್ತೆಲಿ ಮ್ಹಳ್ಳೊ ಮ್ಹಜೊ ಭರ್ವಸೊ.
ಪುಸ್ತಕ್ ದೋನ್
ತುಜೆಂ ಜಿವಿತ್ ತುಜಿ ವಿಂಚವ್ಣ್
ನ್ಹಂಯ್
ಆವಸ್ವರ್ ಎಕುಣೀಸ್: ಮಿಶೇಲ್ ರಾಯನ್ ಆಲಿಯಾ
"ಟ್ರಿಣ್... ಟ್ರಿಣ್"
ಪಯ್ಶಿಲ್ಯಾ ಸ್ಟ್ಯಾಂಡಾ ವಯ್ಲೆಂ ಪೋನ್ ಆವಾಜುಂಕ್ ಲಾಗ್ತಾನಾ ಟಿ.ವಿ. ಮುಕಾರ್ ಬಸೊನ್ ಟಿ.ವಿ. ಪಳವ್ನ್ ಆಸ್ಲ್ಲೆಂ ಮಿಶೇಲ್ ಉಟೊನ್ ಪೋನಾ ತೆವ್ಶಿಂ ಚಮ್ಕಾಲೆಂ. ರಾಯನ್ ಆಪ್ಲ್ಯಾ ಆಫೀಸಾಕ್ ಭಾಯ್ರ್ ಸರೊನ್ ಗೆಲ್ಯಾ ಉಪ್ರಾಂತ್ ಆಪ್ಲ್ಯಾ ಬೆಡ್ರೂಮಾಂತ್ಲೆಂ ಆಪ್ಲೆಂ ಕಾಮ್ ಕರುನ್ ಜಾತಚ್ ಮಿಶೇಲ್ ಟಿ.ವಿ. ಚ್ಯಾ ಮುಕಾರ್ ಬಸ್ಲ್ಲೆಂ.
"ಹಲೋ....?"
ಟೆಲಿಪೋನಾಚೆಂ ರಿಸೀವರ್ ಹಾತಿಂ ಘೆವ್ನ್ ಮಿಶೇಲ್ ಉಲಯ್ಲೆಂ.
"ಮಿ...ಶೇ....ಲ್.....!" ತ್ಯಾ ಕುಶಿನ್ ಥಾವ್ನ್ ಫುಟ್ಕುರೊ ರಡ್ಕುರೊಚೊ ತಾಳೊ.
"ಶೀತಲ್......!" ತ್ಯಾ ತಾಳ್ಯಾಕ್ ಮಿಶೇಲಾನ್ ಪಾರ್ಕಿಲೆಂ.
"ಶೀತಲ್ ಕಿತೆಂ ಜಾಲೆಂ?" ಅಚಾನಕ್ ಆಯ್ಕೊನ್ ಆಯಿಲ್ಲ್ಯಾ ಶೀತಲಾಚಾ ರಡ್ಣ್ಯಾಚಾ ತಾಳ್ಯಾನ್ ಮಿಶೇಲಾಚ್ಯಾ ಸಂಸಾರಾಕ್ಚ್ ಬದ್ಲುನ್ ಸೊಡ್ಲೆಂ. ತೆಂ ಎದೊಳ್ ಆಪ್ಲ್ಯಾ ಸದಾಂಚಾ ಶಾಂತ್ ಮತಿನ್ ಬಸೊನ್ ಟಿ.ವಿ. ಪಳಯ್ತಾಲೆಂ. ಪುಣ್ ಆತಾಂ ಹೆಂ ಶೀತಲ್...?
ಮಿಶೇಲಾಚಾ ಸವಾಲಾಕ್ ತ್ಯಾ ಕುಶಿನ್ ಥಾವ್ನ್ ಶೀತಲಾಚಿ ಕಾಂಯ್ ಜವಾಬ್ ಆಯ್ಲಿ ನಾ. ಶೀತಲಾನ್ ಹುಸ್ಕಾರ್ಚೆಂ ಮಾತ್ರ್ ಮಿಶೇಲಾಕ್ ಸಾರ್ಕೆಂ ಆಯ್ಕಾತಾಲೆಂ. ಹ್ಯಾ ಶೀತಲಾಕ್ ಕಿತೆಂ ಜಾಲೆಂ ಜಾವ್ಯೆತ್? ಮತಿಂತ್ ಉದೆಲ್ಲ್ಯಾ ಸವಲಾಕ್ ದೆಗೆನ್ ಲೊಟುನ್,
"ಶೀತಲ್ ತುಂ ರಡ್ತಾಯ್ ಕಿತ್ಯಾಕ್....?" ಶೀತಲಾಚಿ ಕಾಂಯ್ ಜಾಪ್ ನಾತ್ಲ್ಲಿ ಪಳವ್ನ್ ಮಿಶೇಲಾಚಾ ಮತಿಕ್ ಕಾಂಯ್ ಸಮ್ಜಾಲೆಂ ನಾ.
ಮಿಶೇಲಾಕ್ ಆತಾಂ ಶೀತಲಾಚೆಂ ಭಾರೀಕ್ ರಡ್ಣೆಂ ಆಯ್ಕೊನ್ ಯೇಂವ್ಕ್ ಲಾಗ್ಲೆಂ. ಪಯ್ಲೆಂ ಹುಸ್ಕಾರೊನ್ ಆಸ್ಲ್ಲೆಂ ಶೀತಲ್ ಆತಾಂ ರಡ್ತಾಲೆಂ.
ಮಿಶೇಲಾಚಿ ಮತ್ ಥೊಡ್ಯಾಚ್ ಘಡಿಯಾಂ ಭಿತರ್ ಹ್ಯಾ ಶೀತಲಚಾ ರಡ್ಣ್ಯಾ ಥಾವ್ನ್ ಕದ್ವಳೊನ್ ಗೆಲಿ. ತೆಂ ಕೊಣಾಯ್ಚಾ ರಡ್ಣ್ಯಾಕ್ ವಾ ದುಖಾಕ್ ಪಳಂವ್ಕ್ ಸಕಾನಾತ್ಲ್ಲೆಂ. ಆಸಲ್ಯಾ ಸಂದಿಗ್ದ್ ಪರಿಸ್ಥಿತೆಂತ್ ಮಿಶೇಲ್ ಸಂಪೂರ್ಣ್ ಅಭಲ್ ಜಾತಾಲೆಂ.
"ಕಿತೆಂ ಜಾಲೆಂ ಶೀತಲ್.....?" ಆತಾಂ ಮಿಶೆಲಾಚೊ ತಾಳೊ ಭಿರಾಂತೆನ್ ಭರ್ಲೊ. "ಹಾಂವ್ ಯೇಂವ್ ಥಂಯ್ಚರ್? ಕಿತೆಂ ಜಾಲಾಂ ತೆಂ ತರೀ ಸಾಂಗ್ ಶೀತಲ್!" ಮಿಶೇಲ್ ರಾವ್ಲೆಲ್ಯಾ ಕಡೆಚ್ ದಡ್ಬಡೊಂಕ್ ಲಾಗ್ಲೆಂ. ಕಿತ್ಲೆಂ ಮ್ಹಳ್ಯಾರ್ಯ್ ಶೀತಲ್ ಮಿಶೇಲಾಚೆಂ ಕಾಳ್ಜಾ ಲಾಗ್ಶಿಲೆಂ ಇಶ್ಟಿಣ್ ಆನಿ ಶೀತಲಾ ಶಿವಾಯ್ ಮಿಶೇಲಾಕ್ ಹ್ಯಾ ಮುಂಬಯಿಂತ್ ರಾಯನಾ ಬಗಾರ್ ದುಸ್ರೆಂ ಕೊಣ್ಯ್ ಲಾಗ್ಶಿಲೆಂ ಮ್ಹಳ್ಳೆಂ ನಾತ್ಲ್ಲೆಂ. ಆಸಲೆಂ ಶೀತಲ್ ಆತಾಂ ಹ್ಯಾ ಸಾಕಾಳಿಂಚಾ ವಗ್ತಾರ್ ರಡ್ತಾ ಕಿತ್ಯಾಕ್ ಮ್ಹಳ್ಳೆಂ ತೆಂ ಮಿಶೇಲಾಕ್ ಸಮ್ಜಾಲೆಂ ನಾ.
"ತುಂ..... ತು..ಂ.. ಹಾಂಗಾ ಯೇಂವ್ಕ್ ಸಕ್ತಾಯ್ ಮಿಶೆಲ್......?" ಶೀತಲ್ ಉಲಂವ್ಕ್ ಕಶ್ಟಾತಾಲೆಂ. ಬೋವ್ಶ್ಯಾ ಆಪ್ಣಾಕ್ ಪೋನ್ ಕರ್ಚ್ಯಾ ಪಯ್ಲೆಂ ಶೀತಲ್ ಮಸ್ತ್ ರಡ್ಲಾಂ ಮ್ಹಳ್ಳ್ಯಾ ಪರಿಂ ಮಿಶೇಲಾಕ್ ಭೊಗ್ಲೆಂ.
"ಓ.ಕೆ! ಹಾಂವ್ ಯೆತಾಂ. ವಿಶು ಖಂಯ್ ಆಸಾ? ಹಾಂವ್ ಯೆಂವ್ಚ್ಯಾ ಪಾಸೊನ್ ತುಕಾ ಕಾಂಯ್ ಪ್ರಾಬ್ಲೆಮ್ ಜಾಂವ್ಚೆ ನಾಂತ್.....?"
"ನಾ.....!" ಶೀತಲ್ ಆಪ್ಲ್ಯಾ ಘೊವಾ ವಿಶಿಂ ಉಲಯ್ಲೆಂ ನಾ.
"ಓ.ಕೆ. ಹಾಂವ್ ಯೆತಾಂ!" ಮಿಶೇಲಾನ್ ಪೋನ್ ದವರ್ಲೆಂ.
ಮಿಶೇಲಾಕ್ ಹೆಂ ಸಗ್ಳೆಂ ತಾಚ್ಯಾ ಸಮ್ಜಣೆ ಭಾಯ್ರ್ ಆಸ್ಲ್ಲೆಂ.
ಹ್ಯಾ ದಿಸಾಂನಿ ವಿಶು ಕುಮಾರ್ ಮುಂಬಯಿಚ್ ಆಸ್ಲ್ಲೊ. ಶೀತಲ್ ತಾಚ್ಯಾ ಸಾಂಗಾತಾ ಖುಶ್ ಆಸ್ಲ್ಲೆಂ. ಖುದ್ದ್ ದೊಗಾಂಯ್ ದೋನ್ ದಿಸಾಂ ಪಯ್ಲೆಂ ಮಿಶೇಲಾಚ್ಯಾ ಘರಾ ಯೇವ್ನ್ ಗೆಲ್ಲಿಂ. ಶೀತಲಾಚೊ ಸಂತೊಸ್ ಪಳವ್ನ್ ಮಿಶೇಲಾಕ್ಯ್ ಸಮಾಧಾನ್ ಜಾಲ್ಲೆಂ.
"ಹಾವೆಂ ತುಕಾ ಸಾಂಗೊಂಕ್ ನಾ ಮಿಶೇಲ್.....? ಘೊವಾ ಬಾಯ್ಲೆ ಮಧ್ಲೆ ಸಂಭಂಧ್ ವೇಳ್ ಕರುನ್ ತರ್ಯ್ ಸಗ್ಳೆ ಸಮಾ ಜಾತಾತ್. ತುಂ ಮಾತ್ರ್ ಬೆಶ್ಟೆಂಚ್ ಆಪ್ಲ್ಯಾ ಮಾತ್ಯಾರ್ ಇತ್ಲೆಂ ವ್ಹಡ್ಲೆಂ ವೊಜೆಂ ಘೆವ್ನ್ ಬಸ್ಲ್ಲೆಂಯ್!" ತ್ಯಾ ದೀಸ್ ರಾಯನಾನ್ಯ್ ಆಪ್ಣಾಕ್ಚ್ ಗುನ್ಯಾಂವ್ಕಾರ್ ಕೆಲ್ಲೆಂ.
ತಾಚ್ಯಾ ಉತ್ರಾಂನಿಂಯ್ ಸತ್ ಆಸ್ಲ್ಲೆಂ. ಆಪುಣ್ ಶೀತಲಾಚ್ಯಾ ವಿಶಯಾಂತ್ ಕಾಂಯ್ಚ್ ಕರುಂಕ್ ಸಕಾನಾ ಮ್ಹಣೊನ್ ಕಳಿತ್ ಆಸೊನ್ಯ್ ಆಪುಣ್ ಹ್ಯಾ ಶೀತಲಾಚೊ ವಿಶಯ್ ಘೆವ್ನ್ ಚಿಂತುನ್ ಬಸ್ತಾಲಿಂ. ಆಪ್ಣಾಚ್ಯಾ ಆಸಲ್ಯಾ ಚಿಂತ್ನಾಂ ಥಾವ್ನ್ ಆಪ್ಣಾಕ್ ಆನಿ ಆಪ್ಣಾಚಾ ಘರಾಕ್ಚ್ ಲುಕ್ಸಾಣ್ ಶಿವಾಯ್ ಫಾಯ್ದೊ ಕಾಂಯ್ ನಾ ತೆಂ ಕಳೊನ್ ತ್ಯಾ ಉಪ್ರಾಂತ್ ಮಿಶೇಲಾನ್ ಶೀತಲಾಚಾ ವಿಶಯಾಂತ್ ಚಿಂತ್ಚೆಂ ಸೊಡ್ಲ್ಲೆಂ. ತ್ಯಾ ಕುಶಿಂನ್ ಶೀತಲ್ಯ್ ವಿಶು ಕುಮಾರಾ ಸವೆಂ ಖುಶ್ ಆಸ್ಲ್ಲೆಂ. ತರ್ ಆತಾಂ ಅಚಾನಕ್......?
ಮತಿಂತ್ಲ್ಯಾ ಚಿಂತ್ನಾಂಕ್ ಬಗ್ಲೆಕ್ ಲೊಟ್ಲ್ಲ್ಯಾ ಮಿಶೇಲಾನ್ ರಾಯನಾಕ್ ಪೋನ್ ಕೆಲೆಂ.
ರಾಯನಾಕ್ ತಿಳ್ಸಿಲ್ಯಾ ಬಗಾರ್ ತಾಣೆಂ ಘರಾ ಥಾವ್ನ್ ವೆಚ್ಯಾ ಪರಿಂ ನಾತ್ಲ್ಲೆಂ. ರಾಯನಾಕ್ ತಿಳ್ಸಿಲ್ಯಾರ್ ಮಾತ್ರ್ ತಾಚ್ಯಾ ಆಫೀಸಾ ಥಾವ್ನ್ ಡ್ರೈವರ್ ಯೆತಾ!
ಮಿಶೇಲಾಕ್ ರಾಯನಾಚಿ ಪರ್ವಣ್ಗಿ ಮೆಳೊಂಕ್ ಕಾಂಯ್ ಕಶ್ಟ್ ನಾತ್ಲ್ಲೆ. ಕಿತ್ಯಾಕ್? ಖಂಯ್? ಕಶೆಂ? ಕಾಂಯ್ಚ್ ವಿಚಾರಿನಾಸ್ತಾನಾ ರಾಯನ್ ಆಪ್ಲ್ಯಾ ಬಾಯ್ಲೆಕ್ ಖಂಯ್ ಜಾಯ್ ಥಂಯ್ ವಚೊಂಕ್ ಪರ್ವಣ್ಗಿ ದಿತಾಲೊ.
ರಾಯನಾಚ್ಯಾ ಆಫಿಸಾ ಥಾವ್ನ್ ಡ್ರೈವರ್ ಘರಾ ಯೇವ್ನ್ ಪಾವ್ತಾನಾ ಥೊಡೊ ವೇಳ್ ಜಾಲ್ಲೊ. ಹ್ಯಾ ವೆಳಾಂತ್ ಮಿಶೇಲ್ ನ್ಹೆಸೊನ್ ಆಯ್ತೆಂ ಜಾಲೆಂ.
ಆಜ್ ಡ್ರೈವರಾನ್ ಹೊಂಡಾ ಕಾರ್ ಗ್ಯಾರೇಜಿ ಥಾವ್ನ್ ಭಾಯ್ರ್ ಕಾಡ್ಲೆಂ.
ಕಾರಾರ್ ಬಸ್ಲೆಲ್ಯಾ ಮಿಶೇಲಾಕ್ ಶೀತಲಾಚಿಂಚ್ ಚಿಂತ್ನಾಂ ಮತಿಂತ್ ದೊಸುಂಕ್ ಲಾಗ್ಲಿಂ. ಹೊ ತಾಕಾ ಸಮ್ಜಾನಾತ್ಲ್ಲೊ ಮಿಸ್ತೆರ್! ಜರ್ ತರ್ ಶೀತಲಾನ್ ಪೊನಾಚೆರ್ ಕಾಂಯ್ ತರ್ಯ್ ಸಾಂಗ್ಲ್ಲೆಂ ಜಾಲ್ಯಾರ್ ಮಿಶೇಲಾಕ್ ಥೊಡೆಂ ಸಮಾಧಾನ್ ತರ್ಯ್ ಜಾತೆಂ. ಪುಣ್ ಶೀತಲ್ ಕಾಂಯ್ ಉಲಂವ್ಚ್ಯಾ ಬದ್ಲಾಕ್ ರಡ್ತಾಲೆಂ. ಮಿಶೇಲಾನ್ ಪಯ್ಲ್ಯಾ ಪಾವ್ಟಿಂ ಶೀತಲಾಚಾ ರಡ್ಣ್ಯಾಕ್ ಆಯ್ಕಾಲ್ಲೆಂ. ತಶೆಂ ಶೀತಲ್ ಆಪ್ಣಾ ತಿತ್ಲ್ಯಾ ಭಿವ್ಕುರ್ಯಾ ಸ್ವಭಾವಾಚೆಂ ನ್ಹಯ್. ಚಲಿಯೆ ಜಾತಿಚೆಂ ಭೆಂ ಭಿರಾಂತ್ ತಾಚ್ಯಾ ಶಿರಾಂನಿ ಆಸ್ಲ್ಲೆಂ ಜಾವ್ಯೆತ್. ಪುಣ್ ಶೀತಲ್ ತ್ಯಾ ಮಂಗ್ಳುರಾಂತ್ಯ್ ಆಶೆಂ ರಡ್ಲ್ಲೆಂ ಮಿಶೇಲ್ ಪಳವ್ನ್ ನೆಣಾಂ.
ಶೀತಲಾಚೆಂ ರಡ್ಣೆಂ ಅಜೂನ್ ಆಪ್ಲ್ಯಾ ಕಾನಾಂನಿ ಘುಂಯ್ ಗುಟ್ತಾ ತಶೆಂ ಮಿಶೇಲಾಕ್ ಭೊಗ್ತಾಲೆಂ. ತಾಕಾ ಆಪುಣ್ ಕೆದಾಳಾ ಏಕ್ ಪಾವ್ಟಿಂ ಶೀತಲಾಕ್ ಪಳಯ್ನಾಂ ತಶೆಂ ಜಾತಾಲೆಂ. ಕಾರಾರ್ ಬಸ್ಲ್ಲ್ಯಾ ಕಡೆಚ್ ಮಿಶೇಲ್ ಹುಳ್ವುಳೊಂಕ್ ಲಾಗ್ಲ್ಲೆಂ.
ಮಿಶೇಲಾನ್ ಪೊನಾರ್ ರಾಯನಾಕ್ ಶೀತಲಾಚಾ ವಿಶ್ಯಾಂತ್ ಕಾಂಯ್ಚ್ ಸಾಂಗೊಂಕ್ ನಾ. ಬೆಶ್ಟೆಂ ತಾಚ್ಯಾ ಆಫೀಸಾಚಾ ಕಾಮಾ ಮಧೆಂ ಆಪ್ಣೆಂ ತಾಕಾ ಬೆಜಾರಾಯ್ ಹಾಡಂವ್ಚಿ ಮಿಶೇಲಾಕ್ ಬರೆಂ ದಿಸೊಂಕ್ ನಾ.
ಕಾರಾ ಭಿತರ್ ಮಿಶೇಲ್ ಚಿಂತಾ ಚಿಂತಾನಾ ವಾಟ್ ಸಾಗ್ಸಾಲ್ಲಿ. ಆನಿ ಆತಾಂ ತಾಚೆಂ ಹೊಂಡಾ ಕಾರ್ ವಾರ್ಸೋವಾ ಶೀತಲಾಚಾ ಘರಾ ಪಾವ್ಲ್ಲೆಂ.
ಹ್ಯಾಚ್ ವೆಳಾರ್!
ಮಿಶೇಲಾಚಾ ಕಾರಾ ಪಾಟ್ಲ್ಯಾನ್ಚ್ ಆಯಿಲ್ಲೆಂ ಮೆರೂನ್ ರಂಗಾಚೆಂ ಕಾಳ್ಯಾ ಆರ್ಶ್ಯಾಂನಿ ಭಂಧ್ ಆಸ್ಲ್ಲೆಂ ಮಹೀಂದ್ರ ಸ್ಕೋರ್ಪಿಯೊ ಜೀಪ್ ಮಿಶೇಲಾಚಾ ಹೊಂಡಾ ಕಾರಾ ಥಾವ್ನ್ ಪಾಟಿಂ ಸುಮಾರ್ ಪಯ್ಸ್ ರಾವ್ಲೆಂ.
ಶೀತಲಾಚಾ ಘರಾಚಿ ಮುಕ್ಲಿ ಗೇಟ್ ಉಗ್ತಿ ಕೆಲ್ಲ್ಯಾ ಡ್ರೈವರಾನ್ ಕಾರ್ ಹಾಡುನ್ ಘರಾ ಮುಕಾರ್ ರಾವಯ್ಲೆಂ.
ರಾವ್ಲ್ಲ್ಯಾ ಕಾರಾಚೆಂ ದಾರ್ ಉಗ್ತೆಂ ಕರುನ್ ಮಿಶೇಲ್ ಕಾರಾ ಥಾವ್ನ್ ಭಾಯ್ರ್ ದೆಂವ್ಲಾಂ ಮಾತ್ರ್!
ತಿತ್ಲ್ಯಾರ್!
’ಗಕ್ಕ್’ ಕರುನ್ ಶೀತಲಾಚಾ ಘರ್ಚ್ಯಾ ಗೆಟಿ ಮುಕಾರ್ ಎದೊಳ್ ಮಿಶೇಲಾಚಾ ಕಾರಾಚೊ ಪಾಟ್ಲಾವ್ ಕರುನ್ ಆಸ್ಲ್ಲೆಂ ತೆಂ ಮೆರೂನ್ ರಂಗಾಚೆಂ ಕಾಳ್ಯಾ ಆರ್ಶ್ಯಾಂನಿ ಭಂಧ್ ಆಸ್ಲ್ಲೆಂ ಮಹೀಂದ್ರ ಸ್ಕೋರ್ಪಿಯೊ ಜೀಪ್ ಯೇವ್ನ್ ಉಭೆಂ ಜಾಲೆಂ.
ಕಾರಾ ಥಾವ್ನ್ ದೆಂವ್ಚ್ಯಾ ಮಿಶೇಲಾಚಿ ನದರ್ ತ್ಯಾ ಭಾಯ್ರ್ ಯೇವ್ನ್ ರಾವ್ಲೆಲ್ಯಾ ಜಿಪಾಚೆರ್ ವಚಾನಾಸ್ತಾನಾ ಗೆಲಿ ನಾ. ಥೊಡೊ ವೇಳ್ ಮಿಶೇಲಾನ್ ತ್ಯಾ ಜಿಪಾಕ್ಚ್ ಪಳೆಲೆಂ. ತ್ಯಾ ಜಿಪಾಚೆ ಕಾಳೆ ಆರ್ಶೆ ಭಂಧ್ ಆಸೊನ್ ಭಿತರ್ ಕೋಣ್ ಆಸಾ ತೆಂ ಭಾಯ್ಲ್ಯಾಂಕ್ ಕಳ್ಚೊ ಸಂಭವ್ಚ್ ನಾತ್ಲ್ಲೊ.
ರಾವ್ಲೆಲ್ಯಾ ಜಿಪಾ ಥಾವ್ನ್ ಕೊಣ್ಯ್ ದೆಂವ್ಲೆ ನಾಂತ್.
ಥೊಡಿಂಚ್ ಖಿಣಾಂ!
ತಿತ್ಲ್ಯಾರ್, ಎಕಾಚ್ಚಣೆಂ ವೇಗ್ ಆರಾಯಿಲ್ಲೆಂ ತೆಂ ಜೀಪ್ ’ಬರ್ರ್’ ಕರುನ್ ಆವಾಜ್ ಉಟವ್ನ್ ಮುಕಾರ್ ಧಾಂವ್ಲೆಂ.
ತಿತ್ಲೆಂಚ್!
ಆಪ್ಲ್ಯಾ ಘರಾಚೆಂ ದಾರ್ ಉಗ್ತೆಂ ಕರುನ್ ಶೀತಲ್ ಭಾಯ್ರ್ ಆಯ್ಲೆಂ.
ಕಾರಾಚಾ ದಾರಾಕ್ ತಶೆಂಚ್ ಆಪ್ಲ್ಯಾ ಹಾತಾನ್ ಧರುನ್ ತೊ ಧಾಂಪುಂಕ್ ವಿಸ್ರಾಲ್ಲೆಂ ಮಿಶೇಲ್ ಆಪ್ಲ್ಯಾ ಭಾಯ್ಲ್ಯಾ ರಸ್ತ್ಯಾ ವಯ್ಲ್ಯಾ ನದ್ರೆಕ್ ಕಾಡುನ್ ಆತಾಂ ಹೆವ್ಶಿಂ ಘುಂವ್ಲೆಂ. ಶೀತಲ್ ತಾಚ್ಯಾ ಘರಾಚ್ಯಾ ಮುಕ್ಲ್ಯಾ ದಾರ್ವಟ್ಯಾರ್ ತಾಕಾ ದಿಸ್ಲೆಂ. ತಿತ್ಲೆಂಚ್!
ಕಾರಾಚೆಂ ದಾರ್ ಭಂಧ್ ಕರುನ್ ಮಿಶೆಲ್ ಶೀತಲಾಚಾ ಘರಾಚಿಂ ಮೆಟಾಂ ಚಡ್ಲೆಂ.
ಶೀತಲಾಚ್ಯಾ ಲಾಗಿಂ ಆಯಿಲ್ಲ್ಯಾ ಮಿಶೇಲಾಕ್, ಶೀತಲಾಕ್ ಪಳವ್ನ್ ತೆಂ ಮಸ್ತ್ ರಡ್ಲಾಂ ಮ್ಹಳ್ಳೆಂ ಸ್ಪಶ್ಟ್ ಜಾಲೆಂ. ತಾಚ್ಯಾ ದೊಳ್ಯಾಂ ಥಾವ್ನ್ ದೆಂವ್ಲ್ಲಿಂ ದುಖಾಂ ತಾಚ್ಯಾ ದೊಳ್ಯಾಂ ಸವೆಂ ತಾಚ್ಯಾ ತ್ಯಾ ಪೊಲ್ಯಾಂಕ್ಯ್ ತಾಂಬ್ಡೆ ಕರುನ್ ಗೆಲ್ಲಿಂ.
ಶೀತಲಾಕ್ ಪಳವ್ನ್ ಮಿಶೇಲಾಚಾ ಮತಿಂತ್ ಸಭಾರ್ ಸವಾಲಾಂ ಉಟೊನ್ ಆಯ್ಲಿಂ ಜಾಲ್ಯಾರ್ಯ್ ಘರಾ ಭಾಯ್ರ್ ಮಿಶೇಲಾನ್ ಆಪ್ಲ್ಯಾ ತೊಂಡಾಕ್ ಭಲಾತ್ಕಾರೆನ್ ಮ್ಹಳ್ಳ್ಯಾ ಪರಿಂ ಬೀಗ್ ವೊಡ್ಲೆಂ. ತಾಣೆಂ ಭಾಯ್ರ್ ಕಾಂಯ್ ಪ್ರಸ್ತಾಪ್ ಕಾಡ್ಲೊ ನಾ.
"ಕಿತೆಂ ಹೆಂ ಶೀತಲ್? ಕಿತೆಂ ಹಾಲ್ ಕೆಲ್ಯಾಯ್ ತುಜ್ಯೆ....?" ಘರಾ ಭಿತರ್ ಆಯಿಲ್ಲೆಂ ಮಿಶೇಲ್ ಶೀತಲಾಕ್ ಪಳಂವ್ಚ್ಯಾರ್ಚ್ ಪಡ್ಲೆಂ.
ಶೀತಲಾಕ್ ಲಾಗಿಂ ಥಾವ್ನ್ ಪಳೆಲ್ಲ್ಯಾ ಮಿಶೇಲಾಕ್ ಶೀತಲಾಚೆರ್ ದುಬಾವ್ ಜಾಲೊ. ಶೀತಲಾಚಾ ತೊಂಡಾಚೊ ಛಾರೊ...., ತಾಚ್ಯಾ ದೊಳ್ಯಾಂಚಿ ತಿ ವಿಚಿತ್ರ್ ಪ್ರಕಾಸಾಚಿ ನದರ್..... ತ್ಯಾ ಭಾಯ್ರ್ ರಡೊನ್ ತಾಂಬ್ಡೆ ಜಾಲ್ಲೆ ತೆ ಪೊಲೆ ಪಳಯ್ತಾನಾ ಶೀತಲಾ ಥಂಯ್ ಕಾಂಯ್ ತರ್ಯ್ ಜಾಲಾಂ ಮ್ಹಳ್ಳೆಂ ತೆಂ ಮಿಶೇಲಾಕ್ ಸಮ್ಜಾಲೆಂ.
"ಕಿತೆಂ ಜಾಲೆಂ ಶೀತಲ್....?" ಆಪ್ಲ್ಯಾ ಪಯ್ಲ್ಯಾ ಸವಾಲಾಕ್ ಶೀತಲಾ ಥಾವ್ನ್ ಕಾಂಯ್ ಜವಾಬ್ ಯೇಂವ್ಕ್ ನಾತ್ಲ್ಲಿ ಪಳವ್ನ್ ಪರ್ತ್ಯಾಕ್ ಮಿಶೇಲಾನ್ ಸವಾಲ್ ಕೆಲೆಂ.
"ಆಜ್ ಆಮ್ಚೆ ಮಧೆಂ ಝಗ್ಡೆಂ ಜಾಲೆಂ ಮಿಶೇಲ್!" ಶೀತಲ್ ಕಾಂಯ್ಚ್ ಮುಲಾಜ್ ನಾಸ್ತಾನಾ ಉಲಯ್ಲೆಂ.
"ಝಗ್ಡೆಂ.....? ಕಿತ್ಯಾಕ್?" ದೋನ್ ದಿಸಾಂ ಪಯ್ಲೆಂ ಇತ್ಲ್ಯಾ ಬರ್ಯಾನ್ ಆಸ್ಲ್ಲಿಂ ಹಿಂ ದೊಗಾಂಯ್ ಆಜ್ ಅಚಾನಕ್ ಝಗಡ್ನ್ ಪಡ್ಲ್ಯಾಂತ್ ಮ್ಹಳ್ಯಾರ್....? ತೆಂಯ್ ಶೀತಲಾನ್ ರಡೊನ್ ಆಪ್ಣಾಕ್ ಆಪಂವ್ಚಾ ತಿತ್ಲೆಂ ವ್ಹಡ್ಲೆಂ ಝಗ್ಡೆಂ ಮ್ಹಳ್ಯಾರ್.....? ಮಿಶೇಲಾಕ್ ಸಮ್ಜೊಂಕ್ ಕಶ್ಟ್ ಮಾರ್ತಾಲೆ.
"ತುಕಾ ಕಿತೆಂ ಸಾಂಗೊಂ ಮಿಶೇಲ್.....?" ಶೀತಲ್ ಕಿತ್ಯಾಕ್ಗೀ ಆಪ್ಣಾ ಭಿತರ್ಚ್ ಲಾಚಾರ್ ಮ್ಹಳ್ಳ್ಯಾ ಪರಿಂ ದಿಸ್ತಾಲೆಂ.
"ತುಂ ಝಗಡ್ಲೆಂಯ್ ಕಿತ್ಯಾಕ್.....?" ಮಿಶೇಲಾನ್ ಕ್ರತಕ್ ರಾಗ್ ದಾಖಯ್ಲೊ. ಆಪ್ಲ್ಯಾ ಹಾತಾಂತ್ಲೆಂ ವ್ಯಾನಿಟಿ ಬ್ಯಾಗ್ ಥಂಯ್ಚ್ ಸೋಫಾರ್ ಗಳವ್ನ್ ತೆಂ ಆತಾಂ ಸೋಫಾರ್ ಬಸ್ಲೆಂ.
"ವಿಶು ಘರಾ ನಾ.....?" ವಿಶು ಘರಾ ಆಸಾ ವಾ ನಾ ತೆಂ ಮಿಶೇಲಾಕ್ ಖಚಿತ್ ಕರುಂಕ್ ಜಾಯ್ ಆಸ್ಲ್ಲೆಂ. ರಾಯನಾನ್ ಮಿಶೇಲಾಕ್ ಪಯ್ಲೆಂಚ್ ಹ್ಯಾ ವಿಶಯಾಂತ್ ಜಾಗ್ರುತ್ಕಾಯ್ ದಿಲ್ಲಿ. ಶೀತಲ್ ತಾಚೆಂ ಸಾಂಗಾತಿಣ್ ವ್ಹಯ್! ಪುಣ್ ತೆಂ ಸಾಂಗಾತಿಣ್ ಮ್ಹಳ್ಳ್ಯಾ ಎಕಾಚ್ ಕಾರಾಣಾಕ್ ಲಾಗೊನ್ ಆಶೆಂ ತಾಂಚಾ ಕಾಜಾರಿ ಜಿವಿತಾಂತ್ ಮೆತೆರ್ ಜಾಂವ್ಕ್ ಸಾದ್ಯ್ ನಾತ್ಲ್ಲೆಂ.
"ನಾ!" ಶೀತಲಾನ್ ಸಾಂಗ್ತಾನಾ ವಿಶು ಘರಾ ನಾ ಮ್ಹಳ್ಳೆಂ ತೆಂ ಮಿಶೇಲಾಕ್ ಖಚಿತ್ ಜಾಲೆಂ.
"ಖಂಯ್ ಗೆಲಾ.....?"
"ಖಬಾರ್ ನಾ!"
"ವಿಶು ಲಾಗಿಂ ಝಗಡ್ನಾಕಾ ಮ್ಹಣೊನ್ ತುಕಾ ಹಾವೆಂ ಸಾಂಗ್ಲ್ಲೆಂ! ತುಂ ಕಿತ್ಯಾಕ್ ಝಗ್ಡೊಂಕ್ ಗೆಲೆಂಯ್....?" ದೋನ್ ದಿಸಾಂ ಪಯ್ಲೆಂ ಶೀತಲ್ ಮಿಶೇಲಾಚಾ ಘರಾ ಆಯಿಲ್ಲ್ಯಾ ವೆಳಾರ್ ಶೀತಲಾಕ್ ಮಿಶೇಲಾನ್ ಬರೊಚ್ ಶೆರ್ಮಾಂವ್ ದಿಲ್ಲೊ.
"ಹಾಂವ್ ಜಾಯ್ ಮ್ಹಣೊನ್ ತಾಚ್ಯೆಲಾಗಿಂ ಝಗ್ಡೊಂಕ್ ನಾ ಮಿಶೇಲ್! ಉಲಯ್ತಾಂ ಉಲಯ್ತಾಂ ರಾಗ್ ಆಯ್ಲೊ. ರಾಗಾನ್ ಕಿತೆಂ ಉಲಯ್ಲಿಂ. ಝಗ್ಡೆಂ ಚಡ್ ಜಾಲೆಂ!" ಶೀತಲ್ ಆಪ್ಣಾ ಮುಕಾರ್ ಕಿತೆಂ ತರ್ಯ್ ಲಿಪಯ್ತಾ ಮ್ಹಳ್ಳ್ಯಾ ಪರಿಂ ಮಿಶೇಲಾಕ್ ದಿಸ್ಲೆಂ.
"ತಶೆಂಚ್ ತೆಂ ಜಾಂವ್ಚೆ!" ಮಿಶೇಲಾನ್ ಆತಾಂ ಶೀತಲಾಕ್ ತೀಕ್ಷ್ಣ್ ನದ್ರೆನ್ ಪಳೆಲೆಂ.
ಹೆಂ ಪಳೆಲ್ಲ್ಯಾ ಶೀತಲಾನ್ ಆಪ್ಲಿ ನದರ್ ಸಕಯ್ಲ್ ಬಾಗಾಯ್ಲಿ.
"ತುಕಾ ವಿಶುನ್ ಮಾರ್ಲೆಂ.....?" ಆಪ್ಣಾಕ್ ಉದೆಲ್ಲ್ಯಾ ದುಬಾವಾಕ್ ಮಿಶೇಲಾನ್ ಉಚಾರ್ಲೊ.
"ನಾ!" ತಕ್ಲಿ ಹಾಲಯಿಲ್ಲೆಂ ಶೀತಲಾನ್ ಆಪ್ಣೆ ಹುಸ್ಕಾರ್ತಾನಾ ಭಂಧ್ ಜಾಲ್ಲ್ಯಾ ಆಪ್ಲ್ಯಾ ನಾಕಾ ಥಾವ್ನ್ ಭಳಾನ್ ಶ್ವಾಸ್ ವಯ್ರ್ ವೊಡ್ಲೊ.
"ತುಂ ಫಟ್ ಮಾರ್ತಾಯ್ ಶೀತಲ್!" ಮಿಶೇಲಾಕ್ ಆತಾಂ ನಖ್ಖಿ ಜಾಲೆಂ.
"ಹಾಂವ್ ಗಾಂವಾಕ್ ವಚೊಂಕ್ ಚಿಂತಾಂ ಮಿಶೇಲ್! ಮ್ಹಾಕಾ ಹಾಂಗಾ ರಾವೊಂಕ್ ಜಾಯ್ನಾಂ!" ಶೀತಲಾನ್ ಆಪ್ಲಿ ತಕ್ಲಿ ವಯ್ರ್ ಉಕ್ಲುನ್ ಮುಕ್ಲ್ಯಾ ಜನೆಲಾ ತೆವ್ಶಿಂ ಪಳೆಲೆಂ.
"ಗಾಂವಾಂಕ್ ವಚೊಂಕ್ ಚಿಂತಾಯ್? ಕಿತ್ಯಾಕ್....?" ಮಿಶೇಲಾಕ್ ಆಪ್ಣಾ ಸಾಮ್ಕಾರ್ ಜಗ್ಲಾಣೆ ಮಾರ್ಲ್ಲೊ ಅನುಭವ್ ಜಾಲೊ. ಗಾಂವಾ ಥಾವ್ನ್ ತ್ಯಾ ಅಪುಟ್ ಸಪ್ಣಾಕ್ ಘೆವ್ನ್ ಆಯಿಲ್ಲೆಂ ಶೀತಲ್ ಆತಾಂ ಪಾಟಿಂ ಗಾಂವಾಕ್...? ಹಾಂಗಾಚೊ ವಿಶಯ್ ಗಂಭೀರ್ ಆಸಾ ಮ್ಹಳ್ಳ್ಯಾ ಪರಿಂ ಶೀತಲಾಕ್ ದಿಸ್ಲೆಂ.
"ಮ್ಹಾಕಾ ದಿಸ್ತಾ ಹಾಂಗಾ ವಿಶುಕ್ ಕೋಣ್ ತರ್ಯ್ ಆಸಾ! ದೆಕುನ್ ತಾಕಾ ಮ್ಹಜಿ ಗರ್ಜ್ ನಾ!" ತ್ಯಾ ಮುಕ್ಲ್ಯಾ ಜನೆಲಾಕ್ ಪಳೆವ್ನ್ ಸಾಂಗ್ಲ್ಲ್ಯಾ ಶೀತಲಾನ್ ಆಪ್ಲ್ಯಾ ದೊಳ್ಯಾಂಕ್ ಹಾತಾನ್ ಘೆಶ್ಟಿಲೆಂ. ತ್ಯಾ ತಾಚ್ಯಾ ದೊಳ್ಯಾಂನಿ ದುಖಾಂ ಭರ್ಲ್ಲಿಂ. ದುಖಾಂನಿ ಭಿಜ್ಲ್ಲ್ಯಾ ಹಾತಾಕ್ ತಾಣೆಂ ಆಪ್ಲ್ಯಾ ವಸ್ತುರಾಕ್ ಪುಸ್ಲೊ.
"ತುಂ ಪಿಶೆಂ ಜಾಲಾಂಯ್ ಕಿತೆಂ....?" ಮಿಶೇಲಾಕ್ ಶೀತಲಾಚಿಂ ಉತ್ರಾಂ ಜಿರ್ವಣ್ ಕರುಂಕ್ ಕಶ್ಟ್ ಜಾಲಿಂ. ಶೀತಲ್ ಆಪ್ಲ್ಯಾ ರಾಗಾಚಾ ಭಳಾರ್ ಆನಿ ಝಗ್ದ್ಯಾಚಾ ಕಾರಾಣಾಕ್ ಲಾಗೊನ್ ಆಪ್ಲ್ಯಾ ಘೊವಾ ವಯ್ರ್ ದುಬಾವಾರ್ ಜಾಲಾಂ. ಮಿಶೇಲಾನ್ ಚಿಂತ್ಲೆಂ.
"ಹೊ ತುಜೊ ದುಬಾವ್ ಶೀತಲ್!" ಮಿಶೇಲ್ಚ್ ಉಲಯ್ಲೆಂ. "ತುಮ್ಚೆಂ ಕಾಜಾರ್ ಜಾವ್ನ್ ಪುರ್ತೆಂ ಏಕ್ ವರಸ್ ಜಾಂವ್ಕ್ ನಾ! ಇತ್ಲ್ಯಾ ಭಿತರ್......?" ಮಿಶೇಲ್ ಶೀತಲಾಚಾ ಉತ್ರಾಂಕ್ ಪಾತ್ಯೆಂವ್ಕ್ ಭಿಲ್ಕುಲ್ ತಯಾರ್ ನಾತ್ಲ್ಲೆಂ.
"ಹೆಂ ಸಗ್ಳೆಂ ಮ್ಹಜೆಂಚ್ ಕರ್ಮ್ ಮಿಶೇಲ್! ಬಾಪಾಯ್ಚಾ ಗುಸ್ತಾರ್ ಕಾಡ್ಲ್ಲೆಂ ಸುಖ್.....!" ಶೀತಲಾನ್ ಜಿವಿತಾಂತ್ ಕಿತೆಂಗೀ ಮಾಂದುನ್ ಘೆತ್ಲಾಂ ಮ್ಹಳ್ಳ್ಯಾ ಪರಿಂ ತೆಂ ಉಲಯ್ಲೆಂ. "ತೊ ಜಿಮ್ಮಿಯ್ ಸಾರ್ಕೊ ಸಾಂಗ್ತಾಲೊ! ದುಖಾಂಚೊ ಆನಿ ರಗ್ತಾಚೊ ಶಿರಾಪ್ ಸುಟೊನ್ ವಚಾನಾ! ಹೊಚ್ಚ್ ಶಿರಾಪ್ ಆತಾಂ ಮ್ಹಜ್ಯಾ ಮಾತ್ಯಾರ್ ಬೆಜ್ಲಾ!" ಶೀತಲ್ ಆತಾಂ ಭಾವುಕ್ ಜಾಲೆಂ. ತೆಂ ಉಲಯ್ತಾಂ ಉಲಯ್ತಾಂ ಹ್ಯಾ ತಾಚ್ಯಾ ಪ್ರಸ್ತುತ್ ಸಂಸಾರಾ ಥಾವ್ನ್ ಮಸ್ತ್ ಪಯ್ಸ್ ಪಾವ್ಲೆಂ. ತಾಚ್ಯಾ ದೊಳ್ಯಾಂ ಮುಕಾರ್ ಜಿಮ್ಮಿ ದಿಸೊನ್ ಯೆತಾನಾ ತಾಚ್ಯಾ ಕಾನಾಂಕ್ ಜಿಮ್ಮಿಚಿಂ ಉತ್ರಾಂ ಉಡಾಸಾಕ್ ಆಯ್ಲಿ.
"ತುಂ ಜಿಮ್ಮಿಕ್ ಉಜೊ ಲಾಯ್!" ಮಿಶೇಲ್ ಬಡ್ಬಡ್ಲೆಂ. "ಹೆಂ ತುಜ್ಯಾ ಜಿವಿತಾಚೆಂ ಸವಾಲ್! ತ್ಯಾ ಆದ್ಲ್ಯಾ ಉಡಾಸಾ ಪಾಟ್ಲ್ಯಾನ್ ಧಾಂವ್ಚೆಂ ನ್ಹಯ್! ತ್ಯಾ ಜಿಮ್ಮಿನ್ ಸಾಂಗ್ಲ್ಲ್ಯಾ ಪರಿಂ ಸಗ್ಳೆಂ ಜಾಲೆಂ ಮ್ಹಣೊನ್ ನ್ಹಯ್!" ಜಿವಿತಾಂತ್ ಪಯ್ಲೆ ಪಾವ್ಟಿಂ ಮಿಶೇಲಾನ್ ಜಿಮ್ಮಿ ವಯ್ರ್ ರಾಗ್ ಉಚಾರ್ಲ್ಲೊ. ಹಾಚ್ಯಾ ಆದಿಂ ತೆಂ ಜಿಮ್ಮಿಚೆರ್ ರಾಗಾರ್ ಜಾಲಾಂ ಜಾಲ್ಯಾರ್ಯ್ ಜಿಮ್ಮಿ ವಿರೋಧ್ ತೆಂ ಉಲಯಿಲ್ಲೆಂ ನಾ. ಪುಣ್ ಆಜ್.....? ಆಜ್ ತಾಕಾ ಹಾಂಗಾಸರ್ ಜಿಮ್ಮಿ ಪ್ರಾಮುಖ್ಯ್ ನ್ಹಯ್! ಬಗಾರ್ ಶೀತಲಾಚೆಂ ಜಿವಿತ್! ಜಿಮ್ಮಿಚಿಂ ಉತ್ರಾಂ ಫಟ್ ಜಾಂವ್ಕ್ ಸಕ್ತಾತ್ ಪುಣ್ ಶೀತಲಾಚೆಂ ಜಿವಿತ್? ಹೆಂ ಫಟ್ ಜಾಂವ್ಕ್ ಸಕ್ತಾ? ಕೆದಿಂಚ್ ನಾ.
"ಜಿವಿತ್...?" ಥೊಡ್ಯಾ ವೆಳಾನ್ ಶೀತಲ್ ಉಲಯ್ಲೆಂ. ".... ಕಸಲೆಂ ಜಿವಿತ್ ಮಿಶೇಲ್? ಮ್ಹಜೆಂ ಜಿವಿತ್ ಕಿತೆಂ ಮ್ಹಳ್ಳೆಂ ತೆಂ ಅಜೂನ್ ಮ್ಹಾಕಾಚ್ ಕಳಿತ್ ನಾ. ಹೆಂಚ್ ಹಾಂವ್ ಆತಾಂ ಸುಧುನ್ ಆಸಾ. ವಿಶುಲಾಗಿಂ ಕಾಜಾರ್ ಜಾವ್ನ್ ಮುಂಬಯಿ ಯೆತಾನಾ ಮ್ಹಾಕಾ ಮ್ಹಜಿಂ ಮ್ಹಳ್ಳಿ ಸಪ್ಣಾಂ ಆಸ್ಲ್ಲಿಂ. ಮ್ಹಜಿ ಮ್ಹಳ್ಳಿ ಆಶಾ ಆಸ್ಲ್ಲಿ. ಪುಣ್ ಆತಾಂ ಸಗ್ಳೆಂ ತುಟೊನ್ ಗೆಲ್ಲ್ಯಾ ಪರಿಂ ದಿಸ್ತಾ. ಹಾಂಗಾ ಹಾಂವ್ ಮ್ಹಾಕಾಚ್ ಸೊದ್ತಾಂ. ತುಂ ಜಾಣಾಂಯ್? ಹಾಂಗಾ ಯೇ..... ತುಕಾ ದಾಖಯ್ತಾಂ!" ಕಿತೆಂಗೀ ಚಿಂತ್ಲ್ಲೆಂ ಶೀತಲ್ ಸೋಫಾ ಥಾವ್ನ್ ಉಟ್ಲೆಂ.
ಸೋಫಾ ವಯ್ಲೆಂ ಉಟ್ಲ್ಲೆಂ ಶೀತಲ್ ಮಿಶೆಲಾಚೊ ಹಾತ್ ಧರುನ್ ಮಿಶೇಲಾಕ್ ಸೋಫಾ ವಯ್ಲೆಂ ಉಟವ್ನ್ ಆಪ್ಲ್ಯಾ ಬೆಡ್ರೂಮಾಕ್ ಆಪವ್ನ್ ವರುನ್ ಗೆಲೆಂ.
ಶೀತಲಾಚ್ಯಾ ಹ್ಯಾ ಅಚಾನಕ್ ವರ್ತಾನಾಕ್ ಪಳವ್ನ್ ಮಿಶೇಲಾಕ್ ಆಶ್ಚರ್ಯ್ ಜಾಲೆಂ. ಜಿವಿತಾ ವಿಶಿಂ ಉಲಂವ್ಚೆಂ ಶೀತಲ್ ಆಪ್ಣಾಕ್ ಕಿತೆಂ ದಾಖಂವ್ಕ್ ಸೊಧ್ತಾ? ಹೆಂ ಮಿಶೆಲಾಚಾ ಚಿಂತ್ಪಾ ಭಾಯ್ರ್ ಆಸ್ಲ್ಲೆಂ. ತಾಣೆಂ ತಸೊಚ್ಚ್ ಶೀತಲಾಚೊ ಪಾಟ್ಲಾವ್ ಕೆಲೊ.
ಬೆಡ್ರೂಮಾಕ್ ಆಯಿಲ್ಲ್ಯಾ ಶೀತಲಾನ್ ಆಪ್ಲೆಂ ಕಬಾಟ್ ಉಗ್ತೆಂ ಕರುನ್ ತ್ಯಾ ಕಬಾಟಾಚಾ ವಯ್ಲ್ಯಾ ಅಂಕಣಾಂತ್ ನಿದಾಯ್ಲೆಲ್ಯಾ ರ್ಯಾಪಿಂಗ್ ಪೇಪರಾಂತ್ ರೆವ್ಡಾಯಿಲ್ಲ್ಯಾ ಪಾತಳ್ ವಸ್ತುಕ್ ಭಾಯ್ರ್ ಕಾಡ್ಲಿ.
ಮಿಶೇಲ್ ಕಾಂಯ್ಚ್ ಉಲಯ್ನಾಸ್ತಾನಾ ಶೀತಲಾಕ್ಚ್ ಪಳೆತಾಲೆಂ.
ತಿತ್ಲೆಂಚ್!
ಎಕಾಚ್ಚ್ ಫರಾ ಮಿಶೆಲಾಚಾ ಮತಿಂತ್ ಕಿಟಾಳ್ ಪೆಟ್ಲ್ಲ್ಯಾ ಪರಿಂ ಜಾಲೆಂ. ತಾಚ್ಯಾ ಪಾಟ್ಲ್ಯಾನ್ ತಾಚೊ ಉಡಾಸ್ ಪಾಟಿಂ ಧಾಂವ್ಲೊ.
ವ್ಹಯ್!
ತ್ಯಾ ರ್ಯಾಪಿಂಗ್ ಪೇಪರಾಕ್ ಹಾಚ್ಯಾ ಆದಿಂ ಖಂಯ್ಚರ್ಗೀ ಪಳೆಲ್ಲೊ ಮಿಶೇಲಾಕ್ ಉಡಾಸ್ ಆಯ್ಲೊ.
ಗಿಫ್ಟ್!
ಜಿಮ್ಮಿನ್ ಶೀತಲಾಕ್ ಶೀತಲಾಚಾ ಕಾಜಾರಾ ಬಾಬ್ತಿನ್ ದಿಲ್ಲೆಂ ಗಿಫ್ಟ್!
ಮಿಶೇಲಾಕ್ ಉಡಾಸ್ ಆಯ್ಲೊ.
ಶೀತಲ್ ತ್ಯಾ ಗಿಫ್ಟಾಕ್ ಸೊಡಯ್ತಾಲೆಂ. ಹೆಣೆಂ ತೆಣೆಂ ಪಿಂದ್ಲ್ಲೆಂ ಪೇಪರ್ ಪಳೆತಾನಾ ಹಾಚ್ಯಾ ಆದಿಂ ತ್ಯಾ ಪೇಪರಾಕ್ ಸೊಡಯ್ಲಾಂ ಆನಿ ಪರ್ತ್ಯಾಕ್ ತಶೆಂಚ್ ರ್ಯಾಪ್ ಕೆಲಾಂ ಮ್ಹಳ್ಳೆಂ ಮಿಶೇಲಾಕ್ ಕಳ್ಳೆಂ.
ಶೀತಲಾನ್ ತ್ಯಾ ಗಿಫ್ಟಾಚ್ಯಾ ರ್ಯಾಪಿಂಗ್ ಪೇಪರಾಕ್ ಸೊಡವ್ನ್ ಆತಾಂ ತೆಂ ಗಿಫ್ಟ್ ಮಿಶೇಲಾಚಾ ಮುಕಾರ್ ದವರ್ಲೆಂ.
ತಿತ್ಲೆಂಚ್!
ಮಿಶೇಲ್ ಆಪ್ಣಾಕ್ಚ್ ಪಾತ್ಯೆಲೆಂ ನಾ.
ಏಕ್ ಸೊಭಿತ್ ಪಿಂತುರ್!
ಮಿಶೇಲಾನ್ ತ್ಯಾ ಪಿಂತುರಾಕ್ಚ್ ಪಳೆಲೆಂ.
ತ್ಯಾ ಪಿಂತುರಾಂತ್ ಏಕ್ ವ್ಹಡ್ಲೊ ಆರ್ಸೊ ಆಸ್ಲ್ಲೊ. ತ್ಯಾ ಆರ್ಶ್ಯಾ ಪುಡ್ಯಾನ್ ರಾವೊನ್ ಏಕ್ ಚಲಿ ಆಪ್ಣಾಚೆಂ ರೂಪ್ ತ್ಯಾ ಆರ್ಶ್ಯಾಂತ್ ಪಳೆತಾಲಿ. ಪುಣ್ ತ್ಯಾ ಆರ್ಶ್ಯಾಂತ್ ತಿಚೆಂ ಪ್ರತಿರೂಪ್ ದಿಸಾನಾತ್ಲ್ಲೆಂ. ತೊ ಆರ್ಸೊ ಖಾಲಿ ಆಸ್ಲ್ಲೊ.
ಥೊಡಿಂ ಕ್ಷಣಾಂ ಶೀತಲಾನ್ ತ್ಯಾ ಪಿಂತುರಾಕ್ಚ್ ಪಳೆಲೆಂ.
"ಹ್ಯಾ ಪಿಂತುರಾಕ್ ಪಳೆತಾಂ ಪಳೆತಾಂ ಹಾಂವ್ ಆಪ್ಣಾಕ್ಚ್ ಹ್ಯಾ ಆರ್ಶ್ಯಾಂತ್ ಸೊಧ್ತಾಂ ಮಿಶೇಲ್! ಜಾಲ್ಯಾರ್ಯ್ ಮ್ಹಾಕಾಚ್ ಹಾಂವ್ ದಿಸಾನಾಂ! ಮ್ಹಜೆಂ ಜಿವಿತ್ ಖಂಯ್ಚರ್ಗೀ ಮಾಯಾಗ್ ಜಾಲಾಂ. ತೆಂ ಹಾವೆಂ ಸೊಧುನ್ ಹಾಡುನ್ ಮ್ಹಜ್ಯಾ ರುಪ್ಣ್ಯಾಂತ್ ಸೊಭವ್ನ್ ತಾಕಾ ಸೊಭಾಯ್ ದೀಂವ್ಕ್ ಆಸಾ ಆನಿ ಹ್ಯಾ ಆರ್ಶ್ಯಾಂತ್ ತಾಚೆಂ ಪ್ರತಿರೂಪ್ ಕಾಂತಂವ್ಕ್ ಆಸಾ!"
ಎಕಾಚ್ಚ್ ನದ್ರೆನ್ ತ್ಯಾ ಪಿಂತುರಾಕ್ ಪಳೆಂವ್ಚ್ಯಾ ಮಿಶೇಲಾಕ್ ಶೀತಲಾಚಿಂ ಉತ್ರಾಂ ಸಾರ್ಕಿಂ ಮ್ಹಣೊನ್ ದಿಸ್ಲಿಂ.
" ತುಜ್ಯಾ ಜಿವಿತಾಚಿ ವಾಟ್ ನೀಟ್ ಕರ್ಚ್ಯಾ ಖಾತಿರ್ ಜಿಮ್ಮಿನ್ ಹೆಂ ಪಿಂತುರ್ ಪಿಂತ್ರಾಂವ್ಕ್ ನಾ.....?" ಹ್ಯಾ ಪಿಂತುರಾ ಪಾಟ್ಲಿ ಜಾಣ್ವಾಯ್ ಮಿಶೇಲಾಕ್ ಸಮ್ಜಾಲ್ಲಿ. ತಾಕಾ ಜಿಮ್ಮಿಚೆರ್ ಆತಾಂ ದುಬಾವ್ ಉದೆಲೊ.
"ಜಿಮ್ಮಿಕ್ ಪಿಂತುರಾಂ ಪಿಂತ್ರಾಂವ್ಕ್ ಜಾಯ್ನಾಂ! ತರ್....?" ಮಿಶೇಲ್ ಆತಾಂ ಚಿಂತುಂಕ್ ಪಡ್ಲೆಂ. ಜಿಮ್ಮಿನ್ ಹ್ಯಾ ಆದಿಂ ಪಿಂತುರಾಂ ಪಿಂತ್ರಾಯಿಲ್ಲೆಂ ತೆಂ ನೆಣಾಂ. ಪಿಂತುರಾಂ ಪಿಂತ್ರಾಂವ್ಚಾ ಪಯ್ಕಿ ತೆಂ ಜಾಣಾಂ ಆಸ್ಲ್ಲೆಂ ಮ್ಹಳ್ಯಾರ್.....
"ವ್ಹಯ್! ಆಲ್ವಿನ್!" ಮತಿಂತ್ಚ್ ಉದ್ಗಾರ್ಲ್ಲ್ಯಾ ಮಿಶೇಲಾನ್ ತ್ಯಾ ಪಿಂತುರಾಚೆರ್ ತೆಂ ಪಿಂತುರ್ ಪಿಂತ್ರಾಯಿಲ್ಲ್ಯಾಚೆಂ ನಾಂವ್ ಸೊಧ್ಲೆಂ.
ಎಕಾಚ್ಚ್ ಖಿಣಾ ಭಿತರ್ ಮಿಶೇಲಾಚೊ ದುಬಾವ್ ನಪಂಯ್ಚ್ ಜಾಲೊ.
ಪಿಂತುರಾಚಾ ಕೊನ್ಶ್ಯಾರ್ ತಾಚ್ಯಾ ದೊಳ್ಯಾಂ ನದ್ರೆಕ್ ಸಾಂಪಡ್ಲೆಂ ತೆಂಚ್ ನಾಂವ್ ಜೆಂ ಆಲ್ವಿನಾನ್ ಪಿಂತ್ರಾಯಿಲ್ಲ್ಯಾ ಮಿಶೇಲಾಚಾ ಹರ್ಯೆಕಾ ಪಿಂತುರಾಚೆರ್ ಆಸ್ಲ್ಲೆಂ!
"ಹೊ ಜಿಮ್ಮಿ ಆಸಾ ಪಳೆ ವೆರ್ರಿ ಸ್ಮಾರ್ಟ್!" ಸವ್ಕಾಸ್ ಮಿಶೇಲಾಚಾ ವೊಂಟಾರ್ ಹಾಸೊ ಉದೆಲ್ಯೊ.
ತ್ಯಾ ದೀಸ್ ಜಿಮ್ಮಿನ್ ಸಾಂಗ್ಲ್ಲ್ಯಾ ಪರಿಂಚ್ ತಾಣೆಂ ಭೋವ್ ಮಾರಗಾಯೆಚೆಂ ಗಿಫ್ಟ್ ಭೋವ್ಚ್ ಸುಲಾಭಾಯೆನ್ ಫುಕಾಟಾಕ್ ಘೆತ್ಲ್ಲೆಂ ಆನಿ ಶೀತಲಾಕ್ ಗಿಫ್ಟ್ ಜಾವ್ನ್ ದಿಲ್ಲೆಂ. ಹಿಚ್ಚ್ ಚಾಲ್ ತೊ ಮಿಶೇಲಾ ಸವೆಂಯ್ ಖೆಳ್ಲ್ಲೊ. ಮಿಶೇಲಾಚಾ ಕಾಜಾರಾಕ್ ಜಾಲ್ಯರ್ಯ್ ಜಿಮ್ಮಿನ್ ತಾಕಾ ಅಸಲೆಂಚ್ ಏಕ್ ಪಿಂತುರ್ ಗಿಫ್ಟ್ ಜಾವ್ನ್ ದಿಲ್ಲೆಂ. ತ್ಯಾ ಪಿಂತುರಾಕ್ ಆನಿ ಹ್ಯಾ ಪಿಂತುರಾಕ್ ಮಸ್ತ್ ಫರಕ್ ಆಸ್ಲ್ಲೊ. ತೆಂ ಹ್ಯಾ ಪಿಂತುರಾ ಪ್ರಾಸ್ ಸಂಪೂರ್ಣ್ ವೆಗ್ಳೆಂ.
"ಪಳೆ ಶೀತಲ್!" ಮಿಶೇಲ್ ಥಂಯ್ಚ್ ತ್ಯಾ ಬೆಡ್ರೂಮಾಂತ್ಲ್ಯಾ ಖಾಟಿಯೆರ್ ಬಸ್ಲೆಂ. "ಹಾಂವ್ ತುಕಾ ದುರ್ಸಾನಾ. ತುವೆಂ ಚಿಂತ್ಚೆಂ ಸಾರ್ಕೆಂ! ಹರ್ಯೆಕ್ಲ್ಯಾನ್ಯ್ ಬರೆಂ ಜಿವಿತ್ ಜಿಯೆಂವ್ಕ್ ಜಾಯ್! ಬೋವ್ಶ್ಯಾ ಹಾಂಗಾ ತುಕಾ ಥೊಡೊ ವೇಳ್ ಲಾಗೊಂಕ್ ಪುರೊ!" ಮಿಶೇಲ್ ಆಪ್ಲ್ಯಾ ಪಿಂತುರಾಚಾ ಸಂಸಾರಾ ಥಾವ್ನ್ ಭಾಯ್ರ್ ಆಯಿಲ್ಲೆಂ ತೆಂ ಆತಾಂ ಶೀತಲಾಚ್ಯಾ ವಿಶಿಂ ಚಿಂತುಂಕ್ ಲಾಗ್ಲೆಂ.
ತಿತ್ಲ್ಯಾರ್, ಶೀತಲ್ ಯೇವ್ನ್ ಮಿಶೇಲಾಚಾ ಲಾಗಿಂಚ್ ಬಸ್ಲೆಂ. ತಾಚೆ ದೊಳೆ ಮಾತ್ರ್ ಅಜೂನ್ ತಾಚ್ಯಾ ಹಾತಾಂತ್ ಆಸ್ಲ್ಲ್ಯಾ ತ್ಯಾ ಪಿಂತುರಾಚೆರ್ಚ್ ಖಂಚ್ಲ್ಲೆ. ತ್ಯಾ ಪಿಂತುರಾಂತ್ ದಾಖಯಿಲ್ಲೆಂ ಚಲಿ ಆಪುಣ್ಚ್ ಮ್ಹಳ್ಳ್ಯಾಪರಿಂ ತಾಕಾ ಭೊಗ್ತಾಲೆಂ.
"ತುಂ ನೆಣಾಂಯ್ ಮಿಶೇಲ್!" ಶೀತಲಾನ್ ವ್ಹಳೂ ಆಪ್ಲಿ ದೀಶ್ಟ್ ಆತಾಂ ವಯ್ರ್ ಉಕೊಲ್ಲಿ. "ವಿಶು ಆಪ್ಲ್ಯಾ ಬಿಜ಼ಿನೆಸಾ ಖಾತಿರ್ ಆನಿ ಪಯ್ಶೆ ಜೊಡ್ಚ್ಯಾ ಖಾತಿರ್ ಸಗ್ಳ್ಯಾಂ ಲಾಗಿಂ ಸಂಭಂಧ್ ದವರ್ತಾ. ತಾಚೊ ಸಂಭಂಧ್ ತ್ಯಾ ಅಂಡರ್ ವರ್ಲ್ಡಾಚಾ ಮನ್ಶ್ಯಾಂ ಸವೆಂಯ್ ಆಸಾ!" ಆಪುಣ್ ಸಂಪೂರ್ಣ್ ಸಲ್ವೊನ್ ಗೆಲ್ಲ್ಯಾ ಪರಿಂ ಶೀತಲ್ ಉಲಯ್ತಾಲೆಂ. ತಾಚ್ಯಾ ದೊಳ್ಯಾಂತ್ಲೆಂ ಆಶೆಚೆಂ ಕಿರಣ್ ಮ್ಹಳ್ಳೆಂ ತೆಂ ಉಭೊನ್ ಧಾಂವ್ಲ್ಲ್ಯಾ ಪರಿಂ ದಿಸ್ತಾಲೆಂ.
"ಮ್ಹಾಕಾ ಕಾಂಯ್ಚ್ ಸಮ್ಜಾನಾ ಶೀತಲ್! ಹಾಂವ್ ರಾಯನಾ ಲಾಗಿಂ ಉಲಂವ್....?" ಮಿಶೆಲ್ ಅಸಹಾಯಕ್ ಜಾಲ್ಲೆಂ.
"ಮ್ಹಾಕಾ ಭರ್ವಸೊ ನಾಂ ಮಿಶೇಲ್! ತುಂ ಮ್ಹಜೆಂ ಬೆಸ್ಟ್ ಪ್ರೆಂಡ್ ಮ್ಹಳ್ಳ್ಯಾ ಖಾತಿರ್ ಸಾಂಗ್ತಾಂ. ವಿಶುನ್ ಡೆಲ್ಲಿ ಥಾವ್ನ್ ಆಯ್ಲ್ಯಾ ಉಪ್ರಾಂತ್ ಏಕ್ ರಾತ್ಯ್ ಮ್ಹಜೆ ಸವೆಂ ಪಾಶರ್ ಕರುಂಕ್ ನಾ! ತಾಕಾ ಮ್ಹಜಿ ಗರ್ಜ್ ನಾ! ತರ್, ತಾಚಿ ಗರ್ಜ್ ತಿರ್ಸುಂಕ್ ತಾಕಾ ದುಸ್ರೆಂ ಕೋಣ್ ಆಸಾ ಮ್ಹಣೊನ್ ಜಾಂವ್ಕ್ ನಾ!?" ಶೀತಲಾನ್ ಆಪ್ಲ್ಯಾ ಜಿವಿತಾಚೆಂ ನಿಮಾಣೆಂ ಸತ್ ಮಿಶೇಲಾಚ್ಯಾ ಮುಕಾರ್ ದವರ್ಲೆಂ.
ಶೀತಲಾಚಿಂ ಉತ್ರಾಂ ಆಯ್ಕೊನ್ ಮಿಶೇಲಾಕ್ ಕಾಂಯ್ಚ್ ಸುಸ್ತಾಲೆಂ ನಾ.
"ಆಶೆಂ ಜಾಲ್ಯಾರ್ ಹಾಂಗಾ ಸದಾಂಯ್ ಝಗ್ಡೆಂ ಆನಿ ಲಡಾಯ್ ವಾಡ್ತೆಲೆಂ ಶಿವಾಯ್ ದುಸ್ರೆಂ ಕಾಂಯ್ ನಾ!" ಶೀತಲ್ಚ್ ಉಲಯ್ಲೆಂ. "ಹ್ಯಾಚ್ ಖಾತಿರ್ ಹಾಂವ್ ಮುಂಬಯಿ ಸೊಡುನ್ ಗಾಂವಾಕ್ ವೆಚೆಂ ಬರೆಂ ಮ್ಹಣೊನ್ ಚಿಂತಾಂ! ಗಾವಾಂತ್ ಜಾಲ್ಯಾರ್ಯ್ ಹಾಂವ್ ಮ್ಹಜ್ಯಾ ಬಾಪಾಯ್ಚ್ಯಾ ಘರಾಕ್ ಪಾಟಿಂ ವಚಾನಾ. ಎಕ್ಸುರಿಂ ಜಾಲ್ಯಾರ್ಯ್ ವ್ಹಡ್ ನಾ. ಆಪ್ಲೆಂ ಜಿವಿತ್ ಖಂಯ್ಚರ್ಯ್ ಸಮಾಧಾನೆನ್ ಸಾರ್ತಾಂ!" ಶೀತಲಾಚಾ ಉತ್ರಾಂನಿ ನಿರ್ಧಾರ್ ಸಾರ್ಕೊ ಝಳ್ಕಾತಾಲೊ.
"ತುಂ ಹಾವೆಂ ಸಾಂಗ್ಲ್ಲೆಂ ಆಯ್ಕ್ ಶೀತಲ್! ಆಮ್ಸೊರ್ನಾಕಾ. ಆಮಿಂ ಹಾಂಗಾಚ್ ಬರ್ಯಾನ್ ಹ್ಯಾ ತುಜ್ಯಾ ಪ್ರಾಬ್ಲೆಮಾಕ್ ಪರಿಹಾರ್ ಸೊಧ್ಲ್ಯಾರ್ ಬರೆಂ ಆಸಾ." ಮಿಶೇಲ್ ಉಲಯ್ತಾಲೆಂ ಜಾಲ್ಯಾರ್ಯ್ ಸಗ್ಳೆಂ ತಾಚ್ಯಾ ಹಾತಾಂತ್ ನಾತ್ಲ್ಲೆಂ.
ಶೀತಲ್ ಜರ್ ಮುಂಬಯಿ ಸೊಡುನ್ ಗಾಂವಾಕ್ ಗೆಲೆಂ ಜಾಲ್ಯಾರ್ ತಾಚೆಂ ಸಗ್ಳೆಂ ಜಿವಿತ್ ಪಿಡ್ಡ್ಯಾರ್ ಜಾಲ್ಲ್ಯಾ ಪರಿಂಚ್! ಹೆಂ ಮಿಶೇಲ್ ಜಾಣಾಂ ಆಸ್ಲ್ಲೆಂ. ಶೀತಲ್ ಉಲಂವ್ಕ್ ಕಿತೆಂಯ್ ಉಲಯ್ತಾಲೆಂ. ಪುಣ್ ತಾಣೆಂ ಉಲಯಿಲ್ಲ್ಯಾ ತಿತ್ಲೆಂ ಕಾರ್ಯಾನ್ ಕರುಂಕ್ ಸುಲಭ್ ನಾತ್ಲ್ಲೆಂ.
ಶೀತಲಾಚಾ ಹ್ಯಾ ಪರಿಸ್ಥಿತೆಂತ್ ಶೀತಲಾಕ್ ಎಕ್ಸುರ್ಯಾಕ್ ಸೊಡುನ್ ತಾಣೆಂ ವೆಚ್ಯಾ ಪರಿಂ ನಾ ತೆಂ ಚಿಂತ್ಲ್ಲ್ಯಾ ಮಿಶೇಲಾನ್ ರಾಯನಾಕ್ ಪೋನ್ ಕರುನ್ ಆಪುಣ್ ಸಾಂಜ್ ಪಾಸೊನ್ ಶೀತಲಾಚಾ ಘರಾಚ್ಚ್ ರಾಂವ್ಚೊ ವಿಚಾರ್ ಪರ್ಗಟ್ ಕರ್ತಾನಾ ಧನ್ಫರಾಂಚಾ ಜೆವ್ಣಾಕ್ ಯೆಂವ್ಚೊ ರಾಯನ್ ಘರಾ ಪರ್ತಾನಾಸ್ತಾನಾ ಆಫೀಸಾಂತ್ಚ್ ಉರ್ಲೊ.
ಶೀತಲಾಚ್ಯಾ ಪರಿಸ್ಥಿತೆಕ್ ಪಳಯ್ತಾನಾ ಥೊಡ್ಯಾ ಕ್ಷಣಾಂಕ್ ಜಿಮ್ಮಿನ್ ಸಾಂಗ್ಲ್ಲ್ಯಾಪರಿಂ ಶೀತಲಾಚಾ ಬಾಪಾಯ್ನ್ ಕೆಲ್ಲೆಂ ಕರ್ಮ್ಚ್ ಶೀತಲಾಚಾ ಜಿವಿತಾಕ್ ಆಡ್ ರಾವ್ಲಾಂ ಮ್ಹಳ್ಳೆಂ ಚಿಂತಾಪ್ ಮಿಶೇಲಾಚಾ ಮತಿಕ್ ಆಯ್ಲೆಂ ಜಾಲ್ಯಾರ್ಯ್ ಉಪ್ರಾಂತ್ಲ್ಯಾ ಘಡಿಯೆನಿಂ ಶೀತಲಾಚೆಂ ಜಿವಿತ್ ಕಶೆಂ ಬರೆಂ ಕರುಂಕ್ ಯೆತಾ ಮ್ಹಳ್ಳ್ಯಾ ವಿಶಿಂ ತೆಂ ಚಿಂತುಂಕ್ ಲಾಗ್ಲೆಂ.
ವಿಶು ಕುಮಾರಾಕ್ ಹ್ಯಾ ಉಪ್ರಾಂತ್ ಸಮ್ಜಾಂವ್ಕ್ ಜಾಯ್ ಜಾಲ್ಯಾರ್ ಫಕತ್ತ್ ರಾಯನಾನ್ ಮಾತ್ರ್! ಹೆಂ ಮಿಶೇಲಾಚಾ ಮತಿಕ್ ಸುಸ್ತಾನಾ ತಾಣೆಂ ಶೀತಲಾಕ್ ಸಮಾಧಾನ್ ಕೆಲೆಂ. ತಾಕಾ ಆತಾಂ ರಾಯನಾಚಿ ರಾಕೊನ್ ಆಸ್ಲ್ಲಿ.
ಶೀತಲಾಚ್ಯಾ ಘರಾ ಆಸೊಚ್ ವೇಳ್ ಪಾಶಾರ್ ಜಾತಾಲೊ.
ಮಿಶೇಲ್ ಆಯಿಲ್ಲ್ಯಾ ಥಾವ್ನ್ ಆತಾಂ ಶೀತಲಾಕ್ ಥೊಡೆಂ ಧಯ್ರ್ ಮೆಳ್ಲ್ಲೆಂ. ತಾಚ್ಯಾ ಫುಡಾರಾಚೆಂ ಕಿತೆಂ ಜಾತೆಲೆಂ ಮ್ಹಳ್ಳೊ ತಾಕಾ ಭರ್ವಸೊ ನಾತ್ಲ್ಲೊ ಜಾಲ್ಯಾರ್ಯ್ ಪ್ರಸ್ತುತ್ ಪರಿಗತೆಂತ್ ಮಿಶೇಲಾಚ್ಯಾ ಯೆಣ್ಯಾ ಥಾವ್ನ್ ತಾಕಾ ಥೊಡೆಂ ಸಮಾಧಾನ್ ಜಾಲ್ಲೆಂ.
ವೇಳ್ ಆಸೊಚ್ ಧಾಂವ್ತಾಲೊ.
ಸಾಕಾಳಿಂ ಶೀತಲಾ ಲಾಗಿಂ ಝಗ್ಡೊನ್ ಗೆಲ್ಲೊ ವಿಶು ಕುಮಾರ್ ಧನ್ಫರಾಂ ಜೆವ್ಣಾಕ್ ಪಾಸೊನ್ ಆಯ್ಲೊ ನಾ. ಶೀತಲಾಕ್ ತಾಣೆಂ ಪೋನ್ ಪಾಸೊನ್ ಕೆಲ್ಲೆಂ ನಾ.
ಸಾಂಜೆಚಿ ವೊರಾಂ ಚಾರ್ ಜಾಂವ್ಕ್ ಲಾಗಿಂ ಲಾಗಿಂ ಜಾತಾನಾ ಮಿಶೇಲಾಚೆಂ ಪೋನ್ ವಾಜ್ಲೆಂ.
"ಹಾಂ ರಾಯನ್! ತುಂ ಘರಾ ಭಾಯ್ರ್ ಸರ್ಲೊಯ್...?" ರಾಯನ್ ಘರಾ ಪಾಂವ್ಚ್ಯಾ ಪಯ್ಲೆಂ ಮಿಶೇಲಾಕ್ ಘರಾ ಪಾಂವೊಂಕ್ ಜಾಯ್ ಆಸ್ಲ್ಲೆಂ.
"ಆಯ್ಕ್ ಮಿಶೇಲ್....!" ರಾಯನಾಚೊ ತಾಳೊ ಕಿತ್ಯಾಕ್ಗೀ ದುಸ್ರೊಚ್ ಮ್ಹಳ್ಳ್ಯಾ ಪರಿಂ ಮಿಶೇಲಾಕ್ ಲಾಗ್ಲೊ. "ಶೀತಲ್ ಖಂಯ್ ಆಸಾ....?"
ರಾಯನಾಚಾ ಸವಾಲಾಕ್ ಆಪ್ಲ್ಯಾ ಕಾನಾನ್ ಆಯ್ಕಾತಾನಾ ಪೋನ್ ಕಾನಾಕ್ ಧರ್ಲ್ಲ್ಯಾ ಪರಿಂಚ್ ಮಿಶೇಲಾನ್ ಶೀತಲಾಕ್ ಘುಂವೊನ್ ಪಳೆಲೆಂ.
"ಹಾಂಗಾಚ್ ಆಸಾ! ಕಿತ್ಯಾಕ್.....?" ಮಿಶೇಲಾಕ್ ಆತಾಂ ದುಬಾವ್ ಜಾಲೊ. ವಿಶುನ್ ಕಾಂಯ್ ಪುಣಿಂ ತಾಂಚಾ ಝಗ್ಡ್ಯಾಚಿ ಖಬಾರ್ ರಾಯನಾಕ್ ದಿಲ್ಯಾಗಾಯ್? ಮಿಶೇಲಾಚಾ ಮತಿಂತ್ ಸವಾಲ್ ಉದೆಲೆಂ.
"ಐ ಯಾಮ್ ಸಾರ್ರಿ ಮಿಶೇಲ್. ಏಕ್ ಬ್ಯಾಡ್ ನಿವ್ಸ್.....!"
"ಕಿತೆಂ.....?" ಮಿಶೇಲಾಚೆಂ ದೊಳೆ ರುಂದಾಲೆ. ತಾಚ್ಯೊ ಆಸ್ಡ್ಯೊ ಉಟೊನ್ ರಾವ್ಲ್ಯೊ.
ಶೀತಲ್ ಪಯ್ಸ್ ಥಾವ್ನ್ ಮಿಶೇಲಾಕ್ಚ್ ಪಳೆತಾಲೆಂ.
"ವಿಶುಚೆಂ ಆಕ್ಸಿಡೆಂಟ್ ಜಾಲಾಂ! ಹಿ ಇಸ್ ನೋ ಮೋರ್!" ಮಿಶೇಲಾಕ್ ಘಡ್ಗಡೊ ಮಾರ್ಲ್ಲ್ಯಾ ಪರಿಂ ಜಾಲೆಂ. ಥೊಡ್ಯಾ ಖಿಣಾಂಕ್ ತಾಚ್ಯಾ ತೊಂಡಾ ಥಾವ್ನ್ ಕಾಂಯ್ ಉತಾರ್ ಸುಟ್ಲೆಂ ನಾ. ’ಸಟ್ಟ್’ ಕರುನ್ ತೆಂ ಬಸ್ಲೆಲ್ಯಾ ಕಡೆನ್ ಥಾವ್ನ್ ಉಟೊನ್ ಉಭೆಂ ಜಾಲೆಂ.
"ಯು ಮೀನ್ ಹಿ ಇಸ್ ಡೆಡ್?" ಮಿಶೇಲಾಕ್ ಸಂಸಾರ್ಚ್ ಕೊಸ್ಳೊನ್ ಆಪ್ಲ್ಯಾ ಮಾತ್ಯಾರ್ ಪಡ್ಲೆಲ್ಯಾ ಪರಿಂ ಜಾಲೆಂ.
***************
ಭಾಯ್ಲ್ಯಾಂಗ್ಣಾಚೆಂ ಚಿತ್ರೀಕರಣ್ ಸಂಪವ್ನ್ ಭಿತರ್ಲ್ಯಾಂಗಣಾಚೆಂ ಚಿತ್ರೀಕರಣ್ ಭರಾನ್ ಚಲ್ತಾಲೆಂ. ಪರ್ತ್ಯಾಕ್ ಸಾವಂತಾ ಸವೆಂ ಮುಂಬಯಿ ಪಾಟಿಂ ಆಯಿಲ್ಲೆಂ ಆಲಿಯಾ ಆತಾಂ ರಾಯನಾನ್ ತಾಕಾ ದಿಲ್ಯಾ ಬಾಂದ್ರಾಂತ್ಲ್ಯಾ ಪ್ಲ್ಯಾಟಾಂತ್ಚ್ ರಾವ್ತಾಲೆಂ. ಸದಾಂ ಸ್ಟೂಡಿಯೊಕ್ ವೆಚೆಂ ಯೆಂವ್ಚೆಂ! ಆಲಿಯಾಚೆಂ ಜಿವಿತ್ ಕಿತ್ಯಾಕ್ಗೀ ತಾಕಾಚ್ಚ್ ಪಸಂದ್ ಜಾಲೆಂ ನಾ. ಹ್ಯಾ ಜಿವಿತಾಕ್ ತಾಣೆಂ ಕೆದ್ನಾಂಚ್ ಆಶೆಲ್ಲೆಂ ನಾ. ತಾಚ್ಯಾ ಆಶೆಚ್ಯಾ ಜಿವಿತಾನ್ ತಾಕಾ ಸಾಂಗಾತ್ ದಿಲ್ಲೊ ನಾ! ಫಕತ್ತ್ ತೆಂ ಏಕ್ ಚಲಿ ಮ್ಹಳ್ಳ್ಯಾ ಆಣ್ವ್ಯಾ ವಿಚಾರಾಕ್ ಲಾಗೊನ್....? ಆತಾಂ ಆಲಿಯಾನ್ ಹ್ಯಾ ಸಂಸಾರಾನ್ ಮಾಂದುನ್ ಘೆಂವ್ಚ್ಯಾ ತಸಲೆಂಚ್ ಜಿವಿತ್ ಆಪ್ಣಾಯ್ಲೆಂ. ಹ್ಯಾ ಜಿವಿತಾಂತ್ ಮತಿಚ್ಯಾ ಶಾಂತೆನ್ ದೀಸ್ ಕಾಡುಂಕ್ ತೆಂ ಸಕ್ಲೆಂ ನಾ. ಆತಾಂ ತಾಚ್ಯಾ ಬದ್ಲಾಲ್ಲ್ಯಾ ದಿಶೆಚ್ಯಾ ಮುಕಾರ್ ಹೆಂ ತಾಚೆಂ ಜಿವಿತ್ಯ್ ಕಾಂಯ್ಚ್ ನಾ ಮ್ಹಳ್ಳ್ಯಾ ಪರಿಂ ತಾಕಾ ದಿಸ್ತಾಲೆಂ.
ಆಲಿಯಾ ಆಜ್ ಹ್ಯಾ ಸ್ಥಿತೆಕ್ ಪಾಂವೊಂಕ್ ಹಿಚ್ಚ್ ಸಮಾಜ್ ಕಾರಾಣ್! ಹ್ಯಾಚ್ ಸಮಾಜೆಚ್ಯಾ ರಿತಿ ರಿವಾಜೆಂಕ್ ಆನಿ ರೆಗ್ರ್ಯಾಂಕ್ ಬಲಿ ಜಾವ್ನ್ ಆಲಿಯಾಚೆಂ ಜಿವಿತ್ ಆಲಿಯಾಕ್ ಹ್ಯಾ ಝಳ್ಝಳ್ಚ್ಯಾ ಸಂಸಾರಾಕ್ ಹಾಡುನ್ ಆಯಿಲ್ಲೆಂ. ಆಲಿಯಾನ್ ಖುದ್ದ್ ಆಪ್ಲ್ಯಾ ಖುಶೇನ್ ಆಪ್ಣಾಯಿಲ್ಲೊ ಹೊ ಸಂಸಾರ್ ಭಿಲ್ಕುಲ್ ನ್ಹಯ್!
ಬಾಲಿವುಡಾಚಾ ಸಂಸಾರಾಂತ್ ಆಲಿಯಾ ಎದೊಳ್ಚ್ ಸಾದಾರ್ಣ್ ನಾಂವಾಡ್ದೀಕ್ ಜಾಲ್ಲೆಂ. ಥಂಯ್ ಹಾಂಗಾ ಆಲಿಯಾಚೆಂ ನಾಂವ್ ತಾಚ್ಯಾ ತಸ್ವೀರೆ ಸವೆಂ ಛಾಪುನ್ ಯೆತಾಲೆಂ. ಲೊಕಾಕ್ಯ್ ಹ್ಯಾ ಬಾಲಿವುಡಾಚಾ ನವ್ಯಾ ನಾಯಕಿಕ್ ಪಡ್ದ್ಯಾರ್ ಪಳಂವ್ಚಿ ಆತುರಾಯ್ ಆಸ್ಲ್ಲಿ.
ರುಪ್ಯಾಳ್ಯಾ ಪರ್ದ್ಯಾರ್ ಆಪ್ಲೆಂ ಸಗ್ಳೆಂ ಭವಿಶ್ಯ್ ಹೊಂದೊನ್ ಆಸಾ! ಹೆಂ ಆಲಿಯಾ ಜಾಣಾಂ ಆಸ್ಲ್ಲೆಂ.
ಫಿಲ್ಮಾಂತ್ ಎದೊಳ್ಚ್ ಸಭಾರ್ ಬದ್ಲಾವಣ್ ಜಾಲ್ಲಿ!
"ಹ್ಯಾ ಆಮ್ಚ್ಯಾ ಪಬ್ಲಿಕಾಕ್ ತುಂ ನೆಣಾಂಯ್ ಆಲಿಯಾ! ತಾಂಕಾಂ ಕಿತೆಂ ಪಸಂದ್ ಜಾತಾ ತೆಂ ತುವೆಂ ದಿಲೆಂಯ್ ಜಾಲ್ಯಾರ್ ಮಾತ್ರ್ ತುಂ ಜಯ್ತೆವಂತ್! ಪಬ್ಲಿಕಾಕ್ ಜರ್ ಪಸಂದ್ ಜಾಲೆಂ ನಾ ತರ್ ತುಂ ಕಿತ್ಲ್ಯಾ ವ್ಹಡ್ಲ್ಯಾ ಬ್ಯಾನರಾಂತ್ಯ್ ಕಾಮ್ ಕರ್ ಸಗ್ಳೆಂ ಉದ್ಕಾಂತ್ ಲೊಣಿ ದೆಂವಯಿಲ್ಲ್ಯಾ ಪರಿಂ ದೆಕುನ್ ಜಾತಾ ತಿತ್ಲೆಂ ತುಜಿ ಸಾಮರ್ಥಿ ದಾಖಂವ್ಕ್ ಪ್ರಯತ್ನ್ ಕರ್!" ಸಭಾರ್ ಪಾವ್ಟಿಂ ಆಲಿಯಾ ಆಪ್ಲ್ಯಾ ಚಿಂತ್ನಾಂ ವರ್ವಿಂ ಚಿತ್ರೀಕರಣಾಚ್ಯಾ ವೆಳಾರ್ ಆಪ್ಲ್ಯಾ ಕಾಮಾಂತ್ ಜಾಯ್ ಪುರ್ತೊ ಜೀವ್ ಭರುಂಕ್ ಕಶ್ಟಾತಾನಾ ಸಾವಂತಾನ್ ಆಲಿಯಾಕ್ ಸಮ್ಜಾಯಿಲ್ಲೆಂ.
ಆಲಿಯಾಕ್ಯ್ ಹೆಂಚ್ ಜಾಯ್ ಆಸ್ಲ್ಲೆಂ!
ತೆಂ ಜಾಣಾಂ! ದುಸ್ರ್ಯಾ ಫಿಲ್ಮಾಚಿ ಖಬಾರ್ ಮಸ್ತ್ ಪಯ್ಸ್ ಆಸಾ. ಆಪ್ಣಾಕ್ ಮೆಳ್ಲ್ಲ್ಯಾ ಹ್ಯಾ ಎಕಾ ಸಂದರ್ಭಾಕ್ಚ್ ಫಳಾಧೀಕ್ ಥರಾನ್ ಆಪ್ಣೆಂ ಉಪಯೋಗ್ಸುಂಕ್ ಜಾಯ್! ಕಶೆಂ ತರ್ಯ್ ಆಪ್ಣಾಚೆಂ ನಾಂವ್ ದೀಸ್ ಉಜ್ವಾಡ್ಚಾ ಆದಿಂ ನಾಂವಾಡ್ದೀಕ್ ಜಾಂವ್ಕ್ ಜಾಯ್!
ಹ್ಯಾಚ್ ಖಾತಿರ್ ಆಲಿಯಾನ್ ಚಿತ್ರೀಕರಣ್ ವೆಳಾರ್ ಗೆಲ್ಲ್ಯಾ ಗೆಲ್ಲ್ಯಾ ಸುವಾತೆರ್ ಮೀಡಿಯಾಚಾ ಮುಕಾರ್ ಆಪ್ಲೊ ಸಂಪೂರ್ಣ್ ಸಹಕಾರ್ ದಿಲ್ಲೊ.
ಹಿ ಮೀಡಿಯಾ ಜಾಲ್ಯಾರ್ಯ್ ತಶಿಚ್! ತ್ಯಾ ಪಬ್ಲಿಕಾ ಪರಿಂ! ದೀಸ್ ಉಜ್ವಾಡ್ಚಾ ಭಿತರ್ ಲಿಪೊನ್ ಆಸ್ಲ್ಲ್ಯಾಕ್ಯ್ ಸಿಂಹಾಸನಾಚೆರ್ ಚಡಯ್ತಾ.
ಆತಾಂ ಆತಾಂ ಜಶೆಂ ಚಿತ್ರೀಕರಣ್ ಕಾಬಾರ್ ಜಾವ್ನ್ ಯೆತಾಲೆಂ ತಶೆಂ ಅಲಿಯಾಕ್ ತಾಚ್ಯಾ ಫುಡಾರಾಚಿ ಖಂತ್ ವಾಡೊನ್ ಯೆತಾಲಿ.
ದರ್ಶಕ್ ಆಪ್ಣಾಕ್ ಸ್ವೀಕಾರ್ ಕರ್ತಲೊ ವಾ ನಾ ಮ್ಹಳ್ಳಿ ಖಂತ್ ಎಕಾ ಕುಶಿನ್ ಜಾಲ್ಯಾರ್ ದುಸ್ರ್ಯಾ ಕುಶಿನ್ ಆಪ್ಣೆ ಆರಂಭ್ ಕೆಲ್ಲೆಂ ಝುಜ್ ಫುಡೆಂ ಕಶೆಂ ಪಾವ್ತೆಲೆಂ ಮ್ಹಳ್ಳಿ ಖಂತ್.
ಹ್ಯಾ ದಿಸಾಂನಿ ಸಾವಂತಾಲಾಗಿಂ ಕಾಂಯ್ಚ್ ಉಲಂವ್ಚ್ಯಾ ಪರಿಂ ನಾತ್ಲ್ಲೆಂ. ಪಿಲ್ಮಾಚೆಂ ಚಿತ್ರೀಕರಣ್ ಸಂಪವ್ನ್ ಯೆತಾಲೆಂ ಜಾಲ್ಲ್ಯಾನ್ ಮುಕ್ಲ್ಯಾ ಕಾಮಾಚಿ ತಾಕಾ ಖಂತ್ ಆಸ್ಲ್ಲಿ.
"ಆಲಿಯಾ! ಫಾಲ್ಯಾಂಚೊ ದೀಸ್ ತುಜ್ಯಾ ಕಾಮಾಚೊ ಅಖೇರಿಚೊ ದೀಸ್!" ಕಾಲ್ಚ್ಯಾ ರಾತಿಕ್ ಸ್ಟೂಡಿಯೊ ಥಾವ್ನ್ ಪ್ಲ್ಯಾಟಾಕ್ ವೆಚ್ಯಾ ವಗ್ತಾರ್ ಸಾವಂತಾನ್ ಆಲಿಯಾಕ್ ಸಾಂಗ್ಲ್ಲೆಂ.
"ಥೊಡೆ ಶಾಟ್ಸ್ ಮಾತ್ರ್ ಉರ್ಲ್ಯಾತ್! ಥೊಡ್ಯಾಂಕ್ ರೀಟೇಕ್ ಕಾಡುಂಕ್ ಪಡ್ತೆಲೆಂ ಜಾಲ್ಯಾರ್ಯ್ ಮ್ಹಾಕಾ ದಿಸ್ತಾ ಫಾಲ್ಯಾಂ ತುಜೆಂ ಕಾಮ್ ಸಂಪೂರ್ಣ್ ಜಾತೆಲೆಂ!" ಸಾವಂತ್ ಮುಂದರುನ್ ಉಲಯಿಲ್ಲೊ.
ಆಪ್ಲ್ಯಾ ನಿಮಾಣ್ಯಾ ದಿಸಾಚಾ ಕಾಮಾಕ್ ಆಯ್ತೆಂ ಜಾವ್ನ್ ಆಲಿಯಾ ಆಜ್ ಸ್ಟೂಡಿಯೊಕ್ ಪಾವ್ಲ್ಲೆಂ. ಆಯ್ಚೆಂ ತಾಚೆಂ ಕಾಮ್ ಜಾಲ್ಯಾರ್ ಉಪ್ರಾಂತ್ ಆಪ್ಣಾಕ್ ಉರ್ಚೆಂ ಫಕತ್ತ್ ಡಬ್ಬಿಂಗ್ ಮಾತ್ರ್! ಆಲಿಯಾ ಜಾಣಾಂ ಜಾಲ್ಲೆಂ.
ಸಾವಂತಾಕ್ ಜಾಯ್ ಜಾಲ್ಲ್ಯಾ ಪರಿಂ ಥೊಡೆ ಶಾಟ್ಸ್ ಎದೊಳ್ಚ್ ಕಾಡುನ್ ಜಾಲ್ಲೆ.
"ರಾಯನ್ ಯೇಂವ್ಕ್ ಪುರೊ!" ಸಾವಂತಾನ್ ಆಲಿಯಾಕ್ ಜಾಗಯಿಲ್ಲೆಂ.
ಸ್ಟೂಡಿಯೋಂತ್ ಆಲಿಯಾ ಆಪ್ಲ್ಯಾ ನಿಮಾಣ್ಯಾ ಡೈಲಾಗಾಂಕ್ ಸ್ಟಡಿ ಕರ್ತಾಲೆಂ. ಸಾವಂತ್ ತಯಾರ್ ಜಾಲ್ಲ್ಯಾ ಸೆಟ್ಟಾಂತ್ ಬದಾವಣ್ ಕರ್ತಾಲೊ. ಪಯ್ಲೆಂ ತಾಣೆಂ ಸಾಂಗೊನ್ ಗೆಲ್ಲ್ಯಾ ಸೆಟ್ಟಾ ವಯ್ರ್ ಆಜ್ ಸಾವಂತಾಕ್ ತಿತ್ಲೆಂ ಮನ್ ಆಯ್ಲೆಂ ನಾ. ತೊ ತಾಚ್ಯಾ ಬದ್ಲಾವಣೆಕ್ ಲಾಗ್ಲೊ.
"ರಾಯನ್!"
ಆಲಿಯಾ ಇತ್ಲ್ಯಾ ದಿಸಾಂನಿ ಹ್ಯಾ ವ್ಯಕ್ತಿ ವಿಶ್ಯಾಂತ್ ಸಂಪೂರ್ಣ್ ಜಾಣಾಂ ಜಾಲ್ಲೆಂ. ಆಲಿಯಾಕ್ ರಾಯನಾ ವಿಶ್ಯಾಂತ್ ಜಾಣಾಂ ಜಾಂವ್ಚಿ ಗರ್ಜ್ಯ್ ಆಸ್ಲ್ಲಿ. ಎದೊಳ್ ಕಶೆಂಯ್ ಜಾಲೆಂ! ಪುಣ್ ಫುಡಾರಾಕ್ ಆಪ್ಣಾಕ್ ರಾಯನ್ ಜಾಯ್! ವಿಶು ಕುಮಾರ್ ಕಸೊಯ್ ನಾ. ಹ್ಯಾ ಬಾಲಿವುಡಾಚಾ ಇಂಡಸ್ಟ್ರೀಂತ್ ಆಪುಣ್ ಎಕ್ಸುರೆಂ ಕಾಂಯ್ಚ್ ಕರುಂಕ್ ಸಕಾನಾ. ಹಾಂಗಾಸರ್ ಆಪ್ಣೆ ಆಪ್ಲ್ಯಾ ಪಾಂಯಾರ್ ಉಭೆಂ ಜಾಂವ್ಕ್ ಜಾಯ್ ಜಾಲ್ಯಾರ್ ಕೋಣ್ ತರ್ಯ್ ಜಾಯ್! ವಿಶು ಆಸ್ತಾ ಪಾಸೊನ್ ಆಪ್ಣಾಕ್ ಕಾಂಯ್ ಭಿರಾಂತ್ ನಾತ್ಲ್ಲಿ. ಪುಣ್ ಆತಾಂ.....?
ಏಕ್ ಪಾವ್ಟಿಂ ಆಪ್ಣಾಚೆಂ ನಾಂವ್ ಉಟೊನ್ ವಯ್ರ್ ಆಯ್ಲೆಂ ಕೀ ಆಪ್ಣಾಚೆಂ ಝುಜ್ ಆರಂಬ್ ಜಾಲೆಂ. ತೆದ್ನಾಂ ರಾಯನಾ ತಸಲೊ ಭಳಾಧೀಕ್ ಖಾಂಬೊ ಆಪ್ಣಾ ಸಾಂಗಾತಾ ಆಸ್ಲ್ಯಾರ್ ಮಾತ್ರ್ ಆಪುಣ್ ರಾಣಿ! ನಾ ಜಾಲ್ಯಾರ್.....? ನಾ ಜಾಲ್ಯಾರ್ ಆಪುಣ್ ತ್ಯಾ ಇಕ್ಬಾಲಾಚಾ ಫುಡೆಂ ಕಶೆಂ ರಾವೊಂಕ್ ಸಕ್ತೆಲಿಂ....?
ಇಕ್ಬಾಕಾಚಾ ಫುಡ್ಯಾನ್ ರಾವೊಂಕ್ ಜಾಯ್ ಜಾಲ್ಯಾರ್ ಮ್ಹಾಕಾ ರಾಯನಾ ತಸಲ್ಯಾಚಿ ಗರ್ಜ್ ಆಸಾ! ಪುಣ್ ರಾಯನಾಕ್ ಮ್ಹಜಿ ಗರ್ಜ್ ಆಸಾ? ರಾಯನ್ ತಾಚ್ಯಾ ಸಂಸಾರಾಂತ್ ತ್ಯಾ ಮಿಶೇಲಾ ಸಾಂಗಾತಾ....!
’ಮಿಶೇಲ್!’
ರಾಯನಾಕ್ ಆಪ್ಣಾಂವ್ಚ್ಯಾ ವಾಟೆರ್ ಆಲಿಯಾ ಫುಡೆಂ ಹೆಂ ಮಿಶೇಲ್ ಜಯ್ತ್ ಖಾಂಬೊ ಜಾವ್ನ್ ಉಭೆಂ ಜಾಲ್ಲೆಂ.
ಸಾವಂತಾನ್ ದಿಲ್ಲ್ಯಾ ಸ್ಕ್ರಿಪ್ಟಾ ವಯ್ಲೆ ಡೈಲಾಗ್ ವಾಚ್ಚ್ಯಾ ಆಲಿಯಾಚಿ ಮತ್ ತಾಚ್ಯಾ ಫುಡಾರಾಚಾ ಚಿಂತ್ನಾಂನಿ ಘುಸ್ಪಡೊನ್ ವೆತಾಲಿ. ತ್ಯಾ ಮಧೆಂ ಮಿಶೇಲ್! ಹ್ಯಾ ಮಿಶೇಲಾಕ್ ಏಕ್ ಪಾವ್ಟಿಂ ಪಳಂವ್ಕ್ ಜಾಯ್! ಆಪ್ಣಾ ಮುಕಾರ್ ಆಪ್ಲ್ಯಾ ಬಾಯ್ಲೆಚ್ಯಾ ಗೂಣಾಂಕ್ ಆನಿ ಸೊಭಾಯೆಕ್ ವರ್ಣುಂಚಾ ಹ್ಯಾ ರಾಯನಾಚಾ ಬಾಯ್ಲೆಚಿ ಸೊಭಾಯ್ ಆನಿ ಗೂಣ್ ಕಶೆ ಮ್ಹಳ್ಳೆ ತೆಂ ಪಳಂವ್ಕ್ ಜಾಯ್!
ಆಲಿಯಾ ಎಕಾ ಕುಶಿನ್ ಮಿಶೇಲಾಕ್ ಪಳಂವ್ಕ್ ಉತ್ಸಾಹಿತ್ ಜಾವ್ನಾಸ್ಲ್ಲೆಂ ತರ್ ದುಸ್ರ್ಯಾ ಕುಶಿನ್ ಹ್ಯಾಚ್ ಮಿಶೆಲಾಚಾ ರಾಯನಾಕ್ ಆಪ್ಣಾ ತೆವ್ಶಿಂ ಕಶೆಂ ವೊಡುನ್ ಧರ್ಚೆಂ ಮ್ಹಳ್ಳ್ಯಾ ವಿಶಿಂ ತಕ್ಲಿ ಆಟಯ್ತಾಲೆಂ.
ವಿಶು ಕುಮಾರಾಚಾ ಮರ್ಣಾ ಥಾವ್ನ್ ರಾಯನಾಕ್ ಧಖೊ ಬಸ್ಲ್ಲೊ. ಪುಣ್ ಹಾಚೊ ಪರಿಣಾಮ್ ತಾಚ್ಯಾ ಬಿಜ್ನೆಸಾ ವಯ್ರ್ ಪಡ್ಲಾ ಮ್ಹಣೊನ್ ಮಾತ್ರ್ ತಾಣೆಂ ಕೊಣಾಯ್ಕ್ಯ್ ಉಗ್ತ್ಯಾನ್ ದಾಖಯ್ಲೆಂ ನಾ.
"ರಾಯನ್ ಫಕತ್ತ್ ಏಕ್ ಬಿಜ್ನೆಸ್ಮ್ಯಾನ್! ತಾಚೊ ವಿಲ್ ಪವರ್ ಚಡ್ ಭಳ್ ಆಸಾ!" ವಿಶು ಕುಮಾರಾನ್ ಆಲಿಯಾಕ್ ಸಾಂಗ್ಲ್ಲಿ ಹಿಂ ಉತ್ರಾಂ ಅಜೂನ್ ತಾಕಾ ಉಡಾಸ್ ಆಸಾತ್.
"ರಾಯನ್ ತಾಚ್ಯಾ ಕಾಳ್ಜಾಕ್ ಚಿಂತುಂಕ್ ಆವ್ಕಾಸ್ ದೀನಾ! ತೊ ತಾಚ್ಯಾ ಮತಿಕ್ ಮಾತ್ರ್ ಹೆಂ ಕಾಮ್ ದಿತಾ! ಹ್ಯಾಚ್ ಖಾತಿರ್ ತೊ ಸಕ್ಸೆಸ್ ಜಾಲಾ. ಫಕತ್ತ್ ಮತಿನ್ ಮಾತ್ರ್ ಚಿಂತ್ಚೊ ಮನಿಸ್ ಎ ಅನ್ಬೆಂಡಿಂಗ್ ವಿಲ್!" ಆಲಿಯಾನ್ ವಿಶು ಕುಮಾರಾಕ್ ದುಬಾವ್ ಜಾಯ್ನಾತ್ಲ್ಲ್ಯಾ ಪರಿಂ ತಾಚ್ಯಾಚ್ ತೊಂಡಾ ಥಾವ್ನ್ ರಾಯನಾಚಾ ವಿಶಿಂ ಚಡ್ತಿಕ್ ಮಾಹೆತ್ ಆಪ್ಣಾಯಿಲ್ಲಿ.
ರಾಯನಾಚೊ ಸಕ್ಸೆಸ್ ಫಾರ್ಮುಲಾ!
ಖಂಡಿತ್ ಜಾವ್ನ್! ರಾಯನ್ ಜರ್ ಕಾಳ್ಜಾಕ್ ಚಿಂತುಂಕ್ ಆವ್ಕಾಸ್ ದಿತಾ ಜಾಲ್ಯಾರ್ ರಾಯನ್ ತ್ಯಾಚ್ ಆಮ್ಚ್ಯಾ ದೊಗಾಂಯ್ಚಾ ಪಯ್ಲ್ಯಾ ಭೆಟೆ ದಿಸಾ ಆಪ್ಣಾಚಾ ಆಧೀನ್ ಜಾತೊ! ತ್ಯಾ ದೀಸ್ ಆಪ್ಣಾಕ್, ಆಪ್ಣಾಚ್ಯಾ ಸಗ್ಳ್ಯಾಕ್ ದೊಳೆಭರ್ ಪಳವ್ನ್ಯ್ ರಾಯನ್ ಶಾಂತ್ ಆಸ್ಲ್ಲೊ ಮ್ಹಳ್ಯಾರ್ ಖಂಡಿತ್ ಜಾವ್ನ್ ತೊ ಏಕ್ ಖರೊ ಬಿಜ್ನೆಸ್ಮ್ಯಾನ್!
ಆಲಿಯಾಕ್ ಹೆಂ ನಖ್ಖಿ ಜಾಲ್ಲೆಂ.
ಆಪ್ಣೆಂ ರಾಯನಾಚಾ ಸಂಸಾರಾಂತ್ ಘುಸೊಂಕ್ ಜಾಯ್ ಜಾಲ್ಯಾರ್ ತ್ಯಾ ರಾಯನಾಚಾ ಕಾಳ್ಜಾಕ್ ಪಯ್ಲೆಂ ಜಾಗಂವ್ಕ್ ಜಾಯ್! ತಾಣೆಂ ತಾಚ್ಯಾ ಮತಿಕ್ ಸೊಡುನ್ ತಾಚ್ಯಾ ಕಾಳ್ಜಾ ಥಾವ್ನ್ ಚಿಂತ್ಚ್ಯಾ ಪರಿಂ ಕರುಂಕ್ ಜಾಯ್! ತೆದ್ನಾಂ ಆಪುಣ್ ಜಿಕ್ತೆಲಿಂ. ಪುಣ್ ಹೆಂ ಕಶೆಂ ಸಾದ್ಯ್......?
ಆಪ್ಣಾಚ್ಯಾ ಜಿವಿತಾಂತ್ ಕಿಟಾಳ್ ಪೆಟೊಂಕ್ ಆನಿ ಥೊಡಿಚ್ ಆವ್ದಿ ಉರ್ಲ್ಯಾ! ಎದೊಳ್ ಪಾಸೊನ್ ಆಪುಣ್ ಹ್ಯಾ ವಾಟೆರ್ ಸುರಕ್ಶಿತ್ ಆಸಾಂ. ಪುಣ್ ಹಾಚ್ಯೆ ಉಪ್ರಾಂತ್....? ಹೆಂ ಕಿಟಾಳ್ ಕೆದ್ನಾಂಯ್ ಪೆಟೊನ್ ಆಪ್ಣಾ ಸಾಮ್ಕಾರ್ ಉಭೆಂ ಜಾಂವ್ಕ್ ಸಕ್ತಾ. ತೆಂ ಪೆಟ್ಚ್ಯಾ ಪಯ್ಲೆಂ....!
ವಿಶು ಕುಮಾರಾಚ್ಯಾ ಮರ್ಣಾಚಾ ದಿಸಾ ಥಾವ್ನ್ ಆಲಿಯಾಕ್ ಹಿ ಖಂತ್ ಆಸ್ಲ್ಲಿ.
ವಿಶು ಕುಮಾರಾಕ್ ಅಂಡರ್ ವರ್ಲ್ಡಾ ಸಾಂಗಾತಾ ಸಂಭಂಧ್ ಆಸ್ಲ್ಲೊ ತೊ ಆಲಿಯಾ ಜಾಣಾಂ. ಆಶೆಂ ಆಸ್ತಾನಾ ಇಕ್ಬಾಲ್ ಆನಿ ರಾಶಿದಾ ಸಾಂಗಾತಾಯ್ ತಾಕಾ ಸಂಭಂಧ್ ಆಸೊಂಕ್ ಪುರೊ. ಆಲಿಯಾಕ್ ಹ್ಯಾ ತಾಚ್ಯಾ ದುಬಾವಾಕ್ ಖರ್ಯಾ ಪಣಿಂ ಪಾರ್ಕುಂಚೊ ಆವ್ಕಾಸ್ ಉದೆವ್ನ್ ಯೇಂವ್ಕ್ ನಾತ್ಲ್ಲೊ. ವಿಶು ಕುಮಾರಾ ಲಾಗಿಂ ತಾಣೆಂ ಇಕ್ಬಾಲಾಚಾ ವಿಶಿಂ ಜಾಂವ್ ಯಾ ರಾಶಿದಾ ವಿಶಿಂ ಜಾಂವ್ ಉಲಂವ್ಚ್ಯಾ ಪರಿಂಚ್ ನಾತ್ಲ್ಲೆಂ. ಯಾ ಆಪ್ಣಾಕ್ ತ್ಯಾ ಏರ್ವೇಸಾ ಥಾವ್ನ್ ತುವೆಂ ಕಾಡುಂಕ್ ಕಿತೆಂ ಕಾರಾಣ್ ಮ್ಹಳ್ಳ್ಯಾ ವಿಶಿಂ ಸವಾಲ್ ಉಡಂವ್ಚೆಂ ಸಾದ್ಯ್ಚ್ ನಾತ್ಲ್ಲೆಂ. ಆಪ್ಣಾಚಿ ಏಕ್ ಚೂಕ್ ಜಾಲಿ ಜಾಲ್ಯಾರ್ಯ್ ತ್ಯಾ ಚೂಕಿಚೊ ಪರಿಣಾಮ್ ಆಪ್ಣಾಕ್ ಹ್ಯಾ ಬಾಲಿವುಡಾಚಾ ಸಂಸಾರಾ ಥಾವ್ನ್ ಕಾಡುನ್ ಉಡವ್ಂವ್ಕ್ ಸಕ್ತಾ ಮ್ಹಳ್ಳೆಂ ತೆಂ ಜಾಣಾಂ. ಹ್ಯಾ ಖಾತಿರ್ ಆಪ್ಲ್ಯಾ ಮತಿಂತ್ಲ್ಯಾ ದುಬಾವಾಕ್ ತಾಣೆಂ ಜೊಕ್ತೊ ವೇಳ್ ಯೆತಾಸರ್ ತಸೊಚ್ ದಾಂಬುನ್ ದವರ್ಲ್ಲೊ. ವಿಶು ಕುಮಾರ್ ಆಜ್ ಹ್ಯಾ ಸಂಸಾರಾಂತ್ ನಾ ಜಾಲ್ಯಾರ್ಯ್ ತೊ ವೇಳ್ ಆಜೂನ್ ಉದೆವ್ನ್ ಯೇಂವ್ಕ್ ನಾತ್ಲ್ಲೊ. ಪುಣ್ ಕೆದ್ನಾಂ ತರ್ಯ್ ಉದೆವ್ನ್ ಯೆತಲೊ ಮ್ಹಳ್ಳೆಂ ತಾಕಾ ಸ್ಪಶ್ಟ್ ಆಸಾ.
ವಿಶು ಕುಮಾರಾ ಸವೆಂ ಇತ್ಲೆ ದೀಸ್ ಸಾರ್ಲ್ಲ್ಯಾ ಆಲಿಯಾನ್ ಆಪುಣ್ ಕೆದ್ನಾಂ ತರ್ಯ್ ತ್ಯಾ ಏರ್ವೇಸಾಂತ್ ಏರ್ಹೊಸ್ಟೆಸಾಚೆಂ ಕಾಮ್ ಕರುನ್ ಆಸ್ಲ್ಲಿಂ ಮ್ಹಳ್ಳ್ಯಾ ವಿಶಿಂ ತಾಕಾ ಕಳಯಿಲ್ಲೆಂ ನಾ. ವಿಶು ಕುಮಾರ್ ಆಪ್ಣಾಕ್ ವಳ್ಕಾನಾ ಮ್ಹಳ್ಯಾರ್ ಆಪ್ಣಾಕ್ ಕಾಮಾ ಥಾವ್ನ್ ಕಾಡಂವ್ಚ್ಯಾಂತ್ ತಾಕಾ ಕೊಣೆ ತರ್ಯ್ ಉಪಯೋಗ್ಸಿಲಾಂ ಶಿವಾಯ್ ಖುದ್ದ್ ಜಾವ್ನ್ ವಿಶು ಕುಮಾರಾನ್ ಹೆಂ ಕರುಂಕ್ ನಾಂ. ಹಾಚ್ಯೆ ಥಾವ್ನ್ ವಿಶು ಕುಮಾರಾಕ್ ಕಾಂಯ್ಚ್ ಫಾಯ್ದೊ ನಾ ಮ್ಹಳ್ಯಾ ಉಪ್ರಾಂತ್ ತೊ ಆಸಲ್ಯಾ ಕಾಮಾಕ್ ಕಿತ್ಯಾಕ್ ಹಾತ್ ಘಾಲ್ತಲೊ? ಮ್ಹಾಕಾ ಕಾಮಾ ಥಾವ್ನ್ ಕಾಡ್ಚ್ಯಾಂತ್ ಫಾಯ್ದೊ ಆಸ್ಲ್ಲೊ ಮ್ಹಳ್ಯಾರ್ ಎಕ್ಚ್ ಮ್ಹಜ್ಯಾ ಘೊವಾಕ್ ಯಾ ರಾಶಿದಾಕ್. ದೊಗಾಂ ಭಿತರ್ ಯೆಕ್ಲ್ಯಾಕ್! ನಾಸಿರ್ ಆಶೆಂ ಕರಿಸೊ ನಾ. ತಾಕಾ ಆಶೆಂ ಕರ್ಚಿ ಗರ್ಜ್ಯ್ ನಾ! ತರ್ ಆತಾಂ ಉರ್ಲೊ ರಾಶಿದ್ ಮಾತ್ರ್! ಆಲಿಯಾಚೊ ದುಬಾವ್ ಹಾಂಗಾ ಸ್ಥಿರ್ ಜಾಲ್ಲೊ. ಪುಣ್ ಹ್ಯಾ ದುಬಾವಾಕ್ ತಾಣೆಂ ನಖ್ಖಿ ಕರುಂಕ್ ಆಸ್ಲ್ಲೆಂ. ಜರ್ ತರ್ ಹೊ ದುಬಾವ್ ರಾಶಿದಾ ವಯ್ರ್ ವಚೊನ್ ರಾವ್ಲೊ...? ಆಪ್ಣಾಚೆಂ ಝುಜ್ ನವ್ಯಾನ್ ಆರಂಭ್ ಜಾಲೆಂ! ಆಲಿಯಾ ಚಿಂತಾಲೆಂ.
ತಿತ್ಲ್ಯಾರ್!
ಅಚಾನಕ್ ಏಕ್ ಹಾತ್ ಯೇವ್ನ್ ಆಪ್ಲ್ಯಾ ಖಾಂದಾರ್ ಬಸ್ತಾನಾ, ಚಿಂತ್ನಾಂಚಾ ಸಂಸಾರಾಂತ್ ಆಸ್ಲ್ಲೆಂ ಆಲಿಯಾ ಚಿತ್ಳಾನ್ ಉಡಿ ಮಾರ್ಲ್ಲ್ಯಾ ಪರಿಂ ಉಡೊನ್ ಪಡ್ಲೆಂ.
ತಿತ್ಲೆಂಚ್!
"ರಾಯನ್....! ತುಂ?" ಪಾಟಿಂ ಘುಂವೊನ್ ಪಳೆಲ್ಲ್ಯಾ ಆಲಿಯಾಕ್ ಆಪ್ಣಾ ಪಾಟ್ಲ್ಯಾನ್ ರಾಯನ್ ಉಭೊ ಆಸ್ಲ್ಲೊ ದಿಸ್ಲೊ.
***********
ವಿಶು ಕುಮಾರಾಚಾ ಮರ್ಣಾನ್ ಶೀತಲಾ ವಯ್ರ್ ಕಿತ್ಲೊ ಪ್ರಭಾವ್ ಘಾಲ್ಲೊ ತಿತ್ಲೊಚ್ ಪ್ರಭಾವ್ ಶೀತಲಾಚೆಂ ಜಿವಿತ್ ನಿಯಾಳುನ್ ಬಸ್ಲೆಲ್ಯಾ ಮಿಶೇಲಾ ವಯ್ರ್ಯ್ ತೊ ಪಡ್ಲ್ಲೊ.
ಜಿಣಿಭರ್ ಸಾಂಗಾತಾ ಹಾಸೊನ್ ಖೆಳೊನ್ ವಾಡ್ಲ್ಲ್ಯಾ ದೊಗಾಂಯ್ಚೆಂ ಜಿವಿತ್ ಹ್ಯಾ ಮುಂಬಯಿ ಪಾಸೊನ್ ಸಾಂಗಾತಾಚ್ಚ್ ಉರೊಂಕ್ ಸಕ್ಲ್ಲೆಂ ತರ್ಯ್ ಶೀತಲಾಕ್ ಮಾತ್ರ್ ತಾಚ್ಯಾ ಜಿವಿತಾನ್ ತಾಕಾ ಘಾತ್ ಕೆಲ್ಲೊ.
ಘೊವಾಚ್ಯಾ ಕಾನೂನಾ ಭಾಯ್ಲ್ಯಾ ಬಿಜ್ನೆಸಾಂತ್ ಆಸ್ಲ್ಲ್ಯಾ ತಾಚ್ಯಾ ಮೆತೆರ್ಪಣಾಂತ್ ವಾಂಟೆಲಿ ಜಾಂವ್ಕ್ ತಯಾರ್ ನಾತ್ಲ್ಲೆಂ ಶೀತಲ್ ಮುಂಬಯಿ ಸೊಡುನ್ ಗಾಂವಾಕ್ ವಚೊಂಕ್ ನಿರ್ಧಾರ್ ಕರುನ್ ಬಸ್ಲ್ಲೆಂ ತೆಂ ಆತಾಂ ಘೊವ್ಚ್ ನಾ ಮ್ಹಣ್ತಾನಾ ಸಂಪೂರ್ಣ್ ಹತಾಶ್ ಜಾಲೆಂ.
"ಹೆಂ ಸಗ್ಳೆಂ ಮ್ಹಜ್ಯಾ ಬಾಪಾಯ್ಚಾ ಕರ್ಮಾಚೊ ಫಳ್ ಮಿಶೇಲ್!" ಶೀತಲಾಚಾ ದೊಳ್ಯಾಂನಿ ಶೂನ್ಯತಾ ಆಸ್ಲ್ಲಿ. ತೆಂ ಜಿವಿತಾಕ್ ಕಾಂಟಾಳುಂಕ್ ಲಾಗ್ಲ್ಲೆಂ.
"ಕೊಣಾಯ್ಚಾ ಕರ್ಮಾಚೊ ಫಳ್ ಕೊಣಾಯ್ಕ್ಯ್ ಮೆಳಾನಾ ಶೀತಲ್! ತುಂ ಏಕ್ ಶಿಕ್ಲಲೆಂ ಚೆಡುಂ. ಹ್ಯಾ ವಿಶಯಾಂತ್ ತುವೆಂ ಆಶೆಂ ಉಲಂವ್ಚೆಂ ನ್ಹಯ್!" ಮಿಶೇಲ್ ಶೀತಲಾಕ್ ಸಮ್ಜಾಯ್ತಾಲೆಂ. ಪುಣ್ ಶೀತಲಾಚಾ ಮತಿಂತ್ ಮಾತ್ರ್ ಹೆಂ ನಖ್ಖಿ ಜಾಲ್ಲೆಂ ಕೀ ಬಾಪಾಯ್ಚಾ ಗುಸ್ತಾರ್ ತ್ಯಾ ದುಬ್ಳ್ಯಾ ದಾಕ್ಟ್ಯಾಂಚಾ ಘಾಮಾಚಾ ಪಯ್ಶ್ಯಾಂಕ್ ಸೊರೊ ದಾನ್ ಕರುನ್ ಆಪ್ಣೆಂ ಜೊಡ್ಲ್ಲೆಂ ಸುಖ್ಚ್ ಆಜ್ ತ್ಯಾ ದಿಸಾಂಚಾ ತಾಂಚಾ ದುಖಾಂಚಾ ಶಿರಾಪಾಚೊ ಫಳ್!
"ಜಿಮ್ಮಿ ಸಾರ್ಕೊ ಸಾಂಗ್ತಾಲೊ ಮಿಶೇಲ್! ತೊ ಉಲಯ್ನಾತ್ಲ್ಲೊ ಖರೆಂ. ಪುಣ್ ಜೆದ್ನಾಂ ಜೆದ್ನಾಂ ತೊ ಉಲಯ್ಲಾ ತಾಣೆಂ ಸತ್ಚ್ ಉಚಾರ್ಲಾಂ! ತಾಕಾ ಹೆಂ ಕಶೆಂ ಕಳಿತ್? ಕಾಂಯ್ ತೊ ಮ್ಹಜ್ಯಾ ಪರಿಂಚ್ ಹ್ಯಾ ಕರ್ಮಾಚಾ ಹಾತಾಂತ್ಲಿ ಬಲಿ ಪುಣಿ ನ್ಹಯ್....?" ಶೀತಲ್ ಆತಾಂ ವಿಶೇಶ್ ಚಿಂತಾಲೆಂ. ತಾಕಾ ಚಿಂತಾಪ್ ಸೊಡ್ಲ್ಯಾರ್ ದುಸ್ರೆಂ ಕಿತೆಂಯ್ ಸಾಂಗಾತ್ ದೀಂವ್ಕ್ ಸಕಾನಾತ್ಲ್ಲೆಂ.
ಜಾಂವ್ಯಾಚಾ ಮರ್ಣಾಕ್ ಆಯಿಲ್ಲ್ಯಾ ಶೀತಲಾಚಾ ಬಾಪಾಯ್ನ್ ಆಪ್ಲ್ಯಾ ಧುವೆಕ್ ಚಾರ್ ದೀಸ್ ಗಾಂವಾಕ್ ಆಪವ್ನ್ ವರ್ಚಿ ಇಚ್ಚಾ ದಾಖಯ್ಲಿ ತರ್ಯ್ ಶೀತಲ್ ಆಪ್ಲ್ಯಾ ಬಾಪಾಯ್ಕ್ ಆಯ್ಕಾಲೆಂ ನಾ.
"ಮಿಶೇಲ್.....! ತುಂ ತರ್ಯ್ ಸಮ್ಜಯ್ ಹಾಕಾ! ಹೆಂ ಆಶೆಂಚ್ ದೂಖ್ ದಾಂಬುನ್ ದರುನ್ ತಕ್ಲಿ ಆಟಯ್ತ್ ಜಾಲ್ಯಾರ್ ಹೆಂ ಆಶೆಂಚ್ ಪಿಶೆಂ ಜಾತೆಲೆಂ!" ಮಾಧವ ಆತಾಂ ಮಿಶೇಲಾಚಾ ಭರ್ವಸ್ಯಾರ್ ಆಸ್ಲ್ಲೊ. ಶೀತಲ್ ಆಪ್ಲ್ಯಾ ಬಾಪಯ್ ಲಾಗಿಂ ಉಲಂವ್ಕ್ ಪಾಸೊನ್ ಕಬೂಲ್ ನಾತ್ಲ್ಲೆಂ.
"ಪಳೆ ಶೀತಲ್! ಚಾರ್ ದೀಸ್ ತುಂ ಗಾಂವಾಂತ್ ರಾವೊನ್ ಯೆಶಿ ಜಾಲ್ಯಾರ್ ಸಗ್ಳೆಂ ಸಮಾ ಜಾತೆಲೆಂ. ಥಂಯ್ ತುಜಿಂ ಸಗ್ಳಿಂ ಆಸಾತ್. ಥೊಡ್ಯಾ ದಿಸಾಂಕ್ ತುಂ ತಾಂಚೆ ಮಧೆಂ ರಾವ್ಶಿ ಜಾಲ್ಯಾರ್ ಹ್ಯಾ ದೂಖಾಕ್ ತುಂ ವಿಸ್ರೊಂಕ್ ಸಕ್ತೆಲೆಂಯ್!" ಶೀತಲಾಕ್ ಕಾಂಯ್ ಸಮ್ಜಾವ್ನ್ ಫಾಯ್ದೊ ನಾ ಮ್ಹಳ್ಳೆಂ ಮಿಶೇಲ್ ಜಾಣಾಂ ಆಸ್ಲ್ಲೆಂ. ತೆಂ ಆಪ್ಣಾ ಬರಾಬರ್ ಯೇವ್ನ್ ರಾವ್ತೆಲೆಂ ಶಿವಾಯ್ ಆಪ್ಲ್ಯಾ ಬಾಪಯ್ಚಾ ಘರಾ ಪಾಟಿಂ ವೆಚೆಂ ನಾ. ಆಪ್ಲ್ಯಾ ಜಿವಿತಾಚ್ಯಾ ಹ್ಯಾ ಪರಿಗತೆಕ್ ಆಪ್ಲೊ ಬಾಪಯ್ಚ್ಚ್ ಕಾರಾಣ್ ಮ್ಹಣೊನ್ ಶೀತಲಾನ್ ಎದೊಳ್ಚ್ ಮಾಂದುನ್ ಘೆತ್ಲ್ಲೆಂ.
"ಹಾವೆಂ ಮ್ಹಜೆಂ ಆಪ್ಣಾಚೆಂ ಏಕ್ ಲ್ಹಾನ್ ಬಿಡಾರ್ ಬಾಂದುಂಕ್ ಚಿಂತ್ಲ್ಲೆಂ!" ಶೀತಲ್ ಕಸಲ್ಯಾಗೀ ತಾಚ್ಯಾ ಚಿಂತ್ನಾಂಚಾ ಸಂಸಾರಾ ಥಾವ್ನ್ ಉಲಯ್ತಾಲೆಂ. "ಹೆಂ ಎದೆಂ ವ್ಹಡ್ಲೆಂ ರಾವ್ಳೆರ್ ಮ್ಹಾಕಾ ನಾಕಾಚ್ ಆಸ್ಲ್ಲೆಂ. ಹ್ಯಾ ರಾವ್ಳೆರಾಂತ್ ಮ್ಹಾಕಾ ಎಕಾ ದಿಸಾಚಿ ನೀದ್ ಸಾರ್ಕಿ ಪಡೊಂಕ್ ನಾ!" ಶೀತಲ್ ಆಪ್ಣೆ ಮಂಗ್ಳುರ್ ಥ್ಹಾವ್ನ್ ಆಪ್ಣಾ ಬರಾಬರ್ ಘೆವ್ನ್ ಆಯಿಲ್ಯಾ ಸಪ್ಣಾಂ ಸವೆಂ ಮಸ್ತ್ ಪಯ್ಸ್ ಪಾವ್ಲ್ಲೆಂ.
ವಿಶು ಕುಮಾರಾಚಾ ಘರ್ಚಿಂ ಶೀತಲಾಕ್ ಭುಜಯ್ತಾಲಿಂ ಜಾಲ್ಯಾರ್ಯ್ ಶೀತಲಾಚಾ ಮನ್ ಕಡಂವ್ಚ್ಯಾ ಉತ್ರಾಂ ಮುಕಾರ್ ಕೊಣಾಕ್ಚ್ ಉಲಂವ್ಕ್ ಜೀಬ್ ಪರ್ತಾನಾತ್ಲ್ಲಿ.
ಹ್ಯಾ ವಿಶಯಾಂತ್ ಮಿಶೇಲ್ಯ್ ಅಸಹಾಯಕ್ ಜಾಲ್ಲೆಂ. ತೆಂ ಜಾಲ್ಯಾರ್ಯ್ ಕಿತೆಂ ಕರ್ತೆಲೆಂ. ತೆಂ ಶೀತಲಾಕ್ ಜಾಣಾಂ. ತ್ಯಾ ತಾಚ್ಯಾ ಕಾಜಾರ್ ಜಾಲ್ಲ್ಯಾ ದಿಸಾಂನಿ ಶೀತಲ್ ತಾಚ್ಯಾ ಫುಡಾರಾಕ್ ಚಿಂತುನ್ ಕಿತ್ಲೆಂ ಖುಶ್ ಆಸ್ಲ್ಲೆಂ ತೆಂ ಮಿಶೇಲ್ ಆನಿ ತೊ ಜಿಮ್ಮಿ ಮಾತ್ರ್ ಜಾಣಾಂತ್. ಆಸಲ್ಯಾ ಕಡೆನ್ ಕಾಜಾರ್ ಜಾವ್ನ್ ಎಕಾಚ್ಚ್ ವರ್ಸಾ ಭಿತರ್ ಶೀತಲಾಚಿಂ ಸಪ್ಣಾಂ ಸಗ್ಳಿಂ ತ್ಯಾ ವಾರ್ಯಾರ್ ದಿಶಾ ಸೊಧುನ್ ಉಭ್ಲ್ಲಿಂ. ತಾಚ್ಯಾ ಸಪ್ಣಾಂ ಸವೆಂ ಆಜ್ ತೆಂಯ್ ವಿಧವ್ ಜಾಲ್ಲೆಂ. ಆಸಲ್ಯಾ ಶೀತಲಾಕ್ ಮಿಶೇಲ್ ಕಶೆಂ ಸಮ್ಜಾಂವ್ಕ್ ಸಕ್ತೆಲೆಂ? ಮಿಶೇಲಾಚಾ ಮುಕಾರ್ ದುಸ್ರೊ ಕಾಂಯ್ ಉಪಾಯ್ ನಾಸ್ತಾಂ ಆಪ್ಣೆಂಚ್ ಶೀತಲಾಚಾ ಜತ್ನೆಚಿ ಜವಾಬ್ದಾರಿ ಘೆವ್ನ್ ಮಿಶೇಲಾನ್ ಶೀತಲಾಚಾ ಬಾಪಾಯ್ಕ್ ಭುಜಯ್ಲೆಂ.
ಆಪ್ಣಾಚೊ ಜೀವ್ ಜಾವ್ನ್ ಆಸ್ಲ್ಲೆಂ ಆಪ್ಣಾಚೆಂ ಧುವ್ ಆಜ್ ಆಪ್ಣಾಚೆಂ ಜಾಯ್ನಾಸ್ತಾನಾ ವೆತಾನಾ ಹಾಚ್ಯಾ ಪಾಟ್ಲ್ಯಾ ಕಾರಾಣಾಕ್ ಮಾಧವ ಸಮ್ಜೊಂಕ್ ಸಕಾನಾಸ್ತಾನಾ ತೊ ಆಪ್ಲ್ಯಾ ಭಿತರ್ಚ್ ಕಳ್ವಳ್ಳೊ.
"ಡ್ಯಾಡಿ ಮ್ಹಜೆಂ ಏಕ್ ಉತಾರ್ ಆಯ್ಕಾತಾಯ್....?" ನಿಮಾಣೆಂ ಜಾವ್ನ್ ಶೀತಲಾನ್ ಆಪ್ಲ್ಯಾ ಬಾಪಯ್ ಲಾಗಿಂ ಉಲಂವ್ಚೆಂ ಮನ್ ಕೆಲೆಂ.
"ಹಾಂ ಶೀತಲ್! ಸಾಂಗ್.....! ತುಕಾ ಹಾವೆಂ ಕೆದ್ನಾಂಯ್ ಕಿತೆಂಯ್ ನಾ ಮ್ಹಣೊನ್ ಸಾಂಗ್ಲಾ?" ಆಪ್ಲೆಂ ಧುವ್ ನಿಮಾಣೆಂ ತರ್ಯ್ ಆಪ್ಣಾಲಾಗಿಂ ಉಲಯಿಲ್ಲೆಂ ಪಳವ್ನ್ ಮಾಧವ ಖುಶಿಯೆನ್ ಭರ್ಲೊ.
"ತುಂ ಎಕ್ಚ್ ಏಕ್ ದೀಸ್...."
"ಶೀತಲ್....?" ಆಪ್ಲ್ಯಾ ಬಾಪಾಯ್ ಲಾಗಿಂ ಶೀತಲ್ ಕಿತೆಂ ಉಲಂವ್ಕ್ ವೆತಾ ತೆಂ ಕಳ್ಲ್ಲ್ಯಾ ಮಿಶೇಲಾನ್ ಶೀತಲಾಕ್ ಆಡಾಯ್ಲೆಂ.
"ಆಜ್ ಮ್ಹಾಕಾ ಆಡಾಯ್ನಕಾ ಮಿಶೇಲ್! ಹಾಂವ್ ಮ್ಹಜ್ಯಾ ಬಾಪಾಯ್ಚಾ ಘರಾ ಆಸ್ತಾನಾ ಮ್ಹಜ್ಯಾ ಹ್ಯಾ ಜಿಬೆಕ್ ಹಿಂ ಉತ್ರಾಂ ಉಚಾರ್ಚಾ ತಿತ್ಲಿ ಸಕತ್ ನಾತ್ಲ್ಲಿ. ಪುಣ್ ಆಜ್....! ಆಜ್ ಹಾಂವ್ ಮ್ಹಜ್ಯಾ ಬಾಪಾಯ್ಚಾ ಘರಾ ನಾ ಮಿಶೇಲ್! ದೆಕುನ್ ಹಾಂವ್ ಕಿತೆಂ ಉಲಯ್ತಾಂ ತೆಂ ಮ್ಹಾಕಾ ಉಲಂವ್ಕ್ ಸೊಡ್. ಕೋಣ್ ಜಾಣಾಂ ಹ್ಯಾ ಉಪ್ರಾಂತ್ ಹಾಂವ್ ಮ್ಹಜ್ಯಾ ಬಾಪಾಯ್ ಲಾಗಿಂ ಉಲಂವ್ಕ್ ಸಕ್ತೆಲಿಂ ವಾ ನಾ ತೆಂ!" ಶೀತಲಾಚೆ ದೊಳೆ ಭರೊನ್ ಯೆತಾಲೆ.
"ಆಶೆಂ ತುಂ ಕಿತ್ಯಾಕ್ ಉಲಯ್ತಾಯ್ ಶೀತಲ್...? ಹಾವೆಂ ಕೆದ್ನಾಂಯ್ ತುಜ್ಯಾ ಖುಶೆ ವಿಶಿಂಚ್ ಚಿಂತ್ಲಾಂ ಪುತಾ!" ಮಾಧವ ಆಪ್ಲ್ಯಾ ಧುವೆಚ್ಯಾ ಲಾಗಿಂ ಬಸ್ಲೊ. ಧುವೆಚ್ಯಾ ಉತ್ರಾಂ ಥಾವ್ನ್ ತೊ ಕಳ್ವಳೊನ್ ತಾಚೆಂ ಕಾಳಿಜ್ ಭರೊನ್ ಯೆತಾಲೆಂ.
"ಹೆಂಚ್ ಆಜ್ ಮ್ಹಜ್ಯಾ ಹ್ಯಾ ಗತಿಕ್ ಕಾರಾಣ್ ಡ್ಯಾಡಿ!" ಶೀತಲಾಚಿ ನದರ್ ಶೂನ್ಯತಾ ತೆವ್ಶಿಂ ಧಾಂವ್ಲ್ಲಿ.
"ಶೀತಲ್! ಪ್ಲೀಸ್ ಕೀಪ್ ಕ್ವಾಯ್ಟ್!" ಮಿಶೇಲಾನ್ ಪರ್ತ್ಯಾಕ್ ಶೀತಲಾಚೆಂ ತೋಂಡ್ ಧಾಂಪಂವ್ಕ್ ಪ್ರಯತ್ನ್ ಕೆಲೆಂ.
"ವ್ಹಡ್ ನಾ ಮಿಶೇಲ್! ತೆಂ ಮ್ಹಜೆಂ ಧುವ್! ತಾಕಾ ಉಲಂವ್ಕ್ ಸೊಡ್! ಹಾಚ್ಯೆ ಥಾವ್ನ್ ತಾಚೆಂ ಮನ್ ಥೊಡೆಂ ಹಾಳು ಜಾಲ್ಯಾರ್.....!" ಮಾಧವಾನ್ ಖುದ್ದ್ ಆಪ್ಲ್ಯಾ ಧುವೆಕ್ ಉಲಂವ್ಚಿ ಪರ್ವಣ್ಗಿ ದಿಲಿ. ಎದೊಳ್ ಪಾಸೊನ್ ಆಪ್ಣಾ ಲಾಗಿಂ ಉಲಂವ್ಕ್ ತಯಾರ್ ನಾತ್ಲ್ಲೆಂ ಶೀತಲ್ ಆತಾಂ ಆಪ್ಣಾ ಲಾಗಿಂ ಉಲಂವ್ಕ್ ತಯಾರ್ ಜಾಲಾಂ ಮ್ಹಳ್ಳೆಂ ಕಳೊನ್ ತಾಕಾ ಥೊಡೆಂ ಸಮಾಧಾನ್ ಜಾಲ್ಲೆಂ.
"ಸಾಂಗ್ ಶೀತಲ್ ತುಂ ಕಿತೆಂ ಸಾಂಗೊಂಕ್ ಆಶೆತಾಯ್.....?" ಶೀತಲ್ ಮೌನ್ ಜಾಲ್ಲೆಂ ಪಳವ್ನ್ ಮಾಧವಾನ್ ಪರ್ತ್ಯಾಕ್ ಶೀತಲಾಕ್ ವಿಚಾರ್ಲೆಂ.
"ತುಂ..... ಏಕ್ ದೀಸ್! ಫಕತ್ತ್ ಏಕ್ ದೀಸ್ ತುಜ್ಯಾ ದುಖಾನಾಂತ್ ಯೇವ್ನ್ ಸೊರೊ ಪಿಯೆವ್ನ್ ವೆಚ್ಯಾ ಎಕಾ ಮನ್ಶ್ಯಾಚಾ ಘರಾ ವಚೊನ್ ತಾಚ್ಯಾ ಬಾಯ್ಲೆಕ್ ಪಳೆ, ತಾಚ್ಯಾ ಆವಯ್ಕ್ ಪಳೆ, ತಾಚ್ಯಾ ಭುರ್ಗ್ಯಾಂಕ್ ಆಯ್ಕ್, ತಾಚ್ಯಾ ಬಾಂವ್ಡಾಂಕ್ ಸಮ್ಜಾ, ತುಕಾ ಸಾದ್ಯ್ ಜಾತಾ ಜಾಲ್ಯಾರ್ ತ್ಯಾ ಘರ್ಚ್ಯಾ ಮೊಡ್ಕೆಂತ್ ತಿಳುನ್ ಪಳೆ. ತ್ಯಾ ಸುಕ್ಲೆಲ್ಯಾ ಮೊಡ್ಕೆ ಥಳಾರ್ ತುಕಾ ಮ್ಹಜೆಂ ಜಿವಿತ್ ಸುಕೊನ್ ಗೆಲ್ಲೆಂ ದಿಶ್ಟಿಕ್ ಪಡ್ತೆಲೆಂ!" ಆಪ್ಲ್ಯಾ ಬಾಪಾಯ್ಕ್ ಪಳವ್ನ್ ಉಲಂವ್ಚೆಂ ಧಯ್ರ್ ಶೀತಲಾಕ್ ನಾತ್ಲ್ಲೆಂ. ತಾಚಿ ದೀಶ್ಟ್ ತಶಿಚ್ ತ್ಯಾ ಮುಕ್ಲ್ಯಾ ಜನೆಲಾ ಥಾವ್ನ್ ಭಾಯ್ರ್ ಅನಂತಾಕ್ ಸೊಧುನ್ ಆಸ್ಲ್ಲಿ.
ಶೀತಲಾಚಾ ಉತ್ರಾಂನಿ ಮಾಧವಾಚೆಂ ಕಾಳಿಜ್ ಎಕಾಚ್ಚ್ ಫರಾ ಹಜಾರ್ ಭಾಲಿಯಾಂನಿ ಪಾಪ್ಸಿಲ್ಲ್ಯಾ ಪರಿಂ ಜಾತಾನಾ ತಾಚ್ಯಾ ಪಾಂಯಾಂ ಪಂದ್ಲಿ ಧರ್ಣ್ ಕೊಸಾಳ್ಲ್ಲ್ಯಾ ಪರಿಂ ಜಾಲಿ. ತೊ ’ಸಟ್ಟ್’ ಕರುನ್ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟೊನ್ ಉಭೊ ಜಾಲೊ.
"ಶೀತಲ್.....? ಡ್ಯಾಡಿಲಾಗಿಂ ಆಶೆಂ ಉಲಯ್ನಾಂತ್!" ಮಿಶೇಲ್ ಆತಾಂ ಮಾಧವಾ ತೆವ್ಶಿಂ ಘುಂವ್ಲೆಂ. "ಶೀತಲಾಚಾ ಮತಿಕ್ ಧಖೊ ಬಸ್ಲಾ ಅಂಕಲ್! ದೆಕುನ್ ತೆಂ ಆಶೆಂ ಉಲಯ್ತಾ! ತುಮಿಂ ಬೆಜಾರ್ ಕರಿನಾಕಾತ್!"
ಮಾಧವ ಕಾಂಯ್ ಉಲಯ್ಲೊ ನಾ. ತೊ ತಸೊಚ್ಚ್ ಚಲೊನ್ ವಚೊನ್ ತ್ಯಾ ಮುಕ್ಲ್ಯಾ ದಾರಾಚಾ ದೆಗೆನ್ ಆಸ್ಲ್ಲ್ಯಾ ಜನೆಲಾಚೆಂ ಕರ್ಟನ್ ಹೆವ್ಶಿಂ ವೊಡುನ್ ಭಾಯ್ರ್ ಪಳಂವ್ಕ್ ಲಾಗ್ಲೊ.
ಶೀತಲಾಕ್ ಕೊಣೆಂ ಕಿತ್ಲೆಂ ಸಮ್ಜಾಯ್ಲ್ಯಾರ್ಯ್ ತೆಂ ಮಾತ್ರ್ ಮಂಗ್ಳುರ್ ವಚೊಂಕ್ ತಯಾರ್ ಜಾಲೆಂ ನಾ. ದೋನ್ ದಿಸಾಂನಿ ಮಾಧವ ಮಂಗ್ಳುರಾಕ್ ಭಾಯ್ರ್ ಸರ್ಲೊ. ಮಿಶೇಲಾನ್ ತಾಕಾ ತಾಚ್ಯಾ ಧುವೆ ವಿಶ್ಯಾಂತ್ ಭರ್ವಸೊ ದಿಲ್ಲ್ಯಾನ್ ತಾಕಾ ಥೊಡೆಂ ಸಮಾಧಾನ್ ಜಾಲೆಂ.
ಮಾಧವ ಮಂಗ್ಳುರಾಕ್ ಪಾಟಿಂ ವೆತಾನಾ ಶೀತಲ್ ಮುಂಬಯಿಚ್ ಉರ್ಲೆಂ.
ಹ್ಯಾ ಉಪ್ರಾಂತ್!
ಹರ್ಯೆಕ್ ದೀಸ್ ಮ್ಹಳ್ಳ್ಯಾ ಪರಿಂ ರಾಯನ್ ಆಪ್ಲ್ಯಾ ಆಫೀಸಾಕ್ ಗೆಲ್ಯಾ ಉಪ್ರಾಂತ್ ಮಿಶೇಲ್ ಶೀತಲಾಕ್ ಮೆಳೊಂಕ್ ಯೆತಾಲೆಂ. ಕೆದ್ನಾಂ ಕೆದ್ನಾಂ ಮಿಶೇಲ್ ಶೀತಲಾಕ್ ಆಪ್ಲ್ಯಾ ಘರಾ ಆಪವ್ನ್ ಹಾಡ್ತಾಲೆಂ.
"ವಿಶುಚೆಂ ಕಸಲೆಂಯ್ ಬಿಜ್ನೆಸ್ ತುಕಾ ಮುಖಾರ್ಸುನ್ ವರ್ಚಿ ಆಶಾ ಆಸ್ಲ್ಯಾರ್ ಹಾಂವ್ ತುಕಾ ಕುಮಕ್ ಕರ್ತಾಂ ಶೀತಲ್!" ರಾಯನಾನ್ ಶೀತಲಾಕ್ ಭಾಸಾವ್ಣಿ ದಿಲ್ಲಿ.
ಮಿಶೇಲ್ ಆನಿ ರಾಯನಾನ್ ದಿಲ್ಲ್ಯಾ ಧಯ್ರಾನ್ ಸವ್ಕಾಸ್ ದೀಸ್ ಧಾಂವ್ಲ್ಲ್ಯಾ ಪರಿಂ ಆಪ್ಲ್ಯಾ ಘೊವಾಚ್ಯಾ ಮರ್ಣಾಕ್ ಶೀತಲ್ ವಿಸ್ರೊನ್ ಯೆತಾಲೆಂ.
ಆತಾಂ ಶೀತಲ್ ತಾಚ್ಯಾ ಜಿವಿತಾಕ್ ಥೊಡೆಂ ಸಾಂಬಾಳುಂಕ್ ಸಕ್ಲ್ಲೆಂ ಜಾಲ್ಲ್ಯಾನ್ ಮಿಶೇಲಾಚಿ ಖಂತ್ ಥೊಡಿ ಉಣಿ ಜಾಲ್ಲಿ.
ಶೀತಲಾಚಾ ಘೊವಾಚೆಂ ಬಿಜ್ನೆಸ್ ರಾಯನ್ ಪಳಯ್ತಾಲೊ.
ಆಶೆಂ ಆಸ್ತಾಂ ಆಯ್ಚಾ ಸಾಕಾಳಿಂ ರಾಯನ್ ಸ್ಟೂಡಿಯೊಕ್ ವಚೊಂಕ್ ಭಾಯ್ರ್ ಸರ್ಲೊ. ಹ್ಯಾ ವಿಶಿಂ ರಾಯನಾನ್ ಮಿಶೇಲಾಕ್ ತಿಳ್ಸಿತಾನಾ.....,
"ರಾಯನ್....? ತುಂ ಸ್ಟೂಡಿಯೊಕ್ ವೆತಾಯ್ ಜಾಲ್ಯಾರ್ ಮ್ಹಾಕಾ ಶೀತಲಾಚಾ ಘರಾ ಸೊಡುನ್ ವಚ್!" ಮಿಶೇಲ್ ಶೀತಲಾಚಾ ಘರಾ ವಚೊಂಕ್ ಆಯ್ತೆಂ ಜಾಲೆಂ.
"ಕಿತ್ಯಾಕ್? ಕಾಂಯ್ ಕಾಮ್ ಆಸಾ......?" ರಾಯನಾನ್ ವಿಚಾರ್ಲೆಂ.
"ನಾ! ಆಶೆಂಚ್!"
"ತುಂವೆಂಯ್ ಕಾರ್ ಡ್ರೈವಿಂಗ್ ಶಿಕೊಂಕ್ ಜಾಯ್ ಮಿಶೇಲ್! ಉಪ್ರಾಂತ್ ತುಕಾ ಖಂಯ್ ಜಾಯ್ ಥಂಯ್ಚರ್ ವಚ್ಯೆತ್!" ಸ್ಟೂಡಿಯೊಕ್ ವಚೊಂಕ್ ಆಯ್ತೊ ಜಾಲ್ಲೊ ರಾಯನ್ ಆಪ್ಲ್ಯಾ ಬ್ರೀಫ್ ಕೇಸಿಕ್ ಉಗ್ತಿ ಕರುನ್ ತಾಂತುಂ ತಾಕಾ ಜಾಯ್ ಜಾಲ್ಲೆಂ ಕಿತೆಂಗೀ ಸೊಧ್ತಾಲೊ.
"ನ್ಹೆಸ್!" ಬ್ರೀಫ್ ಕೇಸಿಂತ್ಲೊ ಆಪ್ಲೊ ಚೆಕ್ಬುಕ್ ಆಪ್ಲ್ಯಾ ಹಾತಿಂ ಧರುನ್ ಮಿಶೇಲಾಕ್ ಪಳಯಿಲ್ಲೊ ತೊ ಪರ್ತ್ಯಾಕ್ ತ್ಯಾ ಚೆಕ್ಬುಕಾಚೆರ್ ಆಪ್ಲಿ ನದರ್ ಮಾರುಂಕ್ ಲಾಗ್ಲೊ.
ಹ್ಯಾಚ್ ವೆಳಾರ್!
ಭಾಯ್ರ್ ರಾಯನಾಚಾ ಬೊಂಗ್ಲ್ಯಾ ಸಾಮ್ಕಾರ್ಚ್ ಮುಕ್ಲ್ಯಾ ರಸ್ತ್ಯಾರ್, ಸವ್ಕಾಸ್ ಆಯಿಲ್ಲೆಂ ಏಕ್ ಮೆರೂನ್ ರಂಗಾಚೆಂ ಕಾಳ್ಯಾ ಆರ್ಶ್ಯಾಂನಿ ಭಂಧ್ ಆಸ್ಲ್ಲೆಂ ಮಹೀಂದ್ರ ಜೀಪ್ ಥಾಂಬ್ಲೆಂ. ತ್ಯಾ ಜಿಪಾಚೆರ್ ಥಾವ್ನ್ ಕೊಣ್ಯ್ ಭಾಯ್ರ್ ಆಯ್ಲೆ ನಾಂತ್. ಜಿಪಾ ಭಿತರ್ ಕೋಣ್ ಆಸಾ ವಾ ನಾ ಮ್ಹಳ್ಳೆಂ ತೆಂ ಭಾಯ್ರ್ ಥಾವ್ನ್ ಕಾಂಯ್ ದಿಸೊಂಕ್ ಸಾದ್ಯ್ಚ್ ನಾತ್ಲ್ಲೆಂ.
ಬೊಂಗ್ಲ್ಯಾ ಸಾಮ್ಕಾರ್ಚ್ ಯೇವ್ನ್ ರಾವ್ಲ್ಲ್ಯಾ ಜಿಪಾಕ್ ಪಳವ್ನ್ ಬೊಂಗ್ಲ್ಯಾಚೊ ವಾಚ್ಮ್ಯಾನ್ ಆಪ್ಲ್ಯಾ ಆಪ್ಣೆ ಬಸ್ಲೆಲ್ಯಾ ಕದೆಲಾರ್ ಥಾವ್ನ್ ಉಟೊನ್ ಗೇಟಿ ತೆವ್ಶಿಂ ಮೆಟಾಂ ಕಾಡ್ತಾನಾ, ತೆಂ ಮಹೀಂದ್ರ ಜೀಪ್ ಜಶೆಂ ಆಯಿಲ್ಲೆಂ ತಶೆಂಚ್ ಸವ್ಕಾಸ್ ಮುಕಾರ್ ಗೆಲ್ಲೆಂ ತೆಂ ನಪಂಯ್ಚ್ ಜಾಲೆಂ.
ಮಿಶೇಲಾಚೆಂ ನ್ಹೆಸೊನ್ ಜಾವ್ನ್ ತೆಂ ತಯಾರ್ ಜಾತಾನಾ ರಾಯನಾನ್ ಮಿಶೆಲಾಕ್ ಶೀತಲಾಚಾ ಘರಾ ಸೊಡ್ಲೆಂ. ತೊ ಶೀತಲಾಚಾ ಘರಾ ಗೆಲೊ ನಾ. ತಾಕಾ ಸ್ಟೂಡಿಯೊಕ್ ವೆಗ್ಗಿಂ ಪಾಂವೊಂಕ್ ಆಸ್ಲ್ಲೆಂ.
ಜಿಪಾರ್ ಥಾವ್ನ್ ದೆಂವ್ಲ್ಲೆಂ ಮಿಶೇಲ್ ಶೀತಲಾಚಾ ಘರಾಚಿ ಗೇಟ್ ಉಗ್ತಿ ಕರುನ್ ಭಿತರ್ ಸರ್ಲೆಂ.
ಶೀತಲಾಚಾ ಘರಾ ಭಿತರ್ ಸರ್ಲ್ಲ್ಯಾ ಮಿಶೇಲಾಕ್ ಆಜ್ ಶೀತಲಾಚಾ ಘರ್ಚ್ಯಾ ಸಾಲಾಂತ್ಚ್ ಜಿಮ್ಮಿನ್ ಶೀತಲಾಕ್ ಗಿಫ್ಟ್ ದಿಲ್ಲೆಂ ಪಿಂತುರ್ ಝಳ್ಕಾಲೆಂ. ತ್ಯಾ ಪಿಂತುರಾಕ್ ಶೀತಲಾನ್ ಆಪ್ಲ್ಯಾ ಘರಾಚ್ಯಾ ಸಾಲಾಂತ್ ಸೊಭಯಿಲ್ಲೆಂ.
ತ್ಯಾ ಪಿಂತುರಾಕ್ ಪಳವ್ನ್ ವೊಂಟಾರ್ ಹಾಸೊ ಹಾಡಯಿಲ್ಲ್ಯಾ ಮಿಶೇಲಾಕ್ ಆಜ್ ಶೀತಲ್ ಮಸ್ತ್ ಖುಶಿಯೆರ್ ಆಸ್ಲ್ಲ್ಯಾ ಪರಿಂ ಜಾಲೆಂ.
ಶೀತಲಾ ಥಂಯ್ ಹ್ಯಾ ದಿಸಾಂನಿ ಮಸ್ತ್ ಬದಾವಣ್ ಜಾಲ್ಲಿ.
"ರಾಯನ್ ಯೇಂವ್ಕ್ ನಾ ಮಿಶೇಲ್....?" ಶೀತಲ್ ಭಾಯ್ಲ್ಯಾ ರಸ್ತ್ಯಾಕ್ಚ್ ಪಳೆತಾಲೆಂ.
"ರಾಯನ್ ಹ್ಯಾ ದಿಸಾಂನಿ ಮಸ್ತ್ ಬಿಜಿ ಆಸಾ ಶೀತಲ್! ತಾಕಾ ಸ್ಟೂಡಿಯೊಕ್ ವಚೊಂಕ್ ಆಸಾ ಮ್ಹಣೊನ್ ಮ್ಹಣ್ತಾಲೊ!"
"ಸ್ಟೂಡಿಯೊಕ್....! ಕಿತ್ಯಾಕ್?" ಶೀತಲಾನ್ ಆಪ್ಲಿ ಟಿ.ವಿ ಭಂಧ್ ಕೆಲಿ.
"ಹಾವೆಂ ವಿಚಾರುಂಕ್ ನಾ!" ಮಿಶೇಲಾನ್ ಆಪ್ಲ್ಯಾ ವ್ಯಾನಿಟಿ ಬ್ಯಾಗಾಕ್ ಥಂಯ್ಚ್ ಮುಕ್ಲ್ಯಾ ಸೋಫಾರ್ ಉಡಯ್ಲೆಂ.
"ಹಾಂವ್ ಕಾಫಿ ಕರ್ತಾಂ!" ಶೀತಲ್ ಭಿತರ್ ಕುಜ್ನಾ ತೆವ್ಶಿಂ ಚಮ್ಕಾಲೆಂ.
"ಸುಮಿ ನಾ.....?" ಶೀತಲಾಚಾ ಕಾಮಾಚಾ ಚೆಡ್ವಾಚೊ ಮಿಶೇಲಾಕ್ ಉಡಾಸ್ ಆಯ್ಲೊ.
"ತೆಂ ಮಾರ್ಕೆಟಿಕ್ ಗೆಲಾಂ!" ಶೀತಲಾನ್ ಆತಾಂ ಕೆಟಲಾ ಭಿತರ್ ಉದಾಕ್ ವೊತುನ್ ತಾಕಾ ಸ್ಟವಾರ್ ದವರ್ಲೆಂ.
ಶೀತಲಾಚಾ ಪಾಟ್ಲ್ಯಾನ್ ಆಯಿಲ್ಲೆಂ ಮಿಶೇಲ್ ಕುಜ್ನಾಚಾ ದಾರಾರ್ ಉಭೆಂ ರಾವೊನ್ ಶೀತಲಾಕ್ಚ್ ಪಳೆತಾಲೆಂ. ಕುಜ್ನಾಚಾ ದಾರಾರ್ ಉಭೆಂ ರಾವ್ಲ್ಯಾರ್ ತ್ಯಾ ದಾರಾ ಸಾಮ್ಕಾರ್ಚ್ ಕುಜ್ನಾಚೆಂ ಜನೆಲ್ ಆಸ್ಲ್ಲೆಂ. ತ್ಯಾ ಜನೆಲಾ ದೆಗೆನ್ಚ್ ಫ್ರಿಜ್ಜ್ ಉಭೊ ಆಸ್ಲ್ಲೊ.
ತಶೆಂಚ್ ಮೆಟಾಂ ಕಾಡುನ್ ಭಿತರ್ ಆಯಿಲ್ಲ್ಯಾ ಮಿಶೇಲಾನ್ ಭಾಯ್ರ್ ಪಳಂವ್ಚ್ಯಾ ಆಶೆನ್ ಕುಜ್ನಾಂತ್ಲ್ಯಾ ಜನೆಲಾ ಲಾಗಿಂ ಯೇವ್ ಆಪ್ಲಿ ದೀಶ್ಟ್ ಭಾಯ್ರ್ ವೆಲಿ. ತಾಕಾ ಆತಾಂ ಭಾಯ್ಲೆಂ ಗಾರ್ಡನ್ ಆನಿ ತಾಚ್ಯಾ ದೆಗೆಚೊ ಆಡ್ ರಸ್ತೊ ದಿಸ್ಲೊ. ಆನಿ ತ್ಯಾ ಆಡ್ ರಸ್ತ್ಯಾರ್ ದೀಶ್ಟ್ ಧಾಂವ್ಡಾಯಿಲ್ಲ್ಯಾ ಮಿಶೇಲಾಕ್ ತ್ಯಾ ರಸ್ತ್ಯಾರ್ ರಾವ್ಲೆಲೆಂ ಮೆರೂನ್ ರಂಗಾಚೆಂ ಕಾಳ್ಯಾ ಆರ್ಶ್ಯಾಂಚೆಂ ಜೀಪ್ ದಿಸ್ಲೆಂ.
ಮೆರೂನ್ ರಂಗಾಚೆಂ ಕಾಳ್ಯಾ ಆರ್ಶ್ಯಾಂನಿ ಭಂಧ್ ಆಸ್ಲ್ಲೆಂ ಮಹೀಂದ್ರ ಸ್ಕೋರ್ಪಿಯೊ ಜೀಪ್!
ಪಾಟ್ಲ್ಯಾ ಸಭಾರ್ ದಿಸಾಂ ಥಾವ್ನ್ ಆಪ್ಣಾಚಾ ಆನಿ ಹ್ಯಾ ಶೀತಲಾಚಾ ಘರಾ ಭೊಂವಾರಿಂಚ್ ದಿಸೊನ್ ಯೆಂವ್ಚ್ಯಾ ತ್ಯಾ ಕಾಳ್ಯಾ ಆರ್ಶ್ಯಾಂಚಾ ಮೆರೂನ್ ರಂಗಾಚಾ ಜೀಪಾಕ್ ಪಳವ್ನ್ ಆತಾಂ ಮಿಶೇಲಾಕ್ ಕಿತ್ಯಾಕ್ಗೀ ತ್ಯಾ ಜೀಪಾ ವಯ್ರ್ ದುಬಾವ್ ಉದೆಲೊ. ತಶೆಂಚ್ ತಾಣೆಂ ತ್ಯಾ ಜಿಪಾಕ್ ಪಳೆಲೆಂ.
ವಿಶುಚೆಂ ಆಕ್ಸಿಡೆಂಟ್ ಜಾಲ್ಯಾ ಉಪ್ರಾಂತ್ ಹೆಂ ಜೀಪ್ ಸಭಾರ್ ಪಾವ್ಟಿಂ ಮಿಶೇಲಾಚಾ ನದ್ರೆ ಮುಕಾರ್ ಆಯಿಲ್ಲೆಂ.
ತೆಂಯ್ ಫಕತ್ತ್ ಹ್ಯಾ ಶೀತಲಾಚಾ ಘರಾ ಭೊಂವ್ತಣಿಂ!
ತೆಂ ಜೀಪ್ ಕೊಣಾಚೆಂ ಜಾವ್ಯೆತ್? ಆಪ್ಣಾ ಇತ್ಲ್ಯಾಕ್ ಮಿಶೇಲ್ ಚಿಂತಾಲೆಂ. ಪುಣ್ ತಾಚ್ಯಾ ಮತಿಕ್ ಕಾಂಯ್ ಜವಾಬ್ ಝಳ್ಕಾಲಿ ನಾ.
"ಶೀತಲ್ ಹೆವ್ಶಿಂ ಯೇ.....!"
"ಕಿತೆಂ....?" ತಶೆಂಚ್ ತ್ಯಾ ಜನೆಲಾ ಥಾವ್ನ್ ಭಾಯ್ರ್ ಪಳವ್ನ್ ಆಸ್ಲ್ಲ್ಯಾ ಮಿಶೇಲಾಕ್ ಪಳವ್ನ್ ಶೀತಲಾಕ್ಯ್ ದುಬಾವ್ ಜಾಲೊ.
"ತೆಂ ಮೆರೂನ್ ರಂಗಾಚೆಂ ಜೀಪ್ ಪಳೆ!" ಮಿಶೇಲಾನ್ ಪಯ್ಸ್ ರಾವ್ಲೆಲ್ಯಾ ಜಿಪಾಕ್ ದಾಖಯ್ತಾನಾ ಶೀತಲಾನ್ ಆಪ್ಲಿ ದೀಶ್ಟ್ ಧಾಂವ್ಡಾವ್ನ್ ಮಿಶೇಲಾನ್ ದಾಖಯಿಲ್ಲ್ಯಾ ತೆವ್ಶಿಂ ಪಳೆಲೆಂ.
"ವ್ಹಯ್! ಕಿತೆಂ ಜಾಲೆಂ.....?" ಶೀತಲಾಚಾ ದೊಳ್ಯಾಂಕ್ ತೆಂ ಜೀಪ್ ಸಾಂಪಡ್ಲೆಂ. ಪುಣ್ ತಾಕಾ ಮಿಶೇಲಾನ್ ತೆಂ ಜೀಪ್ ದಾಕಯಿಲ್ಲ್ಯಾಚೊ ಮತ್ಲಾಬ್ ಸಮ್ಜಾಲೊ ನಾ.
"ತೆಂ ಜೀಪ್ ಕೊಣಾಚೆಂ ಜಾಣಾಂಯ್.....?"
"ನಾ! ಕಿತ್ಯಾಕ್....?" ಶೀತಲಾನ್ ಮಿಶೇಲಾಕ್ಚ್ ಪಳೆಲೆಂ.
"ಕಾಂಯ್ ನಾ ಆಶೆಂಚ್!" ಮಿಶೇಲಾನ್ ವಿಶಯ್ ದಾಂಪುನ್ ದವರುಂಕ್ ಪ್ರಯತ್ನ್ ಕೆಲೆಂ.
ಶೀತಲಾಕ್ ತ್ಯಾ ಮಿಶೇಲಾನ್ ದಾಖಯಿಲ್ಲ್ಯಾ ಜಿಪಾ ವಯ್ರ್ ಕಾಂಯ್ ಉರ್ಭಾ ಉದೆಲಿ ನಾ. ತೆಂ ಮಿಶೆಲಾಕ್ ಸೊಡುನ್ ಹೆವ್ಶಿಂ ಆಯ್ಲೆಂ. ಹೆವ್ಶಿಂ ಆಯಿಲ್ಲ್ಯಾ ತಾಣೆಂ ಕಿಚನ್ ಕ್ಯಾಬಿನೆಟಾಕ್ ಉಗ್ತೆಂ ಕರುನ್ ತಾಂತ್ಲಿಂ ದೋನ್ ಕಪ್ಪಾಂ ಭಾಯ್ರ್ ಕಾಡುನ್ ಕ್ಯಾಬಿನೆಟ್ ಭಂಧ್ ಕೆಲೆಂ.
"ಕಿತೆಂ ಮಿಶೇಲ್.....?" ಅಜೂನ್ ಮಿಶೇಲ್ ತ್ಯಾ ಕಾಳ್ಯಾ ಆರ್ಶ್ಯಾಂಚಾ ಜಿಪಾಕ್ಚ್ ಪಳವ್ನ್ ಆಸ್ಲ್ಲೆಂ.
ಮಿಶೇಲಾನ್ ಹ್ಯಾ ಜಿಪಾಕ್ ಹಾಚ್ಯಾ ಆದಿಂ ಸಭಾರ್ ಪಾವ್ಟಿಂ ಪಳೆಲ್ಲೆಂ. ಕೆದ್ನಾಂಯ್ ಆಪ್ಣಾ ಸಾಮ್ಕಾರ್ ಜಾಲ್ಯಾರ್ ಕೆದ್ನಾಂಯ್ ಪಯ್ಸ್! ತ್ಯಾ ಜಿಪಾ ಭಿತರ್ ಕೋಣ್ಯ್ ಆಸಾತ್ ವಾ ನಾಂತ್ ಮ್ಹಳ್ಳೆಂ ತೆಂ ದಿಸಾನಾತ್ಲ್ಲೆಂ. ಕಾಂಯ್ ಹೆಂ ಜೀಪ್ ಆಪ್ಣಾಚೊ ಪಾಟ್ಲಾವ್ ಪುಣಿಂ ಕರಿನಾ? ಪುಣ್ ಕಿತ್ಯಾಕ್? ಮ್ಹಜೊ ನ್ಹಯ್ ತರ್ ಶೀತಲಾಚೊ ಪಾಟ್ಲಾವ್ ಪುಣಿಂ.....? ಚಿಂತ್ಚ್ಯಾ ಮಿಶೇಲಾಕ್ ಕಾಂಯ್ಚ್ ಸಮ್ಜಾನಾತ್ಲ್ಲೆಂ. ಶೀತಲಾಕ್ ಹ್ಯಾ ಜಿಪಾ ವಿಶಿಂ ಕಾಂಯ್ ಖಬಾರ್ ನಾ ಮ್ಹಳ್ಯಾರ್ ಶೀತಲಾಕ್ ಎದೊಳ್ ಕಾಂಯ್ ದುಬಾವ್ ಯೇಂವ್ಕ್ ನಾ. ತರ್ ಕಾಂಯ್ ಹೆಂ ಜೀಪ್ ಮ್ಹಾಕಾಚ್ ಪುಣಿಂ.....?
ತಿತ್ಲೆಂಚ್!
ಕಾಳ್ಜಾ ಭಿತರ್ ಭಿರಾಂತ್ ಉಟೊನ್ ನಾಚೊಂಕ್ ಲಾಗ್ತಾನಾ ಮಿಶೇಲ್ ಹೆವ್ಶಿಂ ಘುಂವ್ಲೆಂ!
ತಿತ್ಲ್ಯಾರ್!
ಹಾಕಾಚ್ಚ್ ರಾಕೊನ್ ರಾವ್ಲ್ಲ್ಯಾ ತ್ಯಾ ಭಾಯ್ಲ್ಯಾ ಜಿಪಾಕ್ ಶೀತಲಾಚಾ ಕಿಚನಾಚಾ ಜನೆಲಾರ್ ಉಭೆಂ ಆಸ್ಲ್ಲೆಂ ಮಿಶೇಲ್ ಬಗ್ಲೆಕ್ ಸರ್ಲೆಲೆಂ ಕಳೊನ್ ತಾಚೆ ತೆ ಕಾಳೆ ಆರ್ಶೆ ಸವ್ಕಾಸ್ ಸಕಯ್ಲ್ ದೆಂವ್ಲೆಂ.
"ಧರ್ ಕಾಫಿ ಘೆ!"
ಕಪ್ಪಾಂಕ್ ಸಾಕರ್ ಆನಿ ನೆಸ್ಕೆಫೆ ಕಾಫಿ ಪಿಟೊ ಘಾಲುನ್ ತಾಕಾ ನೆಸ್ಕೆಫೆ ಕಾಫಿ ಮೇಟ್ ಭರ್ಸುನ್ ಕೆಟಲಿಂತ್ಲೆಂ ಹುನ್ ಜಾಲ್ಲೆಂ ಉದಾಕ್ ಕಪ್ಪಾಂಕ್ ಭಾಗಾಯಿಲ್ಲ್ಯಾ ಶೀತಲಾನ್ ಸಕಯ್ಲ್ಯಾ ಕ್ಯಾಬಿನೆಟಾಚೆಂ ಡ್ರಾವರ್ ವೊಡುನ್ ತಾಂತ್ಲ್ಯಾ ಕುಲೆರಾನ್ ಕಾಫಿ ಮಿಕ್ಸ್ ಕೆಲಿ.
"ಘೆ!" ಏಕ್ ಕಪ್ಪ್ ಕಾಫಿ ಶೀತಲಾನ್ ಮಿಶೇಲಾಕ್ ದಿಲಿ. ದುಸ್ರೆಂ ಕಪ್ಪ್ ಆಪ್ಣೆಂ ಘೆತ್ಲೆಂ.
ಶೀತಲಾನ್ ದಿಲ್ಲ್ಯಾ ಕಾಫಿಯೆಚಾ ಕಪ್ಪಾಕ್ ಹಾತಿಂ ಘೆವ್ನ್ ಥಂಯ್ಚ್ ಕಿಚನಾಂತ್ ಏಕ್ ಸಿಪ್ ಕಾಫಿ ವೊಡುನ್ ಕಿಚನಾಂತ್ ಥಾವ್ನ್ ಭಾಯ್ರ್ ಯೆಂವ್ಚ್ಯಾ ವಗ್ತಾರ್ ಮಿಶೇಲಾಕ್ ಪರ್ತ್ಯಾಕ್ ತ್ಯಾ ಜಿಪಾಚೊ ಉಡಾಸ್ ಆಯ್ಲೊ.
ತಿತ್ಲೆಂಚ್!
ಮತಿನ್ ಆಶೆಲ್ಲ್ಯಾ ಆಶೆಕ್ ನಿರಾಶಾ ಕರುಂಕ್ ತೆಂ ಸಕ್ಲೆಂ ನಾ. ವ್ಹಳೂ ತಾಣೆಂ ಜನೆಲಾ ತೆವ್ಶಿಂ ವಚೊನ್ ಭಾಯ್ರ್ ದೀಶ್ಟ್ ವೆಲಿ.
ತಿತ್ಲೆಂಚ್!
ಮಿಶೇಲಾಚೆ ದೊಳೆ ಆಶ್ಚರ್ಯಾನ್ ರುಂದಾಲೆ.
ರಸ್ತ್ಯಾರ್ ಆಪ್ಣಾಚೊ ಪಾಟ್ಲಾವ್ ಕರ್ತಾ ಮ್ಹಳ್ಳ್ಯಾ ಪರಿಂ ದಿಸ್ಲ್ಲ್ಯಾ ತ್ಯಾ ಜಿಪಾಚೆ ಆರ್ಶೆ ಆತಾಂ ಉಗ್ತೆ ಆಸ್ಲ್ಲೆ.
ಮಿಶೇಲಾನ್ ಜಿಪಾ ಭಿತರ್ ನದರ್ ಮಾರ್ಲಿ. ಕಾಂಯ್ ಫಾಯ್ದೊ ನಾ. ತಾಚ್ಯಾ ದೊಳ್ಯಾಂಕ್ ಕೊಣ್ಯ್ ದಿಸ್ಲೊ ನಾ. ಜಿಪಾಚಾ ಹೆವ್ಶಿಂ ತೆವ್ಶಿಂ ಪಾಸೊನ್ ಕೊಣ್ಯ್ ತಾಚ್ಯಾ ದೊಳ್ಯಾಂಕ್ ಭೆಟ್ಲೆಂ ನಾ.
"ಏದೊಳ್ ಭಂಧ್ ಆಸ್ಲ್ಲ್ಯಾ ಜಿಪಾಚೆ ಆರ್ಶೆ ಆತಾಂ ಉಗ್ತೆ ಆಸ್ಲ್ಲೆ. ಪುಣ್ ಆಜಾಪ್! ಜಿಪಾ ಭಿತರ್ ಜಾಂವ್ ಜಿಪಾ ಲಾಗ್ಸಾರ್ ಜಾಂವ್ ಕೋಣ್ಯ್ ತಾಕಾ ಝಳ್ಕಾಲೆ ನಾಂತ್. ತರ್ ಜಿಪಾ ಭಿತರ್ ಮನಿಸ್ ಆಸ್ಲ್ಲೆ? ಆಸ್ಲ್ಲೆ ತರ್ ತೆ ಆತಾಂ ಖಂಯ್ ಗೆಲೆ?" ಮಿಶೆಲಾಚಾ ಮತಿಂತ್ ಸವಾಲಾಂ ಉಟೊನ್ ರಾವ್ಲಿಂ.
"ಚಲ್! ಭಾಯ್ರ್ ಯಾ!" ಶೀತಲ್ ಕಾಫಿ ಘೆವ್ನ್ ಪಯ್ಲೆಂ ಭಾಯ್ರ್ ಗೆಲೆಂ. ಶೀತಲಾನ್ ಆಪ್ಣಾಕ್ ಆಪಯಿಲ್ಲೆಂ ಆಯ್ಕೊನ್ ಶೀತಲಾಚಾ ಪಾಟ್ಲ್ಯಾನ್ ಪಾಟ್ಲ್ಯಾನ್ ಮಿಶೇಲ್ ಕಿಚನ್ ರೂಮಾ ಥಾವ್ನ್ ಭಾಯ್ರ್ ಗೆಲೆಂ.
"ತುವೆಂ ಡ್ಯಾಡಿಕ್ ಪೋನ್ ಕೆಲ್ಲೆಂಯ್.....?" ಮಿಶೇಲ್ ಸೋಫಾರ್ ಗಳ್ಳೆಂ.
ಶೀತಲ್ ಕಾಂಯ್ ಉಲಯ್ಲೆಂ ನಾ. ತಾಣೆಂ ಥಂಯ್ಚ್ ಮುಕ್ಲ್ಯಾ ಟೀಪಾಯಿಚಾ ವಯ್ರ್ ಪಡೊನ್ ಆಸ್ಲ್ಲ್ಯಾ ಟಿ.ವಿ.ಚಾ ರಿಮೋಟಾಕ್ ಹಾತಿಂ ಘೆತ್ಲೊ. ಟಿ.ವಿ. ಆನ್ ಕೆಲಿ ತಾಣೆಂ.
"ಶೀತಲ್.....?"
"..........!" ಶೀತಲಾನ್ ಮಿಶೇಲಾ ತೆವ್ಶಿಂ ಫಕತ್ತ್ ಘುಂವೊನ್ ಪಳೆಲೆಂ ಮಾತ್ರ್!
"ಡ್ಯಾಡಿ ತುಜ್ಯಾ ಪೋನಾಕ್ ರಾಕ್ತಾ ಆಸ್ತಲೊ ಶೀತಲ್!"
"ತುಂ ರಾಯನಾ ಲಾಗಿಂ ಉಲಯ್ಲೆಂಯ್....?’ ಶೀತಲಾನ್ ತೀಕ್ಷ್ಣ್ ನದ್ರೆನ್ ಮಿಶೇಲಾಕ್ಚ್ ಪಳೆಲೆಂ. ತ್ಯಾ ನದ್ರೆಕ್ ಪಳೆತಾನಾ ಕಿತ್ಯಾಕ್ಗೀ ಆಜ್ ತಾಕಾ ಹ್ಯಾ ದೊಳ್ಯಾಂಕ್ ಆನಿ ಜಿಮ್ಮಿಚಾ ದೊಳ್ಯಾಂಕ್ಚ್ ಕಾಂಯ್ಚ್ ಸಂಭಂಧ್ ನಾತ್ಲೆಲ್ಯಾ ಪರಿಂ ದಿಸ್ಲೆಂ.
ವ್ಹಯ್! ತಿಚ್ಚ್ ತೀಕ್ಷ್ಣತಾ! ಆನಿ ತ್ಯಾ ತಾಳ್ಯಾಂತ್ ತಿಚ್ಚ್ ದ್ರಡತಾ!
"ವ್ಹಯ್!" ಮಿಶೇಲ್ ಉಲಯ್ಲೆಂ. "ವಿಶುನ್ ಕಾಂಟ್ರಾಕ್ಟ್ ಸೈನ್ ಕೆಲ್ಲೆಂ ಆಸಾ ಮ್ಹಣ್ತಾಲೊ ತೊ. ತೆ ಪ್ರಾಜೆಕ್ಟ್ ಕಾಬಾರ್ ಜಾಂವ್ಚಾ ಪಯ್ಲೆಂ ತುಜ್ಯೆಲಾಗಿಂ ತೊ ಪುರ್ಸತಾಯೆನ್ ಉಲಯ್ತಾ ಖಂಯ್! ಆತಾಂ ತೊ ಬಿಜಿ ಆಸಾ ಶೀತಲ್! ತುಂ ಕಾಂಯ್ ಟೆನ್ಶನ್ ಘೆನಾಕಾ. ಹಾಂವ್ ಆಸಾಂ. ಸಗ್ಳೆಂ ಸಾರ್ಕೆಂ ಜಾತೆಲೆಂ!" ಮಿಶೇಲಾನ್ ಶೀತಲಾಕ್ ಭರ್ವಸೊ ದಿಲೊ.
"ತುಂ ಚಿಂತಾಯ್ ಮಿಶೇಲ್..... ಹಾಂಗಾಸರ್ ಸಗ್ಳೆಂ ಸಾರ್ಕೆಂ ಆಸಾ?" ಮಿಶೇಲಾಕ್ ಶೀತಲಾಚಾ ಉತ್ರಾಂಚೊ ಮತ್ಲಾಬ್ ಸಮ್ಜಾಲೊ ನಾ. ಕಾಫಿಯೆಚೆಂ ಕಪ್ಪ್ ತೊಂಡಾಕ್ ಧರ್ಚೆಂ ಮಿಶೇಲ್ ಶೀತಲಾನ್ ಉಚಾರ್ಲ್ಲೊ ವಿಶಯ್ ಆಯ್ಕೊನ್ ತಶೆಂಚ್ ಸ್ತಬ್ದ್ ಜಾಲೆಂ.
"ಕಾಲ್ ರಾತಿಂ ಮ್ಹಾಕಾ ಏಕ್ ಪೋನ್ ಆಯಿಲ್ಲೆಂ!" ಶೀತಲ್ ತ್ಯಾಚ್ ತಿಕ್ಷ್ಣ್ ನದ್ರೆನ್ ಮಿಶೇಲಾಕ್ ಪಳೆಯ್ತಾಲೆಂ.
"ಪೋನ್.....?" ಮಿಶೇಲಾಕ್ ಆಶ್ಚರ್ಯ್ ಜಾಲೆಂ. "ಕೊಣಾಚೆಂ....?" ತೆಂ ಸೊಫಾರ್ ಬಸ್ಲೆಲ್ಯಾ ಕಡೆಚ್ ಮುಕಾರ್ ಬಾಗ್ವಾಲೆಂ.
"ತೊ ಕೋಣ್ ಮ್ಹಣೊನ್ ಹಾಂವ್ ನೆಣಾಂ ಮಿಶೇಲ್!" ಶೀತಲ್ ಟಿ.ವಿ.ಕ್ ಪಳೆಂವ್ಕ್ ಲಾಗ್ಲೆಂ.
"ತೊ.....? ತೊ ಮ್ಹಳ್ಯಾರ್....?"
"ಮ್ಹಾಕಾ ಖಬಾರ್ ನಾ! ಪುಣ್ ತಾಣೆಂ ಮ್ಹಾಕಾ ಏಕ್ ವಿಶಯ್ ಮಾತ್ರ್ ಸಾಂಗ್ಲೊ!"
"ಕಸಲೊ ವಿಶಯ್.....?"
"ಹಾಂವ್ ತುಕಾ ಸಾಂಗ್ತಾಲಿ ಪಳೆ ವಿಶುಕ್ ಮ್ಹಜೆ ಶಿವಾಯ್ ಕೋಣ್ಗೀ ದುಸ್ರೆಂ ಚಲಿ ಆಸಾ ಮ್ಹಣೊನ್....?" ಶೀತಲ್ ಮಿಶೆಲಾ ತೆವ್ಶಿಂ ಘುಂವ್ಲೆಂ.
*********
ಅಚಾನಕ್ ಆಪ್ಲ್ಯಾ ಖಾಂದಾರ್ ಯೇವ್ನ್ ಬಸ್ಲ್ಲೊ ಹಾತ್ ರಾಯನಾಚೊ ಮ್ಹಳ್ಳೆಂ ತೆಂ ಕಳ್ಲ್ಲೆಂಚ್ ರಾಯನಾನ್ ಆಪ್ಲೊ ಹಾತ್ ಕಾಡ್ಚೆ ಪಯ್ಲೆಂಚ್ ಆಲಿಯಾನ್ ಆಪ್ಲ್ಯಾ ದಾವ್ಯಾ ಹಾತಾನ್ ವ್ಹಳೂ ತ್ಯಾ ರಾಯನಾಚಾ ಹಾತಾಕ್ ಧರ್ಲೆಂ.
"ಎಕ್ಲೆಂ ಬಸೊನ್ ಕಿತೆಂ ಕರ್ತಾಯ್.....?" ರಾಯನಾಚಾ ತೊಂಡಾರ್ ಮಂದ್ ಹಾಸೊ ಆಸ್ಲ್ಲ್ಯೊ.
"ಎಕ್ಲಿಂ.....? ತುಂ ಆಸಾಯ್ ಮ್ಹಣ್ತಾನಾ ಎಕ್ಲಿಂ ಖಂಯ್!" ಆಪ್ಲ್ಯಾ ತೊಂಡಾರ್ ಹಾಸೊ ಹಾಡುನ್ "ರಘು....! ಸಾಯ್ಬಾಕ್ ಏಕ್ ಚೇರ್ ಹಾಡ್!" ತೆವ್ಶಿಂ ಪಳವ್ನ್ ಆಲಿಯಾನ್ ಸ್ಪಾಟ್ ಬಾಯಾಕ್ ಆರ್ಡರ್ ಕೆಲೆಂ.
"ಹ್ಯಾ ಪರಿಸ್ಥಿತೆಕ್ ತುಂ ಹೆಳ್ಳೆಂಯ್!"
"ಕಿತೆಂ ಕರ್ಯಾಂ....! ಜಿವಿತಾಂತ್ ಖಂಯ್ ತರ್ಯ್ ಹೆಳೊಂಕ್ಚ್ ಜಾಯ್!"
"ಸಾವಂತ್ ಸಾಂಗ್ತಾಲೊ ಆಜ್ ತುಜೆಂ ಕಾಮ್ ಆಖೇರ್ ಜಾತಾ ಖಂಯ್!"
"ವ್ಹಯ್! ಪಳಂವ್ಕ್ ಜಾಯ್! ಬಸ್!" ರಘುನ್ ಹಾಡುನ್ ದವರ್ಲ್ಲ್ಯಾ ಚೇರಾಕ್ ಆಲಿಯಾನ್ ಆಪ್ಣಾಲಾಗಿಂ ವೊಡ್ಲೆಂ.
"ತರ್..... ಫಾಲ್ಯಾಂ ಥಾವ್ನ್ ತುಂ ಪ್ರೀ.....!" ರಾಯನ್ ತ್ಯಾ ಚೇರಾಚೆರ್ ಬಸ್ಲೊ.
"ಮೋಸ್ಟ್ಲೀ....!" ಆಲಿಯಾ ಹಾಸ್ಲೆಂ. ಪುಣ್ ಥೊಡಿಂಚ್ ಖಿಣಾಂ. ತಿತ್ಲ್ಯಾ ಭಿತರ್ ತಾಚ್ಯಾ ತೊಂಡಾ ವಯ್ಲ್ಯೊ ಹಾಸೊ ಸವ್ಕಾಸ್ ಜಿರೊನ್ ಗೆಲ್ಯೊ. "ಫಾಲ್ಯಾಂ ಥಾವ್ನ್ ಕಶೆ ದೀಸ್ ಕಾಡ್ಚೆ ತೆಂ ಕಳಾನಾ!" ಉಲಯ್ತಾಂ ಉಲಯ್ತಾಂ ತಾಚ್ಯಾ ತೊಂಡಾಚೊ ಛಾರೊ ಬದ್ಲಾಲೊ. ಆಲಿಯಾಕ್ ಪಳೆಲ್ಲ್ಯಾ ರಾಯನಾಕ್ ತೆಂ ಖಂತಿಶ್ಟ್ ಮ್ಹಳ್ಳ್ಯಾಪರಿಂ ದಿಸ್ಲೆಂ.
"ಕಿತ್ಯಾಕ್?"
"ಫಾಲ್ಯಾಂ ಥಾವ್ನ್ ಕಾಮ್ ನಾ ಪಳೆ ತಶೆಂ....!"
"ಚಡ್ ದೀಸ್ ಆಸ್ಚೆಂ ನಾ ಆಲಿಯಾ! ವೆಗಿಂಚ್ ಡಬ್ಬಿಂಗ್ ಆಸ್ತೆಲೆಂ!"
"ಹಾಂವ್ ವಿಸ್ರೊನ್ಚ್ ಗೆಲಿಂ...! ಮಿಶೆಲ್ ಕಶೆಂ ಆಸಾ?" ಆಲಿಯಾನ್ ವಿಶಯ್ ಬದ್ಲಿಲೊ.
"ಫೈನ್! ಶಿ ಇಸ್ ಫೈನ್! ತುಕಾ ವಿಚಾರ್ತಾಲೆಂ!"
"ಮ್ಹಾಕಾ.....?" ಆಲಿಯಾಕ್ ಆಶ್ಚರ್ಯ್ ಜಾಲೆಂ. "ಕಿತ್ಯಾಕ್....?" ಆಲಿಯಾ ರಾಯನಾಕ್ಚ್ ಪಳಂವ್ಕ್ ಪಡ್ಲೆಂ.
"ಅಶೆಂಚ್!" ರಾಯನ್ ಆಪ್ಲ್ಯಾ ಬಸ್ಕೆಕ್ ವೊಣ್ಕಾಲೊ.
"ತಶೆಂ ಜಾಲ್ಯಾರ್ ಆಮಿ ಏಕ್ ದೀಸ್ ಸಾಂಜೆರ್ ಕಿತ್ಯಾಕ್ ಮೆಳೊಂಕ್ ನಜೊ?" ಆಪ್ಣಾಕ್ ಸೊಧುನ್ ಆಯಿಲ್ಲ್ಯಾ ಆವ್ಕಾಸಾಕ್ ಆಲಿಯಾನ್ ಗಳ್ಸಿಲೆಂ.
"ಫಾರ್ ಎ ಡಿನ್ನರ್....?"
"ವ್ಹಯ್! ಪುಣ್ ಮ್ಹಜ್ಯಾ ತರ್ಪೆನ್!" ಆಲಿಯಾನ್ ಸಾಂಗ್ಚಾ ವಗ್ತಾರ್ಚ್ ಥಂಯ್ಚಾರ್ ಸಾವಂತ್ ಯೇವ್ನ್ ಪಾವ್ಲೊ.
"ಏಕ್ ಚೇರ್ ಹಾಡ್ ರೇ!" ಸಾವಂತ್ ಬೊಬಾಟ್ಲೊ. ತೊ ಥಕ್ಲೆಲ್ಯಾ ಪರಿಂ ದಿಸ್ತಾಲೊ.
ಸಾವಂತಾಚಾ ಬೊಬೆಕ್ ಆಯ್ಕೊನ್ ತಾಕಾ ಏಕ್ ಚೇರ್ ಹಾಡುನ್ ದಿಲ್ಲ್ಯಾ ಚೆಡ್ಯಾಕ್ ತಾಣೆಂ ಚ್ಹಾ ಹಾಡುಂಕ್ ಆರ್ಡರ್ ಕೆಲೆಂ.
ಥೊಡ್ಯಾಚ್ ವೆಳಾನ್ ಚ್ಹಾ ಆಯಿಲ್ಲಿ.
"ಮ್ಹಾಕಾ ಹ್ಯಾ ಪಾವ್ಟಿಂ ಸಲ್ವೊಂಕ್ ನಾಕಾ ಸಾವಂತ್!" ಚ್ಹಾಯೆಕ್ ತೊಂಡಾಕ್ ದರೀತ್ತ್ ರಾಯನ್ ಉಲಯ್ಲೊ.
ಸಾವಂತ್ ರಾಯನಾಕ್ಚ್ ಪಳವ್ನ್ ಚ್ಹಾ ಪಿಯೆತಾಲೊ ಶಿವಾಯ್ ತೊ ಕಾಂಯ್ ಉಲಂವ್ಕ್ ನಾ. ತೊ ತಾಚೆಂ ಕಾಮ್ ಕರ್ತಾಲೊ. ಫಿಲ್ಮಾಕ್ ಪಸಂದ್ ಕರ್ಚೆಂ ಕಾಮ್ ದರ್ಶಕಾಂಚೆಂ. ಹ್ಯಾ ಫಿಲ್ಮಾಕ್ ದರ್ಶಕಾಂನಿ ಪಸಂದ್ ಕರ್ಚ್ಯಾ ಪರಿಂ ಪ್ರಸ್ತುತ್ ಕರುಂಕ್ ಮಾತ್ರ್ ತೊ ಸಕ್ತಾ ಶಿವಾಯ್ ಫಿಲ್ಮಾಚೆಂ ನಶೀಬ್ ತೊ ಬರಂವ್ಕ್ ಸಕಾನಾ.
"ಕ್ಲೈಮ್ಯಾಕ್ಸ್ ಜಾಲೆಂ....?" ರಾಯನಾಚಿ ದೀಶ್ಟ್ ಸಾವಂತಾಚೆರ್ ಖಂಚ್ಲ್ಲಿ.
"ಥೊಡೆ ಶಾಟ್ಸ್ ಉರ್ಲ್ಯಾತ್! ಆಜ್ ಜಾತೆಲೆಂ!" ಸಾವಂತಾನ್ ಭರ್ವಸೊ ದಿಲೊ.
ತಿತ್ಲ್ಯಾರ್!
"ಸಾರ್! ಸೆಟ್ ರೆಡಿ ಆಸಾ!" ಅಸಿಸ್ಟಂಟ್ ಡೈರೆಕ್ಟರ್ ರಾಮ್ ಪ್ರಕಾಶ್ ಸಾವಂತಾಕ್ ಸೊಧುನ್ ಆಯ್ಲೊ.
"ಗೆಟ್ ರೆಡಿ ಆಲಿಯಾ!" ಆಲಿಯಾಕ್ ಸಾವಂತಾನ್ ಫರ್ಮಾಯ್ಲೆಂ.
ತಿತ್ಲೆಂಚ್!
ಆಪ್ಲ್ಯಾ ಹಾತಾಂತ್ಲ್ಯಾ ಚ್ಹಾಯೆಚಾ ಕಪ್ಪಾಕ್ ಸಕಯ್ಲ್ ದವರುನ್ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟ್ಲ್ಲೆಂ ಆಲಿಯಾ ಆಪ್ಲೊ ಸ್ಕ್ರಿಪ್ಟ್ ಘೆವ್ನ್ ರಾಮ್ ಪ್ರಕಾಶಾ ಸವೆಂ ಮುಕಾರ್ ಚಲ್ಲೆಂ.
"ಹಾಂವ್ ತುಕಾ ಸತ್ ಸಾಂಗ್ತಾಂ ರಾಯನ್!" ಸಾವಂತ್ ಆಲಿಯಾಚಾ ಪಾಟಿಕ್ಚ್ ಪಳೆತಾಲೊ. "ಹೆಂ ಚೆಡುಂ ಕಾಂಯ್ ಸಾಮಾನ್ಯ್ ನ್ಹಯ್! ತೆಂ ಎಕ್ಸ್ಟ್ರಾ ಆರ್ಡಿನರಿ! ಆಮ್ಚ್ಯಾ ಮುಕ್ಲ್ಯಾ ಪ್ರಾಜೆಕ್ಟಾಂತ್ ಹೆಂ ಆಮ್ಕಾಂ ಖಂಡಿತ್ ಗರ್ಜ್ ಪಡ್ತೆಲೆಂ. ಹಾಚ್ಯಾ ಮುಕಾರ್ ತೆಂ ಅಮೃತಾ ಕಾಂಯ್ಚ್ ನ್ಹಯ್!"
ರಾಯನಾಚಿ ದೀಶ್ಟ್ ಆಲಿಯಾನ್ ಚಲ್ಚ್ಯಾ ತಾಚ್ಯಾ ಮಾಜ್ರಾಚಾ ಚಾಲಿಚೆರ್ಚ್ ಕೇಂದ್ರೀಕ್ರತ್ ಜಾಲ್ಲಿ. ಆಲಿಯಾಚೆಂ ಕಾಮ್ ತಾಣೆಂ ಪಳಂವ್ಕ್ ನಾತ್ಲ್ಲೆಂ. ಪುಣ್ ತಾಕಾ ಆಲಿಯಾ ವಯ್ರ್ ಭರ್ವಸೊ ಆಸ್ಲ್ಲೊ.
ಸೊಭಿತ್ ಮಾಜ್ರಾ ಚಾಲಿಚಿ ಚಾಲ್ ಚಲ್ಚ್ಯಾ ಆಲಿಯಾಚಿ ಪಾಟ್ಲಿ ಕೂಸ್ ಪಳವ್ನ್ ಆಸ್ಲ್ಲ್ಯಾ ರಾಯನಾಕ್ ಸುಮಾರ್ ದಿಸಾಂ ಉಪ್ರಾಂತ್ ಆಜ್ ಪಯ್ಲ್ಯಾ ಪಾವ್ಟಿಂ ಕಿತ್ಯಾಕ್ಗೀ ಆಲಿಯಾ ಸೊಭಿತ್ ದಿಸ್ಲೆಂ.
ಆಲಿಯಾ ರಾಯನಾಕ್ ತ್ಯಾ ದಿಸಾಯ್ ಸೊಭಿತ್ ದಿಸ್ಲ್ಲೆಂ. ಪುಣ್ ತ್ಯಾ ದೀಸ್ ರಾಯನಾನ್ ಆಲಿಯಾಕ್ ಏಕಾ ಬಿಜ್ನೆಸ್ ಮ್ಯಾನಾನ್ ಆಪ್ಣೆ ಕರ್ಚ್ಯಾ ಬಿಜ್ನೆಸಾ ಪಯ್ಲೆಂ ತ್ಯಾ ಬಿಜ್ನೆಸಾಕ್ ಸಂಭಂಧ್ ಜಾಲ್ಲೊ ಪ್ರಾಡಕ್ಟ್ ಪಳಂವ್ಚ್ಯಾ ಪರಿಂ ಆನಿ ಪಳವ್ನ್ ಹ್ಯಾ ಪ್ರಾಡಕ್ಟಾಚೆರ್ ಆಪ್ಣೆ ಪಯ್ಶೆ ವೊತ್ಲ್ಯಾರ್ ತೆ ಪಯ್ಶೆ ಆಪ್ಣಾಕ್ ಕಿತ್ಲ್ಯಾ ಮಾಫಾನ್ ಪಾಟಿಂ ಮೆಳ್ತೆಲೆ ಮ್ಹಳ್ಳ್ಯಾ ವಿಶಿಂ ಮಾತ್ರ್ ಚಿಂತುನ್ ಆಲಿಯಾಚಾ ಸೊಭಾಯೆಕ್ ತುಕುನ್ ಪಳೆಲ್ಲೆಂ.
ಆಲಿಯಾಚಾ ಪಾಟ್ಲ್ಯಾ ಕುಶಿಕ್ ಪಳವ್ನ್ ಬಸ್ಲ್ಲ್ಯಾ ರಾಯನಾಕ್ ತ್ಯಾ ತಾಂಚ್ಯಾ ಪಯ್ಲ್ಯಾ ಭೆಟೆಚೊ ಉಡಾಸ್ ಆಯ್ಲೊ. ತ್ಯಾ ದಿಸಾಚೆಂ ಸೊಭಿತ್ ಘಡಿತ್ ತಾಚ್ಯಾ ದೊಳ್ಯಾಂ ಮುಕಾರ್ ಉದೆವ್ನ್ ರಾವ್ತಾನಾ ಆಲಿಯಾ ತಾಚ್ಯಾ ದೊಳ್ಯಾಂ ಥಾವ್ನ್ ಚುಕ್ಲೆಂ.
"ಚಲ್ ಸಾವಂತ್! ಆಲಿಯಾಚೆ ಪೈನಲ್ ಶಾಟ್ಸ್ ಪಳವ್ಯಾಂ!" ರಾಯನಾಕ್ ಆಲಿಯಾ ವಯ್ರ್ ಆಜ್ ಮನ್ ಜಾಲ್ಲೆಂ.
ಭಿತರ್ ಸ್ಟೂಡಿಯೊಂತ್ ಚಿತ್ರೀಕರಣ್ ಚಲ್ತಾಲೆಂ.
ರಾಯನ್ ಆಲಿಯಾಚಾ ಕಾಮಾಕ್ ತದೇಕ್ಚಿತ್ತಾನ್ ಪಳೆತಾಲೊ.
ಆಲಿಯಾ ಆಪ್ಲ್ಯಾ ಕಾಮಾಂತ್ ಚಡ್ಚ್ ವಿಶ್ವಾಸಿ ಆಸ್ಲ್ಲೆಂ. ಸಾವಂತಾನ್ ಆಪ್ಣಾಕ್ ಆಲಿಯಾ ವಿಶಿಂ ಸಾಂಗ್ಲ್ಲೆಂ ತೆಂ ಶೆಂಭರ್ ಠಕ್ಕೆ ಸಾರ್ಕೆಂ ಮ್ಹಣೊನ್ ರಾಯನಾಕ್ ಖಚಿತ್ ಜಾಲೆಂ. ಕಿತ್ಯಾಕ್, ತಾಣೆಂ ಆಲಿಯಾಚೆ ತೆ ನಿಮಾಣೆ ಚಿತ್ರೀಕರಣಾಚೆ ಶಾಟ್ಸ್ ಪಳೆಲ್ಲೆ. ಆತಾಂ ತಾಕಾ ಆಲಿಯಾ ವಯ್ರ್ ಭರ್ವಸೊ ಉದೆಲ್ಲೊ.
ಆಲಿಯಾಚೆ ನಿಮಾಣೆ ಶಾಟ್ಸ್ ಚಿತ್ರೀಕರಣ್ ಜಾವ್ನ್ ತೆಂ ರಿಲ್ಯಾಕ್ಸ್ ಜಾಲೆಂ. ಸಾವಂತಾಕ್ ಮೆಳೊಂಕ್ ಆಯಿಲ್ಲೊ ರಾಯನ್ ಆಪ್ಲೆಂ ಕಾಮ್ ತಿರ್ಸುನ್ ಥಂಯ್ ಥಾವ್ನ್ ಚಲ್ಲೊ. ಸಾವಂತ್ ತಾಚ್ಯಾ ಮುಕ್ಲ್ಯಾ ಕಾಮಾರ್ ಮೆತೆರ್ ಜಾಲೊ.
ಆಪ್ಣಾಚೆಂ ಅಭಿನಯ್ ಪಳೆಲ್ಲ್ಯಾ ರಾಯನಾಚ್ಯಾ ದೊಳ್ಯಾಂನಿ ಉಪ್ಯೆವ್ನ್ ಆಸ್ಲ್ಲ್ಯಾ ಖುಶಿಯೆಕ್ ಆಲಿಯಾಚಾ ದೊಳ್ಯಾಂನಿ ಪಳೆಲೆಂ. ರಾಯನಾಕ್ ಆಪ್ಣಾ ವಯ್ರ್ ಖುಶಿ ಆಸಾ ತೆಂ ಆಲಿಯಾಕ್ ಕಳಾನಾಸ್ತಾನಾ ಗೆಲೆಂ ನಾ. ರಾಯನ್ ಆಲಿಯಾಚಾ ಕಾಮಾ ಥಾವ್ನ್ ಖುಶ್ ಆಸ್ಲ್ಲೊ. ಆಲಿಯಾಕ್ಯ್ ಹೆಂಚ್ ಜಾಯ್ ಆಸ್ಲ್ಲೆಂ!
ಆಪ್ಣಾ ವಯ್ರ್ ರಾಯನಾಚೊ ಭರ್ವಸೊ! ಹೊಚ್ಚ್ ಭರ್ವಸೊ ಆಪ್ಣಾಕ್ ಆಪ್ಲ್ಯಾ ಮುಕ್ಲ್ಯಾ ಝುಜಾಂತ್ ಸುಲಾಭಾಯೆಚೆಂ ಜಯ್ತ್ ದಿವಂವ್ಕ್ ಸಕ್ತಾ.
ಥೊಡ್ಯಾಚ್ ದಿಸಾಂನಿ ಹೊ ಭರ್ವಸೊ ಆನಿಕ್ಯ್ ವಾಡ್ತಲೊ. ಜೆದ್ನಾ ಹೆಂ ಫಿಲ್ಮ್ ಹಿಟ್ ಜಾತಾ ತೆದ್ನಾಂ!
ಫಿಲ್ಮ್ ಹಿಟ್ ಜಾಯ್ನಾಂ ಜಾಲ್ಯಾರ್....?
"ಜಾಯ್ನಾಂ ಜಾಲ್ಯಾರ್....?" ಆಲಿಯಾನ್ ಆಪ್ಣಾಕ್ಚ್ ಸವಾಲ್ ಕೆಲೆಂ. ತ್ಯಾ ಸವಾಲಾ ಪಾಟ್ಲ್ಯಾನ್ ಸವ್ಕಾಸ್ ಆಲಿಯಾಚಾ ವೊಂಟಾಂನಿ ಮಂದ್ ಹಾಸೊ ಉದೆವ್ನ್ ಮಾಯಾಗ್ ಜಾಲ್ಯೊ.
ತಿತ್ಲ್ಯಾರ್!
ಸವ್ಕಾಸ್ ಆಲಿಯಾಚಾ ಮತಿ ಪಡ್ದ್ಯಾರ್ ಏಕ್ ಅಸ್ಪಶ್ಟ್ ರೂಪ್ ಉದೆಲೆಂ.
ಆಲಿಯಾನ್ ಎದೊಳ್ ಪಳಂವ್ಕ್ ನಾತ್ಲ್ಲೆಂ ರೂಪ್! ತಾಚ್ಯಾ ಭೃಮಿದೆಂತ್ಲೆಂ ರೂಪ್!
"ಮಿಶೇಲ್!" ಆಲಿಯಾನ್ ತ್ಯಾ ರುಪಾಕ್ ನಾಂವ್ ದಿಲೆಂ.
"ರಾಯನ್! ತುಂ ಮ್ಹಾಕಾ ಮಿಶೇಲಾಕ್ ಕೆದಾಳಾ ಮೆಳಯ್ತಾಯ್? ತಾಕಾ ಪಳಂವ್ಕ್ ಮಸ್ತ್ ಮನ್ ಕರ್ತಾ!" ಆಲಿಯಾ ಗುಪಿತ್ ಆಪ್ಲ್ಯಾ ಕಾಳ್ಜಾಂತ್ಚ್ ಉಲಯ್ಲೆಂ.
ತಿತ್ಲೆಂಚ್!
ಎಕಾಚ್ಚ್ ಫರಾ ಆಲಿಯಾಚಿಂ ಚಿಂತ್ನಾಂ ತುಟೊನ್ ಪಡ್ಲಿಂ.
ತಾಚ್ಯಾ ಮತಿಂತ್ಲೆಂ ಮಿಶೆಲಾಚೆಂ ಅಸ್ಪಶ್ಟ್ ರೂಪ್ ಉಭೊನ್ ಧಾಂವ್ಲೆಂ.
ಥೊಡ್ಯಾ ಘಡಿಯಾಂಕ್ ರಾಯನಾಕ್ ತಶೆಂಚ್ ಆಪ್ಲ್ಯಾ ಕಾಳ್ಜಾಂತ್ ಆಲಿಯಾನ್ ಕಯ್ದ್ ಕರುನ್ ದವರ್ಲೆಂ.
ಮಿಶೇಲಾಚೆಂ ಸೆಲ್ಪೋನ್ ವ್ಹಾಜ್ತಾಲೆಂ!
ಆಲಿಯಾನ್ ಆಪ್ಲ್ಯಾ ವ್ಯಾನಿಟಿ ಬ್ಯಾಗಾಂತ್ಲೆಂ ಪೋನ್ ಭಾಯ್ರ್ ಕಾಡ್ಲೆಂ.
ಅಪರಿಚಿತ್ ನಂಬರ್! ತಾಚ್ಯಾ ಸಂಪೂರ್ಣ್ ಉಡಾಸಾ ಭಾಯ್ಲೆಂ!
ಕೋಣ್ ಜಾವ್ಯೆತ್?
ಆಪ್ಣಾಚೆಂ ಹೆಂ ನವೆಂ ನಂಬರ್ ಸಾವಂತ್ ಆನಿ ರಾಯನಾ ಶಿವಾಯ್ ಫಕತ್ತ್ ವಿಶು ಮಾತ್ರ್ ಜಾಣಾಂ ಆಸ್ಲ್ಲೊ. ವಿಶು ಆತಾಂ ನಾ. ತರ್....?
ಪೋನ್ ವ್ಹಾಜೊನ್ಚ್ ಆಸ್ಲ್ಲೆಂ.
ಮತಿಂತ್ಲ್ಯಾ ಚಿಂತ್ನಾಂಕ್ ಬಗ್ಲೆಕ್ ಲೊಟ್ಲ್ಲ್ಯಾ ಆಲಿಯಾನ್ ಪೋನ್ ಆನ್ ಕೆಲೆಂ.
"ಹಲೋ.....?"
"........." ತ್ಯಾ ಕುಶಿನ್ ಥಾವ್ನ್ ಕಾಂಯ್ ಆವಾಜ್ ಆಯ್ಕೊನ್ ಆಯಿಲ್ನಾಂ.
"ಹಲೋ.....?"
"........." ನಾ! ಕಾಂಯ್ಚ್ ಜವಾಬ್ ನಾ.
ಪುಣ್!
ತ್ಯಾ ಕುಶಿಕ್ ಸೂಕ್ಷ್ಮ್ ಕಾನ್ ದೀವ್ನ್ ಆಯ್ಕೊಂಚಾ ಆಲಿಯಾಕ್ ತ್ಯಾ ಕುಶಿಂನ್ ಭಾರೀಕ್ ಆವಾಜಾಂತ್ ಕಸಲೆಂಗೀ ಹಿಂದಿ ಪದ್ ವ್ಹಾಜ್ತಾ ತೆಂ ಆಯ್ಕೊನ್ ಆಯ್ಲೆಂ. ಆಲಿಯಾ ತಶೆಂಚ್ ತ್ಯಾ ಪದಾಕ್ ಆಯ್ಕೊನ್ ರಾವ್ಲೆಂ. ತೆಂ ಜಾಣಾಂ ಆಸ್ಲ್ಲೆಂ. ತ್ಯಾ ಕುಶಿನ್ ಕೋಣ್ ತರ್ಯ್ ಆಸಾ! ಆನಿ ಆಪ್ಣಾ ಸಾಂಗಾತಾ ಹೊ ಖೆಳ್ ಖೆಳ್ತಾ! ಆಲಿಯಾ ಭಿಲ್ಕುಲ್ ಭಿಯೆಂವ್ಚೆಂ ಚೆಡುಂ ನ್ಹಯ್!
"ಕಿತೆಂ ಆಯ್ಕಾತಾಯ್? ಹಾಚ್ಯಾ ಪಯ್ಲೆಂ ಹ್ಯಾ ಪದಾಕ್ ಆಯ್ಕೊಂಕ್ ನಾಂಯ್?" ಎಕಾಚ್ಚ್ ಫರಾ ತ್ಯಾ ಕುಶಿನ್ ಥಾವ್ನ್ ತಾಳೊ ಉಟೊನ್ ಆಯ್ಲೊ.
ತಿತ್ಲೆಂಚ್!
ಆಲಿಯಾನ್ ತ್ಯಾ ತಾಳ್ಯಾಕ್ ಆಪ್ಲ್ಯಾ ಉಡಾಸಾಂತ್ ಸೊಧ್ಲೆಂ.
ನಾ! ಹ್ಯಾ ತಾಳ್ಯಾಕ್ ತೆಂ ಪಾರ್ಕುಂಕ್ ಸಕ್ಲೆಂ ನಾ.
"ರಾಂಗ್ ನಂಬರ್!" ಆಲಿಯಾಚೊ ದ್ರಡ್ ತಾಳೊ.
"ರಾಂಗ್ ನಂಬರ್ ನ್ಹಯ್ ಬೇಬಿ! ಇತ್ಲ್ಯಾ ಕಶ್ಟಾಂನಿ ತುಜೆಂ ನಂಬರ್ ಆಪ್ಣಾಯ್ಲೆಂ. ಆನಿ ತುಂ ಮ್ಹಣ್ತಾಯ್ ಹೆಂ ರಾಂಗ್ ನಂಬರ್?" ತ್ಯಾ ಕುಶಿಚೊ ತಮಾಶ್ಯಾಂಚೊ ತಾಳೊ.
ಆಲಿಯಾ ಆತಾಂ ತ್ಯಾ ಕುಶಿಕ್ ಆಯ್ಕೊಂಕ್ ಲಾಗ್ಲೆಂ. ತ್ಯಾ ಕುಶಿಚಾ ತಾಳ್ಯಾಕ್ ತಾಣೆಂ ಜವಾಬ್ ದಿಂವ್ಚೆಂ ಪ್ರಯತ್ನ್ ಕೆಲೆಂ ನಾ. ತಾಕಾ ಪಯ್ಲೆಂ ಹೆಂ ಕಳೊಂಕ್ ಜಾಯ್ ಆಸ್ಲ್ಲೆಂ ಕೀ ತೊ ತಾಳೊ ಕೊಣಾಚೊ?
"ಬರಿ ಮಜಾ ಮಾರ್ತಾಯ್ ಹಾಂ......?" ತ್ಯಾಚ್ಚ್ ತಾಳ್ಯಾನ್ ವಿಚಾರ್ಲೆಂ.
ಹ್ಯಾ ಕುಶಿನ್ ಆಲಿಯಾ ಶಾಂತ್ಪಣಿಂ ಆಯ್ಕಾತಾಲೆಂ.
"ಆಲಿಯಾ ಬೇಬಿ!"
ತ್ಯಾ ಕುಶಿಚಾ ತಾಳ್ಯಾಂತ್ ಆಪ್ಣಾಚೆಂ ನಾಂವ್ ವ್ಹಾಳೊನ್ ಆಯಿಲ್ಲೆಂ ಆಯ್ಕೊನ್ ಸವ್ಕಾಸ್ ಮುಕಾರ್ ಪಾಟಿಂ ಪಳೆಲ್ಲೆಂ ಆಲಿಯಾ ಆಪ್ಣಾಚಾ ಪೋನಾ ವಯ್ಲ್ಯಾ ಸಂಭಾಶಣಾಕ್ ಕೊಣ್ಯ್ ಆಯ್ಕೊಂವ್ಚಿಂ ಲಾಗ್ಶಿನ್ ಆಸಾತ್ಗೀ ಮ್ಹಣೊನ್ ಪಳವ್ನ್ ಥಂಯ್ಚ್ ಸ್ಟೂಡಿಯೋಚಾ ಸೆಟ್ಟಾಚಾ ಎಕಾ ಕೊನ್ಶ್ಯಾಕ್ ಗೆಲೆಂ.
"ಕೋಣ್ ಉಲಯ್ತಾ......?" ಆಲಿಯಾಚಾ ತಾಳ್ಯಾಂತ್ ದ್ರಡತಾ ಆಸ್ಲ್ಲಿ.
"ಹಾಂವ್ ಜಾಣಾಂ ಆಲಿಯಾ! ವಿಶು ಕುಮಾರಾಚೆಂ ಆಕ್ಸಿಡೆಂಟ್ ಜಾಂವ್ಕ್ ನಾ! ತೊ ಮೊರೊಂಕ್ ತುಂಚ್ ಕಾರಾಣ್! ತಾಕಾ ತುವೆಂ ಮಾರ್ಲಾಂಯ್!"
ತ್ಯಾ ಕುಶಿನ್ ಥಾವ್ನ್ ಆತಾಂ ಎಕಾಚ್ಚಾಣೆಂ ವಿಶು ಕುಮಾರಾಚೊ ವಿಶಯ್ ಯೆತಾನಾ ಆಲಿಯಾಚಿ ಮತ್ ಭಿಯೆಲಿ ಜಾಲ್ಯಾರ್ಯ್ ತಾಣೆಂ ಧಯ್ರ್ ಸಾಂಡ್ಲೆಂ ನ.
"ಕೋಣ್ ವಿಶು ಕುಮಾರ್?" ಆಲಿಯಾನ್ ಆಪ್ಣಾಕ್ ಆನಿ ಹ್ಯಾ ನಾಂವಾಕ್ ಕಾಂಯ್ಚ್ ಸಂಭಂಧ್ ನಾ ಮ್ಹಳ್ಳ್ಯಾ ಪರಿಂ ನಟನ್ ಕೆಲೆಂ.
"ಮ್ಹಾಕಾ ಜಾಯ್ ಜಾಲ್ಯಾರ್ ಹಾಂವ್ ವಿಶು ಕುಮಾರಾಕ್ ಬಚಾವ್ ಕರುಂಕ್ ಸಕ್ತೊ! ಪುಣ್ ಹಾವೆಂ ಕರುಂಕ್ ನಾ! ಜಾಣಾಂಯ್ ಕಿತ್ಯಾಕ್...?"
ಆಲಿಯಾ ಕಾಂಯ್ ಉಲಯ್ಲೆಂ ನಾ. ತಾಣೆಂ ಮೌನ್ ಸಾಂಬಾಳ್ಳೆಂ. ಹೊ ವಿಶುಕುಮಾರಾಚಾ ಮರ್ಣಾಚೊ ವಿಶಯ್ ಜಾಲ್ಲ್ಯಾನ್ ಆಲಿಯಾಕ್ ಕಿತೆಂಯ್ ಉಲಂವ್ಚ್ಯಾ ಪರಿಂ ನಾತ್ಲ್ಲೆಂ.
"ತ್ಯಾ ದೀಸ್ ಮ್ಹಜ್ಯಾ ಭಾವಾಚ್ಯಾ ಹಾತಾ ಥಾವ್ನ್ ತುಕಾ ಬಾಚಾವ್ ಕೆಲ್ಲೊ ಹೊಚ್ಚ್ ವಿಶು ಕುಮಾರ್!"
ಆಲಿಯಾಚಾ ಕಾನಾಂಕ್ ಘಡ್ಗಡೊ ಮಾರ್ಲ್ಲ್ಯಾ ಪರಿಂ ಜಾಲೆಂ.
ತರ್.....?
ಆಲಿಯಾಚಾ ಮತಿನ್ ಖಿಣಾ ಭಿತರ್ ಚಿಂತ್ನಾಂಕ್ ಧಾರ್ ಧರ್ಲ್ಲಿ!
"ಮ್ಹಾಕಾ ರಾಶಿದಾಚಾ ಹಾತಾ ಥಾವ್ನ್ ಬಚಾವ್ ಕೆಲ್ಲೊ ವಿಶು ಕುಮಾರ್....?" ಆಲಿಯಾಚಾ ಮತಿಂತ್ ಜಗ್ಲಾಣೆಂ ಧಾಂವ್ಲೆಂ.
ತರ್ ಹೊ ಆತಾಂ ಮ್ಹಜ್ಯಾಲಾಗಿಂ ಉಲಯ್ತಾ ತೊ.....?
"ಇಕ್ಬಾಲ್ ಭಾಯಿ....?" ಆಲಿಯಾ ಉದ್ಗಾರ್ಲೆಂ.
"ಅರೆ ಚಮ್ಮಕ್ ಚಲ್ಲೂ. ತುಕಾ ಹಾಂವ್ ಭಾಯಿ ನ್ಹಯ್! ಹಾಂವ್ ಹ್ಯಾ ಮುಂಬಯಿಕ್ ಭಾಯಿ! ತುಂ ಆತಾಂ ನಾಚ್ಪಿಣ್! ಏಕ್ ಕಾಮ್ ಕರ್ತಾಯ್...? ಮ್ಹಜ್ಯಾ ರಾವ್ಳೆರಾಂತ್ ವ್ಹಡ್ಲೆಂ ಸಾಲ್ ಆಸಾ. ನಾಸೊಂಕ್ ಯೆತಾಯ್? ರಾಯನಾನ್ ದಿಂವ್ಚ್ಯಾಕ್ಯ್ ಚಡ್ ತುಕಾ ಹಾಂವ್ ದಿತಾಂ. ಸ ಮಹಿನ್ಯಾಂನಿ ಜೊಡ್ಲ್ಲೆಂ ಹಾಂವ್ ಎಕಾಚ್ಚ್ ರಾತಿಕ್ ದಿತಾಂ! ಯೆತಾಯ್.....?" ತ್ಯಾ ಕುಶಿಕ್ ಇಕ್ಬಾಲ್ ವ್ಹಳೂ ಹಾಸ್ಲೊ.
"ಯೂ ಬಾಸ್ಟರ್ಡ್! ತುಜೊ ಭಾವ್ಚ್ ವ್ಹಡ್ಲೊ ಹರಾಮಿ! ಆನಿ ತುಂ ತಾಚ್ಯಾಕ್ಯ್ ವ್ಹಡ್ಲೊ ಹರಾಮಿ!" ಆಲಿಯಾಚೆಂ ರಗಾತ್ ಸಳ್ಸಳ್ಳೆಂ.
"ಬರೆಂ ಕೆಲೆಂಯ್ ತುವೆಂಚ್ ವಿಶು ಕುಮಾರಾಕ್ ಮಾರುನ್! ಹಾಂವ್ಯ್ ತಾಚ್ಯಾ ಮೊರ್ಣಾಚಿ ವಾಟ್ ಸೊಧುನ್ ಆಸ್ಲ್ಲೊಂ!"
"ವಿಶು ಕುಮಾರಾಕ್ ಹಾವೆಂ ಮಾರ್ಲಾಂ?" ಆಲಿಯಾಚಾ ಮತಿಂತ್ ದುಬಾವ್ ಉದೆಲೊ. ಪುಣ್ ಹ್ಯಾ ದುಬಾವಾಕ್ ತಾಣೆಂ ಉಗ್ಡಾಪೆಂ ಕೆಲೆಂ ನಾ.
"ಕಿತೆಂ ಜಾಲೆಂ? ಕಿತೆಂ ಚಿಂತ್ಚ್ಯಾರ್ ಪಡ್ಲೆಂಯ್? ಹೆಂಚ್ ಕೀ ವಿಶು ಕುಮಾರಾಚೆಂ ಆಕ್ಸಿಡೆಂಟ್ ಜಾಲ್ಲೆಂ....? ತಾಚೆಂ ಆಕ್ಸಿಡೆಂಟ್ ಜಾಂವ್ಕ್ ನಾ! ವಚೊನ್ ವಚೊನ್ ತಾಣೆಂ ತುಕಾ ಕಿತೆಂ ಮ್ಹಣೊನ್ ಹೆಲ್ಪ್ ಕೆಲೆಂ. ಆಜ್ ಜಿವಂತ್ ತರ್ಯ್ ಆಸ್ತೊ. ತೆಂಯ್ ಹ್ಯಾ ಇಕ್ಬಾಲಾಚಾ ವಿರೋಧ್? ಕಶೆಂ ಜಾತಾ? ಕಾನಾಂಕ್ ಆಯ್ಕೊಂಕ್ ಬರೆಂ ಲಾಗಾನಾ?" ಥೊಡೊ ವೇಳ್ ತ್ಯಾ ಕುಶಿನ್ ಥಾವ್ನ್ ಮೌನ್.
ಆಲಿಯಾ ಕಾಂಯ್ ಉಲಯ್ಲೆಂ ನಾ.
"ವಿಶು.....!" ಮತಿಂತ್ಚ್ ವ್ಹಳೂ ಪಿಂರ್ಗಾಲೆಂ ಆಲಿಯಾ. ತಾಕಾ ವಿಶು ಕುಮಾರಾಚೆರ್ ಭಿರ್ಮತ್ ಉದೆಲಿ.
"ಆತಾಂ ತುಕಾ ಕೋಣ್ ಬಚಾವ್ ಕರ್ತಲೊ? ತೊ ರಾಯನ್? ತೊ ಪಕ್ಕಾ ಬಿಜ್ನೆಸ್ ಮ್ಯಾನ್. ತಾಕಾ ತುಂ ಫಕತ್ತ್ ಏಕ್ ಸಾಬು ಮಾತ್ರ್! ಆಂಗಾಕ್ ಸಾರಯ್ಲೊ ಆನಿ ಕಾಡುನ್ ಉಡಯ್ಲೊ!" ಪರ್ತ್ಯಾಕ್ ತ್ಯಾ ಕುಶಿನ್ ಥಾವ್ನ್ ಮೌನ್.
ಆಲಿಯಾ ಹಟ್ಟಾನ್ ಮ್ಹಳ್ಳ್ಯಾಪರಿಂ ಆಪ್ಲ್ಯಾ ಅಂತಸ್ಕರ್ನಾಕ್ ಧಾಂಬುನ್ ಧರುನ್ ತ್ಯಾ ಕುಶಿಕ್ ಆಯ್ಕಾತಾಲೆಂ.
"ಮ್ಹಾಕಾ ಏಕ್ ವಿಶಯ್ ಮಾತ್ರ್ ಸಮ್ಜಾನಾ.... ತುವೆಂ ರಾಯನಾಕ್ ಕಶೆಂ ಬಾನಾಯ್ಲೆಂಯ್? ಚಲ್ ತೆಂ ಸೊಡ್ಯಾಂ. ತುಂ ಆತಾಂ ಸಾಂಗ್ ಕೆದಾಳಾ ಯೆತಾಯ್ ನಾಚೊಂಕ್? ತುಕಾ ಆಪವ್ನ್ ವರುಂಕ್ ಮರ್ಸಿಡೀಸ್ ದಾಡ್ತಾಂ!"
ತಿತ್ಲೆಂಚ್!
ಖತ್ಕತೊನ್ ಆಯಿಲ್ಲ್ಯಾ ರಾಗಾ ಥಾವ್ನ್ ಆಲಿಯಾನ್ ಆಪ್ಲೆಂ ಪೋನ್ ಭಂಧ್ ಕೆಲೆಂ.
ತಾಚಿ ಮತ್ ಆತಾಂ ವಾರ್ಯಾ ವೇಗಾನ್ ಚಿಂತುಂಕ್ ಲಾಗ್ಲಿ.
ಆಪ್ಣೆಂ ಖುದ್ದ್ ಸೊಧುನ್ ವಚೊಂಕ್ ಜಾಯ್ ಜಾಲ್ಲೊ ಇಕ್ಬಾಲ್ ತೊಚ್ಚ್ ಆಪ್ಣಾಕ್ ಸೊಧುನ್ ಆಯಿಲ್ಲೊ. ತ್ಯಾ ಭಾಯ್ರ್ ಏಕ್ ಅಪುಟ್ ಸತ್ ಆಲಿಯಾಚಾ ದೊಳ್ಯಾಂ ಮುಕಾರ್ ಆಯಿಲ್ಲೆಂ.
"ತರ್ ವಿಶು ಕುಮಾರಾಚೆಂ ಆಕ್ಸಿಡೆಂಟ್ ಜಾಂವ್ಕ್ ನಾ? ತಾಕಾ ಜಿವೆಶಿಂ ಮಾರ್ಲಾಂ? ಆಪುಣ್ ತಾಚ್ಯಾ ವಯ್ರ್ ಫಾರಿಕ್ಪಣಾಕ್ ಆಶೆಲ್ಲಿಂ ವ್ಹಯ್! ಪುಣ್ ಆಪ್ಣೆ ತಾಕಾ ಮಾರುಂಕ್ ಚಿಂತ್ಲ್ಲೆಂ ನಾ. ಇಕ್ಬಾಲಾನ್ಚ್ ಸಾಂಗ್ಲ್ಲ್ಯಾ ಪರಿಂ ಮ್ಹಾಕಾ ತ್ಯಾ ದೀಸ್ ರಾಶಿದಾಚಾ ಹಾತಾ ಥಾವ್ನ್ ಬಚಾವ್ ಕೆಲ್ಲೊ ಹೊಚ್ ವಿಶು ಕುಮಾರ್? ತರ್ ನಮಿತಾ ಆನಿ ತಾಚೊ ಸಯ್ರೊ ಜಯರಾಜ್? ಜಯರಾಜನ್ ಹ್ಯಾ ವಿಶು ಕುಮಾರಾಕ್ ಸಾಂಗೊಂನ್ ಆಪ್ಣಾಕ್ ಬಚಾವ್ ಕೆಲ್ಲೆಂ?" ಚಿಂತ್ಚ್ಯಾ ಆಲಿಯಾನ್ ತಕ್ಲೆಕ್ ಹಾತ್ ಮಾರ್ಲೊ.
ಆಲಿಯಾಕ್ ಆತಾಂ ಕಿತೆಂ ಕರ್ಚೆಂ ತೆಂ ಕಳ್ಳೆಂ ನಾ. ತೆಂ ಸ್ಟೂಡಿಯೋಂತ್ ಭಿತರ್ ಸರ್ಲೆಂ. ಆಪ್ಣೆಂ ಇಕ್ಬಾಲಾಚೆಂ ಪೋನ್ ರಾಗಾನ್ ಭಂಧ್ ಕೆಲ್ಲೆಂ ಆಸ್ತಾಂ ಹ್ಯಾ ಉಪ್ರಾಂತ್ ಖಂಯ್ಚಾಯ್ ವೆಳಾರ್ ಆಪ್ಣಾಚೆಂ ಪೋನ್ ವ್ಹಾಜ್ತೆಲೆಂ. ಆನಿ ಖಂಯ್ಚಾಯ್ ವೆಳಾರ್ ಹೊ ಇಕ್ಬಾಲ್ ಆನಿ ರಾಶಿದ್ ಆಪ್ಣಾ ಮುಕಾರ್ ಹಾಜರ್ ಜಾತೆಲೆ. ಆತಾಂ ಕಿತೆಂ ಕರುಂ? ಆಲಿಯಾಕ್ ಕಾಂಯ್ಚ್ ಸಮ್ಜಾನಾಸ್ತಾನಾ ವೆತಾನಾ ತೆಂ ಸಾವಂತಾಲಾಗಿಂ ಚಮ್ಕಾಲೆಂ.
ಸಾವಂತಾಕ್ ನೀಬ್ ದೀವ್ನ್ ತೆಂ ಸ್ಟೂಡಿಯೊ ಥಾವ್ನ್ ಭಾಯ್ರ್ ಪಡ್ಲೆಂ. ಆತಾಂ ತಾಚಿ ಸಾವಂತಾಕ್ ಗರ್ಜ್ ನಾತ್ಲ್ಲಿ. ತಾಚ್ಯಾ ಚಿತ್ರೀಕರಣಾಚೆ ಶಾಟ್ಸ್ ಎದೊಳ್ಚ್ ಸಾವಂತಾನ್ ಸಂಪೂರ್ಣ್ ಕೆಲ್ಲೆ. ಹ್ಯಾ ಉಪ್ರಾಂತ್ ಹಾಂಗಾಸರ್ ಸ್ಟೂಡಿಯೋಂತ್ ಆಪ್ಣೆಂ ರಾವ್ಲ್ಯಾರ್ ಆಪ್ಣಾಕ್ ಆಪಾಯ್ ಖಂಡಿತ್ ಆಸಾ ಮ್ಹಳ್ಳೆಂ ತೆಂ ಆಲಿಯಾಕ್ ಸಮ್ಜಾಲ್ಲೆಂ. ಆಪ್ಣಾಕ್ ಮುಖಾಮುಖಿ ಜಾಂವ್ಕ್ ಆಸ್ಚ್ಯಾ ಆಪ್ಲ್ಯಾ ಜಿವಿತಾಚಾ ಝುಜಾಕ್ ಕಶೆಂ ಆಪುಣ್ ಫುಡ್ ಕರುನ್ ರಾವೊಂಕ್ ಸಕ್ತೆಲಿಂ ಮ್ಹಣೊನ್ ಆಲಿಯಾ ಎದೊಳ್ ಪಾಸೊನ್ ಭಿಯೆವ್ನ್ ಆಸ್ಲ್ಲೆಂ. ಪುಣ್ ಹ್ಯಾ ವೆಳಾರ್ ಅಚಾನಕ್ ತೆಂಚ್ ಝುಜ್ ತಾಕಾ ಸೊಧುನ್ ಹಾಜರ್ ಜಾಲ್ಲೆಂ. ಆತಾಂ ಆಲಿಯಾನ್ ಭಿಯೆಂವ್ನ್ ರಾಂವ್ಚ್ಯಾ ಪರಿಂಚ್ ನಾತ್ಲ್ಲೆಂ. ಹ್ಯಾ ಬಾಲಿವುಡಾ ಥಾವ್ನ್ ತಾಣೆಂ ಆಶೆಲ್ಲೆ ದೊನ್ಯ್ ಭಳಾದೀಕ್ ಖಾಂಬೆ ಹ್ಯಾ ವಗ್ತಾರ್ ತಾಚ್ಯಾ ಆಧೀನ್ ನಾತ್ಲ್ಲೆ. ಏಕ್ ಖಾಂಬೊ ಪರ್ತಾಲ್ಲೊ ಜಾಲ್ಯಾರ್ ದುಸ್ರೊ ಖಾಂಬೊ ಅಜೂನ್ ಆಲಿಯಾಚೊ ಜಾಂವ್ಕ್ ನಾತ್ಲ್ಲೊ. ಪುಣ್ ಝುಜಾಚಿ ತಂಬೂರಿ ವ್ಹಾಜೊನ್ ಜಾಲ್ಲಿ!
ಆಪ್ಣೆಂ ಆತಾಂ ಕೊಣಾಯ್ಚಾ ಧಯ್ರಾರ್ ಆಶೆವ್ನ್ ರಾಂವ್ಚ್ಯಾ ಪರಿಂ ನಾ. ಆಪ್ಣಾ ಮುಕಾರ್ ಕಸಲಿ ಪರಿಗತ್ ಆಯ್ಲಿ ಜಾಲ್ಯಾರ್ಯ್ ಆಪ್ಣೆ ಎಕ್ಸುರ್ಯಾನ್ಚ್ ಹ್ಯಾ ಇಕ್ಬಾಲ್ ಆನಿ ರಾಶಿದಾ ಮುಕಾರ್ ರಾವೊಂಕ್ ಜಾಯ್! ದೊಗಾಂ ಭಳಿಶ್ಟ್ ದಾದ್ಲ್ಯಾಂ ಮುಕಾರ್ ಏಕ್ ಚಲಿ! ಜಯ್ತ್ ವಾ ಸಲ್ವಣ್. ತಾಣೆಂ ಆಪ್ಲ್ಯಾ ಕಾಳ್ಜಾಕ್ ಧಯ್ರ್ ದಿಲೆಂ. ಜೀವ್ ಉರೊಂ ಯಾ ಮೊರೊಂ ತಾಣೆಂ ಆತಾಂ ಝುಜೊಂಕ್ ಆಸ್ಲ್ಲೆಂ.
ಸ್ಟೂಡಿಯೊ ಥಾವ್ನ್ ಭಾಯ್ರ್ ಆಯಿಲ್ಲೆಂ ಆಲಿಯಾಚೆಂ ಕಾರ್ ತಾಚ್ಯಾ ಪ್ಲ್ಯಾಟಾ ತೆವ್ಶಿಂ ಧಾಂವ್ತಾಲೆಂ.
"ವಿಶು....!" ಆಲಿಯಾ ಆಪ್ಲ್ಯಾ ಮತಿಂತ್ಚ್ ವಿಶು ಕುಮಾರಾಚಾ ಮರ್ಣಾಕ್ ಚುರ್ಚುರ್ಲೆಂ.
"ಮ್ಹಾಕಾ ಬಚಾವ್ ಕರುಂಕ್ ಗೆಲ್ಲ್ಯಾಕ್ ತುವೆಂ ತುಜೊ ಜೀವ್ ದಿಲೊಯ್......?" ಮತಿಂತ್ಚ್ ಉದ್ಗಾರ್ಲ್ಲ್ಯಾ ಆಲಿಯಾನ್ ’ನ್ಹಯ್’ ಮ್ಹಳ್ಳ್ಯಾ ಭಾಶೆನ್ ಆಪ್ಲಿ ತಕ್ಲಿ ಹಾಲಯ್ಲಿ. ಹಾಚ್ಯಾ ಪಾಟ್ಲ್ಯಾನ್ ತಾಣೆಂ ಆಪ್ಲ್ಯಾ ಮತಿಕ್ ದ್ರಡ್ ಕೆಲೆಂ.
ತಿತ್ಲೆಂಚ್!
ಕಿತೆಂಗೀ ಚಿಂತ್ಲ್ಲೆಂ ಆಲಿಯಾ,
"ಡ್ರೈವರ್! ಮುಕ್ಲ್ಯಾ ಶಾಪಾಚಾ ಸಾಮ್ಕಾರ್ ಕಾರ್ ರಾವಯ್!" ತಾಣೆಂ ಡ್ರೈವರಾಕ್ ಫರ್ಮಾಯ್ಲೆಂ.
ಆಲಿಯಾನ್ ಸಾಂಗ್ಲ್ಲ್ಯಾ ಪರಿಂ ಡ್ರೈವರಾನ್ ಸವ್ಕಾಸ್ ಕಾರ್ ಥಾಂಬಯ್ತಾನಾ, ಕಾರಾ ಥಾವ್ನ್ ದೆಂವ್ಲ್ಲೆಂ ಆಲಿಯಾ ಮುಕ್ಲ್ಯಾ ಶಾಪಿಂಗ್ ಕಾಂಪ್ಲೆಕ್ಸಾ ಭಿತರ್ ರಿಗ್ಲೆಂ.
ಆಪ್ಲೆಂ ಸೆಲ್ಪೋನ್ ಭಾಯ್ರ್ ಕಾಡುನ್ ಎದೊಳ್ ಆಪ್ಣಾಕ್ ಆಯಿಲ್ಲ್ಯಾ ಇಕ್ಬಾಲಾಚಾ ಪೊನಾಚಾ ನಂಬರಾಕ್ ತಾಣೆಂ ಮತಿಂತ್ ಬರಯ್ಲೆಂ.
ಆತಾಂ ತೆಂ ಪಬ್ಲಿಕ್ ಟೆಲಿಪೋನ್ ಬೂತಾಕ್ ಸೊದುಂಕ್ ಲಾಗ್ಲೆಂ. ಕಾರಾರ್ ಬಸ್ಲೆಲ್ಯಾ ಕಡೆಚ್ ಆಲಿಯಾನ್ ಆಪ್ಲ್ಯಾ ಝುಜಾಚಿ ಮಾಂಡಾವಳ್ ಕೆಲ್ಲಿ. ಪುಣ್ ತಾಣೆಂ ಹ್ಯಾ ಝುಜಾಚೆಂ ಆರಂಭ್ ಜಾವ್ನ್ ಇಕ್ಬಾಲಾಕ್ ಜವಾಬ್ ದೀಂವ್ಕ್ ನಾತ್ಲ್ಲಿ. ತೆಂ ಆತಾಂ ಇಕ್ಬಾಲಾಕ್ ಆಪ್ಣಾಚಿ ಜವಾಬ್ ದೀಂವ್ಕ್ ಆಶೆಲೆಂ. ಹ್ಯಾ ಖಾತಿರ್ ತಾಕಾ ಆತಾಂ ಪಬ್ಲಿಕ್ ಟೆಲಿಪೋನ್ ಬೂತ್ ಜಾಯ್ ಆಸ್ಲ್ಲೊ!
ಕಾಂಪ್ಲೆಕ್ಸಾ ಭಿತರ್ ಕೋಣ್ಯ್ ತಾಕಾ ವಳ್ಕಾಲೆಂ ನಾ.
ಟೆಲಿಪೋನ್ ಬೂತಾಕ್ ಆಯಿಲ್ಲ್ಯಾ ಆಲಿಯಾನ್ ಇಕ್ಬಾಲಾಕ್ ಪೋನ್ ಡಯಲ್ ಕೆಲೆಂ.
"ಹಲೋ.....?" ತ್ಯಾ ಕುಶಿನ್ ತೊಚ್ಚ್ ತಾಳೊ. ಇಕ್ಬಾಲ್!
"ತುಜ್ಯಾಲಾಗಿಂ ಕಿತ್ಲಿಂ ಮರ್ಸಿಡಿಸ್ ಕಾರಾಂ ಆಸಾತ್?" ಆಲಿಯಾಚೆಂ ಪಯ್ಲೆಂ ಸವಾಲ್. "ಫಾಲ್ಯಾಂ ಸಾಕಾಳಿಂ ತುಂ ತ್ಯಾ ಮುನಿಸಿಪಾಲಿಟಿಚ್ಯಾ ಸುಣ್ಯಾಂಕ್ ಧರ್ಚಾ ಕಾಮ್ದಾರಾಂಚಾ ಹಾತಾಂ ಥಾವ್ನ್ ಧಾಂವ್ಚ್ಯಾ ಸುಣ್ಯಾ ಪರಿಂ ಧಾಂವ್ತಲೊಯ್! ಮರ್ಸಿಡಿಸ್ ಕಾರಾರ್ ನ್ಹಯ್! ಖಟಾರ್ಯಾ ತುಜ್ಯಾ ಬಾಪಾಯ್ಚಾ ಸಾಯ್ಕಾಲಾರ್!" ರಾಗಾನ್ ಉಸ್ಮಡೊನ್ ಉಲಯಿಲ್ಲ್ಯಾ ಆಲಿಯಾನ್ ತ್ಯಾ ಕುಶಿನ್ ಥಾವ್ನ್ ಇಕ್ಬಾಲಾಕ್ ಕಾಂಯ್ಚ್ ಉಲಂವ್ಕ್ ಆವ್ಕಾಸ್ ದೀನಾಸ್ತಾನಾಚ್ ಪೋನ್ ಭಂಧ್ ಕೆಲೆಂ.
***********
ಕಾಫಿಯೆಚೆಂ ಕಪ್ಪ್ ತೊಂಡಾಕ್ ಧರ್ಚೆಂ ಮಿಶೇಲ್, ಶೀತಲಾನ್ ಉಚಾರ್ಲ್ಲೊ ವಿಶಯ್ ಆಯ್ಕೊನ್ ತಶೆಂಚ್ ಸ್ತಬ್ದ್ ಜಾಲೆಂ. ತಾಚ್ಯಾ ವೊಂಟಾಂಕ್ ಆನಿ ತ್ಯಾ ಕಾಫಿಯೆಚಾ ಕಪ್ಪಾಕ್ ಕಾಂಯ್ಚ್ ಅಂತರ್ ನಾತ್ಲ್ಲೊ. ಕಾಫಿಯೆಚಾ ಕಪ್ಪಾ ಥಾವ್ನ್ ಉಟೊನ್ ಯೆಂವ್ಚಿ ಪಾತಳ್ ಊಭ್ ಮಿಶೇಲಾಚಾ ವೊಂಟಾಂಕ್ ಆದ್ಳೊನ್ ತಾಚ್ಯಾ ನಾಕಾನ್ ವೊಡ್ಚ್ಯಾ ಶ್ವಾಸಾಂತ್ ಏಕ್ ಜಾತಾಲಿ.
ಮಿಶೆಲಾಚಾ ಪೊಪ್ಸಾಂತ್ ಆತಾಂ ಕಾಫಿಯೆಚೊ ಫರ್ಮಾಳ್ಚ್ ಭರೊನ್ ಕಸಲೊಗೀ ಏಕ್ ಸುವಾಧೀಕ್ ಆನ್ಂದ್ ತಾಕಾ ಭೊಗ್ಲ್ಲ್ಯಾ ಪರಿಂ ಜಾಲೊ ತರ್ಯ್ ಶೀತಲಾನ್ ಉಚಾರ್ಲ್ಲ್ಯಾ ಉತ್ರಾಂನಿ ಮಿಶೇಲಾಚಾ ಕಾಳ್ಜಾಚೊ ಆನಿ ತಾಚ್ಯಾ ಮತಿಚೊ ಸಂಭಂಧ್ ತುಟಯ್ಲೊ.
ತೆಂ ತಶೆಂಚ್ ಶೀತಲಾಕ್ ಪಳಂವ್ಚ್ಯಾರ್ ಪಡ್ಲೆಂ.
"ಹ್ಯಾ ಪಾವ್ಟಿಂಚಾ ರಾಯನಾಚಾ ಫಿಲ್ಮಾಂತ್ ಕೋಣ್ ನವೆಂ ಹೀರೋಯಿನ್ ಆಯ್ಲಾಂ?" ಮಿಶೇಲಾಕ್ಚ್ ಪಳವ್ನ್ ಥೊಡೊ ವೇಳ್ ಮೌನ್ ರಾವ್ಲ್ಲೆಂ ಶೀತಲ್, "ವಿಶು ತಾಚ್ಯೆ ಸಾಂಗಾತಾ ಆಸ್ಲ್ಲೊ ಖಂಯ್!"
ಶೀತಲಾಚಾ ತೊಂಡಾ ಥಾವ್ನ್ ಭಾಯ್ರ್ ಪಡ್ಲ್ಲಿಂ ಉತ್ರಾಂ ಮಿಶೇಲಾಕ್ ಘಡ್ಗಡ್ಯಾ ಪರಿಂ ಆಯ್ಕಾಲಿಂ.
"ಕೋಣ್? ಆಲಿಯಾ....?" ಮಿಶೇಲ್ ಉದ್ಗಾರ್ಲೆಂ.
"ಹಾಂ!"
"ನಾ ಶೀತಲ್! ತುಕಾ ಕೊಣೆಂ ತರ್ಯ್ ಬೆಶ್ಟೆಂ ದುಬಾವಾಕ್ ಇಡೆಂ ದಿಲಾಂ! ಕೊಣೆಂ ಸಾಂಗ್ಲೆಂ ತುಕಾ?"
"ತಾಣೆಂ ಮ್ಹಾಕಾ ತಾಚೆಂ ನಾಂವ್ ಸಾಂಗೊಂಕ್ ನಾ! ಪುಣ್ ಮ್ಹಾಕಾ ದಿಸ್ತಾ ತೊ ಸತ್ ಉಲಯ್ತಾ!"
"ತುಂ ತಾಕಾ ಪಾತ್ಯೆಲೆಂಯ್? ಕೋಣ್ ತುಕಾ ಪೋನ್ ಕರುನ್ ಸಾಂಗ್ತಾ ಆನಿ ತುಂ ಪಾತ್ಯೆತಾಯ್?"
"ಪರಿಸ್ಥಿತಿ ಆನಿ ದುಬಾವ್ ಎಕಾಮೆಕಾ ತಾಳ್ ಪಡೊಂಕ್ ಲಾಗ್ತಾನಾ.... ಪಾತ್ಯೆಂವ್ಕ್ಚ್ ಪಡ್ತಾ!" ಶಿತಲಾಚಾ ದ್ರಡ್ ಉಲವ್ಣ್ಯಾಂತ್ ತಾಣೆಂ ಕೆಲ್ಲೊ ದುಬಾವ್ ಖರೊ ಮ್ಹಳ್ಳಿ ಪಾತ್ಯೆಣಿ ಸ್ಪಶ್ಟ್ ಸಾಂಗ್ತಾಲಿ.
ಶೀತಲ್ ಇತ್ಲ್ಯಾ ಧಯ್ರಾನ್ ಸಾಂಗ್ತಾ ಮ್ಹಳ್ಯಾರ್ ಕಾಂಯ್ ಜಾಂವ್ಕ್ಯ್ ಪುರೊ! ಮಿಶೇಲಾನ್ ಚಿಂತ್ಲೆಂ. ತರ್ ಆಪ್ಣೆಂ ಹ್ಯಾ ವಿಶಯಾಂತ್ ರಾಯನಾಲಾಗಿಂ ಖಂಡಿತ್ ಉಲಂವ್ಕ್ ಜಾಯ್! ಮಿಶೇಲಾಚಾ ಮತಿಂತ್ ನಿರ್ಧಾರ್ ಉಟೊನ್ ರಾವ್ಲೊ.
ಥೊಡೊ ವೇಳ್ ತಶೆಂಚ್ ಉಲವ್ನ್ ಜಾವ್ನ್ ದೊಗಾಂಯ್ ಕುಜಾಕ್ ರಿಗ್ಲಿಂ. ತಿತ್ಲ್ಯಾರ್ ಮಾರ್ಕೆಟಿಕ್ ಗೆಲ್ಲೆಂ ಸುಮಿ ಪಾಟಿಂ ಆಯಿಲ್ಲೆಂ.
ತೆಗಾಂಯ್ನ್ಯ್ ಮೆಳೊನ್ ಜೆವ್ಣಾಚಿ ತಯಾರಾಯ್ ಕೆಲಿ. ಹ್ಯಾ ವೆಳಾರ್ ತ್ಯಾ ಕುಜ್ನಾಚ್ಯಾ ಜನೆಲಾ ಥಾವ್ನ್ ಭಾಯ್ರ್ ದೀಶ್ಟ್ ಧಾಂವ್ಡಾಯಿಲ್ಲ್ಯಾ ಮಿಶೇಲಾಕ್ ತೆಂ ಪಯ್ಲೆಂ ರಾವೊನ್ ಆಸ್ಲ್ಲೆಂ ಆಪ್ಣಾಚೊ ಪಾಟ್ಲಾವ್ ಕರ್ತಾ ಮ್ಹಳ್ಳ್ಯಾ ಭಾಶೆನ್ ದುಬಾವ್ ಹಾಡಯಿಲ್ಲೆಂ ಮಹೀಂದ್ರ ಜೀಪ್ ಥಂಯ್ಚರ್ ತಾಚ್ಯಾ ಪಯ್ಲೆಂಚಾ ಜಾಗ್ಯಾರ್ ಉಭೆಂ ಆಸ್ಲ್ಲೆಂ ದಿಸ್ಲೆಂ ನಾ. ತೆಂ ಜೀಪ್ ಮಾಯಾಗ್ ಜಾಲ್ಲೆಂ. ತಿಂ ಕುಜ್ನಾಂತ್ ಆಸ್ಲ್ಲ್ಯಾ ತಿತ್ಲೊ ವೇಳ್ ಮಿಶೇಲಾನ್ ಜನೆಲಾ ಥಾವ್ನ್ ಘಡ್ಯೆ ಘಡ್ಯೆ ಭಾಯ್ರ್ ತಿಳುನ್ ಪಳೆಲ್ಲೆಂ. ಪುಣ್ ತಾಕಾ ತೆಂ ಜೀಪ್ ದಿಸ್ಲ್ಲೆಂಚ್ ನಾ. ಧನ್ಫರಾಂಚೆಂ ಜೆವಾಣ್ ತಯಾರ್ ಜಾಲೆಂ. ಆಜ್ ಧನ್ಫರಾಂ ರಾಯನ್ ಘರಾ ಯೆಂವ್ಚೊ ನಾತ್ಲ್ಲೊ ಜಾಲ್ಲ್ಯಾನ್ ಮಿಶೇಲ್ ಶೀತಲಾಚಾ ಘರಾಚ್ ಉರ್ಲೆಂ.
ಧನ್ಫರಾಂಚೆಂ ಜೆವಾಣ್ ಜಾವ್ನ್ ಅರ್ಧೆಂ ವೋರ್ ಟಿ.ವಿ ಮುಕಾರ್ ಬಸ್ಲೆಲಿಂ ದೊಗಾಂಯ್ ಥೊಡೊ ವೇಳ್ ವಿಶೆವ್ ಘೆಂವ್ಕ್ ಗೆಲಿಂ.
ನಿದೆಂತ್ಲೆಂ ತಿಂ ಉಟ್ತಾನಾ ವೊರಾಂ ಸಾಂಜೆಚಿಂ ಸಾಡೆ ಚಾರ್!
ಸಾಂಜೆಚಿ ಕಾಫಿ ಜಾವ್ನ್ ತಶೆಂಚ್ ಶೀತಲ್ ಆಪ್ಲ್ಯಾ ಘರಾಚ್ಯಾ ಗಾರ್ಡಾನಾಕ್ ಆಯ್ಲೆಂ. ಸಾಂಜೆಚ್ಯಾ ಪ್ರಶಾಂತ್ ಹವ್ಯಾಂತ್ ತ್ಯಾ ಗಾರ್ಡನಾಂತ್ ಫುಲ್ಲ್ಲ್ಯಾ ಫುಲಾಂ ಸಾಂಗಾತಾ ವೇಳ್ ಪಾಶಾರ್ ಕರುಂಕ್ ತಾಂಕಾ ಅಪುರ್ಬಾಯ್ ಜಾಲಿ. ಹ್ಯಾ ಮಧೆಂ ರಾಯನಾಚೆಂ ಪೋನ್ ಯೇವ್ಕ್ ನಾ.
ಸುಮಿನ್ ತ್ಯಾ ಗಾರ್ಡನಾಚಾ ಫುಲಾಂ ಝಡಾಂಕ್ ಉದಾಕ್ ದಿತಾನಾ ಶೀತಲ್ ಆನಿ ಮಿಶೇಲ್ ದೊಗಾಂಯ್ ಗಾರ್ಡನಾಂತ್ ರಾವೊನ್ ತ್ಯಾ ಥಂಡ್ ಜಾಂವ್ಚ್ಯಾ ಮಾತಿಯೆಚಾ ಪರ್ಮಳಾಕ್ ಘೆಂವ್ನ್ ಉಟೊನ್ ಯೆಂವ್ಚ್ಯಾ ವಾರ್ಯಾಚಾ ಸಾಂಗಾತಾ ಆನಂದ್ ಜೊಡುಂಕ್ ಲಾಗ್ಲಿಂ.
ಪೃಥ್ವೆರ್ ಆತಾಂ ಕಾಳೊಕ್ ಪಡೊನ್ ಯೇಂವ್ಕ್ ಲಾಗ್ಲೊ. ಘರಾ ಭಾಯ್ಲ್ಯಾ ಗಾರ್ಡನಾಚೆ ಆನಿ ಕಂಪೌಂಡಾಚೆ ವೀಜ್ ದಿವೆ ಜಳವ್ನ್ ತಿ ದೊಗಾಂಯ್ ಆತಾಂ ಭಿತರ್ ಆಯ್ಲಿ. ದೊಗಾಂಯ್ ಸಾಂಗಾತಾ ಆಸ್ಲ್ಯಾರ್ ಆಶೆಂಚ್! ತಾಂಕಾ ಕಸೊ ವೇಳ್ ಪಾಶಾರ್ ಜಾತಾ ತೆಂ ಕಳೊನ್ಚ್ ಯೇನಾತ್ಲ್ಲೆಂ.
"ರಾಯನಾಚೆಂ ಕಿತೆಂ ಎದೊಳ್ಯ್ ಪೋನ್ ಯೇವ್ಂಕ್ ನಾ?" ಶೀತಲಾನ್ ಸಾಲಾಂತ್ಲ್ಯಾ ಉಗ್ತಿಂ ಆಸ್ಲ್ಲ್ಯಾ ಜನೆಲಾಚ್ಯಾ ಕರ್ಟನಾಂಕ್ ವೊಡುನ್ ಭಂಧ್ ಕೆಲೆಂ. ತ್ಯಾ ಕರ್ಟನಾ ಥಾವ್ನ್ ಭಾಯ್ಲ್ಯಾ ಗಾರ್ಡನಾಂತ್ ಜಳ್ಚೆ ವೀಜ್ ದಿವೆ ಭಿತರ್ ಸಾಲಾಂತ್ ದಿಸೊನ್ ಯೆತಾಲೆ.
"ತೊ ಆಜ್ ಚಡ್ ಬಿಜಿ ಆಸಾ ಮ್ಹಣೊನ್ ಸಾಂಗ್ತಾಲೊ!" ಮಿಶೇಲಾನ್ ಟಿ.ವಿ. ಚೊ ರಿಮೋಟ್ ಕಂಟ್ರೋಲ್ ಆಪ್ಲ್ಯಾ ಹಾತಿಂತ್ ಧರ್ಲೊ.
"ತುವೆಂ ಘರಾ ಪೋನ್ ಕೆಲ್ಲೆಂಯ್....?" ಶೀತಲ್ ಸೊಫಾರ್ ಬಸ್ಲೆಂ. ಸುಮಿ ಭಿತರ್ಲ್ಯಾ ಕಾಮಾರ್ ಮೆತೆರ್ ಜಾಲ್ಲೆಂ.
"ವ್ಹಯ್!"
"ಕಿತೆಂ ಖಂಯ್? ಅಂಕಲಾಕ್ ತುಜೊ ಉಡಾಸ್ ಯೆತಾ ಆಸ್ತಲೊ! ತುಕಾ ಗಾಂವಾಕ್ ಆಪಯ್ನಾತ್ಲ್ಲೊ?"
"ಆಬಾಕ್ ಮ್ಹಾಕಾ ಪಳಂವ್ಚಿ ಆಶಾ ಖಂಡಿತ್ ಆಸ್ತೆಲಿ. ಪುಣ್ ತೊ ಮ್ಹಾಕಾ ಗಾಂವಾಕ್ ಆಪಂವ್ಚೊ ನಾ! ಥೊಡ್ಯಾ ದಿಸಾಂ ಉಪ್ರಾಂತ್ ರಾಯನಾಚೆಂ ಕಾಮ್ ಉಣೆಂ ಜಾತಾನಾ ಗಾಂವಾಂಕ್ ವಚೊನ್ ಥೊಡೆ ದೀಸ್ ರಾವೊನ್ ಯೇಮ್ವ್ಕ್ ಚಿಂತ್ಲಾಂ!" ಮಿಶೇಲಾನ್ ಟಿವಿ ಆನ್ ಕೆಲಿ.
"ರಾಯನ್ ಯೆತಲೊ....?"
"..........!"
ಕಿತೆಂಗೀ ಉಲಂವ್ಕ್ ತೋಂಡ್ ಉಗ್ತೆಂ ಕೆಲ್ಲೆಂ ಮಿಶೇಲ್ ತಶೆಂಚ್ ಆಪ್ಲಿಂ ಉತ್ರಾಂ ವಿಸ್ರಾಲೆಂ. ತಾಚೆಂ ತೋಂಡ್ ತಶೆಂಚ್ ಉಗ್ತೆಂಚ್ ಉರ್ಲೆಂ. ಉಗ್ತೆಂ ಆಸ್ಲ್ಲ್ಯಾ ತೊಂಡಾ ಸವೆಂಚ್ ಮಿಶೆಲಾಚಿ ತಕ್ಲಿ ಹಳ್ವಾಯೆರ್ ತ್ಯಾ ಮುಕ್ಲ್ಯಾ ಜನೆಲಾ ತೆವ್ಶಿಂ ಘುಂವ್ಲಿ. ತ್ಯಾ ಮುಕ್ಲ್ಯಾ ವ್ಹಡ್ಲ್ಯಾ ಜನೆಲಾ ತೆವ್ಶಿಂ ಪಳೆಲ್ಲ್ಯಾ ತಾಚ್ಯಾ ದೊಳ್ಯಾಂಕ್ ಕಿತೆಂಗೀ ಝಳ್ಕಾಲ್ಲ್ಯಾ ಪರಿಂ ಜಾಲೆಂ. ಭಾಯ್ಲ್ಯಾ ಗಾರ್ಡನಾಂತ್ ಜಳ್ಚ್ಯಾ ದಿವ್ಯಾಂಚಾ ಉಜ್ವಾಡಾಂತ್ ತ್ಯಾ ಜನೆಲಾ ಥಾವ್ನ್ ಹೆವ್ಶಿಂ ದಾರಾಚಾ ಕುಶಿನ್ ಚಲೊನ್ ಆಯಿಲ್ಲಿ ಏಕ್ ಸಾವ್ಳಿ!
ವ್ಹಯ್! ಮಿಶೇಲಾಕ್ ತ್ಯಾ ಜನೆಲಾಚಾ ಭಾಯ್ಲ್ಯಾ ಮಂದ್ ಕಾಳೊಕಾಂತ್ ಕಸಲಿಗೀ, ಕೊಣೆಗೀ ಚಲೊನ್ ಆಯಿಲ್ಲಿ ಸಾವ್ಳಿ ಝಳ್ಕಾಲ್ಲಿ.
ತ್ಯಾ ಜನೆಲಾಚಾ ಪಾಟ್ಲ್ಯಾನ್ ಕೋಣ್ ತರ್ಯ್ ಆಸಾ. ಅಚಾನಕ್ ಚಲೊನ್ ಆಯಿಲ್ಲ್ಯಾ ಪರಿಂ ಜಾವ್ನ್ ಎಕಾಚ್ಚ್ ಫರಾ ಮಾಯಾಗ್ ಜಾಲ್ಲಿ ಸಾವ್ಳಿ!
ತಶೆಂಚ್ ದಾರಾಕ್ ಪಳವ್ನ್ ರಾವ್ಲ್ಲ್ಯಾ ಮಿಶೇಲಾಕ್ ಕೊಣೆಯ್ ದಾರಾಚಿ ಕಾಂಪಿಣ್ ಮಾರ್ಲ್ಲೊ ಆವಾಜ್ ಆಯ್ಕಾಲೊ ನಾ. ಮುಕ್ಲೆಂ ದಾರ್ ದಾಂಪ್ಲ್ಲೆಂ.
ತರ್!
ಎದೊಳ್ ಉದೆಲ್ಲಿ ಹಿ ಸಾವ್ಳಿ ಆತಾಂ ಖಂಯ್ ಗೆಲಿ? ಮಿಶೆಲ್ ಚಿಂತಾಲೆಂ.
"ಶೀತಲ್! ಭಾಯ್ರ್ ಕೊಣ್ಗೀ ಚಲೊನ್ ಆಯಿಲ್ಲ್ಯಾ ಪರಿಂ ದಿಸ್ತಾ!"
ಆಪ್ಣೆ ಪಳೆಲ್ಲಿ ಸಾವ್ಳಿ ಶೀತಲಾನ್ ಪಳಂವ್ಕ್ ನಾ ಮ್ಹಣೊನ್ ಮಿಶೇಲ್ ಖಂಡಿತ್ ಜಾಣಾಂ. ಶೀತಲ್ ತರ್ ಹೆಂ ಜಾಣಾಂ ಜಾಲ್ಲೆಂ ಜಾಲ್ಯಾರ್ ತೆಂಯ್ ಭಾಯ್ರ್ ಪಳೆತೆಂ. ಆಶೆಂ ಜಾಂವ್ಕ್ ನಾ. ತರ್....?
"ಭಾಯ್ರ್? ಕೋಣ್......?" ಶೀತಲಾನ್ ಜವಾಬ್ ದಿತಾನಾ ಹಳ್ತಾರ್ ಮಿಶೇಲಾಚಾ ಕುಡಿಂತ್ ಹಿಂವ್ ಚರ್ಲೆಂ.
"ತೆಣೆಂ ಭಾಯ್ರ್ ಕೋಣ್ಗೀ ಆಸಾ ಶೀತಲ್!" ಮಿಶೇಲಾನ್ ಆಪ್ಲ್ಯಾ ಹಾತಾಂತ್ಲೊ ರಿಮೋಟ್ ಕಂಟ್ರೋಲ್ ಸಕಯ್ಲ್ ಸೋಫಾ ವಯ್ರ್ ದವರ್ಲೊ.
"ಭಾಯ್ರ್ ಕೋಣ್ಗೀ ಆಸಾ!? ಕೋಣ್...?" ಶೀತಲಾಕ್ ಮಿಶೇಲ್ ಕಿತೆಂ ಸಾಂಗ್ತಾ ತೆಂ ಕಾಂಯ್ ಸಮ್ಜಾಲೆಂ ನಾ. ತಾಣೆಂ ಮಿಶೇಲಾನ್ ದಾಕಯಿಲ್ಲ್ಯಾ ತೆವ್ಶಿಂ ಆಪ್ಲಿ ನದರ್ ಧಾಂವ್ಡಾಯ್ಲಿ. ತಾಣೆಂ ದುಬಾವ್ ಕರ್ಚ್ಯಾ ತಸಲೆಂ ತಾಕಾ ಕಾಂಯ್ ಝಳ್ಕಾಲೆಂ ನಾ.
"ಹಾವೆಂ ಆತ್ತಾಂ ಪಳೆಲೆಂ. ಆಶೆಂ ತ್ಯಾ ಜನೆಲಾ ಕಡೆನ್ ಥಾವ್ನ್ ಚಲೊನ್ ಯೆವ್ನ್ ದಾರಾಲಾಗಿಂ....!" ಮಿಶೆಲ್ ಭಿಯೆವ್ನ್ ಭಿಯೆವ್ನ್ ಸಾಂಗ್ತಾಲೆಂ.
"ಹಾಂವ್ ಪಳೆತಾಂ ಕೋಣ್ ಆಸಾ ತೆಂ!" ಶೀತಲ್ ಸೋಫಾರ್ ಥಾವ್ನ್ ಉಟೊನ್ ಉಭೆಂ ಜಾಲೆಂ. ಜನೆಲಾಚಾ ಕರ್ಟಾನಾ ಥಾವ್ನ್ ಭಾಯ್ಲ್ಯಾ ಗಾರ್ಡನಾಂತ್ಲ್ಯಾ ದಿವ್ಯಾಂಚೊ ಉಜ್ವಾಡ್ ಮಂದ್ ಮಂದ್ ದಿಸ್ತಾಲೊ.
"ಕಾಂಯ್ ಸುಮಿ ಪುಣಿ.....?" ಮಿಶೇಲಾನ್ ಶೀತಲಾಕ್ ಪಳೆಲೆಂ.
"ಸುಮೀ...? ಸುಮೀ.....?" ಶೀತಲಾನ್ ಕಾಮಾಚ್ಯಾ ಚೆಡ್ವಾಕ್ ಉಲೊ ದಿಲೊ.
"ಹಾಂ ಮ್ಯಾಡಮ್.....?" ಭಿತರ್ ಕಸಲ್ಯಾಗೀ ಕಾಮಾರ್ ಆಸ್ಲ್ಲೆಂ ಸುಮಿ ಭಾಯ್ರ್ ಆಯ್ಲೆಂ.
"ತುಂ ಆತ್ತಾಂ ಭಾಯ್ರ್ ಗಾರ್ಡನಾಕ್ ಗೆಲ್ಲೆಂಯ್.....?"
"ನಾ ಮ್ಯಾಡಮ್!"
"ಬರೆಂ!" ಶೀತಲ್ ಪರ್ತ್ಯಾಕ್ ಮುಕ್ಲ್ಯಾ ದಾರಾ ತೆವ್ಶಿನ್ ಘುಂವ್ಲೆಂ.
ಸುಮಿತಾ ಆಪ್ಲ್ಯಾ ಕಾಮಾರ್ ಭಿತರ್ ರಿಗ್ಲೆಂ
ತಿತ್ಲೆಂಚ್!
ಶೀತಲ್ ಉಟೊನ್ ಉಭೆಂ ಜಾಲ್ಲೆಂ ಪಳವ್ನ್ ಮಿಶೇಲ್ ಸಂಪೂರ್ಣ್ ಭಿಯೆಲೆಂ.
ಪಯ್ಲೆಂ ತೆಂ ಕಾರ್! ಆತಾಂ ಹಾಂಗಾ ಆಶೆಂ ಕೋಣ್ಗೀ....!
"ಶೀತಲ್ ದಾರ್ ಉಗ್ತೆಂ ಕರಿನಾಕಾ! ಪಯ್ಲೆಂ ಭಾಯ್ರ್ ಕೋಣ್ ತೆಂ ಪಳೆ!" ದಾರಾ ತೆವ್ಶಿಂ ಚಮ್ಕೊಂಚಾ ಶೀತಲಾಕ್ ಮಿಶೇಲಾನ್ ಜಾಗ್ರುತ್ಕಾಯ್ ಉಚಾರ್ಲಿ.
ಸವ್ಕಾಸ್ ದಾರಾ ತೆವ್ಶಿಂ ಚಲೊನ್ ಗೆಲ್ಲ್ಯಾ ಶೀತಲಾನ್ ಏಕ್ ಹಾತ್ ದಾರಾಚಾ ಹ್ಯಾಂಡಲಾ ವಯ್ರ್ ದವರುನ್ ದಾರಾ ಭಾಯ್ರ್ ಕೋಣ್ಯ್ ಆಸಾ ವಾ ನಾ ಮ್ಹಳ್ಳೆಂ ತೆಂ ಪಳಂವ್ಕ್ ತೆಂ ಸವ್ಕಾಸ್ ಬಾಗ್ವಲ್ಲೆಂ ಮಾತ್ರ್!
ತಿತ್ಲ್ಯಾರ್!
ಎಕಾಚ್ಚ್ ಫರಾ ಭಾಯ್ರ್ ಥಾವ್ನ್ ಕೊಣೆಂಗೀ ದೋನ್ ತೀನ್ ಪಾವ್ಟಿಂ ದಾರಾಚೆಂ ಹ್ಯಾಂಡಲ್ ಘುಂವ್ಡಾವ್ನ್ ದಾರಾಕ್ ಜ್ಯೋರಾನ್ ಮಾರ್ಲೆಂ.
ತಿತ್ಲೆಂಚ್!
"ಶೀತಲ್....!" ಮಿಶೇಲ್ ಜ್ಯೊರಾನ್ ಬೊಬಾಟ್ಲೆಂ.
ತಾಚ್ಯಾ ಪಾಟ್ಲ್ಯಾನ್,
ದಾರಾ ಮುಕಾರ್ ಥಾವ್ನ್ ಉಡ್ಕಿ ಮಾರ್ಲ್ಲೆಂ ಶೀತಲ್ ತಶೆಂಚ್ ವೊಣೊದಿಕ್ ವೊಣ್ಕೊನ್ ಮೊನೊ ಖಾಂಬೊ ಜಾಲೆಂ. ತಾಕಾ ಶಾಕ್ ಲಾಗ್ಲ್ಲ್ಯಾ ಪರಿಂ ಜಾವ್ನ್ ತಾಚೆಂ ಕಾಳಿಜ್ ರಾವ್ಲೆಲ್ಯಾ ಪರಿಂ ತಾಕಾ ಜಾಲೆಂ.
ತಿತ್ಲ್ಯಾರ್!
ಪರ್ತ್ಯಾಕ್ ತ್ಯಾ ದೆಗೆಚ್ಯಾ ಜನೆಲಾ ಮುಕಾರ್ ಕೋಣ್ಗೀ ಯೇವ್ನ್ ಉಭೆಂ ಜಾಲೆಂ.
"ಶೀ.....ತಲ್!" ಮಿಶೇಲಾಚೊ ತಾಳೊ ಕಾಂಪ್ಲೊ. ತೆಂ ಸಗ್ಳೆಂಚ್ಚ್ ಭಿಯಾನ್ ಥರ್ಥರೊಂಕ್ ಲಾಗ್ಲೆಂ. ತಾಚ್ಯಾ ತೊಂಡಾ ಥಾವ್ನ್ ಸವ್ಕಾಸ್ ರಡ್ಣೆಂ ಭಾಯ್ರ್ ಸರ್ಲೆಂ. ಲ್ಹಾನ್ ಭುರ್ಗ್ಯಾಪರಿಂ ಮಿಶೆಲ್ ರಡೊಂಕ್ ಲಾಗ್ಲೆಂ.
ಭಿತರ್ ಕಾಮಾರ್ ಆಸ್ಲ್ಲೆಂ ಸುಮಿ ಭಾಯ್ರ್ ಧಾಂವೊನ್ ಆಯ್ಲೆಂ.
"ಶ್.....! ಮಿಶೇಲ್!"
ಮಿಶೇಲ್ ರಡ್ತಾ ತೆಂ ಪಳವ್ನ್ ಶೀತಲ್ ಆಪ್ಣಾಕ್ ಲಾಗ್ಲ್ಲ್ಯಾ ಭಿರಾಂತೆಚ್ಯಾ ಶಾಕಾ ಥಾವ್ನ್ ಭಾಯ್ರ್ ಯೇವ್ನ್ ಮಿಶೆಲಾ ತೆವ್ಶಿಂ ವೆವೆಗ್ಗಿಂ ಧಾಂವೊನ್ ಆಯ್ಲೆಂ. ಎಕಾ ಕುಶಿ ಅಚಾನಕ್ ಆಪ್ಲ್ಯಾ ಘರಾ ಭಾಯ್ರ್ ಕೋಣ್ಗೀ ಅಪರಿಚಿತ್ ಯೇವ್ನ್ ರಾವ್ಲ್ಲಿ ಭಿರಾಂತ್ ಜಾಲ್ಯಾರ್ ದುಸ್ರ್ಯಾ ಕುಶಿನ್ ಮಿಶೇಲಾಚೆಂ ರಡ್ಣೆಂ!
"ಶೀತಲ್... ಥಂಯ್ ಕೋಣ್ಗೀ ಆಸಾ!" ಮಿಶೇಲಾನ್ ದಾಖಯಿಲ್ಲ್ಯಾ ಕುಶಿನ್ ಶೀತಲಾನ್ ಪಳೆಲೆಂ.
ವ್ಹಯ್! ತಾಚ್ಯಾ ದೊಳ್ಯಾಂಕ್ ತೆಂಚ್ ಪಾತ್ಯೆಲೆಂ ನಾ.
ಆತಾಂ ಶೀತಲಾನ್ಯ್ ಪಳೆಲಿ ತಿಚ್ಚ್ ಸಾವ್ಳಿ.... ತ್ಯಾ ಮುಕ್ಲ್ಯಾ ಜನೆಲಾರ್!
"ಹು ಇಸ್ ದೇಟ್?" ಶೀತಲ್ ಬೊಬಾಟ್ಲೆಂ.
ತಿತ್ಲ್ಯಾರ್ ಪರ್ತ್ಯಾಕ್ ತಿ ಸಾವ್ಳಿ ಶೀತಲಾಚಾ ಘರಾಚ್ಯಾ ಮುಕ್ಲ್ಯಾ ದಾರಾ ತೆವ್ಶಿಂ ಚಲೊನ್ ಗೆಲಿ.
ವೆವೆಗ್ಗಿಂ ಶೀತಲ್ ಮಿಶೇಲಾಚಾ ಲಾಗಿಂ ಆಯಿಲ್ಲೆಂ ಮಿಶೆಲಾಕ್ ತಾಣೆಂ ಘಟ್ ವೆಂಗುನ್ ಧರ್ಲೆಂ. ಶೀತಲ್ ಮಿಶೆಲಾಕ್ ಜಾಣಾಂ. ಅಸಲ್ಯಾ ಪರಿಸ್ಥಿತೆಂತ್ ಮಿಶೇಲ್ ಆಪ್ಣಾಕ್ಚ್ ಸಾಂಬಾಳುಂಕ್ ಸಕಾನಾ.
ಸುಮಿಕ್ ಹಾಂಗಾ ಸಾಲಾಂತ್ ಕಿತೆಂ ಜಾತಾ ತೆಂ ಕಾಂಯ್ಚ್ ಕಳ್ಳೆಂ ನಾ. ತೆಂ ತಶೆಂಚ್ ಶೀತಲಾಕ್ ಆನಿ ರಡ್ಚ್ಯಾ ಮಿಶೇಲಾಕ್ ಪಳವ್ನ್ ರಾವ್ಲೆಂ.
"ಶ್..... ! ಕ್ವಾಯ್ಟ್ ಮಿಶೇಲ್ ಕ್ವಾಯ್ಟ್!" ಶೀತಲಾನ್ ಮಿಶೇಲಾಚೆಂ ಮಾತೆಂ ಪೊಶೆಲೆಂ. ಪುಣ್ ಮಿಶೆಲಾಚೆಂ ರಡ್ಣೆಂ ರಾವ್ಲ್ಲ್ಯಾ ಪರಿಂ ದಿಸ್ಲೆಂ ನಾ.
ತಿತ್ಲ್ಯಾರ್!
ಮಿಶೇಲಾಚೆಂ ಪೋನ್ ವ್ಹಾಜೊಂಕ್ ಲಾಗ್ಲೆಂ.
ಹ್ಯಾ ಪರಿಸ್ಥಿತೆಂತ್ ಅಚಾನಕ್ ಹೆಂ ಪೋನ್?
ಮಿಶೇಲ್ ಏಕ್ ಪಾವ್ಟಿಂ ತ್ಯಾ ಮುಕ್ಲ್ಯಾ ಜನೆಲಾ ತೆವ್ಶಿಂ ಏಕ್ ಪಾವ್ಟಿಂ ತ್ಯಾ ಆಪ್ಲ್ಯಾ ಬ್ಯಾಗಾ ತೆವ್ಶಿಂ ಪಳಂವ್ಕ್ ಲಾಗ್ಲೆಂ.
"ಮಿಶೇಲ್ ಪೋನ್....!" ಶೀತಲಾನ್ ಮಿಶೇಲಾಚಾ ಬ್ಯಾಗಾ ವಯ್ರ್ ನದರ್ ಮಾರ್ಲಿ.
ಹ್ಯಾ ವೆಳಾರ್ ಮಿಶೇಲಾಕ್ ತೆಂ ಪೋನ್ ಕಾಡುಂಕ್ಯ್ ಧಯ್ರ್ ನಾತ್ಲ್ಲೆಂ.
"ರಾವ್ ಹಾಂವ್ ಪಳೆತಾಂ!" ಶೀತಲ್ ಪೋನಾ ತೆವ್ಶಿಂ ಚಮ್ಕಾಲೆಂ.
ತಾಣೆಂ ಮಿಶೇಲಾಚಾ ಬ್ಯಾಗಾಕ್ ಆಪ್ಲ್ಯಾ ಹಾತಾನಿ ಧರ್ಲಾಂ ಮಾತ್ರ್!
ತಿತ್ಲ್ಯಾರ್!
’ಸಕ್ಕ್’ ಕರುನ್ ಪರ್ತ್ಯಾಕ್ ತ್ಯಾ ಜನೆಲಾ ಪಾಟ್ಲ್ಯಾನ್ ತಿಚ್ಚ್ ಸಾವ್ಳಿ ಧಾಂವೊನ್ ಗೆಲಿ. ತಾಚ್ಯೆ ಸವೆಂ ಮಿಶೇಲಾಚಾ ಬ್ಯಾಗಾ ಭಿತರ್ಲೆಂ ಪೋನ್ ಮೌನ್ ಜಾಲೆಂ.
ಮಿಶೇಲಾಚಾ ಬ್ಯಾಗಾಕ್ ತಶೆಂಚ್ ಆಪ್ಲ್ಯಾ ಹಾತಾನ್ ಧರುನ್ ರಾವ್ಲೆಲ್ಯಾ ಶೀತಲಾನ್ ಮಿಶೇಲಾ ವಯ್ರ್ ನದರ್ ಮಾರುನ್ ತಾಣೆಂ ತೆಂ ಬ್ಯಾಗ್ ಉಗ್ತೆಂ ಕೆಲೆಂ. ತ್ಯಾ ಬ್ಯಾಗಾ ಭಿತರ್ಲೆಂ ಮಿಶೇಲಾಚೆಂ ಪೋನ್ ಭಾಯ್ರ್ ಕಾಡುನ್ ತ್ಯಾ ಪೊನಾಕ್ಚ್ ಪಳೆಲ್ಲ್ಯಾ ಶೀತಲಾನ್ ಆಪ್ಲ್ಯಾ ಹಾತಾಂತ್ಲ್ಯಾ ಮಿಶೇಲಾಚಾ ಬ್ಯಾಗಾಕ್ ಸಕಯ್ಲ್ ಸೋಫಾರ್ ಗಳಂವ್ಕ್ ತೆಂ ಬಾಗ್ವಾಲಾಂ ಮಾತ್ರ್!
ತಿತ್ಲ್ಯಾರ್!
ಎಕಾಚ್ಚ್ ಫರಾ ಶೀತಲ್ ಆಪ್ಣಾಕ್ ವೀಜ್ ಸಕ್ತೆನ್ ಧರ್ಲೆಲ್ಯಾ ಪರಿಂ ಉಡೊನ್ ಪಡ್ಲೆಂ!
ತಾಚ್ಯಾ ಹಾತಾಂತ್ಲೆಂ ಮಿಶೇಲಾಚೆಂ ಪೋನ್ ಪರ್ತ್ಯಾಕ್ ವ್ಹಾಜೊಂಕ್ ಲಾಗ್ಲ್ಲೆಂ!
ಅಚಾನಕ್ ಜಾಲ್ಲ್ಯಾ ಶಾಕಾ ವರ್ವಿಂ ಆಪ್ಣಾಚಾ ಹಾತಾ ಥಾವ್ನ್ ಧರ್ಣಿಕ್ ಗಳೊನ್ ವೆಚ್ಯಾ ಪೊನಾಕ್ ಕಶ್ಟಾಂನಿ ಮ್ಹಳ್ಳ್ಯಾಪರಿಂ ಶೀತಲಾನ್ ಉಡ್ಡೊನ್ ಸಾಂಬಾಳ್ಳೆಂ. ತಾಚಿ ನದರ್ ಆತಾಂ ತ್ಯಾ ಪೊನಾಚಾ ಡಿಸ್ಪ್ಲೇ ವಯ್ರ್ ಧಾಂವ್ಲಿ.
"ಕಾಲಿಂಗ್ ರಾಯನ್!" ತೊ ಡಿಸ್ಪ್ಲೇ ದಾಕಯ್ತಾಲೊ.
"ಮಿಶೇಲ್! ರಾಯನ್!" ಶೀತಲಾನ್ ಪೋನ್ ಕಾಡುನ್ ಮಿಶೇಲಾಕ್ ದಿಲೆಂ.
ತಿತ್ಲೆಂಚ್!
ರಾಯನಾಚೆಂ ನಾಂವ್ ಆಯ್ಕೊನ್ ಮಿಶೇಲಾಕ್ ಕಸಲೆಂಗೀ ಧಯ್ರ್ ಆಯಿಲ್ಲ್ಯಾ ಪರಿಂ ಜಾಲೆಂ. ತಾಣೆಂ ತ್ಯಾ ಪೊನಾಕ್ ಶೀತಲಾ ಥಾವ್ನ್ ಘೆವ್ನ್ ಘೆವ್ನ್ ತೆಂ ಆನ್ ಕೆಲೆಂ.
"ರಾಯನ್ ಪ್ಲೀಸ್ ಹಾಂಗಾ ಯೇ!" ಮಿಶೇಲ್ ಪೊನಾರ್ ರಡೊಂಕ್ ಲಾಗ್ಲೆಂ.
"ಡಾರ್ಲಿಂಗ್... ಕಿತೆಂ ಜಾಲೆಂ?" ತ್ಯಾ ಕುಶಿಚ್ಯಾ ರಾಯನಾಚ್ಯಾ ತಾಳ್ಯಾಂತ್ ಅಚಾನಕ್ ಬದ್ಲಾನಣ್ ಜಾಲಿ.
"ಹಾಂಗಾ ಭಾಯ್ರ್ ಕೋಣ್ಗೀ ಆಸಾ ರಾಯನ್! ಪ್ಲೀಸ್ ವೆಗ್ಗಿಂ ಯೇ!" ಮಿಶೆಲ್ ರಡ್ತಾಲೆಂ.
"ಹಾಂವ್ ಆಯ್ಲೊಂ ಡಾರ್ಲಿಂಗ್! ಶೀತಲ್ ಖಂಯ್ ಅಸಾ?" ರಾಯನಾಚಾ ತಾಳ್ಯಾಂತ್ ಆತಾಂ ಭಿರಾಂತ್ ಸ್ಪಶ್ಟ್ ಕಳೊನ್ ಯೆತಾಲಿ.
"ಹಾಂಗಾಚ್ ಆಸಾ!"
"ಓ.ಕೆ. ಓ.ಕೆ! ಹಾಂವ್ ಆಯ್ಲೊ! ಆರ್ ಯು ಆಲ್ ರೈಟ್?"
"ದಾರಾ ಭಾಯ್ರ್ ಕೋಣ್ಗೀ ಆಸಾ ರಾಯನ್!" ಮಿಶೇಲ್ ಆಪ್ಲ್ಯಾ ಭಿಯೆಲ್ಲ್ಯಾ ಚಿತ್ಳಾ ಸಾರ್ಕ್ಯಾ ದೊಳ್ಯಾಂನಿ ಮುಕ್ಲ್ಯಾ ದಾರಾಕ್ಚ್ ಪಳೆತಾಲೆಂ.
"ದಾರ್ ಉಗ್ತೆಂ ಕರಿನಾಕಾತ್. ಓ.ಕೆ!" ರಾಯನಾನ್ ತ್ಯಾ ಕುಶಿನ್ ಪೋನ್ ಭಂಧ್ ಕೆಲೆಂ.
ಪೋನ್ ಭಂಧ್ ಕರುನ್ ಪರ್ತ್ಯಾಕ್ ಜನೆಲಾ ಲಾಗಿಂ ಪಳೆತಾನಾ ತಿ ಸಾವ್ಳಿ ಮಾಯಾಗ್ ಜಾಲ್ಲಿ! ಹೆವ್ಶಿಂ ತೆವ್ಶಿಂ ಖಂಯ್ಚರ್ಯ್ ಮಿಶೇಲಾಚಾ ದೊಳ್ಯಾಂಕ್ ತಿ ಸಾವ್ಳಿ ದಿಸ್ಲಿ ನಾ. ಮಿಶೇಲಾಕ್ ಆನಿ ಶೀತಲಾಕ್ ಬೆಶ್ಟಾಯಿಲ್ಲಿ ಸಾವ್ಳಿ ಆತಾಂ ಮಾಯಾಗ್ ಜಾಲ್ಲಿ. ದೊಗಾಂಯ್ಕ್ಯ್ ಥಂಯ್ ಥಾವ್ನ್ ಹಾಲೊಂಕ್ ಧಯ್ರ್ ಆಯ್ಲೆಂ ನಾ. ತಶೆಂಚ್ ತಾಣಿಂ ರಾಯನಾಚಿ ವಾಟ್ ಪಳೆಲಿ.
ಮಿಶೆಲಾನ್ ಪೋನ್ ಕರುನ್ ಥೊಡ್ಯಾಚ್ ವೆಳಾನ್ ರಾಯನ್ ಆಯಿಲ್ಲೊ.
"ಶೀತಲ್! ಹಾಂವ್....! ದಾರ್ ಉಗ್ತೆಂ ಕರ್!"
ದರಾ ಭಾಯ್ರ್ ಥಾವ್ನ್ ರಾಯನಾಚೊ ತಾಳೊ ಉಲಯ್ಲೊ.
ರಾಯನ್ ಆಯ್ಲೊ ತೆಂ ಕಳ್ತಚ್ ಶೀತಲಾನ್ ದಾರ್ ಉಗ್ತೆಂ ಕೆಲೆಂ. ದಾರಾರ್ ರಾಯನಾಕ್ ಪಳವ್ನ್ ಧಾಂವೊನ್ ಆಯಿಲ್ಲ್ಯಾ ಮಿಶೆಲಾನ್ ರಾಯನಾಕ್ ವೆಂಗುನ್ ಧರ್ಲೆಂ. ಶೀತಲಾಕ್ ಆತಾಂ ಧಯ್ರ್ ಯೇವ್ನ್ ತಾಣೆಂ ವ್ಹಳೂ ಘರಾ ಥಾವ್ನ್ ಭಾಯ್ರ್ ಮೆಟಾಂ ಕಾಡ್ಲಿಂ. ಹೆವ್ಶಿಂ ತೆವ್ಶಿಂ ಪಳೆಲ್ಲ್ಯಾ ತಾಚ್ಯಾ ದೊಳ್ಯಾಂ ದಿಶ್ಟೆಕ್ ಕೊಣ್ಯ್ ಭೆಟ್ಲೊ ನಾ.
"ಮಿಶೇಲ್! ಸ್ವೀಟ್ ಹಾರ್ಟ್!..... ರಡಾನಾಕಾ! ಆಳೆ ಹಾಂವ್ ಆಯ್ಲೊಂ ನೆ ಕಿತೆಂ ಜಾಲೆಂ" ರಾಯನಾನ್ ಮಿಶೇಲಾಕ್ ಆಪ್ಲ್ಯಾ ವೆಂಗೆಂತ್ ಘೆತ್ಲೆಂ. ತಶೆಂಚ್ ತಾಣೆಂ ಮಿಶೇಲಾಚಿ ಪಾಟ್ ಪೊಶೆಲಿ.
ಥೊಡ್ಯಾ ವೆಳಾನ್ ಮಿಶೇಲಾಕ್ ಸಮಾಧಾನ್ ಜಾಲ್ಲೆಂ ಜಾಯ್ಜಯ್ ತಾಣೆಂ ವ್ಹಳೂ ಆಪ್ಲೆಂ ರಡ್ಣೆಂ ರಾವಯ್ಲೆಂ.
ಮಿಶೆಲಾಕ್ ತಶೆಂಚ್ ಆರಾವ್ನ್ ಧರುನ್ ರಾಯನ್ ಹೆವ್ಶಿಂ ಸೋಫಾ ತೆವ್ಶಿಂ ಆಯ್ಲೊ.
"ಮಿಶೆಲ್......! ಪ್ಲೀಸ್ ಡಾರ್ಲಿಂಗ್! ಹಾಂವ್ ಹಾಂಗಾ ಆಸಾಂ!" ರಾಯನ್ ಮಿಶೇಲಾಕ್ ಭುಜಯ್ತಾಲೊ.
"ಕೋಣ್ ಶೀತಲ್.....?" ರಾಯನಾಕ್ ಆಪ್ಲೆಂ ಮಿಶೇಲ್ ಇತ್ಲೆಂ ಭಿಯೆಲ್ಲ್ಯಾಚೆಂ ಕಾರಾಣ್ ಸಮ್ಜಾಲೆಂ ನಾ.
"..........!" ಶೀತಲ್ ಫಕತ್ತ್ ರಾಯನಾಕ್ ಪಳಯ್ತಾಲೆಂ ಶಿವಾಯ್ ತಾಚ್ಯಾ ಸವಾಲಾಕ್ ಜವಾಬ್ ದೀಂವ್ಕ್ ಶೀತಲಾಕ್ ಸಾದ್ಯ್ ನಾತ್ಲ್ಲೆಂ.
"ಬಸ್ ಮಿಶೇಲ್!"
ಸೋಫಾಚ್ಯಾ ಲಾಗಿಂ ಆಯಿಲ್ಲ್ಯಾ ರಾಯನಾನ್ ಮಿಶೇಲಾ ಸೊಫಾರ್ ಬಸಯ್ಲೆಂ.
ರಾಯನಾನ್ ಮಿಶೆಲಾಕ್ ತ್ಯಾ ಸೊಫಾಚೆರ್ ಬಸಯ್ಲಾಂ ಮಾತ್ರ್!
ತಿತ್ಲ್ಯಾರ್!
ರಾಯನಾಚೆಂ ಸೆಲ್ಪೋನ್ ವ್ಹಾಜೊಂಕ್ ಲಾಗ್ಲೆಂ.
"ಆಲಿಯಾ!"
"ಹಾಂ ಆಲಿಯಾ ಸಾಂಗ್!" ರಾಯನಾನ್ ಪೋನ್ ಆನ್ ಕೆಲೆಂ.
ರಾಯನಾಕ್ ಆಲಿಯಾಚೆಂ ಪೋನ್ ಆಯಿಲ್ಲೆಂ ತೆಂ ಪಳವ್ನ್ ಶೀತಲ್ ರಾಯನಾ ತೆವ್ಶಿಂ ಘುಂವ್ಲೆಂ.
ಹ್ಯಾ ಕುಶಿನ್ ಸೊಫಾರ್ ಬಸ್ಲೆಲ್ಯಾ ಮಿಶೇಲಾನ್ ರಾಯನಾಚಾ ತೊಂಡಾ ಥಾವ್ನ್ ಆಲಿಯಾಚೆಂ ನಾಂವ್ ಆಯ್ಕೊನ್ ಎಕಾಚ್ಚಾಣೆಂ ಆಪ್ಲೆಂ ರಡ್ಣೆಂ ರಾವಯ್ಲೆಂ.
"ಹಿ.... ಹಿ ಟ್ರಾಯ್ಡ್ ಟು.... ಕಿಲ್ ಮಿ!" ಆಲಿಯಾಚಾ ತೊಂಡಾ ಥಾವ್ನ್ ಫುಟ್ಕರ್ ಉತ್ರಾಂ.
"ಆಲಿಯಾ....! ಆರ್ ಯು ಆಲ್ರೈಟ್.....?" ರಾಯನಾಕ್ ದುಬಾವ್ ಜಾಲೊ.
"ಮ್ಹಾಕಾ ಬಚಾವ್ ಕರ್ ರಾಯನ್! ಪ್ಲೀಸ್..... ರಾ....ಯನ್ ಐ ಯಾಮ್ ಡಾ.....ಡಾಯಿಂಗ್!" ಆಲಿಯಾ ಪಿಂರ್ಗಾತಾಲೆಂ.
"ಆಲಿಯಾ ತುಂ ಖಂಯ್ ಆಸಾಯ್? ಕಿತೆಂ ಜಾಲೆಂ ತುಕಾ?" ರಾಯನ್ ಸಗ್ಳೊಚ್ ಘಾಬರ್ಲೊ.
"ಪ್ಲ್ಯಾ....ಟಾಂತ್! ಇ....ಇ....ಇಕ್...ಬಾ...ಲ್ ಭಾ.....ಯಿನ್..... ಮ್ಹಾ... ಮ್ಹಾಕಾ....!"
ಇತ್ಲಿಂಚ್ ಉತ್ರಾಂ ಆಯ್ಕಾಲ್ಲಿಂ ರಾಯನಾಕ್!
ತಾಚ್ಯಾ ಪಾಟ್ಲ್ಯಾನ್ ತ್ಯಾ ಕುಶಿನ್ ಕಿತೆಂಗೀ ’ದಡ್ಡ್’ ಕರುನ್ ಧರ್ಣಿಕ್ ಶೆವ್ಟಾಲ್ಲೊ ಭಳಾಧೀಕ್ ಆವಾಜ್!
*****************
[ಫುಡೆಂ ಕಿತೆಂ ಜಾತಾ ಮ್ಹಳ್ಳೆಂ ವಾಚುಂಕ್ ರಾಕೊನ್ ರಾವಾ....]
ಕಾದಂಬರಿಕಾರಾಚಿಂ ಉತ್ರಾಂ: 1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
