ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮೆಲ್ವಿನ್ ಜೆರಾಲ್ಡ್ ವಾಸ್: ಕೆಲರಾಯ್ ಫಿರ್ಗಜೆಜೊ, ಪಾಟ್ಲ್ಯಾ ಭಾರಾ ವರ್ಸಾಂ ಥಾವ್ನ್ ಕುವೆಯ್ಟಾಂತ್ ವಾವ್ರ್ ಕರುನ್ ಆಸಾ. ಚಡುಣೆಂ ಪಂದ್ರಾ-ಸೊಳಾ ವರ್ಸಾಧಿಂ ಸಾಹಿತ್ಯಾಚಿ ಸುರ್ವಾತ್ ಕರುನ್, 35 ಮಟ್ವ್ಯೊ ಕಾಣ್ಯೊ ಆನಿ ಏಕ್ ಕಾದಂಬರಿ ಬರಯಿಲ್ಲಿ ತರ್ಯೀ ಸಭಾರ್ ವರ್ಸಾಂನಿ ತಿ ಜಿವಾಳ್ ದವ್ರುಂಕ್ ಸಕಾನಾಸ್ತಾಂ ರಾವ್ಲೊ ತರ್ಯ್ ಕೊಂಕ್ಣಿ ಸಾಹಿತ್ಯಾಚೆರ್ ತೊಚ್ಚ್ ಮೋಗ್ ಆನಿ ಹುಸ್ಕೊ ಅಸೊನ್, ಆಯ್ಲೆವಾರ್ ಸರಾಗ್ ರಿತಿನ್ ವೆವೆಗ್ಳ್ಯಾ ಪ್ರಕಾರಾಚಿ ಸಾಹಿತಿಕ್ ಕೃಷಿ ಕರುನ್ ಕೊಂಕ್ಣಿ ವರ್ತುಲಾಂತ್ ನಾಂವಾಡ್ದಿಕ್ ಜಾಲಾ. ಕಾಣ್ಯಾಂಶಿವಾಯ್ 4 ನಾಟ್ಕುಳೆ, 75 ಕವಿತಾ, 10 ಲೇಖನಾಂ, 20 ವಿಮರ್ಶೆ/ಸಮೀಕ್ಶಾ ಬರಯ್ಲ್ಯಾತ್. ಹಾಚೊ ಸ್ವತಾಚೊ ( ಫುಡ್ಲದ್) ಕವಿತಾಜಮೊ ’ಆಟ್ವ್ಯಾ ರಂಗಾಚೊ ಧೊಣು’ ವೆಗಿಂಚ್ ’ಆಶಾವಾದಿ ಪ್ರಕಾಶನ್’ ಪರ್ಗಟ್ಚಾರ್ ಆಸಾ. ಹಾಚ್ಯಾಧಿಂ ಹಾಚಿಂ ಕವಿತಾಂ/ಲೇಕನಾಂ ’ಮೊತಿಯಾಂ ಆನಿ ತಾರಾಂ’, ’ಸಾಗೊರಾಚ್ಯಾ ವಾಟೆಚ್ಯೊ ಝರಿ’, ’ಕವಿತಾಪಾಠ್’ ಆನಿ ’ದರ್ಯಾಕ್ ಉದಾಕ್’ ಬುಕಾಂನಿ ಪರ್ಗಟ್ಲ್ಯಾಂತ್. ಪಾಟ್ಲ್ಯಾ ದೋನ್ ವರ್ಸಾಂ ಥಾವ್ನ್ ದಾಯ್ಜ್.ಕೊಮ್ ಸಾಯ್ಟಿಚೊ ಸಹ-ಸಂಪಾದಕ್ಯೀ ಹೊ ಜಾವ್ನಾಸಾ.
ಭ್ರಮಿದೆಂತ್ಲ್ಯೊ ಸಾವ್ಳ್ಯೊ: ಏಕ್ ಸಾಮಾಜಿಕ್ ಕಾದಂಬರಿ, ಪ್ರಮುಖ್ ಜಾವ್ನ್ ತೆಗಾಂಚ್ಯಾ ತೀನ್ ರಿತಿಚಾ ಸಂಭಂಧಾಂಚೆ ಎಕಾಮೆಕಾಚೆ ಗಾಂಚ್ ಮ್ಹಣ್ಯೆತಾ. ವಾಚ್ಪ್ಯಾಂಕ್ ಸಿಂತಿಮೆಂತಾಂ, ಚಿಂತಾಪ್, ಭಗ್ಣಾಂ, ಉಮಾಳೆ ಜಾಗಂವ್ಕ್ ಜರೂರ್ ಸಕ್ತೆಲಿ ಮ್ಹಳ್ಳೊ ಮ್ಹಜೊ ಭರ್ವಸೊ.
ಪುಸ್ತಕ್ ಏಕ್
ಜಿವಿತ್ ತುಕಾ ಆಪಯ್ತಾ
ಆವಸ್ವರ್ ಏಕ್: ಮಿಶೇಲ್
ಮಿಶೇಲ್!
ಜಶೆಂ ನಾಂವ್ ತಶೆಂ ರೂಪ್. ಏಕ್ ಸುಂದರ್ ಕಲಾ ಜಶೆಂ. ಕಲಾಚೆಂ ರಚನ್ ಯಾ ತಾಚೆಂ ಮೂಳ್ ಸ್ವಾಭಾವಿಕ್ಪಣಿಂ ಅಸ್ಪಶ್ಟ್ ಪಿಂತುರಾಂಕ್ ಸ್ಪಶ್ಟತಾ ದಿಂವ್ಚಾ ವಾವ್ರಾಂತ್ ಉದೆತಾ ಜಾಲ್ಯಾರ್ಯ್ ಮಿಶೇಲ್ ತಶೆಂ ನ್ಹಯ್ ಆಸ್ಲ್ಲೆಂ.
ಮಿಶೇಲ್ ಜಲ್ಮಾ ತಾವ್ನ್ ಸೊಭಾಯೆಚಿ ಬಾವ್ಲಿ!
ಸರ್ವ್ ಸುಂದರಿ!
ಜಶೆಂ ರಾಯ್ ಕುಂವರಿ!
ರಾತಿಚಾ ವೆಳಾರ್ ಇಂಗ್ಲೆಂಡಾಚಾ ಮ್ಯಾಂಚೆಸ್ಟರ್ ಸಿಟಿಚೆ ವೀಜ್ ದಿವೆ ಮ್ಯಾಂಚೆಸ್ಟರಾಕ್ ಏಕ್ ವಿಭಿನ್ನ್ ರೂಪ್ ದೀವ್ನ್ ಸೊಭಯ್ತಾತ್ ಜಶೆಂ ಹ್ಯಾ ವೀಜ್ ದಿವ್ಯಾಂಚಾ ಉಜ್ವಾಡಾಂತ್ ಮಿಶೇಲಾಚೆಂ ಮುಖಮಳ್ಯ್ ವಿಚಿತ್ರ್ ಪ್ರಕಾಸಾನ್ ಸೊಭ್ತಾಲೆಂ.
ಮಿಶೇಲ್!
ಚಾರ್ಲ್ಸ್ ದೆ’ಕೋಸ್ತಾ ಅನಿ ವಿವಿಯಾನಾ ಲೆವಿಸ್ ಹಾಂಚಾ ಮೊಗಾಚೆಂ ಪಯ್ಲೆಂ ಫಳ್. ದೋನ್ ರಂಗ್ ಸಾಂಗಾತಾ ಮೆಳ್ತಾನಾ ತ್ಯಾ ರಂಗಾಂಚ್ಯಾ ಎಕ್ವಟಾ ಥಾವ್ನ್ ದುಸ್ರೊಚ್ ಏಕ್ ರಂಗ್ ಉಬ್ಜಾತಾ ಆನಿ ತ್ಯಾ ರಂಗಾಕ್ ಕಸಲೆಂಯ್ ನಾಂವ್ ದಿವ್ಯೆತಾ. ಆಶೆಂಚ್ ತ್ಯಾ ಮ್ಯಾಂಚೆಸ್ಟರಾಂತ್ಯ್ ದೋನ್ ರಂಗ್ ಸಾಂಗಾತಾ ಮೆಳ್ಲ್ಲೆ. ಏಕ್ ರಂಗ್ ಇಂಡಿಯಾಚಾ ಪಯ್ಶಿಲ್ಯಾ ತ್ಯಾ ಲ್ಹಾನ್ಶ್ಯಾ ಮಂಗ್ಳುರ್ಚಾ ಗಾಂವಾ ಥಾವ್ನ್ ಪುಲೊನ್ ಆಯಿಲ್ಲೊ. ಹೊಚ್ ಚಾರ್ಲ್ಸ್ ದೆ ಕೋಸ್ತಾ! ದುಸ್ರೊ ರಂಗ್ ಸ್ಕಾಟ್ಲ್ಯಾಂಡಾಚಾ ತ್ಯಾ ಡೌನ್ ಟೌನಾ ಭಾಯ್ಲ್ಯಾ ಪಾಚ್ವ್ಯಾ ಪಾಚ್ವ್ಯಾ ಪ್ರಕ್ರತೆಂತ್ಲ್ಯಾ ಸುಂದರ್ ನಿತಳ್ ಸೊಭಾಯೆಂತ್ ನ್ಹಾವ್ನ್ ಎಡಿನ್ಬರ್ಗಾಚಾ ಪಾಳ್ಣ್ಯಾಂತ್ ಧಲೊನ್ ಆಯಿಲ್ಲೊ. ತೆಂಚ್ ವಿವಿಯಾನಾ ಲೆವಿಸ್! ಹ್ಯಾ ದೊಗಾಂಯ್ಚಾ ಮೊಗಾಚೆಂ ಪ್ರತಿರೂಪ್ ಜಾವ್ನ್ ಮಿಶೇಲ್ ಜಲ್ಮಾಲ್ಲೆಂ!
"ಚಾರ್ಲ್ಸ್.....! ಹೆಂ ಕಿತ್ಲೆಂ ಸೊಭಿತ್ ದಿಸ್ತಾ! " ಆಪ್ಲ್ಯಾ ಕುಶಿಂನ್ ನಿದಾಯಿಲ್ಲ್ಯಾ ಆಪ್ಲ್ಯಾ ಬಾಳ್ಶ್ಯಾಕ್, ಮಿಶೇಲಾಕ್ ಪಳಂವ್ಚ್ಯಾ ವಿವಿಯಾನಾಚಾ ತೊಂಡಾರ್ ಕಸಲಿಗೀ ವರ್ಣುಂಕ್ ಜಾಯ್ನಾ ತಸಲಿ ಖುಶಿ ಝಳ್ಕಾತಾಲಿ.
"ಸಗ್ಳೆಂಚ್ ತುಜ್ಯಾಪರಿಂ ವಿವಿ!" ಬಾಯ್ಲೆಚ್ಯಾ ಖುಶಿಯೆಂತ್ ವಾಂಟೆಲಿ ಜಾಲ್ಲ್ಯಾ ಚಾರ್ಲ್ಸಾಚ್ಯಾ ಸಂತೊಸಾಕ್ ಮಿತ್ಮೆರ್ ನಾತ್ಲ್ಲಿ.
"ತುಂವೆಂ ಸಾಂಗ್ಲ್ಲ್ಯಾಪರಿಂಚ್ ಜಾಲೆಂ! ತುಂ ಸಾಂಗ್ತಾಲೊಯ್........, ತುಕಾ ಚೆಡುಂ ಭುರ್ಗೆಂ ಜಾಯ್ ಮ್ಹಣೊನ್? ತಶೆಂಚ್ ಜಾಲೆಂ! " ಆಪ್ಣಾಚಾ ಬಗ್ಲೆಕ್ ಬಸ್ಲೆಲ್ಯಾ, ಆಪ್ಲ್ಯಾ ಘೊವಾಚಾ ಹಾತಾಕ್ ಧರುನ್ ತಾಚ್ಯಾ ಬೊಟಾಂಕ್ ವಿವಿಯಾನಾನ್ ಪೊಶೆಲೆಂ. ತಾಚ್ಯಾ ದೆಗೆನ್ ಆವಯ್ಚ್ಯಾ ಫಾಸ್ಳೆಂತ್ಲೆಂ ಬಾಳ್ಶ್ಯೆಂ, ಭಾರೀಕ್ ಉಗ್ತೆ ಕೆಲ್ಲ್ಯಾ ಆಪ್ಲ್ಯಾ ದೊಳ್ಯಾಂನಿ, ಆಪ್ಣೆ ಜಲ್ಮ್ ಘೆತ್ಲೆಲ್ಯಾ ಸಂಸಾರಾಕ್ ಪಳೆತಾಲೆಂ. ತಾಚ್ಯಾ ದೊಳ್ಯಾಂಕ್ ಕಿತೆಂ ದಿಸ್ತಾಲೆಂ ಆನಿ ತೆಂ ಆಪ್ಲ್ಯಾ ನೆಣ್ತ್ಯಾ ಮತಿಂತ್ ಕಿತೆಂ ಸಮ್ಜಾತಾಲೆಂ ತೆಂ ಬೋವ್ಶಾ ಕೊಣಾಯ್ಕ್ಯ್ ಕಳಿತ್ ಜಾಂವ್ಚೆಂ ನ್ಹಯ್ ತರ್ಯ್, ತೆಂ ನೆಣ್ತೆಂ ಬಾಳ್ಶ್ಯೆಂ ಆಪ್ಲ್ಯಾ ತ್ಯಾ ಭಾರೀಕ್ ಬೊಟಾಂಕ್ ಮುಟಿಂತ್ ಘಟ್ ದಾಂಬುನ್ ದರುನ್, ಎಕೇಕ್ ಪಾವ್ಟಿಂ ತೆಂ ಆಪ್ಲ್ಯಾ ದೊಳ್ಯಾಂಕ್ ಘೆಶ್ಟಿತಾಲೆಂ. ಭುರ್ಗ್ಯಾಕ್ ತರ್ಯ್ ಹೊ ತಾಚೊ ಸಂಸಾರ್ ತಾಕಾ ಏಕ್ ನವೆಂಸಾಂವ್. ತ್ಯಾ ತಾಚ್ಯಾ ಅವಯ್ಚಾ ಗರ್ಬಾಂತ್ಲ್ಯಾ, ತ್ಯಾ ಆದ್ಲ್ಯಾ ಸಂಸಾರಾಂತ್ ಸಗ್ಳೆಂ ತಾಚ್ಯಾ ತಾಬೆಂತ್ ಆಸ್ಲ್ಲೆಂ ಜಾಲ್ಯಾರ್ಯ್, ಥಂಯ್ಚರ್ ತಾಚ್ಯಾ ದೊಳ್ಯಾಂಕ್ ಮಾತ್ರ್ ಕಾಂಯ್ ದಿಸಾನಾತ್ಲ್ಲೆಂ. ಪುಣ್ ತ್ಯಾ ಗರ್ಬಾಂತ್ ತೆಂ ಸಗ್ಳೆಂ ಅನುಭವಿಸುಂಕ್ ಸಕ್ತಾಲೆಂ. ಗರ್ಬಾ ಭಾಯ್ಲ್ಯಾ ಸಂಸಾರಾ ಥಾವ್ನ್ ತಾಚ್ಯಾ ಆವಯ್ನ್ ಉಲವ್ಚೊ ತಾಳೊ, ತಿಚೊ ಸಂತೊಸ್, ತಿಚ್ಯೊ ಹಾಸೊ, ತಿಚ್ಯಾ ಮತಿಚಿ ಧಾಧೊಸ್ಕಾಯ್, ತಿಚೆ ಕಶ್ಟ್, ತಿಚಿಂ ದುಖಾಂ...! ಸಗ್ಳೆಂಚ್!
ಗರ್ಭಾಂತ್ಲೆಂ ಭುರ್ಗೆಂ ಆಪ್ಲ್ಯಾ ಜಿವಾಕ್ ಜೀವ್ ದಿಂವ್ಚ್ಯಾ ತಾಚ್ಯಾ ಆವಯ್ಚ್ಯಾ ಕುಡಿ ಮನಾಂತ್ ಆನಿ ಕಾಳ್ಜಾಂತ್ ಜಾಂವ್ಚ್ಯಾ ಹರ್ಯೇಕ್ ಸಂಗ್ತಿಂಕ್ ಅನುಭವಿಸುಂಕ್ ಸಕ್ತಾ. ತಶೆಂ ಮಿಶೇಲ್....! ಆವಯ್ಚಾ ಗರ್ಭಾಂತ್ ತಾಣೆಂ ಭಾಯ್ಲ್ಯಾ ಸಂಸಾರಾಕ್ ಫಕತ್ತ್ ಅನುಭವಿಸಿಲ್ಲೆಂ. ಭಾಯ್ಲೊ ಸಂಸಾರ್ ತೊ ಕಸೊ ಆಸಾ ತೆಂ ತಾಕಾ ಕಳಿತ್ ನಾತ್ಲ್ಲೆಂ. ಆವಯ್ಚಾ ಮತಿಂತ್ ವ್ಹಾಳ್ಚಿಂ ಚಿಂತ್ನಾಂ ಆನಿ ಹ್ಯಾ ಚಿಂತ್ನಾಂಕ್ ಸಾಂಗಾತ್ ದೀವ್ನ್ ತ್ಯಾ ಆವಯ್ಚ್ಯಾ ಜಿವಿತಾ ಸವೆಂ ಸ್ಪಂದನ್ ಕರ್ಚೆ ಪಂಚ್ತತ್ವ್, ಆವಯ್ಚಾ ಗರ್ಭಾಂತ್ ಕಿರ್ಲೊನ್ ಯೆಂವ್ಚಾ ನವ್ಯಾ ಜಿವಿಚಿ ಮತ್ ವಿಕಾಸ್ ಜಾಂವ್ಕ್ ಎಕಾಮೆಕಾ ಕಾರಾಣ್ ಜಾತಾತ್. ಹ್ಯಾ ಕಾರಾಣಾಂತರಾಕ್ ಹೊಂದೊನ್ ತ್ಯಾ ಗರ್ಭಾಂತ್ ವಾಡ್ಚ್ಯಾ ಭುರ್ಗ್ಯಾಚಿ ಮತ್ ವಿಕಾಸ್ ಜಾತಾ. ತಶೆಂ ಮಿಶೇಲ್.....!
ವಿವಿಯಾನಾಚಾ ಗರ್ಬಾಂತ್ ಮಿಶೇಲ್ ಆಪ್ಲ್ಯಾ ಕುಡಿಚಾ ಅನಿ ಮತಿಚಾ ರೂಪಾಂತ್ ವಿಕಾಸ್ ಜಾವ್ನ್ ಯೆತಾಲೆಂ. ತಾಚ್ಯಾ ಆವಯ್-ಬಾಪಾಯ್ಚಾ ಭೋವ್ ಸುಂದರ್ ಉಲವ್ಣ್ಯಾಕ್ ಆನಿ ಮೊಗಾ ಮಯ್ಪಾಸಾಕ್ ತೆಂ ಆಪ್ಲ್ಯಾ ಆವಯ್ಚ್ಯಾ ಗರ್ಬಾಂತ್, ಭಿತರ್ಲ್ಯಾ ಭಿತರ್ಚ್ ಸ್ಪಂದನ್ ಕರ್ತಾಲೆಂ. ಹ್ಯಾ ಸ್ಪಂದನಾಕ್ ತೆಂ ಆತಾಂ ತಾಚ್ಯಾ ಜಲ್ಮಾ ಉಪ್ರಾಂತ್ ಖುದ್ಧ್ ಆಪ್ಲ್ಯಾ ದೊಳ್ಯಾಂನಿ ಪಳಂವ್ಕ್ ಸಕ್ತಾಲೆಂ....!
ಜಿವಿತಾಂತ್ ಪಯ್ಲೆ ಪಾವ್ಟಿಂ ಆವಯ್-ಬಾಪಯ್ ಜಾಂವ್ಚೊ ನವೊ ಆನ್ಭೋಗ್ ವಿವಿಯಾನಾಕ್ ಆನಿ ಚಾರ್ಲ್ಸಕ್ ತಾಂಕಾ ತಾಂಚಾ ಪ್ರಸ್ತುತ್ ಸಂಸಾರಾ ಥಾವ್ನ್ ಭಾಯ್ರ್ ಹಾಡವ್ನ್, ತಾಂಕಾ ನವ್ಯಾಚ್ ಎಕಾ ಸಪ್ಣಾಂಚಾ ಸಮ್ದಿರಾಂತ್ ಧಲಾಯ್ತಾಲೊ. ಹೊ ನವೊ ಆನ್ಭೋಗ್ ತಾಂಚಾ ಜಿವಿತಾಂತ್, ಎಕಾ ರಿತಿಚಾ ನವ್ಯಾಚ್ ವಿಚಿತ್ರ್ ಸುಖಾಕ್ ಹಾಡುನ್ ಆಯಿಲ್ಲೊ. ಜಿವಿತಾಂತ್ ಮೆಳ್ಚೆ ಆನ್ಭೋಗ್ ಸಭಾರ್ ರಿತಿಚಾ ಸುಖಾಕ್ ಆನಿ ದುಖಾಕ್ ಘೆವ್ನ್ ವ್ಹಾಳೊನ್ ಯೆತಾತ್. ಆಶೆಂ ವ್ಹಾಳೊನ್ ಯೆತಾನಾ ಹ್ಯಾ ಆನ್ಭೋಗಾನ್ ದಿಂವ್ಚೊ ತೊ ಎಕೇಕ್ ಅನುಭವ್ ಜಿವಿತಾಚಾ ವಾಟೆರ್ ಜಿಣ್ಯೇಕ್ ಸೊಭಂವ್ಕ್ ಆನಿ ಜಿವಿತಾಕ್ ಸುಂರ್ಗಾರಾಂವ್ಕ್ ಕುಮಕ್ ಕರ್ತಾ. ಜಶೆಂ ಆಜ್ ಹ್ಯಾ ಆಯ್ಚ್ಯಾ ರಾತಿಚ್ಯಾ ವಗ್ತಾರ್, ಹೆಂ ಮ್ಯಾಂಚೆಸ್ಟರ್ ಶ್ಹೆರ್ ರಂಗ್ ರಂಗೀನ್ ವೀಜ್ ದಿವ್ಯಾನಿಂ ಸೊಭ್ತಾ!
ವಿವಿಯಾನಾಕ್ ಆನಿ ಚಾರ್ಲ್ಸಾಕ್, ತಾಂಕಾಂ ಜಾಲ್ಲೊ ಹೊ ತಾಂಚೊ ಪಯ್ಲೊ ಆನ್ಭೋಗ್, ತಾಂಕಾ ತಾಂಚಾ ಚಾಲ್ತ್ಯಾ ಜಿಣ್ಯೆಚಾ ಪಾನಾನಿಂ ನವಿಂ ನವಿಂ ಸುಂದರ್ ಸಪ್ಣಾಂ ಘೆವ್ನ್ ಆಯಿಲ್ಲೊ.
ಮಿಶೇಲ್ ಆಪ್ಲ್ಯಾ ಆವಯ್ಚಾ ಪೊಟಾಂತ್ ಆಸ್ತಾನಾ ಚಾರ್ಲ್ಸಾನ್ ಪಳೆಲ್ಲಿಂ ತಿಂ ಸಪ್ಣಾಂ ಆಜ್ ನಿಜಾಯ್ಕ್ಯ್ ಸತ್ ಜಾಲ್ಯಾಂತ್ ತಶೆಂ ತಾಕಾ ಭೊಗ್ತಾಲೆಂ.
ಪುಣ್ ತ್ಯಾ ಪಯ್ಲೆಂ.......?
ಮಿಶೇಲ್ ಜಲ್ಮೊಂಚಾ ಪಯ್ಲೆಂ.....?
*************
ವಿವಿಯಾನಾಕ್ ಆಪ್ಣೆಂಚ್ ಜಲ್ಮ್ ದಿಲ್ಲ್ಯಾ ಭುರ್ಗ್ಯಾಪರಿಂ ವಾಡವ್ನ್, ಆಪ್ಲ್ಯಾ ಕುಟ್ಮಾಚೊ ತೆಂ ಏಕ್ ವಾಂಟೊ ಮ್ಹಳ್ಳ್ಯಾಪರಿಂ ತಾಕಾ ಆಪ್ಣಾ ಸವೆಂ ಘೆವ್ನ್, ಕ್ಯಾಥರೀನ್ ಹ್ಯಾ ಮ್ಯಾಂಚೆಸ್ಟರಾಕ್ ಯೆತಾನಾ, ಜಿವಿತಾಂತ್ ಪಯ್ಲೆ ಪಾವ್ಟಿಂ ಪಳೆಲ್ಲ್ಯಾ ಹ್ಯಾ ಇತ್ಲ್ಯಾ ವ್ಹಡ್ಲ್ಯಾ ಶ್ಹೆರಾಚಾ ಸೊಭಾಯೆಕ್ ಪಳವ್ನ್ ವಿವಿಯಾನಾ ಶಿರಿಂ ಚುಕ್ಲ್ಲೆಂ. ಕ್ಯಾಥರೀನ್ ಮ್ಯಾಂಚೆಸ್ಟರಾಕ್ ಯೇಂವ್ಕ್ ಏಕ್ ಕಾರಾಣ್ ಆಸ್ಲ್ಲೆಂ. ಕ್ಯಾಥರೀನಾಚೊ ಘೊವ್ ಸೈಮನ್ ಪಬ್ಲಿಕ್ ಅಥೋರಿಟಿ ಡಿಪಾರ್ಟ್ಮೆಂಟಾಂತ್ ಪಯ್ಲೆಂ ಲಿವರ್ಪೂಲಾಂತ್ ಕಾಮ್ ಕರ್ತಾಲೊ. ದೋನ್ ವರ್ಸಾಂ ಲಿವರ್ಪೂಲಾಂತ್ ಕಾಮ್ ಕೆಲ್ಲ್ಯಾ ತಾಕಾ ತಾಚೆಂ ಕಾಮ್ ಕಿತ್ಯಾಕ್ಗೀ ಪಸಂದ್ ಜಾಂವ್ಕ್ ನಾಂ. ಹಾಕಾ ಏಕ್ ಕಾರಾಣ್ ಹೆಂಯ್ ಜಾಂವ್ಕ್ ಸಕ್ತಾ ಕೀ ಹ್ಯಾರಿಸನ್ ತಾಚೊ ಎಕ್ಸಿಕ್ಯೂಟಿವ್ ಮ್ಯಾನೇಜರ್ ಸ್ವಭಾವಾ ಥಾವ್ನ್ ಕಿರಿ ಕಿರಿ ಮನಿಸ್. ಮಾತ್ಯಾರ್ ಏಕ್ಯ್ ಕೇಸ್ ನಾತ್ಲ್ಲೊ ತೊ ದೊಳ್ಯಾಂಕ್ ಕಾಳೆಂ ಗಾಗಲ್ ಘಾಲುನ್ ಆಫೀಸಾ ಭಿತರ್ ಪಾಂಯ್ ದವರಿತ್ ಜಾಲ್ಯಾರ್, ತ್ಯಾ ತಾಚಾ ಸೆಕ್ರೆಟರಿ ಸಮಂತಾ ಥಾವ್ನ್ ದರುನ್ ತಾಂಚೊ ಆಫೀಸ್ ಬಾಯ್ ಪಾಸೊನ್ ಹಾತಾ ಪಾಂಯಾಂನಿ ಕಾಂಪ್ತಾಲೊ. ಕಾನೂನಾಂತ್ ಸ್ಟ್ರಿಕ್ಟ್, ವೆಳಾಚೊ ಪಕ್ಕಾ, ಕಾಮಾಚೊ ಆಕ್ಯೂರೇಟ್ ಆನಿ ಡಿಸಿಪ್ಲೀನಾಚೊ ಗುಲಾಮ್ ತೊ ಜಾಲ್ಲ್ಯಾ ವರ್ವಿಂ ಹೆಂ ಕಾಮ್ ಮುಕಾರ್ ವರುಂಕ್ ಸೈಮನ್, ಕ್ಯಾಥರೀನಾಚಾ ಘೊವಾಕ್ ತಿತ್ಲೆಂ ಸುಲಭ್ ನ್ಹಯ್ ಮ್ಹಣೊನ್ ಕಳ್ತಾನಾ ತಾಣೆಂ ಲಿವರ್ಪೂಲಾ ಥಾವ್ನ್ ಲಾಗಿಂಚ್ ಆಸ್ಚಾ ಮ್ಯಾಂಚೆಸ್ಟರಾಕ್ ವೆಚೆಂ ಚಿಂತ್ಲೆಂ.
ಹೆಂ ಸೈಮನಾಚೆಂ ಪಯ್ಲೆಂ ಚಿಂತಾಪ್ ಕಾಂಯ್ ನ್ಹಯ್. ಲಿವರ್ಪೂಲಾಕ್ ಯೆಂವ್ಚಾ ಪಯ್ಲೆಂ ಪಾಂಚ್ ವರ್ಸಾಂ ತಾಣೆಂ ಸ್ಕಾಟ್ಲ್ಯಾಂಡಾಚಾ ಎಡಿನ್ಬರ್ಗಾಂತ್ ಕಾಡ್ಲ್ಯಾಂತ್. ತಾಚೊ ಜಲ್ಮಾ ಗಾಂವ್ ಅಬೆರ್ದೀನ್. ಪುಣ್ ಅಬೆರ್ದೀನಾಕ್ ಕ್ಯಾಥರೀನ್ ಕೆದ್ನಾಂಯ್ ಪಾವೊಂಕ್ ನಾ. ಸೈಮನಾಲಾಗಿಂ ತಾಚೆಂ ಕಾಜಾರ್ ಜಾಲ್ಲೆಂಚ್ ಎಡಿನ್ಬರ್ಗಾಂತ್!
ಎಡಿನ್ಬರ್ಗಾಂತ್ಲ್ಯಾ ಕಾಲೇಜಿಂತ್ ಶಿಕ್ತಾನಾ ಸೈಮನಾಕ್ ಆನಿ ಕ್ಯಾಥರೀನಾಕ್ ವಳಕ್ ಜಾಲ್ಲಿ. ಕಾಲೇಜಿಂತ್ ಶಿಕ್ತಾನಾಂಚ್ ಸೈಮನ್ ಆನಿ ಕ್ಯಾಥರೀನ್ ಎಕಾಮೆಕಾ ವಳ್ಕಾಲ್ಲಿಂ. ಕುಡಿಂತ್ ಆನಿ ಮನಾಂತ್ ಎಕಾಮೆಕಾ ವಳಕ್ ಜಾವ್ನ್, ಉಪ್ರಾಂತ್ಚ್ ದೊಗಾಂಯ್ಕ್ಯ್ ಆಮಿ ಎಕಾಮೆಕಾ ಲಗ್ನ್ ಜಾವ್ನ್ ಜಿವಿತ್ ಸಾರುಂಕ್ ಸಕ್ತಾಂವ್ ಮ್ಹಳ್ಳೊ ಭರ್ವಸೊ ಉದೆಲ್ಯಾ ಉಪ್ರಾಂತ್ ತಿಂ ಲಗ್ನ್ ಜಾಲ್ಲಿಂ. ಎಕಾದಾ ವೆಳಾರ್ ಕುಡಿ ಮನಾಂತ್ ಎಕಾಮೆಕಾ ವಳ್ಕೊನ್ಯ್ ಕಾಜಾರಿ ಜಿವಿತಾಕ್ ಜರ್ ತರ್ ತಿಂ ರಾಜಿ ಜಾಯ್ನಾಂತ್ ಜಾಲ್ಯಾರ್ ತಾಂತು ಕಾಂಯ್ ವಾಯ್ಟ್ಯ್ ನಾತ್ಲ್ಲೆಂ. ಹಿ ತಾಂಚಿ, ತಾಣಿಂ ಜಿಯೆಂವ್ಚಿ ಸಮಾಜ್. ಹ್ಯಾ ಸಮಾಜೆಂತ್ ಎಕಮೆಕಾ ಜಾಣಾಂ ಜಾಂವ್ಚೆಂ ಪಯ್ಲೆಂ ಆನಿ ಎಕಾಮೆಕಾ ದೀಸ್ ಕಾಡ್ಚೆ ಉಪ್ರಾಂತ್!
ವಿವಿಯಾನಾಚೆಂ ಆವಯ್ ಲಾರಾ! ಕಾಲೇಜಿಂತ್ ಶಿಕ್ಚ್ಯಾ ವೆಳಾರ್ ಥಾವ್ನ್ ಕ್ಯಾಥರೀನಾಚೆಂ ಚಡ್ ಲಾಗ್ಶಿಲೆಂ ಇಶ್ಟಿಣ್. ಕಾಲೇಜಿಂತ್ ತಿಂ ದೊಗಾಂಯ್ ಸಾಂಗಾತಾ ಶಿಕ್ತಾಲಿಂ. ಕ್ಯಾಥರೀನ್ ತರ್ಯ್ ಸೈಮನಾ ಸಂಗಿಂ ಮಾತ್ರ್ ಚಡ್ ಲಾಗಿಂ ಆಸ್ಲ್ಲೆಂ ಜಾಲ್ಯಾರ್ ಲಾರಾಕ್ ಕೋಣ್ ಲಾಗಿಂ ಆನಿ ಕೋಣ್ ಪಯ್ಸ್ ಮ್ಹಣೊನ್ ನಾತ್ಲ್ಲೆಂ. ಲಾರಾ ಪಳಂವ್ಕ್ ಸೊಭಾಯೆಚೆಂ ಸೊಭಿತ್ ಫುಲ್ಲ್ಲೆಂ ಫುಲ್! ಸಾಕಾಳಿಂಚಾ ವೆಳಾರ್ ತಾಕಾ ಪಳೆತಾನಾ, ಹ್ಯಾ ಎಡಿನ್ಬರ್ಗಾಕ್ ಉಜ್ವಾಡ್ ದೀಂವ್ಕ್ ತ್ಯಾ ದರ್ಯಾ ಮದ್ಲ್ಯಾನ್ ಉಟೊನ್ ಯೆಂವ್ಚಾ ಸುರ್ಯಾಪರಿಂ ಲಾರಾ ಗೊರೆಂ ಗೊರೆಂ ದಿಸ್ತಾಲೆಂ ಜಾಲ್ಯಾರ್, ಸಾಂಜೆರ್, ತ್ಯಾ ಇರ್ವಿನಾಚಾ ದರ್ಯಾ ತಡಿರ್ ಬಸೊನ್ ಮುಖ್ಲ್ಯಾ ತ್ಯಾ ಕ್ಯಾಂಪ್ಬೆಲ್ ಟೌನಾಂತ್ ಬುಡ್ಚ್ಯಾ ಸುರ್ಯಾಕ್ ಪಳೆತಾನಾ, ಸುರ್ಯಾಚಾ ತ್ಯಾ ತಾಂಬ್ಶ್ಯಾ ವರ್ಣಾಳ್ ಕಿರ್ಣಾಂಕ್ ಲಾಗೊನ್, ತ್ಯಾ ಕ್ಯಾಂಪ್ಬೆಲ್ ಟೌನಾಚಾ ಆನಿ ಇರ್ವಿನಾಚಾ ಮಧ್ಲೊ ತೊ ಭಿತರ್ಲೊ ದರ್ಯೊ ತಾಂಬ್ಸಾಣೆಂತ್ ಉಪ್ಯೆತಾನಾ ತೆಂ ದರ್ಯಾ ಉದಾಕ್ ಭಾಂಗ್ರಾಳೆಂ ದಿಸ್ತಾಲೆಂ ತಶೆಂ, ಲಾರಾಚಾ ಗೊರ್ಶ್ಯಾ ಗೊರ್ಶ್ಯಾ ಮುಖಮಳಾ ವಯ್ಲೆ ತೆ ಬಾಂಗ್ರಾಳೆ ಕೇಸ್ ತಾಚ್ಯಾ ಕುಡಿಕ್ ತಿಚ್ಚ್ ಭಾಂಗ್ರಾಳಿ ಸೊಭಾಯ್ ದಿತಾಲೆ. ತಶೆಂಚ್ ತಾಚೆ ತೆ ಆರ್ಶ್ಯಾ ಸಾರ್ಕ್ಯಾಚೆ ದೊಳೆ!
ಲಾರಾ ಆನಿ ಚೆಡೆ ಮ್ಹಳ್ಯಾರ್ ಕಾಂಯ್ ವಿಶೇಶ್ ನ್ಹಯ್. ತಶೆಂಯ್ ಲಾರಾ ಕಾಂಯ್ ಹ್ಯಾ ದರ್ಯಾ ವೆಳೆಚಿ ರೇಂವ್ ನ್ಹಯ್ ಆಸ್ಲ್ಲೆಂ. ಜ್ಯಾ ರೇಂವೆಂತ್ ಕಿತ್ಲೇಂಯ್ ಉದಾಕ್ ವೊತ್ಲೆಂ ತಿತ್ಲೆಂಯ್ ಜಿರೊನ್ ಘೆಲೆಂ ಮ್ಹಳ್ಳ್ಯಾ ಪರಿಂ. ಲಾರಾಕ್ ಆಪ್ಲ್ಯಾ ಸೆಕೆಂಡರಿ ಇಸ್ಕೊಲಾಚಾ ವೆಳಾರ್ಚ್ ಜೊನಾತಾನಾಚಿ ವಳಕ್ ಜಾಲ್ಲಿ. ಜೊನಾತಾನ್ ತರೀ ಪೊಲೀಸ್ ಆಫೀಸಾರಾಚೊ ಪೂತ್. ತಾಚ್ಯೆಲಾಗಿಂ ಪಯ್ಶೆಯ್ ಆಸ್ಲ್ಲೆ ತಶೆಂ ತಾಚಿ ಸವಯ್ಯ್ ತಶಿಚ್ ಆಸ್ಲ್ಲಿ. ಆಪ್ಲ್ಯಾ ಚಾಲಾಕೆಚಾ ಉಲೊಣ್ಯಾನ್ ತಾಣೆಂ ಲಾರಾಕ್ ಪಿಶೆಂ ಕೆಲ್ಲೆಂ. ಜೊನಾತಾನಾಚಾ, ತ್ಯಾ ತಾಚ್ಯಾ ಖಂಯ್ಚಾಯ್ ಚೆಡ್ವಾಕ್ ಪಿಶೆಂ ಕರ್ಚ್ಯಾ ಉತ್ರಾಂಕ್ ಭುಲೊನ್, ಲಾರಾ, ಆಪ್ಲ್ಯಾ ಜಿವಿತಾಚಾ ತ್ಯಾ ತರ್ನಾಟ್ಪಣಾಕ್ ಪಾಂಯ್ ದವರ್ಲ್ಲ್ಯಾ ಪಯ್ಲ್ಯಾ ವರ್ಸಾಚ್ ಜೊನಾತಾನಾಚೆಂ ಜಾಲ್ಲೆಂ. ಆಪ್ಲ್ಯಾ ತೆರಾ ವರ್ಸಾಂಚಾ ಪ್ರಾಯೆರ್ಚ್ ಲಾರಾ ಎಕಾ ಚಲ್ಯಾಕ್ ಜಾಣಾಂ ಜಾಲ್ಲೆಂ.
ಪುಣ್ ಹೆಂ ಎಕಾ ವರ್ಸಾ ಖಾತಿರ್ ಮಾತ್ರ್ ಉರ್ಲೆಂ. ಆಟ್ವ್ಯಾ ಕ್ಲಾಸಿ ಥಾವ್ನ್ ಲಾರಾ ನೊವ್ಯಾ ಕ್ಲಾಸಿಕ್ ಪಾವ್ತಾನಾ ಜೊನಾತಾನಾಚಾ ಬಾವ್ಳ್ಯಾಂತ್ ಕೊಣೆಂ ಎಕ್ಲ್ಯಾ ದುಸ್ರ್ಯಾ ಚೆಡ್ವಾನ್ ಜಾಗೊ ಘೆತ್ಲೊ. ಪುಣ್ ಲಾರಾ ಥಂಯ್ ಹ್ಯಾ ಜೊನಾತಾನಾಚ್ಯಾ ಧಗ್ಯಾ ಥಾವ್ನ್ ಕಾಂಯ್ಚ್ ಬದ್ಲಾವಣ್, ಯಾ ಹ್ಯಾ ಘಡಿತಾ ಥಾವ್ನ್ ಲಾರಾಚ್ಯಾ ಜಿವಿತಾಂತ್ ಪಡೊಂಕ್ ಜಾಯ್ ಜಾಲ್ಲೊ ಪ್ರಭಾವ್ ಪಡೊಂಕ್ ನಾಂ. ಜೊನಾತಾನ್ ಲಾರಾಚಾ ಜೀವನಾ ಥಾವ್ನ್ ಪಯ್ಸ್ ಜಾತಾನಾ ಸ್ಟಾನ್ಲೀ ಲಾರಾಚಾ ಜಿವನಾಂತ್ ಆಯ್ಲೊ. ಆಶೆಂಚ್ ವರ್ಸಾಂ ಧಾಂವ್ತಾನಾ ಲಾರಾಚಾ ಜಿವಿತಾಂತ್ ಕೋಣ್ ಆಯ್ಲೆ ಆನಿ ಕೋಣ್ ಗೆಲೆ ಮ್ಹಳ್ಳೆಂ ತೆಂ ಲಾರಾಕ್ಚ್ ಕಳೊಂಕ್ ನಾಂ. ಜಿವಿತಾಂತ್ ಆಯಿಲ್ಲ್ಯಾ ದಿಸಾಂಕ್ ತಾಣೆಂ ಗಳ್ಸುಂಕ್ ಆರಂಭ್ ಕೆಲೆಂ ಶಿವಾಯ್ ತ್ಯಾ ದಿಸಾಂ ಸಾಂಗಾತಾ ಆಪ್ಣಾಕ್ ವೊಳ್ಸಾಂವ್ನ್ ಜಿವಿತಾಕ್ ಸೊಭಿತ್ ರಿತಿನ್ ಜಿಯೆಂವ್ಕ್ ತೆಂ ಶಿಕ್ಲೆಂ ನಾಂ.
ಲಾರಾನ್ ಕಾಲೇಜಿಚಾ ಮೆಟಾಂಕ್ ಪಾಂಯ್ ದವರ್ತಾನಾ ತಾಕಾ ಕ್ಯಾಥರೀನ್ ಮೆಳ್ಳೆಂ. ಕ್ಯಾಥರೀನ್ ತಾಚೆಂ ಬರೆಂ ಇಶ್ಟಿಣ್ ಜಾಲೆಂ. ಆಪಾಪ್ಲ್ಯಾ ಖಾಸ್ಗಿ ವಿಶಯಾಂತ್ಯ್ ತಾಂಚೆ ಮಧೆಂ ಚರ್ಚಾ ಜಾತಾಲಿ. ಕಾಲೇಜಿಚ್ಯಾ ತ್ಯಾ ದಿಸಾನಿಂ ಸೈಮನ್ ಕ್ಯಾಥರೀನಾಕ್ ಘೆವ್ನ್ ಖಂಯ್ಸರೀ ಪಯ್ಸ್ ಎಕ್ಸುರ್ಯಾ ಸುವಾತೆಕ್ ವಚೊನ್ ತೆಂ ಪಾಟಿಂ ಆಯ್ಲ್ಯಾ ಉಪ್ರಾಂತ್ ಸೈಮನ್ ಆನಿ ಕ್ಯಾಥರೀನಾ ಮಧೆಂ ತ್ಯಾ ತಾಂಚ್ಯಾ ಎಕ್ಸುರ್ಯಾ ಭೊಂವ್ಡೆಂತ್ ಕಿತೆಂ ಕಿತೆಂ ಜಾಲೆಂ ಆನಿ ತಾಣಿಂ ಕಿತೆಂ ಕಿತೆಂ ಕೆಲೆಂ ತೆಂ ಸಗ್ಳೆಂ ಕ್ಯಾಥರೀನ್ ಲಾರಾಕ್ ವಿವರ್ಸಿತಾಲೆಂ.
"ಹಿ ಇಸ್ ಎ ಮ್ಯಾಚೊ...!"
"ಫೋರ್ ಟಾಯ್ಮ್ಸ್..... ಯು ನೋ....... ಫೋರ್ ಟಾಯ್ಮ್ಸ್!" ಕ್ಯಾಥರೀನ್ ಆಪ್ಲ್ಯಾ ಸೈಮನಾಚಾ ಸಕತೆ ವಿಶಿಂ ಉಲಯ್ತಾನಾ ಲಾರಾ ಕಾಂಯ್ ಉಣೆಂ ನಾತ್ಲ್ಲೆಂ.
"ಯು ನೊ ಕ್ಯಾಥಿ.......! ರಿಚರ್ಡ್ಸ್..... ಮೈ ಗಾಡ್! ಹಿ ಇಸ್ ಅ ಡ್ಯಾಮ್ ಕಿಸ್ಸರ್..... ಉಫ್.... ಹಿ ಟೋಟಲ್ಲಿ ಸಕ್ಸ್ ಮಿ ಹನಿ.....!
ವ್ಹಯ್!
ಹ್ಯಾ ದೋನ್ ವರ್ಸಾಂನಿ ರಿಚರ್ಡ್ಸಾನ್ ಲಾರಾಕ್ ಬರೆಂಚ್ ಚಿಂವ್ಲ್ಲೆ. ಚಿಂವೊನ್ ಚಿಂವೊನ್ ತೆಂ ಚಿಂವೋಡ್ ಜಾತಾನಾ ರಿಚರ್ಡ್ಸ್ ದುಸ್ರ್ಯಾ ಕೊಣಾಚಾ ಪಾಟಿಕ್ ಲಾಗ್ಲ್ಲೊ. ಆನಿ ಆತಾಂ ಲಾರಾಚಾ ಜಿವಿತಾಂತ್ ಮೈಕಲ್ ಆಯ್ಲೊ. ಮೈಕೆಲಾಚೊ ಆನಿ ಲಾರಾಚೊ ಸಂಭಂಧ್ ಚಡ್ ತೇಂಪ್ ಉರ್ಲೊ ಜಾಲ್ಯಾರ್ಯ್ ಮೈಕಲಾಕ್ ಲಾರಾ ಶಿವಾಯ್ ದುಸ್ರೊ ಸಂಭಂಧ್ಯ್ ಆಸ್ಲ್ಲೊ. ಕಾಲೇಜಿಚೆಂ ಶಿಕಾಪ್ ಜಾವ್ನ್ ಲಾರಾ ಕಾಮಾಕ್ ಲಾಗ್ತಾನಾ ಮೈಕಲಾ ಸಂಗಿಂ ತಾಚೆಂ ಕಾಜಾರ್ ಜಾಲೆಂ. ಪುಣ್ ಕಾಮಾಕ್ ಸೆರ್ವಾಲ್ಲ್ಯಾ ಲಾರಾಕ್ ತಾಚ್ಯಾ ಆಫೀಸಾಂತ್ಚ್ ಕಾಮ್ ಕರ್ಚಾ ಜೇಸನಾ ಸಂಗಿಂ ಸಂಭಂಧ್ ಉಬ್ಜಾಲೊ. ಹ್ಯಾ ಸಂಭಂಧಾ ಮಧೆಂ ಲಾರಾಕ್ ಜಲ್ಮಾಲ್ಲೆಂ ವಿವಿಯಾನಾ ಕೊಣಾಚೆಂ ಭುರ್ಗೆಂ ಮ್ಹಳ್ಳೆಂ ತೆಂ ಲಾರಾಕ್ಚ್ ಕಳೊಂಕ್ ನಾಂ.
ವಿವಿಯಾನಾಕ್ ಲಾರಾನ್ ಪ್ರಸೂತ್ ಜಾಲ್ಯಾಚ್ ವರ್ಸಾ ಕ್ಯಾಥರೀನಾಚೆಂ ಕಾಜಾರ್ ಸೈಮನಾ ಲಾಗಿ ಜಾಲೆಂ. ಹ್ಯಾಚ್ ವರ್ಸಾ ಲಾರಾ ಅವ್ಚಿತ್ತ್ ಎಕಾ ಪಿಡೆಕ್ ವಳಗ್ ಜಾಲೆಂ. ತಾಕಾ ಆಪ್ಣಾಕ್ ಕಸಲಿ ಪಿಡಾ ಲಾಗ್ಲ್ಯಾ ಮಳ್ಳೆಂ ತೆಂ ಕಳಿತ್ ಜಾಲೆಂ ನಾ. ತಾಚ್ಯಾ ಕುಡಿಂತ್ ರೋಗ್ ನಿರೋಧಕ್ ಸಕತ್ ಉಣಿ ಜಾವ್ನ್ ತೆಂ ಆಪ್ಲ್ಯಾ ಕುಡಿಂತ್ ಜಾಲ್ಲ್ಯಾ ಹ್ಯಾ ಬದ್ಲಾವಣೆಕ್ ತಪಾಸುಂಕ್ ಗೆಲ್ಲ್ಯಾ ವೆಳಾರ್ ತಾಕಾ ಹೊ ವಿಶಯ್ ಕಳಿತ್ ಜಾಲೊ. ಪುಣ್ ತಾಚೆಂ ತಪಾಸಣ್ ಕೆಲ್ಲ್ಯಾಕ್ ಜಾಂವ್ ಯಾ ಕೊಣಾಯ್ಕ್ಯ್ ಹ್ಯಾ ಲಾರಾಕ್ ಧರ್ಲೆಲ್ಯಾ ಪಿಡೆಚಾ ವಿಶಿಂ ಕಳಿತ್ ಜಾಲೆಂ ನಾ. ಕೊಣಾಯ್ ಲಾಗಿಂ ಹ್ಯಾ ಪಿಡೆಚೆಂ ನಾಂವ್ ನಾತ್ಲ್ಲೆಂ. ಹ್ಯಾ ವರ್ವಿಂ ಲಾರಾಕ್ ಹಿ ಆಪ್ಣಾಕ್ ಲಾಗ್ಲ್ಲ್ಯಾ ಪಿಡೆಕ್ ಸಮ್ಜೊಂಕ್ ಸಾದ್ಯ್ ಜಾಲೆಂ ನಾ. ತಾಕಾ ವಕಾತ್ಚ್ ನಾತ್ಲ್ಲೆಂ. ವಕಾತ್ ಆನಿ ನಾಂವ್ ನಾತ್ಲ್ಲಿ ಪಿಡಾ ಆಪ್ಣಾಕ್ ಲಾಗ್ಲ್ಯಾ ಮ್ಹಣೊನ್ ತಾಕಾ ಕಳೊನ್ ಯೆತಾನಾ ಚಡ್ ವೇಳ್ ಉತ್ರಾಲ್ಲೊ. ತಾಕಾ ಹೆಂ ಕಳಿತ್ ಜಾಂವ್ಚೊ ಸಂಭವ್ಯ್ ನಾತ್ಲ್ಲೊ. ಹ್ಯಾ ವೆಳಾರ್ ಲಾರಾಕ್ ಸಂಸಾರಾನ್ ಸಾಂಡ್ಲ್ಲ್ಯಾ ಪರಿಂ ಜಾಲೆಂ. ತಾಕಾ ಕೊಣೆಂಯ್ ಸ್ವೀಕಾರ್ ಕೆಲೆಂ ನಾ. ಕೊಣಾಯ್ ಲಾಗಿಂ ಆಪ್ಲ್ಯಾ ಹ್ಯಾ ಪಿಡೆ ವಿಶಿಂ ಉಲಂವ್ಕ್ ಪಾಸೊನ್ ತಾಕಾ ಧಯ್ರ್ ನಾತ್ಲ್ಲೆಂ. ಮತಿಂತ್ ಧಯ್ರ್ ಘೆವ್ನ್, ತಾಣೆಂ ಕೊಣಾ ಕೊಣಾಲಾಗಿಂ ಆಪ್ಲ್ಯಾ ಪಿಡೆಚಾ ವಿಶಿ ತೋಂಡ್ ಉಘಡ್ಲೆಂ, ತೆ ಸಗ್ಳೆ ಲಾರಾಕ್ ಎಕ್ಸುರೆಂ ಕರುನ್ ಸೊಡುನ್ ಗೆಲೆ. ಲಾರಾಚಿ ತಪಾಸಣ್ ಕರ್ಚಿ ಸೊಡುನ್ ಲಾರಾಕ್ ಅಪ್ಡುಂಕ್ ಸಯ್ತ್ ಆಸ್ಪತ್ರೆಚೆ ಭಿಯೆಲೆ. ತಾಚ್ಯಾ ಲಾಗಿಂ ಯೇಂವ್ಕ್ ಕೊಣ್ಯ್ ತಯಾರ್ ಜಾಲೆ ನಾಂತ್! ಲಾರಾ ಸಂಪೂರ್ಣ್ ತಾಚ್ಯಾ ಸಮಾಜೆ ಥಾವ್ನ್ ಭಾಯ್ರ್ ಉರ್ಲೆಂ. ಹ್ಯಾ ವಗ್ತಾರ್ ಲಾರಾಕ್ ಜಿವಿತ್ ಮ್ಹಳ್ಯಾರ್ ಕಿತೆಂ ತೆಂ ಕಳಿತ್ ಜಾಲೆಂ. ಪುಣ್ ಲಾರಾಕ್ ಜಿವಿತ್ ಮ್ಹಳ್ಯಾರ್ ಕಿತೆಂ ಮ್ಹಣೊನ್ ಕಳ್ಚ್ಯಾ ಪಯ್ಲೆಂ ವೇಳ್ ಉತ್ರಾಲ್ಲೊ. ತೆಂ ಜಿವಿತಾ ಥಾವ್ನ್ ಮಸ್ತ್ ಪಯ್ಸ್ ಪಾವ್ಲ್ಲೆಂ. ತ್ಯಾ ಶಿವಾಯ್ ತೆಂ ಆತಾಂ ದುಸ್ರ್ಯಾ ಭುರ್ಗ್ಯಾಕ್ ಗುರ್ವಾರ್ ಜಾಲ್ಲೆಂ. ತಾಚ್ಯೆ ವಯ್ರ್ ತಿ ಪಿಡಾ ಮೈಕಲಾಕ್ಯ್ ಆಸಾ ಮ್ಹಣೊನ್ ತಾಕಾ ಕಳಿತ್ ಜಾಲೆಂ. ತಶೆಂಶ್ ಜೇಸನ್ಯ್ ಹ್ಯಾ ಪಿಡೆಕ್ ವಳಗ್ ಜಾಲೊ.
ಹ್ಯಾ ನಾಂವ್ ನಾತ್ಲೆಲ್ಯಾ ಪಿಡೆಕ್ ವಳಗ್ ಜಾಲ್ಲೊ ಮೈಕಲ್ ಸೊರ್ಯಾಚೊ ಗುಲಾಮ್ ಜಾವ್ನ್ ಏಕ್ ದೀಸ್ ಆಕ್ಸಿಡೆಂಟ್ ಜಾವ್ನ್ ಅಂತರ್ಲೊ. ಕಾಂಯ್ಚ್ ನೆಣಾಂ ಆಸ್ಲ್ಲ್ಯಾ ಬಾಳ್ಶ್ಯಾಕ್ ಆಪ್ಣಾ ಥಾವ್ನ್ ಹಿ ಪಿಡಾ ಆಪ್ಣೆ ದಾನ್ ದಿಲ್ಯಾ ಮ್ಹಣೊನ್ ಕಳ್ಲ್ಲೆಂ ಲಾರಾ ಜಿವಿತಾಂತ್ ದೆದೆಸ್ಪರ್ ಜಾಲೆಂ. ಹ್ಯಾ ವಗ್ತಾರ್ ತಾಚ್ಯೆ ಸಂಗಿಂ ಆಸ್ಲ್ಲೆಂ ಮ್ಹಳ್ಯಾರ್ ತಾಚೆಂ ಮೊಗಾಚೆಂ ಇಶ್ಟಿಣ್ ಕಾಥರೀನ್ ಮಾತ್ರ್! ಕ್ಯಾಥರೀನಾನ್ ಲಾರಾಕ್ ಸಭಾರ್ ಆಸ್ಪತ್ರೆಂಕ್ ವರುನ್ ವಕಾತ್ ಕರುಂಕ್ ಪ್ರಯತ್ನ್ ಕೆಲೆಂ. ಪುಣ್ ಕಾಂಯ್ ಫಾಯ್ದೊ ಜಾಂವ್ಕ್ ನಾಂ. ಲಾರಾಚಾ ದುಸ್ರ್ಯಾ ಭುರ್ಗ್ಯಾಕ್, ಆಂಜೆಲೀನಾಕ್ ಪಳವ್ನ್, ಲಾರಾ ಆಪ್ಣಾಕ್ಚ್ ಗುನ್ಯಾಂವ್ಕಾರ್ ಮ್ಹಣೊನ್ ಮಾಂದುನ್ ಘೆಂವ್ಕ್ ಲಾಗ್ಲೆಂ. ಆಂಜೆಲೀನಾಚಾ ನೆಣ್ತ್ಯಾ ಹಾಸ್ಯಾಂ ಮುಖಾರ್ ಲಾರಾಕ್ ತಾಚೆಂ ಮರಣ್ ದಿಸ್ತಾಲೆಂ. ತೆಂಯ್ ಆಸಲೆಂ ಮರಣ್ ಕೀ ಆಪ್ಣೆಚ್ ಜಲ್ಮಾಯಿಲ್ಲ್ಯಾ ಫಳಾಕ್ ಆಪ್ಣೆಂಚ್ ಮರಣ್ ಆಯೆರ್ ಜಾವ್ನ್ ದಿಲ್ಲ್ಯಾ ಪರಿಂ!
"ಕ್ಯಾಥಿ....?"
"ಹುಂ.... ಸಾಂಗ್!"
"ಕ್ಯಾಥಿ....!" ಲಾರಾನ್ ಆಪ್ಲ್ಯಾ ದೊಳ್ಯಾಂನಿ ದೆಂವ್ಚ್ಯಾ ದುಖಾಂಕ್ ಪುಶೆಲೆಂ.
"....ಮಾಕಾ ಆನಿ ಆಂಜೆಲೀನಾಕ್ ಕಿತೆಂಯ್ ಜಾಲ್ಯಾರೀಯ್ ತುಂ ಮಾತ್ರ್ ವಿವಿಯಾನಾಕ್ ಸಾಂಡಿನಾಕಾ. ತಾಕಾ ಹಿ ಪಿಡಾ ನಾಂ ಕ್ಯಾಥಿ! ಮೈಕಲ್ಯ್ ಮಾಕಾ ಸೊಡುನ್ ಗೆಲೊ. ಆತಾಂತಾ ಹ್ಯಾ ಹಾಡಾಂನಿಯ್ ಕಾಂಯ್ ಭಳ್ ನಾ. ಹಾಡಾಂ ಭಿತರ್ ಕಿತೆಂಗೀ ಸುಕ್ಲೆಲ್ಯಾ ಪರಿಂ ಜಾತಾ. ಕೋಣ್ಗೀ ಕಿತೆಂಗೀ ಚಿಂವ್ತಾ ಮ್ಹಳ್ಳ್ಯಾ ಪರಿಂ ಜಾತಾ. ಹ್ಯಾ ಆಂಜೆಲೀನಾಚೆಂ ಕಿತೆಂ ಜಾತೆಲೆಂ ತೆಂ ಹಾಂವ್ ನೆಣಾಂ. ಮ್ಹಜ್ಯಾ ಪಾಟ್ಲ್ಯಾನ್ ಏಕ್ ದೀಸ್ ತೆಂಯ್....!" ಲಾರಾ ಆಪ್ಲ್ಯಾ ನೆಣ್ತ್ಯಾ ಬಾಳಾಕ್ ಪಳವ್ನ್ ಹುಸ್ಕಾರ್ತಾಲೆಂ.
"ನಾ ಲಾರಾ! ಆಶೆಂ ಮ್ಹಣಾನಾಕಾ. ತುಂ ಮೊರಾನಾಂಯ್....!" ಕ್ಯಾಥರೀನ್ ಲಾರಾಕ್ ಸಮಾಧಾನ್ ಕರ್ತಾಲೆಂ.
"ಜಿವಿತ್ ಮ್ಹಳ್ಯಾರ್ ಕಿತೆಂ ಮ್ಹಣೊನ್ ಹಾಂವ್ ಆತಾಂ ಜಾಣಾಂ ಜಾಲ್ಯಾಂ. ಹಿ ಜಾಣ್ವಾಯ್ ಮಾಕಾ ಮ್ಹಜ್ಯಾ ತ್ಯಾ ತೆರಾ ವರ್ಸಾಂಚಾ ಪ್ರಾಯೆರ್ ಆಯಿಲ್ಲಿ ಜಾಲ್ಯಾರ್.....!?" ಲಾರಾ ದಿಸಾಂದೀಸ್ ದುಖಾಂ ಗಳಾಯ್ತಾಲೆಂ. ಎಕಾ ಕುಶಿಂನ್ ಮೊರೊಂಕ್ ವೆಚೆಂ ತೆಂ, ದುಸ್ರ್ಯಾ ಕುಶಿಂನ್ ಮೊರೊನ್ ಗೆಲ್ಲೊ ಮೈಕೆಲ್, ತಿಸ್ರ್ಯಾ ಕುಶಿಂನ್ ಮೊರ್ಣಾಚೆಂ ಕಾಂಯ್ಚ್ ನೆಣಾಂ ಆಸ್ಲ್ಲೆಂ ನೆಣ್ತೆಂ ಆಂಜೆಲೀನಾ, ಆನಿ ಚವ್ತ್ಯಾ ಕುಶಿಂನ್ ಲಾಂಭ್ ಜಿಣಿ ಜಿಯೆಂವ್ಕ್ ಜಾಯ್ ಆಸ್ಲ್ಲೆಂ ವಿವಿಯಾನಾ.....! ಹಿಂ ಚ್ಯಾರ್ ಕುಶಿಂಚಿ ಚ್ಯಾರ್ ಚಿಂತ್ನಾಂ, ಚ್ಯಾರ್ ಧಾರಿ ಜಾವ್ನ್ ಲಾರಾಚಾ ಕಾಳ್ಜಾಕ್ ಪಾಪ್ಸುಂಕ್
ಲಾಗ್ಲ್ಲಿಂ.
ಆಪ್ಣಾಚೆಂ ಆನಿ ಮೈಕಲಾಚೆಂ ಕಿತೆಂ ಆಸಾ ತೆಂ ಸಗ್ಳೆಂ ಲಾರಾನ್ ವಿವಿಯಾನಾಚಾ ನಾಂವಾರ್ ಕೆಲೆಂ.
ತ್ಯಾ ಎಕಾ ದಿಸಾ ಸಾಕಾಳಿಂ, ವಿವಿಯಾನಾ ನಿದೆಂತ್ಲೆಂ ಉಟ್ತಾನಾ, ಆಂಜೆಲೀನಾಕ್ ಪೊಟ್ಲುನ್ ಧರ್ಲ್ಲ್ಯಾ ಆವಯ್ಕ್ ಆನಿ ಆವಯ್ಚಾ ಫಾಸ್ಳೆಂತ್ಲ್ಯಾ ಆಪ್ಲ್ಯಾ ಭಯ್ಣಿಕ್ ತಾಣೆಂ ಆಪ್ಲ್ಯಾ ದೊಳ್ಯಾಂನಿ ನಿಮಾಣೆಂ ಪಳೆಲ್ಲೆಂ.
ದೊಗಾಂಯ್ ನಿರ್ಜೀವ್!
ಜಿಯೆವ್ನ್ಯ್ ಕಾಂಯ್ ಫಾಯ್ದ್ಯಾಕ್ ನ್ಹಯ್ ಆಸ್ಲ್ಲ್ಯೊ ನಿರ್ಜೀವ್ ಕುಡಿ!!
ಲಾರಾನ್ ಆಂಜೆಲೀನಾ ಸವೆಂ ಸಾಸ್ಣಾಚಾ ಸಾಸ್ಣಾಕ್ ಹ್ಯಾ ಸಂಸಾರಾಕ್ ಆದೇವ್ಸ್ ಮಾಗ್ಲ್ಲೊ!!!
ಲಾರಾಚಾ ಮರ್ಣಾ ಉಪ್ರಾಂತ್ ಕ್ಯಾಥರೀನಾನ್ ವಿವಿಯಾನಾಕ್ ಆಪ್ಲ್ಯಾ ಘರಾ ಹಾಡ್ಲೆಂ. ತ್ಯಾ ವೆಳಾರ್ ಕ್ರಿಸ್ಟಿನಾ, ಕ್ಯಾಥರೀನಾಕ್ ಜಲ್ಮೊನ್ ವರಸ್ಯ್ ಜಾಂವ್ಕ್ ನಾತ್ಲ್ಲೆಂ. ನೆಣ್ತ್ಯಾ ಕ್ರಿಸ್ಟಿನಾ ಸವೆಂ ಖೆಳ್ತಾನಾ, ವಿವಿಯಾನಾ ಆಪ್ಲ್ಯಾ ಭಯ್ಣಿಕ್ ವಿಸ್ರಾಲೆಂ. ನೆಣ್ತ್ಯಾ ಮತಿಕ್ ಕಾಲ್ಚೆ ದೀಸ್ ವಿಸ್ರೊಂಕ್ ಚಡ್ ಕಾಂಯ್ ಕಷ್ಟ್ ಜಾಲೆ ನಾಂತ್. ಆಶೆಂ ವಿವಿಯಾನಾ ಕ್ಯಾಥರೀನಾಚೆಂ ಧುವ್ ಮ್ಹಳ್ಳ್ಯಾಪರಿಂಚ್ ಕ್ಯಾಥರೀನಾಚಾ ಕುಟ್ಮಾಂತ್ ವಾಡೊಂಕ್ ಲಾಗ್ಲೆಂ.
ಎಡಿನ್ಬರ್ಗಾಂತ್ಚ್ ಆಪ್ಲೆಂ ಶಿಕಾಪ್ ಸಂಪಯಿಲ್ಲೆಂ ವಿವಿಯಾನಾ ಕ್ಯಾಥರೀನಾಚಾ ಕುಟಾಮ್ ಲಿವರ್ಪೂಲಾಕ್ ಯೆತಾನಾ, ತಾಂಚಾ ಸವೆಂ ತೆಂ ಲಿವರ್ಪೂಲ್ ಆಯ್ಲೆಂ. ಲಿವರ್ಪೂಲಾಕ್ ಯೆತಾನಾ ವಿವಿಯಾನಾ ನಿಜಾಯ್ಕ್ಯ್ ಹೊಕಾಲ್ ಜಾಲ್ಲೆಂ. ಆವಯ್ಚಿ ಸೊಭಾಯ್ ತಾಕಾ ಆಯಿಲ್ಲಿ ಜಾಲ್ಯಾರ್ಯ್ ಆವಯ್ಚೆ ತೆ ಕೊಣಾಯ್ಕ್ಯ್ ಪಿಶ್ಯಾರ್ ಗಾಲ್ಚೆ ಆರ್ಶ್ಯಾಚೆ ದೊಳೆ ಮಾತ್ರ್ ವಿವಿಯಾನಾಕ್ ಯೇಂವ್ಕ್ ನಾತ್ಲ್ಲೆ. ಭೋವ್ಶ್ಯಾ ತಾಚ್ಯಾ ಬಾಪಯ್ ಥಾವ್ನ್ ತಾಣೆಂ ತಾಚೆ ಹೆ ಮಾತಿಯೆ ರಂಗಾಚೆ ದೊಳೆ ಘೆತ್ಲ್ಲೆ.
ಎಡಿನ್ಬರ್ಗಾ ಥಾವ್ನ್ ಲಿವರ್ಪೂಲ್! ಆನಿ ಲಿವರ್ಪೂಲಾ ಥಾವ್ನ್ ಮ್ಯಾಂಚೆಸ್ಟರ್ ಪಾವ್ತಾನಾ ವಿವಿಯಾನಾ, ತ್ಯಾ ತ್ಯಾ ಶ್ಹೆರಾಂಚಾ ಪರಿಸರಾಕ್ ಲಾಗೊನ್ ಸಂಪೂರ್ಣ್ ಬದ್ಲಾಲ್ಲ್ಯಾ ಪರಿಂ ಜಾಲ್ಲೆಂ. ಎಡಿನ್ಬರ್ಗಾಂತ್ ತೆಂ ಪರಿಸರ್ಚ್ ದುಸ್ರೆಂ. ಎಡಿನ್ಬರ್ಗಾಂತ್ ದರ್ಯಾಚಾ ಕುಶಿಂನ್ ತಿಕ್ಕೆ ಭಾಯ್ರ್ ರಿಮೋಟ್ ಏರಿಯಾಂತ್ ಕ್ಯಾಥರೀನಾಚೆಂ ಕುಟಾಮ್ ರಾವ್ತಾಲೆಂ ತೆಂ ಪರಿಸರ್ ಸಂಪೂರ್ಣ್ ಶಾಂತ್ ಪರಿಸರ್. ತಿಕ್ಕೆ ಪಯ್ಸ್ ಪಯ್ಸ್ ಘರಾಂ, ಭಾರೀಕ್ ರಸ್ತೆ, ಥೊಡ್ಯಾಚ್ ಪಯ್ಸ್ ವ್ಹಾಳ್ಚೊ ಏಕ್ ವ್ಹಾಳ್, ತ್ಯಾ ವ್ಹಳಾಕ್ ಬಾಂದ್ಲ್ಲೊ ಲ್ಹಾನ್ ಸಾಂಖೊವ್, ತ್ಯಾ ಸಾಂಖೊವಾಚಾ ಉಜ್ವ್ಯಾ ಕುಶಿಂನ್ ಥಾವ್ನ್ ಪಳೆಲ್ಲ್ಯಾರ್ ಪಯ್ಸ್ ಪಯ್ಸ್ ವರೇಗ್ ದಿಷ್ಟಿಕ್ ಪಡ್ಚೆ ಪಾತಾಳ್ ಪಾಚ್ವ್ಯಾ ತಣಾಚೆ ದೊಂಗೊರ್. ಹ್ಯಾ ದೊಂಗ್ರಾನಿಂ ಕಾಂಯ್ಚ್ ರೂಕ್ ನಾತ್ಲ್ಲೆ. ಎಕೇಕ್ ಸುವಾತೆರ್ ದಾಕ್ಟಿಂ ದಾಕ್ಟಿಂ ಝಡಾಂ ಸೊಡ್ಲ್ಯಾರ್ ದುಸ್ರೆಂ ಕಾಂಯ್ ನಾತ್ಲ್ಲೆಂ. ಹ್ಯಾ ಕುಶಿಂನ್ ಲಾಂಭ್ ಲೇನ್. ಹ್ಯಾ ಲೇನಾಂತ್ ಥಂಯ್ ಥಂಯ್ ಘರಾಂ. ತ್ಯಾ ಘರಾಂಚಾ ಭಾಯ್ರ್ ರಸ್ತ್ಯಾ ದೆಗೆನ್ ವ್ಹಡ್ ಜಾಲ್ಲೆ ರೂಕ್. ರೂಕಾಂಚಿ ಸುಕ್ಲ್ಲಿ ಖೊಲಿ ಝಡೊನ್ ಥಂಯ್ ಹಾಂಗಾ ಶಿಂಪಡ್ಲೆಲಿ ದಿಸ್ತಾಲಿ ತರ್, ಥಂಯ್ ಹಾಂಗಾ ಮ್ಹಳ್ಳ್ಯಾಪರಿಂ ಸಾಂಜೆಚಾ ವೆಳಾರ್ ಸೈಕಲಾರ್ ಭೊಂವ್ಡಿ ಮಾರ್ಚಿಂ ಭುರ್ಗಿಂ ದಿಸೊನ್ ಯೆತಾಲಿಂ. ಎಡಿನ್ಬರ್ಗ್ ಪ್ರಕ್ರತೆಚಾ ಸೊಭಾಯೆಕ್ ವೆಂಗುನ್ ರಾವ್ಲ್ಲೆಂ ಶ್ಹೆರ್. ಹ್ಯಾಚ್ ಪಾಚ್ವ್ಯಾಪಣಾಂತ್, ಹ್ಯಾಚ್ ಪ್ರಕ್ರತೆಚಾ ಸೊಭಾಯೆಂತ್, ಹ್ಯಾಚ್ ಮೌನ್ ವಾತಾವರಣಾಂತ್, ಆಪ್ಲ್ಯಾ ಭುರ್ಗ್ಯ್ಯಾಪಣಾಕ್ ಸಾರ್ಲೆಲೆಂ ವಿವಿಯಾನಾ ಆತಾಂ ಲಿವರ್ಪೂಲಾಕ್ ಯೇಂವ್ಕ್ ತಯಾರ್ ಜಾಲೆಂ. ಪೃಕೃತೆಚೊ ತೆಂ ಮೋಗ್ ಕರ್ತಾಲೆಂ ಜಾಲ್ಯಾರ್ಯ್ ಆಪ್ಣಾಕ್ ಪೊಸ್ಚಾ ಕ್ಯಾಥರೀನ್ ಆನಿ ಸೈಮನ್ ಅಂಕಲಾನ್ ಸಾಂಗ್ಲ್ಲ್ಯಾ ಪರಿಂ ವಿವಿಯಾನಾನ್ ಆಯ್ಕೊಂಕ್ ಜಾಯ್ ಆಸ್ಲ್ಲೆಂ.
ಲಿವರ್ಪೂಲಾಂತ್ ವಿವಿಯಾನಾಕ್ ಸಗ್ಳೆಂಚ್ ನವೆಂ. ಎಡಿನ್ಬರ್ಗಾಚೆಂ ವಾತಾವರಣ್ ಹಾಂಗಾಸರ್ ನಾತ್ಲ್ಲೆಂ. ಲಿವರ್ಪೂಲಾಕ್ ಯೆತಾನಾ ಕ್ಯಾಥರೀನಾನ್ ತಾಚೆಂ ಘರ್ ವಿಕುನ್ ದಿಲ್ಲೆಂ ಆನಿ ತಿಂ ಲಿವರ್ಪೂಲಾಂತ್ ಬಾಡ್ಯಾಚಾ ಘರಾಂತ್ ವಸ್ತಿ ಕರುಂಕ್ ಲಾಗ್ಲಿಂ.
ಎಡಿನ್ಬರ್ಗಾಂತ್ ಸಂಪಯಿಲ್ಲೆಂ ಶಿಕಾಪ್ ವಿವಿಯಾನಾನ್ ಆತಾಂ ಲಿವರ್ಪೂಲಾಂತ್ ಆರ್ಂಭ್ ಕೆಲೆಂ. ಪುಣ್ ಹಾಂಗಾಸರ್ ತಾಕಾ ಸಗ್ಳೆಂಚ್ ನವೆಂ ನವೆಂ. ಪ್ರಾಯೆಂತ್ ಭರೊನ್ ಯೆಂವ್ಚ್ಯಾ ವಿವಿಯಾನಾಕ್ ಪಳೆತಾನಾ ತೆಂ ಪಳಂವ್ಕ್ ತಾಚ್ಯಾ ಆವಯ್ ಲಾರಾ ಪರಿಂಚ್ ಸೊಭಿತ್ ದಿಸ್ತಾಲೆಂ ತರ್ಯ್, ಲಾರಾ ತರ್ನಾಟ್ಪಣಾರ್ ಆಸ್ತಾನಾ ಪುಡ್ಪುಡೀತ್ ಆಸ್ಲ್ಲ್ಯಾ ಪರಿಂ ವಿವಿಯಾನಾ ನಾತ್ಲ್ಲೆಂ. ಆಪ್ಲ್ಯಾ ಸೊಭಾಯೆ ವಿಶಿಂ ತೆಂ ಚಡ್ ಕಾಂಯ್ ಜತನ್ ಘೆಂವ್ಕ್ಯ್ ವಚಾನಾತ್ಲ್ಲೆಂ. ವಿವಿಯಾನಾಚೊ ಸ್ವಭಾವ್ ದುಸ್ರೊ. ಆಪ್ಣಾಚೆಂ ಕೊಣ್ಯ್ ನಾತ್ಲ್ಲ್ಯಾ ವರ್ವಿಂ ತೆಂ ಕ್ಯಾಥರೀನಾಕ್ ಆನಿ ತಾಚ್ಯಾ ಕುಟ್ಮಾಕ್ ಚಡ್ಚ್ ಲಾಗ್ಶಿಲೆಂ ಜಾಲ್ಲೆಂ. ತಾಂಚಾಚ್ ಕುಟ್ಮಾಚಾ ಸಾಂದ್ಯಾ ಪರಿಂಚ್ ಆಸ್ತಾಲೆಂ. ಕ್ಯಾಥರೀನಾಚೆಂ ಧುವ್ ಕ್ರಿಸ್ಟಿನಾ ಆನಿ ವಿವಿಯಾನಾ ಮಧೆಂ ಮಸ್ತ್ ಅಂತರ್ ಆಸ್ಲ್ಲೊ. ಕ್ರಿಸ್ಟಿನಾ ಕೆದಾಳಾಯ್ ಆವಯ್ ಲಾಗಿಂ ಝಗಡ್ತಾಲೆಂ. ಪ್ರಾಯೆನ್ ತೆ ವಿವಿಯಾನಾಚ್ಯಾಕ್ಯ್ ಲ್ಹಾನ್ ತರ್ಯ್ ತಾಚೆಂ ಚಿಂತಾಪ್ ತಾಚ್ಯಾ ಆವಯ್ಚಾ ಚಿಂತ್ಪಚ್ಯಾಕ್ಯ್ ಮೆಕ್ಳೆಂಚ್ ಆಸ್ಲ್ಲೆಂ.
ಕ್ಯಾಥರೀನಾನ್ ಲಾರಾಚಾ ಜಿವಿತಾಂತ್ ಕಿತೆಂ ಜಾಲ್ಲೆಂ ತೆ ಪಳೆಲ್ಲೆಂ. ಲಾರಾ ಆಪ್ಲ್ಯಾ ಜಿವಿತಾಚ್ಯಾ ತ್ಯಾ ನಿಮಾಣ್ಯಾ ದಿಸಾಂನಿಂ ಕಶೆಂ ದೆದೆಸ್ಪರ್ ಜಾಲ್ಲೆಂ ತೆಂ ಕ್ಯಾಥರೀನ್ ಅಜೂನ್ಯ್ ವಿಸ್ರೊಂಕ್ ನಾತ್ಲ್ಲೆಂ. ಲಾರಾ ಆಪ್ಲ್ಯಾ ಜಿವಾಕ್ ಭಿಯೆಲ್ಲೆಂ ಚೆಡುಂ ನ್ಹಯ್ ತರ್ಯ್ ಆಂಜೆಲೀನಾಚಾ ಮುಗ್ಧ್ ನಿತಳ್ ರುಪಾಕ್ ಆಪ್ಣಾಚಾ ಬೇಜವಾಬ್ದಾರಿಪಣಾ ವರ್ವಿಂ, ಆಪ್ಣಾಚಾ ಕರ್ತುಬಾಂಚೊ ಧಾಗ್ ಪಡ್ಲಾ ಆನಿ ಹ್ಯಾ ನೆಣ್ತ್ಯಾ ಬಾಳಾಚಾ ಮರ್ಣಾಕ್, ಆಪುಣ್ ಕಾರಾಣ್ ಮ್ಹಣೊನ್ ಲಾರಾಚಾ ಮತಿಕ್ ಕಳೊನ್ ಯೆತಾನಾ, ತೆಂ ಆಪ್ಲಿ ಇಶ್ಟಿಣ್ ಕ್ಯಾಥರೀನಾಚಾ ಮುಖಾರ್ ಗಳ್ಗಳ್ಯಾಂ ರಡ್ಲ್ಲೆಂ.
ಲಾರಾಚಾ ಜಿವಿತಾಂತ್ಲ್ಯಾ ತ್ಯಾ ನಿಮಾಣ್ಯಾ ದಿಸಾಂಕ್ ಪಳೆಲ್ಲೆಂ ಕ್ಯಾಥರೀನ್ ಆಪ್ಲ್ಯಾ ಧುವೆಕ್ ಜಾಗ್ರುತ್ಕಾಯ್ ಸಾಂಗ್ತಾಲೆಂ. ತಾಚ್ಯಾ ಮಸ್ತ್ಯಾಪಣಾಂಕ್ ಸುದ್ರಾಂವ್ಕ್ ಪಳೆತಾಲೆಂ. ಆಶೆಂ ಆವಯ್ ಧುವೆ ಮಧೆಂ ಕೆದಾಳಾಯ್ ಕಾಂಯ್ ನಾಂ ಕಾಂಯ್ ವಿಶಯಾಂ ಮಧೆಂ ತಕರಾರ್ ಚಲೊನ್ಚ್ ಆಸ್ತಾಲೊ. ಸೈಮನ್ ತರ್ಯ್ ಸಗ್ಳ್ಯಾ ಘರ್ಚಾ ವಿಶಯಾಂಕ್ ಆಪ್ಲ್ಯಾ ಬಾಯ್ಲೆ ವಯ್ರ್ಚ್ ಸೊಡ್ತಾಲೊ. ವಿವಿಯಾನಾ ಅನಿ ಕ್ರಿಸ್ಟಿನಾ ಮಧೆಂ ಬರೊಚ್ ಸಂಭಂಧ್ ಆಸ್ಲ್ಲೊ ಜಾಲ್ಯಾರ್ಯ್ ಕ್ರಿಸ್ಟಿನಾ ವಯ್ರ್ ತಿತ್ಲಿ ಇಷ್ಟಾಗತ್ ವಿವಿಯಾನಾಕ್ ನಾತ್ಲ್ಲಿ.
ವಿವಿಯಾನಾ, ಶಾಂತ್ ಸ್ವಭಾವಾಚೆಂ. ಕಿತೆಂಯ್ ಸಾಂಗ್ಲ್ಯಾರ್ ಆಯ್ಕೊಂವ್ಚೆಂ ಆನಿ ಚಡ್ ಜಾವ್ನ್ ಸಮ್ಜಣೆಚೆಂ ಚೆಡುಂ. ತಾಚ್ಯಾ ಪ್ರಾಯೆಚ್ಯಾಕ್ಯ್ ಚಡ್ ತಾಕಾ ಸಮ್ಜಣಿ ಆಸ್ಲ್ಲಿ. ಹೊ ತಾಚೊ ಜಲ್ಮಾಗೂಣ್? ಯಾ ಸಮಾಜೆಂತ್ ತೆಂ ಎಕ್ಸುರೆಂ ಜಾಲ್ಲ್ಯಾಚೊ ಫಳ್? ಮ್ಹಳ್ಳೆಂ ತೆಂ ಕ್ಯಾಥರೀನ್ ನೆಣಾಂ ಆಸ್ಲ್ಲೆಂ. ಪುಣ್ ಆಪ್ಲ್ಯಾ ಧುವೆಚ್ಯಾಕ್ಯ್ ಕ್ಯಾಥರೀನಾಕ್ ವಿವಿಯಾನಾಚೆರ್ ಚಡ್ ಭರ್ವಸೊ ಆಸ್ಲ್ಲೊ.
ಲಿವರ್ಪೂಲಾಚಾ ಡೌನ್ ಟೌನಾಂತ್ ವಸ್ತಿ ಕರುಂಕ್ ಆರಂಭ್ ಕೆಲ್ಲ್ಯಾ ಸಗ್ಳ್ಯಾ ಸೈಮನಾಚಾ ಕುಟ್ಮಾಕ್ ಹೆಂ ಪರಿಸರ್ ಸಗ್ಳೆಂಚ್ ನವೆಂ. ಹಾಂಗಾಸರ್ ಲಾಗಿಂ ಲಾಗಿಂ ಘರಾಂ, ಸೊಭಿತ್ ಸೊಭಿತ್ ರಸ್ತೆ, ಪುಣ್ ಎಡಿನ್ಬರ್ಗಾಚೆಂ ಪಾಚ್ವೆಂಪಣ್ ಹಾಂಗಾಸರ್ ನಾತ್ಲ್ಲೆಂ.
ಎಡಿನ್ಬರ್ಗಾಂತ್, ತ್ಯಾ ವ್ಹಾಳ್ಯಾ ವಯ್ಲ್ಯಾ ರುಕಾಟಾಚಾ ಸಾಂಖೊವಾರ್ ರಾವೊನ್, ಸಕಯ್ಲ್ ಉದ್ಕಾಂತ್ ಭೊಂವ್ಚಾ ಮಾಸ್ಳ್ಯಾಂಕ್ ಪಳವ್ನ್ ಆನಂದ್ ಭೊಗ್ಚಾ ವಿವಿಯಾನಾಕ್, ಲಿವರ್ಪೂಲಾಂತ್ ಆಪ್ಲ್ಯಾ ಇಸ್ಕೊಲಾಚಾ ಆಫಿಸಾಚಾ ದಾವ್ಯಾ ಕುಶಿಂನ್ ಆಸ್ಚಾ ವ್ಹಡ್ಲ್ಯಾ ಸಯ್ತ್ ಅಕ್ವೇರಿಯಮಾಂತ್ ಘುಂವಳ್ ಮಾರ್ಚಾ ಮಾಸ್ಳ್ಯಾಂಕ್ ಪಳವ್ನ್ ದೀಸ್ ಸಾರ್ಚೆಂ ಪಡ್ಲೆಂ.
ಲಿವರ್ಪೂಲಾಕ್ ಸಂಭಂಧ್ ಜೊಡುಂಕ್ ಸೈಮನ್ ಆನಿ ಕ್ಯಾಥರೀನ್ ಸಲ್ವಾತಾನಾ, ತಾಣಿಂ ಮ್ಯಾಂಚೆಸ್ಟರಾಕ್ ವೆಚೆಂ ಯೆವ್ಜಿಲೆಂ. ಲಿವರ್ಪೂಲಾಂತ್ ಫಕತ್ತ್ ದೋನ್ ವರ್ಸಾಂ ಮಾತ್ರ್ ತಿಂ ಕಾಡುಂಕ್ ಸಕ್ಲಿಂ.
ಮ್ಯಾಂಚೆಸ್ಟರ್ ತರ್ಯ್ ವ್ಹಡ್ಲೆಂ ಶ್ಹೆರ್. ಹ್ಯಾ ಶ್ಹೆರಾಂತ್ ಸೈಮನಾಕ್ ಸೆಟಲ್ ಜಾಂವ್ಕ್ ಕಾಂಯ್ ಕಷ್ಟ್ ಜಾಲೆ ನಾಂತ್. ಫಕತ್ತ್ ತಾಕಾ ಹ್ಯಾ ಶ್ಹೆರಾಂತ್ ಏಕ್ ಸಿರ್ವಿಸ್ ಮಾತ್ರ್ ಜಾಯ್ ಆಸ್ಲ್ಲಿ. ಸೈಮನಾಕ್ಯ್ ಎಡಿನ್ಬರ್ಗಾಂತ್ ಆನಿ ಲಿವರ್ಪೂಲಾಂತ್ ಕಾಮ್ ಕರುನ್ ಬರೊ ಆನ್ಭೋಗ್ ಆಸ್ಲ್ಲ್ಯಾನ್, ಎಕಾ ಅಟೋಮೋಬಾಯ್ಲ್ ಕಂಪೆನಿಂತ್ ತಾಕಾ ಬರೆಂಚ್ ಕಾಮ್ ಮೆಳ್ಳೆಂ.
ಅಟೋಮೋಬಾಯ್ಲ್ ಕಂಪೆನಿಂತ್ ಲಿಮಿಟಡ್ ಆಟ್ ವರಾಂ ಕಾಮ್. ತಾಚ್ಯೆ ವಯ್ರ್ ತೊ ಎಕಾ ಪ್ರೈವೇಟ್ ಟ್ರಾನ್ಸ್ಪೋರ್ಟ್ ಕಂಪೆನಿಂತ್ ರಾತಿಚಿಂ ಚ್ಯಾರ್ ವೊರಾಂ ಅಕೌಂಟಾಟಾಚಾ ಕಾಮಾಕ್ ವಚೊಂಕ್ ಲಾಗ್ಲೊ. ಹಾತಾಕ್ ಪಾಗಾರ್ಯ್ ಬರೊ ಪಡ್ತಾನಾ ತಾಂಚೆ ದೀಸ್ಯ್ ಬರ್ಯಾನ್ ವಚೊಂಕ್ ಲಾಗ್ಲೆ.
ಮ್ಯಾಂಚೆಸ್ಟರಾಂತ್ ವಿವಿಯಾನಾಕ್ ಪರ್ತ್ಯಾಕ್ ಸಗ್ಳೆಂ ನವೆಂ. ನವೆಂ ಪರಿಸರ್, ನವಿಂ ಘರಾಂ, ನವಿಂ ತೊಂಡಾಂ, ನವೆಂ ಇಸ್ಕೊಲ್, ಸಗ್ಳೆಂ ನವೆಂ ನವೆಂ. ಮ್ಯಾಂಚೆಸ್ಟರ್ ತ್ಯಾ ಎಡಿನ್ಬರ್ಗಾ ಭಾಶೆನ್ ಯಾ ಲಿವರ್ಪೂಲಾ ಭಾಶೆನ್ ನಾತ್ಲ್ಲೆಂ. ಮ್ಯಾಂಚೆಸ್ಟರಾಚಿ ನಕ್ಷಾಚ್ ದುಸ್ರ್ಯಾ ರಿತಿಚಿ. ಅತ್ತಾಂ ಪಳೆಲ್ಲೆಂ ಅತ್ತಾಂ ಪಳಂವ್ಕ್ ಮೆಳಾನಾತ್ಲ್ಲೆಂ. ವ್ಹಡ್ಲಿಂ ವ್ಹಡ್ಲಿಂ ಬಾಂದ್ಪಾಂ, ಸೊಭಿತ್ ನೀಟ್ ರಸ್ತೆ, ತ್ಯಾ ವಯ್ರ್ ಮನ್ಶ್ಯಾಂಯ್ ನಮುನ್ಯಾ ನಮುನ್ಯಾಂಚಾ ರೂಪಾಚಿಂ, ರಿತಿ ರಿವಾಜೆಚಿಂ, ಪಯ್ಶಿಲ್ಯಾ ಪಯ್ಶಿಲ್ಯಾ ಗಾಂವ್ಚಿಂ, ಎಕೇಕ್ ಎಕೇಕಾ ರೂಪಾಚಾ ಕಾತಿಚಿಂ, ದೇಶಾಚಿಂ, ಸಂಸಾರಾಂತ್ಲ್ಯಾ ಕೊನ್ಶ್ಯಾ ಕೊನ್ಶ್ಯಾಚಿಂ...... ಸಗ್ಳ್ಯಾಂಕ್ ಆಪ್ಲ್ಯಾ ಗರ್ಬಾಂತ್ ಘೆವ್ನ್ ಜಿಯೆತಾಲೆಂ ಮ್ಯಾಂಚೆಸ್ಟರ್!
ಹ್ಯಾಚ್ ಮ್ಯಾಂಚೆಸ್ಟರಾಂತ್ ಸಗ್ಳಿಂ ವ್ಹಾಡ್ತಾತ್ ತಶೆಂ ವಿವಿಯಾನಾ ವ್ಹಾಡ್ಲೆಂ. ಸಗ್ಳ್ಯಾ ಜಾತಿಚಾ ಸಗ್ಳ್ಯಾ ಕಾತಿಚಾ ಲೊಕಾಂ ಸಾಂಗಾತಾ ಮೆಳ್ಳೆಂ. ಆತಾಂ ತೆಂ ಕಾಲೇಜಿಕ್ ವಚೊಂಕ್ ಲಾಗ್ಲೆಂ. ಹ್ಯಾ ಕಾಲೇಜಿಚಾ ದಿಸಾಂನಿಂ, ಸಭಾರ್ ಚಲ್ಯಾಂನಿ ತಾಚ್ಯಾ ಸೊಭಾಯೆಕ್ ಬುಲೊನ್ ತಾಚಿ ಇಷ್ಟಾಗತ್ ಕರುಂಕ್ ಪ್ರಯತ್ನ್ ಕೆಲೆಂ ಜಾಲ್ಯಾರ್ಯ್, ಹ್ಯಾ ಪ್ರಯತ್ನಾಂತ್ ಕೊಣ್ಯ್ ಸುಫಳ್ ಜಾಲೆ ನಾಂತ್. ಹಾಕಾ ಕಾರಾಣ್, ಬೋವ್ಶ್ಯಾ ಕ್ಯಾಥರೀನಾ ಶಿವಾಯ್ ದುಸ್ರೆಂ ಕೊಣ್ಯ್ ನೆಣಾಂ ಆಸ್ಲ್ಲೊ.
ಆಪ್ಲ್ಯಾ ಆವಯ್ಕ್ ಆನಿ ಆಪ್ಲ್ಯಾ ಭಯ್ಣಿಕ್ ಕಿತೆಂ ಜಾಲ್ಲೆಂ ತೆಂ ವಿವಿಯಾನಾ ಜಾಣಾಂ ಆಸ್ಲ್ಲೆಂ ಜಾಲ್ಲ್ಯಾನ್, ಹ್ಯಾ ಸೊಭಿತ್ ಸಂಸಾರಾ ಥಾವ್ನ್ ತೆಂ ಭಾಯ್ರ್ಚ್ ಉರ್ಲೆಂ.
***************
ಮಂಗ್ಳುರ್....!
ಪಶ್ಚಿಮ್ ಕರಾವಳಿಂತ್ಲ್ಯಾ ಹ್ಯಾ ಲ್ಹಾನ್ಶ್ಯಾ ಶ್ಹೆರಾಕ್, ಪೃಕೃತೆನ್ ಆಪ್ಲ್ಯಾಚ್ ಎಕಾ ಸುರ್ಪಾಯೆಚೊ ಸೊಭಾಯೆ ಪಾಲಂವ್ ವೊಡ್ಲ್ಲೊ. ಹ್ಯಾ ಸೊಭಾಯೆಚಾ ಪಾಲ್ವಾ ಪಂದಾ ಖೆಳೊನ್ ವಾಡ್ಲ್ಲೆ, ಹ್ಯಾ ಶ್ಹೆರಾಚಾ ಸೊಭಾಯೆಕ್ ಸಂಪೂರ್ಣ್ ಥರಾನ್ ಚಾಕೊಂಕ್ ಸಕೊಂಕ್ ನಾತ್ಲ್ಲ್ಯಾಚಿ ರುಜ್ವಾತ್, ಹ್ಯಾ ಶ್ಹೆರಾಚಾ ತಾಚಾ ಮಂದ್ಗತಿಚಾ ವಾಡಾವಳಿಂತ್ ದಿಸೊನ್ ಯೆತಾಲಿ ತರ್ಯ್, ಹ್ಯಾಚ್ ಶ್ಹೆರಾಚಾ ಪಾಲ್ವಾ ಪಂದಾ ವಾಡ್ಲ್ಲೊ, ಜೆರೊಮ್ ದೆ’ಕೋಸ್ತಾ ಆಪ್ಲ್ಯಾ ಜಿವಿತಾಚಾ ನಿಸಣೆರ್ ಉಂಚಾಯೆಚಾ ಪಾಂವ್ಡ್ಯಾಕ್ ಚಡ್ಚ್ ಆತ್ರೆಗಾನ್ ಆನಿ ಭಳಾನ್ ಚಡ್ತಾಲೊ.
ಜೆರೊಮ್ ದೆ’ಕೋಸ್ತಾ ಗಾಂವಾಂತ್ ಒಮ್ಜೂರ್ಚೊ ತರ್ಯ್, ಬೆಂದೂರ್ ತಾಚೊ ವ್ಹಡ್ಲೊ ಬೊಂಗ್ಲೊ ಆನಿ ಹ್ಯಾಚ್ ಬೊಂಗ್ಲ್ಯಾಂತ್ ತಾಚಿ ಬೆಂದೂರ್ಚ್ ವಸ್ತಿ. ಒಮ್ಜೂರ್ಚಾ ಇಗರ್ಜೆಚಾ ಪಡ್ಲಾ ಕುಶಿನ್ ತಿಕ್ಕೆ ಪಯ್ಸ್ ದಿಸ್ತಾಲಿಂ ತಿಂ ತಾಚಿಂಚ್ ಶೆತಾಂ ಬಾಟಾಂ. ತಾಚ್ಯಾ ಪೂರ್ವಜಾಂ ಥಾವ್ನ್ ತಾಕಾ ಆಯಿಲ್ಲಿ ಆಸ್ತ್ ದರಬಸ್ತ್ ಆಸ್ಲ್ಲಿ. ತ್ಯಾ ವಯ್ರ್ ಹ್ಯಾ ಕುಶಿಚ್ಯಾ ರಯ್ಲಾ ಪಾಟ್ಯಾ ಪಲ್ತೊಡಿಚಿ ತಿ ಬಂಜರ್ ಸುವಾತ್. ತಾಚ್ಯಾ ಹೆಂವ್ಶಿಲ್ಯಾನ್ ದಿಸ್ಚೊ ತೊ ಲಾಂಬಾಯೆಚೊ ಗುಡೊ. ತಿ ಲಾಂಭಾಯೆಚಿ ಚಲ್ಲ್ಲ್ಯಾ ತಿತ್ಲಿ ಚಲೊನ್ ಮುಗ್ದಾನಾತ್ಲ್ಲಿ ಕಾಜ್ಚಿ ಪಾಡ್. ಜೆರೊಮ್ ಜಲ್ಮಾ ಥಾವ್ನ್ ಬಾಟ್ಕಾರ್!
ಪಯ್ಸೊ ಮಾತ್ರ್ ಪಯ್ಶಾಕ್ ವೊಡ್ತಾ ಮ್ಹಣ್ಚೆ ಪರಿಂ ಜೆರೊಮಾನ್ ಆಪ್ಲ್ಯಾ ಬುದ್ವಂತ್ಕಾಯೆನ್ ಆಪ್ಲಿ ಆಸ್ತ್ ಆನಿಕ್ಯ್ ವಾಡಯ್ಲಿ. ಹ್ಯಾ ಖಾತಿರ್ ತೊ ಹ್ಯಾ ಕರಾವಳಿಂತ್ ಬಸ್ಲೊ ನಾ. ಅಖ್ಖ್ಯಾ ಪಶ್ಚಿಮ್ ಕರಾವಳಿಕ್ ಏಕ್ ವೊಣೊದ್ ಜಾವ್ನ್ ರಾವ್ಲೆಲ್ಯಾ ತ್ಯಾ ಘಾಟಿಯೆಕ್ ತೊ ಚಡ್ಲೊ.
ಪಯ್ಲೆಂ ಪಯ್ಲೆಂ, ಲ್ಹಾನ್ ಲ್ಹಾನ್ ಕಾಫಿಯೆಚಿಂ ತೋಟಾಂ ವರ್ಸಾಚಿ ಕಾಫಿ ಕಾಡ್ಚೆ ಖಾತಿರ್ ಗೇಣಿಕ್ ಘೆತ್ಲೆಲ್ಯಾ ತಾಣೆಂ ಸವ್ಕಾಸ್ ಜಾಲ್ಲ್ಯಾ ಮುನಾಫ್ಯಾ ಥಾವ್ನ್ ಚಿಕ್ಮಂಗ್ಳುರ್ಚಾ ಬೀದರಹಳ್ಳಿಂತ್ ಬಂಜರ್ ಪಡ್ಲೆಲಿ ಸುವಾತ್ ಮೊಲಾಕ್ ಘೆವ್ನ್ ತಾಂತುಂ ಕ್ರಷಿ ಆರಂಭ್ ಕೆಲಿ.
ಥೊಡ್ಯಾಚ್ ವರ್ಸಾಂ ಭಿತರ್ ಜೆರೊಮ್ ಬಾಟ್ಕಾರ್ ಆಸ್ಲ್ಲೊ ತೊ ಘಟಾಗಾರ್ ಜಾಲೊ. ಜೆರೊಮಾನ್ ಬೀದರಹಳ್ಳಿಂತ್ ಸಾದಾರ್ಣ್ ಆಪ್ಲೆಂ ನಾಂವ್ ಘಾಜಯ್ಲೆಂ. ಪಯ್ಲೆಂ ಎಳೊ, ಕಾಫಿ, ಮಿರಿಯಾಂ, ಲಿಂಬೆ, ಮ್ಹಣ್ತಾನಾ ಲಾಗಿಂಚ್ ಬಣಕಲಾಂತ್ ಕೆಂಳ್ಬ್ಯಾ ಕ್ರಷಿ ಆರಂಭ್ ಕೆಲಿ.
ಜೆರೊಮ್ ದೆ’ಕೋಸ್ತಾಕ್ ಚ್ಯಾರ್ ಜಣಾಂ ಭುರ್ಗಿಂ. ತಾಚಿ ಬಾಯ್ಲ್ ಸ್ಟೆಲ್ಲಾ. ಫ್ರಾನ್ಸಿಸ್ ಜೆರೊಮಾಚೊ ಮಾಲ್ಗಡೊ ಪೂತ್. ತಾಚ್ಯಾ ಪಾಟ್ಲೆಂ ಜುಲಿಯಾನಾ. ಜುಲಿಯಾನಾಚಾ ಪಾಟ್ಲೆಂ ಪ್ಲಾವಿಯಾ ಆನಿ ಪ್ಲಾವಿಯಾಚಾ ಪಾಟ್ಲೊ ನಿಮಾಣೊ ಪೂತ್ ಚಾರ್ಲ್ಸ್.
ಪಾರಂಪರಿಕ್ ಆಸ್ತೆ ವರ್ವಿಂ ಜೆರೊಮಾಚಾ ಕುಟ್ಮಾಕ್ ಕಾಂಯ್ ಉಣೆಂ ನಾತ್ಲ್ಲೆಂ. ಗಾಂವ್ಭರ್ ಮರ್ಯಾದ್, ಆನಿ ನಾಂವ್ಭರ್ ಮಾನ್!. ಜೆರೊಮಾನ್ ಆಪ್ಲ್ಯಾ ಚ್ಯಾರ್ಯ್ ಭುರ್ಗ್ಯಾಂಕ್ ಬರೆಂ ಶಿಕಾಪ್ ದಿಲೆಂ. ಆಪ್ಲಿ ಮಾಂಯ್ ಭಾಸ್ ಆನಿ ಆಪ್ಲ್ಯಾ ಗಾಂವ್ ಭಾಸೆಕ್ ಸೊಡುನ್ ಜೆರೊಮಾಚಿಂ ಭುರ್ಗಿಂ ಇಂಗ್ಲೆಜ್ ಭಾಸೆಕ್
ವೆಂಗ್ಲಿಂ.
ಫ್ರಾನ್ಸಿಸ್, ಇಂಜಿನೀಯರಿಂಗ್ ಕರುನ್ ಆಸ್ಟ್ರೆಲಿಯಾ ಪಾವ್ಲೊ. ತಾಚ್ಯಾ ಪಾಟ್ಲೆಂ ಜುಲಿಯಾನಾ ತಾಚೆಂ ವಕಾಲಾತ್ ಶಿಕಾಪ್ ಶಿಕೊನ್ ಜಾತಾಚ್ ತಾಕಾ ಆಯ್ಲೆಲ್ಯಾ ನಳ್ಯಾಂಚಾ ಕಾರ್ಖಾನ್ಯಾಚಾ ಸೊಜಾಮಾಚಾ ಪುತಾಲಾಗಿಂ ಕಾಜಾರ್ ಜಾವ್ನ್ ತೆಂ ನೊವ್ರ್ಯಾ ಸಂಗಿಂ ಕೆನಡಾ ಪಾವ್ಲೆಂ. ಪ್ಲಾವಿಯಾಕ್ಯ್ ಜುಲಿಯಾನಾಚಾ ನೊವ್ರ್ಯಾಚಾ ವಳ್ಕಿಚೆರ್ಚ್ ಕೆನಡಾಚಿಚ್ ಬರಿ ಸಯ್ರಿಕ್ ಜಾತಾನಾ ಆಪ್ಲ್ಯಾ ಟೀಚರಿಚಾ ಕಾಮಾಕ್ ಸೊಡುನ್ ತೆಂ ನೊವ್ರ್ಯಾ ಸಂಗಿಂ ಕೆನಡಾಂತ್ಚ್ ವಸ್ತಿ ಕರುಂಕ್ ಲಾಗ್ಲೆಂ. ನಿಮಾಣೊ ಉರ್ಲಲೊ ಚಾರ್ಲ್ಸ್ ಇಲೆಕ್ಟ್ರೋನಿಕ್ ಇಂಜಿನೀಯರಿಂಗ್ ಪಾಸ್ ಕರುನ್ ತೊ ಇಂಗ್ಲೆಂಡಾಚಾ ಮ್ಯಾಂಚೆಸ್ಟರಾಕ್ ಪಾವ್ಲೊ.
ವಾಡಾವಳಿಕ್ ಮನಿಸ್ ಖಂಯ್ಚಾ ರೂಪಾಂತ್ ಆಶೆತಾ ತ್ಯಾಚ್ ರೂಪಾಂತ್ ತೊ ನಿಮಾಣೊ ಶೆವ್ಟಾತಾ!
ಜೆರೊಮಾಚಾ ಜಿವಿತಾಂತ್ಯ್ ಆಶೆಂಚ್ ಜಾಲೆಂ. ಧನ್ ಆನಿ ದಿರ್ವ್ಯಾಂತ್ ಜೆರೊಮ್ ಆನಿ ತಾಚೆಂ ಕುಟಾಮ್ ವಾಡ್ಲೆಂ. ಪೂಣ್ ಕುಟ್ಮಾಚೆ ಭಾಂದ್ ಎಕಾಮೆಕಾ ಘಟ್ ಕರುನ್ ಜಿವಿತ್ ಸಾರ್ಚೆ ವಿಶಿಂ ತಾಣೆಂ ಚಿಂತುಂಕ್ ನಾತ್ಲ್ಲೆಂ. ಹ್ಯಾಚ್ ಖಾತಿರ್ ಜಿವಿತಾಚಾ ನಿಮಾಣ್ಯಾ ದಿಸಾಂನಿ ಜೆರೊಮ್ ಆಪ್ಲ್ಯಾ ಭುರ್ಗ್ಯಾಂ ಥಾವ್ನ್ ಎಕ್ಸುರೊ ಜಾಲೊ. ಘರ್ಭರ್ ಭುರ್ಗ್ಯಾಂಚಾ ಪಾಂಯಾಂಚಾ ಆವಾಜಾ ಥಾವ್ನ್ ಖುಶಿ ಆಸ್ಲ್ಲೊ ಜೆರೊಮ್, ಆತಾಂ ಆಪ್ಲ್ಯಾಚ್ ಪಾಂಯಾಂಚಾ ಚಲ್ಚ್ಯಾ ಆವಾಜಾಕ್ ಆಯ್ಕಾನಾ
ಜಾಲೊ.
"ಆಮ್ಚಾ ಜಿವಿತಾಂತ್ ಆಸಲೆ ದೀಸ್ ಯೆತಿತ್ ಮ್ಹಣೊನ್ ಹಾಂವೆಂ ಚಿಂತುಂಕ್ ನಾಂ ಎಸ್ತೆಲಾ....!" ವಾಡ್ಯಾಚೊ ಗುರ್ಕಾರ್ ದಾವಿದಾಮ್ ಕಾಳಿಜ್ ರಾವೊನ್ ಮೊರ್ತಾನಾ, ದಾವಿದಾಮಾ ವಯ್ರ್ ಏಕ್ ನಿಮಾಣಿ ದೀಷ್ಟ್ ಘಾಲುನ್ ಯೆವ್ಯಾಂ ಮ್ಹಣೊನ್ ಗೆಲ್ಲೊ ಜೆರೊಮ್, ಪಾಟಿಂ ಘರಾ ಪರ್ತೊಂಚಾ ವಗ್ತಾರ್ ಆಪ್ಲ್ಯಾ ಜಿವಿತಾಚಾ ಚಿಂತ್ನಾನಿಂ ಬುಡ್ಲ್ಲೊ. ಮರ್ಣಾಚಾ ಘರಾಂತ್, ದಾವಿದಾಮಾಚಾ ಮರ್ಣಾಕ್ ನಿಯಾಳ್ ಕೆಲ್ಲ್ಯಾ ತಾಕಾ, ಮನ್ಶ್ಯಾ ಜಿವಿತಾಂತ್ಲೆಂ, ಏಕ್ ಕೊಣೇಯ್ ಚಡ್ತಾವ್ ಜಾವ್ನ್ ಚಿಂತುಕ್ ವಚಾನತ್ಲ್ಲೆಂ ಅಪುಟ್ ಸತ್ ಝಳ್ಕಾಲ್ಲೆಂ.
ಮರ್ಣಾಚಾ ಘರಾ ಥಾವ್ನ್ ಆಪ್ಲ್ಯಾ ಘರಾ ಪಾಟಿಂ ಪರ್ತೊಂಚಾ ಜೆರೊಮಾಕ್, ತಾಚ್ಯಾ ಘರಾಚ್ಯಾ ಸಗ್ಳ್ಯಾ ವಾಟೆರ್, ತಾಕಾ ಆತಾಂ ತಾಚ್ಯಾ ಪುಡಾರಾಚಿ ಖಂತ್ ದೊಸುಂಕ್ ಲಾಗ್ಲಿ. ದಾವಿದಾಮಾಕ್ ಸ ಜಣಾಂ ಭುರ್ಗಿಂ ಆಸೊನ್ಯ್ ಆಯ್ಚ್ಯಾ ಹ್ಯಾ ತಾಚ್ಯಾ ನಿಮಾಣ್ಯಾ ಘಡಿಯೆ ತಾಚ್ಯೆ ಸಂಗಿಂ ತಾಣೆಂ ಜಲ್ಮ್ ದೀವ್ನ್ ಪೊಸ್ಲ್ಲೆಂ ಕೊಣ್ಚ್ ನಾತ್ಲ್ಲೆಂ! ಬಾಯ್ಲೆಚೆ ಹುಸ್ಕಾರ್ ಆನಿ ಸುಸ್ಕಾರ್ ಸೊಡ್ಲ್ಯಾರ್ ದುಸ್ರೆಂ ಕಾಂಯ್ಚ್ ನಾ. ತರ್ ಸ ಜಣಾಂ ಭುರ್ಗಿಂ....... ?
ಆವಯ್ ಬಾಪಯ್ ಭುರ್ಗ್ಯಾಂ ಖಾತಿರ್ ಇತ್ಲೆಂ ಸಗ್ಳೆಂ ಕರ್ತಾತ್. ತಾಂಚ್ಯಾ ಜಲ್ಮಾ ಥಾವ್ನ್ ತಾಂಚ್ಯಾ ವಾಡವಳಿ ಪರ್ಯಾಂತ್ ತಾಂಕಾಂ ವಾಗಂವ್ಕ್ ಕಿತ್ಲಿ ಮ್ಹಿನತ್ ತಿಂ ಕರಿನಾಂತ್? ಆಸಲಿಂ ಭುರ್ಗಿಂ ತಾಂಚಾ ಪಾಂಯಾಂ ವಯ್ರ್ ತಿಂ ಉಭಿಂ ರಾವ್ಲಿಂ ಮ್ಹಣ್ತಾನಾ ಪುರ್ರ್ ಕರುನ್ ಉಭೊನ್ ದಾಂವ್ಚೆಂ ಕಿತ್ಲೆಂ ಸಾರ್ಕೆಂ? ಮರ್ಣಾಚಾ ಘರಾ ಥಾವ್ನ್ ಆಪ್ಲ್ಯಾ ಘರಾಕ್ ಪಾಟಿಂ ಪರ್ತೊಂಚೊ ಜೆರೊಮ್, ದಾವಿದಾಮಾ ವಿಶಿಂ ನಿಯಾಳ್ತಾಲೊ.
"ಫಾಲ್ಯಾಂ ಆಪ್ಣಾಚೆಂಯ್ ಕಾಂಯ್ ಆಶೆಂಚ್ ಜಾಯ್ತ್?" ಮತಿಂತ್ ದೊಸ್ಲ್ಲ್ಯಾ ಸವಾಲಾಕ್ ಜವಾಬ್ ಮೆಳಾನಾಸ್ತಾನಾ ಉಡ್ಡೊಂಚಾ ಜೆರೊಮಾನ್, ಘರಾ ಪಾವ್ತಚ್ ಆಪ್ಲ್ಯಾ ಬಾಯ್ಲೆ ಮುಕಾರ್, ಸುಮಾರ್ ವೆಳಾ ಥಾವ್ನ್ ಆಪ್ಲ್ಯಾ ಮತಿಂತ್ ಕಾಂತವ್ನ್ ಆಸ್ಲೆಲ್ಯಾ ಸವಾಲಾಕ್ ಉಭೆಂ ಕೆಲೆಂ. ಪುಣ್ ಜೆರೊಮಾಚಾ ಹ್ಯಾ ಸವಾಲಾ ಥಾವ್ನ್, ಎಸ್ತೆಲಾಕ್ ಜಾಲ್ಯಾರ್ಯ್ ತಿಚ್ಯಾ ಘೊವಾಚಾ ಮತಿಂತ್ ಕಿತೆಂ ಆಸಾ ಮ್ಹಳ್ಳೆಂ ತೆಂ ಕಶೆಂ ಸಮ್ಜಾತೆಲೆಂ? ಕೆದ್ನಾಂಚ್ ಆಶೆಂ ಉಲಯ್ನಾತ್ಲ್ಲೊ ತಿಚೊ ಘೊವ್, ಆಜ್ ಕಿತ್ಯಾಕ್ ಆಶೆಂ ಉಲಯ್ತಾ ತೆಂ ತಿಕಾ ಕಶೆಂ ಕಳ್ತೆಲೆಂ ? ಘೊವಾಚಾ ಹ್ಯಾ ಸವಾಲಾ ಪಾಟ್ಲೊ ಮತ್ಲಾಬ್ ಕಸಲೊ ತೊ ತಿಕಾ ಸಮ್ಜೊಂಕ್ ಕಶೆಂ
ಸಾದ್ಯ್?
ಆಪ್ಲ್ಯಾ ಘೊವಾಕ್ ಕಸಲೆ ಪಾಡ್ ದೀಸ್ ಆಯ್ಲ್ಯಾತ್ ಮ್ಹಳ್ಳೆಂ ತೆಂ
ಕಳನಾಸ್ತಾನಾ,
"ಕಿತೆಂ ಜಾಲೆಂ?" ಎಸ್ತೆಲಾನ್ ಆಪ್ಲ್ಯಾ ಘೊವಾಕ್ ಸಮ್ಜೊಂಕ್ ಪ್ರಯತ್ನ್ ಕೆಲೆಂ. ಎಕಾ ಕುಶಿನ್, ತಿಕಾ ದುಬಾವ್ಯ್
ಮಾರ್ಲೊಕೀ ಕಾಂಯ್ ಆಪ್ಲೊ ಘೊವ್ ತ್ಯಾ ಚಿಕ್ಮಂಗ್ಳುರ್ಚ್ಯಾ ಬೀದರಹಳ್ಳೆಚ್ಯಾ ಎಸ್ಟೆಟಾ ವಿಶಿಂ ಉಲಯ್ತಾ? ಜೆರೊಮಾನ್ ಆಪ್ಲಿ ಚಿಕ್ಮಂಗ್ಳುರ್ಚಿ ಎಸ್ಟೇಟ್ ವಿಕುನ್ ಸೊಡ್ಚಿ ಆಲೋಚನ್ ಕೆಲ್ಲಿ. ಆಪ್ಲ್ಯಾ ಹಾತಾನ್ ಕೆಲ್ಲೆಂ ತೆಂ, ಆಪ್ಲ್ಯಾಚ್ ಹಾತಾನ್ ವಿಕುಂಕ್ ಪಡ್ತಾ ಮ್ಹಣೊನ್, ಆಪ್ಲ್ಯಾ ಘೊವಾಕ್ ಕಾಂಯ್ ನಾ ಸಮಾಧಾನ್ ಜಾಲಾಂಗಾಯ್? ತಶೆಂಯ್ ನಾ ಸಮಧಾನ್ ಜಾಂವ್ಕ್, ಪಯ್ಶ್ಯಾಂಚಾ ಗರ್ಜೆಕ್ ಲಾಗೊನ್ ಜೆರೊಮ್ ಆಪ್ಲ್ಯಾ ತೋಟಾಕ್ ವಿಕಿನಾ, ಬಗಾರ್, ತೆಂ ಆಪ್ಣಾಕ್ ಹ್ಯಾ ಫುಡೆಂ ಸಾಂಬಾಳುಂಕ್ ಸಾದ್ಯ್ ನಾ ಮ್ಹಳ್ಳ್ಯಾ ಕಾರಾಣಾಕ್ ಲಾಗೊನ್ ವಿಕ್ತಾ. ಆಶೆಂ ಆಸ್ತಾನಾ.....! ಚಿಂತ್ಚ್ಯಾ ಎಸ್ತೆಲಾನ್, ಆಪ್ಣೆ ಘೊವಾ ಮುಕಾರ್ ದವರ್ಲೆಲ್ಯಾ ಸವಾಲಾಕ್, ಆಪ್ಲ್ಯಾ ಘೊವಾ ಥಾವ್ನ್ ಕಾಂಯ್ ಜವಾಬ್ ಯೇಂವ್ಕ್ ನಾ ತೆಂ ಕಳೊನ್,
"ಆಜ್ ತುಂ ಕಿತೆಂ ಚಿಂತ್ಚಾರ್ ಪಡ್ಲಾಯ್....? ದಾವಿದಾಮಾಚಿಂ ಭುರ್ಗಿಂ ಕೊಣ್ಯ್ ಮರ್ಣಾಕ್ ಆಯ್ಲ್ಯಾಂತ್? " ಎಸ್ತೆಲಾನ್ ದಾವಿದಾಮಾಚಾ ಮರ್ಣಾ ವಿಶಿಂ ವಿಚಾರ್ಲೆಂ.
"ಭುರ್ಗಿಂ....!? " ಜೆರೊಮಾಚಾ ನಾಕಾ ಥಾವ್ನ್ ಏಕ್ ಭರಾಧೀಕ್ ಲಾಂಭ್ ಸ್ವಾಸ್ ಭಾಯ್ರ್ ಆಯ್ಲೊ. "ಸಗ್ಳೆಂ ಬೆಷ್ಟೆಂ ಎಸ್ತೆಲಾ....! ತೆ ಕಾರ್ಮಿಣ್ ಎಕ್ಲೆಂ ಮಾತ್ರ್ ಹುಸ್ಕಾರ್ತಾ ಸೊಡ್ಲ್ಯಾರ್, ತೆಂ ಘರ್ ಮರ್ಣಾಚೆಂ ಘರ್ ಮ್ಹಣೊನ್ಚ್ ಕಳಾನಾ!" ಜೆರೊಮಾಚಾ ತಾಳ್ಯಾಂತ್ ಎಕಾ ಥರಾಚೊ ನಿರಾಸ್ ಆಸ್ಲ್ಲೊ.
"ತೆಂ ಫಿಲೊಮೆನ್ ನಾತ್ಲ್ಲೆಂ......?"
"ಸಗ್ಳಿಂ ಆಸಾತ್ ಎಸ್ತೆಲಾ....! ತಾಂಕಾಂ ತಾಂಕಾ ಗರ್ಜ್ ಆಸ್ತಾನಾ ಮಾತ್ರ್. ಭುರ್ಗಿಂ ಜಾಂವ್ ಕೋಣ್ಯ್ ಜಾಂವ್. ಆಯ್ಚಾ ದಾವಿದಾಮಾಚಿ ಗತ್ಚ್ ಫಾಲ್ಯಾಂ ಆಮ್ಚಿ ಜಾತೆಲಿ!" ಜೆರೊಮಾಚಾ ಉಲವ್ಣ್ಯಾಂತ್, ತಾಕಾ ತಾಚ್ಯಾ ಜಿವಿತಾಚಾ ಮುಕ್ಲ್ಯಾ ದಿಸಾಂಚೆಂ ಪಿಂತುರ್ ದಿಸೊಂಕ್
ಲಾಗ್ಲ್ಲೆಂ.
ಜಿಣ್ಯೆಂತ್ ಮನ್ಶ್ಯಾಚೆಂ ಮೊಲಾಧೀಕ್ ದಿರ್ವೆಂಚ್ ತಾಚಿಂ ಭುರ್ಗಿಂ. ಹ್ಯಾ ದಿರ್ವ್ಯಾಕ್ ಸಾಂಬಾಳುಂಕ್ ಮನಿಸ್ ಶಿಕಾನಾ. ಬಗಾರ್, ಸಂಸಾರಿ ದಿರ್ವ್ಯಾಕ್ ಪುಂಜಾಂವ್ಕ್ ಆನಿ ಜಮಂವ್ಕ್ ಕರ್ಚಾ ಪ್ರಯತ್ನಾಂತ್ ತೊ ಆಪ್ಲ್ಯಾ ಖರ್ಯಾ ದಿರ್ವ್ಯಾಕ್ ಹೊಗ್ಡಾಯ್ತಾ.
ಆಶೆಂಚ್ ಜಾಲೆಂ ಜೆರೊಮಾಚಾ ಜಿವಿತಾಂತ್. ಪುಡಾರಾ ಖಾತಿರ್ ಗಾಂವ್ ಸೊಡ್ಲೆಲಿಂ ಭುರ್ಗಿಂ, ತಾಂಚ್ಯಾ ಪುಡಾರಾ ಪಾಟ್ಲ್ಯಾ ಸೊಧ್ನೆಂತ್, ತಾಂಚಾ ಕುಟ್ಮಾ ಥಾವ್ನ್ ಚಡ್ ಪಯ್ಸ್ ಪಾವ್ಲಿಂ. ತಾಂಕಾಂ ತಾಂಚೊ ಪುಡಾರ್ ಮಾತ್ರ್ ಸೊಡ್ಲ್ಯಾರ್, ಆಪ್ಣಾಕ್ ಜಲ್ಮ್ ದಿಲ್ಲ್ಯಾಂಚಾ ಪುಡಾರಾಚಿ ಖಂತ್ ನಾತ್ಲ್ಲಿ.
ಆಸ್ಟ್ರೇಲಿಯಾಕ್ ಪಾವ್ಲ್ಲೊ ಜೆರೊಮಾಚೊ ಮಾಲ್ಗಡೊ ಪೂತ್ ಫ್ರಾನ್ಸಿಸ್, ಬ್ರಿಸ್ಬೇನಾಂತ್ ಸೆಟಲ್ ಜಾಲ್ಲ್ಯಾ ಎಕಾ ಈಸ್ಟ್ ಇಂಡಿಯನ್ ಕುಟ್ಮಾಂತ್ಲ್ಯಾ ಚಲಿಯೆಚಾ ಮೊಗಾರ್ ಪಡ್ಲೊ. ತಾಚೆಂ ನಾಂವ್ ತನಿಶಾ. ತನಿಶಾಚಾ ಬಾಪಾಯ್ಕ್ ಬ್ರಿಸ್ಬೇನಾಂತ್ ಪಾಸ್ಟ್ ಫುಡ್ ರೆಸ್ಟೋರ್ಂಟ್ ಆಸ್ಲ್ಲೆಂ. ತನಿಶಾಚೆಂ ಕುಟಾಮ್ ಪಯ್ಶ್ಯಾನಿಂ ಕಾಂಯ್ ಉಣೆಂ ನಾತ್ಲ್ಲೆಂ. ಪುಣ್ ಬ್ರಿಸ್ಬೇನಾಚಾ ದಿಸಾಂದೀಸ್ ಜಾಂವ್ಚಾ ವಿಶೇಷ್ ವಿಕಾಸಾಕ್ ಲಾಗೊನ್ ತನಿಶಾಚಾ ಬಾಪಾಯ್ಕ್ ಧುವೆಚಿ ಖಂತ್ ಲಾಗ್ಲ್ಲಿ. ತಾಚೆಂ ಮಾಲ್ಗಡೆಂ ಧುವ್ ಆಸ್ಟ್ರೇಲಿಯಾಂತ್ಚ್ ಕಾಜಾರ್ ಜಾಲ್ಲೆಂ ಜಾಲ್ಯಾರ್ಯ್, ಕಾಜಾರ್ ಜಾವ್ನ್ ಚ್ಯಾರ್ಚ್ ವರ್ಸಾನಿಂ ತಾಚೆಂ ಡೈವರ್ಸ್ ಜಾಲ್ಲೆಂ. ತೆಂಯ್ ತೆಂ ಬಾಳಾಂತ್ ಜಾವ್ನ್ ಸಾತ್ ಮಹಿನ್ಯಾನಿಂಚ್ ತಾಚೆಂ ಡೈವರ್ಸ್ ಜಾಲ್ಲೆಂ. ಆತಾಂ ತಾಚಿ ಇಷ್ಟಾಗಾತ್ ತಾಚ್ಯಾಚ್ ಆಫೀಸಾಂತ್ ಕಾಮ್ ಕರ್ಚಾ ಆಸ್ಟ್ರೇಲಿಯನ್ ಚಲ್ಯಾ ಲಾಗಿಂ ಆಸ್ಲ್ಲಿ.
ತನಿಶಾಕ್ ಆನಿ ಫ್ರಾನ್ಸಿಸಾಕ್ ವಳಕ್ ಜಾಲ್ಲಿ ಲೈಬ್ರರಿಂತ್. ತನಿಶಾಕ್ ಲ್ಹಾನ್ ಥಾವ್ನ್ ವಾಚ್ಚೆಂ ಮ್ಹಳ್ಯಾರ್ ಚಡ್ ಪಸಂದ್. ಫಕತ್ತ್ ಚರಿತ್ರಾಕ್ ಸೊಡುನ್ ಆಪ್ಲ್ಯಾ ಹಾತಾಕ್ ಮೆಳ್ಲ್ಲೆ ಕಸಲೆಯ್ ಬೂಕ್ ತೆಂ ವಾಚ್ತಾಲೆಂ. ಹಿಸ್ಟರಿ ಯಾ ಚರಿತ್ರಾ ಮ್ಹಳ್ಯಾರ್ ತನಿಶಾಕ್ ತಾಚ್ಯಾ ಇಸ್ಕೊಲಾಚಾ ದಿಸಾಂ ಥಾವ್ನ್ ಕಿರಿ ಕಿರಿಚೊ ವಿಶಯ್. ಮುಖ್ಯ ಜಾವ್ನ್ ತೆಂ ಅಹಿಂಸಾಕ್ ಚಡ್ ಪಾತ್ಯೆತಾಲೆಂ ಜಾಲ್ಲ್ಯಾನ್, ಆನಿ ರಾಗ್ತಾಪಾತಾಕ್ ತೆಂ ಭಿಲ್ಕುಲ್ ಪಸಂದ್ ಕರಿನಾತ್ಲ್ಲೆಂ ಜಾಲ್ಯಾನ್, ತ್ಯಾ ಚರಿತ್ರಾಚಾ ಹರ್ಯೆಕಾ ಪಾನಾರ್ ಉಮಾಳುನ್ ಯೆಂವ್ಚಾ ರೆವೆಲ್ಯೂಶನಾಕ್, ಆನಿ ತ್ಯಾ ಝುಜಾಂಕ್ ವಾಚ್ತಾನಾ, ತಾಕಾ ಮತಿ ಭಿತರ್ ಕಿತೆಂಗೀ ಪುಟ್ಲೆಲ್ಯಾ ಪರಿಂ ಜಾವ್ನ್ ತಾಚಿ ಮತ್ ದಂಡಳ್ತಾಲಿ.
"ಮನಿಸ್ ಮನ್ಶ್ಯಾಕ್ ಮಾರುನ್ ಹಿಸ್ಟರಿ ಕಿತ್ಯಾಕ್ ರಚ್ತಾ?" ತಾಚೆಂ ಹೆಂ ಎಕ್ಚ್ ಸವಾಲ್!
ಪುಣ್ ಫ್ರಾನ್ಸಿಸ್ ತನಿಶಾಕ್ ಸಗ್ಳೊಚ್ ವಿರುದ್ಧ್! ತಾಕಾ ಚರಿತ್ರಾ ವಾಚ್ಚ್ಯಾಂತ್ ಚಡ್ಚ್ ಅಭಿರುಚಿ. ಆಪ್ಲ್ಯಾ ಶಿಕ್ಪಾಕ್ ಚರಿತ್ರಾ ಕಾಂಯ್ ಉಪ್ಕಾರಾಕ್ ಪಡ್ಚಿ ನ್ಹಯ್ ಮ್ಹಣೊನ್ ತೊ ಜಾಣಾಂ ಆಸ್ಲ್ಲೊ ತರ್ಯ್, ಸಂಸಾರಾಚಾ ಕೊನ್ಶಾ ಕೊನ್ಶ್ಯಾಚಿ ಚರಿತ್ರಾ ಕಾಡುನ್ ತೊ ವಾಚ್ತಾಲೊ. ಸಿವಿಲೈಜೇಶನ್ ಆರಂಭ್ ಜಾಲ್ಲ್ಯಾ ಥಾವ್ನ್ ಪಿರಾಮಿಡಾಂತ್ ಫಾರಾವ್ಯಾ ರಾಯಾಂಕ್ ನಿಕೆಪುಂಚಾ ಪಾಸೊನ್, ಬ್ಯಾಬಿಲೋನಿಯಾ ಆತಾಂಚಾ ಇರಾಕಾ ಥಾವ್ನ್ ಕಾನ್ಸ್ಟಾಂಟಿನೇಪಲ್ ಆತಾಂಚಾ ಇಸ್ತಾನ್ಬುಲ್ ಪಾಸೊನ್, ಗುಡ್ ಹೋಪ್ ಭೂಶಿರಾ ಥಾವ್ನ್ ಅಮೇರಿಕಾ ಪಾಸೊನ್ ಫ್ರಾನ್ಸಿಸ್ ಚರಿತ್ರೆಕ್ ವಾಚ್ತಾಲೊ, ನಿಯಾಳ್ತಾಲೊ ಆನಿ ಆಪ್ಲ್ಯಾ ಮತಿಂತ್ ಜಿರಯ್ತಾಲೊ. ಕಿತ್ಯಾಕ್ಗೀ ತಾಕಾ ಆಪ್ಣೆಂ ಜಲ್ಮಾಲ್ಯಾ ಸಂಸಾರಾಕ್ ಜಾಣಾಂ ಜಾಂವ್ಚೆಂ ಬೆಷ್ಟೆಂ ಪಿಶೆಂ ಸಪಾಣ್.
"ಸಂಸಾರಾಂತ್ ಜಲ್ಮೊನ್ ಸಂಸಾರಾಕ್ ಜಾಣಾಂ ಜಾಯ್ನಾಂ ಜಾಲ್ಯಾರ್ ಫಾಯ್ದೊ ಕಿತೆಂ ಜಲ್ಮೊನ್? ಫ್ರಾನ್ಸಿಸಾಚಿ ಸಾದಿ ಆನಿ ಸೊಂಪಿ ಜವಾಬ್.
ತ್ಯಾ ದೀಸ್ ಸುಮಾರ್ ಅರ್ಧೆಂ ವೊರ್ ತ್ಯಾ ಹಿಸ್ಟರಿ ಸೆಕ್ಶನಾಚಾ ಬುಕಾ ಮಧೆಂ ಸೊಧುನ್, ದುಸ್ರ್ಯಾ ಮಹಾ ಝುಜಾಚಾ ವಿಶಯಾಚೊ ಬೂಕ್ ಘೆವ್ನ್, ಫ್ರಾನ್ಸಿಸ್, ಲೈಬ್ರೆರಿಚಾ ಟೇಬಲಾರ್ ಬಸ್ತಾನಾ, ಪಯ್ಸ್ ಥಾವ್ನ್ ತನಿಶಾ ತಾಕಾಚ್ಚ್ ಪಳೆವ್ನ್ ಆಸ್ಲ್ಲೆಂ.
ಫ್ರಾನ್ಸಿಸಾಕ್ ಆಜ್ ತಾಣೆಂ ಪಯ್ಲ್ಯಾ ಪಾವ್ಟಿಂ ಲೈಬ್ರರಿಂತ್ ಪಳಂವ್ಚೆಂ! ಮತಿಚಾ ಪಡ್ದ್ಯಾರ್, ಎದೊಳ್ ಖಂಯ್ಚರ್ಯ್ ಹ್ಯಾ ಬ್ರಿಸ್ಬೇನಾಂತ್ ತಾಕಾ ಫ್ರಾನ್ಸಿಸಾಕ್ ಹ್ಯಾ ಆದಿಂ ಪಳೆಲ್ಲೊ ಉಗ್ಡಾಸ್ ನಾ. ಹಿಸ್ಟರಿ ಸೆಕ್ಶನಾಚಾಚ್ ಲೈನಿಚೆರ್ ದುಸ್ರ್ಯಾ ಪೊಂತಾರ್ ಆಸ್ಲ್ಲ್ಯಾ ನೋವೆಲ್ಸಾಂಚಾ ಸೆಕ್ಶನಾಂತ್, ರೊಮ್ಯಾಂಟಿಕ್ ನೋವೆಲ್ಸಾಂ ಮಧೆಂ ತನಿಶಾ ಆಪ್ಣಾಕ್ ಜಾಯ್ ಜಾಲ್ಲ್ಯಾ ಪುಸ್ತಕಾಕ್ ಸೊಧುಂಕ್ ಲಾಗ್ತಾನಾ, ಆಪ್ಲ್ಯಾ ಗಾಂವ್ಚಾ, ಆಪ್ಲ್ಯಾ ದೇಶಾಚಾ ಸಾದಾರ್ಣ್ ಆಕರ್ಷಿತ್ ತರ್ನಾಟ್ಯಾಕ್ ಪಳವ್ನ್, ತನಿಶಾಚಿ ನದರ್ ಪರ್ತ್ಯಾಕ್ ಪರ್ತ್ಯಾಕ್ ಫ್ರಾನ್ಸಿಸಾ ತೆವ್ಶಿಂ ಗೆಲ್ಲಿ. ತಾಚಾ ಹ್ಯಾ ವರ್ತನಾಕ್ ಆಪ್ಣೆ ನಾ ಪಸಂದ್ ಕರ್ಚಾ ಸೆಕ್ಶನಾಚಾ ಪುಸ್ತಕಾಂ ಮಧೆಂ ಹೊ ಅಪರಿಚಿತ್ ತರ್ನಾಟೊ ಇತ್ಲೋಯ್ ಎಕೀನ್ಪಣಿಂ ಕಿತೆಂ ಸೊಧ್ತಾ ತೆಂಚ್ ತನಿಶಾಕ್ ಕುತೂಹಲ್ ಜಾಲ್ಲೆಂ.
ಫ್ರಾನ್ಸಿಸ್ ಲೈಬ್ರೆರಿಚಾ ಟೇಬಲಾರ್ ಬಸ್ಲ್ಲೊ ಪಳೆಲ್ಲೆಂ ತನಿಶಾ, ಆಪ್ಲ್ಯಾ ಹಾತಾಕ್ ಮೆಳ್ಲ್ಲೊ ಏಕ್ ಪುಸ್ತಕ್ ಘೆವ್ನ್, ತ್ಯಾಚ್ ಟೇಬಲಾಚಾ ಎಕಾ ಬಸ್ಕೆಕ್ ವೊಡುನ್ ತೆಂಯ್ ಬಸ್ತಾನಾ ತಕ್ಲಿ ಉಕ್ಲುನ್ ವಯ್ರ್ ಪಳೆಲ್ಲ್ಯಾ ಫ್ರಾನ್ಸಿಸಾಕ್, ಆಪ್ಲ್ಯಾ ಸಾಮ್ಕಾರ್ ಸೊಭಿತ್ ಏಕ್ ಚಲಿ, ತೆಂಯ್ ಇಂಡಿಯನ್ ಚಲಿ ದಿಸ್ತಾನಾ, ಥೊಡಿಂ ಕ್ಷಣಾಂ ಆಪ್ಲ್ಯಾ ದೊಳ್ಯಾಂ ದಿಷ್ಟೆನ್ ತನಿಶಾಕ್ಚ್ ಪಳೆಲ್ಲ್ಯಾ ಫ್ರಾನ್ಸಿಸಾನ್, ಸವ್ಕಾಸ್ ಆಪ್ಲಿ ನದರ್ ತನಿಶಾಚಾ ತ್ಯಾ ಸೊಭಿತ್ ದೊಳ್ಯಾಂ ಥಾವ್ನ್ ದೆಂವವ್ನ್ ಸಗ್ಳ್ಯಾ ತನಿಶಾಚಾ ಕುಡಿರ್ ಭೊಂವ್ಡಾಯ್ತಾನಾ, ಪಯ್ಲ್ಯಾ ಪಾವ್ಟಿಂ ತನಿಶಾಕ್ ಎಕಾ ಪರ್ಕಿ ಚಲ್ಯಾಚಾ ದಿಷ್ಟೆ ಮುಖಾರ್ ಲಜ್ ದಿಸ್ಲೆಲ್ಯಾ ಪರಿಂ ಜಾಲೆಂ.
ಫ್ರಾನ್ಸಿಸ್ ತರ್ಯ್ ಲಾಂಬ್ ಜಿವಾಚೊ ಚಡ್ ಕಾಂಯ್ ಮೊಟೊ ನ್ಹಯ್ ತರ್ಯ್ ಆಕರ್ಷಿತ್ ಜಿವಾಚೊ. ತಾಚ್ಯಾ ದೊಳ್ಯಾಂಚಿ ದೀಷ್ಟ್ ಮಾತ್ರ್ ಚಡ್ ತೀಕ್ಷ್ಣ್. ಫ್ರಾನ್ಸಿಸಾನ್ ತನಿಶಾಕ್ ಪಳೆತಾನಾ ಆಪ್ಲ್ಯಾ ದಿಷ್ಟೆನ್ಚ್ ತೊ ಆಪ್ಣಾ ವಯ್ರ್ ರಾಜ್ವಟ್ ಚಲಯ್ತಾ ತಶೆಂ ತನಿಶಾಕ್ ದಿಸ್ಲೆಂ. ಹ್ಯಾಚ್ ದಿಷ್ಟೆ ಮುಕಾರ್ ತನಿಶಾ ಸಲ್ವಾಲ್ಲೆಂ.
ಸೊಭಾಯೆಂತ್ ತೆಂ ಕಾಂಯ್ ಉಣೆಂ ನಾತ್ಲ್ಲೆಂ. ಬ್ರಿಸ್ಬೇನಾಂತ್ ಜಲ್ಮೊನ್ ವ್ಹಡ್ ಜಾಲ್ಲೆಂ ತೆಂ ಕ್ವೀನ್ಸ್ಲ್ಯಾಂಡಾಚಾ ಮಾತಿಯೆಕ್ ಆನಿ ಪ್ರಕ್ರತೆಕ್ ವಿರುದ್ಧ್ ಜಾವ್ನ್ ಥೊಡ್ಯಾ ಸಾವ್ಳ್ಯಾ ರೂಪಾಕ್ ಆಪ್ಲ್ಯಾ ಕುಡಿರ್ ನೆಟವ್ನ್ ಆಯಿಲ್ಲೆಂ. ಸೊಭಿತ್ ರೌಂಡ್ ತೋಂಡ್, ರೂಂದ್ ಪುಗ್ರೆ ಗಾಲ್, ನೀಟ್ ಕಪಾಲ್, ಪಾತಾಳ್ ಮಾತಿಯೆ ರಂಗಾಚೆ ಕೇಸ್, ಸೊಭಿತ್ ಬಾದಾಮಿ ದೊಳೆ, ದಾಟ್ ರೂಂದ್ ತಾಂಬ್ಡೆ ವೋಂಟ್, ನೀಟ್ ಸೊಭಿತ್ ನಾಕ್, ತನಿಶಾ ಸೊಭಾಯೆಂತ್ ಕಾಂಯ್ ಉಣೆಂ ನಾತ್ಲ್ಲೆಂ.
ಪುಸ್ತಕಾಚಿಂ ಪಾನಾಂ ಪರ್ತಿತಾಂ ಪರ್ತಿತಾಂ, ದೊಗಾಂಯ್ಚ್ಯಾ ದೊಳ್ಯಾಂನಿ ದೊಳ್ಯಾಂಕ್ ವಳಕ್ ಭಾಸಾಯ್ತಾನಾ, ತಾಂಚಾ ತೊಂಡಾರ್ ಕಶ್ಯೊ ತ್ಯೊ ಹಾಸೊ ಉದೆಲ್ಯೊ ತೆಂ ತಿಂಚ್ ನೆಣಾಂತ್. ವೊಂಟಾ ವಯ್ಲ್ಯಾ ಹಾಸ್ಯಾಂನಿ ಎಕಾಮೆಕಾಚಿ ವಳಕ್ ಕರುನ್ ದಿತಾನಾ, ವಳ್ಕೆನ್ ಇಷ್ಟಾಗಾತೆಕ್ ವ್ಹಾಡಯ್ಲೆಂ. ದೀಸ್ ಧಾಂವ್ತಾನಾ, ಇಷ್ಟಾಗಾತೆನ್ ದೊಗಾಂಯ್ಕ್ಯ್ ಆಸ್ಟ್ರೇಲಿಯಾಂತ್ಚ್ ಕಾಜಾರಾ ಭೆಸಾಂತ್ ಮೆಳಯ್ಲೆಂ.
ಜೆರೊಮಾನ್ ಆಪ್ಲೆಂ ಚಿಕ್ಮಂಗ್ಳುರ್ಚ್ಯಾ ಬೀದರಹಳ್ಳೆಚೆಂ ಆನಿ ಬಣಕಲಾಚೆಂ ತೋಟ್ ಆನಿ ಆಸ್ತ್ ವಿಕ್ಚಾ ವಿಶಿಂ ಫ್ರಾನ್ಸಿಸಾಕ್ ಪೋನ್ ಕರುನ್ ಸಾಂಗ್ಲೆಂ.
"ತುಮ್ಕಾಂ ಕೊಣಾಯ್ಕ್ಯ್ ಜಾಯ್ ಜಾಲ್ಯಾರ್ ದವರ್ತಾಂರೇ.....! ತುಮ್ಕಾಂ ಜರ್ ನಾಕಾ ಜಾಲ್ಯಾರ್ ಆತಾಂ ಮಾಕಾ ಪಳಂವ್ಕ್ ಜಾಯ್ನಾಂ. ಘರಾ ಲಾಗ್ಚೆಂಚ್ ಸಾಂಭಾಳುಂಕ್ ಕಷ್ಟ್ ಜಾತಾತ್!" ತೋಟ್ ವಿಕ್ಚಾ ಪಯ್ಲೆಂ ಭುರ್ಗ್ಯಾಂಕ್ ಏಕ್ ಸಬ್ದ್ ಸಾಂಗ್ಚೆಂ ಚಡ್ ಗರ್ಜೆಚೆಂ ಮ್ಹಣೊನ್ ಚಿಂತ್ಲ್ಲ್ಯಾ ಜೆರೊಮಾನ್, ಫ್ರಾನ್ಸಿಸಾಕ್ ಫೋನ್ ಕರುನ್ ತಿಳ್ಸಿಲೆಂ.
"ತ್ಯಾ ಘಟಾರ್ ಕಿತೆಂ ಜಾತಾ ಡ್ಯಾಡ್? ಥಂಯ್ಚರ್ ಸಾರ್ಕೆಂ ಏಕ್ ಇಸ್ಕೊಲ್ ನಾಂ. ತುಂಯ್ ತೆಂ ತೋಟ್ ಕಿತ್ಯಾಕ್ ತಕ್ಲೆರ್ ಘೆವ್ನ್ ಬಸ್ತಾಯ್. ಚಾರ್ಲ್ಸ್ಯ್ ಇಂಗ್ಲೆಂಡಾಂತ್ ಸೆಟಲ್ ಜಾಲಾ. ತೆಂ ಆನಿ ಕೊಣಾಕ್? ಬೆಷ್ಟೆಂ ತಕ್ಲಿ ಆಟವ್ನ್ ತುಜೆಂ ಬ್ಲಡ್ ಪ್ರೆಶರ್ ವಾಡಂವ್ಚಾ ಪ್ರಾಸ್ ತೆಂ ವಿಕುನ್ ಸೊಡ್ಲ್ಯಾರ್ಚ್ ಬರೆಂ!"
ಫ್ರಾನ್ಸಿಸಾಚಿ ತಿ ಸಲಹಾ? ವಾ ತಿ ಜವಾಬ್? ಮ್ಹಣ್ಚೆಂ ತೆಂ ಜೆರೊಮಾಕ್ ಕಳ್ಳೆಂನಾ. ಪುಣ್ ಆಜ್ ಜೆಂ ಕಿತ್ಯಾ ಥಾವ್ನ್ ಜೆರೊಮಾಚಿಂ ಭುರ್ಗಿಂ ಭಾಯ್ಲ್ಯಾ ಗಾಂವಾಕ್ ಪಾವ್ಲ್ಲಿಂ, ತಾಕಾಚ್ ತಾಣಿಂ, ಆಜ್, ತಾಂಚಾ ನದ್ರೆಂತ್ ಕಾಂಯ್ಚ್ ಮೋಲ್ ದಾಖಯ್ಲೆಂ ನಾ. ದುಸ್ರಿ ಕಾಂಯ್ ಗತ್ ನಾಸ್ತಾನಾ, ಜೆರೊಮಾನ್, ಚಿಕ್ಮಂಗ್ಳೂರ್ಚಾ ತಾಚ್ಯಾ ಸಗ್ಳ್ಯಾ ಆಸ್ತೆಕ್ ವಿಕುನ್ ಸೊಡ್ಲೆಂ.
"ಪಳೆಲೆಂಯ್ಮೂ ಎಸ್ತೆಲಾ.....? ಭುರ್ಗ್ಯಾಂ ಖಾತಿರ್ ಮ್ಹಣೊನ್ ಆಯ್ಚ್ಯಾ ಕಾಳಾರ್ ಕಾಂಯ್ ಕರುನ್ ದವರ್ಚೆಂ ನ್ಹಯ್. ತ್ಯಾ ಪರ್ಗಾಂವಾನಿಂ ಹಾಂಗಾ ಆಸ್ಲ್ಲ್ಯಾ ಪ್ರಾಸ್ ವರ್ತೆಂ ಕಿತೆಂ ಆಸಾ?" ಪರ್ಗಾಂವಾಕ್ ಗೆಲ್ಲಿಂ ಆಪ್ಲಿಂ ಭುರ್ಗಿಂ ಪಾರ್ಗಾಂವಾಕ್ಚ್ ವೆಂಗುನ್ ರಾವ್ತಾನಾ, ಜೆರೊಮ್ ಚಡ್ ಕಳ್ವಳ್ಳೊ. ವ್ಹಡ್ಲ್ಯಾ ರಾವ್ಳೆರಾ ಸಾರ್ಕ್ಯಾ ತಾಚ್ಯಾ ಘರಾಂತ್ ಆಜ್ ತೊ ಆನಿ ತಾಚಿ ಬಾಯ್ಲ್ ಸೊಡ್ಲ್ಯಾರ್, ಘರಾ ಕಾಮಾಚೆಂ ಸೆಲ್ಲಿ ಶಿವಾಯ್, ತಾಂಚಾ ಸಂಭಂಧಾಚೆಂ, ತಾಂಚಾ ರಾಗ್ತಾಚೆಂ ಮ್ಹಣೊನ್ ಕೋಣ್ಯ್ ನಾತ್ಲ್ಲೆಂ.
ಜೆರೊಮಾಚಾ, ತಾಚ್ಯಾ ಉತರ್ ಪ್ರಾಯೆಚಾ ದಿಸಾಂನಿ, ತಾಕಾ ಖರೆಂಚ್ ಜಿವಿತ್ ಮ್ಹಳ್ಯಾರ್ ಕಿತೆಂ ಮ್ಹಣೊನ್ ದಾಖಯಿಲ್ಲೆಂ. ಆಸ್ತ್ ಆನಿ ಅಂತಸ್ಥೆ ಖಾತಿರ್ ಆಪ್ಣೆ ಕೆಲ್ಲ್ಯಾ ವಾವ್ರಾಚೊ ಫಳ್ ಜಾವ್ನ್, ತಾಣೆಂ ಲೊಕಾಚಾ ಹುಜಿರ್ ಆಪ್ಲೆಂ ನಾಂವ್ ದವರ್ಲೆಂ ಜಾಲ್ಯಾರ್ಯ್, ಆಪ್ಲ್ಯಾಚ್ ಘರಾಂತ್, ತೊ ಆಪ್ಲ್ಯಾ ಬಾಯ್ಲೆ ಸಾಂಗಾತಾ ಎಕ್ಸುರೊ ಜಾಲೊ.
ಕೆನಡಾ ಥಾವ್ನ್ ತಾಚೆಂ ಮಾಲ್ಗಡೆಂ ಧುವ್, ಆಪ್ಲ್ಯಾ ಘೊವಾ ಆನಿ ತಾಚ್ಯಾ ದೊಗಾಂ ಭುರ್ಗ್ಯಾಂ ಸಾಂಗಾತಾ ಗಾಂವಾಕ್ ಆಯಿಲ್ಲೆಂ ತೆಂ, ಬಾಪಯ್ ಆನಿ ಆವಯ್ ಮುಕಾರ್, ಕೆನಡಾಚೆಂ ತಾಂಚಾ ವಸ್ತೆಚೆಂ ಆನಿ ಖಾಣಾಚೆಂ ವ್ಹಡ್ಪಣ್ ದಾಖವ್ನ್, ಮರ್ಜೆನ್ ಆಯಿಲ್ಲ್ಯಾ ಪರಿಂಚ್ ಮರ್ಜೆನ್ ಕೆನಡಾ ಪಾಟಿಂ ಗೆಲೆಂ.
**************
ಮ್ಯಾಂಚೆಸ್ಟರಾಕ್ ಆಯಿಲ್ಲ್ಯಾ ಚಾರ್ಲ್ಸಾಚೆಂ ಜಿವಿತ್, ತಾಣೆಂ ಚಿಂತ್ಲ್ಲ್ಯಾ ತಿತ್ಲೆಂ ಸುಲಭ್ ಜಾಂವ್ಕ್ ನಾ. ಮ್ಯಾಂಚೆಸ್ಟರಾಂತ್ ಜಿವಿತ್ ಜಿಯೆಂವ್ಕ್ ಸುಲಭ್ ಪುಣ್ ಜಿವಿತ್ ಸೊಧುಂಕ್ ಕಷ್ಟ್ ಮ್ಹಣೊನ್ ತಾಕಾ ಹಾಂಗಾ ಆಯಿಲ್ಲ್ಯಾ ತ್ಯಾ ಪಯ್ಲ್ಯಾ ದಿಸಾನಿಂಚ್ ಕಳ್ಲ್ಲೆಂ.
ಕ್ಯಾಥರೀನಾನ್ ಕಾಮ್ ಕರ್ಚಾಚ್ ಕಂಪೆನಿಂತ್ ಚಾರ್ಲ್ಸಾಕ್ ಕಾಮ್ ಮೆಳ್ತಾನಾ, ಚಾರ್ಲ್ಸಾನ್ ತೆಂ ಖುಶೇನ್ ಸ್ವೀಕಾರ್ ಕೆಲೆಂ. ಮ್ಯಾಂಚೆಸ್ಟರಾಂತ್ ಸಗ್ಳ್ಯಾಂಚೆಂ ಜೀವನ್ ತ್ಯಾ ಪಾದರಸ ಪರಿಂ ಕ್ವಿಕ್ ಆನಿ ಫಾಸ್ಟ್. ಖಾಣಾಕ್ ಆನಿ ಜೆವ್ಣಾಕ್, ಫಾಸ್ಟ್ ಫುಡ್ ಅನಿ ಇನ್ಸ್ಟಾಂಟ್ ಜಾಲ್ಯಾರ್, ಕಾಮಾಚೊ ವೇಳ್ ಸೆಕುಂದಾ ಥಾವ್ನ್ ಸೆಕುಂದಾಕ್ ಪಕ್ಕಾ. ಹ್ಯಾ ಪರಿಸರಾಂತ್ ಪಯ್ಲೆಂ ಥೊಡೊ ತೇಂಪ್ ಫಕತ್ತ್ ಆಟ್ ವರಾಂಚಿ ಡ್ಯೂಟಿ ಕೆಲ್ಲ್ಯಾ ಚಾರ್ಲ್ಸಾನ್, ಸವ್ಕಾಸ್ ಆಪ್ಣಾಕ್ ವಳಕ್ ಜಾಲ್ಲ್ಯಾ ಸಾಂಗಾತ್ಯಾಂ ಥಾವ್ನ್, ತಾಂಚಾ ಇಷ್ಟಾಗಾತೆಚಾ ಮಾಹೆತೆನ್ ಓವರ್ ಟಾಯಿಮ್ ಕರುಂಕ್ ಸುರು ಕೆಲೊ. ರೂಮಾಂತ್ ಬಸೊನ್ಯ್ ಕಾಂಯ್ ಜಾಂವ್ಚೆಂ ನಾತ್ಲ್ಲೆಂ. ತಾಚ್ಯೆ ವಯ್ರ್ ತೆಂ ಟ್ಯಾಕ್ಸ್, ಹೆಂ ಟ್ಯಾಕ್ಸ್, ಹೆಂ ಇನ್ಶೂರೆನ್ಸ್, ತೆಂ ಇನ್ಶೂರೆನ್ಸ್ ಮ್ಹಣೊನ್ ಸಾದಾರ್ನ್ ತಾಚೊ ಪಾಗಾರ್ ಗವರ್ನ್ಮೆಂಟಾಕ್ಚ್ ವೆತಾಲೊ.
ಕ್ಯಾಥರೀನ್ ಆನಿ ಚಾರ್ಲ್ಸ್ ಎಕಾಚ್ ಕಂಪೆನಿಂತ್ ಕಾಮ್ ಕರ್ತಾಲಿಂ ಜಾಲ್ಯಾರ್ಯ್, ತಾಂಚಾ ಮಧೆಂ ಚಡಿತ್ ಕಾಂಯ್ ವಳಕ್ ಜಾಂವ್ಕ್ ನಾತ್ಲ್ಲಿ. ಮ್ಯಾಂಚೆಸ್ಟರಾಂತ್ ವೆಳಾಚೊ ಆಭಾವ್ ಸಗ್ಳ್ಯಾಂಕ್ ಆಸ್ಲ್ಲೊ.
ಮ್ಯಾಂಚೆಸ್ಟರಾಕ್ ಪಾವ್ಲ್ಲ್ಯಾ ದುಸ್ರ್ಯಾ ವರ್ಸಾ ಚಾರ್ಲ್ಸಾನ್, ಆಪ್ಲೆಂ ಬಿಡಾರ್ ಬದ್ಲುಂಚೆಂ ಪ್ರಯತ್ನ್ ಕೆಲ್ಲೆಂ. ಅಪ್ಣೆಂ ಆತಾಂ ವಸ್ತಿ ಕರ್ಚೆಂ ಬಿಡಾರ್, ಆಪ್ಣಾಕ್ ಆತಾಂ ಪಯ್ಸ್ ಜಾತಾ ಮ್ಹಣೊನ್ ಆಪ್ಣೆ ಕಾಮ್ ಕರ್ಚ್ಯಾ ಕಂಪೆನಿಚಾ ಲಾಗಿಂ ವಸ್ತೆಚಿ ವಿಲೆವರಿ ಕರುಂಕ್ ಚಿಂತ್ಲ್ಲ್ಯಾ ಚಾರ್ಲ್ಸಾನ್, ಸೊಧ್ನಾಂ ಚಲಯ್ತಾನಾ, ಕ್ಯಾಥರೀನಾಚಾ ವಳ್ಕೆಚೆರ್ ಚಾರ್ಲ್ಸಾಕ್ ನವೆಂ ಘರ್ ಮೆಳ್ಳೆಂ. ಹಾಂಗಾ ತಾವ್ನ್ಚ್ ತಾಂಚಿ ಸಳಾವಳ್ ಆರಂಭ್ ಜಾಲಿ. ಪುಣ್ ಹ್ಯಾ ಸಳಾವಳಿ ಥಾವ್ನ್, ಕ್ಯಾಥರೀನಾಚಾ ಕುಟ್ಮಾಕ್ ಆನಿ ಚಾರ್ಲ್ಸಾಕ್ ಕಾಂಯ್ಚ್ ಸಂಭಂಧ್ ಉದೆಲ್ಲೊ ನಾ. ಪುಣ್ ಚಾರ್ಲ್ಸಾಚೆಂ ನಶೀಬ್ ಭೋವ್ಶ್ಯಾ ತಾಕಾ ಹಾಂಗಾವರೇಗ್ ವೊಡುನ್ ಹಾಡುನ್ ಆಯಿಲ್ಲೆಂ. ಕಾರಾಣ್ ತಾಚ್ಯಾಯ್ ಜಿವಿತಾಂತ್, ಮ್ಯಾಂಚೆಸ್ಟರಾಂತ್ ತಾಚೊ ಮ್ಹಳ್ಳೊ ಏಕ್ ಸಂಭಂಧ್ ಕಿರ್ಲೊಂಕ್ ತಯಾರ್ ಜಾಲ್ಲೊ.
ತ್ಯಾ ದೀಸ್.....!
ಆಯ್ತಾರಾ ಮಿಸಾಕ್ ಭಾಯ್ರ್ ಸರ್ಲ್ಲೊ ಚಾರ್ಲ್ಸ್, ಪಯ್ಲ್ಯಾ ಪಾವ್ಟಿಂ ಆಪ್ಣೆಂ ಆಜ್ ಆಯಿಲ್ಲ್ಯಾ, ಹ್ಯಾ ತಾಕಾ ನವಿ ಜಾಲ್ಲ್ಯಾ ಇಗರ್ಜೆಕ್ ಪಳವ್ನ್ ಶಿರಿಂ ಚುಕ್ಲೊ. ಭಾರಿಚ್ಚ್ ಸೊಭಾಯೆಚಿ, ಸುಂದರ್ ಇಗರ್ಜ್. ಇಗರ್ಜ್ ಪರ್ನಿ ತರ್ಯ್ ಚಾರ್ಲ್ಸಾಕ್ ಹಿ ಭಿಲ್ಕುಲ್ ನವಿ. ಆಪ್ಣೆಂ ಕ್ಯಾಥರೀನಾಚಾ ಜಾಗ್ಯಾಕ್ ವಸ್ತೆಕ್ ಆಯ್ಲ್ಯಾ ಉಪ್ರಾಂತ್ ಹೊ ಪಯ್ಲೊ ಆಯ್ತಾರ್ ತಾಚೊ. ಮಿಸಾಚೊ ವೇಳ್ ಕ್ಯಾಥರೀನಾ ಥಾವ್ನ್ ತಾಣೆಂ ವಿಚಾರುನ್ ಘೆತ್ಲ್ಲೊ.
ಇಗರ್ಜೆಚಿ ಸೊಭಾಯ್ ಇಗರ್ಜೆ ಭಾಯ್ಲ್ಯಾನ್ ಚಾಕೊನ್, ಇಗರ್ಜೆ ಭಿತರ್ ಪಾಂಯ್ ದವರ್ಲ್ಲ್ಯಾ ಚಾರ್ಲ್ಸಾಕ್, ಎದ್ಯಾ ವ್ಹಡ್ಲ್ಯಾ ಇಗರ್ಜೆಂತ್ ಫಕತ್ತ್ ಥಂಯ್ ಹಾಂಗಾ ಧಾ ಪಂಚ್ವೀಸ್ ಜಣ್ ಮಾತ್ರ್ ದಿಸ್ಲೆ ಶಿವಾಯ್ ಉರ್ಲೆಲಿ ಸಗ್ಳಿ ಇಗರ್ಜ್ ಖಾಲಿ ಖಾಲಿ. ತೆ ಸೊಭಿತ್ ಕಾಳ್ಶ್ಯಾ ರುಕಾಟಾಚೆ ಬಾಂಕ್ ತಶೆಚ್ ವಿಣ್ಗೆ ಆಸ್ಲ್ಲೆ. ವಯ್ಲ್ಯಾ ಉಭಾರ್ ಪಾಕ್ಯಾ ತಾವ್ನ್ ದೆಂವಯಿಲ್ಲೆ ತೆ ಲೈಟ್ ಇಗರ್ಜೆಚಿ ಸೊಭಯ್ ದೊಡಿ ಕರ್ತಾಲೆ. ತ್ಯಾ ಶಿವಾಯ್ ತಿ ಮುಕ್ಲಿ ಆಲ್ತಾರ್!
ಆಪ್ಣಾಕ್ ಪಸಂದ್ ಜಾಲ್ಲ್ಯಾ ಜಾಗ್ಯಾರ್ ಬಸ್ಲ್ಲ್ಯಾ ಚಾರ್ಲ್ಸಾನ್, ಥೊಡೊ ವೇಳ್ ಆಲ್ತಾರಿಕ್ಚ್ ಪಳೆಲೆಂ. ಭಕ್ತಿಪಣಾಚಾ ಶಾಂತ್ ವಾತಾವರಣಾಂತ್, ಕಸಲೆಂಗೀ ಏಕ್ ಮಧುರ್ ಸುಖ್ ಭೊಗ್ಲ್ಲ್ಯಾ ಪರಿಂ ತಾಕಾ ಜಾಲೆಂ. ಆಪುಣ್ ಇಗರ್ಜೆಕ್ ಪಾಂಯ್ ದವರುನ್ ಧಾ ಮಿನುಟಾಂ ಜಾಲಿಂ ಜಾಲ್ಯಾರ್ಯ್, ಆಪ್ಣಾ ಉಪ್ರಾಂತ್ ಇಗರ್ಜೆಕ್ ಕೊಣ್ಯ್ ಆಯಿಲ್ಲೆಂ ತಾಕಾ ದಿಸ್ಲೆಂನಾ. ತಿಂಚ್ ತೊ ಇಗರ್ಜೆಕ್ ಯೆಂವ್ಚ್ಯಾ ಪಯ್ಲೆಂ ಇಗರ್ಜೆಂತ್ ಹಾಜರ್ ಆಸ್ಲ್ಲಿಂ ಮನ್ಶ್ಯಾಂ ಮಾತ್ರ್!
ಏಕ್ ಪಾವ್ಟಿಂ ತಾಣೆಂ, ಇಗರ್ಜೆ ಭಿತರ್ ಬಸ್ಲೆಲ್ಯಾಂಚಾ ವಯ್ರ್ ಆಪ್ಲೆಂ ಗುಮಾನ್ ಧಾಂವ್ಡಾಯ್ಲೆಂ. ಇಗರ್ಜೆಂತ್ ಆಸ್ಲ್ಲ್ಯಾ ಪಯ್ಕಿ ಚಡಾವತ್ ಜಾಣಾಂ ಸಗ್ಳಿಂ ಪ್ರಾಯೆಸ್ತ್. ಪ್ರಾಯ್ ಉತಾರ್ಲ್ಲಿಂ! ತರ್ ಮ್ಯಾಂಚೆಸ್ಟರಾಂತ್ ತರ್ನಾಟಿಂ, ಭುರ್ಗಿಂ, ಕಾಜಾರಿ, ಆಂಕ್ವಾರಿ, ಕೊಣ್ಯ್ ನಾಂತ್? ಯಾ ಆಸ್ಲ್ಯಾರ್ಯ್ ತಿಂ ಕಾಂಯ್ ಕ್ರಿಸ್ತಾಂವ್ ನ್ಹಯ್? ಕ್ರಿಸ್ತಾಂವ್ ಜಾಲ್ಯಾರ್ಯ್ ತಿಂ ರೋಮನ್ ಕ್ಯಾಥೊಲಿಕ್ ನ್ಹಯ್? ವಿಶಯ್ ಕಿತೆಂ? ಚಾರ್ಲ್ಸ್ ಆಪ್ಣಾ ತಿತ್ಲ್ಯಾಕ್ ಚಿಂತಾಲೊ.
ಕ್ಯಾಥರೀನ್ ಪುಣ್ಯ್ ಖಂಯ್ಚರ್ಯ್ ದಿಸ್ತಾಗಾಯ್? ಮ್ಹಣೊನ್ ತಾಣೆಂ ಆಪ್ಲಿ ದೀಷ್ಟ್ ಭೊಂವ್ಡಾಯ್ಲಿ ಜಾಲ್ಯಾರ್ಯ್ ತಾಚಾ ದಿಷ್ಟೆಕ್ ತೆಂ ದಿಸ್ಲೆಂ ನಾ.
ತಿತ್ಲ್ಯಾರ್!
ಆಪ್ಣಾ ಪಾಟ್ಲ್ಯಾನ್ ಇಗರ್ಜೆ ಭಿತರ್ ಕೋಣ್ಗೀ ಚಲೊನ್ ಆಯಿಲ್ಲ್ಯಾ ಪರಿಂ ಜಾವ್ನ್, ಆನಿ ಚಲೊನ್ ಆಯಿಲ್ಲೆಂ ತೆಂ ಆಪ್ಲ್ಯಾ ಪಾಟ್ಲ್ಯಾನ್ ಆಸ್ಲೆಲ್ಯಾ ಬಸ್ಕೆಚೆರ್ ಯೇವ್ನ್ ಬಸ್ಲೆಲ್ಯಾ ಪರಿಂ ಚಾರ್ಲ್ಸಾಕ್ ಜಾತಾನಾ, ತಾಚ್ಯಾ ಮನಾಂತ್ ಪಾಟಿಂ ಘುಂವೊನ್ ಪಳಂವ್ಚಿ ಉರ್ಭಾ ಆಯ್ಲಿ ಜಾಲ್ಯಾರ್ಯ್, ತೊ ಪಾಟಿಂ ಘುಂವ್ಲೊ ನಾ. ಥೊಡ್ಯಾಚ್ ವೆಳಾನ್ ಮೀಸ್ ಆರಂಭ್ ಜಾಲೆಂ.
ಮೀಸ್ ಆಖೇರ್ ಜಾವ್ನ್ ಇಗರ್ಜೆ ಥಾವ್ನ್ ಭಾಯ್ರ್ ಆಯಿಲ್ಲ್ಯಾ ಚಾರ್ಲ್ಸಾಚಿ ನದರ್, ಇಗರ್ಜೆಂತ್ ಆಪ್ಣಾ ಪಾಟ್ಲ್ಯಾನ್ ಬಸ್ಲೆಲ್ಯಾ ತ್ಯಾ ನವ್ಯಾ ವ್ಯಕ್ತಿಚೆರ್ ವಚನಾಸ್ತಾನಾ ಗೆಲಿನಾಂ. ಕಾಳ್ಯಾ ಗೀಟಾಂಚಾ ಸ್ಕರ್ಟಾಚೆರ್, ತಸಲ್ಯಾಚ್ ಕೋಟಾ ಪಂದಾ ತಾಂಬ್ಶ್ಯಾ ರಂಗಾಚಿ ಬ್ಲೌಸ್ ನ್ಹೆಸ್ಲ್ಲೆಂ ತರ್ನಾಟೆಂ ಚಲಿ! ಅಂದಾಜೆಕ್ ಪ್ರಾಯ್ ವಿಸಾಂ ತಾವ್ನ್ ಪಂಚ್ವೀಸಾಂ ಭಿತರ್! ಗೊರೆಂ ಮ್ಹಣ್ತಾನಾ ತೆಂ ಖಂಡಿತ್ ಇಂಗ್ಲೆಂಡಾಚೆಂ ಯಾ ಹಾಂಗಾಸರ್ ವಸ್ತಿ ಕರ್ಚ್ಯಾ ಆಸ್ಪಾಸ್ಚಾ ಯುರೋಪಿಯನ್ ಗಾಂವ್ಚೆಂ ಮ್ಹಣೊನ್ ಚಾರ್ಲ್ಸಾಕ್ ಸಮ್ಜಾಲೆಂ ತರ್ಯ್, ತಾಚ್ಯಾ ಮುಖಮಳಾರ್ ಏಕ್ ಆಶ್ಚರ್ಯ್ ಉದೆಲ್ಲೆಂ.
ಹ್ಯಾಚ್ ಚಲಿಯೆಕ್ ತಾಣೆಂ ಕ್ಯಾಥರೀನಾಚಾ ಘರಾ ತೆಂವ್ಶಿ ಚಲ್ಚೆಂ ಪೋರ್ ಪಳೆಲ್ಲೆಂ. ಕಾಲ್ಚಾ ಸಾಂಜೆರ್ ಆಪ್ಣೆ ಗೆಲ್ಲ್ಯಾ ರೆಸ್ಟೋರಂಟಾಂತ್ಯ್ ಹೆಂಚ್ ಚಲಿ ಕೌಂಟರಾರ್ ಆಸ್ಲ್ಲೆಂ. ಹೆಂ ಕೋಣ್ ಜಾವ್ಯೆತ್?
ಮತಿಂತ್ ಸವಾಲ್ ಉದೆಲೆಂ ಜಾಲ್ಯಾರ್ಯ್, ತೆಂ ಸವಾಲ್ ಉಗ್ತ್ಯಾನ್ ವಿಚಾರ್ಚೆಂ ಧಯ್ರ್ ಚಾರ್ಲ್ಸಾಕ್ ನಾತ್ಲ್ಲೆಂ. ಗರ್ಜೆ ಭಾಯ್ಲೆ ವಿಶಯ್ ಹ್ಯಾ ಗೊರ್ಯಾ ಕಾತಿಚಿಂ ಕೆದ್ನಾಂಯ್ ಉಲಯ್ನಾಂತ್ ಮ್ಹಣೊನ್ ಚಾರ್ಲ್ಸ್ ಮ್ಯಾಂಚೆಸ್ಟರಾಕ್ ಯೇವ್ನ್ ಜಾಣಾಂ ಜಾಲ್ಲೊ. ತಾಂಕಾ ಗರ್ಜ್ ಆಸ್ಲ್ಲ್ಯಾ ವಿಶಯಾಂತ್ ಮಾತ್ರ್ ತಿಂ ಮೆತೆರ್ ಜಾತಾತ್ ಶಿವಾಯ್ ಗರ್ಜೆ ಭಾಯ್ಲ್ಯಾ ವಿಶಯಾಕ್ ತಿಂ ಚಡ್ ಗುಮಾನ್ ದೀನಾಂತ್ ಮ್ಹಣೊನ್ ಜಾಣಾ ಜಾಲ್ಲೊ ಚಾರ್ಲ್ಸ್, ಮತಿಂತ್ಲ್ಯಾ ಸವಾಲಾಕ್ ಆನಿ ದುಬಾವಾಕ್ ತಶೆಂಚ್ ದಾಂಬುನ್ ದವರುನ್, ಇಗರ್ಜೆ ಥಾವ್ನ್ ಪಾಟಿಂ ಘರಾ ಪಾವ್ಲೊ.
**************
ರೆಸ್ಟೋರಂಟಾಚಾ ಕೌಂಟರಾರ್ ಪಳಂವ್ಚೆಂ ಗೊರೆಂ ಚಲಿ, ಹಪ್ತ್ಯಾಚಾ ನಿಮಾಣ್ಯಾ ದಿಸಾ, ಆಯ್ತಾರಾ ಇಗರ್ಜೆಂತ್ ಚಾರ್ಲ್ಸಾಚಾ ದೊಳ್ಯಾಂಚಾ ನದ್ರೆಕ್ ಯೆತಾಲೆಂ ಜಾಲ್ಯಾರ್ಯ್, ಚಾರ್ಲ್ಸ್ ಆನಿ ತ್ಯಾ ಚಲಿಯೆ ಮಧೆಂ ಕಸಲೊಯ್ ಸಂಭಂಧ್ ಉದೆಂವ್ಕ್ ನಾತ್ಲ್ಲೊ. ಪುಣ್, ತ್ಯಾ ದಿಸಾ ಬ್ರೆಸ್ತಾರಾ, ರೆಸ್ಟೋರಂಟಾಂತ್ ಬಸ್ಲೊಲೊ ಚಾರ್ಲ್ಸ್, ರೆಸ್ಟೋರಂಟಾಕ್ ಆಯ್ಲೆಲ್ಯಾ ಕ್ಯಾಥರೀನಾಕ್ ಪಳವ್ನ್ ವೊಗೊ ರಾವ್ಲೊ ನಾ. ಹ್ಯಾಚ್ ದಿಸಾ, ಕ್ಯಾಥರೀನಾನ್, ತ್ಯಾ ಕೌಂಟರಾ ವಯ್ಲ್ಯಾ ಚಲಿಯೆಚಿ ಚಾರ್ಲ್ಸಾಕ್ ವಳಕ್ ಕರುನ್ ದಿಲಿ.
"ಚಾರ್ಲ್ಸ್.....!, ಹೆಂ ವಿವಿಯಾನಾ..... ಮ್ಹಜೆಂ ಧುವ್....!" ಕ್ಯಾಥರೀನಾನ್ ವಿವಿಯಾನಾ ತೆಂವ್ಶಿ ಪಳವ್ನ್ ಆಪ್ಲ್ಯಾ ತೊಂಡಾರ್ ಹಾಸೊ ಹಾಡ್ಲ್ಯೊ.
"ತುಜೆಂ ಧುವ್?" ಚಾರ್ಲ್ಸಾಕ್ ಎಕ್ಚ್ಚ್ ಪಾವ್ಟಿಂ ಆಶ್ಚರ್ಯ್ ಜಾಲೆಂ.
"ಕಿತ್ಯಾಕ್....? ಜಾಂವ್ಕ್ ನಜೊ?"
"ತಶೆಂ ನ್ಹಯ್! ತುಜೆಂ ಧುವ್ ಹ್ಯಾ ರೆಸ್ಟೋರಂಟಾಂತ್.....?" ಚಾರ್ಲ್ಸಾನ್ ಆಪ್ಲ್ಯಾ ಆಶ್ಚರ್ಯಾಕ್ ಕಾರಾಣ್ ದಿಲೆಂ.
"ಎಕ್ಟುವಲ್ಲೀ ತೆಂ ನೆಲ್ಸನ್ ಏಂಡ್ ವಿಯೋಲಾಂತ್ ಕಾಮ್ ಕರ್ತಾ. ಪಾರ್ಟ್ ಟಾಯ್ಮಾಕ್ ಬೆಷ್ಟೆಂ ಹಾಂಗಾ ಬಸ್ತಾ!"
"ಓಹ್...!" ಚಾರ್ಲ್ಸಾನ್ ಉದ್ಗಾರ್ ಸೊಡ್ಲೊ. ಕ್ಯಾಥರೀನಾನ್, ವಿವಿಯಾನಾಕ್ ಚಾರ್ಲ್ಸಾಚಿ ವಳಕ್ ಕರುನ್ ದಿಲಿ ತರ್ಯ್, ವಿವಿಯಾನಾ ಹ್ಯಾ ವಳ್ಕೆಂತ್ ತಿತ್ಲೆಂ ಮೆತೆರ್ ಜಾಂವ್ಚಾ ಪರಿಂ ಚಾರ್ಲ್ಸಾಕ್ ದಿಸ್ಲೆಂ ನಾ.
ಚಾರ್ಲ್ಸಾಚೊ ಹೊ ಅಂದಾಜ್ ಖಂಡಿತ್ ಫಟ್ ಜಾಲ್ಲೊ. ಆಜ್ ಜಾಲ್ಯಾ ವಳ್ಕೆನ್, ಸವ್ಕಾಸ್ ತಾಂಚಾ ಮಧೆಂ ಇಶ್ಟಾಗಾತೆಚೆಂ ಭಿಂ ವೊಂಪ್ಲ್ಲೆಂ.
"ಕ್ಯಾಥರೀನಾನ್ ಮ್ಹಕಾ ಸಾಂಗ್ತಾನಾ, ನಿಜಾಯ್ಕ್ಯ್ ತುಂ ಕ್ಯಾಥರೀನಾಚೆಂಚ್ ಧುವ್ ಮ್ಹಣೊನ್ ಹಾವೆಂ ಚಿಂತ್ಲ್ಲೆಂ.....!" ದೊಗಾಂಯ್ ಮದ್ಲಿ ವಳಕ್ ಭಳ್ ಜಾವ್ನ್, ಚಾರ್ಲ್ಸ್ ಆನಿ ವಿವಿಯಾನಾ ಎಕಾಮೆಕಾಕ್ ಮೆಳೊಂಕ್ ಲಾಗ್ತಾನಾ, ವಿವಿಯಾನಾನ್ ಆಪ್ಲೊ ಆನಿ ಕ್ಯಾಥರೀನಾಚೊ ಸಂಭಂಧ್ ಕಸಲೊ ಮ್ಹಳ್ಳ್ಯಾ ವಿಶಿಂ ಸತ್ ಉಚಾರ್ಲೆಂ. ಆಪುಣ್ ಕ್ಯಾಥರೀನಾಚೆಂ ಚೆಡುಂ ನ್ಹಯ್ ಮ್ಹಣೊನ್ ವಿವಿಯಾನಾನ್ ಚಾರ್ಲ್ಸಾಕ್ ಸಾಂಗ್ತಾನಾ ಮಾತ್ರ್, ನಿಜಾಯ್ಕ್ಯ್ ಚಾರ್ಲ್ಸಾಕ್ ಆಶ್ಚರ್ಯ್ ಜಾಲ್ಲೆಂ.
"ತುಕಾ ಕಿತೆಂ ಹಾಂವ್ ಕ್ರಿಸ್ಟಿನಾ ಪರಿಂ ದಿಸ್ತಾಂ?"
"ಕ್ರಿಸ್ಟಿನಾ ಕೋಣ್.....?" ಚಾರ್ಲ್ಸಾನ್ ಹ್ಯಾ ನಾಂವಾಕ್ ಎದೊಳ್ ಆಯ್ಕೊಂಕ್ ನಾತ್ಲ್ಲೆಂ.
"ಕ್ರಿಸ್ಟಿನಾ ಕೋಣ್ ತೆಂ ತುಕಾ ಖಬಾರ್ ನಾ?" ವಿವಿಯಾನಾಚಾ ತೊಂಡಾರ್ ವಿಜ್ಮಿತ್ಕಾಯ್ ಉಟೊನ್ ರಾವ್ಲಿ. "ಕ್ರಿಸ್ಟಿನಾ...... ಕ್ಯಾಥರೀನ್ ಆಂಟಿಚೆಂ ಧುವ್!"
"ಓಹ್.....!" ಚಾರ್ಲ್ಸಾಚಿ ಹ್ಯಾ ಕ್ರಿಸ್ಟಿನಾಕ್ ಜಾಣಾಂ ಜಾಂವ್ಚಿ ಆತುರಾಯ್ ದೆಂವ್ಲಿ. "ನಾ! ಕ್ಯಾಥರೀನಾನ್ ಮ್ಹಾಕಾ ಕಾಂಯ್ ಸಾಂಗೊಕ್ ನಾ!"
"ತುಕಾ ಸಾಂಗ್ಚಿ ಗರ್ಜ್ಯ್ ನಾತ್ಲ್ಲಿ ಪಳೆ......!"
"ವ್ಹಯ್ ತೆಂಯ್ ಸಾರ್ಕೆಂ! ತರ್ ತುಂ.......?"
ಚಾರ್ಲ್ಸ್ ಆತಾಂ ವಿವಿಯಾನಾಚಾ ವಿಶಿಂ ಆಯ್ಕೊಂಕ್ ಉತ್ಸಾಹಿಕ್ ಜಾಲೊ.
"ಹಾಂವ್ ವಿವಿಯಾನಾ ಲೆವಿಸ್.....!" ವಿವಿಯಾನಾನ್ ಆಪ್ಲ್ಯಾ ಜಿವಿತಾಂತ್ಲ್ಯಾ ಮಾರೆಕಾರ್ ಸತಾಕ್ ಚಾರ್ಲ್ಸಾಚಾ ಮುಕಾರ್ ದವರ್ಲೆಂ.
"ಮ್ಹಾಕಾ ಮ್ಹಜ್ಯಾ ಆವಯ್ ಬಾಪಯ್ಕ್ ಪಾಳೆಲ್ಲೊ ಉಗ್ಡಾಸ್ ಆಜ್ ಯೇನಾ. ಪುಣ್ ಕ್ಯಾಥರೀನ್ ಆಂಟಿಲಾಗಿಂ ಮ್ಹಜ್ಯಾ ಮಾಮ್ಮಿಚೆ ಫೋಟೋಗ್ರಾಫ್ಸ್ ಆಸಾತ್. ತಶೆಂ ಹಾಂವ್ ತಿಕಾ ವಳ್ಕಾತಾಂ. ತಿತ್ಲೆಂಚ್!"
"ಐ ಯಾಮ್ ಸಾರ್ರಿ ವಿವಿಯಾನಾ!"
"ಕಿತ್ಯಾಕ್....?"
"ಹಾಂವೆ ತುಕಾ ತುಜೆಂ ಆದ್ಲೆಂಪಣ್ ಉಡಾಸ್ ಹಾಡಯ್ಲೆಂ!"
"ತಶೆಂ ಕಾಂಯ್ ನಾ ಚಾರ್ಲ್ಸ್. ಸತ್ ತೆಂ ಕೆದಾಳಾಯ್ ಸತ್ಚ್. ತೆಂ ವಿಸರ್ ತುಂ!"
ವಿವಿಯಾನಾನ್ ಚಾರ್ಲ್ಸಾಕ್ ಸತಾಕ್ ವಿಸ್ರೊಂಕ್ ಸಾಂಗ್ಲ್ಲೆಂ. ಪುಣ್ ಖುಧ್ದ್ ಜಾವ್ನ್ ವಿವಿಯಾನಾ, ತಾಚ್ಯಾ ಜಿವಿತಾಚಾ ಸತಾಕ್ ವಿಸ್ರೊಂಕ್ ಸಕೊಂಕ್ ನಾ ಮ್ಹಳ್ಳ್ಯಾಚಿ ರುಜ್ವಾತ್ ಜಾವ್ನ್, ಆಪ್ಲ್ಯಾ ಜಿವಿತಾಚೆಂ ಸತ್ ಚಾರ್ಲ್ಸಾ ಮುಕಾರ್ ಉಗ್ಡಾಪೆಂ ಕರ್ತಾನಾ, ತಾಚಿಂ ಸಿಂತಿಮೆಂತಾಳ್ ಜಾಲ್ಲಿ ಭಗ್ಣಾಂ, ತಾಚ್ಯಾ ತ್ಯಾ ದೊಳ್ಯಾಂ ಮದ್ಲ್ಯಾನ್, ದುಖಾಂ ಜಾವ್ನ್ ವ್ಹಾಳೊನ್ ಗೆಲ್ಲಿಂ ತಿಂ ಚಾರ್ಲ್ಸಾನ್ ಪಳೆಲ್ಲೆಂ. ವಿವಿಯಾನಾಚಾ ದುಖಾಭರಿತ್ ಜಿವಿತಾಕ್ ಆಯ್ಕಾಲ್ಯಾ ಉಪ್ರಾಂತ್ ಚಾರ್ಲ್ಸಾಕ್ ಕಿತ್ಯಾಕ್ಗೀ ವಿವಿಯಾನಾಚೆರ್ ಮನ್ ವೊಡಿಲಾಗ್ಲೆಂ. ತೊ ತಾಚೆಲಾಗಿಂ ಉಲಂವ್ಕ್ ಆಶೆತಾಲೊ. ವಿವಿಯಾನಾ ವಯ್ರ್ ಎಕಾ ಥರಾಚೊ ಮಯ್ಪಾಸ್ ಉದೆಲ್ಲೊ ಚಾರ್ಲ್ಸಾಚಾ ಕಾಳ್ಜಾಂತ್!
ದೀಸ್ ವೆತಾಂ ವೆತಾಂ, ಚಾರ್ಲ್ಸ್ ಆಪ್ಣಾ ಸವೆಂ ಚಡ್ ಲಾಗಿಂ ಜಾತಾ ಆನಿ ತೊ ಆಪ್ಣಾ ಸವೆಂ ಚಡ್ ಮೊಗಾನ್ ಉಲಯ್ತಾ ತೆಂ ವಿವಿಯಾನಾ ಜಾಣಾಂ ಜಾಲೆಂ.
ತ್ಯಾ ದೀಸ್.....!
ಆಪ್ಲ್ಯಾ ಜಲ್ಮಾಲ್ಯಾ ದಿಸಾಕ್ ವಿಸ್ರಾಲ್ಲೆಂ ವಿವಿಯಾನಾ, ಅಜೂನ್ಯ್ ನಿದೆಂತ್ ಲೊಳೊನ್ ಆಸ್ತಾನಾ, ವಿವಿಯಾನಾಚಾ ಜಲ್ಮಾ ದಿಸಾಚೊ ಉಡಾಸ್ ದವರುನ್, ತಾಕಾ ಪೋನ್ ಕರುನ್ ಶುಭಾಶಯ್ ಪಾಟಯಿಲ್ಲೊ ಪಯ್ಲೊ ಮನಿಸ್ ಚಾರ್ಲ್ಸ್! ಕ್ಯಾಥರೀನಾಚಾ ಕುಟ್ಮಾ ಶಿವಾಯ್ ವಿವಿಯಾನಾಕ್ ಆತಾಂ ತಾಕಾ ಲಾಗ್ಶಿಲೊ ಜಾವ್ನ್ ಆಸ್ಲ್ಲೊ ಮ್ಹಳ್ಯಾರ್ ಫಕತ್ತ್ ಚಾರ್ಲ್ಸ್ ಮಾತ್ರ್!
ಸಂಸಾರಾಚಾ ಸರ್ವ್ ರಾಟಾವಳಿ ಥಾವ್ನ್ ಪಯ್ಸ್ ರಾಂವ್ಚಾ ವಿವಿಯಾನಾಕ್, ತಾಚ್ಯಾ ಕಾಮಾಲಾಗಿಂ, ತಾಣೆಂ ಕಾಮ್ ಕರ್ಚಾ ಆಫೀಸಾಂತ್, ತಾಚ್ಯಾ ಭೊಂವಾರಿ, ಕೊಣ್ಯ್ ತಾಕಾ ಲಾಗ್ಶಿಲಿಂ ಮ್ಹಣೊನ್ ನಾತ್ಲ್ಲಿಂ. ಹಾಕಾ ಕಾರಾಣ್ಯ್ ಖುದ್ಧ್ ವಿವಿಯಾನಾಚ್!
ವಿವಿಯಾನಾಕ್ ಸಂಸಾರಿ ಸಂಗ್ತ್ಯಾಂ ವಯ್ರ್ ಮನ್ ಲಾಗಾನಾತ್ಲ್ಲೆಂ. ಆಪ್ಣೆಂ ಜಿಯೆಂವ್ಕ್ ಜಾಯ್ ಮ್ಹಣೊನ್ ತಾಕಾ ಆಶಾ ನಾತ್ಲ್ಲಿ. ವಿವಿಯಾನಾಚೆ ಗೂಣ್ ಸಗ್ಳೆ ಚಾರ್ಲ್ಸ್ ಜಣಾಂ ಜಾಲೊ ತರ್ಯ್, ವಿವಿಯಾನಾ ಥಾವ್ನ್ ತೊ ಪಯ್ಸ್ ಗೆಲೊ ನಾ. ಲ್ಹಾನ್ ಪ್ರಾಯೆರ್ಚ್ ಆಪ್ಲ್ಯಾ ಕುಟ್ಮಾಕ್ ಆನಿ ಕುಟ್ಮಾಚಾ ಮೊಗಾ ಥಾವ್ನ್ ವಂಚಿತ್ ಜಾಲ್ಯಾ ಕಾರಾಣಾಕ್ ಲಾಗೊನ್, ವಿವಿಯಾನಾಚೊ ಸ್ವಭಾವ್ ಆಸೊ ಜಾಲಾ ಜಾಂವ್ಕ್ ಪುರೊ ಮ್ಹಳ್ಳೆಂ ಚಾರ್ಲ್ಸಾಕ್ ಕಳಿತ್ ಜಾಲೆಂ. ವಿವಿಯಾನಾಚೊ ಸ್ವಭಾವ್ ಎಕ್ಸುರ್ಪಣಾಚೊ ಜಾಲ್ಯಾರ್ಯ್, ವಿವಿಯಾನಾಲಾಗಿಂ ಕಾಂಯ್ ವಾಯ್ಟ್ ನಾ. ತೆಂ ಕಾಂಯ್ ವಾಯ್ಟ್ ಚಾಲಿಚೆಂ ನ್ಹಯ್. ಆಜ್ ನಾ ಜಾಲ್ಯಾರ್ ಫಾಲ್ಯಾಂ, ತಾಚೆಂಯ್ ಕುಟಾಮ್ ಜಾತಾನಾ, ಖಂಡಿತ್ ವಿವಿಯಾನಾಚಾ ಚಿಂತ್ಪಾಂತ್ ಆನಿ ಉಲವ್ಣ್ಯಾಂತ್ ಬದ್ಲಾವಣ್ ಜಾತೆಲಿ ಮ್ಹಳ್ಳಿ ಪಾತ್ಯೆಣಿ ಚಾರ್ಲ್ಸಾಚಾ ಮತಿಂತ್ ಉದೆಲಿ.
ಸಕಾಳಿಂಚಾ ಅರ್ಧ್ಯಾ ನಿದೆಂತ್, ಆಪ್ಣಾಕ್ ಆಪ್ಲ್ಯಾ ಜಲ್ಮಾ ದಿಸಾಚೆ ಶುಭಾಶಯ್ ಪಾಟಯಿಲ್ಲ್ಯಾ ಚಾರ್ಲ್ಸಾಲಾಗಿಂ, ತ್ಯಾ ವಗ್ತಾರ್ ನಿದೆಚಾ ಆಮಾಲಾಂತ್ ಚಡ್ ಕಾಂಯ್ ಉಲಂವ್ಕ್, ವಿವಿಯಾನಾಕ್ ಸಾದ್ಯ್ ಜಾಂವ್ಕ್ ನಾ ಜಾಲ್ಯಾನ್, ಧನ್ಫರಾಂಚಾ ವೆಳಾರ್, ವಿವಿಯಾನಾಚಾ ಆಫೀಸಾಕ್ ಚಾರ್ಲ್ಸಾನ್ ಫೋನ್ ಕೆಲೆಂ. ವಿವಿಯಾನಾ ಖುದ್ದ್ ಜಾವ್ನ್ ಆಪ್ಣಾಕ್ ಪೋನ್ ಕರುನ್ ಉಲಂವ್ಚೆಂ ನಾ ಮ್ಹಳ್ಳೆಂ ತೆಂ ಚಾರ್ಲ್ಸ್ ಬರ್ಯಾನ್ ಜಾಣಾಂ.
"ಐ ಯಾಮ್ ಸಾರ್ರಿ ಚಾರ್ಲ್ಸ್.....! ಸಾಕಾಳಿಂ ತುಜ್ಯೆ ಲಾಗಿಂ ಉಲಂವ್ಕ್ ಮ್ಹಾಕಾ ಸಾದ್ಯ್ ಜಾಂವ್ಕ್ ನಾ. ಸತ್ ಸಾಂಗ್ಚೆಂ ಜಾಲ್ಯಾರ್ ತುಂ ಫೋನ್ ಕರ್ತಲೊಯ್ ಮ್ಹಣೊನ್ ಹಾವೆಂ ಚೆಂತುಕ್ಚ್ ನಾ. ಮ್ಹಜೊ ಜಲ್ಮಾ ದೀಸ್ ತುಕಾ ಕಸೊ ಉಡಾಸ್ ಉರ್ಲೊ?" ಲೋವ್ ತಾಳ್ಯಾನ್ ಉಲಂವ್ಚ್ಯಾ ವಿವಿಯಾನಾಚಾ ಉತ್ರಾಂನಿ, ಆಜ್ ಎಕಾ ಥರಾಚೊ ಆನಂದ್ ಉಲ್ಲಾಸ್ ಆಸಾ ಮ್ಹಳ್ಳ್ಯಾಪರಿಂ ಚಾರ್ಲ್ಸಾಕ್ ದಿಸ್ಲೊ.
"ತೆಂ ಸೊಡ್, ಜಸ್ಟ್ ಫೊರ್ಗೆಟ್ ಇಟ್!" ಚಾರ್ಲ್ಸ್ ಉಲಯ್ಲೊ. "ಆಜ್ ಸಾಂಜೆರ್ ತುಂ ಕಿತೆಂ ಕರ್ತಾಯ್?"
"ಕಿತ್ಯಾಕ್.......?"
"ಜಸ್ಟ್ ಟೆಲ್ ಮಿ!"
"ವೈ ಚಾರ್ಲ್ಸ್......?"
"ಆಜ್ ತುಂ ನಿಜಾಯ್ಕ್ಯ್ ಖುಶ್ ಆಸಾಯ್? ತುಜ್ಯಾ ತಾಳ್ಯಾ ಥಾವ್ನ್ ಹಾಂವ್ ತುಕಾ ಪಾರ್ಕುಂಕ್ ಸಕ್ತಾಂ. ತುಂ ಮ್ಹಜ್ಯೆಲಾಗಿಂ ಫಟ್ ಮಾರಿನಾಕಾ....!"
"ತುಂ ಏಕ್ ವಿಚಿತ್ರ್ ಮನಿಸ್......!" ಚಾರ್ಲ್ಸಾಚಾ ಉತ್ರಾಂಕ್ ಆಯ್ಕೊನ್ ವಿವಿಯಾನಾ ಹಾಸ್ಲೆಂ.
"ಜಾಂವ್ಕ್ ಪುರೊ! ಆಜ್ ತುಜೊ ಬರ್ತ್ ಡೇ. ಆಜ್ ತು ನಿಜಾಯ್ಕ್ಯ್ ಖುಶ್ ಆಸಾಯ್ ಮ್ಹಣೊನ್ ತುಂ ಉಲಯ್ತಾನಾಚ್ ಕಳ್ತಾ. ಆಜ್ ತುಂ ಮಾಕಾ ಮೆಳ್ತಾಯ್?"
"ಕಿತ್ಯಾಕ್?"
"ತುಜೊ ಬರ್ತ್ ಡೇ ಸೆಲೆಬ್ರೇಟ್ ಕರುಂಕ್!"
"ಸಾಂಜೆರ್ ಆಫೀಸಾ ಥಾವ್ನ್ ರೆಸ್ಟೋರಂಟಾಕ್ ಯೇ!" ಚಾರ್ಲ್ಸಾನ್, ಆಪ್ಣಾಕ್ ಸದಾಂ ಮೆಳ್ಚ್ಯಾ ಜಾಗ್ಯಾಚೊ, ವಿವಿಯಾನಾಕ್ ಪೊನಾರ್ ಉಡಾಸ್ ಕೆಲೊ.
"ತುಕಾ ಮ್ಹಜ್ಯಾ ಘರಾ ಯೇಂವ್ಕ್ ಜಾಂವ್ಚೆಂ ನಾ?"
ತಿತ್ಲೆಂಚ್!
ಚಾರ್ಲ್ಸಾಚಾ ಸವಾಲಾಕ್, ಆನಿ ತ್ಯಾ ಸವಾಲಾ ಪಾಟ್ಲ್ಯಾ ಆಪವ್ಣ್ಯಾಕ್ ಜವಾಬ್ ದಿಂವ್ಚಾ ಪಯ್ಲೆಂಚ್ ವಿವಿಯಾನಾನ್ ಟೆಲಿಪೋನ್ ಭಂದ್ ಕೆಲೆಂ.
ಆಪ್ಲ್ಯಾ ಸವಾಲಾಕ್ ಆನಿ ಆಪವ್ಣ್ಯಾಕ್ ಕಾಂಯ್ಚ್ ಜವಾಬ್ ದೀನಾಸ್ತಾನಾ ಎಕಾಚ್ಚ್ಫರಾ ತ್ಯಾ ಕುಶಿನ್ ಥಾವ್ನ್ ಭಂದ್ ಜಾಲ್ಲ್ಯಾ ಟೆಲಿಪೋನಾಕ್ ಪಳವ್ನ್, ಚಾರ್ಲ್ಸಾಕ್ ಕಾಂಯ್ಚ್ ಸಮ್ಜಾಲೆಂ ನಾ. ಖುದ್ಧ್ ವಿವಿಯಾನಾನ್ಚ್ ಜಾಯ್ ಮ್ಹಣೊನ್ ಟೆಲಿಪೋನ್ ಭಂದ್ ಕೆಲೆಂ? ಯಾ ತೆಂ ಆಪ್ಣಾ ಇತ್ಲ್ಯಾಕ್ ಬಂದ್ ಜಾಲೆಂ? ಚಾರ್ಲ್ಸಾಕ್ ಕಾಂಯ್ ಸಮ್ಜಾನಾಸ್ತಾನಾ ವೆತಾನಾ, ತಾಣೆಂ ಪರ್ತ್ಯಾಕ್ ವಿವಿಯಾನಾಕ್ ಟೆಲಿಪೋನ್ ಡಯಲ್ ಕೆಲೆಂ.
"ಹಲೋ...!" ವಿವಿಯಾನಾಚೊ ಭರಾಧೀಕ್ ತಾಳೊ.
ಥೊಡ್ಯಾಚ್ ವೆಳಾ ಭಿತರ್ ವಿವಿಯಾನಾಚಾ ತಾಳ್ಯಾಂತ್ ಬದ್ಲಾವಣ್ ಜಾಲ್ಲಿ. ತ್ಯಾ ತಾಚ್ಯಾ ತಾಳ್ಯಾಂತ್ ಆತಾಂ ಪಯ್ಲೆಂಚಿ ತಿ ಖುಶಿ ನಾತ್ಲ್ಲಿ.
"ಹಲೋ ವಿವಿಯಾನಾ...! ಚಾರ್ಲ್ಸ್ ಉಲಯ್ತಾಂ!"
"ಯು ನೋ ವನ್ ಥಿಂಗ್ ಚಾರ್ಲ್ಸ್....?" ವಿವಿಯಾನಾಚೊ ತಾಳೊ, ಕಿತ್ಯಾಕ್ಗೀ ಚಾರ್ಲ್ಸಾಕ್ ದುಬಾವಾಕ್ ಇಡೆಂ ಕರುನ್ ದೀಂವ್ಕ್ ಲಾಗ್ಲೊ.
"ವಾಟ್ ?" ಚಾರ್ಲ್ಸಾಕ್ ಕಾಂಯ್ಚ್ ಸಮ್ಜಾಲೆಂ ನಾ.
"ಯು ಕಿಲ್ಡ್ ಮೈ ಮದರ್.... ಯು, ... ಯು ....!"
ವಿವಿಯಾನಾಚಿಂ ಮುಕ್ಲಿಂ ಉತ್ರಾಂ, ಚಾರ್ಲ್ಸಾಚಾ ಕಾನಾಂಚಾ ಪರ್ದ್ಯಾಂಕ್ ಪಿಂದುನ್ ಗೆಲಿಂ. ತಾಚ್ಯಾ ತಾಳ್ಮಾಟ್ಯಾರ್ ಘಡ್ಗಡೊ ಮಾರ್ಲ್ಲ್ಯಾ ಪರಿಂ ತಾಕಾ ಜಾಲೆಂ. ತಾಚ್ಯಾ ದೊಳ್ಯಾಂ ಮುಕಾರ್ ಝಗ್ಲಾಣೆಂ ಉಟೊನ್ ದಾಂವ್ಲೆಂ. ತಾಚ್ಯೆ ಸಂಗಿಂ ಸವ್ಕಾಸ್ ಚಾರ್ಲ್ಸಾಚಾ ಹಾತಾಂತ್ಲೆಂ ಟೆಲಿಪೋನ್ ರಿಸೀವರ್ ಸಕಯ್ಲ್ ಗಳ್ಳೆಂ.
ವಿವಿಯಾನಾಕ್ ಪೋನ್ ಕೆಲ್ಯಾ ಉಪ್ರಾಂತ್, ತ್ಯಾ ಧನ್ಫರಾಂ ಥಾವ್ನ್ ಸಾಂಜೆರ್ ಪಾಸೊನ್, ಚಾರ್ಲ್ಸಾಚಾ ಮತಿಕ್ ಎಕಾ ಘಡಿಯೆಚೆಂ ಸಮಾಧಾನ್ ನಾತ್ಲ್ಲೆಂ. ಆಪ್ಣಾಚ್ಯಾ ಟೆಲಿಪೋನಾ ಥಾವ್ನ್ ಎಕಾಚ್ಚ್ಫರಾ ಬದ್ಲಾಲ್ಲ್ಯಾ ವಿವಿಯಾನಾಚ್ಯಾ ಜಿನೊಸಾಚೊ ಅಂದಾಜ್ಚ್ ನಾತ್ಲ್ಲೊ ಚಾರ್ಲ್ಸ್, ಸಗ್ಳೊಚ್ ಚಿಂತ್ನಾನಿಂ ಬುಡೊನ್ ಗೆಲೊ. ಕ್ಯಾಥರೀನಾಕ್ಯ್ ತಾಣೆಂ ಹ್ಯಾ ವಿಶಿಂ ಕಾಂಯ್ ಸಾಂಗ್ಚಾ ಪರಿಂ ನಾತ್ಲ್ಲೆಂ.
ವಿವಿಯಾನಾಕ್ ಹಾವೆಂ ಫಕತ್ತ್ ತಾಚ್ಯಾ ಬರ್ತ್ಡೇಚ್ಯಾ ಬರ್ಯಾ ದಿಸಾಕ್ ಲಾಗೊನ್ ಆಪ್ಣಾಚಾ ಘರಾ ಆಪಯಿಲ್ಲೆಂ ಶಿವಾಯ್, ತಾಕಾ ಆಪ್ಣೆಂ ಆಪವ್ಣೆಂ ದಿಲ್ಲ್ಯಾಂತ್ ದುಸ್ರೊ ಕಾಂಯ್ ಮತ್ಲಾಬ್ ನಾತ್ಲ್ಲೊ. ಆಸಲ್ಯಾ ಮ್ಹಜ್ಯೆರ್, ಕಾಂಯ್ಚ್ ಪಾಟಿಂ ಫುಡೆಂ ಪಳಯ್ನಾಸ್ತಾನಾ, ವಿವಿಯಾನಾನ್ ತಾಚ್ಯಾ ಆವಯ್ಚಾ ಮರ್ಣಾಚೊ ಆಪ್ರಾದ್ ಥಾಪ್ಲೊ? ಕಾರಾಣ್ ತರ್ಯ್ ಕಿತೆಂ? ವಿವಿಯಾನಾಚಾ ಆವಯ್ಚ್ಯಾ ಮರ್ಣಾಕ್ ಆನಿ ಮ್ಹಾಕಾ ಕಸಲೊ ಸಂಭಂಧ್? ಚಿಂತ್ಚ್ಯಾ ಮತಿಕ್ ಕಾಂಯ್ಚ್ ಸಮ್ಜಾನಾಸ್ತಾನಾ ವೆತಾನಾ ಚಾರ್ಲ್ಸಾಕ್ ವೇಳ್ ಪಾಶಾರ್ ಕರುಂಕ್ಯ್ ಕಷ್ಟ್ ಜಾಲೆ.
ಸಾಂಜೆರ್, ಆಫೀಸಾ ಥಾವ್ನ್ ನಿಟ್ಟ್ ರೆಸ್ಟೋರಂಟಾಕ್ ಆಯಿಲ್ಲ್ಯಾ ತಾಕಾ, ವಿವಿಯಾನಾ ಝಳ್ಕಾಲೆಂ ನಾ. "ಭೋವ್ಶ್ಯಾ ವೇಳ್ ಕರುನ್ ಯೆತೆಲೆಂ!" ಚಿಂತ್ಲ್ಲೊ ಚಾರ್ಲ್ಸ್, ರೆಸ್ಟೋರಂಟಾಂತ್ ಬಸೊಂಕ್ ಸಾದ್ಯ್ ಜಾಯ್ನಾಸ್ತಾನಾ ವೆತಾನಾ ಆಪ್ಲ್ಯಾ ರುಮಾಕ್ ಚಮ್ಕಾಲೊ. ಶಾವರಾಂತ್ ಫ್ರೆಶ್ ಜಾವ್ನ್, ಹುನ್ ಹುನ್ ಕಾಫಿ ಗಳ್ಯಾಕ್ ದೆಂವವ್ನ್, ಆದ್ಲೆ ದಿಸಾ ಪ್ಯಾಕ್ ಕರುನ್ ದವರ್ಲ್ಲೆಂ ವಿವಿಯಾನಾಚ್ಯಾ ಬರ್ತ್ಡೇ ಕ್ ತಾಕಾ ಮ್ಹಣೊನ್ ಹಾಡ್ಲ್ಲೆಂ ಗಿಫ್ಟ್ ಹಾತಿಂ ಘೆವ್ನ್, ತೊ ಪರ್ತ್ಯಾಕ್ ರೆಸ್ಟೋರಂಟಾ ತೆವ್ಶಿಂ ಚಮ್ಕಾಲೊ.
ಹ್ಯಾ ಪಾವ್ಟಿಂಯ್ ರೆಸ್ಟೋರಂಟಾಚಾ ಕೌಂಟರಾರ್ ದುಸ್ರೆಂ ಚಲಿ ಆಸ್ಲ್ಲೆಂ! ಹೆವ್ಶಿಂ ತೆವ್ಶಿಂ ಖಂಯ್ಸರ್ಯ್ ವಿವಿಯಾನಾಚಿ ಝಳಕ್ ತಾಕಾ ದಿಸ್ಲಿ ನಾ. ರೆಸ್ಟೋರಂಟಾಂತ್ ವಿಚಾರುಂಕ್ಯ್ ಚಾರ್ಲ್ಸಾಕ್ ಮನ್ ಆಯ್ಲೆಂ ನಾ. "ವಿವಿಯಾನಾ ಕಾಂಯ್ ಘರಾ ಆಸಾ?" ತಾಚಾ ಮತಿಂತ್ ದುಬಾವ್ ಉದೆಲೊ.
"ಕಿತೆಂಯ್ ಜಾಂವ್ದಿ ಆಜ್ ವಿವಿಯಾನಾಕ್ ಮೆಳೊಂಕ್ಚ್ ಜಾಯ್!" ಮತಿಂತ್ ದ್ರಡ್ ನಿರ್ಧಾರ್ ಕೆಲ್ಲೊ ಚಾರ್ಲ್ಸ್ ಆತಾಂ ಕ್ಯಾಥರೀನಾಚಾ ಘರಾ ತೆವ್ಶಿಂ ಚಮ್ಕಾಲೊ.
ಕ್ಯಾಥರೀನಾಚಾ ಘರಾ ಪಾವ್ಲ್ಲ್ಯಾ ಚಾರ್ಲ್ಸಾನ್, ಕ್ಯಾಥರೀನಾಚಾ ಘರಾಚಿ ಕಾಂಪಿಣ್ ಮಾರ್ಲಿ. ಘರ್ಚಾ ದಾರಾಚಿ ಕಾಂಪಿಣ್ ವ್ಹಾಜ್ಲ್ಲಿ ಆಯ್ಕೊನ್ ದಾರ್ ಉಗಡ್ಲ್ಲ್ಯಾ ಸೈಮನಾಕ್, ಉಗ್ತೆಂ ಕೆಲ್ಲ್ಯಾ ದಾರಾ ಮುಕಾರ್, ಪಯ್ಲೆ ಪಾವ್ಟಿಂ ಎಕ್ಲೊ ಇಂಡಿಯನ್ ತರ್ನಾಟೊ ದಿಷ್ಟಿಕ್ ಪಡ್ತಾನಾ,
"ಸರ್...., ಹಾಂವ್ ಚಾರ್ಲ್ಸ್! ಕ್ಯಾಥರೀನಾಚಾ ಆಫೀಸಾಂತ್ಚ್ ಕಾಮ್ ಕರ್ತಾಂ. ಮ್ಹಾಕಾ ಕ್ಯಾಥರೀನಾಕ್ ಮೆಳೊಂಕ್ ಜಾಯ್ ಆಸ್ಲ್ಲೆಂ!" ಚಾರ್ಲ್ಸಾನ್ ಆಪ್ಲಿ ವಳಕ್ ದಾಖಯ್ತಾನಾ, "ಕ್ಯಾಥೀ..... ಕ್ಯಾಥೀ.....?" ಸೈಮನಾನ್ ಆಪ್ಲ್ಯಾ ಬಾಯ್ಲೆಕ್ ಆಪಯ್ಲೆಂ.
ಕುಜ್ನಾಂತ್ ರಾಂದ್ಪಾಚಾ ಕಾಮಾರ್ ಆಸ್ಲ್ಲೆಂ ಕ್ಯಾಥರೀನ್, ಆಪ್ಣಾಕ್ ಸೈಮನಾನ್ ಆಪಯಿಲ್ಲೆಂ ಅಯ್ಕೊನ್ ಭಾಯ್ರ್ ಆಯ್ಲೆಂ. ಭಾಯ್ಲ್ಯಾ ಸಾಲಾಕ್ ಆಯಿಲ್ಲ್ಯಾ ಕ್ಯಾಥರೀನಾಕ್, ಆಪ್ಲ್ಯಾ ಘರ್ಚ್ಯಾ ದಾರಾ ಮುಕಾರ್ ಉಭೊ ಆಸ್ಲ್ಲ್ಯಾ ಚಾರ್ಲ್ಸಾಕ್ ಪಳವ್ನ್ ಆಶ್ಚರ್ಯ್ ಜಾಲೆಂ.
ಚಾರ್ಲ್ಸ್ ಹ್ಯಾ ವಗ್ತಾರ್ ಹಾಂಗಾ......? ಕ್ಯಾಥರೀನಾಕ್ ಕಾಂಯ್ ಸಮ್ಜಾಲೆಂ ನಾ.
"ಚಾರ್ಲ್ಸ್ ತುಂ...? ಯೇ...... ಭಿತರ್ ಯೇ!"
"ಎಕ್ಟುವಲ್ಲೀ ಕ್ಯಾಥರೀನ್...., ಹಾಂವ್ ವಿವಿಯಾನಾಕ್ ಮೆಳೊಂಕ್ ಆಯಿಲ್ಲೊಂ. ಹಾವೆಂ.....!" ಆಯ್ಚ್ಯಾ ಧನ್ಫರಾಂಚಾ, ಪೊನಾ ವಯ್ಲ್ಯಾ ಸಗ್ಳ್ಯಾ ಘಟನಾಕ್ ಕ್ಯಾಥರೀನ್ ಆನಿ ಸೈಮನಾಚಾ ಮುಕಾರ್ ಚಾರ್ಲ್ಸಾನ್ ವಿವರ್ಸಿಲೆಂ.
"ಐ ಯಾಮ್ ರಿಯಲ್ಲೀ ವೆರ್ರಿ ಸಾರ್ರಿ ಕ್ಯಾಥರೀನ್! ಮ್ಹಜ್ಯೆ ಥಾವ್ನ್ ವಿವಿಯಾನಾಕ್ ಕಾಂಯ್ ದೂಖ್ ಜಾಲಾಂ ಜಾಲ್ಯಾರ್ ಪರ್ತ್ಯಾಕ್ ಐ ಯಾಮ್ ವೆರ್ರಿ ಸಾರ್ರಿ. ತಾಚ್ಚ್ಯಾ ಜಲ್ಮಾದಿಸಾಕ್ ಶುಭಾಶಯ್ ಪಾಟಂವ್ಚೊ ಮಾತ್ರ್ ಮ್ಹಜೊ ಉದ್ದೇಶ್ ಜಾವ್ನ್ ಆಸ್ಲ್ಲೊ ಶಿವಾಯ್ ಹಾಂತುಂ ಮ್ಹಜೊ ದುಸ್ರೊ ಕಸಲೊಯ್ ಮತ್ಲಬ್ ನಾತ್ಲ್ಲೊ. ಹಾವೆಂ ತಾಚ್ಯೆ ಖಾತಿರ್ ಹೆಂ ಏಕ್ ಗಿಫ್ಟ್ ಘೆತ್ಲ್ಲೆಂ. ಹ್ಯಾ ಗಿಫ್ಟಾಕ್ ಹಾಂವ್ ತಾಣೆಂ ಕಾಮ್ ಕರ್ಚ್ಯಾ ರೆಸ್ಟೋರಂಟಾಂತ್ ಪ್ರೆಸೆಂಟ್ ಕರುಂಕ್ ಸಕಾನಾತ್ಲ್ಲ್ಯಾನ್ ತಾಕಾ ಹಾವೆಂ ಮ್ಹಜ್ಯಾ ರುಮಾಕ್ ಆಪಯಿಲ್ಲೆಂ ಶಿವಾಯ್ ದುಸ್ರ್ಯಾ ಕಸಲ್ಯಾಯ್ ಕಾರಾಣಾ ಖಾತಿರ್ ನ್ಹಯ್! ತಾಕಾ ಜರ್ ಹೆಂ ಗಿಫ್ಟ್ ನಾಕಾ ಜಾಲ್ಯಾರ್ ನಾಕಾ. ವ್ಹಡ್ ನಾ! ಪುಣ್ ಹೆಂ ತಾಚ್ಯೆ ಖಾತಿರ್ ಹಾವೆಂ ಕಾಲ್ ಘೆತ್ಲ್ಲೆಂ. ತುಮ್ಕಾಂ ಜರ್ ಬರೆಂ ಮ್ಹಣೊನ್ ದಿಸ್ತಾ ಜಾಲ್ಯಾರ್ ಮಾತ್ರ್....!" ಚಾರ್ಲ್ಸಾಚಾ ತಾಳ್ಯಾಂತ್ ಉಪ್ಯೆಂವ್ಚಿ ದೀನಾತಾ ಕ್ಯಾಥರೀನಾಕ್ ಸ್ಪಶ್ಟ್ ದಿಸ್ಲಿ.
"ತಶೆಂ ಕಾಂಯ್ ನಾ ಚಾರ್ಲ್ಸ್. ಹೆಂ ಮ್ಯಾಂಚೆಸ್ಟರ್! ತುಂ ಅಜೂನ್ ಹ್ಯಾ ಮ್ಯಾಂಚೆಸ್ಟರಾಕ್ ವಳ್ಕಾನಾಂಯ್. ಹಾಂಗಾಸರ್ ಆಪ್ಲ್ಯಾ ಮತ್ಲಾಬಾ ಶಿವಾಯ್, ಕೊಣ್ಯ್ ಕೊಣಾಯ್ಕ್ಯ್ ಏಕ್ ಸಿಗರೇಟ್ ಪಾಸೊನ್ ಆಫರ್ ಕರಿನಾಂತ್. ವಿವಿಯಾನಾ ಎದೊಳ್ಯ್ ಘರಾ ಯೇಂವ್ಕ್ ನಾ. ತೆ ಸದಾಂಚಾ ಪರಿಂ ಆಫಿಸಾ ಥಾವ್ನ್ ನಿಟ್ಟ್ ರೆಸ್ಟೋರಂಟಾಕ್ ವೆತಾ. ಮ್ಹಾಕಾ ತಾಣೆಂ ಪೋನ್ ಕರುನ್ಯ್ ಕಾಂಯ್ ಸಾಂಗೊಂಕ್ ನಾ. ರೆಸ್ಟೋರಂಟಾಂತ್ ತೆಂ ನಾ ಮ್ಹಣೊನ್ ತುಂ ಮ್ಹಣ್ತಾಯ್ ಜಾಲ್ಯಾರ್ ತೆಂ ಖಂಯ್ ಗೆಲಾಂ ಜಾವ್ಯೆತ್? ಕ್ಯಾಥರೀನಾಕ್ಯ್ ವಿವಿಯಾನಾ ವಿಶಿಂ ಕಾಂಯ್ ಖಬಾರ್ ನಾತ್ಲ್ಲಿ.
"ಕಿತೆಂಯ್ ಜಾಂವ್. ತೆಂ ಆಯ್ಲ್ಯಾ ಉಪ್ರಾಂತ್ ಹಾಂವ್ ತಾಚ್ಯೆಲಾಗಿಂ ಉಲಯ್ತಾಂ!" ಕ್ಯಾಥರೀನಾನ್ ಸಾಂಗ್ಲ್ಲೆಂ ಆಯ್ಕೊನ್, ಚಾರ್ಲ್ಸಾಕ್ ಥೊಡೆಂ ಸಮಾದಾನ್ ಜಾಲೆಂ. ಆಪ್ಣೆಂ ವಿವಿಯಾನಾ ಖಾತಿರ್ ಹಾಡ್ಲ್ಲೆಂ, ತಾಚ್ಯಾ ಬರ್ತ್ಡೇ ಚೆಂ ಗಿಪ್ಟ್, ಥಂಯ್ಚ್ ಆಪ್ಣೆ ಬಸ್ಲೆಲ್ಯಾ ಸೋಫಾಚೆರ್ ದವರುನ್,
"ಹೆಂ ವಿವಿಯಾನಾಕ್ ದೀ ಕ್ಯಾಥರೀನ್! ಪ್ಲೀಸ್...!" ಚಾರ್ಲ್ಸ್ ಆತಾಂ ಸೋಫಾ ವಯ್ಲೊ ಉಟೊನ್ ಉಭೊ ಜಾಲೊ. ವಿವಿಯಾನಾಕ್ ಪಳಯ್ನಾಸ್ತಾನಾ, ತಾಕಾ, ಪಾಟಿಂ ಆಪ್ಲ್ಯಾ ರುಮಾಕ್ ವಚೊಂಕ್ ಮನ್ ಆಯಿಲ್ನಾ ತರ್ಯ್, ತಾಚ್ಯೆ ಮುಕಾರ್ ದುಸ್ರಿ ವಾಟ್ ನಾತ್ಲ್ಲಿ. ಕ್ಯಾಥರೀನಾಕ್ ಬರೆಂ ಮಾಗೊನ್ ತೊ ಕ್ಯಾಥರೀನಾಚಾ ಘರಾ ಥಾವ್ನ್ ಭಾಯ್ರ್ ಪಡ್ಲೊ. ಮನ್ ನಾತ್ಲೆಲ್ಯಾ ಮನಾಕ್ ಭಲಾತ್ಕಾರೆನ್ ಮ್ಹಳ್ಳ್ಯಾಪರಿಂ ವೊಡುನ್, ತೊ ಆಪ್ಲ್ಯಾ ರುಮಾ ತೆವ್ಶಿಂ ಚಲೊಂಕ್ ಲಾಗ್ಲೊ.
ಮತಿಕ್ ನಾತ್ಲ್ಲ್ಯಾ ಸಮಧಾನೆ ವರ್ವಿಂ, ಆಜ್ ಹರ್ಶೆಂಚ್ಯಾ ವೇಳಾಚ್ಯಾಕ್ಯ್ ಪಯ್ಲೆಂಚ್ ನಿದೊಂಕ್ ಗೆಲ್ಲ್ಯಾ ಚಾರ್ಲ್ಸಾಚಾ ದೊಳ್ಯಾಂ ಮುಕಾರ್ ನೀದ್ಚ್ ಆಯ್ಲಿನಾ. ತೊ ವಿವಿಯಾನಾಕ್ಚ್ ಚಿಂತಾಲೊ. ತಾಕಾ ತ್ಯಾ ಪೊನಾ ವಯ್ಲಿಂ ವಿವಿಯಾನಾಚಿಂ ಉತ್ರಾಂ, ಪರ್ತ್ಯಾಕ್ ಪರ್ತ್ಯಾಕ್ ಆಪ್ಲ್ಯಾ ಕಾನಾಂಕ್ ಆಯ್ಕೊನ್ ಯೆತಾತ್ ತಶೆಂ ಜಾಲಿಂ.
"ಯು ಕಿಲ್ಡ್ ಮೈ ಮದರ್. ಯು.... ಯು ಕಿಲ್ದ್ ಮೈ ಮದರ್!" ಆಪ್ಲ್ಯಾ ದೊಳ್ಯಾಂ ಮುಕಾರ್ ರಾವ್ಲ್ಲೆಂ ವಿವಿಯಾನಾ, ಆಪ್ಣಾಕ್ ಬೋಟ್ ಜೊಕುನ್ ಸಾಂಗ್ತಾ ತಶೆಂ ಚಾರ್ಲ್ಸಾಕ್ ದಿಸ್ತಾಲೆಂ. ಹೆವ್ಶಿಂ ತೆವ್ಶಿಂ ಕೂಸ್ ಬದ್ಲುನ್ ನಿದ್ಲ್ಯಾರ್ಯ್ ಕಾಂಯ್ ಪ್ರಯೋಜನ್ ಜಾಯ್ನಾಸ್ತಾನಾ ವೆತಾನಾ, ಖಾಟಿಯೆರ್ ಥಾವ್ನ್ ತೊ ಉಟೊನ್ ಬಸ್ಲೊ.
ತಿತ್ಲ್ಯಾರ್...!
ಚಾರ್ಲ್ಸಾಚಾ ರುಮಾಂತ್ಲ್ಯಾ, ವಾರ್ಡ್ರೋಬಾಚಾ ದೆಗೆನ್ ಆಸ್ಲ್ಲ್ಯಾ ಡ್ರೆಸ್ಸಿಂಗ್ ಟೇಬಲಾ ವಯ್ಲೆಂ ಟೆಲಿಪೋನ್ ವ್ಹಾಜೊಂಕ್ ಲಾಗ್ಲೆಂ.
"ಆತಾಂ ಕೋಣ್ ಜಾವ್ಯೆತ್?" ಚಿಂತ್ಲ್ಲ್ಯಾ ಚಾರ್ಲ್ಸಾನ್, ಬೆಡ್ಡಾರ್ ಥಾವ್ನ್ ದೆಂವೊನ್ ವಚೊನ್ ಪೊನಾಚೆಂ ರಿಸೀವರ್ ಕಾಡ್ಲೆಂ.
"ಹಲೋ....?"
"ಚಾರ್ಲ್ಸ್ ತುಕಾ ಆತಾಂ ಆಮ್ಚಾ ಘರಾ ಯೆವ್ಯೆತ್?"
"ಕ್ಯಾಥರೀನ್....?"
"ಲೆಟ್ ಅಸ್ ಸೆಲೆಬ್ರೇಟ್ ವಿವಿಯಾನಾಸ್ ಬರ್ತ್ಡೇ"
"ಆತಾಂ...?"
"ಜಸ್ಟ್ ಎ ಡಿನ್ನರ್......!"
"ವಿವಿಯಾನಾ ಆಯ್ಲಾಂ?"
"ವ್ಹಯ್! ತುಂ ಯೆತಾಯ್?"
"ಆಂ.... ಓ.ಕೆ!"
ಪೋನ್ ಡಿಸ್ಕನೆಕ್ಟ್ ಜಾತಾನಾ ಚಾರ್ಲ್ಸಾಕ್ ಮಿಸ್ತೆರ್ ಸಮ್ಜಾಲೊ ನಾ. "ಕಿತೆಂಯ್ ಜಾಂವ್ದಿ ವಿವಿಯನಾಕ್ ಆಜ್ ಸಂಪೂರ್ಣ್ ಸಮ್ಜೊಂಕ್ ಹೊಚ್ ಬರೊ ಆವ್ಕಾಸ್!" ಘುಸ್ಪಡ್ಲೆಲ್ಯಾ ಆಪ್ಲ್ಯಾ ಮತಿಕ್ ಆಪ್ಣೆಚ್ ಸಮಾಧಾನ್ ಕರುನ್, ವೆವೆಗ್ಗಿಂ ನ್ಹೆಸೊನ್ ರುಮಾ ಥಾವ್ನ್ ತೊ ಭಾಯ್ರ್ ಸರ್ಲೊ. ಕ್ಯಾಥರೀನಾಚೆಂ ಘರ್ ಚಡ್ ಪಯ್ಸ್ ಕಾಂಯ್ ನಾತ್ಲ್ಲೆಂ. ತ್ಯಾಚ್ ತಾಣೆಂ ರಾಂವ್ಚ್ಯಾ ಲೇನಾಚಾ ಅಖೇರಿಕ್ ಆಸ್ಲ್ಲೆಂ. ಕ್ಯಾಥರೀನಾನ್ ಪೋನ್ ಕರುನ್ ಆರ್ಧ್ಯಾ ವೊರಾ ಭಿತರ್ ಚಾರ್ಲ್ಸ್ ವಿವಿಯಾನಾಚಾ ಘರಾ ಪಾವ್ಲೊ. ಘರಾ ಭಿತರ್ ಪಾಂಯ್ ದವರ್ತಾನಾಚ್ ಮುಕಾರ್ ಮೆಳ್ಲ್ಲ್ಯಾ ವಿವಿಯಾನಾಕ್ ಪಳವ್ನ್,
"ಹ್ಯಾಪ್ಪಿ ಬರ್ತ್ಡೇ ವಿವಿಯಾನಾ!" ಚಾರ್ಲ್ಸಾನ್ ವಿವಿಯಾನಾ ಮುಕಾರ್ ಭಲತ್ಕಾರೆನ್ ಮ್ಹಳ್ಳ್ಯಾಪರಿಂ ಆಪ್ಲ್ಯಾ ತೊಂಡಾರ್ ಹಾಸೊ ಹಾಡುಂಕ್ ಪ್ರಯತ್ನ್ ಕೆಲೆಂ. ಚಾರ್ಲ್ಸಾನ್ ವಿವಿಯಾನಾಕ್ ಹಾತ್ ಮೆಳಯ್ತಾನಾ, ವಿವಿಯಾನಾನ್ ಆಪ್ಲ್ಯಾ ಸಾದ್ಯಾ ಸ್ವಭಾವಾಚಾ ತೊಂಡಾರ್ ಕಾಂಯ್ಚ್ ಬದ್ಲಾವಣ್ ಹಾಡಿನಾಸ್ತಾನಾ, ಆಪ್ಲೊ ಹಾತ್ ಮೆಳಯ್ಲೊ.
"ಥ್ಯಾಂಕ್ಸ್...!" ಏಕ್ಚ್ಚ್ ಸಬ್ದ್ ವಿವಿಯಾನಾಚಾ ತೊಂಡಾ ಥಾವ್ನ್ ಭಾಯ್ರ್ ಪಡ್ಲ್ಲೊ.
ತಿತ್ಲ್ಯಾರ್ ಭಿತರ್ ಥಾವ್ನ್ ಭಾಯ್ರ್ ಆಯಿಲ್ಲಿ ಕ್ಯಾಥರೀನ್,
"ತುಂವೆಂ ವಿವಿಯಾನಾಕ್ ಹಾಡ್ಲೆಲೆಂ ಗಿಪ್ಟ್ ಥಂಯ್ಚ್ ಆಸಾ. ತೆಂ ತುಂಚ್ ತಾಕಾ ದೀ!" ಕ್ಯಾಥರೀನಾನ್ ಜಾಗಯ್ತಾನಾ, ಥಂಯ್ಚ್ ಸೋಫಾರ್ ಥೊಡ್ಯಾ ವೆಳಾ ಪಯ್ಲೆಂ, ಆಪ್ಣೆಂ ದವರ್ಲೆಲೆಂ ಗಿಫ್ಟ್, ಆಪ್ಲ್ಯಾ ಹಾತಿಂ ಘೆವ್ನ್,
"ವಿವಿಯಾನಾ ಐ ಯಾಮ್ ವೆರ್ರಿ ಸಾರ್ರಿ! ತುಕಾ ತುಜ್ಯಾ ಬರ್ತ್ಡೇಕ್ ವಿಶ್ ಕರ್ಚೊ ಮಾತ್ರ್ ಮ್ಹಜೊ ಇರಾದೊ ಆಸ್ಲ್ಲೊ ಶಿವಾಯ್ ದುಸ್ರೊ ನ್ಹಯ್! ಮ್ಹಜ್ಯೆ ಥಾವ್ನ್ ತುಕಾ ಕಾಂಯ್...."
"ಇಟ್ಸ್ ಓ.ಕೆ. ಚಾರ್ಲ್ಸ್. ಪುಣ್ ಮ್ಹಾಕಾ ಕಿತ್ಯಾಕ್ಗೀ ಸಗ್ಳೆ ಚಲೆ ಎಕಾಚ್ ರುಪಾಚೆ ಮ್ಹಳ್ಳ್ಯಾಪರಿಂ ದಿಸ್ತಾತ್!" ಚಾರ್ಲ್ಸಾಚೆಂ ಉಲವ್ಣೆಂ ಆಖೇರ್ ಜಾಂವ್ಚಾ ಪಯ್ಲೆಂಚ್, ತಾಚ್ಯಾ ಉತ್ರಾಂಕ್ ಮಧೆಂಚ್ ತುಟವ್ನ್ ವಿವಿಯಾನಾ ಉಲಯ್ಲೆಂ.
"ತುಜ್ಯಾ ಮತಿಂತ್ ಕಿತೆಂಯ್ ಆಸ್ಲ್ಯಾರ್ ಸಾಂಗ್ ವಿವಿಯಾನಾ. ಮತಿಂತ್ಲೆಂ ಹೆರಾಂಲಾಗಿಂ ಸಾಂಗ್ಲ್ಯಾರ್ ಮತಿಚಿ ಜಡಾಯ್ ಹಾಳು ಜಾತಾ!" ಶಾಂತ್ಪಣಿಂ ಚಾರ್ಲ್ಸ್ ಉಲಯ್ಲೊ. ವಿವಿಯಾನಾಚಾ ಮುಖಮಳಾಕ್ ಪಳೆಲ್ಲ್ಯಾ ತಾಕಾ, ತ್ಯಾ ಮುಖಮಳಾರ್, ಅಜೂನ್ ಕಸಲೆಂಗೀ ನಾ ಸಮಾಧಾನ್ ಆಸ್ಲ್ಲ್ಯಾ ಪರಿಂ ದಿಸ್ಲೆಂ.
"ಏಕ್ ವಿಶಯ್ ತುಂ ಜಾಣಾಂಯ್ ಚಾರ್ಲ್ಸ್?" ವಿವಿಯಾನಾಚೊ ತೊಂಡಾಚೊ ಛಾರೊ ಬದ್ಲಾಲೊ.
"ಕಿತೆಂ?"
"ತುಂ ಚಿಂತಾಯ್ ತಿತ್ಲೆಂ ಹಾಂವ್ ಅಭಲ್ ನ್ಹಯ್. ಮ್ಹಜ್ಯಾ ಮತಿಂತ್ಲೆ ಹೆರಾ ಲಾಗಿಂ ಸಾಂಗೊನ್ ಮತ್ ಹಾಳು ಕರುಂಕ್ ಪೆಚಾಡ್ಚೆಂ, ಫಕತ್ತ್ ಲಾಚಾರ್ ಮನ್ಶ್ಯಾಂನಿ, ಆನಿ ಜಿವಿತಾಕ್ ಜಿಯೆಂವ್ಕ್ ಕಳಿತ್ ನಾಸ್ತಾನಾ ಭಿಯೆತೆಲ್ಯಾ ಭಿವ್ಕುರ್ಯಾನಿಂ ಮಾತ್ರ್! ಹಾಂವ್ ಜಿವಿತಾಕ್ ಭಿಯೆನಾ!" ವಿವಿಯಾನಾ ಉಲಯ್ತಾನಾ ಕಸಲ್ಯಾಗೀ ಎಕಾ ಥರಾಚಿ ದ್ರಡತಾ ಆಸ್ಲ್ಲಿ ತಾಚ್ಯಾ ತಾಳ್ಯಾಂತ್. ತಾಚ್ಯಾ ಮುಕಾರ್ ಚಾರ್ಲ್ಸಾಕ್ ಕಾಂಯ್ಚ್ ಉಲಂವ್ಕ್ ಜಾಲೆಂ ನಾ.
"ಎನಿವೇ...,ಥ್ಯಾಂಕ್ ಯು ಫಾರ್ ದಿಸ್ ಗಿಪ್ಟ್!" ಪರ್ತ್ಯಾಕ್ ವಿವಿಯಾನಾಚ್ ಉಲಯ್ಲೆಂ. ಆತಾಂ ಕ್ರಿಸ್ಟಿನಾ ಆನಿ ತಾಚೊ ಭಾವ್ ಅಲೆಕ್ಸ್ ದೊಗಾಂಯ್ ಚಾರ್ಲ್ಸಾಕ್ ಮೆಳೊಂಕ್ ಆಯ್ಲಿಂ.
"ಹಾಂತುಂ ಥ್ಯಾಂಕ್ಸ್ ಕಿತೆಂ ವಿವಿಯಾನಾ? ಆಜ್ ತುಜೊ ಬರ್ತ್ಡೇ. ಐ ಜಸ್ಟ್ ಕೇರ್ ಫಾರ್ ಯು. ದೇಟ್ಸ್ ಆಲ್.....!" ಚಾರ್ಲ್ಸಾನ್ ಸಾಂಗ್ತಾನಾ ವಿವಿಯಾನಾನ್ ಥೊಡ್ಯಾ ಖಿಣಾಂಕ್ ಚಾರ್ಲ್ಸಾಕ್ಚ್ ಪಳೆಲೆಂ.
ಮ್ಯಾಂಚೆಸ್ಟರಾಂತ್ ಏಕ್ ದುಸ್ರ್ಯಾಚೊ ಮೋಗ್ ಕರ್ಚಿಂ ಮನ್ಶ್ಯಾಂ ಮಸ್ತ್ ಮೆಳ್ತಾತ್. ಪುಣ್ ಆಜ್ ಏಕ್ ಪರ್ಕಿ ಚಲೊ ಆಪ್ಣಾಚಿ ಜತನ್ ಕರುಂಕ್ ಆಯ್ತೊ ಜಾಲಾ ತೆಂ ಕಳ್ತಾನಾ, ಆಯ್ಚಾ ಚಾರ್ಲ್ಸಾಚಾ ಉಲವ್ಣ್ಯಾಂತ್ ಆನಿ ವರ್ತನಾಂತ್, ತಾಚೊ ಕಾಂಯ್ ಮತ್ಲಬ್ ಆಸಾ ಮ್ಹಳ್ಳ್ಯಾಪರಿಂ ವಿವಿಯಾನಾಕ್ ದಿಸ್ಲೊ ನಾ. ಕಿತ್ಯಾಕ್ಗೀ ಪಯ್ಲೆ ಪಾವ್ಟಿಂ, ಎಕಾ ಚಲ್ಯಾ ವಯ್ರ್ ತಾಕಾ ಭರ್ವಸೊ ಉದೆಲೊ.
ಥೊಡ್ಯಾ ವಾಯ್ನಾ ಸಂಗಿಂ, ಲ್ಹಾನ್ ಮಟ್ಟಾಚೆಂ ಬರೆಂ ಜೆವಾಣ್, ವಿವಿಯಾನಾಚಾ ಜಲ್ಮಾ ದಿಸಾಚಾ ತರ್ಫೆಚೆಂ, ಚಾರ್ಲ್ಸಾಕ್ ಬರೆಂಚ್ ಪಸಂದ್ ಜಾಲೆಂ. ಜೆವ್ಣಾ ಮಧೆಂ, ಚಾರ್ಲ್ಸಾನ್, ಆಪುಣ್ ಆಪ್ಣಾಚಿ ಮ್ಯಾಂಚೆಸ್ಟರಾಕ್ ಸೊಧುನ್ ಆಯಿಲ್ಲಿ ಜಿವಿತಾ ವಾಟ್ ಸಾಂಗ್ತಾನಾ, ಎಡಿನ್ಬರ್ಗಾ ಥಾವ್ನ್ ಕ್ಯಾಥರೀನ್ ಕಶೆಂ ಮ್ಯಾಂಚೆಸ್ಟರಾಕ್ ಪಾವ್ಲೆಂ ತೆಂ, ತಾಂಚೆ ಥಾವ್ನ್ ಚಾರ್ಲ್ಸಾನ್ ಆಯ್ಕಾಲೆಂ.. ವಿವಿಯಾನಾಚಾ ಜಲ್ಮಾ ದಿಸಾನ್ ನಿಜಾಯ್ಕ್ಯ್ ಚಾರ್ಲ್ಸ್ ಆನಿ ವಿವಿಯಾನಾಚಾ ಕುಟ್ಮಾ ಮಧೆಂ ಸಂಭಂಧ್ ಉಬ್ಜಾಯಿಲ್ಲೊ.
ಹ್ಯಾ ಉಪ್ರಾಂತ್ ವಿವಿಯಾನಾ ಆನಿ ಚಾರ್ಲ್ಸಾಚಿ ಇಶ್ಟಾಗತ್ ವ್ಹಾಡೊನ್, ತಿ ಇಷ್ಟಾಗಾತ್ ತಾಂಚ್ಯಾ ಕಾಜಾರಾಚಾ ನಿರ್ಧಾರಾಕ್ ಪಾವ್ಲಿ. ಹ್ಯಾ ನಿರ್ಧಾರಾನ್ ವಿವಿಯಾನಾ ಆನಿ ಚಾರ್ಲ್ಸಾಚೆರ್ ಕಾಂಯ್ ಪ್ರಭಾವ್ ಗಾಲುಂಕ್ ನಾ ಜಾಲ್ಯಾರ್ಯ್, ಗಾಂವಾಂತ್ ಆಸ್ಲ್ಲ್ಯಾ ಚಾರ್ಲ್ಸಾಚಾ ಆವಯ್ ಬಾಪಯ್ಚೆರ್, ಹಾಚೊ ಪ್ರಭಾವ್ ಬರೊಚ್ ಪಡ್ಲೊ.
ಎಸ್ತೆಲ್, ಚಾರ್ಲ್ಸಾಚಿ ಆವಯ್, ಆಪ್ಲ್ಯಾ ನಿಮಾಣ್ಯಾ ಪುತಾಕ್ ಚಾರ್ಲ್ಸಾಕ್, ಆಪ್ಲ್ಯಾಚ್ ಗಾಂವ್ಚಾ ಚಲಿಯೆ ಲಾಗಿಂಚ್ ಕಾಜಾರ್ ಕರಂವ್ಚಾ ವಿಶಿಂ ಚಿಂತಾಲಿ. ಮಾಲ್ಗಡ್ಯಾ ಪುತಾಚಿ, ಫ್ರಾನ್ಸಿಸಾಚಿ ಕಾಜಾರಾಚಿ ಖಬಾರ್ ಆಯ್ಕಾಲ್ಯಾ ಉಪ್ರಾಂತ್, ಆತಾಂ ಘೊವಾ ಬಾಯ್ಲೆಚೊ ಭರ್ವಸೊ, ತಾಂಚಾ ನಿಮಾಣ್ಯಾ ಪುತಾಚೆರ್ಚ್ ಉರ್ಲ್ಲೊ. ಒಪ್ಸುನ್ ದಿಲ್ಲ್ಯಾ ಧುವಾಂಚೆರ್ ಕಾಂಯ್ ಭರ್ವಸೊ ಕರ್ಚೆಂ ಹಕ್ಕ್ ತಾಣಿಂ ಹೊಗ್ಡಾಯಿಲ್ಲೆಂ. ಪುಣ್, ಆತಾಂ ಚಾರ್ಲ್ಸಾಚಿ ಖಬಾರ್ ಆಯ್ಕೊನ್, ತಾಂಚೊ ನಿಮಾಣೊ ಭರ್ವಸೊ ಪಾಸೊನ್ ಕೊಸ್ಳೊನ್ ಗೆಲ್ಲ್ಯಾ ಪರಿಂ ಜಾಲೊ.
"ನಿಜಾಯ್ಕ್ಯ್ ಎಸ್ತೆಲಾ ಆಜ್ ತ್ಯಾ ಕಾಸ್ಮೀರಾಚೆಂಚ್ ನಶೀಬ್ ಬರೆಂ ಆಸಾ. ತಾಚ್ಯಾ ಘರಾಂತ್ ತಾಕಾ ಖಾಂವ್ಕ್ ಜೇಂವ್ಕ್ ಉಣೆಂಪಣ್ ಆಸಾ ಜಾಲ್ಯಾರ್ಯ್, ತಾಚ್ಯಾ ಘರಾಂತ್ ಮಾಯಾ ಮೋಗ್ ಆನಿ ಎಕ್ವಟ್ ಆಸಾ. ರಾಂದ್ಣಿಂತ್ ಜಳಂವ್ಕ್ ಲಾಂಕುಡ್ ನಾ ಜಾಲ್ಯಾರ್ಯ್, ತೊ ಮೊರ್ತಾನಾ, ತಾಚ್ಯಾ ಮೊಡ್ಯಾಕ್ ಖಾಂದ್ ದೀಂವ್ಕ್, ತಾಣೆಂ ಜಲ್ಮ್ ದಿಲ್ಲ್ಯಾ ತಾಚ್ಯಾ ಪುತಾಂಚೆ ಹಾತ್ ಪಾಂಯ್ ಘಟ್ ಆಸಾತ್. ಆಮ್ಚೆಂ ಕಿತೆಂ ಜಾತೆಲೆಂ ಕೋಣ್ ಜಾಣಾಂ?"
ಜೆರೊಮ್ ಆತಾಂ ಸಗ್ಳೊಚ್ ನಿರಾಶಿ ಜಾಲ್ಲೊ. ಗಾವಾಂತ್ ಸಗ್ಳ್ಯಾಂಕ್ಯ್ ಜೆರೊಮ್ ವ್ಹಡ್ಲೊ ಮನಿಸ್. ಪರ್ಗಾವಾಂತ್ಲ್ಯಾ ಭುರ್ಗ್ಯಾಂಚೊ ಬಾಪಯ್. ಪುಣ್ ಭಿತರ್ಲ್ಯಾ ಭಿತರ್ ತೊ ಆಪ್ಲ್ಯಾ ಫುಡಾರಾಚೆಂ ಚಿಂತುನ್ ಪೊಕೊಳ್ ಜಾಲ್ಲೊ.
ಜಾಲ್ಮಾಲ್ಯಾ ಭುರ್ಗ್ಯಾಕ್, ತಾಚಿಂ ಆವಯ್ ಬಾಪಯ್ ಕಶೆಂ ತ್ಯಾ ಭುರ್ಗ್ಯಾಚೊ ಆಧಾರ್, ತಶೆಂ ಬಾಗ್ವಾಲ್ಲ್ಯಾ ಪಾಟಿಕ್, ತರ್ನಾಟಿಂ ಭುರ್ಗಿಂ ಆಧಾರ್. ಪುಣ್ ಹೆಂ ಕೊಣ್ಯ್ ಚಿಂತುಕ್ ವೆತಾ? ಮತಿಕ್ ನಾತ್ಲ್ಲ್ಯಾ ಸಮಾಧಾನೆನ್ ಜೆರೊಮಾಚಾ ರಗ್ತಾಂತ್ ಸಾಕರ್ ಆನಿ ರಗ್ತಾಚೊ ಒತ್ತಡ್ ವ್ಹಾಡಯ್ಲೊ ಶಿವಾಯ್, ತಾಣೆಂ ಆಶೆಲ್ಲ್ಯಾ ಪರಿಂ ತಾಚ್ಯಾ ಭುರ್ಗ್ಯಾಂಚೊ ಸಾಂಗಾತ್ ತಾಕಾ ಮೆಳ್ಚೊ ಸಂಭವ್, ತಾಚ್ಯಾ ದೊಳ್ಯಾಂ ಮುಕಾರ್ ಉದೆಲೊ ನಾ.
ಖಂಯ್ಚಾ ಹಾತಾನಿಂ ಆಪ್ಲ್ಯಾ ಭುರ್ಗ್ಯಾಂಕ್ ತಾಣೆಂ ಖೆಳಯಿಲ್ಲೆಂಗೀ, ಆಜ್ ತ್ಯಾಚ್ ಕಾಂಪ್ಚಾ ಹಾತಾಂಕ್ ಧರುನ್ ಚಲಂವ್ಚಾಕ್, ತಿಂಚ್ ಭುರ್ಗಿಂ ತಾಚ್ಯಾ ಸಾಂಗಾತಾ ನಾತ್ಲ್ಲಿಂ. ತಿಂ ತಾಂಚೆಂ ಬಿಡಾರ್ ಯಾ ತಾಂಚೊ ಪುಡಾರ್ ಸೊಧುನ್ ಪರ್ಗಾಂವಾಕ್ ಉಭ್ಲ್ಲಿಂ.
ಆಪ್ಲ್ಯಾ ಮಾಲ್ಗಡ್ಯಾ ಪುತಾಚೆಂ, ಫ್ರಾನ್ಸಿಸಾಚೆಂ ಕಾಜಾರ್ ಕಶೆಂಯ್ ಆಪ್ಲ್ಯಾ ಹಾತಾನಿಂ ಚಲವ್ನ್ ವರೊಂಕ್ ಜೆರೊಮಾಕ್ ಆನಿ ಎಸ್ತೆಲಾಕ್ ಸಾದ್ಯ್ ಜಾಲೆಂ ನಾ. ಜೆರೊಮ್ ಆನಿ ಎಸ್ತೆಲ್ ಹ್ಯಾಚ್ ಖರ್ಗವ್ಣೆಂತ್ ಆಸ್ತಾನಾ, ಆತಾಂ ಚಾರ್ಲ್ಸ್ಯ್ ಆಪ್ಲ್ಯಾ ಕಾಜಾರಾಕ್ ಭಾಯ್ರ್ ಸರ್ಲ್ಲೊ.
"ಆಮ್ಚೊ ಚಾರ್ಲಿ ತ್ಯಾ ಗೊರ್ಯಾ ಚೆಡ್ವಾ ಲಾಗಿಂ ಕಾಜಾರ್ ಜಾತಾ ಖಂಯ್. ತೆಂ ಕಿತೆಂ ಹಾಂಗಾ ಯೆತೆಲೆಂ? ಚಾರ್ಲಿಚಿ ಆಮಿಂ ಆಶಾ ಸೊಡ್ಲ್ಲ್ಯಾ ಪರಿಂಚ್!" ಎಸ್ತೆಲಾಚಾ ಮತಿಚೆರ್ ಕಾಳಿಂ ಮೊಡಾಂ ಮಾಂಡ್ಲ್ಲಿಂ.
ಜ್ಯಾ ಭುರ್ಗ್ಯಾಂಚಾ ಖಂತಿನ್ ಎಸ್ತೆಲಾಚಾ ಮತಿಂತ್ ಕಾಳಿಂ ಮೊಡಾಂ ಮಾಂಡ್ಲ್ಲಿಂ, ತ್ಯಾಚ್ ಮತಿಂತ್, ತಿಣೆಂ ತಿಚ್ಯಾ ಭುರ್ಗ್ಯಾಂಚೊ ಬರೊ ಫುಡಾರ್ ಆಶೆಲ್ಲೊ. ಆಪ್ಲಿಂ ಭುರ್ಗಿಂ ಬರೆಂ ಶಿಕೊನ್ ಬರ್ಯಾ ಫುಡಾರಾಕ್ ಪಾವ್ತಾನಾ, ತಿ ಕಿತ್ಲಿ ಖುಶ್ ಜಾಲ್ಲಿ ನಾ?
ಭುರ್ಗ್ಯಾಂಚೊ ಪುಡಾರ್ ಬರೊ ಜಾಂವ್ಚೊ ಪಳವ್ನ್, ಹರ್ಯೆಕ್ ಆವಯ್ ಬಾಪಯ್ ಖುಶಿ ಜಾತಾತ್ ಕೆದ್ನಾಂ? ಜೆದ್ನಾಂ ವರೇಗ್ ತ್ಯಾ ಆವಯ್ ಬಾಪಯ್ಚಾ ಹಾತಾ ಪಾಂಯಾಂಕ್ ಭಳ್ ಆಸ್ತಾ ತೆದ್ನಾಂ ವರೇಗ್.....!
ತ್ಯಾ ಉಪ್ರಾಂತ್....? ಎಸ್ತೆಲ್ ಆಪ್ಲ್ಯಾ ಮತಿಂತ್ ಚಿಂತ್ನಾಂ ಆಟಯ್ತಾಲಿ. ತಿಚ್ಯಾ ಆನಿ ತಿಚ್ಯಾ ಘೊವಾಚ್ಯಾ ಆಶೆಕ್ ಆನಿ ಖುಶೆಕ್ ಲಾಗೊನ್ಚ್ ತಾಣಿಂ ತಾಂಚಾಚ್ ಹಾತಾನ್ ತಾಂಚಾ ಭುರ್ಗ್ಯಾಂಕ್ ಪರ್ಗಾಂವಾಕ್ ದಾಡುನ್ ದಿಲ್ಲೆಂ. ತರ್ ಆತಾಂ......?
ತೆದ್ನಾಂ ಆಮಿಂ ಆಮ್ಚ್ಯಾ ಭುರ್ಗ್ಯಾಂಚೆಂ ಚಿಂತ್ಲೆಂ. ತರ್ ಆತಾಂ ಆಮ್ಚ್ಯಾ ವಿಶ್ಯಾಂತ್ ಚಿಂತುಂಕ್ ಜಾಯ್ ಜಾಲ್ಲೆಂ ಆಮ್ಚ್ಯಾ ಭುರ್ಗ್ಯಾಂಚೆಂ ಕರ್ತವ್ಯ್ ನ್ಹಯ್?
ಆಮ್ಚ್ಯಾ ಭುರ್ಗ್ಯಾಂಕ್, ತಾಂಚೆಂ ಬರೆಂ ಜಾತಾನಾ, ತಾಣಿಂ ಹ್ಯಾ ಆವಯ್ ಬಾಪಾಯ್ಚೆಂ ಚಿಂತ್ಲಾಂ? ಯಾ ತಾಂಕಾ ಹ್ಯಾ ವಿಶಿಂ ಚಿಂತುಕ್ ಜಾಯ್ ಮ್ಹಣೊನ್ ಭೊಗ್ಲಾಂ?
ಕಿತ್ಯಾಕ್? ಆಮ್ಚೆಂ ಜೀವನ್, ಜೀವನ್ ನ್ಹಯ್?
ತರ್ನಿ ಖೊಲಿ ಝಡ್ತಾನಾ ಆವಾಜ್ ಕರಿನಾ ತರ್ಯ್ ತಾಚೊ ಆವಾಜ್ ಸಗ್ಳ್ಯಾಂಕ್ ಆಯ್ಕಾತಾ. ಪಿಕಿ ಖೊಲಿ ಸುಕೊನ್ ಝಡ್ತಾನಾ ತಿಚೊ ಆವಾಜ್ ತಿಚೆಂ ರುದಾನ್ ಸಂಸಾರಾಕ್ ಆಯ್ಕಾತಾ ಜಾಲ್ಯಾರ್ಯ್ ಸಂಸಾರ್ ಕೆಪ್ಪೊ ಕಿತ್ಯಾಕ್ ಜಾತಾ? ಆಮ್ಚ್ಯಾ ಆವಾಜಾಕ್ ಆಯ್ಕೊಂಕ್ ಆಮ್ಚಿಂ ಭುರ್ಗಿಂ ಕಿತ್ಯಾಕ್ ಸಕಾನಾಂತ್? ಕಿತ್ಯಾಕ್? ತ್ಯಾ ಘರಾ ಪಾಟ್ಲ್ಯಾ ಮೊಗ್ರೆ ಝಡಾಂಕ್ ಸಾಂಜೆಚೆಂ ಉದಾಕ್ ಧರ್ಚಿ ಎಸ್ತೆಲ್ ಗುಪಿತ್ತ್ ಆಪ್ಲ್ಯಾ ದೊಳ್ಯಾಂನಿ ದುಖಾಂ ಗಳಯ್ತಾಲಿ.
ಆಪ್ಲ್ಯಾ ಘೊವಾ ಮುಕಾರ್, ಆಪ್ಲ್ಯಾ ಘೊವಾಚ್ಯಾ ಭಲಾಯ್ಕೆಚ್ಯಾ ಕಾರಾಣಾಕ್ ಲಾಗೊನ್, ತಿ, ಹ್ಯಾ ತಿಚ್ಯಾ ಕಾಳ್ಜಾಂತ್ಲ್ಯಾ ಸಿಂತಿಮೆಂತಾಂಕ್ ಉಮಾಳುಂಕ್ ಆವ್ಕಾಸ್ ಕರುನ್ ದೀನಾತ್ಲ್ಲಿ. ಪುಣ್, ಹ್ಯಾ ಮೊಗ್ರೆ ಝಡಾಂಕ್ ಉದಾಕ್ ದಿತಾನಾ, ತ್ಯಾ ತಿಚ್ಯಾ ಹಾತಾಂತ್ಲ್ಯಾ ಪೈಪಾ ಥಾವ್ನ್, ತೆಂ ಉದಾಕ್ ಶಿಂವೊರ್ ಜಾವ್ನ್ ಪಡ್ಚ್ಯಾ ಪರಿಂ, ತಿಚ್ಯಾ ಕಾಳ್ಜಾಂತ್ಲಿಂ ಭಗ್ಣಾಂ, ತ್ಯಾ ಉದ್ಕಾ ಭಾಶೆನ್ ಶಿಂವೊರ್ ಜಾವ್ನ್, ತಿಚ್ಯಾ ದೊಳ್ಯಾಂ ಥಾವ್ನ್ ಗಳೊನ್ ತಿಂ ತ್ಯಾ ಧರ್ಣಿರ್ ಶಿಂವೊರ್ತಾಲಿಂ.
ಆಜ್, ಜೆರೊಮ್ ಆನಿ ಎಸ್ತೆಲಾಚೊ ತಾಳೊಯ್ ಕೊಣಾಯ್ಕ್ಯ್ ಆಯ್ಕಾನಾತ್ಲ್ಲೊ. ಆಪ್ಲ್ಯಾ ಭುರ್ಗ್ಯಾಂಕ್ ಆಪ್ಣಾ ತೆವ್ಶಿಂ ಪಾಟಿಂ ಹಾಡಂವ್ಕ್ ತಾಣಿಂ ಮಾಗ್ಲ್ಲೆಂ ಮಾಗ್ಣೆಂ, ಭೆಟಯಿಲ್ಲಿಂ ಮಿಸಾಂ, ಪಳಯಿಲ್ಲಿ ವಾಟ್, ಕಾಂಯ್ಚ್ ಪಾಯ್ದ್ಯಾಚಿ ಜಾಯ್ನಾಸ್ತಾನಾ ವೆತಾನಾ, ಚಾರ್ಲ್ಸ್ ಆನಿ ವಿವಿಯಾನಾಚೆಂ ಕಾಜಾರ್ ಮ್ಯಾಂಚೆಸ್ಟರಾಂತ್ ಜಾವ್ನ್ ಗೆಲೆಂ.
ಗಾಂವಾಂತ್, ಜೆರೊಮ್ ಆನಿ ಎಸ್ತೆಲ್ ಚಿಂತಾತ್ ತಶೆಂ ಚಾರ್ಲ್ಸ್ ಆನಿ ವಿವಿಯಾನಾ ಮ್ಯಾಂಚೆಸ್ಟರಾಂತ್ಯ್ ಚಿಂತಾಲಿಂ.
ಕಾಜಾರ್ ಜಾವ್ನ್ ದೋನ್ ವರ್ಸಾಂ ಭುರ್ಗ್ಯಾಂಚಾ ವಿಶಿಂ ಚಿಂತ್ಚೆಂ ನಾಕಾ ಮ್ಹಣೊನ್, ಪಯ್ಲೆಂಚ್ ದೊಗಾಂಯ್ನಿಂ ಚಿಂತ್ನಾಂ ಆಟಯಿಲ್ಲಿಂ ಜಾಲ್ಯಾರ್ಯ್, ಕಾಜಾರ್ ಜಾವ್ನ್ ತಿಸ್ರ್ಯಾ ಮಹಿನ್ಯಾಂತ್ಚ್ ವಿವಿಯಾನಾ ಗುರ್ವಾರ್ ಜಾಲೆಂ.
ವಿವಿಯಾನಾ ಗುರ್ವಾರ್ ಜಾತಾನಾ, ಚಾರ್ಲ್ಸಾನ್ ತಾಕಾ ನಿಜಾಯ್ಕ್ಯ್ ಬರ್ಯಾ ಭಾಶೆನ್ ಪಳೆಲೆಂ. ಕಸಲೆಂಯ್ ಭರಾಚೆಂ ಕಾಮ್ ತಾಕಾ ಕರುಂಕ್ ತೊ ದೀನಾತ್ಲ್ಲೊ. ಆಪುಣ್ ಆಫೀಸಾ ಥಾವ್ನ್ ಯೇವ್ನ್ ಘರಾಚೆಂ ಸಗ್ಳೆಂ ಕಾಮ್ ತೊ ಕರ್ತಾಲೊ. ತಶೆಂ ಘರಾಚಾ ಕಾಮಾಕ್ ಮ್ಹಣೊನ್, ಏಕ್ ಚೈನೀಸ್ ಚೆಡುಂ ಚ್ಯಾರ್ ವೊರಾಂಕ್ ಯೆತಾಲೆಂ.
ವಿವಿಯಾನಾಕ್ ಭುರ್ಗ್ಯಾಪಣಾರ್ ಮೆಳಾನತ್ಲ್ಲೆಂ ತೆಂ ಸುಖ್, ಆತಾಂ, ಆಪ್ಣಾ ಥಾವ್ನ್ ತಾಕಾ ದೀಂವ್ಕ್ ಚಾರ್ಲ್ಸ್ ಪ್ರಯತ್ನ್ ಕರ್ತಾಲೊ. ಚಾರ್ಲ್ಸಾಚಾ ಹ್ಯಾ ಪ್ರಯತ್ನಾ ಥಾವ್ನ್, ವಿವಿಯಾನಾ ತರ್ಯ್ ಆಪ್ಲ್ಯಾ ಘೊವಾ ಸಾಂಗಾತಾ ಸುಖಿ ಆಸ್ಲ್ಲೆಂ. ತಾಣೆಂ ಕೆದ್ನಾಂಚ್ ಸಂಸಾರಾಚಾ ಸುಖಾಚಿ ಆಶಾ ಕೆಲ್ಲಿ ನಾ. ಸಂಸಾರಾಚಾ ಸುಖಾಚ್ಯಾಕ್ಯ್ ಮತಿಚೆಂ ಸುಖ್ ಚಡ್ ಗರ್ಜೆಚೆಂ ಮ್ಹಣೊನ್ ವಿವಿಯಾನಾ ಮಾಂದ್ತಾಲೆಂ. ತೆಂ ಜಲ್ಮಾಲ್ಲೆಂ ಪರಿಸರ್, ತಾಚ್ಯಾ ಪುಡರಾಕ್ ಕಾಂಯ್ ಉಪ್ಕಾರಾಕ್ ಪಡ್ಚೆಂ ತಸಲೆಂ ನ್ಹಯ್ ಆಸ್ಲ್ಲೆಂ. ತಾಕಾ ಪೊಸ್ಲೆಲ್ಯಾ ಕ್ಯಾಥರೀನಾಚೆಂ ಕುಟಾಮ್ಯ್ ಕಾಂಯ್ ವ್ಹಡ್ಲೆಂ ಗಿರೇಸ್ತ್ ಕುಟಾಮ್ ನ್ಹಯ್. ಜಿವಿತಾಚಾ ವಾಟೆರ್ ಜಿವಿತ್ ಸಾರುಂಕ್ ಕಿತ್ಲೆಂ ಗರ್ಜ್ ಆಸಾ ತಿತ್ಲೆಂ ತಿಂ ಜೊಡ್ತಾಲಿಂ. ತ್ಯಾ ಜೊಡಿನ್ ತಾಂಚೆಂ ಜೀವನ್ ಸಾರ್ತಾಲೆಂ ಶಿವಾಯ್, ಜೀವನ್ ಸಾರುಂಕ್ ತಾಂಕಾ ದುಸ್ರೊ ಕಾಂಯ್ ಆಧಾರ್ ನಾತ್ಲ್ಲೊ. ಆತಾಂ ವಿವಿಯಾನಾಕ್, ತಾಚ್ಯಾ ಕಾಜಾರಿ ಜಿವಿತಾಂತ್ ಚಾರ್ಲ್ಸ್, ಘೊವಾ ರುಪಿಂ ಆಧಾರ್ ಜಾವ್ನ್ ಆಯಿಲ್ಲೊ.
ವಿವಿಯಾನಾಕ್ ನೋವ್ ಮಹಿನೆ ಭರ್ತಾನಾ ತಾಣೆಂ ಎಕಾ ಚೆಡ್ವಾ ಭುರ್ಗ್ಯಾಕ್ ಜಲ್ಮ್ ದಿಲೊ.
[ಫುಡೆಂ ಕಿತೆಂ ಜಾತಾ ಮ್ಹಳ್ಳೆಂ ವಾಚುಂಕ್ ರಾಕೊನ್ ರಾವಾ....]
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
