ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಬೂಕ್ ಸಮೀಕ್ಶಾ - 14
ಬಾಮುಣಾಂಚೆಂ ಚೆಡುಂ
ಬೂಕ್: ಬಾಮುಣಾಂಚೆಂ ಚೆಡುಂ
ಕವಿ: ಎಚ್ಚೆಮ್ [ತಿಸ್ರೊ ಕವಿತಾಜಮೊ]
ಪ್ರಸ್ತಾವನ್: ವಲ್ಲಿ ಕ್ವಾಡ್ರಸ್, ಅಜೆಕಾರ್
ಛಾಪ್ಲ್ಲಿ ಲಿಪಿ: ಕಾನಡಿ.
ಪಾನಾಂ: 86
ಮೋಲ್: ರು. 50
ಪ್ರಕಾಶಕ್: ಆಶಾವಾದಿ ಪ್ರಕಾಶನ್.
ಪರ್ಗಟ್ ಜಾಲ್ಲಿ ಇಸ್ವಿ: 2006
ಸಮೀಕ್ಶಾ ಚಲಯ್ಣಾರ್: ಮೆಲ್ವಿನ್ ಜೆ. ವಾಸ್
ತಾರಿಕ್: 15 ಅಗೋಸ್ತ್ 2006
ಜಾಗೊ: ಸಾಲ್ಮಿಯಾ, ಕುವೇಯ್ಟ್
ಮೆಲ್ವಿನ್ ಜೆ. ವಾಸ್
ವಲ್ಲಿ ಕ್ವಾಡ್ರಸ್
ಕವಿಚಿ ವ್ಹಳೊಕ್:
ಕೊಂಕ್ಣಿ ಕವಿತಾ ಶೆತಾಂತ್ ’ಎಚ್ಚೆಮ್’ ಮ್ಹಳ್ಳೆಂ ನಾಂವ್ ಥಿರ್. ಏಕ್ ಉಂಚ್ಲೊ ಕವಿ, ವಿಮರ್ಶಕ್, ಚಿಂತ್ಪಿ ಜಾವ್ನ್ ಫಾಮಾದ್ ಜಾಲ್ಲೊ ಹೊ ಕೊಂಕ್ಣೆಂತ್ಲೊ ಏಕ್ ಪ್ರತಿಭಾವಂತ್ ಕವಿ ಮ್ಹಣ್ಚಾಂತ್ ಕಾಂಯ್ ದುಭಾವ್ ನಾ. ಎದೊಳ್ಚ್ ಸಭಾರ್ ಸಾಹಿತಿಕ್ ಸ್ಪರ್ಧ್ಯಾಂನಿ ಜಿಕ್ಲ್ಲೊ ಹೊ ಕೊಂಕ್ಣಿ ಕವಿತಾಂಕ್ ಚಡ್ ಖಾಯ್ಸ್ ಕರ್ತಾ ತರ್ಯ್ ಕಾನಡಿ ಭಾಸೆಂತ್ಲ್ಯಾ ಕವಿತಾಚೆಂಯ್ ಅಧ್ಯಯನ್ ಕರ್ನ್ ಆಯ್ಲಾ. ಹಾಚೆ ’ಚಲ್ಯಾಂಕ್ ಚತ್ರಾಯ್’, ’ಕಯ್ದ್ಯಾಚ್ಯೊ ಕವಿತಾ’ ಉಪ್ರಾಂತ್ ಹೊ ತಿಸ್ರೊ ಕವಿತಾಜಮೊ ಜಾವ್ನಾಸಾ. ಕವಿತಾ ಬರಂವ್ಚೆಸವೆಂ ಹೆರಾಂಚಾ ಕವಿತಾಂಚೆ ಸಮೀಕ್ಶಾ/ವಿಮರ್ಸೊ ಚಲವ್ನ್ ತೊ ಆಯ್ಲಾ ತಶೆಂಚ್ ಕೊಂಕ್ಣಿ ಸಾಹಿತ್ಯಾಕ್ ಲಗ್ತಿ ಜಾಲ್ಲೆಂ ತಾಚೆಂ ಅಂಕಣ್ ’ತಿಸ್ರೊ ದೊಳೊ’ ದಾಯ್ಜ್ಚೆರ್ ಪರ್ಗಟ್ ಜಾವ್ನ್ ಆಸಾ.
ವಿಮರ್ಶೆ/ಸಮೀಕ್ಶಾ ಲೇಖನ್
ವಾಸ್ತವ್ ಆನಿ ಕಯ್ದ್ (ಮೆಲ್ವಿನ್ ಜೆ. ವಾಸ್, ಕೆಲರಾಯ್)
ಸೃಜನಾತ್ಮಕ್ ಸಾಹಿತ್ಯಾಂತ್
(Creative Literature) ಸೃಜನಶೀಲತಾ ವ್ಹಾಳೊನ್ ಯೆತಾನಾ ತೆಂ ಖಂಯ್ಚಾಯ್ ಮುಳಾಚಾ ಗುಣಾಂಕ್ ಘೆವ್ನ್
ವ್ಹಾಳೊನ್ ಯೇಂವ್ಕ್ ಪುರೊ. ಹೆ ಗೂಣ್ ತ್ಯಾ ಮೂಳ್ಕೃತಿಚಾ ಸಾಹಿತಿಚಾ ಜಿವಿತಾ ಸ್ಪಂದನಾ ಥಾವ್ನ್ ತಾಚಾ ಜಿವಿತಾ ಸಂಘರ್ಶಾ ಥಾವ್ನ್ ಯಾ ತಾಚಾ ಜಿವಿತಾ ಆಶಯಾ ಥಾವ್ನ್
ಉಭ್ಜಾಲ್ಲ್ಯಾ ವಿಚಾರಾಂಕ್, ತ್ಯಾ ಕಾಳಾಚಾ ಪ್ರಸ್ತುತ್ ವಾ ಚಾಲ್ತ್ಯಾ ಸಮಾಜೆಚಾ ವಿಚಾರಾಂಸವೆಂ ಪ್ರತ್ಯಕ್ಶ್ಪಣಿಂ ಸಂಬಂಧ್ ಜೊಡುಂಕ್ ಪಾವ್ತಾತ್. ಪುಣ್ ಸಮಾಜ್
ಮ್ಹಳ್ಳ್ಯಾ ಹ್ಯಾ ಸಂಸಾರಾಂತ್ಲ್ಯಾ ಅನೇಕ್ ಗುಣಾಂಚಾ ಎಕಾ ಘೊಸಾಂತ್ ಅಸಲ್ಯಾ ಸಾಹಿತ್ಯಾಕ್ ಪ್ರಸ್ತುತ್ ಕರ್ತಾನಾ ತಾಚಿ ಸೃಜನ್ಶೀಲತಾ ಪ್ರಸ್ತುತ್ ಆನಿ ಭವಿಶ್ಯಾಂತ್
ಹ್ಯಾ ಸಮಾಜೆ ಸಂಗಿಂ ಸಂಬಂಧ್ ಜೊಡುಂಕ್ ಸಕ್ತಾ ಮ್ಹಳ್ಳಿ ಪಾತ್ಯೆಣಿ ಹ್ಯಾ ಸಾಹಿತ್ಯ್ಕಾರಾಚಿ ಆಸ್ತಾ ಜಾಲ್ಲ್ಯಾನ್ ಆಪ್ಣೆಂ ರಸ್ಚಾ ಸಾಹಿತ್ಯಾಂತ್ ತೊ ಭಿಲ್ಕುಲ್
ಸ್ವತಂತ್ರ್. ಅಶೆಂ ವ್ಹಯ್ ತರ್ಯ್ ತಾಚೆಂ ಸ್ವತಂತ್ರ್ ವಿಚಾರ್ ಸಮಾಜೆಕ್ ಆನಿ ತಾಚ್ಯಾ ವ್ಯವಸ್ತೆಕ್ ಸಂಬಂಧ್ ಜೊಡುಂಕ್ ತಾಣೆಂ ಕರ್ಚಾ ಪ್ರಯತ್ನಾಂತ್ ಕಿತ್ಲೆ ಯಶಸ್ವಿ
ಜಾತಾತ್ ಮ್ಹಳ್ಳೆಂ ಸವಾಲ್. ಕಿತ್ಯಾಕ್ ಮ್ಹಳ್ಯಾರ್ ಸಮಾಜೆಂತ್ ಜಿಯೆಂವ್ಚೆಂ ಖಂಯ್ಚೇಂಯ್ ಜಿವಿತ್ ತಾಚ್ಯಾ ಕಯ್ದಿಪಣಾ ಥಾವ್ನ್. ಹಾಂಗಾಸರ್ ಕಯ್ದ್ಯಾಚಿಂ ರುಪಾಂ ಆನಿ
ಕಯ್ದಿಪಣಾಚಿಂ ರುಪಾಂ ಕಸಲಿಂಯ್ ಜಾವ್ಯೆತ್. ಹ್ಯಾ ಕಯ್ದಿಪಣಾ ಥಾವ್ನ್ ಭಾಯ್ರ್ ಯೇಂವ್ಕ್ ಕರ್ಚಾ ಪ್ರಾಮಾಣಿಕ್ ಪ್ರಯತ್ನಾಂತ್ ವಾಸ್ತವಾ ಮಧೆಂ ಅಡ್ಚಾತಾ.
ವಾಸ್ತವಾಚೊ ಹುಂಬೊರ್ ಉತ್ರೊನ್ ಕ್ರಿಯಾತ್ಮಕ್ಪಣಿಂ ಸಮಾಜೆಚಾ ಆಂಗ್ಣಾಕ್ ದೆಂವ್ಚೆಂ ಸೃಜನಾತ್ಮಕ್ ಸಾಹಿತ್ಯಾಕ್ ಜಲ್ಮ್ ದಿಂವ್ಚಾ ತಿತ್ಲೆಂ ಸುಲಭ್ ನ್ಹಂಯ್. ಕಿತ್ಯಾಕ್
ಮ್ಹಳ್ಯಾರ್ ವಾಸ್ತವಾಕ್ ಭೂತ್ಕಾಳ್, ವರ್ತ್ಮಾನ್ ಕಾಳ್ ಆನಿ ಭವಿಶ್ಯತ್ಕಾಳ್ ತಿನ್ಯೀ ಎಕಾಚ್ಚ್ ಮಾಪಾನ್ ಸಾಂಗಾತ್ ದಿತಾನಾ ಹರ್ಯೆಕಾ ಕ್ರಿಯೆಚಿ ಪ್ರತಿಕ್ರಿಯಾ ತಿತ್ಲ್ಯಾಚ್
ಮಾಪಾನ್ ಸಾಂಗಾತ್ ದಿತಾನಾ ಹರ್ಯೆಕಾ ಕ್ರಿಯೆಚಿ ಪ್ರತಿಕ್ರಿಯಾ ತಿತ್ಲ್ಯಾಚ್ ಮಾಪಾನ್ ಆನಿ ತೂಕಾನ್ ಪ್ರಸ್ತುತೆಂತ್ ಸಮಾಜೆಚಾ ಜಿವಿತಾವಯ್ರ್ ಪರಿಣಾಮ್ ಘಾಲ್ತಾ.
ಅಶೆಂ ಆಸ್ತಾಂ ವಾಸ್ತವಾಕ್ ಕ್ರಿಯಾತ್ಮಕ್ ಜಾವ್ನ್ ವಿಚಾರಾಂಚಿ ಕ್ರಾಂತಿ ಉಭಿ ಕರವ್ನ್ ತ್ಯಾ ಕ್ರಾಂತೆಚೊ ಪ್ರಭಾವ್ ಸಮಾಜೆಚಾ ಸುಧಾರಣಾಖಾತಿರ್ ಆಡವ್ ದವರ್ಚಾಂತ್
ಬಾಮುಣಾಂಚೆಂ ಚೆಡುಂ ಯಶಸ್ವಿ ಜಾಲಾ ವ ನಾ? ಹ್ಯಾ ಸವಾಲಾಚಾ ಜಾಪಿಕ್ ’ಬಾಮುಣಾಂಚೆಂ ಚೆಡುಂ’ ಕವಿತಾ ಜಮ್ಯಾಕ್ ಹಾಂವ್ ವಾಸ್ತವಿಕ್ ಥಳಾರ್ ಥಾವ್ನ್ ವೊರಾವ್ನ್ ಪಳೆತಾಂ. ಕಿತ್ಯಾಕ್ ಮ್ಹಳ್ಯಾರ್ ಹ್ಯಾ
ಕವಿತಾಜಮ್ಯಾಂತ್ ಕವಿಚೊ ಆಶಯ್ ಆನಿ ತಾಚ್ಯಾ ಜಿವಿತಾಚೊ ಸಂಘರ್ಷ್ ಸಮಾಜೆಸವೆಂ ಚಡ್ ಮಾಪಾನ್ ಸಂಬಂಧ್ ಜೊಡ್ತಾ. ಹ್ಯಾ ಸಂಬಂಧಾಕ್ ಉಕ್ಲುನ್ ಧರ್ಚೆ
ವಿಚಾರ್ ಸಮಾಜೆಚಾ ವಾಸ್ತವಿಕ್ ವಿನ್ಯಾಸಾಕ್ ಚಡ್ ಲಾಗ್ಶಿಲ್ಯಾನ್ ವಳ್ಕತಾತ್ ತೆಂ ಜಾಂವ್ಚೆಂಯ್ ಮ್ಹಜ್ಯಾ ನಿರ್ಧಾರಾಕ್ ಕಾರಣ್.
ಬಾಮುಣಾಂಚೆಂ ಚೆಡುಂ ತೀನ್ ಮಯ್ನ್ಯಾಚೆಂ ಗುರ್ವಾರ್
ಭುರ್ಗ್ಯಾಚೊ ಬಾಪುಯ್ ಕೊಣ್ ಗಾಂವಾಕ್ ಗಾಂವ್ಚ್ ವಿರಾರ್ [ಬಾಮುಣಾಂಚೆಂ ಚೆಡುಂ]
ಬಾಮುಣಾಂಚೆಂ ಚೆಡುಂ ಉಂಚ್ಲ್ಯಾ ವರ್ಗಾಚೆಂ, ಸಮಾಜೆಂತ್ ಸ್ಥಾನ್ ಮಾನ್ ಆಸ್ಚೆಂ. ಶೆಗುಣಾಂನಿ ಭರ್ಲೆಲೆಂ ತೆಂ ಆಪ್ಲ್ಯಾ ಎಕ್ಸುರ್ಪಣಾ ವಿರುದ್ದ್ ಯಾ ರಿತಿ
ರೆಗ್ರ್ಯಾಂ ವಿರುದ್ದ್ ಆಪ್ಲೆಂ ಮೇಟ್ ಕಾಡುನ್ ಆಪ್ಣಾಕ್ ಜಾಯ್ ತೆಂ ಜೊಡುಂಕ್ ತೆಂ ತಾಚ್ಯಾ ಕಯ್ದಿಪಣಾಚಾ ಪಿಂಜ್ರ್ಯಾ ಥಾವ್ನ್ ಭಾಯ್ರ್ ಯೆತಾ. ಹ್ಯಾ ಭಾಯ್ರ್ ಆಯಿಲ್ಲ್ಯಾ ಕ್ರಿಯೆಕ್
ಆಮಿ ಹ್ಯಾ ಚೆಡ್ವಾಚೊ ಬಂಡಾಯ್ ಮ್ಹಣೊನ್ ಘೆತ್ಲೊ ಜಾಲ್ಯಾರ್ ಹ್ಯಾ ಬಂಡಾಯಥಾವ್ನ್ ತೆಂ ಸಮಾಜೆಕ್ ಕಿತೆಂ ದೀಂವ್ಕ್ ಸಕ್ತಾ ಆನಿ ಖಾಸ್ಗೆನ್ ಅಪುಣ್ ಕಿತೆಂ ಜೊಡುಂಕ್
ಪಾವ್ತಾಂ ಮ್ಹಳ್ಳೆಂ ಸವಾಲ್. ಜಾಂವ್ ತಿ ಸಮಾಜ್ ಪ್ರಜಪ್ರಭುತ್ವಾಂತ್ಲ್ಯಾ ಸ್ವತಂತ್ರ್ಪಣಾಚಿ ಯಾ ಕಮ್ಯೂನಿಸಮ್ ಯಾ ಪರತಂತ್ರ್ ವಿಚಾರಾಂಚಿ. ಹರ್ಯೆಕಾ ವಾಟೆನ್ ಸಮಾಜೆಂತ್ ಜಿಯೆಂವ್ಚೊ ಮನಿಸ್
ಏಕ್ ನ್ಹಂಯ್ ಎಕಾ ರಿತಿಚೊ ಕಯ್ದಿಚ್. ಅಶೆಂ ಮ್ಹಣ್ತಾನಾ ಬಾಮುಣಾಂಚೆಂ ಚೆಡುಂಯ್ ವಾಸ್ತವಾಂತ್ ಕಯ್ದಿಚ್ ಜಶೆಂ ನಿಮ್ನ್ ವರ್ಗಾಚೆಂ ಚೆಡುಂ.
’ಸೆಜಾರ್ ನಾ ಬಜಾರ್ ನಾ. ಘರ್ ಇಸ್ಕೊಲ್ ತುಳ್ಶಿ ಕಾಟೆಂ
ಗಾಂವಾರ್ ಸಗ್ಳೆಂ ಅಜ್ಯಾಪ್ ಹೆಂ ಘಡ್ಲೆಂ ತರ್ಯ್ ಕಶೆಂ’
ಬಾಮುಣಾಂಚಾ ಚೆಡ್ವಾಚೆಂ ಹೆಂ ಕಯ್ದಿಪಣ್. ಪ್ರತ್ಯಕ್ಶ್ ನ್ಹಂಯ್ ತರ್ಯಿ ಪರೋಕ್ಷ್ ಬಿರ್ಮತ್ ಹಾಂಗಾ ಝಳ್ಕಾತಾ. ಹ್ಯಾ ಕಯ್ದಿಪಣಾ ಥಾವ್ನ್ ಭಾಯ್ರ್ ಯೇಂವ್ಕ್
ಜರ್ತರ್ ತೆಂ ಅಪ್ಲ್ಯಾಚ್ ಖಾಸ್ಗೆಚಾ ಕ್ರಾಂತೆಕ್ ದೆಂವ್ತಾ ಜಾಲ್ಯಾರ್ ಹ್ಯಾ ಕ್ರಾಂತೆ ಥಾವ್ನ್ ಬಾಮುಣಾಂಚೆಂ ಚೆಡುಂ ಕಿತೆಂ ಜಯ್ತೆವಂತ್ ಜಾಂವ್ಕ್ ಪಾವ್ತಾ.
’ಖಬ್ರೆವಿಣೆ ಪಾವ್ಸ್ ಗುರ್ವಾದಾರ್ ಮರಣ್
ಸಯ್ತ್ ಯೇನಾತ್ಲ್ಲ್ಯಾ ಹ್ಯಾ ಗಾಂವಾಂತ್
ಖಬ್ರೆ ಶಿವಾಯ್ - ಆಂಕ್ವಾರಾಂಚಾ ಮೊರಿಯಾಂನಿ
ಪಿಂಪ್ರ್ಯಾಂಚಿಂ ರಗ್ತಾಂ ವ್ಹಾಳ್ತಾತ್’ [ಖಬ್ರೆವಿಣೆಂ]
ಎಕಾ ಕುಶಿನ್ ಬಿರ್ಮತ್ ಪಾವೊನ್ ಬಾಮುಣಾಂಚೆಂ ಚೆಡ್ವಾಕ್ ಬಂಡಾಯ್ ಗರ್ಜ್ ಮ್ಹಣೊನ್ ದಿಸ್ತಾನಾ ದುಸ್ರ್ಯಾ ಕುಶಿನ್ ಹ್ಯಾಚ್ ಚೆಡ್ವಾಚಾ ಮೊರಿಯೆಂತ್ ವ್ಹಾಳ್ಚೆಂ ತೆಂ
ಪಿಂಪ್ರ್ಯಾಚೆಂ ರಗಾತ್ ಅಪ್ಲ್ಯಾ ಅಸ್ತಿತ್ವಾಚೆ ಕ್ರಾಂತಿ ಉಟಯ್ತಾ. ಅಶೆಂ ಆಸ್ತಾನಾ ಹ್ಯಾ ಬಾಮುಣಾಂಚಾ ಚೆಡ್ವಾಕ್ ಫಕತ್ತ್ ಸಾಮಾಜಿಕ್ ನದ್ರೆನ್ ಪಳೆಂವ್ಕ್ ಜಾಯ್ನಾಂ.
ಕಿತ್ಯಾಕ್ ಮ್ಹಳ್ಯಾರ್ ಸಮಾಜೆಂತ್ ಮನಿಸ್ ಮ್ಹಳ್ಳಿ ಏಕ್ ಮನ್ಜಾತ್ ಆಪ್ಲ್ಯಾ ಆನಿ ಆಪ್ಲ್ಯಾಂಚಾ ಭಂವ್ತೊಣಿ ವಾಸ್ತವಾಕ್ ರಚುನ್ ತ್ಯಾ ವಾಸ್ತವಾಚಾ ರಿತಿಭದ್ದ್ ಜಿವಿತಾಸವೆಂ ಜಿಣಿ
ಸಾರುಂಕ್ ಆರಂಭ್ ಕರ್ತಾ ತೆದ್ನಾಂ ಮಾತ್ರ್ ತೊ ಮನಿಸ್, ಮನಿಸ್ ಜಾತಾ. ವಾಸ್ತವಿಕ್ ಸಮಾಜೆ ವಿರುದ್ದ್ ವೆತಾನಾ ತೊ ಸಮಾಜೆ ಭಿತರ್ ಆಸೊನ್ಯ್ ಆನಿ ಮನಿಸ್ ಯಾ ಚೆಡ್ಯಾ ಜಾತ್.
ಹೆಂಚ್ ಕಯ್ದ್ ಆನಿ ಕಯ್ದಿಪಣಾಚೆಂ ಸ್ವಷ್ಟ್ ಚಿತ್ರಣ್. ಹಾಂಗಾಸರ್ ಲಾಂಭಾಯೆಚಿ ವರ್ದಿ ಗರ್ಜ್ ನಾ ಮ್ಹಣೊನ್ ಚಿಂತಾಂ ಹಾಂವ್.
ಬಾಮುಣಾಂಚೆಂ ಚೆಡುಂ ಕವಿತೆಕ್ ಎಕಾ ವಿಶಾಲ್ ನದ್ರೆನ್ ಪಳೆಲೆಂ ತರ್, ಬಾಮುಣ್ ಮ್ಹಳ್ಯಾರ್ ಏಕ್ ವರ್ಗ್ ಆನಿ ಚೆಡುಂ ಮ್ಹಳ್ಯಾರ್ ಏಕ್ ಜಾತ್. ಸಮಾಜೆಂತ್ ವರ್ಗಾಕ್ ಏಕ್
ಪರಿಮಿತಿ ಆಸಾ ಏಕ್ ನಿರ್ದಿಷ್ಟತಾ ಆಸಾ. ಪುಣ್ ಚೆಡ್ವಾಕ್ ನಾ. ಚೆಡುಂ ಮ್ಹಳ್ಯಾರ್ ಏಕ್ ಜಾಗತಿಕ್
(Universal) ಜಾತ್ ವಾ ಜಾಗತಿಕ್ ಸಮಾಜ್.
ಅಶೆಂ ಆಸ್ತಾನಾ ಹ್ಯಾ ಕವಿತೆಂತ್ ಏಕ್ ಬಾಮುಣ್ ಜಾವ್ನ್ ತ್ಯಾ ಚೆಡ್ವಾನ್ ಬಂಡಾಯಾಕ್ ದೆಂವ್ಚೆಂ ತಾಣೆಂಚ್ ರಚ್ಲೆಲ್ಯಾ ರಿತಿ ರೆಗ್ರ್ಯಾಂಕ್ ತಾಣೆಂಚ್ ಮೊಡ್ಚೆಂ ಸುಲಭ್ ಆನಿ
ಸಾಮಾನ್ಯ್ ಕರ್ತಾ ಜಾಲ್ಯಾರ್ ತ್ಯಾಚ್ ಸಮಾಜೆಚಾ ನಿಮ್ನ್ ವರ್ಗಾಚಾ ಚೆಡ್ವಾನ್ ಬಂಡಾಯಾಕ್ ದೆಂವ್ಚೆಂ ಕಶ್ಟ್ ಆನಿ ಅಸಾಮಾನ್ಯ್ ಕರುನ್ ಗುನ್ಯಾಂವಾಚೊ ಬಿಲ್ಲೊ ದಿವಯ್ತಾ.
ಆನಿ ಹ್ಯಾ ಬಾಮುಣಾಕ್ ಕಾದುನ್ ಯಾ ವರ್ಗಾಕ್ ಕಾದುನ್ ಫಕತ್ತ್ ಚೆಡ್ವಾಚಾ ನದ್ರೆನ್ ಪಳೆಲ್ಯಾರ್ ಜಾಗತಿಕ್ ಚಿಂತ್ಪಾನ್ ಹೊ ಬಂಡಾಯ್ ನ್ಹಂಯ್. ಕಿತ್ಯಾಕ್ ಮ್ಹಳ್ಯಾರ್ ಮನಿಸ್
ಸಮಾಜೆಂತ್ ಕಯ್ದ್ ಜಾವ್ನ್ ಮಾತ್ರ್ ತೊ ಮನಿಸ್ ಜಾಂವ್ಕ್ ಸಕ್ತಾ ನಾ ಜಾಲ್ಯಾರ್ ತೊ ಮನಿಸ್, ಮನಿಸ್ ಜಾವ್ನ್ಂಯ್ ಮನ್ಜಾತ್ ಜಾತಾ.
ಅಶೆಂ ಆಸ್ತಾನಾ ವಾಸ್ತವಾ ವಿರುದ್ದ್ ವೆಚೆಂ ಧಯ್ರ್ ಕರ್ಚೆಂ ಹೆಂ ಚೆಡುಂ ಸಮಾಜೆಕ್ ಕಾಂಯ್ ಗರ್ಜ್ ಪಡ್ಚೆಂ ನ್ಹಂಯ್. ಹಾಂ! ಪುಣ್ ತೆಂ ಎಕಾ ನಿರ್ದಿಷ್ಟ್ ವರ್ಗಾಚೆಂ
ಮ್ಹಳ್ಯಾರ್ ಬಾಮುಣಾಂಚೆಂ ಜಾವ್ನ್ ಖಂಡಿತ್ ಗರ್ಜೆಚೆಂ. ಕಾರಾಣ್ ವಾಸ್ತವಿಕ್ ಸಮಾಜೆಚಾ ವಿಚಾರಾಂಕ್ ತೆಂ ಉಕ್ಲುನ್ ಧರ್ತಾ ಜಾಲ್ಲ್ಯಾನ್!.
ಅನ್ಯೇಕ್ ಮುಖ್ಯ್ ವಿಶಯ್ ಕಿತೆಂಗೀ ಮ್ಹಳ್ಯಾರ್ ಹಾಂಗಾಸರ್ ತ್ಯಾ ಬಾಮುಣಾಚಾ ಚೆಡ್ವಾಚೆಂ ಭವಿಶ್ಯ್ ಜಾಂವ್ ಯಾ ಚೆಡ್ವಾಚಾ ಜಲ್ಮಾಗುಣಾಚೆಂ, ಸಿಂತಿಮೆಂತಾಚೆಂ
ವರ್ಣನ್ ಜಾಂವ್ ನಾ. ಫಕತ್ತ್ ವರ್ಗಾಚೆ ಆಚಾರ್ ವಿಚಾರ್, ರಿತಿ ರೆಗ್ರ್ಯೊ ಮಾತ್ರ್. ಅಶೆಂ ಆಸ್ತಾನಾ ಹಾಂಗಾಸರ್ ಚೆಡುಂ ಫಕತ್ತ್ ಪರೋಕ್ಶ್ಪಣಿಂ ಏಕ್ ಇಮಾಜ್ ಮಾತ್ರ್.
’ಬಾಮುಣಾಂಚೆಂ ಚೆಡುಂ’ ಚೆಡ್ವಾ ಇಮಾಜೆಕ್ ಸೊಡ್ಲ್ಯಾರ್ ವಿಚಾರಾಂಚೊ ಘೊಸ್.
ಹ್ಯಾಚ್ ಖಾತಿರ್ ಹ್ಯಾ ಕವಿತಾಜಮ್ಯಾಕ್ ಬಾಮುಣಾಂಚೆಂ ಚೆಡುಂ ಮ್ಹಳ್ಳೆಂ ಮಾತಾಳೆಂ ಸರ್ವ್ಯ್ ವಾಟೆನ್ ಸಂಪೂರ್ಣ್ ಸಾರ್ಕೆಂ ಮ್ಹಣೊನ್ ದಿಸ್ತಾ. ಅಶೆಂ
ಮಾಂಧ್ತಾಂ ಹಾಂವ್. ವರ್ಗ್ ಆನಿ ಜಾತ್ ನಾಸ್ತಾಅನಾ ಸಮಾಜೆಂತ್ ವಾಸ್ತವ್ ನಾ. ಹೆ ತೀನ್ಯ್ ಮೆಳೊನ್ ಏಕ್ ಸಮಾಜ್ ರುತಾಂ ಜಾತಾ. ಅಶೆಂ ರುತಾಂ ಜಾಲ್ಲ್ಯಾ ಸಮಾಜೆಂತ್ ಮನಿಸ್
ಭಿತರ್ ಸರ್ತಾನಾ ಪಯ್ಲೊ ತೊ ವದ್ದಾಡ್ತಾ ಮನಿಸ್ ಜಾಂವ್ಕ್ ಉಪ್ರಾಂತ್ ತೊ ಉಡ್ಡಾತಾ ಅಪ್ಲೆಂ ಮನ್ಶಾಪಣ್ ಉರಂವ್ಕ್. ಹ್ಯಾ ವೊದ್ದಾಡ್ಚಾ ಆನಿ ಉಡ್ಡೊಂವ್ಚಾ ಕ್ರಿಯಾ ಆನಿ
ಪ್ರತಿಕ್ರಿಯಾಂತ್ ಸಗ್ಳೆಂ ತಾಚೆಂ ಜೀವನ್ಂಚ್ ಎಕಾ ಪರಿಮಿತೆಂತ್ ತೆಂಯೀ ನಿರ್ದಿಷ್ಟ್ ಪರಿಮಿತೆಂತ್ ಘುಂವ್ತಾ. ಹಾಕಾ ತೊ ಕಯ್ದ್ ಮ್ಹಣ್ತಾ. ಹಾಮ್ಗಾಸರ್ ಕಯ್ದ್ ಏಕ್ ಪಿಂತುರ್
ಮಾತ್ರ್. ತೆಂಯೀ ಅಸ್ಪಶ್ಟ್ ಕಾಲ್ಪನಿಕ್ ಪಿಂತುರ್ ಶಿವಾಯ್ ಹಕೀಗತ್ ನ್ಹಂಯ್. ಕಾರಾಣ್ ವಾಸ್ತವಿಕ್ ಜಿವಿತ್.
ವಾಸ್ತವಿಕ್ ಜಿವಿತಾಂತ್ ಹ್ಯಾ ಸಂಸಾರಾಂತ್ಲೊ ಹರ್ಯೆಕ್ ಮನಿಸ್ ಖಂಯ್ಚಾಯ್ ತರ್ಯೀ ಎಕಾ ರುಪಾನ್ ಕಯ್ದಿಚ್. ತೊ ಆಚಾರಾಂಚೊಯ್ ಜಾಂವ್ಕ್ ಸಕ್ತಾ. ವಿಚಾರಾಂಚೊಯ್ ಜಾಂವ್ಕ್
ಸಕ್ತಾ. ತರ್ ಬಾಮುಣಾಂಚಾ ಚೆಡ್ವಾಚೊ ಬಂಡಾಯ್ ವಿಚಾರಾಂಚೊ, ತಾಕಾ ಆನಿ ತಾಚ್ಯಾ ಸಮಾಜೆಕ್ ಕಿತ್ಲೊ ಉಪ್ಕಾರಾಕ್ ಪಡ್ತಾ?
ಸಮಾಜೆಂತ್ ಜಲ್ಮ್ ಘೆತ್ಲ್ಲೊ ಹರ್ಯೆಕ್ ಜೀವ್ ಸ್ವತಂತ್ರ್. ಅಶೆಂ ಮ್ಹಣ್ತಾನಾ ತೊ ಜೀವ್ ಉಂಚ್ಲ್ಯಾ ವರ್ಗಾಂತ್ ಜಲ್ಮ್ ಘೆಂವ್ ವಾ ನೀಚ್ ವರ್ಗಾಂತ್ ಜಲ್ಮ್ ಘೆಂವ್ ಸ್ವತಂತ್ರಾಚಿಂ
ಹಕ್ಕಾಂ ಹರ್ಯೆಕ್ ಜಿವಾಕ್ ಎಕ್ಚ್ ಮಾಪಾಚಿಂ. ಹ್ಯಾ ಹಕ್ಕಾಂಕ್ ಜೊಡುನ್ ಘೆಂವ್ಕ್ ’ಯೆಮ್ಕೊಂಡಾಚೆಂ ದಾರ್’ ಕವಿತೆಂತ್ ಧಾರ್ಮಿಕ್ ಪಾತ್ಯೆಣೆಚಾ ವಿರೋಧ್ ನಿಮ್ನ್ಯಾ
ರ್ಗಾಚ್ಯಾಂನಿ ಉಟಂವ್ಚೊ ಬಂಡಾಯ್ ಪಳೆಲೊ ತರ್;
’ಸೊಮಿಯಾಂನಿ, ಆತಾಂ ಆಯಿಲ್ಲೆಂ ಕಾಮ್
ಸಾಂಗಾ
ದಯಕರುನ್ ಮ್ಹಣಾನಾಕಾತ್ ಗೊರುಂ ದೇವ್ ಖಾಯ್ನಾಕಾತ್
ವೆತೆಲ್ಯಾಂವ್ ಯೆಮ್ಕೊಂಡಾಕ್. ತೆಂ ಖಂಯ್ ಆಸಾ?’
[ಯೆಮ್ಕೊಂಡಾ ದಾರ್]
ವಾಸ್ತವಿಕ್ ಸಮಾಜೆ ಮುಕಾರ್ ಬಂಡಾಯ್ ಉಭಾರ್ಲ್ಲೊ
ನಿಮ್ನ್ ವರ್ಗ್ ಯೆಮ್ಕೊಂಡ್ ಆಸಾ ಮ್ಹಣೊನ್ ಮಾಂದುನ್ ಘೆವ್ನ್ಂಯ್ ಜಿಯೆಂವ್ಚಾ ಖಾತಿರ್
ಹ್ಯಾ ಸಮಾಜೆಚಾ ರೆಗ್ರ್ಯಾಂ ವಿರೋಧ್ ಧಾರ್ಮಿಕ್ ರಿತಿ ರಿವಾಜೆ ವಿರೋಧ್ ಬಂಡಾಯೆಕ್ ದೆಂವ್ತಾತ್.
ಧಾರ್ಮಿಕ್ ರಿತಿ ರಿವಾಜೆವಿರೋಧ್ ಬಂಡಾಯ್ ಉಟಯಿಲ್ಲೊ ನಿಮ್ನ್
ವರ್ಗ್ ಜಯ್ತೆವಂತ್ ಜಾತಾ?
ಧಾರ್ಮಿಕ್ ಆನಿ ವಾಸ್ತವಿಕ್ ಜಿವಿತಾ ಮಧೆಂ ಏಕ್ ಕಂದಕ್ ಆಸಾ.
ಹೊ ಕಂದಕ್ ಏಕ್ ದುಸ್ರ್ಯಾಕ್ ಇತ್ಲೊ ಅಪರಿಚಿತ್ಗೀ ಮ್ಹಳ್ಯಾರ್
ಹಾಚ್ ಕಂದಕಾಚಾ ದೋನ್ ಕೊಡ್ಕ್ಯಾಂಕ್ ಮ್ಹಳ್ಯಾರ್ ಧರ್ಮ್ ಆನಿ
ವಾಸ್ತವಾಕ್ ಮುಖಾಮುಖಿ ನದರ್ ಆಸೊನ್ಯ್ ತೆ ಎಕಾಮೆಕಾ
ವಳ್ಕಾನಾಂತ್. ತಾಂಚೆ ಮಧೆಂ ಸಂಬಂಧ್ ನಾ. ಅಶೆಂ ಆಸ್ತಾನಾ
ಸಮಾಜೆಂತ್ ಜಿಯೆಂವ್ಚೊ ಹೊ ಕಂದಕಾಂತ್ಲೊ ಮನಿಸ್ ಏಕ್ಚ್ ಧಾರ್ಮಿಕ್ಪಣಾ ಥಂಯ್
ಮಾಲ್ವತಾ ತಾ ವಾಸ್ತವಾಕ್ ತೆಂಕುನ್ ರಾವ್ತಾ. ವಾಸ್ತವಾಕ್ ತೆಂಕುನ್ ರಾವ್ಲ್ಲ್ಯಾಕ್
ಸೊಭಿತ್ ಆನಿ ಆಯ್ಕೊಂಕ್ ಮೊವಾಳ್ ದಿಸ್ತಾ.
’ಮ್ಹಳೆಂಯ್
ಸೊಮ್ಯಾಂ ತುವೆಂ, ಜಿಯೆಂವ್ಚೆಂ ತರ್ ಜಿಯೆ
ಕಾಸುಳೆಚ್ಯಾ ಪಾನಾವಯ್ಲ್ಯಾ ಉದ್ಕಾ ಥೆಂಬ್ಯಾಪರಿಂ
ಪಾನಾರ್ ಅಸೊನ್ಯೀ ನಿರ್ಲಿಪ್ತ್ ಪಾನಾಕ್ ಚಿಡ್ಕಾನಾ ತಸೆಂ
ಆವಯ್ ಬಾಪಯ್ ಬಾಯ್ಲ್ ಭುರ್ಗಿಂ ಸಗ್ಳಿಂ ಅಸೊನ್ಯೀ,
ನಾ ಕಶೆಂ, [ಪಿಂಜ್ರೊ]
ಮನ್ಶಾಕುಳಾಚಾ ಪಯ್ಲ್ಯಾ ದುಃಖಾ ಥೆಂಬ್ಯಾಕ್ ತಶೆಂ
ಮುಗ್ದ್ಮನ್ಶಾಚಾ ನಿಮಾಣ್ಯಾ ಸುಖಾಳ್ ಸ್ವಪ್ಣಾಕ್ ಕಾರಾಣ್ ಜಾಲ್ಲಿಚ್ ಆಶಾ. ಆಶಾ
ವಾಸ್ತವಿಕ್ ಸಂಸಾರಾಕ್ ಲಾಗು ಜಾತಾ. ಧಾರ್ಮಿಕ್ಪಣಾಕ್ ಆನಿ ಆಶೆಕ್ ಕಾಂಯ್
ಸಂಬಂಧ್ ನಾ. ಎಕಾ ಹಾತಿಂ ಆಶಾ ಘೆವ್ನ್ ದುಸ್ರ್ಯಾ ಹಾತಿಂ ಶಾಂತಿ
ಸೊಧ್ಲ್ಯಾರ್ ತಿ ಮೆಳ್ತಾ?
ಕವಿತೆಕ್ ಆನಿ ಕವಿಕ್ ಸಂಬಂಧ್ ಫಕತ್ತ್ ತೆಂ ಕವಿತಾ ಜಲ್ಮೊಂಚಾ ವೆಳಾರ್
ಮಾತ್ರ್. ತ್ಯಾ ಉಪ್ರಾಂತ್ ತೆಂ ಸ್ವತಂತ್ರ್ ಜಶೆಂ ಸಮಾಜೆಂತ್ ಜಲ್ಮೊನ್ ಯೆಂವ್ಚೊ
ಹರ್ಯೆಕ್ ಜೀವ್ ಸ್ವತಂತ್ರ್ ತಶೆಂ. ಅಶೆಂ ಆಸ್ತಾನಾ ಕವಿತೆಂಚಾ ವಿಚಾರಾಂಕ್ ಪಳೆವ್ನ್ ಯಾ
ಪ್ರಸ್ತುತ್ ಕವಿತಾ ನಾಯಕಾಚಾ ಉಲವ್ಣ್ಯಾಕ್ ಭುಲೊನ್ ತೆಂ
ಸಾಹಿತ್ಯ್ ರಚ್ಲೆಲ್ಯಾ ಕವಿಚೆರ್ ಅಪ್ರಾಧ್ ಮಂಡುಂಕ್ ಜಾಯ್ಣಾ. ’ಹಾಂವ್’ ಕವಿತೆಂತ್ ಕಯ್ದಿ
ಪಣಾಚಿಂ ವಿವಿಧ್ ರುಪಾಂ ಪ್ರಸ್ತುತ್ ಜಾಲ್ಯಾಂತ್ ಜಾಲ್ಯಾರ್ಯ್ ಆನಿ
ಹಾಂಗಾಸರ್ ಕವಿತಾನಾಯಕ್ ಆಪ್ಣಾಕ್ ಕಯ್ದಿ ಮ್ಹಣೊನ್
ಮಾಂಧ್ತಾ ಜಾಲ್ಯಾರ್ಯ್ ತಾಚ್ಯಾ ಜಾಣ್ವಾಯೆಚಾ ಪಾವ್ಲಾಂನಿ ತೊ
ಮುಕಾರ್ ಚಲೊನ್ ಹ್ಯಾ ವಾಸ್ತವೀಕ್ ಸಮಾಜೆ ಥಾವ್ನ್ ಭಾಯ್ರ್ ಯೇವ್ನ್ ರಚನಾತ್ಮಕ್ ಜಾಲಾ.
ಹಾಂಗಾಸರ್ ಕಯ್ದಿಪಣ್ ನಾ ಫಕತ್ತ್ ಸ್ವತಂತ್ರಾತಾ. ಹ್ಯಾ
ಸ್ವತಂತ್ರಾಕ್ ವಾಸ್ತವಿಕ್ ಸಮಾಜೆ ಥಾವ್ನ್ ಭಾಯ್ರ್
ವಚೊನ್ಚ್ ಕಿತ್ಯಾಕ್ ಜೊಡುಂಕ್ ಜಾಯ್? ಜಾಂವ್ಕ್ ಪುರೊ ಆಮ್ಚಾ ದೇಶಾಂತ್
ಸ್ವತಂತ್ರಾಚೆಂ ವ್ಹಾರೆಂ ಮಾತ್ರ್ ವ್ಹಾಳ್ತಾ ಆನಿ ಹ್ಯಾ ವ್ಹಾಳ್ಯಾಕ್
ದಿಶಾ ನಾ. ಕೊಣಾಕ್ ಕಶೆಂ ಜಾಯ್ ತಶೆಂ. ಹ್ಯಾ ದೇಶಾಂತ್
ಸ್ವತಂತ್ರ್ಯ್ ಕಯ್ದ್ ಜಾಲಾ.
’ಗಲ್ಲೆಚ್ಯಾ ರಸ್ತ್ಯಾಂನಿ ಪುರ್ಶಾಂವ್ ಕಾಡುಯಾಂ
ಬಣಾಪಿಟೊ ಉಡವ್ನ್ ಬೆಂಡಾ ವಾಜ್ಪಾಂತ್ ನಾಚುಯಾಂ
ಬಾರಾಕ್ ರಿಗೊನ್ ಗಮ್ಮತ್ ಜಾವುಯಾಂ
ವಾಟೆರ್ ಕೊಣ್ ಮೆಳ್ಟಾ ತಾಕಾ ಚಿರುಯಾಂ’ [ಯೆಯಾ ಫೆಸ್ತ್ ಕರುಯಾಂ]
ಸೆಕ್ಯುಲರ್ ಸಮಾಜೆಂತ್ ಫೆಸ್ತಾ ಪರ್ಬೆಕ್ ಕಾಂಯ್ ಬರ್ಗಾಲ್
ನಾ. ದಾಖವ್ಣೆಕ್ ಸಗ್ಳೆಂ ಆಸಾ ಪುಣ್ ದೀಶ್ಟ್ ನಾ. ವಿಚಾರ್
ಸಾರ್ಕೊ ಆಸಾ ಪುಣ್ ಜಾಣ್ವಾಯ್ ನಾ. ಎಕ್ವಟ್ ಆಸಾ ಪುಣ್
ದಿಶಾ ನಾ. ಸ್ವತಂತ್ರ್ ದೇಶಾಚಿ ತೆಂಯ್ ಹಾವೆಂ ಜಿಯೆಂವ್ಚಾ ದೇಶಾಚಿ ಗಜಾಲ್ ಅಶಿ ಆಸ್ತಾನಾ
ಸತಾಕ್ ಮುಖಾಮುಖಿ ರಾಂವ್ಚೆಂ ಧಯ್ರ್ ಕೊಣಾಯ್ಕೀ ಆಸಾ?
ಹಾಂಗಾಸರ್ ಬೊಲ್ಪ್ಯಾಂಚಾ ಹಿಂಡಾಂತ್ ಆಸ್ತಾವರೇಗ್ ಮಾತ್ರ್
ಶಾಭೀತ್. ಹಿಂಡಾ ಥಾವ್ನ್ ಭಾಯ್ರ್ ಗೆಲ್ಲೊ ಮಾಗಿರ್ ಮಾಗ್ಣೆಂಚ್ ಕರ್ತಾ
ಹ್ಯಾ ಹಿಂಡಾಂತ್ಲ್ಯಾ ಬೊಲ್ಪ್ಯಾಂಕ್ ಪಳೆಂವ್ಚೆಂ ತರ್;
’ತುಮಿಂಚ್ ನ್ಹಯ್ಗೀ ಆತಾಂ ಮದ್ಯಾ ರಾನಾಂತ್
ಧವೆ ದಗ್ಲೆ ನೆಸೊನ್ ಯೇವ್ನ್ ಹಾತ್ ಜೊಡ್ನ್ ರಾವ್ಲ್ಯಾತ್
ಹಿಂಡಾಂತ್ಲೊ ಮೆಕ್ಳೊ ಜಾಲ್ಲ್ಯಾ ಬೊಕ್ಡೆಪಿಲಾಪರಿಂ ರಡ್ಟಾತ್
ಆಮಿ ನ್ಹಯ್ ತೆ, ಆಮ್ಚೆ ಸಾರ್ಕೆ ಸೆಕುಲಾರ್ ಕೊಣೀ
ನಾಂತ್.’ [ತುಮಿ]
ಸೆಕ್ರುಲರ್ ಪ್ರಜಾರಾಜಾಚೆಂ ಪ್ರಸ್ತುತ್ ಆನಿ ಚಾಲ್ತೆಂ ದರ್ಶನ್.
ಸಮಾಜೆಕ್ ಭೂತ್ಕಾಳಾಚಿ ಕ್ರಿಯಾ ಆನಿ ಪ್ರತಿಕ್ರಿಯಾ ವರ್ತ್ಮಾನಾಚಾ
ಪ್ರಸ್ತುತ್ ಗಡಿಯೆರ್ ತಾಂಚೊ ಪ್ರಭಾವ್ ಮಾತ್ರ್ ಸೊಡ್ಲ್ಯಾರ್
ಹ್ಯಾ ಪ್ರಭಾವಾಕ್ ಸಮಾಜೆಚಾ ಮುಕಾರ್ ಸಮಾಜೆಚಾ ಉದರ್ಗತೆಕ್ ಒದಗ್ಸುಂಕ್ ಕಶೆಂ
ಸಾಧ್ಯ್ ಮ್ಹಳ್ಳೆವಿಶಿಂ ಕಾಂಯ್ ವಿಚಾರ್ ನಾಂತ್. ಜಶೆಂ ವರ್ತ್ಮಾನ್
ಪತ್ರಾಪರಿಂ ಪುಣ್ ಸಮಾಜೆಕ್ ಪರ್ದ್ಯಾ ಪಾಟ್ಲೆಂ ಲಿಪ್ಲ್ಲೆಂ
ಸತ್ ದಾಖಂವ್ಚೆಂ ಪ್ರೇತನ್ ಝಳ್ಕಾತಾ. ಪ್ರಸ್ತುತ್ ಸಮಾಜೆಕ್
ಹೆಂ ಸತ್ ದಾಖವ್ನ್ ದೀಂವ್ಕ್ ಕೆಲ್ಲ್ಯಾ ಪ್ರಯತ್ನಾಕ್ ನೆಗಾರ್ ಕರುಂಕ್ ಜಾಯ್ನಾಂ.
ಸಾಂಪ್ರದಾಯಿಕ್ ಸಮಾಜೆ ಥಾವ್ನ್ ಭಾಯ್ರ್ ಆಯಿಲ್ಲ್ಯಾ ಆವಯ್
ಬಾಪಾಯ್ಕ್ ತಾಂಚಾ ಜಿವಿತಾ ಝುಜಾಂತ್ ತಿಂ ಮೆತೆರ್ ಆಸ್ತಾನಾ ನಿರ್ಭಾಗಿ ಭುರ್ಗೆಂ ಆವಯ್ ಆನಿ
ಬಾಪಾಯ್ಚಾ ಮೊಗಾ ಥಾವ್ನ್ ದೀಸ್ ಆನಿ ರಾತಿಕ್ ವಂಚಿತ್ ಜಾತಾನಾ ಎಕ್ಸುರ್ಪಣಾಂತ್ ಅಡ್ಚಾಲ್ಲ್ಯಾ ತ್ಯಾ ಬಾಳಾಕ್ ದಿಂವ್ಚೆಮ್
ಲಿಸಾಂವ್ ಕಾಳ್ಜಾಕ್ ಲಾಗ್ಚೆ ತಸಲೆಂ. ಪ್ರತ್ಯಕ್ಶ್ ರುಪಾನ್
ಹೆಂ ಭುಜಾವಣ್ ಮ್ಹಣೊನ್ ದಿಸ್ಲ್ಯಾರ್ ಪರೋಕ್ಶ್
ಪಣಾಂತ್ ತೆಂ ಆಯ್ಚಾ ಸಮಾಜೆಚೆಂ ಚಾಳ್ತೆಂ ದರ್ಶನ್.
’ರಡಾನಾಕಾರೆ ಬಾಳಾ ಆವಯ್ಕ್ ಸೊಧುನ್
ದನ್ಪಾರಾಂಚಾ ವೊತಾಕ್ ಗೊಟ್ಯಾಂತ್ಲ್ಯೊ ಗಾಯೊ
ಧಾಂವೊನ್ ಯೆತಿತ್ ತುಕಾ ದೂದ್ ದೀಂವ್ಕ್’ [ರಡಾನಾಕಾ ಬಾಳಾ]
ಆಯ್ಚೊ ಮನಿಸ್ ಆಪ್ಲ್ಯಾಪಣಾಂತ್ ಇತ್ಲೊ ಮೆತೆರ್ ಜಾಲಾಕೀ ದನ್ಪಾರಾಂ ಭರಾಚಾ ಭುಕೆಕ್
ಸಯ್ತ್ ತ್ಯಾ ಬಾಳಾಕ್ ಆವಯ್ಚಾ ದುದಾಚೆಂ ನಶಿಬ್ ನಾ.
ಹಾಂಗಾಸರ್ ಪ್ರತ್ಯಕ್ಶ್ ಜಾವ್ನ್ ಬಾಳಾಕ್ ಭುಜಾವಣ್ ದಿಂವ್ಚೆಂ
ದಿಸ್ತಾ ಜಾಲ್ಯಾರ್ಯ್ ಪರೋಕ್ಶ್ ಜಾವ್ನ್ ಆವಯಾಂಚಾ
ಸಮಾಜೆಕ್ ವಾಗಂವ್ಚಾ ನಿತಿ ವಯ್ರ್ ಬಂಡಾಯ್ ದಿಸ್ತಾ.
ಹೆಂ ಮುಕಾರುನ್ ಪಳೆಲೆಂ ತರ್;
’ರಡಾನಾಕಾರೆ ಬಾಳಾ ಬಾಪಾಯ್ಕ್ ವಿಚಾರ್ನ್
ಆಮೊರೆಚಾ ವೆಳಾ ಆಂಕ್ವಾರ್ ಮರಿ ಯೆತಾ
ಮಾಗ್ ಮಾಂಯ್ಕಡೆ ಭಳ್ ಭಲಾಯ್ಕಿ ದೀಂವ್ಕ್
ದೀಸ್ರಾತ್ ತೊ ಘೊಳ್ಚಾ ಪಯ್ಶಿಲ್ಯಾ ಗಾಂವಾಂತ್’
[ರಡಾನಾಕಾ ಬಾಳಾ]
ಆಮೊರೆಚಾ ವೆಳಾರ್ ಜಾಲ್ಯಾರ್ಯ್ ಬಾಪುಯ್ ಘರಾ ನಾತ್ಲ್ಲೆಂ ಘರಾಣೆಂ ಧರ್ಮಿಕ್ಪಣಾಂತ್ ಆಪ್ಲೊ
ವೈಭವ್ ಹೊಗ್ಡಾಂವ್ಕ್ ಪಾಂವ್ಚೆಂ ತೆಂ ದುರಂತ್ ಕವಿನ್
ಹಾಂಗಾಸರ್ ಭೋವ್ಚ್ ಸೊಭಿತ್ ಶೈಲೆಂತ್ ಸಮಾಜೆ
ಮುಕಾರ್ ದವರ್ಚೆಂ ಪ್ರೇತನ್ ಕೆಲಾಂ. ಹಿ ಕವಿತೆಚಿ ಸೊಭಾಯ್ ತರ್ಯ್ ಕವಿತೆಂತ್ಲ್ಯಾ ವಿಚಾರಾಂಚೆರ್ ಉಗ್ಡಾಪೆ ಕೆಲ್ಲಿ ಕ್ರಾಂತಿ
ವಯ್ಲ್ಯಾಭಾರ್ ನಿರಾಸಾಕ್ ಇಡೆಂ ದಿತಾ ಜಾಲ್ಯಾರ್ಯ್ ವಿಚಾರಾಂಕ್
ಸೊಡುನ್ ದಿಂವ್ಚೆಂ ದಿಸಾನಾ. ಸಮಾಜೆಚೊ ಹುಸ್ಕೊ
ಹಾಂಗಾಸರ್ ಉಟೊನ್ ದಿಸ್ತಾ. ಸಮಾಜೆಕ್ ಜಾಗಂವ್ಚೆಂ ಪ್ರಾಮಾಣಿಕ್
ಪ್ಯಯತ್ನ್ ಮ್ಹಣ್ಯೆತ್.
’ಥಂಡ್ ಸಾಂಜೆಚ್ಯಾ ವಾರ್ಯಾಪರಿಂ
ವ್ಹಾಳೊನ್
ಆಯ್ಲೆಂಯ್, ಕಾಳ್ಜಾಂತ್ ರಾವ್ಲೆಂನಾಂಯ್
ಗಿರ್ಬುಜೆಚ್ಯಾ ಪಿಲಾಪರಿಂ, ಉಭೊನ್ ಗೆಲೆಂಯ್
ಪಾಕಾಟೆ ಫುಟ್ತಾನಾ - ಭಾತಾ ಕಣ್ ಸೊಧುನ್’
[ತುಂ]
ಕವಿ ಆಪ್ಲ್ಯಾ ಚಡಾವತ್ ಕವಿತೆಂನಿ ಆಪ್ಲ್ಯಾ ಬಂವ್ತಿಂ ಏಕ್ ನಿರಾಸೆಚೊ ಪಿಂಜ್ರೊ ರಚ್ತಾ ಆನಿ ತೊ ಕಯ್ದ್ ಜಾತಾ. ಆಪ್ಲ್ಯಾಚ್ ಖುಶೇನ್! ಅಶೆಂ ಆಸ್ತಾಂ ಆಪ್ಲ್ಯಾ ಖುಶೇಚಾ
ಕಯ್ದ್ಪಣಾಂತ್ ತೊ ಸ್ವತಂತ್ರಾಚೊ ಚಡ್ ಉಂಚ್ಲೊ ಸಂಕೇತ್ ಜಾವ್ನ್
ಸುಕ್ಣ್ಯಾಕ್ ಸಮಾಜೆ ಮುಕಾರ್ ದವರ್ತಾ ಆನಿ ತ್ಯಾ ಸುಕ್ಣ್ಯಾ
ಸಾಂಗಾತಾ ಆಪ್ಣಾಕ್ ಧಾಂವೊಂಕ್ ಉಭೊಂಕ್ ಜಾಯ್ನಾಂ ಮ್ಹಳ್ಳ್ಯಾವಿಶಿಂ ನಿರಾಸಾನ್
ಪ್ರಾಸಾರ್ತಾ. ಹೊ ನಿರಾಸ್ ಕಿತ್ಯಾಕ್?
’ರಾತ್ ಸಂಪ್ಲಿ, ಫಾಂತೆಂ ಜಾಲೆಂ, ಸರ್ಗಾರಾಜ್ ಭಾಸಾಯಿಲ್ಲೊ
ಹೊರೆತ್ ಆಯ್ಲೊ ನಾ
ಸಂಪೊನ್ ತೆಲಾಂ, ಬಾವೊನ್ ಫುಲಾಂ - ಜಿಣ್ಯೆಂತ್ ದೀಸ್ ಉದೆಲೊ
ನಾ’ [ನಶಿಬಾಚಿ ರಾತ್]
ನಶಿಬಾಂತ್ಲೆಂ ಸುಖ್ ಸಾಂಡುನ್ ಸರ್ಗಾರಾಜ್ ಭಾಸಾಯಿಲ್ಲ್ಯಾ
ಹೊರೆತಾಕ್ ಅಪ್ಲೆಂ ಜಿವಿತ್ ಅಪ್ಲ್ಯಾಚ್ ಖುಶೇನ್ ಕಯ್ದ್ ಕರುನ್
ಸಮರ್ಪಿಲಾಂ ಆಸ್ತಾಂ ಆತಾಂ ಉದೆನಾತ್ಲ್ಲ್ಯಾ ದಿಸಾಕ್ ಪಳೆವ್ನ್ ನಿರಾಸ್ ಕಿತ್ಯಾಕ್? ಕಾಂಯ್
ಪುಣಿಂ ಸಾಂಡ್ಲ್ಲ್ಯಾ ಆಶೆಚಿಂ ಮುಳಾಂ ಧೊಸುಂಕ್ ಲಾಗ್ಲ್ಯಾಂತ್?
’ಪುನ್ವೆರಾತಿಂ ಮ್ಹಾಕಾ ನೆಕೆತ್ರಾಂ
ದಿಸಾನಾಂತ್
ಹಾಂವ್ಗಾ ಕವಿ ಕಾಳೊಕಾಂತ್ಲೊ
ಆಮಾಸಿ ಮೊಳ್ಬಾರ್ ಕಾಜುಲ್ಯಾಂಚೊ ದಳ್ಬಾರ್
ಖಬ್ರೆವಿಣೆಂ ಚಲ್ತಾ ವೆಪಾರ್ ಗಿರ್ಬುಜ್ಯಾಂಚೊ’ [ಕಾಳೊಕಾಂತ್ಲೊ ಕವಿ]
ಕಾಳೊಕಾಂತ್ಲ್ಯಾ ಕವಿಚೊ ನೀಜ್ ಬಂಡಾಯ್ ಹೊ. ಹೊ ಕವಿ ಅಪುಣ್ ಕಾಳೊಕಾಂತ್ ಕಯ್ದ್
ಮ್ಹಣೊನ್ ದಿಸ್ಲ್ಯಾರ್ಯ್ ತೊ ಕಾಳೊಕಾಂತ್ ಕಯ್ದ್ ಜಾಂವ್ಕ್
ನಾ. ಬಗಾರ್ ತ್ಯಾ ಕಾಳೊಕಾನ್ ಕಯ್ದ್ ಕರ್ಚಾ ಮನ್ಶಾ ಜಿವಿತಾಚಾ ಭಿತರ್ಲ್ಯಾ ರುಪಾಂಕ್ ಉಗ್ಡಾಪೆಂ ಕರ್ತಾ ಆನಿ ಸಂಸಾರಾಚಾ ಮುಕಾರ್ ದವರ್ತಾ. ಅಶೆಂ ಆಸ್ತಾನಾ ಹಾ ತಾಚ್ಯಾ ಕಯ್ದಿಪಣ್ಯ್
ನಿರಾಸೆಚೊ ಬಿಲ್ಲೊ ಲಾಂವ್ಕ್ ಜಾಯ್ನಾ.
ಪುಣ್ ತಾಚಿ ನಿರಾಶಾ ತೊ ವ್ಯಕ್ತ್ ಕರ್ತಾ ತಾಚ್ಯಾಚ್ ಉತ್ರಾಂನಿ. ಖಂಯ್ ನಾಂ ತರ್ ಖಂಯ್ ತಾಕಾ ತಾಣೆಂ ಉಟಯಿಲ್ಲ್ಯಾ ಆವಾಜಾಕ್ ಆಯ್ಕೊಂವ್ಚೆ ಕೊಣ್ಯ್ ನಾಂತ್ ಮ್ಹಳ್ಳಿ ಖಂತ್
ಸ್ಪಶ್ಟ್ ಆಸಾ. ಹ್ಯಾ ಖಾತಿರ್ ತೊ ನಿರ್ಶಿ ಜಾತಾ.
ಹ್ಯಾಚ್ ವಿಚಾರಾಂಕ್ ತೆ ಕವಿ - ಹೆ ಕವಿ ಕವಿತೆಂತ್ಯ್ ಪಳೆವ್ಯೆತ್ ಜಾಲ್ಯಾರ್ಯ್ ಹಾಂಗಾಸರ್ ಕವಿಂಚಾ ಅಬ್ಲೇಸ್ಪಣಾಚಿ ಚರ್ಚಾ ಆನಿ ಸಾಹಿತ್ಯಾಕ್ ಖಂಯ್ಚಾ ಪರಿಮಿತೆಂತ್ ತೆ
ಗಳ್ಸಿತಾತ್ ಆನಿ ಫಾಯ್ದೊ ಜೊಡ್ತಾತ್ ಮ್ಹಳ್ಳೆ ವಿಚಾರ್ ಸ್ಪಶ್ಟ್ ಆಸಾತ್.
ಸಾಮಾಜಿಕ್ ವೆವಸ್ತೆಂತ್ಲೆ ಮನಿಸ್ಯ್ ಎಕಾಮೆಕಾ ಎಕ್ಲ್ಯಾ ಥಾವ್ನೆಕ್ಲ್ಯಾಕ್ ಹೊಂದ್ವೊನ್ ಆಸ್ತಾತ್. ಹಿ ವೆವಸ್ತಾಯ್ ತಸಲಿಚ್ - ಎಕ್ಲ್ಯಾ ಥಾವ್ನ್ ಎಕ್ಲೊ ಜಿಯೆತಾ.
’ರಾಂದ್ವಯೆ ಕೊಂಕ್ಣ್ಯಾಕ್ ಮಾಸ್ಳೆ ಕಡಿ ಜೀವ್
ಮಾಸ್ಳೆಚ್ಯಾ ಮಾಪ್ಳ್ಯಾಕ್ ರುಕಾ ಕಣ್ಗೆಂತ್ ಪಿರಾಣ್
ಕೊರ್ಗ್ಯಾನ್ ಆಪ್ಲ್ಯಾ ನಶ್ಟಿ ಜಿಣ್ಯೆರ್ ಶಿಣ್
ಕುಮಾರಾಚಾ ಕಾಳ್ಜಾಂತ್ ರಾಯಾಚೆಂ ಸಪಣ್’ [ಸಾಂತೆಂತ್]
ಹ್ಯಾ ಸ್ವಪ್ಣಾಂಕ್ ಸತ್ ಕರುಂಕ್ ವಾಸ್ತವಿಕ್ ಸಮಾಜೆಂತ್ಲೊ ಕಸೊ ಧಾರ್ಮಿಕ್ ಸಮಾಜೆಚೊ ವೇಸ್ ಘೆತಾ ಆನಿ ಆಪ್ಲ್ಯಾ ಸಮಾಜೆಕ್ ಫಟಯ್ತಾ ಮ್ಹಳ್ಳೆಂ ತೆಂ ಸನ್ನೇಶಿ
ಕವಿತಾ ರುಜು ಕರ್ತಾ.
’ತಳಾತ್ ದಾಖಯ್ನಾಸ್ತಾನಾ ಧಾಡಿನಾಕಾಗೊ ಪಾಟಿಂ
ನಶಿಬಾಂತ್ಲೊಂ ರಾಯ್ಕುಂವರ್ ರಾಗಾರ್ ಜಾಯ್ತ್’ [ಸನ್ನೇಶಿ]
ಸಮಾಜೆಕ್ ಬನಾಂವ್ಕ್ ಆಪ್ಲೆಂಚ್ ರಚ್ಲ್ಲ್ಯಾ ಸಮಾಜೆಚೆ ದೊರೆ ಉಡೊನ್ ಆಪ್ಣಾಂವ್ಚಿ ರೀತ್ ವಾಸ್ತವೀಕ್ ಸಮಾಜೆಚೆಂ ಪೊಕೊಳ್ಪಣ್ ಧಾಖಯ್ತಾ.
ಹ್ಯಾ ಪೊಕೊಳ್ಪಣಾಕ್ ’ವಾಂಟೆ’ ಕವಿತಾ ಸಾಂಗಾತ್ ದಿತಾ.
’ಆಂಗಾಂತ್ ಭರ್ತಿ ಆಸ್ತಾನಾ ಹೆಂ ಸಗ್ಳೆಂ ಖಂಯ್ಗಾ ಗೊಮ್ತಾ
ದುಡ್ವಾಚೊ ಭಿಯಾಳೊ ಆಸ್ಚೊ ಬೊಯ್ಲಾ ಭಾಟಾಂನಿ ವೊಂಪ್ತಾ
ಇಗರ್ಜೆ ಆಸ್ರ್ಯಾಂಕ್ ದಾನ್ ದೀವ್ನ್ ಮಾತ್ಯಾರ್ ಮುಂಡಾಸ್ ಭಾಂದ್ತಾ’ [ವಾಂಟೆ]
ಪಾಕಾಟೆ ಫುಟ್ಲ್ಲೆಂ ಗಿರ್ಬುಜೆ ಪೀಲ್ ಸ್ವತಂತ್ರ್ಪಣಿಂ ಉಡೊಂಕ್ ಸಕ್ತಾ ಜಾಲ್ಯಾರ್ಯಿ ಮನ್ಶಾ ಜಿವಿತಾಕ್ ಸ್ವತಂತ್ರಾಚಾ ಭೋವ್ಶಾ ಸ್ವಪಾಣ್ಚ್ ಮ್ಹಣ್ಯೆತ್. ಪಾರಂಪರಿಕ್
ಚಿಂತ್ಪಾವಯ್ರ್ ಉದೆವ್ನ್ ಆಯಿಲ್ಲೆಂ ’ದಾರ್ ಉಘಡ್ ಮಾಂಯ್’ ಅಸಲ್ಯಾಚ್ ಎಕಾ ಜಿವಿತಾಕ್ ದೊಳ್ಯಾಂ ಮುಕಾರ್ ಹಾದ್ತಾ ಜಾಲ್ಯಾರ್ ’ಖಂತ್’ ಕವಿತೆಂತ್ಯೀ ತೆಂಚ್ ಪಾರಂಪರಿಕ್ ಚಿಂತಾಪ್
ಪುಣ್ ಕವಿತೆಚಾ ವ್ಹಾಳ್ಯಾಚಿ ಶೈಲಿ ಮಾತ್ರ್ ಭರ್ವಶ್ಯಾಚಿ. ಹ್ಯಾ ಭರ್ವಶ್ಯಾಕ್ ಸ್ವಶ್ಟ್ ಕರ್ಚೆಂ ತರ್;
’ಫಾಂತ್ಯಾಫರಾರ್ ಬಾಯ್ಲ್ ಉಟ್ತಾ
ಬರವ್ನ್ ದವರ್ಲ್ಲ್ಯೊ ಕವಿತಾ ಘೆತಾ
ರಾಂದ್ಣಿಕ್ ಚೆಪುನ್ ಉಜೊ ಪೆಟಯ್ತಾ
ಆನಿ ಮ್ಹಣ್ತಾ: ಕವಿತಾ ಉನ್ಯಾಪರಿಂ
ಕಾಗ್ದಾ ಕುಡ್ಕ್ಯಾಂನಿ ಆದಾನ್ ತಾಪಯ್ತಾ
ರಿಕಾಮ್ಯಾ ಮೊಡ್ಕೆಂತೀ ಪೇಜ್ ಶಿಜಯ್ತಾ’ [ಬಾಯ್ಲೆಚಿ ಕವಿತಾ]
ಕಾಗ್ದಾ ಕುಡ್ಕ್ಯಾಂನಿ ಆದಾನ್ ತಾಪವ್ನ್ ರಿಕಾಮ್ಯಾ ಕೊಡ್ಕೆಂತ್ ಪೇಜ್ ಶಿಜಂವ್ಚೆಂ ನಿಜಾಯ್ಕ್ಯ್ ಕವಿಚಾ ಸಾಮಾಜಿಕ್ ಜಿಣಿಯೆಚೆಂ ಏಕ್ ಸ್ಪಂದನ್. ಅಶೆಂ ಮ್ಹಣ್ತಾನಾ ಹ್ಯಾ
ಕವಿತಾ ಜಮ್ಯಾಂತ್ ಫಕತ್ತ್ ನಿರಾಸ್ ಮಾತ್ರ್ ನಾ. ಭರ್ಪೂರ್ ಮೋಗ್ಯ್ ಆಸಾ. ಮೊಗಾಚೊ ಸಾಂಗಾತ್ಯ್ ಆಸಾ.
ಕವಿತಾಜಮ್ಯಾಚಾ ಸಾಹಿತ್ಯಾಂತ್ ವಾಸ್ತವಿಕ್ ಜಿವಿತಾಚಾ ಸಂಘರ್ಷಾಂತ್ ಆನಿ ಮನೋರಂಜನ್ ಜೊಡುನ್ ಘೆಂವ್ಚಾ ಜಿವಿತಾಂತ್ ಕಿತ್ಲೊ ಅಂತರ್ ಆಸಾ ತೆಂ ದಾಕವ್ನ್ ದಿಂವ್ಚೆಂ
ಕವಿತಾ ’ಸೀರಿಯಲಾಂತ್ಲ್ಯೊ ಸುನೊ’ ದೀಸ್ಪಡ್ತ್ಯಾ ಜಿವಿತಾಕ್ ಅರ್ಸೊ ದವರುನ್ ಧಾಖಯ್ತಾ ಆಸ್ತಾಂ, ಖಂಯ್ಸರ್ಗೀ ಕವಿ ಹ್ಯಾ ವಾಸ್ತವೀಕ್ ಸ್ಮಾಜೆ ಮುಖಾರ್ ನಿರಾಶಿ ಆನಿ
ಆಪ್ಣಾಕ್ಚ್ ಲಾಚಾರ್ ಮ್ಹಳ್ಳ್ಯಾಪರಿಂ ದಿಸ್ತಾ ತರ್ಯೀ ಹ್ಯಾ ಚಿಂತ್ಪಾಕ್ ಹಾಂವ್ ಸಾಹಿತ್ಯಾಚಾ ನದ್ರೆನ್ ಖಂಡಿತ್ ಸ್ವಾಗತ್ ಕರಿನಾ. ಕಿತ್ಯಾಕ್ ಮ್ಹಳ್ಯಾರ್ ಸಾಹಿತ್ಯ್ ಘಡ್ಣಾರ್
ಯಾ ಸಾಹಿತ್ಯ್ ರಚ್ಣಾರ್ ಆಪ್ಲ್ಯಾ ಯಾ ಪೆಲ್ಯಾಚಾ ಸಮಾಜ್ ಆನಿ ಜಿವಿತಾ ಮಧ್ಲ್ಯಾ ಸ್ಪಂದನಾಕ್ ಘೆಂವ್ನ್ ಸಾಹಿತ್ಯ್ ರಚ್ತಾ ಆಸ್ತಾಂ ತಾಚ್ಯಾ ಲಿಖ್ಣೆಚೆರ್ ಚಡ್ ಪ್ರಭಾವ್
ವರ್ತಮಾನ್ ಯಾ ಪ್ರಸ್ತುತ್ ಘಾಲ್ತಾ. ಅಶೆಂ ಆಸ್ತಾನಾ ತೊ ಪ್ರಸ್ತುತೆಕ್ ಚಡ್ ಧ್ಯಾನ್ ದಿತಾ ಶಿವಾಯ್ ಭವುಶ್ಯತಾಕ್ ನ್ಹಂಯ್. ಅಶೆಂ ಜಾಲ್ಲ್ಯಾನ್ ಭವಿಶ್ಯತಾಚೊ ಆಶಾವಾದ್
ಅಸಲ್ಯಾ ಸಾಹಿತ್ಯಾಂತ್ ಝಳ್ಕೊಂಚೊ ಚಡ್ ಉಣೊ. ನವ್ಯೋತ್ತರ್ ಸಾಹಿತ್ಯಾಚಾ ಹ್ಯಾ ಪ್ರಕಾರಾಂತ್ ನಿರಾಸ್ ಜರೂರ್ ದಿಸ್ತಾ ಜಾಂವ್ಕ್ ಪುರೊ. ಪುಣ್ ನಿರಾಸ್ವಾದ್ ಖಂಯ್ಚರ್ಯ್
ಝಳ್ಕಾನಾ. ಪ್ರಸ್ತುತೆಂತ್ಲೆಂ ಚಾಲ್ತೆಂ ಜಿವಿತ್ ಜಾಂವ್ ತೆಂ ಹಾಸ್ಚೆಂ ಜಾಂವ್ ತೆಂ ರಡ್ಚೆಂ ಜಾಂವ್ ತೆಂ ಎಕಾಮೆಕಾ ಹೊಂದ್ವೊನ್ ಜಿಯೆಂವ್ಚೆಂ ಯಾ ಸ್ವಾರ್ಥಾನ್
ಜಿಯೆಂವ್ಚೆಂ ಹಿಂ ಪ್ರಜಾಪ್ರಭುತ್ವಾಚಾ ಭಂಡ್ವಾಳ್ಶಾಹಿ ಸಮಾಜೆಚಿಂ ದೋಣ್ ಮುಖಾಂ.
ಹಾಕಾ ದಾಖ್ಲೊ ದಿಂವ್ಚೊ ತರ್ ಹ್ಯಾಚ್ ಜಮ್ಯಾಂತ್ಲ್ಯಾ ’ಸಾಳಿಯೊ ಆನಿ ರಾಯ್’ ಕವಿತೆಂತ್ ತ್ಯಾ ರಾಯಾನ್ ಸಾಳಿಯೆಚಾ ಎಕಾ ಮುಖಾಂತ್ ಜಿಕ್ಲೊ. ದುಸ್ರ್ಯಾ ಮುಖಾಕ್ ತಾಣೆಂ
ಪಳೆಲಾಂ ಯಾ ನಾ ತೆಂ ಸವಾಲ್ ನ್ಹಂಯ್ ವಾ ದುಸ್ರೆಂ ಮುಖ್ ತಾಕಾ ಗರ್ಜೆಚೆಂ ಮ್ಹಣೊನ್ ದಿಸೊಂಕ್ಯ್ ನಾ ಜಾಂವ್ಕ್ ಪುರೊ. ಕಿತ್ಯಾಕ್ ಮ್ಹಳ್ಯಾರ್ ತಾಚಿ ವಸ್ತುನಿಶ್ಟ್
ಝುಜಾಂತ್ ಜಿಕ್ಚಿ ಜಾವ್ನಾಸ್ಲ್ಲಿ. ದೆಖುನ್ ತಾಣೆಂ ಸಾಳಿಯಾಚಾ ಎಕಾ ಮುಖಾಕ್ ಮಾತ್ರ್ ದೆಖೊನ್ ಪಾರ್ಕಿಲೆಂ ಆನಿ ತೊ ಜಿಕ್ಲೊ. ದುಸ್ರ್ಯಾ ರುಪಾಕ್ ತಾಣೆಂ ಪಾರ್ಕುಂಕ್ ನಾ ದೆಖುನ್ ತೊ
ಮೆಲೊ. ಅಶಿಚ್ಚ್ ಪ್ರಸ್ತುತ್ ಸಮಾಜ್.
ಪ್ರಸ್ತುತ್ ಸಮಾಜೆಂತ್ ತೆಂಯ್ ಪ್ರಜಾಪ್ರಭುತ್ವಾಚಾ ಸ್ವತಂತ್ರ್ ಸಮಾಜೆಂತ್ ಜಿ ಸಮಾಜ್ ಬಂಡ್ವಾಳ್ಶಾಹಿಂಚಾ ಅಧಿಕಾರಾ ಸಕಯ್ಲ್ ಚಲ್ತಾನಾ ಹಾಂಗಾಸರ್ ಹರ್ಯೆಕ್ಲೊ
ಸಾವ್ಕಾರ್ ಜಾಂವ್ಕ್ ಆಶೆತಾ. ಹ್ಯಾ ಆಶೆಕ್ ನೌಕರಾನ್ ಸಾಂಗಾತ್ ದೀನಾ ಜಾಲ್ಯಾರ್ ತೊ ಸಾವ್ಕಾರ್ ಕಸೊ ಜಾಂವ್ಚೊ? ಅಶೆಂ ಮ್ಹಣ್ತಾನಾ ಹಾಂಗಾ ಸಾವ್ಕಾರಾಕ್
ನೌಕರ್ ಆನಿ ನೌಕರಾಕ್ ಸಾವ್ಕಾರ್ ಚಡ್ಚ್ ಗರ್ಜೆಚೊ. ಹ್ಯಾ ಗರ್ಜೆ ಭಂವ್ತಿಂ ವಾಸ್ತವ್ ಮ್ಹಳ್ಳೆಂ ಏಕ್ ವರ್ತುಲ್ ಆಸಾ. ಹ್ಯಾ ವರ್ತುಲಾ ಭಿತರ್ ಮನಿಸ್ ವಾಸ್ತವಿಕ್ಪಣಿಂ ಮನಿಸ್ ಜಾತಾ.
ಹ್ಯಾಚ್ ಖಾತಿರ್ ಹ್ಯಾ ಕವಿತಾ ಜಮ್ಯಾಂತ್ ವಾಸ್ತವಾಕ್ ಬಾಗ್ವಲ್ಲ್ಯಾ ಮನ್ಶಾಕ್ ಹೊ ಸಂಸಾರ್ ಏಕ್ ಪಿಂಜ್ರೊ ಮ್ಹಳ್ಳ್ಯಾಪರಿಂ ದಿಸ್ತಾ ಜಾಂವ್ಕ್ಪುರೊ. ಪುಣ್ ಖರೆಂಚ್ ಹಾಕಾ
ಪುಷ್ಟಿ ದೀಂವ್ಕ್ ಖಂಡಿತ್ ಜಾಯ್ನಾಂ. ಹ್ಯಾಚ್ ಖಾತಿರ್ ತೊ ಭಾಯ್ಲೊ ಸಂಸಾರ್ ಹ್ಯಾ ಕವಿತಾಜಮ್ಯಾಚಾ ರಚ್ಣಾರಾಕ್ ಸೊಭಿತ್ ದಿಸ್ತಾ ಆನಿ ತ್ಯಾ ಭಾಯ್ಲ್ಯಾ ಸಂಸಾರಾಂತ್ ತೊ
ಜಿಯೆಂವ್ಕ್ ಆಶೆತಾ. ಕೆದ್ನಾಂ ಕೆದ್ನಾಂ ಸುಕ್ಣ್ಯಾಂ ಸಾವ್ಜಾಚಾ ರುಪಾರ್ ಕೆದ್ನಾಂ ಕೆದ್ನಾಂ ಮನ್ಜಾತಿಂಚಾ ರುಪಾರ್.
ಹಿ ಫಕತ್ತ್ ಆಶಾ ಮಾತ್ರ್. ಹಕೀಗತ್ ನ್ಹಂಯ್. ಅಶೆಂ ವಾಸ್ತವಾಕ್ ಫುಡ್ ಕರುನ್ ರಾವ್ತಾ. ಅಶೆಂ ಕೆಲ್ಲ್ಯಾಂತ್ ಕಾಂಯ್ ತೆಂ ಜೊಡುಂಕ್ ಪಾವ್ತಾ? ಅಶೆಂ ಜೊಡ್ಲ್ಲೆಂಚ್ ತ್ಯಾ
ಚೆಡ್ವಾಚಾ ಮೊರಿಯಾಂನಿ ವ್ಹಾಳ್ತಾ ತರ್, ಎಕಾ ಕುಶಿನ್ ಬಾಮುಣಾಚಾ ಚೆಡ್ವಾಚೊ ಬಂಡಾಯ್ ಆನಿ ದುಸ್ರ್ಯಾ ಕುಶಿನ್ ಖಬ್ರೆವಿಣೆಂ ಮೊರಿಯಾಂನಿ ವ್ಹಾಳ್ಚಾ ರಗ್ತಾ ಖಾತಿರ್
ಕವಿತೆಚಾ ನಾಯಕಾನ್ ಉಟಂವ್ಚೊ ಬಂಡಾಯ್ ಎಕಾ ದುಸ್ರ್ಯಾಕ್ ಸಾಂಗಾತ್ ದೀನಾ. ಅಶೆಂ ಆಸ್ತಾಂ ಬಾಮುಣಾಂಚಾ ಚೆಡ್ವಾಚೊ ಬಂಡಾಯ್ ಬಗ್ಲೆಕ್ ಲೊಟುನ್ ಬಾಮುಣ್
ಮ್ಹಳ್ಳ್ಯಾ ಉಂಚ್ಲ್ಯಾ ವರ್ಗಾಚಾ ರಿತಿ ರಿವಾಜೆಂಕ್ ತ್ಯಾಚ್ ವರ್ಗಾನ್ ತಾಂಕಾಂ ಜಾಯ್ ಜಾಲ್ಲ್ಯಾಪರಿಂ ರಚುನ್ ಮೊಡುನ್ ಸಕಯ್ಲ್ಯಾ
ವರ್ಗಾಚಾಂಕ್ಚ್ ಗುನ್ಯಾಂವ್ಕಾರ್ ಕರ್ಚಾ ಹ್ಯಾ ಸಮಾಜಿಕ್ ವ್ಯವಸ್ತ್ವಯ್ರ್ ಆರ್ಸೊ ಧರ್ಚೆಂ ಪ್ರಯತ್ನ್ ಹಾಂಗಾಸರ್ ಕವಿಚೆಂ.
ಕವಿತೆಂಕ್ ಆನಿ ಕವಿಕ್ ಹಾಂವ್ ಜರೀ ಸಂಬಂಧ್ ರಚಿನಾ. ಪುಣ್ ವಾಸ್ತವಿಕ್ ಥಳಾರ್ ಸಾಹಿತ್ಯಾಕ್ ವೊರಾವ್ನ್ ಪಳೆತಾನಾ ಹಾಂಗಾಸರ್ ಕವಿ ಏಕ್ ಮನಿಸ್ ಜಾವ್ನ್ ತೊಯ್
ಸಮಾಜೆಚೊ ಏಕ್ ವಾಂಟೊ ಜಾಲ್ಲ್ಯಾನ್ ಆನಿ ವಾಸ್ತವ್ ಪ್ರತ್ಯಾಕ್ಶ್ ರುಪಾನ್ ಹ್ಯಾ ಕವಿಕ್ಯ್ ಆಪ್ಲ್ಯಾ ವರ್ತುಲಾ ಭಿತರ್ ಘೆತಾ ಜಾಲ್ಲ್ಯಾನ್ ಹಾಂಗಾಸರ್ ತಾಚೆಂಚ್ ಸಾಹಿತ್ಯ್ ತಾಕಾಚ್
ಸಾಂಬಂಧ್ ಜೊಡುಂಕ್ ಸಕ್ತಾ. ಜರ್ತರ್ ಹಾಂವ್ ವಾಸ್ತವಾಕ್ ಸೊಡಿನ್ ತರ್ ಹ್ಯಾ ಸಾಹಿತ್ಯಾಕ್ ಭಳ್ ನಾ. ಕಿತ್ಯಾಕ್ ಮ್ಹಳ್ಯಾರ್ ಹ್ಯಾ ಸಾಹಿತ್ಯಾಚೆ ವಿಚಾರ್ ವಾಸ್ತವಾಚಾ ಥಳಾರ್
ಉಭಾರ್ಲ್ಯಾತ್ ಆಸ್ತಾಂ ಕವಿತೆಂಕ್ ಆನಿ ಕವಿಕ್ ದೊಗಾಂಯ್ಕ್ ಸ್ವತಂತ್ರ್ ಕರ್ಚಾ ಇರಾದ್ಯಾಕ್ ಲಾಗೊನ್ ವಾಸ್ತವಾಕ್ ನೆಗಾರ್ ಕರುಂಕ್ ಜಾಯ್ನಾಂ.
ವಾಸ್ತವಿಕ್ ಜಿವಿತಾಂತ್ ಜಾಲ್ಯಾರ್ಯೀ ಸುಖ್ ಸಂತೊಸ್ ಖಂಯ್ ಆಸಾ? ವಾಸ್ತವಿಕ್ ಜಿವಿತಾಂತ್ ಮನಿಸ್ ಆಪ್ಲಿ ಆಶಾ ಸಾಂಡುನ್ ಅಪ್ಣಾಕ್ಚ್ ತ್ರಪ್ತಿ ದೀಂವ್ಕ್ ಸಕ್ತಾ ಹಿ ತಾಚಿ ಸಲ್ವಣ್
ಶಿವಾಯ್ ಜಯ್ತ್ ನ್ಹಂಯ್. ಅಸಲೆಂ ಜಯ್ತ್ ಆನಿ ಸಲ್ವಣ್ ಹ್ಯಾ ಜಮ್ಯಾಂತ್ ನದ್ರೆಕ್ ಪಡಾನಾ ಹೆಂಚ್ ಹ್ಯಾ ಕವಿತಾಜಮ್ಯಾಚೆಂ ವ್ಹಡ್ಪಣ್ ಆನಿ ಜಯ್ತ್!
ಭವಿಶ್ಯಾಕ್ ರಾಕಾನಾಸ್ತಾನಾ ಭೂತ್ಕಾಳಾಚೆಂ ವರ್ಣನ್ ನಾಸ್ತಾನಾ ಫಕತ್ತ್ ಪ್ರಸ್ತುತ್ ಜಿವಿತಾಕ್ ಸಮಾಜೆ ಮುಕಾರ್ ದವರುನ್ ವಾಸ್ತವಾಚೆಂ ದರ್ಶನ್ ಸಮಾಜೆಕ್
ದಾಖಂವ್ಚೆಂ ಪ್ರಯತ್ನ್ ಹೆಂ. ವಾಸ್ತವಾ ಮುಕಾರ್ ಶರಣಾಗತ್ ಜಾವ್ನ್ ಸಮಾಜೆ ಥಾವ್ನ್ ಪೊಳಾಪೊಳ್ ಘೆವ್ನ್ ಫಕತ್ತ್ ಸಿಂತಿಮೆಂತಾಂಕ್ ಜಾಗಂವ್ಚೆಂ ಪ್ರಯತ್ನ್
ನ್ಹಂಯ್. ಹ್ಯಾಚ್ ಖಾತಿರ್ ಹ್ಯಾ ಜಮ್ಯಾಂತ್ ನಿರಾಸ್ ಆಸಾ. ನಿರಾಸ್ವಾದ್ ನಾ! ಹೆಂ ಹ್ಯಾ ಜಮ್ಯಾಚೆಂ ವ್ಹಡ್ಪಣ್ ಜಾಲ್ಯಾರ್ ವಾಸ್ತವಾಚಾ ಚಾಲ್ತ್ಯಾ ಸತಾಂಕ್ ದೊಳ್ಯಾಂ ಮುಕಾರ್
ಪರತ್ ಪರತ್ ಉಗ್ಡಾಪೆಂ ಕರ್ಚೆಂ ಖಂಡಿತ್ ಹ್ಯಾ ಜಮ್ಯಾಚೆಂ ಉಣೆಂಪಣ್.
ವಾಸ್ತವಿಕ್ ಸಮಾಜೆಂತ್ ಅಡ್ಚೊಂಚೊ ಆನಿ ಭಂಡ್ವಾಳ್ಶಾಹಿ ಸಮಾಜೆಂತ್ ವಜನ್ ಭಗ್ಚೊ ಲೋಕ್ ಪಯ್ಲ್ಯಾಂತ್ ನಿಮ್ನ್ ವರ್ಗ್ ತರ್ ದುಸ್ರ್ಯಾಂತ್ ಮಧ್ಯಮ್ ವರ್ಗ್. ಹ್ಯಾ ದೊನ್ಯ್ ವರ್ಗಾಕ್ ತಾಂಚಾ ಸಾಮಾಜಿಕ್, ನೈತಿಕ್, ರಾಜಕೀಯ್ ಸುಧಾರಣೆಚಾ ವಾಟೆರ್ ಜಾಗವ್ಯೆತ್, ತಾಂಕಾಂ ಆಶಾವಾದಾಚೊ ಪ್ರಕಾಸ್ ಫಾಂಕವ್ಯೆತ್. ಪುಣ್ ವಾಸ್ತವಾಕ್ ಯಾ ವಾಸ್ತವಿಕ್ ಥಳಾಕ್ ನಿರ್ಮೂಲ್ ಕರುಂಕ್ ಸಾಧ್ಯ್ ನಾ. ಹ್ಯಾ ಥಳಾಕ್ ನಿರ್ಮೂಲ್ ಕರ್ಚಾ ಪಯ್ಲೆಂ ದುಸ್ರೆಂ ಥಳ್ ರಚುಂಕ್ ಪಡ್ತಾ. ತ್ಯಾ ಥಳಾಚೆಂ ವಿನ್ಯಾಸ್ ದುಸ್ರೆಂ ಜಾಂವ್ಕ್ ಸಕ್ತಾ ಪುಣ್ ರಚನ್ ತೆಂಚ್!
ಹ್ಯಾ ಖಾತಿರ್ ಹ್ಯಾ ಜಮ್ಯಾಂತ್ಲ್ಯಾ ಉಣ್ಯಾಪಣಾಕ್ ಭರುನ್ ದೀಂವ್ಕ್ ಸಾಧ್ಯ್ ಜಾತಾ ಮ್ಹಳ್ಳೊ ಭರ್ವಸೊ ಖಂಡಿತ್ ನಾ. ಹ್ಯಾ ಪರಿಗತೆಂತ್ ಹ್ಯಾ ಜಮ್ಯಾಂತ್ಲೆಂ ವ್ಹಡ್ಪಣ್ ಜಿಕೊನ್ ಯೆತಾ. ಜಶೆಂ ಹ್ಯಾ ಜಮ್ಯಾಂತ್ಲೊ ಮೋಗ್.
ಉತ್ರಾಂ ಉತ್ರಾಂನಿ ಸೂತ್ರಾಂ ಪಾಚಾರ್ಚೊ ಕವಿ - ಎಚ್ಚೆಮ್ [- ವಲ್ಲಿ ಕ್ವಾಡ್ರಸ್, ಅಜೆಕಾರ್] (ಪ್ರಸ್ತಾವನ್)
’ಕವಿತಾ ಮ್ಹಳ್ಯಾರ್ ಕಿತೆಂ?’ ಮ್ಹಳ್ಳೆಂ
ಸವಾಲ್ ಜರ್ ಕೊಣೆಂಯ್ ಕೆಲೆಂ ತರ್ ಎಕೆಕ್ಲ್ಯಾಚಿ ಎಕೆಕ್
ಜಾಪ್ ಆಸತ್! ತಾಂತಾಂಚಾ ಚಿಂತ್ಪಾಪ್ರಕಾರ್, ತಾಂತಾಂಚಾ ಅರ್ಥಾಪ್ರಕಾರ್,
ತಾಂತಾಂಚಾ ಸಮ್ಜಣೆಪ್ರಕಾರ್. ಪುಣ್ ಕವಿತಾಕ್ ಏಕ್ ಮಿಸ್ತೆರ್
ಮ್ಹಣ್ ಖರೆಂಪಣಿಂ ಪಾತ್ಯೆಂವ್ಚೊ, ತಶೆಂಚ್ ಅಪ್ಲ್ಯಾ ಕವಿತಾಂತ್ ಉತ್ರಾಂ
ಉತ್ರಾಂನಿ ಕವಿತಾಚಿಂ ಸೂತ್ರಾಂ ಭರ್ಚೊ ಕವಿ ಕೊಂಕ್ಣೆಂತ್ ಕೊಣ್ ಮ್ಹಳ್ಯಾರ್
ಮ್ಹಜಾ ಗಮನಾಕ್ ಯೆಂವ್ಚೆಂ ಪಯ್ಲೆಂ ನಾಂವ್ -
ಎಚ್ಚೆಮ್.
’ಎಚ್ಚೆಮ್’ ಲಿಖ್ಣೆಂ ನಾಂವಾರ್ ಕವಿತಾ ಬರಂವ್ಚೊ ’ಹೆನ್ರಿ ಮೆಂದೊಸ್’ ಕೊಂಕ್ಣಿ
ಸಾಹಿತ್ಯಾಕ್ ದೆಂವ್ಲ್ಲೊ ’ಹೆನ್ರಿ ಎಮ್ ಪೆರ್ನಾಲ್’ ಮ್ಹಳ್ಳ್ಯಾ
ಲಿಖ್ಣೆ ನಾಂವಾರ್. ಪೆರ್ನಾಲ್ ಫಿರ್ಗಜೆಂತ್ ಜಲ್ಮೊನ್ ವಾಣಿಜ್ಯ್ಶಾಸ್ತ್ರಾಂತ್
ಪದ್ವೆಚೆಂ ಶಿಕಾಪ್ ಶಿಕ್ತಾಲೊ ತರ್ಯ್ ’ಕವಿತಾ’ ತಾಚಿ ಪಯ್ಲಿ ಆಂವಡ್ ಆನಿ
’ಸಾಹಿತ್ಯ್ ತಾಚಿ ಪಯ್ಲಿ ಭಾಸ್’.
ಅಜೀಕ್ ದೋನ್ ದಾಕ್ಡ್ಯಾಧಿಂ ತಾಚಿ ಸಾಹಿತಿಕ್ ಸುರ್ವಾತ್ ಜಾಲ್ಲೆವೆಳಾರ್ಯ್ ತಾಚೆ
ಚಿಂತಾಪ್ ದಾವ್ಯಾಪಂತೀಯ್ (ಲೆಫ್ಟಿಸ್ಟ್), ಅಥ್ವೆಂಚ್ ಚಿಂತಾಪ್, ಉತ್ರಾಂ
ಉತ್ರಾಂನಿ ತೀಕ್ಷ್ಣ್ ಇಮಾಜ್ಯೊ
ಉಭ್ಯೊ ಕರ್ಚೊ, ಕೆದ್ನಾಂ ಅಪ್ಲ್ಯಾ ಕಾಣ್ಯಾಂನಿ, ಕೆದ್ನಾಂ ತಾಂತ್ಲ್ಯಾ
ಪಾತ್ರಾಂನಿ ಅಪ್ಲೊ ರಾಗ್ ಪಾಚಾರ್ಚೊ ಹೊ ನೀಜ್ ಜಿಣ್ಯೆಂತ್ ಭೋವ್
ದಾಕ್ಶೆಣೆಚೊ, ಲಜೀಶ್ಟ್ ಸ್ವಭಾವಾಚೊ. ಪುಣ್ ಚಿಂತ್ಪಾಂತ್ ತಿತ್ಲೊಚ್ ಕಡಕ್ಕ್ ಆನಿ
ಚುರುಕ್. ಸಮಾಜೆಚಾ ಎಕೆಕಾ ಕೊನ್ಶಾಂತ್ ತಾಚಿ ವಿಮರ್ಶಾತ್ಮಕ್
ನದರ್ ಆಸಾ.
ಕೊಂಕ್ಣೆಂತ್ ತಾಣೆ ಸಭಾರ್ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್, ಆನಿ ತಾಂತ್ಲ್ಯಾ ಥೊಡ್ಯಾಂಕ್
ಸ್ಪರ್ಧ್ಯಾಂನಿ ಇನಾಮಾಂಯ್ ಲಾಭ್ಲ್ಯಾಂತ್, ಪುಣ್ ಕೊಂಕ್ಣಿ
ಸಮಾಜ್ ತಾಕಾ ವಳ್ಕಾತಾ ಎಕಾ ’ಕವಿ’ ರುಪಾರ್. ಹೆಂ ಭೊವ್ಶಾ
ಹ್ಯಾ ದೋನ್ ದಾಕ್ಡ್ಯಾಂನಿ ತಾಣೆಂ ಕೊಂಕ್ಣಿ ಕವಿತಾಶೆತಾಂತ್ ಕೆಲ್ಲ್ಯಾ
ವೆಗ್ಳ್ಯಾಚ್ ರಿತಿಚಾ ವಾವ್ರಾಕ್. ಶೆಂಭೊರಾಂ ವಯ್ರ್ ಕೊಂಕ್ಣಿ ಕವಿತಾ
ಹಾಣೆಂ ಎದೊಳ್ ಬರಯ್ಲ್ಯಾಂತ್ ಸಭಾರ್ ಕವಿತಾಂಕ್ ಇನಾಮಾಂಯ್
ಫಾವೊ ಜಾಲ್ಯಾಂತ್, ಹಾಂತುಂ; ರಾಕ್ಣೊ ಸಾಹಿತಿಕ್ ಸ್ಪರ್ಧ್ಯಾಂತ್, ಕಾಣಿಕ್
ಪತ್ರಾನ್ ಮಾಂಡುನ್ ಹಾಡ್ಲ್ಲ್ಯಾ ಸ್ಪರ್ಧ್ಯಾಂತ್, ದಾಯ್ಜ್
ಪಂಗ್ಡಾನ್ ಮಾಂಡುನ್ ಹಾಡ್ಲ್ಲ್ಯಾ ಸ್ಪರ್ಧ್ಯಾಂತ್ ಲಾಭ್ಲ್ಲ್ಯಾ
ಇನಾಮಾಂಚೊ ಉಲ್ಲೇಕ್ ಕರ್ಯೆತ್ ತರ್ಯ್ ಹಾಚಾ ಕವಿತಾಂಕ್ ರುಜ್ವಾತ್
ದಿಂವ್ಚಾಕ್ ಹಿಂ ಇನಾಮಾಂ ಮಾತ್ರ್ ನ್ಹಯ್, ಹೆರ್ಯ್ ಜಾಯ್ತೆಂ
ಆಸಾ;
’ಚಲಿಯಾಂಕ್ ಚತ್ರಾಯ್’ - ಹಾಚೊ ಫುಡ್ಲದ್
ಕವಿತಾಜಮೊ, ಫುಡೆಂ ಆಶಾವಾದಿ ಪ್ರಕಾಶನಾನ್ ಪರ್ಗಟ್ ಕೆಲ್ಲೊ
’ಕಯ್ದ್ಯಾಚ್ಯೊ ಕವಿತಾ’ ಆನಿ ಆತಾಂ ಆಶಾವಾದಿ ಪ್ರಕಾಶನಾನ್
ಪರ್ಗಟ್ ಕರ್ಚೊ ಎಚ್ಚೆಮಾಚೊ ತಿಸ್ರೊ ಕವಿತಾಜಮೊ ’ಬಾಮುಣಾಂಚೆಂ
ಚೆಡುಂ’ - ಹೆ ತಿನೀಂ ಬೂಕ್ ತೀನ್ ವೆವೆಗ್ಳ್ಯಾ ಸಂದರ್ಭಾರ್,
ವೆವೆಗ್ಳ್ಯಾ ಚಿಂತ್ಪಾಚೆರ್, ವೆವೆಗ್ಳ್ಯಾ ಹಂತಾಚೆರ್ ಹಾಚಾ
ಲಿಖ್ಣೆಥಾವ್ನ್ ಉದೆವ್ನ್ ಆಯಿಲ್ಲಿಂ ಕವಿತಾ ಜಾವ್ನಾಸಾತ್;
ತರ್ನಾಟ್ಪಣಾರ್ ಫುಲ್ತ್ಯಾ ತರ್ನಾಟ್ಪಣಾಚಿಂ ಭಗ್ಣಾಂ ’ಚಲಿಯಾಂಕ್
ಚತ್ರಾಯ್’ ದೀಂವ್ಕ್ ವೆತಾನಾ ಉಪ್ರಾಂತ್ಲೆಂ ಹಂತ್ ಕಾಜಾರ್.
ಪುಣ್ ಕಾಜಾರ್ ಜಾವ್ನ್ ಸಂತೊಸಾಚೆ ದೀಸ್ ಸಾರ್ತಾನಾಂ ಜಿಣ್ಯೆಚಾ ಜ್ಯಾ ಕುಶಿಕ್
ಹೊ ಪಳೆತಾ ಆನಿ ಅಜ್ಯಾಪ್ ಪಾವ್ತಾ. ಮನ್ಶಾಜಿವಿತ್ ಏಕ್ ಉದ್ಕಾಂತ್ಲ್ಯಾ ಬುಳ್ಬುಳ್ಯಾಕ್
ಸರಿ ಕರ್ತಾತ್ ಕೊಣ್. ಹ್ಯಾ ಮಟ್ವ್ಯಾ ಆವ್ದೆಚಾ ಜಿಣ್ಯೆಂತ್
ಮನಿಸ್ ಸಭಾರ್ ಯುಗಾಂ ಜಿಯೆತಾನಾ ಎಕೆಕ್ ಸುಕ್-ದೂಕ್
ಮನ್ಶಾಕ್ ತ್ಯಾ ತ್ಯಾ ವೆಳಾಕಾಳಾ ಫರ್ಮಾಣೆ ಸ್ವೀಕಾರ್ ಕರುಂಕ್
ಆಸಾ, ಕೊಣ್ ತೆದ್ನಾಂ ಹೆಂ ಸ್ವೀಕಾರ್ ಕರ್ತಾ ಆನಿ ಜಿಕ್ತಾ, ತರ್ ಕೊಣ್
ಸಲ್ವಾತಾ. ಪುಣ್ ಎಚ್ಚೆಮ್ ಮ್ಹಜಾ ಚಿಂತ್ಪಾಪ್ರಕಾರ್ ಹೆಂ ಸ್ವೀಕಾರ್
ಕರುನ್ ಧಯ್ರಾನ್ ಜಿಯೆಲ್ಲೊ ಯಾ ಜಿಯೆಂವ್ಕ್ ಪ್ರೇತನ್ ಕರ್ಚೊ
ಕವಿ ಆನಿ ಹಾಕಾ ರುಜ್ವಾತ್ ದಿತಾ ಹಾಚೊ ’ಕಯ್ದ್ಯಾಚ್ಯೊ
ಕವಿತಾ’.
ಕವಿಚಾ ಚಿಂತ್ಪಾಪ್ರಕಾರ್ ಹೊ ಸಂಸಾರ್ ಏಕ್ ’ಬಂದಿಖಾನೊ’ ಆನಿ
ಹಾಂತುಂ ಜಿಯೆತೆಲಿಂ ಸರ್ವಾಂ ’ಕಯ್ದಿ’, ಥೊಡೆ ಧರ್ಮಾಚೆ
ಕಯ್ದಿ, ಆನಿ ಕೊಣ್ ಅಧಿಕಾರಾಚೆ.. ಪುಣ್ ಸಗ್ಳೆ
ಕಯ್ದಿಚ್ಚ್! ಪುಣ್ ’ಕಯ್ದ್ಯಾಚ್ಯೊ ಕವಿತಾ’ ಬುಕಾಂತ್ಲಿಂ ಚಡ್ತಾವ್ ಕವಿತ್
ನಿರಾಶೆಚಿಂ, ದುಖಾಚಿಂ ಮ್ಹಳ್ಳೆಂ ಅಪುಟ್ ಸತ್.
ಲಾಂಬಾಯೆಚಿಂ ಮಿಟರ್ ಕವಿತಾ ಹಾಚಾ ಕವಿತಾಂನಿ ಮೆಳ್ಚಿನಾಂತ್,
ಪುಣ್ ಹಾಚಿಂ ಥೊಡಿಂಚ್ ಉತ್ರಾಂ ಕೆದಿಂಕ್ಚ್ ಸಂಪಾನಾತ್ಲ್ಲಿ ಕಾಣಿ
ಸಾಂಗ್ತಾ, ಹ್ಯಾ ಕಲೆಂತ್ ಭೋವ್ಶಾ ಎಚ್ಚೆಮ್ ಮಾಹೀರ್. ಜಿತ್ಲಿ
ವಿಸ್ತಾರಾಯ್ಗಿ ತಿತ್ಲಿಚ್ ಗುಂಡಾಯ್ ಹಾಚಾ ಕವಿತೆಂತ್ಲ್ಯಾ
ಉತ್ರಾಂನಿ. ಮೊಗಾಚಿಂ ವೆವೆಗ್ಳಿಂ ರುಪಾಂ ಹಾಂತ್ಲ್ಯಾ ಸಭಾರ್
ಕವಿತೆಂನಿ ದಿಸ್ಚಿಂ ವಿಶೇಸ್.
"ಹಾತಾ ಪಾಂಯಾಂಕ್ ಭುರ್ಗಿಂ ದೆವಾ
ದಿಸಾ ಎಕ್ಲ್ಯಾಕ್ ಎಕೇಕ್ ಪಿಡಾ
ನವ್ರೊ ಮ್ಹಜೊ ಕವಿ ದೆವಾ
ದೀಸ್ರಾತ್ ಕರೀತ್ ಬಸ್ತಾ ಕವಿತಾ" [ದೆವಾಚಿ ಮಹಿಮಾ]
ಇತ್ಲೆಂ ವಾಚ್ತಾನಾ ಕೊಣ್ ತೊ ಹಾಸಾನಾಂಯ್ ರಾವತ್? ಹಾಂಗಾ ಕವಿತಾ ಮ್ಹಳ್ಯಾರ್
ಬುರ್ಗಿಂ ಕರ್ಚಿಂಚ್! ಪುಣ್ ಹೆಚ್ಚ್ ಕವಿತೆಚೊ ಫುಡ್ಲ್ಯೊ
ದೋನ್ ವ್ಹೊಳಿ ವಾಚ್ತಾನಾ ವಯ್ಲ್ಯೊ ಹಾಸೊ ಮಾಯಾಗ್
ಜಾತಾತ್;
"ಗಾಂವ್ಚೆಂ ಸಗ್ಳೆಂ ಪಾಕೆಂ ಶಿಂವ್ತಾಂ ದೆವಾ
ಘರಾಕ್ ಮ್ಹಜ್ಯಾ ಶಿಂವೊಂಕ್ ಕೊಲು ನಾ"
ಪುಣ್ ಅನ್ಯೆಕಾ ಕವಿತೆಂತ್ ಕವಿ ಕವಿತಾ ಕರ್ಚಿಂ ರಾವಯ್ತಾ
ಅಶೆಂ ಸಾಂಗೊನ್;
"ಪಾವ್ಸಾ ಥೆಂಬೆ ಮಾತಿಯೆಂತ್ ಜಿರ್ಲೆ, ಮೊಡಾಂನಿ ಮೊಳಾಬ್ ಭರ್ಲೆಂ
ವಿಸ್ರೊನ್ ಗೆಲಾಂ ಹಾಂವ್ಗೊ ಆತಾಂ ಕವಿತಾ ಕರ್ಚೆಂ
ಉತ್ರಾಂ ತುಜಿಂ, ತಾಳೆಯೀ ತುಜೆ - ಹಾಂವ್ ನಾಚ್ತಾಂ
ರಾನಾಂತ್ಲ್ಯಾ ಮೊರಾಪರಿಂ ಪಾಕಾಂ ಉಸವ್ನ್ ಘಡ್ಗಡ್ಯಾಕ್"
[ಆಮಿ]
ಪುಣ್ ಎಕಾ ಕವಿತೆಚಾ ಎಕೆಕಾ ಪಂಗ್ತೆಚೆರ್ ಎಕೆಕ್ ಕಾಣಿ ಸಾಂಗೊನ್
ವೆಚಾ ಕವಿಚೆಂ ಹೆಂ ಕವಿತಾ ಅಶೆಂ ಆಸಾ;
"ಕಾಳ್ಜಾ ಗುಂಟಾಕ್ ಭಾಂದುನ್ ಮ್ಹಾಕಾ
ಪೊಸ್ತಾಯ್ ಕಾಟಾಚಾ ಕೊಂಬ್ಯಾಪರಿಂ
ಫಾಂತ್ಯಾಫಾರಾರ್ ಉಟೊನ್ ಸಾದ್ ಘಾಲುಂಕ್
......
ಹಾಂವ್ಗೊ ಪೆಟೊ ತುಜ್ಯಾ ಮೊಗಾದಾರಾರ್
ಯೆತಾನಾ ವೆತಾನಾ ಸಯ್ರ್ಯಾಂಕ್ ಶಿಮ್ಟಿ ಹಾಲಂವ್ಚೊ
ಗಾಣ್ಯಾಕ್ ತುಜ್ಯಾ ಹಾಂವ್ಗೊ ಬೋಯ್ಲ್
ಗಳ್ಯಾಕ್ ಭಾಂದ್ಲೆಲೆ ಕಿಣ್ಕುಳೆ ಧಲಂವ್ಚೊ" [ಹಾಂವ್]
ಕವಿನ್ ಇತ್ಲೆಂ ಸಾಂಗ್ತಾನಾ ವಾಚ್ಪ್ಯಾಕ್ ಹ್ಯಾ ಕಾಣ್ಯಾಂನಿ ಕಿತೆಂ
ಗೊಮ್ತಾ? ಪುಣ್ ಅಖ್ರೇಚಿ ಪಂಗತ್ ಕಿತೆಂ ಸಾಂಗ್ತಾ?
"ಏಕ್ಚ್ ಏಕ್ ಪಾವ್ಟಿಂ ಸಾಂಕಳ್ ಸೊಡ್ಗೊ
ಆನಿ ಪಾಡಿ ಜಾಗೊ ತುಂ ತೆಲಾತುಪಾಚಿ
ಪಾಡೊ ಜಾತಾಂ ಹಾಂವ್ ಕಡ್ಚ್ಯಾ ಮೆಣಾಚೊ"
ಕವಿಚೆಂ ಏಕ್ ಬದ್ಲಾನಾತ್ಲ್ಲೆಂ ಚಿಂತಾಪ್ ಆಸಾ - ’ಕವಿ ಕಯ್ದಿ’ ಮ್ಹಳ್ಳೊ. ಕಸಲೆಗೀ
ಸೊಸುಂಕ್ ಸಕಾನಾಸ್ಚೆಂ ಭಾಂದ್ಪಾಸ್! ದೆಕುನ್ ಕವಿ ಕೆದ್ನಾಂ ಕಾಟ್ಯಾಚೊ
ಕೊಂಬೊ, ತರ್ ಕೆನ್ನಾ ಭಾಂದುನ್ ಘಾಲ್ಲೊ ಶಿಮ್ಟಿ ಹಾಲಂವ್ಚೊ
ಪೆಟೊ ಆನಿ ಕೆನ್ನಾ ಗುಲಾಮ್. ಪುಣ್ ಸಾಂಖಳ್ ಸುಟ್ತಚ್ ಜಾತಾ ಚರ್ಬೆಲ್ಲೊ
ಪಾಡೊ - ದೊ ದೆವಾಕ್ ಸೊಡ್ಲಲೊ. ಬಾಜಾರಿ ಸಂಸಾರಾಂತ್
ಸಗ್ಳೆಂ ವಿಖ್ರ್ಯಾಕ್ ಆಸ್ತಾನಾ ನಾತ್ಲ್ಲೊ ಕವಿ ಕಿತೆಂ ದೀತ್?
ಮ್ಹಣ್ಚೆಂ ಚಿಂತಾಪ್ ಕವಿ ಹ್ಯಾ ಕವಿತೆಂತ್ ಸೊಭಿತ್ ರಿತಿನ್ ವ್ಹಾಳಯ್ತಾ;
"ಆಸ್ಲ್ಲೆ ಭೆಟಯ್ತಾತ್ ತುಕಾ ರುಪೆಂ ದುಡು
ಭಾಂಗಾರ್
ಹಾಂವ್ ಕಿತೆಂ ದೀಂವ್? ರಿಣಾ ಸಾಂಕ್ಳಿ ಮ್ಹಜ್ಯಾ ಆಂಗಾರ್
ವ್ಹಾಳಯೆನ್ ಖೆಲಾಂ ಪೊಪ್ಸಾಂಕ್ ಮ್ಹಜ್ಯಾ ಅನ್ಕಿಟೆಂತ್
ಬುರಾಕ್
ಬಾಯ್ಲೆ ಭಾಂಗಾರ್ ಘರ್ ಜಾಗೊ ಅಡೊವ್ ಸರಾಫಾ ಕಾಟ್ಯಾರ್"
[ಕಿತೆಂ]
ಸಂಸಾರಾಂತ್ ಜಿಯೆತಾನಾ ಮನಿಸ್ ಹೆಂ ಖಾಯಾ ತೆಂ ಖಾಯಾ ಮ್ಹಣ್ತಾತ್ ತೆಚ್ಚ್ ಪರಿಂ ಹೆಂ
ಖಾಯ್ನಾಕಾ ತೆಂ ಖಾಯ್ನಾಕಾ ಮ್ಹಳ್ಳೆಂ ಸಾಂಗೊನ್ ಯೆಕೊಂಡಾಚಾ ದಾರಾಚೊ ನಿಹಾಳ್ ಕಾಡ್ತೆಲ್ಯಾಂಕ್ ’ಖಂಯ್ ಆಸಾ ಯೆಮ್ಕೊಂಡ್ ಧಾಖಯ್’ ಮ್ಹಳ್ಳ್ಯಾ ಅರ್ಥಾನ್ ಕವಿ ಅಶೆಂ ಸಾಂಗ್ತಾ;
"ಮಾಟ್ ಪಡ್ಲ್ಲ್ಯಾ ಆಮ್ಚ್ಯಾ ಗಾಂವಾಕ್
ಯೇನಾಂತ್ ಕೊಣ್ - ಖಾನಿಸ್ಮಾರೇ ಶಿವಾಯ್
ಮೆಜುಂಕ್ ಕಿತ್ಲಿಂ ಉರ್ಲ್ಯಾತ್ ಗೊರುಂ ವಾಸ್ರುಂ ರೆಡೆ
ತುಮಿಂ ಆಯ್ಲ್ಯಾತ್ - ಅರ್ಗಾಂ ತುಮ್ಕಾಂ" [ಯೆಮ್ಕೊಂಡಾ ದಾರ್]
ಕವಿಚಾ ಉತ್ರಾಂ ಉತ್ರಾಂನಿ ಸೂತ್ರಾಂ, ಪಿಂತುರಾಂ ಉಭಿ ಕರ್ಚಿ ಕಲಾ ಪಳೆಯಾ;
"ಜಾನ್ವಾರಾಂ ಜಿಬೆರ್ ರಗ್ತಾ ತಾನ್
ದೆಕುನ್ ಮಿಸ್ತಾ - ರಗತ್ ವಾಳ್ಟಾ" [ಶೆರಾಂತ್ಲ್ಯೊ ಮನ್ಜಾತಿ]
ಏಕ್ ಮಾಸೂಮ್ ಬುರ್ಗೆಂ ಎಕಾ ಕುಟ್ಮಾಂತ್ ಕಸಲೊ ಸರ್ಗ್
ಹಾಡುನ್ ಯೆತಾ ಮ್ಹಳ್ಳೆಂ ಭೋವ್ ಸೊಭಿತ್ ರಿತಿನ್ ಕವಿ ಅಶೆಂ ಸಾಂಗ್ತಾ;
"ಕಾಜಾರಾಕ್ ಮ್ಹಜ್ಯಾ ವರ್ಸಾಂ ದೋನ್
ಖೆಳ್ಟಾ ಬಾಳ್ಶೆಂ ಆತಾಂ ಪಾಳ್ಣ್ಯಾಂತ್
ಹಾಚೆ ವರ್ತೊ ಆಯೆರ್ ಕಿತೆಂ ದೀಂವ್
ಸರ್ಗ್ ದೆಂವ್ಲಾಂ ಆಮ್ಚ್ಯಾ ಘರಾಂತ್" [ಆಜ್]
ಕವಿಚಿಂ ಕವಿತಾ ವಾಚುನ್ ತಾಳ್ಣೆಂತ್ ಪಡೊನ್ ಕುಮ್ಸಾರಾಂತ್ ಏಕ್ ಬಾಯ್ಲ್ ಕಶೆಂ ಸಾಂಗ್ತಾ ಮ್ಹಳ್ಳೆಂ ಸ್ವಾರಸ್ಯ್ಭರಿತ್ ಕವಿತಾ ಹಾಂಗಾಸರ್ ಆಸಾ;
"ಫಾದರ್ ಮ್ಹಾಕಾ ಕವಿತಾ ಆವಡ್ಟಾ
ದೆಕುನ್ ಹಾವೆಂ ಎಚ್ಚೆಮಾಕ್ ವಾಚ್ಲೊ
ಹಾಂತುಂ ಪಾತಾಕ್ ಕಸ್ಲೆಂ ಬಾಯೆ
ಕವಿತಾ ವಾಚ್ಲ್ಯಾರ್ ಜಿಣ್ಯೆ ಅನ್ಭೋಗ್ ವಾಡ್ಟಾ" [ಕವಿತೆಚೆಂ ಕುಮ್ಸಾರ್]
ಅಸಲೆಂಚ್ ಅನ್ಯೇಕ್ ಕವಿತಾ ವಾಚುಂಕ್ ಮೆಳ್ತಾ ಹಾಂಗಾ;
"ಧುವೆಕ್ ಮ್ಹಜ್ಯಾ ಶೆಗುಣ್ ತುಜೆ ಕಸೆ ಗೊಂವಾ ಬಣ್
ಪುತಾಕ್ ತುಜ್ಯಾ ದೊಳೆ ಮ್ಹಜೆ ತಸೆಂ ವಾಗಾ ತ್ರಾಣ್" [ವೋಂಯ್]
ಕವಿಚಿ ನದರ್ ಟಿವಿಚೆರ್ ಆತಾಂ ಜಾಂವ್ಚಾ ವೀದ್-ವಾವ್ಳೆಕ್ಯ್ ಸೊಡಿನಾಸ್ತಾನಾ ಅಶೆಂ ಲಿಖ್ತಾ;
"ಸೀರಿಯಲಾಂತ್ಲ್ಯೊ ಸುನೊ ಪಳೆಂವ್ಕ್ ಸೊಭೀತ್
ದಂತಾಚ್ಯಾ ಬೊಂಬ್ಯಾಪರಿಂ, ಮೋಗ್ ಆನಿ ಚಾಕ್ರಿ ಕರ್ತಾತ್
ಘೊವಾಂಚಿಂ ರಾವ್ಳೆರಾಂತ್ಲ್ಯಾ ದಾಸಿಂಪರಿಂ
ಪಾಂಯ್ ಧಾಂಬ್ತಾತ್, ಉಮೊ ದಿತಾತ್, ಪಿಡೆಂತ್ ಪಡ್ಲ್ಯಾರ್
ರಗತ್ ಪಿಕುನ್ ವಕಾತ್ ಕರ್ತಾತ್, ಪಿಡ್ಡುಕ್ ಸಯ್ತ್ ಅಡೊವ್ ದವರ್ತಾತ್" [ಸೀರಿಯಲಾಂತ್ಲ್ಯೊ ಸುನೊ]
ತಾಚೆಂ ಅನ್ಯೇಕ್ ಕವಿತಾ ವಾಚ್ಪ್ಯಾಂಕ್ ಸೊಭಿತ್ ರಿತಿನ್ ಹಾಸಯ್ತಾ ’ಯೇರೆ ಬೊನಾ ರಾನಾಕ್’ ಮ್ಹಳ್ಳೆಂ; ಪಯ್ಲೆಂ ಸಾಂತೆಂಕ್ ಪೊಕ್ರಿ ಬೊನಾಕ್ ರಾನಾಕ್ ಆಪಂವ್ಚಿ ಬಾಯ್ಲ್, ಯೇನಾತ್ಲ್ಲ್ಯಾ ಬೊನಾಕ್ ಅಖ್ರೇಕ್ ಅಶೆಂ ಮ್ಹಣ್ತಾ;
"ಯೇನಾಂಯ್ ತರ್, ನಾಡಿನಾಕಾರೆ ಬೊನಾ ಅಶೆಂ ಸಾಂತೆಂತ್
ದೊಳೆ ಮೊಡುನ್, ಪಾಲಂವ್ ವೊಡುನ್
ಘೊವ್ ಆಸಾ, ಭುರ್ಗಿಂ ಆಸಾತ್ ಪೆಟತ್ರೆ ಸಾಂತ್!" [ಯೇರೆ ಬೊನಾ]
ಎಚ್ಚೆಮಾಚಿ ಚಡ್ತಾವ್ ಕವಿತಾ ವಾಚುನ್ ಕೊಣೆಂಯ್ ಎಚ್ಚೆಮಾಚಾ ಕವಿತಾಂನಿ ’ಮೋಗ್’ ನಾ ಮ್ಹಳಾಂ ತರ್ ತಿ ಭೋವ್ ವ್ಹಡ್ಲಿ ಚೂಕ್ ಮ್ಹಣ್ಚಾಕ್ ಹ್ಯಾ ಬುಕಾಂತ್ಲಿಂ ಸಭಾರ್ ಕವಿತಾ ಗೊವಾಯ್, ಏಕ್ ಹೆಂ;
"ಕೊಣ್ ಸಾಂಗ್ತಾ, ಮೊಗಾಕ್ ದೊಳೆ ನಾಂತ್
ಖರೆಂಚ್ ಹಾಂವ್ ತುಜ್ಯಾ ಕವಿತೆಂಕ್ ಪಿಸ್ವಾಲಿಂ
ಭುಲ್ ತುವೆಂ ಘಾಲಿಯ್ ಅಶಿ ಮೊಗಾಂತ್
ಎಚ್ಚೆಮ್ ಕವಿತೆಂತ್ ತುಜ್ಯಾ ಸಬ್ಧ್ ಜಾವ್ನ್ ಗೆಲಿಂ" [ಥೆಂಬೆ]
ಹಾಚೆಂ ’ಮಾಗ್ಣೆಂ’ ಕವಿತೆಚಿಂ ಉತ್ರಾಂ ಆಶಿಂ ಆಸಾತ್;
"ಹಾವೆಂ ಕಾಕ್ಸಾಕ್ ವೆಚೆಕಡೆ ಬೊಂಬ್ ಫುಟ್ತಾತ್
ಹಾವೆಂ ಮುತ್ಚೆಕಡೆ ಎಸಿಡಾಂ ವೊತ್ತಾತ್
ಕಸ್ಲಿ ಹಿ ಗತ್ರೆ ದೆವಾ - ಗಾಂವ್ ಮ್ಹಾಕಾ ಮಾರುಂಕ್ ರಾವ್ಲಾ
ದಾಂಡೆ ತೊಣ್ಕೆ ಘೆವುನ್, ಪಾವ್ಟಿಂಚ್ಯಾಕ್ ಮ್ಹಾಕಾ ರಾಕ್"
ಚಡ್ ಜಾವ್ನ್ ಬೊಂಬೊಯಾಂತ್ ಗಣ್ಪತಿ (ಗಣೇಶ ಚತುರ್ಥಿ) ಸಂದರ್ಭಾರ್ ಧರ್ಮಾಚಾ ನಾಂವಾರ್ ಜಾಂವ್ಚಾ ವೀದ್-ವಾವ್ಳೆಚೆರ್ ಶಿಣೊನ್ ಅಪುರ್ಭಾಯೆನ್ ಕವಿ ಪಿಂತ್ರಾಯ್ತಾ ’ಯೆಯಾ ಫೆಸ್ತ್ ಕರುಯಾಂ’
"ಗಲ್ಲೆಚ್ಯಾ ರಸ್ತ್ಯಾಂನಿ ಪುರ್ಶಾಂವ್ ಕಾಡುಯಾಂ
ಬಣಾಪಿಟೊ ಉಡವ್ನ್ ಬೆಂಡಾ ವಾಜ್ಪಾಂತ್ ನಾಚುಯಾಂ
ಬಾರಾಕ್ ರಿಗೊನ್ ಗಮ್ಮತ್ ಜಾವುಯಾಂ
ವಾಟೆರ್ ಕೊಣ್ ಮೆಳ್ಟಾ ತಾಕಾ ಚಿರುಯಾಂ" [ಯೆಯಾ ಫೆಸ್ತ್ ಕರುಯಾಂ]
ಸಂಸ್ರಾಂತ್ ಖಂಚೆಂಚ್ ಖಬ್ರೆವೀಣ್ ಜಾಯ್ನಾ ಮ್ಹಳ್ಳೆಂ ಕವಿ ಪರತ್ ಪರತ್ ಹ್ಯಾ ಕವಿತೆಂತ್ ಉಚಾರ್ತಾ ಅಶೆಂ;
"ಖಬ್ರೆವಿಣೆ ಕಾಂಯ್ ಪಾವ್ಸ್ ಯೇನಾ
ಮೊಳ್ಬಾರ್ ಕಾಳಿಂ ಮೊಡಾಂ ಜಮ್ತಾತ್
ಚರ್ಬೆಲ್ಲೆ ಮಾಣ್ಕೆ ಕಾಜಾರ್ ಜಾತಾತ್
ಮಾಗಿರ್ ಶಿರಾಂಧಾರಿಂಚೊ ಪಾವ್ಸ್ ವೊತ್ತಾ" [ಖಬ್ರೆವೀಣ್]
ಕವಿ ಕೆನ್ನಾಂಗೀ ಸಾಂತೆಂತ್ ಭೆಟ್ಲ್ಲ್ಯಾ ಅಪ್ಲ್ಯಾ ಮೊಗಾಕ್ ನಿಯಾಳುನ್ ಮೊಗಾನ್ ವಿರಕ್ತ್ ಜಾವ್ನ್ ಗಾಂವ್ಚೆಂ ಗೀತ್ ಅಶೆಂ ಆಸಾ;
"ಮಧ್ಯಾನೆ ರಾತಿರ್ ಹಾಂವ್ಗೊ ಫಿರ್ತಾಂ
ಸೊಧುನ್ ತುಜೊ ಸಾಂಗಾತ್ ಸಾಂತೆಂತ್
ತುಜೆ ತಸಲೆಂ ಮೆಳಾನಾ ಕೊಣ್
ಕಾಂಕ್ಣಾ ನೆಸೊನ್ ಸಾಂತೆಕ್ ಯೆಂವ್ಚೆಂ" [ತುಜೆವೀಣ್]
ಕವಿಚಿ ಆಶಾ ನಿರಾಶಿ ಜಾತಾನಾ ಅಶೆಂ ಜಾಯ್ತ್;
"ಸಾಂತೆಂತ್ಲಿಂ ಫುಲಾಂ ಹಾಡ್ಲಿಂ ಚಿಂತ್ಲೆಂ - ಮೆಜಾರ್ ಮಾಂಡುಂ
ಭಂವರ್ ರೋಸ್ ಚಿಂವೊನ್ ಗೆಲೊ ಘರ್ ಘಾಣಿಂತ್ಚ್ ಉರ್ಲೆಂ
ವೊತಾಂತ್ ಖರ್ಶೆವ್ನ್ ಆಯ್ಲೊಂ ಚಿಂತ್ಲೆಂ - ಸಾವ್ಳೆಕ್ ಥೊಡೆಂ ಬಸುಂ
ವ್ಹಾಳಯ್ ಮೋಪ್ ಖಾವ್ನ್ ಗೆಲಿ ಪಾಕೆಂ ಆಂಗಾರ್ ಪಡ್ಲೆಂ
ಮೊಡ್ಕೆಂತ್ ತಾಂದು ಘಾಲೊ ಚಿಂತ್ಲೆಂ ಶಿಜ್ತಾವರೇಗ್ ಕವಿತಾ ಕರುಂ
ಹಡ್ಬೆಂ ವಾಸ್ರುಂ ಮೊಡ್ಕಿ ವೋಡ್ನ್ ಗೆಲೆಂ ಹಾಂವ್ ಉಪಾಶಿಂ ಪಡ್ಲೊಂ" [ಆಶಾ]
ಪುಣ್ ತಾಚೆಂ ’ಕಾಳೊಕಾಂತ್ಲೊ ಕವಿ’ ಕವೆತೆಂತ್ ಎಕೆಕ್ ಉತಾರ್ ಏಕ್ ನ್ಹಯ್ ಸಭಾರ್ ಸವಾಲಾಂಕ್ ಉಭಿಂ ಕರ್ತಾತ್;
"ಹಾಂವ್ಗಾ ಕವಿ ಕಾಸಾಚಾ ಕಾಮಾಕ್ ಪಡಾನಾತ್ಲ್ಲೊ
ಕೊಣ್ ಪತ್ರಾಂಚೆ ಮ್ಹಜೆಂ ಕವಿತಾ ಛಾಪಿನಾಂತ್
ಸಮ್ಮೇಳನಾಂತ್ ಕೊಣ್ ಮ್ಹಜಿ ಕವಿತಾ ಆಯ್ಕನಾಂತ್
ಕೊಣ್ ಮ್ಹಜೆ ಬೂಕ್ ಘೆವ್ನ್ ವಾಚಿನಾಂತ್
ಕೊಣ್ ಗಾವ್ಪಿ ಮ್ಹಜ್ಯಾ ಕವಿತೆಕ್ ತಾಳೆ ಬಸಯ್ನಾಂತ್
ತರೀ ಹಾಂವ್ಗಾ ಬರಯ್ತಾಂ - ಪೊಟಾಚಾ ಗ್ರಾಸಾಕ್."
ಧರ್ಮಾಚಾ ನಾಂವಾರ್ ಲೊಕಾಂಕ್ ಪಿಳ್ಚಾಂಚಿ ಪರಿಗತ್ ಕವಿ ಅಶೆಂ
ವರ್ಣಿತಾ;
"ತುಮಿಂಚ್ ನ್ಹಯ್ಗೀ ಉಗ್ತ್ಯಾ ರಸ್ತ್ಯಾರ್
ಮ್ಹಜೆ ದಗ್ಲೆ ಪಿಂದ್ಲ್ಲೆ ಆನಿ ಕೊಯ್ತ್ಯೊ ಹಾಡ್ನ್
ಮಾಸಾಂ ಚಿರ್ಲ್ಲಿಂ - ಜಿವೆಚ್ಚ್ ಆಸಾತ್ ಥಂಯ್
ಜಿವ್ಯಾ ಮಾತ್ಯೆಂತ್ ಗಳ್ಲ್ಲೆಕಡೆ ರಗತ್
ವಾಡೊನ್ ರಾವ್ಲಾಂ ಪಳೆಯಾ ಆಜ್ ಪಾರ್ತೇನಿಯಮ್ ರಾನ್"
[ತುಮಿ]
ಎಚ್ಚೆಮಾಚಿಂ ಚಡ್ತಾವ್ ಕವಿತಾ ವಾಚ್ಲ್ಲಿಂ ಜರ್ತರ್ ಎಚ್ಚೆಮಾಕ್
ಮೊಗಾಚಿಂ ಕವಿತಾ ಬರಂವ್ಕ್ ಕಳಾನಾಂತ್ ಮ್ಹಣ್ ಚಿಂತಿತ್ ತರ್ ತಾಂಚೆಂ ಚಿಂತಾಪ್ ಫಟ್ ಕರ್ಚಾಕ್
ಹ್ಯಾ ಬುಕಾಂತ್ ಸಭಾರ್ ಕವಿತಾ ಆಸಾತ್, ಎಕಾಚೊ ಉಲ್ಲೇಕ್ ಕರ್ಚೊ ತರ್;
"ಕಾಳ್ಜಾ ಮೊಳ್ಬಾರ್ ಮ್ಹಜಾ ಚಾನ್ನೆಂ ಫಾಲೆಲಾಂ
ಖೆಳ್ಟಾತ್ ನೆಕೆತ್ರಾಂ ಪುನ್ವೆ ಉಜ್ವಾಡಾಂತ್
ಯೇಗೊ ಬಾಯೆ ತುಂ ಫಿಂತಾಂ ನೆಸೊನ್
ಆಮಿ ಚಾನ್ನ್ಯಾಂತ್ ಖೆಳುಂಯಾಂ" [ಯೇಗೊ
ಬಾಯೆ]
ಪುಣ್ ಹಾಂತ್ಲೆಂ ’ಬಾಮುಣಾಂಚೆಂ ಚೆಡುಂ’ ಕವಿತಾ ಪರತ್
ಪರತ್ ವಾಚ್ತಾನಾ ನವಿಂ ನವಿಂ ರುಪಾಂ ಝಳ್ಕಾತಾತ್.
"ಬಾಮುಣಾಂಚೆಂ ಚೆಡುಂ ತೀನ್ ಮಯ್ನ್ಯಾಂಚೆಂ ಗುರ್ವಾರ್
ಗಾಂವಾರ್ ಏಕ್ಚ್ ಗಾಬ್ ಕೊಣಾಚೆಂಗಾ ಹೆಂ ಕಾರ್ಭಾರ್?" [ಬಾಮುಣಾಂಚೆಂ ಚೆಡುಂ]
ಬ್ರಾಹ್ಮುಣ್ ಮ್ಹಳ್ಯಾರ್ ಆದಿಂಮಾಗಾ ಥಾವ್ನ್ ಸಮಾಜೆಂತ್ ಊಂಚ್
ಮ್ಹಣ್ ಲೆಖ್ಚೊ ಮನ್ಶಾವರ್ಗ್. ಸರ್ವಾಂತ್ ಊಂಚ್ - ಚಿಂತ್ಪಾನ್, ಶಿಕ್ಪಾನ್, ಕರ್ನೆನ್, ಜಿಣ್ಯೆನ್... ಆತಾಂ
ಹೆಂ ಬಾಮುಣಾಂಚೆಂ ಚೆಡುಂ ಗುರ್ವಾರ್ ಜಾತಾನಾ ಕಶೆಂ ಹ್ಯಾ ಪೊಕೊಳ್ ಚಿಂತ್ಪಾಚೆರ್ ಕವಿ ಅರ್ಸೊ ಧರ್ತಾನಾ,
ಸಮಾಜೆಚಾ ಹೆರ್ ವರ್ಗಾಚೆಂ ಕಸ್ತಳ್ ವಯ್ರ್ ಘಾಲ್ತಾ.
ಅಸಲೆಚ್ ಶಿಣ್ ತೊ ಉಚಾರ್ತಾ ದುಡ್ವಾಚೆಂ ಆನಿ ಕುಡಿಚೆಂ ಭಳಾರ್
(ತರ್ನಾಟ್ಪಣಾಚೆಂ) ಉಡ್ಚಾಂಕ್,
"ಆಂಗಾಂತ್ ಭರ್ತಿ ಆಸ್ತಾನಾ ಹೆಂ ಸಗ್ಳೆಂ ಖಂಯ್ಗಾ ಗೊಮ್ತಾ
ದುಡ್ವಾಚೊ ಭಿಯಾಳೊ ಆಸ್ಚೊ ಬೊಯ್ಲಾ ಭಾಟಾಂನಿ ವೊಂಪ್ತಾ
ಇಗರ್ಜೆ ಆಸ್ರ್ಯಾಂಕ್ ದಾನ್ ದೀವ್ನ್ ಮಾತ್ಯಾರ್ ಮುಂಡಾಸ್ ಭಾಂದ್ತಾ" [ವಾಂಟೆ]
ಇತ್ಲೆಂಚ್ ಕಿತ್ಯಾಕ್? ಜೆದ್ನಾಂ ಏಕ್ ಆವಯ್ ಅಪ್ಲ್ಯಾ ಪೊಸ್ಕ್ಯಾ ಧುವೆಕ್ ರಾತ್ಚಾ
ಮಧ್ಯಾನೆರ್ ಭಾಯ್ರ್ ಘಾಲುನ್ ಕುಂಪಾರೆಸವೆಂ ಮಿರಯ್ತಾನಾ ತ್ಯಾ
ಬುರ್ಗ್ಯಾಚೆಂ ರುದಾನ್ ಪಳೆಯಾ;
"ಪುರೊಗೆ ಮಾಂಯ್ ಅರ್ಧಿ ಭಾಕ್ರಿ ಆನಿ ಕರಿನಾ ಸಳ್
ಪೊದೊರ್ನಿಕಡೆ ಪಯ್ಲೆಂ ಮಾಗ್ತಾಂ ಬೆಸಾಂವ್ ಸಾಂಗಿನಾ ಕೆನ್ನಾ
ಪಪ್ಪಾಕ್
ಆತಾಂ ತರೀ ದಾರ್ ಉಘಡ್ ಮಾಂಯ್ ಆಂಗ್ಣಾಂತ್ ಯೇವ್ನ್ ರಾವ್ಲಾ
ವಾಗ್" [ದಾರ್ ಉಘಡ್ ಮಾಂಯ್]
ಪುಣ್ ಕಿತೆಂ ಜಾಲ್ಯಾರ್ಯ್ ಕವಿಚಿ ನದರ್ ಸತಾಕ್ ವಳ್ಕೊಂಕ್
ಸಲ್ವಾನಾಂತ್ ಮ್ಹಣ್ಚಾಕ್ ಹೆಂ ಕವಿತಾ ಗೊವಾಯ್ ದಿತಾ;
"ಸುಭಾಗಿ ಆಸಾತ್ ಹೆ ಕವಿ - ಎದ್ಯಾ
ವ್ಹಡಾ ಪ್ರಜಾ ರಾಜಾಂತ್ಲೆಂ
ಸರ್ಕಾರಿ ಕಾಮಾಂಚೆರ್ ಕವಿತಾ ಕರ್ತಾತ್ ಯೆವ್ಜಣಾಂಚಿ ಗಾಣಾಂ ಗಾಯ್ತಾತ್
ಲೊಕಾ ಸರ್ಕಾರ್ ಹಾಂಕಾಂ ಪ್ರಶಸ್ಥ್ಯೊ ವಾಂಟ್ತಾ ಅಕಾಡೆಮಿಚೊ ಅಧ್ಯಕ್ಶ್
ನೆಮ್ತಾತ್
ಹಾಂವ್ಗಾ ಏಕ್ - ಸರ್ಕಾರಾಚಾ ಹರ್ ಕಾಮಾಂನಿ ಪಯ್ಶೆ ಗಿಳ್ಚೆ
ದಿಸ್ತಾತ್" [ತೆ ಕವಿ ಹೆ ಕವಿ]
ಪುಣ್ ಎಚ್ಚೆಮಾಚಾ ಅಪ್ರೂಪ್ ಕವಿತಾಂ ಪಯ್ಕಿ ಹೆಂ ಕವಿತಾ
ಮ್ಹಾಕಾ ಕಿತ್ಯಾಕ್ಗೀ ಭೋವ್ ’ಆಶಾವಾದಿ’ ಕವಿತಾಪರಿಂ ಭೊಗ್ತಾ;
"ರಡಾನಾಕಾರೆ ಬಾಳಾ ಹಟಾಕ್ ಪಡೊನ್
ದೀಸ್ ಪಾಲೆತಾನಾ ಸುರ್ಯೊ ಲಿಪತ್
ಮೊಡಾಂ ಪಾಲ್ವಾಂತ್ ತುಕಾ ಸಾವ್ಳಿ ದೀಂವ್ಕ್" [ರಡಾನಾಕಾ ಬಾಳಾ]
ಸಂಸಾರಾಕ್ ಫಟಂವ್ಚೊ ಸನ್ನೇಶಿ ಆಬ್ಳೆ ಕಶೆಂ ನಾಡ್ತಾ ಪಳೆಯಾ;
"ಗುಡೆ ದೊಂಗೊರ್ ದೆಂವೊನ್ ಆಯ್ಲಾಂಗೊ
ಬಾಯೆ
ರಿತ್ಯಾ ಪಾಂಯಾಂನಿ, ಕಾಂಟ್ಯಾ ಕುಂಟ್ಯಾಚಾ ವಾಟೆರ್
ತಾನೆಕ್ ಏಕ್ ಕಟ್ಟಿ ನೀಸ್ ದೀ
ಹುಂಬೊರ್ ಉತ್ರೊನ್ ಆಂಗ್ಣಾಕ್ ಯೇ" [ಸನ್ನೇಶಿ]
ಕವಿಚಾ ಹ್ಯಾ ಉತ್ರಾಂನಿ ಜಾಯ್ತೆ ಅವಸ್ವರ್ ಸಾಂಗ್ತಾತ್;
"ಹಾಂಗಾ ತರ್ - ದೀಸ್ ಉದೆನಾ ಕಿರ್ಣಾಂಕ್
ದೀಸ್ ಬುಡಾನಾ ಲ್ಹಾರಾಂಕ್
ಬಂದ್ ದಾರಾಂ ಬಂದ್ ಜನೆಲಾಂ ಮಾಗ್ಣೆಂ ರಜಾರ್ ಚೊವೀಸ್ ವೊರಾಂ" [ಪಿಂಜ್ರೊ]
ಸುರ್ಯಾಚಾ ಕಿರ್ಣಾಂಕ್ ಬಂದ್ ಆಸ್ಚಾ ಜನೆಲಾಂ ಯಾ ದಾರಾಂಭಿತರ್
ದೀಸ್ ಉದೆಂವ್ಚೊ ತರ್ಯ್ ಕಸೊ? ದೀಸ್ ಬುಡಾನಾ ಲ್ಹಾರಾಂಕ್, ಹಿಂ ಕಸಲಿಂ
ಲ್ಹಾರಾಂ? ದೀಸ್-ರಾತ್ ಕರ್ಚಿಂ ಮಾಗ್ಣಿಂ ರಜಾರಾಂಚ್ ಹಾಂಗಾಚಿಂ
ಲ್ಹಾರಾಂ.
’ಕೊಂಕ್ಣಿ ಕವಿತಾಂತ್ ವೆವೆಗ್ಳಿಂ ಪ್ರಕಾರಾಚಿಂ ಕವಿತಾ ಯೆತಿತ್ ಜಾಲ್ಯಾರ್
ಮಾತ್ರ್ ಕೊಂಕ್ಣಿ ಕವಿತಾಂಕ್ ಹೆರ್ ಭಾಸಾಂಚಾ ಕವಿತಾಂ ಸವೆಂ
ಸ್ಥಾನ್ ಆಶೆಂವ್ಚೆಂ ವಾಜ್ಬಿ ಶಿವಾಯ್ ಫಕತ್ತ್ ಎಕಾಚ್ಚ್ ಪ್ರಕಾರಾಚಿಂ ಕವಿತಾ ಘೆವ್ನ್
ನ್ಹಯ್’ - ಅಸಲೆಂ ಚಿಂತಾಪ್ ಚಿಂತ್ಚಾಂತ್ಲೊ ಹಾಂವ್ಯ್ ಎಕ್ಲೊಂ ದೆಖುನ್
ಹ್ಯಾ ವೆವೆಗ್ಳ್ಯಾ ಪ್ರಕಾರಾಂಚಾ ಕವಿತಾಂಕ್ ಹಾಂವ್ ಪಿಸ್ವತಾಂ,
ಮ್ಹಜಾ ಎದೊಳ್ಚಾ ಕವಿತಾ ಅಧ್ಯಯನಾಂತ್ ಕೊಂಕ್ಣಿ ಕವಿತಾಂಕ್ ಕಿತ್ಲೆಂ
ಸಮ್ಜಾಲಾಂ ತೆಂ ನೆಣಾಂ ತರ್ಯ್ ಏಖ್ ಮಾತ್ರ್ ಕಂಡಿತ್
ಸಮ್ಜಾಲಾಂ - ಕೊಂಕ್ಣಿ ಕವಿತಾಶೆತಾಂತ್ ಹಿ ವಿಭಿನ್ನತಾ ಆಸ್ಚಾ ಭೋವ್ ಥೊಡ್ಯಾಂತ್ ಎಚ್ಚೆಮ್ ಎಕ್ಲೊ. ಕೊಣಾಕ್
ಹಾಚಿಂ ಕವಿತಾ ಗರ್ಜೆಚಿಂ ಮ್ಹಣ್ ದಿಸೊಂ ವಾ ಮರ್ಜೆಚಿಂ ಮ್ಹಣ್
ದಿಸೊಂ ವಾ ಖೊರ್ಜೆಚಿಂ ಮ್ಹಣ್ ಲಾಗೊಂ. ಪುಣ್ ಕೊಂಕ್ಣಿ ಕವಿತಾವಿಶ್ಯಾಂತ್ ಜರ್ ಆಮಿಂ ಉಲಯ್ತಾಂವ್ ತರ್ ಥಂಯ್ಸರ್ ಎಚ್ಚೆಮ್ ಸದಾಂಕಾಳ್ ಉಡಾಸಾಕ್ ಉರ್ಚೆತಸಲೊ ಮ್ಹಳ್ಳೆಂ
ಮ್ಹಜೆಂ ಚಿಂತಾಪ್.
ಆನಿ ತಾಚೊ ಹೊ ಕವಿತಾಜಮೊ ಹಾಕಾ ರುಜ್ವಾತ್ ದಿಂವ್ಚಾಂತ್ ಮ್ಹಾಕಾ ಕಾಂಯ್ ದುಭಾವ್
ನಾ.
ಆತಾಂ ಹಾಚಾ ತಿಸ್ರ್ಯಾ ’ಬಾಮುಣಾಂಚೆಂ ಚೆಡುಂ’ ಕವಿತಾಜಮ್ಯಾಂತ್ ಜ್ಯೆ ಕಿತೆಂ ಊಣ್
ಪಯ್ಲ್ಯಾ ಬುಕಾಂನಿ ಆಸ್ಲ್ಲೆಂ ತೆಂ ಭರ್ಪೂರ್ ಮಾಪಾನ್ ಭರ್ನ್ ದಿಂವ್ಚೆಂ
ಪ್ರಾಮಾಣಿಕ್ ಪ್ರೇತನ್ ಕವಿನ್ ಕೆಲ್ಲೆಂ ದಿಸೊನ್ ಯೆತಾ. ಹಿ ಕವಿಚಿ ಆಂತರಿಕ್ ವ್ಹಾಡಾವಳ್. ಜಿ ಕವಿಕ್
ಮಾತ್ರ್ ನ್ಹಯ್ ಕವಿತಾಂಕ್ಯ್ ಬರೆಂಚ್! ಕೊಂಕ್ಣೆಕ್ಯ್!!
ಹಾಚೊ ಅನ್ಯೇಕ್ ವಾವ್ರ್ ಹಾಂಗಾಸರ್ ಹಾವೆಂ ಉಗ್ಡಾಪೆಂ ಕರ್ಚೊ
ಮ್ಹಜೊ ಕಾಯ್ದೊ ಮ್ಹಣ್ ಹಾಂವ್ ಲೆಖ್ತಾಂ, ಕೊಂಕ್ಣಿ ಕವಿತಾಶೆತಾಂತ್
ಮ್ಹಜೆರ್ ಕವಿತಾಚೆಂ ಭಿಂ ವೊಂಪ್ಲ್ಲ್ಯಾಂತ್ ಮೆಲ್ವಿನ್ ರೊಡ್ರಿಗಸಾಚೊ
ಪಾತ್ರ್ ವ್ಹಡ್ಲೊ ಮ್ಹಣ್ ಹಾಚಾಧಿಂ ತವಳ್ ತವಳ್
ಹಾಂವ್ ಸಾಂಗೊನ್ಂಚ್ ಆಯ್ಲಾಂ. ಕೊಂಕ್ಣಿ ಕವಿತಾಂಕ್ ಅಂತರ್ರಾಶ್ಟ್ರೀಯ್
ಹಂತಾರ್ ಪಾವಂವ್ಕ್ ಕಮರ್ ಭಾಂದ್ಲ್ಲ್ಯಾ ಮೆಲ್ವಿನಾಚೊ
ಹೊ ವಾವ್ರ್ ನಿಜಾಯ್ಕೀ ವಿಶೇಷ್. ಪುಣ್ ಭಿಂ ವೊಂಪ್ಲ್ಲೆಂ ತಾಣೆಂ ತರ್ಯ್ ಫುಡೆಂ ತ್ಯಾ
ಲ್ಹಾನ್ ಝಡಾಕ್ ಜತ್ನೆನ್ ವಾಗವ್ನ್, ಪೋಸ್ ಕೆಲ್ಲೆ
ಮ್ಹಜೆ ಹೆರ್ ಥೊಡ್ಯಾ ಮಿತ್ರಾಂಚೊ ವಿಶೇಸ್ ಪಾತ್ರ್ ಆಸಾ, ತಾಂಚಿಂ
ನಾಂವಾಂ ಹಾಂವ್ ಉಲ್ಲೇಕ್ ಕರಿನಾಂ ತರ್ ಹಾಂವ್ ಗುನ್ಯಾಂವ್ಕಾರ್ ಜಾಯ್ನ್; ಆನಿ ತಾಂತುಂ ಎಕ್ಲೊ
ಮ್ಹಜಾ ಕಾಳ್ಜಾಕ್ ಲಾಗ್ಸಿಲೊ ಆಂಡ್ರು ಡಿ’ಕುನ್ಹಾ ತರ್ ದುಸ್ರೊ ಎಚ್ಚೆಮ್.
ಎಚ್ಚೆಮಾನ್ ಮ್ಹಜಾ ಕವಿತಾಚಾ ಚಿಂತ್ಪಾಚೆರ್ ಜಾಯ್ತೆಪಾವ್ಟಿಂ ಅಪ್ಲ್ಯಾ ವಿಮರ್ಶಾತ್ಮಕ್ ನದ್ರೆನ್ ನವಿ ದಿಶಾ ದಿಲ್ಯಾ, ಕಾವ್ಯೆಂ ಮಾತ್ರ್ ನ್ಹಂಯ್, ಕವಿತಾಂಕ್ ಲಗ್ತಿ ಜಾಲ್ಲೆ ನವೆ
ನವೆ ಪ್ರಯೋಗ್ ಉದೆಂವ್ಕ್ಯ್ ಎಚ್ಚೆಮಾನ್ ಏಕ್ ನ್ಹಯ್ ಎಕಾ ರಿತಿನ್ ಪ್ರೇರಣ್ ದಿಲಾಂ, ಜಾಂವ್ ತೆಂ ಕವಿತಾಪಾಠ್ ಯಾ ಬೂಕ್ ಸಮೀಕ್ಶಾ. ಕಿತ್ಯಾಕ್ ಸಂಯ್ಬಾನ್ ತೊ ಜಿತ್ಲೊ ನಿರಾಸ್ವಾದಿಗೀ ತಿತ್ಲೊಚ್ ಹಾಂವ್ ಆಶಾವಾದಿ. ತಾಚಾ ಕಿತ್ಲೆಶ್ಯಾ ’ಸಾಧ್ಯ್ ನಾ’ಂಕ್ ’ಸಾಧ್ಯ್’ ಕೆಲ್ಲೊ ಸಂತೊಸ್ ಮ್ಹಜಾ ಕಾಳ್ಜಾಂತ್ ಮೊರಾಚಿಂ ಪಾಕಾಂ ಭಾಂದುನ್ ನಾಚ್ತಾ. ಜಾಂವ್! ಹೆಂಯ್ ಎಚ್ಚೆಮಾಚೆಂ ಏಕ್ ಲಿಪ್ತೆಂ ತಾಲೆಂತ್!
ಆಬ್ರಿವಿಯೇಶನ್ ಪ್ರಕಾರ್ ಎಚ್ಚೆಮ್ ಮ್ಹಳ್ಯಾರ್ ಹೆಡ್ ಮಾಸ್ಟರ್, ಮ್ಹಳ್ಯಾರ್ ಮೆಸ್ತ್ರಿಂಚೊ ಮೆಖೆಲ್ ಮೆಸ್ತ್ರಿ. ಕೊಂಕ್ಣಿ ಕವಿತಾಂತ್ಯ್ ಹೊ ಮುಖೆಲ್ ಮೆಸ್ತ್ರಿ ಮ್ಹಳ್ಯಾರ್ ಅತಿಶಯೋಕ್ತಿ ಜಾಂವ್ಚಿನಾಂ ಮ್ಹಣ್ ಚಿಂತಾಂ. ಹೊ ’ಬಾಮುಣಾಂಚೆಂ ಚೆಡುಂ’ ಬುಕಾಂತ್ ಆಸ್ಚಿಂ ಎಕೆಕ್ ಕವಿತಾ ವಾಚ್ಪ್ಯಾಂಕ್ ಕೊಂಕ್ಣಿ ಕವಿತಾಚಿ ರೂಚ್ ದೀಂವ್ಕ್ ಪಾವೊಂದಿ, ಆನಿ ಹೊ ಕವಿತಾಜಮೊ ಕೊಂಕ್ಣಿ ಕವಿತಾಶೆತಾಂತ್ ನವ್ಯಾ ಕವಿತಾಂಕ್ ಏಕ್ ’ದಿವ್ಟಿ’ ಜಾಂವ್ಕ್ ಸಕೊಂದಿ ಮ್ಹಳ್ಳೆಂಚ್ ಮ್ಹಜೆಂ ಖಾಲ್ತೆಂ ಮಾಗ್ಣೆಂ.
- ತಶೆಂಚ್ ಜಾಂವ್!
ಭೋವ್ ಖಾಲ್ತೆಪಣಿಂ,
ವಲ್ಲಿ ಕ್ವಾಡ್ರಸ್
ಚೆಡ್ವಾಕ್ ಪಳಂವ್ಚೆ ಪಯ್ಲೆಂ... [ಎಚ್ಚೆಮ್]
ಕವಿತೆಚೊ ಹೊ ಮ್ಹಜೊ ತಿಸ್ರೊ ಬೂಕ್. ಹ್ಯಾ ಸಂಗ್ರಾಹಾಂತ್ಲ್ಯೊ ಏಕ್ ದೋನ್ ಕವಿತಾ, ಮೆಲ್ವಿನ್ ಪೆರ್ನಾಲಾನ್ ಸಂಪಾದುಂಚಾಂ, ಮ್ಹಜಿ ಮೂಳ್ ಪಿರ್ಗಜ್ ಪೆರ್ನಾಳ್ಚ್ಯಾ ಪಿರ್ಗಜ್ ಪತ್ರಾರ್ ಸೊಡ್ಲ್ಯಾರ್ ಹೆರ್ � ಛಾಪೊಂಕ್ನಾಂತ್. ಗಜಾಲ್ ಅಶಿ ಆಸ್ತಾಂ ಹೆ ಬರ್ಪಾಚಾ ಮುಳಾಂತ್ ಪತ್ರಾಂಚಾಂ ಸಂಪಾದಕಾಂಕ್ ಅರ್ಗಾಂ ದಿಂವ್ಚೆಂ ಕರ್ಮ್ ಉರ್ಲೆಂ ಮ್ಹಣ್ಯಾಂ. ಪುಣ್ ದೀನಾಸ್ತಾನಾ � ಜಾಯ್ನಾ. ಫಾಲ್ಯಾಂ ಹೊ ಬೂಕ್ ಮೊಕ್ಳಿಕ್ ಜಾಲ್ಲಿ ತಸ್ವೀರ್ ಛಾಪಿನಾಂವ್, ಕೊಣೆಂ ಬಾವ್ಡ್ಯಾನ್ ಏಕ್ ವಿಮರ್ಸೊ ಬರವ್ನ್ ದಾಡ್ಲ್ಯಾರ್ ಫಾಯ್ಸ್ ಕರಿನಾಂವ್ ಮ್ಹಣ್ � ಮಾಗಿರ್ ಹಟಾಕ್ ಪಡ್ತಿತ್. ಹಿ ದುಸ್ಮನ್ಕಾಯ್ ಬರಿ ನ್ಹಯ್. ಆಸೊಂ.
ಹಾಂತ್ಲ್ಯೊ ಚಡಾವತ್ ಕವಿತಾ ಸುಲಬಾಯೇನ್ ವಾಚ್ಪಾಕ್ ಆನಿ ಆನ್ಬೊಗಾಕ್ ಮೆಳ್ಚ್ಯೊ ತಸಲ್ಯೊ. ಸಂಕೀರ್ಣ್ ಇಮಾಜಿ ಆನಿ ಕಠಿಣ್ ಭಾಶೆ ಥಾವ್ನ್ ಜಾತಾ ತಿತ್ಲೆಂ ಪಯ್ಸ್ ರಾಂವ್ಚೆಂ ಏಕ್ ಪ್ರಾಮಾಣಿಕ್ ಪ್ರೇತನ್ ಹಾಂವೆಂ ಹಾಂಗಾಸರ್ ಕೆಲಾಂ. ಅಶೆಂ ಕೆಲ್ಲ್ಯಾನ್ ಕವಿತಾ ವಿಸ್ತಾರೊಂಕ್ ಸಲೀಸ್ ಜಾತಾ ಮ್ಹಳ್ಳೆಂ ಚಿಂತಾಪ್ ಆಯ್ಲೆವಾರ್ � ಮತಿಂತ್ ಪಾಲೆಂವ್ಕ್ ಲಾಗ್ಲಾಂ. ಪುಣ್ � ಕಾವ್ಯಾತಂತ್ರಾಂತ್ ಆನಿ ಶಯ್ಲೆಂತ್ ಸೊಡ್-ದೊಡ್ ಕರುಂಕ್ ನಾ. ತಶೆಂ ಕೆಲ್ಲ್ಯಾನ್ ಕವಿತಾಚಿ ವೀದ್ವಾವ್ಳಿ ಜಾತಾ ಹೆಂ ಹಾಂವ್ ಪ್ರಾಮಾಣಿಕ್ಪಣಿಂ ಮಾನ್ತಾಂ. ಕವಿತೆಂತ್ಲೊ ಮೂಳ್ ಆಶಯ್ ಅನ್ಬೊಗಾ ಮಾರ್ಗಾನ್ ಜೆನ್ನಾಂ ಸಹೃದು ವಾಚ್ಪ್ಯಾಚಾ ಕಾಳ್ಜಾಮನಾಂತ್ ದಾಖಲ್ ಜಾತಾ, ತೆನ್ನಾಂ ಮ್ಹಜೆ ತಸಲ್ಯಾ ’ಕವಿತಾ ಕರ್ಚ್ಯಾ ನಿರ್ಬಾಗ್ಯಾಚಾ’ ಕರ್ಮಾಕ್ ಶೆವೊಟ್ ಮೆಳ್ಟಾ.
ಆಜ್ ಕೊಂಕ್ಣಿ ಕವಿತೆಕ್ ಸಂಸಾರ್ಭರ್ ಮಾನ್ ಮೆಳ್ಟೇ ಆಸಾ. ತಸೆಂ ಆಮ್ಚ್ಯಾ ಕವೀಂಕ್. ಕೊಂಕ್ಣಿ ಕಾವ್ಯಾಚೆಂ ಕಿಟಾಳ್ ಕಾಳ್ಜಾಂತ್ ಘೆವ್ನ್, ಪೊಟಾಚೊ ಗ್ರಾಸ್ ಸೊಧುನ್, ಸಾತ್ ದರ್ಯೊ ಉಭೊನ್ ಗೆಲ್ಲ್ಯಾ ಮ್ಹಜ್ಯಾ ಕಾಂಯ್ ಸಾಂಗೊಡ್ಯಾಂನಿಂ, ಪೊಟಾ ಭುಕೆಕ್ ಆನಿ ರಿಣಾ ವೊಜ್ಯಾಕ್ - ರೆಂವೆಚ್ಯಾ ಗಾಂವಾಂತ್ಲ್ಯಾ ತೆಲಾಚಾ ಬಾಂಯಾಂನಿಂ ದಿಸಾಚಿಂ ಚೊವೀಸ್ ವೊರಾಂ ಘಳಾಲ್ಲ್ಯಾ ಘಾಮಾಚಾ ಥೆಂಬ್ಯಾಂನಿಂ ಸತ್ಚ್ಚ್ ಕವಿತೆಚಾ ಕಿಟಾಳಾಚೇರ್ ತೆಲಾಚೆಂ ಕಾಮ್ ಕೆಲೆಂ ಆನಿ ಖಾಡಿಯೆಚಾ ದೇಸಾಂನಿಂ ಮಾತ್ ನ್ಹಯ್ ಅಖ್ಖ್ಯಾ ಸಂಸಾರಾರ್ ಕೊಂಕ್ಣಿ ಕವಿತೆಚೊ ಉಜೊ ಪೆಟವ್ನ್ ಸೊಡ್ಲೊ. "ಕವಿತಾ"ಚೊ ಬಾಬ್ ಮೆಲ್ವಿನ್ ರೊಡ್ರಿಗಸ್ ಜಾಂವ್, "ಕವಿತಾವಾಳ್ಯಾ"ಚೊ ಬಾಬ್ ಆಂಡ್ಯೂ ಜಾಂವ್, "ದಾಯ್ಜಾ"ಚೊ ಬಾಬ್ ವಲ್ಲಿ ಕ್ವಾಡ್ರಸ್ ಜಾಂವ್ - ಹಾಂಣಿಂ ಆಪ್ಲ್ಯಾ ತರ್ಣಾಟ್ಪಣಾಚೊ ಆನಿ ಕುಟ್ಮಾಚೊ ಮೊಲಾಧಿಕ್ ವೇಳ್ ಕೊಂಕ್ಣಿ ಕಾವ್ಯಾ ಖಾತಿರ್ ದಿಲಾ. � ಹಾಂಚಾ ದಿಸಾಚಿಂ/ರಾತಿಚಿಂ ಕಾಂಯ್ ಠರಾವಿಕ್ ವೊರಾಂ ಕೊಂಕ್ಣಿ ಸಾಹಿತ್ಯಾಖಾತಿರ್, ಕಾವ್ಯಾಖಾತಿರ್ ಆಡೊವ್ ಆಸಾತ್ - ಹಿ ಗಜಾಲ್ ಕೊಂಕ್ಣಿ ಸಮಾಜೆಕ್ ಸಂತೊಸಾಚಿ. ಪುಣ್ ಹೆ ಆಪ್ಲೊ ಮೊಟೊ ಕವಿತಾವಾವ್ರ್ ಇಂಟರ್ನೆಟಾರ್ ಕರ್ತಾತ್ ಆನಿ ತಿಸ್ರ್ಯಾ ವಿಶ್ವಾಚಾ ಕೊನ್ಶ್ಯಾ ಕೊನ್ಶ್ಯಾಂಕ್ ಹಾಂಚೊ ವಾವ್ರ್ ಪಾವೊಂಕ್ ವೇಳ್ ಲಾಗ್ತಾ. ಗಾಂವ್ಚೊ ವಾಚ್ಪಿ ಇಂಟರ್ನೆಟಾ ಪ್ರಾಸ್ ಪ್ರಿಂಟ್ ಮೀಡಿಯಾ ಖಾಯ್ಸ್ ಕರ್ತಾ ವಾ ತಾಕಾ ತೇಂ ಸುಲಭಾಯೆನ್ ಪಾವ್ತಾ. ಕಂಪ್ಯೂಟರಾಚಾ ಪಡ್ದ್ಯಾ ವಯ್ಲ್ಯಾ ಕವಿತಾಂ ಪ್ರಾಸ್ ಎಕಾಂತಾಂತ್ ವಾಚ್ಲ್ಲ್ಯಾ ಬೂಕಾಂತ್ಲಿಂ ಕವಿತಾ ಚಡ್ ತೇಂಪ್ ಮತಿಂತ್ ಉರ್ತಾತ್ ಹೆಂ ಹಾಂವ್ ಮಾನ್ತಾಂ.
ಸಮಕಾಳೀನ್ ಕೊಂಕ್ಣಿ ಕಾವ್ಯೆಂ ನಿರಾಸ್ವಾದಾನ್ ಪಿಕ್ಲಾಂ ಮ್ಹಣ್ಚೊ ವಾದ್ � ಆಸ್ಯೆತ್. ಸಮಕಾಳೀನ್ ಸಮಾಜ್ ತರೀ ಖಂಯ್ ಸುಖ್, ಸಂತೊಸ್, ಸಮಾದಾನಾನ್ ಭರೊನ್ ವೊಮ್ತೊತಾ? ಗಾಂವಾಂಕ್ ಗಾಂವ್ ಕೊಮುವಾದಾಚಾ ಉಜ್ಯಾಂತ್ ಪೆಟೊನ್ ಜಳ್ಟೇ ಅಸಾ. ಸಮಾಜ್ ಬಾಂದಿಜಯ್ ಜಾಲ್ಲಿಂ ಧರ್ಮಾಂ ಪಾಗೊರ್ ಉಬಾರ್ತೇ ಆಸಾತ್. ಮನ್ಶ್ಯಾ ಸಂಬಂದಾಂಚೆಂ ಮೋಲ್ ತೀನ್ ತಿರ್ಕುಟಾಂಚೆಂ ಜಾಲಾಂ. ಶೆರಾಂತ್ ಜಿಯೆಂವ್ಚೊ ಮನಿಸ್ ಕಾಮಾಚಾ ಆನಿ ಮನ್ಶ್ಯಾ ಸಂಬಂದಾಂಚಾ ಸೊಧ್ನೆಂತ್ ಹಳ್ಟಾರ್ ’ಸ್ಕಿಜಾಯ್ಡ್’ ಜಾತೇ ವೆತಾ. ಹ್ಯಾ ದೇಸಾಚಾ ಕಾಂಯ್ ಗಾಂವಾಂನಿ ಪಿಯೊಂಕ್ ನಿರ್ಮಳ್ ಉದಕ್, ಹಾಗೊಂಕ್ ಕಾಕುಸ್ ನಾತ್ಲ್ಲಿ ಗತ್ ಅಜೂನ್ ಆಸಾ. ನೆಟ್ ಸೊಡ್ಯಾಂ ಥಂಯ್ ಪೇಪರ್ ಪಾವ್ಲ್ಯಾರೀ, "ಕ್ರಾಂತಿವೀರ್" ಪಿಂತುರಾಂತ್ ಜಸೆಂ ನಾನಾ ಪಾಟೇಕರ್ ಮ್ಹಣ್ತಾ "ಬಾಯೆ ತುಜೆಂ ಪೇಪರ್ ಸಕಾಳಿಂಚೆಂ ಭುರ್ಗಿಂ ಹಾಗೊಂಕ್ ವಾಪಾರ್ತಾತ್" - ಅಶಿ ಗತ್ ಆಸಾ. ತರೀ ಹ್ಯಾ ದೇಸಾಚೊ ಸರ್ಕಾರ್ ಮ್ಹಣ್ತಾ "ಕ್ಯಾ ಆಪ್ಕೆ ಪಾಪಾ ಇಮಾನ್ದಾರೀ ಸೆ ಟ್ಯಾಕ್ಸ್ ಭರ್ತೇಂ ಹೆಂ ?" ಆಮಾಯೆಕ್ ಪರ್ಜೆನ್ ರಗ್ತಾಚೊ ಘಾಮ್ ಕರ್ನ್ ಜೊಡ್ಲ್ಲ್ಯಾ ಪಯ್ಶಾಂಚೆಂ ಭರ್ಲ್ಲ್ಯಾ ಟ್ಯಾಕ್ಸಾಚೆಂ ಸರ್ಕಾರ್ ಕರ್ತಾ ತರೀ ಕಿತೆಂ? ಸೊಜೆರಾಂಚಾ ಮೊರ್ನಾಚಾ ಪೆಟೆಂತ್ ಸಯ್ತ್ ಖಾತಲೊ ಖಾವ್ನ್ ಧೆಂಕ್ ಕಾಡ್ತಾ. ಸರ್ಕಾರಾಚಾ ಜಾಯ್ರಾತಾಂತ್ ಸಾಂಕೆ, ದೇಸಾಚಾ ರಾಕೊಣೆಖಾತಿರ್ ಟ್ಯಾಕ್ಸಾಚೊ ದುಡು ಉಪ್ಯೋಗ್ ಜಾತಾ ಮ್ಹಳ್ಯಾರ್, ತೆಚ್ಚ್ ಚಾನೆಲಾರ್ ಜಾಯ್ರಾತ್ ಮುಗ್ದೊನ್ ಖಬ್ರೊ ಚಾಲು ಜಾತಾನಾ, ಖಂಯ್ಚ್ಯಾ ಮಂತ್ರಿನ್ ಅಧಿಕಾರಿನ್ ಕಿತ್ಲೊ ಖಾವ್ನ್ ಟ್ಯಾಕ್ಸಾಚೊ ದುಡು ಗುಳುಂ ಕೆಲೊ � ಲೇಕ್ ಯೆತಾ. ಹೆಂ ಪಳೆವ್ನ್ ಮಾಸುಮ್ ಭುರ್ಗ್ಯಾನ್ ಜರ್ ಇಮಾನ್ದಾರೇನ್ ಟ್ಯಾಕ್ಸ್ ಭರ್ಚ್ಯಾ ಬಾಪಾಯ್ಕ್ ಹೇ ವಿಶಿಂ ವಿಚಾರ್ಲೆಂ ತರ್ ತಾಂಣೆಂ ಕಿತೆಂ ಜಾಪ್ ದೀಜೆ?
ಹೆಂ ವಿಡಂಬನ್ ಪಳೆಯಾ, ಅಮಿತಾಭ್ ಬಚ್ಚಾನಾ ತಸಲ್ಯಾ ಮನ್ಶ್ಯಾಕ್ ಕೊರೊಡಾಂನಿ ವಜ್ರಾಂ ದಿವ್ಳಾಕ್ ದಾನ್ ಕರುಂಕ್ ದುಡು ಆಸಾ , ಟ್ಯಾಕ್ಸ್ ಭರುಂಕ್ ನಾ! ದಾಡ್ಲ್ಲ್ಯಾ ನೊಟಿಸಾಂಕ್ ಜಾಪ್ ದೀಂವ್ಕ್ ಪುರ್ಸತ್ ನಾ. ಬಾವ್ಡೆ ಟ್ಯಾಕ್ಸ್ವಾಲೆ ಆಸ್ಪತ್ರೆಕ್ ಗೆಲ್ಯಾರ್ ಅಖ್ಖ್ಯಾ ದೇಸಾಂತ್ ಹಂಗಾಮಾ ಜಾತಾ. ಹ್ಯಾ ನಾಗ್ಡ್ಯಾ ಸತಾಂಕ್ ನೆಗಾರ್ಚೆಂ ಕಟ್ಟಿ ಧಯ್ರ್ ಮ್ಹಜ್ಯಾ ಹರ್ದ್ಯಾಂತ್ ಸದ್ದ್ಯಾಕ್ ತರೀ ನಾ.
’ಭಾಮುಣಾಂಚೆಂ ಚೆಡುಂ’ - ’ಕಯ್ದ್ಯಾಚೊ ಕವಿತಾ’ಂಚೊ ಮುಕ್ಲೊ ವಾಂಟೊ. ಉಂಚ್ಲೊ ವರ್ಗ್, ಇಸ್ಕೊಲಾಂತ್ ಮುಕ್ಲೊ ಬಾಂಕ್ - ಸಗ್ಳೆಂ ಆಸೊನೀ ಭಾಮುಣಾಂಚೆಂ ಚೆಡುಂ ಭಿರ್ಮತ್ ಭಿತರ್ಲೆ ಭಿತರ್ ಕಿತ್ಲೆಂ ಎಕ್ಸುರೆಂ ಆನಿ ಕ್ದು. ತಾಕಾ ಇಸ್ಕೊಲಾಚಾ ವಾಟೆರ್ ಮಾತ್ಯೆ ರಸ್ತ್ಯಾಚಿ ಧುಳ್ ಮಾತ್ ಸಾಂಗಾತ್. ಥಂಡ್ ಉದ್ಕಾ ನ್ಹಾಣ್, ತುಳಸೀಚೆಂ ಕಾಟೆಂ ಆನಿ ರಂಗೋಳ್ ಸೊಡ್ಲ್ಯಾರ್. ಸಗ್ಳೆ ಬಾಂದ್ ಮೋಡ್ನ್ ಭಾಮುಣಾಂಚಾ ಚೆಡ್ವಾನ್ ಕಾಡ್ಲ್ಲೆಂ ಮೇಟ್ ಭಿತರ್ಲೊ ಬಂಡಾಯ್ ಜರೀ ಆಸ್ಲ್ಯಾರೀ ಗಾಂವಾಕ್ ಗಾಂವ್ ವಿರಾರ್. ಉಂಚ್ಲೊ ವರ್ಗ್ ತಾಂಣಿಂಚ್ಚ್ ಬಾಂದ್ಲ್ಲೆ ರೆಗ್ರೊ ಮೊಡ್ಲ್ಯಾರೀ ತಾಕಾ ಸದಾಂ ನಿಮ್ನ್ ವರ್ಗ್ ಗುನ್ಯಾಂವ್ಕಾರ್. ಪುರೋಹಿತ್ ಶಾಹಿ ಸಮಾಜೆಚಾ ವರ್ಗ್ ವೆವಸ್ತೆಚೆಂ ದುರಂತ್ ಹೆಂ.
ದೇವ್ ಆನಿ ಧರ್ಮಾಚಾ ನಾಂವಾನ್ ವೆಪಾರ್ ಚಲ್ಚಾ ಸಮಾಜೆಂತ್ ಮನ್ಶ್ಯಾ ಸಂಬಂದ್ ದೀಸಾನ್ ದೀಸ್ ಸಂಕೀರ್ಣ್ ಜಾತೇ ಯೆತಾನಾ ಮನ್ಶ್ಯಾಕ್ ಮನಿಸ್ ಅಪರಿಚಿತ್ ಆನಿ ಆಗಂತುಕ್ ಜಾತೇ ವೆತಾ. ಡೊ. ಕೆ. ವಿ. ತಿರುಮಲೇಶಾಚಾ " ಮುಕಾಮುಕಿ " ಕವಿತೆಂತ್ ಜಸೆಂ ಮನಿಸ್ ಅಚಾನಕ್ ದೊನ್ಪಾರಾಚಾ ಘಡ್ಯೆ - ಸಾಲಾಂತ್ ಮಾಜ್ರಾಕ್ ಪಳೆವ್ನ್ ಜಸೆಂ ಆಗಂತುಕ್ ಜಾವ್ನ್ ರಾವ್ತಾ ಕಶೆಂ. ದಿಸಾಚಾ ಹ್ಯಾ ಭೊರ್ ದೊನ್ಪಾರಾಚೇರ್ ನಾ ಹ್ಯಾ ಮಾಜ್ರಾನ್ ನಾ ಹ್ಯಾ ಮನ್ಶ್ಯಾನ್, ನಾಂವ್ನ್ ಭಾಯ್ರ್ ಯೆತಾನಾ ನಾಣ್ಯೆ ಥಾವ್ನ್, ಎಕಾಮೆಕಾಕ್ ಬಿಲ್ಕುಲ್ ಅಪೇಕ್ಸುಂಕ್ ನಾತ್ಲ್ಲೆಂ ಜಾಂವ್ಕ್ ಪುರೊ. ಎಕಾಚ್ಚ್ ಘರಾಂತ್ ದೊನ್ಪಾರಾಂಚಾ ಘಡ್ಯೆ - ಮಾಜಾರ್ ಮನ್ಶ್ಯಾಕ್, ಮನಿಸ್ ಮಾಜ್ರಾಕ್ ಕಶೆಂ ಆಗಂತುಕ್, ಅಪರಿಚಿತ್ - ತಸೆಂ ಮನಿಸ್, ವಸ್ತೆಚಾ ನಾಗರಿಕ್ ಶೆರಾಂನಿಂ ಜಿಣ್ಯೆಕ್ ಆಗಂತುಕ್ - ಅಪರಿಚಿತ್ ಜಾವ್ನ್ ಆಜ್ ಉಬೊ ದಿಸ್ತಾ.
ಹ್ಯಾ ಜಮ್ಯಾಂತ್ ಭಾಮುಣಾಂಚೆಂ ಚೆಡುಂ, ವರ್ಗ್ ವೆವಸ್ತೆ ಭಿತರ್ಲಿ ತಾಚಿ ಲಡಾಯ್ ಆನಿ ದೊರ್ಯಾಂ � ಫಿಂರ್ಗೊಣ್ ಮಾತ್ ನ್ಹಯ್, ಪ್ರಿತುಮೆಚೊ ನಿಶ್ಟುರ್ ಮೋಗ್, ಮ್ಹಜ್ಯಾ ಅಡೇಜ್ ವರ್ಸಾಂಚಾ ಧುವೆಚ್ಯೊ ನಿಶ್ಕಲ್ಮಶ್ ಹಾಸೊ, ಬಾಯ್ಲೆಚಿಂ ನಿರಂತರ್ ಸಪ್ಣಾಂ ಆನಿ ಪೆರ್ನಾಳ್ಚ್ಯಾ ಮ್ಹಜ್ಯಾ ಪರ್ನ್ಯಾ ಘರ್ಚೆಂ ಕೊಲುಂ ಶಿಂವಾನಾಸ್ತಾನಾ ಮೊಡೊನ್ ಪಡ್ಲ್ಲೆಂ ಪಾಕೆಂ ಆನಿ ವಾಳಯೆನ್ ನಿರ್ದಯೆನ್ ಖಾವ್ನ್ ಘಾಲ್ಲೆ ತೇಜಸ್ವಿ, ಲಂಕೇಶ್, ಅಡಿಗ, ಬೋದಿಲೇರ್ ಸಯ್ತ್ ಆಸಾತ್. ದಣ್ಸಣೆಚಾ ಎಕಾ ಬೋಬೆಕ್, ಫಿಂರ್ಗೊಣೆಚಾ ಎಕಾ ಉಸ್ವಾಸಾಕ್ - ಕವಿತಾ, ಜನೆಲ್ ಜಾಯ್ತ್ ತರ್, ಸಾಹಿತಾಚಾ ಮೊಳ್ಬಾರ್ ಕಾವ್ಯಾಚಿಂ ನೆಕೆತ್ರಾಂ ಫುಲೊಂಕ್ ವೇಳ್ ಕಸೊ ಲಾಗತ್?
ಮ್ಹಜೆ ಸಾಂಗಾತಾ ಚಡುಣೆಂ ಆಂ - ನೊವೊದಾಚಾ ದಾಕ್ಡ್ಯಾಂತ್ ಕೊಂಕ್ಣಿ ಕಾವ್ಯಾಚಾ ಮೊಗಾರ್ ಪಡ್ಲ್ಲೆ ಜಾಯ್ತೆ ಕವಿ ಆಜ್ ಬರಯ್ತೇ ನಾಂತ್. � ಸರಿಸುಮಾರ್ ಆಟ್ ಧಾ ವರ್ಸಾಂ ವನ್ವಾಸಾಂತ್ ಉರ್ಲ್ಲೊಂ. ತಸೆಂ ಆಶಾವಾದಿ ಬಾಬ್ ವಲ್ಲಿ ಕ್ವಾಡ್ರಸ್ ಸಯ್ತ್. ಮುಂಬಂಯ್ಂತ್ಲಿಂ ತಾಚಿಂ ಕಾಂಯ್ ವರ್ಸಾಂ ಕಾಂಯ್ಚ್ ಬರಯ್ನಾಸ್ತಾಂ ಸರೊನ್ ಗೆಲ್ಯಾಂತ್. ಜಿಣ್ಯೆಚೊ ಸಂಘರ್ಶ್ಚ್ ತಸಲೊ. ಭೊರ್ ದನ್ಪಾರಾಂ ಜಿಣ್ಯೆಸಾಲಾಂತ್ ಮನಿಸ್ ಮಾಜ್ರಾಕ್, ಮಾಜಾರ್ ಮನ್ಶ್ಯಾಕ್ ಅಪರಿಚಿತ್ ಆಗಂತುಕ್ ಕಶೆಂ, ತಸೆಂ.
ಮ್ಹಜ್ಯಾ ಮೊಗಾಚೆ ಕವಿ ಫ್ರೆಡ್ ಕುಮಾರ್, ಜೊಸ್ಸಿ, ಟಾಯ್ಟಸ್, ಮಾವ್ರಿಸ್, ವಿಲ್ಪ್ರೆಡ್ ಲೋಬೊ, ನೆಲ್ಲು ಪೆರ್ಮಾನ್ನೂರ್, ನಜ್ರೆತ್ ನೆರಿ ಆತಾಂ ವಾಚುಂಕ್ ಮೆಳಾನಾಂತ್. ಕಿಶೂ ಬಾರ್ಕೂರ್ ಸಯ್ತ್ ಅಪ್ರೂಪ್. ಲೋಯ್ಡ್ ಆನಿ ಪಂಚು ಕೆಸೆಟ್ ಕವಿ ಜಾಲ್ಯಾತ್. ಕೊಂಕ್ಣಿ ಕಾವ್ಯಾಕ್ ಸಂಸಾರಾರ್ ಮಾನ್ ಮೆಳ್ಟಾನಾ ಕೊಂಕ್ಣೆಂತ್ ಭಳಾನ್ ವಾಳಾಜಯ್ ಜಾಲ್ಲೆಂ ನವ್ಯೋತ್ತರ್ ವ್ಹಾರೆಂ ಅಸ್ಕತ್ ಪಡ್ಲಾಂ ಮ್ಹಣ್ಚಿ ಬೆಜಾರಾಯ್ ಮ್ಹಜ್ಯಾ ಕಾಳ್ಜಾ ಕೊನ್ಶ್ಯಾಂತ್ � ಆಸಾ. � ಥಂಯ್ ಹಾಂಗಾ ಕಟೀಲ್ಚ್ಯಾ ವಿಲ್ಸಾನಾ ತಸಲೆ ತರ್ನಾಟೆ, ಕವಿತೆಚೆ ನವೆ ಕಾಜುಲೆ ಪೆಟಂವ್ಕ್ ಲಾಗ್ಲ್ಯಾತ್ - ಹಿ ಗಜಾಲ್ ಸಂತೊಸಾಚಿ.
***
ಕೊಂಕ್ಣಿ ಸರ್ಜನ್ಶೀಲ್ ಸಾಹಿತಾಂತ್ಲಿಂ ಮ್ಹಜಿಂ ದಿಮ್ಕುರಿಂ ಪಾವ್ಲಾಂ ಬಳ್ ಜಾವ್ನ್ ಯೆತಾನಾ, ಮ್ಹಾಕಾ ಜಲ್ಮ್ ದಿಲ್ಲ್ಯಾ ಆವಯ್ ಬಾಪಾಯ್ಚೊ, ಮೋಗ್ ದಿಂವ್ಚ್ಯಾ ಭ್ಣುಂ - ಭಾವಾಚೊ, ಪೆರ್ನಾಳಾಂತ್ಲೆ ಮ್ಹಜ್ಯಾ ಜಿವಾಚೆ ಈಶ್ಟ್ ಆಲ್ವಿ, ಅರುಣ್ ಆನಿ ಪಾತಿಮಾಚೊ ತಾಳೊ ಸಂಪಾದಕ್ ಮೆಲ್ವಿನಾಚೊ, ಮ್ಹಜ್ಯಾ ಗರ್ಜೆ ಆಕಾಂತಾಂತ್ ಸದಾಂ ಪಾಂವ್ಚೊ ವಿಟ್ಲಾಂತ್ಲೊ ಮ್ಹಜೊ ಮಿವ್ಣೊ ಲೂವಿಸ್ ಮಸ್ಕರೇನ್ಹಾಸಾಚೊ,
ಕಾಳಾ ಕಾಳಾಕ್ ಸಾತ್ ದರ್ಯಾಂ ಪಯ್ಸ್ ಥಾವ್ನ್ ಉರ್ಬೆಚಿಂ ಇಂಜೆಕ್ಶನಾಂ ತೊಪುನ್ ಮ್ಹಜೆ ಜೆಣ್ಯೆಂತ್ಲೆಂ ನಿರಾಸ್ಪಣ್ ದಾಂವ್ಡಾಂವ್ಚೆ ಮೆಲ್ವಿನ್ ರೊಡ್ರಿಗಸ್, ಆಂಡ್ರ್ಯೂ ಆನಿ ಕಿಶೂ - ಹಾಂಚೊಂ, ಮ್ಹಜ್ಯಾ ಬರ್ಪಾಂಕ್ ಸದಾಂ ಪ್ರೋತ್ಸಾವ್ ದಿಂವ್ಚಾ ರಾಕ್ಣೊ, ಮಿತ್ರ್, ಕಾಣಿಕ್, ಝೆಲೊ ಪತ್ರಾಂಚಾಂ ಸಂಪಾದಕಾಂಚೊ, ಕಶ್ಟಾ ಸುಕಾಂತ್ ಸದಾಂ ಮ್ಹಜಿ ಜಿಣ್ಯೆ ಸಾಂಗಾತಿಣ್ ಸ್ಟೆಲ್ಲಾಚೊ, ಆನಿ ಮ್ಹಜ್ಯಾ ಜಿವಾಚೊ ಜೀವ್ ಮ್ಹಜಿ ಅಡೇಜ್ ವರ್ಸಾಚಿ ದುವ್ ಹೆನ್ಸಿಲ್ ರಿಯಾಚೊ,
ಮ್ಹಜೇರ್ ಆನಿ ಮ್ಹಜ್ಯಾ ಬರ್ಪಾಂಚೆರ್ ಭರ್ವಸೊ ದವರ್ನ್ ಮ್ಹಜೆಂ ಸಾಹಿತ್ ಪರ್ಗಟ್ಚೆಂ ವೊಜೆಂ ಆಪ್ಲ್ಯಾ ಖಾಂದ್ಯಾರ್ ವಾವಂವ್ಚೊ ಕೊಂಕ್ಣಿ ಸಂಸಾರಾಂತ್ಲೊ ಮ್ಹಾನ್ ಆಶಾವಾದಿ, ವಲ್ಲಿ ಕ್ವಾಡ್ರಸ್ ಆಜೆಕಾರ್ ಹಾಚೊ, ಆನಿ ಹೊ ಬೂಕ್ ನಾಜೂಕಾಯೇನ್ ಛಾಪುನ್ ಕಾಡ್ಚೆ ಕೊಡ್ಯಾಳಾಂತ್ಲೆ ಮ್ಹಜೆ ಸಾಂಗಾತಿ, ವಿತೊರಿ, ಲೋಯ್ಡ್ ಆನಿ ರಿಚ್ಚಿ ಹಾಂಚೊ,
ಎಚ್ಚೆಮ್ ಮ್ಹಳ್ಳೊ ಹೊ ಚೆಡೊ,
ಜೀಣ್ಭರ್ ಋಣಿ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
