ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮೆಲ್ವಿನ್ ಜೆರಾಲ್ಡ್ ವಾಸ್: ಕೆಲರಾಯ್ ಫಿರ್ಗಜೆಜೊ, ಪಾಟ್ಲ್ಯಾ ಭಾರಾ ವರ್ಸಾಂ ಥಾವ್ನ್ ಕುವೆಯ್ಟಾಂತ್ ವಾವ್ರ್ ಕರುನ್ ಆಸಾ. ಚಡುಣೆಂ ಪಂದ್ರಾ-ಸೊಳಾ ವರ್ಸಾಧಿಂ ಸಾಹಿತ್ಯಾಚಿ ಸುರ್ವಾತ್ ಕರುನ್, 35 ಮಟ್ವ್ಯೊ ಕಾಣ್ಯೊ ಆನಿ ಏಕ್ ಕಾದಂಬರಿ ಬರಯಿಲ್ಲಿ ತರ್ಯೀ ಸಭಾರ್ ವರ್ಸಾಂನಿ ತಿ ಜಿವಾಳ್ ದವ್ರುಂಕ್ ಸಕಾನಾಸ್ತಾಂ ರಾವ್ಲೊ ತರ್ಯ್ ಕೊಂಕ್ಣಿ ಸಾಹಿತ್ಯಾಚೆರ್ ತೊಚ್ಚ್ ಮೋಗ್ ಆನಿ ಹುಸ್ಕೊ ಅಸೊನ್, ಆಯ್ಲೆವಾರ್ ಸರಾಗ್ ರಿತಿನ್ ವೆವೆಗ್ಳ್ಯಾ ಪ್ರಕಾರಾಚಿ ಸಾಹಿತಿಕ್ ಕೃಷಿ ಕರುನ್ ಕೊಂಕ್ಣಿ ವರ್ತುಲಾಂತ್ ನಾಂವಾಡ್ದಿಕ್ ಜಾಲಾ. ಕಾಣ್ಯಾಂಶಿವಾಯ್ 4 ನಾಟ್ಕುಳೆ, 75 ಕವಿತಾ, 10 ಲೇಖನಾಂ, 20 ವಿಮರ್ಶೆ/ಸಮೀಕ್ಶಾ ಬರಯ್ಲ್ಯಾತ್. ಹಾಚೊ ಸ್ವತಾಚೊ ( ಫುಡ್ಲದ್) ಕವಿತಾಜಮೊ ’ಆಟ್ವ್ಯಾ ರಂಗಾಚೊ ಧೊಣು’ ವೆಗಿಂಚ್ ’ಆಶಾವಾದಿ ಪ್ರಕಾಶನ್’ ಪರ್ಗಟ್ಚಾರ್ ಆಸಾ. ಹಾಚ್ಯಾಧಿಂ ಹಾಚಿಂ ಕವಿತಾಂ/ಲೇಕನಾಂ ’ಮೊತಿಯಾಂ ಆನಿ ತಾರಾಂ’, ’ಸಾಗೊರಾಚ್ಯಾ ವಾಟೆಚ್ಯೊ ಝರಿ’, ’ಕವಿತಾಪಾಠ್’ ಆನಿ ’ದರ್ಯಾಕ್ ಉದಾಕ್’ ಬುಕಾಂನಿ ಪರ್ಗಟ್ಲ್ಯಾಂತ್. ಪಾಟ್ಲ್ಯಾ ದೋನ್ ವರ್ಸಾಂ ಥಾವ್ನ್ ದಾಯ್ಜ್.ಕೊಮ್ ಸಾಯ್ಟಿಚೊ ಸಹ-ಸಂಪಾದಕ್ಯೀ ಹೊ ಜಾವ್ನಾಸಾ.
ಭ್ರಮಿದೆಂತ್ಲ್ಯೊ ಸಾವ್ಳ್ಯೊ: ಏಕ್ ಸಾಮಾಜಿಕ್ ಕಾದಂಬರಿ, ಪ್ರಮುಖ್ ಜಾವ್ನ್ ತೆಗಾಂಚ್ಯಾ ತೀನ್ ರಿತಿಚಾ ಸಂಭಂಧಾಂಚೆ ಎಕಾಮೆಕಾಚೆ ಗಾಂಚ್ ಮ್ಹಣ್ಯೆತಾ. ವಾಚ್ಪ್ಯಾಂಕ್ ಸಿಂತಿಮೆಂತಾಂ, ಚಿಂತಾಪ್, ಭಗ್ಣಾಂ, ಉಮಾಳೆ ಜಾಗಂವ್ಕ್ ಜರೂರ್ ಸಕ್ತೆಲಿ ಮ್ಹಳ್ಳೊ ಮ್ಹಜೊ ಭರ್ವಸೊ.
ಪುಸ್ತಕ್ ಏಕ್
ಜಿವಿತ್ ತುಕಾ ಆಪಯ್ತಾ
ಆವಸ್ವರ್ ದೋನ್: ಆಲಿಯಾ
ಆಲಿಯಾ!
ಜಿವಿತಾ ಮುಳಾಂತ್ ಪಳೆಲ್ಲೆಂ ಸಪಾಣ್, ಏಕ್ ದೀಸ್ ನೀಜ್ ಜಾವ್ನ್, ಆಪ್ಲ್ಯಾ ದೊಳ್ಯಾಂ ಮುಕಾರ್ ಸೊಭಿತ್ ಫುಲಾಂ ಸಾಡಿ ನ್ಹೆಸೊನ್ ಆಯ್ತೆಂ ಜಾತಾನಾ, ಕಾಳ್ಜಾ ಥಳಾರ್, ಎಕಾ ಥರಾಚೊ ವಿಚಿತ್ರ್ ಉಲ್ಲಾಸ್ ಉಮಾಳೊನ್ ಯೆಂವ್ಚಾ ಪರಿಂ, ಆಜ್, ಆಲಿಯಾಚಾ ಮತಿಕ್ ಪಾಕಾಟೆ ಪುಟೊನ್, ತಾಕಾ, ಹ್ಯಾ ಸೊಭಿತ್ ಸಂಸಾರಾಚಾ, ವಯ್ಲ್ಯಾ ನಿಳ್ಶ್ಯಾ ಮೊಳಾಬಾ ಪಂದ್ಲ್ಯಾ ಕುಪಾಂ ಮಧೆಂ, ಆಪುಣ್ ಉಭೊನ್ ವೆತಾಂ ತಶೆಂ ದಿಸ್ತಾಲೆಂ.
ಆಜ್, ಹ್ಯಾ ಸಂಸಾರಾಂತ್, ಸಗ್ಳ್ಯಾಂ ಪ್ರಾಸ್ ಚಡ್ ಖುಶ್ ಆಸ್ಲ್ಲಿ ವ್ಯಕ್ತಿ ಮ್ಹಳ್ಯಾರ್ ’ಆಲಿಯಾ!’. ಹ್ಯಾ ಎಕಾ ದಿಸಾ ಖಾತಿರ್, ತಾಣೆಂ ಕಿತ್ಲ್ಯೊ ರಾತಿ ನಿದೆ ವಿಣೆಂ ಖರ್ಚುಂಕ್ ನಾಂತ್? ಕಿತ್ಲೆ ದೀಸ್, ಮೊಳಾಬಾರ್ ಆಯ್ಕೊನ್ ಯೆಂವ್ಚಾ, ಉಬ್ಚಾ ವಿಮಾನಾಂಚಾ ಆವಾಜಾಕ್ ಆಯ್ಕೊನ್, ಗುಪಿತ್ ಆಪ್ಲ್ಯಾ ಮತಿಂತ್ಚ್ ಬೋಬ್ ಮಾರ್ಲ್ಲಿ ನಾ?
"ಹಾಂವ್ ಆಲಿಯಾ ಏಕ್ ದೀಸ್.....!"
ದಿಸಾಂಕ್ ಆನಿ ಆಲಿಯಾಕ್ ಕಾಂಯ್ ಸಂಭಂಧ್ ನಾತ್ಲ್ಲೊ. ದೀಸ್ ಆಪ್ಣೆ ಇತ್ಲ್ಯಾಕ್ ಉದೆತಾಲೆ, ಆನಿ ಆಪ್ಣೆ ಉದೆವ್ನ್ ಆಯಿಲ್ಲ್ಯಾ ಕರ್ಮಾಕ್, ಯಾ ಬರ್ಯಾ ಕಾಮಾಕ್ ಕೊಣ್ಣಾ ಕೋಣ್ ಜಾಣಾಂ, ತೆ ಉದೆವ್ನ್ ಆಯಿಲ್ಲ್ಯಾ ಪರಿಂಚ್ ಸಾಂಜೆಕ್ ವೆಂಗುನ್ ವೆತಾನಾ, ಆಪ್ಲ್ಯಾ ಸಾವ್ಳೆಕ್ ಸಾಂಡುನ್ ವೆತಾಲೆ.
ಹಿ ಸಾವ್ಳಿ ತರ್ಯ್ ಕಸಲಿ?
ಕೋಣ್ ಹ್ಯಾ ಸಾವ್ಳೆಕ್ ವೆಂಗುಂಕ್ ಆತ್ರೆಗ್ತಾ ತರ್, ಕೋಣ್ ಹ್ಯಾ ಸಾವ್ಳೆ ಥಾವ್ನ್ ಧಾವೊಂಕ್ ಆಶೆತಾ. ಮನ್ಶ್ಯಾಕ್ ಆನಿ ದಿಸಾಂನಿ ಸಾಂಡುನ್ ಗೆಲ್ಲ್ಯಾ ಹ್ಯಾ ಸಾವ್ಳೆಕ್, ಕಸಲೊಗೀ ಏಕ್ ಅವ್ಯಕ್ತ್ ಸಂಭಂಧ್ ಆಸಾ. ಎಕೇಕ್ ಪಾವ್ಟಿಂ ಹೊ ಸಂಭಂಧ್, ದೊಳ್ಯಾಂ ಫುಡೆಂ ಸರ್ಗಾಚಿಂ ಮೆಟಾಂ ದಾಖಯ್ತಾ ತರ್, ಎಕೇಕ್ ಪಾವ್ಟಿಂ ಹೊಚ್ಚ್ ಸಂಭಂಧ್, ದೊಳ್ಯಾಂ ಫುಡೆಂ ಕಾಳೊಕಾಚಿಂ ಮೊಡಾಂ ಮಾಂಡಯ್ತಾ.
ಆಲಿಯಾ ತರ್ಯ್, ತ್ಯಾ ಮೊಡಾಂಕ್ ಪಳವ್ನ್ ಕಸಲೊ ಸಂಭಂಧ್ ನಿಯಾಳ್ತಾಲೆಂ?
"ಬೇಟಾ...., ತುಂ ಇತ್ಲೆಂ ಕಿತ್ಯಾಕ್ ಮೌನ್ ಸಾಂಬಾಳ್ತಾಯ್?" ಆಲಿಯಾಚೆಂ ಮೌನ್ ಪಳವ್ನ್, ತಾಕಾ, ತಾಚಿ ಆಜಿ ಸಮ್ಜಂವ್ಚೆಂ ಪ್ರಯತ್ನ್ ಕರ್ತಾಲಿ.
ಮನ್ಶ್ಯಾಕ್ ಮನ್ಶ್ಯಾನ್ ಸಮ್ಜೊಚಿ ಚಡ್ ಗರ್ಜ್. ಹಿ ಗರ್ಜ್ ಮನ್ಶ್ಯಾ ಸಂಭಂಧಚಾ ಅನುಭಂಧಾಕ್ ಘಟ್ ಕರ್ತಾ. ಪುಣ್, ಮನಿಸ್, ಸಂಸಾರಿ ದವ್ಲತಾಯೆ ಪಾಟ್ಲ್ಯಾನ್ ಚಡ್ ಮೆತೆರ್ ಆಸ್ತಾನಾ, ಹೊ ತಾಚೊ ಅನುಭಂಧ್, ತಾಚ್ಯಾ ಜಿವಿತಾಂತ್ ಘಟ್ ಜಾಂವ್ಚೊ ತರ್ಯ್ ಕಸೊ?
"ಪಯ್ಸೊ ನಾ ಜಾಲ್ಯಾರ್ ಸಂಸಾರ್ ನಾ. ಸಂಸಾರ್ ಆಸ್ಲ್ಯಾರ್ ಕುಟಾಮ್ ನಾ!" ಚಡಾವತ್ ಗ್ರೇಸ್ತ್ ಕುಟ್ಮಾಂಚೆ ಹೆ ಹಾಲ್ ಜಾಲ್ಯಾರ್ಯ್, ಶಬೀರ್ ಅಹ್ಮದಾಚಾ ಕುಟ್ಮಾಂತ್, ಮಾಯಾ ಮೋಗ್, ಸಂಭಂಧ್, ಸಗ್ಳೊ ಆಸ್ಲ್ಲೊ. ಉಣೆಂಪಣ್ ಮ್ಹಳ್ಳೆಂ ಕಾಂಯ್ಚ್ ನಾತ್ಲ್ಲೆಂ.
"ಆಲಿಯಾ....! ಬೇಟಾ, ತುಂ ಮಾಕಾ ಮ್ಹಜ್ಯಾ ಚೆಡ್ವಾ ಪರಿಂ ನ್ಹಯ್. ತುಕಾ ಹಾವೆಂ ಕೆದ್ನಾಂಚ್ ಎಕಾ ಚಲಿಯೆಚಾ ನದ್ರೆನ್ ಪಳಂವ್ಕ್ ನಾ. ತುಂ ಮ್ಹಾಕಾ ಮ್ಹಜ್ಯಾ ಸಲೀಮ್ ಆನಿ ಅಕ್ಬರ್ ಪರಿಂಚ್! ತುಕಾ ಹಾವೆಂ ಮ್ಹಜ್ಯಾ ಪುತಾಚಾ ನದ್ರೆನ್ಚ್ ಪಳೆಲಾಂ. ತುವೆಂಯ್ ಏಕ್ ದೀಸ್ ಆಮ್ಕಾಂ ಸಾಂಡುನ್, ಪಯ್ಶಿಲ್ಯಾ ತ್ಯಾ ಅಮೇರಿಕಾಕ್ ವಚೊಂಕ್ ಆಸಾ. ಆನಿ ಪಾಟಿಂ ಯೆತಾನಾ......!"
"ಪಾಟಿಂ ಯೆತಾನಾ.....?"
"ಪಾಟಿಂ ಯೆತಾನಾ, ತುಂ ಎಕ್ಲೆಂ ಹಾರ್ಟ್ ಸ್ಪೆಶಲಿಸ್ಟ್ ಡಾಕ್ಟರ್ ಜಾವ್ನ್ ಯೆತೆಲೆಂಯ್!"
"ಓಹ್.... ಅಬ್ಬೂ....!"
"ಕಿತೆಂ ಮ್ಹಜೆಂ ಧುವ್ ಖುಶಿ ಜಾಂವ್ಕ್ ನಾ?"
"ಅಬ್ಬೂ....., ಹಾಂವ್ ತ್ಯಾ ವಿಮಾನಾರ್.....!"
ಆಪ್ಲ್ಯಾ ಮತಿಂತ್ಲ್ಯಾ ಕೊನ್ಶ್ಯಾಂತ್, ಕಿರ್ಲೊನ್, ಪಾಲೆವ್ನ್, ಫುಲೊನ್ ಯೆಂವ್ಚಾ ಸಪ್ಣಾಕ್, ಆಪ್ಲ್ಯಾ ದೊಳ್ಯಾಂ ಮುಕಾರ್ ಹಾಡುನ್ ಉಲಯಿಲ್ಲ್ಯಾ ಆಲಿಯಾಚಾ ಉತ್ರಾಂನಿಂ, ಕಸಲಿಗೀ ನಿರಾಶಾ ಝಳ್ಕಾತಾಲಿ. ಆಲಿಯಾಕ್, ತಾಚ್ಯಾ ಬಾಪಾಯ್ನ್ ಕಾಂಯ್ಚ್ ಉಣೆಂ ಕರುಂಕ್ ನಾತ್ಲ್ಲೆಂ. ಶಬೀರ್ ಅಹ್ಮದ್, ಆಪ್ಲ್ಯಾ ಭುರ್ಗ್ಯಾಂಕ್ ಕಾಯ್ಚ್ ಉಣೆಂಪಣ್ ಭೊಗುಂಕ್ ದೀನಾತ್ಲ್ಲೊ. ತಾಚ್ಯಾ ಚ್ಯಾರ್ಯ್ ಭುರ್ಗ್ಯಾಂಚಾ ಪಾಂಯಾಥಳಾರ್ ಸಗ್ಳೆಂಚ್ ಆಸ್ಲ್ಲೆಂ. ತಾಂಚೆ ಮುಕಾರ್ ಕಸಲಿಚ್ ಭಂಧಡ್
ನಾತ್ಲ್ಲಿ.
ಶಬೀರ್ ಅಹ್ಮದಾನ್, ಮನ್ಶ್ಯಾಂ ಥಂಯ್ ದವರ್ಚೊ ಸಂಭಂಧ್ಯ್ ತಸಲೊಚ್! ತಾಕಾ ವಳ್ಕಾಲ್ಲೊ, ಕೊಣ್ಯ್ ತಾಕಾ ತಿತ್ಲ್ಯಾ ಸುಲಾಭಾಯೆನ್ ವಿಸ್ರಾನಾತ್ಲ್ಲೊ. ಉಲವ್ಣ್ಯಾಂತ್ ಮೊವಾಳ್, ಕರ್ನ್ಯಾನಿಂ ದಯಾಳ್, ಸಂಭಂಧಾಂತ್ ಥಿರ್, ಚಡ್ ಕರುನ್ ಮನ್ಶಾಪಣಾ ಖಾತಿರ್ ಜಿಯೆಂವ್ಚೊ, ಆನಿ ಜಾಗೊ ಆಸ್ಚೊ ಖಾಂಬೊ ತೊ!
ಆಲಿಯಾಚಿ ಆವಯ್ ಜಾಲ್ಯಾರ್ಯ್, ಮನ್ಶಾಪಣಾಕ್ ಕಾಂಯ್ ಸೊಡುನ್ ದೀನಾತ್ಲ್ಲಿ. ತಿಣೆಂ, ತಿಚ್ಯಾ ಜಿವಿತಾ ಭಾಯ್ಲೊ ಸಂಸಾರ್ ಪಳೆಲ್ಲೊ. ಚ್ಯಾರ್ ವೊಣೊದಿ ಭಿತರ್ ಬಸೊನ್, ಭಾಯ್ಲೆಂ ವಿಸ್ರೊಂಚಾಕ್ಯ್, ಚ್ಯಾರ್ ವೊಣೊದಿ ಭಾಯ್ರ್ ಆಯ್ಕೊಂವ್ಚಾ, ಹ್ಯಾ ಸಮಾಜೆಂತ್ಲ್ಯಾ ಅಬಲ್ ಚಲಿಯಾಂಚೆಂ ದೂಖ್ ಆಯ್ಕೊಂವ್ಚೆಂ ಪ್ರಯತ್ನ್ ತಿಣೆಂ ಕೆಲ್ಲೆಂ. ಹ್ಯಾಚ್ ಖಾತಿರ್ ತಿಕಾ, ತಿಣೆಂ ಜಿಯೆಂವ್ಚಾ ಸಮಾಜೆಂತ್ ಏಕ್ ನಾಂವ್ ಆಸ್ಲ್ಲೆಂ.
"ಮನ್ಶಾಕ್ ಫುಲಾಂಚಾ ಹಾರಾನಿಂ, ಹೆರಾಂ ಮಧೆಂ ನೆಟವ್ನ್ ರಾವೊಂಕ್ ಜಾಯ್ ಮ್ಹಳ್ಳಿ ಆಶಾ ಆಸ್ಚಿ ಸಹಜ್. ಪುಣ್, ಹಿ ಆಶಾ ಕೊಣಾಯ್ಚಾ ಭಾಗಿಂತ್ಲಿಂ ಫುಲಾಂ ಹುಮ್ಟುನ್ ಕಾಡುನ್, ತ್ಯಾ ಆಶೆಕ್ ಭಾಗಂವ್ಚಿ ಖಂಡಿತ್ ಚೂಕ್!"
ಆಲಿಯಾಚಾ ಆಜೆನ್ ಸಾಂಗ್ಚಿಂ ಉತ್ರಾಂ, ತರ್ನ್ಯಾ ಭುರ್ಗ್ಯಾಂಚಾ ಕಾಳ್ಜಾಂತ್, ಮನ್ಶ್ಯಾನ್ ಮನ್ಶ್ಯಾಕ್ ಮಾನ್ ದಿಂವ್ಚೊ ಚಡ್ ಗರ್ಜೆಚೊ ಮ್ಹಳ್ಳೆಂ ಪಾಚಾರ್ತಾಲಿಂ.
ಆಲಿಯಾಕ್ ಜಾಂವ್, ಯಾ ತಾಚ್ಯಾ ಭಾವಾಂಕ್ ಆನಿ ತಾಚ್ಯಾ ಭಯ್ಣಿಕ್ ಜಾಂವ್, ತಾಣಿಂ ಜಿಯೆಂವ್ಚಾ ಸಮಾಜೆಂತ್, ತಾಂಚಾ ಆವಯ್ನ್ ಯಾ ಬಾಪಾಯ್ನ್ ಜಾಂವ್ ಕಾಂಯ್ ಅಡ್ಕಳ್ ಹಾಡ್ಲ್ಲಿ ನಾ. ಸಮಾಜೆಂತ್ ಜಾಂವ್ ಯಾ ಇಸ್ಕೊಲಾಂತ್ ಜಾಂವ್, ತಾಣಿಂ ಜಿಯೆಂವ್ಚಾ ಪರಿಸರಾಂತ್ ಜಾಂವ್ ಯಾ ಇಷ್ಟಾಂ ಮಂತ್ರಾಂ ಮಧೆಂ ಜಾಂವ್, ಮನ್ಶ್ಯಾಕ್ ಮನಿಸ್ ಮ್ಹಳ್ಳ್ಯಾ ಪರಿಂ ತಾಂಕಾ ವಳ್ಕೊಂಕ್ ಶಿಕಯಿಲ್ಲೆಂ ಶಿವಾಯ್ ಕಸೊಲೊಚ್ ಭೇದ್ ಭಾವ್ ಜಾಂವ್, ಯಾ ಜಾತ್ ಕಾತ್ ಜಾಂವ್, ತಾಂಚಾ ಜಿವಿತಾಚಾ ಉಪದೆಸಾಂ ಮಧೆಂ ಅಡ್ಕಳ್ ಜಾವ್ನ್ ಆಯಿಲ್ಲಿ
ನಾ.
ಅಡ್ಕಳ್ ಜಾವ್ನ್ ಆಯಿಲ್ಲೊ ಎಕ್ಚ್ ಏಕ್ ವಿಶಯ್ ಮ್ಹಳ್ಯಾರ್, ಆಲಿಯಾಚಿ ’ಆಶಾ’!. ಎಕೇಕ್ ಪಾವ್ಟಿಂ, ಹಿಚ್ಚ್ ಆಶಾ, ಜಿವಿತಾಚಾ ದಿಶೆಕ್ ದೆಸ್ವಾಟ್ ಕರುಂಕ್ ಪಾವ್ತಾ.
"ಅಬ್ಬೂ...., ಹಾಂವ್ ತ್ಯಾ ವಿಮಾನಾರ್ ಉಭೊಂಕ್ ಆಶೆತಾಂ!" ಆಪ್ಲ್ಯಾ, ನೆಂಟುಲ್ಯಾ ಜಲ್ಮಾ ಥಾವ್ನ್, ಆಲಿಯಾಕ್ ಕಿತ್ಯಾಕ್ಗೀ ತ್ಯಾ ವಿಮಾನಾರ್ ಉಬ್ಚಿ ಆಶಾ. ಹಾಕಾ ಕಾರಾಣ್ಯ್ ಆಸ್ಲ್ಲೆಂ. ನಾಗ್ಪುರ್ ಥಾವ್ನ್ ಶಬೀರ್ ಅಹ್ಮದ್ ಮುಂಬಯಿ ಯೆತಾನಾ, ವ್ಹಡ್ಲ್ಯಾ ಪಯ್ಶಾಂಚಿ ಕಾಂಯ್ ಥೈಲಿ ಘೆವ್ನ್ ಯೇಂವ್ಕ್ ನಾತ್ಲ್ಲೊ. ಪುಣ್, ತೊ ತಾಚ್ಯಾ ನಶೀಬಾಕ್ ಮಾತ್ರ್ ಆಪ್ಲ್ಯಾ ಬಗ್ಲೆಕ್ ಘೆವ್ನ್ ಆಯಿಲ್ಲೊ. ಹ್ಯಾ ನಶೀಬಾನ್ಯ್ ಶಬೀರಾಕ್ ಬರೊಚ್ ಸಾಂಗಾತ್ ದಿಲೊ. ಶಬೀರ್ ತರ್ಯ್ ಹ್ಯಾ ನಶೀಬಾಕ್ ಆಪ್ಲಿ ಬಾಯ್ಲ್ಚ್ ಕಾರಾಣ್ ಮ್ಹಣೊನ್ ಉಗ್ತ್ಯಾನ್ ಸಾಂಗ್ತಾಲೊ. ಕಾರಾಣ್, ಶಬೀರಾಚಿ ಬಾಯ್ಲ್ ಸಾರಾ, ತಾಚಾ ಜಿವಿತಾಂತ್ ಆಯಿಲ್ಲ್ಯಾ ದಿಸಾ ಥಾವ್ನ್ ಸವ್ಕಾಸ್ ಶಬೀರಾಚೆಂ ಜಿವಿತ್ಚ್ ಬದ್ಲೊಂಕ್
ಲಾಗ್ಲ್ಲೆಂ.
ಶಬೀರ್, ನಾಗ್ಪುರ್ ಥಾವ್ನ್ ಮುಂಬಯಿ ಯೆತಾನಾ, ಆಪ್ಲ್ಯಾ ಬಾಯ್ಲೆಕ್ ಆನಿ ಬಾಯ್ಲೆಚಾ ಉದರಾಂತ್, ತಾಂಚಾ ಮೊಗಾಚಾ ಪಯ್ಲ್ಯಾ ಫಳಾಕ್, ಅಕ್ಬರಾಕ್ ಆನಿ ಆಪ್ಲ್ಯಾ ಆವಯ್ಕ್ ಮಾತ್ರ್ ಘೆವ್ನ್ ಆಯಿಲ್ಲೊ.
ಶಬೀರಾಚೊ ಬಾಪಯ್, ಶಬೀರ್ ಮುಂಬಯಿ ಯೆಂವ್ಚಾ ಪಾಂಚ್ ವರ್ಸಾಂ ಪಯ್ಲೆಂ ಸಂಸಾರ್ ಸಾಂಡುನ್ ವೆತಾನಾ, ಪುತಾಕ್ ತಾಣೆಂ ವ್ಹಡ್ಲಿ ಕಾಂಯ್ ಆಸ್ತ್ ಭಧಿಕ್ ಪಾಟಿಂ ಸೊಡುಂಕ್ ನಾತ್ಲ್ಲಿ ಜಾಲ್ಯಾರ್ಯ್, ಪುತಾಕ್ ಬರೆಂ ಶಿಕಾಪ್ ಮಾತ್ರ್ ದಿಲ್ಲೆಂ. ಆತಾಂ, ಶಬೀರಾಕ್ ತಾಚ್ಯಾ ಮುಕ್ಲ್ಯಾ ಜಿವಿತಾಂತ್, ಹೆಂಚ್ ಶಿಕಾಪ್ ಆಧಾರ್ ಜಾವ್ನ್ ಯೇಂವ್ಕ್ ಜಾಯ್ ಆಸ್ಲ್ಲೆಂ.
"ಶಿಕಾಪ್ ಮಾಡಾಮುಳಾಂತ್ ಪುರ್ಲೆಂಲೆ ದಿರ್ವೆಂ. ಕಿತ್ಲೆಂ ಉಸ್ತುನ್ ಈಟ್ ಗಾಲ್ತಾಯ್ ತಿತ್ಲೆಂ ಚಡ್ ಫಳ್ ದೀಂವ್ಕ್ ಸಕ್ತಾ!" ಆತಾಂ, ಹೆಂಚ್ ಶಿಕಾಪ್ ಶಬೀರಾಚಾ ಕುಟ್ಮಾಂತ್ ಸುಖಾಚೊ ಫಳ್ ದೀಂವ್ಕ್ ತಯಾರ್ ಜಾಲ್ಲೆಂ. ಹ್ಯಾಚ್ ಫಳಾಕ್ ಸೊಧುನ್, ಸಭಾರ್ ಆಪ್ಲ್ಯಾ ಜಲ್ಮಾ ಗಾಂವಾಕ್ ಸೊಡುನ್ ಮುಂಬಯಿಕ್ ಬರೊ ಫುಡಾರ್ ಸೊದುನ್ ಯೆತಾತ್ ತಶೆಂ, ಶಬೀರ್ಯ್ ಮುಂಬಯಿ ಆಯಿಲ್ಲೊ. ಮುಂಬಯಿ ಗಾಂವ್ಚೆಂ ಕಾಳಿಜ್ಯ್ ಉದಾರ್, ತಶೆಂ, ಸಗ್ಳ್ಯಾಂ ಸಾಂಗಾತಾ ಮುಂಬಯಿನ್ ಶಬೀರಾಕ್ಯ್ ಆಪ್ಲ್ಯಾ ವೆಂಗೆಂತ್ ಮಯ್ಪಸಾನ್ ಘೆತ್ಲೆಂ.
***************
"ಮುಂಬಯಿ ಶ್ಹೆರ್!"
ಹೆಂ ಶ್ಹೆರ್ ಮನ್ಶ್ಯಾಕ್ ಧಾಂವೊಂಕ್ ಶಿಕಯ್ತಾ. ಆಳ್ಸಾಯೆನ್ ಗೊರೆತೆಲ್ಯಾಂಕ್ ಮಾರುನ್ ಉಟಯ್ತಾ. ಮುಂಬಯಿ ಶ್ಹೆರಾಚೊ ಮೋಗ್ ಕರ್ತೆಲ್ಯಾಂಕ್, ಹಾಂಗಾಸರ್ ದಿಸಾಂದೀಸ್ ಧಾವೊಂಕ್ ಪಡ್ತಾ. ಹೆಂ ಶ್ಹೆರ್ಯ್, ಧಾಂವ್ತೆಲ್ಯಾಂಚ್ಯಾ ಕುಶಿಂನ್ ಚಡ್ಚ್ ಮಾಲ್ವಾತಾ. ತಶೆಂಚ್, ಶಬೀರ್, ಪಯ್ಲೆ ಪಾವ್ಟಿಂ ಮುಂಬಯಿ ಆಯಿಲ್ಲೊ, ಹ್ಯಾ ಶ್ಹೆರಾಚಾ ಗಡ್ದೆ ಸಾಂಗಾತಾ ತಾಣೆಂಯ್ ಧಾಂವ್
ಧರ್ಲ್ಲಿ.
ಹಾಂಗಾಸರ್, ಜಿವಿತ್ಚ್ ಏಕ್ ಧಾಂವ್ಣಿ! ಪಾಟಿಂ, ಫುಡೆಂ, ಹೆಂವ್ಶಿ, ತೆವ್ಶಿಂ..... ಕೊಣಾಯ್ಕ್ಯ್ ತಿಳುನ್ ಪಳಂವ್ಕ್ ಸಾದ್ಯ್ ನಾತ್ಲ್ಲೆಂ. ಕೊಣ್ಯ್ ತಿಳುನ್ ಬಸ್ಲೊ ಜಾಲ್ಯಾರ್, ತೊ ಪಾಟಿಂ ತೊ ಉರ್ಲೊ. ತಾಚ್ಯಾ ಜಿವಿತಾಚಾ ಧಾಂವ್ಣೆಂತ್, ತೊ ಪಾಟಿಂ ಉರ್ಲೊ ಆನಿ ತಾಚ್ಯೆ ಸಾಂಗಾತಿ, ತಾಚ್ಯೆ ಥಾವ್ನ್ ಮಸ್ತ್ ಪಯ್ಸ್ ಪಯ್ಸ್ ಪಾವೊನ್ ಜಾತಾಲೆ. ಹ್ಯಾಚ್ ಖಾತಿರ್, ಹ್ಯಾ ಮುಂಬಯಿ ಶ್ಹೆರಾಂತ್, ಕೊಣ್ಯ್ ರೊವಾಣೆಕ್ ಬಸ್ಲೆಲ್ಯಾ ಕೊಂಬಿಯೆ ಪರಿಂ ಕುರ್ವೊನ್ ಬಸಾನಾತ್ಲ್ಲೊ. ಆಶೆಂ ಶಬೀರ್ ಅಹ್ಮದಾಕ್ಯ್ ಮುಂಬಯಿ ಆಯಿಲ್ಲ್ಯಾ ದಿಸಾ ಥಾವ್ನ್ ಧಾವೊಂಕ್ ಪಡ್ಲ್ಲೆಂ.
ಧಾಂವೊಂಕ್ ಪಡ್ಲ್ಲೆಂ ಮ್ಹಣ್ಚಾಕ್ಯ್ ತಾಚಿ ಪರಿಸ್ಥಿತಿ ತಾಕಾ ಧಾಂವ್ಡಾಯ್ತಾಲಿ. ಮುಂಬಯಿ ಯೇವ್ನ್ ಹರ್ಯೇಕ್ಲೊ ಗ್ರೇಸ್ತ್ ಜಾಂವ್ಚಾ ಪರಿಂ, ಆಪುಣ್ಯ್ ಏಕ್ ದೀಸ್ ಗ್ರೇಸ್ತ್ ಜಾಂವ್ಕ್ ಜಾಯ್. ಆಪ್ಣಾ ಲಾಗಿಂಯ್ ಬರ್ಪೂರ್ ಪಯ್ಶೆ ಜಮೊ ಜಾಂವ್ಕ್ ಜಾಯ್ ಮ್ಹಣೊನ್ ಶಬೀರ್ಯ್ ಆಶೆಲ್ಲೊ.
ಆಶಾ ಆನಿ ದಿಶಾ, ಎಕಾಚ್ ವಾಟೆ ವಯ್ಲಿಂ ಮೆಟಾಂ ಜಾವ್ನ್ ಸಾಂಗಾತ್ ದಿತಾನಾ, ಜಿವಿತ್ಯ್ ಅಪಾಪಿಂಚ್ ಪುಲ್ತಾ ತಶೆಂ, ಶಬೀರಾಕ್ ತಾಚಾ ಆಶೆನ್ ಆನಿ ದಿಶೆನ್ ಸಾಂಗಾತ್ ದಿಲ್ಲೊ.
"ಬೇಟಾ...., ತುಂ, ಏಕ್ ಮನಿಸ್ ಜಾವ್ನ್ ಮನ್ಶ್ಯಾಂಕ್ ವಳ್ಕಾಶಿ ಜಾಲ್ಯಾರ್, ಏಕ್ ದೀಸ್, ಸಗ್ಳೊ ಸಂಸಾರ್ ತುಕಾ ವಳ್ಕಾತಲೊ!"
ಶಬೀರಾಚಿ ಆವಯ್ ಕೆದಾಳಾಯ್ ಪುತಾಕ್ ಮನ್ಶ್ಯಾಪಣಾಚೆಂ ಲಿಸಾಂವ್ ಶಿಕಯ್ತಾಲಿ. ಹ್ಯಾಚ್ ಖಾತಿರ್, ಮನ್ಶ್ಯಾಂಕ್ ವಳ್ಕೊಂಚಾ ಮನ್ಶ್ಯಾಂ ವಯ್ರ್, ದೆವಾನ್ಯ್ ದಾರಾಳ್ ಆಶೀರ್ವಾದಾಂ
ವೊತ್ಲ್ಲಿಂ.
ಮುಂಬಯಿ ಶ್ಹೆರಾಂತ್ ದಿಸಾ ವಯ್ರ್ ದೀಸ್ ಧಾಂವ್ತಾನಾ, ಶಬೀರ್ ಅಹ್ಮದ್ ಆಪ್ಲ್ಯಾ ಜಿವಿತಾಂತ್ ಯಶಸ್ವಿ ಜಾಲ್ಲೊ. ಚ್ಯಾರ್ ಜಣಾಂ ಭುರ್ಗ್ಯಾಂಚೊ ಬಾಪಯ್ ತೊ ಜಾತಾನಾ, ಪಯ್ಶಾಂಚಾ ಭಳಾಂತ್ಯ್ ತೊ ಸಾದಾರ್ಣಾಕ್ ಭಲಿಷ್ಟ್ಚ್ ಜಾಲ್ಲೊ.
ಜಾಂವ್ಕ್ ಪುರೊ ಹೆಂ ಭಳ್ ಆಪ್ಣಾಂವ್ಕ್, ತಾಕಾ, ಸಭಾರ್ ರಾತಿ ಜಾಗೆಂ ರಾವೊಂಕ್ ಪಡ್ಲ್ಲೆಂ. ಸಭಾರ್ ದಪ್ತರಾಂ ಬದ್ಲಿ ಕರುಂಕ್ ಪಡ್ಲ್ಲೆಂ. ಜಿವಿತಾಚಾ ಧಾಂವ್ಣೆಂತ್, ಹೆಂ ಖಂಡಿತ್ ಗರ್ಜೆಚೆಂ ಮ್ಹಣೊನ್ ಶಬೀರ್ ಜಾಣಾಂ ಆಸ್ಲ್ಲೊ. ಎಕಾ ದಪ್ತಾರಾ ಥಾವ್ನ್ ಎಕಾ ದಪ್ತರಾಕ್ ಉಡ್ಲ್ಯಾರ್ ಮಾತ್ರ್ ಆಪ್ಲ್ಯಾ ಜಿವಿತಾಚಾ ಉಂಚಾಯೆಚಿಂ ಮೆಟಾಂ ಚಡ್ಯೆತ್ ಮ್ಹಣೊನ್ ತೊ ಪಯ್ಲೊಚ್ ಸಮ್ಜಾಲ್ಲೊ.
"ಆಲಿಯಾ.....! ತುಕಾ ಆತಾಂ ಸಮ್ಜೊಂಚಿ ಪ್ರಾಯ್ ನ್ಹಯ್ ಪುತಾ. ಆಳೆ ಹಾಂಗಾ ಆಯ್ಕ್......!"
ಶಬೀರ್ ಆಪ್ಲ್ಯಾ ಧುವೆಕ್ ವೆಂಗೆಂತ್ ಆರಾವ್ನ್, ತಾಚ್ಯಾ ಕಪಾಲಾಕ್ ಉಮೊ ದಿವ್ನ್ ತಾಕಾ ಭುಜಯ್ತಾಲೊ. ಆಪ್ಲ್ಯಾ ಭುರ್ಗ್ಯಾಂಕ್, ಸಗ್ಳ್ಯಾಂಕ್ಯ್ ಎಕಾಚ್ ಮಾಪಾನ್ ತೊ ಮೋಗ್ ದಿತಾಲೊ ಜಾಲ್ಯಾರ್ಯ್, ಆಪ್ಲ್ಯಾ ಪಯ್ಲ್ಯಾ ಧುವೆಕ್ ಕಿತ್ಯಾಕ್ಗೀ ಚಡ್ಚ್ ಮೊಗಾನ್ ಪಳೆತಾಲೊ.
ಜಾಂವ್ಕ್ ಪುರೊ ಬಾಪಾಂಯ್ಕ್ ಆಪ್ಲ್ಯಾ ಧುವಾಂಚೆರ್ ಮೋಗ್ ಚಡ್ ಆಸ್ತಾ. ಪುಣ್, ಆಲಿಯಾ ಥಂಯ್ ಮಾತ್ರ್ ಬಾಪಾಯ್ಕ್ ಏಕ್ ವಿಶೇಷ್ ಆಕರ್ಶಣ್ ಆಸ್ಲ್ಲೆಂ. ಹ್ಯಾಚ್ ಕಾರಾಣಾಕ್ ಲಾಗೊನ್, ಸಭಾರ್ ಪಾವ್ಟಿಂ ಶಬೀರಾಚಾ ಘರಾಂತ್ ನಾ ಸಮಾದಾನ್ಯ್ ಉದೆವ್ನ್ ವೆತಾಲೆಂ.
"ಶಬೀರ್....? ಭುರ್ಗ್ಯಾಂ ಮಧೆಂ, ಆನಿ, ತುಕಾ ಆನಿ ತುಜ್ಯಾ ಬಾಯ್ಲೆ ಮಧೆಂ, ಕೆದ್ನಾಂಚ್ ತಪಾವತ್ ಕರ್ಚೊ ನ್ಹಯ್. ಹೆಂ ಅಲ್ಲಾಕ್ಯ್ ಬರೆಂ ದಿಸಾನಾ. ಮೋಗ್ ಮ್ಹಳ್ಯಾರ್ ತಾಚ್ಯಾ ನದ್ರೆಂತ್ ಎಕ್ಚ್! ತಶೆಂ ಆಸ್ತಾನಾ ಮೊಗಾಂತ್ ತಪಾವತ್
ಕರಿನಾಕಾ!"
ಶಬೀರ್, ಎಕೇಕ್ ಪಾವ್ಟಿಂ ಆಪ್ಲ್ಯಾ ಧುವೆಕ್ ಚಡ್ ವಯ್ರ್ ದವರ್ತಾನಾ, ತಾಚಿ ಆವಯ್ ತಾಕಾ ಬೂದ್ಬಾಳ್ ಸಾಂಗ್ತಾಲಿ. ಶಬೀರ್ ತರ್ಯ್ ಆವಯ್ಚಾ ಉತ್ರಾಂಕ್ ಯಾ ಬಾಯ್ಲೆಚಾ ಸಲಹಾಂಕ್ ಹಾಸೊನ್ ಹಾಸೊನ್ ಪಯ್ಸ್ ಲೊಟ್ತಾಲೊ, ಆನಿ ಪರ್ತ್ಯಾಕ್ ಆಪ್ಲ್ಯಾ ಧುವೆ ಸಾಂಗಾತಾ ತಶೆಂಚ್ ಪಯ್ಲೆಂಚಾ ಪರಿಂಚ್ ಆಸ್ತಾಲೊ.
ಹ್ಯಾಚ್ ಕಾರಾಣಾಕ್ ಲಾಗೊನ್, ಯಾ, ಆಪ್ಲ್ಯಾ ಜಲ್ಮಾಚಾ ಸ್ವಭಾವಾನ್, ಆಲಿಯಾ ಮಾತ್ರ್ ತಿಕ್ಕೆ ಹಟ್ಟಿ ಸ್ವಭಾವಾಚೆಂ ಜಾಲ್ಲೆಂ. ಆಪ್ಣೆಂ ವಿಚಾರ್ಲ್ಲೆಂ ತಾಕಾ ಜಾಯ್ ಆಸ್ಲ್ಲೆಂ. ವ್ಹಡ್ಲ್ಯಾ ಭಾವಾ ಅಕ್ಬರ್, ಆನಿ ದಾಕ್ಟ್ಯಾ ಭಾವಾ ಸಲೀಮಾ ಪರಿಂ ತೆಂ ಭಿಲ್ಕುಲ್ ನಾತ್ಲ್ಲೆಂ. ಆಲಿಯಾಚಾ ಹಟ್ಟಿ ಸ್ವಭಾವಾನ್, ದೀಸ್ಭರ್ ತಾಚ್ಯೆ ಸಂಗಿಂ ಆಸ್ಚಾ, ತಾಚ್ಯಾ ಆವಯ್ಚಾ ಪ್ರಾಸ್, ಸಾಂಜೆಚಾ ವೆಳಾರ್ ಆಫೀಸಾ ಥಾವ್ನ್ ಘರಾ ಯೆಂವ್ಚಾ ತಾಚ್ಯಾ ಬಾಪಾಯ್ ಸಂಗಿಂ, ಚಡ್ ಸಂಭಂಧ್ ಜೊಡ್ಲ್ಲೊ.
ಶಬೀರಾಕ್ಯ್ ದುಸ್ರೊ ಕಾಂಯ್ ಉಪಾಯ್ ನಾತ್ಲ್ಲೊ. ಆಪ್ಲ್ಯಾ ಹಟ್ಟಾನ್ ಧನ್ಫರಾಂ ಜೆವ್ತಾನಾ ಆವಯ್ಚಾ ಹಾತಾಂತ್ಲೆ ಖೆಲ್ಲೆ ಮಾರ್, ಆಪ್ಣೆಂ ದಾರಾಚಾ ಕೊನ್ಶಾಕ್ ಬಸೊನ್ ರಡೊನ್ ಕಾಡ್ಲ್ಲಿಂ ವೊರಾಂ, ಆಪ್ಲ್ಯಾ ಆಜಿಯೆನ್ ಬೂದ್ಬಾಳ್ ಸಾಂಗೊಂಕ್ ಕೆಲ್ಲೆಂ ಪ್ರಯತ್ನ್, ತಾಚ್ಯಾ ವಯ್ಲ್ಯಾನ್ ಆಪ್ಲ್ಯಾ ಭಾವಾಂಚಿಂ ದೂರಾಂ, ಆಲಿಯಾ ಬಾಪಾಯ್ಚಾ ಉಸ್ಕ್ಯಾರ್ ಬಸೊನ್ ರಡೊನ್ ಸಾಂಗ್ತಾನಾ, ಆಪ್ಲ್ಯಾ ಧುವೆಕ್ ಸಮಾಧಾನ್ ಕರುಂಕ್ ತಾಚಿ ಪಾಡ್ತ್ ಘೆನಾಸ್ತಾನಾ ಶಬೀರಾಕ್ ದುಸ್ರಿ ವಾಟ್ ನಾತ್ಲ್ಲಿ.
ತೊ ಕರ್ತಲೊ ತರ್ಯ್ ಕಿತೆಂ? ಧುವೆಕ್ ಸಮಾಧಾನ್ ಕರುಂಕ್ ಧುವೆನ್ ಸಾಂಗ್ಲ್ಲ್ಯಾ ಪರಿಂ ಚಲ್ತಾಲೊ.
"ಆಲಿಯಾ ಆತಾಂ ಭುರ್ಗೆಂ ಅಮ್ಮೀ....! ತಾಕಾ ಜಾಣ್ವಾಯ್ ಯೆತಾನಾ ಸಗ್ಳೆಂ ತೆಂ ಸಮ್ಜಾತೆಲೆಂ. ತುಂ ಬೆಷ್ಟೆಂ ಪುರ್ಪುರ್ನಾಕಾ. ಸಗ್ಳಿಂ ಭುರ್ಗಿಂ ಎಕಾಚ್ ರಿತಿರ್ ಆಸ್ತಾತ್? ತುಮ್ಕಾಂ ಸಮ್ಜಾನಾ
ಕಿತ್ಯಾಕ್?"
ಶಬೀರ್ ಆಪ್ಲ್ಯಾ ಆವಯ್ಕ್ ಸಮ್ಜಾಯ್ತಾಲೊ.
"ತುಂ, ಆಶೆಂಚ್ ತಾಕಾ ಭುರ್ಗೆಂ ಭುರ್ಗೆಂ ಮ್ಹಣೊನ್ ವಯ್ರ್ ದವರ್. ಅಕ್ಬರ್ ಆನಿ ಸಲೀಮ್ ತಾಚ್ಯೆ ಪರಿಂ ಭುರ್ಗಿಂ ನ್ಹಯ್? ತಿಂಯ್ ತಶೆಂಚ್ ಕರ್ತಾತ್? ತುಂ ತಾಕಾ ಚಡ್ ಮಾತ್ಯಾರ್ ದವರ್ತಾಯ್. ತಾಚ್ಯಾ ಪಾಟ್ಲ್ಯಾನ್ ಹೆಂ ರಝಿಯಾ ಆಸಾ, ತಾಚೆಂ ಕಾಂಯ್ ಪಡೊನ್ ಗೆಲಾಂ ತುಕಾ?
ಎಕಾ ಕುಶಿಂನ್, ಆಪ್ಲಿ ಬಾಯ್ಲ್ ಸಾರಾ ಪಾಸೊನ್ ಹ್ಯಾ ಆಲಿಯಾಕ್ ಲಾಗೊನ್ ಜಗಡ್ತಾಲಿ.
ಕಿತೆಂ ಜಾಲ್ಯಾರ್ಯ್, ಮೋಗ್, ಜಗ್ಡೆಂ ಆನಿ ರಾಗ್ ಮ್ಹಣೊನ್, ಶಬೀರಾಚೆಂ ಕುಟಾಮ್ ಮಾತ್ರ್ ಬರೆಂ ಚಲ್ತಾಲೆಂ. ತಶೆಂಯ್ ಮೊಗಾಂತ್ ಮಾತ್ರ್ ರಾಗ್ ಯೆತಾ ನ್ಹಯ್ ಆಸ್ತಾಂ, ಮೋಗ್ ನಾ ಜಾಲ್ಯಾರ್ ರಾಗ್ ಖಂಯ್ ಥಾವ್ನ್ ಯೆತಾ? ಹೆಂ ಆಲಿಯಾಚಿಂ ಆವಯ್ ಬಾಪಯ್ ಸಾರ್ಕಿಂ ಜಾಣಾಂ ಆಸ್ಲ್ಲಿಂ.
ತಶೆಂ ಚೆಡ್ವಾಕ್ ಚಲಿಯೆಪಣ್ ಭರ್ತಾನಾ, ತಾಚೆ ತೆ ಜಲ್ಮಾಗೂಣ್, ಸಗ್ಳೆ ತಾಕಾ ಆಪಾಪಿಂಚ್ ಸೊಡುನ್ ವೆತಾತ್ ಮ್ಹಳ್ಳೆಂ ಆಲಿಯಾಚಿ ಆವಯ್ ಸಾರಾ ಸಾರ್ಕೆಂ ಜಾಣಾಂ ಆಸ್ಲ್ಲಿ. ಕಿತ್ಲೆಂ ಮ್ಹಳ್ಯಾರ್ಯ್ ತಿಯ್ ಏಕ್ ಚೆಡುಂ ಜಾವ್ನ್ಚ್ ಚಲಿ ಜಾಲ್ಲಿ. ತಿಚ್ಯಾ ಜಿವಿತಾಂತ್ಲ್ಯಾ, ತ್ಯಾ ತ್ಯಾ ಪ್ರಾಯೆಚಾ ಹಂತಾರ್ ತಿಚ್ಯಾ ಗೂಣಾಂನಿಂ, ತಿಚ್ಯಾ ಸ್ವಭಾವಾನಿಂ, ಜಾಲ್ಲಿ ಬದ್ಲಾವಣ್ ತಿಕಾ ಕಳಿತ್ ಆಸಾ. ಹೆಂಚ್ ಏಕ್ ಚಿಂತಾಪ್ ತಿಕಾ ಸಮಾಧಾನ್
ದಿತಾಲೆಂ.
ಪುಣ್, ಆಲಿಯಾ ಮಾತ್ರ್, ಬಾಪಾಯ್ನ್ ದಾಖಯಿಲ್ಲ್ಯಾ ವಿಶೇಷ್ ಮೊಗಾಚಾ ಪರಿಣಾಮಾ ವರ್ವಿಂ, ಚಡ್ ಬಾಪಾಯ್ಚಾ ಕುಶಿಂನ್ಚ್ ಮಾಲ್ವಾತಾಲೆಂ. ಬಾಪಯ್ಚ್ ತಾಕಾ ಸರ್ವಸ್ವ್ ಮ್ಹಳ್ಳ್ಯಾ ಪರಿಂ. ಹ್ಯಾಚ್ ಖಾತಿರ್, ತೆಂ ಬಾಪಯ್ ಲಾಗಿಂ ಚಡ್ ಸಳ್ಗೆರ್ ಆಸ್ಲ್ಲೆಂ. ಆಪ್ಲ್ಯಾ ಭಾಂವ್ಡಾಂ ಸಂಗಿಂ ಜಾಲ್ಯಾರ್ಯ್ ಆಲಿಯಾ ತಿತ್ಲೆಂ ವಿಶೇಷ್ ಭರ್ಸಾನಾತ್ಲ್ಲೆಂ.
ಆಪ್ಲೆಂ ಇಸ್ಕೊಲ್ ಜಾಲೆಂ ಆಪ್ಣಾಚೆ ಲಿಸಾಂವ್ ಜಾಲೆಂ! ಉಪ್ರಾಂತ್ಲೊ ವೇಳ್ ಆಲಿಯಾ ಟಿ.ವಿ ಚಾ ಮುಕಾರ್ ಬಸೊನ್, ತಿಂ ರಂಗ್ ರಂಗೀನ್ ಕಾರ್ಟೂನಾ ಪಳವ್ನ್ ಪಾಶಾರ್ ಕರ್ತಾಲೆಂ. ತಾಣೆಂ ಕಾರ್ಟೂನ್ ಪಳಂವ್ಚಾ ವಗ್ತಾರ್, ಕೊಣೆಂಯ್ ಟಿ. ವಿ. ಂತ್ ದುಸ್ರೆಂ ಕಾಂಯ್ ಪಳಂವ್ಕ್ ಸಾದ್ಯ್ ನಾತ್ಲ್ಲೆಂ. ಆಪ್ಣಾಕ್ ಜಾಯ್ ಜಾಲ್ಲೆಂ ತೆಂ ಜಾಯ್ಜಯ್ ಮ್ಹಳ್ಳ್ಯಾ ಪರಿಂ!
ಅಕ್ಬರಾಕ್ ಟಿ.ವಿ. ವಯ್ಲಿಂ ಕಾರ್ಟೂನಾ ಭಿಲ್ಕುಲ್ ಪಸಂದ್ ಜಾಯ್ನಾತ್ಲ್ಲಿಂ. ತೊ ಆಜಿಯೆ ಸಾಂಗಾತಾ ಬಸೊನ್ ಮನ್ಜಾತಿಂಕ್ ಟಿ.ವಿ. ಚೆರ್ ಸೊಧ್ತಾಲೊ. ಟಿ.ವಿ.ಚೆರ್ ಯೆಂವ್ಚಾ ಮನ್ಜಾತಿಂಚಿಂ ಸ್ಟಿಕ್ಕರಾಂ, ಬಾಪಯ್ ಸಾಂಗಾತಾ ಬಾಜಾರಾಂತ್ ವಚೊನ್ ಸೊಧುನ್ ಹಾಡ್ತಾಲೊ, ಆನಿ ಆಪ್ಲ್ಯಾ ಆಲ್ಬಮಾಂತ್ ಚಿಡ್ಕಾಯ್ತಾಲೊ. ಉಪ್ರಾಂತ್, ಆಪ್ಲ್ಯಾ ಭಾವಾಕ್ ಆನಿ ರಝಿಯಾಕ್ ತೊ ಆಲ್ಬಮ್ ದಾಖವ್ನ್ ಖುಶಿ ಪಾವ್ತಾಲೊ.
ಕಾರ್ಟೂನಾಂಕ್ ಆನಿ ಮನ್ಜಾತಿಂಕ್ ಲಾಗೊನ್, ಸಭಾರ್ ಪಾವ್ಟಿಂ ಘರಾಂತ್ ಭುರ್ಗ್ಯಾಂ ಮಧೆಂ ಜಗ್ಡೆಂ ಜಾತಾನಾ, ಸಲೀಮ್ ಆನಿ ರಝಿಯಾ ಅಕ್ಬರಾಚಾ ಕುಶಿಂನ್ಚ್ ಆಸ್ತಾಲಿಂ. ಆಲಿಯಾ ಬಾವ್ಡೆಂ ಎಕ್ಸುರೆಂ ಜಾವ್ನ್ ಸಲ್ವಾಲ್ಯಾರ್ಯ್, ಆಪ್ಲ್ಯಾ ಸಲ್ವಣೆಕ್ ತೆಂ ಮಾಂದುನ್ ಘೆನಾತ್ಲ್ಲೆಂ. ತಾಚೆಂ ಹಟ್ಟ್ ಜಾಣಾಂ ಆಸ್ಲ್ಲೊ ಅಕ್ಬರ್, ಅಪುಣ್ಚ್ ಆವಯ್ಚಾ ಉತ್ರಾಕ್ ಖಲ್ತಿಮಾನ್ ಘಾಲುನ್, ಆಪ್ಲೊ ಮನ್ಜಾತಿಂಚೊ ಆಲ್ಬಮ್ ಘೆವ್ನ್ ಆಜಿಯೆ ಸಾಂಗಾತಾ ವಚೊನ್ ಕುಜ್ನಾಂತ್ ಬಸ್ತಾಲೊ.
ಶಬೀರ್ಯ್ ಹ್ಯಾ ವಿಶಿಂ ಜಾಣಾಂ ಜಾತಾನಾ, ಆಶೆಂ ಜಾಲ್ಯಾರ್ ಭುರ್ಗ್ಯಾಂ ಮಧ್ಲ್ಯಾ ಸಂಭಂಧಾಕ್ ಮಾರೆಕಾರ್ ಮ್ಹಣೊನ್ ಚಿಂತುನ್, ಭುರ್ಗ್ಯಾನಿಂ ನಿದ್ಚಾ ಕುಡಾಂತ್ ಅನ್ಯೇಕ್ ಟಿ.ವಿ. ಘೆವ್ನ್ ಆಯ್ಲೊ.
ಹಾಚ್ಯೆ ಥಾವ್ನ್ ಭುರ್ಗ್ಯಾಂ ಮಧೆಂ ಸಮಧಾನ್ ಹಾಡುಂಕ್ ತಾಣೆಂ ಚಿಂತ್ಲೆಲೆಂ. ಪುಣ್, ಹೆಂ ತಾಚೆಂ ಚಿಂತಾಪ್ ಆಲಿಯಾಚಾ ಜಿವಿತಾಂತ್ ಬೊಲ್ತೆಂಚ್ ಪರಿಣಾಮ್ ಹಾಡುಂಕ್ ಪಾವ್ಲೆಂ. ಪಯ್ಲೆಂ, ಎಕಾ ಟಿ.ವಿ. ಖಾತಿರ್, ಘರಾಂತ್ ಭುರ್ಗ್ಯಾಂ ಮಧೆಂ ಝಗ್ಡೆಂ ತರ್ಯ್ ಜಾತಾಲೆಂ. ಆತಾಂ ಸಗ್ಳೆಂಚ್ ಭಂಧ್ ಜಾಲೆಂ. ಘರಾಂತ್ ದುಸ್ರಿ ಟಿ.ವಿ. ಆಯಿಲ್ಲ್ಯಾ ದಿಸಾ ಥಾವ್ನ್, ಆಲಿಯಾ ಸಂಪೂರ್ಣ್ ಎಕ್ಸುರೆಂ ಜಾಲೆಂ. ತಾಚ್ಯಾ ಹಟಾನ್ ಆನಿ ತಾಚ್ಯಾ ಸ್ವಭಾವಾನ್, ಟಿ.ವಿ. ಆನಿ ಆಲಿಯಾ ಮಧೆಂ ಮಾತ್ರ್ ಸಂಭಂಧ್ ರಚ್ಲೊ ಶಿವಾಯ್, ಆಲಿಯಾಚಾ ರಗ್ತಾ ಸಂಭಂಧಾ ಮಧೆಂ ಸಂಭಂಧ್ ರಚುಂಕ್ ಸಕೊಂಕ್ ನಾತ್ಲ್ಲ್ಯಾನ್, ಆಲಿಯಾ, ಚಲಿಯೆಪಣಾಚಾ ಪಯ್ಲ್ಯಾ ಪಾಂವ್ಡ್ಯಾಕ್ ಪಾವ್ತಾನಾ ಎಕ್ಸುರೆಂ ಜಾಲೆಂ.
ಚಲಿಯೆಪಣಾಚಾ ಪಯ್ಲ್ಯಾ ಪಾಂವ್ಡ್ಯಾರ್, ಲಜ್ ಆನಿ ಮಾನ್ಸುಗಿ, ಆಲಿಯಾಚಾ ಕುಡಿಂತ್ ಭರೊನ್ ಯೇಂವ್ಕ್ ಲಾಗ್ತಾನಾ, ಸವ್ಕಾಸ್, ತೆಂ ಆತಾಂ ಆಪ್ಲ್ಯಾ ಬಾಪಯ್ ಥಾವ್ನ್ಯ್ ಪಯ್ಸ್ ಜಾಲೆಂ. ಎದೊಳ್ ಪಾಸೊನ್, ಬಾಪಯ್, ಆಪ್ಲೊ ಬಾಪಯ್ ಜಾವ್ನಾಸ್ಲ್ಲೊ ತೊ, ಆತಾಂ ಆಲಿಯಾಕ್ ತೊ ಏಕ್ ಚಲೊ ಆನಿ ಆಪುಣ್ ಏಕ್ ಚಲಿ ಮ್ಹಳ್ಳೆಂ ಚಿಂತಾಪ್ ಉದೆಲೆಂ. ತ್ಯಾ ಶಿವಾಯ್, ಆತಾಂ ತಾಚ್ಯಾ ಕುಡಿಂತ್ ಭರೊನ್ ಯೆಂವ್ಚಾ ಅವ್ಯಕ್ತ್ ಭಗ್ಣಾಂ ಥಾವ್ನ್ ತಾಚ್ಯಾ ಮತಿಂತ್ ಜಾಂವ್ಚೆ ಆಟೆವಿಟೆ ತಾಕಾ ಚಲೊ ಆನಿ ಚಲಿಯೆ ಮಧ್ಲೊ ತಪಾವತ್ ಸಮ್ಜಾಂವ್ಕ್ ಲಾಗ್ತಾನಾ, ಆಲಿಯಾ ಅಪಾಪಿಂಚ್ ಬಾಪಾಯ್ಚಾ ಪಾಸ್ಳೆ ಥಾವ್ನ್ಯ್ ಪಯ್ಸ್ ಗೆಲೆಂ.
ಎಕ್ಸುರ್ಪಣಾಂತ್ ಸಾಂಗಾತ್ ದೀಂವ್ಕ್ ಆಪ್ಲಿಂ ಭಾಂವ್ಡಾಂ ನಾತ್ಲ್ಲಿಂ. ಕಾರಾಣ್....., ತಾಣೆಂಚ್ ತಾಂಚ್ಯಾ ಮಧ್ಲೊ ಸಂಭಂಧ್, ಆಪ್ಲ್ಯಾ ಹಟಾಚಾ ಅಧೀನ್ ಕೆಲ್ಲೊ. ಆವಯ್ ತರ್ಯ್, ಆಪ್ಣಾ ಸಂಗಿಂ ಆಸ್ಲ್ಲಿ ಜಾಲ್ಯಾರ್ಯ್, ಲ್ಹಾನ್ಪಣಾರ್ ಥಾವ್ನ್ ತಿಚೆ ಸಂಗಿಂ ರಝಿಯಾನ್ ದವರ್ಲ್ಲ್ಯಾ ತಿತ್ಲ್ಯಾ ಗೂಂಡಾಯೆಚೊ ಸಂಭಂಧ್, ಆಪ್ಣೆಂ ದವರುಂಕ್ ನಾತ್ಲೆಲ್ಯಾನ್, ಆಲಿಯಾ ದೀಸ್ ವೆತಾಂ ವೆತಾಂ ಎಕ್ಸುರ್ಪಣಾಚಾ ಉಜ್ಯಾಂತ್ ಶಿರ್ಕಾಲೆಂ.
ಆಲಿಯಾಚಾ ಜಿವಿತಾಂತ್, ಸವ್ಕಾಸ್ ಎಕೇಕ್ಚ್ ಬದ್ಲಾವಣ್ಯೊ ದಿಸೊನ್ ಯೇಂವ್ಕ್ ಲಾಗ್ಲ್ಯೊ. ತಾಚೆಂ ತೆಂ ಮೌನ್, ತೆಂ ಶಾಂತ್ಪಣ್, ಮತಿಂತ್ಲಿಂ ಚಿಂತ್ನಾಂ, ಭಾಯ್ಲ್ಯಾ ಸಂಸಾರಾಕ್ ಸಮ್ಜೊಂಕ್ ತಾಚೆಂ ಪ್ರಯತ್ನ್, ದೊಳ್ಯಾಂ ಮುಕ್ಲಿಂ ಉಟೊನ್ ರಾವ್ಲ್ಲಿಂ ಸವಾಲಾಂ, ಆಲಿಯಾ ಆಪ್ಲ್ಯಾ ಎಕ್ಸುರ್ಪಣಾಕ್ ಆಶೆಂಚ್ ಸಾರುಂಕ್ ಲಾಗ್ಲೆಂ. ಹ್ಯಾ ವರ್ವಿಂ ತಾಚೆಂ ಶಿಕಾಪ್ಯ್ ಉರ್ಲೆಲ್ಯಾ ಭುರ್ಗ್ಯಾಂಚಾ ಶಿಕ್ಪಾ ಪರಿಂ ಫಳಾದೀಕ್ ಜಾಲೆಂ ನಾ.
ಶಬೀರಾನ್ ಆತಾಂ ವಸ್ತೆ ಖಾತಿರ್ ವ್ಹಡ್ಲೊ ವಿಲ್ಲಾ ಘೆತ್ಲ್ಲೊ. ಆಪ್ಲ್ಯಾ ಮ್ಹಿನತೆ ವರ್ವಿಂ ತಾಣೆಂ ಬರೆಂ ನಾಂವ್ ಜೊಡ್ಲ್ಲೆಂ. ನಾಂವಾ ತೆಕಿದ್ ತಾಕಾ ಏಕ್ ಹುದ್ದೊ ಆಸ್ಲ್ಲೊ. ಪಯ್ಶೆ ದಾರಾಳ್ ಆಸ್ಲ್ಲೆ. ಹಾತಾ ಸಕಯ್ಲ್ ಕಿತ್ಲೆ ಕಾಮಾಕ್ ಆಸಾತ್ ತೆಂ ತೊಚ್ಚ್ ನೆಣಾಂ ಆಸ್ಲ್ಲೊ. ಯೇಂವ್ಕ್ ವಚೊಂಕ್ ಬರೆಂ ಕಂಪೆನಿಚೆಂ ಕಾರ್ ಆಸ್ಲ್ಲೆಂ.
ಆಪ್ಲ್ಯಾ ಪರಿಂಚ್ ಆಪ್ಲಿಂ ಭುರ್ಗಿಂಯ್ ಬರೆಂ ಕರುನ್ ಶಿಕೊನ್, ಬರ್ಯಾ ಜಾಗ್ಯಾಕ್ ಪಾವೊಂಕ್ ಜಾಯ್ ಮ್ಹಳ್ಳೊಚ್ ತಾಚೊ ಇರಾದೊ. ಹ್ಯಾಚ್ ಖಾತಿರ್ ಅಕ್ಬರಾಕ್ ಕಂಪ್ಯೂಟರ್ ಶಿಕ್ಪಾ ಖಾತಿರ್ ಶಬೀರಾನ್ ಅಮೇರಿಕಾ ದಾಡ್ಲೊ. ದುಸ್ರೊ ಸಲೀಮ್ ಮುಂಬಯಿಂತ್ಚ್ ಶಿಕ್ಪಾರ್ ಆಸ್ಲ್ಲೊ. ರಝಿಯಾ ಶಬೀರಾಚೆಂ ನಿಮಾಣೆಂ ಧುವ್ ಯೂನಿವರ್ಸಿಟಿಂತ್ ವಿಗ್ಯಾನ್ ಶಿಕ್ತಾಲೆಂ ತರ್, ಆಲಿಯಾ ಮಾತ್ರ್ ವಿಚಿತ್ರ್ ರಿತಿನ್, ಆಪ್ಣಾಕ್ ಕಾಂಯ್ಚ್ ಗುಮಾನ್ ನಾತ್ಲೆಲ್ಯಾಪರಿಂ, ಆಪ್ಲ್ಯಾ ಜಿವಿತಾಚೊ ಚಡಾವತ್ ವೇಳ್, ತ್ಯಾ ವಯ್ಲ್ಯಾ ಆಗಸಾಕ್ ಪಳವ್ನ್, ಆಪ್ಲ್ಯಾ ಮತಿಂತ್ಚ್ ಸಪ್ಣಾಂ ಬಾಂದುನ್ ಪಾಶಾರ್ ಕರ್ತಾಲೆಂ.
"ಬೇಟಾ ಆಲಿಯಾ, ತುವೆಂ ಆಶೆಂ ಕೆಲ್ಯಾರ್ ಕಶೆಂ ಪುತಾ? ಶಿಕ್ಪಾಂತ್ ಇಲ್ಲೆಂ ಧ್ಯಾನ್ ದೀ...... ತುಜ್ಯಾ ಭಾಂವ್ಡಾಂ ಪರಿಂ ತುವೆಂಯ್ ಬರೆಂ ಶಿಕೊನ್ ವಯ್ರ್ ಯೇಂವ್ಕ್ ಆಸಾ. ಹಾಂವ್ ತುಕಾ ಏಕ್ ಡಾಕ್ಟರ್ ಕರುಂಕ್
ಚಿಂತಾಂ!"
ಆಪ್ಲ್ಯಾ ಶಿಕ್ಪಾಂತ್ ಜವಾಬ್ದಾರಿ ಘೆನಾಸ್ತಾನಾ, ಮೌನ್ಪಣಿಂ, ಆಪ್ಲ್ಯಾ ನಿದ್ಚಾ ಕುಡಾಚೆಂ ಜನೆಲ್ ಉಗ್ತೆಂ ಕರುನ್, ಭಾಯ್ರ್ ದಿಸ್ಚಾ ಮೊಳಾಬಾರ್, ಉಬ್ಚಾ ಸುಕ್ಣ್ಯಾಂಕ್ ಪಳವ್ನ್ ಆಸ್ಚಾ ಧುವೆಕ್ ಶಬೀರ್ ಸಮ್ಜಾಯ್ತಾಲೊ.
"ಅಬ್ಬೂ...., ತಿಂ ಸುಕ್ಣಿಂ ಪಳೆ. ಸಂಸಾರಾಚಿ ಕಾಂಯ್ಚ್ ಫಿಕಿರ್ ನಾಸ್ತಾಂ, ಆತ್ತಾಂ ಕಿತೆಂ, ಫಾಲ್ಯಾಂ ಕಿತೆಂ ಮ್ಹಳ್ಳೆಂ ಚಿಂತಿನಾಸ್ತಾನಾ, ತ್ಯಾ ಮೊಳ್ಬಾರ್ ಉಬ್ತಾತ್. ಹಾಂವ್ಯ್ ತಶೆಂಚ್ ಉಬೊಂಕ್ ಆಶೆತಾಂ!" ಬಾಪಾಯ್ಚಾ ಸಮ್ಜಾವ್ಣೆಕ್ ಆಲಿಯಾಚಿ ಹಿ ಸದಾಂಚಿ ಜವಾಬ್ ಜಾಲ್ಲಿ.
"ಸುಕ್ಣ್ಯಾಂ ಆನಿ ಮನ್ಶ್ಯಾಂ ಮಧೆಂ ಮಸ್ತ್ ಅಂತರ್ ಆಸಾ ಆಲಿಯಾ. ಮನ್ಶ್ಯಾಂಕ್ ಸುಕ್ಣ್ಯಾಂ ಸವೆಂ ಸರಿ ಕರಿನಾಕಾ.....!" ಶಬೀರಾಕ್ ಆಪ್ಲ್ಯಾ ಧುವೆಕ್ ಸಮ್ಜೊಂಕ್ ಕಶ್ಟ್ ಮಾರ್ತಾಲೆ.
"ತೆಂ ಮನ್ಶಾಂಚೆಂ ಚಿಂತಾಪ್ ಅಬ್ಬೂ....! ಮನ್ಶಾಚಾ ಚಿಂತ್ನಾಂಕ್ ಕಾಂಯ್ ಆಡ್ ಆಸಾ?"
"ಹಾಂವ್ ಏಕ್ ಮನಿಸ್ ನ್ಹಯ್ ಆಲಿಯಾ! ಹಾಂವ್ ತುಜೊ ಬಾಪಯ್! ....ಆನಿ ತುಂ ಮ್ಹಾಕಾ ಏಕ್ ಸುಕ್ಣೆಂ ನ್ಹಯ್. ತುಂ ಮ್ಹಜೆಂ ಧುವ್! ಸಮ್ಜಾಲೆಂ ತುಕಾ? ಕಿತ್ಯಾಕ್ ಸಮ್ಜಾನಾ ತುಕಾ?"
"ತುಮ್ಕಾಂಯ್ ಕಿತ್ಯಾಕ್ ಸಮ್ಜಾನಾ ಅಬ್ಬೂ....? ಯೆದೊಳ್ಚ್ ಅಮ್ಮಿಚೊ ಇತ್ಲೊ ವ್ಹಡ್ಲೊ ಸ್ಪೀಚ್ ಜಾಲೊ. ಹಾವೆಂ ಪಯ್ಲೆಂಚ್ ತುಮ್ಕಾಂ ಸಾಂಗ್ಲ್ಲೆಂ.... ಹಾಂವ್ ಮೆಡಿಕಲ್ ಕಾಲೇಜಿಕ್ ವಚಾನಾ! ಮಾಕಾ ತಾಂತುಂ ಕಾಂಯ್ ಉರ್ಭಾ ನಾ!"
"ತರ್....?"
"ಅಬ್ಬೂ, ಮಾಕಾ ದಾಕ್ತೆರ್ ಜಾಂವ್ಕ್ ಮನ್ ನಾ. ಹಾಂವ್ ತ್ಯಾ ಸುಕ್ಣ್ಯಾಂ ಪರಿಂ ನಿಶ್ಚಿಂತ್ ತ್ಯಾ ವಾರ್ಯಾರ್ ಉಭೊಂಕ್ ಆಶೆತಾಂ.!"
ಆಲಿಯಾಚಾ ದೊಳ್ಯಾಂನಿ ಏಕ್ ವಿಚಿತ್ರ್ ಭಾವುಕತಾ ಆಸ್ಲ್ಲಿ.
********************
ಮಹಾಬಲೇಶ್ವರ್!
ಆಲಿಯಾ ಆಪ್ಲ್ಯಾ ಕಾಲೇಜಿಚಾ ಫ್ರೆಂಡ್ಸಾಂ ಸವೆಂ ಪಿಕ್ನಿಕಾಕ್ ಪಾವ್ಲ್ಲೆಂ. ತಾಕಾ ಕಾಲೇಜಿಚಾ ಫ್ರೆಂಡ್ಸಾಂ ಸಾಂಗಾತಾ ಪಿಕ್ನಿಕಾಕ್ ವೆಚೆಂ ಮನ್ ನಾತ್ಲ್ಲೆಂ ತರ್ಯ್, ಸಮೀರಾಚಾ ಭಲಾತ್ಕಾರೆಕ್ ಲಾಗೊನ್ ತೆಂ ವೊಪ್ವಾಲೆಂ. ಸಮೀರ್ ಚಡ್ಚ್ ಆಲಿಯಾಚ್ಯಾ ತೆವ್ಶಿಂ ಆಕರ್ಷಿತ್ ಜಾಲ್ಲೊ. ಪುಣ್, ಆಲಿಯಾಚಾ ಮತಿಚಾ ಚಿಂತ್ಪಾಕ್ ಆನಿ ಕಾಳ್ಜಾಂತ್ಲ್ಯಾ ಭಗ್ಣಾಂಕ್, ಕೊಣ್ಯ್ ಸಮ್ಜೊಂಕ್ ಸಕೊಂಕ್
ನಾತ್ಲ್ಲಿಂ.
ಮಹಾಬಲೇಶ್ವರಾಚಾ ತ್ಯಾ ಪೃಕೃತೆ ಸೊಭಾಯೆಕ್ ಪಳವ್ನ್, ಆಲಿಯಾ ಶಿರಿಂ ಚುಕ್ಲೆಂ ಜಾಲ್ಯಾರ್ಯ್ ಜಿವಿತ್ ಮ್ಹಳ್ಳೆಂ ತೆಂ, ಹ್ಯಾ ಥಂಡಾಯೆಂತ್ ಆನಿ ಸೊಭಾಯೆಂತ್ ಖಂಡಿತ್ ನಾ ಮ್ಹಣೊನ್ ತೆಂ ವೊಳ್ಕಾಲೆಂ.
ಜಿವಿತಾಂತ್ ಸದಾಂಚ್ ಆಶೆಂ ಘಡ್ತಾ! ಮನ್ಶ್ಯಾಕ್ ಜೆಂ ಕಿತೆಂ ಬರೆಂ ಮ್ಹಣೊನ್ ದಿಸ್ತಾ ತೆಂ ತಾಚ್ಯಾ ಜಿವಿತಾಕ್ ಜಿಯೆಂವ್ಕ್ ಫಾಯ್ದ್ಯಾಚೆಂ ಜಾಯ್ನಾಂ. ಆನಿ ಖಂಯ್ಚರ್ ಜಿವಿತ್ ಜಿಯೆಂವ್ಚೊ ಕಾಂಟಾಳೊ ಯೆತಾ ಥಂಯ್ಚರ್ಚ್ ಜಿವಿತ್ ಜಿಯಂವ್ಕ್ ಪಡ್ತಾ!
ಪೃಥುವೆಚಾ ಸೊಭಾಯೆಕ್, ಊಂಚಾಯೆರ್ ಥಾವ್ನ್ ತರ್ನಿಂ ಕಾಳ್ಜಾಂ ಭೊಗುನ್ ಆಸ್ತಾಂ, ಆಲಿಯಾ ಮಾತ್ರ್ ಆಪ್ಲ್ಯಾ ತ್ಯಾಚ್ ಚಿಂತ್ನಾನಿಂ ಬುಡ್ಲ್ಲೆಂ. ತಾಚ್ಯಾ ದೊಳ್ಯಾಂ ಮುಕಾರ್, ತಾಚ್ಯಾ ಮತಿಂತ್ಲೆ, ಜಿವಿತಾಂತ್ ಜವಾಬ್ ದೀಂವ್ಕ್ ಸಕೊಂಕ್ ನಾತ್ಲ್ಲೆ ಮಿಸ್ತೆರ್ಚ್ ಉಟೊನ್ ರಾವ್ತಾಲೆ. ಹಾಕಾ ಕಾರಾಣ್ಯ್ ತಾಚೊ ಬಾಪಯ್ ಜಾವ್ಯೆತ್.
ಆಲಿಯಾಚಾ ಖುಶೆ ವಿರೋಧ್ ತಾಣೆಂ ಆಲಿಯಾಕ್ ಮೆಡಿಕಲ್ ಕಾಲೇಜಿಕ್ ಭರ್ತಿ ಕೆಲ್ಲೆಂ!
"ಆಲಿಯಾ! ಮಾಧುರಿ ದೀಕ್ಷಿತ್ ಇಸ್ ಹಿಯರ್ ಇನ್ ಮಹಾಬಲೇಶ್ವರ್!" ಅಚಾನಕ್ ಸಮೀರಾನ್ ಆಲಿಯಾಕ್ ಖಬಾರ್ ಹಾಡ್ಲ್ಲಿ. ಮಾಧುರಿ ದೀಕ್ಷಿತ್ ಬಾಲಿವುಡಾಚೆಂ ಚಡ್ ಉಂಚ್ಲೆಂ ಹಿರೋಯಿನ್. ಹ್ಯಾ ದಿಸಾಂನಿಂ ಪಕತ್ತ್ ಮಾಧುರಿಚೆಂಚ್ ನಾಂವ್ ಸಗ್ಳ್ಯಾಂಚಾ ಜಿಬೆರ್ ಖೆಳ್ತಾಲೆಂ.
"ಮಾಧುರಿ, ತಾಚ್ಯಾ ಫಿಲ್ಮಾಚಾ ಶೂಟಿಂಗಾಕ್ ಆಯ್ಲಾಂ. ಅನಿಲ್ ಕಪೂರ್ಯ್ ಆಸಾ. ಆಮಿಂ ಸಗ್ಳಿಂ ಪಳಂವ್ಕ್ ವೆತಾಂವ್ . ತುಂ ಯೆತಾಯ್ ಜಾಲ್ಯಾರ್ ಯೇ!" ಧನ್ಪರಾಂಚಾ ಜೆವ್ಣಾರ್ ಸಮೀರಾನ್ ಸಾಂಗ್ಲ್ಲೆಂ.
"ಮ್ಹಾಕಾ ತ್ಯಾ ರಂಗೀನ್ ಸಂಸಾರಾಚಿ ವೋಡ್ ನಾ ಸಮೀರ್! ತುಕಾ ವಚೊಂಕ್ ಜಾಯ್ ಜಾಲ್ಯಾರ್ ತುಂ ವಚ್!" ಆಲಿಯಾಕ್ ತ್ಯಾ ಬಾಲಿವುಡಾಚಾ ರಂಗೀನ್ ಸಂಸಾರಾಚೆರ್ ಕಾಂಯ್ ಆಸಕ್ತ್ ನಾತ್ಲ್ಲಿ.
"ಕಿತ್ಯಾಕ್?" ಸಮೀರಾಚೆಂ ಸವಾಲ್.
"ತುವೆಂ ಕೆದ್ನಾಂಯ್ ಆಪ್ಲ್ಯಾ ಸಂಸಾರಾ ಥಾವ್ನ್ ಭಾಯ್ರ್ ಯೇವ್ನ್ ಪಳೆಲಾಂಯ್? ದೊಳ್ಯಾಂಕ್ ದೀಷ್ಟ್ ಆಸ್ಲ್ಲ್ಯಾಂನಿ ಕುರ್ಡೆಂ ಜಾಯ್ನಾಯೆ ಸಮೀರ್!"
ಆಲಿಯಾಚಾ ಎಕಾಚ್ ಜವಾಬೆನ್ ಸಮೀರಾಚೆಂ ತೋಂಡ್ ಭಂಧ್ ಕೆಲ್ಲೆಂ.
ಸಮೀರ್ಯ್ ಆಲಿಯಾ ವಿಶಿಂ ಜಾಣಾಂ ಆಸ್ಲ್ಲೊ. ಆಲಿಯಾಚಾ ಹ್ಯಾಚ್ ಸ್ವಭಾವಾಕ್ ಲಾಗೊನ್, ತಾಕಾ ಕೊಣ್ಯ್ ಪಸಂದ್ ಕರಿನಾತ್ಲ್ಲೆಂ. ತಾಚ್ಯಾಲಾಗಿಂ ಕೋಣ್ಯ್ ಸಳಾವಳ್ ದವರಿನಾತ್ಲ್ಲೆಂ. ಪುಣ್, ಸಮೀರ್ ಮಾತ್ರ್, ಕಿತ್ಯಾಕ್ಗೀ ಹೆಂ ಸಗ್ಳೆಂ ಸೊಸುನ್ ವರುನ್ ಆಲಿಯಾ ಸವೆಂ ಬರ್ಯಾನ್ ರಾವ್ತಾಲೊ.
"ಮನ್ಶ್ಯಾಚೆಂ ಜಿವಿತ್ ಫಕತ್ತ್ ಏಕ್ ಪಾವ್ಟಿಂ ಮೆಳ್ಚೆಂ ಆಲಿಯಾ! ಜ್ಯಾ ಜಿವಿತಾಂತ್ ತೊ ಜಲ್ಮಾತಾ, ತ್ಯಾ ಜಿವಿತಾಕ್ ತಾಣೆಂ ಜಿಯೆಂವ್ಕ್ ಪಡ್ತಾ. ತಾಕಾ ವಿಂಚವ್ಣ್ ನಾ. ಹೆಂ ತುಕಾ ನೆಣಾಂಯ್?"
"ಕಿತ್ಯಾಕ್ ವಿಂಚವ್ಣ್ ನಾ?" ಸಮೀರಾಚಾ ಫಿಲೋಸಾಫಿಕ್ ಆಲಿಯಾ ಮಾಂದುನ್ ಘೆಂವ್ಕ್ ತಯಾರ್ ನಾತ್ಲ್ಲೆಂ.
ಆಲಿಯಾಚಾ ಸವಾಲಾಕ್ ಜವಾಬ್ ದಿಂವ್ಚಾ ಸ್ಥಿತೆರ್ ಸಮೀರ್ ನಾತ್ಲ್ಲೊ. ತೊ ಮಹಾಬಲೇಶ್ವರಾಕ್ ಪಿಕ್ನಿಕಾಕ್ ಆಯಿಲ್ಲೊ. ಪೃಕೃತೆಚಾ ಸೊಭಾಯೆಕ್ ಚಾಕೊಂಕ್ ಆಯಿಲ್ಲೊ. ಆಲಿಯಾಚಾ ಪಿಶ್ಯಾ ಸವಾಲಾಂಕ್ ಜವಾಬ್ ದೀಂವ್ನ್ ವೇಳ್ ವಿಬಾಡುಂಕ್
ನ್ಹಯ್!
ಆಪ್ಲ್ಯಾ ಉತ್ರಾಂನಿ ಕಶೆಂಯ್ ಆಲಿಯಾಕ್ ಪುಸ್ಲಾವ್ನ್, ಆಪ್ಣಾ ಸವೆಂ ಆಲಿಯಾಕ್, ಮಹಭಲೇಶ್ವರಾಕ್ ಚಿತ್ರೀಕರಣಾಕ್ ಆಯಿಲ್ಲ್ಯಾ ಮಾಧುರಿ ದೀಕ್ಷಿತಾಕ್ ದಾಖಂವ್ಕ್ ಸಮೀರಾನ್ ಆಪವ್ನ್ ವೆಲೆಂ. ಹೊಟೇಲಾಂತ್ ಖಬಾರ್ ಮೆಳ್ಲ್ಲ್ಯಾ ಪ್ರಕಾರ್ಚ್ ಸಗ್ಳೆಂ ಸಾರ್ಕೆಂ ಆಸ್ಲ್ಲೆಂ. ಮಾಧುರಿ ಆನಿ ಅನಿಲ್ ಕಪೂರಾಚಾ ಮಧೆಂ ಪದಾಚೆಂ ಚಿತ್ರೀಕರಣ್ ಚಲ್ತಾಲೆಂ. ಹೆಂ ಪಳಂವ್ಕ್ ಸಗ್ಳಿಂಚ್ ರಾಸ್ ಪಡ್ಲ್ಲಿಂ. ಆಲಿಯಾನ್ ಪಯ್ಲ್ಯಾ ಪಾವ್ಟಿಂ ಮಾಧುರಿ ಆನಿ ಅನಿಲ್ ಕಪೂರಾಕ್ ಉಗ್ತ್ಯಾನ್ ಪಳೆಲೆಂ. ಸಿನೇಮಾಚಾ ಪರ್ದ್ಯಾರ್ ಪಳಂವ್ಚಾ ಮಾಧುರಿಕ್ ಆನಿ ಆಶೆಂ ಮುಖಾಮುಖಿ ಪಳಯಿಲ್ಲ್ಯಾ ಮಾಧುರಿಕ್ ಮಸ್ತ್ ಫರಕ್ ಆಸ್ಲ್ಲೊ. ಅನಿಲ್ ಕಪೂರ್ ಜಾಲ್ಯಾರ್ಯ್ ತಾಕಾ ಸಾದಾರ್ಣ್ ತಸೊಚ್ ದಿಸ್ಲೊ.
ಹೆಂ ಸಗ್ಳೆಂ ಮೇಕಪಾಚೆಂ ಆನಿ ತ್ಯಾ ಲೈಟ್ಸಾಂಚೆ ದೆಣೆಂ ಮ್ಹಣೊನ್ ಆಲಿಯಾ ವೊಪ್ಲೆಂ.
ತಿತ್ಲ್ಯಾರ್!
"ಹಾಯ್!" ಆಲಿಯಾಚಾ ಲಾಗ್ಸಾರ್ಚ್ ಏಕ್ ಅಪರಿಚಿತ್ ತಾಳೊ ಉಟ್ಲೊ.
ಆಲಿಯಾನ್ ತಾಳೊ ಆಯ್ಕೊನ್ ಆಯಿಲ್ಲ್ಯಾ ಕುಶಿಂನ್ ಪಳೆಲೆಂ. ತಾಚ್ಯೆ ಲಾಗ್ಸಾರ್ ಎಕ್ಲೊ ಹ್ಯಾಂಡ್ಸಮ್ ತರ್ನಾಟೊ ಉಭೊ ಆಸ್ಲ್ಲೊ.
ಆಲಿಯಾಕ್ ಹ್ಯಾ ತರ್ನಾಟ್ಯಾಕ್ ಹಾಚ್ಯಾ ಆದಿಂ ಖಂಯ್ಸರ್ಯ್ ಪಳೆಲ್ಲೊ ಉಡಾಸ್ ಆಯ್ಲೊ ನಾ.
"ಹಾಯ್...!" ಆಲಿಯಾ ಥಾವ್ನ್ ಕಾಂಯ್ ಜವಾಬ್ ಯೇಂವ್ಕ್ ನಾತ್ಲೆಲಿ ಪಳವ್ನ್ ತೊಚ್ಚ್ ತರ್ನಾಟೊ ಪರ್ತ್ಯಾಕ್ ಉಲಯ್ಲೊ.
"ಹಾಂವ್...... ರಾಯನ್! ಆಲ್ಫ್ರೆಡ್ ರಾಯನ್!" ಆಪ್ಣಾ ಮುಕ್ಲೊ ತರ್ನಾಟೊ ಆಪ್ಣಾಚಿ ವಳಕ್ ಕರುನ್ ದಿತಾ ತಶೆಂ ದಿಸ್ತಾಲೊ.
ಆಲಿಯಾ ತಾಕಾಚ್ ಪಳೆತಾಲೆಂ. ತಾಕಾ ಕಾಂಯ್ಚ್ ಸಮ್ಜಾನಾತ್ಲ್ಲೆಂ. ಪುಣ್ ಕಸಲಿಗೀ ಏಕ್ ಸಕತ್ ಆಪ್ಣಾಕ್ ತ್ಯಾ ಚಲ್ಯಾಚಾ ವೊಂಟಾಂ ವಯ್ಲ್ಯಾ ಹಾಸ್ಯಾಂ ಸವೆಂ ಸಂಸಾರಾಕ್ ವಿಸ್ರಾಯ್ತಾ ತಶೆಂ ಆಲಿಯಾಕ್ ದಿಸ್ಲೆಂ.
"ಹಾಯ್...!" ಆಪ್ಣಾಕ್ ಕಳಿತ್ ನಾತ್ಲೆಲ್ಯಾ ಪರಿಂಚ್ ಆಲಿಯಾಚಾ ತೊಂಡಾ ಥಾವ್ನ್ ಸಬ್ದ್ ಭಾಯ್ರ್ ಪಡ್ಲೊ.
"ಹಾಂಗಸರ್ ತುಂ ನವೆಂ?" ಆಪುಣ್ ರಾಯನ್ ಮ್ಹಣೊನ್ ಸಾಂಗ್ಲೆಲ್ಯಾ ತ್ಯಾ ತರ್ನಾಟ್ಯಾನ್ ಸವಾಲ್ ಕೆಲೆಂ.
"......" ಆಲಿಯಾಚಾ ತೊಂಡಾ ಥಾವ್ನ್ ಕಾಂಯ್ಚ್ ಜವಾಬ್ ಆಯ್ಲಿ ನಾ. ತೆಂ ಮೌನ್ ಆಸ್ಲ್ಲೆಂ.
"ಕಿತೆಂ...... ಹಾಂವ್ ಉಲಂವ್ಚೆ ತುಕಾ ಪಸಂದ್ ಜಾಂವ್ಕ್ ನಾ?" ಆಪ್ಲ್ಯಾ ದೊಳ್ಯಾಂಕ್ ಲಾಯಿಲ್ಲೆಂ ಕಾಳೆಂ ಗಾಗಲ್ ಆಪ್ಲ್ಯಾ ಉಜ್ವ್ಯಾ ಹಾತಿಂ ಕಾಡುನ್ ರಾಯನಾನ್ ವಿಚಾರ್ಲೆಂ.
"ತುಂ ಮಾಕಾ ವಳ್ಕಾತಾಯ್?" ರಾಯನಾ ವಯ್ರ್ ದುಬಾವ್ ಉದೆಲ್ಲ್ಯಾ ಆಲಿಯಾನ್ ರಾಯನಾಕ್ಚ್ ಪಾಟಿಂ ಸವಾಲ್ ಕೆಲೆಂ.
"ನಾ!"
"ಮಾಗಿರ್?" ಆಲಿಯಾಚಾ ದೊಳ್ಯಾಂನಿ ಆಶ್ಚರ್ಯಾಚಿಂ ಭಾವನಾ ವ್ಹಾಳೊನ್ ಧಾಂವ್ಲಿಂ.
"ದೆಕುನ್ಚ್ ಹಾವೆಂ ತುಕಾ ಪಯ್ಲೆಂ ಮ್ಹಜಿ ವಳಕ್ ಕರುನ್ ದಿಲಿ!" ರಾಯನ್
ಹಾಸ್ಲೊ.
ಆಲಿಯಾಕ್ ಪಯ್ಲೆಂಚಾ ಪ್ರಾಸ್ ಚಡ್ ವಿಚಿತ್ರ್ ದಿಸ್ಲೆಂ. ಏಕ್ ಅಪರಿಚಿತ್ ಚಲೊ, ಹ್ಯಾ ರಿತಿರ್ ಆಪ್ಣಾ ಸವೆಂ ಸಳಾವಳಿನ್ ಮ್ಹಳ್ಳ್ಯಾ ಪರಿಂ ಉಲಯ್ತಾ? ತೆಂಯ್ ಆಪ್ಣಾಚಿ ಕಾಂಯ್ಚ್ ವಳಕ್ ನಾಸ್ತಾಂ? ಆನಿ ಆಪುಣ್ ಕೋಣ್ ಮ್ಹಳ್ಳೆಂ ನೆಣಾಂ ಆಸ್ತಾಂ.....? ಆಲಿಯಾ ಚಿಂತುಂಕ್ ಲಾಗ್ಲೆಂ.
"ಕಿತೆಂ ಚಿಂತಾಯ್? ಐ ಯಾಮ್ ಸಾರ್ರಿ! ತುಕಾ ಹಾವೆಂ ಟ್ರಬಲ್ ಕೆಲೆಂ ಜಾಲ್ಯಾರ್... ಯು ಮೇ ಗೊ ಅಹೆಡ್! ....ಬೈ ದಿ ವೇ ತುಂ...?"
ಆಲಿಯಾನ್ ಆಪ್ಲ್ಯಾ ಜಿವಿತಾಂತ್ ಪಯ್ಲ್ಯಾ ಪಾವ್ಟಿಂ ಅಸಲ್ಯಾ ಚಲ್ಯಾಕ್ ಪಳಂವ್ಚೆ. ಜೊ ಮಾಫಿಯ್ ಮಾಗ್ತಾ ಅನಿ ಸವಾಲಾಂಯ್ ವಿಚಾರ್ತಾ.
ಆಲಿಯಾನ್ ಕಿತೆಂಗೀ ಉಲಂವ್ಕ್ ಮ್ಹಣೊನ್ ತೋಂಡ್ ಉಘಡ್ಲೆಂಲೆಂ ತೆಂ ತಶೆಂಚ್ ಭಂದ್ ಜಾಲೆಂ. ಕಾರಾಣ್...., ತ್ಯಾ ಚಲ್ಯಾಚಾ ಬೊಲ್ಸಾಂತ್ಲೆಂ ಸೆಲ್ಪೋನ್ ಆವಾಜುಂಕ್ ಲಾಗ್ಲ್ಲೆಂ.
"ಏಕ್ ಮಿನಿಟ್......!" ರಾಯನಾನ್ ಆಪ್ಲ್ಯಾ ಬೊಲ್ಸಾಕ್ ಹಾತ್ ಘಾಲುನ್ ತೆಂ ಪೋನ್ ಭಾಯ್ರ್ ಕಾಡ್ಲೆಂ.
"ಹಾಂ! ಸಾಂಗ್ ಸುಪ್ರಿಯಾ! ಕೆದ್ನಾಂ ಆಯ್ಲೆಂಯ್ ಹಾಂಗ್ಕಾಂಗಾ ಥಾವ್ನ್? ವೆಲ್ಕಮ್ ಬ್ಯಾಕ್!" ರಾಯನ್ ಪೊನಾರ್ ಉಲಂವ್ಕ್ ಲಾಗ್ಲೊ.
"..........."
"ನಾ! ಥೊಡೊ ಬಿಜಿ ಆಸಾಂ. ಸಾಂಜೆರ್ ಮೆಳ್ಳ್ಯಾರ್ ಜಾಯ್ತ್?.... ಊಂ.... ತುಂ ಏಕ್ ಕಾಮ್ ಕರ್.... ತುಂ ರೆಸ್ಟ್ ಕರ್. ಹಾಂವ್ ಮ್ಹಜ್ಯಾ ಸಕ್ರೆಟರಿಕ್ ದಾಡ್ತಾಂ. ಜಾಯ್ನಾಂಯೇ......?"
"..........."
"ವ್ಹಯ್ ತೊಚ್ಚ್!"
"..........."
"ನಾ.... ತ್ಯಾಚ್ ಖಾತಿರ್ ಹಾಂಗಾ ಮಹಾಬಲೇಶ್ವರಾಂತ್ ಆಸಾಂ. ........ ಜಾಲೆಂ ಆನಿ ಕಾಂಯ್ ದೋನ್ ಹಪ್ತ್ಯಾಚೆಂ ಶೂಟಿಂಗ್ ಉರ್ಲಾಂ ತಿತ್ಲೆಂಚ್!"
"..........."
"ವ್ಹಯ್ ವ್ಹಯ್........! ಹ್ಯಾಚ್ ಮಹಿನ್ಯಾಂತ್ ಹೆಂ ಲಾಂಚಿಂಗ್ ಜಾಂವ್ಕ್ ಜಾಯ್!"
"..........."
"ಜಾಯ್ತ್ ತರ್.... ಪಳೆತಾಂ, ಜಾಲ್ಯಾರ್ ಫಾಲ್ಯಾಂ ಸಾಕಾಳಿಂ ಮೆಳ್ತಾಂ!"
ರಾಯನಾನ್ ಆತಾಂ ಆಪ್ಲೆಂ ಪೋನ್ ಭಂದ್ ಕೆಲೆಂ. ಭಂದ್ ಕೆಲ್ಲ್ಯಾ ಪೊನಾಕ್ ಆಪ್ಲ್ಯಾ ಪ್ಯಾಂಟಾಚಾ ಬೊಲ್ಸಾಂತ್ ಗಳವ್ನ್ ತೊ ಆತಾಂ ಆಲಿಯಾ ತೆವ್ಶಿಂ ಘುಂವ್ಲೊ.
"ಸಾರ್ರಿ ಹಾಂ.....!" ಮ್ಹಳ್ಳೊ ರಾಯನ್ ".....ತುವೆಂ ಆಪ್ಲೆಂ ನಾಂವ್ ಕಿತೆಂ ಸಾಂಗ್ಲೆಂಯ್?" ಆಲಿಯಾಕ್ ತಾಣೆಂ
ವಿಚಾರ್ಲೆಂ.
ಆಲಿಯಾನ್ ಪೊನಾ ವಯ್ಲ್ಯಾ ತಾಚ್ಯಾ ಉಲೊವ್ಣ್ಯಾಕ್ ಆಯ್ಕಾಲ್ಲೆಂ. ತೊ ಕೊಣಾ ಲಾಗಿಂ ಉಲಯಿಲ್ಲೊ ತೆಂ ಆಲಿಯಾಕ್ ಕಳೊಂಕ್ ನಾ ತರ್ಯ್ ಹೊ ಚಲೊ ಸಿನೆಮಾ ಸಂಸಾರಾಂತ್ ಸಂಭಂಧ್ ದವರ್ತಾ ಮ್ಹಣೊನ್ ಮಾತ್ರ್ ಆಲಿಯಾಕ್ ಸಮ್ಜಾಲ್ಲೆಂ. ತಶೆಂ ಪಳಂವ್ಕ್ ಗೆಲ್ಯಾರ್ ತ್ಯಾ ಅನಿಲ್ ಕಪೂರಾಚ್ಯಾಕ್ಯ್ ಹೊ ಚಲೊಚ್ ಆಲಿಯಾಚಾ ದೊಳ್ಯಾಂಕ್ ಚಡ್ ಸೊಭಿತ್ ದಿಸ್ಲೊ. ತಾಣೆಂ ಉಲಯಿಲ್ಲೆಂ ತೆಂ ಸುಪ್ರಿಯಾ ಕೋಣ್? ಮ್ಹಳ್ಳೆಂ ತೆಂ ಮಾತ್ರ್ ಆಲಿಯಾಕ್ ಕಳೊಂಕ್ ನಾ.
"ಆಲಿಯಾ!" ಆಲಿಯಾನ್ ಆಪ್ಣಾಕ್ ಕಳಿತ್ ನಾತ್ಲೆಲ್ಯಾ ಪರಿಂಚ್ ಆಪ್ಲೆಂ ನಾಂವ್ ಉಚಾರ್ಲ್ಲೆಂ.
"ಬ್ಯೂಟಿಪುಲ್!" ಉದ್ಗಾರ್ಲ್ಲೊ ತೊ ಥೊಡೊ ವೇಳ್ ತಸೊಚ್ಚ್ ಆಲಿಯಾಚಾ ಸೊಭಾಯೆಕ್ ಪಳವ್ನ್, "ಆಲಿಯಾ ಕಿತೆಂ?" ರಾಯನಾಕ್ ಆಲಿಯಾ ವಯ್ರ್ ಕಸಲಿಗೀ ಉಮೆದ್ ಆಸ್ಲ್ಲಿ.
"ಆಲಿಯಾ ಶಬೀರ್ ಖಾನ್!" ಆಪ್ಲೆಂ ಸಗ್ಳೆಂ ನಾಂವ್ ಆಲಿಯಾನ್ ಉಚಾರ್ಲೆಂ.
"ವಂಡರ್ಪುಲ್!" ಆಪ್ಲ್ಯಾ ವೊಂಟಾರ್ ರಾಯನಾನ್ ಆಮ್ರುಕೊ ಹಾಸೊ ಹಾಡ್ಲ್ಯೊ.
ಆಲಿಯಾ ಆತಾಂ ಕಾಂಯ್ ಉಲಯ್ಲೆಂ ನಾ.
"ತುಂ ಹಾಂಗಾ?" ಪರ್ತ್ಯಾಕ್ ತಾಣೆಚ್ ಸವಾಲ್ ಕೆಲೆಂ.
ಆಲಿಯಾ ತರ್ಯ್ ಸಂಪೂರ್ಣ್ ಮಾಂತ್ರಿಕಾಚಾ ಮಂತ್ರಾಂಕ್ ವಳಗ್ ಜಾಲ್ಲ್ಯಾ ಪರಿಂ ಜಾಲ್ಲೆಂ.
"ತುಜೆಂ ನಾಂವ್ ಕಿತೆಂ ಸಾಂಗ್ಲೆಂಯ್?" ಆಲಿಯಾಕ್ ಆತಾಂ ರಾಯನಾಕ್ ಜಾಣಾಂ ಜಾಂವ್ಚೆ ಮನ್ ಜಾಲೆಂ. ಹೆಂ ಮನ್ ತಾಕಾ ಕಶೆಂ ಆಯ್ಲೆಂ ತೆಂ ತೆಂಚ್ ನೆಣಾಂ. ಪುಣ್ ಕಿತ್ಯಾಕ್ಗೀ ರಾಯನಾ ಥಂಯ್ ತಾಕಾ ಆಕರ್ಶಣ್ ಜಾಲ್ಲೆಂ.
"ರಾಯನ್! ಆಲ್ಪ್ರೆಡ್ ರಾಯನ್!"
ರಾಯನಾನ್ ಸಾಂಗ್ತಾನಾ ಆಲಿಯಾಕ್ ರಾಯನಾಚಾ ತೊಂಡಾಕ್ ಪಳಂವ್ಕ್ ಜಾಲೆಂನಾ.
ರಾಯನಾಚಾ ವ್ಯಕ್ತಿತ್ವಾಂತ್ ಆನಿ ತಾಚ್ಯಾ ದೊಳ್ಯಾನಿಂ ತೆಂ ಏಕ್ ವಿಶೇಷ್ ಆಕರ್ಷಣ್ ಆಸ್ಲ್ಲೆಂ. ಜೆಂ ಆಕರ್ಷಣ್ ಖಂಯ್ಚಾಯ್ ಸೊಭಿತ್ ಚಲ್ಯೇಕ್ ಎಕಾ ಕ್ಷಣಾಕ್ ಸಂಸಾರ್ ವಿಸ್ರಾಯ್ತಾಲೆಂ.
"ತುಂ ಕಶೆಂ ಹಾಂಗಾ?" ಪರ್ತ್ಯಾಕ್ ರಾಯನಾನ್ಚ್ ವಿಚಾರ್ಲೆಂ.
"ಹಾಂವ್ ಕಾಲೇಜಿ ಥಾವ್ನ್ ಪಿಕ್ನಿಕಾಕ್ ಆಯ್ಲ್ಯಾಂ!"
"ತುಂ ಕಾಲೇಜಿಂತ್ ಶಿಕ್ತಾಯ್?"
"ವ್ಹಯ್!"
"ಕಿತೆಂ ಶಿಕ್ತಾಯ್?
"ಹಾಂವ್ ಮೆಡಿಕಲ್ ಕರ್ತಾಂ!"
"ತುಜಿ ಸೊಭಾಯ್ ಪಳೆತಾನಾ ತುಂ ಬಾಲಿವುಡಾಕ್ ಫಿಟ್ ಆಸ್ಲ್ಲ್ಯಾ ಪರಿಂ ದಿಸ್ತಾಯ್!"
ರಾಯನಾಚಿಂ ಉತ್ರಾಂ ಆಯ್ಕಾಲ್ಲೆಂ ಆಲಿಯಾ ಕಾಲುಬುಲು ಜಾಲೆಂ.
ಎಕಾ ವಾಟೆನ್ ಹೊ ಆಪ್ಣಾಕ್ ಅಪರಿಚಿತ್ ತರ್ಯ್, ಆಪ್ಣಾಲಾಗಿಂ ಇತ್ಲ್ಯಾ ಸಳಾವಳಿನ್ ಉಲಯ್ತಾ. ದುಸ್ರ್ಯಾ ಕುಶಿಂನ್, ಆಪ್ಣಾಚಿ ಸೊಭಾಯ್ ವರ್ಣುನ್ ಆಪ್ಣಾಕ್ ಬಾಲಿವುಡಾಕ್ ಆಪವ್ಣೆ ದಿತಾ. ಆಲಿಯಾಕ್ ಕಾಂಯ್ ಸಮ್ಜಾಲೆಂ ನಾ. ತಶೆಂ ತಾಚ್ಯೆ ಥಾವ್ನ್ ಪಯ್ಸ್ ಸರ್ಚೆಂ ಕಸಲೆಂಯ್ ಕಾರಾಣ್ಯ್ ತಾಕಾ ಮೆಳ್ಳೆಂ ನಾ. ಹೊ ಕೋಣ್ ಜಾವ್ಯೇತ್? ಆಲಿಯಾ ಆಪ್ಲ್ಯಾ ಮತಿಂತ್ಚ್ ಚಿಂತಾಲೆಂ. ತಾಕಾ ಪಳೆತಾನಾ, ತೆಂ ಏಕ್ ಪಾವ್ಟಿಂ ಚಿಂತ್ಲೆಲ್ಯಾ ಪರಿಂ ದಿಸ್ಲೆಂ ಜಾಲ್ಯಾರ್ಯ್ ದುಸ್ರ್ಯಾಚ್ ಘಡ್ಯೆ ತೆಂ ಆಪ್ಣಾಕ್ಚ್ ವಿಸ್ರೊನ್ ಗೆಲ್ಲ್ಯಾ ಪರಿಂ
ದಿಸ್ತಾಲೆಂ.
ಖಂಯ್ ಬಾಲಿವುಡಾಚಿಂ ಹಿರೋಯಿನಾಂ ಆನಿ ಖಂಯ್ ಹಾಂವ್? ಅಸಲ್ಯಾ ಕಡೆನ್ ಹೊ ಮ್ಹಾಕಾ ಬಾಲಿವುಡಾಕ್ ಆಪವ್ಣೆ ದಿತಾ. ತೆಂಯ್ ಅಚಾನಕ್? ಬಾಲಿವುಡಾಚಾ ಪರ್ದ್ಯಾಚೆಂ ಚಿಂತುಂಕ್ ಪಾಸೊನ್ ನಾತ್ಲೆಲ್ಯಾ ಆಲಿಯಾಕ್ ಅಚಾನಕ್ ಶಾಕ್ ಲಾಗ್ಲ್ಲ್ಯಾ ಪರಿಂ ಜಾಲೆಂ. ತೆಂ ಕಾಂಯ್ ಉಲಯ್ಲೆಂ ನಾ.
"ತುವೆಂ ಹಾಚ್ಯಾ ಪಯ್ಲೆಂ ಖಂಯ್ಸರ್ಯ್ ಆಕ್ಟಿಂಗ್ ಕೆಲಾಂಯ್?" ರಾಯನ್ಚ್ ಉಲಯ್ಲೊ.
"ನಾ..." ಆಲಿಯಾನ್ ಭಲತ್ಕಾರೆನ್ ಹಾಸ್ಚೆಂ ಪ್ರಯತ್ನ್ ಕೆಲೆಂ.
"ಬೈ ದಿ ವೇ...." ರಾಯನ್ ಪರ್ತ್ಯಾಕ್ ಉಲಯ್ಲೊ. "ತುಕಾ ಬಾಲಿವುಡಾಕ್ ಯೆಂವ್ಚೆಂ ಮನ್ ಆಸಾ?"
ಆಲಿಯಾಕ್ ಕಿತೆಂ ಸಾಂಗ್ಚೆಂ ತೆಂ ಕಳೊಂಕ್ ನಾ.
"ಹೊ ರಾಯನ್ ಆಪ್ಣಾ ಸಂಗಿಂ ಆಶೆಂಚ್ ಬೆಷ್ಟೆಂ.....!" ದುಬಾವ್ ಉದೆಲೊ ಆಲಿಯಾಚಾ ಮತಿಂತ್.
"ನೋ! ನಾಟ್ ಎಟ್ ಆಲ್!"
"ಐ ಯಾಮ್ ನಾಟ್ ಜೋಕಿಂಗ್....!" ಎಕಾಚ್ಚ್ ಫರಾ ರಾಯನ್ ಸೀರಿಯಸ್ ಜಾಲೊ. "ಆತ್ತಾಂ ಥೊಡ್ಯಾ ವೆಳಾ ಪಯ್ಲೆಂ ಹಾಂವ್ ಉಲಯಿಲ್ಲೊಂ ಕೊಣಾಲಾಗಿಂ ಮ್ಹಣೊನ್ ಜಣಾಂಯ್ ತುಂ?" ರಾಯನಾನ್ ಆಲಿಯಾಕ್ಚ್ ಪಳಯ್ಲೆಂ. ಆತಾಂ ಕಿತ್ಯಾಕ್ಗೀ ರಾಯನ್ ಸತ್ಚ್ ಉಲಯ್ತಾ ಮ್ಹಳ್ಳ್ಯಾಪರಿ ಆಲಿಯಾಕ್ ದಿಸ್ಲೊ.
"..........?" ರಾಯನಾಚಾ ಸವಾಲಾಕ್ ಆಲಿಯಾ ಲಾಗಿಂ ಕಾಂಯ್ ಜಾವಾಬ್ ನಾತ್ಲ್ಲಿ. ತಾಣೆ ಆಪ್ಲಿ ತಕ್ಲಿ ಉಕ್ಲುನ್ ರಾಯನಕ್ ಪಳೆಲೆಂ ಮಾತ್ರ್.
ಎಕಾ ಖಿಣಾಂತ್ ರಾಯನಾನ್ ತ್ಯಾ ಆಲಿಯಾಚಾ ದೊಳ್ಯಾಂನಿ ಸೊಧ್ನಾಂ ಕೆಲಿಂ. ತ್ಯಾ ದೊಳ್ಯಾಂಚಾ ದಿಷ್ಟೆಂತ್ ತೊ ಭೊಂವ್ಲೊ, ದೆಂವ್ಲೊ, ಘುಂವ್ಲೊ.
ತಿತ್ಲೆಂಚ್!
ಕೋಣ್ಗೀ ಆಪ್ಲ್ಯಾ ಜಿವಾ ಭಿತರ್ ಉಪ್ಯೆತಾ ತಶೆಂ ಆಲಿಯಾಕ್ ಭೊಗ್ಲೆಂ. ಆಪುಣ್ ಖಂಯ್ಚರ್ಗೀ ಸಲ್ವಾಲ್ಲ್ಯಾ ಪರಿ ತಾಕಾ ಜಾಲೆಂ. ತಾಣೆ ಆಪ್ಲಿ ದೀಷ್ಟ್ ಪಾಟಿಂ ಕಾಡುಂಕ್ ಪ್ರಯತ್ನ್ ಕೆಲೆಂ ತರ್ಯ್ ಆಲಿಯಾಕ್ ಹೆಂ ಸಾದ್ಯ್ ಜಾಲೆಂ ನಾ. ತೆಂ ಭಿತರ್ಲ್ಯಾ ಭಿತರ್ಚ್ ಹುಳ್ವುಳ್ಳೆಂ.
"ಸುಪ್ರಿಯಾ?" ಆಲಿಯಾನ್ ತ್ಯಾ ನಾಂವಾಕ್ ಉಡಾಸ್ ಕಾಡ್ಲೆಂ.
"ವ್ಹಯ್! ಸುಪ್ರಿಯಾ ಚೋಪ್ರಾ!" ಪರ್ತ್ಯಾಕ್ ತೊಚ್ ಉಲಯ್ಲೊ. "ಬಾಲಿವುಡಾಂತ್ಲೆಂ ಆತಾಂಚೆಂ ನವೆಂ ಸ್ಟಾರ್!" ರಾಯನಚಿಂ ಉತ್ರಾಂ ಆಲಿಯಾಚಾ ಕಾನಾಕ್ ಪಡ್ತಾಲಿಂ ತರ್ಯ್, ಆಲಿಯಾಚಿ ಮತ್ ಮಾತ್ರ್ ತ್ಯಾ ಬಾಲಿವುಡಾಚಾ ಪರ್ದ್ಯಾರ್ ಸುಪ್ರಿಯಾಕ್
ಸೊಧ್ತಾಲಿ.
ವ್ಹಯ್, ಆಲಿಯಾಕ್ ಆತಾಂ ಉಡಾಸ್ ಆಯ್ಲೊ.
"ತರ್ ರಾಯನ್ ಸತ್ಚ್ ಉಲಯ್ತಾ?" ಆಲಿಯಾನ್ ಮತಿಂತ್ಚ್ ಸವಾಲ್ ಕೆಲೆಂ.
"ತುವೆಂ ಆಯ್ಕಾಲಾಂ ಜಾವ್ಯೆತ್ ಆಲಿಯಾ..... ಹಾಂವ್ ನವ್ಯಾ ಕಲಾಕಾರಾಂಕ್ ಚಡ್ ಪ್ರಾಮುಖ್ಯ್ ದಿತಾಂ. ತುಕಾ ಪಳೆತಾನಾ ತುಜ್ಯೆ ಥಂಯ್ ಏಕ್ ಬಾಲಿವುಡಾಕ್ ನವೆಂ ಆರ್ಟಿಸ್ಟ್ ದಿಸ್ಲ್ಲ್ಯಾ ಪರಿಂ ಮ್ಹಾಕಾ ಜಾಲೆಂ. ತ್ಯಾ ಖಾತಿರ್ ತುಜ್ಯೆ ಲಾಗಿಂ ಉಲಯ್ಲೊಂ. ಬೈ ದಿ ವೇ ಯು ಆರ್ ವೆರ್ರಿ ಬೂಟಿಫುಲ್! ಭೋವ್ಶ್ಯಾ ತುವೆಂ ತುಕಾಚ್ ತ್ಯಾ ಆರ್ಶ್ಯಾಂತ್ ಯೆದೊಳ್ ಸಾರ್ಕೆಂ ಪಳಂವ್ಕ್ ನಾ ಆಸ್ತೆಲೆಂ. ಹಾಂವ್ ಸತ್ ಉಲಯ್ತಾಂ ಯು ಆರ್ ಮೋಸ್ಟ್ ಬ್ಯೂಟಿಫುಲ್! ತುಕಾ ಕೆದ್ನಾಂಯ್ ಬಾಲಿವುಡಾಕ್ ಯೇಂವ್ಕ್ ಜಾಯ್ ಮ್ಹಣೊನ್ ಜಾತಾ ಜಾಲ್ಯಾರ್ ಮ್ಹಜೊ ಉಡಾಸ್ ಕರ್. ಹೆಂ ಮ್ಹಜೆಂ ಪೋನ್ ನಂಬರ್ ಘೆ. ಬಾಲಿವುಡಾಚಾ ಫಿಲ್ಮಾಂಕ್ ಹಾಂವ್ ಫೈನಾನ್ಸ್ ಕರ್ತಾಂ. ಹ್ಯಾ ಹಾಂಗಾಸರ್ ಚಿತ್ರೀಕರಣ್ ಚಲ್ಚ್ಯಾ ಫಿಲ್ಮಾಕ್ಯ್ ಹಾಂವ್ಚ್ ಫೈನಾನ್ಸ್
ಕರ್ತಾಂ!"
ಆಲಿಯಾ ಆಯ್ಕಾತಾಲೆಂ ಮಾತ್ರ್ ಶಿವಾಯ್ ತೊಂಡಾಂತ್ ಜೀಬ್ ನಾತ್ಲೆಲ್ಯಾ ಪರಿಂ ತೆಂ ಮೌನ್ ಜಾಲ್ಲೆಂ. ಆಪ್ಣಾ ಮುಕಾರ್ ಕಿತೆಂ ಚಲ್ತಾ ತೆಂ ಏಕ್ ಸಪಾಣ್ ಮ್ಹಳ್ಳ್ಯಾ ಪರಿ ತಾಕಾ ಜಾತಾಲೆಂ.
"ನೋಟ್ ಡೌನ್!" ರಾಯನಾನ್ ಆಪ್ಲ್ಯಾ ಸೆಲ್ಪೋನಾಚೆಂ ನಂಬರ್ ಸಾಂಗ್ತಾನಾ ಆಲಿಯಾನ್ ಆಪ್ಣಾಕ್ಚ್ ಕಳಿತ್ ನಾತ್ಲೆಲ್ಯಾ ಪರಿಂ ತೆಂ ನಂಬರ್ ಘೆತ್ಲೆಂ.
"ಡು ನಾಟ್ ಡಿಲೀಟ್ ದಿಸ್ ನಂಬರ್!" ತೊಚ್ಚ್ ಪರ್ತ್ಯಾಕ್ ಉಲಯ್ಲೊ. ಕಿತ್ಲೆಶೆ ಜಣ್ ಹ್ಯಾ ನಂಬ್ರಾಕ್ ರಾಕೊಣ್ ಆಸಾತ್. ತುವೆಂ ಮ್ಹಾಕಾ ತುಜೆಂ ನಾಂವ್ ಸಾಂಗ್ಲ್ಯಾರ್ ಪುರೊ. ತುಂ ಕೋಣ್ ಮ್ಹಳ್ಳೆಂ ಮ್ಹಾಕಾ ಕಳ್ತೆಲೆಂ. ಹಾಂವ್ ಕೊಣಾಕ್ ಏಕ್ ಪಾವ್ಟಿಂ ಮೆಳ್ತಾಂ ಪಳೆ ತಾಕಾ ಹಾಂವ್ ಕೆದಿಂಚ್ ವಿಸ್ರಾನಾ! ......ತುಕಾಯ್! ಲೆಟ್ ಮಿ ಗೋ ನೌ! ಬೈ ದಿ ವೇ.... ಆಜ್ ತುಕಾಚ್ಚ್ ಏಕ್ ಪಾವ್ಟಿಂ ಸಾರ್ಕೆಂ ಆರ್ಶ್ಯಾಂತ್ ಪಳೆ. ತುಕಾ ಮ್ಹಜ್ಯಾ ಟೆಲಿಪೋನ್ ನಂಬ್ರಾಚೊ ಉಡಾಸ್
ಯೆತಲೊ!"
ರಾಯನಾಚೆಂ ಉಲವ್ಣೆಂ ಆಲಿಯಾಚಾ ಕಾನಾಂಕ್ ಪಡ್ಚೆಂ ತೆಂ, ಆಲಿಯಾಕ್ ರಾಯನಾ ಸಾಂಗಾತಾ ಹ್ಯಾ ಸಂಸಾರಾ ಥಾವ್ನ್ ದುಸ್ರ್ಯಾಚ್ ಸಂಸಾರಾಕ್ ಆಪವ್ನ್ ವರ್ತಾ ತಶೆಂ ಜಾಲೆಂ. ತೆಂ ತಾಚಿಂ ಉತ್ರಾಂ ತಶಿಂಚ್ ಕಾನ್ ದೀವ್ನ್ ಆಯ್ಕೊನ್ ಆಸ್ಲ್ಲ್ಯಾಪರಿಂಚ್, ತಾಕಾಚ್ಚ್ ಕಳಿತ್ ನಾತ್ಲೆಲ್ಯಾ ಪರಿಂ ತಾಣೆಂ ಆಪ್ಲ್ಯಾ ಮೊಬಾಯ್ಲ್ ಪೊನಾಚೆರ್ ರಾಯನಾಚೆಂ ನಂಬರ್ ಬರಯ್ಲೆಂ.
"ಓ.ಕೆ. ದೆನ್ ಬಾಯ್!" ರಾಯನ್ ಕಸೊ ಆಯಿಲ್ಲೊ ತಸೊಚ್ ಮಾಯಾಗ್ ಜಾಲೊ. ಪುಣ್, ಆಲಿಯಾಚಾ ಮತಿಂತ್ ಮಾತ್ರ್ ವಾದಳ್ ಉಟವ್ನ್ ಗೆಲ್ಲೊ. ಹ್ಯಾ ಉಪ್ರಾಂತ್ ಆಲಿಯಾಕ್ ಆಪ್ಲ್ಯಾ ಭಂವ್ತಿಂ ಕಾಂಯ್ ಮನ್ ಲಾಗ್ಲೆಂ ನಾ. ಆಪ್ಣಾ ಸಾಮ್ಕಾರ್ ವಾದಾಳಾ ಪರಿಂ ಯೇವ್ನ್ ಆಪ್ಲ್ಯಾ ಮತಿಂತ್ ತೂಫಾನ್ ಉಟವ್ನ್ ಗೆಲ್ಲ್ಯಾ ರಾಯನಾಕ್ಚ್ ತೆಂ ಚಿಂತ್ಚಾರ್ ಪಡ್ಲೆಂ. ಎಕ್ಸುರೆಂ ಉಭೆಂ ಜಾವ್ನ್ ರಾಯನಾಕ್ ನಿಯಾಳ್ತಾನಾ, ರಾಯನಾನ್ ಉಚಾರ್ಲ್ಲಿಂ ಹರ್ಯೇಕ್ ಉತ್ರಾಂ ಸತ್ಚ್ ಮ್ಹಳ್ಳ್ಯಾ ಪರಿಂ ಆಲಿಯಾಕ್ ಭೊಗ್ಲೆಂ. ತಾಕಾಚ್ ಕಳಿತ್ ನಾತ್ಲೆಲ್ಯಾ ಪರಿಂ, ತಾಣೆಂ ಆಪ್ಲ್ಯಾ ವ್ಯಾನಿಟಿ ಬ್ಯಾಗಾ ಭಿತರ್ಲೊ ಲ್ಹಾನ್ ಆರ್ಸೊ ಭಾಯ್ರ್ ಕಾಡ್ಲೊ ಆನಿ ಆಪ್ಣಾಕ್ಚ್ ಏಕ್ ಪಾವ್ಟಿಂ ತಾಣೆಂ ತ್ಯಾ ಆರ್ಶ್ಯಾಂತ್ ಪಳೆಲೆಂ. ತಾಕಾಚ್ ತೆಂ ಮಸ್ತ್ ಸೊಭಿತ್ ದಿಸ್ಲೆಂ.
"ತರ್ ರಾಯನ್ ಸತ್ಚ್ ಉಲಯಿಲ್ಲೊ?" ಆಲಿಯಾಚಾ ಸವಾಲಾಕ್ ಜವಾಬ್ ದೀಂವ್ಕ್ ಥಂಯ್ಚರ್ ರಾಯನ್ ನಾತ್ಲ್ಲೊ.
ತಿತ್ಲೆಂಚ್!
ರಾಯನ್ ಖಂಯ್ಸರ್ಯ್ ದಿಸ್ತಾಗೀ ಮ್ಹಣೊನ್ ಆಪ್ಲ್ಯಾ ಭಂವ್ತಿ, ತ್ಯಾ ಚಿತ್ರೀಕರಣಾಚ್ಯಾ ಲೊಕಾ ಮಧೆಂ, ಹೆವ್ಶಿಂ ತೆವ್ಶಿಂ ಆಲಿಯಾನ್ ಆಪ್ಲಿ ದೀಷ್ಟ್ ಭೊಂವ್ಡಾಯ್ಲಿ. ಪುಣ್ ರಾಯನ್ ತಾಚ್ಯಾ ದೊಳ್ಯಾಂಕ್ ಖಂಯ್ಸರ್ಯ್ ದಿಸ್ಲೊ ನಾ.
**************
"ಆಲಿಯಾ....!?"
ಶಬೀರ್ ಅಹ್ಮದ್, ಆಲಿಯಾಚೊ ಬಾಪಯ್ ಏಕ್ ಲಾಂಭ್ ಶ್ವಾಸ್ ಸೊಡುನ್, ಆತಾಂ ಸವ್ಕಾಸ್ ಆಲಿಯಾಚಾ ಲಾಗಿಂ ಆಯ್ಲೊ. ಆಪ್ಲ್ಯಾ ಹಾತಾಂನಿ ತಾಣೆಂ ಧುವೆಚಾ ಬಾವ್ಳ್ಯಾಂಕ್ ಧರುನ್, ಆಪ್ಲ್ಯಾ ನಿದ್ಚ್ಯಾ ಕುಡಾಚಾ ಜನೆಲಾ ಥಾವ್ನ್ ಭಾಯ್ರ್, ತ್ಯಾ ಮೊಳಾಬಾರ್ ದೀಷ್ಟ್ ವರುನ್, ಅನಂತಾಕ್ ಪಳಂವ್ಚಾ ಆಲಿಯಾಕ್ ತಾಣೆಂ ಆಪ್ಣಾ ತೆಂವ್ಶಿ ಘುಂವ್ಡಾಯ್ಲೆಂ.
"..........?"
ಆಲಿಯಾಚಾ ದೊಳ್ಯಾಂನಿ ಶೂನ್ಯಾತಾ ಉಪ್ಯೆತಾಲಿ. ತಾಣೆಂ ತಶೆಂಚ್ ಕಿತೆಂ ಮ್ಹಳ್ಳ್ಯಾ ನದ್ರೆನ್ ಆಪ್ಲ್ಯಾ ಬಾಪಾಯ್ಕ್ ಪಳೆಲೆಂ.
"ಪಳೆ ಪುತಾ....!" ಶಬೀರ್ಚ್ ಉಲಯ್ಲೊ. "...... ತುಜ್ಯಾ ಲ್ಹಾನ್ಪಣಾರ್ ಥಾವ್ನ್ ತುವೆಂ ಕಿತೆಂ ಮಾಗ್ಲಾಂಯ್ ತೆಂ ತುಕಾ ಹಾವೆಂ ದಿಲಾಂ. ತುವೆಂ ಆಶೆಲ್ಲೆಂ ತುಕಾ ಹಾಡುನ್ ದಿಲಾಂ......! ಹಾಂತು ಮ್ಹಜೊ ಕಾಂಯ್ ಸ್ವಾರ್ಥ್ ನಾ. ಮ್ಹಜಿ ಆಶಾ ಇತ್ಲಿಚ್ ಕೀ......, ಮ್ಹಜಿಂ ಭುರ್ಗಿಂ ಬರೆಂ ಶಿಕೊನ್ ಫಾಲ್ಯಾಂ ಸಮಾಜೆಂತ್ ಏಕ್ ಬರೆಂ ನಾಂವ್ ಹಾಡುಂಕ್ ಜಾಯ್ ಮ್ಹಳ್ಳೆಂ
ಮಾತ್ರ್.....!"
ಶಬೀರ್ ಧುವೆಚಾ ಬಾವ್ಳ್ಯಾಂಕ್ ಧರುನ್ ತಾಕಾ ಸಮ್ಜಾಯ್ತಾಲೊ ತರ್ಯ್ ಆಲಿಯಾಚೆ ದೊಳೆ ಮಾತ್ರ್, ಆಪ್ಲ್ಯಾ ಆಂಗ್ಣಾಂತ್ ಕಸಲೆಂ ಏಕ್ ದುಸ್ರೆಂಚ್ ದರ್ಶನ್ ಪಳೆತಾತ್ ತಶೆಂ ದಿಸ್ತಾಲೆ. ಎಕಾ ವಾಟೆನ್, ತ್ಯಾ ದೊಳ್ಯಾಂ ದಿಷ್ಟೆಂತ್ ಮಂದ್ ಮಂದ್ ಉಜ್ವಾಡ್ ಫಾಂಕ್ಚಿ ನಿರಾಶಾ, ಸ್ಪಶ್ಟ್ ದಿಸೊನ್ ಯೆತಾಲಿ ಜಾಲ್ಯಾರ್, ಎಕಾ ವಾಟೆನ್, ತ್ಯಾಚ್ ದೊಳ್ಯಾಂ ಮಧೆಂ, ಕಸಲೆಂ ಏಕ್ ವಿಚಿತ್ರ್ ಸಪಾಣ್ ಉಪ್ಯೆತಾ ತಶೆಂ ದಿಸ್ತಾಲೆಂ.
"ಅಬ್ಬೂ......!"
ಸವ್ಕಾಸ್ ಆಲಿಯಾನ್ ಆಪ್ಲ್ಯಾ ಬಾಪಾಯ್ಚಾ ಹಾತಾಂಕ್ ಆಪ್ಲ್ಯಾ ದೊನ್ಯ್ ಹಾತಾನಿಂ ಧರ್ಲೆಂ. ತ್ಯಾ ಆಪ್ಲ್ಯಾ ಬಾಪಾಯ್ಚ್ಯಾ ಹಾತಾಂಕ್ ಆಪ್ಲ್ಯಾ ಹಾತಾಚಾ ತಾಳುವೆರ್ ದವರ್ನ್, ವ್ಹಳೂ ತೆಂ ಆತಾಂ ತ್ಯಾ ಆಪ್ಲ್ಯಾ ಬಾಪಾಯ್ಚಾ ಹಾತಾಂಕ್ ಪೊಶೆಂವ್ಕ್ ಲಾಗ್ಲೆಂ. ತಾಚಿ ದೀಷ್ಟ್ ಬಾಪಯ್ ಮುಖಾರ್ ದೀನ್ಪಣಿಂ ಬಾಗ್ವಾಲ್ಲಿ. ತಾಚ್ಯಾ ವೊಂಟಾಂನಿ ಉತ್ರಾಂ ಉಮಾಳುಂಕ್ ಲಾಗ್ಲ್ಲಿಂ ತರ್ಯ್ ತೆಂ ಉಲಯ್ಲೆಂ ನಾಂ. ಕಸಲೆಂ ಏಕ್ ಅವ್ಯಕ್ತ್ ಚಿಂತಾಪ್ ತಾಚಾ ಮತಿ ಪಡ್ದ್ಯಾರ್ ಉಟೊನ್ ಆಯ್ಲ್ಯಾರ್ಯ್ ತ್ಯಾ ಚಿಂತ್ಪಾಕ್ ತಾಣೆಂ ಆಪ್ಲ್ಯಾ ಬಾಪಯ್ ಮುಕಾರ್ ಉಗ್ಡಾಪೆಂ ಕೆಲೆಂ ನಾ. ತೆಂ ತಶೆಂಚ್ ಮೌನ್ ಸಾಂಬಾಳುನ್ ರಾವ್ಲೆಂ.
"ಸಾಂಗ್ ಆಲಿಯಾ....! ತುಂ ಕಿತೆಂ ಸಾಂಗೊಂಕ್ ಸೊಧ್ತಾಯ್?" ಶಬೀರಾಚಿ ನದರ್ ಆಪ್ಲ್ಯಾ ಧುವೆಚೆರ್ಚ್ ಖಂಚ್ಲ್ಲಿ. ತೊ ಆಪ್ಲ್ಯಾ ಧುವೆಕ್ ಆಯ್ಕೊಂಕ್ ಆಶೆಲೊ. ಆಪ್ಲ್ಯಾ ಧುವೆಕ್ ಆಪ್ಣೆ ಆಯ್ಕೊಂಚಿ ಚಡ್ ಗರ್ಜ್ ಆಸಾ ಮ್ಹಳ್ಳೆಂ ತಾಕಾ ಸಮ್ಜಾಲ್ಲೆಂ.
"........" ಹ್ಯಾ ವಗ್ತಾರ್ ಆಲಿಯಾ ತಾಚ್ಯಾ ಬಾಪಾಯ್ಲಾಗಿಂ ಮಸ್ತ್ ಉಲಂವ್ಕ್ ಆಶೆಲೆಂ ಜಾಲ್ಯಾರ್ಯ್ ಆಲಿಯಾ ಕಾಂಯ್ ಉಲಯ್ಲೆಂ ನಾ. ತೆಂ ತಶೆಂಚ್ ಮೌನ್ ರಾವ್ಲೆಂ.
"ಪಳೆ ಬೇಟಾ.... ತುಂ ಜಣಾಂಯ್ ಹಾಂವ್ ತುಜೊ ಮಸ್ತ್ ಮೋಗ್ ಕರ್ತಾಂ. ತುವೆಂ ಕಿತೆಂಯ್ ಸಾಂಗ್ಲ್ಯಾರ್ಯ್ ಹಾಂವ್ ತುಕಾ ನಾ ಮ್ಹಣ್ಚೊ ನಾ!" ದುಸ್ರೊ ಉಪಾಯ್ ನಾಸ್ತಾನಾ ಶಬೀರ್ಚ್ ಉಲಯ್ಲೊ.
"........!"
"ಬೇಟಾ.....? ಅಮ್ಮಿ ತುಕಾ ರಾಗಾನ್ ಉಲಯ್ಲಿ ಮ್ಹಣೊನ್ ಬೆಜಾರ್ ಜಾಲಾಂ.....? ತಿ ತುಜ್ಯಾ ಬರ್ಯಾ ಖಾತಿರ್ಚ್ ತುಕಾ ಉಲಯ್ತಾ ಪುತಾ.....! ತಿಕಾ ತುಜೊ ಹುಸ್ಕೊ ಆಸಾ!" ಶಬೀರಾನ್ ಆಪ್ಲ್ಯಾ ಧುವೆಕ್ ಸಮಾಧಾನ್ ಕರುಂಕ್ ಪ್ರಯತ್ನ್ ಕೆಲೆಂ.
"ತಶೆಂ ನ್ಹಯ್ ಅಬ್ಬೂ.....!" ಆಲಿಯಾನ್ ಸುಮಾರ್ ವೆಳಾಚೆಂ ಆಪ್ಲೆಂ ಮೌನ್ ಮೊಡ್ಲೆಂ.
"ಬರೆಂ....! ಸಾಂಗ್ ತರ್ ವಿಶಯ್ ಕಿತೆಂ?"
"ಅಬ್ಬೂ..... ಮಾಕಾ.....!"
ತಿತ್ಲೆಂ!
ಕಿತೆಂಗೀ ಉಲಂವ್ಚ್ಯಾ ಆಲಿಯಾಚೆಂ ತೋಂಡ್ ತಶೆಂಚ್ ಭಂಧ್ ಜಾಲೆಂ.
ಆಲಿಯಾನ್ ಆಪ್ಲ್ಯಾ ಮತಿಕ್ ಆನಿ ತ್ಯಾ ತಾಚ್ಯಾ ಮತಿಂತ್ಲ್ಯಾ ಚಿಂತ್ನಾಂಕ್, ಆಪ್ಲ್ಯಾ ಬಾಪಯ್ ಮುಕಾರ್ ಉಗ್ತೆಂ ದವರ್ಚೆಂ ಪ್ರಯತ್ನ್ ಕರ್ತಾನಾ, ಘರ್ಚೆಂ ಟೆಲಿಫೋನ್ ವಾಜೊಂಕ್ ಲಾಗ್ಲೆಂ. ದೊಗಾಂಯ್ನಿ ಆವಾಜ್ ಆಯ್ಕಾಲ್ಲ್ಯಾ ತೆವ್ಶಿಂ ತಕ್ಲಿ ಘುಂವ್ಡಾಯ್ಲಿ. ತೀನ್ ಪಾವ್ಟಿಂ ರಿಂಗ್ ಜಾಲ್ಲೆಂ ಟೆಲಿಫೋನ್ ಭಂದ್ ಜಾತಾನಾ ಭೋವ್ಶ್ಯಾ ಭಾಯ್ಲ್ಯಾ ಸಾಲಾಂತ್ ಕೊಣೆಂಯ್ ಟೆಲಿಫೋನ್ ಕಾಡ್ಲಾಂ ಆಸ್ತೆಲೆಂ ಮ್ಹಣೊನ್ ಚಿಂತ್ಲ್ಯಾ ಶಬೀರಾನ್,
"ಹಾಂ ಆಲಿಯಾ ಸಾಂಗ್...! ತುಕಾ.... ಕಿತೆಂ?"
"ಅಬ್ಬೂ, ಮ್ಹಾಕಾ ದಾಕ್ತೆರ್ ಜಾಂವ್ಕ್ ಮನ್ ನಾ...!" ವ್ಹಳೂ ತಾಳ್ಯಾನ್ ಆಲಿಯಾನ್ ತೋಂಡ್ ಉಘಡ್ಲೆಂ.
"ದಾಕ್ತೆರ್ ಜಾಂವ್ಕ್ ಮನ್ ನಾ? ....ಕಿತ್ಯಾಕ್ ಬೇಟಾ?
ಶಬೀರಾನ್ ವಿಚಾರ್ಲೆಲ್ಯಾ ಸವಾಲಾಕ್ ಆಲಿಯಾ ಆತಾಂ ಜವಾಬ್ ಸೊಧುಂಕ್ ಲಾಗ್ಲೆಂ.
"........?"
"ಓ. ಕೆ. ತುಕಾ ದಾಕ್ತೆರ್ ಜಾಂವ್ಚೆಂ ಮನ್ ನಾ ಜಾಲ್ಯಾರ್ ವ್ಹಡ್ ನಾ. ಆತಾಂ ತುಂಚ್ ಸಾಂಗ್...... ವಾಟ್ ಡು ಯು ವಾಂಟ್? ತುಜಿ ಕುಶಿ ಕಿತೆಂ.....?" ಶಬೀರಾನ್ ಆಪ್ಲ್ಯಾ ಧುವೆಕ್ ಆಯ್ಕೊಂಕ್ ಚಿಂತ್ಲೆಂ.
ತಿತ್ಲ್ಯಾರ್,
"ಆಲಿಯಾ ತುಕಾ ಫೋನ್!" ಆಲಿಯಾ ಕಿತೆಂಗೀ ಉಲಂವ್ಕ್ ತೋಂಡ್ ಉಘಡ್ತಾನಾ, ಆಲಿಯಾಚಾ ರೂಮಾ ಭಿತರ್ ಆಯೆಲ್ಲ್ಯಾ ರಝಿಯಾನ್ ಭಯ್ಣಿಕ್ ಫೋನ್ ಆಸಾ ಮ್ಹಣೊನ್ ಆಲಿಯಾಕ್ ಜಾಗಯ್ಲೆಂ.
"ಬೇಟಾ ರಝಿಯಾ....?" ಆಲಿಯಾಕ್ ಪೊನಾಚಿ ಖಬಾರ್ ದೀವ್ನ್, ಪಾಟಿಂ ಭಾಯ್ರ್ ವೆಚ್ಯಾ ಆಪ್ಲ್ಯಾ ನಿಮಾಣ್ಯಾ ಧುವೆಕ್ ಶಬೀರಾನ್ ಆಪಯ್ಲೆಂ.
"ಹಾಂ ಅಬ್ಬೂ...?" ಕಿತೆಂ ಮ್ಹಳ್ಳ್ಯಾ ನದ್ರೆನ್, ರಝಿಯಾ ,ಥಂಯ್ಚ್ ತ್ಯಾ ಆಲಿಯಾಚಾ ನಿದ್ಚ್ಯಾ ಕುಡಾಚಾ ದಾರಾರ್ ರಾವೊನ್ ಬಾಪಯ್ಕ್ ಪಳವ್ನ್ ರಾವ್ಲೆಂ.
"ಬೇಟಾ...? ಅಮ್ಮಿಕ್ ಸಾಂಗ್.... ದೋನ್ ಕಪ್ಪ್ ಚ್ಹಾ ಹಾಡುಂಕ್...!"
ಶಬೀರಾನ್ ರಝಿಯಾಕ್ ಸಾಂಗ್ತಾನಾ ’ಜಾಯ್ತ್’ ಮ್ಹಳ್ಳ್ಯಾ ಜಿನ್ಸಾಚೆರ್ ತಕ್ಲಿ ಹಾಲವ್ನ್ ರಝಿಯಾ ಭಾಯ್ರ್ ಗೆಲೆಂ. ರಝಿಯಾನ್ ಆಪ್ಣಾಕ್ ಪೋನ್ ಆಸಾ ಮ್ಹಣೊನ್ ಸಾಂಗ್ಲ್ಲ್ಯಾನ್, ಆಪ್ಲ್ಯಾ ಬಾಪಾಯ್ಚ್ಯಾ ಹಾತಾಂಕ್ ಸೊಡುನ್, ಆಲಿಯಾ, ಆಪ್ಲ್ಯಾ ರೂಮಾಂತ್ಲ್ಯಾ ಫೋನಾ ತೆವ್ಶಿಂ ಚಮ್ಕಾಲೆಂ. ತಾಣೆಂ ಆಪ್ಲ್ಯಾ ಕುಡಾಂತ್ಲ್ಯಾ ಕೋರ್ಡ್ಲೆಸ್ ಟೆಲಿಫೋನಾಕ್ ಹಾತಿಂ ಉಕ್ಲುನ್,
"ಹಲೋ..."
"ಸಲಾಮ್ ಮಾ ಆಲೇಕ್ಕುಮ್!" ತ್ಯಾ ಕುಶಿಂನ್ ಥಾವ್ನ್ ಚಲ್ಯಾಚೊ ತಾಳೊ.
"ಮಾ ಆಲೇಕ್ಕುಮ್ ಸಲಾಮ್! ಸಮೀರ್ ತುಂ? ಕಸೊ ಆಸಾಯ್?" ತ್ಯಾ ಕುಶಿಚಾ ತಾಳ್ಯಾಕ್ ಪಾರ್ಕುಂಕ್ ಆಲಿಯಾಕ್ ಚಡ್ ವೇಳ್ ಲಾಗ್ಲೊ ನಾ.
"ಆಸಾಂ.... ಪೈನ್... ಮಾಗಿರ್? ತುಂ ಕಶೆಂ ಆಸಾಯ್?"
"ಎಸ್.... ಎಸ್, ಐ ಯಾಮ್ ಫೈನ್...."
"ಆಲಿಯಾ.....?" ಆತಾಂ ಸಮೀರಾಚೊ ತಾಳೊ ಥೊಡೊ ಪಾದ್ದೆಲ್ಲ್ಯಾ ಪರಿಂ ಜಾಲೊ.
"ಹಾಂ... ಸಾಂಗ್ ಸಾಂಗ್...."
"ಐ ಯಾಮ್ ಸಾರ್ರಿ..... ಹಾವೆಂ ತುಕಾ ಕಾಲೇಜಿಂತ್ ಮಸ್ತ್ ಸೊಧ್ಲೆಂ.... ತುಂ ಮೆಳೊಂಕ್ ನಾಂಯ್.... ತಶೆಂ....!"
"ಹಾಂವ್ ಆನಿ ಕಾಲೇಜಿಕ್ ಯೆಂವ್ಚಿಂ ನಾ ಸಮೀರ್.....!" ಆಲಿಯಾ ಉಲಯ್ತಾನಾ ಆಪ್ಲ್ಯಾ ಬಾಪಯ್ ತೆವ್ಶಿಂ ಘುಂವ್ಲೆಂ. ಆಪ್ಲ್ಯಾ ಧುವೆಚಿಂ ಉತ್ರಾಂ ಆಯ್ಕೊನ್ ’ಸಟ್ಟ್’ ಕರುನ್ ಶಬೀರಾನ್ ಆಪ್ಲಿ ತಕ್ಲಿ ಉಭಾರುನ್ ಆಲಿಯಾಕ್ಚ್ ಪಳೆಲೆಂ. ಆಪ್ಲೆಂ ಧುವ್ ಹ್ಯಾ ಉಪ್ರಾಂತ್ ಕಾಲೇಜಿಕ್ ವಚಾನಾ? ಕಿತ್ಯಾಕ್? ಶಬೀರಾನ್ ಆಪ್ಲ್ಯಾ ದೊಳ್ಯಾಂನಿಚ್ ಆಲಿಯಾಕ್ ಸವಾಲ್ ಕೆಲೆಂ. ಆಲಿಯಾ ಬಾಪಾಯ್ಕ್ ತಶೆಂಚ್ ಪಳಂವ್ಕ್ ಸಕ್ಲೆಂ ನಾ. ತಾಣೆಂ ತಕ್ಲಿ ತೆವ್ಶಿಂ ಘುಂವ್ಡಾಯ್ಲಿ.
"ಕಾಲೇಜಿಕ್ ಯೆಂವ್ಚೆಂ ನಾಂಯ್?" ಸಮೀರಾಚಾ ತಾಳ್ಯಾಂತ್ ಆಶ್ಚರ್ಯ್ ಉಟೊನ್ ರಾವ್ಲೆಂ. "ಕಿತ್ಯಾಕ್.....?"
"ಮ್ಹಾಕಾ ತೆಂ ತುಕಾ ಸಾಂಗೊಂಕ್ ಕಳಾನಾ.... ಐ ಜಸ್ಟ್ ಕಾಂಟ್ ಸೇ ದ್ಯಾಟ್....!"
"ಬಟ್ ವೈ....?" ಆಲಿಯಾಚಾ ಉತ್ರಾಂನಿ ಸಮೀರಾಕ್ ಅಚಾನಕ್ ಶಾಕ್ ಲಾಗ್ಲ್ಲ್ಯಾ ಪರಿಂ ಜಾಲೆಂ.
"........."
"ಯು ಮೀನ್...?!" ಸಮೀರ್ಚ್ ಉಲಯ್ಲೊ.
ಆಲಿಯಾ ಆತಾಂ ಕಾಂಯ್ ಉಲಯ್ಲೆಂ ನಾ. ತಾಕಾ ಕಿತೆಂ ಉಲಂವ್ಚೆಂ ಮ್ಹಳ್ಳೆಂಚ್ ಕಳ್ಳೆಂ ನಾ. ಆಪ್ಲೊ ಬಾಪಯ್ ಆಪ್ಣಾ ಮುಖಾರ್ಚ್ ಆಪ್ಲ್ಯಾ ಖಾಟಿಯೆರ್ ಬಸೊನ್ ಆಪ್ಣಾಚೆಂ ಆನಿ ಸಮೀರಾಚೆಂ ಉಲವ್ಣೆಂ ಆಯ್ಕಾತಾ ಮ್ಹಳ್ಳಿ ಖಂತ್ ಆಲಿಯಾಕ್ ಭಿಲ್ಕುಲ್ ನಾತ್ಲ್ಲಿ ಯಾ ಬಾಪಾಯ್ಚಿ ಭಿರಾಂತ್ ತಾಕಾ ನಾತ್ಲ್ಲಿ. ತಶೆಂಯ್ ಆಪ್ಲೊ ಬಾಪಯ್, ತಸಲ್ಯಾ ಸಗ್ಳ್ಯಾ ಲ್ಹಾನ್ ವಿಶಯಾಂತ್ ಮೆತೆರ್ ಜಾವ್ನ್, ಸವಾಲಾಂಚೊ ತುರೊ ಚಡಂವ್ಚೊ ಮನಿಸ್ಯ್ ನ್ಹಯ್ ಮ್ಹಣೊನ್ ತೆಂ ಆಪ್ಲ್ಯಾ ಭುರ್ಗ್ಯಾಪಣಾರ್ ಥಾವ್ನ್ ಜಾಣಾಂ ಆಸ್ಲ್ಲೆಂ. ಶಬೀರಾಚಾ ಘರಾ ಸರ್ವಾಂಕ್ ಬರಾಬರ್ ಸ್ವಾತಂತ್ರ್ ಆಸ್ಲ್ಲೊ. ಸರ್ವಾಂಕ್ ಎಕಾಚ್ ಮಾಪಾಚಿಂ ಹಕ್ಕಾಂ, ಸರ್ವಾಂಕ್ ಎಕಾಚ್ ಥರಾಚಿ ಸವ್ಲಾತಾಯ್ ಆಸ್ಲ್ಲಿ. ತಶೆಂ ಆಸ್ತಾನಾ......!
"ಆಲಿಯಾ ಆರ್ ಯು ದೇರ್?"
ಆಪ್ಲ್ಯಾ ಸವಾಲಾಕ್ ಕಾಂಯ್ಚ್ ಜವಾಬ್ ದೀನಾಸ್ತಾನಾ ಆಲಿಯಾನ್ ತ್ಯಾ ಕುಶಿಂನ್ ಮೌನ್ ಸಾಂಬಾಳ್ಲ್ಲೆಂ ಪಳವ್ನ್ ಸಮೀರಾನ್ ವಿಚಾರ್ಲೆಂ. ತ್ಯಾ ಕುಶಿನ್ ಆಲಿಯಾ ಆಪ್ಲ್ಯಾ ಆವಾಜಾಕ್ ಆಯ್ಕಾತಾ ವಾ ನಾ ಮ್ಹಳ್ಳ್ಯಾವಿಶಿಂ ತಾಕಾ ದುಬಾವ್ ಜಾಲ್ಲೊ.
"ಹಾಂ....!"
ಆಪ್ಲ್ಯಾ ಕಪಾಲಾರ್ ಗಳ್ಚಾ ಕೆಸಾಂಕ್, ಆಲಿಯಾನ್ ಆಪ್ಲ್ಯಾ ಹಾತಾನ್ ಪಾಟಿಂ ಕರುನ್, ತಾಂಕಾ ತಶೆಮ್ಚ್ ಆಪ್ಲ್ಯಾ ಮಾತ್ಯಾರ್ ಬಸಯ್ಲೆ. ತಾಣೆಂ ಸಮೀರಾಕ್ ದಿಲ್ಲ್ಯಾ ಜವಾಬೆಂತ್ ಕಸಲಿಗೀ ಏಕ್ ದ್ರಡತಾ ಆಸ್ಲ್ಲಿ.
"ಆಲಿಯಾ ತುಂ ಸಾರ್ಕೆಂ ಆಸಾಯ್ಮೂ......?"
ಸಮೀರಾಚಾ ತಾಳ್ಯಾಂತ್ ಆತಾಂ ದುಬಾವ್ ಆಸ್ಲ್ಲೊ. ಆಲಿಯಾನ್ ಆಪುಣ್ ಕಾಲೇಜಿಕ್ ಯೆಂವ್ಚಿಂ ನಾ ಮ್ಹಳ್ಳ್ಯಾ ವಿಚಾರಾಂತ್ ಖಂಯ್ ತರ್ಯ್ ಆಲಿಯಾಕ್ ಪ್ರಾಬ್ಲೆಮ್ ಆಸ್ತೆಲೆ. ಆಶೆಂ ಸಮೀರ್ ಚಿಂತಾಲೊ.
"ಯು ಜಸ್ಟ್ ಟೆಲ್ ಮಿ ಸಮೀರ್.....! ತುಂ...., ತುಂ ತಶೆಂ ಕಶೆಂ ಕರುಂಕ್ ಸಕ್ತಾಯ್?"
"ಕಶೆಂ ಆಲಿಯಾ....?" ಸಮೀರಾಕ್ ಆಲಿಯಾ ಕಿತೆಂ ಉಲಯ್ತಾ ಮ್ಹಳ್ಳೆಂ ತೆಂ ಸಮ್ಜಾಲೆಂ ನಾ.
ಟೆಲಿಫೋನಾರ್ ಉಲಂವ್ಚೆಂ ಆಲಿಯಾ, ಆತಾಂ ಆಪ್ಲ್ಯಾ ಬಾಪಯ್ ತೆವ್ಶಿಂ ಘುಂವೊನ್ ರಾವ್ಲೆಂ. ತೆಂ ಆಪ್ಲ್ಯಾ ದೊಳ್ಯಾಂನಿ ಆಪ್ಲ್ಯಾ ಬಾಪಯ್ಕ್ಚ್ ಪಳೆತಾಲೆಂ ತರ್ಯ್ ತಾಚಿ ಮತ್ ಮಾತ್ರ್ ಕಿತೆಂಗೀ ದುಸ್ರೆಂಚ್ ಚಿಂತಾಲಿ. ಶಬೀರ್ ಆಲಿಯಾಚಿಂ ಉತ್ರಾಂ ಕಾನಾನಿಂ ಆಯ್ಕಾತಾಲೊ ತರ್ಯ್ ತಕ್ಲಿ ಪಂದಾ ಘಾಲುನ್, ಧರ್ಣಿಕ್ ಪಳವ್ನ್, ತೊ, ಆಪ್ಲ್ಯಾ ಮತಿಂತ್ ಕೆತೆಂಗೀ ಚಿಂತ್ಚ್ಯಾರ್ ಪಡ್ಲ್ಲೊ.
"ತುಂ ಖಂಯ್ಚಾ ವಿಶಿಂ ಉಲಯ್ತಾಯ್.....?"
ಸಮೀರಾನ್ಚ್ ಸವಾಲ್ ಕೆಲೆಂ. ತಾಕಾ ಆಲಿಯಾಚೊ ಮಿಸ್ತೆರ್ ಸಮ್ಜೊಂಕ್ ನಾ.
"ತುಂ ಸಾರ್ಕೊ ಜಾಣಾಂಯ್ ಸಮೀರ್....! ಹಾಂವ್ ಖಂಯ್ಚಾ ವಿಶಯಾಂತ್ ಉಲಯ್ತಾಂ ಮ್ಹಣೊನ್. ತುಜ್ಯಾ ಮಾತಿಕ್ ತುಂ ತಿತ್ಲ್ಯಾ ಸುಲಾಭಾಯೆನ್ ಕಶೆಂ........?"
"ಮತಿಕ್ ಆಮಿಂ ಕಂಟ್ರೋಲ್ ಕರುಂಕ್ ಜಾಯ್ ಆಲಿಯಾ!"
"ಜಾಲ್ಯಾರ್ಯ್.....!"
ಫೊನಾಚೆರ್ ಉಲಂವ್ಚೆಂ ಆಲಿಯಾ ಆತಾಂ ಉಲಯ್ತಾಂ ಉಲಯ್ತಾಂ ಬಾಪಯ್ ತೆವ್ಶಿಂ ಚಲೊನ್ ಆಯ್ಲೆಂ.
"ಜಾಲ್ಯಾರ್ಯ್ ಕಿತೆಂ ಆಲಿಯಾ? ಯು ಜಸ್ಟ್ ಡೋಂಟ್ ಗಿವ್ ಅಪ್....!" ಸಮೀರ್ ಆಲಿಯಾಕ್ ಸಮ್ಜಾಂವ್ಚೆಂ ವ್ಯರ್ಥ್ ಪ್ರಯತ್ನ್ ಕರ್ತಾಲೊ.
"ಐ ಯಾಮ್ ಸಾರ್ರಿ ಸಮೀರ್....! ಇಟ್ಸ್ ಟೂ ಲೇಟ್....!"
"ತರ್ ಹೆಂಚ್ ತುಜೆಂ ಫೈನಲ್ ಡಿಸಿಶನ್?"
"ವ್ಹಯ್ ಸಮೀರ್!"
"ಆಲಿಯಾ ಐ ಪ್ರಾಮಿಸ್ ಯು....! ತುಕಾ...."
"ನೋ ಸಮೀರ್!" ಮ್ಹಳ್ಳ್ಯಾ ಆಲಿಯಾನ್ ಸಮೀರಾಚಿಂ ಮುಕ್ಲಿಂ ಉತ್ರಾಂ ತುಟವ್ನ್ ಸೊಡ್ಲಿಂ. ಆಲಿಯಾಚಾ ಸ್ವಭಾವಾ ವಿಶಿಂ ತೊ ಜಾಣಾಂ ಆಸ್ಲ್ಲೊ. ಆಪ್ಲ್ಯಾ ಮತಿಕ್ ಕಿತೆಂ ಬರೆಂ ದಿಸ್ತಾ ತೆಂಚ್ ಆಲಿಯಾ ಕರ್ತಾಲೆಂ ಶಿವಾಯ್ ಕೊಣಾಯ್ಕ್ಯ್ ತೆಂ ಆಯ್ಕಾನಾ ಮ್ಹಣೊನ್ ತೊ ಖಂಡಿತ್ ಜಾಣಾಂ ತರ್ಯ್ ಆಪ್ಲೆಂ ಏಕ್ ಪ್ರಯತ್ನ್ ಮ್ಹಳ್ಳ್ಯಾ ಪರಿಂ ತಾಣೆಂ ಆಲಿಯಾಕ್ ಪೋನ್ ಕೆಲ್ಲೆಂ. ತಶೆಂ ತಾಕಾ ಕಾಂಯ್ ಆಲಿಯಾಕ್ ಪೋನ್ ಕರಿಜಾಯ್ ಮ್ಹಳ್ಳಿ ಗರ್ಜ್ ನಾತ್ಲ್ಲಿ. ಆಲಿಯಾಚೊ ಸ್ವಭಾವ್ ಆನಿ ತಾಚೆ ಗೂಣ್ ಆಲಿಯಾಕ್ ವಳ್ಕಾಲ್ಲಿಂ ಸಗ್ಳಿಂ ಜಾಣಾಂ ಆಸ್ಲ್ಲಿಂ.
ಆಪ್ಲ್ಯಾ ಫುಡಾರಾಕ್ ಬರೆಂ ಮೇಟ್ ಕಾಡುಂಕ್ ಆಪ್ಲಿ ಜಾಣ್ವಾಯ್ ಪಾವಾನಾ ಜಾತಾನಾ, ಜಾಣ್ವಾಯ್ ಆಸ್ಲ್ಲ್ಯಾನಿಂ ಸಾಂಗ್ಲ್ಲೆಂ ತರ್ಯ್ ಆಯ್ಕೊಂಕ್ ಜಾಯ್ ವಾ ಆಶೆಂ ಆಯ್ಕೊಂಕ್ ಜಾಯ್ನಾತ್ಲ್ಲ್ಯಾಂಕ್, ತಾಣಿಂಚ್ ಖುದ್ದ್ ತಾಂಚಾ ಜಾಣ್ವಾಯೆಕ್ ಪಾಂವ್ಚಿ ಶಾಥಿ ತರ್ಯ್ ಆಸೊಂಕ್ ಜಾಯ್. ಆಲಿಯಾ, ತಾಚ್ಯಾ ಜಿವಿತಾಚೆಂ ಖಂಯ್ಚೇಯ್ ಮೇಟ್ ಕಾಡ್ತಾನಾ, ತ್ಯಾ ಮೆಟಾಕ್ ತೆಂ ಆಪ್ಲ್ಯಾಚ್ ಖುಶೇನ್ ಕಾಡುಂಕ್ ಪೆಚಾಡ್ತಾಲೆಂ ಶಿವಾಯ್ ಆಪ್ಲ್ಯಾ ಬುದ್ವಂತ್ಕಾಯೆನ್ ನ್ಹಯ್. ಆಶೆಂ ಮ್ಹಣೊನ್ ಆಪ್ಣೆಂಚ್ ಕಾಡ್ಲ್ಲ್ಯಾ ಮೆಟಾಂಕ್ ಪಳವ್ನ್ ರಡೊನ್ ಬಸ್ಚೆಂ ಚೆಡುಂ ಆಲಿಯಾ ಭಿಲ್ಕುಲ್ ನ್ಹಯ್ ಆಸ್ಲ್ಲೆಂ.
"ಸಮೀರ್...? ಕಿತೆಂ ಜಾಲೆಂ?" ತ್ಯಾ ಕುಶಿಂನ್ ಸಮೀರಾಚೊ ತಾಳೊ ಆಯ್ಕಾನಾಸ್ತಾನಾ ವೆತಾನಾ ಆಲಿಯಾನ್ ವಿಚಾರ್ಲೆಂ.
"ಕಾಂಯ್ ನಾ ! ಎನಿ ಹೌ..., ಚಾಯ್ಸ್ ಇಸ್ ಯುವರ್ಸ್...! ತಾಚ್ಯೆ ವಯ್ರ್ ಸಗ್ಳೆಂ ಆಪಾಪ್ಲ್ಯಾ ನಶೀಬಾರ್ ಹೊಂದ್ವೊನ್ ಆಸಾ. ಓ.ಕೆ. ದೆನ್..... ಬಾಯ್! ಟೇಕ್ ಕೇರ್. ತುಕಾ ಕೆದಾಳಾಯ್ ಮ್ಹಜಿ ಕಾಂಯ್ ಗರ್ಜ್ ಪಡಾತ್ ಜಾಲ್ಯಾರ್ ಮ್ಹಜೊ ಉಡಾಸ್ ದವರ್....! ಸಲಾಮ್ ಆಲೇಕ್ಕುಮ್..... ಖುದಾ ಆಫೀಜ್....!"
"ಮಾ ಆಲೇಕ್ಕುಮ್ ಸಲಾಮ್....ಖುದಾ ಆಫೀಜ್!"
ಟೆಲಿಪೋನ್ ಭಂದ್ ಕರುನ್ ತೆಂ ಕೋರ್ಡ್ಲೆಸ್ ಟೆಲಿಪೋನ್ ಥಂಯ್ಚ್ ಆಪ್ಲ್ಯಾ ಖಾಟಿಯೆರ್ ಉಡವ್ನ್,
"ಉಫ್..." ಕಸಲ್ಯಾಗೀ ಭಂಧಡೆ ಥಾವ್ನ್ ಸುಟ್ಕಾ ಜೊಡ್ಲೆಲ್ಯಾಪರಿಂ ಆಲಿಯಾನ್ ಸಮಾಧಾನೆಚೊ ಶ್ವಾಸ್ ಸೊಡ್ಲೊ.
"ಬೇಟಾ... ಕಾಂಯ್ ಪ್ರಾಬ್ಲೆಮ್.....?"
ಆಲಿಯಾಚಾ ತೊಂಡಾ ವಯ್ಲೊ ಛಾರೊ ಬದ್ಲಾಲ್ಲೊ ಶಬೀರಾಕ್ ಕಳಾನಾಸ್ತಾನಾ ಗೆಲೊ ನಾ.
"ಅಬ್ಬೂ....? ತುಂ ಮ್ಹಾಕಾ ಏಕ್ ಸಾಂಗ್.....!"
ಆಲಿಯಾ ಲ್ಹಾನ್ ಭುರ್ಗ್ಯಾ ಪರಿಂ ಯೇವ್ನ್ ಬಾಪಾಯ್ಚಾ ಲಾಗಿಂ ಬಸ್ಲೆಂ.
"ಅಬ್ಬೂ....?"
"ಹಾಂ ಬೇಟಾ ಸಾಂಗ್.....!"
"ಅಬ್ಬೂ? ಹ್ಯಾ ಮ್ಹಜ್ಯಾ ಹಾತಾಂಕ್ ಪಳೆ!" ಆಲಿಯಾನ್ ಆಪ್ಲ್ಯಾ ಹಾತಾಂಕ್ ಆಪ್ಲ್ಯಾ ಬಾಪಯ್ ಮುಕಾರ್ ಉಸಯ್ಲೆ.
ಧುವೆಚಾ ಹಾತಾಂಕ್ ಪಳೆಲ್ಲೊ ಶಬೀರ್ ಕಾಂಯ್ಚ್ ಸಮ್ಜಾನಾಸ್ತಾನಾ ಧುವೆಚಾ ಹಾತಾಂಕ್ ಎಕ್ ಪಾವ್ಟಿಂ ಧುವೆಚಾ ತೊಂಡಾಕ್ ಏಕ್ ಪಾವ್ಟಿಂ ಪಳಂವ್ಕ್ ಲಾಗ್ಲೊ. ತಿತ್ಲ್ಯಾರ್ ಸಾರಾ ಘೊವಾಕ್ ಆನಿ ಧುವೆಕ್ ಚ್ಹಾ ಘೆವ್ನ್ ಆಯ್ಲಿ.
ಮುಕ್ಲ್ಯಾ ಟೀಪಾಯಿಚೆರ್ ಚ್ಹಾ ದವರುನ್ ಸಾರಾ ಭಾಯ್ರ್ ವಚೊಂಕ್ ಮೆಟಾಂ ಕಾಡ್ತಾನಾ,
"ಸಾರಾ... ಯೇ ಬಸ್....!" ಶಬೀರಾನ್ ಆಪ್ಲ್ಯಾ ಬಾಯ್ಲೆಕ್ ಆಪ್ಣಾ ಲಾಗಿಂ ಬಸೊಂಕ್ ಹಿಶಾರೊ ಕೆಲೊ.
"ಮ್ಹಾಕಾ ಕುಜ್ನಾಂತ್ ಕಾಮ್ ಆಸಾ. ಆಮ್ಚೊ ಜಾವೇದ್ ಯೆಂವ್ಚೊ ಜಾಲೊ. ವೊರಾಂ ಪಳೆ ಕಿತ್ಲಿಂ ಜಾಲಿಂ....."
ಲಂಡನ್ ಥಾವ್ನ್ ಆಯ್ಲೆಲ್ಯಾ ಜಾವೇದಾಕ್ ಆಜ್ ಶಬೀರಾನ್ ಆಪ್ಲ್ಯಾ ಘರಾ ಜೆವ್ಣಾಕ್ ಆಪಯಿಲ್ಲೆಂ.
"ವ್ಹಡ್ ನಾ ಸಾರಾ. ಉಪ್ರಾಂತ್ ತುಕಾ ಆಲಿಯಾ ರಾಂದ್ಪಾಕ್ ಕುಮಕ್ ಕರುಂಕ್ ಯೆತೆಲೆಂ. ಆಮ್ಚಾ ಭುರ್ಗ್ಯಾಂ ಸಾಂಗಾತಾ ಆಮಿಂ ಬಸೊನ್ ಉಲಂವ್ಚೆಂ ಚಡ್ ಗರ್ಜೆಚೆಂ. ಯೇ... ಯೇ.... ಬಸ್...!" ಶಬೀರಾನ್ ಆಪ್ಲ್ಯಾ ಬಾಯ್ಲೆಕ್ ಆಪಯ್ಲೆಂ. "...... ಜೆವ್ಣಾಚೆಂ ಕಿತೆಂ ವ್ಹಡ್ಲೆಂ? ಜೆವಾಣ್ ಭಾಯ್ರ್ ತಾವ್ನ್ಯ್ ಹಾಡುಂಕ್ ಯೆತಾ!"
ಘೊವಾನ್ ವತ್ತಾಯ್ ಕರ್ತಾನಾ ನಾ ಖುಶೇನ್ ತರ್ಯ್ ಸಾರಾ ಘೊವಾ ಬಗ್ಲೆನ್ ಯೇವ್ನ್ ಬಸ್ಲಿ. ಬಾಪಯ್ ಆನಿ ಧುವೆಚ್ಯಾ ಮಧೆಂ ಕಿತೆಂ ಉಲವ್ಣೆಂ ಜಾಲ್ಯಾರ್ಯ್ ಆಪ್ಣೆಂ ಸಾಂಗ್ಲ್ಲೆಂ ಕಾಂಯ್ ಕೋಣ್ಯ್ ಆಯ್ಕಾನಾ. ಬೆಷ್ಟೆಂ ಹಾವೆಂಚ್ ಆಪ್ಣಾ ಇತ್ಲ್ಯಾಕ್ ಬಡ್ಬಡಾಜಾಯ್ ಆನಿ ತಾಳ್ಯಾಚಿ ಶೆಳ್ ಸುಕಯ್ಜಾಯ್ ಶಿವಾಯ್ ತಾಚ್ಯೆ ಥಾವ್ನ್ ಬರೆಂ ಜಾವ್ಚೆಂ ಕಾಂಯ್ ನಾ ಮ್ಹಣೊನ್ ತಿ ಜಾಣಾಂ ಆಸ್ಲ್ಯಾರ್ಯ್, ಘೊವಾನ್ ಆಪಯ್ತಾನಾ ಆನಿ ವತ್ತಾಯ್ ಕರ್ತಾನಾ, ಇನ್ಕಾರ್ ಕರುಂಕ್ ತಿಚ್ಯೆ ಥಾವ್ನ್ ಸಾದ್ಯ್ ಜಾಲೆಂ ನಾ.
"ಧರ್ ಹಿ ಚ್ಹಾ ಘೆ....!"
ಏಕ್ ಕಪ್ ಚ್ಹಾ ಆಪ್ಲ್ಯಾ ಘೊವಾಕ್ ಹಾಡುನ್ ದೀವ್ನ್ ದುಸ್ರೆಂ ಕಪ್ಪ್ ತಿಣೆಂ ಆಲಿಯಾಕ್ ದಿಲೆಂ.
"ಅಮ್ಮೀ....? ತುಕಾ?" ಆಲಿಯಾನ್ ಆವಯ್ಕ್ ಪಳೆಲೆಂ.
"ಮ್ಹಾಕಾ ನಾಕಾ ಪುತಾ ತುಮಿಂ ಪಿಯೆಯಾ!"
"ಹಾಂ....! ಆತಾಂ ಸಾಂಗ್ ಆಲಿಯಾ ತುಂ ಕಿತೆಂ ಸಾಂಗೊಂಕ್ ಸೊಧ್ತಾಯ್?"
"ಕಾಂಯ್ ನಾ ಅಬ್ಬೂ! ತೆಂ ಸೊಡ್ಯಾಂ....!"
"ತಶೆಂ ನ್ಹಯ್ ಪುತಾ! ತುಂ ಆಮ್ಚೆಂಚ್ ಭುರ್ಗೆಂ. ಆಮಿಂ ಆಮ್ಚೊ ಸಂಭಂಧ್ ಬರೊ ಕರುನ್ ವಾಗಂವ್ಕ್ ಜಾಯ್ ಜಾಲ್ಯಾರ್, ಆಮ್ಚಾ ಮಧೆಂ ಉಲೊಣೆಂ, ತರ್ಕ್ ಖಂಡಿತ್ ಜಾಯ್. ತೆದಾಳಾ ಮಾತ್ರ್ ಕುಟ್ಮಾಂತ್ ಖಂಯ್ ಕಿತ್ಲೊ ಹುಸ್ಕೊ ಆಸಾ ಮ್ಹಣೊನ್ ಕಳ್ತಾ. ಭೋವ್ಶ್ಯಾ, ತುಂ ಚಿಂತಾಯ್ ತುಜಿ ಅಮ್ಮಿ ತುಜೊ ಮೋಗ್ ಕರಿನಾಂ ಮ್ಹಣೊನ್. ತಶೆಂ ನಾಂ ಪುತಾ! ತುಜ್ಯೆ ವಿಶಿಂ ತಿ ಕಿತ್ಲೆಂ ಚಿಂತಾ...... ತುಜ್ಯಾ ಫುಡಾರಾ ವಿಶಿಂ ತಿ ಕಿತ್ಲಿ ತಕ್ಲಿ ಆಟಯ್ತಾ ತೆಂ ಹಾಂವ್ ಜಾಣಾಂ!"
"ಹಾಂವ್ಯ್ ಜಾಣಾಂ ಅಬ್ಬೂ....! ತುಂ ಆನಿ ಅಮ್ಮಿ ಮ್ಹಜ್ಯೆ ಖಾತಿರ್ ಕಿತ್ಲೆ ಕಷ್ಟ್ ಕಾಡ್ತಾತ್ ಆನಿ ಮ್ಹಜೆಂ ಕಿತ್ಲೆಂ ಬರೆಂ ಪಳಂವ್ಕ್ ಆಶೆತಾತ್ ತೆಂ....! ಐ ಲವ್ ಯು ಅಬ್ಬೂ... ಐ ಲವ್ ಯು ಅಮ್ಮಿ....!"
ಉಲಯ್ತಾಂ ಉಲಯ್ತಾಂ ಕಸಲ್ಯಾಗೀ ಚಿಂತ್ನಾನಿಂ ಆಲಿಯಾಚಾ ದೊಳ್ಯಾಂ ಥಾವ್ನ್ ದುಖಾಂ ಉದೆಲಿಂ. ತೆಂ ಭಾವುಕ್ ಜಾಲೆಂ.
"ಬೇಟಾ.....? ಹೆಂ ಕಿತೆಂ? ಛೇ....! ಆಶೆಂ ದೊಳ್ಯಾಂನಿಂ ದುಖಾಂ ಗಳಂವ್ಚೆಂ ನ್ಹಯ್....! ಆಳೆ ದೊಳ್ಯಾಂ ದುಖಾಂ ನಿತಳ್ ಝರಿಚ್ಯಾ ಉದ್ಕಾ ಪರಿಂ ಪವಿತ್ರ್! ತಾಂಕಾ ಕೆದ್ನಾಂಯ್ ದೊಳ್ಯಾಂ ಥಾವ್ನ್ ಗಳೊನ್ ವಚೊಂಕ್ ದೀಂವ್ಕ್ ನುಜೊ. ಕೊಣಾಯ್ಚಾ ದೊಳ್ಯಾಂನಿ ದುಖಾಂ ಗಳಂವ್ಕ್ ದಿಲ್ಯಾರ್ ಯಾ ಖುದ್ದ್ ತಿಂ ದುಖಾಂ ಗಳಂವ್ಕ್ ಆಮಿಂ ಕಾರಾಣ್ ಜಾಲ್ಯಾರ್ ಅಲ್ಲಾಹ್ ಆಮ್ಚೆರ್ ರಾಗಾರ್ ಜಾಯ್ತ್ ಪುತಾ.....!"
ಸಾರಾನ್ ಆತಾಂ ಆಲಿಯಾಕ್ ವ್ಹಳೂ ಆಪ್ಣಾಂ ತೆವ್ಶಿಂ ವೊಡುನ್ ಧರ್ಲೆಂ. ತಿಚ್ಯಾ ಬಾವ್ಳ್ಯಾಂಚಾ ಆಧಾರಾಂತ್ ಆಲಿಯಾಚಾ ತಕ್ಲೆಕ್ ಕಾಂಯ್ ಥೊಡಿ ಶಾಂತಿ ಮೆಳ್ಲ್ಲಿ ಜಾಯ್ಜಯ್. ಆಪ್ಲ್ಯಾ ದಾವ್ಯಾ ಹಾತಾನ್ ತಾಣೆಂ ಆಪ್ಲಿಂ ದುಖಾಂ ಪೊಶೆಂವ್ಕ್ ಲಾಗ್ತಾನಾ ಸಾರಾ ಆಪ್ಲ್ಯಾ ಘೊವಾ ತೆವ್ಶಿಂ ಘುಂವೊನ್,
"ತುಂ ಚ್ಹಾ ಪಿಯೆವ್ನ್ ಜಾವ್ನ್ ಆಲಿಯಾಕ್ ಘೆವ್ನ್ ಮಾರ್ಕೆಟಿಕ್ ವಚೊನ್ ಯೇ.... ಥೊಡೆ ಫ್ರೂಟ್ಸ್ ಹಾಡುನ್ ಯೇ. ತಶೆಂಚ್ ಯೆತಾನಾ ಐಸ್ಕ್ರೀಮಾಚೊ ಉಡಾಸ್ ದವರ್. ಚ್ಹಾ ಪಿಯೆ ಪುತಾ.... ಆಲಿಯಾ ಚ್ಹಾ ಪಿಯೆ....!"
ಸಾರಾನ್ ಆಪ್ಲ್ಯಾ ಖಾಂದ್ಯಾ ವಯ್ಲಿ ಆಲಿಯಾಚಿ ತಕ್ಲಿ ನೀಟ್ ಕರುನ್ ತಿಚ್ಯಾ ಧುವೆಚ್ಯಾ ತಕ್ಲೆ ವಯ್ರ್ ಆಪ್ಲೆ ಹಾತ್ ಚರಯ್ಲೆ.
"ಹಾಂವ್ ತುಕಾ ಉಲಯ್ಲಿಂ ಮ್ಹಣೊನ್ ಬೆಜಾರ್ ಜಾಲೆಂ ಪುತಾ? ತಶೆಂ ಬೆಜಾರ್ ಕರಿನಾಕಾ..... ಪಿಯೆ... ಪಿಯೆ ಚ್ಹಾ ಪಿಯೆ.... ಆಳೆ ಆಮ್ಚೊ ಅಕ್ಬರ್, ಸಲೀಮ್, ರಝಿಯಾ ಶಿಕ್ಪಾಂತ್ ಕಿತ್ಲಿಂ ಹುಶಾರ್ ಆಸಾತ್ ಪಳೆ. ತುಂ ಜಾಲ್ಯಾರ್ಯ್ ತಾಂಚೆ ಮದ್ಲೆಂಚ್! ತಿಂ ಫಾಲ್ಯಾಂ ಸಾಕಾಳಿಂ ಶಿಕೊನ್ ಎಕಾ ವ್ಹಡ್ಲ್ಯಾ ಹುದ್ದ್ಯಾಕ್ ಪಾವ್ತಾನಾ, ತಾಂಚೆ ಮುಖಾರ್ ತುವೆಂ ಲ್ಹಾನ್ ಜಾಂವ್ಕ್ ನುಜೊ ನೆ ಪುತಾ..... ಹಾಂವ್ ಯಾ ತುಜೊ ಅಬ್ಬೂ...... ಆಮಿ ಆಜ್ ಆಸಾಂವ್. ಪುಣ್ ಫಾಲ್ಯಾಂಚೆಂ ಕೋಣ್ ಜಾಣಾಂ? ಸಂಸಾರ್ ಆಸ್ತಾ ವರೇಗ್ ಆಮಿಂ ತುಜೆ ಸಾಂಗಾತಾ ಆಸ್ಚಿಂ ನಾಂವ್. ದೆಕುನ್ ತುಕಾ ಸಮ್ಜಂವ್ಚೆಂ ಸೊಡ್ಲ್ಯಾರ್ ತುಜ್ಯೆ ವಯ್ರ್ ಆಮ್ಕಾಂ ಕಾಂಯ್ ರಾಗ್ ನಾ ಬೇಟಾ...."
ಸಾರಾ ಆಪ್ಲ್ಯಾ ಧುವೆಕ್ ಸಮ್ಜಾಯ್ತಾಲಿ. ಆಜ್ ಸಾಕಾಳಿಂ ಆಪ್ಣೆಂ ಆಪ್ಲ್ಯಾ ಧುವೆಕ್ ಉಲಯಿಲ್ಲ್ಯಾಚೊ ಹೊ ಪರಿಣಾಮ್ ಮ್ಹಣೊನ್ ತಿ ಜಾಣಾಂ ಜಾಲ್ಲಿ. ಆಪ್ಣೆಂ ಆಜ್ ಧುವೆಕ್ ಚಡ್ಚ್ ರಾಗಾನ್ ಉಲಯಿಲ್ಲಿಂ. ತ್ಯಾ ಖಾತಿರ್ ಆಲಿಯಾ ಇತ್ಲೆಂ ಚಿಂತೇಸ್ತ್ ಜಾಲಾಂ ಮ್ಹಳ್ಳೆಂ ತೆಂ ಸಮ್ಜೊನ್ ತಿಣೆಂ ಆಲಿಯಾಕ್ ಸಮಾಧಾನ್ ಕರುಂಕ್ ಪಳೆಲೆಂ.
"ಹಾಂವ್ ಜಾಣಾಂ ಅಮ್ಮೀ.....!" ಪುಣ್.....!"
"ಆಳೆ ಪುತಾ.... ತುಕಾ ಕಶೆಂ ಜಾಯ್ ತಶೆಂ. ಪಯ್ಲೆಂ ಹಾಂವ್ ಆಂಕ್ವಾರ್ ಆಸ್ತಾನಾ ಮ್ಹಾಕಾಯ್ ಕಿತೆಂ ಕಿತೆಂ ಆಶಾ ಅಸ್ಲ್ಲಿ. ಪುಣ್, ಮ್ಹಜೆಂ ತುಜ್ಯಾ ಅಬ್ಬೂ ಸಾಂಗಾತಾ ಕಾಜಾರ್ ಜಾವ್ನ್ ಹಾಂವ್ ಹ್ಯಾ ಘರಾಂತ್ ಯೆತಾನಾ, ಮ್ಹಜ್ಯಾ ಆಶೆಕ್ ಆನಿ ಹ್ಯಾ ಘರಾಕ್ ಕಾಂಯ್ ಸಂಭಂಧ್ ನಾ ಮ್ಹಣೊನ್ ಕಳೊನ್, ಮ್ಹಜ್ಯಾ ಆಶೆಂಕ್ ಹಾಂವ್ ಮ್ಹಜ್ಯಾ ಕುಳಾರಾಚ್ ಸೊಡುನ್ ಆಯ್ಲ್ಯಾಂ. ಮ್ಹಜ್ಯೆ ಪರಿಂ ಫಾಲ್ಯಾಂ ತುಂ.......!"
ಮುಖಾರ್ ಉಲಂವ್ಚೆಂ ಧಯ್ರ್ ಸಾರಾನ್ ಘೆತ್ಲೆಂ ನಾ. ಪಯ್ಲೆಂಚ್ ಆಲಿಯಾಚಾ ತಕ್ಲೆರ್ ಆಘಾತ್ ಆಸಾ ಮ್ಹಣೊನ್ ತಿ ಜಾಣಾಂ ಆಸ್ಲ್ಲಿ. ತೊ ಆಘಾತ್ ಚಿಂತುಂಕ್ಯ್ ತಿಕಾ ನಾಕಾ ಆಸ್ಲ್ಲೆಂ.
*****************
ಮನ್ಶ್ಯಾ ಜಿಣಿಯ್ ಕಸಲಿ? ಹ್ಯಾ ಜಿಣಿಯೆಂತ್ ಮನಿಸ್ ಖಂಯ್ ವೆತಾ, ಕಿತೆಂ ಕರ್ತಾ, ಕಿತ್ಯಾಕ್ ವೆತಾ, ಕೆದ್ನಾಂ, ಕಶೆಂ? ಆಲಿಯಾಚಾ ಮತಿಂತ್ ಎಕಾನ್ ಏಕ್ ಸವಾಲ್ ಉದೆತಾಲೆಂ. ಜಿವಿತಾಚೆಂ ಚಿಂತುಂಕ್ ವಾ ಜಿಣ್ಯೆಚಾ ವಿಶಿಂ ಆಟವ್ ಕರುಂಕ್ ಆಲಿಯಾಚಿ ತಿತ್ಲಿ ಕಾಂಯ್ ವ್ಹಡ್ಲಿ ಪ್ರಾಯ್ ನ್ಹಯ್. ಪುಣ್, ಆಲಿಯಾ ಮಾತ್ರ್ ತಾಚ್ಯಾ ಜಿವಿತಾಂತ್ಲ್ಯಾ, ಜಿವಿತಾಂತ್ ತಾಣೆಂ ಪಳೆಲ್ಲ್ಯಾ ಘಡಿತಾಂಕ್ ಕಿತ್ಯಾಕ್ಗೀ ವಿಸ್ರೊಂಕ್ ಸಕನಾತ್ಲ್ಲೆಂ.
ಜಿವಿತಾಂತ್ಲ್ಯಾ ಚಿಂತ್ನಾಂಚಾ ಹ್ಯಾ ಸಂಘರ್ಶಾಂತ್, ಆಲಿಯಾ, ಆಪ್ಲ್ಯಾ ಮನಾಂತ್ ಏಕ್ ನಿರ್ಧಾರ್ ಘೆಂವ್ಕ್ ಕಷ್ಟಾನಾತ್ಲ್ಲೆಂ. ಆಪ್ಲ್ಯಾ ಮತಿಕ್ ಕಿತೆಂ ಬರೆಂ ದಿಸ್ಲೆಂ ಆನಿ ಆಪ್ಣಾಕ್ ಕಿತೆಂ ಪಸಂದ್ ಜಾಲೆಂ, ತೆಂಚ್ ಆಪ್ಣಾಚೆಂ ಜಾವ್ನ್ ತೆಂ ಘೆತಾಲೆಂ ಶಿವಾಯ್ ತ್ಯಾ ಭಾಯ್ರ್ಯ್ ಆಪ್ಣೆಂ ಚಿಂತುನ್ ಪಳಂವ್ಕ್ ಜಾಯ್ ಮ್ಹಳ್ಳ್ಯಾ ವಿಶಿಂ ತೆಂ ಭಿಲ್ಕುಲ್ ಗುಮಾನ್ ಕರಿನಾತ್ಲ್ಲೆಂ.
ಭುರ್ಗ್ಯಾಪಣಾರ್ ಥಾವ್ನ್ಚ್ ಆಲಿಯಾ ಆಪ್ಲ್ಯಾ ಜಲ್ಮಾ ಸ್ವಭಾವಾ ವರ್ವಿಂ, ಆಪ್ಣಾಕ್ ಏಕ್ ಜೊಕ್ತಿ ದಿಶಾ ಜೊಡೊಂಕ್ ಸಕ್ಲೆಂ ನಾ.
ಆವಯ್ ಬಾಪಯ್ಚಾ ಖುಶೆಚೆಂ ಶಿಕಾಪ್ಯ್ ತಾಕಾ ಪಸಂದ್ ಜಾಲೆಂ ನಾ. ಹಾಕಾ ಹೆಂಯ್ ಏಕ್ ಕಾರಾಣ್ ಜಾಂವ್ಕ್ ಸಕ್ತಾ ಕೀ, ಆಲಿಯಾ, ಆಪ್ಲ್ಯಾ ಮನಾಂತ್ಚ್ ಆಪ್ಣಾಚೊ ಮ್ಹಳ್ಳೊ ಏಕ್ ಸಂಸಾರ್ ರುತಾ ಕರ್ತಾಲೆಂ. ತ್ಯಾ ಸಂಸಾರಾಂತ್ ತಾಚಿಂಚ್ ಮ್ಹಳ್ಳಿಂ ಚಿಂತ್ನಾ ಆಸ್ಲ್ಲಿಂ. ತಾಚೆಂಚ್ ಮ್ಹಳ್ಳೆಂ ಜಿವಿತ್ ಆಸ್ಲ್ಲೆಂ. ಜ್ಯಾ ಜಿವಿತಾಕ್ ಆಲಿಯಾ ಸೊಭಿತ್ ರುಪಾನ್ ಜಿಯೆಂವ್ಕ್ ಆಶೆತಾಲೆಂ. ಪುಣ್, ಫಾಲ್ಯಾಂ ಮ್ಹಳ್ಳೆಂ ತೆಂ ಮನ್ಶ್ಯಾಚಾ ಹಾತಿಂ ಆಸಾನಾ. ತಶೆಂ ಜಿವಿತಾಂತ್ಲಿಂ ಘಡಿತಾಂ ಆಲಿಯಾಕ್ ತಾಚ್ಯಾ ಜಿವಿತಾಚಿ ದಿಶಾ ಚುಕಯ್ತಾಲಿಂ.
ಆಲಿಯಾ ಆಪ್ಲ್ಯಾ ಬಾಪಾಯ್ಚಾ ಖುಶೆ ಪರ್ಮಾಣೆ ಮೆಡಿಕಲ್ ಕಾಲೇಜಿಕ್ ವಚೊಂಕ್ ಲಾಗ್ಲ್ಲೆಂ. ಪುಣ್, ತಾಕಾ ತಾಚ್ಯಾ ಬಾಪಾಯ್ನ್ ಆಶೆಲ್ಲ್ಯಾ ಹ್ಯಾ ಶಿಕ್ಪಾಂತ್ ತಾಚೆಂ ಮನ್ ಲಾಗ್ಲೆಂ ನಾ. ಮೆಡಿಕಲ್ ಕಾಲೇಜಿಂತ್ ಸಮೀರಾಚಿ ತಾಕಾ ವ್ಹಳೊಕ್ ಜಾಲ್ಲಿ ಜಾಲ್ಯಾರ್ಯ್ ತ್ಯಾ ವಳ್ಕೆಂತ್ ಕಾಂಯ್ ಭಳ್ ನಾತ್ಲ್ಲೆಂ. ಸಮೀರ್ ಆಲಿಯಾಕ್ ಜಿವಿತಾ ವಿಶಿಂ ಸಮ್ಜಾಂವ್ಕ್ ಪ್ರಯತ್ನ್ ಕರ್ತಾಲೊ ತರ್ಯ್ ಆಲಿಯಾ ತಾಚ್ಯಾ ಸಮ್ಜಣೆ ಭಾಯ್ರ್ ಆಸ್ಲ್ಲೆಂ.
ಹ್ಯಾ ದಿಸಾಂ ಮಧೆಂ, ರಾಯನ್, ಅಚಾನಾಕ್ ಜಾವ್ನ್ ಆಲಿಯಾಚಾ ಜಿವಿತಾಂತ್ ಉದೆವ್ನ್ ಯೇವ್ನ್ ಘೆಲ್ಲೊ. ತ್ಯಾ ದೀಸ್ ಮಹಾಬಲೇಶ್ವರಾಂತ್ ತೊ ಮೆಳೊನ್ ಗೆಲ್ಲ್ಯಾ ಉಪ್ರಾಂತ್ ಆಲಿಯಾಕ್ ತಾಚಿ ಭೆಟ್ ಜಾಂವ್ಕ್ ನಾತ್ಲ್ಲಿ.
ರಾಯನಾನ್ ಆಲಿಯಾಕ್ ಆಪ್ಣಾಚೆಂ ಟೆಲಿಪೋನ್ ನಂಬರ್ ದಿಲ್ಲೆಂ. ರಾಯನ್ ಬಾಲಿವುಡಾಕ್ ಸಂಭಂಧ್ ದವರ್ತಾಲೊ ಖರೆಂ. ಪುಣ್, ಆಲಿಯಾಕ್ ಬಾಲಿವುಡಾಕ್ ವೆಚೆಂ ಮನ್ ಭಿಲ್ಕುಲ್ ನಾತ್ಲ್ಲೆಂ. ಹ್ಯಾ ಖಾತಿರ್ ತಾಣೆಂ ರಾಯನಾಚಾ ವಿಶಿಂ ಚಡ್ ಚಿಂತ್ಲ್ಲೆಂ ನಾ.
ಪುಣ್, ಆಲಿಯಾ ಮಾತ್ರ್ ಹ್ಯಾ ದಿಸಾಂನಿ, ಆಪ್ಣೆಂ ಆಪ್ಲ್ಯಾ ಶಿಕ್ಪಾ ವಿಶಿಂ, ಘೆಂವ್ಕ್ ತಯಾರ್ ಜಾಲ್ಲ್ಯಾ ನಿರ್ಧಾರಾ ವಿಶಿಂ ಚಡ್ ಚಿಂತಾಲೆಂ.
"ಆಲಿಯಾ...."
"ಬೇಟಾ ಆಲಿಯಾ....?"
ಕುಜ್ನಾಂತ್ ಆಪ್ಲ್ಯಾ ಆವಯ್ಕ್ ಮಜತ್ ಕರ್ಚೆಂ ಆಲಿಯಾ ಆಪ್ಲ್ಯಾ ಆವಯ್ನ್ ಆಪ್ಣಾಕ್ ಆಪಯಿಲ್ಲೆಂ ಆಯ್ಕೊವ್ನ್ ಕಸಲ್ಯಾಗೀ ತಾಚ್ಯಾಚ್ ಮ್ಹಳ್ಳ್ಯಾ ಸಂಸಾರಾಂತ್ ಆಸ್ಲ್ಲೆಂ ತೆಂ ಎಕಾಚ್ಚ್ ಫರಾ ಪ್ರಸ್ತುತ್ ಸಂಸಾರಾಕ್ ಆಯ್ಲೆಂ. ಕಿತೆಂ ಮ್ಹಳ್ಳ್ಯಾ ಭಾಶೆನ್ ಆವಯ್ಕ್ ಪಳಂವ್ಕ್ ತೆಂ ಹೆವ್ಶಿಂ ಘುಂವ್ಲೆಂ.
ತಿತ್ಲೆಂಚ್!
ಆಲಿಯಾಚೊ ಹಾತ್ ಹಾಲ್ಲ್ಲ್ಯಾನ್ ತಾಕಾ ಕಳಿತ್ ನಾತ್ಲ್ಲ್ಯಾ ಪರಿಂಚ್ ತಾಚ್ಯಾ ಹಾತಾಂತ್ಲ್ಯಾ ಸುರಿಯೆನ್ ಆಪ್ಲೆಂ ಕಾಮ್ ಕರುನ್ ಜಾಲ್ಲೆಂ. ಆಲಿಯಾಚಾ ಮೋವ್ ಬೊಟಾಕ್ ಮೊಗಾನ್ ಮ್ಹಳ್ಳ್ಯಾಪರಿಂ ತ್ಯಾ ಸುರಿಯೆನ್ ಎಕಾ ಘಡಿಯೆಕ್ ವೆಂಗ್ಲೆಂ.
"ಉಫ್...!"
ಎಕ್ಚ್ಚ್ ಪಾವ್ಟಿಂ ಹಾತ್ ಪಾಪ್ಡುನ್ ಆಲಿಯಾನ್ ಆಪ್ಲ್ಯಾ ಬೊಟಾ ತೆವ್ಶಿಂ ನದರ್ ಮಾರ್ತಾನಾ ’ಕಣ್..... ಕಣ್....’ ಆವಾಜಾನ್ ತಾಚ್ಯಾ ಹಾತಾಂತ್ಲಿ ತಿ ಸುರಿ ಕಟ್ಟಿಂಗ್ ಬೋರ್ಡಾ ವಯ್ಲ್ಯಾನ್ ಥಾವ್ನ್ ನಿಸ್ರೊನ್ ವಚೊನ್ ಕಿಚನಾಚಾ ಮಾರ್ಬಲಾರ್ ಪಡ್ಲಿ.
"ಬೇಟಾ ಕಿತೆಂ ಜಾಲೆಂ?" ಸಾರಾ ಧುವೆ ತೆವ್ಶಿಂ ಘುಂವ್ಲಿ. ಧುವೆಚ್ಯಾ ಸುಸ್ಕಾರಾಕ್ ಪಳವ್ನ್ ತಿ ಘಾಬರ್ಲಿ.
ಧುವೆಚಾ ಹಾತಾ ಥಾವ್ನ್ ದೆಂವ್ಚೆಂ ರಾಗಾತ್ ಪಳವ್ನ್, ಧುವೆಚ್ಯಾ ಲಾಗಿಂ ಆಯಿಲ್ಲಿ ತಿ,
"ತುಂ ಆಸಾ ಪಳೆ .... ತುಕಾ ಕಿತ್ಲೆ ಪಾವ್ಟಿಂ ಸಾಂಗ್ಲೆಂ.....!" ಧುವೆಚಾ ತೊಂಡಾಕ್ಚ್ ಪಳವ್ನ್, ರಾಗಾತ್ ಪಾಜಾರ್ಚಾ ಬೊಟಾಕ್, ಲಾಗ್ಶಿಲ್ಯಾ ವಸ್ತುರಾಚಾ ಕುಡ್ಕ್ಯಾನ್ ದಾಂಬುನ್ ಧರುನ್,
"ಚಲ್ ಯಾ ಭಾಯ್ರ್ ಯಾ.....! ಬೊಟಾಕ್ ಪಯ್ಲೆಂ ವಕಾತ್ ಲಾವ್ಯಾಂ!"
ಜಳೊನ್ ಆಸ್ಲ್ಲ್ಯಾ ಸ್ಟವಾಚೊ ಗ್ಯಾಸ್ ಭಂಧ್ ಕರುನ್ ಭಾಯ್ರ್ ಆಯಿಲ್ಲ್ಯಾ ತಿಣೆಂ, ಧುವೆಚ್ಯಾ ಬೊಟಾಚೆಂ ರಾಗಾತ್ ಲೋಶನಾಂತ್ ದುವ್ನ್, ತ್ಯಾ ಬೊಟಾಕ್ ಟಿಂಚರ್ ಆಯೊಡಿನ್ ಲಾವ್ನ್, ತಾಚ್ಯೆ ವಯ್ರ್ ಹಳ್ತಾರ್ ಮುಲಾಮೆಚೊ ಲೇಪ್ ಕಾಡುನ್ ಬೊಟಾಕ್ ಬ್ಯಾಂಡೇಜ್ ಕರುನ್,
"ಬೇಟಾ....? ತುಂ ಹಾಂಗಾ ಬಸೊನ್ ಆರಾಮ್ ಕರ್. ಹಾಂವ್ ರಾಂದುನ್ ಯೆತಾಂ ಆಮಿಂ ಮಾಗಿರ್ ಉಲವ್ಯಾಂ!" ಸಾರಾ ಕುಜ್ನಾ ತೆವ್ಶಿಂ ಚಮ್ಕಾಲಿ.
ಆಪ್ಲಿ ಆವಯ್ ಕುಜ್ನಾ ತೆವ್ಶಿಂ ಚಮ್ಕಾತಾನಾ, ಆವಯ್ಕ್ಚ್ ಪಳವ್ನ್ ರಾವ್ಲ್ಲೆಂ ಆಲಿಯಾ ಕಾಂಯ್ಚ್ ಉಲಯ್ಲೆಂ ನಾ. ಅಮ್ಮೀಕ್ ಥೊಡಿ ಕುಮಕ್ ಕರುಂಕ್ ವಚೊನ್ ಆತಾಂ ಆಪ್ಣಾ ಥಾವ್ನ್ ತಿಕಾಚ್ ಉಪದ್ರ್ ಜಾಲೆ. ಆಲಿಯಾನ್ ಆಪ್ಣಾಕ್ಚ್ ಗುನ್ಯಾಂವ್ಕಾರ್ ಕೆಲೆಂ. ತಾಕಾ ಆಪ್ಲ್ಯಾ ಆವಯ್ಚೆರ್ ಭಿರ್ಮತ್ ಆಯ್ಲಿ. ಥೊಡ್ಯಾಚ್ ಖಿಣಾಂ ಭಿತರ್, ತಾಚ್ಯಾ ಮತಿಂತ್ ರಾಜ್ ಕರುನ್ ಆಸ್ಲ್ಲ್ಯಾ ಚಿಂತ್ನಾಂ ಥಾವ್ನ್ ಘಡ್ಲ್ಲೆಂ ಅವ್ಚಿತ್ತ್ ಘಟನ್ ಆನಿ ತಾಚೊ ಪರಿಣಾಮ್ ಜಾವ್ನ್ ಆವಯ್ಚೊ ಮೋಗ್ ಪಳೆಲ್ಲೆಂ ಆಲಿಯಾ ಆಪ್ಲ್ಯಾ ಚಿಂತ್ನಾಂಕ್, ತ್ಯಾ ಘಡ್ಲ್ಲ್ಯಾ ಘಟನಾಕ್, ಆನಿ ಆಪ್ಲ್ಯಾ ಆವಯ್ಚ್ಯಾ ಮೊಗಾಕ್ ನಿಯಾಳುಂಕ್ ಲಾಗ್ಲೆಂ. ಹ್ಯಾ ತೀನ್ ವಿಚಾರಾಂ ಮಧೆಂ ತೆಂ ಘುಸ್ಪಡೊನ್ ವೆತಾನಾ ಖಂಯ್, ಕಿತೆಂ, ಕಶೆಂ, ಮ್ಹಳ್ಳೆಂ ತಾಚ್ಯಾ ತಕ್ಲೆಕ್ ಆಯ್ಲೆಂಚ್ ನಾ.
ಪುಣ್, ತಾಚ್ಯಾ ಬೊಟಾಕ್ ಸುರಿಯೆನ್ ಉಮೊ ದಿಂವ್ಚಾ ಪಯ್ಲೆಂ ಮಾತ್ರ್ ತೆಂ ಚಿಂತಾಲೆಂ ಖಂಡಿತ್. ತಾಚೆಂ ಚಿಂತಾಪ್.... ಆಲಿಯಾ ಕಿತೆಂ ಚಿಂತಾಲೆಂ?
ವ್ಹಯ್!, ತೆಂ ಚಿಂತಾಲೆಂ ತ್ಯಾಚ್ ತಾಚ್ಯಾ ಹಾತಾಂತ್ ಆಸ್ಲ್ಲ್ಯಾ ಸುರಿಯೆ ವಿಶಿಂ!
ಆವಯ್ನ್ ದಿಲ್ಲ್ಯಾ ಕ್ಯಾರೆಟಾಂಕ್ ಭಾರೀಕ್ ತಾಸಾಂವ್ಚ್ಯಾ ತ್ಯಾಚ್ ತಾಚ್ಯಾ ಹಾತಾಂತ್ಲ್ಯಾ ಸುರಿಯೆ ವಿಶಿಂ!!
ಆಪ್ಲೆಂ ಕಾಮ್ ವಿಸ್ರೊನ್ ಆಪ್ಲ್ಯಾಚ್ ನಿರ್ಧೊಶಿ ಬೊಟಾಕ್ ಕಾತ್ರುನ್ ಸೊಡ್ಲೆಲ್ಯಾ ತ್ಯಾ ಸುರಿಯೆ ವಿಶಿಂ!!!
ಸುರಿ....!
ವ್ಹಯ್! ಆಲಿಯಾಚಾ ದೊಳ್ಯಾಂ ಮುಕಾರ್ ಹ್ಯಾ ವಗ್ತಾರ್ ದೋನ್ ಜಾತಿಚಾ ಸುರಿಯೆಚಿಂ ರುಪಾಂ ಉದೆಲ್ಲಿ.
ಏಕ್ ಹಾಂಗಾ ಹ್ಯಾ ಕುಜ್ನಾಂತ್ ಆಪ್ಣೆಂ ಕ್ಯಾರೇಟ್ ತಾಸಾಂವ್ಚಿ ಸುರಿ. ಆನಿ ದುಸ್ರಿ ತ್ಯಾ ಆಸ್ಪತ್ರೆಂತ್ ಮನ್ಶ್ಯಾ ಕಾತಿಕ್ ಚಿರುಂಕ್ ಆಯ್ತಿ ಜಾಲ್ಲಿ ಸುರಿ!
ಸುರಿಯೆಚಾ ಆಕಾರಾಂತ್, ತಾಚ್ಯಾ ವಿನ್ಯಾಸಾಂತ್, ಚಡ್ ಉಣೆಂ ಥೊಡಿ ಬದ್ಲಾವಣ್ ಆಸ್ಲ್ಲಿ. ಪುಣ್ ತ್ಯಾ ಸುರಿಯೆಚಾ ಧಾರಿಂತ್ ಬದ್ಲಾವಣ್ ಕಾಂಯ್ಚ್ ನಾತ್ಲ್ಲಿ. ತ್ಯಾ ಆಸ್ಪತ್ರೆಂತ್ಯ್ ತಿ ಕಾತರ್ತಾಲಿ , ಹಾಂಗಾಸರ್ಯ್ ತಿ ಕಾತರ್ತಾ. ಆಸ್ಪತ್ರೆಚ್ಯಾ ಖಾಟಿಯೆ ವಯ್ರ್ಯ್ ತಿ ಚಿರ್ತಾಲಿ, ಹಾಂಗಾಸರ್ಯ್ ತಿ ಚಿರ್ತಾ!
ತಿಚ್ಚ್ ಧಾರ್....!
ಆಲಿಯಾ ಸಮ್ಜೊಂಕ್ ಪೆಚಾಡ್ಚಿ ಧಾರ್.....!!
ಮತಿಂತ್ ಸವಾಲಾಂಕ್ ಉಟವ್ನ್ ವಾದಾಳ್ ಹಾಡುನ್ ಆಯಿಲ್ಲಿ ಧಾರ್....!!!
"ಅಮ್ಮೀ...., ಹಿ ಸುರಿ ವಸ್ತ್ ತರ್ಯ್ ಕಸಲಿ? ಹಿ ಚಿರ್ತಾ, ಹಿ ಕಾತರ್ತಾ, ಹಿ ತಾಸಾಯ್ತಾ, ಹಿ ಕೊಸಾಯ್ತಾ ಆನಿ ನಿಮಾಣೆಂ.... ಆಂಕ್ವಾರ್ ವ್ಹಕಾಲ್ ಹುನ್ ಉದ್ಕಾಂತ್ ನ್ಹಾವ್ನ್ ನಿತಳ್ ಜಾವ್ನ್ ಯೆಂವ್ಚಾ ಪರಿಂ ನ್ಹಾವ್ನ್ ಯೆತಾ ಆನಿ ಮ್ಹಾಕಾ ಪಳವ್ನ್ ಹಾಸ್ತಾ!
ಆಲಿಯಾಚಾ ಮತಿಂತ್ ಉದೆಲ್ಲೆಂ ಸವಾಲ್ ತಾಚ್ಯಾ ತೊಂಡಾ ಥಾವ್ನ್ ಆವಾಜ್ ಜಾವ್ನ್ ಭಾಯ್ರ್ ಪಡ್ಲೆಂ ನಾ. ಆಪ್ಲ್ಯಾಚ್ ದೊಳ್ಯಾಂ ಸಾಮ್ಕಾರ್ ಅಪ್ಲೆಂಚ್ ಪ್ರತಿರೂಪ್ ಆಪ್ಣಾಕ್ಚ್ ಹೆಂ ಸವಾಲ್ ಉಡಯ್ತಾ ಆನಿ ಹಾಸ್ತಾ ತಶೆಂ ತಾಕಾ ದಿಸೊನ್ ಯೆತಾನಾ ಆಲಿಯಾಕ್ ಬಸ್ಲೆಲ್ಯಾ ಕಡೆನ್ ಬಸೊಂಕ್ ಜಾಲೆಂ ನಾ. ಬಸ್ಲೆಲ್ಯಾ ಕಡೆನ್ ಥಾವ್ನ್ ಉಟೊನ್ ತೆಂ ಆತಾಂ ಕುಜ್ನಾಂ ತೆವ್ಶಿಂ ಮೆಟಾಂ ಕಾಡಿಲಾಗ್ಲೆಂ. ಎಕೇಕ್ ಪಾವ್ಟಿಂ ತಾಚ್ಯಾ ಮತಿಂತ್ ಕಿತೆಂ ಜಾತಾ, ತೆಂ ಕಿತೆಂ ಚಿಂತಾ, ತೆಂ ತಾಕಾಚ್ ಕಳಿತ್ ಜಾಯ್ನಾತ್ಲ್ಲೆಂ.
ಉಟೊನ್ ಯೆಂವ್ಚಾ ಲ್ಹಾರಾಂ ಪಂದ್ಲ್ಯಾ ದರ್ಯಾಕ್ ಪಳಯ್ತಾನಾ, ಮನಿಸ್ ಆಪ್ಲೊ ಮಾತಿಯೆಚೊ ಸಂಸಾರ್ ವಿಸ್ರೊನ್, ಉದ್ಕಾಚಾ ಸಂಸಾರಾಂತ್ ಉಪ್ಯೆಂವ್ಕ್ ಆಶೆವ್ನ್, ಪಾಟಿಂ ಫುಡೆಂ ಚಿಂತಿನಾಸ್ತಾನಾ ದರ್ಯಾ ಉದ್ಕಾಕ್ ದೆಂವ್ಚಾ ಪರಿಂ ಆಲಿಯಾಚಾ ಮತಿ ಭಿತರ್ಯ್ ಚಿಂತ್ನಾಂಚಿಂ ಕುಪಾಂ ಉದೆವ್ನ್ ಧಾಂವ್ತಾನಾ ಆಲಿಯಾ ಹ್ಯಾ ಕುಪಾಂಕ್ ಧರುಂಕ್ ಆಂವ್ಡೆತಾಲೆಂ. ಆಪುಣ್ ವಾರ್ಯಾ ವೆಂಗೆಂತ್ ಉಪ್ಯೆತಾಂ ತಶೆಂ ಎಕ್ಸುರೆಂ ಬಸೊನ್ ಚಿಂತ್ನಾನಿಂ ಆಟಯ್ತಾಲೆಂ.
ಹ್ಯಾಚ್ ತಾಚಾ ಚಿಂತ್ನಾಂಕ್ ಲಾಗೊನ್ ಆಲಿಯಾ ಮೆಡಿಕಲ್ ಶಿಕಾಪ್ ಬರ್ಯಾ ಭಾಶೆನ್ ಶಿಕೊಂಕ್ ಸಕ್ಲೆಂ ನಾ. ತಾಕಾ ತ್ಯಾ ಶಿಕ್ಪಾಂತ್ ಕಾಂಯ್ಚ್ ಉತ್ಸಾಹ್ ಯಾ ಆಪ್ಣೆ ಮೆಡಿಕಲ್ ಶಿಕೊನ್
M.B.B.S ಕೆಲ್ಯಾ ಉಪ್ರಾಂತ್
M.D. ಜಾವ್ನ್ ಅಮೇರಿಕಾಂತ್ ಸರ್ಜನ್ ಜಾವ್ನ್ ಪಾಟಿಂ ಇಂಡಿಯಾಕ್ ಯೆಂವ್ಚೆಂ ಆಪ್ಲ್ಯಾ ಬಾಪಾಯ್ಚೆಂ ಸಪಾಣ್ ಜ್ಯಾರಿ ಕರ್ಚ್ಯಾಂತ್ ಆಲಿಯಾಕ್ ಕಾಂಯ್ಚ್ ಉಮೆದ್ ನಾತ್ಲ್ಲಿ.
ಆಲಿಯಾಕ್ ಉಮೆದ್ ಆಸ್ಲ್ಲಿ ಫಕತ್ತ್ ವಾರ್ಯಾ ವಯ್ಲ್ಯಾ ಕುಪಾಂ ಮಧೆಂ ಉಪ್ಯೆಂವ್ಕ್!
ಲ್ಹಾನ್ ನೆಣ್ತೆಂ ಭುರ್ಗೆಂ ತೆಂ ಆಸ್ತಾನಾ, ಸೊಭಿತ್ ಸರ್ಗಾ ಚಲಿ, ಕುಪಾಂ ಮಧ್ಲ್ಯಾನ್ ಥಾವ್ನ್ ಜಾದೂ ದಾಂಡೊ ಘೆವ್ನ್ ದೆಂವೊನ್ ಯೆಂವ್ಚೆಂ ಪಳೆಲ್ಲೆಂ ಆಲಿಯಾ, ತ್ಯಾ ಸೊಭಿತ್ ಕುಪಾಂಕ್ ಪಳವ್ನ್ ಪಿಶೆಂಚ್ ಜಾತಾಲೆಂ.
ಹ್ಯಾ ಸಂಸಾರಾಂತ್ ತರ್ಯ್ ತಾಕಾ ಹಿ ಸೊಭಾಯ್ ಪಳಂವ್ಕ್ ಮೆಳ್ಲ್ಲಿಚ್ ನಾ.
ಖಂಯ್ ದೆಖ್ಲೆಂ ಥಂಯ್ಚರ್ ಹ್ಯಾ ಸಂಸಾರಾಂತ್ ದೂಖ್ಚ್ ದೂಖ್!
ಆಪ್ಣೆಂ ವಸ್ತಿ ಕರ್ಚೆಂ ಆಪ್ಲೆಂ ಅಪಾರ್ಟ್ಮೆಂಟ್ ದೆಂವೊನ್ ತ್ಯಾ ಭಾಯ್ಲ್ಯಾ ರಸ್ತ್ಯಾಕ್ ಪಾಂಯ್ ತೆಂಕ್ಲ್ಯಾರ್ ಪುರೊ....!
ನೆಣ್ತ್ಯಾ ದೊಳ್ಯಾಂಕ್ ದಿಸೊನ್ ಯೆಂವ್ಚಾ ತ್ಯಾ ದ್ರಶ್ಯಾಂಕ್ ಆನಿ ಜಿವಿತಾಂತ್ ಕೊಣ್ಯ್ ಚಿಂತುಕ್ ವಚಾನಾತ್ಲ್ಲ್ಯಾ ತ್ಯಾ ಘಡಿತಾಂಕ್ ದೆಖ್ಚೆಂ ಆಲಿಯಾ, ಆಪ್ಲ್ಯಾ ಸೊಭಿತ್ ಘರಾ ಭಿತರ್ಲ್ಯಾ ಸಂಸಾರಾಂತ್ ಆನಿ ಹ್ಯಾ ಘರಾ ಭಾಯ್ಲ್ಯಾ ಸಂಸಾರಾಂತ್ ಅಪುಣ್ ಆಡ್ಚೊನ್ ವೆತಾಂ ಮ್ಹಳ್ಳ್ಯಾ ಪರಿಂ ಸಪ್ಣೆತಾಲೆಂ. ಆಪ್ಲ್ಯಾಚ್ ಘರಾ ಭಿತರ್ಲಿ ಎಕ್ಸುರಾಯ್ ಆನಿ ಆಪ್ಣಾಕ್ ಲ್ಹಾನ್ಪಣಾರ್ ಥಾವ್ನ್ ಪಸಂದ್ ಜಾಂವ್ಚೊ ತೊ ನಿಳ್ಚೊ ಮೊಳಾಬ್, ಆಲಿಯಾಚಾ ಹ್ಯಾ ಚಿಂತ್ನಾಂಕ್ ತಾಕಾ ಸಾಂಗಾತ್ ದೀವ್ನ್, ತಾಕಾ ಹ್ಯಾ ಸಂಸಾರಾ ಥಾವ್ನ್ ಮಸ್ತ್ ಪಯ್ಸ್ ವರುನ್ ಪಾವಯ್ತಾಲೊ.
ಆಲಿಯಾಕ್ ತಾಚೊ ಸಂಸಾರ್ ಹ್ಯಾ ತಾಚಾ ಬಾಪಾಯ್ಚಾ ಆಶೆಂತ್ ಆನಿ ಖುಶೆಂತ್ ನಾ ಮ್ಹಳ್ಳ್ಯಾ ಪರಿಂ ದಿಸ್ತಾಲೆಂ. ಭುರ್ಗ್ಯಾಪಣಾರ್ ತಾಣೆಂ ಆಪ್ಣಾಚಾ ಜಿವಿತಾಚಾ ವಿಂಚವ್ಣೆಂತ್, ಆಪ್ಲ್ಯಾ ಆವಯ್ ಬಾಪಾಯ್ಚಾ ನಿರ್ಧಾರಾಕ್ ಖಾಲ್ತಿಮಾನ್ ಘಾಲ್ಲೊ. ಪುಣ್, ಆತಾಂ ಆಲಿಯಾ ವ್ಹಡ್ ಜಾಲಾಂ. ತಾಚಿ ಮತ್ ಬಸ್ಲ್ಯಾ. ತೆಂ ಚಿಂತುಕ್ ಸಕ್ತಾ. ಭುರ್ಗ್ಯಾಪಣಾ ವಯ್ಲ್ಯಾ ಚಿಂತ್ನಾಂಕ್ ಆತಾಂ ತೆಂ ಉಡಾಸ್ ಕಾಡುನ್ ಥಂಯ್ ಆನಿ ಹಾಂಗಾ ಕಿತೆಂ ಫರಕ್ ಆಸಾ ಮ್ಹಳ್ಳ್ಯಾ ವಿಶಿಂ ಸೊಧ್ನಾಂ ಕರುಂಕ್ ಸಕ್ತಾ.
ಹ್ಯಾಚ್ ಸಕ್ತೆನ್ ಆನಿ ಆಲಿಯಾಚಾ ಚಿಂತ್ನಾಕ್ ಲಾಗೊನ್ ತಾಚೆಂ ಎಮ್.ಬಿ.ಬಿ.ಎಸ್. ಶಿಕಾಪ್ ಪೂರ್ಣ್ ಜಾಂವ್ಕ್ ಪಾವ್ಲೆಂ ನಾ. ಶಿಕಾಪ್ ಶಿಕೊಂಕ್ ತಾಕಾ ಸಾದ್ಯ್ ನಾತ್ಲ್ಲೆಂ ಮ್ಹಣೊನ್ ಭಿಲ್ಕುಲ್ ನ್ಹಯ್. ಆಲಿಯಾ ಮತಿಂತ್ ಹುಶಾರ್ ಆನಿ ಚುರುಕ್ ಆಸ್ಲ್ಲೆಂ. ಆಪ್ಲ್ಯಾ ಮೆಟ್ರಿಕ್ ಪರಿಕ್ಷೆಂತ್ ಬರೆಚ್ ಮಾರ್ಕ್ಸ್ ಕಾಡುನ್ ತೆಂ ಉತ್ತೀರ್ಣ್ ಜಾಲ್ಲೆಂ. ಪುಣ್, ಹ್ಯಾ ಬದ್ಲಾಲ್ಲ್ಯಾ ತಾಚ್ಯಾ ಚಿಂತ್ಪಾಕ್ ಪ್ರಭಲ್ ಕಾರಾಣ್ ಜಾಲ್ಲಿಚ್ ತಾಚಿ ಆಜಿ!
ಆಪ್ಲ್ಯಾ ಆಜಿಯೆಕ್ ರಗ್ತಾಂತ್ ಸಾಕರ್ ಚಡೊನ್ ತಿ ಸಂಸಾರಾಕ್ ಆದೇವ್ಸ್ ಕರುನ್ ವೆಚಾ ಪಯ್ಲೆಂ, ತಿ ದೇಡ್ ಮಹಿನೊ ತ್ಯಾ ಆಸ್ಪತ್ರೆಂತ್ ವಳ್ವಳ್ಲ್ಲಿ ಆಲಿಯಾನ್ ಪಳೆಲಾಂ. ಹರ್ಯೇಕ್ ಪಾವ್ಟಿಂ ತೆಂ ಆಸ್ಪತ್ರೆಕ್ ವೆತಾನಾ, ತ್ಯಾ ಆಸ್ಪತ್ರೆಂತ್ ರಡ್ಣೆ, ದೂಖ್, ಬೊಬಾಟ್, ಖಂತ್, ಬೆಜಾರಾಯ್, ವಿಳಾಪ್, ತಾಣೆಂ ಪಳಯ್ಲ್ಯಾತ್. ಎಕಾ ಕುಶಿಂನ್ ಆಪ್ಣೆ ತ್ಯಾ ಬೊಂಗ್ಲ್ಯಾಂತ್ ಸಾರ್ಚೆಂ ಖುಶಾಲ್ಕಾಯೆಚೆಂ ಜೀವನ್, ಆನಿ ಎಕಾ ಕುಶಿನ್ ಹೆಂ ಆಪ್ಲ್ಯಾ ಖುಶಾಲ್ಕಾಯೆಚಾ ಜೀವನಾ ಭಾಯ್ಲೆಂ ರುದಾನಾನ್ ಬರ್ಲೆಂಲೆಂ ಜೀವನ್. ಹ್ಯಾ ದೊನಾಂಯ್ ಮಧೆಂ ಆಪುಣ್ ಝುಜ್ತಾಂ ತಶೆಂ ತಾಕಾಚ್ ದಿಸ್ತಾಲೆಂ. ನಿಮಾಣೆಂ ಜಾವ್ನ್ ತಾಚಿ ಆಜಿ ಆಸ್ಪತ್ರೆಂತ್ಚ್ ಅಲ್ಲಾಹ್ಕ್ ಮೊಗಾಚಿ ಜಾತಾನಾ ಆಲಿಯಾಕ್ ತ್ಯಾ ಆಸ್ಪತ್ರೆಚೊ ಕಾಂಟಾಳೊ ಆಯಿಲ್ಲೊ.
ಜಿವಿತಾಂತ್ ಪಾಶಾರ್ ಜಾವ್ನ್ ಗೆಲ್ಲ್ಯಾ ಘಡಿತಾನಿಂ ಆಲಿಯಾಚಾ ಮತಿಕ್ ಆದೇವ್ಸ್ ಮಾಗ್ಲೊ ನಾ. ತೆಂ ತ್ಯಾಚ್ ತಾಚಾ ಚಿಂತ್ನಾನಿಂ ರೆವ್ಡೊನ್ ದೀಸ್ ಕಾಡುಂಕ್ ಲಾಗ್ಲೆಂ. ಹ್ಯಾ ಭಾಯ್ರ್, ಆಪ್ಣೆ ಸದಾಂ ಪಳಂವ್ಕ್ ಆಶೆಂವ್ಚೊ, ಉಭೊಂಕ್ ರಾಕ್ಚೊ, ಚಿಂತ್ನಾಂನಿ ಸಪ್ಣೆಂವ್ಚೊ ತೊ ಮೊಳಾಬಾ ವಯ್ಲೊ ಸಂಸಾರ್ಚ್ ತಾಕಾ ಸೊಭಿತ್ ದಿಸ್ಲೊ. ತ್ಯಾಚ್ ಸಂಸಾರಾಂತ್ ತೆಂ ಜಿಯೆಂವ್ಕ್ ತಯಾರ್ ಜಾಲೆಂ. ಶಿಕಾಪ್ ಶಿಕೊಂಕ್ ಆಪ್ಲ್ಯಾ ಮತಿಕ್ ಜಾಯ್ನಾಸ್ತಾನಾ ವೆತಾನಾ ಆಲಿಯಾನ್ ಏಕ್ ನಿರ್ಧಾರ್ ಘೆತ್ಲ್ಲೊ.
ಮೆಡಿಕಲ್ ಕಾಲೇಜಿಕ್ ಸಾಸ್ಣಾಕ್ ಆದೇವ್ಸ್ ಮಾಗೊಂಕ್ ಆಲಿಯಾನ್ ಘಟ್ ನಿರ್ಧಾರ್ ಕೆಲ್ಲೊ ತೆದ್ನಾಂ ಆಪ್ಲ್ಯಾ ನಿರ್ಧಾರಾಕ್ ಪಯ್ಲೆಂ ತಾಣೆಂ ಸಮೀರಾಕ್ ಸಾಂಗ್ಲೊ.
"ಆಲಿಯಾ...., ತುಕಾ ಶಿಕ್ಪಾಂತ್ ಜಾಲ್ಯಾರ್ ಹಾಂವ್ ಕುಮಕ್ ಕರ್ತಾಂ!"
ಸಮೀರ್ ಆಲಿಯಾಕ್ ಮಸ್ತ್ ಸಮ್ಜಾಯ್ತಾಲೊ ತರ್ಯ್ ಆಲಿಯಾ ತಾಕಾ ಆಯ್ಕೊಂಕ್ ತಯಾರ್ ನಾತ್ಲ್ಲೆಂ.
"ಸಮೀರ್....., ಮ್ಹಾಕಾ ಇಂಟ್ರೆಸ್ಟ್ ನಾತ್ಲೆಲ್ಯಾ ವಿಶಯಾಂತ್ ಹಾಂವ್ ಉಲಂವ್ಕ್ಚ್ ವಚಾನಾ. ದೆಕುನ್.... ಆಮಿ ತೊ ವಿಶಯ್....!"
ಆಲಿಯಾಚಾ ಜವಾಬೆ ಮುಕಾರ್ ತೊ ಕಾಂಯ್ಚ್ ಉಲಂವ್ಚಾ ಸ್ಥಿತೆರ್ ಪಾವಾನಾತ್ಲ್ಲೊ. ಆಲಿಯಾ ತಾಕಾ ಹರ್ಯೆಕಾ ವಿಶಯಾಂತ್ ಆಶೆಂ ಜವಾಬ್ ದಿತಾಲೆಂ ಕೀ ಸಮೀರಾಕ್ ಮಾತ್ರ್ ನ್ಹಯ್, ಆಲಿಯಾಚಾ ಭೊಂವಾರಿ ಕೊಣಾಯ್ಕ್ಯ್ ದುಸ್ರೆಂ ಉತಾರ್ ಉಲಂವ್ಕ್ ತೆಂ ಆವ್ಕಾಸ್ ಕರುನ್ ದೀನಾತ್ಲ್ಲೆಂ. ಹ್ಯಾಚ್ ಖಾತಿರ್ ಚಡಾವತ್ ಚೆಡ್ವಾಂ ಆಲಿಯಾಚಾ ಪಯ್ಲ್ಯಾ ಭೆಟೆಂತ್ಚ್, ಆಲಿಯಾಚಾ ಗುಣಾಂಕ್ ಪಾರ್ಕುನ್ ಆಲಿಯಾ ಥಾವ್ನ್ ಪಯ್ಸ್ ರಾವೊಂಕ್ ಚಿಂತಾಲಿಂ ತರ್, ಆಲಿಯಾಚಾ ಸೊಭಾಯೆಕ್ ಪಳೆಲ್ಲೆ ಚೆಡೆ ಜಾಲ್ಯಾರ್ಯ್ ತಾಚ್ಯಾ ಮತಿಕ್ ಸಮ್ಜೊಂಕ್ ಸಕಾನಾಸ್ತಾನಾ, ಆಲಿಯಾ ವ್ಹಡ್ಲೆಂ ಘಮಂಡಿ ಚೆಡುಂ ಮ್ಹಳ್ಳ್ಯಾ ಪರಿಂ ತಾಚೊ ಸತ್ಕಾರ್ ಕರ್ತಾಲೆ ಶಿವಾಯ್ ತಾಚ್ಯಾ ಕಾಳ್ಜಾಕ್ ಸಮ್ಜೊನ್ ಆಲಿಯಾಕ್ ಲಾಗ್ಶಿಲೆಂ ಯಾ ಲಾಗ್ಶಿಲೊ ಮ್ಹಣೊನ್ ಕೊಣ್ಯ್ ತಾಚ್ಯಾ ಜಿವಿತಾಂತ್ ಆಯಿಲ್ಲಿಂ ನಾಂತ್.
ಸಮೀರ್ ಜಾಲ್ಯಾರ್ಯ್ ಏಕ್ ಚಲೊ ಜಾವ್ನ್, ತೊ ಎಕಾ ಚಲಿಯೆಚಾ ಭಗ್ಣಾಂಕ್, ತಿಚ್ಯಾ ಆಶೆಕ್, ತಿಚ್ಯಾ ಸೊಭಾಯೆಕ್, ತಿಚ್ಯಾ ಮಾನಾಕ್, ತಿಚ್ಯಾ ಗೌರವಾಕ್ ಪಾರ್ಕುಂಕ್ ಸಕ್ಲೊ ನಾ.
ಆಲಿಯಾಚಾ ಸೊಭಾಯೆಕ್ ಪಳವ್ನ್ ತೊ ಸಲ್ವಾಲ್ಲೊ. ಆಲಿಯಾಕ್ ಆಪ್ಣಾಂವ್ಕ್ ತೊ ಆಶೆತಾಲೊ ತರ್ಯ್ ಆಲಿಯಾ ಕೊಣಾಚ್ಯಾಚ್ ಸಮ್ಜಣೆಚಾ ಭಾಯ್ಲೆಂ ಚೆಡುಂ ಮ್ಹಣೊನ್ ತೊ ಜಾಣಾಂ ಜಾಲ್ಲೊ. ಹ್ಯಾ ಸಮ್ಜಣೆಂತ್ ಆಲಿಯಾನ್ ಆಪ್ಣಾಕ್ಚ್ ಹ್ಯಾ ಸಮಾಜೆ ಮುಕಾರ್ ಪ್ರಸ್ತುತ್ ಕೆಲ್ಲಿ ರೀತ್ಯ್ ಕಾರಾಣ್ ಜಾವ್ಯೆತ್.
ಚಲಿ ಮ್ಹಳ್ಯಾರ್ ಜಳ್ಚಿ ಮೆಣಾಚಿ ವಾತ್. ಜಳ್ಚಾ ಪಯ್ಲೆಂ ಹಂಕಾರಾನ್ ಆಪ್ಲೊ ಆಸ್ಥಿತ್ವ್ ದಾಖಯ್ತಾ ತರ್ಯ್ ಆಲ್ತಾರಿಕ್ ಚಡೊನ್ ಅಪ್ಲ್ಯಾಚ್ ಖುಶೇನ್ ಜಳೊಂಕ್ ಲಾಗ್ತಾನಾ ತಿ ವಾತ್ ಪಾಟಿಂ ಫುಡೆಂ ಪಳಯ್ನಾಸ್ತಾಂ ನಿರಂತರ್ ಜಿವಿತಾಂತ್ಲೊ ಕಾಳೊಕ್ ಧಾಂವ್ಡಾಯ್ತಾ ಮ್ಹಣೊನ್ ಸಮೀರ್ ಚಿಂತಾಲೊ.
ಭೋವ್ಶ್ಯಾ ತೊ ಚಲಿಯೆಚಾ ವಿಶಿಂ ಜಾಣಾಂ ಆಸ್ಲ್ಲೊ. ಪುಣ್ ಚಲಿಯೆಕ್ ನ್ಹಯ್!
ಹ್ಯಾಚ್ ಕಾರಾಣಾಕ್ ಲಾಗೊನ್ ಆಲಿಯಾ ತಾಚೆಂ ಜಾಂವ್ಕ್ ಸಕ್ಲೆಂ ನಾ. ಚಲಿಯೆಚಾ ವಿಶ್ಯಾಂತ್ ಜಾಣಾಂ ಜಾಂವ್ಚಾ ಪಯ್ಲೆಂ ಚಲಿಯೆಕ್ ಜಾಣಾಂ ಜಾಂವ್ಚೆಂ ಚಡ್ ಗರ್ಜೆಚೆಂ ಮ್ಹಳ್ಳೆಂ ಸಮೀರ್ ವಿಸ್ರೊನ್ ಗೆಲ್ಲೊ.
ಆಶೆಂ ಘರಾಂತ್ಯ್ ಎಕ್ಸುರೆಂ, ಭಾಯ್ರ್ಯ್ ಎಕ್ಸುರೆಂ ಜಾಲ್ಲೆಂ ಆಲಿಯಾ ತಾಚ್ಯಾ ಚಿಂತ್ಪಾಕ್ಯ್ ಎಕ್ಸುರ್ಪಣಾಚೆಂಚ್ ರೂಪ್ ದೀಂವ್ಕ್ ಪಾವ್ಲೆಂ.
"ಸಮೀರ್....? ಐ ಜಸ್ಟ್ ಕಾಂಟ್ ಡು ದೇಟ್.....!" ಆಲಿಯಾ ಉಲಯ್ತಾನಾ ತಾಚೆಂ ತೋಂಡ್ ಹಿಂವಾಳ್ಳ್ಯಾ ಭಾಶೆನ್ ದಿಸ್ತಾಲೆಂ. ಥೊಡೊ ವೇಳ್ ಮೌನ್ ರಾವೊನ್ ಕಿತೆಂಗೀ ಮತಿಂತ್ ಕಳ್ವಳ್ಲ್ಲ್ಯಾ ಪರಿ ಜಾಲ್ಲೆಂ ತೆಂ, "....... ಮಾಕಾ ರಾಗಾತ್ ಪಳಂವ್ಕ್ ಜಾಯ್ನಾ. ಹಾಂವ್ ಕಶೆಂ ಖಂಯ್ಚಾಯ್ ಮನ್ಶ್ಯಾಕ್ ತೆಂ ಇಂಜಕ್ಷನ್ ತೊಪುಂಕ್ ಸಕ್ತೆಲಿಂ?"
ಆಲಿಯಾಚಿಂ ಉತ್ರಾಂ ಆಯ್ಕಾಲ್ಲೊ ಸಮೀರ್ ಸವ್ಕಾಸ್ ಆಮ್ರುಕೊ ಹಾಸೊ ಹಾಸ್ಲೊ.
"ದುಸ್ರ್ಯಾ ಕೊಣಾಯ್ ಮುಕಾರ್ ತುಂ ಆಶೆಂ ಉಲಯ್ಶಿ ಜಾಲ್ಯಾರ್, ತಿಂ ತುಕಾ ಪಳವ್ನ್ ಹಾಸೊಂಕ್ ಆಸಾತ್. .....ತುಂ ಜಾಣಾಂಯ್ ಆಲಿಯಾ ಆಮ್ಚ್ಯಾ ಕ್ಯಾಂಪಸಾಂತ್ಲಿಂ ಸಗ್ಳಿಂ ತುಕಾ, ತುಂ ಏಕ್ ಸ್ಟ್ರಾಂಗ್ ಚೆಡುಂ ಮ್ಹಣೊನ್ಚ್ ವೊಲಾಯ್ತಾತ್. ತುಂ ಪಳೆಲ್ಯಾರ್....? ರಾಗಾತ್ ಪಳಂವ್ಕ್ ಜಾಯ್ನಾ, ಇಂಜಕ್ಷನ್ ತೊಪುಂಕ್ ಜಾಯ್ನಾ ಮ್ಹಣೊನ್......!"
"ಹ್ಯಾ ಆಲಿಯಾಕ್ ಎದೊಳ್ ಕೊಣೆಯ್ ಸಮ್ಜಾಲ್ಲೆಂ ನಾ!" ಸಮೀರಾಚೆಂ ಉಲೊಣೆಂ ಕಾಬಾರ್ ಜಾಂವ್ಚಾ ಪಯ್ಲೆಂಚ್ ಆಲಿಯಾ ಉಲಯ್ಲೆಂ.
ತಾಚ್ಯಾ ಉಲೊಣ್ಯಾಂತ್ ಎಕಾ ಥರಾಚೊ ತಿರಸ್ಕಾರ್ ಉಟೊನ್ ದಿಸ್ತಾಲೊ.
"ಪಳೆ ಆಲಿಯಾ.... ಲೊಕಾಚೆಂ ಮ್ಹಾಕಾ ಕಳಿತ್ ನಾ. ಪುಣ್ ಹಾಂವ್ ತುಕಾ ಸಮ್ಜೊಂಕ್ ಪ್ರಯತ್ನ್ ಕರ್ತಾಂ!"
"ತುಜೆಂ ಪ್ರಯತ್ನ್ ಪ್ರಯತ್ನ್ಚ್ ಜಾವ್ನ್ ಉರ್ತೆಲೆಂ ಸಮೀರ್.....! ತುಜ್ಯಾಕ್ಯ್ ತೊ ರಾಯನ್ಚ್ ಜಾವ್ಯೆತ್. ಅಟ್ಲೀಸ್ಟ್ ವ್ಹಳಕ್ ನಾಸ್ತಾನಾ ತರ್ಯ್ ಮ್ಹಜ್ಯಾ ಸೊಭಾಯೆಕ್ ಪಳವ್ನ್ ಮ್ಹಾಕಾ ಏಕ್ ವಾಟ್ ದಾಖವ್ನ್ ದೀಂವ್ಕ್ ಮುಕಾರ್ ಆಯ್ಲೊ.... ಸೊಡ್ ತೆಂ...!" ಉಲಂವ್ಚೆಂ ಆಲಿಯಾ ಆತಾಂ ಚಡ್ ಚಿಂತೇಸ್ತ್ ಜಾಲೆಂ.
ಆಪ್ಣೆಂ ಆಲಿಯಾಕ್ ತಮಾಶೆ ಕೆಲ್ಲೆ ಬರೆ ನ್ಹಯ್ ಮ್ಹಣೊನ್ ಸಮೀರಾಕ್ ಕಳ್ಳೆಂ.
ಆಲಿಯಾನ್ ಮಧೆಂಚ್ ರಾಯನಾಚೆಂ ನಾಂವ್ ಕಾಡ್ಲೆಲೆಂಯ್ ಸಮೀರಾಕ್ ಕಿತ್ಯಾಕ್ಗೀ ಬರೆಂ ಲಾಗ್ಲೆಂ ನಾ.
"ತರ್, ತುಂ ಆತಾಂ ಕಿತೆಂ ಮ್ಹಣ್ತಾಯ್?" ನಿಮಾಣೆಂ ಜಾವ್ನ್ ಸಮೀರ್ ಆಲಿಯಾಕ್ಚ್ ಆಯ್ಕೊಂಕ್ ತಯಾರ್ ಜಾಲೊ. ಆಲಿಯಾನ್ ಮೆಡಿಕಲ್ ಕಾಲೇಜಿಕ್ ಸೊಡುನ್ ವೆಚೆಂ ತಾಕಾ ಮನ್ ನಾತ್ಲ್ಲೆಂ. ತೆಂ ಹ್ಯಾ ಕ್ಯಾಂಪಸಾಂತ್ ಆಸ್ತಾ ಪಾಸೊನ್ ಕಶೆಂ ತರ್ಯ್ ಕರುನ್ ಆಪುಣ್ ತಾಕಾ ಸಾಂಬಳ್ತಲೊಂ ಮ್ಹಳ್ಳೆಂ ಧಯ್ರ್ ಸಮೀರಾಕ್ ಆಸ್ಲ್ಲೆಂ. ಆಲಿಯಾ ಏಕ್ ಪಾವ್ಟಿಂ ತರ್ ಹ್ಯಾ ಕ್ಯಾಂಪಸಾಕ್ ಸೊಡುನ್ ಗೆಲೆಂ ತರ್, ಉಪ್ರಾಂತ್ ತೆಂ ಆಪ್ಣಾಕ್ ಮೆಳೊಂಕ್ ಸಾದ್ಯ್ಚ್ ನಾ. ಚಿಂತ್ಲ್ಲೊ ಸಮೀರ್,
"ಪಳೆ ಆಲಿಯಾ ಹಿ ಆಮ್ಚಾ ಜಿವಿತಾಚಿ ವಾಟ್. ಹ್ಯಾ ವಾಟೆರ್ ಚಲ್ತಾನಾ, ಹಿ ಮ್ಹಜಿ ವಾಟ್ ಆನಿ ಹ್ಯಾ ವಾಟೆ ವಯ್ಲ್ಯಾನ್ ಹಾವೆಂ ಚಲೊಂಕ್ ಜಾಯ್ ಮ್ಹಣೊನ್ ಚೀಂತ್. ತೆದಾಳಾ ತುಕಾ ಕಾಂಯ್ ಭಿರಾಂತ್ ದಿಸ್ಚಿ ನಾ. ಸಗ್ಳೆಂ ಸುಲಭ್ ಜಾತೆಲೆಂ.....!"
"ಯು ಮೀನ್.....!" ಕಿತೆಂಗೀ ಚಿಂತ್ಲ್ಲೆಂ ಆಲಿಯಾ, "ಮನಿಸ್ ಆಪ್ಲಿ ವಾಟ್ ಸೊಧ್ತಾನಾ ಸೊಭಿತ್ ವಾಟ್ಚ್ ಕಿತ್ಯಾಕ್ ಸೊಧ್ತಾ?"
ಎಕಾಚ್ಚ್ ಫರಾ ಆಯಿಲ್ಲ್ಯಾ ಆಲಿಯಾಚಾ ಸವಾಲಾಕ್ ಕಿತೆಂ ಜವಾಬ್ ದಿಂವ್ಚಿ ಮ್ಹಳ್ಳೆಂ ಸಮೀರಾಕ್ ಸಮ್ಜಾಲೆಂ ನಾ.
"ಮ್ಹಳ್ಯಾರ್.....?" ಥೊಡ್ಯಾ ಖಿಣಾಂಚಾ ಮೌನಾ ಉಪ್ರಾಂತ್ ತೊ ಉಲಯ್ಲೊ.
"ಮ್ಹಳ್ಯಾರ್ ವೆರ್ರಿ ಸಿಂಪಲ್......! ಮನಿಸ್ ಕಾಂಟ್ಯಾಂ ವಯ್ಲ್ಯಾನ್ ಚಲೊಂಕ್ ಯಾ ವಾರ್ಯಾ ವಯ್ಲ್ಯಾನ್ ಉಭೊಂಕ್ ಕಿತ್ಯಾಕ್ ಪ್ರಯತ್ನ್ ಕರಿನಾ?" ಸಮೀರಾಚಿ ಕಾಂಯ್ ಜವಾಬ್ ಯೇನಾಸ್ತಾನಾ ವೆತಾನಾ ತಾಣೆಂಚ್ ಮುಕಾರ್ಸಿಲೆಂ.
"ತಾಚ್ಯಾ ಪಾಂಯಾಂಕ್ ಕಾಂಟೆ ತೊಪ್ತಾತ್ ಮ್ಹಳ್ಳ್ಯಾ ಭಿಯಾನ್? ಯಾ ತೊ ವಾರ್ಯಾರ್ ಥಾವ್ನ್ ಜಡೊನ್ ಧರ್ಣಿರ್ ಪಡ್ತಲೊ ಮ್ಹಳ್ಳ್ಯಾ ಆಕಾಂತಾನ್? ವೈ.....? ವೈ ಸಮೀರ್?"
ಆಲಿಯಾ ಎದೊಳ್ಚ್ ಆಪ್ಲ್ಯಾ ಚಿಂತ್ನಾನಿಂ ವಾರ್ಯಾರ್ ಉಭೊಂಕ್ ಲಾಗ್ಲ್ಲೆಂ. ತಾಚ್ಯಾ ಮುಖಮಳಾರ್ ಏಕ್ ವಿಚಿತ್ರ್ ಪ್ರಕಾಸ್ ಆಸ್ಲ್ಲೊ. ತೆಂ ಆಪ್ಲ್ಯಾ ದೊಳ್ಯಾಂನಿಂ ಆಪ್ಲ್ಯಾ ಜಿವಿತಾಚಾ ಮುಕ್ಲ್ಯಾ ವಾಟೆ ವಯ್ಲೆಂ ಸಪಾಣ್ ಪಳೆತಾ ತಶೆಂ ದಿಸ್ತಾಲೆಂ.
"ಆಲಿಯಾ...! ಹಾಂವ್ ತುಕಾ ಏಕ್ ವಿಶಯ್ ಸಾಂಗೊಂ.....?"
"ಅಫ್ಕೋರ್ಸ್.....! ಸಾಂಗ್! ತುಂ ಕಿತೆಂ ಸಾಂಗೊಂಕ್ ಸೊಧ್ತಾಯ್?"
"ತುಂ ಬೆಜಾರ್ ಕರ್ಚೆಂ ನಾಂಯ್.......?"
"ನೊ ನೊ....... ಖಂಡಿತ್ ನಾ!"
"ತುಂ ಕಿತ್ಯಾಕ್ ತುಕಾಚ್ ಎಕ್ಸುರೆಂ ಕರುನ್ ಘೆತಾಯ್ ಜಾಣಾಂಯ್......?"
".........?"
ಅಚಾನಕ್ ಸಮೀರಾಚಾ ತೊಂಡಾ ಥಾವ್ನ್ ಆಯಿಲ್ಲ್ಯಾ ಆಪ್ಣೆಂ ಚಿಂತುಕ್ಚ್ ನಾತ್ಲೆಲ್ಯಾ ಸವಾಲಾಕ್ ಪಳವ್ನ್ ಆಲಿಯಾಚಾ ತೊಂಡಾ ಥಾವ್ನ್ ಉತ್ರಾಂ ಸುಟ್ಲಿಂ ನಾಂತ್. ತಾಣೆಂ ಮೌನ್ ಪಣಿಂ ’ಕಿತ್ಯಾಕ್’ ಮ್ಹಳ್ಳ್ಯಾ ನದ್ರೆನ್ ಸಮೀರಾಚಾ ತೊಂಡಾಕ್ ಪಳೆಲೆಂ.
"ಕಿತ್ಯಾಕ್ ಮ್ಹಳ್ಯಾರ್....!" ಆತಾಂ ಸಮೀರ್ ಉಲಯ್ಲೊ. ".....ತುಂ ತುಜ್ಯಾಚ್ ವಿಶಿಂ ಚಿಂತಾಯ್, ತುಂಚ್ ತುಕಾ ಸಾರ್ಕೆಂ ಮ್ಹಣೊನ್ ಪಾತ್ಯೆತಾಯ್ ಆನಿ ಹ್ಯಾ ಖಾತಿರ್ ತುಕಾಚ್ ತುಂ ಎಕ್ಸುರೆಂ ಕರ್ತಾಯ್.!"
ಸಮೀರಾಚಿ ಜವಾಬ್ ಆಯ್ಕೊನ್ ಥೊಡೊ ವೇಳ್ ಆಲಿಯಾ ಕಾಂಯ್ಚ್ ಉಲಯ್ಲೆಂ ನಾ. ಹ್ಯಾ ವೆಳಾಂತ್ ತಾಚಿ ಮತ್ ಸಗ್ಳೆಂ ತಾಚೆಂ ಜಿವಿತ್ ಆಟಯ್ಲಾಗ್ಲಿ. ಉಪ್ರಾಂತ್ ತೆಂ ಸವ್ಕಾಸ್ ಉಲಯ್ಲೆಂ.
"ಹಾಂವ್ ಎಕ್ಸುರಿಂ ನ್ಹಯ್ ಸಮೀರ್....! ಹಾಂವ್ ಎಕ್ಸುರಿಂ ಮ್ಹಣೊನ್ ಕೊಣಾಯ್ಕ್ಯ್ ಭೊಗ್ತಾ ಜಾಲ್ಯಾರ್ ತಿ ತಾಂಚಿ ಖಂಡಿತ್ ಚೂಕ್. ಜಾಂವ್ಕ್ ಪುರೊ ಹಾಂವ್ ಎಕ್ಸುರಿಂ ರಾವೊಂಕ್ ಖುಶಿ ವರ್ತಾಂ. ಪುಣ್, ಹಾಂತುಂ ಕಾಂಯ್ ಚೂಕ್ ಆಸಾ? ಐ ಡೋಂಟ್ ಥಿಂಕ್ ಸೋ....! ಎನಿ ಹೌ...., ಹಾಂವ್ಯ್ ತುಕಾ ಏಕ್ ವಿಶಯ್ ಸಾಂಗ್ತಾಂ! ಹ್ಯಾ ಸಂಸಾರಾಂತ್ ತುವೆಂ ಸಾಂಗ್ಲೆಲ್ಯಾ ಹ್ಯಾ ಜಿವಿತಾ ವಾಟೆರ್ ಆಪ್ಲೊ ಮತ್ಲಾಬ್ ಯಾ ಆಪ್ಲೊ ಸ್ವಾರ್ಥ್ ನಾಸ್ತಾನಾ ಕೋಣ್ ಕೊಣಾಯ್ಕ್ಯ್ ಜಿಯೆಂವ್ಚೆಂ ಸೊಡ್...... ಕೋಣ್ ಕೊಣಾಯ್ಕ್ಯ್ ಏಕ್ ಹಾಸೊ ಪಾಸೊನ್ ಪಾಟಯ್ನಾಂತ್. ಹಾಕಾ ಕಿತೆಂ ಮ್ಹಣ್ತಾಯ್ ತುಂ....?"
"ಹಾಂ... ಖಂಡಿತ್.....! ಮನ್ಶ್ಯಾಚ್ಯೊ ಹಾಸೊ ಮತ್ಲಾಬಿ ಜಾಂವ್ಕ್ ಸಕ್ತಾತ್. ಮನಿಸ್ಯ್ ಮತ್ಲಾಬಿ ಜಾಂವ್ಕ್ ಸಕ್ತಾ. ತಿತ್ಲೆಂಚ್ ಕಿತೆಂ.... ಎಕೇಕ್ ಪಾವ್ಟಿಂ ಹೊ ಸಂಸಾರ್ಯ್ ಮತ್ಲಾಬಿ ಮ್ಹಣೊನ್ ದಿಸ್ತಾ. ತೆದಾಳಾ ತುಕಾಚ್ ತುಂ ಕೊನ್ಶಾಕ್ ಲೊಟ್ತಾಯ್ ಶಿವಾಯ್ ಆನಿ ತುಕಾಚ್ ತುಂ ಎಕ್ಸುರೆಂ ಕರ್ತಾಯ್ ಶಿವಾಯ್ ದುಸ್ರೆಂ ಕಾಂಯ್ ನಾ.!"
ಸಮೀರಾಚಾ ಜವಾಬೆಕ್ ಆಲಿಯಾನ್ ಆಪ್ಲ್ಯಾ ಮತಿಂತ್ ಥೊಡೆಂ ಆಟಯ್ಲೆಂ.
"ಭೋವ್ಶ್ಯಾ ತುಂ ಮನ್ಶ್ಯಾಕ್ ಮಸ್ತ್ ಲಾಗಿಂ ಥಾವ್ನ್ ವಳ್ಕಾತಾಯ್ ಆನಿ ಮ್ಹಾಕಾ ಮನ್ಶ್ಯಾಚಾ ತಿತ್ಲ್ಯಾ ಲಾಗಿಂ ಯೇಂವ್ಕ್ ನಾಕಾ. ಹಾಂವ್ ಸಂಸಾರಾಕ್ ವಳ್ಕೊಂಕ್ ಪ್ರಯತ್ನ್ ಕರ್ತಾಂ ಆನಿ ಹ್ಯಾ ಸಂಸಾರಾಕ್ ಮನಿಸ್ ಮ್ಹಳ್ಯಾರ್ ಕಿತೆಂ ಮ್ಹಣೊನ್ ದಾಖವ್ನ್ ದೀಂವ್ಕ್ ಆಶೆತಾಂ. ಎನಿ ಹೌ...ಥ್ಯಾಂಕ್ಸ್ ಫಾರ್ ದಿ ಕಾಂಪ್ಲಿಮೆಂಟ್ಸ್......!"
ಥೊಡ್ಯಾ ದಿಸಾಂ ಪಯ್ಲೆಂ ಆಪ್ಣಾ ಮಧೆಂ ಆನಿ ಸಮೀರಾ ಮಧೆಂ ಘಡೊನ್ ಗೆಲ್ಲೆಂ ವಿಚಾರ್ ತರ್ಕ್ ಆಲಿಯಾಕ್ ಉಡಾಸ್ ಆಯ್ಲೆಂ.
ಥೊಡ್ಯಾಚ್ ವೆಳಾ ಪಯ್ಲೆಂ ಕಿಚನಾಂತ್ ಆವಯ್ಕ್ ಕುಮಕ್ ಕರ್ತಾನಾ ಆಪ್ಲ್ಯಾ ಚಿಂತ್ನಾಂ ವರ್ವಿಂ ಸುರಿಯೆಚಾ ಧಾರಿಚೊ ಘಾಯ್ ಕರುನ್ ಘೆತ್ಲೆಲ್ಯಾ ಬೊಟಾಕ್ ಏಕ್ ಪಾವ್ಟಿಂ ಆಲಿಯಾನ್ ಪಳೆಲೆಂ. ತಾಕಾ ಆವಯ್ಚಿ ಭಿರ್ಮತ್ ದಿಸ್ಲಿ. ಆಪ್ಲ್ಯಾ ಮತಿಂತ್ಲ್ಯಾ ಚಿಂತ್ನಾಂಕ್ ಏಕ್ ವಾಟ್ ಖಡಿತ್ ದಾಖಂವ್ಕ್ ಜಾಯ್. ನಾ ತರ್ ಕೆದ್ನಾಂ ಪಾಸೊನ್ ಹಾವೆಂ ಆಶೆಂಚ್ ಭಿತರ್ಲ್ಯಾ ಭಿತರ್ಚ್ ಝಗ್ಡೊನ್ ರಾಂವ್ಚೆಂ. ಆಪ್ಣೆ ಘೆತ್ಲೆಲ್ಯಾ ನಿರ್ಧಾರಾ ವಿಶಿಂ ಖಂಡಿತ್ ’ಅಬ್ಬೂ’ ಲಾಗಿಂ ಉಲಂವ್ಕ್ ಜಾಯ್. ಚಿಂತ್ಲ್ಲೆಂ ಆಲಿಯಾ ತಶೆಂಚ್ ಪರ್ತ್ಯಾಕ್ ಕುಜ್ನಾ ತೆವ್ಶಿಂ ಚಮ್ಕಾಲೆಂ.
ಆಲಿಯಾನ್ ಕುಜ್ನಾಚ್ಯಾ ದಾರಾರ್ ಪಾಂಯ್ ದವರ್ಲ್ಯಾತ್ ಮಾತ್ರ್...!
ತಿತ್ಲ್ಯಾರ್....!
"ಆಲಿಯಾ ತುಂ ವಚ್.... ಭಾಯ್ರ್ ಬಸ್ ಆನಿ ತುಜೆಂ ಕಾಮ್ ಕರ್. ಹಾಂವ್ ಹೆಂ ಕರ್ತಾಂ. ಹೆಂ ಕಾಂಯ್ ವ್ಹಡ್ಲೆಂ ನ್ಹಯ್........!"
ಕುಜ್ನಾಕ್ ಆಯಿಲ್ಲ್ಯಾ ಆಲಿಯಾಕ್ ಪಳವ್ನ್ ತಾಚಿ ಆವಯ್ ಉಲಯ್ಲಿ. ಆಪ್ಲ್ಯಾ ಧುವೆಚೆ ಗೂಣ್ ತಿ ಜಾಣಾಂ ಆಸ್ಲ್ಲಿ. ಕಿತೆಂ ಜಾಲ್ಯಾರ್ಯ್ ತಿ ಆಲಿಯಾಚಿ ಆವಯ್. ತಿಚ್ಯಾ ಧುವೆಕ್ ಜಾಂವ್ಚಿ ತಿ ದೂಖ್ ತಿಕಾಚ್ ಜಾಲ್ಲ್ಯಾ ಪರಿಂ. ಆಲಿಯಾನ್ ಪರ್ತ್ಯಾಕ್ ಕುಜ್ನಾಕ್ ಯೇವ್ನ್ ಆನಿ ಕಿತೆಂ ಉಲ್ಟಾ ಪಲ್ಟಾ ಕರ್ಚೆಂ ನಾಕಾ ಮ್ಹಣೊನ್ ಆಲಿಯಾಕ್ ತಿ ಭಾಯ್ರ್ ಬಸೊಂಕ್ ಸಾಂಗಾಲಾಗ್ಲಿ.
ಭುರ್ಗ್ಯಾಪಣಾರ್ ಜಾಲ್ಯಾರ್ ನೆಣ್ತೆಂಪಣ್. ಭುರ್ಗಿಮತ್, ಆರ್ಗಾಂಟಿ ಸ್ವಭಾವ್, ಸ್ವಾಭಾವೀಕ್ ಮ್ಹಣೊನ್ ಆಪ್ಲ್ಯಾ ಧುವೆಕ್ ಉಲವ್ನ್, ದೆಂಕ್ಣೆಂ ಮಾರುನ್, ರಾಗ್ ಕರುನ್, ಎಕೇಕ್ ಪಾವ್ಟಿಂ ಸಾರಾನ್ ಆಪ್ಲ್ಯಾ ಭುರ್ಗ್ಯಾಂಚಾ ಬೂದಿಕ್ ಮ್ಹಣೊನ್ ಚಿಂತುನ್ ಹಳ್ತಾನ್ ಎಕೇಕ್ ಮಾರ್ ಮಾರ್ಲ್ಲೆಂ ಆಸಾ. ಪುಣ್ ಆತಾಂ.....?
ಆತಾಂ ಆಲಿಯಾ ಆಂಗ್ ಭರ್ಲೆಲೆಂ ಹೊಕಾಲ್. ಆಪ್ಣಾ ಮುಕಾರ್ ದೊಳ್ಯಾಂಕ್ ದೊಳೆ ಮೆಳವ್ನ್ ತೆಂ ಉಲಂವ್ಕ್ಯ್ ಸಕ್ತಾ. ಆಪ್ಲಿ ಧುವ್ ಭುರ್ಗ್ಯಾಪಣಾರ್ ಆಸ್ಲ್ಲ್ಯಾ ಪರಿಂ ಆಜ್ ನಾತ್ಲ್ಲೆಂ ಆಸ್ತಾನಾ ಧುವೆಕ್ ಸಮ್ಜಾಂವ್ಕ್ ತಿಂ ಭುರ್ಗ್ಯಾಪಣಾ ವಯ್ಲಿಂ ಹಾತೆರಾಂ ಆಜ್ ಗರ್ಜ್ ಪಡಾನಾಂತ್ ಮ್ಹಣೊನ್ ಸಾರಾ ಸಾರ್ಕೆಂ ಜಾಣಾಂ ಆಸ್ಲ್ಲಿ.
ಕಿತ್ಲೆಂ ಮ್ಹಳ್ಯಾರ್ಯ್ ಆವಯ್ ತಿ ಆವಯ್ಚ್! ಆವಯ್ಕ್ ಆಪ್ಲೆಂ ಭುರ್ಗೆಂ ಕಿತ್ಲೆಂ ವ್ಹಡ್ ಜಾಲ್ಯಾರ್ಯ್ ತೆಂ ಅಜೂನ್ಯ್ ಆಪ್ಲ್ಯಾ ಉಸ್ಕ್ಯಾರ್ ಖೆಳ್ಚ್ಯಾ ಲ್ಹಾನ್ ಬಾಳಾ ಪರಿಂಚ್. ಆಲಿಯಾ ಲ್ಹಾನ್ ಆಸ್ತಾನಾ ಆಪ್ಲೊ ಸ್ವಭಾವ್ ಬದ್ಲೊಂಕ್ ಪಾವೊಂಕ್ ನಾ ಮ್ಹಣ್ತಾನಾ ಆತಾಂ ಪ್ರಾಯೆನ್ ಭರ್ಲ್ಲೆಂ ಚೆಡುಂ ಕಶೆಂ ಆಪ್ಲೊ ಸ್ವಭಾವ್ ಬದ್ಲಿತೆಲೆಂ?
ಸಾರಾಕ್ ತಿಚ್ಯಾ ವಿವಾಹಿತ್ ಜಿಣ್ಯೆಂತ್ ತಿಚ್ಯಾ ಮಾಂಯ್ ಮಾಂವಾ ಥಾವ್ನ್ ಯಾ ಘೊವಾ ಥಾವ್ನ್, ಯಾ ತಿಚ್ಯಾ ಚವ್ಗಾಂ ಭುರ್ಗ್ಯಾಂ ಪಯ್ಕಿ ಅಕ್ಬರ್, ಸಲೀಮ್ ಆನಿ ರಝಿಯಾ ಥಾವ್ನ್ ಕಾಂಯ್ಚ್ ಕಷ್ಟ್ ಮ್ಹಳ್ಳೆಂ ಕಳೊಂಕ್ ನಾತ್ಲ್ಲೆಂ.
ಫಕತ್ತ್ ಆಲಿಯಾ......! ಆಲಿಯಾಚಾ ಸ್ವಭಾವಾಕ್ ಲಾಗೊನ್ ಮಾತ್ರ್ ತಿ ಚಿಂತೇಸ್ತ್ ಜಾತಾಲಿ. ಆಪ್ಲ್ಯಾ ಧುವೆಕ್ ಸಮ್ಜೊಂಕ್ ಸಾರಾ ದೀಸ್ ರಾತ್ ಪ್ರಯತ್ನ್ ಕರ್ತಾಲಿ ಜಾಲ್ಯಾರ್ಯ್ ತಿ ಸಲ್ವಾಲ್ಲಿ.
ಪಯ್ಲೆಂಚಾ ತ್ಯಾ ದಿಸಾಂನಿ ಆಪುಣ್ ನ್ಹಯ್ ತರ್ಯ್ ಆಪ್ಲೊ ಘೊವ್ ಆಪ್ಲ್ಯಾ ಧುವೆಚಾ ಸಂಗಿಂ ಆಸಾ, ಧುವೆಕ್ ತೊ ಸಮ್ಜಾತಾ, ಧುವ್ ಬಾಪಾಯ್ ಸವೆಂ ಬರ್ಯಾ ಮೊಗಾನ್ ಆಸಾ ಮ್ಹಣೊನ್ ಸಾರಾಚಾ ಮತಿಕ್ ಸಮಾಧಾನ್ ಆಸ್ಲ್ಲೆಂ.
ಪುಣ್, ಹೆಂ ಕೆದ್ನಾಂ ಪಾಸೊನ್......?
ಚಲ್ಯಾಚಾ ಜಿವಿತಾಂತ್ ದಿಸಾಚೊ ಉದೆಂತ್ ಆನಿ ಆಸ್ತಮ್ ತಡವ್ ಕರುನ್ ಠೊಕೆ ಮಾರ್ತಾ ತರ್, ಚಲಿಯೆಚಾ ಜಿವಿತಾಂತ್ ತೊಚ್ಚ್ ಉದೆವ್ ಆನಿ ಆಸ್ತಮ್ ವೆಗಿಂಚ್ ಠೊಕೆ ಮಾರ್ತಾ ಮ್ಹಣೊನ್ ಸಾರಾ ಜಾಣಾಂ. ತಿಣೆಂಯ್ ಚಲಿಯೆಚಾ ಜಿವಿತಾಂತ್ಲ್ಯಾ ಸಭಾರ್ ಉದೆವಾಂಕ್ ಆನಿ ಅಸ್ತಮಾಂಕ್ ಪಾಶಾರ್ ಕೆಲ್ಯಾತ್. ಆಶೆಂ ಆಸ್ತಾನಾ ಆಲಿಯಾಚೊ ಬಾಪಯ್ ಜೀವನ್ ಪರ್ಯಾಂತ್ ಆಶೆಂಚ್ ಆಲಿಯಾಕ್ ಸಾಂಗಾತ್ ದೀಂವ್ಕ್ ಸಕ್ಚೊ ನಾ. ಏಕ್ ದೀಸ್ ಆಲಿಯಾ, ಆಪ್ಲೆಂ ಧುವ್, ಆಪ್ಲ್ಯಾ ಘೊವಾಚೆಂ ಮೊಗಾಚೆಂ ಧುವ್, ಆಪ್ಲ್ಯಾ ಬಾಪಾಯ್ಕ್ ಸೊಡುನ್ ಆಪ್ಣಾ ಲಾಗಿಂ ಯೆತೆಲೆಂ ಮ್ಹಣೊನ್ ಚಿಂತ್ಲ್ಲ್ಯಾ ತಿಕಾ, ಉಪ್ರಾಂತ್ಲೆಂ ಆಲಿಯಾಚೆಂ ಜಿವಿತ್ ನಿಯಾಳ್ತಾನಾ ಕಿತ್ಯಾಕ್ಗೀ ದೊಳ್ಯಾಂ ಮುಕಾರ್ ಸಗ್ಳೆಂ ಗಯ್ರೆಂ ಗಯ್ರೆಂ ದಿಸೊನ್ ಆಯಿಲ್ಲೆಂ.
ತೊ ದೀಸ್.....!
ವ್ಹಯ್! ಸಾರಾಕ್ ಅಜೂನ್ಯ್ ಉಡಾಸ್ ಆಸಾ. ತಿ ಕಶಿ ವಿಸ್ರಾತೆಲಿ?
ತ್ಯಾ ದೀಸ್...!
"ಆಳೆ.....? ಹಾಂಗಾ ಆಯ್ಕ್........!"
ರಾತಿಚೆಂ ಜೆವಾಣ್ ಜಾವ್ನ್ ನಿದೊಂಕ್ ಗೆಲ್ಲ್ಯಾ ಶಬೀರ್ ಅಹ್ಮದಾಕ್ ದೊಳ್ಯಾಂ ಫುಡೆಂ ನೀದ್ಚ್ ಆಯ್ಲಿನಾ. ಆಪ್ಲ್ಯಾ ನಿದ್ಚಾ ಸಾಲಾಂತ್ಲ್ಯಾ ಖಾಟಿಯೆರ್ ಉದಾರೊ ನಿದೊನ್ ತೊ ವಯ್ಲ್ಯಾ ತ್ಯಾ ಸೀಲಿಂಗಾರ್ ಘುಂವ್ಚಾ ಪ್ಯಾನಾಕ್ಚ್ ಪಳೆತಾಲೊ. ಶಬೀರಾಚಾ ಮತಿಂತ್ ಸಭಾರ್ ಸವಾಲಾಂ ಉದೆಲ್ಲಿಂ. ಸಭಾರ್ ತಾಚಾ ಚಿಂತ್ನಾಂಕ್ ತೊ ಆಪ್ಲ್ಯಾ ಬಾಯ್ಲೆ ಸಂಗಿಂ ಉಗ್ತಿಂ ಕರುಂಕ್ ಆಶೆತಾಲೊ.
ಜೆವಾಣ್ ಜಾಲ್ಯಾ ಉಪ್ರಾಂತ್ ಕುಜ್ನಾಂತ್ಲೆಂ ಕಾಮ್ ತಿರ್ಸುನ್ ನಿದ್ಚಾ ಸಾಲಾಕ್ ಆಯಿಲ್ಲಿ ಸಾರಾ ಆಪ್ಲೆ ಕೇಸ್ ಸೊಡವ್ನ್ ಆಂಗಾರ್ ನೈಟಿ ನ್ಹೆಸ್ತಾನಾ ಶಬೀರ್ ಸಾರಾಕ್ಚ್ ಪಳಂವ್ಕ್ ಪಡ್ಲೊ. ಆರ್ಶ್ಯಾ ಮುಕಾರ್ ರಾವ್ಲೆಲ್ಯಾ ಸಾರಾಕ್, ತ್ಯಾ ಆರ್ಶ್ಯಾಂತ್, ಖಾಟಿಯೆರ್ ಆಡ್ ಪಡೊನ್ ಆಪ್ಣಾಕ್ಚ್ ಪಳಂವ್ಚೊ ಆಪ್ಲೊ ಘೊವ್ ದಿಸ್ಲೊ. ಆಪ್ಣಾಕ್ಚ್ ಪಳಂವ್ಚ್ಯಾ ಶಬೀರಾಚ್ಯಾ ದೊಳ್ಯಾಂ ದಿಶ್ಟೆಂತ್ ಕಸಲಿಂಗೀ ಅವ್ಯಕ್ತ್ ಭೊಗ್ಣಾಂ ಆನಿ ಚಿಂತ್ನಾಂ ಉಮಾಳ್ತಾತ್ ಮ್ಹಳ್ಳ್ಯಾ ಪರಿಂ ಸಾರಾಕ್ ದಿಸಾಲಾಗ್ಲೆಂ. ಆಪ್ಣಾಕ್ ಪಳಂವ್ಚೊ ಆಪ್ಲೊ ಘೊವ್ ಆಪ್ಲ್ಯಾ ಮತಿಂತ್ಲ್ಯಾ ಚಿಂತ್ನಾನಿಂ ತೊ ಕಿತೆಂ ಚಿಂತಾಲೊ? ಆನಿಂ ಕಿತೆಂ ಆಶೆತಾಲೊ? ತೆಂ ಶಬೀರಾಚಾ ದೊಳ್ಯಾಂನಿ ವಾಚುಂಕ್ ಸಾರಾ ಸಕ್ಲಿ ನಾ.
ಆಪ್ಲ್ಯಾ ಚಿಂತ್ನಾಂ ಆನಿ ಭಗ್ಣಾಂ ಭರ್ಲೆಲ್ಯಾ ದೊಳ್ಯಾಂನಿ ಆರ್ಶ್ಯಾ ಮುಕಾರ್ ರಾವ್ಲೆಲ್ಯಾ ಆಪ್ಲ್ಯಾ ಬಾಯ್ಲೆಕ್ ಪಳೆವ್ನ್, ತ್ಯಾ ತಿಚ್ಯಾ ಸೊಭಾಯೆಕ್ ಆನಿ ಆಪ್ಲ್ಯಾ ಜಿವಿತಾಂತ್ ಆಲಿಯಾಕ್ ಲಾಗೊನ್ ಅಚಾನಕ್ ಉದೆಲ್ಲ್ಯಾ ಮತಿಂತ್ಲ್ಯಾ ಚಿಂತ್ನಾಕ್ ಲಾಗಿಂ ಹಾಡುನ್, ತಾಂಕಾ ಎಕಾಮೆಕಾ ಥಂಯ್ ಸಂಭಂಧ್ ಸೊಧ್ತಾನಾ, ಖಂಯ್ಚರ್ಗೀ ಆಪುಣ್ ಗೊಂದೊಳಾಂತ್ ಶಿರ್ಕಾಲ್ಲ್ಯಾ ಪರಿಂ ಶಬೀರಾಕ್ ಭೊಗ್ಲೆಂ.
"ಸಾರಾ......?" ಶಬೀರಾಚಾ ತೊಂಡಾ ಥಾವ್ನ್ ಕಶಿಂ ಉತ್ರಾಂ ಸುಟ್ಲಿಂ ತೆಂ ತೊಚ್ಚ್ ನೆಣಾಂ.
ಘೊವಾನ್ ಆಪ್ಣಾಕ್ ಆಪಯಿಲ್ಲೆಂ ಆಯ್ಕೊನ್ ಸಾರಾ ಆಪ್ಲ್ಯಾ ಘೊವಾ ತೆವ್ಶಿಂ ಘುಂವ್ಲಿ. ಆಪ್ಲ್ಯಾ ಹಾತಾಚಿಂ ಕಾಂಕ್ಣಾ ಕಾಡುನ್ ಟೇಬಲಾರ್ ದವರ್ತಾನಾ,
"ಏಕ್ ಮಿನಿಟ್.....!"
ಉಗ್ತೆಂ ಆಸ್ಲ್ಲೆಂ ಆಲ್ಮಾರಿಚೆಂ ದಾರ್ ದಾಂಪುನ್, ತಿ ಆಪ್ಲ್ಯಾ ಘೊವಾ ಲಾಗಿಂ ಆಯಿಲ್ಲಿ, ಖಾಟಿಯೆರ್ ಆಪ್ಲಿ ವೋಲ್ ಸೊಡವ್ನ್ ಉಶೆಂ ತಿಕ್ಕೆ ಹೆವ್ಶಿಂ ವೊಡ್ತಾನಾ ಘೊವಾಚಾ ಮುಖಮಳಾಕ್ ಲಾಗ್ಶಿಲ್ಯಾನ್ ಪಳೆಲ್ಲ್ಯಾ ಸಾರಾಕ್, ದೋನ್ ತೀನ್ ದಿಸಾಂ ಥಾವ್ನ್ ಆಪ್ಲೊ ಘೊವ್, ಕಸಲಿಂಗೀ ಚಿಂತ್ನಾ ಆಪ್ಲ್ಯಾ ಮತಿಂತ್ ದವರ್ನ್ ಬಸ್ಲಾ ಆನಿ ಚಿಂತೇಸ್ತ್ ಜಾಲಾ ಮ್ಹಣೊನ್ ಕಳೊನ್,
"ವ್ಹಯ್ ನೆ? ..... ಮ್ಹಜ್ಯೆ ಥಾವ್ನ್ ಕಾಂಯ್ ಚೂಕ್ ಜಾಲಿ? ಯಾ ಹಾಂವ್ ಕಾಂಯ್ ವಿಸ್ರೊನ್......?"
ಖಾಟಿಯೆರ್ ತಶೆಂಚ್ ಘೊವಾಚ್ಯಾ ತೆವ್ಶಿಂ ಬಾಗ್ವಾಲ್ಲಿ ಸಾರಾ ಶಬೀರಾಕ್ ಲಾಗಿಂ ಜಾಲಿ.
"........!"
ಶಬೀರ್ ಆತಾಂ ಆಪ್ಲ್ಯಾ ಬಾಯ್ಲೆಕ್ಚ್ ಪಳಂವ್ಚಾರ್ ಪಡ್ಲೊ. ಆಪ್ಲ್ಯಾ ಬಾಯ್ಲೆನ್ ವಿಚಾರ್ಲೆಲ್ಯಾ ಸವಾಲಾಕ್ ತಾಚ್ಯಾ ತೊಂಡಾ ಥಾವ್ನ್ ಕಾಂಯ್ಚ್ ಉತಾರ್ ಸುಟ್ಲೆಂ ನಾ. ಥೊಡ್ಯಾ ಕ್ಷಣಾಂಕ್ ಚ್ಯಾರ್ ದೊಳೆ ಎಕಾಮೆಕಾ ಉಲಂವ್ಕ್ ಲಾಗ್ಲೆ. ಎಕಾ ಮೆಕಾಚಾ ಆಂಗ್ಣಾಂತ್ ಸೊಧುಂಕ್ ಲಾಗ್ಲೆ. ದೊಳ್ಯಾನಿಂ ಸೊಧ್ಲ್ಲೆಂ ಆನಿ ಉಲಯಿಲ್ಲೆಂ ತಾಂಚಾ ಮತಿಕ್ ಕಿತ್ಲೆಂ ಸಮ್ಜಾಲ್ಲೆಂ ತೆಂ ಉತ್ರಾಂನಿಂ ಸಾಂಗೊಂಕ್ ಜಾಂವ್ಚೆ ನ್ಹಯ್. ಹೆಂ ಉತ್ರಾಂನಿಂ ವರ್ಣುಂಕ್ ಸಾದ್ಯ್ ಜಾಲ್ಲೆಂ ಜಾಲ್ಯಾರ್ ತ್ಯಾ ಗುಪಿತ್ ಉಲಂವ್ಚಾ ದೊಳ್ಯಾಂಕ್ಯ್ ಲಜ್ ದಿಸ್ತಿ ಆನಿ ತೆ ಉಲಯ್ತೆಚ್ ನಾಂತ್. ದೊಳೆ ಜರ್ ಉಲಂವ್ಕ್ ಸಕಾನಾಸ್ಲೆ, ಮನ್ಶಾ ಜಿವಿತಾಕ್ ಜಿಯೆಂವ್ಚಾ ಸೊಭಾಯೆಕ್ ಮನಿಸ್ ಚಾಕೊಂಕ್ ಸಕ್ತೊ ನಾ. ತಾಚೆಂ ಜಿವಿತ್ಯ್ ಅಧುರೆಂ ಜಾವ್ನ್ ಉರ್ತೆಂ.
"ಉಸ್ಸ್.....!"
ಆಪ್ಲ್ಯಾ ಬಾಯ್ಲೆಕ್ಚ್ ಪಳವ್ನ್ ಏಕ್ ಲಾಂಭ್ ಶ್ವಾಸ್ ಸೊಡ್ಲ್ಲೊ ಶಬೀರ್, ಸವ್ಕಾಸ್ ಖಾಟಿಯೆರ್ ಉಟೊನ್ ಬಸ್ಲೊ. ಸವ್ಕಾಸ್ ಹಾತಾನಿಂಚ್ ಆಪ್ಲ್ಯಾ ಬಾಯ್ಲೆ ಸಾರಾಕ್ ಆಪ್ಣಾ ಲಾಗಿಂ ಬಸೊಂಕ್ ತಾಣೆಂ ಹಿಶಾರೊ ಕರ್ತಾನಾ, ಆಪ್ಣೆಂ ಪಯ್ಲೆಂ ಸೊಡಯಿಲ್ಲ್ಯಾ ವೊಲಿಕ್ ತೆಂವ್ಶಿ ಲೊಟುನ್ ತಿ ಘೊವಾಚಾ ಲಾಗಿಂ ಬಸ್ಲಿ.
ಸವ್ಕಾಸ್ ಆಪ್ಲ್ಯಾ ಘೊವಾಚಾ ಹಾತಾಂಕ್ ತಿಣೆಂ ಆಪ್ಲ್ಯಾ ಹಾತಾನಿಂ ಧರ್ಲೆ.
"ಸಾಂಗ್...... ಕಿತೆಂ ಜಾಲಾಂ? ದೋನ್ ತೀನ್ ದೀಸ್ ಥಾವ್ನ್........!"
"ಆಲಿಯಾ......!" ಬಾಯ್ಲೆಚಿಂ ಉತ್ರಾಂ ಆಖೇರ್ ಜಾಂವ್ಚಾ ಪಯ್ಲೆಂಚ್, ಶಬೀರಾನ್, ಆಪ್ಲ್ಯಾ ಮನಾಂತ್ಲ್ಯಾ ಚಿಂತ್ಪಾ ಪಿಂತುರಾಕ್ ಉಗ್ತೆಂ ಕೆಲೆಂ.
"ಆಲಿಯಾ....!? ಆಲಿಯಾನ್ ಕಿತೆಂ ಕೆಲೆಂ......?"
ಆಶ್ಚರ್ಯಾನ್ ಎಕ್ಚ್ ಪಾವ್ಟಿಂ ಸಾರಾನ್ ಸವಾಲ್ ಕರ್ತಾನಾ ಬಾಯ್ಲೆಚಾ ಹಾತಾಂತ್ಲೊ ಆಪ್ಲೊ ಹಾತ್ ಸೊಡಯಿಲ್ಲೊ ಶಬೀರ್, ತ್ಯಾ ಹಾತಾನ್ ಆಪ್ಲ್ಯಾ ಕಪಾಲಾರ್ ಪೊಶೆಂವ್ಕ್ ಲಾಗ್ಲೊ.
"ಆಲಿಯಾಕ್ ಕಿತೆಂ ಜಾಲಾಂ?" ಶಬೀರಾನ್ ಉತ್ರಾಂ ವಿಂಚ್ಲಿಂ. "ದೋನ್ ತೀನ್ ದೀಸಾಂ ಥಾವ್ನ್ ಹಾಂವ್ ಪಳೆತಾಂ..... ಪಯ್ಲೆಂ ತೆಂ ಮ್ಹಜ್ಯಾ ಲಾಗಿಂ ಇತ್ಲೆಂ ಬರೆಂ ಆಸ್ತಾಲೆಂ. ಆತಾಂ....."
"ಆತಾಂ.....!?" ಘೊವಾಚಾ ಬೆಜಾರಾಯೆಚೆಂ ಕಾರಾಣ್ ಕಿತೆಂ ಮ್ಹಳ್ಳೆಂ ತೆಂ ತಿಕಾ ಸಮ್ಜಾಲೆಂ ನಾ.
"ಆತಾಂ ಮ್ಹಾಕಾ ಪಳವ್ನ್........., ಮ್ಹಜೆ ಥಾವ್ನ್ ಕಾಂಯ್ ಪುಣಿಂ......? ಆಲಿಯಾ ಕಾಂಯ್ ಸಾಂಗ್ತಾಲೆಂ ತುಕಾ?" ಶಬೀರ್ ಮೊಡ್ಕುರ್ ಉತ್ರಾಂನಿಂ ಉಲಯ್ಲೊ. ಸಾರಾಕ್ಯ್ ಆಪ್ಲೊ ಘೊವ್ ಕಿತೆಂ ಉಲಯ್ತಾ ತೆಂ ಕಾಂಯ್ ಸಮ್ಜಾಲೆಂ ನಾ.
"ನಾ..... ತಶೆಂ ಕಾಂಯ್ ನಾ. ತಾಚಿ ಸವಯ್ ತುಂ ಜಾಣಾಂಯ್..... ತೆಂ ರಝಿಯಾ ಪರಿಂ ನ್ಹಯ್!"
"ಹಾಂ......!" ಶಬೀರ್ ಆಲಿಯಾಚಾ ಚಿಂತ್ನಾನಿ ತಾಚ್ಯಾಚ್ ಮ್ಹಳ್ಳ್ಯಾ ಸಂಸಾರಾಂತ್ ಪಾವ್ಲ್ಲೊ. ತಿತ್ಲ್ಯಾರ್ ತಾಕಾ ಕಿತೆಂಗೀ ಉಡಾಸ್ ಆಯಿಲ್ಲ್ಯಾ ಪರಿಂ ಜಾವ್ನ್,
"ಜಾಲ್ಯಾರ್ಯ್......!" ಶಬೀರಾನ್ ಆಪ್ಲ್ಯಾ ಬಾಯ್ಲೆಕ್ಚ್ ಪಳೆಲೆಂ.
ಘೊವಾಚೆಂ ವರ್ತನ್ ಸಾರಾಕ್ ಮಿಸ್ತೆರಾಂತ್ ಬುಡಯ್ತಾಲೆಂ. ತಿ ಆತಾಂ ಆಪ್ಲ್ಯಾ ಘೊವಾಕ್ ಕಿತೆಂ ಜವಾಬ್ ದಿತೆಲಿ. ಪುಣ್, ಘೊವಾಕ್ ಕಶೆಂ ತರ್ಯ್ ತಿಣೆಂ ಸಮಾಧಾನ್ ಕರುಂಕ್ ಜಾಯ್ ಆಸ್ಲ್ಲೆಂ.
"ಆಳೆ...." ತಿ ಆತಾಂ ಉಲಯ್ಲಿ. "......ತುಂ ತಾಚೊ ಬಾಪಯ್ ದೆಕುನ್ ತುಕಾ ತೆಂ ಕಾಂಯ್ ಇಲ್ಲೆಂ ಚಡ್ ಉಣೆಂ ಜಾಲ್ಲೆಂ ಮತಿಕ್ ಕಳ್ತಾ. ಆನಿ ತುಕಾ ಏಕ್ ಸಾಂಗ್ತಾಂ...., ಆಲಿಯಾ ಸದಾಂಚ್ ತೆಂ ಪಾಳ್ಣ್ಯಾಂತ್ಲೆಂ ಭುರ್ಗೆಂ ಜಾವ್ನ್ಚ್ ಉರಾನಾ. ದೀಸ್ ವೆತಾನಾ ತೆಂ ವ್ಹಾಡೊನ್ ಯೆತಾ. ಚೆಡ್ಚಾಂ, ತಾಂಕಾ ಪ್ರಾಯ್ ಭರ್ತಾನಾ, ತಿಂ ಭುರ್ಗ್ಯಾಪಣಾರ್ ಆಸ್ಲ್ಲ್ಯಾ ಪರಿಂ ಆಸಾನಾಂತ್. ತೆಂ ಆತಾಂ ತರ್ನಾಟೆಂ ಜಾಲಾಂ. ಚಲಿ ಆನಿ ಚಲೊ ಮ್ಹಳ್ಯಾರ್ ಕಿತೆಂ ಮ್ಹಣೊನ್ ತೆಂ ಆತಾಂ ಸಮ್ಜೊಂಕ್ ಲಾಗ್ಲಾಂ. ಭೋವ್ಶ್ಯಾ ಹ್ಯಾಚ್ ಕಾರಾಣಾಕ್ ಲಾಗೊನ್ ತೆಂ ತುಜ್ಯೆ ಥಾವ್ನ್ ಪಯ್ಸ್ ರಾವ್ತಾ. ಜಾಂವ್ಕ್ ಪುರೊ ತುಕಾ ಹಿ ತಾಚಿ ಬದ್ಲಾವಣ್ ಮ್ಹಣೊನ್ ಭೊಗ್ತಾ. ಪುಣ್, ಚಲಿ ಜಾಲ್ಲ್ಯಾಕ್ ಹಿ ಬದ್ಲಾವಣ್ ನ್ಹಯ್ ಹಿ ತಾಚ್ಯಾ ಕುಡಿಚಿ ವಾಡಾವಳ್. ತರ್ಯ್ ತೆಂ ತುಜೊ ಪಯ್ಲೆಂಚಾ ಪರಿಂಚ್ ಮೋಗ್ ಕರ್ತಾ. ಪುಣ್, ಪಯ್ಲೆಂಚಾ ತಿತ್ಲಿ ಸಳಾವಳ್ ತೆಂ ಕರಿನಾ ಆಸ್ತೆಲೆಂ. ಹಾಂತುಂ ಕಾಂಯ್ ಚಿಂತುನ್ ಬಸ್ಚಿ ಗರ್ಜ್ ನಾ. ಹ್ಯಾ ಖಾತಿರ್ ತುಂ ತಕ್ಲೆರ್ ಭಾರ್ ಘೆವ್ನ್ ಬಸ್ಲಾಯ್.......?"
ಸಾರಾ, ಶಬೀರಾಕ್ ಆಲಿಯಾ ವಿಶಿಂ ಸಮ್ಜಾಯ್ತಾಲಿ. ಶಬೀರಾಚ್ಯಾ ಮತಿಂತ್ ಕಸಲೆಂ ಚಿಂತಾಪ್ ಯೇವ್ನ್ ತೊ ತಕ್ಲೆಂತ್ ವಿರಾರಾಯ್ ಘೆವ್ನ್ ಬಸ್ಲಾ ಮ್ಹಣೊನ್ ತಿಕಾ ಆತಾಂ ಸ್ಪಷ್ಟ್ ಕಳಿತ್ ಜಾಲ್ಲೆಂ.
"ಬಾಪಯ್ ಮ್ಹಣ್ತಾನಾ ಆಶೆಂ ಜಾಂವ್ಚೆಂಯ್ ಸಹಜ್ಚ್ !" ಸಾರಾ ಫಕತ್ತ್ ಆಪ್ಲ್ಯಾ ಮತಿಂತ್ ಮಾತ್ರ್ ಉಲಂವ್ಕ್ ಸಕ್ಲಿ.
"ಹಾಂವ್ ಹೆಂ ವಿಸ್ರೊನ್ಚ್ ಗೆಲ್ಲೊಂ....! ಓಹ್.......!"
ಶಬೀರಾಕ್ ಆತಾಂ ಸಗ್ಳೆಂ ಸಮ್ಜಾಲ್ಲೆಂ. ಸವ್ಕಾಸ್ ಆಪ್ಲ್ಯಾ ತೊಂಡಾರ್ ಹಾಸೊ ಹಾಡಯಿಲ್ಲೊ ತೊ,
"ದೀಸ್ಯ್ ಕಿತ್ಲೆ ವೆಗ್ಗಿಂ ದಾಂವ್ತಾತ್ ಸಾರಾ....... ಕಾಲ್ಚಾ ದಿಸಾ ತುಂ ಹೊಕಾಲ್ ಜಾವ್ನ್ ಆಯಿಲ್ಲೆಂಯ್!ಆಜ್ ಆಮ್ಚಿಂ ಭುರ್ಗಿಂ.....!" ಮುಕಾರ್ ಕಾಂಯ್ ಉಲಂವ್ಕ್ ಜಾಯ್ನಾಸ್ತಾನಾ ಆಪ್ಲ್ಯಾ ಬಾಯ್ಲೆಕ್ಚ್ ಪಳವ್ನ್ ಶಬೀರ್ ಹಾಸ್ಲೊ.
"ಜಿವಿತ್ ಆಶೆಂಚ್....!"
ಉಲಯಿಲ್ಲ್ಯಾ ಸಾರಾಚಾ ತೊಂಡಾರ್ ಯೆದೊಳ್ಚ್ ಲಜೆಚ್ಯೊ ಹಾಸೊ ಉಪ್ಯೆತಾಲ್ಯೊ. ಘೊವಾಚ್ಯಾ ಉತ್ರಾಂ ಥಾವ್ನ್ ಏಕ್ ಪಾವ್ಟಿಂ ತಿಕಾಯ್ ಆಪ್ಲ್ಯಾ ಹೊಕ್ಲೆಪಣಾಚಾ ದಿಸಾಂಚೊ ಉಡಾಸ್ ಆಯ್ಲೊ. ತ್ಯಾ ಆದ್ಲ್ಯಾ ಉಡಾಸಾನ್ ತಿಣೆಂ ಸವ್ಕಾಸ್ ಆಪ್ಲಿ ತಕ್ಲಿ ಬಾಗಾಯ್ಲಿ. ಚಲಿಯೆಚೊ ಜಲ್ಮಾಗೂಣ್ ಜಾವ್ನ್ ಆಸ್ಚಾ ಲಜೆಕ್ ಪಾಂಗ್ರುನ್ ಬಸ್ಲೆಲ್ಯಾ ಆಪ್ಲ್ಯಾ ಬಾಯ್ಲೆಕ್ ಪಳಯ್ತಾನಾ, ಶಬೀರಾಕ್, ತ್ಯಾಚ್ ಆಪ್ಲ್ಯಾ ತರ್ನಾಟ್ಪಣಾರ್ ತರ್ನಾಟೆಂ ವ್ಹಕಾಲ್ ಜಾವ್ನ್ ಆಪ್ಲ್ಯಾ ಘರಾ ಆಯ್ಲೆಲ್ಯಾ ಸಾರಾಚೊ ಆದ್ಲೊ ಉಡಾಸ್ ಯೇವ್ನ್, ತಾಣೆಂ ಆಪ್ಲ್ಯಾ ಬಾಯ್ಲೆಕ್ ಆಪ್ಣಾ ಲಾಗಿಂ ವೊಡ್ಲೆಂ.
ವ್ಹಯ್!
ತ್ಯಾ ಕುಶಿಂನ್ ಆಲಿಯಾ ಆಪ್ಲ್ಯಾ ಜಿವಿತಾಚಿಂ ಸರೊನ್ ಗೆಲ್ಲಿಂ ಘಡಿತಾಂ, ಕುಜ್ನಾಚಾ ದಾರಾರ್ ರಾವೊನ್ ಉಡಾಸ್ ಕಾಡ್ತಾನಾ, ಹ್ಯಾ ಕುಶಿಂನ್ ಸಾರಾ, ಆಪ್ಲ್ಯಾ ಜಿವಿತಾಂತ್, ಆಲಿಯಾಚೆಂ ಚಿಂತಾಪ್ ಘೆವ್ನ್ ಉದೆವ್ನ್ ಆಯಿಲ್ಲ್ಯಾ ದಿಸಾಂಕ್ ನಿಯಾಳ್ ಕರ್ತಾಲಿ.
ತ್ಯಾ ದೀಸ್, ಆಪ್ಲ್ಯಾ ಘೊವಾನ್ ಮತಿಚಾ ಸಮಾಧಾನೆ ಖಾತಿರ್ ಆಪ್ಲ್ಯಾ ಬಾಯ್ಲೆಕ್ ವೆಂಗೆಂತ್ ಘೆತಾನಾ ಆಪ್ಲೆಂ ಧುವ್ ಜಾವ್ನ್ ಆಸ್ಚೆಂ ಆಲಿಯಾ ಹ್ಯಾ ಉಪ್ರಾಂತ್ ಆಪ್ಣಾ ಥಾವ್ನ್ ಪಯ್ಸ್ ರಾಂವ್ಚೆಚ್ ಬರೆಂ ಮ್ಹಣೊನ್ ತಾಚ್ಯಾ ಮತಿಕ್ ತಾಣೆಂಚ್ ಸಮಾಧಾನ್ ಕೆಲ್ಲೆಂ.
ತ್ಯಾ ಉಪ್ರಾಂತ್....?
ತ್ಯಾ ಉಪ್ರಾಂತ್ ಶಬೀರ್ ಧುವೆಚಾ ಕಸಲ್ಯಾಚ್ ಸಂಗ್ತ್ಯಾನಿಂ ಮೆತೆರ್ ಜಾಯ್ನತ್ಲ್ಲೊ. ಕಿತೆಂಯ್ ಆಸ್ಲ್ಯಾರ್ಯ್ ತೊ ಸಾರಾಕ್ ಸಾಂಗ್ತಾಲೊ. ತಿಚ್ಚ್ ಧುವೆಚಾ ಬರ್ಯಾ ವಾಯ್ಟಾಕ್ ಸಲಹಾ ದಿತಾಲಿ. ತಶೆಂ ಮ್ಹಣೊನ್ ಶಬೀರ್ ಸಂಪೂರ್ಣ್ ಧುವೆ ಥಾವ್ನ್ ಪಯ್ಸ್ ನಾತ್ಲ್ಲೊ. ಆಲಿಯಾಚಾ ಖಾಸ್ಗಿ ವಿಶಯಾಂಕ್ ಸೊಡ್ಲ್ಯಾರ್ ಉರ್ಲೆಲ್ಯಾ ಸಗ್ಳ್ಯಾ ವಿಶಯಾಂನಿ ತೊ ಮೆತೆರ್ ಜಾತಾಲೊ. ಪುಣ್, ಆಲಿಯಾ ಥಂಯ್ ಮಾತ್ರ್ ತಾಚೊ ಸಂಭಂಧ್ ಆತಾಂ ತ್ಯಾ ಪಯ್ಲೆಂಚಾ ತಿತ್ಲೊ ಉಗ್ತೊ ನಾತ್ಲ್ಲೊ.
ಆಪ್ಲ್ಯಾ ಧುವೆ ಥಾವ್ನ್ ಶಬೀರ್ ಹೆಂ ಜಾಣಾಂ ಜಾಲ್ಲೊ ಕೀ ತ್ಯಾ ರಂಗೀನ್ ಟಿ.ವಿ. ಚ್ಯಾ ಪರ್ದ್ಯಾರ್ ಉಡ್ಕಾಣಾಂ ಮಾರ್ಚಿಂ ತರ್ನಾಟಿಂ ಚೆಡ್ವಾಂ ಆಪ್ಲ್ಯಾ ನೀಜ್ ಜೀವನಾಂತ್ ತಶೆಂ ಉಡ್ಕಿ ಮಾರುಂಕ್ ಸಕನಾಂತ್ ಮ್ಹಣೊನ್! "ಪರ್ದ್ಯಾ ವಯ್ಲೆಂ ಪರ್ದ್ಯಾರ್ಚ್ ಸೊಭಿತ್ ದಿಸ್ತಾಲೆಂ. ಹ್ಯಾ ದೊನಾಂಯ್ಕ್ಯ್ ಹೆವ್ಶಿಂ ತೆವ್ಶಿಂ ಕರುಂಕ್ ತ್ಯಾ ಪರ್ದ್ಯಾ ವಯ್ರ್ ಮಾತ್ರ್ ಸಾದ್ಯ್ ಶಿವಾಯ್ ಘರ್ಚಾ ದಾರ್ವಾಟ್ಯಾರ್ ನ್ಹಯ್!" ಆಪ್ಣಾಕ್ಚ್ ಶಬೀರಾನ್ ಸಮ್ಜಾಯಿಲ್ಲೆಂ.
ತ್ಯಾ ದಿಸಾ ಥಾವ್ನ್ ಆಲಿಯಾಚಾ ವಿಶಿಂ ಸಗ್ಳೆಂ ಚಿಂತ್ಚೊ ಹಾರ್ಭಾರ್ ಸಾರಾಚಾ ಮಾತ್ಯಾರ್ ಪಡ್ಲೊ.
ಪುಣ್ ಆಲಿಯಾ......!?
ಆಲಿಯಾ ಜಲ್ಮೊನ್ ಆಯಿಲ್ಲ್ಯಾ ಉಪ್ರಾಂತ್ ಹಂತಾ ಹಂತಾರ್ ಬದ್ಲೊಂಚಾ ತಾಚಾ ಕುಡಿಚಾ ಸ್ವಭಾವಾಕ್ ಮಾತ್ರ್ ತೆಂ ಬದ್ಲುಂಕ್ ಸಕ್ಲೆಂ ಶಿವಾಯ್ ಜಲ್ಮಾ ಥಾವ್ನ್ ತೆಂ ಘೆವ್ನ್ ಆಯಿಲ್ಲ್ಯಾ ತಾಚ್ಯಾ ಗೂಣಾಂಕ್ ಬದ್ಲುಂಕ್ ಕೆದಿಂಚ್ ಸಕ್ಲೆಂ ನಾ.
ತೆಂಚ್ ಹಟ್ಟ್! ತೆಂಚ್ ಚಿಂತಾಪ್! ತೆಂಚ್ ಗರ್ವ್! ಆನಿ ತೆಂಚ್..... ಕೊಣಾಯ್ ಮುಖಾರ್ ತಕ್ಲಿ ಬಾಗಾಯ್ನಾಸ್ಲೊಲೊ ಸ್ವಭಾವ್....!
ವ್ಹಯ್, ಆಲಿಯಾ ಆಪ್ಲ್ಯಾ ಹಟ್ಟಾನ್ ಆನಿ ತಾಚ್ಯಾ ಚಿಂತ್ನಾಂಕ್ ಲಾಗೊನ್ ತಾಚ್ಯಾ ಜಿವಿತಾಂತ್ ಸಲ್ವಾಲ್ಲೆಂ. ಪುಣ್ ತೆಂ ಹ್ಯಾ ಸಲ್ವಣೆಕ್ ಮಾಂದುನ್ ಘೆನಾತ್ಲ್ಲೆಂ. ತಾಚ್ಯಾ ಚಿಂತ್ಪಾ ಪರ್ಮಾಣೆಂ ಆಲಿಯಾ ಆಪ್ಲ್ಯಾಚ್ ಖುಶೆಚೆಂ ಕರುಂಕ್ ಆಶೆತಾಲೆಂ. ತಾಕಾ ಕಸಲಿಯ್ ಭಂದಡ್ ಪಸಂದ್ ನಾತ್ಲೆಲಿ. ಆವಯ್ ಬಾಪಾಯ್ಚಾ ವತ್ತಾಯೆಕ್ ಲಾಗೊನ್ ಘೆತ್ಲೆಲೆಂ ಶಿಕಾಪ್ ಪೂರ್ಣ್ ಥರಾನ್ ಯಶಸ್ವಿಕ್ ಪಾವಂವ್ಕ್ ತೆಂ ಸಕ್ಲೆಂ ನಾ. ಮನ್ ನಾತ್ಲ್ಲ್ಯಾ ಶಿಕ್ಪಾಂತ್ ಆಲಿಯಾ ಮೆತೆರ್ ಜಾಲೆಂ ನಾ. ಜಿವಿತಾಕ್ ಏಕ್ ಗಣಿತಾಚೆಂ ಸವಾಲ್ ಜಾವ್ನ್ ತಾಣೆಂ ಘೆತ್ಲೆಂ ನಾ ಜಾಲ್ಲ್ಯಾನ್ ಮೆಡಿಕಲ್ ಶಿಕ್ಪಾನ್ ಆಲಿಯಾಕ್ ಸೊಭಯ್ಲೆಂ ನಾ.
ಆತಾಂ ಆಲಿಯಾನ್ ಆಪ್ಣೆ ಆಪ್ಲೆಂ ಶಿಕಾಪ್ ಸಾಂಡ್ಚೆ ವಿಶಯಾಂತ್ ಆವಯ್ ಲಾಗಿಂ ಸಾಂಗ್ತಾನಾ ಸಾರಾನ್ ಸರ್ಸರೀತ್ತ್ ಧುವೆಕ್ ಪ್ರಸಂಗ್ ದಿಲ್ಲೊ. ಹೊ ಪ್ರಸಂಗ್ ಕಾಂಯ್ ಆಜ್ ನವೊ ನ್ಹಯ್ ಆನಿ ಆಪ್ಲ್ಯಾ ಪ್ರಸಂಗಾ ಥಾವ್ನ್ ಆಲಿಯಾ ಥಂಯ್ ಕಾಂಯ್ ಬದ್ಲಾವಣ್ ಜಾತೆಲಿ ಮ್ಹಳ್ಳೊ ಭರ್ವಸೊ ತಿಕಾ ನಾತ್ಲ್ಲೊ.
ಆತಾಂ ಆಲಿಯಾನ್ ಸಾಂಗ್ಚಾ ಪರಿಂಚ್ ಸಾರಾ ಆನಿ ಶಬೀರಾನ್ ಆಯ್ಕೊಂವ್ಚೆಂ ನಿಮಾಣೆಂ ಜಾವ್ನ್ ಉರ್ಲೆಂ. ಹೆಂ ಸೊಡ್ಲ್ಯಾರ್ ತಾಂಚೆ ಮುಕಾರ್ ದುಸ್ರಿ ವಾಟ್ಯ್ ನಾತ್ಲ್ಲಿ.
[ಫುಡೆಂ ಕಿತೆಂ ಜಾತಾ ಮ್ಹಳ್ಳೆಂ ವಾಚುಂಕ್ ರಾಕೊನ್ ರಾವಾ....]
ಕಾದಂಬರಿಕಾರಾಚಿಂ ಉತ್ರಾಂ: ಅವಸ್ವರ್ 1
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
