ಡೋಲ್ಫಿ

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ -’ದಾಯ್ಜ್ ’-ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಕುವೆಯ್ಟಾಂತ್ ಮಟ್ವ್ಯಾ ಕಾಣ್ಯಾಂಚೆರ್ ಕಾಮಾಸಾಳ್ - ಡೋಲ್ಫಿ ಕಾಸ್ಸಿಯಾ ಆನಿ ಕ್ಲಾರಾ ಲೋಬೊಕ್ ಸನ್ಮಾನ್

ಕುವೇಯ್ಟ್, ಫೆಬ್ರೆರ್ (8): ಕುವೇಯ್ಟಾಂತ್ ಕೊಂಕ್ಣಿ ಸಾಹಿತ್ಯಾಚೆರ್ ಸರಾಗ್ ರಿತಿಚೆಂ ಅಧ್ಯಯನ್ ಚಲಂವ್ಚಾ ದಾಯ್ಜ್ ಪಂಗ್ಡಾನ್ ಹೆಚ್ಚ್ ಫೆಬ್ರೆರಾಚ್ಯಾ 8 ತಾರಿಕೆರ್ ಎಕಾ ದಿಸಾಚೆಂ ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚೆರ್ ಕಾಮಾಸಾಳ್ ಚಲವ್ನ್ ವೆಲೆಂ.

[ಡೋಲ್ಫಿ ಕಾಸ್ಸಿಯಾ ಮಟ್ವ್ಯಾ ಕಾಣ್ಯಾಂಚೆರ್ ಉಲಯ್ತಾಸ್ತಾಂ]

ಸಕಾಳಿಂ ಧಾ ವೊರಾರ್ ಸುರು ಜಾಲ್ಲ್ಯಾ ಹ್ಯಾ ಕಾಮಾಸಾಳಾಚ್ಯಾ ಉಗ್ತಾವಣಾ ಉಪ್ರಾಂತ್ ವಲ್ಲಿ ಕ್ವಾಡ್ರಸಾನ್ ಆಪ್ಲ್ಯಾ ಉಲವ್ಪಾಂತ್ ’ಕಥಾಪಾಠ್’ ಆನಿ ಕೊಂಕ್ಣಿ ಸಾಹಿತ್ಯಾಚೆರ್ ವಿಮರ್ಸೊ ಮ್ಹಳ್ಳ್ಯಾ ವಿಶ್ಯಾಚೆರ್ ಉಲವ್ನ್, ಕೊಂಕ್ಣಿ ಸಾಹಿತ್ಯ್ ಹೆರ್ ಸಮಕಾಳೀನ್ ಭಾಸೆಚ್ಯಾ ಸಾಹಿತ್ಯಾ ಸಮೊರ್ ಅನಿಕ್‌ಯೀ ಮುಖಾರ್ ಪಾವೊಂಕ್ ಹರ್ಯೆಕಾ ಬರಯ್ಣಾರಾನ್ ಅಪ್ಲಿ ಜವಾಭ್ದಾರಿ ಸಮ್ಜೊನ್ ಘೆಂವ್ಚಿ ಗರ್ಜ್. ಆನಿ ಹಿ ಜವಾಭ್ದಾರಿ ಆಸ್ಚ್ಯಾ ಥಾವ್ನ್ ಮಾತ್ರ್ ಬರೆಂ ಸಾಹಿತ್ಯ್ ಆಶೆವ್ಯೆತ್ ಶಿವಾಯ್ ಅಪ್ಣಾನ್ ಕಿತೆಂಯ್ ಬರಯ್ಲ್ಯಾರ್ ತೆಂ ಸಾಹಿತ್ಯ್ ಜಾತಾ ಮ್ಹಳ್ಳ್ಯಾ ಪೊಕೊಳ್ ಚಿಂತ್ಪಾ ಥಾವ್ನ್ ಸುಟ್ಕಾ ಜೊಡಿಜಾಯ್. ಜೆದ್ನಾಂ ಆಮ್ಚ್ಯಾ ಸಾಹಿತ್ಯಾಚೆರ್ ವಿಮರ್ಸೊ ಘೆಂವ್ಚಿ ಶ್ಯಾಥಿ ಆಮ್ಕಾಂ ಯೆತಾ, ತೆದ್ನಾಂ ಮಾತ್ರ್ ಆಮ್ಚ್ಯಾನ್ ಉಂಚ್ಲೆಂ ಸಾಹಿತ್ಯ್ ರಚುಂಕ್ ಸಾಧ್ಯ್. ಆಮಿ ದಿಸಾನ್ ದೀಸ್ ನವ್ಯೊ ನವ್ಯೊ ಬಾಂಯೊ ಖೊಂಡುನ್, ದೊರೆ ಭಾಂದುನ್ ಆಮ್ಕಾಂಚ್ ಅಮಿ ರಾಯ್ ಪಾಟೊಸಾರ್ ಬಸವ್ನ್, ಅಭಿಮಾನ್ ಪಂಗಡ್ ರಚುನ್, ವಿಜಿಟಿಂಗ್ ಕಾರ್ಡಾಂ ವಾಂಟುನ್, ಬಾಂಯ್ತ್‌ಲೆ ಮಾಣ್ಕೆ ಜಾವ್ನ್ಂಚ್ ಉರ್ಲ್ಯಾಂವ್ ಆನಿ ಆಮ್ಕಾಂಚ್ ಅಮಿ ಅಭಿಶಿಕ್ತ್ ಕೆಲಾಂಸ್ತಾಂ - ಆಮಿಂಚ್ ಮಹಾನ್ ಸಾಹಿತಿ ಮ್ಹಣೊನ್ ಫಟವ್ನ್ ಜಿಯೆವ್ನ್ ಆಸ್ಚೆಂ ಖಂಚ್ಯಾಯ್ ಭಾಸೆಕ್ ಸೊಡ್, ಸ್ವತಾಕ್‌ಯೀ ಉಪ್ಕಾರಾಕ್ ಪಡಾನಾ. ದೆಕುನ್ ಅಸಲ್ಯಾಂಚೆಂ ಸಾಹಿತಿಕ್ (ಶೆಣಾಚೆಂ) ಮಟ್ಟ್ ಅಜೂನ್ ತೆಚ್ಚ್ ಪಂವ್ಡಾರ್ ಆಸಾ ಶಿವಾಯ್ ಸುಧ್ರಾಪ್ ಭಿಲ್ಕುಲ್ ನಾ - ಜಾಂವ್ಚೆಪರೀಂಯ್ ನಾ.

ಕೊಂಕ್ಣೆಂತ್ ವಿಮರ್ಸೊ ಘೆತೆಲೆ ಕಶೆ ನಾಂತ್‌ಗೀ, ತಶೆಚ್ ವಿಮರ್ಸೊ ಕರ್ತೆಲ್ಯಾಂನಿ ಸಯ್ತ್ ಜವಾಭ್ದಾರಿ ಸಮ್ಜೊನ್ ಘೆಂವ್ಚಿ ಗರ್ಜೆಚಿ. ವಿಮರ್ಸೊ ಕರ್ತೆಲ್ಯಾನ್ ಕಿತೆಂಯ್ ಬರಯ್ಲ್ಯಾರ್ ಜಾತಾ ಮ್ಹಳ್ಳೆಂ ಚಿಂತಾಪ್ ಸೊಡ್ಚೆಂ ಗರ್ಜೆಚೆಂ. ತಶೆಂಚ್ ವಿಮರ್ಸೊ ಮ್ಹಳ್ಳ್ಯಾ ನಾಂವಾರ್ ವೆಕ್ತಿಗತ್ ಖೊಡಿ ಕಾಡ್ಚ್ಯೊ, ಹಲ್ಕ್ ಕರ್ಚೆಂ - ಹೆಂ ಆಯ್ಲೆವಾರ್‌ಚ್ಯಾ ದಿಸಾಂನಿ ಚಡೊನ್ ಯೆಂವ್ಚೆಂ ಕೊಂಕ್ಣೆಚೆಂ ದುರ್ಭಾಗ್‌ಪಣ್.

’ಕಥಾಪಾಠ್’ ಅಸಲ್ಯಾಚ್ ಇರಾದ್ಯಾನ್ ಆಸಾ ಕೆಲ್ಲೆಂ ಏಕ್ ಪಾಠ್‌ಥಳ್. ಪುಣ್ ಆಮ್ಚ್ಯಾ ಚಡ್ತಾವ್ ಕಾಣ್ಯೆಗಾರಾಂಕ್ ’ಹೆರಾಂನಿ ಮಾತ್ರ್ ಆಪ್ಲೆಂ ಸಾಹಿತ್ಯ್ ವಾಚಿಜಾಯ್ ಆನಿ ಹೊಗ್ಳಾಪ್ ದೀಜಾಯ್ ಶಿವಾಯ್. ಖೊಡಿ/ವಿಮರ್ಸೊ ನ್ಹಯ್. ಆಮಿಂ ಜಾವ್ನ್ ಹೆರಾಂಚೆಂ ಸಾಹಿತ್ಯ್ ಆಮ್ಚೊ ಜೀವ್ ಗೆಲ್ಯಾರೀ ವಾಚಿನಾಂವ್’ ಮ್ಹಳ್ಳೊ ಮನೋಭಾವ್ ಆಸಾ ತರ್ - ಅಸಲ್ಯಾ ಚಿಂತ್ಪಾಚ್ಯಾ ಲೇಖಕಾಂ ಥಾವ್ನ್ ಶೆಣಾಶಿವಾಯ್ ಹೆರ್ ಕಿತೆಂ ಆಶೆವ್ಯೆತಾ?

ದಾಯ್ಜ್ ಪಂಗ್ಡಾನ್ ಸಾಹಿತ್ಯಾಕ್ ಆನಿ ಸಾಹಿತಿಕ್ ವಾಡಾವಳೆಕ್ ಚಡಿತ್ ಪ್ರಾಮುಖ್ಯತಾ ದಿಲಾಂ/ದಿತಾ ಶಿವಾಯ್ ವೆದಿ ಕಾರ್ಯಿಂ ವಾ ಮಾನ್-ಸಮ್ಮಾನಾಕ್ ನ್ಹಯ್ ದೆಕುನ್ ಲೊಕಾಂಕ್ ಎಕ್ಟಾಂಯ್ ಕರುನ್ ಖಬ್ರಾ ಮಾಧ್ಯಮಾಂಕ್ ವರ್ದಿ ಧಾಡ್ಚ್ಯಾಂತ್ ನ್ಹಯ್ ಮ್ಹಣಾಲೊ.

ಕಾಮಾಸಾಳಾಚ್ಯಾ ಪಯ್ಲ್ಯಾ ಭಾಗಾಂತ್, ಮಾಲ್ಘಡೊ ಡೋಲ್ಫಿ ಕಾಸ್ಸಿಯಾನ್ ಸಾಹಿತ್ಯ್ ಮ್ಹಳ್ಯಾರ್ ಕಿತೆಂ? ಸಾಹಿತ್ಯಾಚೆ ವೆವೆಗ್ಳೆ ಪ್ರಕಾರ್ ಕಸ್ಲೆ? ಸೃಜನಾತ್ಮಕ್, ಸೃಜನೇತರ್ ಸಾಹಿತ್ಯ್, ತಾಂಚೆ ಪ್ರಕಾರ್, ಸಭ್ದಾನುವಾದ್ ಆನಿ ಅರ್ಥಾನುವಾದ್ (ಭಾವಾನುವಾದ್) ವಿಶ್ಯಾಚೆರ್ ಸವಿಸ್ತಾರ್ ರಿತಿನ್ ಉಲಯ್ಲೊ. ಕೊಂಕ್ಣಿ ಕಾಣ್ಯೆಗಾರ್, ಕೊಂಕ್ಣಿ ಕಾಣ್ಯೊಂ ಅಜೀಕ್ ಪನ್ನಾಸ್ ವರ್ಸಾಂ ಥಾವ್ನ್ ಆಜ್ ಪರ್ಯಾಂತ್ ವಾಡೊನ್ ಆಯಿಲ್ಲಿ ರೀತ್ ವಿವರುನ್ ಮ್ಹಣಾಲೊ; "ಕೊಂಕ್ಣಿ ಸಾಹಿತ್ಯಾಕ್ ಶೆಂಭೊರ್ ವರ್ಸಾಂಚಿ ಸಯ್ತ್ ಚರಿತ್ರಾ ನಾ. ಆನಿ ಹ್ಯಾ ಆವ್ದೆಂತ್ ಜರ್ ಕೊಂಕ್ಣೆಂತ್ಲ್ಯಾ ಸಾಹಿತ್ಯಾಚೆರ್ ಸವಾಲಾಂ ಉದೆತಾತ್ ತರ್ ತಿಂ ಬರಿಂ ಲಕ್ಶಣಾಂ. ಪುಣ್ ಹಾಂಗಾಸರ್ ಖಂಯ್ಚ್ಯಾಯ್ ರಿತಿಚೊ ಅತಿರೇಕ್‌ವಾದ್ (Exstremism) ಕೊಣಾಯ್ಕ್‌ಯೀ ಬರೆಂ ನ್ಹಯ್".

ಸಾಹಿತ್ಯಾವಿಶಿಂ ಆಪ್ಲ್ಯಾ ಉಲವ್ಪಾಂತ್ ಡೋಲ್ಫಿ ಕಾಸ್ಸಿಯಾನ್ ’ಏಕ್ ಸಂಪಾದಕ್ ಆನಿ ಬರಯ್ಣಾರ್ ಹಾಂಚೆಮಧ್ಲೊ ಸಂಬಂಧ್ ಕಸೊ ಆಸಾಜಯ್’ ಮ್ಹಳ್ಳ್ಯಾಚೆರ್ ಆಪ್ಲೊ ಅನ್ಭೋಗ್ ವಾಂಟ್ಲೊ. "ಸಂಪಾದಕ್‌ಯೀ ಏಕ್ ಬರವ್ಪಿ ಪುಣ್ ಸಂಪಾದಕ್ ಜಾವ್ನ್ ತಾಚಿ ಜವಾಭ್ದಾರಿ ಆನಿ ಮಿನತ್ ವೆಗ್ಳಿಚ್ ಆಸ್ತಾ ದೆಕುನ್ ಬರವ್ಪ್ಯಾನ್ ಹಿ ಜವಾಭ್ದಾರಿ ಸಮ್ಜೊಂಚೆಂ ವ್ಹಡ್ ಚಿಂತಾಪ್ ಚಿಂತ್ಚೆಂ ಗರ್ಜೆಚೆಂ" ಮ್ಹಣಾಲೊ.

ದುರ್ಭಾಗ್‌ಪಣಾನ್ ಆಜ್ ಕೊಂಕ್ಣಿ ಪತ್ರಿಕೋಧ್ಯಮಾಂತ್ ಥೊಡ್ಯಾ ಹವ್ಯಾಸಿ (?) ಸಂಪಾದಕಾಂನಿ, ಭಾಸೆಚಿ ಗಿನ್ಯಾನ್ ನಾಸ್ತಾಂ, ಭಾಸೆಚೊ ಸಾರ್ಕೊ ವಾಪಾರ್ ಕಳಿತ್ ನಾಸ್ತಾಂ, ಕಶೆಂಯ್ ಬರಯ್ಲ್ಯಾರ್ ಚಲ್ತಾ ಮ್ಹಳ್ಳೆಂ ಆಳ್ಶಿ ಚಿಂತ್ಪಾನ್, ಪತ್ರಿಕೋಧ್ಯಮಾಚೆ ಮೂಳ್ ಶೆವೊಟ್ ನೆಣಾಸ್ತಾಂ, ಆಪ್ಲ್ಯಾ ಅಬ್ಲೇಶಿ/ಸ್ವಾರ್ಥಿ ಇರಾದ್ಯಾನ್ ಕೊಂಕ್ಣಿ ಪತ್ರಿಕೋಧ್ಯಮಾಚೆಂ ಥೊರುಂ ಧರ್ಲಾಂ - ಹೆಂ ಕೊಂಕ್ಣೆಕ್ ಚ್ಯುರಾನ್ ಚ್ಯುರೊ ಕರುಂಕ್ ಪುರೊ - ವೇಳ್‌ಕಾಳ್ ಹಾಚಿ ಗೊವಾಯ್ ದೀತ್.

ದುಸ್ರ್ಯಾ ಭಾಗಾಂತ್ ಕುವೆಯ್ಟಾಂತ್ಲೊ ಭೋವ್ ಮಾಲ್ಘಡೊ ಕಾಣ್ಯೆಗಾರ್ ಗಿಬ್ಬಾ ಕುಲ್ಶೇಕರ್, ಎಕಾ ಕಾಣ್ಯೆಂತ್ ಕಥಾವಸ್ತುಸವೆಂ ಪಾತ್ರ್‌ವರ್ಗ್, ಆನಿ ಪಾತ್ರಾಂಕ್ ಜೀವ್ ಭರ್ಚೆಂ, ತಾಂತ್ರಿಕತಾ ಆನಿ ಮಾಂಡಾವಳ್ - ಹ್ಯಾ ವಿಶ್ಯಾಂಚೆರ್ ಉಲವ್ನ್, ಆಪ್ಲ್ಯಾ ಎಕಾ ಕಾಣ್ಯೆಚೊ ಧಾಕ್ಲೊ ದೀವ್ನ್ ವಿವರಿಲಾಗ್ಲೊ. ಗಿಬ್ಬಾ ಕುಲ್ಶೇಕರಾಕ್ ಅಜೂನ್ ಸಯ್ತ್ ಹೆರಾಂ ಥಾವ್ನ್ ಶಿಕ್ಚೆಂ ಚಿಂತಾಪ್ ಆಸ್ಚೆಂಚ್ ತಾಚೆಂ ವ್ಹಡ್‌ಪಣ್ ಪಾಚಾರ್ತಾ.

ಉಪ್ರಾಂತ್ ಸವಿಸ್ತಾರ್ ರಿತಿನ್ ಶಿಭಿರಾರ್ಥಿಂ ಥಾವ್ನ್ ಭಾಸಾಭಾಸ್ ಚಲ್ಲಿ.

ಕೊಂಕ್ಣೆಂತ್ ಆಯ್ಲೆವಾರ್ ಉದೆಲ್ಲ್ಯಾ ಶೆಣ್ ಚಳ್ವಳಿಚೆರ್ ವಿಮರ್ಶಾತ್ಮಕ್ ನದರ್ /ಆಟೊವ್ ಘಾಲುನ್ ಶಿಭಿರಾರ್ಥಿಂನಿ ಆಪ್ಲೆ ವಿಚಾರ್ ವೆಕ್ತ್ ಕೆಲೆ. ಖಂಚೀಯ್ ಭಾಸ್ ಉರಾಜಯ್ ತರ್ ತ್ಯಾ ಭಾಸೆಚೊ ವಾಪಾರ್ ಜಾಯ್ಜಯ್. ಸಾಹಿತ್ಯ್ ಏಕ್ ಭಳ್ವಂತ್ ಮಾಧ್ಯಮ್ ಎಕಾ ಭಾಸೆಕ್ ಉರಂವ್ಕ್ ಆನಿ ವಾಪಾರ್ ಕರುಂಕ್. ಆನಿ ಹ್ಯಾ ದಿಶೆನ್ ಕೊಂಕ್ಣೆಂತ್ಲ್ಯಾ ಮಾಲ್ಘಡ್ಯಾ ಸಾಹಿತಿಂನಿ ಕೆಲ್ಲ್ಯಾ ವಾವ್ರಾಕ್ ವಾಖಣ್ಣಿ ಫಾವೊ. ಪುಣ್ ಆಯ್ಲೆವಾರ್ ಥೊಡ್ಯಾ ಅಬ್ಲೇಶಿ ಸ್ವಾರ್ಥಿ ಸಕ್ತೆನ್ ಕೊಂಕ್ಣಿ ಸ್ಪಿರಿತಾಕ್ ಕದ್ವಳ್ ಕರುನ್ ಫಕತ್ ನಾಂವ್ ಕಮಾಂವ್ಚ್ಯಾ ಇರಾದ್ಯಾಣ್ ಅಸಲ್ಯಾ ಮಾಲ್ಘಡ್ಯಾ ಕಾಣ್ಯೆಗಾರಾಂಕ್/ಬರಯ್ಣಾರಾಂಕ್, ತಾಂಚ್ಯಾ ಶಿಕ್ಪಾಕ್ (ತುಮಿಂ ಹೆಂ ವಾಚ್ಲಾಂವೆ? ತೆಂ ವಾಚ್ಲಾಂವೆ?), ತಾಂಚ್ಯಾ ಸಾಹಿತ್ಯಾಕ್ ಬೋಟ್ ಜೊಕುನ್, ತಾಂಚೆಂ ಸಾಹಿತ್ಯ್ ಸಗ್ಳೆಂ ಶೆಣ್ ಸಾಹಿತ್ಯ್ ಮ್ಹಣ್ ಹಲ್ಕ್ ಕರ್ಚೆಂ ಆನಿ ಹಲ್ಕ್ ಕರ್ನ್ ಆಮಿ ಬಾದೂರ್ ಮ್ಹಣ್ ಹರ್ದೆಂ ಪೆಟ್ಚೆಂ ಪ್ರೇತನ್ ಕರ್ಚೆಂ ಭೋವ್ ದುರ್ಭಾಗ್‌ಪಣ್.

ಕೊಂಕ್ಣೆಚೊ ಮಾಲ್ಘಡೊ ವಾವ್ರಾಡಿ, ಫಜೀರ್‌ಚೊ ಬೆನ್ನಾ (ಕುವೇಯ್ಟಾಂತ್ ಕೊಂಕ್ಣಿ ಪತ್ರಾಂ ಹಾಡಂವ್ಕ್ ಕಾರಣ್ ಕರ್ತ್) - ಆಪ್ಲ್ಯಾ ಉಲವ್ಪಾಂತ್ ಅಶೆಂ ಮ್ಹಣಾಲೊ; "ಆಜ್ ಕೊಣೀಂ ಕೊಂಕ್ಣಿ ಕಾಣ್ಯೆಗಾರಾಂಚ್ಯಾ ಶಿಕ್ಪಾಕ್ ವಾ ಸಮ್ಜೊಣಿಕ್ ಸವಾಲ್ ಕರುಂದಿತ್. ಪುಣ್ ಹಕೀಗತ್ ಹಿ ಕೀ; ಕೊಂಕ್ಣಿ ಜರ್ ಆಜ್ ಪರ್ಯಾಂತ್ ಶಾಭೀತಾಯೆನ್ ಸಾಂಭಾಳ್ಳ್ಯಾ ವಾ ಉರ್ಲ್ಯಾ ತರ್ - ಅಸಲ್ಯಾಚ್ ಅಶಿಕ್ಪಿ ವಾ ಉಣ್ಯಾ ಶಿಕ್ಪಿ ಲೊಕಾಂ ಥಾವ್ನ್ ಶಿವಾಯ್ ಶಿಕ್ಪ್ಯಾಂ ಥಾವ್ನ್, ವಾ ದುಡ್ವಾಗಾರಾಂ ಥಾವ್ನ್ ಭಿಲ್ಕುಲ್ ನ್ಹಯ್. ಪರ್ಗಾಂವಾಂತ್ ಘರ್ ಕಾಮಾಕ್ ಆಸ್ತೆಲ್ಯಾಂಚ್ಯಾ ಮಿನತೆನ್, ಆನಿ ಮೊಗಾನ್ ಆಜ್ ಕೊಂಕ್ಣಿ ಉರ್ಲ್ಯಾ ಮ್ಹಳ್ಳೆಂ ಸತ್ ಕೊಣೆಂಯ್ ನೆಗಾರ್ ಕರಿನಾಯೆ" ಮ್ಹಣಾಲೊ.

ಹೆರಾಂನಿ ಉಚಾರ್‌ಲ್ಲೆ ಥೊಡೆ ಗರ್ಜೆಚೆ ವಿಚಾರ್;

"ಮಾಲ್ಘಡ್ಯಾ ಕಾಣ್ಯೆಗಾರಾಂಕ್ ಆಪ್ಲ್ಯಾಚ್ ಬಾಪಾಯ್ ಸಾರ್ಕೊ ಮಾನ್ ದಿಂವ್ಚಿ ಗರ್ಜ್ ಆಸಾ. ಆನಿ ಹೊ ಮಾನ್ ದೀಂವ್ಕ್, ಏಕ್ ಬಾಪುಯ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳೆಂ ಕಳಿತ್ ಆಸ್‌ಲ್ಲ್ಯಾಂಕ್ ಮಾತ್ರ್ ಸಾಧ್ಯ್"

"ಕೊಂಕ್ಣೆಂತ್ ಎದೊಳ್ ಆಸ್ಲೆಲೆಂ ಸಾಹಿತ್ಯ್ ಸರ್ವ್ ಶೆಣ್ ಮ್ಹಳ್ಳೊ ವಾದ್ ಮಾಂಡ್ತೆಲ್ಯಾಂನಿ ಏಕ್ ಉಡಾಸ್ ದವರಿಜಯ್ - ಆತಾಂ ತುಮ್ಚೆಪ್ರಕಾರ್ ಜ್ಯೇ ಕಿತೆಂ ಅಮೃತ್ ಮ್ಹಳ್ಳೆಂ ಸಾಹಿತ್ಯ್ ಆಸಾ ತೆಂ ಆನಿ ಥೊಡ್ಯಾ ವರ್ಸಾಂ ಉಪ್ರಾಂತ್ ಶೆಣ್ ಮ್ಹಣ್ತೆಲೆ ಉದೆತೆಲೆ. ಹಿ ಏಕ್ ವಾಡಾವಳ್ ಆನಿ ಸ್ವಾಭಾವಿಕ್. ದೆಕುನ್ ಆಮಿ ದಾವ್ಯಾಪಂತೀಯ್ ಚಿಂತ್ಪಾಕ್ ಮಾಲ್ವಂಚೆಂ ನಾಕಾ".

"ಕೊಂಕ್ಣೆಂತ್ ಉಂಚ್ಲೆಂ ಸಾಹಿತ್ಯ್ - ಆಮಿ ರಚ್‌ಲ್ಲೆಂ. ಆನಿ ಶೆಣ್ ಸಾಹಿತ್ಯ್ ಮ್ಹಳ್ಯಾರ್ ಹೆರಾಂನಿ ರಚ್‌ಲ್ಲೆಂ"

"ಕೊಂಕ್ಣಿ ಸಾಹಿತ್ಯಾಕ್ ಶೆಣ್ ಸಾಹಿತ್ಯ್ ಮ್ಹಣ್ತೆಲ್ಯಾಂಚೆಂ ಸಾಹಿತಿಕ್ ಅಸ್ಥಿತ್ವ್ ಕಸ್ಲೆಂ? ಪಯ್ಲೆಂ ಹೆರಾಂಚ್ಯಾ ಸಾಹಿತ್ಯಾಕ್ ಮೆಜುಂಕ್ ವೆಚ್ಯಾಧಿಂ ತಿಂ ತಸಲೆಂ ಸಾಹಿತ್ಯ್ ವಾ ತಾಚ್ಯಾಕೀ ಉಂಚ್ಲೆಂ ಸಾಹಿತ್ಯ್ ರಚುಂದಿತ್, ತೆದ್ನಾಂ ತಾಂಚೆಂ ಸಾಹಿತ್ಯ್‌ಚ್ ಹೆರ್ ಸಾಹಿತ್ಯಾಕ್ ಶೆಣ್ ಕರುಂಕ್ ಸಕ್ತಾ ಶಿವಾಯ್ ಸಾಂಗೊನ್ ಧಾಖಂವ್ಚಿ ಗರ್ಜ್ ನಾ"

ತಿಸ್ರ್ಯಾ ಭಾಗಾಂತ್ ವಲ್ಲಿ ಕ್ವಾಡ್ರಸಾನ್ ಕೊಂಕ್ಣೆಂತ್ಲ್ಯಾ ಫಾಮಾದ್ ಕಾಣ್ಯೆಗಾರಾಂಚ್ಯಾ ಮೆಳಿಂತ್ಲ್ಯಾ ಕಾಣ್ಯೆಗಾರಾಂಕ್ ತಶೆಂಚ್ ತಾಂಚ್ಯಾ ಕಾಣ್ಯಾಂಚೊ ಮಟ್ವೊ ಉಲ್ಲೇಕ್ ಕರುನ್ ತಾಂಚ್ಯಾ ಕಾಣ್ಯಾಂ ಮಧೆಂ, ದಾಯ್ಜ್ 2007 ವರ್ಸಾಚೊ ಕಾಣ್ಯೆಗಾರ್; ಕ್ಲೆರೆನ್ಸ್ ಕೈಕಂಬಾಚ್ಯೊ ಮಟ್ವ್ಯೊ ಕಾಣ್ಯೊ ಖಂಯ್ಚರ್ ಆಸಾತ್ ಮ್ಹಳ್ಳ್ಯಾಚೆರ್ ಆಪ್ಲೆ ಅಧ್ಯಯನ್ ವಿಚಾರ್ ಪ್ರಸ್ತುತ್ ಕೆಲೆ. "ಕ್ಲೆರೆನ್ಸ್ ಕೈಕಂಬಚ್ಯೊ ಕಾಣ್ಯೊ ಸಂವೇದನಾತ್ಮಕ್ ಚಿಂತ್ಪಾಚ್ಯೊ ಆನಿ ಸಾದ್ಯಾ ಮನ್ಶಾ ಜಿಣ್ಯೆಕ್ ಸ್ಪಂದನ್ ಕರ್ಚೆ ತಸಲ್ಯೊ" ಮ್ಹಣಾಲೊ. ತಶೆಂಚ್ ಏಕ್ ಕುಡ್ಕೊ ಪಿಜ್ಜಾ ಕಾಣ್ಯೆಕ್ ಧಾಕ್ಲೊ ಜಾವ್ನ್ ಘೆವ್ನ್ ತ್ಯಾ ಕಾನ್ಯೆಚೆಂ ಲಿಸಾಂವ್ ವಾ ಸಾರ್ ಕಸೊ ಘೆವ್ಯೆತಾ ಮ್ಹಣೊನ್ ವಿವರಿಲೊ.

ಉಪ್ರಾಂತ್ ಶಿಭಿರಾರ್ಥಿಂನಿ ಆಪಾಪ್ಲ್ಯಾ ಅರ್ಥಾಚೊ ಮತ್ಲಬ್ ಘೆವ್ನ್ ತ್ಯಾ ಕಾಣ್ಯೆಚೊ ಸಾರ್ ವರ್ಣಿಲೊ.

ಚೊವ್ತ್ಯಾ ಭಾಗಾಂತ್ ಕೊಂಕ್ಣೆಂತ್ಲ್ಯಾ ಉಂಚ್ಲ್ಯಾ ಕಾಣ್ಯೆಗಾರಾಂ ಪಯ್ಕಿಂತ್ಲೊ ಎಕ್ಲೊ ಕೆವಿನ್ ಡಿ’ಮೆಲ್ಲೊ ಉಲಯಿತ್ತ್ - "ಸಮಕಾಳೀನ್ ಸಾಹಿತ್ಯಾಂತ್ ಕೊಂಕ್ಣಿ ಕಾಣ್ಯೊ" ಮ್ಹಳ್ಳ್ಯಾಚೆರ್ ಸವಿಸ್ತಾರ್ ರಿತಿನ್ ಆಪ್ಲೆ ವಿಚಾರ್ ವೆಕ್ತ್ ಕರುನ್ ಮ್ಹಣಾಲೊ "ಕೊಣ್ ಖಂಚ್ಯಾಯ್ ಇರಾದ್ಯಾನ್ ಕಾಣಿ ಬರಂವ್ದಿ, ಪುಣ್ ಹಾವೆಂ ಕಾಣಿ ಬರಂವ್ಚಿ ಮ್ಹಜ್ಯಾ ಸಂತೊಸಾಕ್ ಆನಿ ಮ್ಹಜೆಭಿತರ್ ಆಸ್ಚ್ಯಾ ಉಧ್ಭವಾ ಖಾತಿರ್" ಮ್ಹಣಾಲೊ. ತಾಣೆಂ ಕಾನಡಿಂತ್ಲ್ಯಾ ’ಬುಗುರಿ’ ಕಾಣ್ಯೆಚೊ ಸವಿಸ್ತಾರ್ ದಾಖ್ಲೊ ದಿವ್ನ್ ಏಕ್ ಕಾಣಿ ಕಶಿ ಆಸಾಜಯ್ ಮ್ಹಣೊನ್ ವಿವರಿಲೆಂ. ತಶೆಂಚ್ ತಾಚ್ಯಾ ಎಕೆಕಾ ಕಾಣ್ಯೆಂತ್ಲೆ ಎಕೇಕ್ ಪಾತ್ರ್ ಕಶೆ ತಾಕಾ ಭೆಟ್ಲೆ? ಖಂಯ್ಚರ್ ಭೆಟ್ಲೆ? ಮ್ಹಳ್ಳ್ಯಾಚೆರ್ ವಿವರುನ್ ಮ್ಹಣಾಲೊ.

ಮೆಲ್ವಿನ್ ಜೆ. ವಾಸ್ "ಕಾಣಿ ಏಕ್ ಮಾಧ್ಯಮ್ ಮಾತ್ರ್ ಎಕಾ ಕಾಣ್ಯೆಗಾರಾಕ್ ಆಪ್ಲ್ಯಾ ವಾಚ್ಪ್ಯಾಕ್ ಪಾವೊಂಕ್" ಮ್ಹಣಾಲೊ.

[ಸಿರಿಲ್ ಪೆರಿಸ್ ಬೆಂದುರ್ ಕೊಂಕ್ಣಿ ಪದಾಂ ಗಾಯ್ತಾನಾ]

ದನ್ಪಾರಾಂ ಉಪ್ರಾಂತ್ ಕೊಂಕ್ಣಿ ಪತ್ರಿಕೋಧ್ಯಮಾಂತ್ ಸಿರಿಲ್ ಪೆರಿಸಾನ್ ಪದ್ ಗಾಯ್ಲೆಂ ತರ್ ಬಾಯ್ ಪ್ರಿಯಾ ಸಿಕ್ವೇರಾನ್ ಖೆಳ್ ಖೆಳವ್ನ್ ಮನರಂಜನ್ ಕೆಲೆಂ. ಹೆಚ್ಚ್ ಸಂದರ್ಭಾರ್ ಚಲ್‌ಲ್ಲ್ಯಾ ಕಾರ್ಯಾಂತ್, ಕೊಂಕ್ಣಿ ಪತ್ರಿಕೋಧ್ಯಮಾಂತ್ ಪಂಚ್ವೀಸ್ ವರ್ಸಾಂಚ್ಯಾಕೀ ಚಡಿತ್ ವಾವ್ರ್ ಕೆಲ್ಲ್ಯಾ ಡೋಲ್ಫಿ ಕಾಸ್ಸಿಯಾಕ್ ತಶೆಂಚ್ ತಾಚೆಸವೆಂ ಹರ್ಯೆಕಾ ಸಂದರ್ಭಾರ್ ಪರ್ದ್ಯಾ ಪಾಟ್ಲ್ಯಾನ್ ರಾವೊನ್ ವಾವ್ರ್ ಕೆಲ್ಲ್ಯಾ ತಾಚ್ಯಾ ಪತಿಣೆಕ್ ಕ್ಲಾರಾ ಲೋಬೊಕ್ ದಾಯ್ಜ್ ಪಂಗ್ಡಾನ್ ಮಾನ್‌ಪತ್ರ್, ಕಾಣಿಕೊ ದಿವುನ್ ಸನ್ಮಾನ್ ಕೆಲೊ.

[ಫಜೀರ್ಚೊ ಬೆನ್ನಾ ಡೊಲ್ಫಿ ಕಾಸ್ಸಿಯಾ ಆನಿ ಕ್ಲಾರಾ ಲೋಬೊಚ್ಯಾ ಕೊಂಕ್ಣಿ ವಾವ್ರಾವಿಶಿಂ ಮಟ್ವ್ಯಾನ್ ಉಲಯ್ತಾನಾ]

[ಸನ್ಮಾನ್ ಕಾರ್ಯಾಚ್ಯಾ ಸಂದರ್ಭಾರ್]

ಮೆಲ್ವಿನ್ ವಾಸಾನ್ ಮಾನ್‌ಪತ್ರ್ ವಾಚ್ಲೆಂ ಆನಿ ಬೆನ್ನಾ ಫಜೀರಾನ್ ತೆಂ ಮಾನ್‌ಪತ್ರ್ ಆನಿ ಕಾಣಿಕೊ ಡೋಲ್ಫಿ ಕಾಸ್ಸಿಯಾಕ್ ದಿಲ್ಯೊ. ಬಾಯ್ ಪ್ರಿಯಾ ಸಿಕ್ವೇರಾನ್ ಕ್ಲಾರಾ ಲೋಬೊಚೆಂ ಮಾನ್‌ಪತ್ರ್ ವಾಚ್ಲೆಂ ಆನಿ ಗಿಬ್ಬಾ ಕುಲ್ಶೇಕರಾನ್ ತೆಂ ಮಾನ್‌ಪತ್ರ್ ಆನಿ ಕಾಣಿಕೊ ದಿಲ್ಯೊ.

[ಡೊಲ್ಫಿ ಕಾಸ್ಸಿಯಾಕ್ ಬೆನ್ನಾ ಫಜೀರ್ ಮಾನ್‌ಪತ್ರ್ ಆನಿ ಕಾಣಿಕೊ ದಿತಾಸ್ತಾಂ]

[ಕ್ಲಾರಾ ಲೋಬೊಕ್ ಗಿಬ್ಬಾ ಕುಲ್ಶೇಕರ್ ಮಾನ್‌ಪತ್ರ್ ಆನಿ ಕಾಣಿಕೊ ದಿತಾಸ್ತಾಂ]

ಸಮ್ಮಾನಾ ಉಪ್ರಾಂತ್ ಉಲಯಿತ್ತ್ ಡೋಲ್ಫಿ ಕಾಸ್ಸಿಯಾ ಉಲಯಿತ್ತ್ ಅಪ್ಲ್ಯಾ ಕಾಳ್ಜಾಂತ್ಲೆ ಉಚಾರ್ ಅಶೆ ವೆಕ್ತ್ ಕರಿಲಾಗ್ಲೊ; "ಹಾವೆಂ ಏಕ್ ನಿಚೆವ್ ಕೆಲ್ಲೊ - ಕೊಂಕ್ಣೆಂತ್ ಕಸ್ಲೊಚ್ ಮಾನ್-ಸಮ್ಮಾನ್ ಘೆಂವ್ಚೊನಾ, ಕಿತ್ಯಾಕ್ ಮ್ಹಳ್ಯಾರ್ ಹಾವೆಂ ಜ್ಯೆ ಕಿತೆಂ ಮ್ಹಜ್ಯಾನ್ ಕರುಂಕ್ ಜಾತಾ, ತೆಂ ಮ್ಹಜೆಂ ಕಾಮ್ ಮ್ಹಣ್ ಕೆಲೆಂ ಶಿವಾಯ್ ಖಂಚ್ಯಾಯ್ ರಿತಿಚ್ಯಾ ಆಶೆನ್ ನ್ಹಯ್. ದೆಕುನ್ ಮಾನ್ ಸಮ್ಮಾನಾಕ್ ಹಾಂವ್ ಜೊಕ್ತೊ ಮ್ಹಣೊನ್ ನ್ಹಯ್". ಪುಣ್ ಹೆಂ ಚಿಂತಾಪ್ ಮ್ಹಜ್ಯಾ ಥೊಡ್ಯಾ ಕಾಳ್ಜಾಕ್ ಲಾಗ್ಸಿಲ್ಯಾ ಮಿತ್ರಾಂನಿ ದಬಾವ್ ಘಾಲುನ್ ಬದ್ಲಿಜೆ ಪಡ್ಲೊ ಮ್ಹಣಾಲೊ. ತಾಚ್ಯಾ ವಾವ್ರಾಕ್ ತ್ರಾಣ್ ಆನಿ ಸ್ಪಿರಿತ್ ದಿಲ್ಲೊ ತಾಚಿ ಪತಿಣ್ ಮಾನೆಸ್ತಿಣ್ ಕ್ಲಾರಾ ಲೋಬೊನ್ ದೆಕುನ್ ತಿಕಾ ದಿಲ್ಲೊ ಮಾನ್ ನಿಜಾಯ್ಕೀ ಜೊಕ್ತೊ ಮಾನ್. ಆನಿ ಹ್ಯಾ ಖಾತಿರ್ ದಾಯ್ಜ್ ಪಂಗ್ಡಾಕ್ ತಾಣೆಂ ಉಲ್ಲಾಸ್ ಪಾಟಯ್ಲೆ. ದಾಯ್ಜ್ ಪಂಗ್ಡಾಚೊ ವಾವ್ರ್ ನಿಸ್ವಾರ್ಥಿ ವಾವ್ರ್. ಆನಿ ಹೊ ವಾವ್ರ್ ಪಳೆಂವ್ಕ್ ಸಕಾನಾಸ್ಚಿಂ ಥೊಡಿಂ ತಾಂಕಾಂ ಸಲ್ವಂವ್ಕ್ ಸರಾಗ್ ಪ್ರೇತನ್ ಕರ್ಚೆಂ ಕೊಂಕ್ಣೆಂತ್ ದಿಸೊನ್ ಯೆತಾ. ಪುಣ್ ಜೊಕ್ತೊ ಶೆವೊಟ್ ಆಸ್ತೆಲ್ಯಾಂಕ್ ಸಲ್ವಣ್ ಮ್ಹಳ್ಳಿ ನಾ. ತಶೆಂ ದಾಯ್ಜ್ ಪಂಗಡ್ ಆಫ್ಲ್ಯಾ ಶೆವೊಟಾಕ್ ಪಾವೊಂಕ್ ಸಕ್ತಲೊ. ತಾಂಕಾಂ ಸರ್ವ್ ಬರೆಂ ಮಾಗ್ತಾಂ" ಮ್ಹಣಾಲೊ.

[ಕಥಾಪಾಠಾಂತ್ ಹಾಜರ್ ಆಸ್‌ಲ್ಲಿಂ ಶಿಭಿರಾರ್ಥಿಂ]

ಹೆನ್ರಿ ಲುವಿಸ್ ಸಾಸ್ತಾನ್ ಹಾಣೆಂ ಹೆಚ್ಚ್ ಸಂದರ್ಭಾರ್ ಡೋಲ್ಫಿ ಕಾಸ್ಸಿಯಾಚೆರ್ ಬರಯಿಲ್ಲೆಂ ಏಕ್ ಕವಿತಾ ’ವಾತ್’ ವಾಚುನ್ ಸಾಂಗ್ಲಿ. ತಶೆಂಚ್ ಉಪ್ಕಾರ್ ಬಾವುಡ್ಲೊ.

ಹೆಚ್ಚ್ ಸಂದರ್ಭಾರ್, ಕುವೆಯ್ಟಾಂತ್ ಪಾಟ್ಲ್ಯಾ ಪಾಂಚ್ ವರ್ಸಾಂ ಥಾವ್ನ್ ಸರಾಗ್ ರಿತಿನ್ ಚಲಂವ್ಚ್ಯಾ ಕಾಮಾಸಾಳಾಕ್ ಪರ್ದ್ಯಾ ಪಾತ್ಲ್ಯಾನ್ ರಾವೊನ್ ಮಜತ್ ಕರ್ಚ್ಯಾ ಬಾಯ್ ಬೆನಿಟಾ ಕ್ವಾಡ್ರಸಾಚೊ ಉಪ್ಕಾರ್ ಬಾವುಡ್ಲೊ.

ಸಾಂಜೆರ್ ಸಾಡೆ ಚ್ಯಾರ್ ವೊರಾಕ್ ಹೆಂ ಕಾಮಾಸಾಳ್ ಅಖೇರ್ ಜಾಲೆಂ.

ಸಾಹಿತಿಲಾಗಿಂ ಸಂವಾದ್

ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed, hosted and maintained by Ashawadi Publications