ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮೆಲ್ವಿನ್ ಜೆರಾಲ್ಡ್ ವಾಸ್: ಕೆಲರಾಯ್ ಫಿರ್ಗಜೆಜೊ, ಪಾಟ್ಲ್ಯಾ ಭಾರಾ ವರ್ಸಾಂ ಥಾವ್ನ್ ಕುವೆಯ್ಟಾಂತ್ ವಾವ್ರ್ ಕರುನ್ ಆಸಾ. ಚಡುಣೆಂ ಪಂದ್ರಾ-ಸೊಳಾ ವರ್ಸಾಧಿಂ ಸಾಹಿತ್ಯಾಚಿ ಸುರ್ವಾತ್ ಕರುನ್, 35 ಮಟ್ವ್ಯೊ ಕಾಣ್ಯೊ ಆನಿ ಏಕ್ ಕಾದಂಬರಿ ಬರಯಿಲ್ಲಿ ತರ್ಯೀ ಸಭಾರ್ ವರ್ಸಾಂನಿ ತಿ ಜಿವಾಳ್ ದವ್ರುಂಕ್ ಸಕಾನಾಸ್ತಾಂ ರಾವ್ಲೊ ತರ್ಯ್ ಕೊಂಕ್ಣಿ ಸಾಹಿತ್ಯಾಚೆರ್ ತೊಚ್ಚ್ ಮೋಗ್ ಆನಿ ಹುಸ್ಕೊ ಅಸೊನ್, ಆಯ್ಲೆವಾರ್ ಸರಾಗ್ ರಿತಿನ್ ವೆವೆಗ್ಳ್ಯಾ ಪ್ರಕಾರಾಚಿ ಸಾಹಿತಿಕ್ ಕೃಷಿ ಕರುನ್ ಕೊಂಕ್ಣಿ ವರ್ತುಲಾಂತ್ ನಾಂವಾಡ್ದಿಕ್ ಜಾಲಾ. ಕಾಣ್ಯಾಂಶಿವಾಯ್ 4 ನಾಟ್ಕುಳೆ, 75 ಕವಿತಾ, 10 ಲೇಖನಾಂ, 20 ವಿಮರ್ಶೆ/ಸಮೀಕ್ಶಾ ಬರಯ್ಲ್ಯಾತ್. ಹಾಚೊ ಸ್ವತಾಚೊ ( ಫುಡ್ಲದ್) ಕವಿತಾಜಮೊ ’ಆಟ್ವ್ಯಾ ರಂಗಾಚೊ ಧೊಣು’ ವೆಗಿಂಚ್ ’ಆಶಾವಾದಿ ಪ್ರಕಾಶನ್’ ಪರ್ಗಟ್ಚಾರ್ ಆಸಾ. ಹಾಚ್ಯಾಧಿಂ ಹಾಚಿಂ ಕವಿತಾಂ/ಲೇಕನಾಂ ’ಮೊತಿಯಾಂ ಆನಿ ತಾರಾಂ’, ’ಸಾಗೊರಾಚ್ಯಾ ವಾಟೆಚ್ಯೊ ಝರಿ’, ’ಕವಿತಾಪಾಠ್’ ಆನಿ ’ದರ್ಯಾಕ್ ಉದಾಕ್’ ಬುಕಾಂನಿ ಪರ್ಗಟ್ಲ್ಯಾಂತ್. ಪಾಟ್ಲ್ಯಾ ದೋನ್ ವರ್ಸಾಂ ಥಾವ್ನ್ ದಾಯ್ಜ್.ಕೊಮ್ ಸಾಯ್ಟಿಚೊ ಸಹ-ಸಂಪಾದಕ್ಯೀ ಹೊ ಜಾವ್ನಾಸಾ.
ಭ್ರಮಿದೆಂತ್ಲ್ಯೊ ಸಾವ್ಳ್ಯೊ: ಏಕ್ ಸಾಮಾಜಿಕ್ ಕಾದಂಬರಿ, ಪ್ರಮುಖ್ ಜಾವ್ನ್ ತೆಗಾಂಚ್ಯಾ ತೀನ್ ರಿತಿಚಾ ಸಂಭಂಧಾಂಚೆ ಎಕಾಮೆಕಾಚೆ ಗಾಂಚ್ ಮ್ಹಣ್ಯೆತಾ. ವಾಚ್ಪ್ಯಾಂಕ್ ಸಿಂತಿಮೆಂತಾಂ, ಚಿಂತಾಪ್, ಭಗ್ಣಾಂ, ಉಮಾಳೆ ಜಾಗಂವ್ಕ್ ಜರೂರ್ ಸಕ್ತೆಲಿ ಮ್ಹಳ್ಳೊ ಮ್ಹಜೊ ಭರ್ವಸೊ.
ಪುಸ್ತಕ್ ಏಕ್
ಜಿವಿತ್ ತುಕಾ ಆಪಯ್ತಾ
ಆವಸ್ವರ್ ಧಾ: ಆಲಿಯಾ
"ಆಲಿಯಾ ಟೇಕ್ ಕೇರ್! ಕಾಂಯ್ ಕಿತೆಂಯ್ ಗರ್ಜ್ ಪಡಾತ್ ಜಾಲ್ಯಾರ್ ಮ್ಹಾಕಾ ಫೋನ್ ಕರ್.....!"
ಅಭಿಲಾಶನ್ ಆಲಿಯಾಕ್ ಸಾಂಗ್ತಾನಾ, ಟ್ಯಾಕ್ಸಿಚೆರ್ ಥಾವ್ನ್ ದೆಂವ್ಲೆಲೆಂ ಆಲಿಯಾ, ಅಭಿಲಾಶಕ್ ಹಾತ್ ಹಾಲವ್ನ್ ಆಪ್ಲ್ಯಾ ಅಪಾರ್ಟ್ಮೆಂಟಾಚಾ ಲಿಫ್ಟಾ ತೆವ್ಶಿಂ ಚಮ್ಕಾಲೆಂ. ಲಿಫ್ಟ್ ಧರುನ್ ತೆಂ ಆಪ್ಲ್ಯಾ ಪ್ಲ್ಯಾಟಾಕ್ ಯೇವ್ನ್ ಪಾವ್ಲೆಂ. ದಾರ್ ಉಗ್ತೆಂ ಕರುನ್ ಭಿತರ್ ಆಯಿಲ್ಲ್ಲ್ಯಾ ತಾಣೆಂ ಆಪ್ಲ್ಯಾ ಹಾತಾಂತ್ಲೆಂ ವ್ಯಾನಿಟಿ ಬ್ಯಾಗ್ ಸೊಫಾರ್ ಉಡಯ್ಲೆಂ ಆನಿ ತೆಂ ಥಂಯ್ಚ್ ಸೊಫಾರ್ ಗಳ್ಳೆಂ. ತಾಕಾ ಆಪ್ಲೆಂ ವಸ್ತುರ್ ಬದ್ಲಿ ಕರುಂಕ್ಯ್ ಮನ್ ಆಯಿಲ್ನಾ.
ಪಾಂಯ್ ಸೊಡುನ್ ಸೊಫಾಕ್ ವೊಣ್ಕಾಲ್ಲ್ಯಾ ತಾಚಿ ತಕ್ಲಿ ನೀಟ್ ಜಾವ್ನ್ ತಾಚೆ ದೊಳೆ ವಯ್ಲ್ಯಾ ಸೀಲಿಂಗಾಕ್ ಪಳೆತಾಲೆ. ಸವ್ಕಾಸ್ ಏಕಾ ವಯ್ರ್ ಏಕ್, ಆಜ್ ಘಡ್ಲೆಲೆಂ ಸಗ್ಳೆಂ ಘಡಿತ್ ಆಲಿಯಾಚಾ ದೊಳ್ಯಾಂ ಮುಕಾರ್ ಆಯ್ಲೆಂ.
ಘರ್ಚ್ಯಾ ವಿರಾರಾಯೆಂತ್ ಪ್ಲೈಟಾರ್ ತಾಚ್ಯೆ ಥಾವ್ನ್ ಜಾಲ್ಲಿ ಗಳಾಯ್, ತ್ಯಾ ಗಳಾಯೆಚೊ ಪರಿಣಾಮ್ ಜಾವ್ನ್ ತ್ಯಾ ಇಕ್ಬಾಲಾಚಾ ಭಾವಾನ್ ಆಪ್ಣಾಕ್ ಆಪುಣ್ ತಾಚ್ಯಾ ಕಾಮಾಚೆಂ ಮ್ಹಣೊನ್ ವೊಲಾಯಿಲ್ಲೆಂ, ಪ್ಲೈಟಾರ್ ಜಾಲ್ಲೆಂ ಝಗ್ಡೆಂ, ಝಗ್ಡ್ಯಾ ಥಾವ್ನ್ ಆಪ್ಣಾಕ್ ಮೆಳ್ಲ್ಲಿ ಭೆಶ್ಟಾವ್ಣಿ, ಭೆಶ್ಟಾವ್ಣೆ ಪಾಟ್ಲೆಂ ಗೂಂಡಾರಾಜ್, ಅಭಿಲಾಶನ್ ಆಪ್ಣಾಕ್ ದಿಲ್ಲೊ ಸಾಂಗಾತ್, ಅವ್ಚಿತ್ ಮಧೆಂ ಪಡ್ಲೆಂಲೆಂ ನಮಿತಾ, ಟ್ಯಾಕ್ಸಿ, ಸಿಗ್ನಲ್, ವಾಟ್ ಬದ್ಲಿಲ್ಲೆಂ, ಆತಾಂ ಘರ್....!
ವ್ಹಯ್! ಆಯ್ಚ್ಯಾ ದಿಸಾಚಾ ಹ್ಯಾ ಘಡಿತಾಂತ್ ಅಭಿಲಾಶನ್ ಆಲಿಯಾಕ್ ಸಂಪೂರ್ಣ್ ತಾಚೊ ಸಾಂಗಾತ್ ದಿಲ್ಲೊ. ತೆಂ ನಾತ್ಲ್ಲೆಂ ಜಾಲ್ಯಾರ್ ನಮಿತಾನ್ ಮಧೆಂ ಯೆಂವ್ಚೊ ಸಂಭವ್ಚ್ ನಾತ್ಲ್ಲೊ. ಏರ್ಪೊರ್ಟಾ ಥಾವ್ನ್ ಭಾಯ್ರ್ ಯೆತಾನಾ ಆನಿ ಕಿತೆಂ ಜಾತೆಂ ಕೋಣ್ ಜಾಣಾಂ? ಪ್ಲೈಟಾ ವಯ್ಲೊ ವಿಶಯ್ ಆಲಿಯಾನ್ ಚಿಂತ್ಲ್ಲ್ಯಾ ತಿತ್ಲೊ ಲ್ಹಾನ್ ನ್ಹಯ್ ಆಸ್ಲ್ಲೊ. ತಶೆಂ ಆಲಿಯಾಕ್ ಖುದ್ದ್ ಜಾವ್ನ್ ಆಪ್ಣಾ ವಯ್ರ್ ಭರ್ವಸೊ ಆಸ್ಲ್ಲೊ. ನಮಿತಾ ಯೇಂವ್ಕ್ ನಾತ್ಲೆಲೆಂ ಜಾಲ್ಯಾರ್ ಆಲಿಯಾಚಾ ಜಿವಿತಾಚೆಂ ಅಂತ್ಯ್ ಖಂಡಿತ್ ಜಾತೆಂ ನಾ. ಪುಣ್ ತ್ಯಾ ತಾಚ್ಯಾ ಜಿವಿತಾಚಿ ದಿಶಾ ಮಾತ್ರ್ ಬೋವ್ಶಾ ಬದ್ಲಾತಿ.
"ವಾರೆಂ ಉಟ್ಚ್ಯಾ ಪಯ್ಲೆಂಚ್ ತಾಚಿ ದಿಶಾ ಬರಯ್ಲೆಲಿ ಆಸ್ತಾ! ಆನಿ ತ್ಯಾಚ್ ದಿಶೆನ್ ತೆಂ ಧಾಂವ್ತಾ! ಆಶೆಂಚ್ ಮನ್ಶಾ ಜಿವಿತ್! ತಾಣೆಂ ಜಲ್ಮೊಂಚಾ ಪಯ್ಲೆಂಚ್ ತಾಚಿ ದಿಶಾ ಬರಯ್ಲೆಲಿ ಆಸ್ತಾ ಆನಿ ಹ್ಯಾಚ್ ದಿಶೆ ತೆವ್ಶಿಂ ತಾಚೆಂ ಜಿವಿತ್ ಧಾಂವ್ತಾ!"
ಆಲಿಯಾ ಕಿತ್ಲೆಂ ಧಯ್ರಾಧೀಕ್ ಚಲಿ ಮ್ಹಳ್ಳೆಂ ತೆಂ ಆಜ್ ಸಗ್ಳ್ಯಾಂಕ್ ರುಜು ಜಾಲ್ಲೆಂ. ಆಪ್ಲ್ಯಾ ಜಿವಾಕ್ ಭಿಯೆನಾಸ್ತಾನಾ, ಆಪ್ಲ್ಯಾ ಚಲಿಯೆ ಜಾತಿಕ್ ಲಜೆನಾಸ್ತಾನಾ ಸಮಾಜೆಂತ್ ಎಕಾ ದಾದ್ಲ್ಯಾ ಮುಕಾರ್, ತೆಂಯ್ ಸಮಾಜೆಚಿ ಸುಸಂಸ್ಕ್ರತಿ ನಾತ್ಲೆಲ್ಯಾ ತ್ಯಾ ಗೂಂಡಾಚಾ ಮುಕಾರ್ ಆಲಿಯಾ ಧಯ್ರಾನ್ ಉಭೆಂ ಜಾಲ್ಲೆಂ. ಆಸಲೆಂ ಧಯ್ರಾಧೀಕ್ ಚೆಡುಂ ಜಿವಿತಾಂತ್ಲ್ಯಾ ಮುಕ್ಲ್ಯಾ ಮೆಟಾಂ ವಿಶಿಂ ಚಿಂತುನ್ ಅಪಧಯ್ರಾನ್ ಪಾಟಿಂ ರಾವ್ತಾ?
ಕೆದಿಂಚ್ ನಾ!
ಪುಣ್ ಇಕ್ಬಾಲಾಚ್ಯಾ ತ್ಯಾ ಭಾವಾನ್ ಉಚಾರ್ಲ್ಲಿ ಉತ್ರಾಂ ಮಾತ್ರ್ ಆಲಿಯಾಕ್ ಪರ್ತ್ಯಾಕ್ ತಾಚ್ಯಾ ಮತಿಚ್ಯಾ ಪಡ್ದ್ಯಾರ್ ಧಾರು ಲಾಸಂವ್ಕ್ ಲಾಗ್ಲಿಂ.
ಆಯಾ ಜಾವ್ನ್ ಆಪುಣ್ ಇಕ್ಬಾಲಾಚಾ ಭಾವಾಚ್ಯಾ ಘರಾ ಕಾಮ್ ಕರ್ತಾಂ ತಶೆಂ ತಾಕಾ ಭೊಗ್ಲೆಂ.
ಚಿಂತ್ನಾಂ ಆನಿ ದೊಳ್ಯಾ ದಿಸವ್ಣ್ ಆಲಿಯಾಚಾ ಮತಿಕ್ ದೆದೆಸ್ಪರ್ ಕರ್ತಾನಾ ಆಲಿಯಾನ್ ಥಂಯ್ಚ್ ಸೊಫಾಚೆರ್ ಬಸೊನ್ ಆಸ್ಲ್ಲ್ಯಾ ಕಡೆನ್ ಆಪ್ಲೆ ದೊಳೆ ದಾಂಪ್ಲೆ. ತಾಚಿ ಮತ್ ಥಕ್ಲ್ಲಿ ಜಾಲ್ಯಾರ್ಯ್ ತ್ಯಾ ಮತಿಕ್ ವಿಶೆವ್ ಮ್ಹಳ್ಳೊ ತೊ ಹುಂಗುನ್ ಪಾಸೊನ್ಯ್ ಲಾಗಿಂ ಆಯ್ಲೊ ನಾ!
ವೇಳ್ ತಸೊಚ್ ಪಾಶಾರ್ ಜಾವ್ನ್ ವೊಣ್ತಿ ವಯ್ಲ್ಯಾ ಗಡಿಯಾಳಾಚೊ ಆವಾಜ್ ಕಾನಾಂಕ್ ಆದಾಳ್ತಾನಾ ಏಕ್ ಲಾಂಭ್ ಸುಸ್ಕಾರ್ ಸೊಡ್ಲ್ಲೆಂ ಆಲಿಯಾ ಸೊಫಾ ಥಾವ್ನ್ ಉಟ್ಲೆಂ. ದೊಳೆ ಘುಂವ್ಡಾವ್ನ್ ತಾಣೆಂ ವೊರಾಂ ಪಳೆಲಿಂ. ಆಪ್ಲೊ ಘೊವ್ ಘರಾ ಯೆಂವ್ಚೊ ವೇಳ್ ಜಾಲೊ ತೆಂ ಜಾಣಾಂ ಜಾವ್ನ್ ತೆಂ ಆತಾಂ ಘರ್ಚ್ಯಾ ಕಾಮಾಕ್ ಲಾಗ್ಲೆಂ.
ಲಗಾಮ್ ನಾಸ್ತಾನಾ ಜಿವಿತಾ ಘಡಿತಾಂಕ್ ನಿಯಾಳ್ ಕರ್ಚಾ ಮತಿಚಾ ಹಾತಾಂತ್, ಆಲಿಯಾ ದಿಶಾ ನಾಸ್ತಾನಾ ಉಭ್ಚ್ಯಾ ಸೊಂರ್ಗ್ಯಾ ಪರಿಂ ಜಾಲ್ಲೆಂ. ತಾಚ್ಯಾ ಮತಿಚಾ ಹಾತಾಂತ್ ಆಲಿಯಾಚೆಂ ಜಿವಿತ್ ತ್ಯಾ ಸೊಂರ್ಗ್ಯಾಚೊ ದಾಗೊ ಜಾವ್ನ್ ಕಯ್ದ್ ಜಾಲ್ಲೆಂ.
ಆಶಾಂತೆಚೆಂ ಎಕ್ಸುರೆಂ ಜಿವಿತ್ ಭುಕೆಚ್ಯಾ ಮತಿಕ್ ಘಟಾಯ್ ಆನಿ ಭಳ್ ಚಡ್ ಲಾಭಯ್ತಾ! ಆಶೆಂ ತಿ ಮತ್ ಚಿಂತ್ನಾಂಚೊ ಸಂಸಾರ್ ರಚ್ತಾ! ಹ್ಯಾ ರಚ್ಲೆಲ್ಯಾ ಸಂಸಾರಾಂತ್ ಆಪ್ಲ್ಯಾ ಭಿತರ್ಚ್ ಮನಿಸ್ ಆಪ್ಣಾಚೊ ಆನಿ ಆಪ್ಲ್ಯಾ ಜಿವಿತಾಚೊ ಆಪಾಲಿಪಾಚೊ ಖೆಳ್ ದೆಖ್ತಾ. ಹ್ಯಾ ಖೆಳಾಂತ್ ತೊಚ್ ಖೆಳ್ಗಾಡಿ ಜಾತಾ ಜಾಲ್ಲ್ಯಾನ್ ಭಾಯ್ಲ್ಯಾ ಸಂಸಾರಾಚಿ ತಾಕಾ ಕಾಂಯ್ ಪರ್ವಾ ಆಸಾನಾ. ಫಕತ್ತ್ ತೊ ಆಪ್ಲ್ಯಾಚ್ ಸಂಸಾರಾಂತ್ ಆಸ್ತಾ ಆನಿ ಆಪ್ಲ್ಯಾ ಜಿವಿತಾಚೊ ಖೆಳ್ ದೆಖ್ತಾ. ಆಪ್ಲ್ಯಾ ಜಿವಿತಾಂತ್ ಆಶೆಂಚ್ ಮುಕಾರುನ್ ವೆತಾನಾ ತೊ ತಾಚ್ಯಾಚ್ ಮತಿಲಾಗಿಂ ಇತ್ಲೊ ಸಂಭಂಧ್ ಜೊಡುಂಕ್ ಪಾವ್ತಾ ಕೀ ತಾಚ್ಯಾ ಹರ್ಯೆಕಾ ಸವಾಲಾಕ್ ಜವಾಬ್ ತೊ ಆಪ್ಲ್ಯಾ ಮತಿಲಾಗಿಂಚ್ ವಿಚಾರ್ತಾ ಆನಿ ನಿಮಾಣೆಂ ಭೃಮಿದೆಚಾ ಸಂಸಾರಾಕ್ ಪಾವ್ತಾ!
"ಟ್ರಿಣ್.... ಟ್ರಿಣ್!"
ಘರಾಚ್ಯಾ ದಾರಾ ಕಾಂಪಿಣೆಚೊ ಆವಾಜ್ ಆಯ್ಕೊನ್ ಕುಜ್ನಾಂತ್ ಕಾಮಾರ್ ಆಸ್ಲ್ಲೆಂ ಆಲಿಯಾ ಎಕ್ಚ್ ಪಾವ್ಟಿಂ ಉಡೊನ್ ಪಡ್ಲೆಂ. ದಾರಾಚಿ ಕಾಂಪಿಣ್ ಹ್ಯಾ ಘಡಿಯೆ ತಾಕಾ ಪರ್ಕಿ ಜಾಂವ್ಕ್ ಪಾವ್ಲ್ಲಿ. ಜಿವಿತಾಂತ್ಲ್ಯಾ ಸಂಸಾರಾಂತ್ ತೆಂ ಯಾಂತ್ರಿಕ್ ರಿತಿನ್ ಕುಜ್ನಾಂತ್ ರಾಂದ್ತಾಲೆಂ ತರ್ ಚಿಂತ್ನಾಂಚಾ ಸಂಸಾರಾಂತ್ ಮಾನಸಿಕ್ ರಿತಿನ್ ತಳ್ಮಾಳ್ಯಾಂನಿ ಭರ್ಲ್ಲೆಂ.
ಥಂಯ್ಚ್ ಕುಜ್ನಾಂತ್ ಉಮ್ಕಾಳ್ಚ್ಯಾ ಗಡಿಯಾಳಾ ವಯ್ರ್ ದೀಶ್ಟ್ ವೆಲ್ಲ್ಯಾ ಆಲಿಯಾಕ್ ಖಂಡಿತ್ ಆಪ್ಲೊ ಘೊವ್ ಆಯ್ಲೊ ತೆಂ ಕಳ್ತಾನಾ ವೆವೆಗ್ಗಿಂ ತೆಂ ಕುಜ್ನಾ ಥಾವ್ನ್ ಬಾಯ್ರ್ ಯೇವ್ನ್ ಮುಕ್ಲ್ಯಾ ದಾರಾ ತೆವ್ಶಿಂ ಚಮ್ಕಾಲೆಂ. ತಿತ್ಲ್ಯಾರ್ ಪರ್ತ್ಯಾಕ್ ಏಕ್ ಪಾವ್ಟಿಂ ದಾರಾಚಿ ಕಾಂಪಿಣ್ ವಾಜ್ಲಿ.
ಘೊವಾಕ್ ದಾರ್ ಉಗ್ತೆಂ ಕೆಲ್ಲೆಂ ಆಲಿಯಾ, ತಶೆಂಚ್ ತಾಕಾ ಹಾಸೊ ಪಾಟವ್ನ್ ಪರ್ತ್ಯಾಕ್ ಕುಜ್ನಾಕ್ ಆಯ್ಲೆಂ. ದಾರಾರ್ ರಾವ್ಲ್ಲ್ಯಾ ನಾಸಿರಾಕ್ ಆಜ್ ಆಪ್ಲ್ಯಾ ಬಾಯ್ಲೆಚೊ ಜಿನೊಸ್ ಕಿತ್ಯಾಕ್ಗೀ ಥೊಡೊ ದುಸ್ರೊಚ್ ದಿಸ್ಲೊ.
ಆಲಿಯಾ ಕುಜ್ನಾಕ್ ರಿಗ್ತಾನಾ ನಾಸಿರಾನ್ ಘುಂವೊನ್ ದಾರ್ ಭಂಧ್ ಕೆಲೆಂ. ಆಪ್ಲೆ ಮೊಚೆ ನಿಕ್ಳಾವ್ನ್, ಹಾತಾಂತ್ಲ್ಯಾ ಬ್ರೀಫ್ ಕೇಸಿಕ್ ವರುನ್ ಆಪ್ಲ್ಯಾ ರುಮಾಂತ್ ದವರುನ್ ಗಳ್ಯಾಚಿ ಟಾಯ್ ಸದಿಳ್ ಕೆಲ್ಲೊ ತೊ ತಸೊಚ್ ಕಿತೆಂಗೀ ಚಿಂತುನ್ ಕುಜ್ನಾಕ್ ಚಮ್ಕಾಲೊ.
ಕುಜ್ನಾಚಾ ದಾರಾರ್ ಉಭೊ ರಾವೊನ್ ನಾಸಿರಾನ್ ಆಲಿಯಾಕ್ಚ್ ಪಳೆಲೆಂ. ಆಪ್ಲ್ಯಾ ಬಾಯ್ಲೆಚ್ಯಾ ಹರ್ಯೆಕಾ ಕಾಮಾಂತ್ ಆಜ್ ಆಸಾ ಮ್ಹಳ್ಳ್ಯಾ ಪರಿಂ ತಾಕಾ ಜಾಲೆಂ. ಎಕಾ ವಾಟೆನ್ ಆಲಿಯಾ ಥಕ್ಲ್ಲ್ಯಾ ಪರಿಂ ದಿಸ್ತಾಲೆಂ ಜಾಲ್ಯಾರ್ಯ್ ತಾಚ್ಯಾ ಕಾಮಾಂತ್ ಆಜ್ ಎಕಾ ಥರಾಚಿ, ನಾಸಿರಾನ್ ಎದೊಳ್ ಪಳೆಂವ್ಕ್ ನಾತ್ಲೆಲಿ ಚಾಲ್ ದಿಸ್ಲಿ. ಕುಜ್ನಾಚಾ ದಾರಾರ್ ಯೇವ್ನ್ ರಾವ್ಲ್ಲ್ಯಾ ಆಪ್ಣಾ ತೆವ್ಶಿಂ ಅಜೂನ್ ಆಲಿಯಾಚೆಂ ಗುಮನ್ ವ್ಹಾಳೊಂಕ್ ನಾ ತೆಂ ಪಳೆಲ್ಲೊ ನಾಸಿರ್, ಸವ್ಕಾಸ್ ಭಿತರ್ ಸರೊನ್ ಆಲಿಯಾಚಾ ಲಾಗಿಂ ಯೆತಾನಾ ಆಪ್ಣಾ ಪಾಟ್ಲ್ಯಾನ್ ಕಿತೆಂಗೀ ಆಯಿಲ್ಲ್ಯಾ ಪರಿಂ ಜಾವ್ನ್ ಎಕ್ಚ್ ಪಾವ್ಟಿಂ ಜಾಗೆಂ ಜಾಲ್ಲೆಂ ಆಲಿಯಾ ಪಾಟಿಂ ಘುಂವ್ಲೆಂ.
"ತುಂ?" ತೆಂ ಉದ್ಗಾರ್ಲೆಂ.
"ಖಂಯ್ಚಾ ಸಂಸಾರಾಕ್ ಪಾವ್ಲಾಂಯ್ ಡಾರ್ಲಿಂಗ್? ಕಿತೆಂ ಭಲಾಯ್ಕಿ ಬರಿ ನಾ ತುಕಾ?" ನಾಸಿರಾನ್ ವಿಚಾರ್ಲೆಂ.
"ಕಾಂಯ್ ನಾ! ಆಶೆಂಚ್.....!"
"ತುಕಾ ಪಳೆತಾನಾ ಕಿತೆಂಗೀ ಜಾಲ್ಲ್ಯಾ ಪರಿಂ ದಿಸ್ತಾ!"
"ನಾ ನಾ! ತುಂ ವಸ್ತುರ್ ಕಾಡ್. ತುಕಾ ಜ್ಯೂಸ್ ತಯಾರ್ ಕರ್ತಾಂ!" ಆಲಿಯಾನ್ ಆಜ್ ತಾಚ್ಯೆ ಸವೆಂ ಘಡ್ಲೆಲ್ಯಾ ಘಡಿತಾಕ್ ನಾಸಿರಾ ಥಾವ್ನ್ ಲಿಪಂವ್ಕ್ ಪ್ರಯತ್ನ್ ಕೆಲೆಂ.
"ಆರ್ ಯು ಶ್ಯೂರ್......? ಭಲಾಯ್ಕಿ ಬರಿ ನಾ ಜಾಲ್ಯಾರ್ ಸಾಂಗ್! ತುಂ ರಾಂದಿನಾಕಾ. ಅಬ್ಬೂ ಘರಾ ಆಪಯ್ತಾಲೊ! ಆಮಿ ಘರಾ ವಚೊನ್ ಯೆವ್ಯಾಂ!"
"ನಾ ಹಾಂವ್ ಬರಿಂ ಆಸಾ!" ಆಲಿಯಾನ್ ಜವಾಬ್ ದಿಲಿ. ತಾಕಾ ನಾಸಿರಾಚಾ ಘರಾ ವಚೊಂಕ್ ಮನ್ ನಾತ್ಲ್ಲೆಂ. ಆಪ್ಣಾಕ್ ಏಕ್ ಸುನ್ ಮ್ಹಣೊನ್ ಮರ್ಯಾದ್ ದೀನಾತ್ಲೆಲ್ಯಾ ಘರಾ ತೆಂ ಮೊನ್ಯಾ ಮನ್ಜಾತಿ ಪರಿಂ ಕಶೆಂ ಬಸ್ತೆಲೆಂ?
ಆಲಿಯಾಚಿ ಜವಾಬ್ ಆಯ್ಕೊನ್ ನಾಸಿರ್ ಪಾಟಿಂ ಘುಂವ್ಲೊ. ತಿತ್ಲೆಂಚ್!
ತಾಚ್ಯಾ ಬೊಲ್ಸಾಂತ್ ಆಸ್ಲ್ಲೆಂ ತಾಚೆಂ ಸೆಲ್ಪೋನ್ ವ್ಹಾಜೊಂಕ್ ಲಾಗ್ಲೆಂ.
ಬೊಲ್ಸಾಕ್ ಹಾತ್ ಘಾಲುನ್ ಪೋನ್ ಭಾಯ್ರ್ ಕಾಡುನ್ ಪಳೆಲ್ಲ್ಯಾ ನಾಸಿರಾಕ್ ಆಪ್ಲ್ಯಾ ಖಾಸ್ಗಿ ಪೊನಾಚೆರ್ ಅಪರಿಚಿತ್ ನಂಬರ್ ದಿಸೊನ್ ಯೇವ್ನ್ ತಾಕಾ ಆಶ್ಚರ್ಯ್ ಜಾಲೆಂ ತರ್ಯ್ ತಾಣೆಂ ಪೋನ್ ರಿಸೀವ್ ಕೆಲೆಂ.
"ಹಲೋ.....!" ನಾಸಿರ್ ಉಲಯ್ಲೊ.
"........." ತ್ಯಾಕುಶಿನ್ ಥಾವ್ನ್ ಆಯ್ಕೊನ್ ಆಯಿಲ್ಲ್ಯಾ ತಾಳ್ಯಾಕ್ ವಳಕ್ ಧರ್ಚೆಂ ಪ್ರಯತ್ನ್ ತಾಣೆಂ ಕೆಲೆಂ ಜಾಲ್ಯಾರ್ಯ್ ತಾಕಾ ಸಾದ್ಯ್ ಜಾಲೆಂ ನಾ.
ಸುಮಾರ್ ದೋನ್ ಮಿನುಟಾಂ ತ್ಯಾ ಕುಶಿನ್ ಥಾವ್ನ್ ಉಲಯಿಲ್ಲ್ಯಾ ತಾಳ್ಯಾನ್ ನಾಸಿರಾಕ್ ಕಾಂಯ್ಚ್ ಉಲಂವ್ಕ್ ಆವ್ಕಾಸ್ ಕರುನ್ ದಿಲೊ ನಾ. ತ್ಯಾ ಕುಶಿಚ್ಯಾ ವ್ಯಕ್ತಿನ್ ಆಪ್ಲೆಂ ಉಲೊಣೆಂ ರಾವವ್ನ್ ತಾಚೆಂ ಪೋನ್ ಭಂಧ್ ಕರ್ತಾನಾ, ಹ್ಯಾ ಕುಶಿನ್ ನಾಸಿರ್ ಕಾನಾಕ್ ಲಾಯಿಲ್ಲ್ಯಾ ಆಪ್ಲ್ಯಾ ಪೊನಾಕ್ ಪಾಟಿಂ ಕಾಡುಂಕ್ ವಿಸ್ರಾಲ್ಲೊ. ಪೊನಾ ವಯ್ಲ್ಯಾ ಉತ್ರಾಂಚಾ ಪ್ರಭಾವಾನ್ ರಾವ್ಲ್ಲ್ಯಾ ಕಡೆಚ್ ರೂಕ್ ಜಾಲ್ಲೊ ನಾಸಿರ್ ತಸೊಚ್ ಆಪ್ಲ್ಯಾ ಬಾಯ್ಲೆಕ್ ಪಳವ್ನ್ ರಾವ್ಲೊ. ತಾಚ್ಯಾ ತೊಂಡಾ ಥಾವ್ನ್ ಉತ್ರಾಂ ಸುಟ್ಲಿಂ ನಾಂತ್. ತಾಚ್ಯಾ ದಿಶ್ಟಿಂತ್ ಏಕ್ ವಿಚಿತ್ರ್ ಪ್ರಕಾಸ್ ಭರೊನ್ ಯೇಂವ್ಕ್ ಲಾಗ್ಲೊ.
ವ್ಹಾಜ್ಲೆಲ್ಯಾ ಟೆಲಿಪೊನಾಚೆರ್ ಆಪ್ಲ್ಯಾ ಘೊವಾನ್ ಕಾಂಯ್ಚ್ ಉಲಯಿಲ್ಲೆಂ ಆಲಿಯಾಕ್ ಆಯ್ಕಾಲೆಂ ನಾ. ಆಪ್ಲ್ಯಾ ಕಾಮಾ ಮಾಧೆಂ ತೆಂ ತೆಂ ಪಾಟಿಂ ಘುಂವೊನ್, ನಾಸಿರಾಕ್ ಪಳವ್ನ್,
"ಕೊಣಾಚೆಂ ಪೋನ್......? ಅಬ್ಬೂಕ್ ಸಾಂಗ್....! ಆಜ್ ನಾಕಾ ಅನ್ಯೇಕ್ ಪಾವ್ಟಿಂ ಯಾ ಆಮಿಂ!" ಆಲಿಯಾಕ್ ತೆಂ ಟೆಲಿಪೋನ್ ನಾಸಿರಾಚಾ ಬಾಪಾಯ್ಚೆಂ ಮ್ಹಳ್ಳೊ ದುಬಾವ್ ಜಾಲೊ.
ಆಲಿಯಾಚಾ ಉತ್ರಾಂಕ್ ಆಯ್ಕಾಲ್ಲೊ ನಾಸಿರ್ ಹ್ಯಾ ಸಂಸಾರಾಕ್ ಪಾಟಿಂ ಪರ್ತಾಲೊ. ಆಪ್ಲ್ಯಾ ಬಾಯ್ಲೆಚಾ ಆಜ್ಞಾಕ್ ತಾಣೆಂ ಪಾಳೊ ದಿಲೊ ನಾ. ಪುಣ್ ಅಜೂನ್ ಕಾನಾಕ್ ಲಾಯಿಲ್ಲ್ಯಾ ಪೋನಾಕ್ ಆಪ್ಲ್ಯಾ ಹಾತಾ ಸಯ್ತ್ ಸಕಯ್ಲ್ ದೆಂವವ್ನ್, ತ್ಯಾ ಪೊನಾಕ್ ಏಕ್ ಪಾವ್ಟಿಂ ಆನಿ ಆಲಿಯಾಕ್ ಏಕ್ ಪಾವ್ಟಿಂ ತಾಣೆಂ ಪಳೆಲೆಂ.
ಆಪ್ಲ್ಯಾ ಘೊವಾಚೆಂ ವರ್ತನ್ ಕಿತ್ಯಾಕ್ಗೀ ಆಲಿಯಾಕ್ ಬರೆಂ ಲಾಗ್ಲೆಂ ನಾ. ಘೊವಾಚೆಂ ಯೆಣೆಂ ತಾಕಾ ತಾಚ್ಯಾ ಆಯ್ಚಾ ದಿಸಾಚಾ ಘಡಿತಾ ಥಾವ್ನ್ ಥೊಡೆಂ ಪಯ್ಸ್ ವರುಂಕ್ ಸಕ್ಲ್ಲೆಂ ತರ್ಯ್ ಅಚಾನಕ್ ಆತಾಂ ಆಯಿಲ್ಲ್ಯಾ ಪೊನಾ ಥಾವ್ನ್ ನಾಸಿರಾಚೊ ಬಾದ್ಲಾಲ್ಲೊ ಜಿನೊಸ್ ಕಿತ್ಯಾಕ್ಗೀ ಆಲಿಯಾಚಾ ಮತಿಂತ್ ದುಬಾವಾಕ್ ವೊಂಕಾಲಾಗ್ಲೊ.
"ಹೊ ರಾಶಿದ್ ಮ್ಹಳ್ಯಾರ್ ಕೋಣ್......?" ತೊಂಡಾ ವಯ್ಲ್ಯಾ ಆಶ್ಚರ್ಯಾಚಾ ಛಾರ್ಯಾನ್ ಆಲಿಯಾಕ್ಚ್ ಪಳೆಲ್ಲ್ಯಾ ನಾಸಿರಾನ್ ಸವಾಲ್ ಕೆಲೆಂ.
ಆಪ್ಲ್ಯಾ ಘೊವಾಚ್ಯಾ ಜಿಬೆರ್ ಪರ್ಕಿ ನಾಂವ್ ಆಯ್ಕೊನ್, ತೆಂಯ್ ಆಪ್ಲೊ ಘೊವ್ ಪರ್ಕಿ ದಾದ್ಲ್ಯಾಕ್, ತೊ ಕೋಣ್ ಮ್ಹಣೊನ್ ಆಪ್ಣಾಕ್ ವಿಚಾರ್ತಾ ತೆಂ ಕಳೊನ್ ಆಲಿಯಾ ಘುಸ್ಪಡ್ಲೆಂ.
"ರಾ....ಶಿದ್! .....ಕೋಣ್ ರಾಶಿದ್?" ಹ್ಯಾ ನಾಂವಾ ವಿಶಿಂ ಕಾಂಯ್ಚ್ ನೆಣಾಂ ಆಸ್ಲ್ಲ್ಯಾ ಆಲಿಯಾನ್ ಪಾಟಿಂ ನಾಸಿರಾಕ್ ಸವಾಲ್ ಕೆಲೆಂ.
"ಡ್ಯಾಮಿಟ್!" ನಾಸಿರ್ ಘರ್ಜಾಲೊ. "ಎಕಾ ಸಾಂಜೆರ್ ಥಾವ್ನ್ ತುಕಾ ಪೋನ್ ಕರುಂಕ್ ಟ್ರೈ ಕರ್ತಾಂ. ತುಜೆಂ ಪೋನ್ ಭಂಧ್ ಆಸಾ. ಆನಿ ಹೊ ಆತಾಂ...!" ನಾಸಿರ್ ರಾಗಾನ್ ಖಡ್ಕಡ್ತಾ ಮ್ಹಳ್ಳ್ಯಾ ಪರಿಂ ಆಲಿಯಾಕ್ ದಿಸ್ಲೆಂ.
"ಪೋನ್....!?"
ಆಪ್ಲ್ಯಾ ಸೆಲ್ಪೊನಾಚೊ ಆಲಿಯಾಕ್ ಆತಾಂ ಉಡಾಸ್ ಆಯ್ಲೊ. ಪ್ಲೈಟಾರ್ ತಾಣೆಂ ತಾಚೆಂ ಪೋನ್ ಭಂಧ್ ದವರ್ಲ್ಲೆಂ ತೆಂ ಅಜೂನ್ ತಾಣೆಂ ಆನ್ ಕೆಲ್ಲೆಂ ನಾ.
"ಪೋನ್ ಆನ್ ಕರುಂಕ್ ಜಾಯ್ ಮ್ಹಣೊನ್ ಖಬಾರ್ ನಾ ತುಕಾ?" ನಾಸಿರಾಚೊ ತಾಳೊ ಸಗ್ಳ್ಯಾ ತಾಚ್ಯಾ ಘರಾಂತ್ ಸಾದ್ಲೊ. ಆಲಿಯಾ ಆಪ್ಲ್ಯಾ ಘೊವಾಕ್ಚ್ ಪಳಂವ್ಕ್ ಪಡ್ಲೆಂ. ಥೊಡ್ಯಾಚ್ ವೆಳಾ ಪಯ್ಲೆಂ ಆಯಿಲ್ಲ್ಯಾ ಟೆಲಿಪೊನಾನ್ ಅಚಾನಕ್ ನಾಸಿರಾಚಾ ಸ್ವಭಾವಾಕ್ಚ್ ಬದ್ಲುನ್ ಸೊಡ್ಲ್ಲೆಂ. ಹೆಂ ಕಿತ್ಯಾಕ್ ಆನಿ ಕಶೆಂ ಮ್ಹಳ್ಳೆಂ ತೆಂ ಆಲಿಯಾಕ್ ಸಮ್ಜಾಲೆಂ ನಾ. ತ್ಯಾ ಭಾಯ್ರ್ ತಾಚ್ಯಾ ಘೊವಾಚ್ಯಾ ತೊಂಡಾ ಥಾವ್ನ್ ಪರ್ಕಿ ದಾದ್ಲ್ಯಾಚೆಂ ನಾಂವ್! ಆಲಿಯಾ ಸಗ್ಳೆಂಚ್ ಘುಸ್ಪಡ್ಲೆಂ.
ಹೆಂ ಕಳ್ಲ್ಲೊ ನಾಸಿರ್ ಸವ್ಕಾಸ್ ಎದೊಳ್ ಉಭಾರ್ಲೆಲ್ಯಾ ಆಪ್ಲ್ಯಾ ತಾಳ್ಯಾಂತ್ ಥೊಡಿ ಮೊವಾಳಾಯ್ ಹಾಡುನ್,
"ಓ.ಕೆ....! ಹೊ ರಾಶಿದ್ ಮ್ಹಳ್ಯಾರ್ ಕೋಣ್ ಆಲಿಯಾ? ಸುಣೆಂ ಘೊಂಕ್ಲ್ಲ್ಯಾ ಪರಿಂ ಘೊಂಕ್ತಾ ತೊ! ತುವೆಂ ಪ್ಲೈಟಾರ್ ಪಾಂಯ್ ದವರ್ಲ್ಯಾರ್ ತುಕಾ ಲಾಗಾಡ್ ಕಾಡ್ತಾ ಖಂಯ್. ಕೋಣ್ ಹೊ? ಉಲಂವ್ಚಿ ರೀತ್ ಕಳೀತ್ ನಾತ್ಲಲೊ ಈಡಿಯಟ್....! ಕಾಮಾ ಕಡೆನ್ ಕಾಂಯ್ ಪುಣಿಂ ಜಾಲೆಂ....?" ಆಪ್ಲ್ಯಾ ತಾಳ್ಯಾಂತ್ ಆತಾಂ ಥೊಡಿ ಮೊವಾಳಾಯ್ ಹಾಡುನ್ ನಾಸಿರಾನ್ ವಿಚಾರ್ಲೆಂ. ತಾಕಾ ಅಜೂನ್ ಹೊ ಏಕ್ ಮಿಸ್ತೆರ್ ಮ್ಹಳ್ಳ್ಯಾ ಭಾಶೆನ್ ಜಾಲ್ಲೊ. ತ್ಯಾ ಭಾಯ್ರ್ ತ್ಯಾ ಪೊನಾ ವಯ್ರ್ ಆಪ್ಣಾಕ್ ದಿಲ್ಲಿ ಭೆಶ್ಟಾವ್ಣಿ ಆಯ್ಕೊನ್ ತೊ ರಾಗಾನ್ ಖಡ್ಕಡ್ಲ್ಲೊ.
ಆಲಿಯಾಕ್ ಆತಾಂ ನಾಸಿರಾಚಾ ರಾಗಾಚೆಂ ಆನಿ ಬದ್ಲಾಲ್ಲ್ಯಾ ಜಿನೊಸಾಚೆಂ ಕಾರಾಣ್ ಕಿತೆಂ ಮ್ಹಳ್ಳೆಂ ತೆಂ ಸಮ್ಜಾಲೆಂ.
"ತರ್ ಇಕ್ಬಾಲಾಚಾ ಭಾವಾಚೆಂ ನಾಂವ್ ರಾಶಿದ್?" ಆಲಿಯಾನ್ ಆಪ್ಲ್ಯಾ ಮತಿಂತ್ಚ್ ಸಮ್ಜೊನ್ ಘೆತ್ಲೆಂ.
ಆಲಿಯಾಕ್ ಆತಾಂ ತಾಚ್ಯಾ ಘೊವಾ ಥಾವ್ನ್ ಕಾಂಯ್ ಲಿಪೊನ್ ದವರುಂಕ್ ಸಾದ್ಯ್ ನಾತ್ಲ್ಲೆಂ.
"ಮ್ಹಾಕಾ ಖಬಾರ್ ನಾತ್ಲ್ಲಿ ತಾಚೆಂ ನಾಂವ್ ರಾಶಿದ್ ಮ್ಹಣೊನ್! ಆಜ್ ಸಾಕಾಳಿಂಚಾ ಪ್ಲೈಟಾರ್ ಅಹ್ಮದಾಬಾದ್ ಥಾವ್ನ್ ಮುಂಬಯಿ ಯೆಂವ್ಚ್ಯಾ ವಗ್ತಾರ್.....!"
ಆಲಿಯಾನ್ ನಿರ್ವೊಗ್ ನಾಸ್ತಾಂ ಪ್ಲೈಟಾರ್ ಘಡ್ಲ್ಲೆಂ ಆಯ್ಚೆಂ ಘಡಿತ್ ಆಸಾ ತಶೆಂ ಆಪ್ಲ್ಯಾ ಘೊವಾಕ್ ಸಾಂಗ್ಲೆಂ.
ಆಲಿಯಾನ್ ಸಾಂಗ್ಲೆಲೆಂ ಆಯ್ಕಾಲ್ಲ್ಯಾ ನಾಸಿರಾಕ್ ಕಾಂಯ್ಚ್ ಸಮ್ಜಾನಾಸ್ತಾನಾ ತಶೆಂಚ್ ಉಭೊ ರಾವ್ಲೆಲ್ಯಾ ಕಡೆನ್ ತೊ ತ್ಯಾ ಕುಜ್ನಾಚಾ ದಾರಾಚಾ ದಾರ್ವಂತಾಕ್ ವೊಣ್ಕಾಲೊ.
"ತುಂ ಕಾಂಯ್ ಟೆನ್ಶನ್ ಕರಿನಾಕಾ ನಾಸಿರ್! ತಿಂ ಘೊಂಕ್ಚಿಂ ಸುಣಿಂ. ತಾಂಕಾಂ ಭಿಯೆಲ್ಯಾರ್.....!" ಆಲಿಯಾ ಆಪ್ಲ್ಯಾ ಘೊವಾಕ್ ಧಯ್ರ್ ದೀಂವ್ಕ್ ಪ್ರಯತ್ನ್ ಕರಿಲಾಗ್ಲೆಂ.
"ಜಾಣಾಂ ಆಸಾಯ್ ತುಂ... ಟೆಲಿಪೊನಾರ್ ತಾಣೆಂ ಮ್ಹಾಕಾ ಕಸಲಿ ಧಮ್ಕಿ ದಿಲಿ ಮ್ಹಣ್.....?"
ಆಲಿಯಾಕ್ಚ್ ಪಳವ್ನ್ ಸಾಂಗ್ಲೆಲ್ಯಾ ನಾಸಿರಾನ್ ಫುಡೆಂ ಉಲಂವ್ಚೆಂ ಪ್ರಯತ್ನ್ ಕೆಲೆಂ ನಾ. ಥೊಡೊ ವೇಳ್ ತೊ ಮೌನ್ ಜಾಲೊ. ಉಪ್ರಾಂತ್ ಕಿತೆಂಗೀ ಚಿಂತುನ್,
"ಫಾಲ್ಯಾಂ ಥಾವ್ನ್ ತುವೆಂ ಘರ್ ಭಾಯ್ರ್ ಸರ್ಚೆಂ ನಾಕಾ ಆಲಿಯಾ! ಪುರೊ... ಮಸ್ತ್ ಜಾಲೆಂ. ದಿಸ್ ಇಸ್ ಪೈನಲ್!"
ನಾಸಿರಾನ್ ಆತಾಂ ಆಪ್ಲೆಂ ಸೆಲ್ಪೋನ್ ಕಾಡುನ್ ತಾಚ್ಯೆರ್ ಏಕ್ ನಂಬರ್ ಡಯಲ್ ಕೆಲೆಂ.
"ಹಲೋ ಅಬ್ಬೂ....!"
ನಾಸಿರಾನ್ ಆಪ್ಲ್ಯಾ ಬಾಪಾಯ್ಕ್ ಆತಾಂಚ್ ಆಪ್ಲ್ಯಾ ಘರಾ ಯೇವ್ನ್ ಮೆಳೊಂಕ್ ಸಾಂಗ್ಲೆಂ.
ನಾಸಿರ್ ಆಪ್ಲ್ಯಾ ಬಾಪಯ್ ಲಾಗಿಂ ಆಪ್ಣಾಚ್ಯಾ ವಿಶಿಂ ಉಲಂವ್ಕ್ ತಾಕಾ ಹಾಂಗಾ ಆಪಯ್ತಾ ತೆಂ ಕಳೊನ್,
"ನಾಸಿರ್...., ತುಜ್ಯಾ ಘರ್ಚ್ಯಾಂಕ್ ಸಾಂಗೊಂಕ್ ವಚಾನಾಕಾ. ಕಾಂಯ್ ಪ್ರಾಬ್ಲೆಮ್ ಜಾಯ್ನಾತ್ಲ್ಲ್ಯಾ ಪರಿಂ ಹಾಂವ್ ಪಳೆತಾಂ. ಸಗ್ಳೆಂ ಸಮಾ ಜಾತೆಲೆಂ!" ಆಲಿಯಾನ್ ನಾಸಿರಾಚ್ಯಾ ಪೊನಾಕ್ ಧರ್ಲ್ಲ್ಯಾ ಹಾತಾಕ್ ಧರುನ್ ವೊಡ್ಲೆಂ. ಎಕಾ ಖಿಣಾಕ್ ಆಲಿಯಾಕ್ಚ್ ಪಳೆಲ್ಲ್ಯಾ ನಾಸಿರಾನ್ ದಾವ್ಯಾ ಹಾತಾಂತ್ ಆಸ್ಲ್ಲ್ಯಾ ಪೊನಾಕ್ ಉಜ್ವ್ಯಾ ಹಾಂತಾಂತ್ ಬದ್ಲಿಲೆಂ. ಆನಿ ದಾವ್ಯಾ ಹಾತಾನ್ ಆಲಿಯಾಕ್ ಪಯ್ಸ್ ಲೊಟ್ಲೆಂ.
"ನಾಸಿರ್! ತುವೆಂ ಚಿಂತ್ಚ್ಯಾ ತಿತ್ಲೆಂ ವ್ಹಡ್ಲೆಂ ಕಾಂಯ್ ಜಾಂವ್ಕ್ ನಾ!" ಆಲಿಯಾಕ್ ಕಿತೆಂ ಕರ್ಚೆಂ ತೆಂ ಸಮ್ಜಾನಾತ್ಲ್ಲೆಂ. ನಾಸಿರಾನ್ ಆಪ್ಲ್ಯಾ ವಿಶಯಾಂತ್ ತಾಚ್ಯಾ ಘರ್ಚ್ಯಾಂಕ್ ಮಧೆಂ ಹಾಡ್ಚೆಂ ಅಲಿಯಾಕ್ ಪಸಂದ್ ನಾತ್ಲ್ಲೆಂ.
"ನಾಸಿರ್! ತುಂ ಆಯ್ಕ್ ಮ್ಹಾಕಾ! ತಶೆಂ ಕಾಂಯ್ ಪ್ರಾಬ್ಲೆಮ್ ಜಾಲ್ಯಾರ್ ಹಾಂವ್ ನಮಿತಾಕ್ ಸಾಂಗ್ತಾಂ. ಪ್ಲೀಸ್...!" ಆಲಿಯಾಚೊ ತಾಳೊ ಮೊವಾಳುನ್ ರಡ್ಕುರ್ಯಾ ತಾಳ್ಯಾ ಪರಿಂ ಜಾಲೊ.
"ಶಟಪ್ ಆಲಿಯಾ! ವೊಗೆಂಚ್ ಬಸ್ತಾಯ್ ಜಾಲ್ಯಾರ್ ಬಸ್! ನಾ ಜಾಲ್ಯಾರ್....! ಇತ್ಲೊ ವ್ಹಡ್ಲೊ ವಿಶಯ್ ಜಾಲೊ ಆನಿ ತುವೆಂ ಮ್ಹಾಕಾ ಏಕ್ ಸಬ್ದ್ ಸಾಂಗೊಂಕ್ ನಾಂಯ್. ತುಜ್ಯಾ ತಿತ್ಲ್ಯಾಕ್ಚ್ ತುಂ ...."
ನಾಸಿರಾಚಿ ಘರ್ಜೊವ್ಣಿ ತ್ಯಾ ಕುಶಿಂನ್ ನಾಸಿರಾಚಾ ಬಾಪಾಯ್ಕ್ ಸಾರ್ಕಿ ಆಯ್ಕಾತಾಲಿ. ಹೆಂ ಜಾಣಾಂ ಜಾಲ್ಲೆಂ ಆಲಿಯಾ ಆತಾಂ ವೊಗೆಂ ಜಾಲೆಂ. ತೆಂ ಕಾಂಯ್ ಉಲಯ್ಲೆಂ ನಾ.
ಆಪ್ಲ್ಯಾ ಬಾಪಯ್ ಲಾಗಿಂ ಆಲಿಯಾಚೊ ಆಯ್ಚೊ ವಿಶಯ್ ನಾಸಿರಾನ್ ಪೊನಾರ್ ಸಾಂಗ್ಲೊ ನಾ ಜಾಲ್ಯಾರ್ಯ್ ತ್ಯಾ ಕುಶಿನ್ ಪೊನಾಕ್ ಕಾನ್ ದೀವ್ನ್ ಆಯ್ಕೊಂವ್ಚ್ಯಾ ಸುಲೇಮಾನಾಕ್ ಪೊನಾ ವಯ್ಲ್ಯಾ ನಾಸಿರಾಚಾ ಉಲವ್ಣೆ ಮಧ್ಲಿಂ ಆಲಿಯಾಚಿಂ ಉತ್ರಾಂ ಆಯ್ಕಾತಾನಾ ಕಿತೆಂ ತರ್ಯ್ ಜಾಲಾಂ ಮ್ಹಳ್ಳೆಂ ಸುಲೇಮಾನಾಕ್ ಕಳಿತ್ ಜಾಲೆಂ.
ಬಾಪಾಯ್ ಲಾಗಿಂ ಉಲವ್ನ್ ಜಾವ್ನ್ ನಾಸಿರಾನ್ ಆತಾಂ ದುಸ್ರೆಂ ನಂಬರ್ ಡಯಲ್ ಕೆಲೆಂ.
ಆಲಿಯಾ ನಾಸಿರಾಕ್ಚ್ ಪಳೆತಾಲೆಂ.
"ಹಲೋ....!"
"........."
"ಮಾ ಆಲೇಕ್ಕುಮ್ ಸಲಾಮ್!"
"........."
"ಆಯ್ಕ್ ಅಮೀನಾ ತುಂ ಆತಾಂಚ್ ಮ್ಹಜ್ಯಾ ಘರಾ ಯೇಂವ್ಕ್ ಸಕ್ತಾಯ್?"
"........."
"ಆಮಿಂ ಹಾಂಗಾಚ್ ಉಲಯ್ಲ್ಯಾರ್ ಬರೆಂ!"
ನಾಸಿರಾಚ್ಯಾ ತೊಂಡಾ ಥಾವ್ನ್ ಅಮೀನಾಚೆಂ ನಾಂವ್ ಆಯ್ಕಾಲ್ಲೆಂಚ್ ಆಲಿಯಾ ಸಗ್ಳೆಂಚ್ ರಾಗಾಚಾ ಆವೇಶಾನ್ ಭರ್ಲೆಂ.
"ಸ್ಟಾಪಿಟ್ ನಾಸಿರ್!"
ಉದ್ವೇಗಾನ್ ಬೊಬಾಟ್ಲ್ಲ್ಯಾ ಆಲಿಯಾನ್ ನಾಸಿರಾಚಾ ಲಾಗಿಂ ಯೇವ್ನ್, ತಾಣೆಂ ಪೋನ್ ಧರ್ಲ್ಲ್ಯಾ ಹಾತಾಕ್ ಭಳಾನ್ ಧರುನ್ ವೊಡ್ಲೆಂ. ಅಚಾನಕ್ ಜಾಲ್ಲ್ಯಾ ಆಲಿಯಾಚಾ ಪ್ರತಿಕ್ರಿಯಾಕ್ ಲಾಗೊನ್ ನಾಸಿರಾಚೊ ಪೋನ್ ಧರ್ಲ್ಲೊ ಹಾತ್ ಆಲಿಯಾಚಾ ಭಳಾನ್ ಸಕಯ್ಲ್ ದೆಂವ್ತಾನಾ ತ್ಯಾ ತಾಚ್ಯಾ ಹಾತಾಂತ್ಲೆಂ ಟೆಲಿಪೋನ್ ಗಳೊನ್ ಧರ್ಣಿಕ್ ಪಡ್ಲೆಂ.
ಆಲಿಯಾ ರಾಗಾನ್ ಖರ್ಶೆತಾಲೆಂ.
ಏಕ್ ಘಡಿ ಆಲಿಯಾಕ್ಚ್ ರಾಗಾನ್ ಭರೊನ್ ಪಳೆಲ್ಲ್ಯಾ ನಾಸಿರಾನ್ ಆಪ್ಣಾಕ್ಚ್ ಸಮಾಧಾನ್ ಕರುನ್ ಮ್ಹಳ್ಳ್ಯಾಪರಿಂ ಟೆಲಿಪೋನ್ ವಿಂಚುಂಕ್ ತೊ ಬಾಗ್ವಾತಾನಾ ಆಲಿಯಾನ್ ’ಸಟ್ಟ್’ ಕರುನ್ ಬಾಗ್ವೊನ್ ತೆಂ ಪೋನ್ ವಿಂಚ್ಲೆಂ ಆನಿ ಆಪ್ಲ್ಯಾ ಹಾಂತಾಂತ್ ಘಟ್ ದಾಂಬುನ್ ಧರ್ಲೆಂ.
"ಆಲಿಯಾ ಪೋನ್ ದೀ...!" ನಾಸಿರ್ ಆಲಿಯಾಚಾ ಲಾಗಿಂ ಆಯ್ಲೊ.
"ಹ್ಯಾ ಘರಾಂತ್ ತಾಣೆಂ ಪಾಂಯ್ ದವರುಂಕ್ ನಜೊ ನಾಸಿರ್. ಶಿ ಇಸ್ ಎ ಬ್ಲಡಿ ಬಿಚ್!"
ನಾಸಿರ್ ಆಲಿಯಾಚಾ ಹಾತಾಂತ್ಲೆಂ ಪೊನ್ ಘೆಂವ್ಚ್ಯಾ ಖಾತಿರ್ ಆಲಿಯಾಕ್ ಲಾಗಿಂ ಲಾಗಿಂ ಜಾತಾನಾ ಆಲಿಯಾ ಪಾಟಿಂ ಪಾಟಿಂ ವೆತಾಲೆಂ.
"ಹೆಂ ಘರ್ ಮ್ಹಜೆಂ! ....ಹ್ಯಾ ಘರಾಂತ್ ಹಾಂವ್....!" ಖರ್ಶೆಂವ್ಚೆಂ ಆಲಿಯಾ ಆತಾಂ ಆಪ್ಲ್ಯಾ ಜಿಬೆರ್ ಉತ್ರಾಂ ಸೊಧುಂಕ್ ಲಾಗ್ಲೆಂ. ತಾಕಾ ಕಿತೆಂ ಉಲಂವ್ಚೆಂ ಕಿತೆಂ ಕರ್ಚೆಂ ತೆಂ ಕಾಂಯ್ ಸಮ್ಜಾಲೆಂ ನಾ.
"ಪೋನ್ ದೀ ಆಲಿಯಾ!"
"ನಾಸಿರ್... ಪ್ಲೀಸ್ ನಾಸಿರ್....!" ಆಲಿಯಾ ದೀನ್ಪಣಿ ರಡ್ಕುರ್ಯಾ ತಾಳ್ಯಾರ್ ಗಳ್ಳೆಂ. ಪಾಟಿಂ ಪಾಟಿಂ ಯೆಂವ್ಚೆಂ ತೆಂ ಪಾಟ್ಲ್ಯಾ ವೊಣೊದಿಕ್ ಆದ್ಳೊನ್ ರಾವ್ಲೆಂ.
"ಪೋನ್ ದೀ ಆಲಿಯಾ....!" ನಾಸಿರಾನ್ ಆಲಿಯಾಚಾ ಹಾತಾಕ್ ಭಳಾನ್ ದರುನ್ ತಾಕಾ ಹೆವ್ಶಿಂ ವೊಡ್ಲೆಂ.
ತಿತ್ಲೆಂಚ್!
’ಟಪ್ಪ್..!" ಆವಜ್ ಕರುನ್ ಟೆಲಿಪೋನ್ ಆಲಿಯಾಚಾ ಹಾತಾ ಥಾವ್ನ್ ಉಸ್ಳಾಲ್ಲೆಂ ತೆಂ ಮಾರ್ಬಲಾಚಾ ಫಾತ್ರಾ ವಯ್ಲ್ಯಾನ್ ಉಸ್ಳೊನ್ ತೆವ್ಶಿಂ ವಚೊನ್ ರಾವ್ಲೆಂ.
ಹೆಂ ಪಳೆಲ್ಲ್ಯಾ ನಾಸಿರಾನ್ ಆಪ್ಲ್ಯಾ ಬಾಯ್ಲೆಕ್ ಸೊಡುನ್ ವಚೊನ್ ಆಪ್ಲೆಂ ಪೋನ್ ವಿಂಚ್ಲೆಂ.
"ನಾಸಿರ್!" ವ್ಹಳೂ ಆಲಿಯಾ ತಶೆಂಚ್ ಹತಾಶ್ ಜಾವ್ನ್ ಧರ್ಣಿಕ್ ಗಳ್ಳೆಂ.
ಆಜ್ ಪ್ಲೈಟಾರ್ ರಾಶಿದಾಚಾ ಉತ್ರಾಂಕ್ ಉತಾರ್ ಪಾಟಿಂ ದಿತಾನಾ ಸಯ್ತ್ ಕಾಂಯ್ಚ್ ಭಿಯೆಂವ್ಕ್ ನಾತ್ಲೆಲೆಂ ಆಲಿಯಾ, ಆಪ್ಲ್ಯಾ ಘೊವಾನ್ ಆಪ್ಲ್ಯಾ ಘರಾಂತ್ ತಾಚ್ಯಾ ಬಾಪಾಯ್ಕ್ ಆನಿ ಅಮೀನಾಕ್ ಆಪಯಿಲ್ಲೆಂ ಕಳೊನ್ ಕೊಸ್ಳೊನ್ ಗೆಲ್ಲ್ಯಾ ಪರಿಂ ಜಾಲೆಂ. ಜರ್ತರ್ ನಾಸಿರಾಚಾ ಗರ್ಜೆಕ್ ಲಾಗೊನ್ ಹರ್ಶೆಂಚಾ ಪರಿಂ ತಿಂ ಯೇವ್ನ್ ಗೆಲ್ಲಿಂ ಜಾಲ್ಯಾರ್ ಬೋವ್ಶಾ ಆಲಿಯಾಕ್ ಥೊಡ್ಯಾ ಘಡಿಯಾಂಚೆಂ ನಾ ಸಮಾಧಾನ್ ಭೊಗೊನ್ ಉಪ್ರಾಂತ್ ತೆಂ ಆಪ್ಣಾಕ್ಚ್ ಸಮಾಧಾನ್ ಕರ್ತೆಂ. ಪುಣ್ ಆಜ್.....!
ಆಜ್ ಆಪ್ಣಾ ಥಾವ್ನ್ ಉಟ್ಲ್ಲ್ಯಾ ಸಮಸ್ಯಾಕ್ ಲಾಗೊನ್, ನಾಸಿರಾನ್ ದೊಗಾಂಯ್ಕ್ಯ್ ಆಲಿಯಾಚಾ ಘರಾ ಆಪಯಿಲ್ಲೆಂ. ಆಲಿಯಾಚೆಂ ನಾಸಿರಾ ಸಾಂಗಾತಾ ನಿಖಾ ಜಾಂವ್ಚ್ಯಾ ಪಯ್ಲೆಂ, ಅಮೀನಾ ನಾಸಿರಾಕ್ ಕಿತ್ಲೆಂ ಲಾಗಿಂ ಆಸ್ಲ್ಲೆಂ ತೆಂ ಆಲಿಯಾ ನೆಣಾಂ ತರ್ಯ್ ತಾಂಚೆಂ ನಿಖಾ ಜಾಲ್ಯಾ ಉಪ್ರಾಂತ್ ತಿಂ ಮಾಲ್ಗಡೆಂ ಘರ್ ಭಾಯ್ರ್ ಸರೊನ್ ಆಪ್ಲೆಂ ಮ್ಹಳ್ಳೆಂ ಬಿಡಾರ್ ಕೆಲ್ಯಾ ಉಪ್ರಾಂತ್ ಅಮೀನಾ ನಾಸಿರಾಕ್ ಚಡ್ ಲಾಗಿಂ ಜಾಲ್ಲೆಂ.
ಎಕಾ ವಾಟೆನ್ ಅಮೀನಾ ನಾಸಿರಾಚ್ಯಾ ಕುಟ್ಮಾ ಸಂಭಂಧಾಂತ್ಲೆಂ ತರ್ ದುಸ್ರ್ಯಾ ವಾಟೆನ್ ಆತಾಂ ನಾಸಿರಾನ್ ಆಪ್ಣಾಚೆಂ ಬಿಜ್ನೆಸ್ ಖುದ್ದ್ ಜಾವ್ನ್ ಚಲವ್ನ್ ವರುಂಕ್ ಆರಂಭ್ ಕೆಲ್ಯಾ ಉಪ್ರಾಂತ್ ನಾಸಿರಾಕ್ ಅಮೀನಾ ಲಾಯರ್ ಜಾಲ್ಲೆಂ. ನಾಸಿರಾಚಾ ಬಿಜ್ನೆಸಾಚಿಂ ಸಗ್ಳಿಂ ಲೀಗಲ್ ಕಾಮಾಂ ತೆಂ ಪಳಯ್ತಾಲೆಂ.
ಆಪ್ಣಾಚಾ ಘೊವಾನ್ ಆಪ್ಣಾಚೆಂ ಕಾಂಯ್ಚ್ ಆಯ್ಕಾಲೆಂ ನಾ ತೆಂ ಕಳೊನ್ ಆಪ್ಣಾಕ್ಚ್ ಸಮಾಧಾನ್ ಕೆಲ್ಲೆಂ ಆಲಿಯಾ ಆತಾಂ ಭಾಯ್ರ್ ಸಾಲಾಕ್ ಆಯಿಲ್ಲೆಂ ತೆಂ ಸೊಫಾಚೆರ್ ಬಸ್ಲೆಂ. ತಾಚ್ಯಾ ಮತಿಕ್ ಕಾಂಯ್ಚ್ ಗೆಲೆಂ ನಾ.
ಬಸ್ಲೆಲ್ಯಾ ಕಡೆಚ್ ಆಪ್ಲ್ಯಾ ದೋನ್ಯ್ ಹಾತಾಂನಿ ಆಪ್ಲ್ಯಾ ಮುಖಮಳಾಕ್ ದಾಂಪುನ್ ತೆಂ ತಶೆಂಚ್ ರಾವ್ಲೆಂ. ದುಸ್ರ್ಯಾ ಕುಶಿನ್ ನಾಸಿರ್ ಆಪ್ಲ್ಯಾ ಬಾಪಾಯ್ಕ್ ಅನಿ ಅಮೀನಾಕ್ ರಾಕೊನ್ ಬಸ್ಲ್ಲೊ.
ತಿತ್ಲ್ಯಾರ್, ಎಕಾಚ್ಚ್ ಫರಾ ಕಿತೆಂಗೀ ಚಿಂತ್ಲ್ಲ್ಯಾ ಪರಿಂ ಜಾವ್ನ್ ಸೊಫಾ ವಯ್ಲೆಂ ಉಟ್ಲ್ಲೆಂ ಆಲಿಯಾ ಭಿತರ್ ಗೆಲ್ಲೆಂಚ್ ಆಪ್ಲ್ಯಾ ವ್ಯಾನಿಟಿ ಬ್ಯಾಗಾಂತ್ಲೆಂ ಸೆಲ್ಪೋನ್ ಕಾಡುನ್ ತೆಂ ಭಂಧ್ ಆಸ್ಲ್ಲೆಂ ಪಳವ್ನ್ ತೆಂ ತಾಣೆಂ ಆನ್ ಕೆಲೆಂ.
ಸೆಲ್ಪೋನ್ ಆನ್ ಕರುನ್ ಏಕ್ ಮಿನುಟ್ಯ್ ಜಾಂವ್ಕ್ ನಾ. ತೆಂ ವ್ಹಾಜೊಂಕ್ ಲಾಗ್ಲೆಂ. ಜಶೆಂ ಸುಮಾರ್ ವೆಳಾ ಥಾವ್ನ್ ಕೋಣ್ ತರ್ಯ್ ಆಪ್ಣಾಲಾಗಿಂ ಉಲಂವ್ಕ್ ಆಶೆತಾ ಮ್ಹಳ್ಳ್ಯಾ ಪರಿಂ!
"ಅಭಿಲಾಶ!" ಮನಾಂತ್ಚ್ ಉದ್ಗಾರ್ಲೆಂ ಆಲಿಯಾ.
ತಿತ್ಲೆಂಚ್!
ಆಲಿಯಾನ್ ಆತಾಂ ವೇಳ್ ಕಾಡ್ಲೊ ನಾ. ತಾಣೆಂ ಪೋನ್ ಆನ್ ಕೆಲೆಂ.
"ಹಾಂ ಅಭಿಲಾಶಾ.... ಸಾಂಗ್!"
"ಕಿತೆಂ ಕರ್ತಾಲೆಂಯ್ ತುಂ? ತುಜೆಂ ಪೋನ್ ಭಂಧ್ ಆಸ್ಲ್ಲೆಂ. ಕಾಂಯ್ ಪ್ರಾಬ್ಲೆಮ್....?" ಅಭಿಲಾಶಚ್ಯಾ ತಾಳ್ಯಾಂತ್ ಉತ್ಸುಕಾಯ್ ಭರ್ಲೆಲಿ ಭಿರಾಂತ್ ಸ್ಪಶ್ಟ್ ಉಟೊನ್ ದಿಸ್ತಾಲಿ.
"ನಾ ಕಾಂಯ್ ನಾ!"
"ಶೂವರ್....?"
"ಹಾಂ!"
"ಪಳೆ...! ಕಾಂಯ್ ಪ್ರಾಬ್ಲೆಮ್ ಆಸ್ಲ್ಯಾರ್ ಮ್ಹಾಕಾ ಪೋನ್ ಕರ್ ಹಾಂ!" ಅಭಿಲಾಶ ಉಡಾಸ್ ಕರುಂಕ್ ವಿಸ್ರಾಲೆಂ ನಾ.
"ಹಾಂ.... ಜಾಯ್ತ್!"
"ಬಾಯ್...!"
ಅಭಿಲಾಶನ್ ಪೋನ್ ಭಂಧ್ ಕರ್ತಾನಾ ಹ್ಯಾ ಕುಶಿನ್ ಆಲಿಯಾನ್ ಪೋನ್ ಕಾನಾ ಥಾವ್ನ್ ಸಕಯ್ಲ್ ಗಳಯ್ಲೆಂ.
ಆಯ್ಚೆಂ ಘಡಿತ್ ಆಲಿಯಾನ್ ಚಿಂತ್ಲ್ಲ್ಯಾ ತಿತ್ಲೆಂ ಲ್ಹಾನ್ ನ್ಹಯ್ ಆಸ್ಲ್ಲೆಂ. ಘಡಿಯೆನ್ ಘಡಿ ತೆಂ ಘಡಿತ್ ತಾಚ್ಯಾ ಘಡ್ಣೆಚಿಂ ಪಾಳಾಂ ಆಲಿಯಾಚಾ ಜಿವಿತಾಂತ್ ರೊಂಬಯಿತ್ತ್ ಘಟ್ ಜಾವ್ನ್ ವೆತಾಲೆಂ. ಆಲಿಯಾಕ್ ಹ್ಯಾ ವಿಶಿಂ ಕಾಂಯ್ ಭಿರಾಂತ್ ನಾತ್ಲ್ಲಿ ಜಾಲ್ಯಾರ್ಯ್ ನಾಸಿರ್ ಮಾತ್ರ್ ಹ್ಯಾ ಭೂಗತ್ ಸಂಸಾರಾಂತ್ಲ್ಯಾ ಮನ್ಶ್ಯಾಂಚಿಂ ಕರ್ತುಬಾಂ ಆಯ್ಕೊನ್ ಜಾಣಾಂ ಆಸ್ಲ್ಲೊ ಜಾಲ್ಲ್ಯಾನ್ ಹ್ಯಾ ಘಡಿತಾಚೆಂ ಪರಿಣಾಮ್ ತಾಚ್ಯಾ ಜಿವಿತಾಂತ್ ಕಿತೆಂ ಕರುಂಕ್ ಪಾವಾತ್ ತೆಂ ಚಿಂತುನ್ ತೊ ಭಿಯೆಲ್ಲೊ.
ಭಾಯ್ಲ್ಯಾ ಸೊಫಾಚೆರ್ ಬಸೊನ್ ಚಿಂತ್ಚ್ಯಾರ್ ಪಡ್ಲ್ಲ್ಯಾ ನಾಸಿರಾಚಾ ದೊಳ್ಯಾಂ ಮುಕಾರ್ ಥೊಡ್ಯಾ ವೆಳಾ ಪಯ್ಲೆಂ ಆಯಿಲ್ಲ್ಯಾ ಪೊನಾ ವಯ್ಲೆಂ ಉಲೊಣೆಂಚ್ ತಾಚ್ಯಾ ಕಾನಾಂತ್ ಪರ್ತ್ಯಾಕ್ ಆಯ್ಕೊಂಕ್ ಲಾಗ್ಲೆಂ. ತ್ಯಾ ಪೊನಾ ವಯ್ರ್ ತಾಣೆಂ ಆಯ್ಕಾಲ್ಲಿ ಧಮ್ಕಿ ಆತಾಂಯ್ ತಾಚ್ಯಾ ಕಾನಾಂತ್ ಆಯ್ಕೊನ್ ಯೆತಾಲಿ.
ತಿಂಚ್ ಕರ್ಕಸ್ ಉತ್ರಾಂ.....!
ನಾಸಿರ್ ಆಪ್ಣಾಕ್ ಆಚಾನಕ್ ಜಾಲ್ಲ್ಯಾ ಧಖ್ಯಾ ಥಾವ್ನ್ ಭಾಯ್ರ್ ಯೇಂವ್ಕ್ ಉಡ್ಡಾತಾನಾ, ಭಿತರ್ಲ್ಯಾ ನಿದ್ಚ್ಯಾ ಕುಡಾಂತ್ ಖಾಟಿಯೆರ್ ಬಸ್ಲೆಲೆಂ ಆಲಿಯಾ ಮುಕಾರ್ ಯೇಂವ್ಕ್ ಆಯ್ತಿ ಜಾಲ್ಲ್ಯಾ ಪರಿಸ್ಥಿತಿಚ್ಯಾ ಸಾಂಗಾತಾ ಜಗ್ಡೊಂಕ್ ಆಯ್ತೆಂ ಜಾತಾಲೆಂ.
ಆಪ್ಲ್ಯಾ ಚಲಿಯೆಪಣಾಚೊ ಮಾನ್ ರಾಕೊಂಕ್, ಆಲಿಯಾನ್ ತ್ಯಾ ಪ್ಲೈಟಾರ್ ಕೆಲ್ಲೆಂ ಝಗ್ಡೆಂ ಇತ್ಲೆಂಯ್ ಮುಕಾರ್ ಪಾವಾತ್ ಮ್ಹಳ್ಳ್ಯಾ ವಿಶಿಂ ಆಲಿಯಾನ್ ಚಿಂತುಂಕ್ ನಾತ್ಲ್ಲೆಂ ತರ್ಯ್ ತೆಂ ಪರಿಸ್ಥಿತೆ ಮುಕಾರ್ ಕೆದ್ನಾಂಚ್ ಭಿಯೆಲ್ಲೆಂ ಚಲಿ ನ್ಹಯ್! ಪುಣ್ ಆಪ್ಲ್ಯಾ ಆನಿ ನಾಸಿರಾಚಾ ಸಂಭಂಧಾ ಮಧೆಂ ಭಾಯ್ಲೊ ಯಾ ಭಾಯ್ಲೆಂ ಕೋಣ್ಯ್ ಮೆತೆರ್ ಜಾತಾ ತೆಂ ಕಳೊನ್ ಆಲಿಯಾಚಾ ಮತಿಕ್ ಮೊಡಾಂನಿ ವೆಡೊ ಮಾರ್ಲ್ಲೊ. ಆಪ್ಲ್ಯಾ ಘೊವಾನ್ ಹ್ಯಾ ರಾತಿಚ್ಯಾ ವಗ್ತಾರ್ ಹಾಂಗಾಸರ್ ಘರಾಲಾಗಿಂ ತಾಂಕಾಂ ಆಪಯಿಲ್ಲೆಂ ಆಲಿಯಾಕ್ ಸೊಸುಂಕ್ ಜಾಯ್ನಾತ್ಲ್ಲೊ ವಿಶಯ್ ಜಾಲ್ಲೊ.
ಆಲಿಯಾನ್ ಆತಾಂ ಆಪ್ಣಾಕ್ಚ್ ಆಪ್ಲ್ಯಾ ಮುಕ್ಲ್ಯಾ ವಾಟೆರ್ ಚಲೊಂಕ್ ಧಯ್ರ್ ಎಕ್ಟಾಂಯ್ ಕೆಲೆಂ.
**********
ಏಕ್ ಧವ್ಯಾ ರಂಗಾಚೆಂ ಮಾರುತಿ ಕಾರ್, ಸಗ್ಳೆಂಚ್ ಕಾಳ್ಯಾ ಆರ್ಶ್ಯಾಂನಿ ಭಂಧ್ ಆಸ್ಲ್ಲೆಂ ತೆಂ ವ್ಹಡ್ಲ್ಯಾ ರಸ್ತ್ಯಾಕ್ ಸೊಡುನ್ ಸವ್ಕಾಸ್ ಭಿತರ್ ಆಯಿಲ್ಲೆಂ ತೆಂ ನಾಸಿರಾಚಾ ಆಪಾರ್ಟ್ಮೆಂಟಾ ಮುಕಾರ್ ಯೇವ್ನ್ ರಾವ್ಲೆಂ.
ಅಪರಿಚಿತ್ ಕಾರಾಕ್ ಪಳೆಲ್ಲೊ ಗೂರ್ಖಾ,ತ್ಯಾ ಕಾರಾ ಥಾವ್ನ್ ಕೊಣ್ಯ್ ದೆಂವಾನಾಂತ್ ತೆಂ ಪಳವ್ನ್ ಕಸಲ್ಯಾಗೀ ದುಬಾವಾನ್ ಮ್ಹಳ್ಳ್ಯಾಪರಿಂ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟ್ಲ್ಲೊ ತೊ ಆಪ್ಲ್ಯಾ ಪೆಂಕ್ಡಾ ಥಾವ್ನ್ ಸಕಯ್ಲ್ ಗಳ್ಲ್ಲ್ಯಾ ಯೂನಿಫಾರಮ್ ಪ್ಯಾಂಟಾಕ್ ವಯ್ರ್ ಕರುನ್, ಆಪ್ಲ್ಯಾ ದೊಳ್ಯಾಂ ಸಾಮ್ಕಾರ್ ಯೇವ್ನ್ ರಾವ್ಲೆಲ್ಯಾ ಕಾರಾ ತೆವ್ಶಿಂ ಮೆಟಾಂ ಕಾಡಿಲಾಗ್ಲೊ.
ಗೂರ್ಖಾನ್ ಕಾರಾ ತೆವ್ಶಿಂ ದೋನ್ ಮೆಟಾಂ ಕಾಡ್ಲ್ಯಾಂತ್ ಮಾತ್ರ್!
ತಿತ್ಲ್ಯಾರ್!
ಆಪಾರ್ಟ್ಮೆಂಟಾಚಾ ಪಾರ್ಕಿಂಗಾಚೆರ್ ಜಳೊನ್ ಆಸ್ಲೆಲ್ಯಾ ಸ್ಪಾಟ್ಲೈಟಾಚಾ ಉಜ್ವಾಡಾಂತ್ ಕಾರಾಚೆಂ ದಾರ್ ಉಗ್ತೆಂ ಕರುನ್ ಕಾರಾ ಥಾವ್ನ್ ಏಕ್ ವ್ಯಕ್ತಿ ಸಕಯ್ಲ್ ದೆಂವ್ಲ್ಲಿ ತಿ ಗೂರ್ಖಾಕ್ ದಿಸ್ಲಿ. ಕಾರಾ ಥಾವ್ನ್ ಸಕಯ್ಲ್ ದೆಂವ್ಲೆಲಿ ವ್ಯಕ್ತಿ ಆಪ್ಣಾ ತೆವ್ಶಿಂ ಚಲೊನ್ ಯೆತಾ ತೆಂ ಕಳ್ಲ್ಲೆಂಚ್ ಗೂರ್ಖಾ ಥಂಯ್ಚ್ ರಾವ್ಲೊ. ಪಯ್ಸ್ ಥಾವ್ನ್ಚ್ ತಾಣೆಂ ತ್ಯಾ ಕಾರಾ ಥಾವ್ನ್ ದೆಂವ್ಲೆಲ್ಯಾ ವ್ಯಕ್ತಿಕ್ ಪಳೆಲೆಂ. ತ್ಯಾ ವ್ಯಕ್ತಿಕ್ ಹಾಚ್ಯಾ ಆದಿಂ ಖಂಯ್ಚರ್ಯ್ ಪಳೆಲ್ಲೊ ಉಡಾಸ್ ಗೂರ್ಖಾಕ್ ಆಯ್ಲೊ ನಾ.
ತಿತ್ಲ್ಯಾರ್!
ಏಕ್ ನವೆಂಚ್ ಟಾಟಾ ಇಂಡಿಕಾ ಕಾರ್ ಯೇವ್ನ್ ತ್ಯಾ ಮಾರುತಿ ಕಾರಾಚಾ ಪಾಟ್ಲ್ಯಾನ್ ರಾವ್ಲೆಂ. ತಾಚ್ಯಾ ವಾಟೆರ್ ಹೆಂ ಪಯ್ಲೆಂ ಆಯಿಲ್ಲೆಂ ಮಾರುತಿ ಕಾರ್ ಉಭೆಂ ಆಸ್ಲ್ಲೆಂ ಆಸ್ತಾಂ, ತಾಕಾ ಮುಕಾರ್ ವಚೊಂಕ್ ವಾಟ್ ನಾತ್ಲೆಲಿ.
ಮಾರುತಿ ಕಾರಾ ಥಾವ್ನ್ ದೆಂವ್ಲ್ಲೊ ವ್ಯಕ್ತಿ, ಗೂರ್ಖಾಚಾ ಲಾಗಿಂ ಪಾವ್ಲ್ಲೊ ತೊ ಗೂರ್ಖಾ ಲಾಗಿಂ ತಾಕಾ ಉಲಂವ್ಕ್ ಜಾಯ್ ಜಾಲ್ಲೆಂ ಉಲವ್ನ್ ಗೂರ್ಖಾಕ್ ಕಾರಾ ತೆವ್ಶಿಂ ಆಪವ್ನ್ ಹಾಡುನ್ ಆಯ್ಲೊ. ಗೂರ್ಖಾಚಾ ತೊಂಡಾಚೊ ಛಾರೊ ಆತಾಂ ಸಂಪೂರ್ಣ್ ಭಿರಾಂತೆನ್ ಭರ್ಲ್ಲೊ.
ಗೂರ್ಖಾ ಕಾರಾಚಾ ಲಾಗಿಂ ಯೆತಾನಾ ಕಾರಾಚೊ ಕಾಳೊ ಆರ್ಸೊ ಸವ್ಕಾಸ್ ಸಕಯ್ಲ್ ದೆಂವೊಂಕ್ ಲಾಗ್ಲೊ. ಆರ್ಸ್ಯಾ ಭಿತರ್ ಥಾವ್ನ್ ಎಕಾ ವ್ಯಕ್ತಿನ್ ಗೂರ್ಖಾಲಾಗಿಂ ಥೊಡೆಂ ಉಲವ್ನ್ ಜಾತಾನಾ ಗೂರ್ಖಾ ತಕ್ಲಿ ಹಾಲವ್ನ್ ದೆಗೆನ್ ರಾವ್ಲೊ. ಆತಾಂ ತೆಂ ಮಾರುತಿ ಕಾರ್ ಭಿತರ್ ಆಯಿಲ್ಲೆಂ ತೆಂ ಪಾರ್ಕಿಂಗಾಕ್ ವಚಾನಾಸ್ತಾನಾ ಲಿಫ್ಟಾಚಾ ಲಾಗಿಂಚ್ ರಾವ್ಲೆಂ.
ಲಿಫ್ಟಾಚಾ ಲಾಗಿಂ ರಾವ್ಲೆಲ್ಯಾ ಕಾರಾ ಥಾವ್ನ್ ಚಾರ್ ಜಣ್ ಪಟಾಪಟ್ ದೆಂವ್ಲ್ಲೆ ತೆ ಲಿಫ್ಟಾಚಾ ಮುಕಾರ್ ಚಮ್ಕಾಲ್ಲೆಚ್ ಉಗ್ತೆಂ ಜಾಲ್ಲ್ಯಾ ಲಿಫ್ಟಾಚಾ ದಾರಾ ಭಿತರ್ ತೆ ರಿಗ್ಲೆ.
ಆತಾಂ ಸವ್ಕಾಸ್ ಭಿತರ್ ಆಯಿಲ್ಲೆಂ ಟಾಟಾ ಇಂಡಿಕಾ ಕಾರ್ ಪಾರ್ಕಿಂಗಾರ್ ರಾವೊನ್ ತಾಚೆ ಹೆಡ್ಲೈಟ್ ಆಫ್ ಜಾತಾನಾ ತ್ಯಾ ಕಾರಾಚೆಂ ದಾರ್ ಉಗ್ತೆಂ ಕರುನ್ ಅಮೀನಾ ಭಾಯ್ರ್ ಆಯ್ಲೆಂ.
ಚವ್ತ್ಯಾ ಮಾಳಿಯೆರ್ ಲಿಫ್ಟ್ ಯೇವ್ನ್ ರಾವ್ತಾನಾ, ಉಗ್ತೆಂ ಜಾಲ್ಲ್ಯಾ ದಾರಾ ಮುಕಾಂತ್ರ್ ತೆ ಚಾರ್ಯ್ ಜಣ್ ಲಿಫ್ಟಾ ಥಾವ್ನ್ ಭಾಯ್ರ್ ಯೇವ್ನ್ ಹೆವ್ಶಿಂ ತೆವ್ಶಿಂ ಪಳವ್ನ್ ಕಾಂಯ್ ಭಿರಾಂತ್ ನಾ ತಿ ಖಾತ್ರಿ ಕೆಲ್ಲಿಚ್, ತಾಂಚೆ ಪಯ್ಕಿ ಎಕ್ಲ್ಯಾನ್ ಹಾತಾನ್ಚ್ ದೊಗಾಂ ವ್ಯಕ್ತಿಂಕ್ ಸಂಜ್ಞಾ ಕೆಲಿ.
ತಿತ್ಲ್ಯಾರ್, ಎಕ್ಲ್ಯಾನ್ ಲಿಫ್ಟಾಚಾ ಸ್ಟಾಪ್ ಸ್ವಿಚ್ಚಾಕ್ ಟೂತ್ ಪಿಕ್ಕ್ ರಿಗವ್ನ್ ತೊ ಸ್ವಿಚ್ಚ್ ದಾಂಬುನ್ ರಾವಯ್ಲೊ ಆನಿ ಲಿಫ್ಟ್ ಸ್ತಬ್ದ್ ಜಾಲಿ.
ತಿತ್ಲೆಂಚ್!
ತಾಂಕಾ ಗರ್ಜ್ ಆಸ್ಲ್ಲ್ಯಾ ಆಪಾರ್ಟ್ಮೆಂಟಾಚ್ಯಾ ದಾರಾಚಿ ಕಾಂಪಿಣ್ ತಾಣಿಂ ಮಾರ್ಲಿ. ದೋಗ್ ಜಣ್ ಮಾತ್ರ್ ದಾರಾ ಮುಕಾರ್ ರಾವೊನ್ ದೋಗ್ ಲಿಫ್ಟಾ ಭಿತರ್ ಘುಸ್ಲ್ಲೆ.
ಕೋಣ್? ಕಿತೆಂ? ಕಾಂಯ್ಚ್ ವಿಚಾರಿನಾಸ್ತಾನಾ ಭಿತರ್ ಥಾವ್ನ್ ’ಟಕ್ಕ್’ ಕರುನ್ ದಾರಾಚಿ ಖಿಳ್ ಕಾಡ್ಲ್ಲೊ ಆವಾಜ್! ದಾರಾ ಮುಕಾರ್ ರಾವ್ಲ್ಲೆ ದೊಗೀ ವ್ಯಕ್ತಿ ಆತಾಂ ಜಾಗ್ರುತ್ ಜಾಲೆ.
ತಿತ್ಲ್ಯಾರ್!
ಮುಕ್ಲ್ಯಾ ದಾರಾಚ್ಯಾ ಕಾಂಪಿಣೆಚೊ ಆವಾಜ್ ಆಯ್ಕೊನ್ ಆಪ್ಣಾಚೊ ಬಾಪಯ್ ಯಾ ಅಮೀನಾ ಆಯ್ಲಾಂ ಆಸ್ತೆಲೆಂ ಮ್ಹಣೊನ್ ಸಮ್ಜಾಲ್ಲ್ಯಾ ನಾಸಿರಾನ್ ಕಾಂಯ್ಚ್ ಪಾಟಿಂ ಫುಡೆಂ ಚಿಂತಿನಾಸ್ತಾನಾ ದಾರ್ ಉಗ್ತೆಂ ಕೆಲೆಂ.
ತಿತ್ಲೆಂಚ್!
’ಸಟ್ಟ್’ ಕರುನ್ ಘರಾ ಭಿತರ್ ಘುಸ್ಲೆಲ್ಯಾ ದೊಗಾಂ ಅಪಾರಿಚಿತಾಂಕ್ ಪಳವ್ನ್ ನಾಸಿರ್ ಆಜಾಪ್ ಜಾಲೊ.
"ಕೋಣ್? ಕೊ.....ಕೋ....ಕೋಣ್ ತುಮಿಂ?"
ನಾಸಿರಾನ್ ಕಾಲುಬುಲು ಜಾವ್ನ್ ಸವಾಲ್ ಉಡಯ್ತಾನಾ ಘರಾ ಭಿತರ್ ಆಯಿಲ್ಲ್ಯಾ ವ್ಯಕ್ತಿ ಪಯ್ಕಿ ಎಕ್ಲ್ಯಾನ್ ’ಟಪ್ಪ್’ ಕರುನ್ ಹಳ್ವಾಯೆರ್ ದಾರ್ ದಾಂಪ್ಲೆಂ.
ಘರಾ ಭಿತರ್ ಪ್ರವೇಶ್ ಜಾಲ್ಲೆ ದೊಗ್ಯ್ ಪಳಂವ್ಕ್ ದಡಂಗ್ ಜಿವಾಚೆ ಜಾಲ್ಯಾರ್ಯ್, ತಾಂಚಾ ತೊಂಡಾರ್ ಸಾದೆಂಪಣ್ ಸಾರ್ಕೆಂ ಉಟೊನ್ ದಿಸ್ತಾಲೆಂ. ತರ್ಯ್ ಆಚಾನಕ್ ಆಪ್ಲ್ಯಾ ಘರಾ ಭಿತರ್ ರಿಗೊನ್ ದಾರ್ ದಾಂಪ್ಲೆಲ್ಯಾ ಹಾಂಚಾ ಮತ್ಲಾಬಾಕ್ ನಾಸಿರ್ ಸಮ್ಜೊಂಕ್ ಸಕ್ಲೊ ನಾ. ಭಿಯೆಲ್ಲ್ಯಾ ಮತಿನ್ ಕಾಂಯ್ಚ್ ಪಾಟಿಂ ಫುಡೆಂ ಪಳಯ್ನಾಸ್ತಾನಾ ದಾರ್ ಉಗ್ತೆಂ ಕೆಲ್ಲಿ ಆಪ್ಲಿ ವ್ಹಡ್ಲಿ ಚೂಕ್ ಜಾಲಿ ಮ್ಹಣೊನ್ ನಾಸಿರಾಕ್ ಆತಾಂ ಕಳ್ಳೆಂ.
"ಬಸ್!"
ಎಕಾ ವ್ಯಕ್ತಿನ್ ನಾಸಿರಾಕ್ ಸಾಂಗ್ಲೆಂ.
ಆಪ್ಲ್ಯಾ ಘರಾ ಅಪರಿಚಿತ್ ಜಾವ್ನ್ ಆಯಿಲ್ಲೆ ಹೆ ಆಪ್ಲ್ಯಾ ಘರಾ ಆಪ್ಣಾಕ್ಚ್ ಬಸೊಂಕ್ ಸಾಂಗ್ತಾತ್ ತೆಂ ಕಳೊನ್,
"ಕೋಣ್ ತುಮಿಂ? ಜಸ್ಟ್ ಗೆಟ್ ಔಟ್.....!" ನಾಸಿರಾಚೊ ತಾಳೊ ಕಾಂಪ್ತಾಲೊ.
ನಾಸಿರಾಚಿಂ ಉತ್ರಾಂ ಆಪ್ಲ್ಯಾ ಕಾನಾಂಕ್ ಆಯ್ಕೊಂಕ್ ನಾಂತ್ ಮ್ಹಳ್ಳ್ಯಾಪರಿಂ ವರ್ತನ್ ಕೆಲ್ಲ್ಯಾ ತ್ಯಾ ದೊಗಾಂಯ್ನಿ ಮುಕಾರ್ ಮೆಟಾಂ ಕಾಡ್ಲಿಂ.
"ಬಸ್!"
ಶಾಂತ್ ತಾಳ್ಯಾನ್ ತಾಂಚೆ ಪಯ್ಕಿ ಎಕ್ಲ್ಯಾನ್ ಪರ್ತ್ಯಾಕ್ ನಾಸಿರಾಕ್ ಬಸೊಂಕ್ ಸಾಂಗ್ಲೆಂ. ತಾಚ್ಯೆ ಸವೆಂ ತಾಣೆಂ ಎದೊಳ್ಚ್ ನಾಸಿರಾಚಾ ಘರಾಚಾ ಸಾಲಾಚೆಂ ವೀಕ್ಷಣ್ ಕರುನ್ ಜಾಲ್ಲೆಂ. ತಾಂಕಾ ಹಾಂಗಾ ಕಸಲೊಯ್ ಆಪಾಯ್ ನಾ ಮ್ಹಳ್ಳ್ಯಾಚಿ ತಾಂಕಾ ಖಾತ್ರಿ ಜಾಲ್ಲಿ.
"ತುಮಿ ಕೋಣ್...? ಹಾಂವ್ ಪೊಲಿಸಾಂಕ್ ಆಪಯ್ತಾಂ!" ಭಿಯೆಲ್ಲ್ಯಾ ನಾಸಿರಾನ್ ಆಪ್ಲ್ಯಾ ಬೊಲ್ಸಾಂತ್ಲೆಂ ಪೋನ್ ಭಾಯ್ರ್ ಕಾಡ್ಲೆಂ.
"ಅರೇ ಯಾರ್! ಧರುನ್ ಬಸಯ್ ತಾಕಾ ಥಂಯ್! ಬೆಶ್ಟೆಂಚ್ ಬಕ್ ಬಕ್ ಕರ್ತಾ!" ಉಲಯಿಲ್ಲೊ ಎಕ್ಲೊ ತ್ಯಾ ಸಾಲಾಂತ್ಲ್ಯಾ ಸೊಫಾಚೆರ್ ಬಸ್ಲೊ.
ಪಯ್ಲೆಂ ಉಲಯಿಲ್ಲ್ಯಾ ವ್ಯಕ್ತಿಚಾ ತೊಂಡಾ ವಯ್ಲೆಂ ಸಾದೆಂಪಣ್ ಎಕಾನ್ ಏಕ್ ಮಾಯಾಗ್ ತ್ಯಾ ತಾಚ್ಯಾ ತೊಂಡಾರ್ ಆತಾಂ ಧಾರುಣಾಯ್ ಉದೆವ್ನ್ ಆಯ್ಲಿ.
ತಾಚ್ಯೆ ಪಾಟ್ಲ್ಯಾನ್....!
"ಚಲ್ ಬಸ್!" ತ್ಯಾ ದುಸ್ರ್ಯಾ ವ್ಯಕ್ತಿನ್ ಆತಾಂ ನಾಸಿರಾಕ್ ಧರುನ್ ಮುಕಾರ್ ಲೊಟ್ತಾನಾ ನಾಸಿರ್ ರಾಗಾನ್ ಹುಳ್ವುಳೊನ್ ಹೆಂವ್ಶಿ ಆಯ್ಲೊ.
ತಿತ್ಲ್ಯಾರ್!
ಭಾಯ್ಲ್ಯಾ ಸಾಲಾಂತ್ ವ್ಹಾಜ್ಲೆಲ್ಯಾ ದಾರಾಚಾ ಕಾಂಪಿಣೆಚೊ ಆವಾಜ್ ಆಯ್ಕೊನ್ ನಾಸಿರಾಚೊ ಬಾಪಯ್ ಯಾ ಅಮೀನಾ ಆಯ್ಲಾಂ ಜಾಯ್ಜಯ್ ಮ್ಹಣೊನ್ ಚಿಂತುನ್ ಆಪ್ಲ್ಯಾ ಖಾಟಿಯೆರ್ ತೆವ್ಶಿಂ ಲೊಳೊನ್ ಆಡ್ ಪಡ್ಲ್ಲ್ಯಾ ಆಲಿಯಾಕ್ ಥೊಡ್ಯಾ ವೆಳಾನ್ ಭಾಯ್ರ್ ಥಾವ್ನ್ ತಾಚ್ಯಾ ಮಾಂವಾಂಚೊ ಜಾಂವ್ದಿ ವಾ ಅಮೀನಾಚೊ ಜಾಂವ್ದಿ ತಾಳೊ ಆಯ್ಕೊನ್ ಯೇನಾಸ್ತಾನಾ ಭಾಯ್ರ್ ಕೊಣಾಚೊ ದುಸ್ರ್ಯಾಂಚೊ ತಾಳೊ ಆಯ್ಕೊನ್ ಯೇವ್ನ್, ಭಾಯ್ರ್ ಕಿತೆಂಗೀ ದುಸ್ರೆಂಚ್ ಚಲ್ತಾ ತೆಂ ಕಳೊನ್ ಯೇವ್ನ್ ’ಸಟ್ಟ್’ ಕರುನ್ ತೆಂ ಖಾಟಿಯೆರ್ ಥಾವ್ನ್ ಉಟ್ಲೆಂ.
"ಸೊಡ್! ಸೊಡ್ ತಾಕಾ! ಆತಾಂ ತೊಚ್ಚ್ ಖುದ್ದ್ ಬಸ್ತಲೊ!"
ನಾಸಿರ್ ಸೊಫಾಚೆರ್ ಬಸೊಂಕ್ ಕಬೂಲ್ ಜಾಂವ್ಕ್ ನಾತ್ಲಲೊ ಪಳವ್ನ್ ಪಯ್ಲೆಂಚ್ ಸೊಫಾಚೆರ್ ಬಸ್ಲೆಲ್ಯಾ ವ್ಯಕ್ತಿನ್ ಹಾಸೊನ್ಶೆಂ ಸಾಂಗ್ಲೆಂ. ತಾಚ್ಯಾ ಪಾಟ್ಲ್ಯಾನ್ ಆಪ್ಲ್ಯಾ ಶರ್ಟಾ ಭಿತರ್ ಹಾತ್ ಘಾಲ್ಲ್ಯಾ ತ್ಯಾ ವ್ಯಕ್ತಿನ್ ಆಪ್ಲ್ಯಾ ಪ್ಯಾಂಟಾಕ್ ಖೊವವ್ನ್ ದವರ್ಲ್ಲ್ಯಾ ಕಾಳ್ಯಾ ರಂಗಾನ್ ಮಿರ್ಮಿರ್ಚ್ಯಾ ಏರ್ಗನ್ನಾಕ್ ಭಾಯ್ರ್ ಕಾಡ್ಲೆಂ.
ತಿತ್ಲೆಂಚ್!
ಏರ್ಗನ್ನಾಕ್ ಪಳೆಲ್ಲ್ಯಾ ನಾಸಿರಾಚ್ಯಾ ತಾಳ್ಯಾಚಿ ಶೆಳ್ ಸುಕೊನ್ ಗೆಲಿ. ತೊ ಸಗ್ಳೊಚ್ ಕಾಂಪೊಂಕ್ ಲಾಗ್ಲೊ.
ಆತಾಂ ತ್ಯಾ ವ್ಯಕ್ತಿನ್ ಉಲಂವ್ಚೆಂ ಪ್ರಯತ್ನ್ ಕೆಲೆಂ ನಾ. ತಾಣೆಂ ಫಕತ್ತ್ ಆಪ್ಲ್ಯಾ ಹಾತಾಂತ್ಲ್ಯಾ ಏರ್ಗನ್ನಾಕ್ ಉಕ್ಲುನ್ ದರುನ್ ತಶೆಂಚ್ ನಾಸಿರಾಕ್ ಬಸೊಂಕ್ ಸಂಜ್ಞಾ ಕೆಲಿ.
ನಾಸಿರಾಕ್ ಆತಾಂ ದುಸ್ರಿ ವಾಟ್ ನಾತ್ಲ್ಲಿ. ತೊ ಮೌನ್ಪಣಿ ಸೊಫಾಚೆರ್ ಬಸ್ಲೊ.
"ತೆಂ ಖಂಯ್ ಆಸಾ....?" ನಾಸಿರಾ ಶಿವಾಯ್ ಘರಾಂತ್ ದುಸ್ರೆಂ ಕೊಣ್ಯ್ ದಿಸೊನ್ ಯೇನಾಸ್ತಾನಾ ವೆತಾನಾ ಸೊಫಾರ್ ಬಸ್ಲೆಲ್ಯಾ ವ್ಯಕ್ತಿನ್ ವಿಚಾರ್ಲೆಂ.
ಹ್ಯಾಚ್ ಘಡಿಯೆ ಆಪ್ಲ್ಯಾ ಬೆಡ್ರೂಮಾ ಥಾವ್ನ್ ಭಾಯ್ರ್ ಆಯಿಲ್ಲೆಂ ಆಲಿಯಾ ಸಾಲಾಕ್ ಪಾವೊನ್ ಮುಕಾರ್ ಪಳೆಂವ್ಕ್ ಆನಿ ತೆಂ ಖಂಯ್ ಆಸಾ ಮ್ಹಣ್ ತ್ಯಾ ವ್ಯಕ್ತಿನ್ ವಿಚಾರುಂಕ್ ಸಮಾಸಮ್ ಜಾಲೆಂ. ಚಾರ್ಯ್ ಜಣಾಂಚ್ಯೊ ದಿಶ್ಟಿ ಎಕಾಮೆಕಾ ಆದಾಳ್ಳ್ಯೊ.
ತಿತ್ಲೆಂಚ್!
ಆಲಿಯಾಚಾ ಕುಡಿಂತ್ ಜಗ್ಲಾಣೆ ದಾಂವ್ಲ್ಲ್ಯಾ ಪರಿಂ ಜಾಲೆಂ.
ವ್ಹಯ್! ತೊಚ್ಚ್ ತೊ!
ಇಕ್ಬಾಲಾಚೊ ಭಾವ್! ಪ್ಲೈಟಾರ್ ಆಪ್ಣಾ ಸಾಂಗಾತಾ ಝಗಡ್ಲಲೊ! ಆಪ್ಣಾಕ್.... ಆಪ್ಣಾಕ್.....! ಆಲಿಯಾಕ್ ಮುಕಾರ್ ಚಿಂತುಂಕ್ ಜಾಲೆಂ ನಾ.
ತಿತ್ಲ್ಯಾರ್!
’ಟ್ರಿಣ್.... ಟ್ರಿಣ್’
ಭಿತರ್ಲ್ಯಾ ನಿದ್ಚಾ ಕುಡಾಂತ್ ಆಲಿಯಾಚೆಂ ಪೋನ್ ವಾಜೊಂಕ್ ಲಾಗ್ತಾನಾ ಆಲಿಯಾಚಿ ಮತ್ ಪೊನಾ ತೆವ್ಶಿಂ ಧಾಂವ್ಲಿ. ತೆಂ ಪೋನ್ ವ್ಹಾಜೊಂಕ್ ನಾತ್ಲ್ಲೆಂ ಜಾಲ್ಯಾರ್ ಆಲಿಯಾ ರಾಗಾಚಾ ಆವೇಶಾರ್ ಕಿತೆಂ ಕರ್ತೆಂ ತೆಂ ತಾಕಾಚ್ ಕಳಿತ್ ನಾತ್ಲ್ಲೆಂ. ಇಕ್ಬಾಲಾಚಾ ಭಾವಾಕ್ ಆಪ್ಲ್ಯಾ ಘರಾ ಪಳವ್ನ್ ತೆಂ ವಾಗಿಣ್ ಜಾಲ್ಲೆಂ. ಪುಣ್ ತಿತ್ಲ್ಯಾ ಭಿತರ್ ತಾಚೆಂ ಪೋನ್ ವಾಜ್ಲ್ಲೆಂ. ಭಾಯ್ಲ್ಯಾ ಕೊಣಾಯ್ಕ್ಯ್ ದುಬಾವ್ ಜಾಯ್ನಾತ್ಲ್ಲ್ಯಾ ಪರಿಂ ಎಕಾಚ್ ಫರಾ ಪಾಟಿಂ ಘುಂವ್ಲ್ಲೆಂ ಆಲಿಯಾ ನಿದ್ಚ್ಯಾ ಕುಡಾ ತೆವ್ಶಿಂ ಚಮ್ಕಾಲೆಂ.
ತಿತ್ಲೆಂಚ್!
"ಹೇಯ್....!"
ಗರ್ಜಾಲ್ಲೊ ಇಕ್ಬಾಲಾಚೊ ಭಾವ್ ರಾಶಿದ್ ಸೊಫಾ ವಯ್ಲೊ ಉಟೊನ್ ಸರಾಂರಾಂ ಮುಕಾರ್ ಧಾಂವೊನ್ ಆಲಿಯಾಚಾ ಪಾಟ್ಲ್ಯಾನ್ ತಾಚ್ಯಾ ನಿದ್ಚ್ಯಾ ಕುಡಾಕ್ ರಿಗ್ತಾನಾ, ಪಾಟಿಂ ಫುಡೆಂ ಕಾಂಯ್ಚ್ ಚಿಂತಿನಾಸ್ತಾನಾ ಎಕ್ಚ್ ಪಾವ್ಟಿಂ ಬಸ್ಲೆಲ್ಯಾ ಕಡೆನ್ ಥಾವ್ನ್ ಉಟೊನ್ ರಾವ್ಲೆಲ್ಯಾ ನಾಸಿರಾಕ್ ಪಳವ್ನ್ ತ್ಯಾ ದುಸ್ರ್ಯಾ ವ್ಯಕ್ತಿನ್ಯ್ ಆಪ್ಲೆಂ ಏರ್ಗನ್ನ್ ಭಾಯ್ರ್ ಕಾಡ್ಲೆಂ. ನಾಸಿರ್ ಆತಾಂ ಥಂಯ್ಚ್ ಸ್ತಬ್ದ್ ಜಾಲೊ.
ಸುಮಾರ್ ವೇಳ್ ಲಿಫ್ಟಾಕ್ ರಾಕೊನ್ ರಾವ್ಲ್ಲೆಂ ಅಮೀನಾ ಲಿಫ್ಟ್ ಸಕಯ್ಲ್ ದೆಂವಾನಾ ತೆಂ ಪಳವ್ನ್ ಮುಕಾರ್ ಬಸೊನ್ ಪಾರೊತ್ ಕರ್ಚ್ಯಾ ಗುರ್ಖಾ ತೆವ್ಶಿಂ ಚಮ್ಕಾಲೆಂ. ಆಮೀನಾ ಆಪ್ಣಾ ತೆವ್ಶಿಂ ಯೆತಾ ತೆಂ ಕಳೊನ್ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟ್ಲ್ಲೊ ಗೂರ್ಖಾ,
"ಕಿತೆಂ ಜಾಲೆಂ ಮ್ಯಾಡಮ್?" ಗೂರ್ಖಾಕ್ ದುಬಾವ್ ಜಾಲೊ.
"ಲಿಫ್ಟ್ ಕಿತ್ಯಾಕ್ ಸಕಯ್ಲ್ ಯೇನಾ?"
"ಯೆತಾ ಮ್ಯಾಡಮ್....!"
"ಮಾಗಿರ್....? ಇತ್ಲೊ ವೇಳ್ ಜಾಲೊ! ಲಿಫ್ಟ್ ಯೆಂವ್ಚಿ ದಿಸಾನಾ!"
"ಹಾಂವ್ ಪಳೆತಾಂ!"
ಗೂರ್ಖಾ ಆತಾಂ ಲಿಫ್ಟಾಚಾ ಲಾಗಿಂ ಯೇವ್ನ್ ಲಿಪ್ಟಾಚೊ ಇಂಡಿಕೇಟರ್ ಜಳ್ತಾ ತೆಂ ಪಳವ್ನ್ ಲಿಫ್ಟ್ ಖಂಯ್ಚಾ ಮಾಳಿಯೆರ್ ಆಸಾ ತೆಂ ಪಳಂವ್ಚ್ಯಾಕ್ ಲಿಫ್ಟಾಚೊ ಫ್ಲೋರ್ ಇಂಡಿಕೇಟರಾರ್ ತಾಣೆ ದೀಶ್ಟ್ ವೆಲಿ.. ತೊ ಇಂಡಿಕೇಟರ್ ಲಿಫ್ಟ್ ಚವ್ತ್ಯಾ ಮಾಳಿಯೆರ್ ಆಸಾ ಮ್ಹಣೊನ್ ದಾಕಯ್ತಾನಾ,
"ಬೋವ್ಶಾ ಕಾಂಯ್ ಪಾಡ್ ಜಾಲ್ಯಾ ಆಸ್ತೆಲಿ. ಹಾಂವ್ ಪಳವ್ನ್ ಯೆತಾಂ ಮ್ಯಾಡಮ್!" ಗೂರ್ಖಾ ಆತಾಂ ಲಿಫ್ಟಾಚಾ ಬಗ್ಲೆಕ್ ಆಸ್ಲ್ಲಿಂ ಮೆಟಾಂ ಚಡೊಂಕ್ ಲಾಗ್ಲೊ.
ಅಮೀನಾಕ್ ಆತಾಂ ಕಿತೆಂ ಕರ್ಚೆಂ ಮ್ಹಳ್ಳೆಂತೆಂ ಸಮ್ಜಾಲೆಂ ನಾ. ರಾವ್ಲೆಲ್ಯಾ ಕಡೆನ್ ಥಾವ್ನ್ಚ್ ತಾಣೆಂ ತ್ಯಾ ಗೂರ್ಖಾನ್ ಚಡೊನ್ ವೆಚ್ಯಾ ಶಿಡಿಯಾಂ ವಯ್ರ್ ನದರ್ ಮಾರ್ಲಿ. ಗೂರ್ಖಾ ಶಿಡಿಯೊ ಚಡ್ತಾಲೊ. ಅಮೀನಾ ತಾಕಾಚ್ ಪಳವ್ನ್ ರಾವ್ಲೆಂ.
ನಿದ್ಚ್ಯಾ ಕುಡಾ ಭಿತರ್ ಪಾವ್ಲೆಲ್ಯಾ ಆಲಿಯಾನ್ ಖಾಟಿಯೆ ವಯ್ಲೆಂ ಪೋನ್ ಹಾತಿಂ ಘೆವ್ನ್ ಆಪ್ಲಿ ನದರ್ ತಾಚೆರ್ ಮಾರ್ತಾನಾ ಆಪ್ಣಾ ಪಾಟ್ಲ್ಯಾನ್ ಆಯ್ಕೊನ್ ಆಯಿಲ್ಲ್ಯಾ ಆವಾಜಾಕ್ ಲಾಗೊನ್ ತಾಣೆಂ ಆಪ್ಲಿ ತಕ್ಲಿ ಪಾಟಿಂ ಘುಂವ್ಡಾಯ್ಲಿ.
ತಿತ್ಲೆಂಚ್!
ತಕ್ಲಿ ಘುಂವ್ಡಾವ್ನ್ ಪಾಟಿಂ ಪಳೆಲ್ಲ್ಯಾ ಆಲಿಯಾಕ್ ತ್ಯಾಚ್ ವಗ್ತಾರ್ ತಾಚ್ಯಾ ನಿದ್ಚ್ಯಾ ಕುಡಾ ಭಿತರ್ ಪಾಂಯ್ ದವರ್ಲ್ಲ್ಲೊ ರಾಶಿದ್ ದೊಳ್ಯಾಂಕ್ ಭೆಟ್ತಾನಾ ಆಲಿಯಾನ್ ತಶೆಂಚ್ ಉಭೆಂ ಜಾವ್ನ್ ರಾಶಿದಾಕ್ಚ್ ಪಳೆಲೆಂ.
"ಪಳೆ....! ಹಾಂವ್ ಬರ್ಯಾನ್ ಸಾಂಗ್ತಾ! ಕಾಂಯ್ ಹುಶಾರ್ಪಣ್ ಕರಿನಾಕಾ!"
ರಾಶಿದ್ ಸವ್ಕಾಸ್ ಆಲಿಯಾಚಾ ಲಾಗಿಂ ಜಾತಾಲೊ.
ಆಲಿಯಾಚಾ ಹಾತಾಂತ್ಲೆಂ ಪೋನ್ ಆಜೂನ್ ವ್ಹಾಜ್ತಾಲೆಂ.
"ದವರ್...! ಪೋನ್ ಸಕಯ್ಲ್ ದವರ್!" ರಾಶಿದಾನ್ ಸಾಂಗ್ತಾನಾ ಎದೊಳ್ ವರೇಗ್ ವ್ಹಾಜೊನ್ ಆಸ್ಲ್ಲೆಂ ಆಲಿಯಾಚಾ ಹಾತಾಂತ್ಲೆಂ ಪೋನ್ ಭಂಧ್ ಜಾಲೆಂ.
"ಪಳೆ ! ಜೆಂ ಕಿತೆಂ ತುಕಾ ಉಲಂವ್ಕ್ ಆಸಾ ತೆಂ ತುಂ ಏರ್ವೇಸಾಚಾ ಆಫೀಸಾಂತ್ ಉಲಯ್. ಹೆಂ ಮ್ಹಜೆಂ ಘರ್! ಹಾಂಗಾ ತುವೆಂ ಯೇಂವ್ಕ್ ಜಾಯ್ ಮ್ಹಳ್ಳಿ ಗರ್ಜ್ ನಾ!" ಆಲಿಯಾ ಧಯ್ರಾನ್ ಉಲಯ್ಲೆಂ. ರಾಶಿದಾಚಾ ಹಾತಾಂತ್ಲ್ಯಾ ಏರ್ಗನ್ನಾಕ್ ಪಳವ್ನ್ ಪಾಸೊನ್ ತೆಂ ಭಿಯೆಲೆಂ ನಾ.
"ಪ್ಲೈಟಾರ್ ತುವೆಂ ಕಿತೆಂ ಮ್ಹಳ್ಳೆಂಯ್? ತುಕಾ ಭಾರಿಚ್ ಚರಬ್ ಆಸಾ. ತುಂ ಕಿತೆಂ? ತುಜ್ಯಾಕ್ಯ್ ವ್ಹಡ್ಲ್ಯಾ ವ್ಹಡ್ಲ್ಯಾಂಕ್ ಹಾಡುನ್ ಹಾವೆಂ ನಾಚಯ್ಲಾಂ! ಆತಾಂ ತುಕಾ ಕಶೆಂ ನಾಚಯ್ತಾಂ ಪಳೆ.....!"
ರಾಶಿದಾನ್ ಆಪ್ಲ್ಯಾ ಪ್ಯಾಂಟಾಚಾ ಬೊಲ್ಸಾಕ್ ಹಾತ್ ಘಾಲೊ.
"ತುಂಯ್ ಸಾದಾರ್ಣ್ ನಾಂಯ್! ಇನ್ಪ್ಲುಯೆನ್ಸ್ ಕರುಂಕ್ ಪಳೆತಾಯ್...?!" ಪ್ಯಾಂಟಾಚಾ ಬೊಲ್ಸಾ ಥಾವ್ನ್ ರಾಶಿದಾನ್ ಏಕ್ ಪೇಪರ್ ಭಾಯ್ರ್ ಕಾಡ್ಲೆಂ. ತೆಂ ಪೇಪರ್ ಮುಕ್ಲ್ಯಾ ಆಲಿಯಾಚಾ ಡ್ರೆಸ್ಸಿಂಗ್ ಟೇಬಲಾ ವಯ್ರ್ ದವರುನ್,
"ಹಾವೆಂ ಸಾಕಾಳಿಂಚ್ ತುಜ್ಯಾ ಮ್ಯಾನೇಜರಾಕ್ ಪೋನ್ ಕರಯಿಲ್ಲೆಂ. ಆಯ್ಚಾ ದಿಸಾ ಭಿತರ್ ತುಕಾ ತುಜ್ಯಾ ಕಾಮಾ ಥಾವ್ನ್ ಕಾಡುನ್ ಉಡಂವ್ಕ್ ಸಾಂಗ್ಲೆಲೆಂ. ಪುಣ್ ಮ್ಹಜೆಂ ಇನ್ಪ್ಲುಯೆನ್ಸ್ ಪಾಂವ್ಚ್ಯಾ ಪಯ್ಲೆಂ ತುವೆಂ....! ಹಾಕಾ ಸೈನ್ ಕರ್!" ಆಲಿಯಾಕ್ ಆಪ್ಣೆಂ ಮೆಜಾರ್ ದವರ್ಲ್ಲ್ಯಾ ಪೇಪರಾಕ್ ರಾಶಿದಾನ್ ದಾಖಯ್ಲೆಂ. ಆಲಿಯಾಕ್ ರಾಶಿದಾಚಾ ತೊಂಡಾರ್ ವಿಲಕ್ಷಣ್ ಹಾಸೊ ದಿಸ್ತಾಲ್ಯೊ.
ರಾಶಿದಾನ್ ಡ್ರೆಸ್ಸಿಂಗ್ ಟೇಬಲಾರ್ ದವರ್ಲೆಲ್ಯಾ ಪೇಪರಾರ್ ಆಲಿಯಾನ್ ಆಪ್ಲಿ ದೀಶ್ಟ್ ವೆಲಿ.
ತಿತ್ಲೆಂಚ್!
ಆಲಿಯಾ ಆಪ್ಲ್ಯಾ ದೊಳ್ಯಾಂಕ್ಚ್ ಪಾತ್ಯೆಲೆಂ ನಾ! ತಾಚೆ ದೊಳೆ ರೂಂದಾಲೆ!
"ರಿಸಿಗ್ನೇಶನ್ ಲೆಟರ್!"
"ಕರ್ ಸೈನ್ ಕರ್!" ರಾಶಿದ್ ವ್ಹಳೂ ವಿಲಕ್ಷಣ್ ಹಾಸೊ ಹಾಸ್ತಾಲೊ.
ತಿತ್ಲ್ಯಾರ್!
"ಟ್ರಿಣ್.... ಟ್ರಿಣ್...."
ಪರ್ತ್ಯಾಕ್ ಆಲಿಯಾಚಾ ಹಾತಾಂತ್ಲೆಂ ಸೆಲ್ಪೋನ್ ವ್ಹಾಜೊಂಕ್ ಲಾಗ್ತಾನಾ ತಾಚ್ಯೆ ಸವೆಂ ರಾಶಿದಾಚ್ಯೊ ಹಾಸೊ ಭಂಧ್ ಜಾಲ್ಯೊ.
"ಸಾಲೀ... ಪೋನ್ ಭಂಧ್ ಕರ್!" ಚಿಡ್ಲೆಲ್ಯಾ ರಾಶಿದಾನ್ ಗಾಳ್ ದೀವ್ನ್ ಸಾಂಗ್ಚ್ಯಾ ಪಯ್ಲೆಂಚ್ ’ಸಕ್ಕ್’ ಕರುನ್ ಪೊನಾಕ್ ಪಳೆಲ್ಲ್ಯಾ ಆಲಿಯಾಕ್ ತ್ಯಾ ಪೊನಾಚಾ ಡಿಸ್ಪ್ಲೇ ವಯ್ರ್ ಅಭಿಲಾಶಚೆಂ ನಾಂವ್ ದಿಸೊನ್ ಯೇವ್ನ್ ಥಂಯ್ಚ್ ತೆಂ ಪೋನ್ ತಾಣೆಂ ಆನ್ ಕೆಲೆಂ. ಪುಣ್ ತ್ಯಾ ಪೊನಾಕ್ ಕಾನಾಕ್ ಲಾಯ್ನಾಸ್ತಾನಾ ತಶೆಂಚ್ ಆಪ್ಲ್ಯಾ ಹಾತಾಂತ್ ಧರುನ್ ತೆಂ ರಾವ್ಲೆಂ. ಹೆಂ ಎಕಾಚ್ ಸೆಕುಂದಾ ಭಿತರ್ ಘಡೊನ್ ಗೆಲ್ಲೆಂ.
ಆಪ್ಲ್ಯಾ ಭಿಯಾನ್ ಆಲಿಯಾನ್ ಆಪ್ಲೆಂ ಪೋನ್ ಭಂಧ್ ಕೆಲೆಂ ಮ್ಹಣೊನ್ ಪಾತ್ಯೆಲ್ಲೊ ರಾಶಿದ್,
"ಆಜ್ ಪ್ಲೈಟಾರ್ಯ್ ತುವೆಂ ಆಶೆಂಚ್ ಚುಪ್ಚಾಪ್ ರಾವೊನ್ ತುಜೆಂ ಕಾಮ್ ತುವೆಂ ಕೆಲ್ಲೆಂಯ್ ಜಾಲ್ಯಾರ್...? ಕರ್...! ಹಾಂಗಾ ಸೈನ್ ಕರ್!" ಏರ್ಗನ್ನಾಚಾ ಪೊಂಯ್ಟಾನ್ ದಾಕವ್ನ್ ಸಾಂಗಾಲಾಗ್ಲೊ ರಾಶಿದ್.
"ಹೆಂ ಕಿತೆಂ ರಾಶಿದ್?" ತಿತ್ಲ್ಯಾಚ್ ಧಯ್ರಾನ್ ಆಲಿಯಾನ್ ವಿಚಾರ್ಲೆಂ. ತೆಂ ಜಾಣಾಂ ತ್ಯಾ ಕುಶಿಂನ್ ಅಭಿಲಾಶಾಕ್ ಆಪ್ಣಾಚೆಂ ಆನಿ ರಾಶಿದಾಚೆಂ ಸಂಬಾಶಣ್ ಖಂಡಿತ್ ಆಯ್ಕಾತೆಲೆಂ.
"ರಾ....ಶಿದ್! ತುಂ ಮ್ಹಜೆಂ ನಾಂವ್ಯ್ ಜಾಣಾಂ ಜಾಲೆಂಯ್! ಬರೆಂ ಆಸಾ! ಫಾಲ್ಯಾಂ ಮ್ಹಾಕಾಯ್ ಜಾಣಾಂ ಜಾತೆಲೆಂಯ್! ಆತಾಂ ಸೈನ್ ಕರ್....!"
"ಹಾವೆಂ ಕರಿನಾ ಜಾಲ್ಯಾರ್?"
"ತುಂ ಖಂಡಿತ್ ಕರ್ತೆಲೆಂಯ್! ತಶೆಂಯ್ ತುಕಾ ಹೆಂ ಕಾಮ್ ಕಾಂಯ್ ಗರ್ಜೆಚೆಂ ನ್ಹಯ್! ತುಜ್ಯಾ ಘೊವಾಕ್ ಇತ್ಲೆಂ ವ್ಹಡ್ಲೆಂ ಬಿಜ್ನೆಸ್ ಆಸಾ. ಮ್ಹಾಕಾಚ್ ಅಜ್ಯಾಪ್ ಜಾಲೆಂ. ಇತ್ಲ್ಯಾ ವ್ಹಡ್ಲ್ಯಾ ಬಿಜ್ನೆಸ್ಮ್ಯಾನಾಚೆಂ ಬಾಯ್ಲ್ ತ್ಯಾ ವಿಮಾನಾಚೆರ್.... ತುಕಾ ತೆಂ ಕಾಮ್ ನಾಕಾ. ತುಂ ತುಜ್ಯಾ ಘೊವಾಚೆಂ ಬಿಜ್ನೆಸ್ ಸಾಂಬಾಳ್! ಹೆಂ ಜಾಯ್ನಾಂ ಜಾಲ್ಯಾರ್ ಮ್ಹಜ್ಯಾ ಘರಾ ಯೇ. ಕಸಲೆಂ ಕಾಮ್ ತುಕಾ ಜಾಯ್ ವಿಚಾರ್...! ಹಾಂವ್ ದಿವಯ್ತಾಂ! ನಾಚೊಂಕ್ ಜಾಣಾಂಯ್..? ತುಕಾ....!"
"ಶಟಪ್!" ಮಧೆಂಚ್ ಬೊಬಾಟ್ಲೆಲ್ಯಾ ಆಲಿಯಾಚಾ ರಾಗಾಚಾ ಬೊಬೆಕ್ ರಾಶಿದಾಚಿಂ ಮುಕ್ಲಿಂ ಉತ್ರಾಂ ತಾಚ್ಯಾ ತೊಂಡಾ ಥಾವ್ನ್ ಭಾಯ್ರ್ ಪಡ್ಲಿಂ ನಾಂತ್.
"ಚಲ್! ಸುಮಾರ್ ಜಾಲೆಂ. ಹಾಕಾ ಸೈನ್ ಕರ್!"
"ಕರಿನಾಂ!"
"ಸಾಲೀ.... ಸೈನ್ ಕರ್!" ರಾಗಾನ್ ರಾಶಿದಾನ್ ಆಪ್ಲೆಂ ಗನ್ನ್ ತ್ಯಾ ಡ್ರೆಸ್ಸಿಂಗ್ ಟೆಬಲಾಕ್ ದಾಡಾಯ್ಲೆಂ.
"ಹೆಂ ಆಲಿಯಾ ಜಿವಿತಾಕ್ ಕೆದ್ನಾಂಚ್ ಭಿಯೆಲ್ಲೆಂ ನ್ಹಯ್! ಆತಾಂ ತುಂ ಚಿಂತಾಯ್ ತುಜ್ಯಾ ಹ್ಯಾ ಧಮ್ಕೆಕ್ ಹಾಂವ್ ಭಿಯೆತಾಂ?" ಆಲಿಯಾ ತಾಚ್ಯಾ ಧಯ್ರಾಂತ್ ದ್ರಡ್ ಆಸ್ಲ್ಲೆಂ.
"ಅಚ್ಚಾ...!?" ಕಿತೆಂಗೀ ಚಿಂತ್ಲ್ಲೊ ರಾಶಿದ್,
"ಚಲ್...! ತುಕಾ ಹಾಂವ್ ದಾಕಯ್ತಾಂ ಭ್ಯೆಂ ಮ್ಹಳ್ಯಾರ್ ಕಿತೆಂ ತೆಂ!"
ರಾಶಿದಾನ್ ಡ್ರೆಸ್ಸಿಂಗ್ ಟೇಚಲಾರ್ ದವರ್ಲ್ಲೆಂ ತೆಂ ಪೇಪೆರ್ ಆಪ್ಲ್ಯಾ ಹಾತಿಂ ಘೆತ್ಲೆಂ. ತೊ ಆತಾಂ ಆಲಿಯಾಚಾ ಲಾಗಿಂ ಆಯಿಲ್ಲೊ ಆಪ್ಲ್ಯಾ ಏರ್ಗನ್ನಾಕ್ ಆಲಿಯಾಚಾ ಭರ್ಲ್ಲ್ಯಾ ಹರ್ಧ್ಯಾರ್ ದಾಂಬುನ್ ದರುನ್, "ಚಲ್.... ಭಾಯ್ರ್ ಚಲ್!" ಆಲಿಯಾಕ್ ತಾಣೆ ಫರ್ಮಾಯ್ಲೆಂ.
ಆಲಿಯಾ ಏಕ್ ಮೇಟ್ಯ್ ಹಾಲ್ಲೆಂ ನಾ ತೆಂ ಪಳವ್ನ್
"ತೇರಿ ತ್ತೊ...!
ರಾಶಿದಾನ್ ಆಪ್ಲ್ಯಾ ಏರ್ಗನ್ನಾಕ್ ಆಲಿಯಾಚಾ ಹರ್ಧ್ಯಾರ್ ದಾಂಬುನ್ ದರುನ್ ತಾಚ್ಯಾ ಟ್ರಿಗರಾಚೆರ್ ಆಪ್ಲೆಂ ಬೋಟ್ ಆಂರ್ದಿಲೆಂ.
ಶಿಡಿಯೆಕ್ ಚಡೊನ್ ವೆಚ್ಯಾ ಗೂರ್ಖಾಕ್ ಪಳವ್ನ್ಚ್ ರಾವ್ಲೆಲ್ಯಾ ಅಮೀನಾಕ್ ಆಪಾರ್ಟ್ಮೆಂಟಾಚಾ ಕಂಪೌಡಾ ಭಿತರ್ ಎಕಾಚ್ಚ್ಫರಾ ಉಜ್ವಾಡ್ ಪೆಟ್ಲೆಲ್ಯಾ ಪರಿಂ ಜಾವ್ನ್ ತಾಣೆಂ ಆಪ್ಲಿ ದೀಶ್ಟ್ ತ್ಯಾ ಶಿಡಿಯೆ ವಯ್ರ್ ಥಾವ್ನ್ ಕಾಡುನ್ ತೆಂ ಪಾಟಿಂ ಘುಂವ್ಲೆಂ.
ಪಾಟಿಂ ಘುಂವ್ಲೆಲ್ಯಾ ತಾಕಾ ಅಪಾರ್ಟ್ಮೆಂಟಾಚಾ ಕಂಪೌಂಡಾ ಭಿತರ್ ಜಳೊನ್ ಆಯಿಲ್ಲೆ ದೋನ್ ದಿವೆ ಹೆವ್ಶಿಂ ಯೇವ್ನ್ ತಾಚ್ಯಾ ದಾವ್ಯಾ ಕುಶಿಕ್ ಘುಂವೊನ್ ರಾವ್ಲೆ. ತಾಚ್ಯಾ ಪಾಟ್ಲ್ಯಾನ್ ಕಾರಾಚೆಂ ಎಂಜಿನ್ ಭಂಧ್ ಜಾಲ್ಲೊ ಆವಾಜ್. ಉಪ್ರಾಂತ್ ತೆ ದಿವೆಯ್ ಭಂಧ್ ಜಾಲೆ. ಆತಾಂ ಕಾರಾಚೆಂ ದಾರ್ ಉಗಡ್ಲ್ಲೊ ಆವಾಜ್.
ತಿತ್ಲೆಂಚ್!
"ಸುಲೇಮಾನ್ ಅಂಕಲ್" ಅಮೀನಾನ್ ವಳಕ್ ಧರ್ಲಿ.
ಕಾರಾರ್ ಥಾವ್ನ್ ದೆಂವ್ಲ್ಲೊ ಸುಲೇಮಾನ್ ಕಾರಾಕ್ ಲಾಕ್ ಕರುನ್ ಮುಕಾರ್ ಆಯಿಲ್ಲೊ ತೊ ಅಚಾನಕ್ ಅಮೀನಾಕ್ ಪಳವ್ನ್,
"ಅಮೀನಾ ಬೇಟಿ! ತುಂ....?" ರಾತಿಚ್ಯಾ ಹ್ಯಾ ವೆಳಾರ್ ಅಮೀನಾಕ್ ಆಪ್ಲ್ಯಾ ಪುತಾಚಾ ಅಪಾರ್ಟ್ಮೆಂಟಾ ಸಕಯ್ಲ್ ಪಳವ್ನ್ ಸುಲೇಮಾನಾಕ್ ಆಶ್ಚರ್ಯ್ ಜಾಲೆಂ.
"ತುಂ ಕಿತೆಂ ಹಾಂಗಾ?" ಪುತಾಚಾ ಚಿಂತ್ನಾಂನಿಚ್ ಬುಡೊನ್ ಆಯಿಲ್ಲ್ಲ್ಯಾ ಸುಲೇಮಾನಾನ್ ಆಪ್ಲ್ಯಾ ತೊಂಡಾರ್ ಹಾಸೊ ಹಾಡ್ಚೆಂ ಪ್ರಯತ್ನ್ ಕೆಲೆಂ.
"ನಾಸಿರಾನ್ ಆಪಯಿಲ್ಲೆಂ....! ತಶೆಂ....!" ಸುಲೇಮಾನಾಚ್ಯಾ ಸವಾಲಾಕ್ ಅಮೀನಾನ್ ಮಟ್ವಿ ಜವಾಬ್ ದಿಲಿ.
"ನಾಸಿರಾನ್ ಹಾಕಾಯ್ ಹಾಂಗಾ ಆಪಯ್ಲಾಂ? ವಿಶಯ್ ಕಿತೆಂ ಜಾವ್ಯೆತ್? ಆಪುಣ್ ಜಾಲ್ಯಾರ್ ಘರಾ ಭಿತರ್ಲೊ ಮನಿಸ್. ಹೆಂ ಘರಾ ಭಾಯ್ಲೆಂ ಚೆಡುಂ. ಬಿಜ್ನೆಸಾಂತ್ ಕಾಂಯ್ ಚಡ್ಉಣೆಂ ಜಾಲ್ಯಾರ್ ಯಾ ಘೊವಾ ಬಾಯ್ಲೆ ಮಧೆಂ ಕಾಂಯ್ ಉಲೊಣೆಂ ಜಾಲ್ಯಾರ್ ತೆಂ ಆಮ್ಚೆ ಭಿತರ್ಲೆಂ. ತಶೆಂ ಆಸ್ತಾನಾ ಅಮೀನಾ ಹಾಂಗಾ.....?" ಸುಲೇಮಾನ್ ಚಿಂತುಂಕ್ ಲಾಗ್ಲೊ ಶಿವಾಯ್ ತಾಕಾ ಕಾಂಯ್ ಸಮ್ಜಾಲೆಂ ನಾ.
"ಲಿಫ್ಟ್ ಚಲಾನಾ ಚಾಚಾ! ತೊ ಗೂರ್ಖಾ ಆಪುಣ್ ಪಳಯ್ತಾಂ ಮ್ಹಣೊನ್ ವಯ್ರ್ ಗೆಲಾ!" ಅಮೀನಾ ಶಿಡಿಯೆ ಮುಕಾಂತ್ರ್ ವಯ್ರ್ ಪಳಂವ್ಕ್ ಲಾಗ್ಲೆಂ. ತಾಕಾ ಖಂಯ್ಚರ್ಯ್ ಗೂರ್ಖಾ ದಿಸ್ಲೊ ನಾ.
"ಯೆತಲೊ ಪಳೆಯಾಂ!" ಸುಲೇಮಾನಾನ್ ಸಾಂಗ್ಲೆಂ.
"ಕಂಪೆನಿಚೆಂ ಕಸಲೆಂಯ್ ಲೀಗಲ್ ಕಾಮ್ ಆಸಾ ಜಾಲ್ಯಾರ್ ಫಾಲ್ಯಾ ಆಫೀಸಾಕ್ ಯೆತಾಂ ಮ್ಹಣೊನ್ ಹಾವೆಂ ನಾಸಿರಾಕ್ ಸಾಂಗ್ಲೆಂ. ಪುಣ್ ತೊ ಖಂಯ್ ಆಯ್ಕಾತಾ? ಕಂಪೆನಿಚೆಂ ನ್ಹಯ್ ಪರ್ಸನಲ್ ಕಾಮ್ ಆಸಾ ಮ್ಹಣಾಲೊ!" ಅಮೀನಾ ಸುಲೇಮಾನಾಕ್ಚ್ ಪಳೆತಾಲೆಂ.
"ಪರ್ಸನಲ್.....?" ಸುಲೇಮಾನ್ ಮತಿಂತ್ಚ್ ಉದ್ಗಾರ್ಲೊ. ತಾಕಾ ಮಿಸ್ತೆರ್ ಕಿತೆಂ ತೊ ಕಾಂಯ್ ಸಮ್ಜಾಲೊ ನಾ.
ಗೂರ್ಖಾ ಕಿತೆಂ ಅಜೂನ್ಯ್ ದಿಸಾ ಮ್ಹಣೊನ್ ಚಿಂತುನ್ ಶಿಡಿಯೆ ಲಾಗಿಂ ಯೇವ್ನ್ ಶಿಡಿಯೆ ಮದ್ಲ್ಯಾನ್ ಅಮೀನಾನ್ ವಯ್ರ್ ದಿಶ್ಟ್ ವೆಲಿ. ತಿತ್ಲ್ಯಾರ್ ಗೂರ್ಖಾ ಶಿಡಿಯೊ ದೆಂವೊನ್ ಸಕಯ್ಲ್ ಯೆಂವ್ಚೊ ದಿಸ್ಲೊ ತಾಕಾ. ತಿಂ ಥಂಯ್ಚ್ ತಾಕಾ ರಾಕೊನ್ ರಾವ್ಲಿಂ.
ಆಪ್ಲ್ಯಾ ಹರ್ಧ್ಯಾಚಾ ದಾವ್ಯಾ ಕುಶಿಚಾ ಸ್ತನಾಕ್ ಭಿತರ್ ದಾಂಬುನ್, ರಾಶಿದಾಚ್ಯಾ ಹಾತಾಂತ್ಲೆಂ ಏರ್ಗನ್ನ್ ಆಪ್ಣಾಚಿ ವಳಕ್ ದಾಖಂವ್ಕ್ ಲಾಗ್ತಾನಾ ಆಲಿಯಾಕ್ ಹಳ್ತಾರ್ ಹರ್ಧ್ಯಾರ್ ದೂಕ್ ಉಬ್ಜಾಲಿ. ತ್ಯಾ ದುಖಿ ಸಾಂಗಾತಾ,
"ಕಾಂಯ್ ಹೊ ಆಪ್ಣಾಕ್ ಜಿವೆಶಿಂ ಮಾರಿತ್...?" ಮತಿಂತ್ ಉದೆಲ್ಲ್ಯಾ ಸವಾಲಾಕ್ ಆಲಿಯಾನ್ ಥಂಯ್ಚ್ ಜಿರಯ್ಲೆಂ.
ರಾಶಿದಾನ್ ಆಲಿಯಾಕ್ ಬೆಷ್ಟಾಂವ್ಕ್ ಕೆಲ್ಲೆಂ ಪ್ರಯತ್ನ್ ವಿಫಲ್ ಜಾತಾನಾ,
"ಚಲ್! ಭಾಯ್ರ್ ವಚ್. ತುಕಾ ದಾಕಯ್ತಾಂ!" ರಾಶಿದಾನ್ ಆತಾಂ ದುಸ್ರೊ ಉಪಾಯ್ ನಾಸ್ತಾಂ ಆಲಿಯಾಕ್ ವೊಡುನ್ ಭಾಯ್ರ್ ಹಾಡ್ಲೆಂ.
ಆಲಿಯಾಕ್ ತಶೆಂಚ್ ಧರುನ್ ತೊ ನಾಸಿರಾ ಮುಕಾರ್ ಉಭೊ ಜಾಲೊ.
"ಲಪ್ಡೆ ನಾಕಾತ್! ಮ್ಹಾಕಾ ಲಪ್ಡೆ ನಾಕಾತ್! ಬರ್ಯಾ ಭಾಶೆನ್ ತುಜ್ಯಾ ಬಾಯ್ಲೆಕ್ ಹಾಂಗಾ ಸೈನ್ ಕರುಂಕ್ ಸಾಂಗ್! ನಾ ಜಾಲ್ಯಾರ್....!" ರಾಶಿದಾಕ್ ಕಾಂಯ್ಚ್ ಕರುಂಕ್ ಸಮ್ಜಾನಾತ್ಲ್ಲೆಂ.
"ಚಲ್ ಸಾಂಗ್. ತುಜ್ಯಾ ಬಾಯ್ಲೆಕ್ ಹಾಚೆರ್ ಸೈನ್ ಕರುಂಕ್ ಸಾಂಗ್!"
ರಾಶಿದಾನ್ ಹೆವ್ಶಿಂ ತೆವ್ಶಿಂ ಪಳವ್ನ್ ಮುಕಾರ್ ತಾಚ್ಯಾ ದೊಳ್ಯಾಂ ದಿಶ್ಟೆಕ್ ಸಾಂಪಡ್ಲೆಲ್ಯಾ ಸಾಲಾಂತ್ಲ್ಯಾ ಟೀಪಾಯಿಚೆರ್ ಆಪ್ಲ್ಯಾ ಹಾತಾಂತ್ಲ್ಯಾ ತ್ಯಾ ರಿಸಿಗ್ನೇಶನ್ ಲೆಟರಾಕ್ ದವರ್ಲೆಂ.
"ರಾಶಿದ್!" ಆತಾಂ ಉಲಯ್ಲೊ ಎದೊಳ್ ವರೇಗ್ ನಾಸಿರಾಕ್ ಏರ್ಗನ್ನ್ ಜೊಕುನ್ ದವರ್ಲ್ಲೊ ವ್ಯಕ್ತಿ. ".....ಇತ್ಲೊ ಲಾಂಭ್ ವೇಳ್ ಕಿತ್ಯಾಕ್? ಎಕಾಚ್ ಜಟ್ಕ್ಯಾನ್ ಹಾಕಾ ಉಡಯ್ತಾಂ. ಹೊ ಕಲಾಸ್ ಜಾಲೊ ಜಾಲ್ಯಾರ್ ಮಾಗಿರ್ ಹೆಂ ಸೈನ್ಯ್ ಮಾರ್ತೆಲೆಂ ಆನಿ ತುಜ್ಯಾ ಪಾಂಯಾಂಕ್ಯ್ ಪಡ್ತೆಲೆಂ!" ದುಸ್ರೊ ವ್ಯಕ್ತಿ ಆಮ್ಸೊರಾರ್ ಆಸ್ಲ್ಲ್ಯಾ ಪರಿಂ ದಿಸ್ತಾಲೊ.
"ಚಲ್! ಉಡಯ್ ತಾಕಾ!" ಎಕಾಚ್ಚ್ಫರಾ ರಾಶಿದಾನ್ ಆದೇಶ್ ದಿಲೊ.
"ವಾಟ್ ಇಸ್ ಗೋಯಿಂಗ್ ಆನ್? ಆಲಿಯಾ... ಹೆಂ ಕಿತೆಂ ಜಾತಾ? " ಭಿಂಯಾನ್ ಕಾಂಪ್ಲ್ಲೊ ನಾಸಿರ್ ಆಪ್ಣಾಕ್ ಗನ್ನ್ ಜೊಕುನ್ ದರ್ಲೆಲ್ಯಾ ವ್ಯಕ್ತಿ ತೆವ್ಶಿಂ ಘುಂವೊನ್, "ಏಕ್ ಮಿನಿಟ್.... ಏಕ್ ಮಿನಿಟ್!" ನಾಸಿರಾನ್ ಜಿವಾಚ್ಯಾ ಆಕ್ಲಾಸಾನ್ ವಿನತಿ ಕೆಲಿ.
"ಚಲ್! ತುಜ್ಯಾ ಬಾಯ್ಲೆಕ್ ಹ್ಯಾ ಪೇಪರಾಕ್ ಸೈನ್ ಕರುಂಕ್ ಸಾಂಗ್! ತಾಣೆಂ ಸೈನ್ ಕೆಲ್ಯಾರ್ ತುಂ ವಾಂಚ್ಲೊಯ್! ನಾ ಜಾಲ್ಯಾರ್....!" ರಾಶಿದ್ ಮುಕ್ಲ್ಯಾ ಸೊಫಾಚೆರ್ ಬಸ್ಲೊ.
"ಡೂ ಇಟ್... ಆಲಿಯಾ ಡೂ ಇಟ್!"
ನಾಸಿರಾನ್ ಕಾಂಯ್ಚ್ ಪಾಟಿಂ ಮುಕಾರ್ ಚಿಂತ್ಲೆಂ ನಾ. ತಾಕಾ ತಾಚ್ಯಾ ಜಿವಾಚೆಂ ಭ್ಯೆಂ ಲಾಗ್ಲ್ಲೆಂ.
ಆಪ್ಣಾಕ್ ಸೈನ್ ಕರುಂಕ್ ಸಾಂಗ್ಚ್ಯಾ ಆಪ್ಲ್ಯಾ ಘೊವಾಕ್ಚ್ ಥೊಡ್ಯಾ ಕ್ಷಣಾಂಕ್ ಆಪ್ಲ್ಯಾ ತೀಕ್ಷ್ಣ್ ನದ್ರೆನ್ ಆಲಿಯಾನ್ ಪಳೆಲೆಂ. ತಾಚ್ಯಾ ಮತಿಂತ್ ವ್ಹಳೂ ತೂಫಾನ್ ಉಟೊಂಕ್ ಲಾಗ್ಲೆಂ.
ಆಪ್ಲೆಂ ಜಿವಿತ್ ಕೊಣಾಯ್ ಮುಕಾರ್ ತಕ್ಲಿ ಬಾಗಾಯ್ನಾಸ್ತಾನಾ ಕಾಡ್ಲೆಲೆಂ ತೆಂ ಆಜ್ ಹ್ಯಾ ತೀನ್ ಕಾಸಾಂಚಾ ಗೂಂಡಾ ಮುಕಾರ್ ಆಪ್ಣಾಕ್ ಶರಣಾಗತ್ ಜಾಂವ್ಕ್ ಲಾಯ್ತಾ. ತೆಂಯ್ ಆಪ್ಲ್ಯಾ ಘೊವಾಚೊ ಜೀವ್ ಆಡವ್ ದವರುನ್! ಕಿತೆಂ ಕರುಂ ಆತಾಂ? ಹಾಂವೆ ಜರ್ ಸೈನ್ ಘಾಲಿ ತರ್ ಸಗ್ಳೆಂ ಸಂಪದಿತೆಲೆಂ. ಹ್ಯಾ ಘಡಿಯೆ ’ಯಾ ಅಲ್ಲಾಹ್’ ತುಂಚ್ ಮ್ಹಾಕಾ ಪಾವ್! ಹ್ಯಾ ಘಡಿಯೆಂತ್ಲೆಂ ತುಂಚ್ ಮ್ಹಾಕಾ ಹಾವೆಂ ಸಾಲ್ವಾರ್ ಜಾಂವ್ಚೊ ಉಪಾಯ್ ದಾಕಯ್!" ಆಲಿಯಾನ್ ಆಪ್ಲ್ಯಾ ಖುದಾಕ್ ಉಡಾಸ್ ಕೆಲೊ.
"ಆಲಿಯಾ....! ಸೈನ್ ಕರ್ ಆಲಿಯಾ! ಪ್ಲೀಸ್!" ನಾಸಿರ್ ಭಿಯಾಣ್ ಕಾಂಪ್ತಾಲೊ. ತಾಕಾ ತಾಚೆಂ ಮರಣ್ ತಾಚ್ಯಾ ದೊಳ್ಯಾಂ ಮುಕಾರ್ ದಿಸೊಂಕ್ ಲಾಗ್ಲೆಂ.
"ಮ್ಯಾಡಮ್ ಲಿಫ್ಟ್ ಚಲಾನಾ. ತುಮಿ ಚಲೊನ್ ಗೆಲ್ಯಾರ್ಚ್ ಬರೆಂ ಆಸಾ! ಹಾಂವ್ ಸರ್ವಿಸ್ವಾಲ್ಯಾಂಕ್ ಪೋನ್ ಕರ್ತಾಂ!" ಗೂರ್ಖಾನ್ ಅಮೀನಾಕ್ ಸಾಂಗ್ತಾನಾ, ದುಸ್ರೊ ಕಾಂಯ್ ಉಪಾಯ್ ನಾತ್ಲೆಲಿಂ ದೊಗಾಂಯ್ ಶಿಡಿಯೊ ಚಡೊಂಕ್ ಲಾಗ್ಲಿಂ.
"ಬೇಟಿ..... ತುಜೆಂ ಕಾಮ್ ಕಶೆಂ ಚಲ್ತಾ?" ಶಿಡಿಯೊ ಚಡ್ತಾನಾ ಮೌನತಾ ಮೊಡುನ್ ಸುಲೇಮಾನಾನ್ ಸವಾಲ್ ಕೆಲೆಂ.
"ಹಾಂ ಚಾಚಾ...! ಎಕೇಕ್ ಪಾವ್ಟಿಂ ಮಸ್ತ್ ಬಿಜಿ ಆಸ್ತಾಂ. ಪುಣ್ ಚಲ್ತಾ! ಲಾಯರಾಚೆಂ ಶಿಕಾಪ್ ಶಿಕ್ತಾನಾ ಮ್ಹಾಕಾ ಖಬಾರ್ ನಾತ್ಲ್ಲಿ ಶಿಕ್ಪಾ ಭಾಯ್ಲಿಂ ಹ್ಯಾ ಸಮಾಜೆಂತ್ಲಿಂ ಕಾನೂನಾಂ.... ಕಿತೆಂ ಕರಿಯಾಂ? ಆಜ್ ಕಾಲ್ ಸಗ್ಳೆಂ ಬಿಜ್ನೆಸ್ ಜಾವ್ನ್ ಗೆಲಾಂ!"
ಶಿಡಿಯೆ ವಯ್ಲ್ಯಾನ್ ಉಲೊಣೆಂ ಆಯ್ಕೊನ್ ಪಯ್ಲೆಂ ವಯ್ರ್ ಆಯಿಲ್ಲ್ಯಾ ಗೂರ್ಖಾನ್ ಸಾಂಗ್ಲೆಲ್ಯಾ ಪರಿಂ ಕೋಣ್ ತರ್ಯ್ ಶಿಡಿಯೆ ವಯ್ಲ್ಯಾನ್ ಚಲೊನ್ ಯೆತಾತ್ ತೆಂ ಕಳಿತ್ ಜಾಲ್ಲೆ ನಾಸಿರಾಚಾ ಘರಾ ಭಾಯ್ರ್ ಪಾರೊ ಕರ್ಚೆ ದೊಗ್ಯ್ ವ್ಯಕ್ತಿ ಆತಾಂ ಜಾಗ್ರುತ್ ಜಾಲೆ. ತಾಂಚೆ ಪಯ್ಕಿ ಎಕ್ಲ್ಯಾನ್ ತ್ಯಾ ಶಿಡಿಯೆ ಮಧ್ಲ್ಯಾ ಜಾಗ್ಯಾ ಮುಖಾಂತ್ರ್ ವಯ್ರ್ ಥಾವ್ನ್ ಸಕಯ್ಲ್ ತಿಳುನ್ ಪಳೆಲೆಂ.
"ಚಲ್ ಭಾಯಿಕ್ ಜಾಗಯ್!" ಶಿಡಿಯೆರ್ ಥಾವ್ನ್ ಸಕಯ್ಲ್ ತಿಳುನ್ ಪಳೆಲ್ಲ್ಯಾ ವ್ಯಕ್ತಿನ್ ದುಸ್ರ್ಯಾಕ್ ಸಾಂಗ್ಲೆಂ.
ದುಸ್ರೊ ವ್ಯಕ್ತಿ ಆತಾಂ ಮುಕಾರ್ ಸರೊನ್ ರಾಶಿದಾಕ್ ಜಾಗಂವ್ಚ್ಯಾ ಖಾತಿರ್ ಆನಿ ಕಿತೆಂ ನಾಸಿರಾಚ್ಯಾ ಘರಾಚ್ಯಾ ದಾರಾರ್ ಮಾರ್ತಾ ಮ್ಹಣ್ತಾನಾ, ಹ್ಯಾ ಕುಶಿಚ್ಯಾ ಅಪಾರ್ಟ್ಮೆಂಟಾಚೆಂ ದಾರ್ ಉಗ್ತೆಂ ಜಾವ್ನ್ ಏಕ್ ಪ್ರಾಯೆಸ್ತ್ ಬಾಯ್ಲ್ ಭಾಯ್ರ್ ಆಯ್ಲಿ. ತಿಕಾ ಪಳವ್ನ್ ಕಾಲುಬುಲು ಜಾಲ್ಲ್ಯಾ ವ್ಯಕ್ತಿನ್ ಆಪ್ಲಿ ನದರ್ ಹೆವ್ಶಿಂ ತೆವ್ಶಿಂ ಭೊಂವ್ಡಾಂವ್ಕ್ ಆರಂಭ್ ಕರ್ತಾನಾ ದುಸ್ರ್ಯಾ ವ್ಯಕ್ತಿನ್ ಲಿಫ್ತಾಕ್ ವೀಕ್ಷಣ್ ಕರ್ಚೆಂ ನಟನ್ ಕೆಲೆಂ.
"ಏ.... ವಚ್ ರೇ ಫೋರ್ಮ್ಯಾನಾಕ್ ಪೋನ್ ಮಾರ್! ಲಿಫ್ಟಾಂತ್ ಘಡ್ಬಡ್ ಆಸಾ!"
"ಕಾಯ್ ಜಾಲಾ?" ಮರಾಠಿಂತ್ ವಿಚಾರ್ಲೆಂ ದುಸ್ರ್ಯಾನ್.
"ತುಜ್ಯಾ ಆಯ್ ಲಾ....."
ಪಯ್ಲೊ ಉಲಯಿಲ್ಲೊ ಆತಾಂ ಗಾಳಿ ಯೆಟುಂಕ್ ಲಾಗ್ತಾನಾ ಖರೆಂಚ್ ಲಿಫ್ಟ್ ಪಾಡ್ ಜಾಲಾಂ ಮ್ಹಣ್ ಕಳ್ಲ್ಲಿ ತಿ ಪ್ರಾಯೆಸ್ತ್ ಬಾಯ್ಲ್ ಪರ್ತ್ಯಾಕ್ ದಾರ್ ಉಗ್ತೆಂ ಕರುನ್ ಕಾಂಯ್ಚ್ ಉಲಯ್ನಾಸ್ತಾನಾ ಭಿತರ್ ಚಲ್ಲಿ. ತಿಚೆ ಪಾಟ್ಲ್ಯಾನ್ ತಿಣೆ ದಾರ್ ಭಂಧ್ ಕರ್ತಾನಾ ಹ್ಯಾ ಭಾಯ್ಲ್ಯಾ ದೊಗಾಂಯ್ನಿ ಎಕಾ ಮೆಕಾಕ್ ಪಳವ್ನ್ ತಕ್ಲಿ ಹಾಲಯ್ಲಿ.
ಆಪ್ಣಾ ಥಾವ್ನ್ ಆನಿ ಕಾಂಯ್ ಕರುಂಕ್ ಜಾಯ್ನಾ ತೆಂ ಆಲಿಯಾಕ್ ಕಳ್ಳೆಂ. ಆಪ್ಣಾ ಖಾತಿರ್ ತೆಂ ಹಟ್ಟಾನ್ ಜೀವ್ ಜಾಲ್ಯಾರ್ಯ್ ದೀಂವ್ಕ್ ತಯಾರ್. ಪುಣ್ ಆತಾಂ ಆಪ್ಣಾಚಾ ಹಟ್ಟಾ ಖಾತಿರ್ ಆಪ್ಲ್ಯಾ ಘೊವಾಚೊ ಜೀವ್ ರಿಸ್ಕೆರ್ ಆಸಾ ಮ್ಹಣ್ತಾನಾ ಆಪುಣ್ ಸಲ್ವಾಲ್ಲೊ ಅನುಭವ್ ತಾಕಾ ಜಾಲೊ.
"ಚಲ್! ತುಂ ಜಿಕ್ಲೊಯ್! ಹಾಂವ್ ಹಾಚ್ಯೆರ್ ಸೈನ್ ಕರ್ತಾಂ. ನಾಸಿರಾಕ್ ವಚೊಂಕ್ ಸೊಡ್!"
"ಹೊ ತುಜೊ ಕಸಲೊ ನಾಟಕ್? ಮ್ಹಜ್ಯಾ ಲಾಗಿಂ ವೇಳ್ ನಾ. ವೆಗ್ಗಿಂ ಸೈನ್ ಕರ್!"
"ಹೊ ಮ್ಹಜ್ಯಾ ಆನಿ ತುಜ್ಯಾ ಮಧ್ಲೊ ವಿಶಯ್! ತುಂ ನಾಸಿರಾಕ್ ಹಾಂತುಂ ಮಧೆಂ ಹಾಡಿನಾಕಾ! ತಾಕಾ ವಚೊಂಕ್ ಸೊಡ್!" ಆಲಿಯಾಚೆಂ ಶಾಂತ್ಪಣಾಚಿ ವಿನತಿ.
"ತು ಸೈನ್ ಕರ್ ಸಾಲೀ....!" ರಾಶಿದಾನ್ ರಾಗಾನ್ ದಾಂತ್ ಚಾಬ್ಲೆ.
"ಆಲಿಯಾ ಸೈನ್ ಕರ್ ಪ್ಲೀಸ್!" ನಾಸಿರಾಚಿ ಖಾಲ್ತಿ ವಿನತಿ.
"ರಾಶಿದ್! ಹಾಂವ್ ಭಿಯೆಂವ್ಚೆಂ ಚೆಡುಂ ನ್ಹಯ್! ತುಂ ನಾಸಿರಾಕ್ ವಚೊಂಕ್ ಸೊಡ್!"
"ರಾಶಿದ್! ಯೇ ಸಾಲೀ ಕ್ಯಾ ನಾಟಕ್ ಕರ್ ರಹೀ ಹೇ!" ದುಸ್ರೊ ವ್ಯಕ್ತಿ ತಾಪ್ಲೊ.
"ನಾಸಿರಾಕ್ ವಚೊಂಕ್ ಸೊಡ್ ರಾಶಿದ್!"
ನಾಸಿರ್ ಏಕ್ ಪಾವ್ಟಿಂ ರಾಶಿದಾಕ್ ಏಕ್ ಪಾವ್ಟಿಂ ಆಲಿಯಾಕ್ ಪಳೆತಾಲೊ.
"ರಾಶಿದ್, ಹೆಂ ಆಯ್ಕೊಂವ್ಚೆಂ ಚೆಡುಂ ನ್ಹಯ್! ಹಾಕಾ ಉಕ್ಲುನ್ ತ್ಯಾ ಜನೆಲಾ ಥಾವ್ನ್ ಭಾಯ್ರ್ ಮಾರ್ಯಾಂ....! ಕಿಸ್ಸಾ ಕತಂ!"
"ಮ್ಹಾಕಾ ಚಿಂತುಂಕ್ ಸೊಡ್!" ರಾಶಿದ್ ಪಿಸಾಂತುರ್ ಜಾಲೊ. ತಾಚ್ಯಾ ಜಿವಿತಾಂತ್ ಪಯ್ಲ್ಯಾ ಪಾವ್ಟಿಂ ಎಕಾ ಚಲಿಯೆ ಮುಕಾರ್ ತೊ ಇತ್ಲೊ ಲಾಚಾರ್ ಜಾಲ್ಲೊ.
"ವೇಳ್ ನಾ ರಾಶಿದ್! ಭಾಯಿನ್ ಕಿತೆಂ ಸಾಂಗ್ಲಾಂ ತೆಂ ತುಂ ಜಾಣಾಂಯ್! ಹೆಂ ಇತ್ಲ್ಯಾ ವೆಗ್ಗಿಂ ಮೊರ್ಚೆಂ ನಾ! ಫಾಲ್ಯಾಂಯ್ ದೀಸ್ ಆಸಾ. ಫಾಲ್ಯಾಂ ಪಳೆಯಾಂ.....! ದುಸ್ರ್ಯಾನ್ ರಾಶಿದಾಕ್ ಜಾಗಯ್ಲೆಂ.
"ಫಾಲ್ಯಾಂ......? ಆಜ್ ಮ್ಹಾಕಾ ಕಶಿ ನೀದ್ ಯೆತೆಲಿ?" ರಾಶಿದ್ ಸಗ್ಳೊಚ್ ದೆದೆಸ್ಪರ್ ಜಾಲೊ.
"ಫಿರ್ ಉಡಾದೆ ಸಾಲೀಕೊ! ಭಾಯಿಕ್ ಆಮಿಂ ಮಾಗಿರ್ ಸಮ್ಜಾವ್ಯಾಂ!" ದುಸ್ರ್ಯಾ ವ್ಯಕ್ತಿನ್ ನಿಮಾಣಿಂ ವಾಟ್ ದಾಕಯ್ಲಿ.
ತಿತ್ಲೆಂಚ್!
ರಾಶಿದ್ ಆತಾಂ ಸೊಫಾ ವಯ್ಲೊ ಉಟ್ಲೊ.
ಹೆವ್ಶಿಂ ಅಯಿಲ್ಲೊ ತೊ ನಾಸಿರಾಚಾ ಲಾಗಿಂ ಯೇವ್ನ್,
"ತುಜ್ಯಾ ಬಾಯ್ಲೆಕ್ ತುಜಿ ಗರ್ಜ್ ನಾ....!" ನಾಸಿರಾಕ್ ಕಿತೆಂ ಜಾತಾ ತೆಂ ಕಳ್ಚ್ಯಾ ಪಯ್ಲೆಂಚ್ ರಾಶಿದಾನ್ ಆಪ್ಲೆಂ ಗನ್ನ್ ಕಾಡುನ್ ನಾಸಿರಾಚಾ ತಕ್ಲೆಕ್ ದಾಂಬುನ್ ಧರ್ಲೆಂ.
"ಚಲ್ ಆತಾಂ ಸಾಂಗ್! ತೊ ಕೋಣ್ ಮನಿಸ್? ತುಕಾ ಜಾಯ್ ಜಾಲ್ಲೊ ತೊ ಕೋಣ್? ತುವೆಂ ಸಾಂಜೆರ್ ಪೋನ್ ಕರವ್ನ್ ಮ್ಹಜ್ಯಾ ಭಾವಾ ಸಾಂಗಾತಾ ಮಾಂಡವಳಿ ಕೆಲ್ಲೊ ತೊ ಮನಿಸ್ ಕೋಣ್? ಸಾಂಗ್. ತುಕಾ ಆನಿ ತುಜ್ಯಾ ಘೊವಾಕ್ ದೊಗಾಂಯ್ಕ್ಯ್ ಸೊಡ್ಲೆಂ! ಚಲ್! ಸಾಂಗ್ ತೊ ಮನಿಸ್ ಕೋಣ್?"
ರಾಶಿದಾನ್ ಮತಿಂತ್ಚ್ ದೊಗಾಂಯ್ಕ್ಯ್ ಮಾರ್ಚೆಂ ಪ್ಲ್ಯಾನ್ ಕೆಲ್ಲೆಂ. ಪುಣ್ ಆಲಿಯಾಚಾ ಪಾಟ್ಲ್ಯಾನ್ ಆಸ್ಲ್ಲ್ಯಾ ತ್ಯಾ ಅಪರಿಚಿತ್ ವ್ಯಕ್ತಿಚೆಂ ಭಳ್ ಪಯ್ಲೆಂ ತುಕುನ್ ಪಳಯ್ಲ್ಯಾ ಶಿವಾಯ್ ಹೆಂ ಕಾಮ್ ಸಾದ್ಯ್ ನಾತ್ಲ್ಲೆಂ. ರಿಸಿಗ್ನೇಶನ್ ಲೆಟರಾಕ್ ಕಶೆಂಯ್ ಹೆಂ ಸೈನ್ ಕರುಂಕ್ ಆಯ್ಕಾನಾ. ಘೊವಾಚ್ಯಾ ಜಿವಾಚೆಂ ಭೆಂ ಹಾಕಾ ನಾ. ತರ್ ಹಾಕಾ ಕಲಾಸ್ ಕರುನ್ಚ್ ಸಮಾಧಾನ್ ಜೊಡ್ಚೆಂ ಬರೆಂ. ಹಾಚ್ಯಾ ಪಯ್ಲೆಂ ಆಪ್ಣಾಕ್ ತ್ಯಾ ವ್ಯಕ್ತಿಚೆಂ ನಾಂವ್ ಕಳೊಂಕ್ ಜಾಯ್. ಹಾಕಾ ಕೊಣೆಂ ಸಾಂಜೆರ್ ಹೆಲ್ಪ್ ಕೆಲಾಂ ತೆಂ.
"ಚಲ್ ಬತಾ! ಜಲ್ದೀ. ದೇಕ್....., ಯೆ ಕಿಸ್ಸಾ ಯಹಾಂ ಕತಮ್! ಏ ಘೊಡಾ ನಿಚೆ ಕರ್! ಕಲಾಸ್.....!" ರಾಶಿದಾನ್ ಆಪ್ಲೆಂ ಗನ್ನ್ ಆಪ್ಲ್ಯಾ ಪೆಂಟಾಚಾ ಬೊಲ್ಸಾಕ್ ರಿಗಯ್ಲೆಂ.
"ಏ ತೆರೆಕೊ ಸುನ್ತಾ ನಹೀಂ ಕ್ಯಾ? ಘೊಡಾ ನೀಚೆ ಕರ್!" ದುಸ್ರ್ಯಾ ವ್ಯಕ್ತಿ ವಯ್ರ್ ರಾಶಿದ್ ಬೊಬಾಟ್ಲೊ.
ದುಸ್ರ್ಯಾ ವ್ಯಕ್ತಿನ್ಯ್ ಆತಾಂ ಆಪ್ಲೆಂ ಗನ್ನ್ ಸಕಯ್ಲ್ ಕೆಲೆಂ.
ಆಲಿಯಾ ಅಜೂನ್ ತಶೆಂಚ್ ಮೌನ್ ಉಭೆಂ ಆಸ್ಲ್ಲೆಂ.
"ಆತಾಂಯ್ ಸಾಂಗಿನಾಂಯ್? .....’ಹುಫ್’ ಕರುನ್ ವ್ಹಡ್ಲೊ ಶ್ವಾಸ್ ಭಾಯ್ರ್ ಫುಂಕ್ಲ್ಲ್ಯಾ ರಾಶಿದಾನ್ ಆಪ್ಲಿ ಖಾಡ್ಕಿ ಖೊರ್ಪಿಲಿ.
ತಿತ್ಲೆಂಚ್!
ವಾರ್ಯಾ ವೆಗಾನ್ ತ್ಯಾಚ್ ಹಾತಾನ್ ಆಪ್ಲ್ಯಾ ಪ್ಯಾಂಟಾಚಾ ಬೊಲ್ಸಾಂತ್ ಆತ್ತಾಂ ಲೊಟ್ಲೆಲ್ಯಾ ತ್ಯಾ ಏರ್ಗನ್ನಾಕ್ ಭಾಯ್ರ್ ವೊಡುನ್ ಆಲಿಯಾಕ್ ತಾಣೆಂ ಜೊಕುನ್ ಧರ್ತಾನಾ ತ್ಯಾಚ್ ವೆಳಾರ್ ರಾಶಿದಾಚಾ ಬೊಲ್ಸಾಂತ್ಲೆಂ ಸೆಲ್ಪೋನ್ ವ್ಹಾಜೊಕ್ ಲಾಗ್ಲೆಂ!
ಆಲಿಯಾಕ್ ಗನ್ನ್ ಜೊಕುನ್ ಧರ್ಲೆಲ್ಯಾ ರಾಶಿದಾಚೆ ವೋಂಟ್ ರಾಗಾನ್ ಹಾಲ್ತಾಲೆ.
ನಾಸಿರಾನ್ ಎದೊಳ್ಚ್ ದೊಳೆ ದಾಂಪ್ಲ್ಲೆ.
"ಏಕ್ ಸೆಕೆಂಡ್ ಕೆ ಲಿಯೆ ಬಚ್ ಗಯೀ....!"
ರಾಶಿದಾಕ್ ಆಪ್ಣಾ ಮುಕಾರ್ ಕಾಂಯ್ಚ್ ದುಸ್ರೊ ಉಪಾಯ್ ನಾಸ್ತಾನಾ ವೆತಾನಾ ತಾಣೆಂ ಆಪ್ಲೆಂ ಸೆಲ್ಪೋನ್ ಭಾಯ್ರ್ ಕಾಡ್ಲೆಂ. ತೆಂ ಕಾನಾಂಕ್ ಲಾಯಿಲ್ಲ್ಯಾ ತಾಕಾ ಘಡ್ಗಡೊ ಮಾರ್ಲ್ಲ್ಯಾ ಪರಿಂ ಜಾಲೆಂ.
"ಹಾಂ ಭಾಯಿ!" ರಾಶಿದ್ ಎಕ್ಚ್ ಸಬ್ದ್ ಉಲಯ್ಲೊ ಶಿವಾಯ್ ತೊ ದುಸ್ರೆಂ ಕಾಂಯ್ ಉಲಯ್ಲೊ ನಾ. ಫಕತ್ತ್ ತ್ಯಾ ಕುಶಿಚ್ಯಾ ಆಪ್ಲ್ಯಾ ಭಾವಾಚ್ಯಾ ತಾಳ್ಯಾಕ್ ತೊ ಆಯ್ಕಾತಾಲೊ.
"ಅಚ್ಚಾ ಭಾಯೀ!" ರಾಶಿದಾನ್ ಪೋನ್ ಭಂಧ್ ಕೆಲೆಂ.
"ಭಾಯೀಕ್ ಕಶಿ ಖಬಾರ್ ಗೆಲಿ? ಹ್ಯಾ ಸಾಲೀನ್ ಕಿತೆಂ ತರ್ಯ್ ಕೆಲಾಂ. ನಾಂ ಜಾಲ್ಯಾರ್ ಹಾಂವ್ ಹಾಂಗಾ ಆಸ್ಲ್ಲಿ ಖಬಾರ್ ಭಾಯಿಕ್...!" ರಾಶಿದಾಕ್ ಪಾತ್ಯೆಂವ್ಕ್ ಜಾಲೆಂ ನಾ.
"ಹೆಂ ಪಳಯ್ತಾ ತಶೆಂ ನಾ!" ಮ್ಹಳ್ಳೊ ರಾಶಿದ್ ಆತಾಂ ನಾಸಿರಾ ತೆವ್ಶಿಂ ಘುಂವೊನ್,
"ತುಂ ಜಾಣಾಂಯ್ ತೊ ಕೋಣ್ ಮ್ಹಣೊನ್? ನಾ! ತುಕಾ ಪಳೆತಾನಾಚ್ ಕಳ್ತಾ ತುಕಾ ಕಾಂಯ್ ಹ್ಯಾ ವಿಶಯಾಂತ್ ಖಬಾರ್ ನಾ. ಪುಣ್ ತುಜ್ಯಾ ಬಾಯ್ಲೆಕ್ ಕೋಣ್ ತರ್ಯ್ ಆಸಾ! ತುಜೆಂ ಬಾಯ್ಲ್ ಪಳಂವ್ಚ್ಯಾ ಪರಿಂ ನಾ. ತಾಕಾ ಕೋಣ್ ತರ್ಯ್ ಆಸಾ!" ರಾಶಿದಾನ್ ಏರ್ಗನ್ನಾನ್ ಆಪ್ಲ್ಯಾ ಮಾತ್ಯಾಕ್ ಖೊರ್ಪಿಲೆಂ.
ತಿತ್ಲ್ಯಾರ್!
ಮುಕ್ಲ್ಯಾ ದಾರಾರ್ ಮಾರ್ಲ್ಲೊ ಆವಾಜ್! ತಾಚ್ಯಾ ಪಾಟ್ಲ್ಯಾನ್ ದಾರಾಚಿ ಕಾಂಪಿಣ್ ವ್ಹಾಜ್ಲಿ!
"ಚಲ್ರೇ! ಹೇಯ್......?"
ರಾಶಿದ್ ದಾರಾ ತೆವ್ಶಿಂ ಚಮ್ಕಾತಾನಾ ದುಸ್ರ್ಯಾ ವ್ಯಕ್ತಿನ್ ರಾಶಿದಾಚೊ ಪಾಟ್ಲಾವ್ ಕೆಲೊ. ದಾರಾರ್ ಪಾವ್ಲ್ಲೊ ತೊ ಘುಂವೊನ್ ಪಾಟಿಂ ಪಳವ್ನ್,
"ಉಸ್ಕೊ ಮೆರಾ ಸಲಾಮ್ ಬೋಲ್ದೇನಾ!"
ದಾರ್ ಉಗಡ್ಲ್ಲೊ ರಾಶಿದ್ ಭಾಯ್ರ್ ಆಯ್ಲೊ. ಭಾಯ್ರ್ ಆಯಿಲ್ಲ್ಯಾ ತಾಕಾ ದಾರಾ ಮುಖಾರ್ ಸುಲೇಮಾನ್ ಆನಿ ಅಮೀನಾ ದೊಗಾಂಯ್ ಸಾಂಗಾತಾ ದಿಸ್ಲಿಂ. ತಾಂಕಾಚ್ ಪಳೆಲ್ಲ್ಯಾ ರಾಶಿದಾನ್ ಕಾಂಯ್ಚ್ ಉಲಯ್ನಾಸ್ತಾನಾ ಶೀದಾ ಭಾಯ್ರ್ ಗೆಲ್ಲೊ ತೊ ಲಿಪ್ಟಾ ಭಿತರ್ ಘುಸ್ಲೊ. ಎಕ್ಲ್ಯಾನ್ ಲಿಫ್ಟಾಚ್ಯಾ ಸ್ಟಾಪ್ ಸ್ವಿಚ್ಚಾಕ್ ದಾಂಬುನ್ ದರಯಿಲ್ಲ್ಯಾ ಟೂತ್ಪಿಕ್ಕಾಕ್ ವೊಡುನ್ ಕಾಡ್ತಾನಾ ಲಿಫ್ಟಾಚೆಂ ದಾರ್ ಭಂಧ್ ಜಾಲೆಂ. ತಾಣಿಂ ಗ್ರೌಂಡ್ ಪ್ಲೋರಾಚೊ ಬಟನ್ ದಾಂಬ್ತಾನಾ ಲಿಫ್ಟ್ ಚಾಲು ಜಾವ್ನ್ ಸಕಯ್ಲ್ ಧಾಂವೊಂಕ್ ಲಾಗ್ಲಿ.
*************
ಎಕ್ಚ್ ಸೆಕುಂದಾಚೊ ಅಂತರ್!
ರಾಶಿದಾನ್ ಸಾಂಗ್ಲ್ಲ್ಯಾ ಪರಿಂ ಎಕಾಚ್ ಸೆಕುಂದಾಚಾ ಅಂತರಾನ್ ಆಲಿಯಾಚೊ ಜೀವ್ ಉರ್ಲ್ಲೊ. ತಾಣೆಂ ಮಾಗ್ಲ್ಲೆಂ ಮಾಗ್ಣೆ ಖುದಾನ್ ಆಯ್ಕಾಲ್ಲೆಂ ಯಾ ತಾಚೆಂ ಆವ್ಕ್ ತಾಚ್ಯಾ ಖುದಾನ್ ಪಯ್ಲೆಂಚ್ ಬರವ್ನ್ ದವರ್ಲ್ಲೆಂ ತೆಂ ಸಮ್ಜೊಂಚೊ ಆಲಿಯಾಕ್ ಸಾದ್ಯ್ ನಾತ್ಲ್ಲೆಂ. ಪುಣ್ ಆಲಿಯಾ ಮಾತ್ರ್ ಎಕಾಚ್ಚ್ ಸೆಕುಂದಾಚಾ ಅಂತರಾನ್ ಆಯ್ಚಾ ಆನ್ವಾರಾ ಥಾವ್ನ್ ಬಚಾವ್ ಜಾಲ್ಲೆಂ!
ಬಚಾವ್ ಜಾಲ್ಲೆಂ ಯಾ ಬಚಾವ್ ಕೆಲ್ಲೆಂ.....?
ವ್ಹಯ್!
ನಿದ್ಚ್ಯಾ ಕುಡಾಂತ್ ದುಸ್ರೆ ಪಾವ್ಟಿಂ ವಾಜ್ಲೆಲ್ಯಾ ಪೊನಾಕ್ ಆಲಿಯಾನ್ ಭಂಧ್ ಕರ್ಚೆಂ ಸೊಡುನ್ ತಾಕಾ ಆನ್ ಕೆಲ್ಲೆಂ! ಆಲಿಯಾ ಜಾಣಾಂ ಆಸ್ಲ್ಲೆಂ ಕೀ ಹಾಂಗಾ ಕಿತೆಂ ಚಲ್ತಾ ತೆಂ ಸಗ್ಳೆಂ ತ್ಯಾ ಕುಶಿನ್ ಅಭಿಲಾಶ ಆಯ್ಕಾತೆಲೆಂ ಆನಿ ನಮಿತಾಕ್ ಸಾಂಗೊನ್ ಕಾಂಯ್ ನಾ ತರ್ ಕಾಂಯ್ ತರ್ಯ್ ಕರ್ತೆಲೆಂ! ಆನಿ ಆಶೆಂಚ್ ಜಾಲ್ಲೆಂ. ಪುಣ್ ತ್ಯಾ ಆಕಾಂತಾಚಾ ವೆಳಾರ್ಯ್ ಆಲಿಯಾಚಾ ಮಾತಿಕ್ ಹೆಂ ಝಳ್ಕಾಲ್ಲೆಂ ಮಾತ್ರ್ ನಿಜಾಯ್ಕ್ಯ್ ಆಲಿಯಾಚಾ ಧಯ್ರಾಚಿ ರುಜ್ವಾತ್!
"ಬೇಟಾ...., ಕಿತೆಂ ಜಾಲೆಂ? ಕೆದ್ನಾಂ ಥಾವ್ನ್ ಹಾಂವ್ ವಿಚಾರ್ನ್ ಆಸಾಂ. ವಿಶಯ್ ಕಿತೆಂ? ಬಹೂ...., ತುಕಾ ಜಾಲ್ಯಾರ್ಯ್ ಉಲಂವ್ಕ್ ಜಾಯ್ನಾಂ....?" ಸುಲೇಮಾನಾನ್ ಎದೊಳ್ಚೆಂ ಆಪ್ಲೆಂ ಮೌನ್ ಮೊಡ್ಲೆಂ.
ಸುಲೇಮಾನ್ ಆನಿ ಅಮೀನಾಕ್ ಹಾಂಗಾಚೊ ಮಿಸ್ತೆರ್ ಸಮ್ಜೊಂಕ್ ನಾತ್ಲ್ಲೊ. ತಿಂ ನಾಸಿರಾಚಾ ಅಪಾರ್ಟ್ಮೆಂಟಾಕ್ ಪಾವ್ತಾನಾ ಪಯ್ಲೆಂ ಲಿಫ್ಟ್ ಸಾರ್ಕಿ ನಾತ್ಲ್ಲಿ. ಶಿಡಿಯೊ ಚಡೊನ್ ವಯ್ರ್ ಪಾವ್ತಾನಾ ಉಗ್ತೆಂ ಜಾಲ್ಲ್ಯಾ ನಾಸಿರಾಚಾ ಘರಾ ಭಿತರ್ ಥಾವ್ನ್ ಭಾಯ್ರ್ ಆಯಿಲ್ಲೆ ದೋಗ್ ತರ್ನಾಟೆ ಸರಾಂರಾಂ ಲಿಫ್ಟಾ ಭಿತರ್ ಘುಸ್ಲ್ಲೆ ಆನಿ ಲಿಫ್ಟ್ ಚಾಲು ಜಾಲ್ಲಿ. ತಾಚ್ಯೆ ವಯ್ರ್ ಘರಾ ಭಿತರ್ ಪಾಂಯ್ ದವರ್ತಾನಾ ಭಿತರ್ಲೆಂ ವಾತಾವರಣ್ಚ್ ಬದ್ಲಾಲ್ಲ್ಯಾ ಪರಿಂ ದಿಸ್ತಾಲೆಂ. ನಾಸಿರ್ ಜಾಂವ್ ಆಲಿಯಾ ಜಾಂವ್ ದೊಗಾಂಯ್ ಕಾಂಯ್ಚ್ ಉಲಂವ್ಕ್ ನಾಂತ್. ಸೊಫಾ ವಯ್ಲ್ಯಾ ರಿಸಿಗ್ನೇಶನ್ ಲೆಟರಾಕ್ ದೊಗಾಂಯ್ನಿ ಪಳೆಲ್ಲೆಂ.
"ನಾಸಿರ್ ಕಾಂಯ್ ಆಲಿಯಾಕ್ ಭಲಾತ್ಕಾರೆನ್ ಏರ್ಹೊಸ್ಟೆಸಾಚಾ ಕಾಮಾಕ್ ರಿಸೈನ್ ದೀಂವ್ಕ್ ಪೆಚಾಡ್ತಾ?" ದೊಗಾಂಯ್ಚಾ ಮತಿಂತ್ ಹೆಂ ಸವಾಲ್ ಜರೂರ್ ಉಟ್ಲ್ಲೆಂ. ಪುಣ್ ಹೆಂ ವಿಚಾರುಂಕ್ ಮಾತ್ರ್ ದೊಗಾಂಯ್ಕ್ಯ್ ಧಯ್ರ್ ಆಯಿಲ್ಲೆಂ ನಾ. ಆಲಿಯಾ ಜರ್ತರ್ ತಾಂಚಾ ಫುಡ್ಯಾನ್ ನಾತ್ಲ್ಲೆಂ ಜಾಲ್ಯಾರ್ ಸುಲೇಮಾನ್ ಆನಿ ಅಮೀನಾ ಖಂಡಿತ್ ನಾಸಿರಾಕ್ ಹ್ಯಾ ವಿಶಿಂ ವಿಚಾರ್ತಿಂ. ಪುಣ್ ಆಲಿಯಾಚಾ ಮುಕಾರ್....?
ದೊಗಾಂಯ್ಕ್ಯ್ ನಾಸಿರಾನ್ ತಾಂಕಾ ಆಪ್ಲ್ಯಾ ಘರಾ ಆಪಯಿಲ್ಲ್ಯಾಚೊ ಮತ್ಲಬ್ ಸಮ್ಜಾಲೊ ನಾ. ಖರೆಂ ಸಾಂಗ್ಚೆಂ ಜಾಲ್ಯಾರ್ ನಸಿರಾಕ್ಚ್ ಆಪ್ಣೆ ಆಪ್ಲ್ಯಾ ಬಾಪಾಯ್ಕ್ ಆನಿ ಅಮೀನಾಕ್ ಹ್ಯಾ ರಾತಿಚ್ಯಾ ವೆಳಾರ್ ಹಾಂಗಾ ಕಿತ್ಯಾಕ್ ಆಪಯ್ಲಾಂ ಮ್ಹಳ್ಳೆಂ ತೆಂ ಕಳ್ಳೆಂ ನಾ. ಥೊಡ್ಯಾ ವೆಳಾ ಪಯ್ಲೆಂ ದೊಗಾಂಯ್ಕ್ಯ್ ಪೋನ್ ಕರುನ್ ಆಪಯ್ತಾನಾ, ಆಲಿಯಾಚಾ ಜಗ್ಡ್ಯಾಚಾ ಸಮಸ್ಯಾಕ್ ಪರಿಹಾರ್ ಸೊಧುಂಕ್ ತಾಣೆಂ ಬಾಪಾಯ್ಕ್ ಆನಿ ಅಮೀನಾಕ್ ಆಪಯಿಲ್ಲೆಂ. ಪುಣ್ ಆತಾಂ.....?
ಆತಾಂ ತೊಚ್ಚ್ ಸಮಸ್ಸೊ ಜೀವನ್ ಆನಿ ಮರಣಾಕ್ ನಾಸಿರಾಚ್ಯಾ ದೊಳ್ಯಾಂ ಮುಕಾರ್ ದಾಕವ್ನ್ ಭಾಯ್ರ್ ಗೆಲ್ಲೊ. ಹೊ ತಾತ್ಕಾಲಾಕ್ ಯಾ ಸಾಸ್ಣಾಕ್ ತೆಂ ತೊ ನೆಣಾಂ ಆಸ್ಲ್ಲೊ ಜಾಲ್ಯಾರ್ಯ್ ಹ್ಯಾ ಥೊಡ್ಯಾಚ್ ಘಡಿಯಾಂ ಭಿತರ್ ಆಲಿಯಾಕ್ ನಾಸಿರ್ ಸಂಪೂರ್ಣ್ ಜಾಣಾಂ ಜಾಲ್ಲೊ. ಆಪ್ಲ್ಯಾ ಬುದ್ವಂತ್ಕಾಯೆಚಾ ಭಳಾನ್ ’ಆಲಿಯಾ’ ಮ್ಹಳ್ಯಾರ್ ಕಿತೆಂ ಮ್ಹಣೊನ್ ತೊ ಸಮ್ಜಾಲ್ಲೊ.
ನಾಸಿರ್ ಆಲಿಯಾಕ್ ಆಜ್ ಸಮ್ಜೊಂಕ್ ಸಕ್ಲ್ಲೊ ವ್ಹಯ್! ಪುಣ್ ಏಕ್ ಮನಿಸ್ ಜಾವ್ನ್ ತೊ ಆಲಿಯಾಕ್ ಸಮ್ಜಾಲ್ಲೊ ವಾ ಖುದ್ದ್ ತಾಚೊ ಘೊವ್ ಜಾವ್ನ್ ತೊ ಆಪ್ಲ್ಯಾ ಬಾಯ್ಲೆಕ್ ಸಮ್ಜಾಲ್ಲೊ?
ಎಕಾ ಥರಾಚೆಂ ಗಂಭೀರ್ ಮೌನ್ ನಾಸಿರಾಚಾ ಘರಾಂತ್ ರಾಜ್ ಕರುಂಕ್ ಲಾಗ್ಲ್ಲೆಂ. ಸುಲೇಮಾನ್ ಆನಿ ಅಮೀನಾ ಎಕಾ ಸೊಫಾಚೆರ್ ಬಗ್ಲೆಕ್ ಬಗ್ಲೆಕ್ ಬಸ್ಲ್ಲಿಂ ಜಾಲ್ಯಾರ್ ಎಕಾ ಸೊಫಾಚೆರ್ ನಾಸಿರ್ ಬಸೊನ್ ಆಸ್ಲ್ಲೊ ಆನಿ ದುಸ್ರ್ಯಾ ಸೊಫಾಚೆರ್ ಆಲಿಯಾ ಮೌನ್ ಬಸೊನ್ ಆಸ್ಲ್ಲೆಂ. ಸುಲೇಮಾನಾನ್ ಪುತಾಕ್ ಆನಿ ಸುನೆಕ್ ಕೆಲ್ಲ್ಯಾ ಸವಾಲಾಕ್ ದೊಗಾಂಯ್ನಿಯ್ ಜವಾಬ್ ದಿಂವ್ಚೆಂ ಪ್ರಯತ್ನ್ ಕೆಲ್ಲೆಂ ನಾ. ದೊಗಾಂಯ್ಚಾ ಮತಿಂತ್ ಕಿತೆಂ ಚಲ್ತಾ ತೆಂ ಕೊಣಾಯ್ಕ್ಯ್ ಸಮ್ಜಾಲೆಂ ನಾ.
ತಿತ್ಲ್ಯಾರ್!
"ಟ್ರಿಣ್..... ಟ್ರಿಣ್...." ಘರಾಂತ್ಲೆಂ ಮೌನ್ ಮೊಡುನ್ ಮ್ಹಳ್ಳ್ಯಾ ಪರಿಂ ಆಯ್ಕೊನ್ ಆಯಿಲ್ಲ್ಯಾ ಆವಜಾ ತೆವ್ಶಿಂ ಸಗ್ಳಿಂ ಘುಂವ್ಲಿ.
ಆಲಿಯಾಚಾ ಹಾತಾಂತ್ಲೆಂ ಸೆಲ್ಪೋನ್ ವ್ಹಾಜ್ತಾಲೆಂ.
ಅಜೂನ್ ತೆಂ ಸೆಲ್ಫೋನ್ ಆಲಿಯಾಚಾ ಹಾತಾಂತ್ಚ್ ತಾಚ್ಯಾ ಹಾತಾ ತಾಳುವೆಚ್ಯಾ ಉಭೆಕ್ ವಿಶೆವಾಂತ್ ಆಸ್ಲ್ಲೆಂ ತೆಂ ಆತಾಂ ಜಾಗೆಂ ಜಾಲ್ಲೆಂ. ಹಾತಾಚಾ ತಾಳುವೆರ್ ಸುಟ್ಲ್ಲೊ ಭಾರೀಕ್ ಘಾಮ್ ಪೊನಾಚೆರ್ ಥಂಡ್ಸಾಣ್ ಹಾಡವ್ನ್ ರಾವ್ಲ್ಲೊ.
ಆಪ್ಲಿ ಮೂಟ್ ಸೊಡವ್ನ್ ನಿರ್ಲಕ್ಷಾನ್ ಪೊನಾಚಾ ಡಿಸ್ಪ್ಲೇ ವಯ್ರ್ ಆಲಿಯಾನ್ ದೀಶ್ಟ್ ವೆಲಿ.
"ಅಭಿಲಾಶ!"
ಗಂಭೀರ್ ಮೌನ ಮಧೆಂ ವಾಜ್ಚ್ಯಾ ಟೆಲಿಪೊನಾಕ್ ಪಳವ್ನ್ ಸುಲೇಮಾನ್ ಆನಿ ಅಮೀನಾ, ಆಲಿಯಾ ತೆವ್ಶಿಂ ಘುಂವ್ಲಿಂ ಜಾಲ್ಯಾರ್ಯ್ ನಾಸಿರಾ ಥಂಯ್ ಮಾತ್ರ್ ಕಾಂಯ್ ಬದ್ಲಾವಣ್ ಜಾಲಿ ನಾ. ತೊ ತಕ್ಲಿ ಪಂದಾ ಗಾಲುನ್ ಧರ್ಣಿಕ್ ದೀಶ್ಟ್ ಜೊಕುನ್ ಚಡ್ ಗಂಭಿರ್ ಚಿಂತ್ಪಾಚೆರ್ಚ್ ಆಸ್ಲ್ಲೊ.
ಆಲಿಯಾನ್ ಪೋನ್ ಆನ್ ಕೆಲೆಂ.
"ಹಾಂ.... ಸಾಂಗ್!"
"............"
"ಹಾಂ ಸಗ್ಳೆಂ ಸಾರ್ಕೆಂ ಆಸಾ!"
"..........."
"ನಾ ನಾ ಕಾಂಯ್ ನಾ! ಥ್ಯಾಂಕ್ ಯು!" ಕಪಾಲಾರ್ ಗಳ್ಲ್ಲ್ಯಾ ಕೆಸಾಂಕ್ ಆಲಿಯಾನ್ ದಾವ್ಯಾ ಹಾತಾನ್ ಆಪ್ಲ್ಯಾ ಮಾತ್ಯಾಕ್ ಚಡಯ್ಲೆ.
"..........."
"ನಾ ಮ್ಹಕಾ ಕಾಂಯ್ ಕರುಂಕ್ ಜಾಂವ್ಕ್ ನಾ!"
"..........."
"ಹೌ ಡೇರ್ ಹಿ ಎಂಟರ್ ಮೈ ಹೌಸ್!"
ಆಲಿಯಾಚಾ ತೊಂಡಾ ಥಾವ್ನ್ ಉತ್ರಾಂ ಸುಟ್ತಾನಾ ಎಕಾಚ್ ಫರಾ ಬಸ್ಲೆಲ್ಯಾ ಕಡೆನ್ ಥಾವ್ನ್ ಉಟೊನ್ ಹೆವ್ಶಿಂ ಆಲಿಯಾಚಾ ಲಾಗಿಂ ಆಯಿಲ್ಲೊ ನಾಸಿರ್,
"ಹು ದಿ ಹೆಲ್ ಇಸ್ ದಿಸ್....?" ’ಸಕ್ಕ್’ ಕರುನ್ ನಾಸಿರಾನ್ ಆಲಿಯಾಚ್ಯಾ ಹಾತಾಕ್ ಧರುನ್ ತಾಚೆಂ ಪೋನ್ ವೊಡ್ಲೆಂ.
"ಡ್ಯಾಮಿಟ್! ಹು ಆರ್ ಯು...?" ಪೊನಾಕ್ ಕಾನಾಕ್ ಲಾವ್ನ್ ನಾಸಿರ್ ಬೊಬಾಟ್ಲೊ.
"ನಾಸಿರ್ ಮ್ಹಾಕಾ ಪೊನ್ ದೀ!" ಆಲಿಯಾ ಉಟೊನ್ ಉಭೆಂ ಜಾಲೆಂ.
"ಕಮಾನ್ ಸ್ಪೀಕ್ ಅಪ್....!" ಬೊಬಾಟ್ಲೊ ನಾಸಿರ್ ಪೊನಾಚೆರ್.
ತಿತ್ಲ್ಯಾರ್!
ತ್ಯಾ ಕುಶಿನ್ ಥಾವ್ನ್ ಟೆಲಿಪೊನ್ ಭಂಧ್ ಜಾಲೆಂ.
ಟೆಲಿಪೋನ್ ಭಂಧ್ ಜಾಲ್ಲೆಂ ಪಳವ್ನ್ ನಾಸಿರ್ ಆಲಿಯಾಚಾ ಕುಶಿನ್ ಘುಂವ್ಲೊ. ತೊ ಕಿತೆಂ ಕರ್ತಾ ತೆಂ ತಾಕಾಚ್ ಸಮ್ಜಾಲೆಂ ನಾ. ’ದಡ್ಡ್’ ಕರುನ್ ತಾಣೆಂ ಆಲಿಯಾಚಾ ಪೊನಾಕ್ ಧರ್ಣಿಕ್ ಮಾರ್ಲೆಂ. ಧರ್ಣಿಕ್ ಆಪ್ಟೊನ್ ಉಸ್ಳಾಲ್ಲೆಂ ಪೋನ್ ’ಟಕ್ಕ್’ ಆವಾಜ್ ಕರುನ್ ಮುಕ್ಲ್ಯಾ ದಾರಾಕ್ ಆಪ್ಟೊನ್ ಹೆವ್ಶಿಂ ಯೆವ್ನ್ ರಾವ್ಲೆಂ.
ನಾಸಿರಾಚ್ಯಾ ಎಕಾಚ್ಫರಾಕ್ ಬದ್ಲಾಲ್ಲ್ಯಾ ತಾಚ್ಯಾ ಭರ್ತಾವಾಕ್ ಪಳವ್ನ್ ಸುಲೇಮಾನ್ ಆನಿ ಅಮಿತಾ ಉಟೊನ್ ರಾವ್ಲಿಂ.
ತಿತ್ಲ್ಯಾರ್!
"ಹ್ಯಾ ಘರಾಂತ್ ಕಿತೆಂ ಜಾತಾ ಆಲಿಯಾ? ಕಮಾನ್ ಟೆಲ್ ಮಿ ನೌ!" ನಾಸಿರಾನ್ ಆಲಿಯಾಚಾ ಕೆಸಾಂಕ್ ಆಪ್ಲ್ಯಾ ಹಾತಾನ್ ಧರುನ್ ಆಲಿಯಾಚಿ ತಕ್ಲಿ ಪಾಟಿಂ ಬಾಗಾಯ್ಲಿ.
"ಬೇಟಾ...! ಹೆಂ ಕಿತೆಂ ಕರ್ತಾಯ್? ಸೊಡ್ ತಾಕಾ!" ಸುಲೇಮಾನ್ ಸರಾಂರಾಂ ಮೆಟಾಂ ಕಾಡುನ್ ಮುಕಾರ್ ಆಯ್ಲೊ. ಬಾಪಯ್ ಮುಕಾರ್ ಆಯಿಲ್ಲೊ ಪಳವ್ನ್ ಆಲಿಯಾಚಾ ಕೆಸಾಂಕ್ ನಾಸಿರಾನ್ ಸೊಡ್ಲೆಂ.
"ಬೇಟಾ! ಹೆಂ ತುಜೆಂ ಬಾಯ್ಲ್....! ಬಾಯ್ಲೆ ಸಂಗಿಂ ಆಶೆಂ ವರ್ತನ್ ಕರ್ತಾಯ್? ಛೇ....!" ಸುಲೇಮಾನಾನ್ ಪುತಾಚಾ ಹಾತಾಕ್ ಧರುನ್, "ಹೆವ್ಶಿಂ ಯೇ!" ತಾಣೆಂ ನಾಸಿರಾಕ್ ಹೆವ್ಶಿಂ ಆಪವ್ನ್ ಹಾಡ್ಲೆಂ.
"ಕಿತೆಂ ನಾಸಿರ್ ಭುರ್ಗ್ಯಾಂ ಪರಿಂ ಕರ್ತಾಯ್....! ಸುಲೇಮಾನಾನ್ ನಾಸಿರಾಕ್ ಸೊಫಾಚೆರ್ ಹಾಡುನ್ ಬಸಯ್ಲೊ. ಅಮೀನಾ ಮಾತ್ರ್ ಸಗ್ಳೆಂಚ್ ಥಂಡ್ ಜಾಲ್ಲೆಂ. ತಾಣೆ ಕಾಂಯ್ಚ್ ಉಲಂವ್ಚೆಂ ಧಯ್ರ್ ಕೆಲೆಂ ನಾ.
"ತುಂ ಜಾಣಾಂಯ್ ಅಬ್ಬೂ....?" ನಾಸಿರಾಚಾ ತಾಳ್ಯಾಂತ್ ಆತಾಂ ಬದ್ಲಾವಣ್ ಜಾಲಿ.
"ಹಾಂ...! ಸಾಂಗ್ ನಾಸಿರ್ ಕಿತೆಂ ಜಾಲೆಂ?"
"ತುಂ ಜಾಣಾಂಯ್ ಅಬ್ಬೂ....? ಹಾವೆಂ ಹಾಕಾ ಕಿತ್ಲೆಂ ಸಾಂಗ್ಲೆಂ ತುಂ ಏರ್ಹೊಸ್ಟೆಸಾಚಾ ಕಾಮಾಕ್ ವಚಾನಾಕಾ! ಹಾಣೆಂ ಮ್ಹಜೆಂ ಆಯ್ಕಾಲೆಂ? ಆಯ್ಕೊಂಕ್ ನಾ. ತುವೆಂ ಸಾಂಗ್ಲ್ಲೆಂ ಹಾಕಾ ಸಮ್ಜೊಂಕ್ ನಾ. ಅಮ್ಮಿನ್ ಸಾಂಗ್ಲ್ಲೆಂ ಹಾಣೆಂ ಆಯ್ಕೊಂಕ್ ನಾ. ಹಾಚ್ಯೆ ಥಾವ್ನ್.... ಹಾಚ್ಯೆ ಥಾವ್ನ್ ಮ್ಹಾಕಾ ಹೆಂ ಘರ್ ಕರುಂಕ್ ಪಡ್ಲೆಂ. ಹಾಂಗಾ ಜಾಲ್ಯಾರ್ಯ್ ಹೆಂ ಸಂತೊಸಾನ್ ರಾವ್ಲೆಂ? ಹಾಕಾ ಹಾಚೆಂಚ್ ಜಾಯ್ಜಯ್! ತಾಣೆಂ ಸಾಂಗ್ಲ್ಲ್ಯಾಪರಿಂಚ್ ಜಾಯ್ಜಯ್! ಏಕ್ ದೀಸ್ ಪುಣಿಂ ಮತಿಕ್ ಸಮಾಧಾನ್ ಆಸಾ?"
"ಏಕ್ ಮಿನಿಟ್ ಅಂಕಲ್....!"
ನಾಸಿರಾಚಿಂ ಉತ್ರಾಂ ಮಧೆಂಚ್ ತುಟವ್ನ್ ಅಮೀನಾ ಉಲಯ್ಲೆಂ.
"ನಾಸಿರ್ ತುಜ್ಯಾ ಘರ್ಚ್ಯಾ ಪ್ರಾಬ್ಲೆಮಾಂತ್ ಹಾಂವ್ ಯೆನಾ! ಲೆಟ್ ಮಿ ಗೋ....! ಆನಿ ತುಂ ಮ್ಹಾಕಾ ಅಸಲ್ಯಾ ವಿಶಯಾಂತ್ ಮೆತೆರ್ ಕರಿನಾಕಾ ಪ್ಲೀಸ್!" ಅಮೀನಾ ವಚೊಂಕ್ ತಯಾರ್ ಜಾಲೆಂ.
"ಏಕ್ ಮಿನಿಟ್ ಅಮೀನಾ! ಹಾಂವ್ಯ್ ಯೆತಾಂ!" ಸುಲೇಮಾನ್ ನಾಸಿರಾಚಾ ಬಗ್ಲೆ ಥಾವ್ನ್ ಉಟ್ಲೊ.
"ಹಾಂ ಬೇಟಾ! ತುಮ್ಚ್ಯಾ ಮಧೆಂ ಕಿತೆಂಯ್ ನಾ ಸಮಾಧಾನ್ ಜಾಲಾಂ ಜಾಲ್ಯಾರ್ ತೆಂ ತುಮಿಂಚ್ ಸುದಾರ್ಸುನ್ ವರುಂಕ್ ಜಾಯ್! ಕಾಜಾರಿ ಜಿವಿತ್ ಮ್ಹಳ್ಯಾರ್ ಸದಾಂ ಸುಖ್ಚ್ ನ್ಹಯ್! ಹೆಂ ಏಕ್ ಮಿಸ್ತೆರಾಚೆಂ ಜಿವಿತ್. ಹ್ಯಾ ಮಿಸ್ತೆರಾಕ್ ಸೊಡವ್ನ್ ಸೊಭಿತ್ ರಿತಿನ್ ಜಿವಿತ್ ಜಿಯೆಂವ್ಚಿ ವಾಟ್ ತುಮಿ ಸಾಂಗಾತಾ ಸೊಧುಂಕ್ ಜಾಯ್!" ಉಲಯಿಲ್ಲೊ ಸುಲೇಮಾನ್ ಆತಾಂ ಆಲಿಯಾ ತೆವ್ಶಿಂ ಘುಂವ್ಲೊ.
"ಹಾಂವ್ ಸಾಂಗ್ತಾಂ ಮ್ಹಣೊನ್ ಬೆಜಾರ್ ಕರಿನಾಕಾ ಬಹೂ! ಚಲಿಯೆನ್ ಏಕ್ ಚಲಿ ಜಾಂವ್ಚೆಂಚ್ ಮುಖ್ಯ ನ್ಹಯ್! ಹೆಂ ತುಜೆಂ ಘರ್! ತುಂ ಹ್ಯಾ ಘರಾಚೊ ಖಾಂಬೊ! ತುವೆಂ ತುಜ್ಯಾ ಘರಾಚ್ಯಾ ವಿಶಿಂ, ತುಜ್ಯಾ ಘೊವಾ ವಿಶಿಂ, ತುಜ್ಯಾ ಭುರ್ಗ್ಯಾಂ ವಿಶಿಂ ಚಿಂತುಂಕ್ ಜಾಯ್. ಹಾಂತುಂಚ್ ತುಜೊ ಸಂತೊಸ್ ಆನಿ ಹಾಂತುಂಚ್ ತುಜೆಂ ಸುಖ್.....!
"ಆನಿ ಮ್ಹಜ್ಯೆ ವಿಶಿಂ.....? ಮ್ಹಜ್ಯಾ ವಿಶಿಂ ಕೋಣ್ ಚಿಂತಾ?" ಆಪ್ಲ್ಯಾ ಮಾಂವಾಂಚಾ ಉತ್ರಾಂಕ್ ಖಾಡುಂ ಮಾರುನ್ ’ಸಟ್ಟ್’ ಕರುನ್ ಆಲಿಯಾನ್ ವಿಚಾರ್ಲೆಂ.
"ಆಯ್ಕಾಲೆಂಯ್ ಅಬ್ಬೂ.....?" ನಾಸಿರ್ ಉಸ್ಮಡ್ಲೊ." ಹೆಂ ಹಾಚ್ಯಾ ಆವಯ್ ಬಾಪಾಯ್ಕ್ ಹಾಚ್ಯಾ ಭಾಂವ್ಡಾಂಕ್ ಕೇರ್ ಕರಿನಾತ್ಲ್ಲೆಂ ಹಾಂಗಾ ಕೊಣಾಕ್ ಕಿತ್ಲೆಂ ಕೇರ್ ಕರಿತ್? ತುಮಿ ಜಾಣಾಂತ್ ಹಾವೆಂ ತುಮ್ಕಾಂ ಹಾಂಗಾ ಕಿತ್ಯಾಕ್ ಆಪಯಿಲ್ಲೆಂ.....?" ನಾಸಿರಾನ್ ಸುಲೇಮಾನಾಕ್ ಆನಿ ಅಮೀನಾಕ್ ಹಾಂಗಾ ಆಪಯಿಲ್ಲ್ಯಾ ವಿಶಯಾಕ್ ಮುಕಾರ್ ಘಾಲ್ತಾನಾ ವಚೊಂಕ್ ತಯಾರ್ ಜಾಲ್ಲೆಂ ಅಮೀನಾ ಲಾಂಭ್ ಸ್ವಾಸ್ ಸೊಡುನ್ ಸುಲೇಮಾನಾಕ್ಚ್ ಪಳಂವ್ಕ್ ಪಡ್ಲೆಂ.
"ಆಜ್, ಹೆಂ ಕೊಣಾಲಾಗಿಂ ಪ್ಲೈಟಾರ್ ಝಗಡ್ನ್ ಆಯ್ಲಾಂ. ಝಗಡ್ಲೆಂ ತೆಂ ಝಗಡ್ಲೆಂ....! ಪುಣ್ ಮ್ಹಾಕಾ ಏಕ್ ಸಬ್ದ್ ಹಾಣೆ ಕಾಂಯ್ ಸಾಂಗ್ಲೊ? ಹೆಂ ಝಗಡ್ನ್ ಆಯಿಲ್ಲೊಚ್ ಮ್ಹಾಕಾ ಪೋನ್ ಕರ್ತಾ ಆನಿ ಕಿತೆಂ ಮ್ಹಣ್ತಾ ಜಾಣಾಂಯ್? ಮ್ಹಾಕಾ ಮ್ಹಜ್ಯಾ ಬಾಯ್ಲೆಕ್ ಸಾಂಬಾಳುಂಕ್ ಜಾಯ್ನಾ ಜಾಲ್ಯಾರ್ ತಾಚ್ಯೆ ಲಾಗಿಂ ದಾಡುಂಕ್ ಜಾಯ್ ಖಂಯ್! ತಿತ್ಲೆಂಚ್ ನ್ಹಯ್! ಹಾಕಾ ಸೊಧುನ್ ತೊ ಅಚಾನಕ್ ಮ್ಹಜ್ಯಾ ಘರಾ ಭಿತರ್ ಘುಸ್ತಾ ಆನಿ ಮ್ಹಾಕಾಚ್ ಜಿವೆಶಿಂ ಮಾರುಂಕ್ ಪಳೆತಾ. ಕಿತ್ಯಾಕ್.....? ಫಕತ್ತ್ ಎಕಾ ಹಾಚ್ಯಾ ದಸ್ಕತೆ ಖಾತಿರ್!"
"ಆನಿ ಹೆಂ ದಸ್ಕತ್ ಕರ್ತಾ? ಹಾಚ್ಯೆ ತಸಲೆಂ ಹಟ್ಟಿ ಆನಿ ಅರ್ಗಾಂಟಿ ಚೆಡುಂ ಹಾವೆಂ ಪಳಂವ್ಕ್ ನಾ! ಹ್ಯಾ ಕುಶಿನ್ ಘೊವಾಚೊ ಜೀವ್ ವೆತಾ ಜಾಲ್ಯಾರ್ಯ್ ತ್ಯಾ ಪೆಪರಾರ್ ಹೆಂ ದಸ್ಕತ್ ಘಾಲುಂಕ್ ಹೆಂ ತಯಾರ್ ನಾ!" ನಾಸಿರಾನ್ ಮುಕ್ಲ್ಯಾ ಟೀಪಾಯಿ ವಯ್ಲೆಂ ತೆಂ ರಿಸಿಗ್ನೇಶನ್ ಲೆಟರ್ ಕಾಡುನ್,
"ಎಕಾ ದಸ್ಕತೆ ತಿತ್ಲೆಂ ಹಾಚ್ಯಾ ಘೊವಾಕ್ ಮೋಲ್ ನಾ?" ನಾಸಿರಾನ್ ಆಲಿಯಾಕ್ಚ್ ಪಳೆಲೆಂ.
"ತುಂ ಜಾಣಾಂಯ್ ತೆಂ ಕಸಲೆಂ ಪೇಪರ್ ಮ್ಹಣೊನ್?" ಎದೊಳ್ ಮೌನ್ ಆಸ್ಲ್ಲೆಂ ಆಲಿಯಾ ಆತಾಂ ಉಲಯ್ಲೆಂ.
"ಕಸಲೆಂಯ್ ಜಾಂವ್ದಿ ತೆಂ!"
"ಬೇಟಾ ಹೆಂ ರಿಸಿಗ್ನೇಶನ್ ಲೆಟರ್....!" ಸುಲೇಮಾನಾನ್ ಸಾಂಗ್ಲೆಂ.
"ತರ್ ಕಿತೆಂ.....?"
".........." ಕೊಣ್ಯ್ ಕಾಂಯ್ ಉಲಯ್ಲಿಂ ನಾಂತ್.
"ಹಾಕಾ ಕೋಣ್ ಕಾಮ್ ಕರ್ ಮ್ಹಣ್ ಸಾಂಗ್ತಾ? ಕಾಮ್ ಕರುನ್ ಹೆಂ ಮ್ಹಾಕಾ ಉದ್ದಾರ್ ಕರ್ತಾ?"
"ಬೇಟಾ ತೊ ವಿಶಯ್ ಸೊಡ್ ಆತಾಂ! ಜಾಲ್ಲೆಂ ಜಾವ್ನ್ ಗೆಲೆಂ. ಹ್ಯಾ ವಿಶಿಂ ಚಿಂತುನ್ ಫಾಯ್ದೊ ನಾ!"
"ತುಕಾ ಖಬಾರ್ ನಾ ಅಬ್ಬೂ! ತ್ಯಾ ಹಲ್ಕಟಾನ್ ಹಾಂಗಾ..... ಹಾಂಗಾ ಗನ್ನ್ ಜೊಕುನ್ ದರ್ಲ್ಲೆಂ.!" ಆಪ್ಲ್ಯಾ ಉಜ್ವ್ಯಾ ಹಾತಾಚಾ ಬೊಟಾನ್ ಆಪ್ಲ್ಯಾ ತಕ್ಲೆಕ್ ನಾಸಿರಾನ್ ಜೊಕುನ್ ಧರ್ಲೆಂ.
"ಗನ್ನ್ ಜೊಕುನ್ ದರ್ಲ್ಲೆಂ.....? ಕೊಣೆ?" ಆಮೀನಾಕ್ ಅನಿ ಸುಲೇಮಾನಾಕ್ ಆಶ್ಚರ್ಯ್ ಜಾಲೆಂ.
"ತಿತ್ಲೆಂಚ್ ನ್ಹಯ್! ಹೆಂ ಕಾಂಯ್ ತರ್ಯ್ ಹಾಲ್ಲಾಂ? ಕಾಂಯ್ಚ್ ನಾ. ತಿತ್ಲ್ಯಾರ್ ಕೊಣಾಚೆಂಗೀ ತ್ಯಾ ಗೂಂಡಾಕ್ ಪೋನ್ ಯೆತಾ ಆನಿ ತೊ ಸಗ್ಳೆಂ ಸೊಡುನ್ ವೆತಾ. ಆನಿ ವೆತಾನಾ ಕಿತೆಂ ಮ್ಹಣ್ತಾ ಜಾಣಾಂಯ್....? ತ್ಯಾ ಗೂಂಡಾ ಪ್ರಾಸ್ ವ್ಹಡ್ಲೊ ಏಕ್ ಗೂಂಡಾ ಮ್ಹಜ್ಯಾ ಬಾಯ್ಲೆಕ್ ಜಾಯ್ ಜಾಲ್ಲೊ ಆಸಾ ಖಂಯ್!"
"ಸ್ಟಾಪಿಟ್ ನಾಸಿರ್!" ಆಲಿಯಾ ರಾಗಾನ್ ಬೊಬಾಟ್ಲೆಂ.
"ಕಿತ್ಯಾಕ್ ತೊ ವಿಚಾರುನ್ ಗೆಲೊ ನೆ. ಆತಾಂ ಹಾಂವ್ಯ್ ವಿಚಾರ್ತಾಂ. ತುಂ ಇತ್ಲ್ಯಾ ಧಯ್ರಾನ್ ತಾಚೆ ಮುಕಾರ್ ರಾವ್ಲ್ಲೆಂಯ್ ನೆ. ತೊ ಕೋಣ್ ತೊ?"
ಸುಲೇಮಾನಾಕ್ ಆನಿ ಅಮೀನಾಕ್ ಕಾಂಯ್ಚ್ ಸಮ್ಜಾಲೆಂ ನಾ.
"......." ಕಿತೆಂಗೀ ಉಲಂವ್ಕ್ ತೋಂಡ್ ಉಗಡ್ಲ್ಲೆಂ ಅಲಿಯಾ ಮೌನ್ ಜಾಲೆಂ.
ಸುಲೇಮಾನ್ ಆತಾಂ ಚಿಂತುಂಕ್ ಪಡ್ಲೊ.
"ತರ್....?
"ಆಮಿಂ ಹಾಂಗಾ ಯೆತಾನಾ ಲಿಫ್ಟಾಂತ್ ಗೆಲ್ಲೆ ತೆ.....?"
"ಹೆಂ ಕಿತೆಂ ಬಹೂ.....?"
ನಾಸಿರ್ ಇತ್ಲ್ಯಾ ಆವೇಶಾನ್ ಭರುಂಕ್ ಕಾರಾಣ್ ಕಿತೆಂ ಮ್ಹಳ್ಳೆಂ ತೆಂ ಅಮೀನಾಕ್ಯ್ ಆತಾಂ ಸಮ್ಜಾಲೆಂ.
"ನಾಸಿರ್! ತುಂ ಕಾಂಯ್ ಭಿಯೆನಾಕಾ. ತಾಂಚೆ ವಯ್ರ್ ಲೀಗಲ್ ಆಕ್ಷನ್ ಕಾಣ್ಗೆಯಾಂ. ತೆ ಆಯಿಲ್ಲೆ ಕೋಣ್ ತೆ ಮ್ಹಣೊನ್ ತುಂ ಜಣಾಂಯ್?" ಅಮೀನಾನ್ ವಿಚಾರ್ಲೆಂ.
"ಹೆಂ ಸಾರ್ಕೆಂ ನ್ಹಯ್ ಬಹೂ.....! ಆಮ್ಚೆಂ ಕುಟಾಮ್ ಮರ್ಯಾದ್ವಂತ್ ಕುಟಾಮ್. ಆಶೆಂ ಗೂಂಡಾ, ಘರಾ ಬಾಗ್ಲಾರ್ ಯೆತಿತ್ ಜಾಲ್ಯಾರ್....? ಆಮಿಂ ಫಾಲ್ಯಾಂ ಜಿಯೆಂವ್ಕ್ ಆಸಾ! ಆಮ್ಚೆಂ ಬಿಜ್ನೆಸ್ ಆಸಾ....! ಆಶೆಂ ಆಸ್ತಾನಾ ತುವೆಂ.....?" ಸುಲೇಮಾನ್ ಬೆಜಾರಾಯ್ ದಾಖವ್ನ್ ಉಲಯ್ಲೊ.
"ತುಮಿ ಸಮ್ಜಾತಾತ್...., ಹಾಂಗಾ ಮ್ಹಜೆಂ ಕಾಂಯ್ ನಾ?" ಆಲಿಯಾನ್ ಸುಲೇಮಾನಾಕ್ಚ್ ಪಳೆಲೆಂ.
"ತುಜೆಂ ಕಾಂಯ್ ಆಸಾ ಮ್ಹಣೊನ್ ತುವೆಂ ಚಿಂತ್ಲ್ಲೆಂ ಜಾಲ್ಯಾರ್ ತೆಂ ಉರಂವ್ಕ್ ತುಂ ಪೆಚಾಡ್ತೆಂಯ್! ಆಶೆಂ....!?" ನಾಸಿರ್ ಮಧೆಂ ಉಲಯ್ಲೊ.
"ನಾಸಿರ್....? ವಾಟ್ ಡು ಯು ಮೀನ್...? ನಾಸಿರಾಚ್ಯಾ ಉತ್ರಾಂ ಪಾಟ್ಲೊ ಮತ್ಲಾಬ್ ಖಿಣಾ ಭಿತರ್ ಸಮ್ಜಾಲ್ಲೆಂ ಆಲಿಯಾ ಆಪ್ಲ್ಯಾ ಘೊವಾ ವಯ್ರ್ ರಾಗಾರ್ ಜಾಲೆಂ. "ತುಂ ಕಿತೆಂ ಚಿಂತಾಯ್? .....ಹಾವೆಂ ತ್ಯಾ ಪರ್ಕ್ಯಾನ್ ಬರಯ್ಲೆಲ್ಯಾ ಮ್ಹಜ್ಯಾ ರಿಸಿಗ್ನೇಶನ್ ಲೆಟರಾಕ್ ದಸ್ಕತ್ ಕರುಂಕ್ ಜಾಯ್ ಆಸ್ಲ್ಲಿ?"
"ಪರ್ಕ್ಯಾ ಥಾವ್ನ್ ಜಾಲ್ಯಾರ್ ಕಿತೆಂ ಜಾತೆಂ? ಹ್ಯಾ ಘರ್ಚ್ಯಾ ಮಿಸ್ತೆರಾಕ್ ಏಕ್ ವಾಟ್ ಮೆಳ್ತಿ!"
"ತರ್, ತುಕಾ ಮ್ಹಜೆಂ ಕಾಂಯ್ ಪಡೊನ್ ವಚೊಂಕ್ ನಾ ನಾಸಿರ್.....?"
"ಕೊಣಾಕ್ ಕೊಣಾಚೆಂ ಕಿತ್ಲೆಂ ಪಡೊನ್ ಗೆಲಾಂ ತೆಂ ಥೊಡ್ಯಾ ವೆಳಾ ಪಯ್ಲೆಂ ಹಾವೆಂ ಆನಿ ತುವೆಂ ದೊಗಾಂಯ್ನಿ ಪಳೆಲಾಂ!"
"ಅಚ್ಚಾ! ತರ್, ತುಕಾ ತುಜ್ಯಾ ಬಾಯ್ಲೆಚಾ ಮಾನಾಚಿ, ಮರ್ಯಾದೆಚಿ, ಆನಿ ಗೌರವಾಚಿ ಕಾಂಯ್ ಪರ್ವಾ ನಾ...!?"
"ಪಯ್ಲೆಂ ಘರ್ಚೊ ಮಾನ್ ರಾಕೊಂಕ್ ಶಿಕ್! ಉಪ್ರಾಂತ್ ಸಗ್ಳೆಂ....!"
"ಬೇಟಾ.... ಹೊ ತುಮ್ಚೊ ಝಗಡ್ಚೊ ವೇಳ್ ನ್ಹಯ್!" ಸುಲೇಮಾನ್ ಮಧೆಂ ಆಯ್ಲೊ. " ಪಯ್ಲೆಂ ಆಮಿಂ ಭಾಯ್ಲೆಂ ಆಯಿಲ್ಲೆಂ ಆಪತ್ತ್ ತೆಂ ಪಯ್ಸ್ ಕರಿಯಾಂ! ಭಿತರ್ಲೆಂ ತೆಂ ಕೆದಾಳಾಯ್ ಸಾರ್ಕೆಂ ಕರಿಯೆತ್!"
"ಭಿತರ್ಲೆಂ ಸಮಾ ಆಸ್ಲ್ಲೆಂ ಜಾಲ್ಯಾರ್ ಭಾಯ್ಲೆಂ ಆಪತ್ತ್ ಘರಾ ಭಿತರ್ ಯೆತೆಂನಾ ಅಬ್ಬೂ....!" ನಾಸಿರಾಚಿ ಜಾಪ್.
"ನಾಸಿರ್!" ಸುಮಾರ್ ವೆಳಾನ್ ಆತಾಂ ಉಲಯ್ಲೆಂ ಅಮೀನಾ. "ತುಂ ಅಬ್ಬೂ ಕಿತೆಂ ಸಾಂಗ್ತಾ ತೆಂ ಪಯ್ಲೆಂ ಆಯ್ಕ್! ಭಾಯ್ಲೆ ಗೂಂಡಾ ಘರಾ ಭಿತರ್ ಯೆತಾತ್ ಆನಿ ತುಮಿ ಆಶೆಂ.... ತೆ ಕೋಣ್ ಮ್ಹಣೊನ್ ಜಾಣಾಂತ್ ತುಮಿಂ? ಪಯ್ಲೆಂ ಆಮಿಂ ಹ್ಯಾ ವಿಶಯಾಂತ್ ಲೀಗಲಿ ಕಿತೆಂ ಕರುಂಕ್ ಜಾತಾ ತೆಂ ಚಿಂತುಂಕ್ ಜಾಯ್!"
"ಮ್ಹಾಕಾ ಹಾಚೊ ಕಾಂಯ್ ಭರ್ವಸೊ ನಾ ಅಮೀನಾ! ಘೊವಾಚೊ ಜೀವ್ ರಿಸ್ಕೆರ್ ಆಸಾ ಮ್ಹಣೊನ್ ಜಾಣಾಂ ಜಾವ್ನ್ಯ್ ಹೆಂ ಕಾಂಯ್ಚ್ ಹಾಲ್ಲ್ಲೆಂ ನಾ. ಹಾಚ್ಯಾ ತೊಂಡಾರ್ ಭಿರಾಂತೆಚಿ ಸಾವ್ಳಿ ಪಾಸೊನ್ ಉದೆಲ್ಲಿ ನಾ. ಹಾಕಾ ಪಯ್ಲೆಂ ಸಮ್ಜಯ್! ಹೆಂ ಆಮ್ಚೆಂ ಕಾಂಯ್ ಆಯ್ಕಾತಾ ಜಾಲ್ಯಾರ್ ಬರೆಂ! ನಾ ಜಾಲ್ಯಾರ್ ಬೆಶ್ಟೆಂ ಉಲವ್ನ್ ಕಾಂಯ್ ಫಾಯ್ದೊ ನಾ!"
ನಾಸಿರಾನ್ ಸಾಂಗ್ಲೆಂ ಜಾಲ್ಯಾರ್ಯ್ ಅಮೀನಾಕ್ ಆಲಿಯಾ ಲಾಗಿಂ ಕಿತೆಂಯ್ ಉಲಂವ್ಚೆಂ ಧಯ್ರ್ ಆಯ್ಲೆಂ ನಾ. ತೆಂ ಮೌನ್ ರಾವ್ಲೆಂ.
"ಪಳೆ ಬಹೂ!" ಸುಲೇಮಾನ್ ಆಮೀನಾಚಿ ಭಿತರ್ಲಿ ಅಸ್ಕತ್ಕಾಯ್ ಜಾಣಾಂ ಜಾವ್ನ್ ತೊ ಉಲಯ್ಲೊ. "ತುಕಾ ಹಾವೆಂ ಮ್ಹಜ್ಯಾ ಘರಾ ನಾಸಿರಾಕ್ ಬಾಯ್ಲ್ ಜಾವ್ನ್ ನಿಖಾ ಕರುನ್ ಹಾಡ್ತಾನಾ ಮ್ಹಜ್ಯಾ ಧುವೆ ಪರಿಂಚ್ ಹಾಡ್ಲ್ಲೆಂ. ಹ್ಯಾಚ್ ಖಾತಿರ್ ತುಜ್ಯಾ ಹರ್ಯೆಕಾ ಹಟಾಕ್ ಹಾಂವ್ಚ್ ಖಾಲ್ತೊ ಜಾವ್ನ್ ತುಮ್ಚೆ ಖಾತಿರ್ ಇತ್ಲೆಂ ಸರ್ವ್ ಕೆಲೆಂ. ಮ್ಹಜೆಂ ಬಿಜ್ನೆಸ್ ಆಜ್ ಹ್ಯಾ ಪಾಂವ್ಡ್ಯಾ ವರೇಗ್ ಹಾವೆಂ ಹಾಡುನ್ ಪಾವಯ್ಲಾಂ ಜಾಲ್ಯಾರ್ ಹಾಂತುಂ ಹಾವೆಂ ಕಿತ್ಲಿ ನೀದ್ ವಿಭಾಡ್ಲ್ಯಾ, ಕಿತ್ಲೆಂ ಸುಖ್ ಸಾಂಡ್ಲಾಂ ಆನಿ ಕಿತ್ಲೊ ಘಾಮ್ ವ್ಹಾರಾಯ್ಲಾ ತೆಂ ಹಾಂವ್ ಜಾಣಾಂ. ಹೆಂ ಬಿಜ್ನೆಸ್ ಮ್ಹಜ್ಯಾ ಜಿವಾ ಪ್ರಾಸ್ ಮ್ಹಾಕಾ ವರ್ತೆಂ. ಆಶೆಂ ಆಸ್ತಾನಾ ತುಜ್ಯಾ ಹ್ಯಾ ಚಿಲ್ಲರ್ ಸ್ವಭಾವಾಕ್ ಆನಿ ಅರ್ಗಾಂಟಾಕ್ ಲಾಗೊನ್ ಹೆಂ ಮ್ಹಜೆಂ ಬಿಜ್ನೆಸ್ ವಿಭಾಡುಂಕ್ ಮ್ಹಾಕಾ ನಾಕಾ. ಆಜ್ ಹಾಂಗಾ ಧಮ್ಕಿ ದಿಲ್ಲೆ ತೆ ಗೂಂಡಾ ಫಾಲ್ಯಾಂ ಮ್ಹಜ್ಯಾ ಘರ್ಚ್ಯಾ ದಾರಾರ್ಯ್ ಉಭೆ ಜಾತೆಲೆ. ಹಾಂತುಂ ಕಾಂಯ್ ದುಬಾವ್ ನಾ. ತರ್ ತುಂಚ್ ಸಾಂಗ್ ಹಾಕಾ ಪರಿಹಾರ್ ಕಿತೆಂ?"
ಸುಲೇಮಾನಾಚ್ಯಾ ಉತ್ರಾಂನಿ ಎಕಾ ಕ್ಷಣಾಂತ್ ಆಲಿಯಾಕ್ ಚಿಂತುಂಕ್ ಲಾಯ್ಲೆಂ. ಥೊಡಿಂ ಕ್ಷಣಾಂ ತಶೆಂಚ್ ಚಿಂತ್ಲ್ಲೆಂ ಆಲಿಯಾ,
"ಮ್ಹಜ್ಯಾ ಘೊವಾಚೆಂ ಬಿಜ್ನೆಸ್ ತೆಂ ಮ್ಹಜೆಂ ನ್ಹಯ್.....?"
"ತುಂ ಹಕ್ಕಾ ವಿಶಿಂ ಉಲಯ್ತಾಯ್.....?"
"ತುಮಿಂ ಕಿತೆಂಯ್ ಸಮ್ಜೊನ್ ಘೆಯಾ!"
"ಮ್ಹಳ್ಯಾರ್...?"
"ನಾಸಿರಾನ್ ಹಾಚ್ಯಾ ಪಯ್ಲೆಂ ಸಭಾರ್ ಪಾವ್ಟಿಂ ಮ್ಹಾಕಾ ತಾಚ್ಯಾ ಅಫೀಸಾಂತ್ ಕಾಮ್ ಕರುಂಕ್ ವತ್ತಾಯ್ ಕೆಲ್ಯಾ. ಪುಣ್ ಹಾಂವ್ ಜಾಣಾಂ ಕೀ ಹೆಂ ಬಿಜ್ನೆಸ್ ತಾಚೆಂ ಮಾತ್ರ್ ನ್ಹಯ್ ಬಗಾರ್ ಸಗ್ಳ್ಯಾ ತಾಚ್ಯಾ ಕುಟ್ಮಾಚೆಂ. ಆಶೆಂ ಆಸ್ತಾನಾ ಹಾಂವ್ ಭಾಯ್ಲೆಂ ಚೆಡುಂ ಜಾವ್ನ್ ತುಮ್ಚ್ಯಾ ಬಿಜ್ನೆಸಾಂತ್ ಮಧೆಂ ಯೇವ್ನ್ ಹಾಚೊ ಪ್ರಭಾವ್ ತುಮ್ಚ್ಯಾ ಬಿಜ್ನೆಸಾಂತ್ ಪಡ್ಚೊ ನಾಕಾ ಮ್ಹಣೊನ್ ಹಾಂವ್ ಪಯ್ಸ್ ರಾವ್ಲ್ಲಿಂ. ಆತಾಂ ತುಮಿಂಚ್ ಮ್ಹಾಕಾ ಆನಿ ತುಮ್ಚ್ಯಾ ಬಿಜ್ನೆಸಾಕ್ ಸಂಭಂಧ್ ಜೊಡ್ತಾತ್....?"
"ಕಿತ್ಯಾಕ್ ಮ್ಹಳ್ಯಾರ್ ತುಕಾ ಆನಿ ನಾಸಿರಾಕ್ ಸಂಭಂಧ್ ಆಸಾ!"
"ತ್ಯಾ ಖಾತಿರ್.....?"
"ಸಂಭಂಧ್ ಕಿತ್ಲೆಯ್ ಕಶೆಯ್ ಜೊಡ್ಯೆತ್. ಪುಣ್ ಬಿಜ್ನೆಸ್? ಬಿಜ್ನೆಸ್ ತಶೆಂ ನ್ಹಯ್! ಲ್ಹಾನ್ಶೆಂ ಬಿಜ್ನೆಸ್ ಉಭೆಂ ಕರುಂಕ್ ಕಿತ್ಲೆ ತ್ರಾಸ್ ಆಸಾತ್ ತೆ ತುಂ ನೆಣಾಂಯ್!"
"ತರ್, ತುಮ್ಚ್ಯ ಬಿಜ್ನೆಸಾ ಮುಕಾರ್ ಮ್ಹಜ್ಯಾ ಸಂಭಂಧಾಕ್ ಕಾಂಯ್ ಮೋಲ್ ನಾ?"
"ತಶೆಂ ನ್ಹಯ್ ಬಹೂ! ತುಂ ಸಮ್ಜೊಂಕ್ ನಾಂಯ್. ಬಿಜ್ನೆಸಾಂತ್ ತುಜ್ಯಾ ಕುಟ್ಮಾಕ್ ಯೆಂವ್ಚೆಂ ನಾಂವ್ ತುಕಾಯ್ ಯೆತಾ!"
"ನಾಂವ್!" ಆಲಿಯಾ ಉಚಾರ್ತಾನಾ ತಾಚ್ಯಾ ತೊಂಡಾರ್ ಏಕ್ ಖಂತಿಚೊ ವಿಲಕ್ಷಣ್ ಭರಿತ್ ಛಾರೊ ಉದೆವ್ನ್ ಮಾಯಾಗ್ ಜಾಲೊ.
"ಹಾಂವ್, ಏಕ್ ಚೆಡುಂ ಜಾವ್ನ್ ಪಯ್ಲೆಂ ಆನಿಂ ಆಲಿಯಾ ಜಾವ್ನ್ ಉಪ್ರಾಂತ್! ತಶೆಂಚ್ ಹಾಂವ್ ಚಲಿ ಜಾವ್ನ್ ಪಯ್ಲೆಂ ಆನಿ ಆಲಿಯಾ ನಾಸಿರ್ ಜಾವ್ನ್ ಉಪ್ರಾಂತ್! ಬೋವ್ಶಾ ತುಮಿ ಆತಾಂ ಸಂಭಂಧ್ ಜಾಣಾಂ ಜಾಲ್ಯಾತ್ ಆಸ್ತೆಲೆಂ. ಹಾಂ! ಅನ್ಯೇಕ್ ವಿಶಯ್, ತುಮಿಂ ಸಾಂಗ್ಲೆಂ ಕೀ ಸಂಭಂಧ್ ಕಿತ್ಲೆಯ್ ಜೊಡುಂಕ್ ಯೆತಾತ್. ಬೋವ್ಶಾ ತುಮಿಂ ಸಂಭಂಧಾಚೆಂ ಮೋಲ್ ನೆಣಾಂತ್. ಸಂಭಂಧ್ ಜೊಡ್ಚ್ಯಾ ಪಯ್ಲೆಂ ಮನ್ಶಾನ್ ಆಪ್ಲ್ಯಾ ವಯ್ರ್ಚ್ ವಿಶ್ವಾಸ್ ದವರುಂಕ್ ಜಾಯ್. ಮ್ಹಾಕಾ ಮ್ಹಜೆ ವಯ್ರ್ ವಿಶ್ವಾಸ್ ಆಸಾ!"
"ತರ್ ಹ್ಯಾ ಸಮಸ್ಯಾಕ್ ಕಾಂಯ್ ಪರಿಹಾರ್ ನಾ?"
"ಹೊ ಸಮಸ್ಸೊ ಹ್ಯಾ ಫುಡೆಂ ತುಮ್ಚೆ ಮುಕಾರ್ ಉಭೊ ಜಾಂವ್ಚೊ ನಾ!"
"ತುಂ ಇತ್ಲ್ಯಾ ಧಯ್ರಾನ್ ಕಶೆಂ ಸಾಂಗ್ತಾಯ್?"
"ತೆಂ ಸಗ್ಳೆಂ ಜಾಣಾಂ ಅಬ್ಬೂ! ತ್ಯಾ ರಾಶಿದಾನ್ ಮಾಗಿರ್ ಬೆಶ್ಟೆಂಚ್ ಸಾಂಗೊಂಕ್ ನಾ ಹಾಕಾ ಕೋಣ್ ದುಸ್ರೊ ಗೂಂಡಾ......"
"ಶಟಪ್ ನಾಸಿರ್!" ರಾಗಾನ್ ಬೊಬಾಟ್ಲ್ಲೆಂ ಆಲಿಯಾ ರಾಗಾನ್ ಉಸ್ಮಡ್ಲೆಂ.
"ಹಾಂವ್ ಹ್ಯಾ ಅಮೀನಾ ತಸಲ್ಯಾ ಹಲ್ಕಟ್ ಜಾತಿಚಿಂ ನ್ಹಯ್! ಘರಾ ಭಾಯ್ರ್ ತುಕಾ ಹ್ಯಾ ಹಾಚೆ ಸಂಗಿಂ ಭೊಂವೊಂನ್ ಸವಯ್ ಜಾಲ್ಯಾ!" ಆಲಿಯಾ ರಾಗಾನ್ ಖರ್ಶೆತಾಲೆಂ. ತಾಚ್ಯಾ ತೊಂಡಾ ಥಾವ್ನ್ ಅಯಿಲ್ಲ್ಯಾ ಹ್ಯಾ ಉತ್ರಾಂಕ್ ಸಗ್ಳಿಂಚ್ ಕಾಲುಬುಲು ಜಾಲಿಂ. ಕೊಣೆಚ್ ಚಿಂತುಂಕ್ ಸಯ್ತ್ ನಾತ್ಲ್ಲ್ಲೆಂ ಆಲಿಯಾ ಆಶೆಂ ಅಮೀನಾ ವಯ್ರ್ ಆಫ್ರಾದ್ ಮಾಂಡಿತ್ ಮ್ಹಣೊನ್. ಸುಲೇಮಾನ್, ನಾಸಿರ್ ಆನಿ ಅಮೀನಾ ತೆಗಾಂಯ್ ಎಕಾಮೆಕಾ ತೊಂಡಾಕ್ ತೋಂಡ್ ಪಳಂವ್ಚ್ಯಾರ್ ಪಡ್ಲಿಂ. ತಿತ್ಲ್ಯಾರ್ ಅಮೀನಾ ಎಕಾಚ್ಚ್ ಫರಾ ಉಟ್ಲ್ಲೆಂ ತೆಂ,
"ಹಾಂವ್ ವೆತಾಂ ನಾಸಿರ್!" ಅಮೀನಾ ದಾರಾ ತೆವ್ಶಿಂ ಚಮ್ಕಾಲೆಂ. ನಾಸಿರಾಚ್ಯಾ ತೊಂಡಾ ಥಾವ್ನ್ಯ್ ಕಾಂಯ್ ಉತಾರ್ ಸುಟ್ಲೆಂ ನಾ. ಸುಲೇಮಾನ್ಯ್ ಅಚಾನಕ್ ಅಮೀನಾ ಆನಿ ನಾಸಿರಾ ಮಧೆಂ ಆಲಿಯಾನ್ ಉಭೊ ಕೆಲ್ಲ್ಯಾ ಸಂಭಂಧಾ ವರ್ವಿಂ ಅಚಾನಕ್ ಮತಿಕ್ ಕಾಳೊಕ್ ಆಯಿಲ್ಲ್ಯಾ ಪರಿಂ ಜಾವ್ನ್ ಕಾಂಯ್ಚ್ ಉಲವ್ಚಾ ಸ್ಥಿತೆರ್ ನಾತ್ಲ್ಲೊ.
ನಾಸಿರಾಚಾ ಘರಾಚೆಂ ದಾರ್ ಉಗ್ತೆಂ ಕೆಲ್ಲೆಂ ಅಮೀನಾ,
"ಚಾಚಾ, ಹಾಂವ್ ವೆತಾಂ!" ಅಮೀನಾನ್ ಭಾಯ್ರ್ ವಚೊನ್ ದಾರ್ ದಾಂಪ್ಲೆಂ. ಆತಾಂ ಸುಲೇಮಾನ್ಯ್ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟ್ಲೊ. ಏಕ್ ಪಾವ್ಟಿಂ ಪುತಾಕ್ ಏಕ್ ಪಾವ್ಟಿಂ ಸುನೆಕ್ ಪಳವ್ನ್ ಘರಾ ಭಾಯ್ರ್ ಆಯಿಲ್ಲೊಚ್ ಭಾಯ್ರ್ ಅಮೀನಾ ದಿಸ್ಲೆಂ ನಾ ತೆಂ ಪಳವ್ನ್ ತಾಣೆಂ ಲಿಫ್ಟಾಚೊ ಬಟನ್ ದಾಂಬ್ಲೊ.
*************
ಆಲಿಯಾಚ್ಯಾ ಜಿವಿತಾಂತ್ ರಾಶಿದಾಚಿ ಸಾವ್ಳಿ ಪರ್ತ್ಯಾಕ್ ಆಯ್ಲಿ ನಾ ಜಾಲ್ಯಾರ್ಯ್ ಆಲಿಯಾ ಆನಿ ರಾಶಿದಾಚಾ ಝಗ್ಡ್ಯಾಚೊ ಪ್ರಭಾವ್ ಆಲಿಯಾಚಾ ಖಾಸ್ಗಿ ಜಿವಿತಾಂತ್ ಚಡ್ ಮಾಫಾನ್ ಪಡ್ಲ್ಲೊ. ನಮಿತಾನ್ ಜಯರಾಜಕ್ ಸಾಂಗೊನ್ ರಾಶಿದಾಕ್ ಆಲಿಯಾಚಾ ಜಿವಿತಾಂತ್ ಪ್ರವೇಶ್ ಜಾಯ್ನಾತ್ಲ್ಲ್ಯಾ ಪರಿಂ ಪಳೆಲೆಂ ಜಾಲ್ಲ್ಯಾನ್ ನಮಿತಾ ಆಲಿಯಾಕ್ ಆತಾಂ ಅಭಿಲಾಶ ತಿತ್ಲೆಂಚ್ ಮೊಗಾಚೆಂ ಜಾಂವ್ಕ್ ಪಾವ್ಲೆಂ. ಅಭಿಲಾಶಾ ಕಶೆಂಯ್ ಆಲಿಯಾ ವಿಶಿಂ ಪಯ್ಲೆಂಚ್ ಜಾಣಾಂ ಆಸ್ಲ್ಲೆಂ ಜಾಲ್ಯಾರ್ಯ್ ತ್ಯಾ ಗೂಂಡಾಂಚಾ ಮುಕಾರ್ ಆಲಿಯಾನ್ ದಾಖಯಿಲ್ಲ್ಯಾ ಧಯ್ರಾಕ್ ಪಳವ್ನ್ ಮಾತ್ರ್ ತೆಂ ಆಲಿಯಾಚ್ಯಾ ನೀಜ್ ರುಪಾಕ್ ವಳ್ಕಾಲೆಂ.
"ಏಕ್ ಚೆಡುಂ ಜಾವ್ನ್ ತುಜೆಂ ಆತ್ಮ ಸ್ಥೈರ್ಯ್ ಇತ್ಲೆಂ ಘಟ್ ಕಶೆಂ ಆಸಾ ಆಲಿಯಾ?"
ಅಭಿಲಾಶಾಚಾ ಸವಾಲಾಕ್ ಆಲಿಯಾ ಏಕ್ ಕ್ಷಣ್ ಚಿಂತುಂಕ್ ಪಡ್ಲೆಂ. ತಾಚ್ಯಾ ಜಿವಿತಾಂತ್ ಆಯಿಲ್ಲ್ಯಾ ಹರ್ಯೆಕ್ಲ್ಯಾನ್ ತಾಚ್ಯಾ ಹ್ಯಾ ಸ್ವಭಾವಾಕ್ ತಾಚೊ ಜಲ್ಮಾಚೊ ಗೂಣ್ ಮ್ಹಣೊನ್ಚ್ ವೊಲಾಯ್ಲಾಂ ಶಿವಾಯ್ ತಾಚ್ಯಾ ಭಿತರ್ಲ್ಯಾ ಚಲಿಯೆಪಣಾ ವಿಶಿಂ ಕೊಣೆಂಚ್ ಚಿಂತುಂಕ್ ನಾ.
ಚಲಿ ಕುಡಿನ್ ಸೊಭಿತ್, ಉಲವ್ಣ್ಯಾಂತ್ ಮೊವಾಳ್, ಕರ್ನ್ಯಾಂನಿ ದಯಾಳ್, ಚಿಂತ್ನಾಂನಿ ಮೊಗಾಳ್ ಆಸ್ಲ್ಯಾರ್ ಮಾತ್ರ್ ತಿ ಚಲಿ ಗುಣೇಸ್ತ್. ಅಸಲಿ ಚಲಿ ಮಾತ್ರ್ ಸಗ್ಳ್ಯಾಂಕ್ ಪಸಂದ್ ಜಾತಾ. ಅಸಲ್ಯಾ ಚಲಿಯೆಕ್ ಸಗ್ಳಿಂ ಆಪ್ಲಿ ಸುನ್ ಕರುಂಕ್ ತಯಾರ್ ಆಸಾತ್. ಅಸಲ್ಯಾ ಚಲಿಯೆ ಲಾಗಿಂ ಸಗ್ಳಿಂ ತಾಂಚೆ ಸಂಭಂಧ್ ದವರುಂಕ್ ತಯಾರ್ ಜಾತಾತ್. ತರ್ ಚಲಿಯೆಚಾ ಸಂಸಾರಾಂತ್ ಗುಣೇಸ್ತ್ ಮ್ಹಳ್ಯಾರ್ ಹೆಂ ಮಾತ್ರ್?
ಸಮಾಜೆಂತ್ ಸಗ್ಳೆಂ ಸೊಸುನ್ ತಕ್ಲಿ ಪಂದಾ ಘಾಲುನ್ ಜಿಯೆಲ್ಲಿ ಚಲಿ ಮಾತ್ರ್ ನಿಜಾಯ್ಕ್ಯ್ ಚಲಿ? ಆನ್ಯಾಯಾ ವಿರೋಧ್ ಯಾ ಆಪ್ಲ್ಯಾ ಮಾನವೀಯ್ ಹಕ್ಕಾ ಖಾತಿರ್ ಉಟೊನ್ ರಾವ್ಲ್ಲಿ ತಿ ಚಲಿ ಚಲಿ ನ್ಹಯ್?
"ಪಳೆ ಅಭಿಲಾಶಾ....! ತುಕಾ ತುಜ್ಯಾ ವಯ್ರ್ ತರ್ ಭರ್ವಸೊ ಆಸಾ.... ತುವೆಂ ಭಿಯೆಂವ್ಚಿ ಕಾಂಯ್ ಗರ್ಜ್ ನಾ. ಭಿರಾಂತ್ ನಾ ಮ್ಹಣ್ತಾನಾ ಜಿವಿತ್ ಸೊಭಿತ್! ಸೊಭಿತ್ ಜಿವಿತ್ ಜಿಯೆಂವ್ಕ್ ಖಂಡಿತ್ ಸುಲಭ್ ನ್ಹಯ್. ಹೆಂ ಸುಲಭ್ ನ್ಹಯ್ ಆಸ್ಲ್ಲ್ಯಾಕ್ ಆಪ್ಲೆಂ ಆತ್ಮ್ಸ್ಥೈರ್ಯ್ಚ್ ಘಟಾಯ್ ದಿತಾ. ಪುಣ್ ಹ್ಯಾ ಘಟಾಯೆಕ್ ಭಳ್ ತುವೆಂ ತುಜ್ಯಾಚ್ ವಯ್ರ್ ದವರ್ಚ್ಯಾ ಭರ್ವಸ್ಯಾ ವಯ್ರ್ ಹೊಂದೊನ್ ಆಸಾ. ತುಜ್ಯಾ ವ್ಯಕ್ತಿತ್ವಾಚೆರ್ ತುಜೊ ಭರ್ವಸೊ ಕಿತ್ಲೊ ಉಂಚಾಯೆಕ್ ಚಡ್ತಾ ತಿತ್ಲೆಂ ತುಜೆಂ ವ್ಯಕ್ತಿತ್ವ್ ಪ್ರಭಲ್ ಜಾತಾ ಆನಿ ತುವೆಂ ಜಿಯೆಂವ್ಚಾ ಸಮಾಜೆ ಮುಕಾರ್ ತುಂ ಭಳ್ವಂತ್ ಜಾತಾಯ್!"
ಆಲಿಯಾಚಾ ಉತ್ರಾಂಚೊ ಮತ್ಲಾಬ್ ಅಭಿಲಾಶಾಕ್ ಭಿಲ್ಕುಲ್ ಸಮ್ಜಾಲೊ ನಾ.
ಏರ್ಪೋರ್ಟಾ ಥಾವ್ನ್ ಭಾಯ್ರ್ ಆಯಿಲ್ಲಿಂ ದೊಗಾಂಯ್ ರೆಸ್ಟೋರಂಟಾಕ್ ಗೆಲಿಂ. ರೆಸ್ಟೋರಂಟಾಚಾ ಮೆಜಾರ್ ಬಸ್ಲೆಲ್ಯಾ ಆಭಿಲಾಶಕ್ ಆಲಿಯಾಚೆಂ ಜಿವಿತ್ ನಿಯಾಳುನ್ ಯೇವ್ನ್ ತಾಕಾ ಆಲಿಯಾಚಿ ಭಿರ್ಮತ್ ದಿಲಿ. ಆಲಿಯಾನ್ ಆಪ್ಲ್ಯಾ ಜಿವಿತಾಂತ್ ಕೊಣಾಯ್ಕ್ಯ್ ಕೆದ್ನಾಂಯ್ ವಾಯ್ಟ್ ಕರುಂಕ್ ನಾತ್ಲ್ಲೆಂ. ಫಕತ್ತ್ ತೆಂ ಹ್ಯಾ ಸಮಾಜೆ ಮುಕಾರ್ ಆಪ್ಲಿ ತಕ್ಲಿ ಬಾಗಂವ್ಕ್ ತಯಾರ್ ನಾತ್ಲ್ಲೆಂ ತಿತ್ಲೆಂಚ್! ಹ್ಯಾ ಎಕಾಚ್ಚ್ ಕಾರಾನಾಕ್ ಲಾಗೊನ್ ಆಜ್ ಆಲಿಯಾ ಅಭಿಲಾಶಾ ಮುಕಾರ್ ತಾಚ್ಯಾ ಜಿವಿತಾಂತ್ ಸಲ್ವಾಲ್ಲ್ಯಾ ಪರಿಂ ತಾಕಾ ದಿಸ್ತಾಲೆಂ.
"ಪುಣ್....., ಆತಾಂ ಪಳೆ ಆಲಿಯಾ ಹ್ಯಾಚ್ ಕಾರಾಣಾಕ್ ಲಾಗೊನ್ ತುಜ್ಯಾ ಖಾಸ್ಗಿ ಜಿವಿತಾಂತ್ ಕಿತೆಂ ಜಾತಾ ತೆಂ...!"
"ಸಲ್ವಣಿ ಮಾಂದುನ್ ಘೆತ್ಲ್ಲ್ಯಾಕ್ ಆನಿ ಆಪ್ಣಾ ವಯ್ರ್ ಭರ್ವಸೊ ನಾತ್ಲ್ಲ್ಯಾಕ್ ಮಾತ್ರ್ ಫುಡಾರಾಚಿ ಖಂತ್! ಹಾಂವ್ ಫುಡಾರ್ ಪಳೆನಾ. ಜ್ಯಾ ಘಡಿಯೆ ಜಿಯೆವ್ನ್ ಆಸಾಂ ತ್ಯಾ ಘಡಿಯೆಕ್ ಹಾಂವ್ ಕೊಣಾಯ್ಚಿಂ ಗುಲಾಮ್ ಜಾಯ್ನಾ.....!"
"ಮ್ಹಳ್ಯಾರ್......!"
"ಚಲ್ಯಾಕ್ ಚಲಿಯೆಚಿ ತಶೆಂ ಚಲಿಯೆಕ್ ಚಲ್ಯಾಚಿ ಗರ್ಜ್ ಖಂಡಿತ್ ಆಸಾ ಮ್ಹಣ್ತಾನಾ ಹಾಂಗಾಸರ್ ಹ್ಯಾ ದೊನಾಂ ಮಧೆಂ ಊಂಚ್ ಆನಿ ನೀಚ್ ಖಂಯ್ ಥಾವ್ನ್ ಆಯ್ಲೆಂ? ಚಲಿಯೆ ವಿಣೆ ಚಲೊ ಜರ್ತರ್ ಕಿತೆಂಯ್ ಕರುಂಕ್ ಸಕ್ತಾ ಜಾಲ್ಯಾರ್ ತೆಂಚ್ ಚಲಿಯ್ ಚಲ್ಯಾವಿಣೆ ಕರುಂಕ್ ಸಕ್ತಾ. ಹಾಕಾ ತುಂ ಕಿತೆಂ ಮ್ಹಣ್ತಾಯ್...?"
"ಆಂ.... ವ್ಹಯ್!" ಆಲಿಯಾನ್ ವಿಚಾರ್ಲೆಲ್ಯಾ ಸವಾಲಾಕ್ ಜವಾಬ್ ದೀಂವ್ಕ್ ಅಭಿಲಾಶಕ್ ಥೊಡೊ ವೇಳ್ ಲಾಗ್ಲೊ.
"ಹಾಕಾ ತುಂ ಒಪ್ತಾಯ್ ತರ್, ತುಕಾಚ್ ತುಂ ಅಭಲ್ ಮ್ಹಣೊನ್ ಕಿತ್ಯಾಕ್ ಚಿಂತಾಯ್? ಫಕತ್ತ್ ಚಲೊ ಜೆಂ ಕಿತೆಂ ಆಪ್ಣೆಂ ಬುಡಯ್ಲಾಂ ತಾಕಾ ಧುಂವ್ಕ್ ಸಕ್ತಾ ಆನಿ ತುಂ ಪೊಶೆಂವ್ಕ್ ಸಕಾನಾಂಯ್ ಮ್ಹಣೊನ್...?"
"........." ಅಭಿಲಾಶಾಚಿ ಕಾಂಯ್ ಜವಾಬ್ ಆಯ್ಲಿ ನಾ.
ತಿತ್ಲ್ಯಾರ್!
ಆಪ್ಣಾಲಾಗಿಂ ಆಯಿಲ್ಲ್ಯಾ ವೇಯ್ಟರಾಕ್ ದೋನ್ ಕಾಫಿಯೆಕ್ ಅಭಿಲಾಶನ್ ಆರ್ಡರ್ ಕೆಲೆಂ. ವೇಯ್ಟರ್ ಕಾಫಿಯೆಚೆಂ ಆರ್ಡರ್ ಘೆವ್ನ್ ಚಲ್ಲೊ.
"ಎಕ್ಲ್ಯಾಕ್ ಧುಂವ್ಚೆಂ ಹಕ್ಕ್ ಜರ್ತರ್ ಆಸಾ ಜಾಲ್ಯಾರ್ ಮಾಕಾ ಪುಸ್ಚೆಂ ಹಕ್ಕ್ ಕಿತ್ಯಾಕ್ ನಾ? ಕಸಲ್ಯಾ ಅಧಿಕಾರಾನ್ ಹಾಂಗಾಸರ್ ಅಂತರ್ ರಚುಂಕ್ ಜಾತಾ?"
"........." ಆತಾಂಯ್ ಅಭಿಲಾಶ ಕಾಂಯ್ ಉಲಯ್ಲೆಂ ನಾ. ಇತ್ಲ್ಯಾ ಗೂಂಡಾಯೆನ್ ತಾಣೆಂ ಕೆದ್ನಾಂಚ್ ಚಲಿಯೆಚ್ಯಾ ಜಿವಿತಾ ವಿಶಿಂ ಚಿಂತ್ಲ್ಲೆಂಚ್ ನಾ. ಅಪುಣ್ ಏಕ್ ಚಲಿ, ಚಲಿ ಮ್ಹಳ್ಯಾರ್ ಕಿತೆಂ ಮ್ಹಣೊನ್ ತಾಣೆಂ ಆಯ್ಕಾಲ್ಲೆಂ ಆನಿ ಮಾಲ್ಗಡ್ಯಾಂ ಥಾವ್ನ್ ಸಮ್ಜಾಲ್ಲೆಂ ಮಾತ್ರ್ ತೆಂ ಆಪ್ಲ್ಯಾ ಜಿವಿತಾಂತ್ ಪಾಳುನ್ ಆಯ್ಲಾಂ ಶಿವಾಯ್ ’ತೆಂ ಆಶೆಂ ಕಿತ್ಯಾಕ್’ ಮ್ಹಳ್ಳ್ಯಾ ವಿಶಿಂ ತಾಚ್ಯಾ ಮತಿಂತ್ ಸವಾಲ್ ಉಟ್ಲ್ಲೆಂ ನಾ. ಕಿತ್ಯಾಕ್ ಮ್ಹಳ್ಯಾರ್ ತಾಣೆಂ ಪಯ್ಲೆಂಚ್ ಅಪುಣ್ ಸಂಸಾರಾಂತ್ಲಿ ಅಭಲ್ ಜೀವಿ ಮ್ಹಣೊನ್ ಮಾಂದುನ್ ಘೆತ್ಲ್ಲೆಂ.
"ತುಂ ಸಾರ್ಕೆಂ ಚಿಂತುನ್ ಪಳೆಶಿ ಜಾಲ್ಯಾರ್ ಅಭಿಲಾಶ, ಚಲಿ ಹ್ಯಾ ಸಂಸಾರಾಂತ್ ಖಂಯ್ ಸ್ವತಂತ್ರ್ ಆಸಾ? ತಿಕಾ ಮಾನ್ ಮೆಳ್ತಾ! ತಿಕಾ ಫುಲಾಂ ರಾಕ್ತಾತ್! ತಿಚಿ ವಾಖಣಿ ಜಾತಾ! ತಿಚೆಂ ನಾಂವ್ ಘಾಜ್ತಾ! ತಿಚ್ಯಾ ಚಲಿಯೆಪಣಾಚಿ ಚರ್ಚಾ ಗೋಡ್ ಗೋಡ್ ಉತ್ರಾಂನಿ ವ್ಹಾಳ್ತಾ! ಪುಣ್ ಚಲಿ.....?"
"ಚಲಿ ಅಜೂನ್ ಕೊಣಾಚಾ ಖಾಟಿಯೆರ್ ದಡ್ಬಡ್ತಾ ಜಾಲ್ಯಾರ್ ಕೊಣಾಚಾ ಪಾಂಯಾಂ ಪಂದಾ ಆಡ್ಚಾತಾ. ಕೊಣಾಚಾ ಮುಟಿಭಿತರ್ ಉಸ್ಮಡ್ತಾ ಜಾಲ್ಯಾರ್ ಕೊಣಾಚಾ ದರ್ಬರಾಂತ್ ಪೆಂಕಾಡ್ ಹಾಲಯ್ತಾ. ಕೊಣಾಚಾ ಹಾತಾಂತ್ ಖೆಳಾಚಿ ಬಾವ್ಲಿ ಜಾಲ್ಯಾರ್ ತ್ಯಾ ಗಲ್ಲೆಂತ್ ಮೆಣಾಚಿ ವಾತ್ ಜಾವ್ನ್ ಕರ್ಗತಾ!" ಆಲಿಯಾ ಉಲಯ್ತಾಂ ಉಲಯ್ತಾಂ ಆತಾಂ ಖರ್ಶೆಂವ್ಕ್ ಲಾಗ್ಲೆಂ. ಜಶೆಂ ತಾಚ್ಯಾ ದೊಳ್ಯಾಂ ಮುಕಾರ್ ಚಲಿಯೆಚಿಂ ಹಿಂ ತಾಣೆಂ ಸಾಂಗ್ಲೆಲ್ಯಾ ಹ್ಯಾ ರುಪಾಂಕ್ ತೆಂ ಪಳವ್ನ್ ಆಸಾ.
ತಿತ್ಲ್ಯಾರ್!
ಅಭಿಲಾಶನ್ ಆರ್ಡರ್ ಕೆಲ್ಲಿ ಕಾಫಿ ಘೆವ್ನ್ ವೇಯ್ಟರ್ ತಿಂ ಬಸ್ಲೆಲ್ಯಾ ಮೆಜಾಲಾಗಿಂ ಆಯ್ಲೊ. ತಾಕಾ ಪಳವ್ನ್ ಆಪ್ಲೆಂ ಉಲೊಣೆಂ ಥೊಡ್ಯಾ ವೆಳಾಕ್ ದೊಗಾಂಯ್ನಿ ಭಂಧ್ ಕೆಲೆಂ.
ವೇಯ್ಟರ್ ಆಪ್ಣೆ ಹಾಡ್ಲೆಲ್ಯಾ ಕಾಫಿಯೆಕ್ ತಾಂಚಾ ಮುಕಾರ್ ದವರುನ್ ಚಲ್ಲೊ.
"ತುಂ ಜಾಣಾಂಯ್ ಅಭಿಲಾಶಾ? ಆಜ್ ತ್ಯಾ ರಸ್ತ್ಯಾ ದೆಗೆನ್ ಸಂಸಾರ್ ನೆಣಾಂ ಆಸೊನ್ ಖೆಳ್ಚೆಂ ತೆಂ ನೆಣ್ತೆಂ ಚೆಡುಂ ಫಾಲ್ಯಾಂ ತಾಚಿ ಪ್ರಾಯ್ ಭರ್ತಾನಾ ಪೊಟಾಚಿ ಭುಕ್ ತಾಕಾ ದೊಸ್ತಾನಾ ತೆಂ ಖಂಯ್ ಪಾವ್ತಾ ತೆಂ? ಅಜೂನ್ ಹಾಂವ್ ತ್ಯಾ ಸಿಗ್ನಲಾಂ ಮುಳಾಂತ್ ಸೊಧುನ್ ಆಸಾ ತ್ಯಾಚ್ ಮುಖಮಳಾಂಕ್ ಜಿಂ ಲ್ಹಾನ್ಪಣಿ ಭಿಕ್ ಮಾಗ್ತಾನಾ ಹಾವೆಂ ತಾಂಕಾ ಭಿಕ್ ದಿಲ್ಲೆಂ. ಏಕ್ ದೀಸ್ ತಿಂ ತ್ಯಾ ಸಿಗ್ನಲಾ ಖಾಂಬ್ಯಾ ಮುಳಾಂತ್ಲಿಂ ಮಾಯಾಗ್ ಜಾಲ್ಲಿಂ ತಿಂ ಅಜೂನ್ ಮ್ಹಜ್ಯಾ ದೊಳ್ಯಾಂಕ್ ದಿಸ್ಲ್ಲಿಂ ನಾಂತ್. ನವಿಂ ನವಿಂ ಮುಖಮಳಾಂ ಸದಾಂ ಯೆತಾತ್ ಆನಿ ವೆತಾತ್. ತಿಂ ಖಂಯ್ ವೆತಾತ್?" ಉಲಂವ್ಚೆಂ ಆಲಿಯಾ ಆತಾಂ ಮೌನ್ ಜಾಲೆಂ. ಆಪ್ಲ್ಯಾ ತಕ್ಲೆಕ್ ಹಾತ್ ಧರುನ್ ಶೂನ್ಯ್ ದ್ರಶ್ಟೆನ್ ತೆಂ ಪಯ್ಸ್ ಖಂಯ್ಚರ್ಗೀ ಪಳೆತಾಲೆಂ. ಬೋವ್ಶಾ ತಾಚ್ಯಾ ದಿಶ್ಟೆಂತ್ ತಾಕಾ ತಿಂಚ್ ನೆಣ್ತಿಂ ಮುಖಮಳಾಂ ದಿಸ್ತಾಲಿಂ ಆಸ್ತೆಲಿಂ.
"ಆಲಿಯಾ ಕಾಫಿ ಥಂಡ್ ಜಾತಾ!" ಅಭಿಲಾಶನ್ ಆಲಿಯಾಕ್ ಜಾಗಯ್ಲೆಂ. ಅಭಿಲಾಶನ್ ಸಾಂಗ್ಲೆಲೆಂ ಆಯ್ಕೊನ್ ಆಲಿಯಾನ್ ಕಾಫಿಯೆಚೆಂ ಕಪ್ಪ್ ಹಾತಿಂ ಘೆತ್ಲೆಂ. ಕಾಫಿ ಪಿಯೆತಾಂ ಪಿಯೆತಾಂ ಆಲಿಯಾ ಮಾತ್ರ್ ಸಂಪೂರ್ಣ್ ಆಪ್ಲ್ಯಾ ಚಿಂತ್ನಾಂ ಸಾಗೊರಾಂತ್ ಬುಡ್ಲೆಂ. ಎಕಾ ಕುಶಿನ್ ತಾಚ್ಯಾ ಜಿವಿತಾನ್ ತಾಕಾ ದಾಖಯಿಲ್ಲ್ಯಾ ತ್ಯಾ ಪಿಂತುರಾಂಕ್ ತೆಂ ವಿಸ್ರೊಂಕ್ ಸಕಾನಾತ್ಲ್ಲೆಂ ಜಾಲ್ಯಾರ್ ಎಕಾ ಕುಶಿನ್ ತಾಚ್ಯಾ ಜಿವಿತಾಂತ್ ತಾಕಾ ಸೊಧುನ್ ಆಯಿಲ್ಲ್ಯಾ ಜಿಣಿಯೆ ಸೂತ್ರಾಂಕ್ ತೆಂ ಸಾಂಡುಂಕ್ ತಯಾರ್ ನಾತ್ಲ್ಲೆಂ.
ಹ್ಯಾ ದೊನಾಂಯ್ ಮಧೆಂ ರಾಜಿ ಕರ್ಚೆಂ ಮ್ಹಳ್ಯಾರ್ ಆಪ್ಣೆ ಜಿಯೆಂವ್ಚ್ಯಾ ಖಾತಿರ್ ಹೆರಾಂಕ್ ವಿಸ್ರೊಂಚೆಂ ಮ್ಹಣೊನ್ ತೆಂ ಜಾಣಾಂ ಆಸ್ಲ್ಲೆಂ.
ಪೊಸೊಭರ್ ಹಾಸೊ ಆನಿ ಥೆಂಬೊಭರ್ ದೂಖ್! ಹೆಂ ಮನ್ಶಾಪಣ್ ಆಸ್ಲ್ಲೊ ಮನಿಸ್ ಕೆದಿಂಚ್ ವಿಸ್ರೊಂಕ್ ಸಕಾನಾ. ತಶೆಂಚ್ ಆಲಿಯಾ. ತಾಣೆಂ ಪಳೆಲ್ಲ್ಯೊ ತ್ಯೊ ಹಾಸೊ ಆನಿ ತೆಂ ದೂಖ್ ತೆಂ ವಿಸ್ರೊಂಕ್ ಸಕ್ಲೆಂ ನಾ.
ಹ್ಯಾ ಮಧೆಂ ತಾಚ್ಯಾ ನಿಖಾ ಜಾಲ್ಲ್ಯಾ ಜಿವಿತಾಂತ್ ಪಯ್ಲೆಂಚಾ ಪ್ರಾಸ್ ಚಡ್ ವೇಗಾನ್ ಬದ್ಲಾವಣ್ ಜಾವ್ನ್ ಯೆತಾಲಿ. ಆಲಿಯಾನ್ ಆಪ್ಲ್ಯಾ ಘೊವಾ ಸಾಂಗಾತಾ ಅಮೀನಾಕ್ ಸಂಭಂಧ್ ಆಸಾ ಮ್ಹಣೊನ್ ಉಗ್ತ್ಯಾನ್ ಸಾಂಗೊನ್ ವ್ಹಡ್ಲಿ ಚೂಕ್ ಆಧಾರ್ಲ್ಲಿ.
ಆಲಿಯಾಚ್ ಹಿಚ್ಚ್ ಚೂಕ್ ಅಮೀನಾಕ್ ಆನಿ ನಾಸಿರಾಕ್ ಚಡ್ ಲಾಗಿಂ ಹಾಡುಂಕ್ ಪಾವ್ಲ್ಲಿ. ಆಲಿಯಾ ಆನಿ ನಾಸಿರ್ ಎಕಾಚ್ ಘರಾಂತ್ ಜಿಯೆತಾಲಿಂ ಜಾಲ್ಯಾತ್ಯ್ ತಾಂಚಾ ಮಧೆಂ ಸಂಭಂಧ್ ಮ್ಹಳ್ಳೊ ತೊ ಜಿಯೆನಾತ್ಲ್ಲೊ. ಫಕತ್ತ್ ಝಗ್ಡೆಂ ಆನಿ ನಾ ಸಮಾಧಾನ್ ಮಾತ್ರ್!
ಆಲಿಯಾನ್ ಆಪ್ಲ್ಯಾ ಆನಿ ನಾಸಿರಾಚಾ ಮಾಧ್ಲ್ಯಾ ಸಂಭಂಧಾ ವಿಶಿಂ ಆಪ್ಲ್ಯಾ ಘರ್ಚ್ಯಾಂಕ್ ಕಾಂಯ್ ಸಾಂಗೊಂಕ್ ನಾ ಜಾಲ್ಯಾರ್ಯ್ ಹೊ ವಿಶಯ್ ತಾಂಕಾಂ ಕಳಾನಾಸ್ತಾನಾ ಗೆಲೊ ನಾ.
ಸುಲೇಮಾನಾನ್ ಖುದ್ದ್ ಜಾವ್ನ್ ಶಬೀರಾಕ್ ಆಪ್ಲ್ಯಾ ನಿರ್ಧಾರಾ ವಿಶ್ಯಾಂತ್ ತಿಳ್ಸಿಲ್ಲೆಂ. ತಾಂಕಾ ತಿಳ್ಸಿಲ್ಯಾ ಬಗಾರ್ ನಾಸಿರಾಕ್ ಆಲಿಯಾ ಥಾವ್ನ್ ತಲಾಖ್ ಮೆಳೊಂಕ್ ಸಾದ್ಯ್ ನಾತ್ಲ್ಲೆಂ.
ಸುಲೇಮಾನಾಚಾ ನಿರ್ಧಾರಾ ಥಾವ್ನ್ ಶಬೀರ್ ಆನಿ ಸಾರಾಕ್ ಸಂಸಾರ್ಚ್ ಉಟೊನ್ ಯೇವ್ನ್ ತಾಂಕಾ ಗಿಳ್ಲ್ಲ್ಯಾ ಪರಿಂ ಜಾಲೆಂ.
"ಹೆಂ ಕಿತೆಂ ಜಾಲೆಂ.....?" ಶಬೀರ್ ಪಯ್ಲ್ಯಾ ಪಾವ್ಟಿಂ ಆಪ್ಲ್ಯಾ ನಶೀಬಾಕ್ ಚಿಂತುನ್ ರಡ್ಲೊ.
ಶಬೀರಾಕ್ ಹಿ ಆಚಾನಕ್ ಖಬಾರ್! ತಾಚ್ಯಾ ಧುವೆಚ್ಯಾ ತೊಂಡಾ ಥಾವ್ನ್ ತಾಣೆಂ ಹ್ಯಾ ವಿಶಿಂ ಆಯ್ಕೊಂಕ್ ನಾತ್ಲ್ಲೆಂ.
"ತರ್, ಪರಿಗತ್ ಇತ್ಲ್ಯಾ ಮುಕಾರ್ ಪಾವ್ಲ್ಯಾ....? ಆನಿ ಆಲಿಯಾನ್ ಆಪ್ಣಾಕ್ ಏಕ್ ಉತಾರ್ ಪಾಸೊನ್ ಸಾಂಗೊಂಕ್ ನಾ!" ಶಬೀರ್ ಆಪ್ಲ್ಯಾ ಧುವೆಕ್ ಚಿಂತುಂನ್ ಕಂಗಾಲ್ ಜಾಲೊ.
ಸುಲೇಮಾನಾಕ್ ತಾಣೆಂ ಕಿತ್ಲೆಂ ಸಮ್ಜಾಂವ್ಕ್ ಪ್ರಯತ್ನ್ ಕೆಲೆಂ ಜಾಲ್ಯಾರ್ಯ್ ಕಾಂಯ್ ಫಾಯ್ದೊ ಜಾಲೊ ನಾ. ಸುಲೇಮಾನ್ ಶಬೀರಾಕ್ ಆಯ್ಕೊಂಕ್ ತಯಾರ್ ನಾತ್ಲ್ಲೊ. ತೊ ಆಯ್ಕತಲೊ ಜಾಲ್ಯಾರ್ಯ್ ಕಸೊ? ಆಲಿಯಾಕ್ ತೊ ಇತ್ಲ್ಯಾ ದಿಸಾಂನಿ ಬರ್ಯಾ ಭಾಶೆನ್ ಜಾಣಾಂ ಜಾಲ್ಲೊ.
"ಪಳೆ ಶಬೀರ್! ಅಮ್ಚೆ ಮಧೆಂ ಕುಟ್ಮಾ ಸಂಭಂಧ್ ಆಸಾ ವ್ಹಯ್. ಆನಿ ಹೊ ಸಂಭಂಧ್ ಆಸೊಚ್ ಉರ್ತಲೊ. ಪುಣ್ ಹ್ಯಾ ಸಂಭಂಧಾ ಖಾತಿರ್ ಆಪುಣ್ ಆಪ್ಲ್ಯಾ ಪುತಾಚೊ ಫುಡಾರ್ ವ್ಹಾಳ್ಚ್ಯಾ ನ್ಹಂಯ್ತ್ ವ್ಹಾಳೊನ್ ವೆಚೊ ಪಳವ್ನ್ ಹಾತ್ ಭಾಂದುನ್ ಬಸೊಂ? ತುಂಚ್ ಚೀಂತ್. ಹಾವೆಂ ಆಲಿಯಾಕ್ ಮಸ್ತ್ ಸೊಸ್ಲೆಂ. ತಾಕಾ ಜಾಂವ್ಚೆಂ ನಾ. ಕುಟಾಮ್ ಆನಿ ಸಂಭಧ್ ಮ್ಹಳ್ಯಾರ್ ತೆಂ ಕಿತೆಂ ಮ್ಹಣೊನ್ಚ್ ತೆಂ ನೆಣಾಂ. ತೆಂ ಫಕತ್ತ್ ಆಪ್ಣಾಚೆಂ ಮಾತ್ರ್ ಪಳೆತಾ! ಆಶೆಂ ಆಸ್ತಾನಾ.... ಹಾವೆಂಯ್ ಆಪ್ಲ್ಯಾ ಪುತಾಚೆಂ ಪಳಂವ್ಕ್ ಪಡ್ತಾ!"
ಸುಲೇಮಾನಾನ್ ಉಲಂವ್ಚೆಂಯ್ ಸಾರ್ಕೆಂ. ಆಲಿಯಾಚಿಂ ಕರ್ತುಬಾಂ ಸುಲೇಮಾನಾಚಾ ತೊಂಡಾ ಥಾವ್ನ್ ಆಯ್ಕಾಲ್ಲ್ಯಾ ಶಬೀರಾನ್ ಆಪ್ಲ್ಯಾ ಧುವೆಚಾ ಚೂಕಿಕ್ ಮಾಂದುನ್ ಘೆತ್ಲೆಂ. ಸುಲೆಮಾನಾಕ್ ಭಲಾತ್ಕಾರೆನ್ ಸಮ್ಜಾಂವ್ಕ್ ಸಾದ್ಯ್ ನಾತ್ಲ್ಲೆಂ. ಆಪ್ಲ್ಯಾಚ್ ಧುವೆಚಿ ಚೂಕ್ ಆಸಾ ಮ್ಹಣ್ತಾನಾ....! ಶಬೀರ್ಯ್ ಮೌನ್ ಜಾಲೊ. ಪುಣ್ ನಿಮಾಣೆಂ ಪ್ರಯತ್ನ್ ಮ್ಹಳ್ಳ್ಯಾ ಪರಿಂ ತಾಣೆಂ ಆಪ್ಲ್ಯಾ ಧುವೆಕ್ಚ್ ಸಮ್ಜಾಂವ್ಚೆಂ ಪ್ರಯತ್ನ್ ಕೆಲೆಂ.
"ಜಾಂವ್ಕ್ ಪುರೊ ಅಬ್ಬೂ! ತುಮ್ಚ್ಯಾ ವಿಚಾರಾಂ ಮುಕಾರ್ ತುಮ್ಕಾಂ ಮ್ಹಜಿಚ್ ಚೂಕ್ ದಿಸ್ತಾ ಜಾಂವ್ಕ್ ಪುರೊ! ಪುಣ್ ತುಮಿ ಮ್ಹಜ್ಯಾ ಜಾಗ್ಯಾರ್ ರಾವೊನ್ ಕಿತ್ಯಾಕ್ ಚಿಂತಿನಾಂತ್? ತುಮಿಂ ಕೆದ್ನಾಂಯ್ ಎಕಾಚ್ಚ್ ಎಕಾ ಘಡಿಯೆಕ್ ಆಲಿಯಾ ಜಾಂವ್ಚೆಂ ಪ್ರಯತ್ನ್ ಕೆಲಾಂ? ತರ್ ತುಮ್ಕಾಂ ಕಶೆಂ ಸಮ್ಜಾತೆಲೆಂ?" ಆಲಿಯಾ ಆಪ್ಲ್ಯಾ ವಿಚಾರಾಂತ್ ಅಚಲ್ ಆಸ್ಲ್ಲೆಂ.
"ನಿಖಾ ಮ್ಹಳ್ಯಾರ್ ಏಕ್ ಖೆಳ್ ನ್ಹಯ್ ಆಲಿಯಾ! ಹ್ಯಾ ಸಂಭಂಧಾಕ್ ತುವೆಂ ಸಮ್ಜೊಂಕ್ ಜಾಯ್ ಆನಿ ತ್ಯಾ ಪರಿಂ ತುವೆಂ ಚಲೊಂಕ್ ಜಾಯ್! ತುಂ ಜಾಣಾಂಯ್? ತುಜೆಂ ತಲಾಖ್ ಜಾಲೆಂ ಜಾಲ್ಯಾರ್ ತುಜಿ ಪರಿಗತ್ ಕಿತೆಂ ಜಾತೆಲಿ ತಿ? ತುಜ್ಯಾ ತಲಾಖಾಚೊ ವಿಶಯ್ ಆಯ್ಕೊನ್ ಹಾಂಗಾ ಸಗ್ಳಿಂ ಇತ್ಲ್ಯಾ ಬೆಜಾರಾಯೆರ್ ಆಸಾತ್ ಜಾಲ್ಯಾರ್ಯ್ ತುಕಾ ಹ್ಯಾ ವಿಶಯಾಂತ್ ಕಾಂಯ್ಚ್ ಪಡೊನ್ ವಚೊಂಕ್ ನಾ ಮ್ಹಳ್ಯಾರ್.....? ತುಂ ಜಿವಿತಾಕ್ ಕಿತೆಂ ಚಿಂತಾಯ್? ಜಿವಿತ್ ಮ್ಹಳ್ಯಾರ್ ಏಕ್ ಸಪಾಣ್?" ಶಬೀರಾಕ್ ಆಪ್ಲ್ಯಾ ಧುವೆ ವಿಶ್ಯಾಂತ್ ಖಂತ್ ಆಸ್ಲ್ಲಿ. ಕಿತ್ಲೆಂ ಮ್ಹಳ್ಯಾರ್ಯ್ ತೆಂ ತಾಚೆಂ ಧುವ್ ಜಾವ್ನ್ ಜಲ್ಮಾಲಾಂ ಮ್ಹಣ್ತಾನಾ ತಾಣೆಂ ಆತಾಂ ತಾಕಾ ಸೊಸುಂಕ್ಚ್ ಆಸ್ಲ್ಲೆಂ.
"ತುಮಿಂ ಕೊಣ್ಯ್ ಮ್ಹಜ್ಯಾ ವಿಶಿಂ ಬೆಜಾರಾಯ್ ಕರಿನಾಕಾತ್ ಅಬ್ಬೂ!" ಆಲಿಯಾ ಖಡಾಖಂಡಿತ್ ಉಲಯ್ಲೆಂ. "ನಾಸಿರಾಕ್ ಹಾಂವ್ ತಲಾಖ್ ದೀನಾ. ತೊ ಮ್ಹಾಕಾ ತಲಾಖ್ ದಿತಾ! ಮ್ಹಾಕಾ ತಾಚಿ ಗರ್ಜ್ ನಾ ಮ್ಹಣೊನ್ ಮ್ಹಾಕಾ ದಿಸೊಂಕ್ ನಾ ತಾಕಾ ಮ್ಹಜಿ ಗರ್ಜ್ ನಾ ಮ್ಹಣ್ ದಿಸ್ಲ್ಯಾ! ನಿಖಾ ಮ್ಹಳ್ಯಾರ್ ಏಕ್ ಖೆಳ್ ನ್ಹಯ್... ಹೆಂ ಹಾಂವ್ ಬರೆಂ ಕರುನ್ ಜಾಣಾಂ. ಹ್ಯಾಚ್ ಖಾತಿರ್ ಹಾಂವ್ ಹ್ಯಾ ಸಂಭಂಧಾ ಸವೆಂ ಖೆಳಾನಾ! ಪುಣ್ ನಾಸಿರ್....? ಮ್ಹಜ್ಯಾ ಸಂಭಂಧಾ ಸವೆಂ ತೊ ಖೆಳೊಂಕ್ ಲಾಗ್ಲಾ. ನಿಖಾ ಮ್ಹಳ್ಯಾರ್ ಕಿತೆಂ ಮ್ಹಳ್ಳೆಂ ತಾಣೆಂ ಸಮ್ಜೊಂಕ್ ಜಾಯ್. ತೊ ಸಮ್ಜಾಲ್ಲೊ ಜಾಲ್ಯಾರ್ ತ್ಯಾ ಅಮೀನಾ ಸವೆಂ ತೊ....!" ಆಲಿಯಾನ್ ಮುಕಾರ್ ಉಲಂವ್ಚಿ ಉರ್ಭಾ ದಾಖಯ್ಲಿ ನಾ. ತೆಂ ಆಪ್ಣಾಕ್ ಸೊಡುನ್ ದೀಂವ್ಕ್ ತಯಾರ್ ನಾತ್ಲ್ಲೆಂ.
"ತರ್, ತುವೆಂಯ್ ತುಜ್ಯಾ ಫುಡಾರಾ ವಿಶಿಂ ಚಿಂತ್ಲಾಂಯ್ ಆಸ್ತೆಲೆಂ!" ಶಬೀರಾಕ್ ಆಪ್ಲ್ಯಾ ಧುವೆ ವಯ್ರ್ ದುಬಾವ್ ಜಾಲೊ.
"ತುಮಿಂ ಕಾಂಯ್ ಭಿಯೆಂವ್ಚಿ ಗರ್ಜ್ ನಾ. ನಾಸಿರಾ ಥಾವ್ನ್ ತಲಾಖ್ ಘೆವ್ನ್ ಹಾಂವ್ ಪಾಟಿಂ ಹಾಂಗಾ ಯೇನಾ! ಮ್ಹಜ್ಯಾ ಜಿವಿತಾಚಿ ದಿಶಾ ಮ್ಹಾಕಾ ಖಂಯ್ ವರ್ತಾ ಥಂಯ್ ಹಾಂವ್ ವೆತೆಲಿಂ!" ಆಲಿಯಾ ಆಪ್ಲ್ಯಾ ಜಿವಿತಾ ವಿಶಿಂ ಕಾಂಯ್ ಖಂತಿರ್ ನಾತ್ಲ್ಲೆಂ.
"ಹೆಂ ತುಜೆಂ ಘರ್ ಆಲಿಯಾ! ತುವೆಂ ಜಲ್ಮಾಲ್ಲೆಂ ಘರ್! ತುಂ ಕೆದಾಳಾ ಆಶೆತಾತಾಯ್ ತೆದಾಳಾ ತುಕಾ ಹಾಂಗಾಸರ್ ಯೆಂವ್ಚೆಂ ಹಕ್ಕ್ ಆಸಾ!"
"ಚಲಿಯೆಕ್ ಜಲ್ಮಾಲ್ಲ್ಯಾ ಘರಾ ಥಾವ್ನ್ ಒಪ್ಸುನ್ ದಿಲ್ಯಾ ಉಪ್ರಾಂತ್ ತ್ಯಾ ಘರಾಂತ್ ತಾಕಾ ಹಕ್ಕ್ ನಾ ಅಬ್ಬೂ! ಹ್ಯಾ ಹಕ್ಕಾಕ್ ಪರ್ಗಟ್ ಕರುಂಕ್ಚ್ ಚಲಿಯೆಕ್ ಒಪ್ಸುನ್ ದಿಂವ್ಚೆಂ!" ಆತಾಂ ಆಲಿಯಾ ಥೊಡ್ಯಾ ವೆಳಾಕ್ ಮೌನ್ ಜಾಲೆಂ. "ಕಿತ್ಲ್ಯಾ ಬೆಜಾರಾಯೆಚೊ ವಿಶಯ್! ನಾಸಿರ್ ಹ್ಯಾ ಹಕ್ಕಾಕ್ ಸಮ್ಜೊಂಕ್ ಸಕ್ಲೊ ನಾ!"
"ಆಲಿಯಾ ಬೇಟಾ...., ಹೆಂ ತುಜೆಂ ಜಿವಿತ್! ಹೆಂ ಕಾಂಯ್ ಪ್ಲೈಟ್ ನ್ಹಯ್. ದೋನ್ ತೀನ್ ವೊರಾಂಚಿ ತುಜಿ ಡ್ಯೂಟ್ ಜಾಲಿ ಆನಿ ತುಂ ದೆಂವೊನ್ ಗೆಲೆಂಯ್! ಕುಟಾಮ್ ಮ್ಹಣ್ತಾನಾ ರಾಗ್ ಆನಿ ಮೋಗ್ ಸದಾಂ ಆಸ್ತಾ. ಹಾಂತುಂ ಆಮಿಂ ಕೆದ್ನಾಂಯ್ ಎಕಾ ಕುಶಿಕ್ಚ್ ಮಾಲ್ವೊನ್ ರಾಂವ್ಚೆಂ ನ್ಹಯ್!" ಬಾಪಾಯ್ ಶಬೀರಾನ್ ಆಲಿಯಾಕ್ ಮಸ್ತ್ ಸಮ್ಜಾಯ್ಲೆಂ.
"ಸಾರ್ಕೆಂ ಅಬ್ಬೂ! ಹೆಂ ಹಾಂವ್ ಜಾಣಾಂ ಹ್ಯಾ ಖಾತಿರ್ ಹಾವೆಂ ಮ್ಹಜ್ಯಾ ವಿಚಾರಾಂ ಭಾಯ್ರ್ ಕಿತ್ಲೆಂ ಸೊಸ್ಲಾಂ ತೆಂ ಮ್ಹಾಕಾ ಮಾತ್ರ್ ಕಳಿತ್. ತುಮ್ಚ್ಯಾ ಮುಕಾರ್ ಮ್ಹಕಾ ತೆಂ ಉಗ್ಡಾಪೆಂ ಕರುಂಕ್ ನಾಕಾ. ಆತಾಂ ಸಗ್ಳೆಂ ಸಂಪ್ಲಾ ಅಬ್ಬೂ! ಜೆದ್ನಾ ಪಾಸೊನ್ ತೆಂ ಪ್ಲೈಟ್ ಆಸಾ ತೆದ್ನಾಂ ಪಾಸೊನ್ ಹೆಂ ಆಲಿಯಾ ಆಸಾ! ತ್ಯಾ ಉಪ್ರಾಂತ್.....?" ಆಲಿಯಾ ವ್ಹಳೂ ಹಾಸ್ಲೆಂ. ತಾಚ್ಯಾ ಹಾಸ್ಯಾಂನಿ ವಿಲಕ್ಶಣ್ ರೂಪ್ ಆಸ್ಲ್ಲೆಂ.
ನಾಸಿರಾ ಸಾಂಗಾತಾ ತಾಚೆಂ ನಿಖಾ ಜಾವ್ನ್ ತಾಚ್ಯಾ ಘೊವಾಚ್ಯಾ ಘರಾ ಆಲಿಯಾಕ್ ಒಪ್ಸುನ್ ದಿತಾನಾ ತೆಂ ಆಪ್ಣೆಂ ಪಾಂಯ್ ದವರ್ಲ್ಲ್ಯಾ ನವ್ಯಾ ಜಿವಿತಾಕ್ ನೆಣಾಂ ಆಸ್ಲ್ಲೆಂ. ತೆಂ ಚಲ್ಯಾಕ್ ನೆಣಾಂ ಆಸ್ಲ್ಲೆ. ಅಪುಟ್ಪಣಿ ತೆಂ ನಾಸಿರಾಕ್ ಮೆಳ್ಲ್ಲೆಂ ತರ್ಯ್ ಹ್ಯಾ ಅಪುಟ್ ಜಿವಿತಾಂತ್ ಕಿತ್ಲೆಂ ಸರ್ಶಿ ಬರ್ಶಿಕ್ ಆಸಾ ತೆಂ ತಾಕಾ ಉಪ್ರಾಂತ್ ಕಳ್ಲ್ಲೆಂ.
ಆಲಿಯಾನ್ ಚಿಂತ್ಲ್ಲ್ಯಾಪರಿಂ ತಾಚೆಂ ಜೀವನ್ ಚಲಾನಾಸ್ತಾನಾ ವೆತಾನಾ ಆಲಿಯಾನ್ ತಾಚ್ಯಾ ಸಂಭಂಧಾ ಸವೆಂ ರಾಜಿ ಕೆಲಿ ಜಾಲ್ಯಾರ್ಯ್ ತಾಚ್ಯಾ ವಿಚಾರಾಂ ಸಂಗಿಂ ತಾಣೆಂ ರಾಜಿ ಕೆಲಿ ನಾ. ಬೋವ್ಶಾ ಹ್ಯಾಚ್ ಖಾತಿರ್ ತಾಚೊ ನಾಸಿರಾ ಸಂಗಿಂ ಆಸ್ಲ್ಲೊ ಸಂಭಂಧ್ ಉರಂವ್ಚ್ಯಾಂತ್ ತೆಂ ಸಲ್ವಾಲೆಂ.
ಮತಿಚೆಂ ಚಿಂತಾಪ್ ಏಕ್ ಆನಿ ಕುಡಿಚಿ ದಾದೊಸ್ಕಾಯ್ ದುಸ್ರಿ ಜಾತಾನಾ ಆಲಿಯಾ ಪುರ್ತೆಂ ನಿರಾಶಿ ಜಾಲೆಂ. ಕುಡಿಚಿ ದಾದೊಸ್ಕಾಯ್ ಆಪ್ಲ್ಯಾ ಘೊವಾ ಮುಕಾರ್ ಉಗ್ತಿ ಕರುನ್ಯ್ ನಾಸಿರ್ ತಾಚೊ ಜಾಲೊ ನಾ. ಬಗಾರ್ ತೊ ದಿಸಾಂದೀಸ್ ಅಮೀನಾ ತೆವ್ಶಿಂ ಚಡ್ ಮಾಲ್ವೊಂಕ್ ಲಾಗ್ಲೊ.
ಮತಿಚಿ ವಿರಾರಾಯ್ ಕುಡಿಕ್ ದಾದೊಸ್ಕಾಯ್ ದೀಂವ್ಕ್ ಸಲ್ವಾತಾನಾ ಆಲಿಯಾಚಿಂ ಭಗ್ಣಾಂ ತಾಚ್ಯಾ ಕಾಳ್ಜಾಂತ್ಚ್ ಚಿರ್ಮುಟೊನ್ ಗೆಲಿಂ.
ಹಾಚ್ಯೆ ಸವೆಂ ಆಲಿಯಾಚೆಂ ತಲಾಖ್ ಚಲ್ಲೆಂ!
ಆಲಿಯಾನ್ ಸಾಂಗ್ಲ್ಲ್ಯಾಪರಿಂಚ್ ತಾಚೆಂ ತಲಾಖ್ ಜಾಲ್ಯಾ ಉಪ್ರಾಂತ್ ತೆಂ ಆಪ್ಲ್ಯಾ ಬಾಪಾಯ್ಚಾ ಘರಾ ಪಾಟಿಂ ಗೆಲೆಂ ನಾ. ತೆಂ ನಮಿತಾ ಸವೆಂ ತಾಚ್ಯಾ ಪ್ಲ್ಯಾಟಾಂತ್ ರಾವೊಂಕ್ ಲಾಗ್ಲೆಂ.
ಧುವೆಕ್ ಸೊಧುನ್ ನಮಿತಾಚಾ ಪ್ಲ್ಯಾಟಾಕ್ ಪಾಸೊನ್ ಆಯಿಲ್ಲ್ಯಾ ಶಬೀರಾಚೆಂ ಆಲಿಯಾನ್ ಕಾಂಯ್ಚ್ ಆಯ್ಕಾಲೆಂ ನಾ. ತಾಣೆಂ ತಾಚ್ಯಾ ಬಾಪಾಯ್ಕ್ ಆನಿ ತಾಚ್ಯಾ ಜಲ್ಮಾಲ್ಲ್ಯಾ ಘರಾಕ್ ತಿರಸ್ಕಾರ್ ಕೆಲೆಂ.
ಹ್ಯಾ ವೆಳಾರ್ ಜಾಲ್ಲ್ಯಾ ಉಲೊಣ್ಯಾಂತ್ ಶಬೀರಾಚೆಂ ಮನ್ ದುಖ್ಲೆಂ. ಹ್ಯಾ ಉಪ್ರಾಂತ್ ಆಲಿಯಾಚಾ ಕುಟ್ಮಾನ್ ಆಲಿಯಾಕ್ ಮೆಳ್ಚೆಂ ಪ್ರಯತ್ನ್ ಕೆಲೆಂ ನಾ. ಆಲಿಯಾನ್ ಜಾಲ್ಯಾರ್ಯ್ ತಾಚ್ಯಾ ಕುಟ್ಮಾ ಥಾವ್ನ್ ಸಂಭಂಧ್ ಜೊಡುಂಕ್ ಚಿಂತ್ಲೆಂ ನಾ.
ಕಾಳ್ಜಾಂತ್ಲಿಂ ಭಗ್ಣಾಂ ದಿಶಾ ದಿಸಾನಾಸ್ತಾನಾ ನಪಂಯ್ಚ್ ಜಾತಾನಾ ಚಲೊ ಆನಿ ಚಲಿಯೆ ಮಧ್ಲೊ ಅಂತರ್ ಕಿತೆಂ ಮ್ಹಣೊನ್ ಆಲಿಯಾ ಸಮ್ಜಾಲೆಂ.
ಸಮಾಜೆಂತ್ ಚಲಿಯೆಕ್ ಅಭಲ್ ಮ್ಹಣೊನ್ ಕೊನ್ಶಾಕ್ ಲೊಟ್ತಾನಾ, ವಾಸ್ತವಾಂತ್ ಚಲಿ ಆನಿ ಚಲ್ಯಾ ಮಧೆಂ ಕೋಣ್ ಪ್ರಭಲ್ ಆನಿ ಕೋಣ್ ಅಭಲ್ ಮ್ಹಣೊನ್ ತೆಂ ಜಾಣಾಂ ಜಾಲೆಂ.
"ಆಶೆಂ ತುಂ ಎಕ್ಸುರೆಂ ಕೆದ್ನಾಂ ಪಾಸೊನ್ ಜಿವಿತ್ ಸಾರುಂಕ್ ಪಾವ್ತೆಲೆಂಯ್ ಆಲಿಯಾ?" ಅಭಿಲಾಶಚ್ಯಾ ಕರಾರಾ ದಿಸಾ ನಾಕಾ ನಾಕಾ ಮ್ಹಳ್ಯಾರ್ಯ್ ಆಪ್ಲ್ಯಾ ಜಿವಿತಾಚಾ ಹ್ಯಾಚ್ ಘಡಿಯಾಂಕ್ ನಿಯಾಳುನ್ ಬೆಜಾರಾಯೆಂತ್ ಆಸ್ಲ್ಲ್ಯಾ ಆಲಿಯಾಕ್ ಪಳವ್ನ್ ತಾಕಾ ನಮಿತಾನ್ ವಿಚಾರ್ಲೆಂ.
ನಮಿತಾ ಆಲಿಯಾಚಾ ಭಗ್ಣಾಂಕ್ ಜಾಣಾಂ ಜಾಲ್ಲೆಂ. ತೆಂಯ್ ಏಕ್ ಚಲಿ. ಫುಡಾರಾಕ್ ತಾಣೆಯ್ ಕಾಜಾರ್ ಮ್ಹಳ್ಳ್ಯಾ ಎಕ್ವಟಾಚಾ ಭಾಂದಾಂತ್ ಆಪ್ಣಾಕ್ಚ್ ಬಾಂದುನ್ ಘೆಂವ್ಕ್ ಆಸಾ. ತಾಚ್ಯಾ ಮತಿಂತ್ಲ್ಯಾ ಸಪ್ಣಾಂಕ್ ಸೊಭಿತ್ ರಂಗಂವ್ಕ್ ಆಸಾ. ಆಶೆಂ ಆಸ್ತಾನಾ ಆಪ್ಣಾ ಮುಕಾರ್ ಬಾವೊನ್ ಪಡ್ಲೆಲ್ಯಾ ಫುಲಾ ಪರಿಂ ಜಾಲ್ಲ್ಯಾ ಆಲಿಯಾಕ್ ಪಳೆತಾನಾ ತಾಚೆಂ ವಿಭಾಡ್ಲ್ಲೆಂ ಜಿವಿತ್ ಪಳವ್ನ್ ನಮಿತಾಚಾ ಮತಿಂತ್ಯ್ ಚುರ್ಚುರೆ ಯೆತಾಲೆ.
"ಜಿವಿತಾಂತ್ ಆಪ್ಣಾಕ್ ಪೆಲ್ಯಾಚಿ ಗರ್ಜ್ ಆಸಾ ಮ್ಹಣೊನ್ ಕೆದಾಳಾ ಭೊಗ್ತಾ?" ಆಲಿಯಾನ್ ಆಪ್ಲ್ಯಾ ಹರ್ಧ್ಯಾಕ್ ಬಾಂದ್ಲ್ಲ್ಯಾ ಹಾತಾಂಕ್ ಸೊಡವ್ನ್ ತೆ ಆಪ್ಲ್ಯಾ ಉಸ್ಕ್ಯಾರ್ ಗಳಯ್ಲೆ.
"........" ನಮಿತಾ ಕಾಂಯ್ ಜವಾಬ್ ದೀನಾಸ್ತಾನಾ ಮೌನ್ ರಾವ್ಲೆಂ.
"ಜೆದ್ನಾಂ ಮನಿಸ್ ಆಪ್ಲ್ಯಾ ಭಿತರ್ ಸುಖ್ ಸಂತೊಸ್ ಭೊಗುಂಕ್ ಸಲ್ವಾತಾ ತೆದ್ನಾಂ ತೊ ಹ್ಯಾ ಸುಖಾ ಸಂತೊಸಾಚಿಂ ಸೊಧ್ನಾ ಕರ್ತಾ ಆನಿ ತೆಂ ಸುಖ್, ಜಾಂವ್ ತೆಂ ಕಸಲ್ಯಾಯ್ ರೂಪಾಚೆಂ ಯಾ ಕಸಲ್ಯಾಯ್ ವೈಶಿಶ್ಟ್ಯಾಚೆಂ, ಹೆಂ ಜೊಡುಂಕ್ ತೊ ಹ್ಯಾ ಸಂಸಾರಾಂತ್ಲ್ಯಾ ನೈಸರ್ಗಿಕ್ ಯಾ ಸ್ವಾಭಾವೀಕ್ ಜಾವ್ಯೆತ್ ವಾ ಕೃತಕ್ ಜಾವ್ಯೆತ್, ಹಾಂಚೆ ಮಧ್ಲ್ಯಾ ಪೆಲ್ಯಾಕ್ ತೊ ವಿಂಚ್ತಾ ಆನಿ ಸುಖ್ ಭೊಗ್ತಾ! ಹಾಂಗಾಸರ್ ತಾಣೆಂ ಜೊಡ್ಲ್ಲೆಂ ಸುಖ್ ಚಡ್ ಪ್ರಾಮುಖ್ಯ್? ವಾ ತಾಕಾ ಸುಖ್ ಜೊಡುನ್ ದೀಂವ್ಕ್ ಕಾರಾಣ್ ಜಾಲ್ಲಿ ವ್ಯಕ್ತಿ ವಾ ವಸ್ತ್ ವಾ ಮನ್ಜಾತ್ ಯಾ ಕಿತೆಂಯ್ ತೆಂ ಜಾಂವ್... ಖಂಯ್ಚೆಂ ಚಡ್ ಪ್ರಾಮುಖ್ಯ್?"
ಆಲಿಯಾಚಾ ಜಾಪಿ ಪಾಟ್ಲ್ಯಾ ಸವಾಲಾ ಥಾವ್ನ್ ನಮಿತಾ ಏಕ್ ಕ್ಷಣ್ ಚಿಂತ್ಚಾರ್ ಪಡ್ಲೆಂ.
"ಸತ್ ಸಾಂಗೊಂ?" ಆತಾಂ ತೆಂ ಉಲಯ್ಲೆಂ.
ಆಲಿಯಾ ಫಕತ್ತ್ ನಮಿತಾಕ್ ಪಳವ್ನ್ ರಾವ್ಲೆಂ ಶಿವಾಯ್ ತಾಣೆ ಕಾಂಯ್ ಜಾಪ್ ದಿಲಿ ನಾ. ತಾಚ್ಯಾ ಹಾವಭಾವಾಂತ್ ಕಾಂಯ್ ಬದ್ಲಾವಣ್ ದಿಸೊನ್ ಆಯ್ಲಿ ನಾ. ತಾಚಿ ತಿಚ್ಚ್ ಶಾಂತ್ ನದರ್! ಪುಣ್ ಚಡ್ ತೀಕ್ಷ್ಣ್!
"ಹಾಂಗಾಸರ್ ಪ್ರಾಮುಖ್ಯತೆಚೆಂ ಸವಾಲ್ಚ್ ಉದೆನಾ!" ನಮಿತಾಚಾ ಜವಾಬೆಕ್ ಎಕ್ಚ್ ಪಾವ್ಟಿಂ ’ಥಟಕ್ಕ್’ ಜಾಲೆಂ ಆಲಿಯಾ. ತಾಣೆಂ ಚಿಂತುಂಕ್ ಸಯ್ತ್ ನಾತ್ಲ್ಲೆಂ ನಮಿತಾ ಆಸಲಿ ಜವಾಬ್ ದೀಂವ್ಕ್ ಸಕ್ತೆಲೆಂ ಮ್ಹಣ್.
"ಮ್ಹಳ್ಯಾರ್.....?!" ತಾಣೆಂ ನಮಿತಾಕ್ ಪಾರ್ಕುಂಚಾ ಖಾತಿರ್ ಸವಾಲ್ ಉಡಯ್ಲೆಂ.
"ವೆರ್ರಿ ಸಿಂಪಲ್ ಆಲಿಯಾ! ಆಪ್ಲ್ಯಾ ಸುಖಾ ಖಾತಿರ್ ಕೊಣ್ಯ್ ದುಸ್ರ್ಯಾಕ್ ಗಳ್ಸಿತಾ ಜಾಲ್ಯಾರ್ ತಾಚ್ಯಾ ನದ್ರೆಂತ್ ತ್ಯಾ ವ್ಯಕ್ತಿ ಥಂಯ್ ಯಾ ತ್ಯಾ ವಸ್ತು ಥಂಯ್ ಪ್ರಾಮುಖ್ಯತಾ ಮ್ಹಳ್ಳೆಂ ಭಿಲ್ಕುಲ್ ಯೇನಾ. ಯೆತಾ ಜಾಲ್ಯಾರ್ ಫಕತ್ತ್ ಸ್ವಾರ್ಥ್ ಮಾತ್ರ್!"
"ಯು ಆರ್ ಎಕ್ಸಾಕ್ಟ್ಲೀ ಆನ್ ಲೈನ್ ಡಿಯರ್!" ಆಲಿಯಾನ್ ಏಕ್ ಲಾಂಭ್ ಶ್ವಾಸ್ ಸೊಡ್ಲೊ. ಉಪ್ರಾಂತ್ ತೆಂ ಉಲಯ್ಲೆಂ.
"ಜಿವಿತಾಂತ್ ಉಣೆಂಪಣ್ ಆಸ್ಲ್ಲೊ ಮಾತ್ರ್ ಪೆಲ್ಯಾಕ್ ಸೊಧ್ತಾ. ಉಣೆಂಪಣ್ ನಾತ್ಲ್ಲೊ ಆಪ್ಣಾ ತಿತ್ಲ್ಯಾಕ್ ಸುಖಿ ರಾವ್ತಾ. ನಿಖಾ, ಕುಟಾಮ್, ಸಂಭಂಧ್, ಸಗ್ಳೆ ಕಿತೆಂ ತೆಂ ಹಾವೆಂ ಪಳೆಲಾಂ. ಹಾಂಗಾಸರ್ ಹರ್ಯೆಕಾಂತ್ಯ್ ಮ್ಹಾಕಾ ಆನಿ ತುಕಾ ಮ್ಹಳ್ಯಾರ್ ಚಲಿಯೆಕ್ಚ್ ಭಾಗ್ವೊನ್ ಜಿಯೆಂವ್ಕ್ ಪಡ್ತಾ. ಆತ್ತಾಂ ಘೊವಾಚಾ ಭಿಯಾನ್, ಆತ್ತಾಂ ಭುರ್ಗ್ಯಾಂಚಾ ಖಂತಿನ್, ಅತ್ತಾಂ ಮಾಂಯ್ ಮಾಂವಾಂ ಥಂಯ್ ತಗ್ಸುನ್, ಆತ್ತಾಂ ಸಂಭಂಧ್ ರಾಕೊಂಕ್, ಆತ್ತಾಂ ಸಂಭಂಧ್ ವ್ಹಾಡಂವ್ಕ್, ಆನಿಂ ...... ಸೊಡ್ ತೆಂ!" ಉಲಂವ್ಚೆಂ ಆಲಿಯಾ ಕಸಲ್ಯಾ ಎಕಾ ವಿಚಿತ್ರ್ ತಾತ್ಸಾರಾನ್ ಮ್ಹಳ್ಳ್ಯಾ ಪರಿಂ ಆಂಗ್ ಹಿಂವ್ಳಾವ್ನ್ ಮೌನ್ ಜಾಲೆಂ. ಥೊಡಿಂ ಕ್ಷಣಾಂ ಮೌನ್ ರಾವ್ಲ್ಲೆಂ ತೆಂ,
"ತುಂ ಜಾಣಾಯ್? ಎಕೇಕ್ ಪಾವ್ಟಿಂ ಖುದ್ದ್ ತುಜ್ಯಾ ಘರಾಂತ್ ತುಜ್ಯಾಚ್ ಘೊವಾ ಥಾವ್ನ್ ತುಜ್ಯೆ ವಯ್ರ್ ಅತ್ಯಾಚಾರ್, ಭಲತ್ಕಾರ್ಯ್ ಜಾತಾ! ನಾಕಾ ನಾಕಾ ಮ್ಹಳ್ಯಾರ್ಯ್ ತುವೆಂ ತೊಡ್ಪ್ಯಾ ಪರಿಂ ಆಪ್ಣಾಕ್ಚ್ ಉಗ್ತೆಂ ಘಾಲುಂಕ್ ಪಡ್ತಾ ಆನಿ ತೊ... ಆನಿ ತೊ ಹಾತಾಕ್ ಮೆಳ್ಲ್ಲೆಂ ವಿಂಚ್ತಾ, ಆಸುಡ್ತಾ, ಪಾಪುಡ್ತಾ, ಆನಿಂ.... ಆನಿ.... " ಆಲಿಯಾ ಆತಾಂ ಖರ್ಶೆಂವ್ಕ್ ಲಾಗ್ಲೆಂ.
ಆಲಿಯಾಚಾ ತಾತ್ಸಾರಾಕ್ ಪಳೆಲ್ಲೆಂ ನಮಿತಾ,
"ಆಲಿಯಾ, ಪ್ಲೀಸ್ ಕಾಮ್ಡೌನ್! ಆಮಿಂ ಹ್ಯಾ ವಿಶಿಂ ಚಿಂತ್ಚೆಂ ನಾಕಾ. ಸೊಡ್ ತೆಂ!" ನಮಿತಾನ್ ಮುಕಾರ್ ಬಾಗ್ವೊನ್ ಆಲಿಯಾಚೊ ಹಾತ್ ಧರ್ಲೊ.
"ಹೆಂ ಚಿಂತಾಪ್ ನ್ಹಯ್ ನಮಿತಾ! ಮ್ಹಜ್ಯೆ ಸಂಗಿಂ ಆಶೆಂ ಜಾಲಾಂ! ಜಾಣಾಂಯ್ ತುಂ? ಮ್ಹಜೊ ಸ್ವಾಭಿಮಾನ್ ಉರಂವ್ಚ್ಯಾ ಎಕಾಚ್ ಎಕಾ ಇರಾದ್ಯಾಕ್ ಲಾಗೊನ್ ಹಾವೆಂ ಭೊಗ್ಲ್ಲಿ ಹಿಂಸಾ ತುಂ ಜಾಣಾಂಯ್? ತ್ಯಾ ಭಾಯ್ರ್ ತೆಂ ಅಮೀನಾ ಮ್ಹಜ್ಯಾ ಆನಿ ಮ್ಹಜ್ಯಾ ಘೊವಾ ಮಧೆಂ ಯೆತಾನಾ ಮ್ಹಜೊ ಅನಿ ನಾಸಿರಾಚೊ ಸಂಭಂಧ್ ಉರಂವ್ಚ್ಯಾ ಖಾತಿರ್ ಹಾಂವ್ಯ್ ತೆಂಚ್ ತೊಡ್ಪೆಂ ಜಾಲ್ಯಾಂ! ತೊ ದಳ್ದಿರ್, ಫಕತ್ತ್ ಜಾಯ್ ಆಸ್ಲ್ಲೆಂ ವಿಂಚುನ್, ಆಸ್ಡುನ್ ಪಾಪ್ಡುನ್ ಗೆಲೊ ಶಿವಾಯ್ ಕೆದ್ನಾಂಚ್ ಮ್ಹಾಕಾ ಮೊಗಾನ್ ಸಮ್ಜೊಂಕ್ ಸಕ್ಲೊ ನಾ!" ಆಪ್ಲ್ಯಾ ಜಿವಿತಾ ವಿಶ್ಯಾಂತ್ಚ್ ಉಲಯಿಲ್ಲೆಂ ಆಲಿಯಾ ಕಾಳ್ಜಾಚ್ಯಾ ತಳ್ಮಳ್ಯಾಂನಿ ಭರೊನ್ ಉಲಂವ್ಕ್ ಜಾಯ್ನಾಸ್ತಾನಾ ಮೌನ್ ಜಾಲೆಂ. ತಾಣೆಂ ಆಪ್ಲ್ಯಾ ಹಾತಾಂಕ್ ದರ್ಲ್ಲ್ಯಾ ನಮಿತಾಚ್ಯಾ ಹಾತಾಂ ಥಾವ್ನ್ ಆಪ್ಲ್ಯಾ ಹಾತಾಂಕ್ ಸುಟ್ಕಾ ದಿವವ್ನ್ ತ್ಯಾ ಹಾತಾಂಕ್ ಆಪ್ಲ್ಯಾ ಮುಖಮಳಾರ್ ಚರಯ್ಲೆಂ. ನಮಿತಾನ್ ಆಲಿಯಾಕ್ ಇತ್ಲ್ಯಾ ಸಿಂತಿಮೆಂತಾನಿ ಬುಡ್ಲ್ಲೆಂ ತೆಂ ಆಜ್ಚ್ ಪಯ್ಲ್ಯಾ ಪಾವ್ಟಿಂ ಪಳೆಲೆಂ. ಆಲಿಯಾ ಮ್ಹಳ್ಯಾರ್ ದ್ರಡ್ ಮನಾಚೆಂ ಚೆಡುಂ ಮ್ಹಣೊನ್ ಪಾತ್ಯೆಲ್ಲ್ಯಾ ನಮಿತಾಚಿ ಪಾತ್ಯೆಣಿ ತಾಚ್ಯಾ ದೊಳ್ಯಾಂ ಮುಖಾರ್ಚ್ ಫಟ್ ಜಾಲ್ಲಿ. ಆಲಿಯಾ ಆಪ್ಲ್ಯಾ ಜಿವಿತಾಕ್ ಜಿಯೆಂವ್ಚ್ಯಾ ವಿಶಯಾಂತ್ ಮಾತ್ರ್ ದ್ರಡ್ ಆಸ್ಲ್ಲೆಂ ಶಿವಾಯ್ ಏಕ್ ಚಲಿ ಜಾವ್ನ್ ತೆಂಯ್ ಏಕ್ ನಾಜೂಕ್ ಜೀವ್ ಮ್ಹಳ್ಳೆಂ ತೆಂ ನಮಿತಾನ್ ಆಜ್ ಒಪುನ್ ಘೆತ್ಲೆಂ.
"ಮ್ಹಾಕಾ ಹ್ಯಾ....." ಆಲಿಯಾನ್ ಮುಂದರಿಲೆಂ "....ವಿಶಯಾಂತ್ ಕಾಂಯ್ ದೂಖ್ ನಾ ನಮಿತಾ! ಮ್ಹಾಕಾ ಮಜ್ಯೆ ವಯ್ರ್ ಧಯ್ರ್ ಆನಿ ಭರ್ವಸೊ ಆಸಾ! ಮ್ಹಾಕಾ ಮ್ಹಜೆಂ ಜಿವಿತ್ ಸಾರುಂಕ್ ಎಕಾ ಚಲ್ಯಾಚಿ ಗರ್ಜ್ ನಾ! ಪುಣ್... ಪುಣ್ ಹಾಂವ್ ಮ್ಹಜ್ಯಾ ಘೊವಾ ವಯ್ರ್ ವಿಶ್ವಾಸಾನ್ ಪಾತ್ಯೆವ್ನ್ ಆಯಿಲ್ಲಿಂ. ಹ್ಯಾ ಮ್ಹಜ್ಯಾ ವಿಶ್ವಾಸಾಕ್ ತಾಣೆಂ ಮ್ಹಾಕಾ ಏಕ್ ದೀಸ್ ಹಾಂವ್ ತಾಚೆಂ ಬಾಯ್ಲ್ ಮ್ಹಣೊನ್ ಗೌರವ್ ದಿಲ್ಲೊ ಜಾಲ್ಯಾರ್....?!" ಆಲಿಯಾನ್ ಆತಾ ಆಪ್ಲ್ಯಾ ಬೊಟಾನ್ ಆಪ್ಲ್ಯಾ ದೊಳ್ಯಾಂಕ್ ಪೊಶೆಲೆಂ. ಹೆವ್ಶಿಂ ತೆವ್ಶಿಂ ಪಳೆಲ್ಲೆಂ ತೆಂ ಸವ್ಕಾಸ್ ಆಪ್ಲ್ಯಾ ಬಸ್ಕೆಕ್ ವೊಣ್ಕಾಲೆಂ.
ಆಪ್ಲ್ಯಾ ಜವಾಬೆ ಥಾವ್ನ್ ಆಲಿಯಾ ಆಪ್ಲ್ಯಾ ಜಿವಿತಾಚ್ಯಾ ವಿಶಿಂ ಚಿಂತುನ್ ಇತ್ಲೆಂ ಸಿಂತಿಮೆಂತಾಳ್ ಜಾಲೆಂ ತೆಂ ಕಳ್ಲ್ಲೆಂ ನಮಿತಾ ಚುರ್ಚುರ್ಯಾಂನಿ,
"ಹಾವೆಂ ಸಾಂಗ್ಲ್ಲ್ಯಾಚೊ ತೊ ಮತ್ಲಾಬ್ ನ್ಹಯ್ ಆಲಿಯಾ! ಪುಣ್ ಚಲಿ ಮ್ಹಣೊನ್ ಜಲ್ಮ್ ಘೆತ್ಲ್ಯಾ ಉಪ್ರಾಂತ್ ಹ್ಯಾ ವಾಸ್ತವೀಕ್ ಸಮಾಜೆಂತ್ ದೀಸ್ ಕಾಡುಂಕ್.....!"
"ವಾಸ್ತವ್.....? ಕಸಲ್ಯಾ ವಾಸ್ತವಾ ವಿಶಿ ಉಲಯ್ತಾಯ್ ತುಂ?" ನಮಿತಾಚಿಂ ಉತ್ರಾಂ ಮಧೆಂಚ್ ಕಾತ್ರುನ್ ಆಲಿಯಾ ಉಲಯ್ಲೆಂ. "ಹ್ಯಾ ಸಮಾಜೆಂತ್ ಹ್ಯಾ ಚಲ್ಯಾನ್ ಆಪ್ಣಾಕ್ ಉಪ್ಕಾರಾಕ್ ಪಡ್ಚ್ಯಾ ತಸಲ್ಯೊ ಆನಿ ಅಪ್ಣಾಕ್ ಫಾಯ್ದೊ ಮೆಳ್ತಾ ತಸಲ್ಯೊ ಸ್ವಾರ್ಥಿ ವಾಟೊ ವಿಂಚುನ್ ತ್ಯಾ ವಾಟೆಂಕ್ ರಿತಿ ಆನಿ ರಿವಾಜೆಂಚಾ ನಾಂವಾರ್ ಹ್ಯಾ ಸಮಾಜೆ ಮುಕಾರ್ ಉಭೆಂ ಕೆಲಾಂ ಪಳೆ.... ಹೊ ತುವೆಂ ಉಲಂವ್ಚೊ ವಾಸ್ತವ್? ಯಾ ಹಾಂವ್ ಅಭಲ್ ಮ್ಹಣೊನ್ ಹಾವೆಂಚ್ ಮಾಂದುನ್ ಘೆವ್ನ್ ಮ್ಹಜ್ಯಾ ಭೊಂವಾರಿ ಹಾವೆಂಚ್ ಉಭೊ ಕೆಲ್ಲ್ಯಾ ಪಾಗೊರಾಕ್ ತುಂ ವಾಸ್ತಾವ್ ಮ್ಹಣ್ತಾಯ್? ದೊನಾಂಯ್ಕ್ಯ್ ಮೊಡುಂಕ್ ಸಾದ್ಯ್ ಆಸಾ ನಮಿತಾ. ಜೆಂ ಕಿತೆಂ ಮೊಡುಂಕ್ ಸಾದ್ಯ್ ಆಸಾ ತೆಂ ಖರೆಂ ನ್ಹಯ್!"
ಆಲಿಯಾಚಾ ಉತ್ರಾಂನಿ ಹ್ಯಾ ಸಮಾಜೆ ವಯ್ರ್ ಭಿರಾಂಕುಳ್ ತಾತ್ಸಾರ್ ಆಸಾ ತಶೆಂ ತಾಚ್ಯಾ ಉತ್ರಾಂನಿ ಕಳ್ತಾಲೆಂ. ನಮಿತಾ ಆಲಿಯಾಚಾ ಉತ್ರಾಂಕ್ ಉತಾರ್ ದೀವ್ನ್ ಉಲಯ್ಲೆಂ ನಾ. ತೆಂ ಆತಾಂ ಮೌನ್ ಜಾಲೆಂ. ಆಲಿಯಾಚೊ ತಾತ್ಸಾರ್, ತಾಚ್ಯಾ ಏಕಪ್ರಕಾರಾಚಾ ಚಿಂತ್ಪಾಚೊ ಮ್ಹಣೊನ್ ಸಾಂಗೊಂಕ್ಯ್ ನಮಿತಾಕ್ ಸಾದ್ಯ್ ಜಾಲೆಂ ನಾ. ಕಿತ್ಯಾಕ್ ಮ್ಹಳ್ಯಾರ್ ತಾಚ್ಯಾ ಖಾಸ್ಗಿ ಜಿವಿತಾ ವಿಶಿಂ ಆಲಿಯಾ ಭೋವ್ ಉಣೆಂ ಉಲಯ್ತಾಲೆಂ. ಹೆಂ ಉಲೊಣೆಂ ಭೋವ್ ಉಣೆಂ ಜಾಲ್ಯಾರ್ಯ್ ಹ್ಯಾ ಉಲವ್ಣ್ಯಾಂತ್ ತೆಂ ಫಕತ್ತ್ ಆಪ್ಣಾ ವಿಶಿಂ ಮಾತ್ರ್ ಉಲಯ್ನಾತ್ಲ್ಲೆಂ. ಬಗಾರ್ ಸಮಾಜೆಂತ್ ದಣ್ಸಾಲ್ಲ್ಯಾ ಲ್ಹಾನಾಂತ್ಲ್ಯಾ ಲ್ಹಾನಾಂ ವಿಶಿಂ ತೆಂ ಉಲಯ್ತಾಲೆಂ. ಹ್ಯಾಚ್ ಖಾತಿರ್ ಆಲಿಯಾನ್ ನಾಸಿರಾಚಾ ಜಿವಿತಾಂತ್ ತಿಳುನ್ ಪಳಂವ್ಚೆಂ ರಾವಯಿಲ್ಲೆಂ.
"ಹಾಂತುಂ ಕಾಂಯ್ ಫಾಯ್ದೊ ನಾ ನಮಿತಾ!" ಆಲಿಯಾಚೆಂ ಜಿವಿತ್ ಅಮೀನಾಕ್ ಲಾಗೊನ್ ಪಿಡ್ಡ್ಯಾರ್ ಜಾತಾ ಮ್ಹಳ್ಳ್ಯಾ ವಿಶಯಾಕ್ ಅಭಿಲಾಶನ್ ನಮಿತಾ ಮುಕಾರ್ ದವರ್ತಾನಾ ನಮಿತಾನ್ ಆಲಿಯಾಕ್ ಸಮ್ಜಂವ್ಚೆಂ ಪ್ರಯತ್ನ್ ಕೆಲ್ಲೆಂ.
"ಪುಣ್ ತುಂ ಆಶೆಂ ಕಿತ್ಲೆ ದೀಸ್ ಕಾಡುಂಕ್ ಸಕ್ತೆಲೆಂಯ್?"
"ತುಂ ಚಿಂತಾಯ್ ಮ್ಹಜೊ ಘೊವ್ ಆಸ್ಲ್ಲೊ ತೊ ನಿಜಾಯ್ಕ್ಯ್ ಮ್ಹಜೊ ಘೊವ್....?"
"ಮ್ಹಳ್ಯಾರ್....?"
"ತಾಣೆ ಹ್ಯಾ ಮ್ಹಜ್ಯಾ ಗೊರ್ಯಾ ಕಾತಿಕ್ ಮಾತ್ರ್ ಪಳೆಲಾಂ ಶಿವಾಯ್, ಹ್ಯಾ ಮತಿ ಭಿತರ್ ಕಿತೆಂ ಆಸಾ ತೆಂ ತೊ ಪಳಂವ್ಕ್ ಸಕೊಂಕ್ ನಾ. ತಶೆಂಯ್ ತಾಕಾ ಆತಾಂ ಹಾಂವ್ ಏಕ್ ಭೊರೊ ಜಾಲ್ಯಾಂ. ತಾಚ್ಯಾ ವಾಟೆರ್ ಹಾವೆಂ ಕಿತ್ಯಾಕ್ ತಾಕಾ ಜಡಾಯ್ ಜಾಯ್ಜಯ್.....?"
"ತಶೆಂ ನ್ಹಯ್ ಆಲಿಯಾ!" ನಮಿತಾ ಆಲಿಯಾಕ್ ಸಮ್ಜಾಂವ್ಕ್ ಪ್ರಯತ್ನ್ ಕರ್ತಾಲೆಂ.
"ಹ್ಯಾ ವಿಶಯಾಂತ್ ಆನಿ ಕಾಂಯ್ ಉಲವ್ನ್ ಫಾಯ್ದೊ ನಾ. ಹಾಂವ್ ಆತಾಂ ಫಕತ್ತ್ ಮುಕ್ಲೆಂ ಚಿಂತಾಂ. ಲೆಟ್ ದೆಮ್ ಬಿ ಹ್ಯಾಪ್ಪಿ! ಮನಾಂ ಮೆಳ್ಳ್ಯಾರ್ ಮಾತ್ರ್ ಸುಖ್ ಆನಿ ಸಂತೊಸ್! ಮನಾಂ ಮೆಳಾನಾಂತ್ ಜಾಲ್ಯಾರ್ ಸುಖ್ ಸಂತೊಸ್ ಖಂಯ್ ಥಾವ್ನ್?"
ಆಲಿಯಾನ್ ಆಪ್ಲ್ಯಾ ಮುಕ್ಲ್ಯಾ ಜಿವಿತಾಕ್ ಖುಶೇನ್ ಖಾಲ್ತಿಮಾನ್ ಘಾಲೊ. ತೆಂ ಜಾಣಾಂ ಆಸ್ಲ್ಲೆಂ ನಾಸಿರ್ ಆಪ್ಣಾ ಸಾಂಗಾತಾ ಆನಿ ಆಪುಣ್ ನಾಸಿರಾ ಸಾಂಗಾತಾ ಕೆದ್ನಾಂಚ್ ಸುಖಿ ಆಸ್ಚೆ ನಾಂವ್. ಹ್ಯಾ ಖಾತಿರ್ ಭಲಾತ್ಕಾರ್ಯ್ ಸಮಾಧಾನ್ ಆನಿ ಸುಖ್ ಶಾಂತಿ ವಿಭಾಡುಂಕ್ ಪಾವ್ತಾ ಶಿವಾಯ್ ಬರೆಂಪಣ್ ಕಾಂಯ್ ಹಾಡುನ್ ಯೇನಾ.
"ತುವೆಂ ಉಲಂವ್ಚೆಂ ಸಾರ್ಕೆಂ ಆಲಿಯಾ! ನಾಸಿರ್ ಫಾಲ್ಯಾಂ ಅಮೀನಾ ಲಾಗಿಂ ನಿಖಾ ಜಾತಲೊ. ಪುಣ್ ತುಜೆಂ ಕಿತೆಂ ಜಾತೆಲೆಂ? ತುಕಾ ಕೋಣ್ ಸ್ವೀಕಾರ್ ಕರ್ತಲೊ?"
ನಮಿತಾಚ್ಯಾ ಸವಾಲಾನ್ ಆಲಿಯಾಚಾ ತೊಂಡಾರ್ ಹಾಸೊ ಉದೆಲ್ಯೊ.
ಪಾತಳ್ ಅಸ್ಪಶ್ಟ್ ಭಾವನಾಂಚ್ಯೊ ಹಾಸೊ! ಪುಣ್ ಅರ್ಥಾ ಭರಿತ್ ಹಾಸೊ!
"ತುಂ ಹೆಂ ಸಾಂಗೊಂಕ್ ಸೊಧ್ತಾಯ್ ಕೀ ಹಾಂವ್ ಎದೊಳ್ಚ್ ಜಡಾರ್ ಥಾವ್ನ್ ಹುಮ್ಟಿಲ್ಲೆಂ ಫುಲ್. ಜ್ಯಾ ಫುಲಾಚ್ಯಾ ಪಾಕ್ಳ್ಯಾಂ ವಯ್ರ್ ಧಾಗ್ ಪಡ್ಲ್ಯಾತ್....?"
ಆಲಿಯಾಚಾ ತೊಂಡಾರ್ ಪರ್ತ್ಯಾಕ್ ತ್ಯೊಚ್ ಅಸ್ಪಶ್ಟ್ ಭಾವನಾಂಚ್ಯೊ ಹಾಸೊ ಉದೆಲ್ಯೊ.
ತಾಣೆ ಆಪ್ಲಿ ನದರ್ ಉಭಾರುನ್ ವಯ್ಲ್ಯಾ ಮೊಳಾಬಾಕ್ ಪಳೆಲೆಂ.
ಸಾಂಜೆಚಾ ಮೊಳಾಬಾಚೊ ರಂಗ್ ವರ್ಣಾಳ್ ದಿಸ್ತಾಲೊ.
ಪಯ್ಶಿಲ್ಯಾ ದರ್ಯಾಂತ್ ಸುರ್ಯೊ ವಿಶೆವಾಕ್ ಗೆಲಾ ತಸೊ!
ಆಲಿಯಾ ಮತಿಂತ್ಚ್ ಖುಶ್ ಜಾಲೆಂ.
ಆಲಿಯಾ ತಾಚ್ಯಾ ಭುರ್ಗ್ಯಾಪಣಾರ್ ಥಾವ್ನ್ ಹ್ಯಾ ಮೊಳಾಬಾಕ್ ಕಿತ್ಯಾಕ್ಗೀ ಚಡ್ಚ್ ಪಸಂದ್ ಕರ್ತಾ. ತಿಂ ಮೊಳಾಬಾ ಪಂದ್ಲಿ ಕುಪಾಂ! ತ್ಯಾ ಕುಪಾಂ ಪಂದಾ ಉಬ್ಚಿಂ ಸುಕ್ಣಿಂ! ಸ್ವತಂತ್ರ್! ಸಂಪೂರ್ಣ್ ಸ್ವತಂತ್ರ್.....!
ಪುಣ್ ಹ್ಯಾ ಪೃಥ್ವೆರ್ ಮಾತ್ರ್ ಭಂಧಡ್ಚ್ ಭಂಧಡ್! ಹ್ಯಾ ಭಂಧಡೆಂತ್ ಖಂಯ್ ಧಾಗ್ ಆನಿ ಖಂಯ್ ಧಾಗೊ.....?
ಪಡ್ಲಲೊ ಧಾಗ್ ದಿಸಾನಾ ಜಾಲ್ಯಾರ್ಯ್ ಮನಿಸ್ ಹ್ಯಾ ಧಾಗಾಕ್ ಚಿಂತುನ್ ಕಾಂಟಾಳ್ತಾ! ಆನಿ ತೊ ಧಾಗೊ ಭೋವ್ಚ್ ನಾಜೂಕ್ ಮ್ಹಣೊನ್ ಜಾಣಾಂ ಆಸೊನ್ಯ್ ತೊಚ್ ಮನಿಸ್ ತೊ ಧಾಗೊ ತುಟಯ್ತಾ ಆನಿ ಹಾಸ್ತಾ!
ಆಲಿಯಾಚಾ ಪಾಕ್ಳ್ಯಾಂನಿಂಯ್ ಧಾಗ್ ಪಡ್ಲಾ ಆನಿ ತಾಚೊ ಧಾಗೊ ತುಟ್ಲಾ. ಬೋವ್ಶಾ ತಾಣೆಂ ತ್ಯಾ ಕುಪಾಂ ಮಧೆಂ ಉಭೊಂಕ್ ಆಸಾ. ತಾಚಿ ದಿಶಾ ತಾಣೆಂ ಸೊಧುಂಕ್ ಆಸಾ. ಆಶೆಂಯ್ ಜಾಂವ್ಕ್ ಸಕ್ತಾ ಕೀ ತ್ಯಾ ಕುಪಾಂ ಮಧೆಂ ಆಲಿಯಾಚಿ ದಿಶಾ ತಾಕಾ ಸೊಧುನ್ ಆಸಾ ಆನಿ ತಾಣೆಂ ತ್ಯಾ ದಿಶೆಕ್ ಆಜ್ ನ್ಹಯ್ ತರ್ ಫಾಲ್ಯಾಂ ಮೆಳೊಂಕ್ ಆಸಾ!
ಆಲಿಯಾಚೆ ದೊಳೆ ಮೊಳಾಬಾಕ್ಚ್ ಪಳೆಂವ್ಕ್ ಲಾಗ್ಲೆ. ತ್ಯಾ ಸಾಂಜೆಚ್ಯಾ ಪ್ರಶಾಂತ್ ವಾತಾವರಣಾಂತ್ ತ್ಯಾ ದರ್ಯಾಂತ್ ನ್ಹಾಂವ್ಕ್ ವೆಚ್ಯಾ ಸುರ್ಯಾಚಿಂ ತಿಂ ವರ್ಣಾಳ್ ಕಿರ್ಣಾಂ ತ್ಯಾ ಕುಪಾಂ ಮಧ್ಲ್ಯಾನ್ ಜಾವ್ನ್ ಸಗ್ಳ್ಯಾ ಮೊಳಾಬಾರ್ ಭಾಂಗ್ರಾಳಿ ಮಾಂದ್ರಿ ಸೊಡವ್ನ್ ಆಲಿಯಾಕ್ ಆಪ್ಲ್ಯಾ ವೆಂಗೆಂತ್ ಘೆಂವ್ಕ್ ಆತುರ್ ಜಾವ್ನ್ ರಾವ್ಲ್ಯಾಂತ್ ತಶೆಂ ತಾಕಾ ಭೊಗ್ತಾನಾ ಆಲಿಯಾ ಸ್ವತಂತ್ರ್ ಜಾವ್ನ್ ಸುಕ್ಣ್ಯಾ ಪರಿಂ ತ್ಯಾ ಮೊಳಾಬಾರ್ ಉಭೊಂಕ್ ಆಶೆಲೆಂ.
ತಿತ್ಲೆಂಚ್!
ಆಪ್ಲ್ಯಾ ಆಶೆಕ್ ಘೆವ್ನ್ ತೆಂ ಉಭ್ಲೆಂ! ತಾಕಾ ಆಜ್ ಹ್ಯಾ ಸಂಸಾರಾಂತ್ ಕಾಂಯ್ಚ್ ಭಂಧಡ್ ನಾತ್ಲ್ಲಿ!
ಆಲಿಯಾಕ್ಚ್ ಪಳೆಂವ್ಚೆಂ ನಮಿತ ಆಲಿಯಾಚಾ ಉಭಾರ್ಲ್ಲ್ಯಾ ದೊಳ್ಯಾಂ ದಿಶ್ಟೆಂತ್ಲಿಂ ತಾಚಿಂ ಸಪ್ಣಾ ಪಾರ್ಕುಂಕ್ ಸಕ್ಲೆಂ ನಾ ಜಾಲ್ಯಾರ್ಯ್ ತ್ಯಾ ತಾಚ್ಯಾ ದಿಶ್ಟೆಂತ್ ಭಂಧಡೆ ಥಾವ್ನ್ ಸುಟ್ಲ್ಲ್ಯಾ ಸುಕ್ಣ್ಯಾಚೊ ಸಂತೊಸ್ಭರಿತ್ ಉಲ್ಲಾಸ್ ಪಳಂವ್ಕ್ ಸಕ್ಲೆಂ.
***************
[ಫುಡೆಂ ಕಿತೆಂ ಜಾತಾ ಮ್ಹಳ್ಳೆಂ ವಾಚುಂಕ್ ರಾಕೊನ್ ರಾವಾ....]
ಕಾದಂಬರಿಕಾರಾಚಿಂ ಉತ್ರಾಂ: 1, 2, 3, 4, 5, 6, 7, 8, 9
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
