Ami Zoiteunt Zaunko Kitem Korizai?

ded7

Voros : 2005

Moino : Janer

Eka lhan kannyecho uddas mhaka yeta - eka zhoddar fulon yemvcha bongeak rakon raula bhromor, anim tea bhromorak gillunk rakon raula xirlo, anim xirleak gillchak rakon raula ek divodd, anim tea divddak khaunko rakon raulea ghonn, anim kednam ghonnik oplea bondukent jivexim marin mhonn rakon raula eklo xikaregar.

Amcha somajechem prostut chintap - jem lhan maslleank vhodd maslleamni gillchem - edoll‌yi as‌l'lem, atam-i asa anim oxench zalem tor anim fuddem-i astelem.

Atam soval hem ’zoit mhollear hengi?’. Konn to monis axena zoiteunt zaunko? zamv to monis somajecha khoinchai vorgant jiemvdi ya kosolyai kamar asondi, punn taka ’zoit mhollear progoti’. Borem chintap hem anim osolem chintap ek progotipor somajek rutam korta tem khonddit. Ek ghoddi amim omkanch soval kor‍yam;

’amcha jinnyent amim zoiteunt zaunko kitem sorv korizai?’ ya hench soval il'lem ghumvddaun vichartam; ’tem kitem sorv gorjechem, jem amcha jinnyent amkam zoiteunt korunk sokta?’.

Monis devan rochlelea sorv rochnam poiki unchlo kiteak mhollear monis chintunk sokta, taka oplem falem koxem asazoi mholl'llem chintun mett kaddunk sadhy asa - jem devan rochlelea her khonchai rochnank sadhy na. Tor monis zal'lo khonddit hem soval zorur vicharta xivai koxi-i jinni sar‍lear zalem mhonn nhoi. Atam voilea sovalak zap to to monis tantacha chintpaprokar zapi sodhta.

Punn jeral ritin hea sovalachi zap vhoraun polleli tor - choddtavo monis itlench axeta, apnnanm-i oplea jinnyent ’hem hem’ sogllem zoddizoi, ’him him’ kamam korizai, hem opnnan eka disa gollsizai. Hangasor monis eka songtecho beparvo korta anim to zaunasa amim gollsunk ascha songteanchem/vostunchem mol kitlem?

’Amkam zoiteunt korchi songot/vost kaim herank luksann kortagi?’ ya amchi zoit ami gollsil'lea, ami zodd‌l'lea songteamni/vostumni mejyet‌gi? hench chintap mukharun velem tor ’zor opnnan zoiteunt zainastana soit herank upkarchem kitem-i kelam?’ - punn he vichar chintche monis bhovo unnem. Kiteak mhollear hem chintap udemvchem mhollear kupancher rauller bhandunk sopnnemvchem nhoi‌gi?

Monxacha suratakhatir roch‌l'le dore ya sobdh zaunasat; ’sthan’, ’man’, ’ontost’, ’protixtta’, ’hud'de’. Anim zori tori somajent ekamekalagim ubhzomvchem osomodhan heachch dor‍yam nimtim. Monis kitli-i somzonni zoddundi, kitli-i zannvai ghemvdi ya kitlem-i xikap zoddundi.

Punn jednam voreg opli nodor oplea tollata bhair pauvonko sokanangi tit'tun por‍yant osole oxir chintpache dore choddon'nch vetele. Anim aukas‌sodpi zaun, oplea suratakhatir sodam-i herank upeog korunk sodhtele.

Ek bori somaz bandhun haddchant ek sahitichi zoubdhari vorti asa. Somajecho chuki dhakhoun dimvcho matr nhoi astam tea chukink porihar sodhchi zovabdhariy sahitichich zaunasa. Punn hem ghoddchadhim tea sahitin vichar‌vont zamvchi bhovo gorz asa. Anim osole vichar aslear matr somajecha oxir chintpache dore kosllaunko tachan sadhy xivai taka mellcho her vatto nant.

Osole dore ubharche fokot pollkur‌vadimni matr. Kiteak mhollear pollkur‌vadink hench zoit punn vichar‌vont monxak nhoi.

Kiteak mhollear jedna por‍yant amcha motint ascha ’opunn zannari’ mholl'llo kallo pordho amim pois korunk sokchenamv - tedoll por‍yant amcha zoitachi nit anim rit osoleach chintpacher hondvon asa. Anim jednam amim hi rit/nit bodlunk soktamv - tednam amcha zoitachi vatt amkam sodhun yeteli. Dekun amim rakon raveam, axa koream. Ek dis khonddit yetolo hea riti/nitink por‍yai chintap haddn.

Punn voddlem soval hench - to dis kednam yetolo?

- Valley Quadros, Ajekar