परत एक नतालांचें (क्रिस्मस) फेसत
वरस : २००४
मयनो : दसेंबर
वर्सान वर्सा दसेंबराचा पंचवीस तारिकेर येंवचें नतालांचें फेसत संसारभर संबरमाचो दीस, आमचो देव मनीस जावन जल्माल्लो दीस.
घरांनी कुस्वार, घरांनी या आंगणांनी गर्दानाचो गोटो, गोट्यांत तारां, गुडे दोंगोर, घरां, रूक, आनीं त्या मधें एक ल्हान कोलवाचें पाकें आनीं त्या पाक्याभितर आसचा गोरवांमधें एक नागडो बाळोक, त्या बाळकासवें एक असकत आवय आनीं एक खाल्तो बापूय.
वयर उमकाळचे आंज भडवे, मुखल्यान दीसरात चरोवार आसचो शेळियो, आनीं त्या शेळियांक राकचे भडवे. वा! क्रिस्मस म्हळ्यार कितलो वडलो संभ्रम आमकां? मद्याने रातीं इगर्जेंत वैभवाचें मीस, सगळो लोक नव्या/पर्न्या पर्मळीक तेल वोतल्ल्या सुटार, बुटार, कोटार, पेंटार. क्रिस्मस केक, क्रिस्मस क्यारल, क्रिस्मस कार्डां अशें भोग्ताकी जेजून एक पावटीं न्हय, अन्येक पावटीं जल्माजय आसल्लें म्हण.
पूण हें सवाल अस्वाभावीक म्हळ्ळें हांवय जाणां. रातीं सुरू जाल्ल्या ह्या फेसताचें आचरण जाता दुस्रे दिसा, मास, पोळी, सोर, गायन, नाच पार्ट्यो आनीं धेंक. थोडीं अपणाखातीर आनीं थोडीं हेरां खातीर हें फेसत आचरण कर्ताना लोक, आसों तो गांवांत या पर्गांवांत. फेसताचें काराण एकच - आनीं तें जावनासा आमचा सोम्यान जल्माल्लो दिवस भोव संभ्रमान आचरण कर्चो. अजीक चडुणें पंद्रा वर्साधीं म्हाका नतालांचा फेसताचा संधर्भार आयिल्ल्या एका कार्डांत आसल्लीं उत्रां हीं; The most important thing in CHIRSTMAS is the CHRIST and not the MAS.
भोवशा आमचा सगळ्या चिंत्पाक सवाल कर्चें हें परयाय चिंताप आमकां जायतीं सवालां कर्तात. आमचा चिंत्पाचा सभार पाळांक, मुळांक उसतितात.
अडूक दिसोंक पुरो तरय एक संगत मात्र आमीं नेगार कर्तांव पेद्रून जेजूक नेगार केल्लेपरीं, आनीं तें जावनासा आमीं क्रिसता थावन भोव पयस वचोन वचोन क्रिस्मसाचें आचरण कर्तांव. आमचीं मत इतली लौकीक जाल्याकी, असलें चिंताप चिंतचें सयत मा-पातक म्हण लेखचे चडताव सगळे. कित्याक? नतालांचा फेसताचो नीज घूर्त कसलो? आचरण? कशें?.
देव पूत जेजूक ताणेंच रचल्ल्या संसारांत अपलोच एक बंगलो बांधून उंचल्या सोसायटिचा मनशांपरीं IअU ंत जल्म घेव्येतोने? आमचो देव तो, कित्याक आमकां आमचें मट्ट (वा असतित्व) सकला देंववंक गत आधार नातल्ल्यांपरीं गोट्यांत जल्माजय आसल्लें? कितें हाचो घूर्त? एक घडी नियाळ केलो तर, दिसचें सत भोव मार्मीक;
जेजू आयिल्लो ल्हान्विकायेची निशानी घेवून, खाल्तेपणाची निशानी घेवून, गत आधार नातल्ल्यां पासत. आनीं आमीं प्रतगेचा दोणप्याचेर चडोन कितें कर्तांव? आमकां हेरांची गर्ज समजोंवची मत विशेवार आसा (वा मेल्या), हेरांचो हुसको मतिंत दवरुंक आमीं कांय प्रवादी न्हय.
तर सांगा, आमीं क्रिसतासवें हें फेसत कर्तांव वा लुसिफेरासवें? आमीं प्रवादी न्हय, आमकां साक्रिफीस करुंक नाका, खुर्सार चडोंक नाका, आमकां आमचो राटावळ्यो आसात, आमचें कुटाम आसा, निर्गतिकांक कुमोक कर्चें काम समाजसेवकाचें.
बरें - भारी बरेंच.
पूण आमीं एक घडी चिंत्यां जरतर त्या निर्गतिकां पयकी आमचोच एकलो भाव, या आमचीच एक भयण आसती तर आज आमचा चिंत्पाक ही भिजुडाय येतिगी? आमीं प्रवादी न्हय;
बरें, पूण आमीं एका दिसाखातीर पुणीं मनीस तरी जाल्ल्यांव तर? नतालांचा फेसतादिसा पुणीं आमीं एका नागड्याक नेसोंक दीवंक सकल्यांव, एका निर्गतिकाक पुणीं आस्रो दीशे करुंक सकल्यांव, एका बेकारीक तरय काम मेळाशें करुंक सकल्यांव, एका दुखेसताचीं दुखां पुसुंक सकल्यांव तर आमकां क्रिसताक सोधून वेची गर्ज पाडतिना, बगार क्रीसतच आमकां सोधून येतो न्हयगी? आनीं अशें जर आमीं करुंक पावल्यांव तर मात्र आमीं आचरण कर्चा फेसताक खरो अर्थ येवंक सकात न्हयगी? कित्याक म्हळ्यर संतोस वांटलो तर दोडतो जाता.
आनीं नतालांचा फेसताचो संदेश होच - संतोस एकामेका वांटून घेंवचो - खरया क्रीसती शेगुणान.
सर्व दायज वाचप्यांक ह्या नतालांचा फेसताचे रास रास उल्लास पाटयतां. भोव खाल्तेपणीं,
- वल्ली क्वाड्रस, अजेकार
