’sorvank man/moread di. Zo taka favo zal'lo, techchporim pattim man diunk soktolo, va oploch man bhongoitolo - A.va’
Kednam Moun Uloitana..!
Voros: 2011
Onko : 52
Lambhayechem moun.. Ponchvis moineanchem moun mhakach ojeap korta.
Hem moun kitlem korkore diunk soklem mholl'llem mhojean obhivyokt korunk utram nant. Eka pattlean ek mholl'lleporim onvaran mhojer ghal'li dhadd toryi titli kotthinn nhoi, jitli hacher sontos/somdhan bhogteleank polletana, zankam eka tempar hamvem ’aple’ mhonn chintl'lem. Punn jivit ek rongmanchi ani ami sorv hantleo kottputlleo; konn khuxen ani konn nirvog nastam.
Mhojea lhanponnar thaun mhojea motint khonchon ayil'lem ek jivem sot hem ki ’bhouxa amger hamv konnakcho nakasl'lom bhurgo’ mholl'llem, kiteak; hamv mhalghoddo put nhoi, nimanno putyi nhoi. Maloghddeak putak toxench nimannea putak sodanch sthan aslem. Itlench nhoi, kotthinn rag, hotth, vixes pokriponnam mhaka onikyi konxeak lott'tolim. Itlench pavanatl'leak mhaka lhanponnar vixes xell, khonkli.
Punn vixes kitengi mhollear konnakchch nakasl'lom hamv mhojea mam-iko mogacho, zoxem kanddint ek sangap asa "het'tourige heggonn mud'du". Mhoji auy oxikopi (somsarachea bazari utramni sangchem tor; onpodd govar)
Mhojea jinnyent vadall kaim novem nhoi, sobhar pauttim, sobhar ritichim vadallam hamvem fudd keleant. Jitlom jiklam, kitlom solvalam mholl'llem hamv mezunk vochana, punn ek sot xiklam; jinnyent yemvchem horyek vadall ek sot gheun yeta, nagddem sot, koddu sot, oddhuk sot, konn hem mandundi va mandina zamv.
2009 isvi bhouxa mhojea jinnyent onyek vadall gheun ailem; poilem mhojem kam' gelem, ekach moinea bhitor mhoji auy hea somsarachem poinn sompoun geli.
Lhanponnar thaun mhaka vachpachi pisai chodd asli. Choddtavo zaun kanddi ani konknni sahity vachtalom. Konknnent mhojea chintnancher probhavo ghalunk sokl'li kadombori e.Tti.Lobochi ’tum boro za’. Ani hea kadomborent porot porot e.Tti.Lobon boryil'lem utar zaunasa ’rumvant sorg asa’. Anim hem utar bhouxa porot porot mhojea hea lamb mounant somojl'lem sot.
Somsarachea khonchyai somajent kaim konn bekari asot tor taka konnim kam' labhcheo vatto dhakhoit tor konknnent matr, osleancheo khobro zatat. Durbhagponnant hamvyi oslea eka somajecho vantto zaunasotam, mhakai hache thaun suttka natl'li. Punn sot matr hea khobram thaun othvench zaunasolem.
Ailevar mongllurak bhett dil'levellar mitr echchem' mell'llo, somvad kortana mhonnalo "tumchevixim sobhar riticheo khobro aikleo, tumi kamavellar konknni vaur kortaleat dekun tumkam kamantolo kaddlo kom-i". Mhaka ojeap zaunk na, taka zapyi sovalantcho dili;
"Gaddva thaun khottexivai her kitem opekxa koryet? guloba thaun pormollaxivai her kitem opekxa koryet?, monis jea kaleticho/khastachogi, techch mapan heramvixim uloitolo nhoi?". Hem nastam mhojevixim her koslem sangtele? pam-i chukon vag eka fonddak poddl'lo kom-i, toull sorvamni ’mhojem-i khelam, mhojem-i khelam’, mhonn tacher fator marl'le kom-i. Hi kanni mhoni aji mhaka lhanponnar sangtali. Hamvyi hench chintam. Hamv kaim dhon-dirvem, namv-asot-bodik mellta mholl'lle axen konknni vaurak demvonk na, dekun mhaka konn kitem sangta mholl'lleacher bhilkul gonn'nnem na.
Kitem-i asom.
’Ek jevonn chearamni jeuyet, punn chear jeunnam ekleak jeunk zaina’ mholl'llem lisamv patyel'li mhoji onpodd govar auy, kednam-i mhoje ixtt montr ghora ayil'levellar, ghora randl'lem natl'levellar sangtali.
Hamv zolmotana ghorcho kolu soit sarko nastam sogllean pomvtalem kom-i. Osli dubllikai khud'd sosun, aplea bhurgeamni boro fuddar zoddizoi mhonnon porgamvak gel'li mhoji auy, bhurgeaponnar amkam melltali don-oddez vorsank ek pauttim matr. Ani tea don-oddez moineachi roza khas korn mhaka bhovo mogachi zaunasotali.
Ek pauttim mhojea eklea vhollkechean mhojelagim asche thodde poixe magle dekun hamvem taka gorjek mhonnon dili. Punn tannem te pattim dilechch nant. Bhurgeamot dekun hamv mosot roddlom. Toull mhojea onpodd govar auyn mhaka vicharolem;
"kiteak roddtai puta, tannim tuje poixe matr khele ne? tujem noxib velemye?".
Kitlem borem soval? jyem az pasot khonchyai bukamni vo khonchyai ddigremni hamv xikonk soklomna.
Ti onpodd govar, ticho bapuy tichea bhurgeaponnar sorl'lo dekhun, opleachch soireanger kam' korn dis kaddon vhodd zal'li mhoji auy poile pauttim mhojer ragar zal'li jednam hamv ’padri’ zaunk seminorik gel'levellar. Devak orgam, hamv dedd vorsamni pattim ailom. (somsaracha bazari utramni sangchem tor doro uddon ailom). Amchea gamvant ek vichitr rivaz asa, jim konn mhojeporim doro uddon ayil'lim, konn'nch somajek dolle mellvonk sokonk nant. Az soit tim aplea ghora yezoi tor modeaneratim kallea arxeachea karamni lipon. Hamvem chintchi rit veglli. Hamv somajek dolle melloun, techch somajent jielam, kitem-i borem/vaitt hamvem kelam tor lipoun nhoi, ugtean. Lipoun korchi vidhea xikl'lom tor az hamv kitengi zatom konn'nna. Dekun somajek toryi mhojercho dollo.
Vhoi! hamvem chintchi rit, hamvem khonchem-i kam' korchi rit othvichch; jitlo nakar ragki, titlichch kallzant doya-bhirmot, ani osleank somaz jieunk soddina mholl'llem sot tika jinnyelisamv zaun zannasl'lem dekun kednam-i mhaka oxem sangtali;
"mhaka her putanchi khont na, kiteak mhollear tankam monxank parkun, zokte ritin jieunk kollit asa, punn tujer mhaka khont asa, kiteak tuka lokancho motlob parkunchi vidhea ozun kollit na. Tuka dhovem aslem sorv dud mhonn dista."
Hamv porgamvak paulom, vorsak/don vorsak ek pauttim rojer gamvak aileari, mhoji askt (mitr vitori karkollachea utramni sangchem tor), mhaka aschi padd souy ekcho; ’konknni’. Dekun pondra disanchea rojer aileari unnear unne bhara dis toryi konknni khatir, konknni boroupeank mellchem, tanche vichar aikonchem pixemponn. Hem fokt't porgamvak pavol'lea vellar mat nhoi, hamv jednam kanneo borvonk suru kel'lethaun asli pisai; gamv sodhun, ghoram sodhun hamv kitlexea boroinnarank mell'llam mhonn mhaka ozun kollit asa, zaunk puro tankam kollit na.
Hechchvixim ul'lek korun mhojea eka maloghddea sahitik mitran mhojea auyk sanglem; "tujea putak il'lem somzai, taka konknni bhut lagla".
Hamvem uprant taka vicharolem "kiteak tuvem oslim utram sanglim-i?"
Tannem mhaka somzaunk preton kelem "olle vol'li, tuvem pollemvcho konknni boroupi lok, ani konknni somaz tuka khonchea nodren polleta mholl'llem somzon ghe. Tum tanchea nodren fokt't ek duddvacho mudo. Tujea mukar lonnie utram sangtele hechch tujea pattlean tujim khellkullam korn hastat. Ani mhaka hem sosana. Tuvem jitlem ’xennantlea kiddeank’ ustun ’motiam’ korunk chintai, titlench, ’te’ ami ’xennantole kiddechch’ mhonn dhakhvonk mortat."
Taka hamvem oxi zap dil'li; "polle, hamv konnakyi man/gourou ditam tor tem mhojem vektitv. Atam zo ho manak/gourvak favo zal'lo asa to techch mapan herank man/gourou diunk sokta. Zo hea manak/gourvak nafavo zal'lo asa tor, tachea vektitvak sori zaun to korundi, tachem lekh vicharunk/mezunk vhochon mhozo vell/tokli kiteak vibhaddum?, hamv hamvcho ani tim tinch"
Mhojim utramni tacher kitlim probhavo korunk soklim, va na, tem hamv nennam. Asom!
Oxem rojer ayil'lea disamni hamv kom-i geleari mhojea auyn fon korn mhaka soval vicharchem "puta, jeuloive?, puta kitem tori kha.. Pie...". Ani kitlea mogan ti mhoka sangtaligi, titlo rag mhaka yetalo, ani tika mhoji zap astali "hamv kaim bhurgo nhoi, mhaka bhuk lagtana khatam, tum somdhan ghe".
Ani 2009 isvechea zulai moineachea solla tariker hamv gamvak yetam mhonn nokhkhim zal'lem. Punn mhoji auy hamvem yemvcheaki don disadhinch ho somsar sanddun sasnnacho vixevo gheunk gel'li.
Atam moine sompon, vorsam paxar zalim. Kallzant rupnnem toxench asa, kanamni gaz tosoch asa.
Punn! atam utram nant, sutram nant, fonam nant, jeutangi va mortangi mholl'lli fikir korchim nant. Kitem-i asa tor; hechch mhojye onpodd govar auyn xikomvchem preton kel'lim totvam, jim tichi jinni zhoroun xikl'lim. Itleacho ul'lek kortana, mhojea motint eka podacho uddas yeta;
’Sob kuchh sikha hom'ne, no sikhi hoxiari, soch hoi duniavalom; ke me hum onaddi’
(Horyek xiklom hamv punn nhoi huxarai, sot hem zaunasa; hamvnch ek on'naddi)
[Hea don vorsanchea audent porot porot mhojevixim husko dourun, toxench mhojevixim khobro korunk mhaka somprk kel'lea sorvank hamv dhinvasotam, hamv moun matr aslom - mono nhoi]
Dev borem korum
Khalteponnim,
- Valley Quadros, Ajekar
