’Itle devo, dhorm', bhaso asoni, ami ek zaun uronk sokonk namv nhoi? kitlem vhoddlem viporeas nhoi?’
Oxir Vatt Vincheangi?
Voros : 2009
Moino : March
Mhoje tosolea eka sadea monxeak, (tumkam patyeunko koxtt zatir tor tuje tosolea eka sadea monxeak) zortor eklo mukhar ubho ravon bonduk zokun "tuka vanchonk khonchem bhovo gorz asa mholl'llem veggim sang, udak? bhum-i, varem va hamv?"
Khonddit zaun hamv zamv tum zamv zap diteleamv "tum" mhonnon.
Hangasor kaim dhoir ekttaun "tujexivai bakichem sorv gorjechem" mholl'llem tor to kaim aplea bondukeche gulle vot'to matr nhoi, her lok, toxench vatter vechem sunnem mazoryi ’tuka vo mhaka’ pixear kaddn haste.
Hakachch mhonnchem gorz poddtana gaddamv soit bapui korchem mhonn.
Hi zalea aichea kallachi porigot, voir thaun sokoil, poddla thaun muddlant, gamvant toxench porgamvant, hichch gozal, kom-i geleari polleunko mellchi khobar hich, potramni zamv her madhyomamni zamv vachunk mellchi khobar hichch; khoim disachem khuni, omaikancher zulum', nenntea bhurgeank soit aplea kuddichea voddnnek gollsitat ani uprant logadd kaddtat. Aplea moddkent xizoyil'li pez moreaden jeunko labhazoi tori porixrom' korizai. Samajik kaide kanun mholl'llo ek zok zala, kanun labhonki sadea monxan vixes ritichechi minot korunk poddta. Oxem-i bhogta; kirtonanchea bukant vachunk mellchim sotam ekekch ugddapim zate asat.
Hea disamni lokanchem gomon choddit vechem zaunasa; ailevar oskor inamam jiklelea slom' ddog miliyonor filmacher. Lokache vad vivad vichitr nhoi? oskor mellanatleari lok dursoto amchea bharotacher kaddlelea filmank itle solisayen puroskar labhanant mhonn, atam mell'lle, teyi ek don nhoi, att askor!. Toryi lok purpurta ’amchea bharotachi moread kaddchea filmak oskor dile ani amchea dexachi moread kaddli’.
Bomboichi zopoddpott'tti somsarantli dusri vhoddli zopoddpott'tti mholl'llem sot bhouxa bobattcho ho lok visronk na zauyet. Dekun zannari sangtat ’zonoron'nu somodhanopoddisolu zonardhononindolu osadhyo’.
Slom'ddog miliyonor soddlear onyek vixoi lokanchea gomonak voddcho zaunasa ’atonkvad’. Godhro, babri mosjid, mumboi donge, orissa, tonduri, nitthari, teholka, horxod mehta, chara, bofors, kargil ani her vad-vivad bhouxa ami holltar visorleamv. Sod'deachea mott'ttak visronk osadhy zamvcho vixoi zaunasa ’atonkvad’.
Oxem mhonnon atonkvad mhonntoch kaim amchea choddtavo lokachem goman isrel-pealestinant zamvchea zhuzacher vhochana, vorsandhim zal'lea isrel ani hoson nosrol'lachea pongddak zal'lea zhuzacher vochana, va tacheaki poilem zal'lea irak - emerika zhuzacher vochana, va tacheaki adhim zal'lea taliban-omerikachea zhuzacheryi vochana. Tacheaki poilem atonkvad atam bellxelam.
Mhoje tosolea (soddeam tuje tosolea) eka sadea monxak zor konnem-i soval kelem ’khoinchem atonkvad?’, tednam mhoji/tuji zovab kosli asyet? bhimyenaka, hangasor bondhuk nastam soval vicharlam, konn mhonnat por xrilonkachea krikettorancher pakistanant bondukeche gulle marlele - te ’atonkvadi’ mhonn. Konn mhonnat por bomboyant tazmoholant yeun lokancher gulle soddle polle, techch atonkvadi mhonn. Ani konn mhonntit kaxmirant ’jihadi’ mhonn vevegllea ranamni , ttenttani ason ttreyning ghetat te atonkvadi mhonnon, konn mhonntit ’noksoloitt’ mhonn, ani konn mhonntit ’elttittii’, ’ulfa’......
Ek ghoddi niall koream - nizaiki hechchgi atonkvadi? hechch atonkvadi tor he konn mholl'llem amkanch omi soval koream;
’zhodd plos sekyuritti’ asa mholl'llea dhoiran vedicher choddon konna konnak galli sovun bobattche amche mukheli, vedi sokla pordea pattlean ravon konnak dhormachea namvim, konnak rongachea namvi, konnak zatichea namvim, konnak bhasechea namvi masam khaunko lamvche konn?
choddtavo lokak koxi-i tokli na, tokli asleari tantum xenn bhorlam, konnak porigotechi dab, konnak her gorz ani osoleanchea komprak mhomv saroun lemvomvche he mukheli, kednam dhormachea namvan, kednam ani kosolea nibamni ekameka vingodd korun, chyuran chyuro korun ekamekachem rogat piemvche konn?
amcho des xanticho des, amchea desacho bapui mohatma gandhi, zo xante khatir okhkho somsar mandhta, tacher ghoddl'lea filmak soit att askor inamam labhleant, taka xantecho nobel puroskar labhonk natl'li vhoddlem sot. Punn az hechch gandhik turupacho ekko korun sorv partteo lokank ekamekachea faidea khatir gollsina? ani ami sorv ’kurigollu sar kurigollu’ - nizaiki bokre zaun jietamv xivai amcho okkol kaim churuk zal'loch na. Zamvcheporim-i asa mhonnchem dhoir mhakai na.
Kitea? amchem somyb pollkurem, amchem somyb dubhavi, amchem somyb herank sokla ghaln mostunchem. Sodanchem magnnem rozar korn, hofteachem mis chukoinastam bhageunt jinni jiemvche ami amcheach somajent ekameka pollemvchi, vhollkonchi rit amkanch marog poddonk na? na tor ailevar zal'leporim amkam amcheach angnnant demvon amcher hol'lo zatona. Tor ho des konnacho mhonn char zonn ekameka mellon bhasabhas choloitat tor te konn?
amchea desant asche title devo somsarant her khonchear desant nant, amchea desant asche title dhorm' somsarachea her khonchyai desant nant, amchea desant asche titleo bhaso somsarachea her khonchyai desant nant, toryi sot hem: amchea desant asche titlem dolddirponn somsarachea her khonchyai desant dison yena. Ozun amchepoiki ami jitlem mukhar paulam kaddtamvgi titlinch pattim pautamv. Amchea chintpachi sukidhadd? amchea somzonnechi sukidadd? itle devo asoni, itle dhorm' asoni, itleo bhaso asoni, ami ek zaun uronk sokonk namv nhoi? kitlem vhoddlem viporeas nhoi? dekun zatim zatim modhem, bhase bhase modhem, pranteam pranteam modhem ani devam devam modhem dore ani rajvottki. Ani ami hechch gulam'ponnant jinni mholl'llem sukh bhogtele bokre.
Disan dis aicho somsar eka osolea dixen chomkon asa, somsar arthik divallent kongal zala, gamvant kamam mellanant, kam' nastam gamvant aschim golfak vetalim, atam golfachi porigot gamvcheaki pastt zamvchim khunnam disonk lagleant. Zaiteamni kamam hogddaileant, ani kamam aschim soit dis mezun asat. Thoddeancho pag unno kela, punn bhaddim choddon asat, vostunchim molam choddon asat, benkamni vadd na mhonnon konne ghoram-flettam ghetleant, punn flettam oniki toyar zaunant, benkachem lon bandhunk tras thoddeank, thoddeamni xer markettint duddu ghal'lo, markett portalea, eka vatten tteaks, onyeka vatten pidda xidda...
Arthik divalli, kamam unni va nant, choddl'lem nasomodhan, ekamekache monosthap, zhogddim, morol polis, atonkvad - somosse nhoi, somosseanche vor amche mukhar asat.
Toryi, hea sorv somosseam modhem somodhanechi vatt sodhun ti mukharun vorchench ek bhovo vhoddlem xort amche mukhar asa.
Bori vatt kednam-i oxir asta kom-i, ami khoinchi vatt vincheam?
khalteponnim,
- vol'li kvaddros, ojekar
