’Jednam poreant aplim svopnnam heranchea svopnnanchi desvatt korinant, tedoll poryant ami svopnnam pollezai’
Bhorvoxeaxivai Amkam Her Kitem Asa?
Voros : 2009
Moino : Janer
’Hea somsarant jietelea horyeklean svopnnam pollezai, matr nhoi, tim hokigot zamvcheak preton korizai’ mhonnta bharotacho adhlo odhyokx obdul kolam'.
Svopnnam kaim konnaichi ast-vost nhoi, konnem-i svopnnam polleuyeta, jednam poreant aplim svopnnam heranchea svopnnanchi desvatt korinant, tedoll poryant; svopnnam aschim funkeak, svopnnanchem mol choddana va demvana. Ani him svopnnam polleunko horyekleak hokk asa, khonchyai zaticho to zamv, khonchyai pranteaoch to zamv, khonchyai kaleticho to zamv.
Onyek novem voros suru zalem, fokot't ek sanketik nib; amim jiemvchea somsarant, amchi svopnnam sakar korunk fuddem vecheak.
Hechch bhorvoxean suru zal'lem 2008 voros sobhar korall ghodditank pollexem korunk paulem. Punn voros kitench korina, bogar kitem-i korta tor monis, ani tachi manosikota matr. Vorsachea modhench suru zal'li arthik divalli, choddl'lem senseks, poddl'li markett, demvl'li benkachi vadd, penkadd moddon poddl'lo bhandpa bazar, punn hea sorvank her kosloch vikolp nastam sosun, khiroun, jiroun jietelea lokanchi sintimentam veustit ritin pillun, gillun koxem madhyom' disandis sorketa mholl'llench addhuk sot.
Konn mhonnta inflexon pondra porsentt choddl'lem mhonn? he porsentt mholl'lle onkhe soit dimvcheadhim zaiti monogotecho hat asta, konnak choddoilear faido tor konnak demvoilear faido, punn bhogcho lok kosoi techch vorgacho polle, gaddvaporim jieun souy zal'lo. Dekun ghorchem bhaddem choddlam, pettrolachem mol choddlam, geasachem mol choddlam, horyekachem mol choddlam, punn samball ozun tochch, to choddonk na, ani hea porigotent konnak pursot va soironn asa ami adhlea moineamni haddl'lea vostunchem mol hea moineant kitlem vaddlam/choddlam mholl'llem parkunk? ani hea modhem ttivi/potr madhyomamni sangchench/porgottchench ’sot’ zalam.
Dex-videxamni, ontorraxttri-i sthorar soit ’heddlain’ zamvche tosolea somosseank ukolchea amchea choddtavo madhyomank khoremponnim kitlo husko asa? dexache bhovo protixttit puroskaramni fumarchea amchea mohan zornolisttank sadea lokacho kitlo husko asa? kitli khont asa? khobro soit koxeo ghoddtat? khobro soit koxeo rup bodoltat? koxem duddu/sokot/odhikar hea khombrancher gupit ritin rajvottki choloita mholl'llem ami poilem somzol'leamv tor, hanchim kitlim sotam amkam hea sotantlim ’khotam’ toryi distim nhoi?
Gamvcheo-dexi khobro soddeam, yu.En.Oi (yunaittedd nyuz af inddia), pi.Tti.Oi (pres ttrostt af india), ruttors tosolea protixttit khobra madhyomantleo khobro soit kitleo pramannik zaun vachpeank pautat? sogllem soddeam; ailevar mumboicher zal'lea dhaddichi khoborch gheveam; hi khobar koxi koxi porgott zali polleya, konnem loxkor i-toibak bottam zoklim tor konnem talibanak bottam zoklim, konnem sanglem hi togaddia/singhal/modichi chal, dekun hannench pakistachea ugrvadink molak haddn koroyil'li mhollem tor hichch khobar pakistanant veglleach rupar porgottli, bondhit zal'lo ’kosob’ hachem niz namv ’omor singh’ mhollem, tachesovem moron poddl'lo ’hiralal’ - punn polisamni hachem tondd chenchun ghalam; konnakch vhollok mellanaye mhonnon... Hea khobrenche unnear unnem ikra kanneo toryi vachl'lo/aikal'lo uddas.
Hangasor hamvem boromvcho mhozo irado khonchem sot khonchem nhoi mholl'llo bhilkul nhoi, punn koxem ’sot’ aschem madhyomachea hatim vevegllem rup gheta mholl'llem. Hachevixim il'lem toryi somzonk preton korchem tor; him madhyomam khonchim? ani hancher konnachi/kosoli rajvottki cholta mholl'llem somzonchi gorz asa;
en.Ddi.Tti.Vi (nyu ddelhi ttelivixon) - bharotantlem lokamogall ttivi chanolak duddvachi bhollixtt mozot dita ’gospols af charitti’ (speyn sportts komyunisom'). Suru zal'le tempar amkam aikonk mellcho tancho tallo sod'deak pakistanachea lokancher matso movo zala, kiteak; pakistanant hem ek matr cheanol broddkastt zaunko pakistan sorkaran porvonngi dilea dekhun. Hacho somsthapok/odhyokx dda|pronnoi roi, prokax karot ani vrinda karot hancho soiro. (vrinda karotachi bhoinn radhika roi pronnoi roichi bail).
Inddia ttudde, bharotachem bhovo lokamogall hofteallem, eka tempar bijepin pattimbo dilelem, atam en.Ddi.Tti.Vichi ast. Atam hea hoftealleacho tallo soit poilencheporim na mholl'llem hachea choddtavo vachpeank kollon ayil'lem sot.
Si.En.En-oi.Bi.En: hea chanelak ’sodorn beapttistt chorch’ sompurnn ritin arthik kumok korn asa, hanchem hedd afis omerikant asa ani vorsak unnear unnem 800 miliyon ddolor kumok hea chanolachea procharak khorchita. Hem cheanol razdip sordesai ani tachi bail sagorika ghox choloitat. Eka tempar en.Ddi.Tti.Vi.Cho meanejing eddittor zaun bhovo lokamogall zal'lo, toxench ’big faitt’ tosolem karyem suru kel'lea razdip sordesain ttivi 18 chea raghou balsovem mellon hem cheanol suru kel'lem. Punn en.Ddi.Tti.Vichea lokamogallayekhatir khatir vixes ritin vaur kel'lo razdip sordesai, fokot't taka mellcho sambhall (36 lakh rupoi vorsacho sambhall) porgott kel'lean, ovman bhogon (en.Ddi.Ttivint sovo voddlo samball) hem cheanol soddn gel'lo, kiteak hancheaki panch vantte chodd sambhall raghou bal hannem dil'lo, tovi ttoyotta korola gaddiesovem. Gorib lokam khatir zhuzon puroskar zoddtelea potrkortanchem hem khasgi chintap - soddeam.
Ttaim's grup (ttaim's af inddia, midd-dde, noubharot ttaim's, sttar ddostt, femina, vizoi ttaim's, vizoi kornattoko, ttaim's novo (24 voram nyuz cheanol) ani her thoddim..)
ttaim's grupache dhoni ’ben'nett andd kolmon’ (vorldd krixchiyon kounsil haka 80% arthik mozot dita, toxench ek inglix ani ek ittaliyon bakiche 20% somasom' vanttun ditat. Ittalicho roborttio mindo, sonia gandhicho soiro mhonntat)
sttar ttivi: hem cheanol asttreliacho eklo choloita, haka melbornchi sointt pittors ponttifik igorz pattimbo dita.
Hindhusthan ttaim's: birla grupachem, punn xobhona bhartiyan hem ghetl'lea uprant sod'deak ttaim's grupasovem asa.
Do hindu: sumar 125 vorsadhim suru zal'lem inglix disallem, svittzorlenddachea zodduva sosaitti, berne hanchea tabent asa. En. Ramachi bail svittzorlenddachi.
Inddiyon ekspres: atam don zaun vingodd zalam; do inddiyon ekspres ani nyu inddiyon ekspres (dokxinn bharoti-i); e.Si.Tti.Es krixchiyon ministtris hancho promukh bonddvall asa.
Inaddu: az pason bharoti-i ramoji ravo mholl'lleachea tabent asa. Ramoji ravo film' inddosttricho, andro prodexant aplochch vhoddlo film' sttuddio choloun asa.
Andro jeoti: em'.Oi.Em' (muslim' partti af hoidorabad) ani eka kangres ministtoran hem telugu disallem ailevar molak ghetlem.
Do sttettsmean: bharoti-i komyunistt parttichea tabent asa.
Koirali ttivi: bharoti-i komyunistt partti (marksistt) chea tabent asa.
Matribhumi: liddors af muslim' lig ani komyunistt liddors hancho bonddvall chodd asa.
Exiyon ez ani ddekkon kronikol: eka soudi orebiyon kompenichea tabent asa; hacho mukhel sompadok em'.Je. Okbhor.
Thoddim her sotam (?) niall korchim tor;
2002 isvent gujratant golatto zalo, zaitim hindhu, muslim' ghoram bhosm' zalim, lok jivo jivo lason, hulpon melo. Hechch sondorbhar razdip sordesai ani bhorka dot't en.Ddi.Tti.Vint kam' korn aslim. Tea vellar, muslim' kuttmank fokos korcheak eka soudi orebiyon kompenin panch miliyon ddalors dil'lo. Ani tannim bhovo orthabhorit ritin toxench kelem. Ekch ek hindu kuttmak zamv, tanchea soireank zamv lasl'lem, hannim kour kelench na.
Tem kiteak? bhovo dderingacho zornolistt torunn tezpalan tehelka.Kom' hantum sorag ritin choddtavo zaun bijepichea vo choddtavo zaun hindhutvak virod zaun ghottallo kel'leanchi kriteam ujvaddak haddcheak orob raxttram thaun sorag ritin labhchea bleank chekkam karann mholl'llem bhovo thoddeank matr kollit.
Itlea sorv songtecher ujvadd fankoitana, madhyomancho patr, razoki-i xetamni zamv, samajik xetamni zamv, xoikxonnik xetamni zamv koslo patr gheta mholl'llem ondoz koryeta. Dekun hea madhyomank soit mumboyant atonkvadi hol'lo kortana poddon gel'lem fokot't tti.Ar.Pi matr, dekun mit mirvon, otixoyokt pacharn, udak pienastam ratichi nid soit kaddinastam, rosteacher nidon, lollon ttivimni khobar ditelea sobhar potrikodhyomim poikint kaim thodde bore, nixttaunt, potrikodhyomi asonk puro. Asleari konnak distat?
Ani osolea khobrenk mosala lhaun, lokam kornam essemes haddomvcho dondo kitle veustit ritin cholonk na? punn ratichi nid khollon, rostear nidon, lollon khobro dil'le hechch potrikodhyomi, hye uprant kitlea mapan gorjeuntank pautat? oxem mhonnon hamvem sangcho irado ho nhoiki, soglle potrikodhyomi bhrixtt mhonnon, asat, bhovo thodde ozun asat, apli noitikota hogddainastam vavurlele, vavurche ozun asat, punn bhollamukar oskot talleachem trann kitlem?
Itlem sorv amche bhomvtonni asonyi, ami bhorvoso sanddinastam, bhorvoxean, faleancho boro fuddar axemvche xivai her nirvog asa?
Bhagi novem voros tumkam sorvank, sorvank sorv borench zamv.
Khalteponnim,
- Valley Quadros, Ajekar
