’Ek sankhovo bhandunk khambe gorjeche, punn fokot't khambeamni sankhovo zaina, taka add khambeyi gorjeche’

Ubbhe ani Add Khambe

de35

Voros : 2007

Moino : May  

Horyeka bhasentlea sahiteak ’zonorexon geap’ (pillge modhlo ontor) ek somosso. Horyeka bhasamni asche sahiti vevegllea kallache, vevegllea kaletiche, vevegllea chintpache mhonntoch konknni bhasechem sahity kaim othvench nhoim. Amcha konknnent hem zonorexon geap asa mholl'llem sot konnak dison‌yi disanatleporim kelam zauyet va konnak dison‌yi opnnak kitem poddon gelam mholl'llea chintpan tyexim choddit guman diunko na tor‌yi ho somosso porihar korcho bhovo gorjecho.

Ho somosso koslo?

Khonchyai bhasent zor bhas urlea tor tacho vhapar zal'lenimtim. Ani ho vhapar zamvcheo vatto rutam korche sahiti zaunasat. Gaupi gaitit, nott notton kortit punn tankam mullachem patth‌tholl gorjechem zaunasa sahity. Podam-gitam nastam gaupean gamvchem tor‌yi kitem? notton korunk‌yi zoktem sombhaxonn gorjechem nhoim‌gi? oxem mhonntoch sahit khorench zaun eka bhasecha vhaddaullek bhovo mohotvacho patr gheta mholl'llem sot.

Somsarachi porigot zoxi disan‌dis bodlon yeta, techch‌porim horyeka bhasache sahiti tea tekid oplea chintpachi dhar, dixa bodlitat. Thodde xikpan, thodde zannvayen, thodde somzonnent, thodde zoktea vachpant opli chintpa sokot choddoitat. Sahit rochun onbhog zoddtat ani oxem onbhog zodd‌l'leporinch thoddim oplea motichim daram ugtinch dourtat ani thoddim dhamptat - hem tea tea sahitichea monogotecher asa. Khonchyai bhasent khonchyai sahitik hea somsarant opnnachem xikon zalem mhonn na. Mortasor xikonk astach. Zo konn sahiti (ordho kollso) opnnak labh‌l'li zannvai vorti dekhun oplea motichem dar dhampta, tosolo heram thaun xikonk vochana, bogar opnna thaun heramni xikazoi mhonn amvddeta - hem chintpachem oxir‌ponn.

Atam fokot't amcha konknnevixim ulomvchem tor - amcha konknnent‌y osole sahiti dorobost asat. Kaim ek don proxosthi labhleo tor zalem - te jive sant. Konknnent tanchem namv omor. Ani tancha motichim daram bondh. Punn khoremponnim eka sahitik khonchyai proxosthent mezunk sadhy asa? dhakhlo: konknni kadomboricho bapui mhonn namvadd'dik zal'lea zo.Sa.Olvarisachaya eka kadomborek‌yi okaddemi proxosthi labhonk na. Tor okaddemechi proxosthi labh‌l'lea kadomborikarancheo kadomborio zo.Sa.Olvarisachea kadomborencheaki unchleo mhonn zalem? de|luvis moskoreF tosolo kovi konknnent ozun udeunko na mhonntat - haka kosolich proxosthi mellonk na. Toxem astam khonchi-i proxosthi khonchyai sahitik mohan korunk sokana. Oxem chintche astit tor te khorench allmeacha chintpache. Tache ponda kitench kirlana.

Oxem mhonnon mhozo irado konnak‌y kupancher choddomvcho va konnaiki kupancher thaun voddn ghalcho nhoim. Hea somosseacher il'lo ujvadd fankomvcho. Amcha konknnent zaite osole ubhe khambe asat, oplestokim mohan sahiti zaun vhaddon urleat. Tannim roch‌l'lea sahiteant, tankam mell‌l'lea proxostheamni tankam ubho khambo kela - khorem. Punn konnaik‌yi add khambe zaunko naka. Kiteak? kosle te add khambe?

Zoxem her bhasamni ascheporim amcha konknnent‌yi zaite udeun yemvche sahiti asat. Osoleank kitlexeank amche mohan sahitik vollkotat ani tancha sahiteacher orso dhortat? opnnan vis, tis, challis, pon'nas vorsam konknni sahitik seva kelea mhonncha kitlexea sahitimni udeun yemvcha sahitincha bukancher kaim vimorso va somikxa kelea? tor hannim hea vis, tis, challis vorsamni pikoyil'le goddai va gõyttam konnakhatir? hi monogot khorench zaun bhasecher probhavo ghalta koxem polleyam - jednam poreant osoli monogotent amche ubhe khambe astit, tedoll poreant udeun yemvche sahiti tosoleank khais korchem sodd - vachunk‌yi vochanant. Oxem ubhzota khodd - ’amchem sahity buso - kunddo’ (maf kor bab sttifon kvaddros tuzo sobdh vhapar‌l'leak).

Hangasor mhozo irado malghoddeank va udeun yemvcha sahitincha kuleank chimtto kaddcho bhilkul nhoim. Ho ontor kiteak?

amcha sahiteak add khambe zai. Amim khambe bhandunk soktamv punn fokot't ubhea khambeamni sankhovo zaina, sankhovo zaunko add khambe gorjeche - ani ek sankhovo matr eka gamva thaun onyeka gamvak pauvonko sokta. (modhem zonorexon geap mholl'lli nom-i asa).

Add khambe zamvchem konne?: hem soval bhovo gorjechem. Add khambo zal'leank khoddpachem kalliz aschem gorz asa, ghugichi dixtt aschi gorjechi zaunasa. Kiteak mhollear hea add khambeancher lok cholon vetastam, tea add khambeancher pam-i dourta, gudd'ddaita, ximpi uddoita, veveglleo khebddayo korta. Konknnechea mott'ttak sangchem tor vevegllea ritir sosar zaunko poddta, loz-nalisai-onnkonnem bhogunk poddta. Tor‌yi ghugichi dixtt kiteak mhollem havem? ghug disak polleunko sokana. Fatrachem kalliz kiteak mhollem havem? tantum duk na.

Jednam poreant osole add khambe amcha konknnent nant va udenant, tedoll poreant amcha konknni sahiteant ekek ubhe khambe matr udetele. Tancheo kritio, proxostheo matr tankam onik‌yi unchayek paitelim tor‌yi eka bhasecha poripurnn vikasak hem upkarak poddchem na. Jednam ho sankhovo zata, tednam amche modhem konn'nch unch va konn'nch lhan mholl'llo bhedh aschona. Kiteak konn‌y unch sahiti poilo khalto astach ani asazoi‌ch.

Atam udemvchem soval fokot't ek - hamv ani tum khonchea khambeak servotamv?

- Valley Quadros, Ajekar