"amim amkam amcha xeathiecher mejtamv tor heram amkam mejtat amim tankam kitem kelam tacher"

Khoincho Dhorm' Unchlo?

de28

Voros : 2006

Moino : oktobor

Hea somsarant jieun ascha hor‍yeka monxak ek nhoim ek dhorm' asa, tem to pallum va soddum punn hea somsarant zolmon yemvcha hor‍yeka monxacher zolmol'lea ghoddyech ho ’dhorm'’ tacher thapla. Konn kristamv tor konn muslim' ani konn parsi tor konn sikh hor‍yekleak ho dhorm' mholl'llo asa zamv to kallo vo goro.

’Thapla’ - mholl'llo sobdh havem kiteak vaparlo mhollear khonchai monxan zolmol'lea ghoddye apnnak posondecho dhorm' khoncho mholl'lli vinchounn korunk osadhy matr nhoim osombod'd. Tankam to dhorm' tancha zolm' dataram thaun labhta, ani tea zolm' datarank‌y to dhorm' tancha zolm' dataram thaun demvon/gollon/thapon ayil'lo zaunasa.

Hor‍yeka dhormacho mullavo sar hoch - monis zaun jieun astana zoso tum jietai toxem herank jieunko sodd ani monxaponnak kedinch sanddinaka. Hea utranchi poribhaxa tea tea dhormamni veveglli asyeta tor‌y sar tochch. Khoncho to dhorm' xikoita tuza bhavanchi khun kor mhonn? khoncho dhorm' xikoita tuza sezarchank luttun jie mhonn? khoncho dhorm' xikoita ekamekachem rogat pie mhonn?

Lhan‌ponnar thaun hor‍yeklo veveglleam thaun vevegllea ritir vevegllea prokarani hea dhormachi xikoun gheta. Ani hor‍yeklo hench xikta ’oplo dhorm' unchlo’. Hindvank tancho dhorm' unchlo kiteak mhollear to ’somyom' ani sosnnikai’ xikoita tor zoinank tancho dhorm' uncho kiteak mhollear tancho dhorm' tankam ’ohimsa’ xikoita. Kristamvank tancho dhorm' ’ekamekacho mog kora, dusmanank bhogsia’ mhonn xikoita dekhun kristamvank tancho dhorm' unchlo. Tor atam soval utt'ta hem ’hea somsarantle sorv dhorm' unchle ani sorv monxak ho dhorm' asa tor monis kiteak itlo khotto?’

Hea somsarant dhorm' xikounn‌daram zaitim asat, tor‌y raxttram ekameka kiteak ragar, dhvexar ani mosran zholltat? eka raxttrabhitor zati-katicha niban kiteak zhogoddtat? khoncho to lipto dhorm' zo monxank heaporim jieunko mojbur korta?

Amchi dharmik progoti mejchem map amcha firgojent ascha bhandpancher mejtamv, kitli vhodd igorz, kitlem vhodd diull vo kitli vhodd mosjid ani tea bhandpamni vorsak kitlim kar‍yim kortamv, kitlo lok yeta ani kitlo hozar/lakhamni khorchitamv mholl'lleacher asa xivai amcha gamvant ozun techch bhukent, gorib‌ponnant jieun aschanchem gonn'nnem korunk khonchoi dhorm' fuddem yena. Hankam vorsak ek pauttim lokam mukhar apoun kaim thoddea rupeanchi bhik dimvchi tor‌y hanga potr‌kortanchi lain ubhi asonk zai, potramni khobro chhaponk zai. Soviniyorani amcheo rongall tosvir‍yo chhapon yeunko zai.

Hachemodhem thodde dhormandlle - dhormacha namvan dhvex vistarche. Ani thodde chintat kaim herank aplea dhormak haddlem tor amim salvar zatamv mhonnon, konna goribank fuslaun, bonaun mankodd korn amcha dhormak haddn tancha bebos‌ponnacher khellkhullam kortamv. Punn hea prokriechi khori vatt amim kednangi visroleamv mhonn dista - khori vatt hi zaunasa poilem amim amcho dhorm' poripurnn ritin jieleavonko tor tacher preronn gheun zor konn‌y amcho dhorm' ghetit tor tacheaki vortem khoinchem asa? hem hea dhormandlleank koxem somzomvchem?

Hea sorv sovalank mellchi zap bhovo sompi - dhorm' monxacha jinnyent ek nib matr xivai aid nhoim. Monis oplo dhorm' kosloi mhonnom punn tea dhormaprokar to jiechch na va jieunko preton‌y korina. Preton kel'lem tor hea somsarant raxttramni fouz bhandchi gorz udetina. Aicha kallar dex koreddamni duddu hea fouz bhandchak ani marekar aidank gollsita tor‌y koroddamni lok ozun bhuko ani nagddo. Disachem ek jevann got nat‌l'le kitlegi hea somsarant ozun jietat, pottak aschancha svarthak lagon gamvar gamv ragan, dhvexan lastona. Ho dhorm' fokot't jiemvcheo vatto matr sodhun dita xivai jieunko khann dina. Jieunko gorjechem khann monxan oplim dha bottam zhoroun gollsunk zai. Tim zhoromvchem madhyom' matr to oplea chintpatekid sodhundi - konn votant gham' kaddn ghollondi ani konn konnachem luttun khamvdi punn ek matr sot - dhorm' nastam monis jieunko sokta punn khann nastam nhoim.

Inglixant ek sangap asa ’We rate ourselves by what we are capable of doing, whereas others rate us for what we have done to them’ (amim amkam amcha xeathiecher mejtamv tor heram amkam mejtat amim tankam edoll kitem kelam tacher). Mhollear monxacho dhorm' ani monxachi jinni modhem bhovo vhodd khondok asa. Amcho dhorm', amchi jinni, amchem chintap, amcheo korneo kedinch ekameka tall poddanant. Dekhun khoncho dhorm' unchlo ani khoncho unchlo nhoim mholl'llem tork pixem tork‌ch mhonnyeta.

Hea porigotent hea sorv sovalank zap apapinch labhta - sorvanchaki vortem dhorm' zaunasa ’monxadhorm'’. Punn atam utt'ta onyek soval ’monis zaun jieunko konnak zai?’

Dev borem korum,
- Valley Quadros, Ajekar