"sorgachi vatt herank kumok korchi xivai herank oddkoll haddchi nhoi"

Novea Vorsachem Novem Chintap

de18

Voros : 2006

Moino : Janer

Chintap monxak novim sotam dhakhoun dita, chintap monxak noveo vatto sodhun dita, punn chintchant amim kitlim huxar? bhouxa ek somikxa keli tor xembhorant novod tthokke lok fokot ’opunn, aplim bail bhurgim, apli ast-bodik, ople ixtt montr’ heavixim matr chintunk sokta xivai choddtik kitench nhoi.

Baki ur‌l'lea thoddeamni chintunk preton kelem tor‌y tanchan heranchim kortuvam vo heranche guneamv matr chintunk sadhy mholl'llem mhojem chintap. Kiteak mhollear zaiteank chintap ek pidda mholl'llem motint asa. Chintap ek pidda mhonn chintchim-i dharall mapan asat.

Amchem chintap‌y kitlem opurbhayechem? amkam devo, dhorm', mis, ters, patkam, kumsar, festam xivai her chintap yemvchench bhovo unnem. Dekun amcha motin jednam chintunk mon kelem tednam yemvchem chintap‌y amcha tollatatitlench gundd. Dekun'nch amchi mot jezuche bhara apostol as‌l'le, tantum pedru vorto, ani zudas ghatki mhonn amchem chintap. Chuk dogamyni kel'li, pedruk jezun poilench xida sang‌l'lem "olle pedru, tum mhaka fanteacho kombo sad ghalchapoilem tin pauttim negar kortoloi", tor‌y pedrun toxench kelem. Uprant pedru gollgollean roddlo... Uprantli sobhar ritichi kanni sobhar zonnanthaun amim aikalea, ani pedru igorz matecho vhoddil zaloch.

Punn guneamv korunk bhair sor‌l'lea zudasak jezun kedink‌ch xida sanglenanki "tum mhaka vikhrit kortai" mhonn. Sang‌l'lem tor konn zannam to kitem korto mholl'llem? asom! zudasan tis nanneank jezuk vikhrit keloch. Uprant opli chuk vollkon to gollpas gheun melo...

Don chuki, don guneamv, don thoranche, jezuk vikhrit korche.. Punn dogank tannim kel'lea guneamvank bhogunk mell‌l'lem vevegllench - kiteak? asom! choddtik sovalam kelear novich hereji zait!.

Thoddeach vorsadhim krikettant meach fiksing opradant xirkon podd‌l'leancho dhakhlo gheveam, asttreliacho mark va ani xen varn, dokxinn afrikacho heansi kronie ani her thodde. Hantum poilo konnench oplo guneamv vollkon ghetlona, poilem kiteak ozun soit heansi kroniexivai her konnench ho guneamv kobul kelona. Kitem zalem? heansi kroniek krikett somsarantlo mekllo kelo, thoddeach vorsamni to hea somsarantloch mekllo zalo. Punn her ozun asat.

Ailevar eka somvadant ’chori oni chor’ mholl'llevixim tork cholon astana, chorak kosoli xikxa dizai mhonnon uloun astana eklo mhonnalo, ’chorak faxechi xikxa dizai, punn tannem chori kortananch xirkon poddlo tor matr’. Onyeklean toull soval kelem ’kiteak chori kortananch xirkon podd‌l'leak?’ poilo zap diun mhonnalo, hanga xikxa fokot't ’chori kel'leak nhoi, bogar xirkon podd‌l'leak’

Novea vorsar novem chintap chintunk amkam sadhy? va tench pornem chintap? tench gumatt? tichch mandd kurponn ani tichch dhol?  

- Valley Quadros