ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 68. ತೊ ಚುರ್ಚುಲ್ಲೊ ನಾ!
ಚೇತನ್ ಕಾಪುಜಿನ್: ಸೆವಕ್ ಪತ್ರಾಚೊ ಆಧ್ಲೊ ಸಂಪಾದಕ್ ಮಾ|ಚೇತನ್ ಲೋಬೊ, ಏಕ್ ಬರೊ ಕಾಣ್ಯೆಗಾರ್ ಮ್ಹಳ್ಳೆಂ ಸರ್ವಾಂಕ್ ನ್ಹಯ್ ತರ್ಯೀ ಸಭಾರಾಂಕ್ ತರ್ಯೀ ಕಳಿತ್ ಆಸಾ. ಲೇಖನಾಂ, ಅನುವಾದಾಂ, ಕಾಣ್ಯೊ, ಕವಿತಾ ತಾಣೆ ಲಿಖ್ಲ್ಯಾತ್. ಇಂಗ್ಲಿಶ್ ಭಾಸೆಂತ್ ಸಯ್ತ್ ಲೇಖನಾಂ ಬರಂವ್ಚೊ ಹೊ ಏಕ್ ಪ್ರಭುದ್ದ್ ಚಿಂತ್ಪಿ ತಶೆಂಚ್ ಸಾಹಿತ್ಕಾರ್ ಜಾವ್ನಾಸಾ.
ಚೇತನ್ ಕಾಪುಜಿನ್
"ಕೊಂಗ್ರಾಜುಲೇಶನ್ಸ್ ಲೊರಿ, ತುಜ್ಯಾ ಘಣ್ಘಣಿತ್ ಉತ್ರಾಂನಿ ಸಗ್ಳಿ ಇಗರ್ಜ್ ಹಾಲವ್ನ್ ದವರ್ಲಿಯ್ ತುವೆಂ" ಫಾದರ್ ಜೆರಿನ್ ಫಾದರ್ ಲೊರೆನ್ಸಾಚೊ ಉಪ್ಕಾರ್ ಭಾವುಡ್ಲೊ.
"ಬರೆಂ ಫ಼ೆಸ್ತ್ ತುಕಾ ಜೆರಿ ಆನಿ ಹ್ಯಾಪ್ಪಿ ಎನಿವರ್ಸರಿ ಒಫ್ ಪ್ರೀಸ್ಟ್ಹುಡ್. ಇಗರ್ಜ್ ಹಾಲಯಿಲ್ಲಿಗಿ ಮಾತ್ತಿ, ಥೊಡ್ಯಾಂಚಿ ಪುಣಿ ಝೆಮ್ ಸುಟಂವ್ಕ್ ಸಕ್ಲಾಂ ಥರ್...ತೆಂಚ್ ವ್ಹಡ್...ಥೊಡ್ಯಾಂಕ್ ಮೊಜೊ ತಾಳೊ ನಿದುಂಕ್ ಗಾಣಾಂ ಗಾಯಿಲ್ಲೆಬರಿ ಜಾತಾ ಕೊಣ್ಣಾ!" ಫಾದರ್ ಜೆರಿಕ್ ವೆಂಗುನ್ ಹಾಸ್ಲೊ ಫಾದರ್ ಲೊರೆನ್ಸ್.
ಪಾಸ್ಕಾಂಚ್ಯಾ ಫ಼ೆಸ್ತಾಕ್ ಮಿಸಾಕ್ ಆನಿ ಪ್ರಸಂಗ್ ದೀಂವ್ಕ್ ಫಾದರ್ ಜೆರಿನ್ ಸೆಮಿನರಿಂತ್ ಶಿಕಂವ್ಚ್ಯ ಆಪ್ಲ್ಯಾ ಇಶ್ಟಾ ಫಾದರ್ ಲೊರೆನ್ಸಾಕ್ ಆಪವ್ಣೆಂ ದಿಲ್ಲೆಂ. ತೊ ದೀಸ್ ಜೆರಿಚ್ಯಾ ಒಡ್ದಿಚೊ ದೀಸ್ಯಿ ಜಾವ್ನಾಸ್ಲ್ಲೊ. ಆಪ್ಲ್ಯಾ ಖಾಸ್ ಇಶ್ಟಾ ಸಾಂಗಾತಾ, ಹೊ ದೀಸ್ ಖಾಸ್ಗಿ ರಿತಿರ್ ಆಚರುಂಕ್ ಜೆರಿನ್ ನಿರ್ದಾರ್ ಕೆಲ್ಲೊ.
"ಅಮ್ಚ್ಯಾ ಬೊಟ್ಲೆರಾಮಾನ್ ಫ಼ೆಸ್ತಾಕ್ ಕಿತೆಂ ವಿಶೇಸ್ ತಯಾರ್ ಕೆಲಾಂ ಪಳೆವ್ಯಾಂ" ಜೆರಿ ಜೆವ್ಣಾಚ್ಯಾ ಕುಡಾಕ್ ಘುಸ್ಲೊ. ಫಾದರ್ ಲೊರೆನ್ಸ್ ಮಿಸಾಕ್ ಅಯಿಲ್ಲ್ಯಾ ಭುರ್ಗ್ಯಾಂಚೆ ಮೆಳಿಂತ್ ಭರ್ಸಾಲೊ.
ಧಾ ಪಂದ್ರಾ ಮಿನುಟಾಂ ಉಪ್ರಾಂತ್ ಉದೆಲ್ಲ್ಯಾ ಜೆರಿಚೆಂ ಮುಕಮಳ್ ಬಾವ್ಲ್ಲೆಂ.
"ಲೊರಿ, ನಾಸ್ಟೊ ಏಕ್ ಪಂದ್ರಾ ಮಿನುಟಾಂ ಲೇಟ್..ಯಾ.. ಬೆಜಾರ್ ಕರಿನಾಕಾ"
"ಕಿತ್ಯಾಕ್ ಜೆರಿ?”" ಫಾದರ್ ಲೊರಿಕ್ ಕಿತೆಂಗಿ ಸಾರ್ಕೆಂ ನಾ ತಶೆಂ ಭಗ್ಲೆಂ.
"ಕಾಂಯ್ ನಾ ಲೊರಿ, ಫಕತ್ತ್ ಪಂದ್ರಾ ಮಿನುಟಾಂ"
"ಕಿತೆಂ ಸಾಂಗ್ ಜೆರಿ".
"ಸೊರ್ರಿ ಯಾ ಲೊರಿ, ಬೊಟ್ಲೆರ್ ಕಾಲ್ ರಾತಿಂಚ್ ಸಾಂಗಾನಾಸ್ತಾನಾ ಗಾಂವಾಕ್ ಗೆಲಾ ಕಂಯ್, ತುಂ ಬೆಜಾರ್ ಕರಿನಾಕಾ, ಹೊಟೆಲಾಥಾವ್ನ್ ನಾಸ್ಟೊ ಹಾಡುಂಕ್ ಚೆರ್ಕ್ಯಾಕ್ ದಾಡ್ಲಾಂ... ಆತ್ತಾಂ ಯೆತಲೊ"”
ಬೊಟ್ಲೆರ್ ನಾತ್ಲ್ಲ್ಯಾ ಜೆರಿಕ್ ಚಡಿತ್ ತೊಂದ್ರ್ಯಾಂಕ್ ಘಾಲುಂಕ್ ಮನ್ ನಾಸ್ಲ್ಲೊ ಲೊರಿ ನಾಸ್ಟೊ ಜಾತಚ್ ಮ್ಹಣಾಲೊ "ಜೆರಿ, ಚಲ್ಯಾಂ ಅಮ್ಗೆರ್. ಆಜ್ ಹಾಂವ್ ಮಾಂಯ್ಕ್ ಪಳೆಂವ್ಕ್ ಘರಾ ವೆತಾಂ. ಅಮ್ಚ್ಯಾ ಘರಾಚ್ ಫೆಸ್ತ್ ಆನಿ ತುಜೊ ಎನಿವರ್ಸರಿ ಆಚರ್ಸಿಯಾಂ.."
"ಸೊರ್ರಿ ಲೊರಿ, ತುಂ ಬೆಜಾರ್ ಕರ್ನಾಕಾ, ಆಜ್ ಮ್ಹಜೊ ದೀಸ್. ಮ್ಹಾಕಾ ಎಕ್ಸುರೊ ಸೊಡ್ಚಿ ದಯಾ ಕರ್ಶಿ?"
"ತುಜಿ ಖುಶಿ" ಜೆರಿಚ್ಯಾ ಸ್ವಭಾವಾಚಿ ವಳೊಕ್ ಆಸ್ಲ್ಯಾ ಫಾದರ್ ಲೊರೆನ್ಸಾನ್ ಬಳ್ ಕೆಲೆಂ ನಾ. "ಛೆ..ಅಸೆಂ ಜಾಂವ್ಕ್ ನಜೊ ಆಸ್ಲೆಂ, ತೆಂಯಿ ಒಡ್ದಿಚ್ಯಾ ದಿಸಾ.." ತೊ ಚುರ್ಚುರ್ಲೊ.
ಪುಣ್ ಫಾದರ್ ಜೆರಿ ಚುರ್ಚುರ್ಲೊ ನಾ!!
ಮೆಜಾರ್ ಆಸ್ಲ್ಲ್ಯಾ ದಿಸಾಳೆಂ ಹಾತಿಂ ಘೆವ್ನ್ ದೀಶ್ಟ್ ಲಾಯ್ತಾನಾ, ದಿಸಾಳ್ಯಾಚ್ಯಾ ಪಾನಾರ್ ತಾಚಿಚ್ ಚರಿತ್ರಾ ದಿಸ್ಲಿ...
�
... ಧಾ ವರ್ಸಾಂ ಆದ್ಲಿ ಎಪ್ರಿಲಾಚಿ 19 ತಾರಿಕ್, ಸಾಂಜೆಚಿಂ 8.30 ವೊರಾಂ.
ಒಡ್ದಿಕ್ ಆಯಿಲ್ಲ್ಯಾ ಸಯ್ರ್ಯಾಂಪಯ್ಕಿ ಥೊಡಿಂ ಆನಿಕಿ ಘರಾಂತ್ ಆಸ್ಲ್ಲಿಂ.
ಅಮೊರಿ-ತೇರ್ಸ್ ಜಾವ್ನ್ ಲ್ಹಾನಾಂ ವ್ಹಡಾಂಲಾಗಿಂ ಬೆಸಾಂವ್ ಮಾಗ್ತಾನಾ, ತ್ಯಾಚ್ ದಿಸಾ ಸಕಾಳಿಂ ಓಡ್ದ್ ಮೆಳ್ಲ್ಲ್ಯಾ ತಾಣೆಂಯಿ ಹರ್ಶೆಂಚೆಬರಿ ವ್ಹಡಿಲಾಂಲಾಗಿಂ ಬೆಸಾಂವ್ ಮಾಗ್ಲೆಂ. ತಾಚ್ಯಾಕಿ ದೇಡ್ ವರ್ಸ್ ವಡ್ ಭಯ್ಣ್ ಮೊಲಿಲಾಗಿಂ ಬೆಸಾಂವ್ ಮಾಗ್ತಾನಾ, ತಾಚೆ ಮಾವ್ಶೆನ್:
"ಪಾದ್ರ್ಯಾಪಾನ್ ಭೆಸಾಂವ್ ಮಾಗ್ಚೆಂಗಿ?’" ಮ್ಹಣ್ ಸವಾಲ್ ಕರ್ನ್,
"ಗಾಂವಾಕ್ ರಾಯ್ ತರಿ, ಅವಯ್ಕ್ ಪುತ್ ಆನಿ ಭಯ್ಣಿಕ್ ಭಾವ್ ನೆ?" ಮ್ಹಳ್ಳಿ ಜಾಪ್ಯಿ ತಿಣೆಂಚ್ ದಿಲ್ಲಿ.
ಸರ್ವ್ ಜೊರಾನ್ ಹಾಸ್ಲ್ಲಿಂ!!
ಅಮೊರಿ ತೆರ್ಸಾಉಪ್ರಾಂತ್ ಸಕ್ಕಡ್ ಬಸೊನ್ ಗಜಾಲಿ ಕಾಡ್ತಾನಾ, ಸೆಜಾರ್ಚೊ ವಿನ್ಸಿ ಆಪ್ಣಾ ಇತ್ಲ್ಯಾಕ್ ಮ್ಹಳ್ಳೆಬರಿ ಉಲಯ್ಲೊ:
"ಆನಿ ಹ್ಯಾ ಘರ್ಚೆಂ ಸುರುಪ್ಚ್ಚ್ ಬದಲ್ತೆಲೆಂ".
"ಕಿತ್ಯಾಕ್ ಮ್ಹಳೆಂಯ್?"
ದೆಗೆನ್ ಬಸ್ಲ್ಲ್ಯಾ ಜೆರಿಚ್ಯಾ ಪ್ರಾಯೆಸ್ತ್ ಬಾಪ್ಪುನ್ ಸವಾಲ್ ಕೆಲೆಂ.
"ವಯ್ಲ್ಯಾ ವಾಡ್ಯಾಚ್ಯಾ ಕಿಟ್ಟಿಬಾಯೆಕ್ ಪಳೆನಾಂಯ್? ಪುತಾಚಿ ಓಡ್ದ್ ಜಾವ್ನ್ ಭರ್ತಿ ಪಾಂಚ್ ವರ್ಸಾಂ ಜಾಂವ್ಕ್ ನಾಂತ್. ದೋನ್ ಮಾಳಿಯಾಂಚೆಂ ನವೆಂ ಘರ್ ಉಭೆಂ ಜಾವ್ನಾಯೆ? ವಾಡ್ಯಾಕ್ ವಾಡೊಚ್ ಸಾಂಗ್ತಾ: ಹೆಂ ಸರ್ವ್ ಪಾದ್ರಿ ಪುತಾಚೆಂ ಕಾರ್ಬಾರ್ ಮ್ಹಣ್".
"ಕುಟ್ಮಾಂತ್ಲೊ ಎಕ್ಲೊ ಪಾದ್ರಿ ಜಾಲ್ಯಾರ್ ಲೊಟ್ರಿ ಉಟ್ಲ್ಲೆಬರಿಚ್. ಕಾಂಯ್ ನಾ ತರ್, ಗಲ್ಫಾಚಿ ವಿಜಾ ಮೆಳ್ಲ್ಲೆ ಬರಿಚ್" ಆನ್ಯೆಕ್ಲ್ಯಾನ್ ತಾಳೊ ಮೆಳಯ್ಲೊ.
"ತುಂ ಕಿತೆಂ ಮ್ಹಣ್ತಾಯ್ ರೊನಿ?" ಬಾಪ್ಪುನ್ ಜೆರಿಚ್ಯಾ ಮಾಲ್ಘಡ್ಯಾ ಬಾವಾಕ್ ಸವಾಲ್ ಉಡಯ್ಲೆಂ.
ಆಪುಣ್ ಕಸಲ್ಯಾ ಉಜ್ಯಾ ಪರ್ವತಾಚೆರ್ ಉಭೊ ಆಸಾಂ ತೆಂ ಸಮ್ಜೊಂಕ್ ಜೆರಿಕ್ ಚಡಿತ್ ವೇಳ್ ಲಾಗ್ಲೊ ನಾ. ಆಪ್ಲೊ ವ್ಹಡ್ ಭಾವ್ ರೊನಿ ಕುಶಿನ್ ದೀಶ್ಟ್ ಘುಂವ್ದಾಯಿಲ್ಲ್ಯಾ ತಾಕಾ ಉಜ್ಯಾಪರ್ವತಾಚಿ ದಾವ್ ಆನಿಕ್ಯಿ ಕಟಿಣ್ ದಿಸ್ಲಿ.
ರೊನಿಚ್ಯಾ ದಿಶ್ಟಿಂತ್ ಆಶಾ ಆಸ್ಲ್ಲಿ, ಅತ್ರೆಗ್ ಆಸ್ಲ್ಲೆ, ಯೆಂವ್ಕ್ ಅಸ್ಚ್ಯಾ ಸಂಗ್ತಿಂಚಿಂ ಸುಪ್ತ್ ಸಪ್ಣಾಂ ಆಸ್ಲ್ಲಿಂ!!
"ಓಡ್ದ್ ಸರಳ್ ಆನಿ ಸೊಂಪ್ಯಾ ರಿತಿನ್ ಕೆಲ್ಯಾರ್ ಪುರೊ, ದರ್ಬಾರ್ ಗೊವ್ಜಿ ಮ್ಹಾಕಾ ಪಸಂದ್ ನಾ" ಮ್ಹಳ್ಳ್ಯಾ ಜೆರಿಚ್ಯಾ ಉತ್ರಾಂಕ್ ಖಿಣಾನ್ ಕಾಡ್ನ್ ಉಡಯಿಲ್ಲೆಂ ರೊನಿನ್.
"ಓಡ್ದ್ ಕಸಿ ಕರಿಜೆ ಮ್ಹಳ್ಳೆಂ ಮ್ಹಾಕಾ ಸೊಡ್. ಫಿರ್ಗಜೆಂತ್ ಜಾಂವ್ಚ್ಯೊ ಹೆರ್ ಒಡ್ದಿ, ಕಾಜಾರಾಂ ಕಸಿಂ ಅಸ್ತಾತ್ ಮ್ಹಳ್ಳೆಂ ತುಕಾ ಕಳಿತ್ ನಾ. ಆಮಿ ಭಿಕಾರ್ಪಣಾನ್ ಚಲ್ಚಿ ಗರ್ಜ್ ನಾ".
ಬಾಪಯ್ಚ್ಯಾ ಮೊರ್ನಾ ಉಪ್ರಾಂತ್, ಬಾಪಾಯ್ಚ್ಯಾ ಜಾಗ್ಯಾರ್ ಆಸ್ಲ್ಲ್ಯಾ ವಡ್ ಭಾವಾಕ್ ವಿರೋಧ್ ವಚೊಂಕ್ ಜೆರಿಕ್ ಮನ್ ನಾತ್ಲ್ಲೆಂ.
ಪುಣ್ ಒಡ್ದಿದಿಸಾಚ್ಯಾ ಸರ್ಬಾರಾಯೆಂತ್ ಹರ್ಯೆಕ್ ಘಡಿ
"ಹಾಚಿ ಗರ್ಜ್ ನಾಸ್ಲ್ಲಿ" ಮ್ಹಳ್ಳೆಂ ಚಿಂತಪ್ ಸಬಾರ್ ಪಾವ್ಟಿಂ ತಾಚೆಥಂಯ್ ಉದೆಲ್ಲೆಂ...
..ಆತಾಂ ರೊನಿ ದಾಟ್ಟುಚ್ಯಾ ದಿಶ್ಟಿಂತ್ ಆಸ್ಲ್ಲ್ಯಾ ಅತ್ರೆಗಾಂನಿ ಆನಿ ಭಗ್ಣಾಂನಿ, ಒಡ್ದಿಚ್ಯಾ ಸರ್ಬಾರಾಯೆಚೆಂ ಕಾರಣ್ ತಾಕಾ ದಿಸ್ಲೆಂ. ಒಡ್ದಿಕ್ ರೊನಿನ್ ದುಡು ಭೆಶ್ಟೆಂ ಖರ್ಚುಂಕ್ ನಾತ್ಲ್ಲೊ.. ತೊ "ಇನ್ವೆಸ್ಟ್" ಕೆಲ್ಲೊ, ದೊಡ್ಯಾನ್, ತಿದೊಡ್ಯಾನ್ ವಾ ಧಾ ವಾಂಟ್ಯಾಂನಿ ಪಾಟಿಂ ಜೊಡ್ಚೆಖಾತಿರ್!!
ಆಪುಣ್ ಉಭೊ ಆಸ್ಲ್ಲೊ ಉಜ್ಯಾಪರ್ವತ್ ಫುಟ್ತಾ ತಶೆಂ ಭಗ್ಲೆಂ.
"ಲೊಂಕ್ಡಾ ತಸ್ಲ್ಯೊ ಘಟ್ ವಸ್ತು ಹುನ್ ಅಸ್ತಾನಾಂಚ್ ಬಡವ್ನ್ ಸಾರ್ಕ್ಯೊ ಕರುಂಕ್ ಸಲೀಸ್" ಮ್ಹಳ್ಳೆಂ ಜೆರಿಕ್ ಬರ್ಯಾನ್ ಕಳಿತ್ ಆಸ್ಲ್ಲೆಂ.
"ಏಕ್ ಮಿನುಟ್.."’ತಾಣೆ ತಾಳೊ ಸಾರ್ಕೊ ಕೆಲೊ ಆನಿ ನಿರ್ಧಾರ್ ಘಟ್ ಕೆಲೊ.
"ಹಾಂವ್ ಯಾಜಕ್ ಜಾಲ್ಲ್ಯಾನ್, ಆಪ್ಣಾಂಕ್ ಅರ್ಥಿಕ್ ಫಾಯ್ದೊ ಜಾಯ್ತ್ ಮ್ಹಳ್ಳೆಂ ಚಿಂತಪ್ ಕೊಣಾಚೆ ಮತಿಂತ್ ಚುಕೊನ್ ತರಿ ಆಯ್ಲಾಂ ತರ್, ತೆಂ ಹೆಚ್ ಘಡ್ಯೆ ಮತಿಂತ್ಲೆಂ ಕಾಡ್ನ್ ಉಡಂವ್ಚೆಂ ಬರೆಂ. ಯಾಜಕ್ ಜಾಲ್ಲೊಚ್ ಎಕ್ಲೊ ಕಾಮಾಕ್ ಲಾಗ್ಲೊ, ಜೊಡುಂಕ್ ಲಾಗ್ಲೊ ಮ್ಹಳ್ಳೆಂ ಚಿಂತಪ್ ಭೊವ್ ಕೀಳ್ ಕಾಸ್ತಾಚೆಂ ಆನಿ ಹಕೀಕತೆ ಭಾಯ್ಲೆಂ.." ಆಪ್ಲ್ಯಾ ತೊಂಡಾಥಾವ್ನ್ ಉತ್ರಾಂ ನ್ಹಯ್, ಹುನ್ ಕೆಂಡಾಂ ಭಾಯ್ರ್ ಸರ್ಚೆಬರಿ ಭಗ್ಲೆಂ ತಾಕಾ!!
ತ್ಯಾ ರಾತಿಂ ಜೆವ್ಣಾವೆಳಾರ್ ಚಡ್ ಉಲವ್ಣೆಂ ನಾಸ್ಲ್ಲೆಂ.
"ಅಸೆಂ ಕಿತ್ಯಾಕ್ ಉಲಯ್ಲೊಯ್?" ಮ್ಹಣ್ ತಾಕಾ ಕೊಣೆಂಚ್ ಸವಾಲ್ ಕೆಲೆಂ ನಾ. ಪುಣ್ ಸಭಾರಾಂಚಿ ಮನಾಂ ಆಪ್ಣಾನ್ ಮೊಡ್ಲ್ಯಾಂತ್ ಮ್ಹಳ್ಳೆಂ ತಾಕಾ ಕಳಿತ್ ಆಸ್ಲ್ಲೆಂ.
ತಾಕಾ ಕಸಲೆಚ್ಚ್ ಚುರ್ಚುರೆ ಭಗ್ಲೆನಾಂತ್!!
*****************************
ತಕ್ಲಿ ಪಾಪುಡ್ನ್ ಫಾದರ್ ಜೆರಿನ್ ದಿಸಾಳ್ಯಾಚೆಂ ಪಾನ್ ಪರ್ತಿಲೆಂ...
..ವೊರಾಂ ರಾತಿಚಿಂ ಸಾಡೆ ಧಾ.
ಫೊನಾಚಿ ಕಾಂಪಿಣ್ ವಾಜ಼್ಲಿ.
"ಹಲೊ ಹಾಂವ್ ರೊನಿ ಉಲಯ್ತಾಂ" ಜೆರಿಚ್ಯಾ ದಾಟ್ಟುಚೊ ಶೀತಳ್ ತಾಳೊ.
"ಹಾಂ ಸಾಂಗ್"
"ಮಾಂಯ್ ಕಾಲ್ ಥಾವ್ನ್ ಭೋವ್ ಚಡ್ ಉಶ್ಯಾರ್ ನಾ. ಆತಾಂ ಉಸ್ವಾಸ್ ಘೆಂವ್ಕ್ ಕಶ್ಟಾತಾ."
"ಹೊ ತಶೆಂಗಿ, ತಿಕಾ ಆಸ್ಪತ್ರೆಕ್ ವರಿಜೆ ಮ್ಹಣ್ ಚಿಂತಾತ್ ತರ್, ವರಾ. ಮೊಜ್ಯಾ ಪರ್ವಣ್ಗೆಚಿ ಗರ್ಜ್ ದಿಸನಾ. ಹಾಂವ್ ಕಾಂಯ್ ದಾಕ್ತೆರ್ ನ್ಹಯ್." ಜೆರಿನ್ ಶಾಂತ್ ತಾಳ್ಯಾನ್ ಜಾಪ್ ದಿಲಿ ಆನಿ ಫೊನ್ ದವರ್ಲೆಂ.
ರೊನಿಚೆಂ ಫೊನ್ ಯೆಂವ್ಚೆಂ ಹೆಂ ಪಯ್ಲೆ ಪಾವ್ಟಿ ನ್ಹಯ್ ಆಸ್ಲೆಂ. ಮಾಂಯ್ಚಿ ಭಲಾಯ್ಕಿ ಬರಿ ನಾ ತರ್ ತುರ್ತ್ ಜೆರಿಕ್ ಫೊನ್ ಯೆತಾಲೆಂ. ಸುರ್ವೆರ್ ತೊ ಉಟಾಉಟಿಂ ವಚೊನ್, ಭಾಡ್ಯಾಕ್ ಕಾರ್ ಕರ್ನ್ ಆವಯ್ಕ್ ಆಸ್ಪತ್ರೆಕ್ ಎಡ್ಮಿಟ್ ಕರ್ತಾಲೊ ಆನಿ ಡಿಸ್ಚಾರ್ಜ್ ಜಾತಾನಾ, ಆಸ್ಪತ್ರೆಚೆಂ ಬಿಲ್ಲ್ ಭರ್ತಾಲೊ.
ಪುಣ್ ಕ್ರಮೇಣ್ ಹಾಚೊ ಮತ್ಲಭ್ ತಾಕಾ ಸಮ್ಜಾಲೊ!!
ಆವಯ್ಕ್ ಪಳೆವ್ನ್ ಘೆಂವ್ಚಿ ಆಪ್ಲಿ ಜ಼ವಾಬ್ದಾರಿ ಆಪ್ಲ್ಯಾ ಖಾಂದ್ಯಾಥಾವ್ನ್ ನಿಸ್ರಾವ್ನ್ ಘೆಂವ್ಚಿ ರೊನಿಚಿ ಹಿ ಚಲಾಕಿ.
ಹಾಕಾ ಬಲಿ ಜಾಂವ್ಕ್ ಜೆರಿ ತಯಾರ್ ನಾತ್ಲ್ಲೊ!!
ಹ್ಯಾ ಖಾತಿರ್ ತಾಕಾ ಬಿರುದಾಂಯಿ ಮೆಳ್ಲ್ಲಿಂ. ‘ಕಸಲೊ ಪಾದ್ರಿ ಯಾ ಹೊ? ಆವಯ್ಚೊ ಸಮೇತ್ ಹುಸ್ಕೊ ನಾ ತಾಕಾ.’
�
...ದಿಸಾಳ್ಯಾಚೆಂ ಆನ್ಯೆಕ್ ಪಾನ್ ಪರ್ತಿಲೆಂ ಫಾದರ್ ಜೆರಿನ್.
"ಫಾದರ್, ಅಮ್ಚ್ಯಾ ಫಿರ್ಗಜೆಕ್ ಸೊಭಿತ್ತ್ ಇಗರ್ಜ್ ಅಸಾ, ಇಸ್ಕೊಲ್ ಆಸಾ, ಹೊಲ್ ಆಸಾ.. ಇತ್ಲೆ ಸೊಭಿತ್ತ್ ಫಿರ್ಗಜೆಕ್ ಏಕ್ ಜೊಕ್ತೆಂ ದ್ವಾರ್, ಮ್ಹಣ್ಜೆ ಮಹಾದ್ವಾರ್ ನಾ. ತುಮ್ಚ್ಯಾ ಆದ್ಲ್ಯಾ ವಿಗಾರಾಂನಿ ಹ್ಯೆ ಫಿರ್ಗಜೆಕ್ ಜಾಯ್ತೆಂ ಕೆಲಾಂ. ತುಮ್ಚ್ಯಾ ವೆಳಾರ್ ಹೆಂ ಇಗರ್ಜೆಚೆಂ ಮಹಾದ್ವಾರ್ ತಯಾರ್ ಜಾಯ್ಜೆ ಮ್ಹಣ್ ಅಮ್ಚಿ ಆಶಾ ಫಾದರ್" ಉಪಾದ್ಯಕ್ಶಾನ್ ಪ್ರಸ್ತಾವನ್ ಘಾಲೆಂ.
ಫಿರ್ಗಜ್ ಗೊವ್ಳಿಕ್ ಮಂಡಳೆಚೆ ಸದಸ್ಯಾಂಚೆ ದೊಳೆ ತಾಚೆರ್ ಖಂಚ್ಲ್ಲೆ.
ಜಮಾತಿಚೆರ್ ಹೊ ವಿಶಯ್ ಯೆತಲೊ ಮ್ಹಳ್ಳೆಂ ಕಳಿತ್ ಆಸ್ಲ್ಲ್ಯಾ ಫಾದರ್ ಜೆರಿನ್ ಆಪ್ಲಿ ಜಾಪ್ ದೀಂವ್ಕ್ ತಡವ್ ಕೆಲೊನಾ.
"ಫಿರ್ಗಜೆಚ್ಯಾ ಉದರ್ಗತೆಕ್ ತುಮ್ಕಾಂ ಅಸ್ಚಿ ಉರ್ಭಾ ಪ್ರಶಂಸಾರ್ಹ್. ಪುಣ್ ಮಹಾದ್ವಾರ್ ಬಾಂದ್ಚೆವಿಶಿಂ ಮೊಜಿ ಅಭಿಪ್ರಾಯ್ ವೆಗ್ಳೀಚ್ ಆಸಾ. ಅಮ್ಚೆ ಫಿರ್ಗಜೆಂತ್ ಸಗ್ಳೆಂ ಆಸಾ. ಪುಣ್ ಫಿರ್ಗಜೆಚಿ ಅಭಿವೃದ್ಧಿ ಜಾಯ್ಜಾಯ್. ಹೆ ಖಾತಿರ್ ಏಕ್ ಮಹಾದ್ವಾರ್ ಬಾಂಧಿಜೆ ಮ್ಹಣ್ತಾತ್ ತುಮಿ? ಬಾಂದುಂಕ್ ಕಾಂಯ್ಚ್ ನಾ ಮ್ಹಳ್ಳ್ಯಾ ತಕ್ಶಣ್ ಮಹಾದ್ವಾರ್ ಬಾಂಧಿಜೆ ಮ್ಹಳ್ಳೊ ಅರ್ಥ್ ನ್ಹಯ್. ಮಹಾದ್ವಾರ್ ಫಿರ್ಗಜ್ಗಾರಾಂಚೊ ಬಾವಾರ್ತ್ ಚಡಯ್ತಾ? ದುಬ್ಳ್ಯಾ ಫಿರ್ಗಜ್ಗಾರಾಂಕ್ ಜೇಂವ್ಕ್ ಪೇಜ್ ದಿತಾ? ಎಕಾ ಅಕ್ರಿಸ್ತಾಂವಾಕ್ ಪುಣಿ, ಕ್ರಿಸ್ತಾಂವ್ ಸಮಡ್ತಿವಿಶಿಂ ಬರಿ ಅಬಿಪ್ರಾಯ್ ದಿತಾ? ಮಹಾದ್ವಾರ್ ಬಾಂಧುಂಕ್ ಏಕ್ಚ್ ಏಕ್ ಜೊಕ್ತೆಂ ಕಾರಣ್ ತುಮ್ಚೆಲಾಗಿಂ ಆಸಾ ತರ್.. ಸಾಂಗಾ ಮ್ಹಾಕಾ.." ಜೆರಿನ್ ಸವಾಲ್ ಉಡಯ್ಲೆಂ.
ಸವಾಲಾಚಿ ಜಾಪ್ ಜಾವ್ನ್ ತಿನ್ಂಚ್ ವರ್ಸಾಂನಿ ಫಾದರ್ ಜೆರಿಕ್ ತ್ಯಾ ಫಿರ್ಗಜೆಥಾವ್ನ್ ಹಳ್ಳೆಚ್ಯಾ ಲ್ಹಾನ್ ಫಿರ್ಗಜೆಕ್ ವರ್ಗ್ ಜಾಲ್ಲೊ.
"ಹೊ ಫಿರ್ಗಜೆಚ್ಯಾ ಅಭಿವ್ರದ್ದೆಕ್ ಉಳ್ಟೊ. ಹಾಚೆಥಾವ್ನ್ ಫಿರ್ಗಜೆಕ್ ಕಾಂಯ್ಚ್ ಬರೆಪಣ್ ನಾ. ಹೊ ವಿಗಾರ್ ಆಮ್ಕಾಂ ನಾಕಾ. ಹಾಕಾ ಬದ್ಲಿಯಾ ಫಿರ್ಗಜೆಚ್ಯಾ ಬಳ್ವಂತ್, ಶಿಕ್ಪಿ ಆನಿ ಸಮ್ಜಣೆದಾಯೆಕ್ ಮಾನೆಸ್ತಾಂಚ್ಯಾ ಮನವೆಕ್ ಬಿಸ್ಪಾನ್ ಸಮೇತ್
’ಹಾಂ’ ಕೆಲ್ಲೆಂ!!
ಫಿರ್ಗಜ್ ಸೊಡುಂಕ್ ಫಾದರ್ ಜೆರಿ ಬಿಲ್ಕುಲ್ ಚುರ್ಚುರ್ಲೊ ನಾ!!"
******************************
...ದಿಸಾಳ್ಯಾ ಪತ್ರಾಚೆಂ ನಿಮಾಣೆಂ ಪಾನ್ ಪರ್ತಿಲೆಂ ಫಾದರ್ ಜೆರಿನ್.
"ಫಾದರ್, ತುಮ್ಚ್ಯಾ ಭಾವಾಚೆಂ ಫೊನ್ ಆಯಿಲ್ಲೆಂ. ಆಜ್ ಸಕಾಳಿಂ ಧಾ ವರಾಂಚೆರ್ ತುಮ್ಚಿ ಮಾಂಯ್ ಸರ್ಲಿ ಕಂಯ್. ಹಾರ್ಟೀ ಕೊಂಡೊಲೆನ್ಸಸ್ ಫಾದರ್" ಫಿರ್ಗಜೆಚ್ಯಾ ಆಫಿಸಾಂತ್ ವಾವುರ್ಚ್ಯಾ ಚಲಿಯೆನ್ ವರ್ದಿ ದಿಲಿ.
ಜೆರಿ ಆಪ್ಲೆಂ ಗರ್ಜೆಚೆಂ ಕಾಮ್ ತಿರ್ಸುನ್ ಘರಾ ವಚೊಂಕ್ ಭಾಯ್ರ್ ಸರ್ಲೊ. ಬಸ್ಸಾರ್ ಗೆಲ್ಯಾರ್ ಸ ವರಾಂಚಿ ವಾಟ್.
"ಬಾಯ್ಕಾಚೆರ್ ತರ್ ಚಾರ್ ವೊರಾಂನಿ ಪಾವ್ಯೆತ್’ ಚಿಂತ್ಲೆಂ ತಾಣೆ. ಭಯ್ಣಿಕ್ ಫೊನ್ ಕರ್ತಾನಾ, ರಡ್ಣ್ಯಾಮಧೆಂ, ಹಾಂವ್ಯಿ ಯೆತಾಂ ತುಜೆಸಾಂಗಾತಾ" ಮ್ಹಣಾಲೆಂ.
ಆಪ್ಲೆ ಫಿರ್ಗಜೆಥಾವ್ನ್, ಭಯ್ಣಿಚ್ಯಾ ಘರಾ, ದೋನ್ ವೊರಾಂ, ಉಪ್ರಾಂತ್ ಘರಾ ಪಾವುಂಕ್ ದೋನ್ ವೊರಾಂ. ’ಜಾಯ್ತ್’ ಮ್ಹಣಾಲೊ ಫಾದರ್ ಜೆರಿ.
"ಭಯ್ಣಿಚ್ಯಾ ಘರಾ ವಚುನ್, ಸಗ್ಳ್ಯಾಂಕ್ ಖಬರ್ ಸಾಂಗುನ್, ಭಯ್ಣಿಕ್ ಆಪ್ಣಾಸಾಂಗಾತಾ ಬಾಯ್ಕಾರ್ ಘೆವ್ನ್ ಘರಾ ಭಾಯ್ರ್ ಸರ್ಲೊ.
ಭಾವೊಜಿ ಆನಿ ಕುಟ್ಮಾಚಿಂ ‘ದುಸ್ರ್ಯಾದಿಸಾ ಮೊರ್ನಾಕ್ ಯೇವ್ನ್ ಪಾವ್ತಾಂ" ಮ್ಹಣಾಲಿಂ.
ಮೊರ್ನಾಚಿ ರೀತ್ ಬರ್ಯಾನ್ ಚಲ್ಲಿ.
ಮೊರ್ನ್ ಜಾತಚ್ ಫಾದರ್ ಜೆರಿ ಆಪ್ಲ್ಯಾ ಫಿರ್ಗಜೆಕ್ ಪರ್ತಾಲೊ.
ದೋನ್ ದಿಸಾಂ ಉಪ್ರಾಂತ್ ತಾಚ್ಯಾ ಫಿರ್ಗಜ್ ವಿಗಾರಾಥಾವ್ನ್ ತಾಕಾ ಫೊನ್ ಆಸ್ಲ್ಲೆಂ
"ಫಾದರ್ ಜೆರಿ, ಮಾಂಯ್ಚ್ಯಾ ಸಾತ್ವ್ಯಾ ದಿಸಾಚ್ಯಾ ಮಿಸಾಕ್ ತುಂ ಯೆತಾಯ್?"
"ನಾಂ ಫಾದರ್, ಮ್ಹಾಕಾ ಹಾಂಗಾಸರ್ ಏಕ್ ದುಸ್ರೆಂ ಮೀಸ್ ಆಸಾ. ತುಮಿಂಚ್ ಮೀಸ್ ಭೆಟಯಾ".
"ಜೆರಿ, ತುಕಾ ಎಕ್ ವಿಶಯ್ ಸಾಂಗುಂಕ್ ಆಸಾ. ಬೆಜಾರ್ ಕರ್ನಾಕಾ. ದೋನ್ ದಿಸಾಂ ಆದಿಂ ತುಂ ಎಕಾ ಚೆಡ್ವಾಕ್ ಬಾಯ್ಕಾರ್ ಬಸುನ್ ಬೊಂವ್ಡಾವ್ನ್ ಆಸ್ಲ್ಲೊ ಯ್ ಖಂಯ್. ಫಿರ್ಗಜೆಂತ್ ಸಬಾರ್ ಲೋಕ್ ಹೆಚ್ ವಿಶ್ಯಾಂತ್ ಚರ್ಚೆ ಕರ್ನ್ ಅಸಾ. ಕೋಣ್ ಯಾ ತೆಂ ಚೆಡುಂ?”
ಜೆರಿಕ್ ಹಳ್ಟಾಚೊ ಧಖೊ ಲಾಗ್ಲ್ಲೊ!!"
ತಾಣೆ ಫೊನ್ ಸಂಪರ್ಕ್ ತುಟಯ್ಲೊ.
****************************
"ದಿಸಾಳೆಂ ದೋಡ್ನ್ ದೆಗೆಕ್ ದವರ್ಲ್ಯಾ ಫಾದರ್ ಜೆರಿಕ್ ಆಪ್ಲ್ಯಾ ಒಡ್ದಿಚ್ಯಾ ಪಯ್ಲ್ಯಾ ಮಿಸಾಕ್, ಸೆಮಿನರಿಚ್ಯಾ ಪ್ರಾಯೆಸ್ತ್ ಡೆಸಾ ಪಾದ್ರ್ಯಾಪಾನ್ ಸಾಂಗ್ಲ್ಲ್ಯಾ ಸೆರ್ಮಾಂವಾಚ್ಯಾ ಉತ್ರಾಂಚೊ ಉಡಾಸ್ ಅಯ್ಲೊ" ;
"ಜೆರಿ, ತುಂವೆಂ ಕಸಲ್ಯಾ ರಿತಿಚ್ಯಾ ಜಿಣ್ಯೆಚಿ ವಿಂಚವ್ಣ್ ಕೆಲ್ಯಾಯ್ ತೆಂ ಸಮ್ಜುನ್ ಘೆ. ಎಕಾ ಕುಟ್ಮಾಥಾವ್ನ್ ತುಂ ಆಯ್ಲಾಯ್ ತರಿ, ಲೊಕಾಕ್ ತುಂವೆಂ ಸಾಧೊ ಯಾಜ಼ಕ್ ಜಾವ್ನ್ ಜಿಯೆಂವ್ಚೆಂ ಸೊಸನಾ, ತಾಂಕಾಂ ಕರುಂಕ್ ತಾಂಕ್ ನಾತ್ಲ್ಲೆಂ ಸರ್ವ್ ತುಂವೆಂ ಕರಿಜೆ ಮ್ಹಣ್ ಆಶೆತೆಲಿಂ, ತುಂವೆಂ ಸಾಂತ್ ಜಾಯ್ಜೆ, ಮಾರ್ಥಿರ್ ಜಾಯ್ಜೆ, ನಾಂ ತರ್, ತುಕಾ ಲೊಕ್ ಮಾರ್ಥಿರ್ ಮಾರ್ತಲೊ. ತಾಂಚ್ಯಾ ಸರ್ವ್ ಚುಕಿಂಕ್ ತುಜೆಲಾಗಿಂ ಲೇಕ್ ವಿಚಾರ್ತಲೊ. ಆಪ್ಲ್ಯಾ ಸರ್ವ್ ನಿರ್ಭಾಗ್ಪಣಾಕ್ ತುಕಾ ಜ಼ವಾಬ್ದಾರ್ ಕರ್ತಲೊ. ತುಂ ತಾಂಚಿಂ ಪಾತ್ಕಾಂ ತುಜೆವಯ್ರ್ ಘೆನಾಶಿ ತರ್, ತುಕಾ ಖುರ್ಸಾರ್ ಮಾರ್ತಲೊ. ಹಿಚ್ ಜಿಣಿ ಎಕಾ ಯಾಜಕಾಚಿ ಜೆರಿ, ಹಿಚ್ ಜಿಣಿ.."
..."ವೊಡ್ದಿಚೊ ದಶಮಾನೋತ್ಸವ್ � ಪಾಸ್ಕಾಂ ಫೆಸ್ತಾಚೆಂ ಸ್ಪೆಶಿಯಲ್ ಸೆಲ್ಫ್ ಮೇಡ್ ಪೇಜ್ ಆನಿ ಲೊಣ್ಚೆಂ"- ಕಸಲೆಂಗಿ ಗೀತ್ ಶಿಳೊಣಿ ಘಾಲ್ನ್ ಗಾವ್ನ್, ಕುಜ್ನಾಂತ್ ರಿಗ್ಲೊ ಫಾದರ್ ಜೆರಿ.
ಫೆಸ್ತಾಕ್, ಹೆರಾಂಬರಿ ಸನ್ನಾಂ ಮಾಸಾಚೆಂ ಜೆವಣ್ ನಾತ್ಲ್ಲ್ಯಾಕ್ ತಾಕಾ ಬಿಲ್ಕುಲ್ ಚುರ್ಚುರೆ ಭಗ್ಲೆನಾಂತ್!!
[ಹಿ ಕಾಣಿ ರಾಕ್ಣೊ ಪತ್ರಾಚೆರ್ ಪರ್ಗಟ್ಲ್ಯಾ]
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
