ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮೆಲ್ವಿನ್ ಜೆರಾಲ್ಡ್ ವಾಸ್: ಕೆಲರಾಯ್ ಫಿರ್ಗಜೆಜೊ, ಪಾಟ್ಲ್ಯಾ ಭಾರಾ ವರ್ಸಾಂ ಥಾವ್ನ್ ಕುವೆಯ್ಟಾಂತ್ ವಾವ್ರ್ ಕರುನ್ ಆಸಾ. ಚಡುಣೆಂ ಪಂದ್ರಾ-ಸೊಳಾ ವರ್ಸಾಧಿಂ ಸಾಹಿತ್ಯಾಚಿ ಸುರ್ವಾತ್ ಕರುನ್, 35 ಮಟ್ವ್ಯೊ ಕಾಣ್ಯೊ ಆನಿ ಏಕ್ ಕಾದಂಬರಿ ಬರಯಿಲ್ಲಿ ತರ್ಯೀ ಸಭಾರ್ ವರ್ಸಾಂನಿ ತಿ ಜಿವಾಳ್ ದವ್ರುಂಕ್ ಸಕಾನಾಸ್ತಾಂ ರಾವ್ಲೊ ತರ್ಯ್ ಕೊಂಕ್ಣಿ ಸಾಹಿತ್ಯಾಚೆರ್ ತೊಚ್ಚ್ ಮೋಗ್ ಆನಿ ಹುಸ್ಕೊ ಅಸೊನ್, ಆಯ್ಲೆವಾರ್ ಸರಾಗ್ ರಿತಿನ್ ವೆವೆಗ್ಳ್ಯಾ ಪ್ರಕಾರಾಚಿ ಸಾಹಿತಿಕ್ ಕೃಷಿ ಕರುನ್ ಕೊಂಕ್ಣಿ ವರ್ತುಲಾಂತ್ ನಾಂವಾಡ್ದಿಕ್ ಜಾಲಾ. ಕಾಣ್ಯಾಂಶಿವಾಯ್ 4 ನಾಟ್ಕುಳೆ, 75 ಕವಿತಾ, 10 ಲೇಖನಾಂ, 20 ವಿಮರ್ಶೆ/ಸಮೀಕ್ಶಾ ಬರಯ್ಲ್ಯಾತ್. ಹಾಚೊ ಸ್ವತಾಚೊ (ಫುಡ್ಲದ್) ಕವಿತಾಜಮೊ ’ಆಟ್ವ್ಯಾ ರಂಗಾಚೊ ಧೊಣು’ ವೆಗಿಂಚ್ ’ಆಶಾವಾದಿ ಪ್ರಕಾಶನ್’ ಪರ್ಗಟ್ಚಾರ್ ಆಸಾ. ಹಾಚ್ಯಾಧಿಂ ಹಾಚಿಂ ಕವಿತಾಂ/ಲೇಕನಾಂ ’ಮೊತಿಯಾಂ ಆನಿ ತಾರಾಂ’, ’ಸಾಗೊರಾಚ್ಯಾ ವಾಟೆಚ್ಯೊ ಝರಿ’, ’ಕವಿತಾಪಾಠ್’ ಆನಿ ’ದರ್ಯಾಕ್ ಉದಾಕ್’ ಬುಕಾಂನಿ ಪರ್ಗಟ್ಲ್ಯಾಂತ್. ಪಾಟ್ಲ್ಯಾ ದೋನ್ ವರ್ಸಾಂ ಥಾವ್ನ್ ದಾಯ್ಜ್.ಕೊಮ್ ಸಾಯ್ಟಿಚೊ ಸಹ-ಸಂಪಾದಕ್ಯೀ ಹೊ ಜಾವ್ನಾಸಾ.
ಭ್ರಮಿದೆಂತ್ಲ್ಯೊ ಸಾವ್ಳ್ಯೊ: ಏಕ್ ಸಾಮಾಜಿಕ್ ಕಾದಂಬರಿ, ಪ್ರಮುಖ್ ಜಾವ್ನ್ ತೆಗಾಂಚ್ಯಾ ತೀನ್ ರಿತಿಚಾ ಸಂಭಂಧಾಂಚೆ ಎಕಾಮೆಕಾಚೆ ಗಾಂಚ್ ಮ್ಹಣ್ಯೆತಾ. ವಾಚ್ಪ್ಯಾಂಕ್ ಸಿಂತಿಮೆಂತಾಂ, ಚಿಂತಾಪ್, ಭಗ್ಣಾಂ, ಉಮಾಳೆ ಜಾಗಂವ್ಕ್ ಜರೂರ್ ಸಕ್ತೆಲಿ ಮ್ಹಳ್ಳೊ ಮ್ಹಜೊ ಭರ್ವಸೊ.
ಹ್ಯೊ ಸಾವ್ಳ್ಯೊ ಭ್ರಮಿದೆಂತ್ಲ್ಯೊ!!
ಸಾವ್ಳ್ಯಾಂಚೆಂ ಆರಂಭ್
ಮ್ಯಾಂಚೆಸ್ಟರ್!
ರಾತಿಚ್ಯಾ ಹ್ಯಾ ವೆಳಾರ್ ರಂಗ್ ರಂಗೀನ್ ವೀಜ್ ದಿವ್ಯಾಂಚಾ ಸುಂರ್ಗರಾಯೆಂತ್
ಮ್ಯಾಂಚೆಸ್ಟರ್ ಬರೆಂಚ್ ಸೊಭ್ತಾಲೆಂ. ಮ್ಯಾಂಚೆಸ್ಟರಾಚೆಂ ರಾತಿಚೆಂ ಜೀವನ್ಚ್ ದುಸ್ರೆಂ!
ಹ್ಯಾ ರಾತಿಚ್ಯಾ ಜೀವನಾಕ್ ಆನಿ ದಿಸಾಚಾ ಜೀವಾನಾಕ್ ಭಿಲ್ಕುಲ್
ಸರಿ ಕರುಂಕ್ ಸಾದ್ಯ್ಚ್ ನಾತ್ಲ್ಲೆಂ. ತಶೆಂಚ್ ವಿವಿಯಾನಾಕ್ ಆನಿ...!
ಆಪ್ಲ್ಯಾ ಘರಾಚಾ ಜನೆಲಾ ಪಾಟ್ಲ್ಯಾನ್ ರಾವೊನ್ ಭಾಯ್ರ್ ಪಳಂವ್ಚ್ಯಾ ವಿವಿಯಾನಾಕ್ ತಾಣೆಂ
ಸದಾಂ ಪಳಂವ್ಚೊ ತೊ ಮ್ಯಾಕ್ಡೊನಾಲ್ಡಾಚೊ ವ್ಹಡ್ಲೊ ಜಾಹಿರಾತ್
ಬೋರ್ಡ್ ವೀಜ್ ದಿವ್ಯಾಂಚಾ ಉಜ್ವಾಡಾಂತ್ ಜಳ್ಚೊ ಸಾರ್ಕೊ
ದಿಸ್ತಾಲೊ. ತಾಚ್ಯಾ ದಾವ್ಯಾ ಕುಶಿಕ್ ವ್ಹಡ್ಲೊ ಸಯ್ತ್
ಫಿಲಿಪ್ಸ್ ಬ್ರ್ಯಾಂಡಾಚೊ ರಂಗೀನ್ ಬೋರ್ಡ್ ಝಗ್ಲಾಣ್ಯಾಪರಿಂ ಘಡಿಯೆಕ್ ಏಕ್
ಪಾವ್ಟಿಂ ಉದೆವ್ನ್ ಆಯಿಲ್ಲ್ಯಾಪರಿಂ ದಿಸ್ತಾಲೊ. ತ್ಯಾ ಭಾಯ್ರ್
ಹೆಂವ್ಶಿಂ ತೆವ್ಶಿಲೆ ಮ್ಯಾಂಚೆಸ್ಟರಾಕ್ ಉಜ್ವಾಡ್ ದಿಂವ್ಚೆಂ ರಂಗ್ ರಂಗೀನ್ ದಿವೆ!
ಸಗ್ಳೆಂ ಮ್ಯಾಂಚೆಸ್ಟರ್ಚ್ ಹ್ಯಾ ರಂಗೀನ್ ದಿವ್ಯಾಂಚಾ ಉಜ್ವಾಡಾಂತ್
ಸೊಭಿತ್ ಥರಾನ್ ಜಳ್ತಾಲೆಂ. ತಶೆಂಚ್ ವಿವಿಯಾನಾ!
ತ್ಯಾ ಕುಶಿನ್ ತೆಂ ಶ್ಹೆರ್ ಆಪ್ಲ್ಯಾ ರಾತಿಚ್ಯಾ ಸೊಭಾಯೆಕ್
ಪಾಂಗ್ರುನ್ ಜಳ್ತಾಲೆಂ ತರ್ ಹ್ಯಾ ಕುಶಿನ್ ವಿವಿಯಾನಾ ಆಪ್ಲ್ಯಾ ಜಿವಿತಾಂತ್
ಬುಡೊನ್ ಗೆಲ್ಲ್ಯಾ ದಿಸಾಕ್ ಚಿಂತುನ್ ಝಳ್ತಾಲೆಂ!
ದೊನ್ಯ್ ಕುಶಿಂನಿ ಉಜೊ!
ಏಕ್ ಸೊಭಾಯೆಕ್ ಲಾಗೊನ್ ಜಳ್ತಾ ಜಾಲ್ಯಾರ್ ಏಕ್ ಜಲ್ಮಾಲ್ಲ್ಯಾ ಖಾತಿರ್ ಜಳ್ತಾ!
ಸಗ್ಳೆಂ ಮ್ಯಾಂಚೆಸ್ಟರ್ ಶ್ಹೆರ್ ಆಪ್ಣೆಂ ಜಿಯೆಂವ್ಕ್ ಜಾಯ್ ಮ್ಹಳ್ಳ್ಯಾ ಖಾತಿರ್ ಜಿಯೆತಾಲೆಂ ಜಾಲ್ಯಾರ್ ವಿವಿಯಾನಾ
ಮಾತ್ರ್ ಆಪ್ಣೆಂ ಜಲ್ಮ್ ಘೆತ್ಲೆಲ್ಯಾ ಖಾತಿರ್ ಜಿಯೆತಾಲೆಂ! ಜೆದ್ನಾಂ
ಪಾಸೊನ್ ಚಾರ್ಲ್ಸ್ ತಾಚ್ಯಾ ಜಿವಿತಾಂತ್ ಯೇಂವ್ಕ್ ನಾತ್ಲ್ಲೊ ತೆದ್ನಾಂ
ಪಾಸೊನ್!
ವಿವಿಯಾನಾನ್ ಹ್ಯಾ ಸಂಸಾರಾಂತ್ ಧ್ವೇಶ್ ಕೆಲ್ಲೊ ಮ್ಹಳ್ಯಾರ್ ಫಕತ್ತ್ ಎಕಾಚ್ ಜಾತಿಚೊ. ಚಲ್ಯಾ ಜಾತಿಚೊ!
ಪುಣ್ ಚಾರ್ಲ್ಸ್......?
ವ್ಹಯ್!
ಚಾರ್ಲ್ಸ್! ಚಾರ್ಲ್ಸಾನ್ ವಿವಿಯಾನಾಚಾ ಜಿವಿತಾಕ್ಚ್ ಬದ್ಲುನ್
ಸೊಡ್ಲ್ಲೆಂ.
ಚಾರ್ಲ್ಸಾಚೊ ಉಡಾಸ್ ಯೇವ್ನ್ ವಿವಿಯಾನಾನ್ ತ್ಯಾ ಜನೆಲಾ ಥಾವ್ನ್ ಆಪ್ಲಿ
ದೀಶ್ಟ್ ಬಾಯ್ರ್ ವೆಲಿ. ತಾಚ್ಯಾ ದೊಳ್ಯಾಂ ಮುಕಾರ್ ತೆಂ ಚಾರ್ಲ್ಸಾಕ್ ಪಳಂವ್ಕ್ ಆಶೆಲೆಂ.
ಪುಣ್ ತಾಚ್ಯಾ ದೊಳ್ಯಾಂಕ್ ಚಾರ್ಲ್ಸ್ ದಿಸ್ಲೊ ನಾ. ದೊಳ್ಯಾಂಚಾ ಆಶೆಚಿ ಭುಕ್ ಥಾಂಬಾನಾಸ್ತಾನಾ
ವೆತಾನಾ ತಾಚ್ಯಾ ಮತಿಕ್ ಬೆಜಾರಾಯೆನ್ ವೆಡೊ ಮಾರ್ಲೊ. ತಾಣೆಂ ಆಪ್ಲ್ಯಾ ರಿಸ್ಟ್
ವಾಚಾಚೆರ್ ನದರ್ ಮಾರ್ಲಿ.
ತೆಂ ಹ್ಯಾ ವೆಳಾರ್ ವೊರಾಂ ಆಟ್ ಜಾವ್ನ್ ಚಾಳೀಸ್ ಮಿನುಟಾಂ ದಾಕಯ್ತಾಲೆಂ.
ಚಾರ್ಲ್ಸ್ ತಾಚ್ಯಾ ದೊಳ್ಯಾಂ ಮುಕಾರ್ ಪ್ರಸ್ತುತ್ ಜಾಂವ್ಕ್ ಅಜೂನ್
ವೀಸ್ ಮಿನುಟಾಂ ಬಾಕಿ ಆಸ್ಲ್ಲಿಂ. ಆಪ್ಲ್ಯಾ ದೊಳ್ಯಾಂಚಾ ಪಿಶ್ಯಾ ಆಶೆಕ್ ಚಿಂತುನ್ ತೆಂ ಆಪ್ಲ್ಯಾ
ಮತಿಂತ್ಚ್ ಹಾಸ್ಲೆಂ. ತಾಚ್ಯಾ ಪಾಟ್ಲ್ಯಾನ್ ವಿವಿಯಾನಾಚೊ
ಹಾತ್ ಸವ್ಕಾಸ್ ಆಪ್ಲ್ಯಾ ಪೊಟಾ ವಯ್ರ್ ಚರ್ಲೊ. ಥಂಯ್ಚರ್ ಎಕಾ
ನೆಣ್ತ್ಯಾ ಜಿವಾನ್ ಕಿರ್ಲೊನ್ ಯೆಂವ್ಚೊ ತಾಕಾ ಆನ್ಭೋಗ್ ಜಾಲೊ. ತೆಂ ತಶೆಂಚ್ ಆಪ್ಲ್ಯಾ
ಹಾತಾಕ್ ಆಪ್ಲ್ಯಾ ಪೊಟಾರ್ ದವರುನ್ ತ್ಯಾ ಗೋಡ್ ಆನ್ಭೋಗಾಕ್ ಭೊಗುಂಕ್
ಲಾಗ್ಲೆಂ.
ತಿತ್ಲೆಂಚ್!
ಎಕಾಚ್ಚ್ ಫರಾ ಅಚಾನಕ್ ಜಾವ್ನ್ ತಾಚ್ಯಾ ದೊಳ್ಯಾಂ ಮುಕಾರ್ ತಾಚ್ಯಾ ಆವಯ್ಚೆಂ ಆನಿ ತಾಚ್ಯಾ ಭಯ್ಣಿಚೆಂ ರೂಪ್ ಉದೆವ್ನ್ ರಾವ್ಲೆಂ.
ದೊಗಾಂಯ್ಚಿಂ ಅಸ್ಪಶ್ಟ್ ರುಪಾಂ! ಗಯ್ರಿಂ ಗಯ್ರಿಂ! ಆಪ್ಣಾಕ್
ಹ್ಯಾ ಸಂಸಾರಾಂತ್ ಎಕ್ಸುರಿಂ ಕರುನ್ ಗೆಲ್ಲಿಂ ರುಪಾಂ!
ತಿತ್ಲ್ಯಾರ್!
ವಿವಿಯಾನಾಕ್ ಆಪ್ಲ್ಯಾ ಪೊಟಾ ಭಿತರ್ಲ್ಯಾ ಜಿವಾನ್ ಹಾಸ್ಲ್ಲ್ಯಾ
ಪರಿಂ ಜಾಲೆಂ. ತೆಂ ತ್ಯಾ ಹಾಸ್ಯಾಂಕ್ ಆಯ್ಕೊಂಕ್ ಆಂವ್ಡೆಲೆಂ. ಹ್ಯಾ
ಹಾಸ್ಯಾಂ ಥಾವ್ನ್ ತೆಂ ಆಪ್ಲ್ಯಾ ಆವಯ್ಕ್ ಆನಿ ಆಪ್ಲ್ಯಾ ಭಯ್ಣಿಕ್
ವಿಸ್ರೊಂಕ್ ಆಶೆಲೆಂ. ಆಪುಣ್ ಎಕ್ಸುರಿಂ ನ್ಹಂಯ್ ಮ್ಹಣೊನ್
ಹ್ಯಾ ಸಂಸಾರಾಕ್ ತೆಂ ಸಾಂಗೊಂಕ್ ಆಶೆಲೆಂ.
ಪುಣ್.......!
ಮಂಗ್ಳುರ್!
ಜೆರೊಮ್ ದೆ’ಕೋಸ್ತಾಚ್ಯಾ ಘರಾಂತ್ ಎಕಾ ರಿತಿಚೆಂ ವಿಚಿತ್ರ್ ಮೌನ್ ರಾಜ್ ಕರ್ತಾಲೆಂ. ತಾಚ್ಯಾ ಘರಾಂತ್
ಸುಮಾರ್ ತೆಂಪಾ ಉಪ್ರಾಂತ್ ಆಜ್ ಮನ್ಶ್ಯಾಂ ಆಸೊನ್ಯ್ ಕೊಣ್ಚ್
ನಾ ಮ್ಹಳ್ಳ್ಯಾಪರಿಂ ಜಾಲ್ಲೆಂ. ಜೆರೊಮಾಚಾ ಘರಾಕ್ ಘರ್
ಮ್ಹಣ್ಚ್ಯಾಕ್ಯ್ ತಾಕಾ ಬೊಂಗ್ಲೊ ಮ್ಹಣೊನ್ ವೊಲಾವ್ಯೆತ್. ಜಲ್ಮಾನ್ ತೊ
ಪಯ್ಲೊ ಭಾಟ್ಕಾರ್! ತ್ಯಾ ಉಪ್ರಾಂತ್ ಘಟಾಗಾರ್! ತ್ಯಾ ಉಪ್ರಾಂತ್......?
ಬೆಂದೂರ್ ಫಿರ್ಗಜೆಂತ್ ತಾಕಾ ತಾಚೆಂ ಮ್ಹಳ್ಳೆಂ ಏಕ್ ನಾಂವ್ ಆಸ್ಲ್ಲೆಂ.
ಹ್ಯಾ ನಾಂವಾಕ್ ತಾಣೆಂ ವಾಡಂವ್ಚ್ಯಾಂತ್ ವರ್ತಿ ಮ್ಹಿನತ್ ಕಾಡ್ಲ್ಯಾ. ತಾಚ್ಯಾ
ಮ್ಹಿನತೆಚೊ ಫಳ್ ಜಾವ್ನ್ ತ್ಯಾ ಪಯ್ಶಿಲ್ಯಾ ಒಮ್ಜೂರಾಂತ್ಲಿಂ ತಾಚಿಂ ಭಾಟಾಂ ಆನಿ
ಶೆತಾಂ ತಾಣೆಂ ತಾಚ್ಯಾ ಪೂರ್ವಜಾಂ ಥಾವ್ನ್ ಆಯೆರ್ ಜಾವ್ನ್ ಘೆತ್ಲೆಲಿಂ ತಿ
ಹ್ಯಾ ವಗ್ತಾರ್ ಫುಲೊನ್ ರಾವ್ಲ್ಲಿ ಸಾಕ್ಸ್.
ಪೂಣ್ ಆಜ್.......?
ಆಜ್ ತಾಚ್ಯಾ ಬೊಂಗ್ಲ್ಯಾ ಭಾಯ್ರ್ ಶಿರಾಂಧಾರಿಚೊ ಪಾವ್ಸ್
ವೊತ್ತಾಲೊ. ಜೆರೊಮಾಕ್ ಆಜ್ ಆಪ್ಲ್ಯಾ ಘರಾಂತ್ ಎಕಾ ಘಡಿಯೆಕ್ ಜಾಲ್ಯಾರ್ಯ್
ಬಸೊಂಕ್ ಮನ್ ಆಯ್ಲೆಂ ನಾ. ತೊ ತ್ಯಾ ತಾಚ್ಯಾ ಘರಾಚ್ಯಾ
ವಿಶಾಲ್ ಉಭಾರ್ ಸೊಫ್ಯಾರ್ ಹೆವ್ಶಿಂ ತೆವ್ಶಿಂ ಭೊಂವ್ತಾಲೊ. ತಾಚ್ಯಾ ಜಿವಾಂತ್ ಕಸಲೊಗೀ ಎಕಾ ಥರಾಚೊ ಆತ್ರೆಗ್ ಆಸ್ಲ್ಲೊ.
ಹ್ಯಾ ಆತ್ರೆಗಾನ್ ತೊ ಘಡ್ಯೆ ಘಡಿಯೆ ಆಪ್ಲ್ಯಾ ಬೊಂಗ್ಲ್ಯಾಕ್ ಯೇಂವ್ಕ್ ಆಸಾ ಕೆಲ್ಲ್ಯಾ ತ್ಯಾ
ಮುಕ್ಲ್ಯಾ ವಡ್ಲ್ಯಾ ಗೇಟಿಕ್ಚ್ ಪಳೆತಾಲೊ. ಜಶೆಂ ತಾಕಾ
ಹ್ಯಾ ಶಿರಾಂಧಾರಿ ವೊತ್ಚ್ಯಾ ಪಾವ್ಸಾಂತ್ ಕೊಣಾಚಿಗೀ ರಾಕೊನ್ ಆಸಾ
ಮ್ಹಳ್ಳ್ಯಾಪರಿಂ!
ವ್ಹಯ್! ಜೆರೊಮಾಕ್ ಆಜ್ ರಾಕೊನ್ ಆಸ್ಲ್ಲಿ.
ಪುಣ್ ತಾಚ್ಯಾ ಹ್ಯಾ ರಾಕೊಣೆಕ್ ಆಜ್ ಹೊ ಪಾವ್ಸ್ ತಾಕಾ ಸಾಂಗಾತ್
ದೀನಾ ಮ್ಹಳ್ಳ್ಯಾಪರಿಂ ತಾಕಾ ದಿಸ್ತಾಲೆಂ. ಹ್ಯಾ ಪಾವ್ಸಾ
ವರ್ವಿಂ ಆಜ್ ತಾಚಿ ದೀಶ್ಟ್ಯ್ ತ್ಯಾ ತಾಚ್ಯಾ ಬೊಂಗ್ಲ್ಯಾಚಾ ಗೇಟಿಕ್
ಸೊಡುನ್ ಚಡ್ ಪಯ್ಸ್ ಪಾಸೊನ್ ವಚೊಂಕ್ ಸಕಾನಾತ್ಲ್ಲಿ. ತ್ಯಾ ಭಾಯ್ರ್ ತ್ಯಾ
ಪಾವ್ಸಾ ಸಾಂಗಾತಾ ಮಾರ್ಚೊ ಘಡ್ಗಡೊ ಆನಿ ಜಗ್ಲಾಣೆಂ!
ತಿತ್ಲ್ಯಾರ್!
ಏಕ್ ಅಂಬಾಸಿಡರ್ ಕಾರ್ ತಾಚ್ಯಾ ಬೊಂಗ್ಲ್ಯಾಚಾ ಮುಕ್ಲ್ಯಾ ರಸ್ತಾನ್ ಯೆಂವ್ಚೆಂ ಜೆರೊಮಾಕ್
ದಿಸ್ಲೆಂ.
ತಿತ್ಲೆಂಚ್!
"ಎಸ್ತೆಲಾ.....?" ಜೆರೊಮಾನ್ ಆಪ್ಲ್ಯಾ ಬಾಯ್ಲೆಕ್ ಕಸಲ್ಯಾಗೀ ಉದ್ವೇಗಾನ್
ಮ್ಹಳ್ಳ್ಯಾಪರಿಂ ಉಲೊ ಮಾರ್ಲೊ.
ತ್ಯಾ ಯೆಂವ್ಚ್ಯಾ ಕಾರಾಕ್ ತೊ ಆಪ್ಲ್ಯಾ ಬೊಂಗ್ಲ್ಯಾಚಾ ಗೇಟಿ
ಮುಕಾರ್ ಥಾಂಬೊಂಕ್ ಆಶೆಲೊ. ಥಾಂಬ್ಲೆಲ್ಯಾ ಕಾರಾ ಥಾವ್ನ್ ದೆಂವ್ಚ್ಯಾ ಆಪ್ಲ್ಯಾ
ದಿಶ್ಟೆಚ್ಯಾ ರಾಕೊಣೆಕ್ ತೊ ವೆಂಗುಂಕ್ ಆಂವ್ಡೆಲೊ. ಆಪ್ಲ್ಯಾ ಫುಡಾರಾಚೊ ಭರ್ವಸೊ ತಾಚ್ಯಾ ದೊಳ್ಯಾಂ
ಮುಕಾರ್ ತ್ಯಾ ಕಾರಾರ್ ಬಸೊನ್ ಯೆತಾ ಮ್ಹಳ್ಳ್ಯಾಪರಿಂ ತಾಕಾ
ದಿಸ್ಲೆಂ. ತಾಚ್ಯೆ ಸವೆಂ ಎದೊಳ್ಚ್ ತಾಣೆಂ ತಯಾರ್ ಕರುನ್ ದವರ್ಲ್ಲ್ಯಾ ತ್ಯಾ
ಸತ್ರೆಕ್ ತಾಣೆಂ ಹಾತಿಂ ಘೆತ್ಲೆಂ. ವೆವೆಗ್ಗಿಂ ತೊ ಸತ್ರಿ ಸೊಡವ್ನ್ ಭಾಯ್ರ್ ಜಾಲಾಕ್ ದೆಂವ್ಲೊ. ಆನಿ ಕಸಲ್ಯಾಗೀ ವಿಚಿತ್ರ್
ಸಕ್ತೆನ್ ಮ್ಹಳ್ಳ್ಯಾಪರಿಂ ಮುಕ್ಲ್ಯಾ ಗೆಟಿ ತೆವ್ಶಿಂ ಧಾಂವೊಂಕ್
ಲಾಗ್ಲೊ.
ಪೂಣ್.....!
ನಾಗ್ಪುರ್!
ಶಬೀರ್ ಅಹ್ಮದ್ ಆಪ್ಲ್ಯಾ ಘರಾಂತ್ ಖಂತೀಶ್ಟ್ ಜಾವ್ನ್ ಬಸ್ಲ್ಲೊ. ಥೊಡ್ಯಾಚ್
ದಿಸಾಂ ಪಯ್ಲೆಂ ತಾಚೊ ಬಾಪಯ್ ಉಮರ್ ಆರ್ಶದ್ ಖುದಾಕ್
ಮೊಗಾಚೊ ಜಾವ್ನ್ ಹ್ಯಾ ಸಂಸಾರಾಕ್ ಸಾಂಡುನ್ ಗೆಲ್ಲೊ. ಉಮರಾಚೆಂ ಘರಾಣೆಂ ಕಾಂಯ್
ವ್ಹಡ್ಲೆಂ ಘರಾಣೆಂ ನ್ಹಂಯ್! ಉಮರಾಚಿ ಜೋಡ್ ಫಕತ್ತ್ ತಾಚೆಂ ಜಿವಿತ್
ಸಾರುಂಕ್ ಪಾವ್ತಾ ತಿತ್ಲಿಚ್. ತ್ಯಾ ಭಾಯ್ರ್ ತಾಚ್ಯೆಲಾಗಿಂ ಕಾಂಯ್
ನಾತ್ಲ್ಲೆಂ. ಪುಣ್ ಆಪ್ಣೆಂ ಜೊಡ್ಲೆಲ್ಯಾಂತ್ ಉರವ್ನ್ ಕಶ್ಟಾಂನಿ
ಮ್ಹಳ್ಳ್ಯಾಪರಿಂ ತಾಣೆಂ ಆಪ್ಲ್ಯಾ ಪುತಾಕ್ ಶಬೀರಾಕ್ ಶಿಕಾಪ್ ದಿಂವ್ಚ್ಯಾಂತ್ ಕಾಂಯ್ಚ್ ಉಣೆಂಪಣ್ ಕೆಲ್ಲೆಂ
ನಾ. ಆಪ್ಣಾಚಿ ಗತ್ ಆಪ್ಲ್ಯಾ ಪುತಾಕ್ ಯೆಂವ್ಕ್ ನಜೊ. ಆಪ್ಲೊ
ಪೂತ್ ಆಪ್ಲ್ಯಾ ಸಮಾಜೆಂತ್ ಏಕ್ ನಾಂವಾಡ್ದೀಕ್ ವ್ಯಕ್ತಿ ಜಾಂವ್ಕ್ ಜಾಯ್ ಮ್ಹಳ್ಳೊ ಉಮರಾಚೊ ಆಶಯ್ ಜಾವ್ನ್ ಆಸ್ಲ್ಲೊ.
ಹ್ಯಾಚ್ ಖಾತಿರ್ ತಾಣೆಂ ಆಪ್ಣಾ ಥಾವ್ನ್ ಆಪ್ಲ್ಯಾ ಪುತಾಕ್ ಭಾಂಗಾರ್ ದುಡು ಆಸ್ತ್ ಆಯೆರ್ ಜಾವ್ನ್
ದೀಂವ್ಕ್ ಆಪ್ಣಾ ಥಾವ್ನ್ ಸಾಧ್ಯ್ ನಾ ಮ್ಹಣೊನ್ ಜಾಣಾಂ ಆಸೊನ್ ಆಪ್ಲ್ಯಾ
ಪುತಾಕ್ ತಾಣೆಂ ಬರೆಂ ಶಿಕಾಪ್ ದಿಲ್ಲೆಂ.
"ಪಳೆ ಪುತಾ! ಶಿಕಾಪ್ ಮಾಡಾಮುಳಾಂತ್ ಪುರುನ್ ದವರ್ಲೆಲೆಂ ದಿರ್ವೆಂ. ಜಿತ್ಲೆಂ ತುಂ ಹ್ಯಾ ಮಾಡಾಮುಳಾಕ್ ಉಸ್ತುನ್ ಈಟ್ ಘಾಲ್ತಾಯ್ ತಿತ್ಲೊ ತುಕಾ ಫಳ್ ಲಾಭ್ತಲೊ! ಹ್ಯಾಚ್ ತುಜ್ಯಾ ಶಿಕ್ಪಾ ಥಾವ್ನ್ ತುವೆಂ ಏಕ್ ದೀಸ್ ಹ್ಯಾ ಸಮಾಜೆಂತ್ಲೊ ವ್ಹಡ್ಲೊ ಮನಿಸ್ ಜಾಂವ್ಕ್ ಜಾಯ್. ತುವೆಂ ತುಜೆಂ ನಾಂವ್ ದವರುಂಕ್ ಜಾಯ್!" ಉಮರ್ ಆಪ್ಲ್ಯಾ ಪುತಾಕ್ ಶಬೀರಾಕ್ ಕೆದಾಳಾಯ್ ಸಾಂಗ್ತಾಲೊ.
ಬಾಪಾಯ್ನ್ ಶಬೀರಾಕ್ ಶಿಕಾಪ್ ದಿಲ್ಲೆಂ. ಪುಣ್ ಹೆಂ ಶಿಕಾಪ್ ತಾಕಾ ತಾಚ್ಯಾ ನಾಗ್ಪುರಾಂತ್ ರಾವೊನ್ ಬರೆಂ ಜಿವಿತ್ ಜೊಡುನ್ ದೀಂವ್ಕ್ ಸಕ್ತಾ ಮ್ಹಳ್ಳೊ ಭರ್ವಸೊ ಶಬೀರಾಕ್ ನಾತ್ಲ್ಲೊ. ಹ್ಯಾ ಖಾತಿರ್ ತಾಣೆ ಆಪ್ಲೊ ಗಾಂವ್ ಸೊಡುಂಕ್ ಜಾಯ್ ಆಸ್ಲ್ಲೊ.
ಆಪ್ಣೆ ಗಾಂವ್ ಸೊಡುಂಕ್ ಜಾಯ್ ಜಾಲ್ಯಾರ್ ಆಪ್ಣಾ ಬರಾಬರ್ ಆಪ್ಲ್ಯಾ ಬಾಯ್ಲೆಕ್ ಆಪ್ಲ್ಯಾ ಆವಯ್ಕ್ ಸಾಂಗಾತಾ ಘೆವ್ನ್ ವಚೊಂಕ್ ಜಾಯ್! ಬಾಪಯ್ ಹ್ಯಾ ಸಂಸಾರಾಕ್ ಅಂತರ್ಲ್ಯಾ ಉಪ್ರಾಂತ್ ಆಪ್ಣಾಕ್ ಆಸ್ಚಿಂ ಮ್ಹಳ್ಯಾರ್ ಫಕತ್ತ್ ಆಪ್ಲಿ ಆವಯ್ ಆನಿ ಆಪ್ಲಿ ಬಾಯ್ಲ್! ಹ್ಯಾ ದೊಗಾಂಯ್ಕ್ಯ್ ಘೆವ್ನ್ ಹಾಂವೆ ಮ್ಹಜೊ ಗಾಂವ್ ಸೊಡ್ಲೊ ಜಾಲ್ಯಾರ್ ಉಪ್ರಾಂತ್ ಹೊ ಮ್ಹಜ್ಯಾ ಪುರ್ವಜ್ಯಾಂನಿ ಘನಾನ್ ಜಿಯೆಲ್ಲೊ ಗಾಂವ್ ಮ್ಹಾಕಾ ಪರ್ಗಾಂವ್ ಜಾತಲೊ. ತ್ಯಾ ಉಪ್ರಾಂತ್ ಹಾಂವ್ ಹ್ಯಾ ಮ್ಹಜ್ಯಾ ಗಾಂವಾಕ್ ಪಾಟಿಂ ಯೇಂವ್ಕ್ ಸಕ್ತಲೊಂ? ತ್ಯಾ ಭಾಯ್ರ್ ಆಪ್ಲಿ ಬಾಯ್ಲ್ ಫುಡ್ಲದ್ ಗುರ್ವಾರ್! ಹ್ಯಾ ಪರಿಸ್ಥಿತೆಂತ್ ಹಾಂವ್ ತಿಕಾ ತ್ಯಾ ಪರ್ಗಾವಾಂತ್ ಸುಖ್ ದೀಂವ್ಕ್ ಸಕ್ತಲೊಂ......? ಮ್ಹಜ್ಯಾ ಬಾಪಾಯ್ಚಾ ಸಪ್ಣಾಕ್ ಹಾಂವ್ ಸಾಕಾರ್ ಕರುಂಕ್ ಸಕ್ತಲೊಂ? ಶಬೀರಾಚಾ ಮತಿಂತ್ ಸವಾಲಾಂ ಉಟ್ತಾಲಿಂ.
ಶಬೀರಾನ್ ಆತಾಂ ಏಕ್ ವಿಂಚವ್ಣ್ ಕರುಂಕ್ ಆಸ್ಲ್ಲಿ. ಆನಿ ತೊ ತಾಚ್ಯಾ ಫುಡಾರಾಚ್ಯಾ ವಿಂಚವ್ಣೆಕ್ ತಯಾರ್ ಜಾಲೊ!
ಪುಣ್.......!
ಮುಂಬಯಿ!
ಜೇನಾಕ್ ಮುಂಬಯಿಚಿ ಸಯ್ರಿಕ್ ಯೆತಾನಾ ಜೇನ್ ಮಸ್ತ್ ಖುಶಿಯೆಂತ್ ಭರ್ಲೆಂ. ತಾಕಾ ಜಾಂವ್ಚೊ
ನೊವ್ರೊ ಪೀಟರ್ ಕ್ಯಾಸ್ತೆಲಿನೋ ಮುಂಬಯಿಂತ್ ವ್ಹಡ್ಲೊ ಬಿಜ್ನೆಸ್ಮ್ಯಾನ್. ಜೇನಾಕ್ ಎಕಾ
ವಾಟೆನ್ ಮುಂಬಯಿ ವೆಚಿ ಖುಶಿ ಜಾಲ್ಯಾರ್ ದುಸ್ರ್ಯಾ ಕುಶಿನ್ ಆಪ್ಲ್ಯಾ ಆಂಕ್ವಾರ್ಪಣಾಕ್
ಸಾಂಡುನ್ ಕಾಜಾರಿ ಭೆಸಾಕ್ ಪಾಂಯ್ ದವರ್ಚೊ ಸಂತೊಸ್. ಕಾಜಾರಾಕ್ ಆಯ್ತೆಂ ಜಾಂವ್ಚ್ಯಾ
ಹರ್ಯೆಕಾ ಚಲಿಯೆಚಾ ಕಾಳ್ಜಾಂತ್ ಉಟೊನ್ ಯೆಂವ್ಚ್ಯಾ
ಸಪ್ಣಾಂ ಪರಿಂ ಜೇನ್ ಆಪ್ಲ್ಯಾ ಸಪ್ಣಾಂಕ್ ಘೆವ್ನ್ ಆಪ್ಲ್ಯಾ ಕಾಜಾರಾಕ್ ಆಯ್ತೆಂ ಜಾಲ್ಲೆಂ. ಜೇನ್
ಮುಂಬಯಿಚ್ಯಾ ತಾಕಾ ಜಾಂವ್ಕ್ ಆಸ್ಚ್ಯಾ ನೊವ್ರ್ಯಾಚಾ ಆಸ್ತಿಚೆರ್ ಕಾಂಯ್ ಆಶೆವ್ನ್
ನಾತ್ಲ್ಲೆಂ. ಆಸ್ತೆಂತ್ ಆನಿ ಅಂತಸ್ತೆಂತ್ ತಾಚೊ ಬಾಪಯ್ ಕಾಂಯ್ ಉಣೊ
ನಾತ್ಲ್ಲೊ. ಪುಣ್ ಆಪುಣ್ ಕಾಜಾರ್ ಜಾವ್ನ್ ಮುಂಬಯಿ
ವೆತಾಂ ಮ್ಹಣ್ತಾನಾ ಆನಿ ಆಪ್ಲೊ ಘೊವ್ ಮುಂಬಯಿ ಬಿಜ್ನೆಸ್ ಕರ್ತಾ
ಮ್ಹಣ್ತಾನಾ ತಾಕಾ ತಾಚ್ಯಾ ಕಾಜಾರಾಂತ್ ಎಕಾ ಥರಾಚಿ ವಿಶೇಸ್ ಉರ್ಭಾ ಉದೆಲ್ಲಿ. ತ್ಯಾ ವೆಳಾರ್
ಮುಂಬಯಿ ವೆಚೆಂ ಮ್ಹಳ್ಯಾರ್ ಆಪ್ಲೊ ದೇಶ್ ಸಾಂಡುನ್
ವೆಚೆಂ ಮ್ಹಳ್ಳ್ಯಾಪರಿಂ!
ಪೀಟರಾಲಾಗಿಂ ಕಾಜಾರ್ ಜಾವ್ನ್ ಮುಂಬಯಿ ಆಯಿಲ್ಲೆಂ ಜೇನ್ ಮುಂಬಯಿಚ್ಯಾ ಶ್ಹೆರಾಕ್ ಪಳವ್ನ್ ವಿಜ್ಮಿತ್ ಜಾಲ್ಲೆಂ. ತ್ಯಾ ಭಾಯ್ರ್ ತಾಚ್ಯಾ ಘೊವಾಚ್ಯಾ ಬಿಜ್ನೆಸಾಕ್ ಪಳವ್ನ್! ಪೀಟರ್ ಜಲ್ಮಾ ಥಾವ್ನ್ ಬಿಜ್ನೆಸ್ಮ್ಯಾನ್! ತೊ ಹರ್ಯೆಕಾ ಸಂಗ್ತೆಕ್ಯ್ ಬಿಜ್ನೆಸಾಚ್ಯಾ ನದ್ರೆನ್ಚ್ ಪಳೆತಾಲೊ. ಮುಂಬಯಿಂತ್ ಆಪ್ಲೊ ಬಿಜ್ನೆಸ್ ಸಾಮ್ರಾಜ್ಯ್ ಸ್ಥಾಪನ್ ಕರ್ಚಿ ತಾಚಿ ಏಕ್ಚ್ ಭುಕ್! ಹ್ಯಾ ಭುಕೆಕ್ ಲಾಗೊನ್ ತೊ ಆಪ್ಲ್ಯಾ ಘರಾಕ್ ಆಪ್ಲ್ಯಾ ಬಾಯ್ಲೆಕ್ ಪಾಸೊನ್ ವಿಸ್ರಾತಾಲೊ.
ಕಾಜಾರ್ ಜಾವ್ನ್ ಮುಂಬಯಿ ಆಯಿಲ್ಲ್ಯಾ ಜೇನಾಚೆ ತಾಚ್ಯಾ ಕಾಜಾರಾಚೆ ಪಯ್ಲೆ ಪಯ್ಲೆ ದೀಸ್ ಬರ್ಯಾ ಥರಾನ್ ಗೆಲೆ ಜಾಲ್ಯಾರ್ಯ್ ಉಪ್ರಾಂತ್ಲೆ ದೀಸ್ ತಾಣೆಂ ಚಿಂತ್ಲ್ಲ್ಯಾ ಪರಿಂ ಚಮ್ಕಾಲೆ ನಾಂತ್. ಬಿಜ್ನೆಸಾಕ್ ಲಾಗೊನ್ ಆಪ್ಣಾಚೊ ಘೊವ್ ಮುಂಬಯಿ ಥಾವ್ನ್ ಭಾಯ್ರ್ ಆಸ್ತಾನಾ ಜೇನ್ ಆಪ್ಲ್ಯಾ ಘರಾ ಎಕ್ಸುರೆಂ ಜಾಲೆಂ. ಹ್ಯಾ ಖಾತಿರ್ ಹ್ಯಾ ಮುಂಬಯಿಂತ್ ತಾಚಿ ಇಶ್ಟಾಗತ್ ವಾಡ್ಲಿ.
ಬಿಜ್ನೆಸ್ಮ್ಯಾನಾಚಿ ಬಾಯ್ಲ್ ಮ್ಹಣ್ತಾನಾ ಆತಾಂ ಜೇನಾಚೊ ಸಂಸಾರ್ ಸವ್ಕಾಸ್ ಬದ್ಲೊಂಕ್ ಲಾಗ್ಲೊ. ದಿಸಾಂದೀಸ್ ವಾಡೊನ್ ವೆಚ್ಯಾ ತಾಚ್ಯಾ ಇಶ್ಟಾಗತೆನ್ ತಾಕಾ ಆಪ್ಲ್ಯಾ ಘರಾ ಥಾವ್ನ್ ಭಾಯ್ರ್ ದವರ್ಲೆಂ. ಹ್ಯಾ ದಿಸಾಂನಿ ತೆಂ ಪಯ್ಲ್ಯಾಪಣಾಕ್ ಗುರ್ವಾರ್ ಜಾಲ್ಲೆಂ.
ಜೇನ್ ಆನಿ ಪೀಟರಾಚಾ ಕಾಜಾರಾಚಿ ಸಾಕ್ಸ್ ಜಾವ್ನ್ ಜೇನ್ ವರ್ಸಾನ್ಚ್ ಬಾಳಾಂತ್ ಜಾಲೆಂ. ಹ್ಯಾ ಉಪ್ರಾಂತ್ ಜೇನಾಕ್ ಗುರ್ವಾರ್ ಜಾಂವ್ಚೆಂ ಮನ್ ಜಾಲೆಂ ನಾ. ತೆಂ ತಾಚ್ಯಾ ಸಂಸಾರಾಂತ್ಚ್ ಮೆತೆರ್ ಜಾಲೆಂ. ಜೇನಾಚಾ ಭುರ್ಗ್ಯಾಕ್ ಘರ್ಕಾಮಾಚೆಂ ಪೊಸ್ತಾಲೆಂ. ಜೇನ್ ರಾತ್ ರಾತ್ ಭರ್ ಘರಾ ಭಾಯ್ರ್ ಆಸ್ತಾಲೆಂ ಹ್ಯಾ ವೆಳಾರ್ ತೆಂ ಸಗ್ಳ್ಯಾ ಸವಯಾಂಚೆಂ ಗುಲಾಮ್ ಜಾಲೆಂ.
ಹಾಂಗಾ ಥಾವ್ನ್ ತಾಂಚೆಂ ಘರ್ ಮ್ಹಳ್ಳೆಂ ತೆಂ ಝುಜಾಚೆಂ ಮಯ್ದಾನ್ ಜಾಂವ್ಕ್
ಪಾವ್ಲೆಂ. ಘೊವಾ ಬಾಯ್ಲೆ ಮಧೆಂ ದಿಸಾಂದೀಸ್ ಝಗ್ಡೆಂ ಚಲ್ತಾಲೆಂ. ಘರಾಂತ್
ಸಮಾಧಾನ್ ಮೆಳಾನಾಸ್ತಾನಾ ವೆತಾನಾ ಜೇನ್ ಘರ್ಚ್ಯಾ
ಸಮಾಧಾನೆಕ್ ಭಾಯ್ರ್ ಸೊಧುಂಕ್ ಲಾಗ್ಲೆಂ. ಘರ್ಚ್ಯಾ
ಸಮಾಧಾನೆಕ್ ಭಾಯ್ರ್ ಸೊಧ್ಚ್ಯಾ ವಾಟೆರ್ ತೆಂ ಆಪ್ಲ್ಯಾ ಘೊವಾಕ್ ಆನಿ ಆಪ್ಲ್ಯಾ ಭುರ್ಗ್ಯಾಕ್ಚ್
ವಿಸ್ರಾಲೆಂ. ಹ್ಯಾ ವಿಸ್ರೊಣೆಂತ್ ಜೇನ್ ಆಪ್ಲೆಂ ಸುಖ್ ಆಶೆಲೆಂ.
ಪುಣ್......!
ಮ್ಯಾಂಚೆಸ್ಟರಾ ಥಾವ್ನ್ ಮಂಗ್ಳುರಾಕ್, ಮಂಗ್ಳುರಾ ಥಾವ್ನ್
ಮುಂಬಯಿಕ್!
ನಾಗ್ಪುರಾ ಥಾವ್ನ್ ಮುಂಬಯಿಕ್, ಮುಂಬಯಿ ಥಾವ್ನ್ ಬಾಲಿವುಡಾಕ್!
ಜಲ್ಮಾ ಥಾವ್ನ್ ಮರ್ಣಾ ಪರ್ಯಾಂತ್ ದೊಗಾಂ ಚಲಿಯಾಂಚೆಂ
ಪಯ್ಣ್!
ಹ್ಯಾ ಪಯ್ಣಾಂತ್ ಹಿ ವಾಸ್ತವೀಕ್ ಸಮಾಜ್, ಹ್ಯಾ ಸಮಾಜೆಂತ್ಲ್ಯೊ ರಿತಿ ರಿವಾಜಿ, ಕಾಳ್ಜಾಂತ್ಲಿ ಆಶಾ, ಜಲ್ಮಾ ಥಾವ್ನ್ ಆಯಿಲ್ಲೆಂ ಚಲಿಯೆಪಣ್,
ನಾಜೂಕ್ ಭಗ್ಣಾಂ, ಜಿಯೆಂವ್ಚೆ ವಿಚಾರ್, ಆನಿ ಆಪ್ಲ್ಯಾ ವಿಚಾರಾಂ
ಸವೆಂ ಜಿಯೆಂವ್ಚ್ಯಾ ಖಾತಿರ್ ಆಪ್ಣಾಯಿಲ್ಲೆಂ ಝುಜ್! ಹ್ಯಾ ಝುಜಾ ಉಪ್ರಾಂತ್
ನಿಮಾಣಿ ಝಡ್ತಿ!
ಗ್ರೇಸ್ತ್ಕಾಯೆಂತ್ ಕಾಂಯ್ಚ್ ಉಣೆಂ ನಾತ್ಲೆಲಿಂ ಸೊಭಾಯೆಂತ್ ಉಮಾಳುನ್
ವೊತ್ಚಿಂ ’ಮಿಶೇಲ್’ ಆನಿ ’ಆಲಿಯಾ’ ಆಪ್ಲ್ಯಾ ಜಿವಿತಾಚ್ಯಾ ಪಯ್ಣಾಂತ್ ತ್ಯಾ ಉಜ್ವಳ್ಚ್ಯಾ
ಶ್ಹೆರಾಂತ್ ಜಲ್ಮೊನ್, ಹ್ಯಾ ಸಮಾಜೆಂತ್ಲ್ಯಾ ವಿಚಾರಾಂನಿ
ಮೊಳುನ್, ಆಪಾಪ್ಲ್ಯಾ ನಶೀಬಾಕ್ ಘೆವ್ನ್ ತ್ಯಾ ಬಾಲಿವುಡಾಚಾ
ಮಿರ್ಮಿರಾಂವ್ಚ್ಯಾ ಗ್ಲಾಮರ್, ಪಯ್ಶೆ, ನಾಂವ್ ಜೊಡ್ಚ್ಯಾ
ಸೆಲೆಬ್ರಿಟಿಂಚಾ ರಂಗ್ ರಂಗೀನ್ ಪರ್ದ್ಯಾ ಪಾಸೊನ್ ಸಾರ್ಚೆಂ
ಪಯ್ಣ್!
ಹ್ಯಾ ಪಯ್ಣಾಂತ್ ಜಲ್ಮ್, ಸಮಾಜ್, ವಿಚಾರ್, ಆನಿ ಝುಜ್ ಆಸಾ!
ಝುಜ್ ಜಯ್ತಾಚೆಂ ಆನಿ ಸಲ್ವಣೆಚೆಂ!
ಎಕ್ಲ್ಯಾಚಾ ಜಯ್ತಾಚೆಂ ಆನಿ ಎಕ್ಲ್ಯಾಚಾ ಸಲ್ವಣೆಚೆಂ!
ಹೆಂ ಇತ್ಯರ್ಥ್ ಕರುಂಕ್ಚ್ ಮ್ಹಣೊನ್ ಜಲ್ಮಾಲ್ಲೊ ರಾಯನ್! ಆಲ್ಫ್ರೆಡ್ ರಾಯನ್! ಜಲ್ಮಾ ಥಾವ್ನ್ ಬಿಜ್ನೆಸ್ಮ್ಯಾನ್! ಜಿವಿತಾಂತ್ಲ್ಯಾ
ಹರ್ಯೆಕಾ ಸಂಗ್ತೆಕ್ಯ್ ಆಪ್ಲ್ಯಾ ಬಿಜ್ನೆಸಾಚಾ ನದ್ರೆನ್ ತುಕುನ್ ಪಳಂವ್ಚೊ! ಆಪುಣ್ ಜಿಕೊಂಕ್ಚ್
ಮ್ಹಣೊನ್ ಜಲ್ಮಾಲ್ಲೊ!
ಹ್ಯಾ ತೆಗಾಂ ಭಾಯ್ರ್! ಹೊ ಭೃಮಿದ್ ಮ್ಹಳ್ಳೊ ಸಂಸಾರ್!
- ಮೆಲ್ವಿನ್ ಜೆ. ವಾಸ್ ಕೆಲರಾಯ್/ಕುವೇಯ್ಟ್
ಪಯ್ಲೊ ಭಾಗ್: ಜಿವಿತ್ ತುಕಾ ಆಪಯ್ತಾ
ಅವಸ್ವರ್ - 1: ಮಿಶೇಲ್
ಅವಸ್ವರ್ - 2: ಆಲಿಯಾ
ಅವಸ್ವರ್ - 3: ಮಿಶೇಲ್
ಅವಸ್ವರ್ - 4: ಆಲಿಯಾ
ಅವಸ್ವರ್ - 5: ಮಿಶೇಲ್
ಅವಸ್ವರ್ - 6: ಆಲಿಯಾ
ಅವಸ್ವರ್ - 7: ಮಿಶೇಲ್
ಅವಸ್ವರ್ - 8: ಆಲಿಯಾ
ಅವಸ್ವರ್ - 9: ಮಿಶೇಲ್
ಅವಸ್ವರ್ - 10: ಆಲಿಯಾ
ಅವಸ್ವರ್ - 11: ಮಿಶೇಲ್
ಅವಸ್ವರ್ - 12: ಆಲಿಯಾ
ದುಸ್ರೊ ಭಾಗ್: ತುಜೆಂ ಜಿವಿತ್ ತುಜಿ ವಿಂಚವ್ಣ್ ನ್ಹಯ್
ಅವಸ್ವರ್ - 13: ಮಿಶೇಲ್ ರಾಯನ್ ಆಲಿಯಾ
ಅವಸ್ವರ್ - 14: ಮಿಶೇಲ್ ರಾಯನ್ ಆಲಿಯಾ
ಅವಸ್ವರ್ - 15: ಮಿಶೇಲ್ ರಾಯನ್ ಆಲಿಯಾ
ಅವಸ್ವರ್ - 16: ಮಿಶೇಲ್ ರಾಯನ್ ಆಲಿಯಾ
ಅವಸ್ವರ್ - 17: ಮಿಶೇಲ್ ರಾಯನ್ ಆಲಿಯಾ
ಅವಸ್ವರ್ - 18: ಮಿಶೇಲ್ ರಾಯನ್ ಆಲಿಯಾ
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
