’ಖಂಚ್ಯಾಯ್ ವೆಕ್ತಿ/ವಸ್ತುಚೆಂ ಮೋಲ್ ಸಮ್ಜಾಜಯ್ ತರ್ ಆಮಿ ಪಯ್ಲೆಂ ತಿ ವಸ್ತ್/ವೆಕ್ತಿ ಹೊಗ್ಡಾಯ್ಜಯ್’ - ಆವಾ
ಕೊಂಕ್ಣಿ ಬಾಜಾರಾಂತ್ ಏಕ್ ಪಾಸಾಯ್
ವರಸ್ : 2011
ಮಯ್ನೊ : ಸಪ್ತೆಂಬರ್
ಜೆದ್ನಾಂ ಇಸ್ಕೊಲಾಂನಿ ಕೊಕ್ಣಿ ರಿಗ್ಲಿಗೀ, ತೆಚ್ಚ್ ವೆಳಾರ್ ಕೊಂಕ್ಣಿ ಸಾಹಿತ್ಯಾಚೆರ್ ’ಶ್ಹೆಣ್ ಚಳ್ವಣ್’ ಉದೆಲಿ. ಕೊಣ್ ಶ್ಹೆಣ್ ಶ್ಹೆಣ್ ಮ್ಹಣ್ ಆಪ್ಲೆಂ ನಾಕ್ ಧಾಂಪಿಲಾಗ್ಲೆ ತರ್ ಕೊಣ್ ಅಪ್ಲ್ಯಾ ಶ್ಹೆಣಾಚೆರ್ ಸುಗಂಧ್ ಪರ್ಮಳುಂಕ್ ಲಾಗ್ಲೆ, ತರ್ ಆನಿ ಕೊಣ್ ಹೆಂ ಶ್ಹೆಣ್ ಕೊಣಾ ಕೊಣಾಚ್ಯಾ ಆಂಗಾ-ಪಾಂಗಾಚೆರ್ ಉಡವ್ನ್ ಮಝಾ ಪಳೆಲಾಗ್ಲೆ. ಪುಣ್ ಏಕ್ ಅಡ್ಹೂಕ್ ಸತ್ ಮಾತ್ರ್ ಹ್ಯಾ ಚಳ್ವಳೆನ್ ಉದ್ದಾಪೆ ಕೆಲೆಂ; ಆನಿ ತೆಂ ಜಾವ್ನಾಸಾ, ಕೊಂಕ್ಣಿ ಸಾಹಿತ್ ಚಡ್ತಾವ್ ಜಾವ್ನ್ ಉತ್ರಾಂಚಿ ರಾಸ್ ಚಡ್ ಆಸೊನ್, ತಾಂತುಂ ಸಾಹಿತಿಕ್ ಸಾರ್ ಮೆಳ್ಳ್ಯಾರಿ ಕಾಂಯ್ ಕಾಲ್ದೊ ಥೆಂಬೊ ಕೊಣ್ಣಾ.
ಉಪ್ರಾಂತ್ ಗುಪ್ತಿಂ ಖೆಳ್ ಸುರು ಜಾಲೆ, ಕೊಣೆಂ ವಿಮರ್ಶೆ ಮ್ಹಳೆಂ, ಕೊಣೆಂ ಸಮೀಕ್ಶಾ ಮ್ಹಳೆಂ, ಅನಿ ಕೊಣೆ ಆನಿ ಕಿತೆಂ ಮಾತ್ತಿ ಗೊಬೊರ್ ಮ್ಹಳೆಂ. ಹೆಚ್ಚ್ ಸಂಧರ್ಭಾಚೊ ಫಾಯ್ದೊ ಜೊಡುಂಕ್ ಕೊಣೆಂ ಹ್ಯಾ ವಿಮರ್ಶಕಾಂಚ್ಯಾ ಖಾಂದಾರ್ ಬಂದೂಕ್ ದವರ್ನ್ ಕೊಣಾ ಕೊಣಾಕ್ ನಿಶಾನ್ ಕೆಲೊ. ಆನಿ ಆಪ್ಲೊ ಗುಪಿತ್ ಇರಾದೊ ಸಂಪ್ತಚ್ಚ್, ಹಾಂಚಿಂಚ್ ನಾಂವಾಂ ಪಾಡ್ ಕರ್ನ್ ಚಲ್ತೆಚ್ ರಾವ್ಲೆ.
"ಕೊಂಕ್ಣಿ ಮನಿಸ್ ರಾಜಕೀಯಾಂತ್ ಪಾಟಿಂ ಆಸ್ತಿತ್, ಪುಣ್ ಕೊಂಕ್ಣಿ ವರ್ತುಲಾಂತ್ ಆಸ್ಚೆ ತಿತ್ಲಿ ರಾಜಕೀಯ್ ಹೆರ್ ಖಂಚ್ಯಾಯ್ ಸಮಾಜೆಂತ್ ಆಸ್ಚಿನಾ", ಮ್ಹಜೊ ಎಕಾ ತೆಂಪಾಚೊ ಮಿತ್ರ್ ಜಾವ್ನಾಸ್ಲ್ಲ್ಯಾ ದೆ|ಜೊಜಿ ಪೀಂತ್ ಆಯ್ಕೊಳಾನ್ ಸಾಂಗ್ಲೆಲಿಂ ಉತ್ರಾಂ (ಕಿತ್ಯಾಕ್ ಮ್ಹಣ್ ವೆಗಿಂಚ್ ಉಗ್ಡಾಪೆಂ ಕರ್ತಾಂ).
ಆಮ್ಚ್ಯಾ ದೇಸಾಂತ್ ಭೋವ್ ಥೊಡ್ಯೊ ಭಾಸೊ ಮಾತ್ರ್ ಪಾಂಚ್ ಲಿಪಿಯಾಂನಿ ಬರಯ್ತಾತ್, ತಾಂತುಂ ಕೊಂಕ್ಣಿ ಏಕ್. ಮ್ಹಳ್ಯಾರ್ ಆಮ್ಚೆಲಾಗಿಂ ಆಸ್ಚ್ಯೊ ಉಪಲಬ್ಧ್ಯೊ ಧಾರಾಳ್. ಇತ್ಲೆಂ ಆಸೊನ್ಯೀ, ಆಮ್ಚೆ ಮಧೆಂ ಎಕ್ವಟ್ ಮ್ಹಳ್ಳೊ ನಾತ್ಲ್ಲೊ, ನಾ, ಆನಿ ಭೋವ್ಶಾ ಆಸ್ಚೊಯ್ ನಾ. ಪಾಂಚ್ ಲಿಪಿ ಸೊಡಾ, ಏಕ್ ಲಿಪಿ ಧರಾ, ಹಾಂತುಂ ಕಿತ್ಲೆಂ ವಾಂಟೆ ಫಾಂಟೆ, ಹರ್ಯೆಕ್ಲೆ ಹಾಂಗಾಸರ್ ಅಪಾಪ್ಲಿ ಪೊಕೊಳ್ ಇಮಾಜ್ ಭಾಂದುನ್ ಸಮಾಜೆಕ್ ಧಾಖಂವ್ಚ್ಯಾರ್ ಮಗ್ನ್, ಅಪಾಪ್ಲೆ ದೊರೆ ಭಾಂದ್ತಾತ್, ಕುಡ್ಕೆ ಜಾಲ್ಲ್ಯಾ ಸಾಹಿತಿಕ್ ಸಮಾಜೆಚೆ ಪರತ್ ಕುಡ್ಕೆ, ಅನಿ ಹರ್ಯೆಕಾ ದೊರ್ಯಾ ಭಿತರ್ ಎಕ್ಚ್ಚ್ ಬೊಬಾಟ್; "ಆಮಿ ಕೊಂಕ್ಣಿ ಸೆವಾ ಕರ್ತಾಂವ್, ಆಮಿ ಕೊಂಕ್ಣೆಕ್ ವಯ್ರ್ ವರ್ತಾಂವ್ (ವಯ್ರ್ ಖಂಯ್? ಸರ್ಗಾಕ್?)". ಪುಣ್ ಹಕೀಗತೆಂತ್ ಎಕಾ ದೊರ್ಯಾ ಭಿತರ್ ಕೊಂಕ್ಣೆವಿಶಿಂ ಚರ್ಚಾ ಜಾಂವ್ಚ್ಯಕೀ ಚಡ್ ಜಾವ್ನ್ ಹೆರ್ ದೊರ್ಯಾಂನಿ ಕಿತೆಂ ಕುಸ್ತಾ, ಕಿತೆಂ ಘಾಣ್ತಾ ಮ್ಹಳ್ಳೆವಿಶಿಂ ಸಂವಾದ್, ಖೆಳ್ಕುಳಾಂ ಚಲ್ತಾತ್. ಆನಿ ಹ್ಯಾ ದೊರ್ಯಾ ಭಿತರ್ ಸಯ್ತ್ ಅರ್ಧೆ ಕುಡ್ಡೆ, ಅರ್ಧೆ ಭೆರೆ, ಅರ್ಧೆ ಮತಿಗಾರ್. ಆಸೊಂ;
ಹಾಂಗಾಸರ್ ಹ್ಯಾ ಥೊಡ್ಯಾ ಆವ್ದೆಂತ್ ಜಾಲ್ಲ್ಯಾ ಥೊಡ್ಯಾ ಬದ್ಲಾವಣೆಚೆರ್ ಆರ್ಸೊ ಧರ್ತಾಂ;
ವರ್ಗ್: ಕೊಣ್ ಹೆಂ ಪಳೆಂವ್ದಿ ವ ನಾ ಆಸೊಂ; ಸತ್ ಸಾಂಗಾ, ಆಮ್ಚೆ ಭಿತರ್ ವರ್ಗ್ ಭೇಧ್ ನಾಂ? ಜಶೆಂ ಬಾಮ್ಣಾಂಚೆಂ ಮಾರಾಂಕ್ ಭೇದ್ ಕರ್ಚೆಪರಿಂ, ಹಾಂಗಾಸರ್ಯೀ ವರ್ಗ್ ಭೇಧ್ ನಾ? ಹಾಂಗಾಚೆ ವರ್ಗ್ ಅಶೆ ಅಸಾತ್; ಕಾಂಯ್ ಥೊಡ್ಯೊ ಕಾಣ್ಯೊ ಬರಯ್ಲ್ಯಾರ್ ತೊ ನವೊ ಬರವ್ಪಿ, ಥೊಡಿಂ ವರ್ಸಾಂ ಜಾತೆಚ್ಚ್ ಅಚಾನಕ್ ತಾಚ್ಯೊ ಕಾಣ್ಯೊ ಶೆಂಭೊರ್ ಜಾತಾತ್. ದೊನ್ಶಿಂ ಜಾತಾತ್, (ಕೊಣಾಕ್ ಲೇಕ್ ಆಸಾ? ದೊನ್ಶಿಂ ಕಾಣ್ಯೊ, ತಿನ್ಶಿಂ ಕವಿತಾ, ಪಾಂಯ್ಶಿ ಲೇಖನಾಂ) ಬರಯಿಲ್ಲೆ ಕೊಂಕ್ಣೆಚೆ ಮಹಾನ್ ಸಾಹಿತಿಚ್ಯಾ ವರ್ಗಾಕ್ ಸೆರ್ವಲ್ಲೆ ಮ್ಹಣ್ ಲೆಖ್ತಾತ್, ಉಪ್ರಾಂತ್ ತಾಣಿ ಗಳಂವ್ಚಿ ಘಾಣ್ ಬಿಟಿ ಸಯ್ತ್ ಹೆರಾಂನಿ ಪ್ರಸಾದ್ ಮ್ಹಣ್ ಸೆವಿಜಯ್, ಆನಿ ವಿರೋಧ್ ಕೆಲ್ಲ್ಯಾಂಕ್ ತಾಂಚೊ ಮಾತ್ರ್ ನ್ಹಯ್, ತಾಚ್ಯಾ ಸಂತಾನ್ ಕುಟ್ಮಾಚ್ಯಾ ಎಕೆಕಾ ಅಸ್ಕತ್ಕಾಯೆಚೆರ್ ಸಯ್ತ್ ಖಬ್ರೊ ಜಾತಾತ್, ವೆವೆಗ್ಲ್ಯಾ ಲಿಖ್ಣೆ ನಾಂವಾಂನಿ ನಾಂವಾಂನಿ ತಾಂಚೆವಿರೋಧ್ ಪ್ರಚಾರ್ ಜಾತಾ. ಅನಿ ಅಶೆಂ ಹೆರಾಂಚ್ಯಾ ಅಸ್ಕತ್ಕಾಯೆಚೆರ್ ಪ್ರಚಾರ್ ಕರ್ನ್ ಸುಖ್ ಭಗ್ಚ್ಯಾಂಕ್ ಕಿತೆಂ ಸಾಂಗ್ಚೆಂ ಮ್ಹಣ್ ತುಮಿಂಚ್ ಚಿಂತಾ.
ಮರ್ಯಾದ್: ಕೊಂಕ್ಣೆಂತ್ ಯೆದೊಳ್ ಪಾಸೊನ್ ಸಾಹಿತಿಕ್ ಮಟ್ಟ್ ಕಾಂಯ್ ವಿಶೇಸ್ ನಾತ್ಲ್ಲೆಂ ವ್ಹಯ್ ಮ್ಹಣ್ ಚಿಂತ್ಯಾಂ, ಪುಣ್ ಏಕ್ ಸತ್ ನೆಗಾರ್ ಕರ್ಚೆಂ ನಾಕಾ, ತೆಂ ಜಾವ್ನಾಸಾ, ಸಾಹಿತಿಕ್ ಮರ್ಯಾದ್, ಸಾಹಿತಿಕ್ ಭಾಸೆಚೊ ಮಾನ್, ಜೀವ್ ಆಸ್ಲ್ಲೊ. ಸದ್ದ್ಯಾಚ್ಯಾ ಪರಿಗತೆಂತ್ ವಾಚುಂಕ್ ಮೆಳ್ಚಿ ಭಾಸ್ ಹ್ಯಾ ಮರ್ಯಾದೆಕ್ ಮಿಕ್ವೊನ್ ವೆತಾ ಮ್ಹಳ್ಳೆಂ ಸತ್ ನೆಗಾರ್ ಕರ್ಚೆಪರಿಂ ನಾ. ಚಾಲು ಭಾಸ್, ರೌಡಿ ಭಾಸ್, ಸಾಹಿತಾಂತ್ ಪ್ರಸ್ತುತ್ ಜಾಲಿ ತರ್, ತೆಂ ಸಾಹಿತ್ ಕಸಲೊ ಫುಡಾರ್ ದೀಂವ್ಕ್ ಸಕಾತ್? ಹೆಂ ಸಮ್ಜೊನ್ ಘೆಂವ್ಚೆಂ ಭೋವ್ ಗರ್ಜೆಚೆಂ.
ಬಂಡಾಯ್/ದಾಬ್: ಕಾನಡಿಂತ್ ’ದಬ್ಬಾಳಿಕೆ’ ಮ್ಹಳ್ಳೊ ಸಬ್ಧ್ ಸಾರ್ಕೊ ದಿಸತ್. ಕಾಳ್ ಬದಲ್ಲಾ, ವಿಚಾರ್ ಬದಲ್ಲ್ಯಾತ್, ದೆಕುನ್ ಹಾಂವೆಂ ದೊನ್ಶಿಂ ಕಾಣ್ಯೊ, ತಿನ್ಶಿಂ ಕವಿತಾ ಬರಯ್ಲ್ಯಾಂತ್ (ಬರಯ್ಲ್ಯಾಂತ್ಚ್ಚ್ ಮ್ಹಣ್ ಚಿಂತ್ಯಾಂ), ದೆಕುನ್ ಮ್ಹಾಕಾಚ್ಚ್ ಕಳಿತ್ ಆಸಾ, ತುಂ ಆಯ್ಚೊ/ಕಾಲ್ಚೊ ಚೆರ್ಕೊ. ಅಸಲಿಂ ಹಲ್ಕ್ ಉತ್ರಾಂ ಆಯ್ಕೊನ್, ಆಯ್ಕೊನ್ ವ್ಹಗೆಚ್ ಬೊಸ್ಚೆ ತರ್ಯೀ ಕಿತ್ಲೊ ತೇಂಪ್ ವ್ಹೊಗೆಚ್ ಬೊಸ್ತೆಲೆ?. ಜರ್ತರ್ ಆಜ್ ಸಾಹಿತ್ಯಾಚೆರ್ ಇತ್ಲಿ ಠೀಕಾ ಆಸಾ ತರ್ ಹಾಚೆಂ ಕಾರಣ್ ಕೊಣ್? ಹೆಂ ಸಮ್ಜೊಂಚಿ ಭೋವ್ ಗರ್ಜೆಚೆಂ ಜಾವ್ನಾಸಾ. ಕಿತ್ಲೊ ತೇಂಪ್ ಹ್ಯಾ ಫಟ್ಕಿರ್ಯಾ ಪ್ರವಾದಿಂಕ್ ದಿಂಬಿಯೆರ್ ಪಡೊನ್ ನಮಾನ್ ಕರಿಜಯ್?
ಅತಾಂ ಹೆ ವರ್ಗ್ ಕೊಣೆ ರಚ್ಲ್ಲೆ? ಕಿತ್ಯಾಕ್ ಪಾಸೊನ್ ರಚ್ಲ್ಲೆ? ಬೂಕ್ ಛಾಪ್ತಾನಾ, ಬುಕಾಚ್ಯಾ ಮುಕ್ಪಾನಾಚೆರ್ ’ಹೊ ಬೂಕ್ ಪ್ರಭುದ್ದ್ ವಾಚ್ಪ್ಯಾಂಕ್ ಮಾತ್ರ್, ದೆಕುನ್ ವಿಮರ್ಸೊ ಕರ್ತೆಲ್ಯಾಂನಿ, ವಿಮರ್ಸೊ ಕರ್ಚಿ ಶ್ಯಾಥಿ ಆಸಾಗೀ ಮ್ಹಣ್ ಸಮ್ಜಾಜೆ’. ಅಸಲಿಂ ಉತ್ರಾಂ ಛಾಪುನ್ ಕಿತ್ಲೆಶ್ಯಾಂಕ್ ಬನಾಯ್ತಿತ್? ಹೆರ್ ಭಾಸಾಂಚ್ಯಾ ಮಾನ್ ಸಾಹಿತಿಂಸವೆಂ ಉಭೆ ರಾವೊನ್ ತಸ್ವೀರೊ ಕಾಡುನ್, ಉಪ್ರಾಂತ್ ಹೆರಾಂಕ್ ’ಹಾಂವೆಂ ಅಮ್ಕ್ಯಾ ಸಾಹಿತಿಲಾಗಿಂ ಮಾತ್ರ್ ಸಂವಾದ್ ಕರ್ಚೊ’ ಮ್ಹಣ್ ಹರ್ಧೆಂ ಪೆಟುನ್ ಕಿತ್ಲೆಶ್ಯಾಂಕ್ ಬನಾಯ್ತೆಲೆ ಹೆ? ಮೆಜಾವಯ್ಲೆಂ ಕೆಳೆಂ ಕಾಡುನ್ ಪಿಲ್ಯಾದ್ ಜೊಡುನ್ ವಿಜಿಟಿಂಗ್ ಕಾರ್ಡಾಂನಿ ಆಪ್ಲ್ಯಾ ಬಾದೂರಿಚಿ ಲಾಂಬ್ ಪಟ್ಟಿ ಛಾಪುನ್ ಕಿತ್ಲೆಶ್ಯಾಂಕ್ ಮಾಂಕೊಡ್ ಕರ್ತೆಲೆ? ಆನಿ ಹೆಂ ಸರ್ವ್ ಸೊಸ್ತೆಲೆಯ್ ಕಿತ್ಲೊ ತೇಂಪ್ ಸೊಸ್ತೆಲೆ?, ಸಾರ್ಕಿ ಕೊಂಕ್ಣಿ ಬರಂವ್ಕ್ ಕಳಿತ್ ನಾಸ್ತಾನಾ ಸಯ್ತ್, ಆಪ್ಣಾಕ್ ಪನ್ನಾಸ್ ವರ್ಸಾಂ ಜಾತತ್ ದೆಕುನ್ ಆಪ್ಣಾಕ್ ಪುರಸ್ಕಾರ್ ಮೆಳೊಂಕ್ ಹೊಚ್ಚ್ ವೇಳ್ ಮ್ಹಣ್ ವರ್ಸಾಧಿಂ ತಯಾರಾಯ್ ಕರ್ನ್ ಕಿತ್ಲೆಶ್ಯಾಂಕ್ ಫಟಯ್ತೆಲೆ? (ಹಾಂಗಾಸರ್ ಮಿರ್ಜಾ ಘಾಲಿಬಾಚೆಂ ಉತಾರ್ ಯಾದಿಂತ್ ಯೆತಾ; ದುನಿಯಾ ಮೆ ಬೇವಕೂಫೊಂ ಕಿ ಕಮೀ ಹೈ ಕ್ಯಾ, ಏಕ್ ಕೊ ಡೂಂಡೊ, ಹಜಾರ್ ಮಿಲ್ತೆ ಹೈ).
ಆತಾಂ ಮರ್ಯಾದೆವಿಶಿಂ ಉಲವ್ಯಾಂ, ಎಕಾ ಗಾಂವಾಂತ್ಲ್ಯಾ ಎಕಾ ತರ್ನ್ಯಾ ಬರವ್ಪ್ಯಾನ್ ಎಕಾ ಮಹಾನ್ (ಅಶೆಂ ತೊ ಚಿಂತಾ) ಕೊಂಕ್ಣಿ ಬರಯ್ಣಾರಾಕ್ ವಿಚಾರ್ಲೆಂ ಕಂಯ್ "ಮಟ್ವಿ ಕಾಣಿ ಆನಿ ವಿಡಂಬನಾ ಮಧೆಂ ಫರಕ್ ಕಸಲೊ?", ಸಟ್ಟ್ ಕರ್ನ್ ತಾಚಿ ಜಾಪ್ ಕಂಯ್ "ವೆರಿ ಸಿಂಪಲ್, ಹಾಂವ್ ಖಂಯ್ ಕಾತ್ರಿನ್/ಪಾತ್ರಿಸ್ ಹಾಡ್ತಾಂಕೀ, ತೆಂ ವಿಡಂಬನ್, ನಾಯೇ ತಿ ಮಟ್ವಿ ಕಾಣಿ". 2003 ಇಸ್ವೆಂತ್ ಎಕ್ಲೊ ಕೊಂಕ್ಣಿ ಚಿಂತ್ಪಿ ಸರ್ಲೊ. ಸಗ್ಳಿ ಕೊಂಕ್ಣಿ
ಸಮಾಜ್ ರಡ್ಲಿ, 2004 ಇಸ್ವೆಂತ್ ತೊ ಸರ್ಲ್ಲ್ಯಾ ದಿಸಾ ಹಾಂವ್ ತಾಚ್ಯಾ ಘರಾ ಪಾವ್ಲೊಂ, ತಾಚ್ಯಾ ಪ್ರಾಯ್ವಂತ್ ಆವಯ್ಕ್ ಭೆಟ್ಲೊಂ, ತಾಚಿ ವ್ಹಡ್ ಭಯ್ಣ್ (ರಿಟಾಯರ್ಡ್ ಟೀಚರ್) ಮೆಳ್ಳಿ ಅನಿ ಮ್ಹಕಾ ಸವಾಲ್ ಕರಿಲಾಗ್ಲಿ "ಎಕ್ಲೊ ಮಾಲ್ಘಡೊ ಬರಯ್ಣಾರ್, ಆತಾಂ ಮ್ಹಜೊ ಭಾವ್ ಮೆಲ್ಲ್ಯಾ ಉಪ್ರಾಂತ್, ತಾಚೆವಿಶಿಂ ನಾಕಾಜಾಲ್ಲೆಂ ಬರಯ್ತಾಮೂ? ಕಿತ್ಯಾ?, ತಾಕಾ ಹೆಂ ಸೊಭ್ ದಿತಾ?", ಹಾಂವೆಂ ಜಾಪ್ ದಿಲಿ; "ತೊ ಪ್ರಾಯೆಂತ್ ಮಾತ್ರ್ ಮಾಲ್ಘಡೊ, ಮತಿಂತ್ ನ್ಹಯ್, ಆನಿ ತುಜೊ ಭಾವ್ ಜೀವ್ ಆಸ್ತಾನಾ ಬರಯಿಲ್ಲೆಂ ತರ್ ತೊ ಜಾಪ್ ದಿತೊನೆ?". ಆತಾಂ ಸವಾಲ್ ಕರಾ ಖಂಚಿ ಮರ್ಯಾದ್? ತರ್ ಹಿ ಮರ್ಯಾದ್ ಬಂಗಯ್ತಲೆ ಕೊಣ್? ನವೆ ಬರಯ್ಣಾರ್? ವ ಮಹಾನ್ ಮ್ಹಣ್ ಚಿಂತ್ಚೆ ಮಾಲ್ಘಡೆ? ಫಟ್ಕಿರ್ಯಾ ನಾಂವಾಂನಿ ಇಮೇಯ್ಲಾಂ ಕರ್ತಾತ್ ತರ್ನಾಟೆ ಬರಯ್ಣಾರ್ ಮ್ಹಣ್ ಬೊಬಾಟ್ಚ್ಯಾ ಹಾಂಣಿಂ ಫಟ್ಕಿರಿಂ ನಾಂವಾ ವಾಪಾರ್ನ್ ಘಾಲ್ಲಿಂ ಇಮೇಯ್ಲಾಂ ಕೊಣೆಂಯ್ ವಾಚುಂಕ್ ನಾಂತ್? ತರ್ ಸಾಂಗಾ ಹಿ ಮರ್ಯಾದ್ ಕೊಣೆ ರಾಕೊನ್ ವ್ಹರಿಜೆ ಆಸ್ಲಿ? ಪತ್ರಾಂನಿ/ಸಾಯ್ಟಿಂನಿ ಕೊಣೆಂಯ್ ಆಪ್ಣಾಕ್ ವಿರೋದ್ ಬರಯ್ಲ್ಯಾರ್ ಫೊನಾಂ ಕರ್ನ್ ಧಮ್ಕುಂಚಿ ಮರ್ಯಾದ್?
ತಿಸ್ರೊ ವಿಶಯ್; ದಾಬ್; ಭೊವ್ ಮಹತ್ವಾಚೊ ವಿಶಯ್. ತುಮಿ ನೆಣಾಂತ್ ತರ್ಯೀ ಆಯ್ಕಲಾಂ ಆಸ್ಯೆತ್, ಜಾಯ್ತೆ ಹ್ಯಾ ಕೊಂಕ್ಣೆಕ್ ಆಯ್ಲೆ, ಜಾಯ್ತ್ಯಾ ರಿತಿನ್ ಆಪ್ಲೊ ವಾವ್ರ್ ಕರ್ನ್, ಸಲ್ವಾಲೆ ಆನಿ ನಾಂವ್ ನಾಸ್ತಾಂ ಗೆಲೆ. ಕಾಂಯ್ ಪಾಟ್ಲ್ಯಾ ತೀಸ್ -ಪಾಂತೀಸ್ ವರ್ಸಾಂಚಿ ಚರಿತ್ರಾ ಪಳೆಯಾತ್; ಹಾಂವ್ ಖುದ್ದ್ ಕಾಣಿಕ್ ಪತ್ರಾಂತ್ ಕಾಮ್ ಕರ್ನ್ ಆಸ್ಚೆ ವೆಳಾರ್, ಸಲ್ವಲ್ಲ್ಯಾ ’ಅವಿಲ್ ರಸ್ಕೀಞಾ’ ವಿಶಿಂ ನಾಕಾ ಜಾಲ್ಲ್ಯೊ ಖಬ್ರೊ ಕೆಲ್ಲೆ ಸಂಪಾದಕ್ ಅಜೂನ್ ಜೀವ್ ಆಸಾತ್, ಪುಣ್ ಅವಿಲ್ ರಸ್ಕೀಞಾಕ್ ಸಾಹಿತಿಕ್ ರಿತಿನ್ ಜಾಂವ್, ಹೆರ್ ರಿತಿನ್ ಜಾಂವ್, ಕುಮ್ಕೆಕ್ ಆಯಿಲ್ಲೆ ಕೊಣೀಂ ಆಸಾತ್? ಆಸ್ಟಿನ್ ಪ್ರಭುವಿಶಿಂ ಆಯ್ಕಾಲ್ಲೆಂ, ತಾಕಾ ಜಾಲ್ಯಾರೀ ಸತ್ತ್ಯಾನಾಸ್ ಕರುಂಕ್ ಪ್ರೇತನ್ ಕೆಲ್ಲೆಂ ’ದುಸ್ಮಾನಾಂಚೊ ಮೋಗ್ ಕರಾ, ತಾಂಕಾಂ ಭಗ್ಸಿಯಾ, ಎಕಾ ಪೊಲ್ಯಾಚೆರ್ ಮಾರ್ಲ್ಯಾರ್ ತಾಂಕಾಂ ಅನ್ಯೇಕ್ ಪೊಲೊ ಧಾಖಯಾ’ ಮ್ಹಳ್ಳಿ ಜೆಜುಚಿ ಶಿಕವ್ಣ್ ದಿತೆಲ್ಯಾನ್ಂಚ್ ನ್ಹಯ್? ರಿಚ್ಚಿ ಪಿರೇರಿನ್ ’ಕಲಾ ಕಿರಣ್’ ಪತ್ರ್ ಚಲವ್ನ್ ಆರ್ಥಿಕ್ ಕಂಗಾಲ್ ಜಾತಾನಾ ತಾಚಿ ಕೊಣೆಂಯ್ ಕುಮೊಕ್ ಕೆಲ್ಯಾ?, ಸಿಲ್ವೆಸ್ಟರ್ ಸೊಜಾನ್ ’ಉದೆವ್’ ಪತ್ರ್ ಚಲಯ್ತಾನಾ ಸಯ್ತ್ ತೊ ಸಲ್ವಲೊ, ತಾಚಿ ಸಯ್ತ್ ಮಜತ್ ಕರುಂಕ್ ಕೊಣಿಂ ಆಯ್ಲೆ? ತಾಂಕಾಂ ಸೊಡಾ, ಕೊಂಕ್ಣೆಂತ್ಲೊ ಶ್ರೇಷ್ಟ್ ಚಿಂತ್ಪಿ ಚಾ.ಫ್ರಾ.ನ್ ಸಯ್ತ್ ’ಜಿವಿತ್’ ಪತ್ರ್ ಚಲಯ್ತಾನಾ ಸಲ್ವಾಲೊ, ತಾಕಾ ಮಜತ್ ಕರುಂಕ್ ಕೊಣ್ ಅಯ್ಲಿಂ? ಮೌರಿಸ್ ಶಾಂತಿಪುರ್ ಭೋವ್ ಪ್ರತಿಭಾ ಆನಿ ಪ್ರಾಮಾಣಿಕತಾ ಘೆವ್ನ್ ಆಯ್ಲೊ, ಇತ್ಲಿ ಪ್ರತಿಭಾ ಆಸೊನ್ಯೀ ತೊ ಪರತ್ ಪರತ್ ಸಲ್ವಾಲೊ, ಪಯ್ಲೊ ’ಆಮ್ಚೊ ಯುವಕ್’, ಉಪ್ರಾಂತ್ ’ಉಮಾಳೊ’ ಅನಿ ಅಖೆರಿಕ್ ’ಕಾಣಿಕ್’, ಪುಣ್ ಹ್ಯಾ ಸರ್ವಾಂವಿಶಿಂ ನಾಕಾ ಜಾಲ್ಲ್ಯೊ ಖಬ್ರೊ ಆಮಿ ಆಯ್ಕೊಂಕ್ ನಾಂತ್? ಹಾಂಗಾಸರ್ ಮ್ಹಜೆಂ ಸವಾಲ್ಯೀ ತೆಂಚ್, ಆಮಿ ಹೆರಾಂಚ್ಯಾ ಗರ್ಜೆಕ್ ಪಾವೊಂಕ್ ಸಕಾನಾಂವ್ ಪುಣ್ ತಾಂಚ್ಯೊ ಖಬ್ರೊ ಕರುಂಕ್ ಕಿತ್ಯಾಕ್ ಪಾಟಿಂ ಸರಾನಾಂವ್?
ಪತ್ರಿಕೋಧ್ಯಮ್ ಸೊಡಾ, ಕೊಂಕ್ಣೆಂತ್ ಪಯ್ಲೆಂ ಅಂತರ್ಜಾಳ್ ಮಾಯ್ಭಾಸೆಚೊ ನವೀನ್ ಸಿಕೇರ್ ಸುರ್ವಿಲ್ಯಾ ದಿಸಾಂನಿ ವಿಜಾ ಖಾತಿರ್ ಮೊಸ್ತ್ ಕಶ್ಟಾಲೊ. ಸಾರ್ಕೆಂ ಕಾಮ್ ನಾ, ತರ್ಯೀ ಆಪ್ಲ್ಯಾ ಪ್ರತಿಭೆನಿಮ್ತಿಂ ಕೊಂಕ್ಣಿ ಅಂತರ್ಜಾಳಿಚಿ ನವಿ ಸುರ್ವಾತ್ ದಿಲ್ಲ್ಯಾ ಹಾಕಾ ಮಜತ್ ದಿಂವ್ಚಿ ಸೊಡ್, ಹಾಚೆಥಾವ್ನ್ಂಚ್ ಸಂಭಾವನ್ ವಸೂಲ್ ಕೆಲ್ಲೆ ಆಮ್ಚೆ ಮಾನ್ ಸಾಹಿತಿ. ಹಾಂವೆಂ ದಾಯ್ಜ್ ಸುರು ಕೆಲ್ಲೆ ಥಾವ್ನ್ ಮ್ಹಾಕಾಯ್ ಸುಟ್ಕಾ ನಾ, ಮ್ಹಜ್ಯಾ ಎಕ ಬುಕಾಕ್ ಪ್ರಸ್ತಾವನ್ ಬರಂವ್ಕ್ ಎಕಾ ಸಾಹಿತಿಕ್ ಉಪ್ಕಾರ್ ಮಾಗ್ಲೊ, ತಾಣೆಂ ಪ್ರಸ್ತಾವನ್ ಬರಯ್ಲೆಂ ಆನಿ ಹಾಂವ್ ಗಾಂವಾಕ್ ಆಯಿಲ್ಲೆವೆಳಾರ್ ಮ್ಹಜೆ ಥಾವ್ನ್ ತ್ಯಾ ಪ್ರಸ್ತಾವನಾಕ್ ಸಂಭಾವನ್ ದೀಜಯ್ ಆಸ್ಲೆಂ ಮ್ಹಳ್ಳೆಂ ಮ್ಹಾಕಾ ತಿಸ್ರ್ಯಾ ಥಾವ್ನ್ ಆಯ್ಕೊಂಕ್ ಮೆಳ್ಳೆಂ. ಜರ್ತರ್ ತೊ ಖುದ್ದ್ ಯೇವ್ನ್ ಮ್ಹಕಾ ಸಾಂಗ್ತೊ "ಮ್ಹಾಕಾ ಇಲ್ಲಿ ಗರ್ಜ್ ಆಸಾ ದೆಕುನ್ ಮ್ಹಾಕಾ ಇತ್ಲೆ ಪಯ್ಶೆ ದಿಶಿಗಿ", ತೆದ್ನಾಂ ಹಾಂವ್ ಖಂಡಿತ್ ದಿತೊಂ. ಪುಣ್ ಅಶೆಂ ಖಬ್ರೊ ಕರ್ನ್ ಪಯ್ಶೆ ವಸೂಲ್ ಕರ್ಚಿ ರೀತ್ ಪಳೆವ್ನ್ ಹಾಂವ್ ಖುಬಾಳ್ಳೊಂ ಅನಿ ತೊ ತಿಸ್ರೊ ಮನಿಸ್ ಪತ್ರ್ ಚಲಯ್ತಾಲೊ ದೆಕುನ್ ತಾಚಿ ಅಭಿಪ್ರಾಯ್ ವಿಚಾರ್ಲಿ, ತಾಕಾ ತಾಣೆಂ ಜಾಪ್ ದಿಲಿ, ಹಾಂವ್ ಜಾಲ್ಯಾರ್ "ದೆಡ್ಶೆಂ ರುಪಯ್ ದಿತೊಂ", ಅಶೆಂ ಹಾಂವೆಂ ತ್ಯಾ ಬರಯ್ಣಾರಾಕ್ ಸಾಂಗ್ಲೆಂ ತುಜೆಂ ಸಂಭಾವನ್ ದೀಂವ್ಕ್ ಹಾಂವೆಂ ಅಮ್ಕ್ಯಾಕ್ ಸಾಂಗ್ಲಾಂ, ಪುಣ್ ನಿರಾಸೆಚಿ ಗಜಾಲ್ ಮ್ಹಳ್ಯಾರ್, ತಾಕಾ ಹಜಾರ್ ರುಪಯ್ ವ ಉಣ್ಯಾರ್ ಉಣೆಂ ಪಾಂಯ್ಶಿ ರುಪಯ್ ದೀ, ನಾತ್ಲ್ಯಾರ್ ನಾಕಾ ಮ್ಹಣ್ ತೊ ಗೆಲ್ಲೊ ಕಂಯ್. (ಮಾಫ್ ಕರಾ, ಹಾಂಗಾಸರ್ ಪರತ್ ಹಾಂವ್ ಪಯ್ಶ್ಯಾಂಚೊ ಉಲ್ಲೇಕ್ ಕಿತ್ಯಾಕ್ ಕರ್ತಾಂ ಮ್ಹಳ್ಯಾರ್, ಆಮ್ಚ್ಯಾ ಚಡ್ತಾವ್ ಬರಯ್ಣಾರಾಂಚ್ಯಾ ಚಿಂತ್ಪಾಚಿ ಗುಂಡಾಯ್ ಸಮ್ಜೊಂಕ್, ಆಮ್ಕಾಂ ಗರ್ಜ್ ಆಸ್ಲ್ಲಿಚ್ಚ್ ಮ್ಹಣ್ ಚಿಂತ್ಯಾಂ, ಪುಣ್ ಸಾರ್ಕ್ಯೊ ವಾಟೊ ಆಮ್ಕಾಂ ಕಳಿತ್ ನಾಂತ್? ಅಶೆಂ ವಸೂಲಿ ಕರ್ಚಿ ರೀತ್ ಕಿತ್ಯಾಕ್?)
ಆಸೊಂ, ಹಾಂಗಾಸರ್ ಅಸಲೆ ಸಭಾರ್ ಸಂಗ್ತಿ ಅಸಾತ್. ಪುಣ್ ಕೊಣ್ ಕೊಣಾಕ್ ಪಡೊನ್ ಗೆಲಾ? ಆಮಿ ಆಮ್ಚೊ ದೊರೊ ಘಟ್ಟ್ ಕರ್ಚ್ಯಾರ್ ಪಡ್ಲ್ಯಾಂವ್, ಆನಿ ತ್ಯಾ ದೊರ್ಯಾಚೆರ್ ವರ್ಸಾನ್ ವರಸ್ ನವೊ ನವೊ ರಂಗ್ ದಿಂವ್ಚ್ಯಾರ್ ಪಡ್ಲ್ಯಾಂವ್, ಸಂಸಾರ್ ರಂಗ್ ಪಸಂದ್ ಕರ್ತಾ ದೆಕುನ್. ಆನಿ ಜಿಂ ಆಮ್ಕಾಂ ಹೊಗ್ಳಾಪ್ ದಿತಾತ್, ತಿಂ ಮಾತ್ರ್ ದೊರ್ಯಾ ಭಿತರ್, ಬಾಕಿಚ್ಯಾಂಚೆಂ ಅಮ್ಕಾಂ ಪಡೊನ್ ವ್ಹಚೊಂಕ್ ನಾ. ಕಶೆಯ್ ದೊರ್ಯಾ ಭಿತರ್ ಆಸ್ಚೆ ಅರೆ-ಭೆರೆಚ್.
ಹ್ಯಾ ಸರ್ವ್ ಸಮಸ್ಸ್ಯಾಂ ಮಧೆಂ ಎಚ್ಚೆಮಾನ್ ಕಿಟಾಳ್ ಪೆಟಯ್ಲಾಂ. ಕಿಟಾಳ್ ಏಕ್ ದಿವೊ ಸಯ್ತ್ ಪೆಟಂವ್ಕ್ ಸಕ್ತಾ, ತಶೆಂಚ್ ಏಕ್ ಘರ್ ಸಯ್ತ್ ಹುಲ್ಪಾಂವ್ಕ್ ಸಕ್ತಾ. ಎಚ್ಚೆಮಾಚ್ಯಾ ಪ್ರತಿಭೆಚೆರ್, ತಾಚ್ಯಾ ಕೊಂಕ್ಣಿ ಸಾಹಿತಿಕ್ ಹುಸ್ಕ್ಯಾಚೆರ್, ತಾಚ್ಯಾ ಪ್ರಾಮಾಣಿಕತೆಚೆರ್ ದುಭಾವ್ ನಾ. ಕಾಂಯ್ ಇಲ್ಲೊ ದುಭಾವ್ ಅಸಾ ತರ್ ತಾಚ್ಯಾ ಸಾಹಿತಿಕ್ ಪ್ರಭುದ್ದತೆಚೆರ್, ತಾಚ್ಯಾ ನಿತಿಚೆರ್ ಮ್ಹಾಕಾ ದುಭಾವ್ ನಾ, ಆಸಾ ತರ್ ತಾಚ್ಯಾ ರಿತಿಚೆರ್. ಆಮ್ಕಾಂ ಕೊಂಕ್ಣೆಂತ್ ಹವ್ಯಾಸಿ ಬರಯ್ಣಾರ್ ಮಾತ್ರ್ ನ್ಹಯ್, ಹವ್ಯಾಸಿ ಸಂಪಾದಕ್ ಸಯ್ತ್ ಭರೊನ್ ಗೆಲ್ಯಾತ್. ಹ್ಯಾ ಪರಿಗತೆಂತ್ ಚ್ಯಾರ್ - ಆಟ್ ವೊಳಿ ಬರಯ್ಲ್ಯಾರ್ ಕವಿತಾ ಜಾತಾ, ದೋನ್-ತೀನ್ ಪಾನಾಂ ಬರಯ್ಲ್ಯಾರ್ ವಿಡಂಬನ್ ಜಾತಾ, ಚಾರ್-ಪಾಂಚ್ ಪಾನಾಂ ಬರಯ್ಲ್ಯಾರ್ ಕಾಣಿ ಜಾತಾ, ಆಟ್-ಧಾ ಪಾನಾಂ ಬರಯ್ಲ್ಯಾರ್ ನೀಳ್ಗಥಾ ಜಾತಾ, ಆನಿ ಇಲ್ಲಿ ಲಾಂಬ್ ಜಾಲ್ಯಾರ್ ಸಾಂಕಳ್ ಕಾಣಿ ವ ಮಿನಿ ಕಾದಂಬರಿ ಜಾತಾ ಮ್ಹಣ್ ಪಾತ್ಯೆಂವ್ಚ್ಯಾ ಹಾಂಚೆ ಥಾವ್ನ್ ಕಸಲೆಂ ಸಾಹಿತಿಕ್ ವಾವ್ರ್ ಅಪೇಕ್ಶಾ ಕರ್ಯೆತಾ?. ಎಚ್ಚೆಮ್ ಖಂಡಿತ್ ಜಾವ್ನ್ ಹವ್ಯಾಸಿ ಸಂಪಾದಕ್ ನ್ಹಯ್, ಪುಣ್ ಏಕ್ ಸಂಪಾದಕ್ ಜಾವ್ನ್ ತಾಕಾ ಶಿಕೊಂಕ್ ಆಸ್ಚಿಂ ಲಿಸಾಂವಾಂಚಿ ಸುರ್ವಾತ್ ಜಾಲ್ಯಾ ಮಾತ್ರ್.
ಹವ್ಯಾಸಿ ಸಂಪಾದಕಾಂಚೊ ಉಲ್ಲೇಕ್ ಕರ್ತಾನಾ ಅಜೀಕ್ ಕಾಂಯ್ ಪಂದ್ರಾ ವರ್ಸಾಧಿಂ ಹಾಂವೆಂ ಹೆಂ ಉತಾರ್ ಸಾಂಗ್ಲ್ಲೆಂ "ಕೊಂಕ್ಣೆಂತ್ ಕೊಣೆಂಯ್ ಸಂಪಾದಕ್ ಜಾವ್ಯೆತ್", ಆನಿ ಹ್ಯಾ ಉತ್ರಾಚೆರ್ ಸಿಜ್ಯೆಸಾನ್ ಅಪ್ಲ್ಯಾ ಎಕಾ ವಿಡಂಬನಾಂತ್ ಜವಾಬ್ ದಿಲ್ಲಿ "ಕೊಂಕ್ಣೆಂತ್ ಕೊಣೆಂಯ್ ಸಂಪಾದಕ್ ಜಾವ್ಯೆತ್ ಕಂಯ್, ಅಶೆಂ ಗೋಂಪೆಕ್, ಬೋರಿ ಬಸವಾಕ್ ಸಂಪಾದಕ್ ಕೆಲೊ". ವಿಡಂಬನ್ ಮ್ಹಳ್ಳೊ ಸಭ್ದ್ ಕೊಂಕ್ಣೆಂತ್ ವ್ಹಡ್ಲೊ ಜೋಕ್ ಜಾಲಾ. ವಿಡಂಬನಾಚೊ ಖರೊ ಮತ್ಲಬ್ ಕಸೊಯ್ ಆಸೊಂ, ಪುಣ್ ಚಡ್ತಾವ್ ಜಾವ್ನ್ ಕೊಂಕ್ಣೆಂತ್ ವಿಡಂಬನ್ ಮ್ಹಳ್ಯಾರ್, ಶೀದಾ ಕೊಣಾಯ್ಲಗಿಂ ವಾದ್ ಕರುಂಕ್ ಜಾಯ್ನಾಸ್ತಾಂ, ಆಡ್ ನಾಂವ್ ಹಾಡುನ್ ತಾಂಕಾಂ ಯೆಟ್ಚೆಂ ಆನಿ ಆಪ್ಲ್ಯಾ ಮತ್-ಗತ್ ನಾತ್ಲ್ಯಾಂಕ್ ಧಾಖವ್ನ್ ಹರ್ದೆಂ ಪೆಟ್ಚೆಂ (ಜಾಯ್ತೆ ಧಾಖ್ಲೆ ಆಸಾತ್, ತೆಂ ಫುಡ್ಲ್ಯಾ ರುಂವಾಂತ್ಲ್ಯಾ ಸರ್ಗಾಂತ್ ಬರಯ್ತಾಂ, ಆಯ್ಲೆಂ ಆವ್ರ್, ವೊತ್ಲೆಂ ಉದಾಕ್ ಮ್ಹಳ್ಳಿ ಸಾಂಗ್ಣಿ ಸತ್ ಜಾಯ್ಜಯ್ ಪಳೆ)"
ಇತ್ಲೆಂ ಬರವ್ನ್ ಆಸ್ತಾಂ, ಕಿಟಾಳಾಚೆರ್ ’ದುರಂತ್ ಕಾಣಿ ಜಾಲೊ ಆನಂದಾಗರ್’ ಮ್ಹಳ್ಳೆಂ ಲೇಖನ್ ವಾಚ್ಲೆಂ, ಕೊಣ್ ಹೊ ಅನಂದಾಗಾರ್? ಕಾಂಯ್ ಹಾಂವ್ ಭುರ್ಗೊ ಜಾವ್ನ್ ಆಸ್ತಾನಾ ಕಾನಡಿಂತ್ (ಸುಧಾ/ಮಯೂರ) ಹಾಣೆಂ ತರ್ಜಣ್ ಕೆಲ್ಲ್ಯೊ ಕೊಂಕ್ಣಿ ಕಾಣ್ಯೊ ವಾಚ್ತಾಲೊಂ. ಕೊಂಕ್ಣೆಕ್ ಉದ್ದಾರ್ ಕರ್ಚ್ಯಾ ಇರದ್ಯಾಚಿಂ ಇತ್ಲಿಂ ಸಂಚಾಲನಾಂ ಆಸಾತ್, ಇತ್ಲೆ ಪರಿಶದ್ ಆಸಾತ್, ಇತ್ಲಿಂ ಪತ್ರಾಂ ಆಸಾತ್, ಪುಣ್ ಆಜ್ ಪಾಸೊನ್ ಹ್ಯಾ ಬರಯ್ಣಾರಾಚಿ ಖಬಾರ್ ಕಿತ್ಯಾಕ್ಗಾಯ್ ಖಂಯ್ಚರ್ಯೀ ಆಯ್ಲಿನಾ? ಹೆಂ ಖರೆಂಚ್ ಜಾವ್ನ್ ಕೊಂಕ್ಣಿ ಸಾಹಿತಿಕ್ ಪರಿಗತೆಚ್ಯಾ ನಾಗ್ದ್ಯಾ ಸತಾಕ್ ಜಿವೆಂ ಜಿವೆಂ ಧಾಖಯ್ತಾ. ಆನಿ ಅಶೆಂ ದುಬ್ಳಿಕಾಯೆಂತ್ ಕೊಣಾ ಥಾವ್ನ್ ಕಿತೆಂಚ್ ಅಪೇಕ್ಶಾ ಕರಿನಾಸ್ತಾಂ ಹೊ ಸಂಸಾರ್ ಸಾಂಡುನ್ ಗೆಲ್ಲ್ಯಾಕ್ ಮೊಗಾನ್ ಮೆಳೊಂಕ್ ಗೆಲ್ಲಿಂ ತರ್ಯೀ ಕೊಣ್ ಪಳೆಯಾ; ಗ್ಲೇಡಿಸ್ ಬಾಯ್ (ಜಿಕಾ ಚಡ್ತಾವ್ ಬರವ್ಪಿ ಖೆಳ್ಕುಳಾಂ ಕರ್ತಾತ್ ಶಿವಾಯ್ ಆಜ್ ಪಾಸೊನ್ ತಿಚ್ಯಾ ಕೊಂಕ್ಣಿ ವಾವ್ರಾಚೆರ್ ಜೊಕ್ತಿ ಮರ್ಯಾದ್ ತಿಕಾ ಮೆಳೊಂಕ್ ನಾ), ಎಚ್ಚೆಮ್ (ಸದ್ದ್ಯಾಕ್ ಕಾಮ್ ನಾಸ್ತಾಂ, ಕಿಟಾಳ್.ಕೊಮ್ ಚಲಯ್ತಾ), ಆನಿ ದೋಗ್ ತರ್ನೆ ವಿಲ್ಸನ್.
ಹೇಮಾಚಾರ್ಯಾಚಿಂ ’ಆಮ್ಚಿ ಮಾತಿ ಆಮ್ಚಿಂ ಮನ್ಶಾಂ’ ಅಂಕಣಾಂತ್ಲಿಂ ಉತ್ರಾಂ ನಾಕಾ ನಾಕಾ ಮ್ಹಳ್ಯಾರೀ ಉಡಾಸಾಕ್ ಯೆತಾತ್ ’ಕೊಂಕ್ಣಿ ಭಾಸ್ ಆಜ್ ಜಿವಿ ಉರ್ಲ್ಯಾ ತರ್, ಧವ್ಯಾ ಕಾಲರಾಚ್ಯಾ ಕೊಂಕ್ಣಿ ಲೊಕಾಂ ಥಾವ್ನ್ ನ್ಹಯ್, ಬಗಾರ್ ಬಂಗ್ಲ್ಯಾಂತ್ ಕಾಮ್ ಕರ್ತೆಲ್ಯಾ ಆಯಾ-ಬೊಯಾಂ ಥಾವ್ನ್, ಬೆಕ್ರೆಂನಿ ಪೀಟ್ ಲಾಟ್ಚ್ಯಾ ಮೆಸ್ತಾಂ ಥಾವ್ನ್, ಡ್ರಾಯ್ವಾರಾಂ ಥಾವ್ನ್’. ಹ್ಯಾ ಉತ್ರಾಕ್ ಮುಖಾರುನ್ ಸಾಂಗ್ಚೆಂ ತರ್, ಕೊಂಕ್ಣಿ ಸ್ಪಿರಿತ್ ಆಜ್ ಜಿವಾಳ್ ಆಸಾ ತರ್, ಅಸಲ್ಯಾ ಕಾಮ್ ನಾತ್ಲ್ಲ್ಯಾಂ ಥಾವ್ನ್, ಜಾಂಕಾಂ ಖಂಚೀಂಯ್ ಸಂಚಾಲನಾಂ ವಳ್ಕನಾಂತ್, ಖಂಚೊಯ್ ವರ್ಗ್ ವಳ್ಕನಾ, ಖಂಚ್ಯಾಯ್ ದೊರ್ಯಾಂನಿ ಹಾಂಕಾಂ ರೀಗ್ ನ, ಕಸ್ಲೇಯ್ ಪುರಸ್ಕಾರ್ ಹಾಂಕಾಂ ನಾಂತ್. ಫಕತ್ತ್ ಆಸಾತ್ ತರ್ ದಾಬ್.
ಆತಾಂ ಹ್ಯಾ ಚ್ಯಾರ್ ಜಣಾಂನಿ ಅನ್ಯೇಕಾ ಪುರೊನ್ ಗೆಲ್ಲ್ಯಾ ಸವಾಲಾಕ್ ಉಸ್ತಿಲೆಂ, ’ಆನಂದಾಗರ’ ತಸಲ್ಯಾಂಕ್ ಕೊಣೆಂ, ಕೆದಾಳಾ, ಕಶೆಂ, ಕಿತ್ಯಾಕ್ ವ್ಹಳ್ಕಾಜಾಯ್ ಆಸ್ಲೆಂ?, ಖಂಚ್ಯಾ ದೊರ್ಯಾಭಿತರ್ ತೊ ಭರ್ತಿ ಜಾವ್ಯೆತೊ? ಕಸಲ್ಯಾ ವರ್ಗಾಂತ್ ತೊ ಸೆರ್ವೊಂಕ್ ಅರ್ಹ್ ಆಸ್ಲೊ?. ಸಂಸಾರ್ ಏಕ್ ಬಾಜಾರ್, ಹಾಂಗಾ ಜಾಂವ್ಚೆಂ ಹರ್ಯೆಕ್ ಪ್ರತಿಫಳಾಕ್, ಏಕ್ ನಯಾ ಪಯ್ಸೊ ದಿಲ್ಯಾರೀ, ದೋನ್ ನಯಾ ಪಯ್ಶ್ಯಾಚೆಂ ತರ್ಯೀ ನಾಂವ್ ಯೇಜೆ, ವ ಹೆರ್ ರಿತಿರ್ ಯೆವೆಂ ಯೇಜಯ್ ಮ್ಹಳ್ಳ್ಯಾ ಚಿಂತ್ಪಾಚೊ ಬಾಜಾರ್. ಜಾಯ್ಜಯ್ ಆಸ್ಲೆಂ, ಪುಣ್ ಕಿತ್ಯಾಕ್ ಅಶೆಂ ಜಾಲೆಂ ನಾ?, ’ಆನಂದಾಗರ’ ಖರೊಚ್ಚ್ ಜಾವ್ನ್ ಅಮ್ಕಾಂ ಏಕ್ ಸವಾಲ್ ಜಾತಾ, ಆನಿ ಕಿತ್ಲೆ ಅಸಲೆಚ್ಚ್ ’ಆನಂದಾಗರ’ ಆಸಾತ್?, ಜಾಂಚ್ಯಾ ಘರ್ಚ್ಯಾ ಮಿಟರಾಚೊ ಫ್ಯೂಜ್ ಕಾಡ್ಲಾ? ಜಾಂಕಾಂ ಪಿಡೆಕ್ ವ್ಹಕಾತ್ ಹಾಡುಂಕ್ ಸಯ್ತ್ ತಾಂಕ್ ನಾ? ವ ಜೆವ್ಣಾಕ್ ತಾಂದುಳ್ ಸಯ್ತ್ ಹಾಡ್ಚಿ ಗತ್ ನಾ? ಆನಿ ಹಿ ಜವಾಭ್ದಾರಿ ಕೊಣೆ ಘೆಂವ್ಕ್ಜಾಯ್? ಸೆಜಾರಿಂನಿ? ಸಮಾಜೆನ್? ಫಿರ್ಗಜೆನ್? ಗಾಂವಾನ್? ಸಂಘಟನಾನ್? ಧರ್ಮಾನ್?, ಸಾಹಿತ್ಯಾನ್?......
ಪುಣ್ ಹ್ಯಾ ಚ್ಯಾರ್ ಜಣಾಂಚ್ಯಾ ವಾವ್ರಾನ್ ಎಕ್ ಭಿರಾಂಕುಳ್ ಸತಾಕ್ ಉಗ್ಡಾಪೆ ಕೆಲೆಂ, ಕೊಂಕ್ಣಿ ಸಮಾಜ್ ಸೊಡಾ, ಕೊಂಕ್ಣಿ ಬರವ್ಪಿ ಸಯ್ತ್ ಬರವ್ಪ್ಯಾಕ್ ಪಾವಾನಾಂತ್. ಆನಿ ಪಾವ್ತೆಲೆ ಅಸಾತ್ ತರ್ ತೆ ಕೊಣ್ಂಚ್ ನ್ಹಯ್ ಆಸ್ಚೆ, ಕಿತೆಂಚ್ ನ್ಹಯ್ ಅಸ್ಚೆ, ತರ್ಯೀ ಕೊಂಕ್ಣೆಚೊ ವರ್ತೊ ಮೋಗ್ ಕರ್ತೆಲೆ.
ಕಿಟಾಳ್ ಕೊಂಕ್ಣೆಂತ್ ಕೊಣೆಂಚ್ ಪೆಟಂವ್ಕ್ ಸಕಾನಾತ್ಲ್ಲೆಂ ಕಿಟಾಳ್ ಪೆಟಂವ್ಕ್ ಸಕೊಂದಿ ಮ್ಹಳ್ಳೆಂಚ್ ಮ್ಹಜೆಂ ಮಾಗ್ಣೆಂ.
ದೇವ್ ಬರೆಂ ಕರುಂ,
ಖಾಲ್ತೆಪಣಿಂ,
- ವಲ್ಲಿ ಕ್ವಾಡ್ರಸ್, ಅಜೆಕಾರ್
