AI

ಕಾಳ್ಜಾಕ್ ಖಾಲ್ತಿಮಾನ್ ಘಾಲ್ಚಿ ಮತ್

ಜಶಿ ಉಜ್ಯಾಚಿ ಏಕ್ ಕಾಡಿ ಕಶೆಂ ರಾಂದಣ್ ಝಳಂವ್ಕ್ ಸಕ್ತಾ ತೆಚ್‌ಪರಿಂ ಎಕ್ಲ್ಯಾಚೆಂ ಘರ್ ಭಸ್ಮುಂಕ್‌ಯೀ ಪಾವ್ತಾ. ತಶೆಂ ಮ್ಹಣೊನ್ ಉಜ್ಯಾಚಿ ಕಾಡಿ ಬರಿ ವಾ ವಾಯ್ಟ್ ಮ್ಹಣೊಂಕ್ ಜಾಯ್ನಾ. ಜೊ ಮನಿಸ್ ಖಂಚ್ಯಾ ಇರಾದ್ಯಾನ್ ತಾಚೊ ವಾಪಾರ್ ಕರ್ತಾ ತಾಚೆರ್ ಲಬ್ದೊನ್ ಆಸ್ತಾ. ಆತಾಂಚೊ ಕಾಳ್ ಎ.ಐ.ಚೊ ಕಾಳ್. ಚಡುಣೆಂ ಉಜ್ಯಾಚ್ಯಾ ಕಾಡಿಯೆಕ್ ಸರಿ ಕರುಯೆತಾ. ಜಶೆಂ ಎ-ಐ.ಚೊ ಬರೊ ವಾಪಾರ್ ಕೆಲೊ ತರ್, ಬರೆಂಚ್ ಪ್ರತಿಫಳ್ ಜೊಡುಂಕ್ ಸಾಧ್ಯ್ ಜಾತಾ. ತಶೆಂಚ್ ಖೊಟೊ ವಾಪಾರ್ ಕೆಲೊ ತರ್ ಮಾರೆಕಾರ್ ಪ್ರತಿಫಳ್ ಲಾಭ್ತಾ. ಪುಣ್ ಹಾಂಗಾಸರ್ ಕವಿ ಹ್ಯಾ ಎ.ಐ. ಸವೆಂ ಮತ್ ಆನಿ ಕಾಳಿಜ್ ಹ್ಯಾ ದೊನಾಂಚೆಂ ಮಹತ್ವ್ ಕಿತ್ಲೆಂ ಮ್ಹಳ್ಳೆಂ ಭೋವ್ ಅಪುರ್ಭಾಯೆನ್ ಚಿತ್ರಿತ್ ಕೆಲ್ಲೆಂ ದಿಸೊನ್ ಯೆತಾ. ಅಪ್ಲ್ಯಾ ಮತಿಚ್ಯಾ ಬುಧ್ವಂತ್ಕಾಚೆರ್ ಉಡ್ಕಾಣಾಂ ಘಾಲ್ಚ್ಯಾಧಿಂ ’ಕಾಳಿಜ್’ ನಾತ್ಲೆಲ್ಯಾ ಹ್ಯಾ ತಾಂತ್ರಿಕ್ ಕಟ್‌ಪುತ್ಳೆಚೆಂ ತೊಂಡ್ ಧಾಂಪಂವ್ಕ್ ಸಕ್ತಾ ಆನಿ ಎಕಾ ಕವಿತೆಚಿ ಸಕತ್ ಕಿತ್ಲಿ ಆಸೊಂಕ್ ಸಾಧ್ಯ್ ಮ್ಹಳ್ಳಿ ಅಪುರ್ಭಾಯೆನ್ ಗವಾಯ್ ದಿತಾ.

AI

ಮ್ಹಾಲ್ಗಡೆ ಆಮ್ಚೆ, ಭರೊನ್ ಆಸ್‌ಲ್ಲೆ 
ಜಾಯ್ತ್ಯಾ ದೆಣ್ಯಾಂನಿ!
ನಿಪುಣ್ ತೆ ಸರ್ವ್ ಕಾಮಾಂನಿ 
ಮೆಸ್ತ್ರಿ, ಕಲಾಕಾರ್, ಸುತಾರಿ
ಸಾಹಿತ್ಯ್, ಸಂಗೀತ್, ವಿಜ್ಞಾನಿ
ಆನಿಕ್‌ಯೀ ವಾವ್ರ್ ಕೆಲೊ ಜಾಯ್ತ್ಯಾ ಶೆತಾಂನಿ 
ಆನಿ
ತಾಂಚ್ಯೆ ಪಿಳ್ಗೆಕ್ ಹಾತಾಂತರ್ ಕೆಲೊ 
ಶೆಂಭೊರ್ ವಾಂಟ್ಯಾಂನಿ

ಆಜ್ ತಾಂಚೆಂ ಸಗ್ಳೆಂ ಕಾಮ್ ಕರ್‍ತಾ ಎ‌ಐ (AI)!
ಆಮ್ಕಾಂ ಕಿತೆಂ ಜಾಯ್ ತೆಂ
ಸಗ್ಳೆಂ ದಿತಾ ಖಂಯ್!
ಎಕ್ಲೆಂಚ್ ಕರ್‍ತಾ, ಎಕಾಚ್ ಖಿಣಾನ್
ಕಾಮಾಂ ಜಾಯ್ತಿಂ!

ಸಂಸಾರಾಂತ್ಲೊ ಲೋಕ್ ಸಗ್ಳೊ
ತಾಚ್ಯಾಚ್ ಮೊಗಾರ್ ಪಡ್ಲಾ ಖಂಯ್
ತಾಚೆವಿಶಿಂ ದುರ್ಸೊನ್ ಬರಯ್ಲ್ಯಾರ್ ಪುಣೀ,
ಆಮ್ಚ್ಯಾಚ್ ಆಂಗಾರ್ ಉಡ್ತಾತ್ 
ಆಜ್‌ಕಾಲ್ ವಾಟ್ಸಪ್ ಗ್ರೂಪಾಂನಿ!

ಚಿತ್ರ್‌ಕಾರಾಲಾಗಿಂ ವಿಚಾರ್‍ಲ್ಯಾರ್ 
ತಾಂಚಿ ಲದಿನ್;
’ಆಜ್ ಆಮ್ಚಿಂ ಪಿಂತುರಾಂ 
ಎಕೀ ಮನಿಸ್  ಪಳೆನಾ!
ಲೊಕಾಕ್ ಕೆದ್ನಾಂಯ್ ಆಮ್ಸೊರ್.
ವೇಳ್ ನಾ!
ದೆಕುನ್ ಸಗ್ಳಿಂ ತಾಕಾಚ್ ಭುಲ್ಲ್ಯಾಂತ್
ತಾಚೊಚ್ ಪಾಟ್ಲಾವ್ ಕರ್ತಾತ್!

ಸುತಾರಿ ಮ್ಹಣಾಲೊ, 
ಹಾಂವೆಂ ದೋನ್ ದಿಸಾಂನಿ ಕರ್‍ಚಿ ತಿ ಕಲಾ
ತೆಂ ಎಕಾಚ್ ಮಿನುಟಾನ್ ಸಂಪಯ್ತಾ!’
ಸಂಗೀತ್‌ಕಾರ್ ದುರ್ಸಾಲೊ, 
’ವರ್ಸಾಂ ಜಾಯ್ ಪಡ್ಲಿಂ ಮ್ಹಾಕಾ
ವ್ಹಾಜಂತ್ರಾಂ ಆನಿ ಪದಾಂ ಶಿಕುಂಕ್!’

ಗ್ರಾಫಿಕ್ ಡಿಸಾಯ್ನರ್ ಪುರ್ಪುರ್ಲೊ,
’ವಿವಿಧ್ ಡಿಸಾಯ್ನಾಂ ಶಿಕುಂಕ್
ಆನಿ ತಕ್ಲಿ ವ್ಹಾಪಾರ್‍ನ್ ಸೊಡೊಂವ್ಕ್
ಪಾಶಾರ್ ಕೆಲಿ ಅರ್ಧಿ ಜಿಣಿ 
ಝರೊನ್ ಗೆಲಿ ಪ್ರಾಯ್ !’

ನೀಜ್ ಕವಿ ಥೊಡೆ ಭೆಟ್ಲೆ ಮ್ಹಾಕಾ
ಆನಿ ತಾಣಿಂ ಸರ್‍ಸರಿ ಯೆಟ್ಲೆಂ ತಾಕಾ
"ಸಗ್ಳೆಂ ವರಸ್ ಚಿಂತುನ್ ಬರೊಂವ್ಚೊ ವಿಷಯ್ 
ಎಕೆಚ್ ಘಡಿಯೆ ಹಾಡ್ನ್  ದಿತಾ ತೆಂ ಎಕ್ಲೆಂ ಎ‌ಐ!"
ಮುಕ್ಕಾಲ್ ಜಿಣಿ ಉಭೊನ್ ಗೆಲಿ! 
ಪ್ರಗಟ್ಲೆ ಬೂಕ್ ಕಷ್ಟಾಂನಿ
ಏಕ್ - ದೋನ್..
ಬೊಲ್ಸ್ ಖಾಲಿ!"

ಉರ್ಭಾ ಚಡ್ಲಿ ಮ್ಹಾಕಾಯ್ 
ಉಗ್ತೆಂ ಕೆಲೆಂ ಮೊಬಾಯ್ಲಾರ್ ಎ‌ಐ
"ಸಾಂಗ್ ಮ್ಹಾಕಾ ವೆಗಿಂ ಸಾಂಗ್.
ಮತಿಂತ್ ಮ್ಹಜ್ಯಾ ಕಿತೆಂ ಆಸಾ ತೆಂ!"
ತಾಚಿ ಜಾಪ್:
"ಹಾಂವ್ ಎ‌ಐ
ಮನಿಸ್ ನ್ಹಯ್ 
ಕಶೆಂ ಸಾಂಗುಂ ತುಜ್ಯೆ ಮತಿ ಭಿತರ್‍ಲೆಂ ಬಾಯ್!’?
ತರ್‌ಯೀ ಕರ್ತಾಂ ಪ್ರೇತನ್
ತುಂ ಮತಿ ಭಿತರ್ ಚಿಂತುನ್ ಆಸಾಯ್ ಅಶೆಂ..
"ಕಿತ್ಲೊ ಬುದ್ವಂತ್ ಹೊ ಎ‌ಐ!
ಮ್ಹಜೊ ಅಂದಾಜ್ ಸಾರ್ಕೊಗಿ?"
"ನಾ. ಖಂಡಿತ್ ನ್ಹಯ್"
ಅಶೆಂ ತೀನ್ ಚ್ಯಾರ್ ದಿಲ್ಯೊ ಜಾಪಿ
ಆಕ್ರೇಕ್ ಸಲ್ವೊನ್ ಮ್ಹಣಾಲೆಂ
ತುಂಚ್ ಸಾಂಗ್.
ಹಾಂವೆಂ ಸಾಂಗ್ಲೆಂ...
ಮ್ಹಜಿ ಮತ್ ಅಶಿ ಚಿಂತುನ್ ಆಸಾ:
"ಎ‌ಐ ಕಸಲಿ ಜಾಪ್ ದೀತ್ ಮ್ಹಾಕಾ?"
ಎ‌ಐ ಯ್ ಹಾಸ್ತಾ ಆನಿ ಮ್ಹಣ್ತಾ..
"ಹಹಹ ಯೂ ಪೂಲ್‌ಡ್ ಮಿ ಕಂಪ್ಲೀಟ್ಲೀ!
ಯೂ ವಿನ್, ಐ ಸರೆಂಡರ್‌!"

ಉಪ್ರಾಂತ್ ಹಾಂವೆಂ ಮೆಸೆಜ್ ಕೆಲಿ.
ಕೊಣಾಕ್?
ಮ್ಹಜ್ಯಾ ಮಾಂಯ್ ಬಾಬಾಕ್!
ತಿಂ ಚಿಕ್ಕೆ ಪಯ್ಸ್ ಆಸಾತ್ 
ವಿಚಾರ್ಲೆಂ ತೆಂಚ್ ಸವಾಲ್ 
ತಾಣಿಂ ಸಾರ್ಕಿ ಜಾಪ್ ದಿಲ್ಲಿ ವಾಚುನ್
ಜಾಲಿಂ ಹಾಂವ್ ಕಂಗಾಲ್!
ಆಕ್ರೇಕ್ ತಾಣಿಂ ಜವಾಬ್ ದಿಲಿ
’ಕಾಳಿಜ್ ನಾಸ್ತಾಂ ಕಶೆಂ ಸಾಂಗ್ತಲೆಂ ತುಜೆಂ ಎ‌ಐ?’

(ಸಪ್ಟೆಂಬರ್ 2026)