ಕವಿತಾकविताPoem

Ujvaddachye vengent... ! [Andrew L D'Cunha]

[Kovita] Ujvaddachye vengent...! [Andrew L D'Cunha]

Chorak chondr sosana, zoxem kallokachea razant ujvadd koidi mholl'lleporim. Somsrant kallokant miromvchi souy korun jivitachi moza marn souyer poddleleank ujvadd soiro koso disonk puro. Dekun zauyet xikpi vorgant ascho monis legun az heach kallokache dolall zaleat ani ekameka kallok vantt'tat, ujvaddache chyure kortat ani kallokachech dore bhandtat.

Ho kallok amchea vicharancho asyet, amim borem/vaitt mhonn korchea songtencho asyet, zat-pranty-bhas-lipi asyet va her kitem-i..

Punn ginean, somzonni, borem, sot oxem ’ujvadd’ sobdhacher kaim thodde orth asat. Hea kaim thoddeant ’gunn’yi ek orth ascho hea kovitent barkayen polletana sustata. Konkonni khovita xetant ’omurth kovita’ (Abstract poetry) vachunk mellcheo bhovo oprup.

Ujvaddacho khoro motlob ’hea somsarant futt naschem kitench na’ mhonn dakomvcho. Ani tosolea barik barik futtimni oplim kirnnam rigomvchi xeathi aschi fokot ujvaddak matr. Hangasor osoleach ujvaddachea vengent don bhomvar kovin ubhe keleat; altoddi ani poltoddi. Narl, suknnim ani lharam kaim khellgaddi astit punn hea degen zhoddon poddlolo ek narl, to vinchunk opleo oskok bonchimni proitn korchim suknnim, toxench to vinchunk‌ch zai mholl'llem jid'dan vochun doreachea lharak sangun yemvchem ani tem lhar soit hea suknneanchi vinoti somzun tea narlak toddir paumvchem ani ho sontos vornnunk mollbar suknneancho purxamv... Vha! kitem devasamvachem nitoll chintop. Bhouxa kovi anddryu thaun matr osolem ek chintop kovitemni hoddunk sadhy konn'nna.

Kovitechy sobhayechi unchli ghoddi yeta okherichea koddveant. Oputt axavad, zoxem altoddi ek narl zhoddloki toxench onyeka toddir soit ek nark zhoddon poddtalo mhonncho axavad...

Punn hem fokot ujvaddachy vengent matr sadhy.

[Kovita] Ujvaddachye vengent...! [Andrew L D'Cunha]

Ujvaddachye vengent... !

Ujvaddachye vengent

doreak malvol'lea maddantlo

ek narl

zhoddon poddlo

suknnim thoddim bhomvtim zomlim

bonchien tanchea vinchunk zalemna

thoddim doreak ubhlim, ani

lharank sangon ailim

ek vhodd lhar ailem

narlak ukoln vorn gelem

mollbar suknneancho purxamv

onyeka toddik...

Ani thoddea vorsamni

tea onyeka toddir

doreak malval'lea maddacho

narl zhoddon poddtolo

ujvaddachye vengent

- Andrew L. D’cunha [Febrer, 2025]

Andrew L. D'Cunha: Vrit'ten ’Finance Consultant’ vaur korun ascho anddru el. Ddi’kunha konknnecho namnnecho kovi, kannyegar. ’vhollu vhollu vhall vhallea’, ’onzurachem pan’, ’ayeracho buk’ mholl'lle tin kovitazome porgottleat. Kornattok konknni sahity okaddemi, toxem vimola poi Puroskar, Sondex Puroskar haka favo zaleat. Aplea kuttmasovem sod'deak mongllurant vosti korun osa.

Borovpi

Andrew L. Dcunha

1984 (Pattlea 42 vorsam) thaun konknnent sahity rochun ascho Andrew L Dcunha ek lokamogall kovi. Gamvan Gurpur Kin'nikombollacho to otam Bejai vosti korn asa. Devadhin Denis ani Mary Dcunha hanchea sat bhurgeam poiki to nimanno. Tannem 1000 voir kovitam, 150 ko mikvon lekhnam ani 30 mottveo kannio boroileat. ’Vhollu Vhollu Vhall Vhallea’ (2004 - Ashawadi Prakashan), ’Onzurachem Pan’ (2013 - Kovita Trust) ani ’Ayeracho Buk’ (2014 - Karnataka Konknni Sahity Okaddemi) tache prokttit kovita zome. Tachea "Onzurachem Pan" Pustokak Karnataka Konknni Sahity Okaddemi proxsoti, AIKWO (Okhil Bharot Konknni Boroupeancho Ektar Pursokar), Vishwa Konkani Kendra-cho Vimala V. Pai Kovita Pursokar ani Dr.T.M.A.Pai Foundation-acho Pustok Pursokar taka lableat. Ailevar tachea "Ujvaddachye Vengent" kovita pustokak Karnataka Konknni Sahity Proxsoti lablea. 2023 vorsachi Rajy Mott'ttachi “Sondesh Konknni Sahity Proxsoti” taka lablea.

Mongllur Akax‍vanni thaun sumar 40 konknni kar‍yokromam tannem sador keleant. Sumar 38 vorsam adim Raknno potrar ‘Andru Mam'’ likhnne namvan bhurgeancho somsar vibhag tannem choloun vhela. Amcho Yuvok potrar nirvahok sompadok zaun vaur dila. "Izoicho Kollo" potracho sompadok zaun vavur‍la. Daiji Dubai Boroupeanchea Ektaracho Sompadok zaun vaur dila. Maai‍bhaas.com zalli zagear, Raknno, Dirvem, Ujvadd potramni kovita onkonn tannem choloilam. Raknnear tacho "Kas Somsar" onkonn, Noman Jezu Ballok potrar "Khas Somsar" onkonn oni Amcho Sondex potrar sokallik lekhnam sorag prokott zaun asat. Tannem att pustokank prostaun boroilam. Vevegllea konknni kovita spordeancho, konknni kovita sador sortencho toxench kornattok konknni sahity okaddemichea pustok proxsotecho voroinnar zaun vaur dila. Gamvant ani porgamvant sobar kovitagoxtti tannem choloun veleat. Kovitam vixim sobar probondh monddon keleat ani upneas dileat. “Kovita Trust” cho to trustee zaun asa. Kovita.com zalli zagear sompadokiyam to boroita.

All 14 pages by this writer