ಕವಿತಾकविताPoem

Prime Time [Andrew L D'Cunha]

[Kovita] Prime Time [Andrew L D'Cunha]

Amim amkam devo somestank. Dekun zhuz va loddai, konnem konnak marlam va chirlam tem konnak kitem poddon gelam?. Zhuz va dombi khonchyai somajek bholaikechem nhoi. Hantum zamvchem luksann fokot duddvan mapchem nhoi, bogor monxaponnak zamvchem luksann utraunko utram mellchim nant.

’zhuz’ amkam sorvank lagxilean onbhog korunk mellonk na dekun amkam tacho porinnam' kollit na. Punn zhuzachea vellar porgamvant kam' korn ascho amcho kaim lok zhuz mhollear kitem mhonn bhovo lagxilean somzon aila. Punn konkonni sahiteant to onbhog ayil'lo bhovo unno. Punn unneantlea unneant soit kovi anddryucheo kaim thoddeo kovita ani kotha hamvem pattlea ponchvis vorsamni vachleat. Zamv ominachea rupar, zamv her bhurgeachea rupar; jeo irakan kuveyttacher zhuz manddun aslevellar zal'lea omaik bhurgeanchea khunicher boroyil'leo kovita/kotha. Koronachea vellar soit anddryun boroyil'li kovita ’pen'nu beka pen'nu (ujvaddachye vengent pustokant asa)’ zamv, ani atam hangasor ’proim' ttaim'’ soit osoleach tallon naschea masum' bhurgeanchem rudan.

Hi kovita kaim kitem sangon veta. Kom-i‌gi xabitayen ani mojen jiemvche liddor jednam zhuz manddtana oni kom-i‌gi jieun aschim ttivicher ti bhatmi polletat. Somosso koso zamvcho jedoll pason opnnak tacho probhavo poddana zait?. Ek kovita rosik zaunascheak hi kovita khorich zaun lamb kall poreant motichea podd'deant khonchon urtoli mhonncheak dubhavo na.

[Kovita] Prime Time [Andrew L D'Cunha]

Prime Time

Proim' ttaim' vhallta rogtabori

uzo

dhumvor

Bhurgo polleta.

"poppa... Konn tori liddor

viddio gem' khellta?"

Bapui -

osohaikponnacho ostoment

moun

TV podd'dear

zhoglanne

knniponn utt'ta, visfott

ek xher sormonn!

"Ddadda, kiteak viddio gemaporim

dista hem.?"

Bapui ttivicho avaz unno korta.

Punn pauna.

Bhurgea kallzant

kitem tori moddcho avaz

zo khoinchoch botton dablear

portun ghoddsunk zaina!.

Bhurgo ghayelea bhurgeak polleta

roddta!

“UNDO kor,

RESET kor ddadda pliz”!

- Andrew L. D’cunha [Mar, 2026]

Andrew L. D'cunha: Vrit'ten ’Finance Consultant’ vaur korun ascho Andrew L Dcunha Konknnecho namnnecho kovi, kannyegar. ’Vhollu vhollu vhall vhallea’, ’Onzurachem pan’, ’Ayeracho Buk’ mholl'lle tin kovitazome porgottleat. Karnataka Konknni Sahity okaddemi, toxem Vimala Pai Foundation-acho Puroskar, Sandesha Puroskar haka favo zaleat. Aplea kuttmasovem sod'deak mongllurant vosti korun osa.

Borovpi

Andrew L. Dcunha

1984 (Pattlea 42 vorsam) thaun konknnent sahity rochun ascho Andrew L Dcunha ek lokamogall kovi. Gamvan Gurpur Kin'nikombollacho to otam Bejai vosti korn asa. Devadhin Denis ani Mary Dcunha hanchea sat bhurgeam poiki to nimanno. Tannem 1000 voir kovitam, 150 ko mikvon lekhnam ani 30 mottveo kannio boroileat. ’Vhollu Vhollu Vhall Vhallea’ (2004 - Ashawadi Prakashan), ’Onzurachem Pan’ (2013 - Kovita Trust) ani ’Ayeracho Buk’ (2014 - Karnataka Konknni Sahity Okaddemi) tache prokttit kovita zome. Tachea "Onzurachem Pan" Pustokak Karnataka Konknni Sahity Okaddemi proxsoti, AIKWO (Okhil Bharot Konknni Boroupeancho Ektar Pursokar), Vishwa Konkani Kendra-cho Vimala V. Pai Kovita Pursokar ani Dr.T.M.A.Pai Foundation-acho Pustok Pursokar taka lableat. Ailevar tachea "Ujvaddachye Vengent" kovita pustokak Karnataka Konknni Sahity Proxsoti lablea. 2023 vorsachi Rajy Mott'ttachi “Sondesh Konknni Sahity Proxsoti” taka lablea.

Mongllur Akax‍vanni thaun sumar 40 konknni kar‍yokromam tannem sador keleant. Sumar 38 vorsam adim Raknno potrar ‘Andru Mam'’ likhnne namvan bhurgeancho somsar vibhag tannem choloun vhela. Amcho Yuvok potrar nirvahok sompadok zaun vaur dila. "Izoicho Kollo" potracho sompadok zaun vavur‍la. Daiji Dubai Boroupeanchea Ektaracho Sompadok zaun vaur dila. Maai‍bhaas.com zalli zagear, Raknno, Dirvem, Ujvadd potramni kovita onkonn tannem choloilam. Raknnear tacho "Kas Somsar" onkonn, Noman Jezu Ballok potrar "Khas Somsar" onkonn oni Amcho Sondex potrar sokallik lekhnam sorag prokott zaun asat. Tannem att pustokank prostaun boroilam. Vevegllea konknni kovita spordeancho, konknni kovita sador sortencho toxench kornattok konknni sahity okaddemichea pustok proxsotecho voroinnar zaun vaur dila. Gamvant ani porgamvant sobar kovitagoxtti tannem choloun veleat. Kovitam vixim sobar probondh monddon keleat ani upneas dileat. “Kovita Trust” cho to trustee zaun asa. Kovita.com zalli zagear sompadokiyam to boroita.

All 14 pages by this writer