ಕವಿತಾकविताPoem

प्रैम टायम [आंड्रू एल. डी’कुन्हा]

[कविता] प्रैम टायम [आंड्रू एल. डी’कुन्हा]

आमीं आमकां देव समेसतांक. देकून झूज वा लडाय, कोणें कोणाक मारलां वा चिरलां तें कोणाक कितें पडोन गेलां?. झूज वा दोंबी खंच्याय समाजेक भलायकेचें न्हय. हांतूं जांवचें लुक्साण फकत दुडवान मापचें न्हय, बगर मनशापणाक जांवचें लुक्साण उत्रावंक उत्रां मेळचीं नांत.

’झूज’ आमकां सर्वांक लागशिल्यान अनभोग करुंक मेळोंक ना देकून आमकां ताचो परिणाम कळीत ना. पूण झुजाच्या वेळार पर्गांवांत काम कर्न आसचो आमचो कांय लोक झूज म्हळ्यार कितें म्हण भोव लागशिल्यान समजोन आयला. पूण कोंकणी साहित्यांत तो अनभोग आयिल्लो भोव उणो. पूण उण्यांतल्या उण्यांत सयत कवी आंडऱ्यूच्यो कांय थोड्यो कविता आनी कथा हांवें पाटल्या पंचवीस वर्सांनी वाचल्यात. जांव अमीनाच्या रुपार, जांव हेर भुर्ग्याच्या रुपार; ज्यो इराकान कुवेयटाचेर झूज मांडून आसलेवेळार जाल्ल्या अमायक भुर्ग्यांच्या खुनिचेर बरयिल्ल्यो कविता/कथा. कोरोनाच्या वेळार सयत आंडऱ्यून बरयिल्ली कविता ’पेन्नू बेका पेन्नू (उज्वाडाच्ये वेंगेंत पुसतकांत आसा)’ जांव, आनी आतां हांगासर ’प्रैम टायम’ सयत असल्याच ताळोन नासच्या मासूम भुर्ग्यांचें रुदान.

ही कविता कांय कितें सांगोन वेता. कंय‌गी शाबीतायेन आनी मजेन जियेंवचे लीडर जेदनां झूज मांडताना अनी कंय‌गी जियेवन आसचीं टिविचेर ती भात्मी पळेतात. समस्सो कसो जांवचो जेदोळ पासोन अपणाक ताचो प्रभाव पडाना जायत?. एक कविता रसीक जावनासच्याक ही कविता खरीच जावन लांब काळ पऱ्यांत मतिच्या पडद्यांत खंचोन उर्तली म्हणच्याक दुभाव ना.

[कविता] प्रैम टायम [आंड्रू एल. डी’कुन्हा]

प्रैम टायम

प्रैम टायम व्हाळता रग्ताबरी

उजो

धुंवोर

भुर्गो पळेता.

"पप्पा... कोण तरी लीडर

वीडियो गेम खेळता?"

बापूय -

असहायकपणाचो असतमेंत

मौन

टिवी पडद्यार

झगलाणे

क्णिपण उटता, विस्फोट

एक श्हेर सोर्मोण!

"डाडा, कित्याक विडियो गेमापरीं

दिसता हें.?"

बापूय टिविचो आवाज उणो कर्ता.

पूण पावना.

भुर्ग्या काळजांत

कितें तरी मोडचो आवाज

जो खंयचोच बटन दाबल्यार

पर्तून घडसुंक जायना!.

भुर्गो घायेल्या भुर्ग्याक पळेता

रडता!

“अन डू कर,

री-सेट कर डाडा प्लीज”!

बरवपी

आंड्रयू एल. डिकुन्हा

१९८४ (पाटल्या ४२ वर्सां) थावन कोंकणेंत साहित्य रचून आसचो आंडऱ्यू एल. डिकुन्हा एक लोकामोगाळ कवी. गांवान गुर्पूर किन्निकंबळाचो तो अतां इजय वसती कर्न आसा. देवाधीन डेनीस आनी मेरी डिकुन्हा हांच्या सात भुर्ग्यां पयकी तो निमाणो. ताणें १००० वयर कवितां, १५० क मिकवोन लेखनां आनी ३० मटव्यो काणियो बरयल्यात. ’व्हळू व्हळू व्हाळ व्हाळ्या’ (२००४ - आशावादी प्रकाशन), ’अंजुराचें पान’ (२०१३ - कविता ट्रसट) आनी ’आयेराचो बूक’ (२०१४ - कर्नाटक कोंकणी साहित्य अकाडेमी) ताचे प्रकटीत कविता पुंजे. ताच्या "अंजुराचें पान" पुसतकाक कर्नाटक कोंकणी साहित्य अकाडेमी प्रशसती, AIKWO (अखील भारत कोंकणी बरोवप्यांचो एक्तार पुरसकार), विमला वी. पै विश्व कोंकणी कविता पुरसकार आनी डा. टी. एम. ए. पै पुसतक पुरसकार ताका लाबल्यात. आयलेवार ताच्या "उज्वाडाच्ये वेंगेंत" कविता पुसतकाक कर्नाटक कोंकणी साहीत प्रशसती लाबल्या. २०२३ वर्साची राज्य मट्टाची “संदेश कोंकणी साहित्य प्रशसती” ताका लाबल्या.

मंगळूर आकाश‍वाणी थावन सुमार ४० कोंकणी कार‍यक्रमां ताणें सादर केल्यांत. सुमार ३८ वर्सां आदीं राकणो पत्रार ‘आंद्रू माम’ लिखणे नांवान भुर्ग्यांचो संसार विभाग ताणें चलवन व्हेला. आमचो युवक पत्रार निर्वाहक संपादक जावन वावर दिला. "इजयचो कळो" पत्राचो संपादक जावन वावूर‍ला. दायजी दुबाय बरवप्यांच्या एक्ताराचो संपादक जावन वावर दिला. माय‍भास.कोम जाळी जाग्यार , राकणो, दिर्वें, उज्वाड पत्रांनी कविता अंकण ताणें चलयलां. राकण्यार ताचो "कास संसार" अंकण, नमान जेजू बाळोक पत्रार "खास संसार" अंकण अनी आमचो संदेश पत्रार सकाळीक लेखनां सराग प्रकट जावन आसात. ताणें आट पुसतकांक प्रसतावन बरयलां. वेवेगळ्या कोंकणी कविता स्पर्द्यांचो, कोंकणी कविता सादर सर्तेंचो तशेंच कर्नाटक कोंकणी साहित्य अकाडेमिच्या पुसतक प्रशसतेचो वरयणार जावन वावर दिला. गांवांत आनी पर्गांवांत सबार कवितागोश्टी ताणें चलवन वेल्यात. कवितां विशीं सबार प्रबंध मंडन केल्यात आनी उपन्यास दिल्यात. “कविता ट्रसट” चो तो ट्रसटी जावन आसा. कविता.कोम जाळी जाग्यार संपादकीयां तो बरयता.

All 14 pages by this writer