ಅಣುಯುಧ್ದ್ [ ಪ್ರಕಾಶ್ ಪಡ್‌ಗಾಂವ್‌ಕರ್]

ಮನೀಸ್ ಶಿಕ್ಪಿ ಜಾಲ್ಲೆಪರಿಂಚ್ ವಿನಾಶಿಕಾರಿ ಜಾಲಾ, ದೆಕುನ್ ಸಂಸಾರಾಂತ್ ಅಪ್ಲೆಂ ವ್ಹಡ್‌ಪಣ್ ಧಾಕವ್ಪಾಕ್ ಲಾಗುನ್ ಹೆರಾಂಚೆಂ ನಾಸ್ ಕರುಂಕ್ ವೆವೆಗಳ್ಯೊ ವಾಟೊ ಸೊಧುನ್ ಆಸಾ. ಆಸೊಂಕ್ ಮನ್ಶಾಕ್ ಸರ್ವ್ ಆಸಾ; ಶಿಕಪ್ ಆಸಾ, ಸಮ್ಜಣಿ ಆಸಾ, ಬರೆಂ-ವಾಯ್ಟ್ ಮ್ಹಳ್ಳಿ ಪ್ರಜ್ನಾ ಆಸಾ ಪುಣ್ ಇತ್ಲೆಂ ಸರ್ವ್ ಆಸೊನ್‌ಯೀ ತಿತ್ಲೆಚ್ ಮಾಪಾಚೆಂ ಖೊಟೆಂಯೀ ಅಸಾ.

ಕವಿ ಬಾಬ್ ಪ್ರಕಾಶ್ ಪಡ್‌ಗಾಂವ್‌ಕರ್ ಗೊಂಯ್ಚೊ ನಾಮ್ಣೆಚೊ ಕವಿ. ಹಾಚ್ಯೊ ಚಡ್ತಾವ್ ಕವಿತಾ ಸಾಮಾಜಿಕ್ ಕಾಳ್ಜೆಚ್ಯೊ ಕವಿತಾ. ವಾಚಪ್ಯಾಕ್ ಚಿಂತೂಂಕ್ ಕರ್ಚ್ಯೊ ಕವಿತಾ. ಹಾಂಗಾಸರ್‌ಯೀ ಏಕ್ ಅಸಲಿಚ್ ಕವಿತಾ ಆಸಾ, ಜಾಂವ್ಕ್ ಪುರೊ ಹಿ ರಾಜಕೀಯ್ ಚಿಂತ್ಪಾಚಿ ಕವಿತಾ. ಪುಣ್ ಹ್ಯಾ ಕವಿತೆಚಿ ತಾಂಕ್ ಆನಿ ಗುಂಡಾಯ್ ಮಾಪುಂಕ್ ತುಕಾಚ್ ಸೊಡ್ತಾಂ.

[ಕವಿತಾ] ಅಣುಯುಧ್ದ್ [ಪ್ರಕಾಶ್ ಪಡ್‌ಗಾಂವ್‌ಕರ್]

ಅಣುಯುಧ್ದ್

ಅನಾಮೀಕ್ ಶಕ್ತಿನ್

ಕೆಲ್ಲಿ ನಿರ್ಮಾನಿ ಧರ್ತ್‌ರೆಚಿ

ವಾವ್ರ್ ತಾಚ್ಯಾ ಪ್ರಯೊಗ್‌ಶಾಲೆಚೊ

ಘೆತ್ಲೊ ಮನ್ಶಾಂನಿ ಅಪ್ಲ್ಯಾ ಹಾತಾಂತ್

ಅದ್ಭೂತ್ ತಾಂಕಿನ್ ಮೊನ್ಶಾಂನಿ

ಕೆಲ್ಲಿ ಸೌಂಶೊಧನಾಂ

ದೊಳೆ ದಿಪ್ಕವ್ಪಿ*

ಮನಿಸ್ ಜಿಣೆಚ್ಯಾ ಉತ್ಥಾನಚಿ

ಆಯ್ಜ್ ತೊಚ್ ಮನೀಸ್

ನಿರ್ಮುನ್ ವಿನಾಶ್‌ಕರಿ ಅಣುಬೊಂಬ್

ಘೆವ್ನ್ ತೊ ಹಾತಾಂತ್ ಫುಶಾರ್ತಾ**

ಝೂಜ್ ಕರೂಂಕ್ ಫುರ್‌ಫುರ್ತಾ

ಅಬುದ್ದ್‌ಪೊಣಾನ್ ತೊ ಮನೀಸ್ ಎಕ್ ದೀಸ್

ಅಣುಯುಧ್‌ದ ಘಡೊಂವ್ಚೊನಾ

ಕರ್ಚೊನಾ ಡೂಪ್ ಧರ್ತರೆಚೊ***

ಶಾಶ್ವತಿ ದಿಂವ್ಕ್ ಕೊಣ್ ಸಕಾನಾ.

* ದಿಪ್ಕವ್ಪಿ = ದೊಳೆ ಧಾಂಪಂವ್ಚೊ, ** ಫುಶಾರತಾ = ಬಡಾಯ್ ಉಲಯ್ತಾ, *** ಡೂಪ್ = ನಾಸ್

- ಪ್ರಕಾಶ್ ಪಡ್‌ಗಾಂವ್‌ಕರ್ [ಜನೆರ್, 2019]

ಪ್ರಕಾಶ್ ಪಡ್‌ಗಾಂವ್‌ಕರ್: ನಾಮ್ಣೆಚೊ ಕವಿ, ವಿಶ್ಲೇಷಕ್ ’ಉಜ್ವಾಡಾಚಿಂ ಪಾವ್ಲಾಂ’, ’ವಾಸ್ಕೋಯನ್’, ’ಹಾಂವ್ ಮನೀಸ್ ಅಶ್ವಥಾಮೊ’, ’ಕಾಳ್-ರೇಲ್ವೆಚ್ಯೊ’, ’ಮನ್-ಹಾರಶಾಂಚ್ಯೊ’, ’ಪಾವಸ್-ಪಯಣಾಚ್ಯೊ’, ’ಸರ್ಗ್ ಧಾಡಪಾಕ್ ಧರ್ತೆಚೊ’, ’ವ್ಹಂವತೀ ನ್ಹಂಯ್ ಕಾಳಾಚೀ’, ’ಬ್ರಮ್ಹಾಂಡ್ - ಯೋಗಿ ಚಿರಂತಾನಚೊ’ ಹಾಚೆ ಕವಿತಾಜಮೆ. ಕೇಂದ್ರ್ ಸಾಹಿತ್ ಅಕಾಡೆಮಿಚೊ ಪುರಸ್ಕಾರ್ ಜೊಡ್ಪಿ, ಟಿ. ಎಮ್. ಎ. ಪೈ ಪುರಸ್ಕಾರ್, ಕಲಾ ಅಕಾಡೆಮಿ ಪುರಸ್ಕಾರ್ ಹಾಕಾ ಲಾಭ್‌ಲ್ಲೆ ಪ್ರಮುಕ್ ಪುರಸ್ಕಾರ್.