आब आनी निसण (- सलोमी मियापदव, मोगर्नाड)

[कविता] आब आनी निसण  (-  सलोमी मियापदव, मोगर्नाड)

वेळाकाळा तेकीद मनशाजिवीत बदल्ता, मनशान कांय तेंपाथावन पाळून आयिल्ल्यो रिती रिवाजी, कर्न्यो बदल्तात. समाजेंत कवी मात्र एक असलें संयब, जें वेळाकाळाक सरी जावन अपली लिखणी उकल्ता आनी सर बदलावणेंत मनशान आपणायिल्ल्या तशेंच होगडायिल्ल्या मनशामोलांक उकलन धर्ता. ह्या वेळाक अपुर्भायेन प्रतिनिधित्व कर्च्यो कविता आंडऱ्यू एल. डी’कुन्हान बरयल्यात. ताच्याच कवितेच्या प्रभावांत आस्येत पूण आयलेवार अपल्या कवितेच्या देण्यावर्वीं अख्ख्या कोंकणी कविताशेतांत पर्जळता बाय सलोमी मियापदव (मोगार्नाड). तिच्यो कविता मोटव्यो पूण दिर्साळ मिर्सांगेपरीं तीक्ष्ण. जशें दिर्साळ मिर्सांग चाबलेल्यांक लांब काळ पऱ्यांत तोंड हुलोप आसताकी, तशेंच हिची मोटवी कविता सयत वाचप्याच्या काळजा-मनांत जिवी उर्ता. एक बरी कविता म्हणच्याक हीच गवाय.

गोंयची बाय उर्जिता भोभेन सयत ’म्हाळो’ म्हळ्ळी अपुर्भायेची कविता बरयिल्ली, तांतूं पुंजावन दवरलेल्यो सोभीत यादी आसलल्यो. हांगाशर बाय सलोमिच्या कवितेंत सयत म्हाळो आसा पूण एक निसण आसा. ह्या निसणेंत चडून भातेणाभितर लिपवन केळ्यासाल अपल्या गोर्वांक खावंवच्या आबाची दयळाय खरेंच जावन वाचप्याच्या काळजाक आपडता. भोव सोंपी दिसची ही कविता कांय थोड्योश्यो काणियो सांगून वेतात आनी कवितेच्या सोभायेक आट सुरांनी वर्णिता. बाकिचें पार्कुंक तुकाच सोडतां.

[कविता] आब आनी निसण  (-  सलोमी मियापदव, मोगर्नाड)

आब आनी निसण

आबाक बारा गोर्वां

गोर्वांक एक गोटो

गोट्याक एक म्हाळो

म्हाळ्याक एक निसण!

गोर्वांक भातेण घाल्च्याक तो

घड्येन घडिये

म्हाळ्याक चडतालो

नात्रांक आयलो दुबाव

देकून केलो पाटलाव

दयाळ आब

भातेणा संगीं

केळ्यांची साल‌यी

गोर्वांक खावयतालो!

-  सलोमी मियापदव, मोगर्नाड. [फेब्रेर, २०२५]

सलोमी मियापदव, मोगर्नाड: कोंकणी, कानडी भासेंनी कविता, चुटुकां, पिंतुरां तशेंच हेर रितिचीं बर्पां बरयता. तिनशांवयर कविता बरयल्यांत, कविगोश्टिंनी त्यो सादर केल्यात. हिच्या कोंकणी कवितेंचें द्वी-हिच्या ’आटवो सूर’ कविता संग्रहाक कर्नाटक कोंकणी साहित्य अकाडेमिचो पुरसकार लाभला. हिणें कविगोश्टिचें अध्यक्ष‌पण चलयलां.