[खबर]  कोंकणी वाचन विश्वांतल्यान नवे वाचपी आनी बरोवपी तयार जातले - जुजे लॉरेन्सो

कोंकणी वाचन विश्वांतल्यान नवे वाचपी आनी बरोवपी तयार जातले - जुजे लॉरेन्सो

कोंकणी भाशा मंडळ, गोंयच्या कोंकणी वाचन विश्वाचें उक्तावण.

“पुस्तक हें आयदन, तातूंत विचारांचें रांदप जाता. आयदनां पोन्नी जातात पूण विचार न्हय. ह्या व्यासपिठा वरवीं वाचपी आनी बरोवपी तयार जातले आनी अशें केल्यार कोंकणीचो दर्जो वयर सरतलो अशी आस्त लेखक जुजे लॉरेन्सो हांणी उक्तायली. कोंकणी भाशा मंडळाच्या कोंकणी वाचन विश्वाचें उक्तावण केले उपरांत ते उलयताले. आपल्या उलोवपांत पुस्तकांच्या वाचनाचें म्हत्व आनी पुस्तकांचेर चर्चा जावपाक जाय अशें मत तांणी मांडलें. 8 सप्टेंबर 2020, आंतरराष्ट्रीय साक्षरताय दिसा निमतान कोंकणी भाशा मंडळान, कोंकणी वाचन विश्वाचें उक्तावण केलें.

भुरग्यांक आपले आवयभाशेन शिकोवंक जाय जाल्यारच ते भाशेची उदरगत जातली: कमल किशोर शर्मा

उक्तावणा उपरांत राजस्थानाचे लेखक आनी शिक्षणवीद कमल किशोर शर्मा हांणी अध्यापन आनी लेखना खातीर साहित्य वाचनाचें म्हत्व ह्या विशयाचेर व्याख्यान दिलें. कोंकणी भाशा मंडळा वरी हेरांनी लेगीत आपले मायभाशे खातीर सदांच वावरूंक जाय. भुरग्यांक आपले आवयभाशेन शिकोवंक जाय जाल्यारच ते भाशेची उदरगत जातली अशें तांणी सांगलें.

खंयच्याय झाडाचें मूळ कापून उडयलें जाल्यार ताचीं पानां फकत थोड्याच दिसा खातीर बरीं पाचवींचार आसतलीं, कांय दिसांनी तीं गळून पडटलीं. हेच तरेन भुरग्यांचे बाबतींत आनी भाशेचे बाबतींत जाता.

भुरग्यांची आपली स्वताची लायब्ररी आसूंक जाय. तांकां ल्हानपणा सावन वाचनाची संवय लावंक जाय. साहित्य वाचल्यारच जिवनाचें सार्थक जातलें अशें मत तांणी मांडलें.

सुरवातीक कोंकणी भाशा मंडळाची अध्यक्ष अन्वेषा सिंगबाळ हांणी प्रास्तावीक करतना मंडळाचो उद्देश सांगलो. माध्यमां बदल्ल्यात पूण वाचन उणें जावंक ना, आनी ताका बळगें दिवपाक कोंकणी भाशा मंडळान वाचन विश्व सुरू केला. कोंकणी वाचन विश्व व्यासपिठा खाला सादरीकरण, चर्चा सत्रां, लेखकांच्यो मुलाखती जातल्यो अशें तांणी सांगलें.

हे कार्यावळीक 180 परस चड प्रेक्षक गुगल मीट वरवीं जोडिल्ले, ते भायर फेसबूकाचेर प्रेक्षक लायव्ह आशिल्ले.

कार्यावळीचें संयोजन सोनिया गडकार जाल्यार उपकाराचें उलोवप पुर्वा गुडे हांणी केलें. शलाका देसाय हांणी मुखेल सोयरे जुजे लॉरेन्सो हांची वळख केली आनी सबिना मुल्ला हांणी व्याख्याते कमल शर्मा हांची वळख करून दिली.

‘वज्रलिखणी’ चेर चर्चा सत्र 22 सप्टेंबराक 2020 दिसा वाचन विश्वाची पयली कार्यावळ गुगल मीटाचेर जातली. कोंकणीचे म्हापुरस शणै गोंयबाब हांच्या बरपांचेर भासाभास जातली. लेखक शांताराम वालावलीकार हांणी संपादीत केल्ल्या वज्रलिखणी ह्या पुस्तकाचेर ही कार्यावळ जातली.