[ಜಿಣ್ಯೆ ಅನ್ಭೋಗಾಚೆಂ]

ಜಿಣ್ಯೆ ಅನ್ಭೋಗಾಚೆಂ ಕಾಪ್ ಜೆದ್ನಾಂ ಪ್ರಾಮಾಣಿಕ್ ರಿತಿನ್ ವ್ಹಾಳೊನ್ ಯೆತಾನಾ ವಾಚ್ಪ್ಯಾಚ್ಯಾ ಕಾಳ್ಜಾಸವೆಂ ತೆಂ ಸ್ಪಂದನ್ ಕರ್ತಾ ಮಾತ್ ನ್ಹಯ್, ಅಪ್ಶಿಚ್ಚ್ ಕವಿತಾ ಉದೆತಾ. ಅಸಲಿಂ ಥೊಡಿಂ ಅಪ್ರೂಪ್ ಕವಿತಾ ಕೊಂಕ್ಣೆಂತ್‌ಯೀ ವಾಚುನ್ ಆಯಿಲ್ಲೊ ಉಡಾಸ್ ಅಜೂನ್ ಜಿವೊ ಆಸಾ; ಡೋಲ್ಫಿ ಕಾಸ್ಸಿಯಾಚೆಂ ’ಕೊಂಕ್ಣಿ ಬರಯ್ಣಾರ್’ ತಾಂತ್ಲಿ ಏಕ್ ಕವಿತಾ ತರ್ ಆತಾಂ ಕೊಂಕ್ಣಿ ವಾವ್ರ್ ಕರ್ನ್ ಲೊಕಾಮೊಗಾಳ್ ಜಾಲ್ಲಿ ಗ್ಲೇಡಿಸ್ ರೇಗೊಚಿ ಹಿ ಕವಿತಾ ಕಾಂಯ್ ವೆಗ್ಳಿ ನ್ಹಯ್.

ಕೊಂಕ್ಣಿ ವಾವ್ರ್ ಕರ್ಚೆ/ಕೆಲ್ಲೆ ಕೊಂಕ್ಣಿ ಲೊಕಾಚ್ಯಾ ನದ್ರೆಂತ್ ಸಸಾರ್ - ಹೆಂ ಕಾಂಯ್ ನವೆಂ ನ್ಹಯ್. ಪುಣ್ ಸಸಾರ್ ಜಾವ್ನ್‌ಯೀ ಗಾಂವಾಂತ್ ತಶೆಂಚ್ ಪರ್ಗಾಂವಾಂತ್ ಹೊ ವಾವ್ರ್ ಕರುಂಕ್ ವಿಶೇಸ್ ತ್ರಾಣ್ ಗರ್ಜ್ ಆಸಾ. ಎಕಾ ತೆಂಪಾರ್ ಹರ್ಯೆಕಾ ಫೆಸ್ತಾಂನಿ ವಚುನ್ ಕೊಂಕ್ಣಿ ಬೂಕ್ ವಿಖುನ್ ಆಸ್‌ಲ್ಲಿ ಗ್ಲೇಡಿಸ್ ಬಾಯ್ ಆಜ್‌ಕಾಲ್ ಥಕ್ಲ್ಯಾ, ಕಲ್ಯಾಣ್‌ಪುರಾಂತ್ಲ್ಯಾ ಒಝೋನಾಮ್ ಆಶ್ರಮಾಂತ್ ವಸ್ತಿ ಕರ್ತೆಲ್ಯಾ ಹಿಕಾ ಆಜ್ ಮೆಳುಂಕ್ ಯೆತೆಲಿಂ ನಾಂವ್, ಫೊನಾರ್ ಉಲಯ್ತೆಲಿಂ ನಾಂತ್, ಎಕಾ ತೆಂಪಾರ್ ಕೊಂಕ್ಣಿ ಲೋಕ್ ಆಮ್ಚೆಂಚ್ ಕುಟಾಮ್ ಮ್ಹಣುನ್ ಪಾತ್ಯೆವ್ನ್ ಬಸ್‌ಲ್ಲ್ಯಾ ಹಿಕಾ ಆಜ್ ಚ್ಯಾರ್ ವೊಣದಿ ಮಾತ್ರ್ ಪಳೆತಾತ್, ರಾಕ್ತಾತ್ ಆನಿ ಕಿತೆಂಗೀ ಸಾಂಗ್ತಾತ್ ಮ್ಹಣ್ ಭಗ್ಲೆಂ. ಆನಿ ಹ್ಯಾ ಮ್ಹಜ್ಯಾ ಭಗ್ಣಾಂಕ್ ಪ್ರತಿಫಲಿತ್ ಕರ್ಚಿ ಕವಿತಾ ಹಿ ಆಯ್ಲೆವಾರ್ ’ದಿವೊ ಪತ್ರಾಚೆರ್’ ಪರ್ಗಟ್ ಜಾಲ್ಲಿ ಜಾವ್ನಾಸಾ.

ಹರ್ಯೆಕ್ ಪಾವ್ಟಿಂ ಮಂಗ್ಳುರಾಕ್ ಗೆಲ್ಲೆವೆಳಾರ್ ತಿಕಾ ಭೆಟ್ಚಿ ಏಕ್ ರಿವಾಜ್ ಮ್ಹಳ್ಳೆಪರಿಂ ಜಾಲ್ಯಾ. ಆಧ್ಲೆಪಾವ್ಟಿಂ ತಿಕಾ ಮೆಳುಂಕ್ ಗೆಲ್ಲೊಂ ಮಂಗ್ಳುರಾಂತ್ಲ್ಯಾ ಆಶ್ರಮಾಂತ್, ಹ್ಯೇ ಪಾವ್ಟಿಂ ಕಲ್ಯಾಣ್‌ಪುರ್ ಆಶ್ರಮಾಂತ್, ಕೆದಿಂಚ್ ತಿಣೆ ಹೆರಾಂಕ್ ದುರ್ಸೊನ್ ಉಲಯಿಲ್ಲೆಂ ನಾ ತರ್‌ಯೀ, ಹ್ಯೇ ಪಾವ್ಟಿಂ ತಿಣೆಂ ಲಿಪಂವ್ಕ್ ಪ್ರೇತನ್ ಕರ್ಚಿ ದೂಕ್ ಹಾಂವೆಂ ಪಳೆಲಿ, ಕಿತೆಂಚ್ ಸಾಂಗಿನಾಸ್ತಾನಾ ಸಯ್ತ್ ಸಕ್ಕಡ್ ಮ್ಹಾಕಾ ಸಮ್ಜಾಲೆಂ, ಭಲಾಯ್ಕೆಂತ್ ತಿ ಬರಿ ನಾತ್‌ಲ್ಲಿ ತರ್‌ಯೀ ಮ್ಹಜೆಸವೆಂ ಅದೇಸ್ ಖರ್ಚುಂಕ್ ಮ್ಹಜೆಸವೆಂ ಆಶ್ರಮಾಚ್ಯಾ ಭಾಯ್ರ್ ಆಯ್ಲಿ, ಥೊಡ್ಯಾ ಬರಯ್ಣರಾಂಕ್ ಮೆಳ್ಳಿ, ಸಂತೊಸ್ಲಿ, ಉಪ್ರಾಂತ್ ಆಮಿ ಸಾಂಗಾತಾ ಜೇವ್ನ್, ತಿಕಾ ಆಶ್ರಮಾಕ್ ಪಾಟಿಂ ಪಾವವ್ನ್ ಮ್ಹಜೆಂ ಪಯ್ಣ್ ಹಾಂವ್ ಮುಖಾರುನ್ ಗೆಲೊಂ ತರ್‌ಯೀ ಆಪ್ಲೆಂ ಜಿಣ್ಯೆದೂಕ್ ಲಿಪವ್ನ್ ತಿಣೆ ಫಾಂಕಯಿಲ್ಲ್ಯಾ ಹಾಸ್ಯಾಂನಿ ಮ್ಹಾಕಾ ಶಿಕುಂಕ್ ಜಾಯ್ತೆಂ ಆಸ್ಲೆಂ.

[ತುಕಾ ಗ್ಲೇಡಿಸ್ ಬಾಯೆಲಾಗಿಂ ಏಕ್ ಸಬ್ಧ್ ಉಲಂವ್ಕ್ ಮನ್ ಜಾತಾ ತರ್ ತಿಕಾ ಏಕ್ ಫೋನ್ ಕರುನ್ ದೋನ್ ಮಿನುಟಾಂಭರ್ ಉಲಂವ್ಕ್ ತಿಚೊ ಮೊಬಾಯ್ಲ್ ನಂಬರ್: 8277024906/9964866811]

ಆಜ್ ಹಾಂವ್..?

ಆಜ್ ಹಾಂವ್ ಖಂಯ್ಚರ್ ಆಸಾಂ

ಚಾರ್ ವೊಣ್ತಿಂಚ್ಯಾ ಎಕಾ ಕುಡಾಂತ್

ಬಸೊಂಕ್ ಜಾಯ್ನಾ - ಉಟೊಂಕ್ ಜಾಯ್ನಾ

ನಿದೊನ್ ಆಸಾಂ ಚಾರ್ ಪಾಂಯಾಂಚ್ಯಾ ಖಟ್ಲ್ಯಾರ್

ಕೊಂಕ್ಣೆಂತ್ಲೆಂ ಜಾಂವ್ ಖಂಚೆಂಯ್ ತೆಂ ಕಾರ್ಯೆಂ

ಧಾಂವ್ತಾಲಿಂ ಹಾಂವ್ ವ್ಹಡಾ ಉರ್ಭೆನ್..

ಖಂಯ್ ಕವಿಗೋಷ್ಟಿ ಖಂಯ್ ಕೊಂಕ್ಣಿ ಫೆಸ್ತಾ ಗೊವ್ಜಿ..

ಖುಶಾಲಯೆನ್ ಆಸ್ತಾಲಿಂ - ಮೆತೆರ್ ಜಾತಾಲಿಂ.

ಕೊಣೆ ಆಪಯ್ಲ್ಯಾರೀ ನಾ ಮ್ಹಣ್ಚಿ-ನಾತ್‌ಲ್ಲಿ ಸವಯ್

ಸಗ್ಳ್ಯಾಂಚಿ ವಳಕ್-ಸಗ್ಳ್ಯಾಮ್ಚಿ ದೊಸ್ತಿ..

ಮ್ಹಜಿಚ್ ಬಡಾಯ್ ಗಾಜಯ್ತಾಲಿಂ ಸಗ್ಳಿಂ...

ಪುಣ್! ನಿದೊನ್ ಆಸಾಂ ಹ್ಯಾ ಖಟ್ಲ್ಯಾರ್.

ಘಡ್ಲೆಂ ಕಿತ್ಯಾ ಮ್ಹಜೆ ಥಂಯ್ ಅಶೆಂ!

ಕಾಮ್ಯ್ ಕೊಣಾಚೆ ಮ್ಹಾಕಾ ದೊಳೆ ಲಾಗ್ಲೆ!

ಯಾ! ಕಸ್ಲೆಂ ತರೀ ಗೃಹಣ್ ಬೆಜ್ಲೆಂ!!

ದಾಕ್ತೆರಾಚೆಂ ತೊಂಡ್ ಪಳೆಂವ್ಚೆಂ ಪಡ್ಲೆಂ.

ಸಂಸಾರ್ ಸಗ್ಳೊ ಹಾಂವ್ ಭಂವ್ಲಿಂ

ಪುಣ್! ಮಾಂಯ್ ಭಾಷೆಕ್ ಮ್ಹಜ್ಯಾ ನಾ ವಿಸರ್‍ಲಿ.

ದೆವಾನ್ ದಿಲ್ಲಿಂ ತಾಲೆಂತಾಂ ಮ್ಹಜಿಂ..

ಕೊಂಕ್ಣಿ ಮ್ಹಜ್ಯಾ ಮಾಯೆ ಖಾತಿರ್ ಖರ್ಚಿಲಿಂ..

ದೆವಾ ಮ್ಹಜ್ಯಾ ಪಾವ್ ಮ್ಹಾಕಾ...

ಆಯ್ಲೆಲಿ ಪಿಡಾ ಮ್ಹಜಿ ನಿವಾರ್ ಬಾಪಾ..

ಮ್ಹಜೆಂ ಸರ್ವಸ್ವ್ ತುಕಾಚ್ ದಿತಾಮ್

ಭಲಾಯ್ಕಿ ಮ್ಹಜಿ ಪಾಟಿಂ ದಿ ದೆವಾ

ಮಾಂಯ್ ಭಾಶೆಚಿ ಮ್ಹಜ್ಯಾ ಸೆವಾ ಕರಿತ್ತ್ ರಾವ್ತಾಂ..

ತಿಕಾ ಹಾಂವ್ ಊಂಚ್ ಉಬಾರ್‍ತಾಂ

ಭಾರತೀಯ್ ಭಾಸಾಂ ಮಧೆಂ ತಿಕಾ

ಸದಾಮ್ಚ್ ಫುಲವ್ನ್ ಉರಯ್ತಾಂ

- ಗ್ಲೇಡಿಸ್ ರೇಗೊ [ಅಕ್ತೋಬರ್, 2016]

ಗ್ಲೇಡಿಸ್ ರೇಗೊ: ಕೊಂಕ್ಣೆಂತ್ ಗ್ಲೇಡಿಸ್ ರೇಗೊಚೆಂ ಏಕ್ ಭಳ್ವಂತ್ ನಾಂವ್. ಜಾಂವ್ ಕಾಣ್ಯೊ, ಜಾಂವ್ ಕವಿತಾ, ಜಾಂವ್ ಲೇಖನಾಂ, ವಾ ಕೊಂಕ್ಣಿ ವಾವ್ರ್. ವಿಶೇಸ್ ಶಿಕ್ಪಿ ತಿ ನ್ಹಯ್ ಪುಣ್ ವಿಶೇಸ್ ಕೊಂಕ್ಣಿ ಮೋಗಿ. ಗಾಂವಾಂತ್ ತಶೆಂಚ್ ಪರ್ಗಾಂವಾಂತ್ ತಿಣೆ ಕೆಲ್ಲೊ ವಾವ್ರ್ ಹೆರ್ ಕೊಣೆಂಯ್ ಕೆಲ್ಲೊ ಹಾಂವೆಂ ಪಳೆಂವ್ಕ್/ಆಯ್ಕುಂಕ್ ನಾ. ತಿಚ್ಯಾ ಬರ್ಪಾಕ್/ವಾವ್ರಾಕ್ ಪುರಸ್ಕಾರ್ ತಿಕಾ ಫಾವೊ ಜಾಲಾಸ್ತಲೊ ಪುಣ್ ತಿಚ್ಯಾ ಕೊಂಕ್ಣಿ ಮೊಗಾಕ್ ಫಾವೊ ಜಾಂವ್ಚೊ ಪುರಸ್ಕಾರ್ ನಾ ಮ್ಹಣ್ಚೆಂ ಧಯ್ರ್ ಘೆತಾಂ.