ಕವಿತಾकविताPoem
ಮ್ಹಜೆಂ ನತಾಲ್
ಕವಿತಾಝರ್ - 58
ಕವಿತಾಝರ್ - 58
ಮ್ಹಜೆಂ ನತಾಲ್
ನತಾಲ್ ಮ್ಹಜೆಂ ಗೆಲಾಂ
ಸಾಂಗಾನಾಸ್ತಾಂಚ್ ಧಾಂವ್ಲಾಂ
ಖಂಯ್ ತರಿ ತೆಂ ಲಿಪ್ಲಾಂ
ತುಮಿ ಕೊಣೆಂ ತರಿ ಚೊಯ್ಲಾಂ?
ನತಾಲ್ ಆಯ್ಲೆಂರೆ ಮ್ಹಣ್ತಾನಾ
ಕೊಣ್ ಗೊಡಾ ಪೆಳ್ಯಾಂಕ್
ಉತಿಯೆರ್ ಸಾಸ್ಪಾತಾಲೆಂ
ಕೊಣ್ ಮುಸಾಳ್ ಕಾಡುಂಕ್
ಮಾಳ್ಯಾರ್ ಚಡ್ತಾಲೆಂ
ಕೊಣ್ ದಾಂತ್ಯಾಚಿ ಮಾತಿ
ಧುವ್ನ್ ಕಾಡ್ತಾಲೆಂ
ಕೊಣ್ ಸುರಯ್ ತಾಂದುಳ್
ಸುಕವ್ನ್ ಭಾಜ್ತಾಲೆಂ
ಪುಣ್ ಆತಾಂ ಮ್ಹಜೆಂ ನತಾಲ್ ನಾ
ಉತಿಯೆರ್ ಕೊಣ್ ಸೊಧ್ತಲೆಂ?
ಮಾಳ್ಯಾರ್ ಕೊಣ್ ಚಡ್ತಲೆಂ?
ನತಾಲ್ ಆಯ್ಲೆಂರೆ ಮ್ಹಣ್ತಾನಾ
ಭುರ್ಗಿಂ ಸಗ್ಳ್ಯಾ ಶೆಜಾರಾಚಿಂ
ಗೊಟೊ ಬಾಂಧುಂಕ್ ಜಮ್ತಾಲಿಂ
ಕೊಣೆಂ ಇಂದಾ ತಾಳೆ ಹಾಡ್ಲೆ
ಕೊಣೆ ಚಿವೆ ವೊಡುನ್ ಬಾಂದ್ಲೆ
ಕೊಣೆಂ ಕಟ್ಟೆಚೆಂ ತಳೆಂ ಕೆಲೆಂ
ಕೊಣೆಂ ಕೆಲೆಂ ಪಿಡ್ಯಾಚೆಂ ಪಾಂಪಾಳೆಂ
ಕೊಣೆ ತಣಾ ಪಾಸ್ಕೆಟಿ ಹಾಡ್ಲ್ಯೊ
ಕೊಣೆ ಮುಗಾಚ್ಯೊ ಪಾತಿ ವೊಂಪ್ಲ್ಯೊ
ಪುಣ್ ಆತಾಂ ಮ್ಹಜೆಂ ನತಾಲ್ ನಾ
ಗೊಟೊ ಕೊಣ್ ಭಾಂದ್ತಲೆ?
ತಾಳಿಯೊ ಕೊಣ್ ಹಾಡ್ತಲೆ?
ನತಾಲ್ ಆಯ್ಲೆಂ ಮ್ಹಣ್ತಾನಾ
ಕೊಣ್ ತಾಂದುಳ್ ಧೊಳುಂಕ್
ಸಾಂಗಾತಾ ಬಸ್ತಾಲಿಂ
ಕೊಣ್ ತೀಳ್ ವಾಸುಡ್ನ್
ಭಾಜುಂಕ್ ಧರ್ತಾಲಿಂ
ಕೊಣ್ ಕಾಯ್ಲ್ ಚಡವ್ನ್
ತೇಲ್ ವೊತ್ತಾಲಿಂ
ಉಣ್ ಆತಾಂ ಮ್ಹಜೆಂ ನತಾಲ್ ನಾ
ತಾಂದುಳ್ ಕೊಣ್ ಧೊಳ್ತೆಲೆಂ?
ಪೀಟ್ ಕೊಣ್ ಮೆಳ್ತಲೆಂ
ನತಾಲ್ ಆಯ್ಲೆಂರೆ ಮ್ಹಣ್ತಾನಾ
ಕೊಣ್ ಗುಮಾಟ್ ಘೆವ್ನ್ ಬಸ್ತಾಲೊ
ಶೆಜಾರಿ ತಾಕಾ ಸಾಂಗಾತ್ ದಿತಾಲೊ
ಗೊಟ್ಯಾಂತ್ ಚಿಮ್ಣೆ ಉಜ್ವಾಡ್ ಫಾಂಕ್ತಾಲೊ
ಮಧ್ಯಾನೆರ್ ಬಾಳೊಕ್ ಹಾಸ್ತಾಸೊ ದಿಸ್ತಾಲೊ
ಪುಣ್ ಆತಾಂ ಮ್ಹಜೆಂ ನತಾಲ್ ನಾ
ಪೆಡೆ ಆಸಾ ದಾಂತೆಂ ನಾ
ಗೊಡ್ ಆಸಾ ಉತೊವ್ ನಾ
ಮುಸಾಳ್ ಆಸಾ ವಾನ್ ನಾ
ಶೆಜಾರ್ಯಾಕ್ ಬಾಬಾ ಮಾನ್ ನಾ
ತಾಳಿಯೊ ಆಸಾತ್ ಈಂದ್ ನಾ
ಚಿಮ್ಣಿ ಆಸಾ ವಾತ್ ನಾ
ಫೆಸ್ತ್ ಆಸಾ ಮೋಗ್ ನಾ
ಪುಡ್ಡಿಂಗ್ ಆಸಾ ಚೂನ್ ನಾ
ವ್ಹಯ್ ಮ್ಹಜೆಂ ನತಾಲ್ ಭಯ್ರೆಂ ಜಾಲಾಂ
ಮ್ಹಜೆಂ ನತಾಲ್ ಮ್ಹಾಕಾ ಪರ್ಕಿ ಜಾಲಾಂ
ಮ್ಹಜಾ ಮೊಗಾಚೆಂ ನತಾಲ್ ಫಿಂರ್ಗಿ ಜಾಲಾಂ
- ಜೊರ್ಜಿ ಪೀಂತ್ ಆಯ್ಕೊಳ್
© 2005 ಜೊರ್ಜಿ ಪಿಂತ್ ಆಯ್ಕೊಳ್ · ದಾಯ್ಜ್ · ಆಶಾವಾದಿ ಪ್ರಕಾಶನ್ ಸರ್ವ್ ಹಕ್ಕಾಂ ರಾಕೊನ್ ದವರ್ಲ್ಯಾಂತ್.
More in Daaiz
ಕವಿತಾकविताPoem Nov 2006
ಪರತ್ ಆಯ್ಲ್ಯಾರೇ ದಿವಾಳಿ
ಕವಿತಾकविताPoem Nov 2006
ಕಿತ್ಲೆ ವೇಸ್?
ಕವಿತಾकविताPoem Nov 2006
ಮೊಗಾಚೊ ಘಾತ್
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.