Avr

Placeholder: the original page gave this picture no description, and none has been written yet. It came from daaiz\daaiz\katha\kj\khm1.asp.

HM Pernal

Sat disam thaun sorsorit pursot nastana poddcho xirandharicho paus il'lo sutton az asor podd‌l'lo. Sodancheporim sosaitticha angnnant sokallinchaki votak ang xekun bos‌l'lea dex‌panddek boraddecha maloghddea putan sohoz‌ponnim vicharolem ’baba.. Gandhik mar‌l'lo goddse bamnnanchomu?’ titlench.

Tollhatar sotari tombaku ghalon chuno lhaun ghosttuncha pirayecha dex‌panddecha tollomtteak choddlem. Pautt mell‌l'le tedalla lekache, vigeanache patth sangon dimvcho bhurgeak baulleak dhorn hatantolo tombaku thoim‌cho uddoun ’ye.. Dakoitam..’ mhonn soraram aplea toll‌mallyecha fletta kuxin voddon‌cho vhorn gelo dex‌pandde babache tambxeono rundal'le dolle, kampche vontt. Usvasak fulchem nak polleun'nch boraddecho choutea vorgant xikcho bhurgo kalubulo zal'lo.

Brohnmumboi munisipol korporexon noukore thaun nivrit't zal'loch soin kolivadd challintolem ghor vikun bodlapun yeun don bedd‌rumachem logbog nouxim chodor futtinchem flett kannghel'lea uprant‌yi dex‌pandden opli porni souy soddunk nat‌l'li. Soddchi tor‌yi koxi? sokallim utt‌l'loch chanvem kanak khouvn angnnant ukattea pamyamni muddla sur‍yacha movo kirnnank patt ghalon boson toೞatar sotari tombaku chunea sangata mollon to hollott korn tantlem kostoll vinchun dhull funkun ubhoun chimnnent gheun nijji ani vonttam modhem dourina tor taka kaksak zainatolem. Tannem toxem fanteacha sur‍yak patt korn bos‌l'le vorvingi va dhumttecha mohimen‌gi tachi udkadde omrdhunchi pidda gunn zal'li.

Bodlapun tedi vhodd pentt kaim nhoim. Dekhun mumboi‌porim munsipol korporexon na. Asa mhollear nogor‌sobha ani nogor seuk. Mumboi‌porim unch mallyechim ttouram bandhunk hanga nogor‌sobha porvonnogi dina dekhun tin ya char mallianchinch choddaut kott'ttonnam. Choddtik bandhlear liftt zai. Liftt mhonntana foir brigeddichi porvonnogi zai iteadi..

Dex‌pandde korporexonant‌cho kam' kortalo zal'lean hem sogllem taka bor‍yan kollit as‌l'lem. Toxem bilddor koxem bilddop karpett mhonn lokak bonaitat tem. Dex‌pandden flett ghetana taka gujratti bilddor deddian borich riyaiti dil'li. Deddia laginch dex‌pandden flett buk korunk onyek karonn mhollear, bilddinga bhair dorbosot ugto zago aslo ani taka sokallinchem votak ang xekunk hanga konnacho akxep natlo.

Gor‍yancha kallar mettrik xik‌l'lo dex‌pandde somyban mauni. Sosaittint konnai‌kodde ulyil'lo na. To zalem tachem ’sokall’ pepor zalem. Zaite pauttim angnnant ang xekunk bos‌l'lekddechch to pepor‌yi vachun kaddttalo. Pepor vaschem ordhear‌cho rauvn zaite pauttim eka bakkaran kaksak dhamvtalo. Toxem votar ang xekunk kaksak dhamvonk solis zaije mhonn'nch tannem deddiakodde toll‌mallyer flett ghet‌l'lem. Bharavi bandantolem udok soddlear pausant udkant buddon vechi bhirant aschea bodlapuramot toll‌mallyecha flettank konn‌yi vicharinatole dekhun bilddor‌yi mell‌l'lea molak ditale. Punn dex‌pandde bodlapur ayil'le thaun bandantolem udok soddche titlo paus‌yi poddonk natlo. Gel'le sat dis hottar podd‌l'leprim zal'lo paus soddlear.

Dex‌panddek cherke bhurge nat‌l'le. As‌l'lim dogam-i cheddvanchch. Tacha nivrit'techa vellak dogank‌yi kazar zaun bhurgim zal'lim. Festa porbek aplea kuttma sangata yeun char dis ravon vetana dex‌panddechem ghor natrancha pamyantlea kinnkulleamni fulon rautalem. Gaddiecha godd'dent dador bamydor thaun bodlapur bhurgea ballank voddon haddon yemvchemyi koxttanchench.

Ott'ttuk chovis plettam aschea kott'ttonnantolim vis plettam vikon gel'linch bilddor deddian ko oprettivo haujing sosaitti korn ti parizat ko oprettivo haujing sosaitti limittedd mholl'llea namvan nondait rauteleam poiki malghoddo xikpi dex‌panddechch dekhun takach sosaitticho promottor tosem poilo cher‌men kelo. Sosaittint taka ekleak soddlear her pautt mellttana dex‌panddeyi, tachi bail‌yi lisamv ghetalim. Dex‌pandde lekant ani vigeanant huxar. Tachi bail moratti ani choritrent.

Dex‌panddecha toll‌mallyecha don bedd‌rumancha flettant ek bedd‌rum' sogllem devachench kudd. Dex‌pandde sud'dacharacho monis tor‌yi titlo devasponnacho nhoim. Tachi bail mat fantear utt‌l'lich matear xellem nhaun ekoddem vostur nheson sosaitticha dakttulea bogichant te disa ful‌l'lim lhan vhodd tichea dolleank dischim sogllim fulam khunttun kaddtali. Tantlim fulam sosaittintlea her konnak mellaje tor‌yi tannim tiche poilem uttaje poddtalem. Toxem khunttun hadd‌l'lim fulam devak mallon ang xekchem, pepor vaschem, kam' kortalo. Nijzo ani vontta modhlo tombaku irzon udok sutt'tana dex‌panddek kaksak yeun to nitoll zaun bhair yetana bail arti ukltali.

Boraddecha maloghddea cherkeak baulleak ghott'tt dhorn soraram voddon haddon devacha kuddak rig‌l'lochch dex‌pandde, thoim devank fulam mallchi tachi bail ghoddgoddo mar‌l'leprim ubhichch urli. Ho kitem autat? marancha cherkeak devacha kuddak voddon haddon yeun mataro kiteak barik kampta? var‍ya sut'turak xirkal'lea pikea kholieporim...?

’Aikalemye...’ dex‌panddecho tallo ragan kamptale. ’ti pett di...’ hea purtem tantiantolem bhair poddanatlea pilak az hamv sangtam... Gandhik mar‌l'lo konnem mhonn..?’ dex‌panddek itlea ragant tache balen‌yi edoll polleunk nat‌l'lem. Khorem sangchem tor, tea itlea pornea lonkdda pettent kitem asot asa mhonn tikai kollit natlem. Kitlim ghoram bodlileari ti pett mat khud'd dex‌pandde kitengi asot as‌l'leaporim vhauvn vortalo ani zogasonnen sambhallon dourtalo. Bail mittacho kundo zal'li polleun dex‌pandde khud'd devachim fainellam, imaji douril'lea konxea gelo ani porni lonkddachi pett voddon haddon boraddecha choutea vorgant xikchea cherkeacha pamyam mulla douroli. Ani zanveak khouyil'lo bhigatant tachem big ugtem korn tantum bhor‌l'lim ekek‌cho pornim pepram tache mukar chotrayen soddoilim.

’Polle.. Tuzo bapuy kongressi nhoim, roil‌vent yuniynacho mhan mukeli nhoim.. Polle tum tor‌yi polle.. Hea kongresini amchim ghoram, komttam jivo sogllem zolloun amkam koxem boraddecho cherko bhimyan kamptalo. ’tin hozar vorsam, tin hozar vorsam thaun amim tumkam dhambun dourolam mhonn tumim mhonntat‌ne?, vhoi hamv bamunn, naturam' goddseyi bamunn, tannem gandhik marlem, tumi soglle mellon mhaka mara.. Mara... Mara...’

Ravo‌l'le koddechch kampcho dex‌pandde itlem mhonnon devacha kuddant‌cho dodd'dd korn portalo.

’Baba...’ mhonn boraddecha cherkean mar‌l'lea kinkrattek parizat ko oprettivo haujing sosaittichem sogllem kott'ttonn bhumykaponnek halcheporim hal'lem.

Bhair choukant munisipalittichi gaddi ’bharvi bandant udok opayacha mott'ttak choddlam, khoincheyi ghoddye baglam ughddunk puro lokan zagrut ravonk vinonti’ mhonn chotrai sangtali.