Oxi Ek Mogachi Kanni

Kothazhor - 73. Oxi Ek Mogachi Kanni

Kishoo Barkur

Kitem boromv, koxem suru korum mhaka kollana. Jem hamv boroitam, tem tuje it'tun pautolem mhonnoni hamv nennam. Tuka koxem apomvchem? tum mhozo mog‌ch zaunas‌l'lem-i, tori moga mhonn tuka ken'nam-i mholl'llemna..... Kallzacho gonddo toxem as‌l'lem-i tori tuka ken'nam-i sang‌l'lenam. Koxem tuka ulo marum mhaka bilkul somzana. Punn mhaka uddas asa thaun tum mhozo uddas zal'lem-i tem mat hamv zannam. Ek khinn legun soddinastam, vell ghoddi lekinastam, uddas zaun mhaka dhoslam-i... Kaim tukai hamv toxench...?

Tum ken'na mhoza disamni khirlem-i, ratichim sopnnam zalem-i mhaka koll'llench na. Uddasa margar pattim pattim vetam, tum sokallichem iskalak cholon yemvchem mhaka dista. Tum attvent as‌l'lem-i ani hamv noveant. Sozagelea sankea uprant amchi vatt ek zateli. Hamv mhozo vell oddzostt korn tuka thoim raktolom. Uprant amchim utram mollbar choddon ubhtalim, kallzak pakam fultalim... Amchea samkar iskalachi gett ken'na udetali.... Bilkul kollanat‌l'lem.

Tuka uddas asa? tea vorsa iskalacha parlimenttant hamv koslogi ’montri’ zal'lom ani tum ’upomontri’ zal'lem-i. Noxiban mhonn chint‌l'lem-i? tache pattlean hamv kitlo khell khell'llolom tem tuka ya sisttor roz‌merik zamv kollanat‌l'leborim zaunko hamve kitle vod'duvorantt ghet‌l'le zannam-i? kaim vors‌bhor tujelagim vevegllea nibamni ulouyetem nhoi!

Onkolan hadd‌l'lim golfachim choklettam tuka dije mhonn poteant dour‍l'lim, dimvchem dhoir nastam, hamvem-i khainastam, toxinch koddon gel'lim, zannam-i?

Hamv dhavent pas zaun poixilea zuniyor kolejik vochonk astana, tum thoim aschemnam-i mholl'llea ekach karonnak, kitlexem pauttim hamv napas zal'lom tor kitlem borem astem mhonn hamvem chint‌l'lem na? pas zal'leak mhakach hamvem yett‌l'lemna?

Amchi jyuniyor kolez ani tumchem hoiskul ekameka pois as‌l'lim. Tori fokot tujer ek dixtt ghalche pasot, ani mhaka polletam, tujea galamni udemvcha tambsanne pasot, kitlexea pauttim donparanchea jeunna viramavellar, konnakonnachi soikolam magon hamv thoimsor yetolom. Thoim poreant tem soikol maddoun yeun vetana, donparam jemv‌l'lea bhutientli pez khoimsor mayak zaun vetali konn zanna? sanjer klasi zata poreant, mhoje bara brestar ani tera sukrar zatele. Muklea vorsa tum poile piyusik bhorti zata poreant kitlea korondayen tem voros hamvem khorchil'lem, tem bhovo‌xea devo ani hamv mat zannamv. Tuka kaim tachi khobar as‌l'li?

Zuniyor kolejintli gozal vegllich. Sut'turantlea char gamvchea tea ek mat zuniyor kolejint, xerantlea kolejiborim, chedde cheddvanchi bhorsounni bilkul nat‌l'li. Hoiskul poreant, madrinkhal as‌l'lea iskalanim suddall vaddlelea amkam hangachea bhomvtonnent bandhun ghal'leborim zatalem. Ek cholo ani choli mell'llim, uloilim mhollear korddak uzo pett‌l'lebori! tori hamv, tumvem ixttinneasongim yemvchea vellar‍ch mhojea ixttasongim sutt'talom. Gadeameremni amche pongodd il'le mukar pattim cholon vetana, hamv fokot tuka aikonche pasot vhoddlean uloitalom, hastalom. Tujem dhean‌yi hangach astolem tem hamv bor‍yan zannas‌l'lom. Tum mhoje notts magtalem-i, leab rekordd vichartalem-i. Zor tum vicharxi mhonn mhaka poilench koll'llelem tor hamv poilea piyuseche notts ani rekordd kitle bore korn kortom konn'nna. Dusrea vorsache mhoje rekordd ovvol nombrache as‌l'le. Muklea vorsa tum vichartolem-i tuka tanchi gorz poddteli mholl'llea ekach xevottan mhoji tankivorti minot tea notts ani rekorddancher ghal'li. Amchea lekchororank ojeap‌xem zal'lem. Poilea vorsa moreaden ’esoin‌mentt’ dinat‌l'lea cherkeak dusrea vorsa khoincho bhut lagla tankam kollonk‌nat‌l'lem! tum mhojea rekorddanchi mozot ghetai mhonn zannas‌l'lo ’boyoloji bhott’ tuka toull toull utram tir martolo mhonn tuvem sang‌l'lo uddas asa mhaka.

Sanjechem klasi thaun ghora yetana, gadeamerenim tuka utronche pasot soraram cholon tuka our‍ttek korn ghora vechem as‌l'lem. Ghorapavo‌l'lench buk uddoun, porot ek pauttim tuka merer utronche pasot khoinchai niban bhair sorchem as‌l'lem. Tea ek futt rundayechea merer tuka utortona, tum mhojea bovo‌lagim yemvchea tea ek apurbayechea ghoddye pasot, tea khinna, mhojea angant chor‍chea tea vije pasot, kitlexim moilam fukottak hamv chol‌l'lomna?

Tuka uddas asa? tea vorsa notalam ratim, modheane misak vetana, hamv amchea ghorcheamsongim, tum tunchea ghorcheamsongim, ami dogam-i tanche pras char mettam mukar.... Punvechea chan'neak gade dudant buddoun kadd‌l'leborim distale. Xetancher mandd‌l'le dova thembe tea chan'neak motiamborim porzolltale..... Ani dosembrachea himvanti hamv barik ghametalom. Gade utorn penttent pavon ami rostear ekameka borabor choltana, hamv tujesongim resperak‌ch bhair sorlanxem mhaka bhogtalem! pois khoimsor‍gi ‘svadik rat bhagi rat’ hollvayen aikatalem. Khorench sangtam tosolo doivik anbog mhaka jinnyent porot zal'lona! tuzo hat dhorchi pisai mhaka itli yetali... Mhoje doni hat hamvem ghott bandhun dour‍l'le. Ten'nam sang mhaka tum kitem chintalem-i?

Te dis kitle bore as‌l'le... Disak ek pauttim tuka pollelem ani tuvem omrukeo haso dileoi tor hamv khuxechea amalant piktalom. Tum hastam tujea galamni poddchea ponddkuleamni buddon raveaxem mhaka bhogtalem. Tum koxem ani ken'na mhojea jinnyent titlem misllalem-i, mhaka bilkul khobar‍ch zalina. Tea misllaunnent mhoje pras tuzoch vantto chodd as‌l'lo... Ya tunch as‌l'lem-i? hamv fokot namvankhatir as‌l'lom? mhojea jinniecho xevott‌ch tum mhonn hamv chintalom.

Tea vorsa vhoddlea festachea santent hamvem choritra roch‌l'li! gamvant amchea, poile pauttim tornea cholean, eka tornea choliek festasantent ois‌krim' gheun dil'lem! tuvem kitlem doddun tem kannghel'lem-i... Punn hi khobor fokot khobor zaun uronk nat‌l'li. Tea vorsa, gamvant prayek pavo‌l'lea hor‍yek cholea choliamni festa sur‍yo buddchapoilem ekameka ois‌krim' khauyil'lim! pattlea char panch mohineamni festakhatir zomo kel'le poixe, ekach disan ois‌krimam pattlean udak zal'le.

Moikolachea rosa ratim, ami tanger ddekorexon korunk gel'le ten'na tum thoim as‌l'lem-i. Hamv vonntir kagdafintanchim kallzam soddoitalom ani tum mhaka ttep katorn ditalem-i. Vonntivoilea tea fintanchea kallzam bhitor moikol ani tachea voklechea namva bodlak mhojem ani tujem namv boromvchi mhoji girant tea dis kitlea koxttamni hamvem dambun dhor‌l'li tem hamv mat zannam... Tukai tich axa nat‌l'li?

Khoimsor gele te dis konn'nna? toull tukai mhozo sangat boro lagtalo tem hamv zannas‌l'lom. Mhaka polleunko‌nam-i tor polleun haslenam-i tor tukai somadhan zainat‌l'lem tem mhaka kollit as‌l'lem. Na tor tapant poddon hamv char panch dis klasik yeunko nat‌l'levellar tum nottsachea nibar, amger ghora mhaka polleunko yetemnai. Okttobrachea rojent, spordheak podam xikonk mhonn mhaka ghoddye ghoddye melltemnam-i. Tuka podam xikoitana, mhozo gollo suktalo ani tallo suttanat‌l'lo ani tum tujea songit mestrichea haloticher omrukem hastalem-i. Mhojea kallza monantle hal tum bor‍yan zannas‌l'lem-i... Tukai toxench zatolem nhoi?

Dhavent astam, klasik ovvol nombrar pas zal'lo hamv, piyusint napas zal'leak, fokot tuka guneamvkar tthoraitam. Tum zor tea nomuner mhojea kallzant patt bandun bosonk nat‌l'lem-i, kemisttrichea ’ikvexona’nim, meathsachea ’thiyoromamni’, fijhiksachea ’prufamni’ ani boyolojichea ’sel'la sel'la’nim fokot tunch mhaka zhollkanat‌l'lem-i tor hamv piyusint unnear fostt klas tor‍yi yetom. Tea disamni tum mhojea jinnyent itlem ghuson gel'lem-i, porikxechea peporamni hamvem tujinch namvam soddn dusrem kaim boroyil'lem va na ti mhakoch khobar na!

Vochonk kuskuttachem mon nat‌l'lem tori dusri vatt nastam hamvem bomboichi vatt dhor‌l'li. Gamvchea nakear, hoivelagim bossak rakchea mhaka paunko ghorchim, ani ek dog ixtt ayil'le. Bos suttchea il'lem poilem, tum ’khoimsor‍gi’ vechem ochanok tea vatten paxar zal'lem-i... Mhaka mell‌l'lem-i, bos sutt'ta por‍yant ravo‌l'lem-i... Ani tum thoimsor khonddit yetelem-i mhonn hamv kiteak poilench zannaslom? bos sutton mukar vetana bhiz‌l'lea mhojea dolleank, tujyai dolleankhanchimni dukam dis‌l'lim...? ya toxem mhaka bhog‌l'lem mat?...

Bomboi pavo‌l'lea uprant.....

***

Avaz nastam bhitor rig‌l'lea ronin jen'nichea hatantlim peporam ekdom voddn kannghelim...

"hey kitem korn asai? him kagdam...! ore him khoim mell'llim tuka? kitem ho kochro...?"

"plis roni tim kagdam mhaka di.... Hanga kobattant sogllem soma kor‍yam mhonntana... Him mell'llim... Tum itlem pura boroixi mhonn hamv nennas‌l'lim... Plis dinem..." jen'nin kobattantlem sorv ustun ghal'lem... Porneo tosvir‍yo... Foilam... Buk...

"in‌feaktt hamv‌yi hinch kagdam sodhun as‌l'lom." apli ttoi soddill kortam roni mhonnalo.

"kitlim vorsam zalim... Hamv chintalom tim khoim tori gul'l zaleant mhonn..." moche nikllaun to jen'nisovem tea kochrea modhench boslo. "bhurgim khoim geleant?" jen'ni taka vonnkalem.

"rinu ddeans klasik gelam. Yetana saddesat zaunko puro. Dhaktto sokoil bilddingantlea bhurgeamsongim khellta. Bhovo‌xea tujem kar gettibhitor rigtana polleunko na astelem... Tem sodd ani sang mhaka hem kitem boroilem-i sang mhaka.... Konn tem cheddum?"

"oho! tem pura toullchem pixeponn... Sodd ti gozal" roni thoincho uttonk laglo.

"sang‌ne roni plis... Mukar kitem zalem?" jen'nin taka soddlem na.

"zamvchem kitem? hamv bomboi pavon purtim char vorsam zaije tor tachem kazar zalem."

"tuka khobor nat‌l'li? tum vogoch rauloi?"

"khobor zamvchi? tannem mhaka gamvam thaun kagot boroyil'lem legun... Tachem poilem ani nimanne mogapotr!"

"ani tum gamvak yeunko‌nam-i!!"

"yeun kitem kortom? toull mhaka bavis vorsam... Bomboi gamvchea kuddant rautalom. Somaxem kam' nat‌l'lem... Tem pura filmamni cholta jen'ni... Uttauttim gamvak yeun tachem resper zatastana greandd enttri marn ’rok do ye xadi’ mhonn bobatt mar‍lear tem altar soddn dhamvon yeun mhaka veng marta... Soma sangchem tor toull mhojelagim gamvak yeunko ttikettiche poixe legun nat‌l'le!" roni haslo.

"tuka kitench bhoglemna? duk ailemna?" jen'ni ronichea ttoi songim khelltalem.

"bhoglem... Duklem ani jivitant kainch urlemna mhonn chintlem soit. Tea vogtachim mhoji bhognnanch tuvem at'tam vachlim-i... In‌feaktt hamv jiughat korchevixim chintalom."

"uf" jen'ni nitt zalem. "magir!?"

"magir kitem? jiughat korchem titlem dhoir ailemna. Uprantlo thoddo temp ondhkarantxem as‌l'lom... Vellasovem sorv sarkem zalem... Vachunk suru kelem... Kam' kortam kortam xikop mukorsilem. Ddigri zoddli... Kam'... Promoxon... Uprant tum mell'llem-i"

"kitlea sompean sangtai... Tem cheddum? tachevixim kitem?"

"cheddvak kitem? dogam bhurgim asat. Asttreliant settol zalam... Atam-i toull toull imeylam dhaddit't asta. Itlea mottem zalam... Soin of prosperitti..." ronichea tonddar pokri haso khelltaleo.

"mhollear.... Lovina!!?? yu..." jen'nin uxeant ronik marlem... Mhaka got'tuch as‌l'lem... Tumchea dogam'modhem kaim tori chokkor asat mhonn."

"hey... Hey atam suru kornaka. Amche modhem kaim chokkor nant zaite... Vi ar zostt gudd frendds...!" ronin jen'nik arailem.

"mhojelagim uloinaka tum..." jen'ni fottkir‍ya ragan tachea vengentlem suttchem preton kortalem.

"attvea novea klasint suru zamvcho mog... Itts zostt infechuyexon...! titlench... Somaprayechancho mog jikcho bharich oprup... Cheddvank kolez zaije tor bori soirik aili tor ekvis bavis vorsank‌ch kazar korn soddtat... Toxem mhonn cheddeank tea prayer kazar zaunko zata? te jinnyent settl zaun kazar zata mhonnta por‍yant cholianchea ghorchim raktit?"

"bari filosofi ulounko suru kelem-i?" jen'ni ronichea vengent hullvoll'llem.

"jinnyent mar khel'le uprant filosofi apapinch yeta jen'ni..."

"tem sodd... Tum novent astam... Tuka hamv kiteak dislimna?"

"poilean tum amchea gamvant nat‌l'lem-i... Ani ek vella as‌l'lem-i tori hamv bilkul tuka loin martona" roni haslo.

"ham!??" jen'ni porot khuball'llem.

"ddarling" ronin apli veng boll keli. Tachim bottam jen'nichea kesam modhem khelltalim.

"hamv noveant astam tum tisrent as‌l'lem-i!... Rimembor??"