ಕವಿತಾकविताPoem
ಯೇನಾಕಾ
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
"ಪುನರ್ಜಿವಂತ್ ಜಾಲ್ಲೊ ಸೊಮಿ ಜೆಜು ಸರ್ವಾಂಕ್ ಬರೆಂ ಕರುಂ, ಆಮ್ಚೆ ಭಿತರ್ಲೊ ರಾಗ್-ಧ್ವೇಷ್-ಮೊಸೊರ್ ನಾಸ್ ಕರುಂ"
ಆರ್ಥರ್ ರೋಶನ್ ಪಿರೇರಾ, ಒಮ್ಜೂರ್
ಮನಿಸ್ ಜಾವ್ನ್ ಯೇನಾಕಾ
ಶಿರಾಂಧಾರಿಂಚೊ ಪಾವ್ಸ್ ವೊತ್ತಾ
ಪುಣ್ ಹಾಂಗಾಸರ್ ಕಿತೆಂಚ್ ಖಿರ್ಲಾನಾ
ಕಿರ್ಣಾಂ ಚಡ್ಲ್ಯಾರ್ ಸೊರ್ಯೊ ಸೊಭ್ತಾ
ಪುಣ್ ನದರ್ ಲಾಂವ್ಕ್ ಜಾಂವ್ಚೆಂನಾ
ಮಾಗ್ಣೆಂ ರಜಾರ್ ಜಾಯ್ತೆಂ ಜಾತಾ
ಪುಣ್ ಮನಿಸ್ ಕಿತ್ಯಾಕ್ ಬದ್ಲಾನಾ
ಜೆತ್ಸೆಮೊನಿ ಮೊಳ್ಯಾಂತ್ ಘಾಮೆಲೊಯ್ ರಗಾತ್
ಖೊಟ್ಯಾಂಕ್ ಕಳ್ಳೆಂನಾ ಸಮ್ಜಾಲೆಂ ಫಕತ್ ಬರ್ಯಾಂಕ್
ಜೆರ್ಭಾಂದಾಂನಿ ಮಾರ್ ಖಾಂದಿಂ ಖುರಿಸ್
ಮುಕುಟ್ ಕಾಂಟ್ಯಾಂಚೊ ಭಾಲೊ ಕಡ್ವಳಾಂತ್
ಸೊಸ್ಲೆಂಯ್ ಆಮ್ಚೆಖಾತಿರ್ ಜಾಂವ್ದಿ ಮ್ಹಣ್ ಬರೆ ಮನಿಸ್
ಆಜ್ ಸಾದ್ ಘಾಲುಂಕ್ ಜಾಯ್ತ್ ಕೊಂಬೊ ನಪಂಯ್ಚ್
ನೆಗಾರ್ ಕರುಂಕ್ ಮೆಳ್ಚೆನಾಂತ್ ಕೊಣ್ಂಚ್
ಉಜ್ವೊ ದಾವೊ ಪೊಲೊ ಧಾಖವ್ನ್ ಉಲಯ್ತೆಲೆಂ ಮೊನೆಂ
ಉತಾರ್ ಬರೆಂ ರಾಗಾವಿಣೆಂ ಜಿಬೆರ್ ಥಾವ್ನ್ ಲಿಪಯ್ಲೆಂ
ಸೊಡಂವ್ಕ್ ಪಾತ್ಕ್ಯಾಂಕ್ ಯೇನಾಕಾ ತುಂ ಪರತ್
ಖೊಟ್ಯಾಂಕ್ ಹಾಂಗಾಸರ್ ಬಿಲ್ಕುಲ್ ನಾ ಮತ್
ಸಂಸಾರಿ ಬರೆ ತುಕಾ ಮೆಳ್ತೆಲೆ ಸರ್ಗಾರ್ ಖಂಡಿತ್
ಪಾತ್ಯೆತೆಲ್ಯಾಂಕ್ ಪಾವ್ತಾ ತುಜೆಂ ಜೀವನ್ಪಣ್ ಖರೆಂ ಸತ್
ಜಿಣಿ ಬದ್ಲೊಂಕ್ ತೆಂಚ್ ಪಾವ್ತಾ ಹ್ಯಾ ಸಂಸಾರಾಂತ್
ಯೆತಾಯ್ ತರ್ ಯೇ ತುಂ ಧರ್ತೆಕ್
ಪುಣ್ ಮನಿಸ್ ಜಾವ್ನ್ ಯೇನಾಕಾ.......!
ಜೆಜುನ್ ಸಾಂಡುನ್ ಗೆಲ್ಲ್ಯಾ ಹ್ಯಾ ಸಂಸಾರಾಂತ್ ಜಾಯ್ತೆಂ ಬದಲ್ಲಾಂ, ಮನಿಸ್ ಬದಲ್ಲಾ, ಮನ್ಶಾಚೆಂ ಚಿಂತಾಪ್ ಬದಲ್ಲಾಂ, ಸತ್-ನೀತ್ ಬದಲ್ಲ್ಯಾ, ಮೋಗ್-ಮಯ್ಪಾಸ್ ಬದಲ್ಲಾ ದೆಖುನ್ ಜೆಜುಕ್ ಪರತ್ ಹ್ಯಾ ಸಂಸಾರಾಕ್ ಯೆತಾನಾ ಮನಿಸ್ ಜಾವ್ನ್ ಯೇನಾಕಾ ಮ್ಹಣ್ ಕವಿ ಆಯ್ಚಾ ಕಾಳಾಚಾ ಮನ್ಶಾಪಣಾಚಾ ಮೊಲಾಂಕ್ ಸವಾಲ್ ಕರ್ತಾ.
^ ವಯ್ರ್
ವಾಯ್ಲೆಟ್ ಪಿರೇರಾ, ಕುಲ್ಶೇಕರ್
ತುಜೆರ್ ಏಕ್ ನಿಯಾಳ್ ಸೊಮ್ಯಾ
ಸೊಸ್ಲೆಯ್ ಕಿತ್ಲೆ ಕಷ್ಟ್ ತುವೆಂ ಸೊಮ್ಯಾಂ
ಸೊಡ೦ವ್ಕ್ ಆಮ್ಕಾಂ, ಆಮ್ಚ್ಯಾ ಪಾತ್ಕಾಂತ್ಲೆಂ ಧನ್ಯಾಂ
ನಾತ್ಲ್ಲೊ ತುಜೆ ಥಂಯ್ ಕಸಲೊಚ್ಚ್ ಗುನ್ಯಾ೦ವ್
ತರ್ಯೀ ಫಾವೊ ಜಾಲೆ೦ ತುಕಾ ಖುರ್ಸಾಚೆಂ ಮರಣ್
ಗೊಲ್ಗೊಥಾ ಮ್ಹಳ್ಳ್ಯಾ ತ್ಯಾ ಕಟ್ಟ್ಯಾಚ್ಯಾ ಸುವಾತೆರ್
ದಿಲೊ ರಗ್ತಾಂಭಳ್ ಭರ್ಶಿಲ್ಲೊ ವಾಯ್ನ್ ಪಿಯೆಂವ್ಕ್
ಪಾಟಿ ಸರ್ಲೆನಾಂತ್ ಶಿಂಪಿ ಉಡವ್ನ್ ಖೆಬ್ಡಾಯೊ ಕರುಂಕ್
ಸೊಡ್ತಿ ಘಾಲ್ತಾಲೆ ವೋಡ್ನ್ ತುಜೆಂ ಅಂಗ್ ವಸ್ತುರ್
ಚೊರಾಂ ಮಧೆಂ ಉಮ್ಕಾಳಾಯ್ಲೊ ತುಕಾ ಖುರ್ಸಾರ್
ಸಾಣ್ಸಿಲೊ ಜಬ್ಬೊರ್ ಕಾ೦ಟ್ಯಾಚೊ ಮುಕುಟ್ ಮಾತ್ಯಾರ್
ಪಾಶಾಂವ್ ವಿಪರೀತ್, ಸೊಸ್ಲೆಯ್ ಕಷ್ಟ್ ಸಭಾರ್
ಖುರಿಸ್ ಖಾಂದ್ಯಾರ್ ಘೆವ್ನ್ ಮೌನ್ಪಣಿಂ ಚಮ್ಕಾಲೊಯ್ ಮುಕಾರ್
ತುವೆಂಚ್ಚ್ ರಚ್ಲ್ಲಿ ಹಿ ಪರ್ಜಾ ಸೊಮ್ಯಾಂ
ಇತ್ಲಿಂ ನಿರ್ದಯಿ, ಬೇಮಾನಿ ಜಾಲಿ ತಿಂ ಕಶಿಂ?
ಲಜ್ ಮರ್ಯಾದ್ ಅಪ್ಲಿ ಸಾಂಡುನ್ ಪುರ್ತಿ
ಅಪ್ಲ್ಯಾಚ್ಚ್ ರಚ್ನಾರಾಕ್ ಖುರ್ಸಾಂವ್ಕ್ ಮುಕಾರ್ ಸರ್ಲಿಂ
ಪುಣ್ ತುವೆಂ ಹೆಂ ಸರ್ವ್ ಸೊಸ್ಲೆಂಯ್
ಬಾಪಾ ಖಾತಿರ್ ನಾಲಿಸಾಯೆಚೆಂ ಮರಣ್ ಘೆತ್ಲೆಂಯ್
ತುವೆಂ ಮೊರೊನ್ ದಿಲೊಯ್ ಆಮ್ಕಾಂ ಸಂದೇಶ್ ನವೊ
ಪೆಲ್ಯಾ ಖಾತಿರ್ ಜೀವ್ ದೀ ಮ್ಹಣ್ ಅಪ್ಲೊ
ಪುಣ್ ಸೊಮ್ಯಾಂ, ತುಜೊ ಸಾಕ್ರಿಫಿಸ್ ವ್ಯರ್ಥ್ ಜಾಲಾ
ಹ್ಯಾ ಸಂಸಾರಾರ್ ಮನಿಸ್ ಮನ್ಶ್ಯಾಕ್ ಗ್ರಾಸು೦ಕ್ ಲಾಗ್ಲಾ
ಸತ್ಯಾನ್ ಚಲ್ಲ್ಲ್ಯಾ೦ಕ್ ಖುರ್ಸಾಯ್ತಾತ್ ಹಾಂಗಾ
ಅನ್ನ್ಯಾಯಾನ್ ಚಲ್ಲ್ಲೊ ಜಿಕ್ತಾ ಸದಾಂ.
ದಿಸಾನ್ದೀಸ್ ಅಪ್ಲ್ಯಾ ಸಂಸಾರಿ ರಾಟಾವಳೆಂನಿ ಮೆತೆರ್ ಜಾಲ್ಲ್ಯಾ ಮನ್ಶಾಕ್, ಜೆದ್ನಾಂ ಅಪ್ಣಾವಿಶ್ಯಾಂತ್ ಚಿಂತುಂಕ್ಚ್ ವೇಳ್ ನಾತ್ಲ್ಲ್ಯಾ ಸಂದರ್ಭಾರ್, ಲಗ್ಬಗ್ ವೀಸ್ ಶೆಕ್ಡ್ಯಾಧಿಂ ಮನ್ಶಾಂಚಾ ಹಾತಿಂ ಮರಣ್ ಪಾವ್ಲ್ಲ್ಯಾ ಸೊಮ್ಯಾಚೊ ನಿಯಾಳ್ ಕರುನ್ ದಿತಾ
^ ವಯ್ರ್
ಜೊಮೆಲ್, ಬೊಂದೆಲ್
ಪಾಸ್ಕಾಂ ಜಾಗ್ರಣ್
ನಿಮಾಣ್ಯಾ ಸುಕ್ರಾರಾ ಕಾಲ್ವಾರಿ ಖುರ್ಸಾರ್ ಮೊರೊನ್
ಪಾಸ್ಕಾಂ ರಾತಿಂ ಪುನರ್ ಜಿವಾಂತ್ ಜಾಲ್ಲ್ಯಾ ಜೆಜು
ತುಕಾ ಹಾಂವ್ ಅರ್ಗಾಂ ದಿತಾ.
ಪುಣ್ ಕರೆಜ್ಮಾಚೊ ಕಾಳ್ ಚಾಳಿಚ್ ದಿಸಾನಿಂಚ್
ಮುಗ್ದಾಲ್ಲ್ಯಾಕ್ ವರ್ತಿ ಬೆಜಾರಾಯ್ ಜಾತಾ
ಆಜ್ ಥಾವ್ನ್ ಜೆಜು,
ಘರ್ಚೊ ಉಜ್ವಾಡ್ ಪಪ್ಪಾಚಾ ಬೊತ್ಲಿಂತ್ ಫಾಂಕ್ತಾನಾ
ತಾಚಾ ಬೆಬ್ದ್ಯಾ ಭಾಶೆಕ್ ಸದಾಂಚ್ ಗಾಂಚ್ ಚುಕ್ತಾ
ಸೆಜಾರ್ಚಿಂ ಭುರ್ಗಿಂ ಪಯ್ಸ್ ರಾವ್ನ್ ಹಾಸ್ತಾನಾ
ಕಾಳ್ಜಾಂತ್ ಮ್ಹಜ್ಯಾ ದುಃಕಾಚೆ ಬಾಲೆ ತೊಪ್ತಾತ್.
ಆಜ್ ಥಾವ್ನ್ ಜೆಜು,
ಘರ್ಚೊ ಸ್ವಾದ್ ಪಪ್ಪಾಚಾ ಬಿಡಿಯಾಂ ತುದ್ಯೆರ್ ಆಸ್ತಾನಾ
ತಾಚೆ ಮೆಳ್ಕುಟೊ ಸ್ವಾಸ್ ವೊಂಟಾ ಸಂಗಿಂ ಹಾಸ್ತಾ
ಸೆಜಾರ್ಚಿಂ ಪೊರಾಂ ರೈಲಾಚಿ ಚಿಮ್ಣಿ ಮ್ಹಣ್ ಖೊಲಾಯ್ತಾನಾ
ಕಾಳ್ಜಾಂತ್ ಮ್ಹಜ್ಯಾ ಕಳ್ವಳ್ಯಾಚೆ ಹಾಕ್ ಜಾತಾತ್.
ಆಜ್ ಥಾವ್ನ್ ಜೆಜು,
ಘರ್ಚೆಂ ಸಮಧಾನ್ ಮಮ್ಮಿಚಾ ಗಾಳಿ ಶಿರಾಪಾಂತ್ ಬುಡ್ತಾನಾ
ತಿಚಿ ಸಳ್ಸಳಿ ಜೀಬ್ ವ್ಹಡ್ ಬೊಬೆಕ್ ತಾಳ್ ದಿತಾ
ಇಷ್ಟಿಣ್ಯೊ ಮ್ಹಜೊ ಸಾಂಗಾತ್ ಸೊಡ್ತಾನಾ
ಸಂಸಾರ್ಚ್ ಮ್ಹಾಕಾ ನಾಕಾಶೆಂ ದಿಸ್ತಾ.
ದೆಕುನ್, ನಾಕಾ ಜೆಜು ನಾಕಾ
ಅಸಲೆಂ ಪಾಸ್ಕಾಂ ಫೆಸ್ತ್ ನಾಕಾ
ಜರ್ತರ್ ಆಜ್ ಥಾವ್ನ್ ಪರತ್ ಕರೆಜ್ಮ್ ಸುರು ಜಾಯ್ತ್
ಸದಾಂನೀತ್ ಹಾಂವ್ ದಿಂಬ್ಯೆರ್ ಪಡ್ತೆಲಿಂ
ಪಪ್ಪಾ ಮಾಮ್ಮಿಕ್ ಸುಟ್ಕಾ ಮೆಳ್ಚ್ಯಾಕ್
ವರ್ಸ್ಭರ್ ಖುರ್ಸಾಮುಳಿಂ ಮಾಗ್ತೆಲಿಂ.
ಕರೆಜ್ಮಾಚಾ ವೆಳಾರ್ ಜೆದ್ನಾಂ ಎಕಾ ಬೆಬ್ದ್ಯಾ ಬಾಪಾಯ್ನ್ ಸೊಡ್ಲ್ಲೊ ಸೊರೊ ಪರತ್ ಪಿಯೆಂವ್ಕ್ ಲಾಗ್ತಾನಾ, ತಶೆಂಚ್ ಘರಾಂತ್ ಹರ್ಶೆಂಚೆಂ ಝಗ್ಡೆಂ-ಲಡಾಯ್ ಪಾಸ್ಕಾಂಚೆಂ ಫೆಸ್ತ್ ಯೆತೆಚ್ಚ್ ಪರತ್ ಸುರು ಜಾಂವ್ಚಾ ವೆಳಾರ್ ಏಕ್ ಭುರ್ಗೆಂ ಕಿತ್ಲ್ಯಾ ಮಾರ್ಮಿಕ್ ರಿತಿನ್ ದೆವಾಲಾಗಿಂ ರುದಾನ್ ಕರ್ತಾ ತೆಂ ಪಳೆಯಾ
^ ವಯ್ರ್
ಆಸ್ಟಿನ್ ಪ್ರಭು, ಚಿಕಾಗೊ
ಚಿಂತಾಪ್ ಮ್ಹಜೆಂ
ಥೊಡೆ ಪಾವ್ಟಿಂ ಚಿಂತ್ತಾಂ ಹಾಂವ್
ಅಶೆಂ ಕಿತ್ಯಾಕ್ ಹಾಂಗಾ ಘಡ್ಲೆಂ?
’ಜೆಜು ಹ್ಯಾ ಸಂಸಾರಾಕ್ ಯೆತಲೊ
ಮರಿಯೆ ಮುಖಾಂತ್ರ್ ಸಂಸಾರ್ ದೆಖ್ತಲೊ
ಜುದೆವಾಂ ವಿರೋಧ್ ತೊ ಝುಜ್ತಲೊ
ಶೆವ್ಟಿಂ ಖುರ್ಸಾರ್ ಪ್ರಾಣ್ ಸೊಡ್ತಲೊ’
ಅಶಿ ಪ್ರೊಫೆಸಿ ಪ್ರೊಫೆತಾಂನಿ ಲಿಖ್ಲೆಲಿ
ಆಸಾ ತಶಿಚ್ಚ್ ತಿ ಜ್ಯಾರಿ ಜಾಲಿ
ತರ್ ಆಮಿಂ ಜುದೆವಾಂಕ್ ಯೆಟ್ಚೆಂ ಕಿತ್ಯಾಕ್
ತಾಂಚಿ ಕಾಂಯ್ ಹಾಂತುಂ ಚೂಕ್ ಆಸಾ
ದೆವಾಚ್ಯೆ ಖುಶೆ ಪ್ರಕಾರ್ ಘಡ್ಲಾಂ ಆಶೆಂ
ತರ್ ಜೆಜು ಕಷ್ಟಾಲೊ ಮ್ಹಣ್ ರಡ್ಚೆಂ ಕಿತ್ಯಾಕ್
ಜೆಜುನ್ ಕಾಂಯ್ ನವೊ ಧರ್ಮ್ ರಚುಂಕ್ ನಾ
ತರ್ ಆತಾಂ ಹಾಂಗಾ ತಾಚ್ಯಾಚ್ ನಾಂವಾರ್
ಏಕ್ ವ್ಹಡ್ಲೊ ಸಂಸ್ಥೊಚ್ ಸ್ಥಾಪನ್ ಕೆಲಾ ಕಿತ್ಯಾಕ್
ಜರ್ ಜೆಜು ಮೆಲ್ಲ್ಯಾ ಉಪ್ರಾಂತ್ ಸರ್ಗ್ ರಚ್ಲೊ
ಪೆದ್ರು ಮೆಲ್ಲ್ಯಾ ಉಪ್ರಾಂತ್ ತಾಕಾ ಚಾವಿ ಮೆಳ್ಳಿ
ತಾಚ್ಯೆ ಆದ್ಲೆ ಮೆಲ್ಲೆ ತೆ ಸರ್ವ್ ಭಾಗೆವಂತ್
ಖಂಚ್ಯಾ ಗೃಹಾರ್ ವಸ್ತಿ ಕರ್ನ್ ಆಸ್ಲ್ಲೆ
ಜೆಜು ಕುಡಿ ಅತ್ಮ್ಯಾ ಸಮೇತ್ ಸರ್ಗಾಕ್ ಗೆಲೊ
ಮರಿಯೀ ತಾಚೆಪರಿಂಚ್ ಸರ್ಗಾಕ್ ಉಭ್ಲಿ
ಆನಿ ಆತಾಂ ಹೆಂ ಸರ್ಗ್ ಫಕತ್ತ್ ಕ್ರೀಸ್ತಾಂವಾಂಕ್
ತರ್ ಮಹಾತ್ಮಾ ಗಾಂಧಿ ಯಮ್ಕೊಂಡಾಂತ್ ಬಸ್ಲಾ?
ಮಾರ್ಟಿನ್ ಲೂಥರ್ ಪುಲ್ಗತ್ರಿಂತ್ ಆಸಾ?
ಸವಾಲಾಂಚೊ ದಾಳೊಚ್ಚ್ ಮತ್ ಕಾಂತಯ್ತಾ
ಮನ್ಶ್ಯಾನ್ ಕೆಲ್ಲ್ಯಾ ಸಭಾರ್ ನವಾಲಾಂಕ್
ಸವಾಲಾಂ ವಿಚಾರುಂಕ್ ಉದ್ರೇಕ್ ಹಾಡ್ತಾ
ಕೋಣ್ ಮ್ಹಜೆಂ ತೋಂಡ್ ಧಾಂಪುಂಕ್ ಪೆಚಾಡ್ನ್
ತೊ ಏಕ್ ಮಿಸ್ತೆರ್ ಮ್ಹಣ್ ಸಾಂಗ್ತಾಸ್ತಾನಾ
ಕುಲ್ಯಾಂಕ್ ದೋನ್ ಬಸಂವ್ಯಾಂ ಕಸೆಂ ಭೊಗ್ತಾ
ಕವಿ ಜೆದ್ನಾಂ ವಾಸ್ತವಾಂತ್ ಉಭೊ ರಾವೊನ್ ಸಾಮಾಜಿಕ್, ಧಾರ್ಮಿಕ್, ರಾಜಕೀಯ್, ಚಾರಿತ್ರಿಕ್ ಸಂಗ್ತ್ಯಾಂಕ್ ತುಕುನ್ ಸವಾಲಾಂ ಕರುಂಕ್ ಧರ್ತಾನಾ ಉದೆಂವ್ಚೆಂ ಕವಿತಾ ಕಿತ್ಲೆಂ ಸೊಭಿತ್ ಆಸ್ಯೆತ್ ಮ್ಹಣ್ಚಾಕ್ ಗೊವಾಯ್ ದಿಂವ್ಚೆಂ ಕವಿತಾ ಹೆಂ.
^ ವಯ್ರ್
ವಿನ್ಸಿ, ಮೆಲ್ಕಾರ್
ಖುರ್ಸಾವರ್ವಿಂ ಸೊಡ್ವಣ್..
ಗರ್ಧಾನಾಚ್ಯಾ ಗೊಟ್ಯಾಂತ್ ತುಂ ಜಲ್ಮಾಲೊಯ್
ಸುತಾರಿಚೆಂ ಕಾಮ್ ಕರ್ನ್ ವ್ಹಾಡ್ಲೊಯ್
ಕಿತೆಂಚ್ ಪಾತ್ಕಾಂ ತುವೆಂ ಕರುಂಕ್ನಾಂಯ್
ಸತಾಚೆಂ ಜೀವನ್ ಸಾಂಡುಂಕ್ನಾಂಯ್
ಚಾಳಿಸ್ ದೀಸ್ ಆನಿ ರಾತ್ ಮಾಗ್ಣ್ಯಾಮುಖಾಂತ್ರ್
ಉಪಾಸ್ ಧರುನ್ ದೆವಾಲಾಗಿಂ ತುಂ ಉಲಯ್ಲೊಯ್
ಹ್ಯಾ ಸಂಸಾರಿ ಪಯ್ಣಾಂತ್
ಜಯ್ತ್ ತುವೆಂ ಜೊಡ್ಲೆಂಯ್..
ಸಭಾರ್ ಅಜ್ಯಾಪಾಂ ತುವೆಂ ಕೆಲಿಂಯ್
ಶುಭ್ವಾರ್ತಾ ಪ್ರಸಾರುನ್ ದೆವಾಚಿ ವಳಕ್ ದಿಲಿಯ್
ಉತ್ರಾನ್ ತುಜ್ಯಾ ಸಯ್ತಾನ್ ಸಮೇತ್ ಧಾಂವ್ಡಾಯ್ಲೊಯ್
ಸಭಾರಾಂಚಿ ಪಿಡಾ-ಶಿಡಾ ಗೂಣ್ ಕೆಲಿಯ್
ಜಾಲ್ಯಾರೀ ತುಜೆರ್ ಆಮಿಂ ಮೊಸೊರ್ ಕೆಲೊ
ಜೆರ್ಭಾಂದ್ ತುಕಾ ಮಾರಯ್ಲೊ
ರುಕಾಚೊ ಖುರಿಸ್ ಖಾಂದ್ಯಾರ್ ದಿವುನ್
ತ್ಯಾಚ್ಚ್ ಖುರ್ಸಾರ್ ತುಕಾ ಖಿಳಾಯ್ಲೊ
ಜೆಜು ತುಜೆಥಂಯ್ ಕಿತ್ಲೆಂ ಮೊವಾಳ್ಪಣ್
ಆಮಿ ಕೆಲ್ಲ್ಯಾ ಸರ್ವ್ ಪಾತ್ಕಾಂಕ್ ಭೊಗ್ಸಿಲೆಂಯ್
ತುಜ್ಯಾ ಆವಯ್ಕ್ ಆಮ್ಚಿಯೀ ಆವಯ್ ಕರ್ನ್ ದಿಲಿಯ್
ಸತಾಚಿ ವಾಟ್ ಚಲೊಂಕ್ ಧಯ್ರಾನ್ ಭರ್ಚಾಕ್
ಮವಿತ್ರ್ ಆತ್ಮೊ ಆಮ್ಕಾಂ ದಿಲೊಯ್
ಜಾಲ್ಯಾರೀ ತುಜೆರ್ ಆಮಿಂ ಪಾತ್ಯೆಂವ್ಕ್ ನಾಂವ್
ಜೆಜು ತುಜ್ಯಾ ಖುರ್ಸಾಥಾವ್ನ್ ದಿಲ್ಯಾಯ್ ಆಮ್ಕಾಂ ಸೊಡ್ವಣ್
ಸದಾಂಚ್ ತುಜೊ ಖುರಿಸ್ ವ್ಹಾವಂವ್ಕ್
ದೀ ಆಮ್ಕಾಂ ಘಟಾಯ್ ತುಜೆ ಥಾವುನ್
ಪರ್ತ್ಯಾನ್ ಯೇ ಜೆಜು ಹ್ಯಾ ಸಂಸಾರಿಂ ಉಜ್ವಾಡ್ ಜಾವುನ್
ಫಾತೊರ್ ಜಾಲ್ಲೆಂ ಕಾಳಿಜ್ ಕಾಡ್ನ್ ಉಡಯ್ ಆಮ್ಚೆ ಥಾವ್ನ್
ಸದಾಂಚ್ ತುಜ್ಯಾ ರಾಜಾಂತ್ ಜಿಯೆಂವ್ಕ್
ಮಾಗ್ಣ್ಯಾ ಮುಖಾಂತ್ರ್ ದಾಖಯ್ ವಾಟ್ ಆಮಾ ಸರ್ವಾಂಕ್
ಕರೆಜ್ಮಾಚಾ ವೆಳಾರ್ ಕವಿ ಸೊಮ್ಯಾಲಾಗಿಂ ಎಕಾ ಸಂವಾದಾಕ್ ಲಾಗ್ತಾನಾ ಥಂಯ್ಸರ್ ಕಸಲೆಂ ಸಂಭಾಶಣ್ ಉಭೆಂ ಜಾಯ್ತ್ ಮ್ಹಳ್ಳೆಂ ಸಮ್ಜೊಂಕ್ ಕವಿಕ್ ಮಾತ್ರ್ ನ್ಹಯ್, ಎಕಾ ಸಾದ್ಯಾ ವಾಚ್ಪ್ಯಾಕ್ ಸಯ್ತ್ ತ್ರಾಸ್ ಜಾಂವ್ಚೆನಾಂತ್
^ ವಯ್ರ್
ಆಂಡ್ರು ಎಲ್. ಡಿ’ಕುನ್ಹಾ, ಶಾರ್ಜಾ
ಎಪ್ರಿಲಾಂತ್ಲ್ಯಾ ರಾತಿಂ
ಮ್ಹಜ್ಯಾ ದುಬ್ಳ್ಯಾ ಬಿಚಾಣ್ಯಾರ್
ರಗ್ಳ್ಯಾಂಕ್ ಯೇನಾಕಾಗೆ ತುಂ
ಮ್ಹಾಕಾ ವೆಂಗುಂಕ್ ಆಶೆನಾಕಾ
ಗೋಡ್ ನೀದ್ ಚೊರಿನಾಕಾ...
ಮ್ಹಜಾ ಘಾಮಾ ಈಟಾಕ್ ವ್ಹಾಡ್ಲೆಲ್ಯಾ
ಮ್ಹಾಡಾಂಚಾ ತರ್ನ್ಯಾ ಮೊಡ್ಲಾಂನೊ
ತುಮಿ ಕಿತ್ಯಾಕ್ ರಾವ್ಲ್ಯಾತ್ಗೊ ವೊಗೆಂ
ಮೆಳೊನ್ ನಾಚಾಗೊ...ಮನ್ ಕರ್ನ್ ಇಲ್ಲೆಂ ಧಲಾಗೊ
ಮ್ಹಾಕಾ ವೆಂಗುಂಕ್ ಯೇಂವ್ಚಿ ತಿ
ಲಜೆವ್ನ್ ಧಾವೊಂದಿ...
ಮೊಡ್ಲಾಂ ನಾಚ್ಲಿನಾಂತ್
ರಡ್ಣ್ಯಾಕ್ ಮ್ಹಜಾ ಹಾಲ್ಲೆನಾಂತ್
ಮಧ್ಯಾನೆ ರಾತಿಂಚೆ ಕಳ್ವಳೆ ಥಾಂಬ್ಲೆನಾಂತ್.
ಧನ್ಯಾ ಘರಾ ಬಾರಾ ವಾಜ್ಲಿಂ
ಅರೇ ಮಾಲ್ಘಡ್ಯಾಂನೊ ತುಮಿ ದೆಕ್ತಾತ್ ಕಿತೆಂ?
ದುಬ್ಳ್ಯಾ ಹಾತಾಂನಿ ತುಮ್ಕಾಂ ಪೊಶೆಲಾಂ ಕಿತ್ಲೆಂ
ನಾಣ್ಯೆ ಪಾಟ್ಲ್ಯಾ ಪೊಣ್ಸಾ ರುಕಾ... ದೆಗೆಲ್ಯಾ ಆಂಬ್ಯಾ ರುಕಾ
ಪಾಪ್ ಬಾವ್ಡ್ಯಾ ಮ್ಹಜೆರ್ ರಾಗ್ ನಾಕಾ
ತುಮ್ಚೆ ಬಾವ್ಳೆ ಮೊಟೆ ಫಾಂಟೆ ಇಲ್ಲೆ ಹಾಲಯಾ
ನೀದ್ ಚೊರ್ಚಿ ಕಾಟ್ ಚೊಟ್ಟಿ ಲಜ್ ನಾತ್ಲ್ಲಿ ತಿ
ಕಾಂಪೊನ್ ಧಾವೊಂದಿ
ರುಕಾ ಫಾಂಟೆ ಹಾಲ್ಲೆನಾಂತ್
ಮಾಲ್ಘಡ್ಯಾಂ ಕಾಳಿಜ್ ಕಡ್ಲೆಂನಾ
ಮಧ್ಯಾನೆ ರಾತಿಂಚೆ ವಳ್ವಳೆ ರಾವ್ಲೆನಾಂತ್.
ಕಾಳೊಕಾಂತ್ ತಿ ಮಾಕಾ ವೆಂಗ್ತಾ...
ನೀದ್ ಚೊರ್ತಾ
ಬಾಳಾಕ್ ವೆಂಗ್ತಾ...
ಜಾಗ್ ಕರ್ತಾ
ಬಾಯ್ಲೆಕ್ಯ್ ವೆಂಗ್ತಾ...
ಖರಸ್ ಹಾಡ್ತಾ.
ಅಲ್ತಾರೆರ್ ತೇಲ್ ಸುಕೊನ್
ಥಕ್ಲ್ಲ್ಯಾ ಚಿಮ್ಣೆ ಉಜ್ವಾಡಾಕ್ ದಿಸ್ತಾತ್
ಬಾಳಾ ಕಪೊಲಾರ್ ಥೆಂಬೆ ಥೆಂಬೆ ಘಾಮಾ ಥಿಕಾಂ
ಬಾಯ್ಲೆ ದೊಳ್ಯಾಂ ಇಡ್ಯಾಂತ್ ಇರೊನ್ ವೆಚಿಂ ಖಂತಿ ದುಖಾಂ
ಪರ್ನೆಂ ಘಡಿಯಾಳ್ ಕಟ್ ಕಟ್ ಕೊಟಾಯ್ತಾನಾ
ಪಾಲ್ಯಾಂಯ್ ಜಿಯೆಂವ್ಕ್ ಆಸಾ -
ಕಾಳಿಜ್ ಜಾಗಯ್ತಾ...
ಹಾಯ್ ಪಕೃತೆ!
ಕಿತೆಂ ತುಜಿ ಗತ್?
ತುಜೆ ರೂಕ್ ಸೊರ್ಕೆಲ್ಯಾತ್...
ಮೊಡಾಂ ಕಡಾನಾಂತ್.
ತುಜೊ ದರ್ಯೊ ಉಬೆಲಾ...
ಧರಣ್ ಸಗ್ಳಿಚ್ ತಾಪ್ಲ್ಯಾ
ವೊಂಪ್ತಾನಾ ಉಜೊ ಪಡ್ತಾ..
ಲುಂವ್ತಾನಾ ಆವ್ರ್ ಯೆತಾ
ಪಾಚ್ವೆಂಪಣ್ ಕರ್ಪೊನ್ ಗೆಲಾಂ...
ಮ್ಹನ್ಶಾಪಣಾ ಪ್ರಾಣ್ ಉಬ್ಲಾ
ತುಜೆರ್ ಪಾತ್ಯೆಲ್ಲ್ಯಾ ಮ್ಹಜಿ ಜಿಣಿ
ಮ್ಹನ್ಜಾತಿ ಪಾಸ್ಟ್ ಜಾಲ್ಯಾ.
ರಾತಿಚಾ ಧಗಿಚಾ ವೇಂಗೆಂತ್ ಜಾಗೊ ಉರೊನ್
ಫಾಂತ್ಯಾರ್ ನೀದ್ ಲಾಗ್ತಾನಾ
ಗುಡಾಂತ್ಲಿಂ ಕುಂಕ್ಡಾಂ ಗೊಟ್ಯಾಂತ್ಲಿಂ ಗೊರ್ವಾಂ
ಬೊಬಾಟುನ್ ಆಪಯ್ತಾತ್
ಫಾಂತ್ಯಾಚಾ ಸುಕ್ಣ್ಯಾಂಚೊ ತಾಳೊ ಪಡ್ಲಾ..
ಪಕೃತೆಚಿ ಕಾನ್ ಫುಟ್ಲ್ಯಾತ್
ಬಾಯ್ಲ್ ರಾಂದ್ಣಿಲಾಗಿಂ ಸಕಾಳಿಂಚಿ ಭೆಟವ್ಣಿಂ ಮ್ಹಣ್ತಾನಾ
ಹಾಂವ್ ಗೊಟ್ಯಾಕ್ ಪಾವ್ತಾಂ
"ಮ್ಹಜಾ ದೆವಾ ಮ್ಹಜಾ ಸಾಯ್ಬಾ" ಸಾಂಗೊನ್...
"ಮ್ಹಜಾ ದೆವಾ ಮ್ಹಜಾ ಸಾಯ್ಬಾ...
ಪಾಯಾಂಕ್ ಪಡ್ತಾಂ
ಜಶಿ ಧಗಿಚಿ ರಾತ್ ದಿಲಿಯ್
ತಸಲೊ ದೀಸ್ ದೀನಾಕಾ ದೆವಾ
ಇಲ್ಲಿ ಥಂಡಾಯ್ ದಿ ಬಾಪಾ.... ಆಮೆನ್"
ಎಪ್ರಿಲ್ ಮಯ್ನ್ಯಾಚಾ ಎಕಾ ರಾತಿಂ ಕವಿ ದೆವಾಕ್ ಏಕ್ ಅಪುರ್ಭಾಯೆಚೊ ಉಲೊ ದಿತಾ, ಹೆಂ ವಾಚ್ತಾನಾ ಸಾದೆಂ ಕವಿತಾ ದಿಸೊಂಕ್ ಪುರೊ, ಪುಣ್ ಸಾಂಕೇತಿಕ್ ರಿತಿನ್ ಹ್ಯಾ ಕವಿತೆಂತ್ ಆಯ್ಚಾ ಪ್ರಸ್ತುತ್ ಕಾಳಾಚಿ ಅಪುರ್ಭಾಯೆಚಿ ಕಾಣಿ ಆಸ್ಚಿ ಕವಿತೆಚಿ ವೋಡ್ ಆಸ್ಚಾಂಕ್ ಜರೂರ್ ಗೊಮ್ತೆಲಿ
^ ವಯ್ರ್
ಡಾ|ಎಡ್ವರ್ಡ್ ನೊರೊನ್ಹಾ
ಚಲ್ತಾಂ ಚಲ್ತಾಂ
"ಚಲ್ತಾಂ ಚಲ್ತಾಂ ಜಾಲಿ ರಾತ್
ದಿವೊಡೆಚಾ ಬಂದ್ರಾರ್
ಜಿಗ್ಬಿಗ್ ದಿವೆ ಜಳ್ತಾತ್."
ಗಣ್ಣ್ ದಾಧೊಶಿ ಕಾಳೊಕ್
ಆಪಯ್ತ್ ಮೊಡುನ್ ದೊಳೆ,
"ಅಪಾ ಲಿಪಾ ಸೋ ಲಿಪಾ;"
ಧಂಡಳ್ಚಾ ಸಾಂಕ್ಯಾ ವಯ್ಲ್ಯಾನ್
ಕುಂಬು ಫೊಳ್ಯಾಂಚಿ ವಾಟ್,
"ಚಲ್ತಾಂ ಚಲ್ತಾಂ ಜಾಲಿ ರಾತ್."
ಲಕೊನ್ ಕೊಸಾಳ್ಚ್ಯೆ ಗಾಡ್ಯೆಕ್
ಮಾನ್ ಮರ್ಯಾದೆಚೊ ತಿರು;
ತೇಲ್ ಮುಗ್ದಾಲ್ಲೊ ಲಾಂಪ್ಯಾಂವ್.
ಆಂಬ್ಶೆಲ್ಲ್ಯಾ ಕೊಶೆಡ್ದಾಂಕ್
ಫ್ಲೆನಾರಿ ಇಂದುಲ್ಜೆನ್ಚಾಂಚೊ
ಕುರ್ಪೆಚೊ ವೊಳೊ;
ಕಾಳ್ಯಾ ಲುಗ್ಟಾಚೊ ಕಾಳೊ
ಪಿಂದ್ಲ್ಲೊ ತೆಂಪ್ಲಾಚೊ ಪೊಡ್ದೊ;
ಖುರಿಸ್ ಉಬಾರ್ನ್
ಫೊಂಡ್ ನಿಕೆಪಿಲ್ಲೊ.
ಜೆದ್ನಾಂ ಏಕ್ ಕವಿ ಖುರಿಸ್ ಆನಿ ಮೊರ್ನಾಚೊ ಫೊಂಡ್ ಸಾಂಕೇತಿಕ್ ರಿತಿನ್ ಜಿಣ್ಯೆ ಮಿಸಾಂವಾಕ್ ಸರಿ ಕರುನ್ ಮನ್ಶಾ ಜಿಣ್ಯೆಚಾ ಸಾರಾಚೆರ್ ಕವಿತಾ ಬರಂವ್ಕ್ ಲಾಗ್ತಾನಾ ಥಂಯ್ಚರ್ ಉದೆಂವ್ಚೆಂ ಕವಿತಾ ಕಿತ್ಲೆಂ ಅಪುರ್ಭಾಯೆಚೆಂ ತೆಂ ತುಮಿಂಚ್ ಪಾರ್ಕಿಯಾ.
^ ವಯ್ರ್
ಜೆ.ಬಿ.ಮೊರಾಯಸ್
ಪಿಲಾತ್ ಹಾತ್ ಧುತಾ
ದೇಡ್ ಮಹಿನ್ಯಾಚೆಂ
ಬಾಳ್ ಹಾತಿಂ
ದೇಡ್ ಹಾತಿ
ಕುಡ್ಕೊ ಆಂಗಾರ್
ಪುಣ್ ತ್ಯಾ ದೋನ್ ದೊಳ್ಯಾಂನಿ
ದುಖ್ ಸಗ್ಳ್ಯೆ ಜಿಣ್ಯೆಚೆಂ
ಚಿತ್ರಿತ್ ಜಾಲಾಂ.
ತೆ ಪಳೆಂವ್ಚೆಂ
ಮ್ಹಾಕಾ ಧಯ್ರ್ ನಾ
ಮ್ಹಜ್ಯೆಚ್ ಜಿಣ್ಯೆಚೊ ಆರ್ಸೊ
ತೆ ಜಾತಿತ್ ಮ್ಹಳ್ಳಿ ಭಿರಾಂತ್
ಮ್ಹಜೆ ದೊಳೆ ಚುಕಯ್ತಾತ್
ದೀಷ್ಟ್ ತಾಚಿ
ಆನಿ ಪಾಂಯ್ ದಾಕಯ್ತಾತ್
ವಾಟ್ ವೆಗ್ಳಿ
ಮ್ಹಜೆ ಭಿತರ್ಲೊ ಪಿಲಾತ್
ಪರ್ತ್ಯಾನ್ ಆಜ್ ಹಾತ್ ಧುತಾ
ಆನಿ ಹಾಂವ್ ಚಲ್ತಾಂ ಮುಖಾರ್
ನಿಶ್ಚಿಂತ್ ಮನಾನ್.
ಜೆಜುಕ್ ಖುರ್ಸಾಚಾ ಮೊರ್ನಾಚೆಂ ಫರ್ಮಾಣ್ ದೀವ್ನ್ ಲೊಕಾಂ ಮುಖಾರ್ ಸುಭಾಗಿ ಮ್ಹಣ್ ಪಾಚಾರ್ಚಾಕ್ ಹಾತ್ ಧುಲ್ಲೊ ಪಿಲಾತ್ ಆಜ್ ನಾಂ ತರ್ಯ್ ತಾಚೆಂ ಸಂತಾನ್ ಅಜೂನ್ ಆಮ್ಚಾ ಸಂಸಾರಾಂತ್ ಹರ್ಯೆಕ್ಕಡೆ ಆಸಾತ್ ತೆಂ ಕವಿತೆಚಾ ಸಾವ್ಳೆಂತ್ ಉಟೊನ್ ದಿಸ್ತಾ.
^ ವಯ್ರ್
ಮೆಲ್ವಿನ್ ಜೆ. ವಾಸ್
ರೂಕ್
ಮ್ಹಜ್ಯಾಚ್ ಹಾತಾಂನಿ ಹಾವೆಂಚ್
ಉದಾಕ್ ವೊತುನ್ ಪೋಸ್ ಕರುನ್
ವಾಗಯಿಲ್ಲೊ ರೂಕ್ಗೆ ಮಾಂಯ್
ಜ್ಯಾ ರುಕಾಚಾ ಸಾವ್ಳೆ ಮುಳಾಂತ್
ಹಾವೆಂ ಇರ್ನೆಂ ಧರ್ಲ್ಲೆಂ
ಪಾಯ್ನ್ ಮ್ಹಾಕಾ ಸುತಾರಿಪಣ್ ಶಿಕಯಿಲ್ಲೆಂ
ಜ್ಯಾ ರುಕಾಮುಳಿಂ ತುವೆಂ ಮ್ಹಾಕಾ
ಉಸ್ಕ್ಯಾರ್ ಖೆಳಯಿಲ್ಲೆಂಯ್
ಹಾಚ್ಯಾ ಪಾಳಾಂಕ್ ಆದ್ಳೊನ್ ಪಡ್ತಾನಾ
ಧಾಮ್ವೊನ್ ಯೇವ್ನ್ ವೆಂಗೆಂತ್ ಆರಾವ್ನ್
ಮ್ಹಾಕಾ ಬುಜವ್ನ್
ಪಯ್ಶಿಲ್ಯಾ ದೆವಾಳಾಕ್ ಧಾಖವ್ನ್
ಹಾಸಯಿಲ್ಲೆಂಯ್
ಹ್ಯಾಚ್ ರುಕಾಚಾ ಸಾವ್ಳೆಪಂದಾ
ತಿಚೆ ಆನಿ ಹಾಚೆ ಮಧೆಂ ಹಾವೆಂ ಗಡ್ ವೊಡ್ಲ್ಲಿ
ತಾನೆಲ್ಲ್ಯಾ ಲೊಕಾಂಚಾ ಜಿಬೆಕ್ ಥಂಡ್ಸಾಣ್
ಭುಕೆಲ್ಲ್ಯಾ ಪೊಟಾಂಕ್ ಘಟಾಯ್
ವಾಟ್ ಚುಕೊನ್ ಗೆಲ್ಲ್ಯಾಂಕ್
ಘರ್ಚಿ ದಿಶಾ ಧಾಖವ್ನ್
ಭರ್ವಶ್ಯಾನ್ ಭರ್ಲೆಲೆಂ
ಆಜ್ ಹ್ಯಾಚ್ ರುಕಾಕ್ ನಿಸಣ್ ಕರುನ್
ಫಾಂಟ್ಯಾ ಥಾವ್ನ್ ಫಾಂಟ್ಯಾಕ್ ಹಾವೆಂ
ಉಮ್ಕಾಳೊಂಕ್ ಆಸಾ
ಆಜ್ ಮ್ಹಜೊ ಪಾಯ್ ಮ್ಹಜೆಸಂಗಿಂ
ಆಸೊಂ ಯಾ ನಾ ಆಸೊಂ
ತುಜಿ ಅಪುಟ್ ದುದಾ ಸಕತ್
ಅಜೂನ್ ಹ್ಯಾ ಜಿವಾಕ್ ಭಳ್ ದಿತಾಗೆ ಮಾಂಯ್
ನಾಕಾಗೆ ಮಾಂಯ್
ಅಶೇಂಯ್ ತುವೆಂ ದುಖಾಂ ಗಳಂವ್ಕ್
ಫಾಲ್ಯಾಂಚಾ ಉದೆವಾಕ್ ಹಾಂವ್ ನವೆಂ ಕರ್ತಲೊಂ
ಸಗ್ಳ್ಯೊ ಸಂಗ್ತಿ
ಹಾಂವ್ ನವ್ಯಾನ್ ಲಾಯ್ತಲೊಂ
ಸಗ್ಳ್ಯಾ ಪ್ರಥ್ವೆಕ್ ಆಜ್ ಹಾಂವ್
ಸಂಪೂರ್ಣ್ ಪರಿಪೂರ್ಣ್ ಕರ್ತಲೊಂಗೆ ಮಾಂಯ್
ಹ್ಯಾಚ್ ರುಕಾ ಥಾವ್ನ್.. ಆಜ್..!
ಜ್ಯಾ ರುಕಾಂತ್ ಜಾಲ್ಲ್ಯಾ ಅಸ್ತಿತ್ವಾಂತ್ ಕವಿ, ಇತ್ಲೊ ಮುಖಾರ್ ಪಾವೊನ್ ತ್ಯಾಚ್ ರುಕಾಂತ್ ಅಪ್ಲೊ ಶೆವೊಟ್ ಜೊಡ್ತಾನಾ ಹ್ಯಾ ರುಕಾಚಾ ಪಾಳಾಂನಿ, ಫಳಾಂನಿ, ಫುಲಾಂನಿ, ಸಾವ್ಳೆಂನಿ ಸಯ್ತ್ ಕವಿ ಅಪ್ಲೆಂಪಣ್ ಸೊಧುನ್ ಆಸ್ತಾನಾ, ಅಪ್ಲ್ಯಾ ವ್ಹಡಿಲಾಂಕ್ ದಿಂವ್ಚಿ ಭುಜಾವಣ್ ಸಯ್ತ್ ಕಿತ್ಲಿ ಪರಿಪಕ್ವ್ ಜಾಂವ್ಕ್ ಸಕ್ತಾ ತೆಂ ತುಮಿಂಚ್ ಪಾರ್ಕುನ್ ಸೊಡಾ.
^ ವಯ್ರ್
ವಲ್ಲಿ ಕ್ವಾಡ್ರಸ್, ಅಜೆಕಾರ್
ಖುರ್ಸಾಯ್ ತಾಕಾ ಖುರ್ಸಾಯ್
ಗೊರ್ವಾಂ ಗೊಟ್ಯಾಂತ್ ಉದೆವ್ನ್ ಆಯ್ಲೊ
ಚಾಳೀಸ್ ದೀಸ್ ಉಪಾಶಿಂ ರಾವ್ಲೊ
ರಾನಾ ಮೊಳ್ಯಾಂತ್ ಮಾಗ್ಣೆಂ ಕೆಲ್ಲ್ಯಾಕ್
ಖುರ್ಸಾಯ್ ತಾಕಾ ಖುರ್ಸಾಯ್
ಆಸೊಂ ಹೊ ಮನ್ಶಾಪಿಲೊ
ಪಾತ್ಕಾಂನಿ ಬುಡೊನ್ ಘಾತ್ಕಿ ಜಾಲೊ
ಪಾಳೊ ದಿವುನ್ ಸಯ್ತಾನಾಚೊ ತಾಳೊ
ಪುಣ್ ತಾಕಾ - ಖುರ್ಸಾಯ್ ತಾಕಾ ಖುರ್ಸಾಯ್
ಕುಡ್ಡ್ಯಾ ದೊಳ್ಯಾಂಕ್ ದೀಶ್ಟ್ ದಿಲ್ಲ್ಯಾ
ಕೆಪ್ಪ್ಯಾ ಕಾನಾಂಕ್ ಗೂಣ್ ಕೆಲ್ಲ್ಯಾ
ಪಾತ್ಕಾಂ ಸಗ್ಳಿಂ ಧುವ್ನ್ ವೆಲ್ಲ್ಯಾಕ್
ಖುರ್ಸಾಯ್ ತಾಕಾ ಖುರ್ಸಾಯ್
ಧ್ವೇಶಾನ್ ಭರೊನ್ ವಾಯ್ಟ್ ಕೆಲೆಂ
ಫ಼ಾರಿಕ್ಪಣಾಚೆ ತಾನೆಂತ್ ರಗಾತ್ ಚಿಂವ್ಲೆಂ
ಮೊಗಾಕ್ ವರ್ನ್ ಆವ್ರಾಂತ್ ಲೊಟ್ಲೆಂ
ಪುಣ್ ತಾಕಾ - ಖುರ್ಸಾಯ್ ತಾಕಾ ಖುರ್ಸಾಯ್
ಎಕಾಮೆಕಾ ಮೋಗ್ ಕರಾ ಮ್ಹಳ್ಳ್ಯಾ
ದುಸ್ಮಾನಾಂಕ್ ಭಗ್ಸುಂಕ್ ಸಾಂಗ್ಲ್ಲ್ಯಾ
ಆಸ್ತ್ ವಿಕುನ್ ಪೆಲ್ಯಾಂಕ್ ದೀ ಮ್ಹಳ್ಳ್ಯಾಕ್
ಖುರ್ಸಾಯ್ ತಾಕಾ ಖುರ್ಸಾಯ್
ಸತಾ ನಿತಿಕ್ ವಿಕುನ್ ದಿಲೆಂ
ಆಪ್ಲ್ಯಾ ಪೆಲ್ಯಾಂಕ್ ಲುಟುನ್ ಖೆಲೆಂ
ದೆವಾಕ್ ವ್ಹರ್ನ್ ಆಡೊವ್ ಘಾಲೆಂ
ಪುಣ್ ತಾಕಾ - ಖುರ್ಸಾಯ್ ತಾಕಾ ಖುರ್ಸಾಯ್
ವಾರೆಂ ವಾದಾಳಾಂತ್ಲೆಂ ರಾಕ್ಲ್ಲ್ಯಾಕ್
ಪಿಡೆ ಶಿಡೆಂತ್ ಭಲಾಯ್ಕಿ ದಿಲ್ಲ್ಯಾಕ್
ಆಮ್ಚಾ ಪಾತ್ಕಾಂಚೊ ಕಾಂಟ್ಯಾ ಮುಕುಟ್
ನೆಸ್ಲ್ಲ್ಯಾಕ್
ಖುರ್ಸಾಯ್ ತಾಕಾ ಖುರ್ಸಾಯ್
ಪಳೆ ಹೊ ಅಸ್ಕತ್ ಮನಿಸ್
ತೀಸ್ ನಾಣ್ಯಾಂಕ್ ವಿಕ್ಲ್ಲೊ ಜುದಾಸ್
ಚೋರ್ ನ್ಹಯ್ ಭಾಗೆವಂತ್ ಬಾರಾಬ್ಬಾಸ್
ಪುಣ್ ತಾಕಾ- ಖುರ್ಸಾಯ್ ತಾಕಾ ಖುರ್ಸಾಯ್
ಉದಾಕ್ ಆಸ್ಲ್ಲೆಂ ವಾಯ್ನ್ ಕೆಲೆಂ
ದೋನ್ ಮಾಸ್ಳ್ಯಾಂನಿ ಹಜಾರಾಂಕ್
ವಾಡ್ಲೆಂ
ಮರಣ್ ಪಾವ್ಲ್ಲ್ಯಾಂಕ್ ಜಿವಂತ್ ಕೆಲ್ಲ್ಯಾಕ್
ಖುರ್ಸಾಯ್ ತಾಕಾ ಖುರ್ಸಾಯ್
ಅಖ್ರೇಚಾ ಘಡ್ಯೆ ಆಯ್ತೊ ಜಾಲಾಯ್
ತುಜಿಂ ಪಾತ್ಕಾಂ ತಾಚಾ ಖಾಂದ್ಯಾರ್
ಎದೊಳ್ಚ್ಚ್ ಅರ್ಧೊ ಮೆಲ್ಲ್ಯಾ ತಾಕಾ
ಖುರ್ಸಾಯ್ ತಾಕಾ ಖುರ್ಸಾಯ್
ತೊ ಮೊಗಾ ದರ್ಯೊ ಫ಼ಾರಿಕ್ಪಣ್ ಘೆಂವ್ಚೊನಾ
ತೊ ಜಾಣ್ವಾಯೆಚೊ ಸುರ್ಯೊ ಆಪ್ಲಿಂ ಪಾತ್ಕಾಂ
ಮೆಜಿಸೊನಾ
ತರ್ ಆತಾಂ ರಾಕ್ತಾಯ್ ಕೊಣಾಕ್
ಖುರ್ಸಾಯ್ ತಾಕಾ ಖುರ್ಸಾಯ್
ಆಮ್ಚಾ ಸಮಾಜೆಂತ್ ಅಸಲೊ ಲೋಕ್ ಭರೊನ್ ಗೆಲಾ, ಅಪ್ಣಾಚಾ ದೊಳ್ಯಾಂತ್ ಆಡೆಂ ಆಸೊನ್ಯ್ ಹೆರಾಂಚಾ ದೊಳ್ಯಾಂಚೆಂ ಕಿಸರ್ ಮೆಜ್ಚೆ ಹೆ ಇತ್ಲೆ ಹಡ್ಬೆ ತರ್ಯೀ ಹೆರಾಂಕ್ ಸದಾಂಯ್ ’ಖುರ್ಸಾಯ್ ತಾಕಾ ಖುರ್ಸಾಯ್ (ಚಾರ್ ಮುಖಾಂ ಬುಕಾಂತ್ಲೆಂ)’ ಮ್ಹಣ್ ಅಪ್ಣಾಂಕ್ ಭಾಗೆವಂತ್ ಮ್ಹಣ್ ಪಾಚಾರುಂಕ್ಯ್ ಪಾಟಿಂ ಸರಾನಾಂತ್.
^ ವಯ್ರ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.