ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಯಜ್ನ್
ಕ್ಲೆರೆನ್ಸ್ ಪಿಂಟೊ, ಕೈಕಂಬ: ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚಾ ಸಂಸಾರಾಂತ್ ಹೆಂ ನಾಂವ್ ಥಿರ್ ಆನಿ ಅಥ್ವೆಂಚ್. ಅಪುರ್ಭಾಯೆಚಿ ಕಥಾ, ವಿಭಿನ್ನ್ ರಿತಿನ್ ನಿರೂಪಣ್ ಕರ್ಚಾಂತ್ ಮಾತ್ರ್ ನ್ಹಂಯ್, ವಾಚ್ಪ್ಯಾಕ್ ತಿ ಕಾಣಿ ಸಂಪ್ತಾಪರ್ಯಾಂತ್ ಭಾಂದುನ್ ದವರ್ಚಿ ಕಲಾ ಆಸ್ಚಾ ಭೋವ್ ಥೊಡ್ಯಾಂ ಪಯ್ಕಿ ಉಟೊನ್ ದಿಸ್ಚೊ ಕಾಣ್ಯೆಗಾರ್ ಹೊ ಜಾವ್ನಾಸಾ. ಅಪುಟ್ ಕೊಂಕ್ಣಿ ಭಾಸ್ ಆನಿ ವಾಚ್ಪ್ಯಾಕ್ ವೆಗ್ಳ್ಯಾಚ್ ಸಂಸಾರಾಕ್ ವರುನ್ ವೆಚಿ ಹಾಚಾ ಕಾಣ್ಯಾಂಚಿ ವಿಶೇಷತಾ. ಹಾಚಾ ಮಟ್ವ್ಯಾ ಕಾಣ್ಯಾಂಚೊ ಬೂಕ್ ’ಸುಟ್ಕಾ’ ಪರ್ಗಟ್ ಜಾಲಾ ತರ್ಯ್ ಅಡೇಯ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಹಾಣೆಂ ಎದೊಳ್ಚ್ ಬರಯ್ಲ್ಯಾತ್. ವೆಬ್ಸಾಯ್ಟಾಂಚೆರ್ ಸುರ್ವಾತ್ ಕೆಲ್ಲೆಂ ಪಯ್ಲೆಂ ಮಟ್ವ್ಯಾ ಕಾಣ್ಯಾಂಚೆಂ ಅಂಕಣ್ ’ಕಥಾಮೃತ್’ ಹಾಣೆಂಚ್ ಸುರ್ವಾತ್ ಕೆಲ್ಲೆಂ ಜಾವ್ನಾಸಾ. [’ಸುಟ್ಕಾ’ ಬುಕಾಂತ್ ಪರ್ಗಟ್ ಜಾಲ್ಲಿ ಮಟ್ವಿ ಕಾಣಿ]
ಹಾಚ್ಯೊ ಥೊಡ್ಯೊ ಕಾಣ್ಯೊ: ದೆವಾನ್ ವಿಸರ್ಲೆಲಿಂ ಭುರ್ಗಿಂ, ಧುಳ್ ತಿ ಧುಳ್ಚ್ಚ್, ಏಕ್ ಕುಡ್ಕೊ ಪಿಜ್ಜಾ
ಕ್ಲೆರೆನ್ಸ್, ಕೈಕಂಬ
ಸದಾಂಚೆ ಬರಿಚ್ಚ್ ಸುರ್ಯೊ ಮುಡ್ಲಾ ಕುಶಿನ್ ಉದೆವ್ನ್ ಯೆತಾಲೊ.
ಥಂಡಿಯೆಚೊ ಕಾಳ್ ಜಾಲ್ಲ್ಯಾನ್ ಶೀತಳ್ ವ್ಹಾರೆಂ ಭರಾನ್ ವ್ಹಾಳೊನ್ ಆಸ್ಲ್ಲೆಂ.
ಸಾಂತ್ ಡೆನಿಸ್ ಯುನಿವರ್ಸಿಟಿಚ್ಯಾ ಭಾಯ್ಲ್ಯಾ ಆಂಗ್ಣಾಂತ್ ವಿಕ್ಟರ್ ಆಪ್ಲ್ಯಾ ಬಾಪಾಯ್ಚ್ಯಾ ಯೆಣ್ಯಾಕ್ ರಾಕೊನ್ ರಾವ್ಲ್ಲೊ. ವೀಸ್ ವರ್ಸಾಂಚೊ ಸೊಭಿತ್ ಸುಂದರ್ ತರ್ನಾಟೊ. ಆಜ್ ತಾಕಾ ವೀಸ್ ವರ್ಸಾಂ ಜಾಲ್ಲಿಂ. ಹ್ಯಾ ಸಂದರ್ಬಾರ್ ತಾಚ್ಯಾ ಬಾಪಾಯ್ ತಾಕಾ ವಿಶೇಸ್ ಇನಾಮ್ ದಿತಾಂ ಮ್ಹಣ್ ಭಾಸಾಯಿಲ್ಲೆಂ ಆನಿ ತ್ಯಾ ಇನಾಮಾಕ್ ತೊ ರಾಕೊನ್ ರಾವ್ಲ್ಲೊ.
ತಿತ್ಲ್ಯಾರ್ ಕಾಳೆಂ ಮರ್ಸಿಡಿಸ್ ಕಾರ್ ಯುನಿವರ್ಸಿಟಿಚ್ಯಾ ಮುಖ್ಲ್ಯಾ ದಾರ್ವಾಟ್ಯಾಂತ್ಲ್ಯಾನ್ ಭಿತರ್ ಯೇವ್ನ್ ಕಾರಾಚ್ಯಾ ಆಡ್ಡ್ಯಾಂತ್ ರಿಗ್ಲೆಂ.
ಬಾಪುಯ್ ಆಪ್ಣಾ ಸರ್ಸಿನ್ ಯೆತಾ ಮ್ಹಣಾಸರ್ ರಾವೊಂಕ್ ಜಾಯ್ನಾತ್ಲ್ಲೊ ವಿಕ್ಟರ್ ಧಾಂವೊನ್ ವಚೊನ್ ಕಾರಾಲಾಗಿಂ ಪಾವ್ಲೊ.
ರಿಚ್ಚರ್ಡ್ ಕಾರಾಂತ್ಲೊ ಸರಾರಾಂ ದೆಂವೊನ್ ಆಪ್ಲ್ಯಾ ಪುತಾಕ್ ವೆಂಗೊನ್, ಉಮಾಳ್ಯಾಂನಿ ಭರೊನ್ ಮ್ಹಣಾಲೊ - ಭಾಗಿ ಜಲ್ಮಾ ದಿವಸ್ ತುಕಾ ಮ್ಹಜ್ಯಾ ಪುತಾ.. ವಿಕ್ಟರ್...
ಹಾತಾಂತ್ ಆಸ್ಲ್ಲೊ ಫುಲಾಂಚೊ ತುರೊ ದೀವ್ನ್ ತಾಣೆಂ ಮುಕಾರ್ಸುನ್ ಮ್ಹಳೆಂ "ಆಜ್ ತುಂ ವೀಸ್ ವರ್ಸಾಂಚೊ ಜಾಲಾಯ್. ತ್ಯಾ ಖಾತಿರ್ ಹಾವೆಂ ತುಕಾ ವಿಶೇಸ್ ಇನಾಮ್ ಹಾಡ್ಲಾಂ... ಧರ್ ಹಿ ಚಾವಿ ತುಜ್ಯಾ ನವ್ಯಾ ಕಾರಾಚಿ... ಟೊಯೋಟಾ .. ತುವೆಂ ಕೆದಾಳಾ ಥಾವ್ನ್ ಆಶೆಲ್ಲೆಂ ಕಾರ್ ತೆಂ... ಹಾವೆಂ ತುಕಾ ಭಾಸಾಯಿಲ್ಲೆಂ ಇನಾಮ್..."
ಚಾವಿ ಹಾತಿಂ ಘೆತಾನಾ, ವಿಕ್ಟರಾಚ್ಯಾ ತೊಂಡಾರ್ ಜಾಲ್ಲ್ಯಾ ಸಂತೊಸಾಕ್ ಪಳೆವ್ನ್ ರಿಚ್ಚರ್ಡಾಚೆಂ ಮನ್ ಉಚಾಂಬಳ್ ಜಾಲ್ಲ್ಯಾ ದರ್ಯಾ ಭಾಶೆನ್ ಜಾಲೆಂ. ಹ್ಯಾ ವೆಳಿಂ ತಾಚ್ಯಾ ಮತಿಂತ್ ಆಯಿಲ್ಲಿಂ ಚಿಂತ್ನಾಂ ತಿಂಚ್ಚ್ - ಜೆನೆಟ್, ತುಂ ಆಜ್ ಮ್ಹಜ್ಯಾ ಸವೆಂ ಆಸ್ಲ್ಲೆಂಯ್ ತರ್ ತುಜ್ಯಾ ಪುತಾಕ್ ಪಳೆವ್ನ್ ಕಿತ್ಲೆಂ ಖುಶ್ ಜಾತೆಂಯ್?
ವಿಕ್ಟರಾಕ್ ತಾಣೆ ಪರತ್ ಪಳಯ್ಲೆಂ. ತರ್ನೊ ದಡಂಗ್ ಜಿವಾಚೊ. ಸೊಭಾಯೆನ್ ಗೊರೊ ತಸೆಂ ವಿಶೇಸ್ ಆಕರ್ಶಿತ್. ಶಿಕ್ಪಾಂತ್ ಉತ್ತೀಮ್ ತರ್ ಖೆಳಾಂತ್ ಕಾಂಯ್ ಪಾಟಿಂ ನಾ ಮ್ಹಣ್ಚ್ಯಾ ತಾಲೆಂತಾಂನಿ ಭರ್ಲ್ಲೊ.
ರಿಚರ್ಡಾಚ್ಯಾ ಹಾತಿಂ ಲ್ಹಾನ್ ಲೊಕಾಟೊ ಆಸ್ಲ್ಲೊ. ತೊ ವಿಕ್ಟರಾಚ್ಯಾ ಮುಕಾರ್ ವೊಡ್ಡಾವ್ನ್ ಮ್ಹಳೆಂ - "ವಿಕ್ಟರ್, ಹೆಂ ಇನಾಮ್ ತುಜ್ಯಾ ಮಮ್ಮಿನ್ ತುಜ್ಯಾ ಖಾತಿರ್ ತಿ ಮೊರ್ಚ್ಯಾ ಪಯ್ಲೆಂ ದಿಲ್ಲೆಂ. ತುಂ ವೀಸ್ ವರ್ಸಾಂಚೊ ಜಾತಾನಾ ತುಕಾ ದಿಂವ್ಚ್ಯಾ ಖಾತಿರ್.. ಧರ್ ... ಹೆಂ ತುಜ್ಯಾ ಮಮ್ಮಿಚಿ ಕಾಣಿಕ್ ತುಕಾ...ಯೆದೊಳ್ ಮ್ಹಣಾಸರ್ ಹಾವೆಂ ತಿ ಸಾಂಬಾಳ್ನ್ ದವರ್ಲ್ಲಿ ಮೊಲಾಧಿಕ್ ವಸ್ತ್ ಆಜ್ ತುಜ್ಯಾ ಹಾತಿಂ ದಿತಾಂ...."
ವಿಕ್ಟರಾಚ್ಯಾ ತೊಂಡಾರ್ ಆಜ್ಯಾಪ್ ಭರೊನ್ ಗೆಲೆಂ. ತಾಚ್ಯಾ ಆವಯ್ಕ್ ದೆಖ್ಲ್ಲೊ ಉಡಾಸ್ ತಾಕಾ ನಾತ್ಲ್ಲೊ. ತೊ ಜಲ್ಮಾಲ್ಲ್ಯಾ ಥೊಡ್ಯಾಚ್ಚ್ ದಿಸಾಂನಿ ತಿ ಮರಣ್ ಪಾವ್ಲ್ಲಿ ಮ್ಹಣ್ ತಾಣೆಂ ಆಯ್ಕಾಲ್ಲೆಂ ಮಾತ್ ತರ್ ಹೆಂ ಕಿತೆಂ..?
ಕಾಂಪ್ಚ್ಯಾ ಹಾತಾಂನಿ ತೊ ಲೊಕಾಟೊ ತಾಣೆ ಘೆತ್ಲೊ. ಪರ್ನೊ ಲೊಕಾಟೊ ತೊ. ವೀಸ್ ವರ್ಸಾಂಚ್ಯಾ ಪಯ್ಲೆಂಚೊ ಮ್ಹಣ್ ಸಾರ್ಕೆಂ ಕಳ್ತಾಲೆಂ.
"ವಿಕ್ಟರ್, ಮ್ಹಜ್ಯಾ ಭುರ್ಗ್ಯಾ,
ಭಾಗಿ ವೀಸಾವೊ ಜಲ್ಮಾ ದೀಸ್ ತುಕಾ ...
ತುಜಿ ಮೊಗಾಚಿ ಮಮ್ಮಿ"
ಲೊಕೊಟ್ಯಾ ವಯ್ರ್ ನಿಳ್ಶ್ಯಾ ತಿಂತಾನ್ ನಾಜೂಕಾಯೆನ್ ಬರಯಿಲ್ಲಿಂ ಉತ್ರಾಂ ತಾಣೆ ಮತಿ ಭಿತರ್ ವಾಚ್ಲಿಂ.
ವಿಕ್ಟರಾನ್ ಬಾಪಾಯ್ಚ್ಯಾ ತೊಂಡಾಕ್ ಪಳಯ್ಲೆಂ. ಬಾಪಾಯ್ಚ್ಯಾ ದೊಳ್ಯಾಂನಿ ದುಃಖಾಂ ಆಸ್ಲ್ಲಿಂ....
ಕಾಂಪ್ಚ್ಯಾ ಹಾತಾಂನಿ ವಿಕ್ಟರಾನ್ ಲೊಕಾಟೊ ಉಗ್ತೊ ಕೆಲೊ..
ತಾಂತು ಬರಯಿಲ್ಲೆಂ ಲಾಂಬ್ ಪತ್ರ್ ಆಸ್ಲ್ಲೆಂ
ತೆಂ ತಾಣೆಂ ವಾಚುಂಕ್ ಸುರು ಕೆಲೆಂ.
*******************
ಹಾಂವ್ ಜಿಯೆಲಿಂ...
ಹಾಂವ್ ಜಿಯೆಂವ್ಕ್ ಉರ್ಡಾಲಿಂ...
ಹಾಂವ್ ಜಿಯೆಂವ್ಕ್ ಉರ್ಡೊನ್ ಸಲ್ವಾಲಿಂ...
ಹಾಂವ್ ಜಿಯೆಂವ್ಕ್ ಉರ್ಡೊನ್ ಸಲ್ವೊನ್ ಪರತ್ ಜಿಯೆಲಿಂ
ಆನಿ ಪರತ್ ಜಿಯೆಂವ್ಕ್ ಆರಂಭ್ ಕೆಲ್ಲ್ಯಾ ವಗ್ತಾ ಹಾಂವ್ ಸಲ್ವಾಲಿಂನಾಂ... ಬಗಾರ್ ಜಿಯೆಲಿಂ....
ಮ್ಹಜ್ಯಾ ಬಾಳಾ ವಿಕ್ಟರ್,
ಹೆಂ ಏಕ್ ಚಕ್ರ್. ಮ್ಹಜ್ಯಾ ಜೀವನಾಚೆಂ ಚಕ್ರ್. ಮ್ಹಜಿ ಬಲಿ ಘೆತ್ಲ್ಲ್ಯಾ ಯಜ್ನಾಚೆಂ ಚಕ್ರ್...
ಮ್ಹಜ್ಯಾ ಜೀವನಾಚ್ಯಾ ವಿವಿಧ್ ಘಟನಾಂನಿ ಆನಿ ತಶೆಂಚ್ಚ್ ಪರಿಗತೆಚ್ಯಾ ಘಟಕಾಂನಿ ವಿಣ್ಲೆಲೆಂ, ಏಕ್ ವಿಚಿತ್ರ್ ಚಕ್ರ್...
ಹೆಂ ಚಕ್ರ್ ತುಜ್ಯಾ ದೊಳ್ಯಾಂ ಹುಜಿರ್ ರೂಪಿತ್ ಜಾತಾನಾ ಹಾಂವ್ ಮರಣ್ ಪಾವೊನ್ ಸರಿ ಸುಮಾರ್ ವೀಸ್ ವರ್ಸಾಂ ಜಾತೆಲಿಂ ಮ್ಹಣ್ ಹಾಂವ್ ಜಾಣಾ. ಹಾಂವ್ ಮರಣ್ ಪಾವ್ಲ್ಯಾಂ ತರೀ ತುಜ್ಯೆ ಥಂಯ್ ಪರತ್ ಜೀವಂತ್ ಜಾಂವ್ಚಾ ಪ್ರೇತನಾಂತ್ ಹೆಂ ಚಿತ್ರ್ ತುಜ್ಯಾ ಮುಕಾರ್ ಭೋವ್ ಜಾಗ್ರುತ್ಕಾಯೆನ್ ದವರ್ಲಾಂ.
ಆಜ್ ತುಕಾ ವೀಸ್ ವರ್ಸಾಂ ಭರ್ಲ್ಯಾಂತ್. ತುಂ ವ್ಹಡ್ ಜಾಲಾಯ್. ಹ್ಯಾ ವಗ್ತಾ ತುಕಾ ಜಾಣ್ವಾಯ್ ಬರಿ ಆಸ್ತೆಲಿ.
ಮೋಗ್ ಆನಿ ತ್ಯಾಗ್ - ಹೆ ಕಿತ್ಲ್ಯಾ ಅಪುರ್ಬಾಯೆಚೆ ಸಬ್ಧ್ ಮ್ಹಳ್ಳೆಂ ಸಮ್ಜೊಂಚಿ ಸಕತ್ ತುಕಾ ಖಂಡಿತ್ ಜಾವ್ನ್ ಆಸ್ತೆಲಿ. ತ್ಯಾಚ್ಚ್ ಖಾತಿರ್ ವೀಸ್ ವರ್ಸಾಂ ಭರ್ತಾನಾ ತುಕಾ ಜಲ್ಮಾ ದೀಸಾಚಿ ಕಾಣಿಕ್ ದಿಂವ್ಚ್ಯಾ ಖಾತಿರ್ ತುಜೊ ದ್ಯಾಡ್ ಯೆತಲೊ... ಆನಿ ಹಿ ಕಾಣಿಕ್ ತುಕಾ ದಿತಲೊ...
ತುಂ ಮ್ಹಜೊ ಪೂತ್... ಮ್ಹಜ್ಯಾ ಉದರಾಂತ್ ಜಲ್ಮಾಲ್ಲೊ. ಹಾವೆಂ ತುಜೊ ಕಿತ್ಲೊ ಮೋಗ್ ಕೆಲ್ಲೊ ಆನಿ ತ್ಯಾ ಮೊಗಾಖಾತಿರ್ ಹಾವೆಂ ಮ್ಹಜ್ಯಾಚ್ಚ್ ಜೀವಾಚೊ ಸಾಕ್ರಿಫಿಸ್ ಭೆಟಯ್ಲೊ ಮ್ಹಳ್ಳೆಂ ಸತ್ ಮ್ಹಜ್ಯಾಚ್ಚ್ ಉತ್ರಾಂನಿ ತುಕಾ ಕಳಂವ್ಚ್ಯಾ ಪ್ರೇತನಾಂತ್ ಹೆಂ ಘಟನಾವಳ್ ಹಾವೆಂ ಲಿಖ್ಲ್ಯಾ. ಹಾವೆಂ ತುಕಾ ಪಯ್ಲೆಂಚ್ಚ್ ಕಳಯ್ಲಾಂ.. ಹಿಂ ಘಟನಾಂ, ಮ್ಹಜ್ಯಾ ಜೀವನಾಚೆಂ ಚಕ್ರ್ ಮ್ಹಣ್ .. ಆನಿ ಹೆಂ ಚಕ್ರ್ ಸೊಡವ್ನ್ ಜಾಲ್ಲ್ಯಾ ಉಪ್ರಾಂತ್ ತುಜ್ಯಾ ದೊಳ್ಯಾಂನಿ ಮ್ಹಜೆ ಖಾತಿರ್, ತುಜ್ಯಾ ಮೊಗಾಳ್ ಆವಯ್ ಖಾತಿರ್ ದೋನ್ ದುಃಖಾಂ ಉದೆಲಿಂ ತರ್ ಹಾಂವ್ ನಿಜಾಯ್ಕೀ ಭಾಗಿ.. ಪುತಾ ಮ್ಹಜ್ಯಾ...
ಆನಿ ತ್ಯಾ ಘಡಿಯೆ ಹಾಂವ್ ಅನಂತಾಯೆನ್ ಆಗಾಧ್ ಸಂಸಾರಾಂತ್ ನಿರಂತರಿ ಜಿಯೆಂವ್ಕ್ ಸುರು ಕರ್ತೆಲಿಂ.. ಮ್ಹಜೆಂ ಜೀವನ್ ಸುಫಳ್ ಜಾಲ್ಲೊ ಆನ್ಭೋಗ್ ಮ್ಹಾಕಾ ಫಾವೊ ಜಾತಲೊ.. ಮ್ಹಾಕಾ ನಿರಾಸ್ ಕರ್ಚೊನಾಂಯ್ಮೂ?
ಆತಾಂ ಹೆಂ ಚಕ್ರ್ ಆರಂಭ್ ಜಾತಾ.....
**************************
ಎಪ್ರಿಲ್ 13, 1985
ತ್ಯಾ ದೀಸಾ ಹಾಂವ್ ಹರ್ಶೆಂಚ್ಯಾ ಬರಿಚ್ಚ್ ದಾಕ್ತೆರ್ನಿ ಸರ್ಶಿನ್ ಗೆಲ್ಲಿಂ.
ತುಜಾ ಡ್ಯಾಡಿಲಾಗಿಂ ಸಾತ್ ವರ್ಸಾಂ ಪಯ್ಲೆಂ ಮ್ಹಜೆಂ ಕಾಜಾರ್ ಜಾಲ್ಲೆಂ. ತ್ಯಾ ಸಾತ್ ವರ್ಸಾಂನಿ ಆಮಿ ಕೆಲ್ಲ್ಯಾ ಸಭಾರ್ ಪರಿಕ್ಷಾ ಪಯ್ಕಿ ತಿ ಏಕ್ ಜಾವ್ನಾಸ್ಲ್ಲಿ.
"ಆಕ್ರೇಕ್ ತರಿ ದೆವಾನ್ ತುಮ್ಚೆಂ ಮಾಗ್ಣೆಂ ಆಯ್ಕಾಲೆಂ.." ಪರಿಕ್ಷೆಚೊ ರಿಪೊರ್ಟ್ ಹಾತಿಂ ಘೆವ್ನ್ ಆಯಿಲ್ಲಿ ದಾಕ್ತೆರ್ನ್ ಆಮ್ಕಾಂ ದೆಖೊನ್ ಸಂತೊಸಾನ್ ಉಲಯ್ಲಿ." ಜೆನೆಟ್, ತುಂ ಆವಯ್ ಜಾಂವ್ಚ್ಯಾರ್ ಆಸಾಯ್ ... ತುಕಾ ಆತಾಂ ಸುಮಾರ್ ಸ - ಸಾತ್ ಹಾಫ್ತೆ ಉತರ್ಲ್ಯಾತ್ ಆಸ್ತೆಲೆ..."
ತಿ ಜಾವ್ನಾಸ್ಲ್ಲಿ ತುಂ ಮ್ಹಜ್ಯಾ ಗರ್ಭಾಂತ್ ಆಯ್ಲ್ಯಾಯ್ ಮ್ಹಳ್ಳ್ಯಾಚಿ ಪಯ್ಲಿ ಖಬಾರ್.
ಹಾಂವ್ ಸಂತೊಸ್ಲಿಂ. ತುಜೊ ಡ್ಯಾಡಿ ಮ್ಹಜ್ಯಾ ವರ್ನಿ ಚಡ್ ಉಚಾಂಬಳ್ ಜಾವ್ನ್ ಖುಶ್ ಜಾಲೊ. ತೊ ಏಕಾ ಚಿತ್ಳಾಬರಿ ನಾಚ್ಲೊ.
ಹಾಂವೆಂ ಆನಿ ತುಜ್ಯಾ ಡ್ಯಾಡಿನ್ ಇತ್ಲೊ ಮೋಗ್ ಕೆಲ್ಲೊ ಕೀ ಹೊ ಮೋಗ್ ಸಂಪೂರ್ಣ್ ಜಾಯ್ಜಯ್ ತರ್ ಆಮ್ಕಾಂ ಬಾಳ್ ಜಾಯ್ ಆಸ್ಲ್ಲೆಂ. ಆಮ್ಚ್ಯಾ ಮೊಗಾಚಿ ರುಜ್ವಾತ್ ಆಮ್ಕಾಂಚ್ಚ್ ನ್ಹಂಯ್ ಹ್ಯಾ ಸಂಸಾರಾಕ್ ದಾಕಂವ್ಕ್ ಆಮಿಂ ಆಶೆಲ್ಲ್ಯಾಂವ್.
ತಿತ್ಲೆಂಚ್ಚ್ ನ್ಹಂಯ್, ಏಕಾ ಚಲಿಯೆಚೆಂ ಜೀವನ್, ತೆಂಯ್ ಪ್ರತ್ಯೇಕ್ ಜಾವ್ನ್ ಕಾಜಾರಿ ಜೀವನ್ ಸಂಪೂರ್ಣ್ ಜಾಯ್ಜಯ್ ತರ್ ತಿಣೆ ಆವಯ್ ಜಾಯ್ಜಯ್ಚ್ಚ್.
"ಜೆನೆಟ್, ಆಜ್ ಆಮ್ಚಿಂ ದೊಗಾಂಯ್ಚಿಂ ಸ್ವಪ್ಣಾಂ ಖರಿಂ ಜಾಲಿಂ ನ್ಹಂಯ್ಗೀ ? "ತುಜೊ ಡ್ಯಾಡಿ ಏಕ್ ಲ್ಹಾನ್ ಭುರ್ಗ್ಯಾಬರಿ ಹುಸ್ಕಾರ್ಲೊ. ತಾಚ್ಯಾ ದೊಳ್ಯಾಂನಿ ಸಂತೊಸಾಚಿಂ ದುಃಖಾಂ ಭರ್ಲ್ಲಿಂ." ಆಜ್ ಥಾವ್ನ್ .." ತೊ ಮುಕಾರ್ಸುನ್ ಉಲಯ್ಲೊ. "ತುವೆಂ ಕಿತೆಂಚ್ಚ್ ಕಾಮ್ ಕರುಂಕ್ ನಜೊ.. ತುಕಾ ಆತಾಂ ಏಕ್ಚ್ಚ್ ಕಾಮ್ ಆಮ್ಚ್ಯಾ ಹ್ಯಾ ಲ್ಹಾನ್ .. ಲ್ಹಾನ್ ಪಿಂಪ್ರ್ಯಾಚಿ ಸಾರ್ಕಿ ಜತನ್ ಘೆಂವ್ಚಿ... ತುಜ್ಯಾ ಉದರಾಂತ್ ಆಸ್ಚ್ಯಾ ತಾಕಾ ಕಾಂಯಿಂಚ್ಚ್ ತ್ರಾಸ್ ಪಡೊಂಕ್ ನ್ಹಜೊ... "
ಹಾಂವ್ ಮತಿಭಿತರ್ ಹಾಸ್ಲ್ಲಿಂ, ತುಜ್ಯಾ ಡ್ಯಾಡಿಚೆಂ ನೆಣ್ತೆಂಪಣ್ ಆನಿ ಸಂತೊಸಾಚಿ ಉಚಾಂಬಳಾಯ್ ಪಳೆವ್ನ್....
***************
ಮೇ 29, 1985
ಆಮಿ ಪರತ್ ದಾಕ್ತೆರ್ನಿಕ್ ಮೆಳೊಂಕ್ ಗೆಲ್ಲ್ಯಾಂವ್. ಹಾಚ್ಯಾ ಆದಿಂ ದೋನ್ ಪಾವ್ಟಿಂ ಡ್ಯಾಡಿ ಮ್ಹಾಕಾ ತಿಚ್ಯಾ ಸರ್ಸಿನ್ ಆಪವ್ನ್ ವರ್ನ್ ಗೆಲ್ಲೊ. ತುಕಾ ಹಾಂವ್ ಗರ್ಭೆಸ್ತ್ ಜಾಲ್ಯಾಂ ಮ್ಹಳ್ಳ್ಯಾ ಉಪ್ರಾಂತ್ ಹಿ ಆಮ್ಚಿ ತಿಸ್ರಿ ಭೆಟ್.
ತುಂ ಮ್ಹಜ್ಯಾ ಉದರಾಂತ್ ಬರ್ಯಾನ್ ಆನಿ ಶಾಬಿತಾಯೆನ್ ವ್ಹಾಡೊನ್ ಯೆತಾಯ್ ಮ್ಹಣ್ ದಾಕ್ತೆರ್ನಿನ್ ಆಮ್ಕಾಂ ತಿಳ್ಸಿಲ್ಲೆಂ. ಪುಣ್ ಪಾಂಚ್ ಸ ದೀಸಾಂ ಪಯ್ಲೆಂ, ಮ್ಹಜ್ಯಾ ಪೊಟಾಚ್ಯಾ ಸಕಯ್ಲ್ಯಾ ವಾಂಟ್ಯಾಂತ್ ಆವ್ಚಿತ್ತ್ ದೂಃಖ್ ಸುರು ಜಾಲ್ಲಿ. ಸುರ್ವಿಲ್ಲ್ಯಾ ದೋನ್ ದಿಸಾಂನಿ ಉಣಿ ಆಸ್ಲ್ಲಿ ತರ್ ತೀನ್ ಚಾರ್ ದೀಸಾಂನಿ ಚಿಕ್ಕೆ ಚಡ್ ಜಾಲ್ಲಿ. ದಾಕ್ತೆರ್ನಿನ್ ಮ್ಹಜಿ ಪರಿಕ್ಷಾ ಕರುಂಕ್ ಸುಮಾರ್ ಪಂದ್ರಾ ಮಿನುಟಾಂ ಕಾಡ್ಲಿಂ. ಹಾಂವ್ ತಿಚ್ಯಾ ತೊಂಡಾಕ್ಚ್ಚ್ ಪಳೆತಾಲಿಂ. ತಿಚ್ಯಾ ತೊಂಡಾರ್ ಕಾಂಯ್ಚ್ ಬದ್ಲಾವಣ್ ಜಾಲಿನಾ.
"ಮ್ಹಜ್ಯಾ ಭುರ್ಗ್ಯಾಕ್ ಕಾಂಯ್ ಭಾದಕ್ ಆಸಾಗೀ ದೊಕ್ತರ್ ?" ಹಾವೆಂ ಆಮ್ಸೊರಾನ್ ವಿಚಾರ್ಲೆಂ. ಮ್ಹಾಕಾ ಕಿತ್ಯಾಕ್ಗೀ ವಿಶೇಸ್ ಭ್ಯೆಂ ದಿಸ್ತಾಲೆಂ. ಹಿ ದೂಃಖ್ ಮ್ಹಜ್ಯಾ ಗರ್ಭಾಂತ್ ವ್ಹಾಡೊನ್ ಯೆಂವ್ಚ್ಯಾ ತುಕಾ ಕಾಂಯ್ ಭಾದಕ್ ಹಾಡಿತ್ಗೀ ಮ್ಹಣ್ ಹಾಂವ್ ಭಿಂಯೆತಾಲಿಂ.
"ಜೆನೆಟ್... ದೆವಾಚೆರ್ ಭರ್ವಾಸೊ ದವರ್.. " ತಿಣೆ ಮ್ಹಜ್ಯಾ ಭುಜಾಂಚೆರ್ ಹಾತ್ ಖಂಚಯ್ಲೆ ಆನಿ ಧಯ್ರ್ ದೀವ್ನ್ ಮ್ಹಳೆಂ." ದೆವಾನ್ ಸಭಾರ್ ಕಾಳಾ ಉಪ್ರಾಂತ್ ತುಕಾ ಬಾಳ್ ಫಾವೊ ಕೆಲಾಂ ಆನಿ ತಾಕಾ ಕಾಂಯ್ಚ್ಚ್ ಬಾಧಕ್ ಯೇಂವ್ಕ್ ಸೊಡ್ಚೊ ನಾ.. "
ತಿಚ್ಯಾ ಉತ್ರಾಂನಿ ಮ್ಹಾಕಾ ಸಮಧಾನ್ ದಿಲ್ಲೆಂ ಆನಿ ಮ್ಹಜಿ ಮತ್ ಥಂಡ್ ಜಾಲಿ.
*********************
ಜೂನ್ 9, 1985
ಆಮಿ ಪರತ್ ದಾಕ್ತೆರ್ನಿಕ್ ಮೆಳೊಂಕ್ ಗೆಲ್ಲ್ಯಾಂವ್. ಮ್ಹಜ್ಯಾ ಪೊಟಾಚ್ಯಾ ಸಕಯ್ಲ್ಯಾ ವಾಂಟ್ಯಾಂತ್ ಉಭ್ಜಾಲ್ಲಿ ದೂಃಖ್ ಬಿಲ್ಕುಲ್ ಉಣಿ ಜಾಂವ್ಕ್ ನಾತ್ಲ್ಲಿ. ದಾಕ್ತೆರ್ನಿನ್ ಆಜ್ ಪರೀಕ್ಷಾ ಕರುಂಕ್ ಚಡ್ ವೇಳ್ ಕಾಣ್ಘೆಲ್ಲೊ. ಮ್ಹಜ್ಯಾ ವಿಶ್ಯಾಂತ್ ತಿಕಾ ಚಡ್ತಿಕ್ ಕಾಂಯ್ಚ್ಚ್ ಸಮ್ಜಲೆಂನಾ. ದುಸ್ರ್ಯಾ ದಿಸಾ ಸಕಾಳಿಂ ಕಿತೆಂಚ್ಚ್ ಖಾಯ್ನಾಸ್ತಾನಾ ಆಸ್ಪತ್ರೆಕ್ ಯೇಂವ್ಕ್ ತಿಣೆ ಸಾಂಗ್ಲೆಂ ಆನಿ ’ಎಕ್ಸ್ ರೇ’ ಕಾಡ್ನ್ ಕಿತೆಂ ಚಡುಣೆಂ ಆಸಾ ತೆಂ ಪಳೆವ್ಯಾಂ ಮ್ಹಣ್ ಕಳಯ್ಲೆಂ.
"ದೊಕ್ಟರ್ ... ಮ್ಹಾಕಾ ವಿಶೇಸ್ ಭ್ಯೆಂ ದಿಸ್ತಾ.." ಹಾಂವ್ ಭಿಂಯಾನ್ ಉಲಯ್ಲಿಂ. " ’ ಎಕ್ಸ್ ರೇ’ ಕಾಡ್ಲ್ಯಾರ್ ತ್ಯಾ ವರ್ವಿಂ ಮ್ಹಜ್ಯಾ ಬಾಳಾಕ್ ಕಾಂಯ್.... ?? "
"ಜೆನೆಟ್ " ದಾಕ್ತೆರ್ನಿನ್ ಮ್ಹಜಿಂ ಉತ್ರಾಂ ಆರ್ಧ್ಯಾರ್ ಮೊದುನ್ ಮ್ಹಳೆಂ. " ತುಕಾ ಕಿತ್ಲಿ ತುಜ್ಯಾ ಭುರ್ಗ್ಯಾಚಿ ಆಶಾ ಆಸಾಗೀ ತಸೆಂಚ್ಚ್ ಏಕಾ ದಾಕ್ತೆರ್ನಿಕ್ ತಿಚ್ಯಾ ಪಿದೆಸ್ತಾಚಿ ಖಂತ್ ಆಸಾ. ತುಜ್ಯಾ ಪೊತಾಂತ್ಲ್ಯಾ ದೂಃಖಿಚೆಂ ಕಾರಣ್ ಸೊಧುನ್ ಕಾದಿಜಯ್ಚ್ಚ್ ಆನಿ ತ್ಯಾ ದೆಕುನ್ ಆಮಿ ’ಎಕ್ಸ್ ರೇ’ ಕಾಡ್ಚಿ ಗರ್ಜ್. ಪರತ್ ಹಾಂವ್ ತುಕಾ ಸಾಂಗ್ತಾಂ, ತುಂ ದೆವಾಚೆರ್ ಭರ್ವಾಸೊ ದವರ್ ಆನಿ ತೊ ತುಕಾ ಖಂಡಿತ್ ಜಾವ್ನ್ ಪಾಡ್ ಕರಿಸೊನಾ..."
ಕಿತ್ಯಾಕ್ಗೀ ಕಳಿತ್ ನಾ ಮ್ಹಜ್ಯಾ ದೊಳ್ಯಾಂನಿ ದುಃಖಾಂ ಭರೊನ್ ಆಯ್ಲಿಂಚ್ಚ್ ಆನಿ ಹಾಂವ್ ಗಳ್ಗಳ್ಯಾಂ ರಡ್ಲಿಂ. ತುಜ್ಯಾ ಡ್ಯಾಡಿನ್ ಮ್ಹಾಕಾ ಜಾಯ್ತೆಂ ಭುಜಯ್ಲೆಂ.. ತರೀ ಮ್ಹಾಕಾ ಸಮಧಾನ್ ಜಾಲ್ಲೆಂ ನಾ...
***********************
ಜೂನ್ 10, 1985
ಪೊಟಾಕ್ ಕಾಂಯ್ಚ್ಚ್ ಖಾಯ್ನಾಸ್ತಾನಾ, ಫಾಂತ್ಯಾರ್ಚ್ಚ್ ಆಮಿಂ ಆಸ್ಪತ್ರೆಕ್ ಗೆಲ್ಲ್ಯಾಂವ್. ಥಂಯ್ ಪಾವ್ಲ್ಲ್ಯಾ ತಕ್ಷಣ್ ಮ್ಹಾಕಾ ಎಕ್ಸ್ ರೇ ವಿಭಾಗಾಕ್ ವೆಲೆಂ. ಥಂಯ್ಸರ್ ಮ್ಹಜ್ಯೊ ಕಿತ್ಲ್ಯೊ ಎಕ್ಸ್ರೇ ಕಾಡ್ಲ್ಯೊ ತೆಂ ಹಾಂವ್ ನೆಣಾ. ಮ್ಹಜೆಂ ರಗಾತ್ ಸಿರೀಂಜಾನಿ ಭರುನ್ ಕಾಡ್ಲೆಂ. ಪರೀಕ್ಷಾ ಕರ್ಚ್ಯಾ ಖಾತಿರ್.
ಹರ್ಯೆಕ್ ಪಾವ್ತಿಂ, ಎಕ್ಸ್ ರೇ ಕಾಡ್ಚ್ಯಾ ವೇಳಾರ್ ಯೆಂವ್ಚ್ಯಾ ಉಜ್ವಾಡಾಕ್ ದೆಖ್ತಾನಾ, ಮ್ಹಜೆಂ ಕಾಳಿಜ್ ಫುಟೊನ್ ಯೆಂವ್ಚ್ಯಾ ಬರಿ ಜಾತಾಲೆಂ. ತ್ಯಾ ಎಕ್ಸ್ ರೇ ಚ್ಯಾ ಕೀರ್ಣಾಂ ವೊರ್ವಿಂ ಮ್ಹಜ್ಯಾ ಗರ್ಭಾಂತ್ ಆಸ್ಚ್ಯಾ ತುಕಾ ಕಾಂಯ್ಚ್ಚ್ ಜಾಯ್ನಾ ಜಾಲ್ಯಾರ್ ಪುರೊ ಹಾಂವ್ ಮಾಗ್ತಾಲಿಂ.
ಆವಯ್ನ್ ತಿಚ್ಯಾ ಭುರ್ಗ್ಯಾಚೊ ಮೋಗ್ ಕೆಲ್ಲ್ಯಾ ಬರಿ ಹೆರ್ ಕೋಣ್ಂಚ್ಚ್ ತಾಚೊ ಮೋಗ್ ಕರುಂಕ್ ಸಕ್ಚೊ ನಾ. ಹಾವೆಂ ತುಕಾ ದೆಖೊಂಕ್ ನಾತ್ಲ್ಲೆಂ. ತುಂ ಮ್ಹಜ್ಯಾ ಗರ್ಭಾಂತ್ ಆಸ್ಲ್ಲೊಯ್.. ತುಜ್ಯಾ ಅಸ್ವಿತ್ವಾಕ್ ಹಾವೆಂ ಅನ್ಭೋಗ್ ಕೆಲ್ಲೊ ಮಾತ್ರ್... ತರೀ ಹಾಂವ್ ತುಜೊ ಮೋಗ್ ಕರ್ತಾಲಿಂ..
ತ್ಯಾ ದೀಸ್ ಆಮ್ಕಾಂ ರಿಫೋರ್ಟ್ ಮೆಳ್ಳೊ ನಾ. ಆಮಿ ಪಾಟಿಂ ಆಯ್ಲ್ಯಾಂವ್.
ರಾತಿಂ ಮ್ಹಾಕಾ ಬಿಲ್ಕುಲ್ ನೀದ್ ಪಡ್ಲಿನಾ. ತುಜ್ಯಾ ಡ್ಯಾಡಿನ್ ಮಸ್ತ್ ಭುಜಂವ್ಚೆಂ ಪ್ರೇತನ್ ಕೆಲೆಂ. ಪುಣ್ ಮ್ಹಜೆಂ ಮನ್ ಕಿತೆಂಚ್ಚ್ ಆಯ್ಕೊಂಕ್ ತಯಾರ್ ನಾತ್ಲ್ಲೆಂ. ಹಾಂವ್ ಖಳ್ಮಿತ್ ನಾಸ್ತಾನಾ ರಡ್ತಾಲಿಂ.
"ರಿಚರ್ಡ್, ಮ್ಹಜ್ಯಾ ಬಾಳಾಕ್ ಕಾಂಯ್ ಜಾಯ್ತ್ ತರ್ ಹಾಂವ್ ಪುಣಿ ಜೀವಂತ್ ಉರ್ಚಿಂ ನಾ.."
ಮ್ಹಜಿಂ ಉತ್ರಾಂ ಆಯ್ಕೊನ್ ತುಜೊ ಡ್ಯಾಡಿಯೀ ಗಳ್ಗಳ್ಯಾಂ ರಡ್ಲ್ಲೊ.
****************
ಜೂನ್ 13, 1985
ತ್ಯಾ ದೀಸ್ ಮ್ಹಜ್ಯಾ ಎಕ್ಸ್ ರೇ ಚೊ ರೀಫೊರ್ತ್ ಮೆಳ್ಚ್ಯಾರ್ ಆಸ್ಲ್ಲೊ. ಪಾಟ್ಲೆ ತೀನ್ ದೀಸ್ ಹಾವೆಂ ರಡೊನ್ಂಚ್ಚ್ ಪಾಶಾರ್ ಕೆಲ್ಲೆ.
ಮ್ಹಜ್ಯಾ ಪೊಟಾಂತ್ಲಿ ದೂಖ್ ಹಾಳ್ವಾಯೆನ್ ಚಡೊನ್ ಯೆತಾಲಿ.
ಆಮಿ ಅಸ್ಪತ್ರೆಕ್ ಪಾವ್ತಾನಾ, ದಾಕ್ತೆರ್ನ್ ಆಮ್ಚ್ಯಾ ಯೆಣ್ಯಾಕ್ ರಾಕೊನ್ ಆಸ್ಲ್ಲ್ಯಾ ಬರಿ ಮ್ಹಾಕಾ ಭಗ್ಲೆಂ. ವೇಳ್ ಪಾಡ್ ಕರಿನಾಸ್ತಾನಾ, ತಿಣೆ ಆಮ್ಕಾಂ ತಿಚ್ಯಾ ಕುಡಾಕ್ ವೆಲೆಂ ಆನಿ ಬಾಗಿಲ್ ಬಂಧ್ ಕೆಲೆಂ.
ತಿಣೆ ಅಮ್ಕಾಂ ಬಸೊಂಕ್ ಸಾಂಗ್ಲೆಂ ನಾ ತರಿ ಆಮಿಂ ಬಸ್ಕಾ ಘೆತ್ಲಿ.
ಮ್ಹಜ್ಯಾ ಕಾಳ್ಜಾಂತ್ಲೆ ದಡ್ದಡೆ ವಾಡೊನ್ಂಚ್ಚ್ ವೆತಾಲೆ. ಅಂತಸ್ಕರ್ನಾಂತ್ ಭಿಂಯಾಚಿಂ ಮೊಡಾಂ ದಾಟೊನ್ ಯೆತಾಲಿಂ.
ದಾಕ್ತೆರ್ನಿನ್ ಕಾಡ್ಲ್ಲ್ಯೊ ಎಕ್ಸ್ ರೇ ಆಮ್ಚ್ಯಾ ಹುಜಿರ್ ದವರ್ಲ್ಯೊ.
ತಿ ಉಲಯ್ಲಿ ನಾ. ತಿಚೆಂ ತೊಂಡ್ ಬಾವ್ಲ್ಲೆಂ ಆನಿ ದೊಳೆ ಕಾಳ್ಶೆಲ್ಲೆ.
ತ್ಯಾ ಲ್ಹಾನ್ ಕುಡಾ ಭಿತರ್ ಆಮ್ಚ್ಯಾ ತೆಗಾಂ ಮಧೆಂ ಬೋವ್ ಕಠೋರ್ ರೀತಿಚೆಂ ಮೌನ್ಪಣ್ ಭರೊನ್ ಗೆಲ್ಲೆಂ. ತ್ಯಾ ಮೌನ್ಪಣಾಚಿ ಆಡ್ಹೂಕ್ ತಿಕ್ಸಾಣ್ ಮ್ಹಾಕಾ ಸೊಸುಂಕ್ ಜಾಲೆಂ ನಾ.
"ದೊಕ್ತರ್ .." ಹಾವೆಂ ಮೌನ್ಪಣ್ ಮೊಡುನ್ ಮ್ಹಳೆಂ. " ಮ್ಹಜ್ಯಾ ’ಎಕ್ಸ್ ರೇ’ ಆನಿ ರಗ್ತಾಚ್ಯಾ ರೀಪೊರ್ಟಾಂತ್ ತುಮಿಂ ಕಿತೆಂ ಸೊಧುನ್ ಕಾಡ್ಲಾಂ? ಮ್ಹಜ್ಯಾ ಬಾಳ್ಶಾಕ್ ಕಾಂಯ್ ಭಾದಕ್ ನಾಮೂ ?"
ದಾಕ್ತೆರ್ನಿಚ್ಯಾ ಕಪಾಲಾರ್ ಘಾಮಾಚೆ ಥೆಂಬೆ ಉದೆಲ್ಲೆ ಹಾವೆಂ ದೆಖ್ಲೆ. ತಿಣೆ ತೆ ಆಮ್ಸೊರಾನ್ ಪುಸ್ಲೆ. ಆತಾಂ ತಿ ಆಮ್ಚ್ಯಾಲಾಗಿಂ ಕಿತೆಂಗೀ ಸಾಂಗೊಂಕ್ ಉರ್ಡಾತಾಲಿ. ಪುಣ್ ತಿಚ್ಯಾ ಜೀಬೆಕ್ ಖಾಡುಮ್ ಘಾಲ್ಲ್ಯಾ ಭಾಶೆನ್ ಜಾತಾಲೆಂ ಜಾಯ್ಜಯ್. ತಿಕಾ ಉಲಂವ್ಕ್ ಸಾದ್ಯ್ ಜಾಯ್ನಾತ್ಲ್ಲೆಂ. ಮೆಜಾಚೆರ್ ಆಸ್ಲ್ಲ್ಯಾ ಗ್ಲಾಸಾಂತ್ಲೆಂ ಉದಾಕ್ ತಿಣೆ ಏಕಾಚ್ಚ್ ಘೊಟಾನ್ ಪಿಯೆವ್ನ್ ಕಾಬಾರ್ ಕೆಲೆಂ.
"ಥೊಡ್ಯಾ ಪಾವ್ಟಿಂ...." ದಾಕ್ತೆರ್ನಿಂಚಿ ಉತ್ರಾನ್ ಕಠಿಣಾಯೆನ್ ಕಾಂಪ್ತಾಲಿಂ. " ಪಿಡೆಸ್ತಾಕ್ ತಾಚ್ಯಾ ಪಿಡೆ ವಿಶ್ಯಾಂತ್ ಸಾಂಗ್ಚೆಂ ತಿತ್ಲೆಂ ಧೈರ್ ದಾಕ್ತೆರಾಂ ಥೈಂ ಆಸಾನಾ..."
"ತಿತ್ಲಿ ಕಠೋರ್ ಪಿಡಾ ಮ್ಹಾಕಾ ಆಯ್ಲ್ಯಾ ದೊಕ್ತರ್... " ಹಾಂವ್ ಕಠಿಣಾಯೆನ್ ಆಮ್ಸರ್ತಾಲಿಂ.
ದಾಕ್ತೆರ್ನಿನ್ ಲಾಂಬ್ ಸ್ವಾಸ್ ಸೊಡ್ಲೊ. " ಮ್ಹಜಿಂ ಉತ್ರಾಂ ಆಯ್ಕೊನ್ ತುಮಿ ಬಿಲ್ಕುಲ್ ಭಿಯೆಂವ್ಕ್ ನ್ಹಜೊ.. " ಆತಾಂ ತಿ ಹಾಳ್ವಾಯೆನ್ ಉತ್ರಾಂ ವಿಂಚ್ತಾಲಿ. " ಮುಖ್ಲಿಂ ಮ್ಹಜಿಂ ಉತ್ರಾಂ ತುಂಚ್ಯಾ ಮನಾ ಕಾಳ್ಜಾಂನಿ ಉಚಾಂಬಳಾಚಿಂ ಲ್ಹಾರಾಂ ಹಾಡ್ತೆಲಿಂ ತರ್ಯ್... ದಯಾ ಕರ್ನ್ ತುಮಿ ಸ್ತಿಮಿತ್ ಸಾಂಬಾಳಾ... ಅಸಲಿ ಪರಿಸ್ಥಿತ್ ಕೋಣಾಯ್ಕಿ ... ಖಂಚಾ ಮನ್ಶಾಕ್ಯ್ ಯೇಂವ್ಕ್ ನ್ಹಜೊ ಮ್ಹಣ್ ಹಾವೆಂ... ಮಾಗ್ಚೆಂ....""ದೊಕ್ತರ್
..."
ಹಾಂವ್ ಉಸ್ಮಡ್ಲಿಂ. "ಮ್ಹಾಕಾ ಕಸಲಿ ಪಿಡಾ ಆಯ್ಲ್ಯಾ ಮ್ಹಣ್ ದಯ ಕರ್ನ್ ಸಾಂಗ್.... ಮ್ಹಾಕಾ ಕಿತೆಂ ಜಾಲಾಂ..."
"ಎಕ್ಸ್ರೇ ಆನಿ ಹೆರ್ ರಿಫೊರ್ಟ್ ಸಾಂಗ್ತಾತ್ ಕೀ ತುಜ್ಯಾ ’ಕಿಡ್ನಿಂತ್ ’ಕ್ಯಾನ್ಸರ್’ ಜಾಲಾಂ ಆನಿ ತೆಂ ಕ್ಯಾನ್ಸರ್ ಪಯ್ಲ್ಯಾ ಹಂತಾಕ್ ಉತ್ರೊನ್ ದುಸ್ರ್ಯಾ ಹಂತಾಕ್ ಪಾವ್ಲಾಂ...ತಸೆಂ ಮ್ಹಾಕಾ ಆನಿ ಮ್ಹಜ್ಯಾ ಸಾಂಗಾತಿ ದಾಕ್ತೆರಾಂಕ್ ಭಗ್ತಾ...."
ಅನಂತ್ ಪಯ್ಸ್, ದಿಗಂತಾರ್ ಅಸ್ಚಿಂ ಹಜಾರೊಂ ನೆಕೆತ್ರಾಂ ಎಕಾಚ್ಚ್ಫರಾ ತಾಂಚೊ ಜಾಗೊ ಸಾಂಡುನ್ ಮ್ಹಜ್ಯಾ ಆಂಗಾರ್ ಪಡೊನ್ ಮ್ಹಾಕಾ ಭಸ್ಮ್ ಕೆಲ್ಲ್ಯಾ ಬರಿ ಭಗೊಂಕ್ ಲಾಗ್ಲೆಂ. ಹಾಂವ್ ಆನಿ ತುಜೊ ಡ್ಯಾಡಿ ಮಾತ್ಯೆಚೊ ಮುದೊ ಜಾಲ್ಲ್ಯಾ ಬರಿ ಥೊಡ್ಯಾ ಘಡಿಯಾಂಕ್ ಬಸ್ಲ್ಯಾಂವ್.
"ಕ್ಯಾನ್ಸರ್ ...." ತುಜೊ ಡ್ಯಾಡಿ ಕಶ್ಟಾಂನಿ ಉಲಯ್ಲೊ." ಮ್ಹಜ್ಯಾ ಜೆನೆಟಾಕ್ ಅಸೆಂ ಕಿತ್ಯಾಕ್ ದೇವ್ ಕಶ್ಟಿತಾ ದೊಕ್ತರ್ ? ಆಂಕಾಂ ಕಿತ್ಯಾಕ್ ಆಸಲೆ ಕಶ್ಟ್ ?? ಹಿ ಪಿಡಾ ಗೂಣ್ ಕರ್ಯೆತ್ಮೂ?"
"ಹಾಂ ! ಹ್ಯಾ ಪಿಡೆಕ್ ವಕಾತ್ ಆಸಾಯ್ ಮ್ಹಣ್ಯೆತ್ ಯಾ ನಾಂಯ್ ಮ್ಹಣ್ಯೆತ್... ರೇಡಿಯೇಶನ್ ಚಿಕಿತ್ಸಾ ವೊರ್ವಿಂ ಕ್ಯಾನ್ಸರ್ ಆಸ್ಚ್ಯಾ ಆಂಗಾಚ್ಯಾ ಕುಡ್ಕ್ಯಾಕ್ ಭಸ್ಮಿಲ್ಯಾರ್, ಪಿಡೆಸ್ತಾಕ್ ಬಾಚಾವ್ ಕರ್ಯೆತ್... ಯಾ ಬಳಾದಿಕ್ ವಕ್ತಾಂ ದಿವ್ಯೆತ್ ಆನಿ ತ್ಯಾ ವರ್ವಿಂ ಕ್ಯಾನ್ಸರ್ ಗೂಣ್ ಕರ್ಯೆತಾ...""ತರ್
ಘಳಾಯ್ ಕಿತ್ಯಾಕ್ ದೊಕ್ತರ್.." ತುಜೊ ಡ್ಯಾಡಿ ಲೆಕಾವರ್ತೆಂ ಆಮ್ಸರ್ತಾಲೊ. "ಪಯ್ಶೆ ಕಿತ್ಲೆ ಖರ್ಚಾಲ್ಯಾರ್ಯ್ ವ್ಹಡ್ ನಾ.. ಮ್ಹಜಿ ಆಸ್ತ್ ಬದಿಕ್ ಸರ್ವ್ ಹಾಂವ್ ವಿಖ್ತಲೊಂ ಆನಿ ಜೆನೆಟಾಚಿ ಭಲಾಯ್ಕಿ ಪಾಟಿಂ ಮೆಳ್ಚ್ಯಾ ಖಾತಿರ್ ಖರ್ಚಿತಲೊಂ.. ಜೆನೆಟಾ ಮುಕಾರ್.. ತಾಚ್ಯಾ ಭಲಾಯ್ಕೆ ಮುಕಾರ್ ಮ್ಹಾಕಾ ದುಸ್ರೆಂ ಕಿತೆಂಚ್ಚ್ ನಾಕಾ....."
" ಹಾಂಗಾಸರ್ ಪಯ್ಶಾಂಚೆಂ ಸವಾಲ್ ನ್ಹಂಯ್ ರಿಚರ್ಡ್..... ಸವಾಲ್ ಏಕ್ಲ್ಯಾಚ್ಯಾ ಜೀವನಾಚೆಂ ಆನಿ ದುಸ್ರ್ಯಾಚ್ಯಾ ಮರ್ಣಾಚೆಂ... "
"ತುಂ ಕಿತೆಂ ಉಲಯ್ತಾಯ್ ಮ್ಹಣ್ ಮ್ಹಾಕಾ ಬಿಲ್ಕುಲ್ ಅರ್ಥ್ ಜಾಯ್ನಾ ದೊಕ್ತರ್.... " ತುಜೊ ಡ್ಯಾಡಿ ಉಚಾಂಬಳ್ ಜಾವ್ನ್ ಉಲಯ್ತಾಲೊ.
"ಜೆನೆಟಾಚ್ಯಾ ಕಿಡ್ನಿಂತ್ಲೆಂ ಕ್ಯಾನ್ಸರ್ ಗೂಣ್ ಜಾಯ್ಜಯ್ ತರ್ ಬಳಾಧಿಕ್ ಕೀರ್ಣಾಂಚೊ ಪ್ರಯೋಗ್ ಕರ್ನ್, ತೊ ಭಾಗ್ ಹುಲ್ಪಾಯ್ಜಯ್ ಪಡ್ತಾ...ಯಾ ವಕ್ತಾಂ ದೀಜಯ್ ಪಡ್ತಾತ್ ಆನಿ ತ್ಯಾ ವೆಳಾರ್ ಗರ್ಭಾಂತ್ ಆಸ್ಚ್ಯಾ ತರ್ನ್ಯಾ ಬಾಳ್ಶಾಕ್ ಜೀವ್ ಉರೊಂಕ್ ..."
" ನಾ... ನಾ... ದೊಕ್ತರ್..."
ಹಾಂವ್ ಜಾತಾ ತಿತ್ಲ್ಯಾ ವ್ಹಡಾ ತಾಳ್ಯಾನ್ ಬೊಬಾಟ್ಲಿಂ. ದಾಕ್ತೆರ್ನಿನ್ ಉಲಯಿಲ್ಲಿಂ ಉತ್ರಾಂ ಮ್ಹಜ್ಯಾನ್ ಆಯ್ಕೊಂಕ್ ಜಾಲಿಂ ನಾಂತ್. ತುಜ್ಯಾ ಮರ್ಣಾಚೊ ವಿಷಯ್ ಮ್ಹಜ್ಯಾ ಕಾಳ್ಜಾಕ್ ಹಜಾರ್ ಕಾಪಾಂ ಕರ್ನ್ ಶಿಂಡುಂಕ್ ಲಾಗ್ಲೆಂ. ಹಾಂ ಪುತಾ... ಮ್ಹಜೊ ಜೀವ್ ವಾಂಚಂವ್ಚ್ಯಾ ಖಾತಿರ್ ತುಜ್ಯಾ ಜೀವಾಕ್ ಭಸ್ಮ್ ಕರುಂಕ್ ಹಾಂವ್ ತಯಾರ್ ನಾತ್ಲ್ಲಿಂ....
ಹಾವೆಂ ಖಿಣಾ ಭಿತರ್ ನಿರ್ಧಾರ್ ಕೆಲ್ಲೊ.
ತೊ ನಿರ್ಧಾರ್, ಮ್ಹಜ್ಯಾ ಮತಿಚ್ಯಾ ಹಜಾರೊಂ ಪಡ್ದ್ಯಾಂ ವಯ್ಲ್ಯಾನ್ ಉದೆವ್ನ್, ಮ್ಹಜ್ಯಾ ಅಂತಸ್ಕರ್ನಾಕ್ ಸ್ಪರ್ಶ್ ಜಾತಾನಾ, ಮ್ಹಾಕಾ ನಿಜಾಯ್ಕಿ ವ್ಹರ್ತೊ ಸಂತೊಸ್ ಜಾಲೊ. ಕಸಲೆಂಗೀ ವಿಚಿತ್ರ್ ಸುಖ್ ಮ್ಹಾಕಾ ಲಾಬೊಂಕ್ ಲಾಗ್ಲೆಂ.
ಮ್ಹಜ್ಯಾಚ್ಚ್ ಭುರ್ಗ್ಯಾ ಖಾತಿರ್ ತೊ ಜಲ್ಮೊಂಚ್ಯಾ ಪಯ್ಲೆಂಚ್ಚ್ ಹಾವೆಂ ಮ್ಹಜೊ ಸಾಕ್ರಿಫಿಸ್ ದಿಂವ್ಚೊ... ಏಕಾ ಆವಯ್ಕ್ ಕಿತ್ಲ್ಯಾ ಅಪುರ್ಭಾಯೆಚೆಂ ದೆಣೆ.. ಕಿತ್ಲ್ಯಾ ಮಯ್ಪಾಸಾಚಿ ಕರ್ನಿ ಹಿ...!!!
"ದೊಕ್ತರ್ ... " ಹಾಂವ್ ಆತಾಂ ಥಿರಾಸಣೆನ್ ಉಲಯ್ಲಿಂ. " ಮ್ಹಜ್ಯಾ ಭುರ್ಗ್ಯಾಕ್ ವಾಂಚಂವ್ಚ್ಯಾ ಖಾತಿರ್ ಹಾಂವ್ ಹೆಂ ಕ್ಯಾನ್ಸರ್ ಸೊಸ್ತೆಲಿಂ... ಯೆಂವ್ಚೆ ಪಾಂಚ್ ಮಹಿನೆ ಹೆಂ ಕ್ಯಾನ್ಸರ್ ಮ್ಹಜ್ಯಾ ಜಿವಾಂತ್ ವಾಡೊಂಕ್ ಹಾಂವ್ ದಿತೆಲಿಂ... ಮ್ಹಾಕಾ ವಕಾತ್ ನಾಕಾ... ಮ್ಹಜ್ಯಾ ಗರ್ಭಾಂತ್ಲ್ಯಾ ಬಾಳಾಕ್ ಕಸಲೆಂಚ್ಚ್ ಆನಾಹುತ್ ಯೆಂವ್ಚೆಂ ವಕಾತ್ ಹಾಂವ್ ಸೆಂವ್ಚಿಂ ನಾ... ಹಾವೆಂ ಮ್ಹಜ್ಯಾ ಭುರ್ಗ್ಯಾಕ್ ಜಲ್ಮ್ ದಿಲ್ಯಾ ಉಪ್ರಾಂತ್ ತರ್ ತುಮಿ ಕಿತೆಂ ತರ್ಯ್ ಕರ್ಯಾ..
ತುಜೊ ಡ್ಯಾಡಿ ಮ್ಹಾಕಾಚ್ಚ್ ಪಳೆತಾಲೊ. ಹಾವೆಂ ತಾಚ್ಯಾ ತೊಂಡಾಕ್ ಪಳಯ್ಲೆಂ. ತಾಚ್ಯಾ ದೊಳ್ಯಾಂನಿ ದುಖಾಚಿ ರಾಸ್ ಭರೊನ್ ಆಸ್ಲ್ಲಿ. ತೊ ರಡ್ತಾಲೊ... ತಾಚೆಂ ಕಾಳಿಜ್ ದುಖಾಚ್ಯಾ ಕೊಂಡಾಂತ್ ಲೊಳೊನ್ ಆಸ್ಲ್ಲೆಂ ಹಾವೆಂ ದೆಖ್ಲೆಂ. ಆಮ್ಚ್ಯಾ ಕಾಜಾರಿ ಜೀವನಾಂತ್ ಪಯ್ಲ್ಯಾ ಪಾವ್ಟಿಂ ಹಾವೆಂ ತಾಚ್ಯಾ ಲಾಗಿಂ ವಿಚಾರಿನಾಸ್ತಾನಾ ಹೊ ನಿರ್ಧಾರ್ ಘೆತ್ಲ್ಲೊ. ಹೊ ನಿರ್ಧಾರ್ ತಾಕಾ ಕಠೋರ್ ಲಾಗ್ಲೊ ಜಾಯ್ಜಾಯ್.
"ಹೆಂ ತುವೆಂ ಕಿತೆಂ ಕೆಲೆಂಯ್ ಜೆನೆಟ್...? " ತೊ ಕಳ್ವಳ್ಯಾಂ ಮಧೆಂ ಹುಸ್ಕಾರ್ಲೊ. " ಆತಾಂಚೆಂ ಭುರ್ಗೆಂ ನ್ಹಂಯ್ ತರ್ ತುಂ ಸಾರ್ಕೆಂ ಜಾಲ್ಯಾ ಉಪ್ರಾಂತ್ ದೇವ್ ಆಮ್ಕಾಂ ಆನ್ಯೇಕ್ ಭುರ್ಗೆಂ ಫಾವೊ ಕರ್ತಲೊ.."
ಪುತಾ... ತುಜ್ಯಾ ಡ್ಯಾಡಿಚ್ಯಾ ಹ್ಯಾ ಉತ್ರಾಂಚೊ ಪಾಡ್ ಅರ್ಥ್ ಕರಿನಾಕಾ. ಬಾಪಾಯ್ಕ್ ಭುರ್ಗ್ಯಾಚೊ ಮೋಗ್ ಉದೆಂವ್ಚೊ ತಾಚೊ ಜಲ್ಮ್ ಜಾಲ್ಯಾ ಉಪ್ರಾಂತ್ ಪುಣ್ ಆವಯ್ಕ್ ಭುರ್ಗೆಂ ತಿಚ್ಯಾ ಪೊಟಾಂತ್ ವಾಡ್ತಾನಾಂಚ್ಚ್ ಏಕಾ ಸಂಬಂಧಾಚಿ ಸಾಯ್ ಖಿರ್ಲಾತಾ... ಮೊಗಾಚಿ ಅಂಖ್ರಿ ಪಾಲೆತಾ.....
"ದಯ ಕರುನ್ ಮ್ಹಾಕಾ ಮಾಫ್ ಕರ್ ರಿಚರ್ಡ್.. " ಹಾವ್ ತುಜ್ಯಾ ಡ್ಯಾಡಿಚ್ಯಾ ಭುಜಾಂಚೆರ್ ತಕ್ಲಿ ದವರ್ನ್ ರಡ್ಲಿಂ. " ಹಾವೆಂ ತುಜ್ಯಾ ಲಾಗಿಂ ಕಿತೆಂಚ್ಚ್ ವಿಚಾರಿನಾಸ್ತಾನಾ ಮ್ಹಜ್ಯಾ ಜೀವಾಚೊ ನಿರ್ದಾರ್ ಘೆತ್ಲೊ ರಿಚರ್ಡ್... ಮ್ಹಾಕಾ ಮಾಫ್ ಕರ್... ಮ್ಹಜ್ಯಾ ಜೀವಾಚೆರ್ ಘೊವ್ ಜಾವ್ನಾಸ್ಚ್ಯಾ ತುಕಾಯ್ ಮ್ಹಜೆ ತಿತ್ಲೆಂಚ್ಚ್ ಹಕ್ಕ್ ಆಸಾ.. ಪುಣ್ .. ಹ್ಯಾ ಬಾಳಾನ್ ಮ್ಹಜ್ಯಾ ಸಾಂಗಾತಾ ಜಿಯೆಂವ್ಕ್ ಸುರು ಕೆಲಾಂ... ತಾಕಾ ಹಾಂವ್ ಹೊಗ್ದಾಂವ್ಕ್ ಸಕ್ಚಿಂ ನಾ... ! ಏಕ್ ಉತಾರ್ ಉಡಾಸ್ ದವರ್ ... ಜರ್ತರ್ ಹಾಂವ್ ತುಕಾ ಸಾಂಡುನ್ ಗೆಲಿಂ ತರ್ಯ್ ತುಜೆ ಖಾತಿರ್ ಏಕ್ ವಿಶೇಸ್ ದಾಯ್ಜ್ ಪಾಟಿಂ ಸೊಡುನ್ ವೆತೆಲಿಂ.... ಆಮ್ಚ್ಯಾ ಅಮೊಲಿಕ್ ಮೊಗಾಚಿ ರುಜ್ವಾತ್.. ಆಮ್ಚೆಂ ಜೀವನ್ ...ಆಮ್ಚೆಂ ರಗಾತ್...."
ಡ್ಯಾಡಿ ಉಲಯ್ಲೊ ನಾ. ತಾಕಾ ಉಲಂವ್ಕ್ ಜಾಯ್ನಾತ್ಲ್ಲೆಂ.
"ಜೆನೆಟ್" ದಾಕ್ತೆರ್ನ್ ಮ್ಹಜ್ಯಾ ಲಾಗಿಂ ಯೇವ್ನ್ ಉಲಯ್ಲಿ. "ತುವೆಂ ಏಕ್ ವರ್ತೊ ಸಾಕ್ರಿಫಿಸ್ ಭೆಟಂವ್ಕ್ ಚಿಂತ್ಲಾಯ್. ತುಜ್ಯಾ ಭುರ್ಗ್ಯಾ ಖಾತಿರ್ ಏಕ್ ವಿಶೇಸ್ ಬಲಿದಾನ್! ತುಮ್ಚ್ಯಾ ಮೊಗಾಚೊ ರುಪ್ಕಾರ್ ಹೊ !! ಪುಣ್ ಮುಖ್ಲೆ ದೀಸ್ ತುಮ್ಚ್ಯಾ ಜೀವನಾಂತ್ ಏಕ್ ಕಠೀಣ್ ಝುಜ್ ಜಾಂವ್ಕ್ ಪಾವ್ತೆಲೆಂ... ಹೆಂ ಝುಜ್ ತುಮಿ ದೊಗಾಯ್ನೀ ಸಾಂಗಾತಾ ಮೆಳೊನ್, ಎಕಾಮೆಕಾಚ್ಯಾ ಲಾಗ್ಸಿಲ್ಯಾ ಸಂಬಂಧಾಂತ್ ಝುಜೊಂಕ್ ದೇವ್ ತುಂಕಾಂ ಕುರ್ಪಾ ದೀಂವ್ ಮ್ಹಣ್ ಹಾಂವ್ ಮಾಗ್ತಾಂ.."
ಆಮಿ ತಿಚ್ಯಾ ಕುಡಾ ಥಾವ್ನ್ ಭಾಯ್ರ್ ಯೆತಾನಾ ಮ್ಹಜ್ಯಾ ಮತಿಂತ್ ದೂಃಖ್ ನಾತ್ಲ್ಲೆಂ ಬಗಾರ್ ಏಕಾ ಅವ್ಯಕ್ತ್ ರೀತಿಚೆಂ ಸಮಧಾನ್ ಭರೊನ್ ಗೆಲ್ಲೆಂ.
******************
ಜೂನ್ ಥಾವ್ನ್ ಅಕ್ತೋಬರ್
1985
ಹೆ ದೀಸ್ ಮ್ಹಜ್ಯಾ ಜೀವನಾಂತ್ ಆತೀ ಕಶ್ಟಾಂಚೆ ಮ್ಹಣ್ಯೆತ್. ದೀಸಾಚಿ ಹರ್ಯೆಕ್ ಘಡಿ ಹಾಂವ್ ವರ್ತ್ಯಾ ಕಶ್ಟಾಂನಿ ಜಿಯೆತಾಲಿಂ. ಮ್ಹಜ್ಯಾ ಕಿಡ್ನಿಂತ್ ವ್ಹಾಳಯೆ ಬರಿ ವಾಡೊನ್ ಯೆಂವ್ಚೆ ಕ್ಯಾನ್ಸರ್ ಮ್ಹಾಕಾ ಕಠಿಣಾಯೆನ್ ದಗ್ದಿತಾಲೆಂ. ಥೊಡ್ಯಾ ಪಾವ್ಟಿಂ ತಿ ದೂಃಖ್ ಮ್ಹಾಕಾ ಸೊಸುಂಕ್ ಜಾಯ್ನಾತ್ಲ್ಲಿ. ಹಾಂವ್ ರಡ್ತಾಲಿಂ. ತೆದ್ನಾಂ, ದಾಕ್ತೆರ್ನಿನ್ ಸಾಂಗ್ಲ್ಲ್ಯಾ ಉತ್ರಾಂಚೊ ಉಡಾಸ್ ಮ್ಹಾಕಾ ಯೆತಾಲೊ... ಹೆಂ ಏಕ್ ಝುಜ್... ತುಜ್ಯಾ ಖಾತಿರ್ .. ತುಕಾ ಆಪ್ಣಾಂವ್ಚ್ಯಾ ಖಾತಿರ್.. ಆನಿ ಏಕಾ ಸೊಜೆರಾ ಬರಿ ಹಾಂವ್ ಝುಜ್ತಾಲಿಂ..
ಹಾಂವ್ ಸತ್ಚ್ಚ್ ಸಾಂಗ್ತಾಂ ಮ್ಹಜ್ಯಾ ಬಾಳಾ...
ಹ್ಯಾ ದೀಸಾನಿ ಜಿಯೆಂವ್ಕ್ ಮ್ಹಾಕಾ ವಿಶೇಸ್ ಕಷ್ತ್ ಜಾತಾಲೆ... ತರೀ ಹಾಂವ್ ಜಿಯೆತಾಲಿಂ...
ತುಜ್ಯಾ ಖಾತಿರ್ ...
ತುಕಾ ಸಂಸಾರಾಕ್ ಬರ್ಯಾ ಥರಾನ್ ಹಾಡ್ಚಾ ಖಾತಿರ್...
**************
ನವೆಂಬರ್ 1985
ಮ್ಹಜ್ಯಾ ಕಶ್ಟಾಂಚೊ ನಿಮಾಣೊ ಮಹಿನೊ ಸುರು ಜಾಲ್ಲೊ.
ತುಂ ಮ್ಹಜ್ಯಾ ಗರ್ಭಾಂತ್ ಅಂತಿಮ್ ಹಂತಾಚೆರ್ ವಾಡೊನ್ ಯೆತಾಲೊಯ್. ಆತಾಂ ಮ್ಹಜೆಂ ಪೊಟ್ ಬರೆಂಚ್ಚ್ ವ್ಹಡ್ ದಿಸ್ತಾಲೆಂ
ಮ್ಹಜ್ಯಾ ಗರ್ಭಾಂತ್ ತುಂ ಬರಿಂಚ್ಚ್ ಉಡ್ಕಾಣಾಂ ಘಾಲ್ತಾಲೊಯ್. ತ್ಯಾ ತುಜ್ಯಾ ಉಡ್ಕಾಣಾಚ್ಯಾ ಹುಳ್ವುಳ್ಯಾಂ ವರ್ವಿಂ ಮ್ಹಜ್ಯಾ ಪೊಟಾಂತ್ಲಿ ದೂಃಖ್ ಆನಿಕೀ ಚಡ್ ಜಾತಾಲಿ ತರೀ ಮ್ಹಾಕಾ ರಡೊಂಕ್ ಯೆನಾತ್ಲ್ಲೆಂ.
ಪಾಟ್ಲ್ಯಾ ದೋನ್ ಮಹಿನ್ಯಾಂನಿ ಉದಾಕ್ ಭರೊನ್, ಸುಜೊನ್ ಆಯಿಲ್ಲೊ ಮ್ಹಜೊ ಜೀವ್, ಆತಾಂ ಚಡ್ ಆನಿ ಚಡ್ ಸುಜೊಂಕ್ ಲಾಗ್ಲೊ. ಮ್ಹಾಕಾ ಸರಾಗ್ ಚಲೊಂಕ್ ಕಶ್ಟ್ ಜಾಂವ್ಕ್ ಲಾಗ್ಲೆ. ದೋನ್ ಮೆಟಾಂ ಚಲ್ತಾನಾ ತಕ್ಲಿ ಘುಂವೊನ್, ಧರ್ಣಿಚೆರ್ ಆಪ್ಟಿಲ್ಲ್ಯಾ ಬರಿ ಜಾತಾಲೆಂ.
ಹರ್ಯೆಕಾ ದೋನ್ ದಿಸಾಂ ಏಕ್ ಪಾವ್ಟಿಂ ಮ್ಹಾಕಾ ಆಸ್ಪತ್ರೆಕ್ ವಚೊಂಕ್ ಆಸ್ಲ್ಲೆಂ. ಆಖ್ರೇಚೆಂ ಸ್ಕ್ಯಾನಿಂಗ್ ಜಾಲ್ಯಾ ಉಪ್ರಾಂತ್ ದಾಕ್ತೆರ್ನಿನ್ ಮ್ಹಾಕಾ ಕಳಯ್ಲೆಂ - " ತುಜ್ಯಾ ಆಶೆ ಫರ್ಮಾಣೆ ತುಕಾ ಚೆರ್ಕೊ ಜಾತಲೊ ಜೆನೆಟ್... ತುಜೊ ಚೆರ್ಕೊ ಬೋವ್ ಬರ್ಯಾ ಸ್ಥಿತೆರ್ ಆಸಾ..."
ಹಾಂವ್ ಸಂತೊಸಾನ್ ಪುಳಕಿತ್ ಜಾಲಿಂ.
ಕಿತ್ಯಾಕ್ ತುಜೆಂ ಬರೆಂಪಣ್ ಮ್ಹಾಕಾ ಸಂತೊಸ್ ದಿತಾಲೆಂ ಮಾತ್ರ್ ನ್ಹಂಯ್ ಸರ್ವ್ ದೂಃಖಿಕ್ ಆನಿ ಕಶ್ಟಾಂಕ್ ವಿಸ್ರಾಶೆಂ ಕರ್ತಾಲೆಂ.
********************
ನವೆಂಬರ್ 23, 1985
ಮಧ್ಯಾನ್ ಉತರ್ತಾನಾ ಮ್ಹಜ್ಯಾ ಪಾಟಿಂತ್ ಆನಿ ತಸೆಂ ಪೊಟಾಸಕಯ್ಲ್ ಎಕಾಚ್ಚ್ಫರಾ ಬರೊವ್ನ್ ಯೇಂವ್ಕ್ ಸುರು ಜಾಲೆಂ. ತ್ಯಾ ಘಡಿಯ್ ಮ್ಹಾಕಾ ವಿಶೇಷ್ ಭ್ಯೆಂ ದಿಸೊಂಕ್ ಲಾಗ್ಲೆಂ. ತುಕಾ ಜಲ್ಮ್ ದಿಂವ್ಚ್ಯೊ ಘಡಿಯ್ಯೊ ಲಾಗಿಂ ಆಯ್ಲ್ಯೊ ಮ್ಹಣ್ ಮ್ಹಾಕಾ ಖಾತ್ರಿ ಜಾತಾಲೆಂ.
ತುಜೊ ಡ್ಯಾಡಿ ನಿದ್ಲ್ಲೊ. ಸಗ್ಲೊ ದೀಸ್ ಆಫಿಸಾಂತ್ ಕಾಮ್ ಕರ್ಚ್ಯಾ ತಾಕಾ ಮಸ್ತ್ ಪುರಸಾಣ್ ಜಾತಾಲಿ. ತೊ ನಿದೆಂತ್ ಘೊರೆತಾಲೊ.
ಹಾವೆಂ ತಾಕಾ ಉಟಯ್ಲೆಂ.
ಘಳಾಯ್ ಕರಿನಾಸ್ತಾನಾ ಆಮಿಂ ಆಸ್ಪತ್ರೆಕ್ ಗೆಲ್ಯಾಂವ್.
**************
ನವೆಂಬರ್ 24, 1985
ದನ್ಪಾರಾಂಚೆಂ ಏಕ್ ವೊರ್ ಜಾತಾ ವರೇಗ್ ಹಾಂವ್ ವಾರ್ಡಾಂತ್ ಬೆಡ್ಡಾಚೆರ್ ಆಸ್ಲ್ಲಿಂ. ಉಪ್ರಾಂತ್ ಮ್ಹಾಕಾ ಬಾಳಾಂತ್ ಜಾಂವ್ಚ್ಯಾ ಕುಡಾಕ್ ತಾಣಿಂ
ವೆಲೆಂ.
ಆತಾಂ ಮ್ಹಜೆ ಕಶ್ಟ್ ಪರಮಾವಧೆಕ್ ಪಾವ್ಲ್ಲೆ. ಹಾಂವ್ ಮ್ಹಜ್ಯಾ ಜೀವಾಂತ್ ಆಸ್ಲ್ಲೆಂ ತ್ರಾಣ್ ಪ್ರಯೋಗ್ ಕರುನ್ ಕರ್ನ್ ಉರ್ಡಾತಾಲಿಂ, ತುಕಾ ಗರ್ಭಾಂತ್ಲೊ ಭಾಯ್ರ್ ಹಾಡ್ಚ್ಯಾ ಖಾತಿರ್.
ತುಜೊ ಡ್ಯಾಡಿ ಮ್ಹಜ್ಯಾ ಸವೆಂಚ್ಚ್ ಉಭೊ ಆಸ್ಲ್ಲೊ.
ತೀನ್ ವೊರಾಂ ಜಾವ್ನ್ ಸ ಮಿನುಟಾಂನಿ ಹಾಂವ್ ತುಕಾ ಬಾಳಾಂತ್ ಜಾಲಿಂ. ರಗ್ತಾನ್ ಬುಡ್ಲ್ಲ್ಯಾ ತುಕಾ ತುಕಾ ನರ್ಸಾಂನಿ ಮ್ಹಜೆ ಲಾಗಿಂ ಹಾಡ್ಲೊ ಆನಿ ಹರ್ದ್ಯಾಚೆರ್ ದವರ್ಲೊ.
ತುಂ ಪುಡ್ಪುಡಿತ್ ಜಾವ್ನಾಸ್ಲ್ಲೊಯ್. ಸೊಭಿತ್ ಆನಿ ಮಧುರ್ ನೆಣ್ತೊ. ದೊಳೆ ತುಜೆ ಉಗ್ತೆಚ್ಚ್ ಆಸ್ಲ್ಲೆ. ವ್ಹಡ್ ಏಕ್ ಝುಜ್ ಝುಜೊನ್ ಜಿಕೊನ್ ಆಯಿಲ್ಲ್ಯಾ ದಯ್ರಾಧಿಕ್ ಸೊಜೆರಾ ಭಾಶೆನ್ ತುಂ ಮ್ಹಾಕಾ ದಿಸ್ಲೊಯ್.
ಹಾಂವ್ ಸಂತೊಸಾನ್ ರಡ್ಲಿಂ. ತುಜ್ಯಾ ಜೀವಾಚೊ ಹುನುನೊ ಸ್ಪರ್ಶ್ ಮ್ಹಜ್ಯಾ ಜೀವಾಕ್ ಲಾಗ್ತಾನಾ, ಮ್ಹಜ್ಯಾ ಕುಡಿಂತ್ಲ್ಯಾ ಹರ್ಯೆಕಾ ಶಿರೆಂತ್ ಅಪರಿಮಿತ್ ಆನಂದಾಚೆಂ ವ್ಹಾದಾಳ್ ಉಟ್ಲೆಂ.
ಹಾಂ ಪುತಾ ! ತ್ಯಾ ವಗ್ತಾ ತುಕಾ ದೆಖೊನ್, ತುಜ್ಯಾ ಸಂಗೀಂ ಥೊಡ್ಯೊಚ್ಚ್ ಘಡಿಯೊ ಜಿಯೆವ್ನ್ ಮ್ಹಾಕಾ ಜಾಲ್ಲೊ ಸಂತೊಸ್ ವರ್ಣುಂಕ್ ಆಸಾಧ್ಯ್.
ಥೊಡಿಂಚ್ಚ್ ಕ್ಷಣಾಂ ತಸಿಂ ಪಾಶಾರ್ ಜಾಲಿಂ.
ನರ್ಸಾಂನಿ ಯೇವ್ನ್ ತುಕಾ ಮ್ಹಜೆ ಥಾವ್ನ್ ಮೆಕ್ಳೊ ಕೆಲೊ. ತಾಂಚ್ಯಾ ಸಾಂಗಾತಾ ಉಬಿ ಅಸ್ಲ್ಲ್ಯಾ ದಾಕ್ತೆರ್ನಿನ್ ಮ್ಹಾಕಾ ಕಳಯ್ಲೆಂ.
"ಆನಿ ಚಡ್ ವೇಳ್ ಆಮಿ ಪಾಡ್ ಕರಿನಾಂವ್ ಜೆನೆಟ್.. ಆನಿ ಥೊಡ್ಯಾಚ್ಚ್ ವೇಳಾನ್ ತುಕಾ ಆಮಿ ಆಪರೇಶನ್ ತಿಯೆಟರಾಕ್ ಆಪವ್ನ್ ವರ್ತೆಲ್ಯಾಂವ್ ತುಜ್ಯಾ ಕ್ಯಾನ್ಸರಾಚ್ಯಾ ಚಿಕಿತ್ಸೆ ಖಾತಿರ್.."
ವೆಗ್ಳಾಚಾರ್..!
ತ್ಯಾ ಉತ್ರಾಚೊ ಆಡ್ಹೂಕ್ ಅರ್ಥ್ ಮ್ಹಾಕಾ ಏಕಾಚ್ಚ್ ಫರಾ ಸಮ್ಜಾಲೊ. ಥೊಡ್ಯಾಚ್ಚ್ ಘಡಿಯಾಂಚ್ಯಾ ಮಧುರ್ ಆನಿ ರೊಸಾಳ್ ಮಿಲನಾ ಉಪ್ರಾಂತ್ ಮ್ಹಜೊ ಆನಿ ತುಜೊ ವೆಗ್ಳಾಚಾರ್ ಜಾಲ್ಲೊ. ಹಾವೆಂ ತುಜ್ಯಾ ತೊಂಡಾರ್ ದೀಶ್ಟ್ ಘಾಲಿ. ತುಜ್ಯಾ ತೊಂಡಾರ್ ಕಾಂಯಿಂಚ್ಚ್ ಬದ್ಲಾವಣ್ ನಾತ್ಲ್ಲಿ. ತುಕಾ ಮ್ಹಜೆ ಥೈಂ ಪಳಂವ್ಚಿ ಸಕತ್ ನಾತ್ಲ್ಲಿ.
ಮ್ಹಜೆಂ ಕಾಳಿಜ್ ದುಖಾನ್ ಭರೊನ್ ಗೆಲೆಂ. ಹಾಂವ್ ಏಕ್ ಕಸಲಿ ನಿರ್ಭಾಗಿ ಆವಯ್ ಮ್ಹಣ್ ಹಾಂವ್ ಚಿಂತುಂಕ್ ಲಾಗ್ಲಿಂ. ಜಲ್ಮ್ ದಿಲ್ಯಾ ಉಪ್ರಾಂತ್ ಥೊಡಿಂ ಕ್ಷಣಾಂ ಸಯ್ತ್ ತುಜೆ ಸಾಂಗಾತಾ ಖರ್ಚುಂಕ್ ಮ್ಹಾಕಾ ಫಾವೊ ನಾತ್ಲ್ಲೆಂ.
ಹ್ಯಾ ಘಡಿಯೆ ಹಾಂವ್ ತುಜ್ಯಾ ಥಾವ್ನ್ ಪಯ್ಸ್ ಗೆಲ್ಯಾ ಉಪ್ರಾಂತ್ ಮ್ಹಜ್ಯಾ ಜೀವಾಕ್ ಚಿಕಿತ್ಸಾ ದೀಂವ್ಕ್ ಆಸ್ಲ್ಲಿ ಮ್ಹಣ್ ಹಾಂವ್ ಜಾಣಾಸ್ಲ್ಲಿಂ. ತ್ಯಾ ಚಿಕಿತ್ಸೆ ಉಪ್ರಾಂತ್ ಹಾಂವ್ ಪಾಟಿಂ ಯೆನಾ ತರ್??? ಹೊ ವೆಗ್ಳಾಚಾರ್ ಸಾಸ್ಣಾಚೊ ಜಾಲೊ ತರ್ ???
ಮ್ಹಾಕಾ ನೀಜ್ ಜಾವ್ನ್ ರಡೊಂಕ್ ಆಯ್ಲೆಂ ಆನಿ ಹಾಂವ್ ರಡ್ಲಿಂ.
ತ್ಯಾ ವಗ್ತಾ ತುಕಾ ಕಿತೆಂ ಭಗ್ಲೆಂ ಕೋಣ್ ಜಾಣಾ ತುಂಯ್ ಎಕಾಚ್ಚ್ ಫರಾ ರಡ್ಲೊಯ್... ನರ್ಸಾನ್ ತುಕಾ ಕುಡಾಂತ್ಲೆಂ ಭಾಯ್ರ್ ವೆಲೆಂ.
******************
ದಿಸೆಂಬರ್ 25, 1985
ತುಕಾ ಆಮಿ ವಿಕ್ಟರ್ ಮ್ಹಣ್ ನಾಂವ್ ದವರ್ಲೆಂ. ಏಕಾ ಝುಜಾಂತ್ ಜಯ್ತ್ ಜೊಡ್ಲ್ಲ್ಯಾ ಸೊಜೆರಾಚೊ ಉಡಾಸ್ ಕಾಡುನ್ ಹೆಂ ನಾಂವ್ ಆಮಿ ತುಕಾ ದಿಲ್ಲೆಂ.
ಜೆಜು ಜಲ್ಮಾಲ್ಲ್ಯಾ ದೀಸ್ ತುಕಾ ತೆಂಪ್ಲಾಂತ್ ಭೆಟಯ್ಲೆಂ. ಕಿತ್ಯಾಕ್ ಕ್ರೀಸ್ತ್ ಸೊಮಿ ತುಜೆ ಸವೆಂ ಸದಾಂಚ್ಚ್ ಆಸೊಂ ಮ್ಹಣ್ ಆಮ್ಚಿ ಆಶಾ ಜಾವ್ನಾಸ್ಲ್ಲಿ.
********************
ಜನವರಿ 12, 1986
ಹಾಂವ್ ಆನಿಕೀ ಜೀವ್ ಆಸ್ಲ್ಲಿಂ.
ಹ್ಯಾ ದಿಸಾಂನಿ ಮರಣ್ ಮ್ಹಾಕಾ ಲಾಗಿಂ ಜಾತಾಲೆಂ ವ ಹಾಂವ್ ಮರ್ಣಾಕ್ ಲಾಗಿಂ ಜಾತಾಲಿಂ ತೆಂ ಹಾಂವ್ ನೆಣಾ.
ಕ್ಯಾನ್ಸರಾನ್ ಮ್ಹಜ್ಯಾ ಜೀವಾಕ್ ನಾಸ್ ಕೆಲ್ಲೆಂ. ಪಾತ್ಲ್ಯಾ ದೀಸಾನಿ ಮ್ಹಾಕಾ ಕಿತ್ಲ್ಯಾ ನಮುನ್ಯಾಂಚಿಂ ವಕ್ತಾಂ ಆನಿ ಚಿಕಿತ್ಸಾ ದಿಲ್ಲಿ ತರೀ ಮ್ಹಜ್ಯಾ ಜೀವಾಂತ್ ಭರೊನ್ ಗೆಲ್ಲೆಂ ಕ್ಯಾನ್ಸರ್ ವ್ಹಾಳಯೆ ಭಾಶೆನ್ ಚರೊನ್ಂಚ್ಚ್ ವೆತಾಲೆಂ.
ಹರ್ಯೆಕ್ ದೀಸ್ ಹಾಂವ್ ಬೋವ್ ಕಶ್ಟಾಂನಿ ಪಾಶಾರ್ ಕರ್ತಾಲಿಂ. ಮ್ಹಜ್ಯಾ ಜೀವಾಂತ್ಲೆ ಅಟೆವಿಟೆ ಸೊಸುಂಕ್ ಜಾಯ್ನಾಸ್ತಾನಾ ಕಿತ್ಲೆಶ್ಯಾಪಾವ್ಟಿಂ ಕಳ್ವಳೊನ್ ರಡ್ತಾಲಿಂ. ಬೆಡ್ಡಾರ್ ಥಾವ್ನ್ ಉಟೊನ್ ಚಲಾಜಯ್ ತರೀ ಮ್ಹಾಕಾ ನರ್ಸಾಂನಿ ಕುಮಕ್ ಕರಿಜಯ್ ಆಸ್ಲ್ಲಿ.
ದೀಸಾಕ್ ಏಕ್ ಪಾವ್ಟಿಂ ತುಕಾ ಮ್ಹಜ್ಯಾ ಲಾಗಿಂ ಹಾಡ್ತಾಲೆ. ತುಂ ಮ್ಹಜ್ಯಾ ಲಾಗಿಂ ಥೊದೊಚ್ಚ್ ವೇಳ್ ಆಸ್ಲ್ಲ್ಯಾ ವೇಳಾರ್ ಮ್ಹಜ್ಯಾ ಜೀವಾಂತ್ಲೆ ಸರ್ವ್ ಕಶ್ಟ್ ಮಯಾಗ್ ಜಾಲ್ಲೆ ಪರಿಂ ಮ್ಹಾಕಾ ಭಗ್ತಾಲೆಂ. ಮ್ಹಜ್ಯಾ ದೂಃಖಿಚೊ ಉಡಾಸ್ ಸಯ್ತ್ ಮ್ಹಾಕಾ ಯೆನಾತ್ಲ್ಲೊ. ತುಂ ಮ್ಹಜ್ಯಾ ವೆಂಗೆಂತ್ ಆಸ್ಲ್ಲ್ಯಾ ವೇಳಾರ್ ಮ್ಹಾಕಾ ಜಾಂವ್ಚೊ ತೊ ಸಂತೊಸ್ ಹಾಂವ್ ಕೆದಿಂಕ್ಚ್ಚ್ ವಿಸ್ರೊಂಕ್ ಸಕಾಶಿಂನಾ.
ಪುಣ್, ಯೆದೋಳ್ ವರೆಗ್ ಹಾವೆಂ ತುಕಾ ಪಾನೊ ದೀಂವ್ಕ್ ನಾತ್ಲ್ಲೊ. ಜಲ್ಮ್ ದಿಲ್ಲ್ಯಾ ಆವಯ್ಕ್ ತಾಚ್ಯಾ ಭುರ್ಗ್ಯಾಕ್ ಪಾನೊ ದೀಂವ್ಕ್ ನಾ ತರ್ ತಾಚ್ಯಾ ಕೀ ವರ್ತೆಂ ನಿರ್ಭಾಗ್ಪಣ್ ಹೆರ್ ಖಂಚೆಂಯ್ ನಾ. ದಾಕ್ತೆರ್ನಿಲಾಗಿಂ ಹಾವೆಂ ಏಕ್ ಪಾವ್ಟಿಂ ವಿಚಾರ್ಲ್ಲೆಂ - "ದೊಕ್ತರ್ ..ಏಕ್ ಪಾವ್ತಿಂ ಮ್ಹಜ್ಯಾ ಭುರ್ಗ್ಯಾಕ್ ಪಾನೊ ದಿಂವ್ಚೆಂ ಭಾಗ್ ಮ್ಹಾಕಾ ಫಾವೊ ಜಾಯ್ತ್ಗೀ?"
"ತುಜ್ಯಾ ಭುರ್ಗ್ಯಾಚ್ಯಾ ಬರೆಪಣಾಖಾತಿರ್ ಆಮಿ ಹೆಂ ಸರ್ವ್ ಕರ್ತಾಂವ್.." ತಿಣೆ ಮ್ಹಾಕಾ ಜವಾಬ್ ದಿಲ್ಲಿ. " ಕಿತ್ಯಾಕ್ ತುಜ್ಯಾ ರಗ್ತಾಂತ್ ವೀಕ್ ಭರ್ಲ್ಲ್ಯಾ ಬರಿ ವಕಾತ್ ಭರೊನ್ ಆಸಾ.. ಅನಿ ತೆಂ ತುಜ್ಯಾ ಭುರ್ಗ್ಯಾಕ್ ಬಿಲ್ಕುಲ್ ಬರೆಂ ನ್ಹಂಯ್.."
ಪಳೆ ಪುತಾ.. ಹಾಂವ್ ಕಿತ್ಲಿಂ ನಿರ್ಭಾಗಿ...
ಖಂಚಾಯ್ ಭುರ್ಗ್ಯಾಕ್ ತಾಚ್ಯಾ ಆವಯ್ಚೆಂ ದೂದ್ ಖಾಂವ್ಚೆಂ ಭಾಗ್ ಆಸ್ತಾ..ಪುಣ್ ತುಕಾ ತೆಂಯ್ ಫಾವೊ ಜಾಲೆಂ ನಾ....
*********
ಜನೆರ್ 17, 1986
ಆಯ್ಚಾ ದಿಸಾ ತುಕಾ ಮ್ಹಜ್ಯಾ ಸರ್ಶಿನ್ ಹಾಡ್ನ್ ಪಾಟಿಂ ವೆಲ್ಲ್ಯಾ ಉಪ್ರಾಂತ್ ಏಕಾಚ್ಚ್ಫರಾ ಮ್ಹಜ್ಯಾ ಹರ್ಧ್ಯಾಂತ್ ದೂಃಖ್ ಸುರು ಉಟ್ಲಿ. ಉಸ್ವಾಸ್ ಭಾಂದ್ಲ್ಲ್ಯಾ ಬರಿ ಜಾವ್ನ್ ಹಾಂವ್ ಕಾಂಯ್ ಹ್ಯಾಚ್ಚ್ ಘಡಿಯೆ ಮೊರ್ತಾಂ ಕೊಣ್ಣಾ ಮ್ಹಣ್ ಮ್ಹಾಕಾ ಭಗ್ಲೆಂ. ಥೊಡ್ಯಾ ವೆಳಾನ್ ಸಾರ್ಕಿ ಜಾತಾನಾ ಮ್ಹಜ್ಯಾ ಮತಿಂತ್ ವಾದಾಳ್ ಉಟ್ಲ್ಲೆಂ.
ಆನಿ ತೊಡ್ಯಾ ದೀಸಾನಿ ಹಾಂವ್ ಮೊರ್ತೆಲಿಂ. ತುಜ್ಯಾ ಲಾಗಿಂ ಉಲಂವ್ಕ್ ಸಕ್ಚಿಂ ನಾ. ತುಂ ಡ್ಯಾಡಿಲಾಗಿಂ ಮ್ಹಜ್ಯಾ ವಿಶ್ಯಾಂತ್ ವಿವಿಧ್ ಸವಾಲಾಂ ವಿಚಾರ್ತಲೊಯ್. ತ್ಯಾ ಸರ್ವ್ ಸವಾಲಾಂಕ್ ಜವಾಬ್ ದಿಂವ್ಚ್ಯಾ ಖಾತಿರ್ ಹಾಂವ್ ಪೆನ್ನ್ ಆನಿ ರಿತೆಂ ಕಾಗಾತ್ ಘೆವ್ನ್ ಪಾತ್ಲಿಂ ಘಡಿತಾಂ ಬರಂವ್ಕ್ ಸುರು ಕೆಲೆಂ.
ಮ್ಹಜ್ಯಾ ಜೀವನಾಚೆಂ ಚಕ್ರ್ ಹ್ಯಾ ರಿತ್ಯಾ ಕಾಗ್ದಾಚೆರ್ ಉತ್ರಾಂನಿ ಪಿಂತ್ರಾಂವ್ಕ್ ಲಾಗ್ಲಿಂ. ರಿತ್ಯಾ ಕಾಗ್ದಾಚೆರ್ ಉತ್ರಾಂ ಭರೊನ್ ಯೆತಾಲಿಂ....
****************
ಜನೆರ್ 22, 1986
ಮ್ಹಜೆ ಆಖ್ರೆಚೆ ದೀಸ್ ಲಾಗಿಂ ಆಯಿಲ್ಲೆ ಮ್ಹಣ್ ಹಾಂವ್ ಜಾಣಾ. ಆಯ್ಚ್ಯಾ ದೀಸಾ ಚಕ್ರಾಚಿಂ ಘಡಿತಾಂ ಬರವ್ನ್ ಹಾಂವ್ ಸಂಪಯ್ತಾಂ ಕಿತ್ಯಾಕ್ ಹ್ಯಾ ಫುಡೆಂ ಚಡ್ ದೀಸ್ ವಾಂಚಾನಾ ಮ್ಹಣ್ ಹಾಂವ್ ಜಾಣಾ.
ಮ್ಹಜೆ ಹಾತ್ ಥರ್ಥರ್ತಾತ್.... ಮ್ಹಜೊ ಜೀವ್ ಕಠೀಣಾಯೆನ್ ಕಾಂಪ್ತಾ... ಮತಿಂತ್ ಆನಿಕೀ ಮುಕಾರ್ಸುನ್ ಬರಂವ್ಕ್ ಆಶಾ ಆಸಾ ತರೀ ಕೂಡ್ ಆಸ್ಕತ್ ಜಾಲ್ಯಾ...
ಆತಾಂ ತುಕಾ ಆದೇವ್ಸ್ ಮ್ಹಣ್ಚೊ ವೇಳ್ ಆಯ್ಲಾ. ಹಾಂವ್ ತುಕಾ ಆದೇವ್ಸ್ ಮ್ಹಣ್ತಾಂ ತುಕಾ ಮ್ಹಜ್ಯಾ ಬಾಳಾ ವಿಕ್ಟರ್....
ವೀಸ್ ವರ್ಸಾಂಚ್ಯಾ ಜಲ್ಮಾ ದೀಸಾ ಹೆಂ ಚಕ್ರ್ ತುಜ್ಯಾ ಮುಕಾರ್ ಉಭೆಂ ಜಾತೆಲೆಂ. ಡ್ಯಾಡಿಕ್ ಹಾವೆಂ ತಸೆಂ ಸಾಂಗ್ಲಾಂ.
ಹ್ಯಾ ವೆಳಾರ್ ಮ್ಹಜೆಂ ಕಾಳಿಜ್ ಫುಟೊನ್ ಆಯಿಲ್ಲ್ಯಾಬರಿ ಜಾತಾ. ತುಕಾ ಮ್ಹಜ್ಯಾ ಮೊಗಾಚ್ಯಾ ಪುತಾಕ್ ಆಧೇವ್ಸ್ ಮ್ಹಣ್ಚೆಂ ವಿಶೇಸ್ ಕಶ್ಟಾಂಚೆಂ ತರೀ ವಿಧಿಚ್ಯಾ ಖುಶೆ ಪ್ರಮಾಣೆಂ ಆಮಿ ಎಕಾ ಮೆಕಾ ಥಾವ್ನ್ ಪಯ್ಸ್ ವಚಾಜಯ್ಚ್ಚ್ ಜಾಲಾಂ...
ಆಧೇವ್ಸ್ ತುಕಾ ಮ್ಹಜ್ಯಾ ಭುರ್ಗ್ಯಾ... ವಿಕ್ಟರ್....
ತುಜಿ ನಿರ್ಭಾಗಿ ಮಮ್ಮಿ
*****************
ವಿಕ್ಟರಾನ್ ಪತ್ರ್ ವಾಚುನ್ ಆಕೇರ್ ಕೆಲ್ಲೆಂ...
ರಿತ್ಯಾ ಕಾಗ್ದಾಚೆರ್ ಭರೊನ್ ಗೆಲ್ಲಿಂ ಉತ್ರಾಂ ತಾಚ್ಯಾ ಮತಿಂತ್ ವಾದಾಳ್ ಹಾಡುಂಕ್ ಸಕ್ಲ್ಲಿಂ...
ಅವಯ್ಚೊ ಮೋಗ್ ಆನಿ ತ್ಯಾಗ್ ತಾಕಾ ಅರ್ಥ್ ಜಾಲ್ಲೊ....
ಅವಯ್ಚ್ಯಾ ಯಜ್ನಾಚೆಂ ಬಲಿದಾನ್ ತಾಣೆ ದೆಖ್ಲ್ಲೆಂ...
ರಿಚರ್ಡಾನ್ ಪುತಾಕ್ ದೆಖ್ಲೆಂ.
ವಿಕ್ಟರ್ ಖಳ್ಮಿತ್ ನಾಸ್ತಾನಾ ರಡ್ತಾಲೊ.
ತೆದ್ನಾಂ, ಮೊಳ್ಬಾರ್ ರಾಸ್ ಪಡ್ಲ್ಲ್ಯಾ ಕಾಳ್ಯಾ ಮೊಡಾಂನಿ ಪಾವ್ಸಾಚೊ ಶೆಣಿಯೊಂ ವೊಂಪುಂಕ್ ಸುರು ಕೆಲ್ಲ್ಯೊ....
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
