ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ದೆವಾಚ್ಯಾ ನಾಂವಾನ್........!?
- ಆಸ್ಟಿನ್ ಡಿ’ಸೋಜ್ ಪ್ರಭು ನಂತೂರ್/ಚಿಕಾಗೊ
ಆಮ್ಚಾ ಸಮಾಜೆಚ್ಯಾ ಎಕೆಕಾ ಸಮಸ್ಸ್ಯಾಂಚೆರ್ ಆರ್ಸೊ ಧರ್ಚ್ಯಾ ಇರಾದ್ಯಾನ್, ಹೆಂ ಲೇಖನ್ ಪರ್ಗಟ್ಲಾಂ ಶಿವಾಯ್ ಕೊಣಾಯ್ಕ್ಯ್ ಹಲ್ಕ್ ಕರ್ಚ್ಯಾ ಇರಾದ್ಯಾನ್ ಭಿಲ್ಕುಲ್ ನ್ಹಂಯ್. ಹ್ಯಾ ಲೇಖನಾಚೊ ಬರವ್ಪಿ ಆಸ್ಟಿನ್ ಪ್ರಭುಚಿ ಪರತ್ ವಳೊಕ್ ಗರ್ಜ್ ಮ್ಹಣ್ ದಿಸಾನಾ. ಏಕ್ ಮುಖೆಲಿ, ಸಂಘಟಕ್, ವಾವ್ರಾಡಿ, ಚಿಂತ್ಪಿ, ಲೇಖಕ್, ಕವಿ, ಆನಿ ಸರ್ವಾಂಚ್ಯಾಕೀ ಪಯ್ಲೆಂ - ಸಾಮಾಜಿಕ್ ಹುಸ್ಕೊ ಆಸ್ಚೊ. ಹಾಣೆಂ ವಿಂಚ್ಲ್ಲೊ ವಿಷಯ್ ಆಮ್ಚಾ ಸಮಾಜೆಂತ್ ಪ್ರಸ್ತುತ್ ಆಸ್ಚಿ ಮಾರೆಕಾರ್ ಪಿಡಾ - ಜಿ ಥೊಡ್ಯಾಂಕ್ ಅಶಿಯೀ ಲಾಗ್ಲ್ಯಾ ಮ್ಹಳ್ಯಾರ್, ಫಿರ್ಗಜೆಂತ್ ಆಸ್ಚಾ ಭಾವಾರ್ಥ್ಯಾಂನಿ ವೆಗಿಂಚ್ ಅಪ್ಲೊ ಭಾವಾರ್ಥ್ ಸಾಂಡುನ್ ಧಾಂವೊಂಕ್ ಹೆಚ್ಚ್ ಕಾರಾಣ್ ಜಾಂವ್ಕ್ಯ್ ಪುರೊ. ಆಜ್ಕಾಲ್ ಚಡಾವತ್ ಪಾದ್ರಿಂಕ್ ಪಳೆತಾನಾ ಖರೆಂಚ್ ಭಗ್ತಾ ’ಯಾಜಕ್ಪಣ್ ಏಕ್ ಭೆಸ್ ನ್ಹಂಯ್ - ಬಗಾರ್ ಏಕ್ ವೃತ್ತಿ’ ಮ್ಹಳ್ಳೆಂ ಖರೆಂಚ್ ಗೊಮ್ತಾ.
ವಾಚ್ಪ್ಯಾಂಕ್ ಅಪಾಪ್ಲೆ ವಿಚಾರ್ ವೆಕ್ತ್ ಕರುಂಕ್ ಭರ್ಪೂರ್ ಆವ್ಕಾಸ್ ಆಸಾ.
"ಆಮ್ಚಿ ಕೊಂಕ್ಣಿ
ಸಮಾಜ್ ಫಿರ್ಗಜ್ ಮ್ಹಳ್ಳ್ಯಾ ವರ್ತುಲಾಕ್ ಭಂವಾಡೊ ಕಾಡುನ್ ಆಸಾ ತರ್ಯೀ ಆಮ್ಚೆ ಚಡ್ತಾವ್ ಧಾರ್ಮಿಕ್,
ಫಿರ್ಗಜಾಂನಿ ಫಕತ್ತ್ ಭಾಂದ್ಪಾಂ ಭಾಂದ್ಚ್ಯಾಂತ್ ವೆಸ್ತ್ ಆಸಾತ್ ಶಿವಾಯ್ ಕುಟ್ಮಾಂ ಭಾಂದ್ಚ್ಯಾಂತ್
ನ್ಹಂಯ್. ಆಮ್ಚಿ ಕೊಂಕ್ಣಿ ಸಮಾಜ್ ಆಜೂನ್ಯೀ ಪಾದ್ರಿ ಕೇಂದ್ರಿತ್ ಆಸಾ ಶಿವಾಯ್ ಕುಟಾಮ್ ಕೇಂದ್ರಿತ್ ಜಾವ್ನ್
ನಾ."
ಮೊಗಾಳ್ ಮೆಲ್ಕಿ (ಮಾ|ಬಾ|ವಿ.ಜೆ.ಮಿನೇಜಸ್), ತುಜಿಂ ವಯ್ಲಿಂ ಉತ್ರಾಂ
ವಾಚುನ್ ಮ್ಹಜೊ ತುಜೆವಯ್ಲೊ ಅಭಿಮಾನ್ ಆನಿಕ್ಯೀ ಚಡ್ಲೊ, ತೊ
ಸರ್ಗಾ ಕುಶಿನ್ ವಾಡ್ಲೊ! ಕಿತ್ಯಾಕ್ ತಿಂ ಉತ್ರಾಂ ಅಕ್ಷರಸ್ ಸತ್ ಜಾವ್ನಾಸಾತ್. ಆಯ್ಲೆವಾರ್
ಹಾಂವ್ ಮಂಗ್ಳುರಾಕ್ ಮಹಿನ್ಯಾಚಿ ಭೆಟ್ ದೀಂವ್ಕ್ ಗೆಲ್ಲ್ಯಾವೆಳಿಂ
ಹಾಂವೆಂಯ್ ಮ್ಹಜ್ಯಾ ಹ್ಯಾ ಉಗ್ತ್ಯಾ ದೊಳ್ಯಾಂನಿ ಪಳೆಲ್ಲೆಂ ತಿತ್ಲೆಂಚ್!
ಸರ್ವ್ ವಿಗಾರ್ ಭಾಂದ್ಪಾಂ ಭಾಂದುನ್ ಆಪ್ಣೆಂ ವಾಗ್ ಮಾರ್ಲೊ ಮ್ಹಳ್ಳಿ
ಬೊಬಾಟ್ ಮಾರುಂಕ್ ಲಾಗ್ಲ್ಯಾತ್. ದಾಖ್ಲ್ಯಾಕ್ ಮ್ಹಜಿಚ್
ಫಿರ್ಗಜ್ - ಹಾಂಗಾಚ್ಯಾ ಹೊಲಾಂತ್ ಜಾಂವ್ಚೆ ತಿತ್ಲಿಂ ಲಗ್ನಾ ಸೊಭಾಣಾಂ
ಹೆರ್ ಖಂಯ್ಸರ್ಯ್ ಜಾಯ್ನಾಂತ್! ತರ್ಯೀ ಪಾದ್ರ್ಯಾಬಾಂಚಿ
ಶೆರ್ಮಾಂವಾಂ ವೆಳಿಂ ಬೊಬಾಟ್ ಏಕ್ಚ್ಚ್ - ಪಯ್ಶೆ ದಿಯಾ,
ಪಯ್ಶೆ ದಿಯಾ, ಸೈರ್ಯಾಂ ಪಾದ್ರಿಂಕ್ ರಾವೊಂಕ್ ಘರ್ ಉಭಾರುಂಕ್ ಆಸಾ! ಕಿತೆಂ
ಮರ್ಜಿ ಹಾಂಚಿ ಲೋಕ್ ಪಯ್ಶೆ ದಾನ್ ದಿತಾ ಮ್ಹಣ್! ಹಾಂಕಾಂ ವಿಚಾರ್ತಲೊ ಕೋಣ್ ತರ್ಯೀ ಆಸಾ
ವ ನಾ? ಫಿರ್ಗಜೆಂತ್ ಇತ್ಲೆ ದುರ್ಬಳೆ ಆಸ್ಲ್ಲೆ ಹಾಂಚ್ಯಾ ದೊಳ್ಯಾಂಕ್
ದಿಸ್ತಾತ್ ವ ನಾ? ಆಮ್ಚೊ ಬಿಸ್ಪ್ ಜಾಲ್ಯಾರ್ಯೀ ಹಾಂಕಾಂ ಕಿತೇಂಯ್ ಜಾಯ್ ತೆಂ
ಬಾಂಧುಂಕ್ ಪರ್ವಣ್ಗಿ ದಿತಾ? ಹ್ಯಾಂ ಸರ್ವ್ ಸವಾಲಾಂಕ್ ಜವಾಬ್ ದಿತಲೊ ಕೋಣ್? ದೆವಾಚ್ಯಾ
ನಾಂವಾನ್ ಹ್ಯಾ ದೆವಾಜಾಗ್ಯಾಂನಿ ಜಾಂವ್ಚಿಂ ತಿಂ ಆತರ್ವಣಾಂ ತರ್ಯ್ ಕಿತೆಂ!
ಏಕ್ಲೊ, ದೋಗ್ ಜಣ್ ಜಾಲ್ಯಾರ್ಯೀ ವ್ಹಡ್ ನ್ಹಂಯ್ ಆಸ್ಲ್ಲೆಂ;
ಹರ್ಯೆಕ್ಲೆಯೀ ಜೆಜುಚಿ ಶಿಕವ್ಣ್ ಕಸೆಗಾಯ್ ವಿಸರ್ಲೆ?
ಮೊಯ್ಜೆಚೆ ಉಪಾದೆಸ್ ಥಂಯ್ಚ್ ಸೊಡ್ನ್ ಆಮಿ ಆಮ್ಚೆಚ್ ಉಪಾದೆಸ್
ಹಾಡ್ಲೆ, ಸೊಮಿಯಾ ದೆವಾಕ್ ಸರ್ಗಾರ್ಚ್ ಸೊಡ್ನ್ ಆಲ್ತಾರಾಂನಿ ಆಮ್ಚೆಚ್
ಸಾಂತ್ ಚಡೊನ್ ರಾವ್ಲೆ, ಎಕಾ ನಿಜಾ ದೆವಾಕ್ ಮಾನ್ ದೀ ಮ್ಹಳ್ಳೊ ಉಪಾದೆಸ್ ಘಾಟಾಕ್ ಚಡೊನ್ ಆಮಿ
ಸಾಂತಾಂ ಭಕ್ತಾಂಕ್ ವಾತಿ ಭೆಟಂವ್ಕ್ ಧರ್ಲ್ಯೊ, ರಾವ್ಳೆರಾ ತಸೊಲ್ಯೊ ಇಗರ್ಜ್ಯೊ ಭಾಂದುನ್ ಆಮಿ ಆಮ್ಚ್ಯಾ ದೆವಾಕ್ ಗ್ರೇಸ್ತ್ ಕೆಲೊ ಆನಿ
ಸೆಜಾರಾಂತ್ಲ್ಯಾ ದುರ್ಬಳ್ಯಾಂಕ್ ಸೊಡ್ನ್ ಸೊಡ್ಲೊ? ಮ್ಹಜ್ಯಾ
ಹ್ಯಾ ಸವಾಲಾಂಕ್ ಜವಾಬ್ ದೀಂವ್ಕ್ ಏಕ್ಚ್ ಏಕ್ ಮುಖಾರ್ ಯೇತ್ ಘಾಲುನ್ ತೊ ದಗ್ಲೊ? ದೆವಾ, ದೆವಾ, ಜುದಾಸಾನ್ ವಿಕ್ರಿತ್ ಕೆಲೊ,
ಪಿಲಾತಾನ್ ಹಾತ್ ಧುಲೆ, ಸೊಜೆರಾಂನಿ ಜೆರ್ಬಾಂದ್ ಮಾರ್ಲೆ,
ಪೆದ್ರುನ್ ನೆಗಾರ್ ಕೆಲೆಂ, ಲೋಕಾನ್ ವಿರೋಧ್ ಬೊಬಾಟ್
ಮಾರ್ಲಿ. ಆನಿ ಆತಾಂ ಹೆ ಕಿತೆಂ ಕರ್ತಾತ್?
ಭಾಂಗಾರಾಚ್ಯಾ ಸಾಡ್ಯಾ ತಸಲಿಂ ವಸ್ತ್ರಾಂ ಆಮ್ಕಾಂ ಜಾಯ್ ದೆವಾಲಾಗಿಂ
ಮಾಗ್ತಾನಾ? ಕಿತ್ಲೆಶೆ ದೆವೊತಿ ಯೆತಾತ್ ಇಗರ್ಜಾಂಕ್ ನ್ಹೆಸೊನ್ ಪಿಂಜ್ಲ್ಲಿಂ
ವಸ್ತುರಾಂ - ಕಿತೆಂ ದಬಾಜೊ ಆಮ್ಚೊ ಇಗರ್ಜೊ ಸೊಭಂವ್ಚ್ಯಾ
ದಿವ್ಯಾಂಚೊ! ಮಾರ್ಚ್ಯಾ ಲಾಖೊಂ ರುಪ್ಯಾಂಚ್ಯಾ ಫಟಾಕ್ಯಾಂಚೊ!! ತೆಚ್ಚ್
ಪಯ್ಶೆ ಕೊಣಾಯ್ ಗರ್ಜೆವಂತಾಂಚ್ಯಾ ಘರಾಕ್ ವ್ಹಣದಿ ಉಭಾರುಂಕ್
ದಿಲ್ಯಾರ್? ಆಮ್ಚ್ಯಾ ದೆವಾಕ್ ಕಿತೆಂ ರಾಗ್ ಯೇತ್?
ಶೆರ್ಮಾಂವಾವೆಳಿಂ ಸೊಲ್ತಾಂವ್ ಆಮಿ ಭಿಂರ್ಡಿ ಸೊಲಾಂ - ಕೊಣಾಚ್ಯಾ ದೊಳ್ಯಾಂಕ್
ಮಾತಿ ಘಾಲುಂಕ್? ಕರೆಜ್ಮಾವೆಳಿಂ ರಡ್ತಾಂವ್ ಆಮಿ ಶೆರ್ಮಾಂವಾವೆಳಿಂ ಕೊಣಾಕ್ ಕೆಳಿಂ
ಸೊಲುನ್ ದೀಂವ್ಕ್? ಜರ್ ಆಮಿ ಫಕತ್ ಸಾಂಗ್ತಾಂವ್ ಹೆರಾಂಕ್ ಆನಿ ಆಮಿ ಜಾವ್ನ್ ಕಿತೆಂಚ್ ಕರಿನಾಂವ್ ತರ್ ಧಾಂಪ್ಯಾಂ ಆಮಿ ಆಮ್ಚೆಂ ತೋಂಡ್ ದಾಖಯ್ನಾಸ್ತಾಂ ತೆಂ ವಿರೂಪಿ
ಸೊಂಡ್. ದೆವಾಚ್ಯಾ ನಾಂವಾನ್ ಲೊಕಾಕ್ ಭಾನಾಂವ್ಚೆಂ ಬಂಧ್ ಜಾಂವ್; ದೆವಾಚ್ಯಾ
ನಾಂವಾನ್ ಭಾಂದ್ಪಾಂ ಉಭಾರ್ಚೆಂ ಬಂಧ್ ಜಾಂವ್; ದೆವಾಚ್ಯಾ ನಾಂವಾನ್
ಭಿರ್ಮತ್ ಲೊಕಾಕ್ ಫಟಂವ್ಚೆಂ ಬಂಧ್ ಜಾಂವ್!
ಜರ್ ಮದರ್ ತೆರೆಜಾ ಫಕತ್ತ್ ಏಕ್ ಕಾಪಾಡ್ ನ್ಹೆಸೊನ್, ಧರ್ಣಿರ್
ಮಾಂದ್ರೆರ್ ನಿದೊನ್, ಹೆರಾಂಕ್ ಕಿತೆಂ ರಾಂದ್ತಾತ್ಗಿ ತೆಂಚ್ ಆಪುಣ್ಯ್ ಖಾಂವ್ನ್, ಏಕ್ಚ್ ಏಕ್
ಬಾಂದಾಪ್ ಆಪ್ಲ್ಯಾ ಫಾಯ್ದ್ಯಾಕ್ ಭಾಂದಿನಾಸ್ತಾಂ, ಏಕ್ಚ್ ಏಕ್
ಪಾವ್ಟಿಂ ಆಪ್ಣಾಕ್ ದಾನ್ ದಿಯಾ ಮ್ಹಣ್ ಲೋಕಾಲಾಗಿಂ ಮಾಗಾನಾಸ್ತಾಂ ಇತ್ಲಿಂ
ಸರ್ವ್ ಕಾರ್ಭಾರಾಂ ಕರುಂಕ್ ಸಕ್ಲಿ, ತರ್ ಆಮ್ಕಾಂ ಕಿತೆಂ ತಿಚ್ಯೆಪರಿಂಚ್
ವ ತಿಣೆ ಕೆಲ್ಲ್ಯಾಂತ್ಲೆಂ ಪನ್ನಾಸ್ ಠಕ್ಕೆ ತರ್ಯೀ ಕರುಂಕ್ ಜಾಯ್ನಾಂ?
ಆಮ್ಚೆ ಪ್ರಸಂಗ್/ಶೆರ್ಮಾಂವ್ ಜಾಂವ್ ಆಮ್ಚೆಂ ಖರೆಂ ಜೀವನ್; ಆಮಿ
ಹೆರಾಂಕ್ ದಿಂವ್ಚೆಂ ಶಿಕಾಪ್ ಜಾಂವ್ ಆಮಿ ಭಾಂದ್ಚೊ ಆಮ್ಚೊಚ್
ಮುಖ್ಲೊ ರಸ್ತೊ; ಆಮಿ ಹೆರಾಂಕ್ ದಿಂವ್ಚಿ ದೇಖ್ಚ್ ಜಾಂವ್ ಆಮ್ಚೆಂ
ಮಾರ್ಗ್ದರ್ಶನ್. ದೆವಾಚ್ಯಾ ನಾಂವಾನ್ ಜಾಂವ್ಚೊ ವ್ಯಾಪಾರ್ ಬಂಧ್ ಜಾಂವ್!
ಹೆರಾಂಚ್ಯೊ ಗರ್ಚೊಚ್ ಜಾಂವ್ ಆಮ್ಚೆಂ ಮಿಸಾಂವ್; ಹೆರಾಂಚೆ ಬರೆಂಪಣ್ಂಚ್ ಜಾಂವ್ ಆಮ್ಚೆಂ ತೆಸಾಂವ್;
ಹೆರಾಂಕ್ ಕೆಲ್ಲ್ಯಾ ಕುಮ್ಕೆನ್ಂಚ್ ಆಮ್ಚೆರ್ ಪಡೊಂ ಬೆಸಾಂವ್; ಬಂಧ್ ಕರ್ಯಾಂ ಆಮಿಂ
ಪಾದ್ರಿಂಕ್ ಫಿರ್ಗಜ್ ಘರಾಂ ಭಾಂದ್ಚೆಂ ತೆಂತೆಸಾಂವ್ ಆನಿ ಆಯಿಲ್ಲ್ಯಾ ಗೆಲ್ಲ್ಯಾಂಕ್ ಕನ್ವೆಡ್ತರ್ ಕರ್ಚೆಂ
ಮಾಲ್ದಿಸಾಂವ್.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
