ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಪಾಠ್ - 4
20 ವ್ಯಾ ಶೆಕ್ಡ್ಯಾಚ್ಯೊ ಕೊಂಕ್ಣಿ ಕಾಣ್ಯೊ
ವಿಸಾವ್ಯಾ ಶೆಕ್ಡ್ಯಾಚ್ಯೊ ಕೊಂಕ್ಣಿ ಕಾಣಿಯೊ ಭಾಗ್ 1 [ಸಂಗ್ರಹಕ್: ವಲ್ಲಿ ಕ್ವಾಡ್ರಸ್]
ಚಾಲ್ತ್ಯಾ ಜಿವಿತಾಂತ್ ಘಡ್ಚ್ಯಾ ದೈನಿಕ್ ಘಡಿತಾಕ್ ಎಕಾ ಕಾಣಿಯೆ ರುಪಾರ್ ಸೊಭಾಯ್ ದೀವ್ನ್ ತ್ಯಾ ಸೊಭಾಯೆಚೊ ಪರ್ದೊ ಉಡಡ್ಚ್ಯಾ ವಗ್ತಾರ್ ವಾಚ್ಪ್ಯಾಕ್ ಏಕ್ ಲಿಸಾಂವ್ ದಿಂವ್ಚ್ಯಾ ಪಾರಂಪರಾನುಗತ್ ಜಾವ್ನ್ ಆಯಿಲ್ಲ್ಯಾ ವಿಚಾರಾಂಕ್ಚ್ ಚಡ್ತಾವ್ ಜಾವ್ನ್ ವ್ಹಾಳಯಿಲ್ಲ್ಯಾ ವಿಭಿನ್ನಾತಾಯೆಚಾ ಕಾಣಿಯಾಂಕ್ ಪುಂಜಾಯಿಲ್ಲೊ ವಿಸಾವ್ಯಾ ಶೆಕ್ಡ್ಯಾಚ್ಯೊ ಕೊಂಕ್ಣಿ ಕಾಣಿಯೊ ಭಾಗ್ 1 ಸಂಗ್ರಹ್ ಕೊಂಕ್ಣಿ ಸಾಹಿತ್ಯ್ ಭಂಡಾರಾಕ್ ಏಕ್ ಅಮೂಲ್ಯ್ ದೇಣ್ಗಿ ಖಂಡಿತ್.
ಕರ್ನಾಟಕ್ ಸರ್ಕಾರಾಚಾ ಸುವರ್ಣ ಮಹೋತ್ಸವ ಸಂದರ್ಭಿಂ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡಮಿನ್ ಅಸಲೆಂ ಏಕ್ ಸಾಹಿತ್ಯ್ ಭಂಡಾರ್ ಕೊಂಕ್ಣಿ ಲೊಕಾಚಾ ಹಾತಿಂ ದೀಂವ್ಕ್ ಯೆವ್ಜಿಲ್ಲೆಂ ಯೋಜನ್ ಖಂಡಿತ್ ಶಭಾಸ್ಕೆಕ್ ಫಾವೊ.
ವಿಸಾವ್ಯಾ ಶೆಕ್ಡ್ಯಾಚ್ಯಾ ತರ್ನ್ಯಾ ತಶೆಂ ಪರ್ನ್ಯಾ ಲೇಖಕಾಂಚಾ ಸಾಹಿತ್ಯಾಕ್, ಲಿಪಿ, ವ್ಯಾಪ್ತಿ, ಬೊಲಿ, ಸಮಾಜ್, ಗಡಿಚಾ ಭಂದಡೆಂತ್ಲೆಂ ಸುಟವ್ನ್ ಎಕಾಚ್ಚ್ ಲಿಪಿಂತ್ ಆಟಾಪುನ್ ದವರುಂಕ್ ಕೆಲ್ಲೊ ವಾವ್ರ್ ಕಾಂಯ್ ಸುಲಾಭಾಯೆಚೊ ನ್ಹಯ್. ಹೊ ವಾವ್ರ್ ಫಕತ್ತ್ ಹ್ಯಾ ಎಕಾ ಯೋಜನಾಕ್ ಲಾಗೊನ್ ಮಾತ್ರ್ ಮ್ಹಣೊನ್ ವಾಚ್ಪ್ಯಾನ್ ಹಾಂಗಾ ಸಮ್ಜೊಂಚೆಂ. ಹಾವೆಂ ಆಶೆಂ ಸಾಂಗ್ತಾನಾ ಹಾಂಗಾಸರ್ ಉಟ್ಲ್ಲೆಂ ದುರ್ಸೊಣೆಂ ನೆಗಾರುಂಕ್ ಜಾಯ್ನಾಂ. ಕೊಂಕಣಿ ಭಾಸ್ ಏಕ್ ತರೀ ಹ್ಯಾ ಭಾಶೆಕ್ ವಾಪಾರ್ಚ್ಯಾ ಹರ್ಯೆಕ್ಲ್ಯಾಕ್ ತಾಚ್ಯಾ ಕೊಂಕಣಿಚ್ಯಾ ವ್ಯಾಪ್ತಿಕ್ ತಾಚಿಚ್ ಮ್ಹಳ್ಳಿ ವ್ಯಕ್ತಿಗತ್ ಪರಿಧಿ ಆಸಾ. ಥೊಡ್ಯಾಂನಿ ಹ್ಯಾ ಪರಿಧೆ ಥಾವ್ನ್ ಭಾಯ್ರ್ ಯೇವ್ನ್ ಸಹಕರ್ಸಿಲ್ಲೆಂ ಸಂತೊಸಾಚೆಂ ತರ್, ಥೊಡ್ಯಾಂನಿ ಸಹಕರ್ಸಿನಾತ್ಲ್ಲೆಂಯ್ ಸಂತೊಸಾಚೆಂ. ಕೊಣಾಯ್ಚಾ ವ್ಯಕ್ತಿಗತ್ ಸಿಂತಿಮೆಂತಾಂಕ್ ಕೊಣೆಂಯ್ ಸಾರ್ವಜನಿಕ್ಪಣಿ ಅವಮಾನಿತ್ ಕರುಂಕ್ ಜಾಯ್ನಾಂ. ಪುಣ್ ತಾಂಚಾ ಅಸಹಕಾರಾಂತ್ ಕೊಂಕ್ಣಿ ಸಾಹಿತ್ಯ್ ಭಂಡಾರಾಕ್ ಜಾಲ್ಲೆಂ ಲುಕ್ಸಾಣ್ ಮಾತ್ರ್ ದುಃಖಾಳ್.
ಹ್ಯಾ ಸಂಗ್ರಹಾಚಾ ಸಂಗ್ರಹಕಾಚಿಂ ಪಯ್ಲಿಂ ಉತ್ರಾಂ ವಾಚ್ತಾನಾ ವಾಚ್ಪ್ಯಾಕ್ ಹ್ಯಾ ಸಂಗ್ರಹಾ ವಿಶಿಂ ಜೆರಾಲ್ ವಿಮರ್ಶಾತ್ಮಕ್ ಮಾಹಿತ್ ಮೆಳ್ತಾ. ತ್ಯಾ ಉಪ್ರಾಂತ್ ಪರ್ತ್ಯಾನ್ ತ್ಯಾಚ್ ವಾಚ್ಪ್ಯಾಕ್ ಹ್ಯಾ ಸಂಗ್ರಹಾಚಾ ವಯ್ರ್ ನವ್ಯಾನ್ ಏಕ್ ವಿಮರ್ಸೊ ಗರ್ಜ್ ಪಡ್ತಾ ಮ್ಹಳ್ಳೆಂ ಮ್ಹಾಕಾ ಭಗಾನಾ.
ಸಂಗ್ರಹಕ್ ಹ್ಯಾ ಸಂಗ್ರಹಾಚಾ ವಾವ್ರಾಂತ್ ಫಕತ್ತ್ ಏಕ್ ಸಂಗ್ರಹಕ್ ಮಾತ್ರ್ ಜಾವ್ನ್ ತಾಚ್ಯಾ ವಾವ್ರಾಚಿಂ ದೋನ್ ಉತ್ರಾಂ ತಾಣೆಂ ಫಕತ್ತ್ ಸಂಗ್ರಹಕಾಚಾ ನದ್ರೆನ್ ಉಚಾರ್ಲ್ಲಿಂ ಜಾಲ್ಯಾರ್ ಕಾಂಯ್ ವಾಯ್ಟ್ ಜಾತೆಂ ನಾ. ತೊ ಕೊಂಕ್ಣೆಚೊ ಕಿತ್ಲೋಯ್ ಜವಾಬ್ದಾರಿಯುತ್ ಸಾಹಿತಿ ಜಾಲೊ ಜಾಲ್ಯಾರೀ ಹ್ಯಾ ವೆಳಾರ್ ತೊ ಪ್ರಾಥಮಿಕ್ ಜಾವ್ನ್ ಸಂಗ್ರಹಕ್ ಪಯ್ಲೊ ಆನಿ ಸಾಹಿತಿ ಉಪ್ರಾಂತ್. ತೊ ಹಾಂಗಾಸರ್ definitive ಜಾವ್ನ್ selector ಜಾವ್ಯೆತಾ. ಪುಣ್ decisive ಜಾವ್ನ್ elector ನ್ಹಯ್. ಹಾಂವ್ ಹಾಂಗಾಸರ್ ಹೆಂಯ್ ಒಪ್ತಾಂ ಕೀ ಹ್ಯಾ ಸಂಗ್ರಹಾಚಾ ಭಾಯ್ರ್ ವಚೊನ್ ತೊ ಖುದ್ದ್ ಜಾವ್ನ್ ತಾಚ್ಯಾಚ್ ಸಂಗ್ರಹಾಚೊ ತೊಚ್ ವಿಮರ್ಶಕ್ ಜಾಂವ್ಕ್ ಸಕಾನಾ ಮ್ಹಳ್ಳೆಂಯ್ ಸತ್. ಹಾಚಿ ಗರ್ಜ್ಯ್ ನಾ. ಜಾಲ್ಯಾರೀ ತಾಚ್ಯಾ ಸಾಹಿತ್ಯಾಚಾ ಜಾಣ್ವಾಯೆಚೊ ಜವಾಬ್ದಾರಿಯುತ್ ಹುಸ್ಕೊ ಆನಿ ತಾಚಿ ದೂರ್ದೃಷ್ಟಿ ತಾಕಾಯ್ ವಿಮರ್ಶಾಚಾ ನದ್ರೆಚಿಂ ದೋನ್ ಉತ್ರಾಂ ಉಲಂವ್ಕ್ ಲಾಯ್ತಾ. ಹ್ಯಾ ಉತ್ರಾಂಕ್ ವಿಮರ್ಸೊ ಮ್ಹಣ್ಚ್ಯಾಕೀ ಸಾಹಿತಿಂಕ್ ಜಾಗ್ವಣ್ ದಿಂವ್ಚಿಂ ಜವಾಬ್ದಾರೆಚಿಂ ಉತ್ರಾಂ ಮ್ಹಣ್ಯೆತ್.
ಹ್ಯಾ ಜವಾಬ್ದಾರೆಚಾ ಉತ್ರಾಂಕ್ ಸಂಕ್ಷಿಪ್ತಾಯೆನ್ ಪರಿಶೀಲನ್ ಕರುನ್ ಹ್ಯಾ ಸಂಗ್ರಹಾಂತ್ ಆಟಾಪ್ಚ್ಯಾ ಕಾಣಿಯಾಂ ವಯ್ರ್ ಸುದೀರ್ಘ್ ವಿಮರ್ಶಾಚಿ ನದರ್ ಮಾರ್ಲಿ ತರ್ ಸರ್ವಾಂ ಪ್ರಾಸ್ ಪಯ್ಲೆಂ ಉಟೊನ್ ಯೆಂವ್ಚೆಂ ಭಳಾಧೀಕ್ ಸವಾಲ್ ಕಿತೆಂ ಮ್ಹಳ್ಯಾರ್, ಹರ್ಯೇಕ್ ಕಾಣಿಯೆಗಾರ್ ಸಾಹಿತಿ? ಹರ್ಯೆಕ್ ಕಾಣಿಯೆಗಾರ್ ಸಾಹಿತಿಚಾ ಮೆಳಾಕ್ ವರ್ಗಾತಾ? ಹೊ ಚರ್ಚಾಸ್ಪದ್ ವಿಶಯ್.
ಏಕ್ ಜವಾಬ್ದಾರಿಯುತ್ ಸಾಹಿತಿ ಪಯ್ಲೆಂ ಆಪ್ಲ್ಯಾ ಸಮಾಜೆಕ್ ವಾಚ್ತಾ. ಆಶೆಂ ವಾಚ್ತಾನಾ, ತಾಣೆಂ ಜೊಡ್ಲ್ಲ್ಯಾ ಅನುಭವಾಕ್ ಜೆದ್ನಾಂ ತೊ ಅನುಭೋಗ್ ಕರುಂಕ್ ಸಕ್ತಾ, ತೆದ್ನಾಂ ತೊ ಆಪ್ಣೆ ಜೊಡ್ಲ್ಲ್ಯಾ ಅನುಭೋಗಾಕ್, ಆಪ್ಲ್ಯಾ ಸಮಾಜೆ ಮುಕಾರ್ ಸಾಹಿತ್ಯ್ ಜಾವ್ನ್ ಅಭಿವ್ಯಕ್ತ್ ಕರ್ತಾ. ಹ್ಯಾ ಅಭಿವ್ಯಕ್ತೆ ಥಾವ್ನ್ ತಾಣೆಂ ಅನುಭೋಗ್ ಜೊಡ್ಲ್ಲಿ ಸಮಾಜ್ ಉದ್ಧಾರ್ ಜಾತಾ ವಾ ತಾಂತುಂ ಸುಧಾರಣ್ ಯೆತಾ ಮ್ಹಳ್ಳೊ ಹುಸ್ಕೊ ತಾಕಾ ಆಸಾನಾ. ಪುಣ್ ತಾಚ್ಯಾ ಜವಾಬ್ದಾರೆಕ್ ಮಾತ್ರ್ ತೊ ಜಾಣಾಂ ಆಸ್ತಾ. ಕೆದ್ನಾಂ ಜವಾಬ್ದಾರಿಯುತ್ ಸಾಹಿತಿ ತಾಣೆಂ ಜೊಡ್ಲ್ಲ್ಯಾ ಅನುಭವಾಕ್ ತೊ ಅನುಭೋಗ್ ಕರುಂಕ್ ಸಕಾನಾ, ತೆದ್ನಾಂ ತಾಕಾ ತಾಚ್ಯಾ ಅನುಭವಕ್ ಸಮಾಜೆ ಮುಕಾರ್ ದವರುಂಕ್ ಹೆರಾಂನಿ ಅಭಿವ್ಯಕ್ತ್ ಕೆಲ್ಲ್ಯಾ ಅನುಭೋಗಾಕ್ ಸಮ್ಜೊನ್ ತ್ಯಾ ಸಮ್ಜಣೆ ಪರ್ಮಾಣೆಂ ತಾಚ್ಯಾ ಸಂವೇದನಾಕ್ ಅಭಿವ್ಯಕ್ತ್ ಕರುಂಕ್ ಪಡ್ತಾ. ಹಾಂಗಾಸರ್ ಎಕಾಚ್ ವ್ಯಕ್ತಿಚಾ, ಅನುಭವಾ ಥಾವ್ನ್ ಆನ್ಭೋಗ್ ಜೊಡ್ಲ್ಲ್ಯಾ, ಹೆರಾಂ ಥಾವ್ನ್ ಆನ್ಭೋಗ್ ಜೊಡ್ಲ್ಲ್ಯಾ, ಆನಿ ಹೆಂ ದೊನೀ ನಾಸ್ತಾನಾ ಫಕತ್ತ್ ಅನುಭವ್ ಮಾತ್ರ್ ಜೊಡ್ಲ್ಲ್ಯಾ ವ್ಯಕ್ತಿಚಾ ಅಭಿವ್ಯಕ್ತೆಂತ್ ಕಿತ್ಲೆಂ ವ್ಯತ್ಯಾಸ್ ಆಸಾ ತೆಂ ಸ್ಪಶ್ಟ್ ಕಳ್ತಾ. ಹ್ಯಾಚ್ ಖಾತಿರ್ ಅನುಭೋಗ್ ಜೊಡಿನಾತ್ಲ್ಲ್ಯಾ ವ್ಯಕ್ತಿಚಾ ಅಭಿವ್ಯಕ್ತೆಕ್ ವಾಚ್ಪಾಚೊ ಆನ್ಭೋಗ್ ಚಡ್ ಗರ್ಜ್.
ವಿಸಾವ್ಯಾ ಶೆಕ್ಡ್ಯಾಚ್ಯೊ ಕೊಂಕ್ಣಿ ಕಾಣಿಯೊ _ ಹ್ಯಾ ಸಂಗ್ರಹಾಂತ್ಲ್ಯಾ ಕಾಣಿಯಾಂನಿ ಹೊ ಜವಾಬ್ದಾರಿಪಣಾಚೊ ಊಣ್ ಅವ್ವಲ್ ಜಾವ್ನ್ ಝಳ್ಕಾತಾ. ಕೊಂಕ್ಣಿ ಸಾಹಿತ್ಯ್ ಸಮಾಜ್ ಸಮ್ಜಣೆಚಾ ಆನಿ ಜವಾಬ್ದಾರೆಚಾ ಕಸಲ್ಯಾ ಪಾಂವ್ಡ್ಯಾರ್ ಉಭಿ ಆಸಾ ಮ್ಹಳ್ಳೆಂ ಸ್ಪಶ್ಟ್ ದಿಸ್ತಾ.
ಹ್ಯಾ ಸಂಗ್ರಹಾಂತ್ ಸಂಗ್ರಹ್ ಕೆಲ್ಲ್ಯೊ ಕಾಣಿಯೊ, ತ್ಯಾ ತ್ಯಾ ಲೇಖಕಾಂಚಿ ಆಪುರ್ಭಾಯೆಚಿ ಕಾಣಿ ನ್ಹಯ್ ಆಸ್ಯೆತ್ ವಾ ಹ್ಯಾ ಸಂಗ್ರಹಾಂತ್ಲ್ಯೊ ಸರ್ವ್ ಕಾಣಿಯೊ ಶ್ರೇಷ್ಟ್ ಕಾಣಿಯೊ ನ್ಹಯ್ ಆಸ್ಯೆತ್ ಮ್ಹಳ್ಳ್ಯಾ ಸತಾಕ್ ಖುದ್ದ್ ಸಂಗ್ರಹಕ್ ಒಪುನ್ ಘೆತಾ. ತಾಚ್ಯಾ ಹ್ಯಾ ಪ್ರಾಮಾಣಿಕ್ಪಣಾಚಾ ಸತಾಕ್ ಹಾಂವ್ಯೀ ಮಾಂದುನ್ ಘೆತಾಂ. ತರೀ ಹ್ಯಾ ಸಂಗ್ರಹಾಂತ್ ಆಟಾಪಿಲ್ಲ್ಯೊ ಕಾಣಿಯೊ ವಾಚ್ತಾನಾ ಕೊಂಕ್ಣಿ ಲೇಕಕ್ ಜವಾಬ್ದಾರೆಚಾ ಹಂತಾರ್ ಕೊಂಕ್ಣಿ ಸಮಾಜೆ ಭಾಯ್ರ್ಯ್ ಏಕ್ ಸಮಾಜ್ ಆಸಾ ಮ್ಹಳ್ಳೆಂಚ್ ನೆಣಾಂತ್ ಮ್ಹಳ್ಳೆಂ ಪ್ರತ್ಯಕ್ಷ್ ದಿಸೊನ್ ಯೆತಾ. ದಿಸ್ಪಡ್ತ್ಯಾ ಜಿವಿತಾಂತ್ಲ್ಯಾ ಚಾಲ್ತ್ಯಾ ಘಡಿತಾಂಕ್ instant ಕಾಣಿಯೊ ಜಾವ್ನ್ ವಾಚ್ಪ್ಯಾಂಕ್ ದಿಂವ್ಚ್ಯಾ ಥೊಡ್ಯಾ ಲೇಕಕಾಂಚಾ ಬೇಜವಾಬ್ದಾರಿ ಕಾಮಾಚೆರ್ ಪ್ರಭಾವಿತ್ ಜಾವ್ನ್ ತ್ಯಾ ಪ್ರಭಾವಾ ಥಾವ್ನ್ ಭಾಯ್ರ್ ಯೇಂವ್ಕ್ ಸಕಾನಾತ್ಲ್ಲೆ ಲೇಕಕ್ಚ್ ಚಡ್ ಝಳ್ಕಾತಾತ್. ಹ್ಯಾಚ್ ಲೇಕಕಾಂಚಿ ದುಸ್ರಿ ಕಾಣಿ ಉತ್ತೀಮ್ ಆಸ್ಲ್ಲೊ ದಾಖ್ಲೊ ಖಂಡಿತ್ ಆಸ್ಯೆತಾ. ಪುಣ್ ಹಾಂಗಾಸರ್ ತೊ ಗರ್ಜೆ ಭಾಯ್ಲೊ ವಿಶಯ್.
ಹ್ಯಾ ಸಂಗ್ರಹಾಂತ್ ಆಟಾಪಿಲ್ಲ್ಯಾ ಕಾಣಿಯಾಂನಿ, ಫಕತ್ತ್ ಆಪ್ಲೆಂ ಘರ್, ಆಫೀಸ್, ಸೆಜಾರ್, ಬಜಾರ್, ಸೊಡ್ಲ್ಯಾರ್ ಘಾಟ್, ಬೊಂಬಯ್ ಆನಿ ಗಲ್ಫ್! ಇತ್ಲೆಂಚ್! ಹ್ಯಾ ಭಾಯ್ರ್ ಸಂಸಾರ್ಯ್ ನಾ! ಸಮಾಜ್ಯ್ ನಾ! ನವೀನ್ಯತಾಯ್ ನಾ! ವೈವಿಧ್ಯತಾಯ್ ನಾ! ಪುಣ್ ವಿಭಿನ್ನತಾ ಆಸಾ ಮ್ಹಳ್ಳ್ಯಾ ಸತಾಕ್ ಹಾಂವ್ ಒಪ್ತಾಂ. ಹಾಕಾ ಕಾರಾಣ್ ಸೊದ್ಚೆಂ ತರ್, ಜ್ಯಾ ಕೊಕ್ಣಿಂ ಲೇಕಕಾಚಾ ಕೊಂಕಣಿ ವ್ಯಾಪ್ತೆ ಭಿತರ್ ಖಂಯ್ಚರ್ ಕೊಂಕಣಿ ಭಾಸ್ ಸಮಾಜೆಚಾ ಇತರ್ ಭಾಶೆ ಸವೆಂ ವ್ಯಾವಹಾರಿಕ್ ಆನಿ ಆಫೀಶಿಯಲ್ ರುಪಾಂತ್ ಸಂಘರ್ಶಾಂತ್ ದೆಂವ್ಚ್ಯಾ ಮಟ್ಟಾಕ್ ಪಾವೊಂಕ್ ನಾ ಥಂಯ್ಚರ್ ಹೊ ಊಣ್ ಚಡ್ತಾವ್ ಮಾಪಾನ್ ಜಳ್ಕಾತಾ. ಥೊಡ್ಯಾಂಚಾ ಜವಾಬ್ದಾರಿಯುತ್ ವಾಚ್ಪಾನ್ ಹ್ಯಾ ಊಣಾಕ್ ಪಯ್ಸ್ ಕೆಲ್ಲೆಂ ಸಾರ್ಕೆಂ ಝಳ್ಕಾತಾ.
ಹ್ಯಾ ಮಧೆಂ ಹ್ಯಾ ಸಂಗ್ರಹಾಂತ್ ವೈಶಿಷ್ಟಾಯೆನ್ ಭರ್ಲ್ಲ್ಯೊ, ಆಪುರ್ಭಾಯೆಚ್ಯೊ ಕಾಣಿಯೊ ಆಸಾತ್. ಪುಣ್ ತ್ಯೊ ಫಕತ್ತ್ ಬೊಟಾಂನಿ ಮೆಜ್ಯೆತ್ ತಸಲ್ಯೊ ಮ್ಹಳ್ಳೆಂ ವಿಶಾದನೀಯ್. ಹ್ಯಾ ಕಾಣಿಯಾಂಕ್ analyse ಕರುನ್ ತಾಂಚಾ evaluation ಕ್ ಪ್ರಸ್ತುತ್ ಕರುಂಕ್ ಹ್ಯಾ ಲೇಖನಾಂತ್ ಆವ್ಕಾಸ್ ನಾತ್ಲೆಲ್ಯಾನ್ ವಾಚ್ಪ್ಯಾನ್ ಹ್ಯಾ ಲೇಖನಾಕ್ ಫಕತ್ತ್ ಖೊಡ್ ಮ್ಹಣೊನ್ ಮಾಂದುನ್ ಘೆಂವ್ಚಿ ಚೂಕ್. ಆಮ್ಚೆಂ ಗ್ರೇಸ್ತ್ಪಣ್ ದಾಖಂವ್ಚ್ಯಾ ಪಯ್ಲೆಂ ಆಮ್ಚ್ಯಾ ಉಣ್ಯಾಪಣಾಕ್ ಪಯ್ಲೆಂ ಭರ್ತಿ ಕರ್ಯಾಂ. ಆಶೆಂ ಮ್ಹಣ್ತಾನಾ ಹಾಂಗಾಸರ್ ಫಕತ್ತ್ ಉಣೆಪಣ್ ಮಾತ್ರ್ ದಾಖಂವ್ಚೊ ಇರಾದೊ ಮ್ಹಜೊ ನ್ಹಯ್. ತೆಂ ಉಣೆಂಪಣ್ ಕಶೆಂ ಮ್ಹಳ್ಳೆವಿಶಿಂ ಚಿಂತ್ಚಿ ಗರ್ಜ್.
ಹ್ಯಾ ಸಂಗ್ರಹಾಂತ್ ಕೊಶೆಡ್ದಾಚಿ ಪ್ರಾಮಾಣಿಕತಾ ನಾಸ್ತಾನಾ ವ್ಹಾಳಯಿಲ್ಲೆಂ ಸಾಹಿತ್ಯ್, ಸ್ವಾರ್ಥಿ ವಿಚಾರ್, ದೇವ್ ಧರ್ಮ್ ಆನಿ ತಾಚೆ ಪೂಜಾರಿ, ಅಸ್ವಸ್ಥ್ ನದರ್, ಆನಿ ಪಾರಂಪರಾನುಗತ್ ಪಾತ್ಯೆಣಿ ಮ್ಹಳ್ಳ್ಯಾ ಚೌಕಟ್ಟಾ ಭಿತರ್ ಕಯ್ದ್ ಜಾವ್ನ್ ’ಅಯ್ಯೋ’ ಮ್ಹಣ್ಚ್ಯಾಬರಿ ಖರ್ಶೆತಾ. ಸಾಹಿತ್ಯಾಚೆಂ ರಚನ್ ಸ್ರಜನಾತ್ಮಕ್ ರಿತಿನ್ ವ್ಹಾಳವ್ನ್, ತಾಂತುಂ ವೈವಿಧ್ಯತಾ ಹಾಡ್ಚ್ಯಾ ಕಲೆಚ್ಯಾ ಶ್ಯಾಥಿಯೆಕ್ ಸಾಹಿತಿಂನಿ ಗಳ್ಸುಂಚಾ ಬದ್ಲಾಕ್, ಸ್ವಂತ್ ಮಾಂದ್ಲ್ಲ್ಯಾ ವಿಚಾರಾಂಕ್ ವಾ ಸಮಾಜೆಚಾ ಭಂದಡೆ ಭಿತರ್ ಕಯ್ದ್ ಕರ್ಚ್ಯಾ ವಿಚಾರಾಂಕ್ಚ್ ಚಡ್ ಮಾಂದುನ್ ಘೆವ್ನ್ ಚಲ್ಚಾಬರಿ ದಿಸ್ತಾ. ಹ್ಯಾ ಭಾಯ್ರ್ ವಚೊನ್ ಕೊಶೆಡ್ದಾಚಾ ಪ್ರಾಮಾಣಿಕ್ಪಣಾಂತ್ ಸಮನ್ವಯ್ ದೀಶ್ಟ್ ವಾಪಾರ್ಚಿ ಭುದ್ವಂತ್ಕಾಯ್ ವಾ ತೀವ್ರ್ ದೃಷ್ಟಿ ಜೊಕುನ್ ಸಮಾಜೆಂತ್ಲ್ಯಾ ಜಿವಿತಾಕ್ ಪಾರ್ಕುಂಚಿ ಜವಾಬ್ದಾರಿಯುತ್ ಶ್ಯಾಥಿ ಉಪಯೋಗ್ ಕೆಲ್ಯಾ ಮ್ಹಳ್ಳ್ಯಾಚೆರ್ ದುಭಾವ್ ಮಾರ್ತಾ.
ಕಥಾ ಮ್ಹಳ್ಯಾರ್ ಫಕತ್ತ್ ಸಿಂತಿಮೆಂತಾಂ ಜಾಗಂವ್ಚಿಂ ಘಡ್ಪಾಂ ಘಡ್ಚಿ ಕಲಾ ವಾ ಸೆಜಾರ್ಚಾ ವ್ಯಕ್ತಿಚಾ ಜಿಣಿಯೆಕ್ ಉಪಯೋಗ್ಸುನ್ ಸಾರ್ವಜನಿಕ್ ಲಿಸಾಂವ್ ದಿಂವ್ಚಿ ಕಲಾ ಮ್ಹಣೊನ್ ಚಡ್ತಾವ್ ಸಾಹಿತ್ ಪಾತ್ಯೆಲ್ಯಾತ್ ತಶೆಂ ದಿಸ್ತಾ. ಹೊ ಖರೊಚ್ ಆತ್ಮ್ಯಾಘಾತ್! ಹ್ಯಾ ಆತ್ಮ್ಯಾಘಾತಾಚಿ ಕಿಂಚಿತ್ ಪರ್ವಾ ಕರಿನಾಸ್ತಾನಾ, ಪಿಳ್ಗೆ ಥಾವ್ನ್ ಪಿಳ್ಗೆ ಮಧೆಂ ಉಬ್ಜೊಂಚಾ, ಪರಿಗತೆನ್ ಉಭೆ ಕರ್ಚಾ ವಿಚಾರಾಂಕ್ ಸಟ್ಟ್ ಕರುನ್ ಪಾರಂಪರಿಗತೆಂತ್ ಬದ್ಲುನ್, ಸಮಾಜೆಂತ್ ಆಪುಣ್ ಸುದಾರಣ್ ಹಾಡ್ತಾಂ ಮ್ಹಳ್ಳ್ಯಾ ಭೃಮಿದೆಂತ್ ಸಮಾಜೆಂತ್ಲ್ಯಾ ಜಿವಿತಾಕ್ಚ್ ವಿಸ್ರೊನ್ ಸೊಡ್ಚೆಂ, ಕೊಂಕ್ಣಿ ಕಥಾ ಸಂಸಾರಾಂತ್ಲೆಂ ಏಕ್ ಮಹಾನ್ ದುರಂತ್ ಜಾಲ್ಯಾರ್, ಪ್ರಸ್ತುತ್ ಸಮಾಜೆಚಾ ಪರಿಗತೆಕ್ ವಿಸ್ರೊನ್, ಆತ್ಮಸಾಕ್ಶೆಚಾ ವಿರೋಧ್, 1960 ಇಸ್ವೆಚಾ ಸಮಾಜೆಚಾ ಜಿವಿತಾಬರಿ ಆಯ್ಚಾ ಪಿಳ್ಗೆಚೆಂಯ್ ಜಿವಿತ್ ತ್ಯಾಚ್ ರಿತಿ ರಿವಾಜೆ, ತ್ಯಾಚ್ ಚಾಲ್ ಚಮ್ಕಾಣೆ, ತ್ಯಾಚ್ ಆಡಂಬರಾಚೆಂ, ತ್ಯಾಚ್ ದೇವ್ ಧರ್ಮಾಚೆಂ ಆಸೊಂಕ್ ಜಾಯ್ ಮ್ಹಳ್ಳ್ಯಾಚೆಂ ಲಿಸಾಂವ್ ದಿಂವ್ಚೆಂ, ಆಪ್ಣಾಕ್, ಸಂಪೊನ್ ಗೆಲ್ಲ್ಯಾ ಆಪ್ಲ್ಯಾ ಮಾಲ್ಘಡ್ಯಾಂಚಿ ಆನಿ ದೇವ್ ಧರ್ಮಾಚಿ ಪರ್ವಾ ಆಸಾ ಮ್ಹಳ್ಳ್ಯಾಚಿ ನಾಟಕೀಯ್ ರುಜ್ವಾತ್ ದಿಂವ್ಚಿ ಕೊಂಕ್ಣಿ ಕಥಾ ಸಂಸಾರಾಂತ್ಲೆಂ ಆನ್ಯೇಕ್ ಮಹಾನ್ ದುರಂತ್.
ಕಾಣಿಯೆಕ್ ಉಪಯೋಗ್ಸಿಲ್ಲ್ಯಾ ಕಥಾ ವಸ್ತು ಥಾವ್ನ್ ವಾಚ್ಪ್ಯಾಕ್ ಲಿಸಾಂವ್ ದಿಂವ್ಚೆಂ, ಗರ್ಜ್ ಪಡ್ಲ್ಯಾರ್ ಶೆರ್ಮಾಂವ್ ಸಾಂಗ್ಚೆಂ, ವಾಚ್ಪ್ಯಾಕ್ ಭಲಾತ್ಕಾರೆನ್ ಬೂದ್ಬಾಳ್ ದಿಂವ್ಚೆಂ ಪ್ರಯತ್ನ್ ಜಾತಾ ಶಿವಾಯ್ ಕಾಣಿಯೆಕ್ ಆನಿ ವಾಚ್ಪ್ಯಾಕ್ ಎಕಾಮೆಕಾ ಅಗೋಚರ್ ಜಾವ್ನ್ ಅನಾಪೇಕ್ಶಿತ್ ಅಚಾನಕ್ ಸಂವೇದನ್ ಕರ್ಚ್ಯಾಂತ್ ಸಲ್ವಾತಾ. ಹ್ಯಾಚ್ ಖಾತಿರ್ ಕಾಣಿ ಮ್ಹಳ್ಯಾರ್ ದಿಸ್ಪೊಡ್ತ್ಯಾ ಜಿವಿತಾಂತ್ಲಿ ವೈಯುಕ್ತಿಕ್ ಚಿಂತ್ಪಾಚಿ ಘಟನಾವಳ್ ನ್ಹಯ್. ಜಶೆಂ ಖಬ್ರೆ ಪತ್ರಾಂತ್ಲ್ಯಾ ವರ್ದೆಬರಿ. ಜಿಣಿಯೆಂತ್ ಕಾಣಿ ಏಕ್ ಜಿವಿತ್ ಜಾವ್ನ್ ಪರ್ತ್ಯಾಕ್ ಪರ್ತ್ಯಾಕ್ ವ್ಯಕ್ತಿಗತ್ ರುಪಾನ್ ದೊಳ್ಯಾಂ ಮುಕಾರ್ ಯೇಂವ್ಕ್ ಜಾಯ್.
ಹ್ಯಾ ಸಂಗ್ರಹಾಂತ್ ಕೊಂಕ್ಣಿ ಮಾತಿಯೆಚೊ ಪರ್ಮಳ್ ಆಸಾ. ಹೊ ಪರ್ಮಳ್ ವೈಶಿಷ್ಟಾಯೆನ್ ಭರೊನ್ ಹೆರಾಂಕ್ ಮಾಹಿತಿ ಜಾಲ್ಲೊ ಜಾಲ್ಯಾರ್ ಚಡ್ ಬರೆಂ ಆಸ್ತೆಂ. ವಿಭಿನ್ನತಾ ವೈಶಿಷ್ಟಾಯೆಕ್ ಜಿಕೊಂಕ್ ಸಕೊಂಕ್ ನಾ. ಸಂಭಂಧಾಚೆ ಗಾಂಚ್, ಮಾನ್ ಅಭಿಮಾನ್, ಸಂಸ್ಕೃತಿ, ರಿತಿ ರಿವಾಜಿ, ದೇವ್ ಧರ್ಮ್ ಹಾಂಚೆಂ ನಿದರ್ಶನ್ ಆಸಾ. ಹೆಂ ನಿದರ್ಶನ್ ಹೆರ್ ಸಮಾಜೆಂಕ್ ಸಮ್ಜಣಿ ಜಾವ್ನ್ ಉದೆಲ್ಲೆಂ ಜಾಲ್ಯಾರ್ ಚಡ್ ಬರೆಂ ಆಸ್ತೆಂ.
ಭುಕ್, ಆಶಾ, ತೃಪ್ತಿ, ಸೊದ್ನಾಂ ತಸಲ್ಯಾ ವೈಯುಕ್ತಿಕ್ ತರೀ ಸಾದ್ಯಾ ವಿಶಯಾಂ ವಯ್ರ್ ಆನ್ವೇಶಣ್ ಚಲಯಿಲ್ಲೆಂ ಭಾರಿಚ್ಚ್ ಉಣೆಂ. ಸ್ತ್ರೀ ಸಂವೇದನ್, ಬಾಳ್ ಶೋಶಣ್, ಯೌವಣ್ ಶೋಶಣ್, ಹ್ಯಾ ವಿಶಯಾಂ ವಯ್ರ್ ಗಂಭೀರಾತಾಯ್ ನಾ. ಮೋಗ್ ಆನಿ ಭೋಗ್ ಎಕಾಚ್ಚ್ ನಾಣ್ಯಾಚಾ ದೋನ್ ಮುಖಾಂಬರಿ. ಹಾಂಚಾ ಶಿವಾಯ್ ಜಿವಿತಾಕ್ ಅರ್ಥ್ ನಾ. ಅಸಲ್ಯಾ ವಿಶಯಾಂ ವಯ್ರ್ ವೈವಿಧ್ಯಮಯ್ ಸಂಶೋದನ್ ಚಲಯಿಲ್ಲೆಂ ನಾ. ದೊನೀ ಸಬ್ದಾಂಕ್ ಪಾರಂಪರಿಕ್ ಅರ್ಥಾನ್ಚ್ ಸೊಭಯಿಲ್ಲೆಂ ಚಡ್. ತತ್ವಾಂ ಆನಿ ಸಂಘರ್ಶಾಕ್ ದೆವೊಂಕ್ ಪ್ರಯತ್ನ್ ಕೆಲ್ಲೆಂ ನಾ. ಆಸ್ಲ್ಯಾರೀ ತಾಂತುಂ ಜಡಾಯ್ ಉಣಿ. ಭೋವ್ಶ್ಯಾ ಸಮಾಜೆಚಿ ಭಿರಾಂತ್! ಹ್ಯಾಚ್ ಖಾತಿರ್ ಚಡ್ತಾವ್ ಸಾಹಿತ್ಯ್ ಪಾದ್ರಿ ಮಾದ್ರಿಂಚಾ ಲೊಬಾಬರಿ ನಿತಳ್ ಧವೆಂ ಆನಿ ಉತಳ್ non traanspaerent ಜಾವ್ನ್ ಉರ್ಲಾಂ. ಪರ್ಕಿ ಭಾಶೆಚಾ ಸಾಹಿತಿಂಚಾ ಉತ್ರಾಂಚೆಂ ವ್ಯಾಖ್ಯಾಕ್ ದೀವ್ನ್ ಸಾಹಿತ್ಯ್ ರಚ್ಚ್ಯಾ ಸಾಹಿತಿಂಚಾ ಸಾಹಿತ್ಯಾಂತ್ ಸಯ್ತ್ ಉತ್ರಾ ಸೂತ್ರ್ (ಮಾಲ್ಘಡ್ಯಾಂಚಿ ಸಾಂಗ್ಣಿ) ವಾಚ್ಪ್ಯಾಕ್ ಲಿಸಾಂವ್ ದಿತಾ.
ಅಖ್ಖೊ ಸಂಸಾರ್ಚ್ ಭಾರತಾಕ್ soಜಿಣ sಣಚಿಣe ಮ್ಹಣೊನ್ ವೊಲಾಯ್ತಾ. ಹಾಂಗಾಚರ್ ಏಕ್ ಚಲಿ ರಡ್ತಾ ಚಡ್ ಆಬಿ ಝಗಡ್ತಾ ಉಣೆಂ. ಹಾಂಗಾಚರ್ ಏಕ್ ಚಲೊ ಛಿomಠಿಡಿomise ಕರ್ತಾ ಚಡ್ ಪುಣ್ ಸಂಘರ್ಶಾಕ್ ರಾವ್ತಾ ಉಣೊ. ಆಶೆಂ ಆಸ್ತಾಂ ಅಸಲ್ಯಾ ಸಮಾಜೆಂತ್ ಜಿಯೆಂವ್ಚಾ ಖಂಯ್ಚಾಯ್ ಸಾಹಿತಿನ್ ಸಮಾಜೆಕ್ ದೆಖ್ಚ್ಯಾ ನದ್ರೆಂತ್ ಅಪ್ರಾಮಾಣಿಕ್ ಜಾಂವ್ಕ್ ನುಜೊ. ಸಾಹಿತಿನ್ ತಾಚ್ಯಾ ಸಾಹಿತ್ಯಾ ದ್ವಾರಿಂ ವಾಚ್ಪ್ಯಾ ಸವೆಂ ಸಂಭಾಶಣ್ ಚಲಂವ್ಕ್ ಜಾಯ್. ಅಸಲೆಂ ಸಂಭಾಶಣ್ ಕೆದ್ನಾಂಚ್ ಭಾಶಣ್ ಜಾವ್ನ್ ಉರಾನಾ. ಬಗಾರ್ ಸಂವೇದನ್ ಜಾತಾ. ಹ್ಯಾಚ್ ಖಾತಿರ್ ಸಾಹಿತಿನ್ ವಾಚ್ಪ್ಯಾಚಾ ಮನೋಸ್ಥಿತಿಚಿ ಆನಿ ವಾಚ್ಪ್ಯಾಚಾ ಸಾಮಾಜಿಕ್ ಪರಿಗತೆಚಿ, ವಿಚಾರಾಂನಿ ಜವಾಬ್ದರಿ ಘೆಂವ್ಕ್ ಜಾಯ್. ವಾಚ್ಪ್ಯಾಚಾ ಸಮಾಜೆಚಿ ಪರಿಗತ್ ವಾ ವಾಚ್ಪ್ಯಾಚಾ ಕುಟ್ಮಾಚೆ ಸಂಸ್ಕಾರ್ ಸಾಹಿತಿಚಾ ಸಾಹಿತ್ಯಾ ಥಾವ್ನ್ ಬದ್ಲುಂಕ್ ಸಾದ್ಯ್ ನಾ. ಸಾಹಿತ್ಯ್ ಸಮಾಜೆಚೊ ಏಕ್ ವಾಂಟೊ ಮಾತ್ರ್. ತೆಂ ಸಮಾಜೆಂತ್ ರಿವೊಲ್ಯೂಶನ್ ಹಾಡ್ಚ್ಯಾ ಪ್ರಾಸ್ ಪಯ್ಲೆಂ. ಭಾಶೆಂತ್ ರಿವೊಲ್ಯೂಶನ್ ಹಾಡ್ತಾ. ಸಾಹಿತ್ಯಾಕ್ ಭಾಸ್ ಪ್ರಾಥಮಿಕ್ ಆನಿ ಸಮಾಜ್ ಮಾಧ್ಯಮಿಕ್. ಹ್ಯಾಚ್ ಖಾತಿರ್ ಜೆಂ ಸಾಹಿತ್ಯ್ ವ್ಯಕ್ತಿಗತ್ ರುಪಾನ್ ವಾಚ್ಪ್ಯಾಕ್ ದೈವಿಕ್ ಸಂವೇದನ್ ಕರ್ಚ್ಯಾಂತ್ ಯಶಸ್ವಿ ಜಾಲೆಂ ತರೀ ತೆಂ ಯಶಸ್ವಿ ಸಾಹಿತ್ಯ್. ಜರೀ ತೆಂ ವಾಚ್ಪ್ಯಾಚಾ ಸಾಮಾಜಿಕ್ ಪರಿಗತೆಕ್ ಲಾಗು ಜಾಯ್ನಾ ತರೀ. ಹೆಂ ಪಾರ್ಕುಂಚಿ ಸೂಕ್ಷ್ಮ್ ನದರ್ ವಿಮರ್ಶಕಾಕ್ ಆಸೊಂಕ್ ಜಾಯ್.
ವಿಮರ್ಶಕ್ ತಾಚ್ಯಾ ವಯುಕ್ತಿಕ್ ಚಿಂತ್ಪಾಂತ್ ಖಂಯ್ಚಾಯ್ ವಿಚಾರಾಂಕ್ ಹೊಂದೊನ್ ರಾವೊಂಕ್ ಸಕ್ತಾ. ತೊ ಸಾಹಿತಿ ಜಾಲೊ ಜಾಲ್ಯಾರೀ ತಾಕಾ ಮಾನ್ವಾಲ್ಲ್ಯಾ ವಿಚಾರಾಂಕ್ ತೊ ಅನುರಕ್ತ್ ಜಾವ್ನ್ ಸಾಹಿತ್ಯ್ ರಚುಂಕ್ ಸಕ್ತಾ. ಪುಣ್ ತೊ ಏಕ್ ವಿಮರ್ಶಕ್ ಜಾತಾನಾ ತಾಣೆಂ ಆಪ್ಣಾಕ್ಚ್ ಬಗ್ಲೆಕ್ ದವರುನ್, ಸಾಹಿತ್ಯಾಕ್, ತಾಚ್ಯಾ ಸಾಹಿತಿಚಾ ಆನಿ ತಾಚ್ಯಾ ಪಾಟ್ಲ್ಯಾನ್ ಆಸ್ಚ್ಯಾ ತ್ಯಾಚ್ ಸಾಹಿತಿಚಾ ಅಗೋಚರ್ ಜವಾಬ್ದಾರೆಕ್ ಮುಕಾರ್ ದವರುನ್ ತಾಣೆಂ ರಚ್ಲ್ಲೆಂ ಸಾಹಿತ್ಯ್ ಕಿತ್ಲೆಂ ಪ್ರಭಾವಿತ್ ಆಸಾ ಮ್ಹಳ್ಳ್ಯಾಚೆಂ ಪೈಸಲ್ ದೀಂವ್ಕ್ ಜಾಯ್ ಶಿವಾಯ್ ವಿಮರ್ಶಕಾಚಾ ಆಪ್ಲ್ಯಾ ವ್ಯಕ್ತಿಗತ್ ವಿಚಾರಾಂಕ್ ಆನಿ ಸಾಹಿತಿಚಾ ಸಾಹಿತಿಕ್ ವಿಚಾರಾಂಕ್ ಮುಕಾರ್ ದವರುನ್ ನ್ಹಯ್. ಹೆಂ ವಿಮರ್ಶಕಾಚಾ ದೂರ್ದೃಷ್ಟಿ ಆನಿ ಸೂಕ್ಷ್ಮ್ ದೃಷ್ಟಿಚೆಂ ಉಣೆಂಪಣ್ ಉಗ್ಡಾಪೆಂ ಕರ್ತಾ. ಹ್ಯಾ ವಿಶಯಾಂತ್ ಹಾವೆಂ ಜಾತಾ ತಿತ್ಲಿ ಮ್ಹಿನತ್ ಕೆಲ್ಯಾ. ಹ್ಯಾ ಖಾತಿರ್ ಹ್ಯಾ ಕಾಣಿಯೆ ಸಂಗ್ರಹಾಂತ್ಲ್ಯಾ ಕಾಣಿಯೆಗರಾಂಚ್ಯೊ ಇತರ್ ಕಾಣಿಯೊ ಪಾಸೊನ್ ಉಡಾಸ್ ಕಾಡುನ್ ಹಾವೆಂ ವ್ಹಾರಾವ್ನ್ ಪಳೆಲ್ಯಾತ್. ಹ್ಯಾ ಮ್ಹಜ್ಯಾ ಮ್ಹಿನತೆಂತ್ ಹಾಂವ್ ಕಿತ್ಲೊ ಯಶಸ್ವಿ ಜಾಲಾಂ ತೆಂ ಹ್ಯಾ ಸಂಗ್ರಹಾಂತ್ಲೆ ಸಾಹಿತಿ ಜಾಣಾಂ ಜಾತೆಲೆ.
ಸಂಗ್ರಹಾಚೆಂ ಕವರ್ ಡಿಸೈನ್ ಅರ್ಥಾಭರಿತ್ ಆಸಾ. ಸಂಗ್ರಹಾಂತ್ ಥೊಡಿಂ ಪಾನಾಂ ಚುಕೊನ್ ಗೆಲ್ಯಾಂತ್. ಭೋವ್ಶ್ಯಾ ಹಿ ಚೂಕ್ ಮ್ಹಜ್ಯಾ ಹಾತಾಕ್ ಆಯಿಲ್ಲ್ಯಾ ಸಂಗ್ರಹಾಂತ್ ಮಾತ್ರ್ ಜಾಲ್ಯಾ ಜಾಂವ್ಕ್ ಸಕ್ತಾ. ಟೈಪಿಂಗಾಂತ್ ಘುಸ್ಪಡ್ ಗೊಂದೊಳ್ ಆಸಾ. ಭೋವ್ಶ್ಯಾ ಹ್ಯಾ ಸಂಗ್ರಹಾಕ್ ಏಕ್ ಸಂಪಾದಕ್ ನಾತ್ಲ್ಲೊ ಹ್ಯಾ ಘುಸ್ಪಡ್ ಗೊಂದೊಳೆಕ್ ಕಾರಾಣ್ ಜಾಂವ್ಕ್ ಪುರೊ. ಸಂಗ್ರಹಕಾನ್ ಕಾಣಿಯೊ ಸಂಗ್ರಹ್ ಕರುನ್ ದಿಲ್ಲ್ಯಾ ಮ್ಹಿನತೆಕ್ ಜರ್ ತರ್ ಎಕಾ ಸಂಪಾದಕಾನ್ ಸಂಪಾದಕ್ಪಣಾಚೊ ವಾವ್ರ್ ಸಾಂಬಾಳ್ಲ್ಲೊ ಜಾಲ್ಯಾರ್ ವಾ ಖುದ್ದ್ ಸಂಗ್ರಹಕಾನ್ಚ್ ಸಂಗ್ರಹಕಾಚೊ ಸಂಪಾದಕ್ ಜಾವ್ನ್ ವಾವ್ರಾಚಿ ಜವಾಬ್ದಾರಿ ಘೆತ್ಲ್ಲಿ ಜಾಲ್ಯಾರ್, ಹ್ಯಾ ಸಂಗ್ರಹಾಂತ್ಲೆ ಸಭಾರ್ ಊಣ್ ಉಣೆ ಕರ್ಯೆತೆ. ಕೊಂಕಣಿಚಾ ಹರ್ ಪ್ರಾಂತ್ಯಾಂತ್ಲ್ಯಾ ಬೋಲಿಂತ್ಲೆಂ ಸಾಹಿತ್ಯ್ ಹ್ಯಾ ಸಂಗ್ರಹಾಂತ್ ಜಮೊ ಜಾಂವ್ಕ್ ಪಾವೊಂಕ್ ನಾ ತೆಂ ವಿಶಾದನೀಯ್. ತರೀ ಅಸಲೊ ಏಕ್ ಕಾಣಿಯಾಂ ಸಂಗ್ರಹ್ ಪರ್ಗಟ್ ಕೆಲ್ಲ್ಯಾ ಕರ್ನಾಟಕ್ ಕೊಂಕಣಿ ಸಾಹಿತ್ಯ್ ಅಕಾಡಮಿಕ್ ಶಭಾಸ್ಕಿ ಫಾವೊ. ತಶೆಂಚ್ ಹ್ಯಾ ಸಂಗ್ರಹಾಚಾ ಸಂಗ್ರಹಕಾಚೊ ಮ್ಹಿನತೆಭರಿತ್ ವಾವ್ರ್ _ ತೆಂಯ್ ಪರ್ಗಾಂವಾಂತ್ ರಾವೊನ್ ಕಾಣಿಯಾಂಕ್ ಜಮಯಿಲ್ಲೊ ವಾವ್ರ್ ಮಾನಾನ್ ಲೆಕ್ಚ್ಯಾ ತಸಲೊ. ಹ್ಯಾ ಸಂಗ್ರಹಾಚಾ ದೊನೀ ಸಂಗ್ರಹಕಾಂಕ್ ಮಾನಾಚೊ ಪ್ರಣಾಮ್.
ಖಳವ್ಣಿ: ಹ್ಯಾ ಲೇಖನಾಂತ್ ಸ್ಪಶ್ಟ್ ಉಲ್ಲೇಖ್ ಕರುನ್ ವಿವರಾಣಾತ್ಮಕ್ ವಿಮರ್ಸೊ ದಿಂವ್ಚಾ ತಸಲ್ಯೊ ಕಾಣಿಯೊ ಹ್ಯಾ ಸಂಗ್ರಹಾಂತ್ ಆಸಾತ್. ಹ್ಯಾಚ್ ಕಾಣಿಯಾಂ ವರ್ವಿಂ ಕೊಂಕಣಿ ಸಾಹಿತ್ಯಾಚೊ ಮಾನ್ ಉರೊಂಕ್ ಪಾವ್ಲಾ ಮ್ಹಳ್ಳೆಂ ಅಪುಟ್ ಸತ್. ಅಸಲ್ಯಾ ಕಾಣಿಯಾಂಚೆಂ ವಾ ತಾಂಚ್ಯಾ ಲೇಕಕಾಚೆಂ ನಾಂವ್ ಹಾವೆಂ ಉಲ್ಲೇಖ್ ಕರುಂಕ್ ನಾತ್ಲ್ಲೆಂ ಕಾರಾಣ್ಯ್ ಭೋವ್ ಸೊಂಪೆಂ.
1. ಕೊಂಕ್ಣಿ ಸಾಹಿತ್ಯ್ ಸಮಾಜ್ ಹ್ಯಾ ವೆಳಾರ್ ನಾಜೂಕ್ ಪರಿಗತೆಂತ್ ಚಲ್ತಾ ಜಾಲ್ಲ್ಯಾನ್ ಹಾವೆಂ ಹಾಂಗಾಸರ್ ನಾಂವಾಂ ಉಲ್ಲೇಖ್ ಕೆಲ್ಲ್ಯಾಂತ್ ಲಿಪಿ, ಬೋಲಿ, ವ್ಯಾಪ್ತಿ, ಸಮಾಜ್, ಗಡ್, ಹ್ಯಾ ಮಧೆಂ ವಯುಕ್ತಿಕ್ ವಾ ವ್ಯಕ್ತಿಗತ್, ಜೆರಾಲ್ ವಾ ಸಾರ್ವಜನಿಕ್ ವಾದ್ ವಿವಾದ್ ಉಬ್ಜಂವ್ಚೊ ವಾ ಬೆಜಾರಾಯೆಚೊ ಮನಸ್ತಾಪ್ ಉಟಂವ್ಕ್ ನುಜೊ.
2. ಆಯ್ಲೆವಾರ್ ಕೊಂಕಣಿ ಸಾಹಿತ್ಯಾಂತ್ ಉದೆಲ್ಲ್ಯಾ ಶೆಣ್ ಚಳುವಳೆ ಥಾವ್ನ್ ಹಾಲ್ಲ್ಲ್ಯಾ ಬರವ್ಪ್ಯಾಂ ಮಧೆಂ ಹೆಂ ಲೇಖನ್ ಪ್ರತ್ಯಕ್ಶ್ ವಾ ಪರೋಕ್ಷ್ಪಣಿಂ ಕೊಣಾಯ್ಕಿ ಶೆಣ್ ಆನಿ ಮ್ಹೊಂವ್ ಮ್ಹಳ್ಳ್ಯಾ ವರ್ಗಾಂತ್ ವಾಂಟೆ ಕರ್ಚ್ಯಾಂತ್ ಕಾರಾಣ್ ಜಾಂವ್ಕ್ ನುಜೊ.
ಹೆಂ ಲೇಖನ್ ಏಕ್ ವಿಮರ್ಶಾ ಲೇಖನ್ ಜಾವ್ನ್ ಆಸ್ತಾಂ ಹ್ಯಾ ಲೇಖನಾಕ್ ಕೊಣೆಂಯ್ ವಾಚ್ಪ್ಯಾನ್ ಶೆಣ್ ಚಳುವಳೆಚಾ ವರ್ಗಾಕ್ ಮೆಳವ್ನ್ ತ್ಯಾ ಚಳುವಳೆಕ್ ಸ್ಪೂರ್ತಿ ಜಾವ್ನ್ ವಾಚ್ಚೆಂ ನ್ಹಯ್. ಕಿತ್ಯಾಕ್ ಮ್ಹಳ್ಯಾರ್ ವಿಮರ್ಶಾಚಾ ಜವಾಬ್ದಾರೆಚಾ ವಾವ್ರಾಂತ್ ಹಾಂವ್ ಎಕಾ ವಯ್ರ್ ಏಕ್ ಮೇಟ್ ಕಾಡ್ತಾನಾ ಸಬ್ದಾನಿಂ ಲಿಸಾಂವ್ ಸೊದ್ಚ್ಯಾ ಆನಿ ಸಾಹಿತ್ಯಾ ಥಾವ್ನ್ ಸಮಾಜೆಂತ್ ಸುಧಾರಣ್ ಹಾಡಂವ್ಚಾ ೧೯೬೦ ಇಸ್ವೆಚಾ ಚಿಂತ್ಪಾಕ್ ಹಾವೆಂ ಪ್ರಸ್ತುತ್ ಸಮಾಜೆಚಾ ಪರಿಗತೆ ಮುಕಾರ್ ಮಾಧ್ಯಮಿಕ್ ಜಾವ್ನ್ ಘೆತ್ಲಾಂ. ಎಕಾ ಕುಶಿನ್ ಜಾಗತೀಕರಣಾ ನಿಮ್ತಿಂ ವ್ಯಕ್ತಿಚೆಂ ರಗತ್ ಸುಕಂವ್ಚಿ ಪ್ರಸ್ತುತ್ ಸಮಾಜೆಚಿ ಪರಿಗತ್ ಆನಿ ದುಸ್ರ್ಯಾ ಕುಶಿನ್ ಧರ್ಮ್ ವ್ಯವಹಾರಿಕ್ಪಣಾ ವರ್ವಿಂ ಜಿವಿತಾಚೊ ಶ್ವಾಸ್ ಬಾಂದ್ಚಿ ಪ್ರಸ್ತುತ್ ಜಿವಾಚಿ ಮನೋಸ್ಥಿತಿ! ಹ್ಯಾ ದೊನಾಂಯ್ ಮಧೆಂ ಆಡ್ಚಾಲ್ಲ್ಯಾ ಪ್ರಸ್ತುತ್ ಪರಿಗತೆಂತ್ಲ್ಯಾ ವ್ಯಕ್ತಿಚಾ ವಯುಕ್ತಿಕ್ ಸಂಘರ್ಶಾಕ್ ಹಾವೆಂ ಪ್ರಾಥಮಿಕ್ ಜಾವ್ನ್ ಘೆತ್ಲಾಂ. ಆನಿ ಹ್ಯಾಚ್ ವಿಚಾರಾಂಚೆರ್ ಹೊಂದೊನ್ ಹೆಂ ಲೇಖನ್ ಲಿಖ್ಲಾಂ.
ಆಶೆಂ ಮ್ಹಣ್ತಾನಾ ಪರಿಗತ್ ಆನಿ ಮ್ಹಜ್ಯಾ ಸಂಘರ್ಶಾ ವರ್ವಿಂ ಹ್ಯಾ ಸಂಗ್ರಹಾಂತ್ ಆಟಾಪ್ಚಾ ಪ್ರಭಾವಿತ್ ಸಾಹಿತ್ಯಾಕ್ ಉಲ್ಲೇಖ್ ಕರ್ಚ್ಯಾ ಮ್ಹಜ್ಯಾ ಧರ್ಮಾಕ್ ಹಾಂವ್ ಹಾಂಗಾ ಪಾಳಿನಾಸ್ತಾನಾ ಮ್ಹಜ್ಯಾ ಅಂತಸ್ಕರ್ನಾಚಾ ಅಪ್ರಾಮಾಣಿಕ್ಪಣಾಂತ್ ದೆಂವ್ಲಾಂ ಮ್ಹಳ್ಳ್ಯಾ ಸತಾಕ್ಯ್ ಹಾಂವ್ ಒಪುನ್ ಘೆತಾಂ. ಪುಣ್ ಆತ್ಮ್ಯಾ ನಿವೇದನಾಚಾ ವಾಟೆರ್ ಕೊಂಕಣಿಚಾ ಖಂಯ್ಚಾಯ್ ಬರವ್ಪ್ಯಾಕ್ ವಯುಕ್ತಿಕ್ ಬೋಟ್ ಜೊಕ್ಚೆಂ ಮೂರ್ಖ್ಪಣ್ ಹಾವೆಂ ಕರುಂಕ್ ನಾ ಮ್ಹಳ್ಳೆಂ ಸಮಾಧಾನ್ ಆಸಾ. ಹೆಂಚ್ ಸಮಾಧಾನ್ ಹ್ಯಾ ಸಂಗ್ರಹಾಂತ್ಲ್ಯಾ ದೆವಾಧೀನ್ ಬರಯ್ಣಾರಾಂಕ್ ಆನಿ ಆಜಿಕ್ ಲಿಖ್ಣಿ ಸಾಂಡ್ಲ್ಲ್ಯಾ ಬರಯ್ಣಾರಾಂಕ್ ಮಾನಾನ್ ಲೆಕಿಶೆಂ ಕರ್ತಾನಾ ಎಕ್ವೀಸಾವ್ಯಾ ಶೆಕ್ಡ್ಯಾಂತ್ಯ್ ಲಿಖ್ಣೆಚಿ ಧಾರ್ ಪಾಜ್ಚ್ಯಾ ಸರ್ವ್ ಬರಯ್ಣಾರಾಂಕ್ ಫುಡಾರಾಕ್ ಸರ್ವ್ ಬರೆಂ ಮಾಗ್ತಾ.
ದೇವ್ ಬರೆಂ ಕರುಂ,
ಮೆಲ್ವಿನ್ ಜೆ. ವಾಸ್, ಕೆಲರಾಯ್.
[ಮಾಯ್ 9 ವೆರ್, ಕುವೇಯ್ಟಾಂತ್ ಆಸಾ ಕೆಲ್ಲ್ಯಾ ಕಥಾಪಾಠ್ಚೆರ್ ವಾಚ್ಲ್ಲೆಂ ಲೇಖನ್]
ದಾಯ್ಜ್ ಮಿಸಾಂವಾಕ್ ಪಾಂಚ್ವೆಂ ವರಸ್: ಕುವೆಯ್ಟಾಂತ್ ಕೊಂಕ್ಣಿ ಕಾಣ್ಯಾಂಚೆರ್ ಕಾಮಾಸಾಳ್
ಕುವೇಯ್ಟ್, ಮಾಯ್ (9): ಕುವೇಯ್ಟಾಂತ್ ಕೊಂಕ್ಣಿ ಸಾಹಿತ್ಯಾಚೆರ್ ಸರಾಗ್ ರಿತಿಚೆಂ ಅಧ್ಯಯನ್ ಚಲಂವ್ಚಾ ದಾಯ್ಜ್ ಪಂಗ್ಡಾನ್ ಹೆಚ್ಚ್ ಮಾಯ್ ಮಯ್ನ್ಯಾಚ್ಯಾ 9 ತಾರಿಕೆರ್, ’20ವ್ಯಾ ಶೆಕ್ಡ್ಯಾಚ್ಯೊ ಮಟ್ವ್ಯೊ ಕಾಣ್ಯೊ’ ಬುಕಾಚೆರ್ ಅದೇಸಾಚೆಂ ಕಾಮಾಸಾಳ್ ಚಲವ್ನ್ ವೆಲೆಂ.
[ಕಾಮಾಸಾಳಾಂತ್ ಹಾಜರ್ ಆಸ್ಲ್ಲಿಂ ಥೊಡಿಂ]
ಸಕಾಳಿಂ ಸಾಡೆ ಧಾ ವೊರಾರ್ ಸುರು ಜಾಲ್ಲ್ಯಾ ಹ್ಯಾ ಕಾಮಾಸಾಳಾಚ್ಯಾ ಸುರ್ವಾತೆಚೆರ್, ದಾಯ್ಜ್.ಕೊಮ್ ಪಾಟ್ಲ್ಯಾ ಚ್ಯಾರ್ ವರ್ಸಾಂನಿ ಚಲೊನ್ ಆಯಿಲ್ಲಿ ವಾಟ್, ಹ್ಯಾ ವಿಶ್ಯಾಚೆರ್ ವಲ್ಲಿ ಕ್ವಾಡ್ರಸಾನ್ ಮಟ್ವ್ಯಾನ್ ವಿವರ್ ದಿಲೊ, ತಶೆಂಚ್ ಹ್ಯಾ ಚ್ಯಾರ್ ವರ್ಸಾಂನಿ ದಾಯ್ಜ್ ಮಿಸಾಂವಾಂತ್ ವಾಂಟೆಲಿ ಜಾಲೆಲ್ಯಾ ಸರ್ವಾಂಚೊ ಪ್ರತ್ಯಕ್ಷ್ ತಶೆಂಚ್ ಪರೋಕ್ಶ್ ರಿತಿನ್ ಉಪ್ಕಾರ್ ಬಾವುಡ್ಲೊ.
ದುಸ್ರ್ಯಾ ಭಾಗಾಂತ್, 2007 ಇಸ್ವೆಂತ್, ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮೆನ್ ಪರ್ಗಟ್ ಕೆಲ್ಲ್ಯಾ, ವಲ್ಲಿ ಕ್ವಾಡ್ರಸ್ ಹಾಣೆ ಸಂಗ್ರಹ್ ಕೆಲ್ಲ್ಯಾ 20ವ್ಯಾ ಶೆಕ್ಡ್ಯಾಚ್ಯೊ ಕೊಂಕ್ಣಿ ಕಾಣ್ಯೊ ಬುಕಾಚೆರ್ ಏಕ್ ಅಪುರ್ಭಾಯೆಚೆಂ ವಿಮರ್ಶಾತ್ಮಕ್ ಲೇಖನ್, ಕೊಂಕ್ಣೆಂತ್ಲೊ ಫಾಮಾದ್ ವಿಮರ್ಶಕ್, ಕವಿ ಮೆಲ್ವಿನ್ ಜೆ. ವಾಸ್ ಕೆಲರಾಯ್ ಹಾಣೆಂ ಪ್ರಸ್ತುತ್ ಕೆಲೆಂ. ತ್ಯೇ ಉಪ್ರಾಂತ್, ಶಿಭಿರಾರ್ಥಿಂನಿ ಎಕಾಮೆಕಾ ಸಂವಾದ್ ಚಲಯ್ಲೊ.
ತ್ಯೇ ಉಪ್ರಾಂತ್ ದಾಯ್ಜ್ ಮಿಸಾಂವಾಚೊ ವಾಂಟೊ ಜಾವ್ನ್ ವರ್ಸಾನ್ ವರಸ್ ಆಸಾ ಕರ್ಚ್ಯಾ ’ದಾಯ್ಜ್ ಸಾಹಿತಿಕ್ ಸ್ಪರ್ಧೊ’ಚೆಂ ಆಧ್ಲ್ಯಾ ವರ್ಸಾಚ್ಯಾ, ’ಮಟ್ವಿ ಕಾಣಿ’, ’ಕವಿತಾ’ ತಶೆಂಚ್ ’ವಿಮರ್ಸೊ’ ಬರಂವ್ಚ್ಯಾ ಸ್ಪರ್ಧ್ಯಾಂತ್ ವೆವೆಗ್ಳಿಂ ಇನಾಮಾಂ ಜಿಕ್ಲೆಲ್ಯಾಂಚಿಂ ನಾಂವಾಂ ಮಾನೆಸ್ತ್ ಪಾಸ್ಕಲ್ ಪಿಂಟೊನ್ ವಾಚುನ್ ಸಾಂಗ್ಲಿಂ. 2004 ಇಸ್ವೆಂತ್ ಸುರು ಜಾಲ್ಲ್ಯಾ ಹ್ಯಾ ವರ್ಸಾಳ್ಯಾ ಸ್ಪರ್ಧ್ಯಾಂತ್ ಎದೊಳ್ಚ್ ಏಕ್ ಲಾಖ್ ರುಪ್ಯಾಂಚಿಂ ಇನಾಮಾಂ ದಾಯ್ಜ್ ಪಂಗ್ಡಾನ್ ಜಿಕ್ಪ್ಯಾಂಕ್ ದಿಲ್ಯಾಂತ್.
[ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2007 ಚಿಂ ಇನಾಮಾಂ ಘೋಶಿತ್ ಕರ್ಚೊ ಮಾನೆಸ್ತ್ ಪಾಸ್ಕಲ್ ಪಿಂಟೊ]
ಅಖ್ರೇಚ್ಯಾ ಭಾಗಾಂತ್ ಕವಿತಾಗೋಶ್ಟಿ ಆಸಾ ಕೆಲ್ಲಿ, ಕವಿ ಮೆಲ್ವಿನ್ ಜೆ. ವಾಸ್ ಕೆಲರಾಯ್ ಹಾಣೆಂ ಅಪ್ಲಿ ’ಹಾಂವ್ ಕವಿ ಜಾತಾಂ’ ಮ್ಹಳ್ಳಿ ಅಪ್ರೂಪ್ ಗಜ಼ಲ್ ವಾಚುನ್ ಸಾಂಗ್ಲಿ ತರ್ ಬಾಯ್ ಪ್ರಿಯಾ ಸಿಕ್ವೇರಾನ್ ಅಪ್ಲಿ ’ಅಸ್ಥಿತ್ವ್’ ಕವಿತಾ ವಾಚುನ್ ಸಾಂಗ್ಲಿ.
ಪ್ರಿಯಾ ಸಿಕ್ವೇರಾನ್ ಉಪ್ಕಾರ್ ಬಾವುಡ್ಲೊ.
ವರ್ಧಿ - ದಾಯ್ಜ್ ಭಾತ್ಮಿ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications