ಕಾಣ್ಯೊ
ಸಾಹಿತಿಕ್ ಸ್ಪರ್ಧೊ 2004
ಕಥಾಪಾಠ್
ಅಂಕಣಾಂ
ಸಾಹಿತಿಕ್ ಸ್ಪರ್ಧೊ 2005
ಕವಿತಾಂ
ಸಾಹಿತಿಕ್ ಸ್ಪರ್ಧೊ 2006
ದಾಯ್ಜ್ ಶಿಭಿರ್ 2006
ವಿಡಂಬನಾಂ
ದಾಯ್ಜ್ ಶಿಭಿರ್ 2007
ಕಥಾಮೃತ್
ವಿಮರ್ಶೆ
ಕಥಾಝರ್ - ವಿಂಚ್ಣಾರ್ ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚೆಂ ಅಂಕಣ್
ಕಥಾಪಾಠ್ - 1
ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ.
ಬೂಕ್: ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ.
ಲೇಖಕ್: ವಲ್ಲಿ ಕ್ವಾಡ್ರಸ್, ಅಜೆಕಾರ್.
ಪ್ರಸ್ತಾವನ್: ಮಿಕ್ಮ್ಯಾಕ್ಸ್.
ಪ್ರಕಾಶಕ್: - ಆಶಾವಾದಿ ಪ್ರಕಾಶನ್
ಮುಖ್ಪಾನ್: ಎಡ್ಡಿ ಸಿಕೇರ್, ಖತಾರ್.
ಪಾನಾಂ: 90.
ಮೋಲ್: ರುಪಯ್ 50.
ವಿಮರ್ಶಕ್/ಸಮೀಕ್ಶಕ್:
ಪ್ರಿಯಾ ಸಿಕ್ವೇರಾ ಫೆರಾರ್/ಕುವೇಯ್ಟ್
ವಲ್ಲಿ ಕ್ವಾಡ್ರಸ್: 1987 ಇಸ್ವೆಂತ್ ಪಯ್ಲಿ ಮಟ್ವಿ ಕಾಣಿ ’ಸಲ್ವಣಿ’ ಕಾಣಿಕ್ ಪಂದ್ರಾಳ್ಯಾಂತ್ ಪರ್ಗಟ್ ಜಾಲಿ. ಉಪ್ರಾಂತ್ ’ರಾಕ್ಣೊ’, ’ಉದೆವ್’, ’ಉಮಾಳೊ’, ’ಪಯ್ಣಾರಿ’, ’ಝೆಲೊ’, ’ಮಿತ್ರ್’, ’ಆಮ್ಚೊ ಯುವಕ್’, ’ಆಮ್ಚಿ ಮಾಂಯ್’, ’ಸೆವಕ್’, ’ದಿವೊ’, ’ಕುಟಾಮ್’, ’ಹೊಸ ದಿಗಂತ’ ಪತ್ರಾಂನಿ ಕೊಂಕ್ಣಿ/ಕಾನಡಿ ಕಾಣ್ಯೊ ಪರ್ಗಟ್ ಜಾಲ್ಯಾತ್. ಎದೊಳ್ 180 ವಯ್ರ್ ಮಟ್ವ್ಯೊ ಕಾಣ್ಯೊ ಪರ್ಗಟ್ಲ್ಯಾತ್ ಆನಿ ’ಆಕಾಶ್ವಾಣಿ ಮಂಗ್ಳುರ್’ ಹಾಚೆರ್ ಸ ಮಟ್ವ್ಯೊ ಕಾಣ್ಯೊ ಪ್ರಚಾರ್ ಜಾಲ್ಯಾತ್.
’ಆಶಾವಾದಿ (2002)’, ’ಖಿಳೊ (2003)’, ’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ (2005)’ ಮ್ಹಳ್ಳೆ ತೀನ್ ಬೂಕ್ ಪರ್ಗಟ್ಲ್ಯಾತ್ ತಶೆಂಚ್ ’ಕುಳ್ವಾರ್ಚೆಂ ದಾಯ್ಜ್’, ’ಕುವೆಯ್ಟ್ಗಾರಾಂಚೊ ಝೆಲೊ ವಿಶೇಷ್ ಅಂಕೊ’, ’ದಿವೊ ದಾಯ್ಜ್ ವಿಶೇಷ್ ಅಂಕೊ’ಚೆಂ ಸಂಪಾದನ್ ಕೆಲಾಂ. ತಶೆಂಚ್ 'ಸರ್ಗಾವಯ್ಲಿ ಮಾಂಯ್’ (ರೊನಾಲ್ಡ್ ಒಲಿವೆರಾ) ಹಾಚಾ ಬುಕಾಚೆಂ ಸಂಪಾದಕ್ಪಣ್ ಕೆಲಾಂ. ಮಾಂಯ್ಭಾಸ್.ಕೊಮ್ಚೆರ್ ಮಟ್ವ್ಯಾ ಕಾಣ್ಯಾಂಚೆಂ ಅಂಕಣ್ ’ಮುಖಾಂ’ ಚಲಯ್ಲಾಂ (2003-2005), ದಾಯ್ಜ್.ಕೊಮ್ಚೆರ್ ’ಕಥಾದಾಯ್ಜ್’, ’ಕಥಾಝರ್’ ಆನಿ ’ಕಥಾಂಕರ್’ ಮ್ಹಳ್ಳಿಂ ತೀನ್ ಅಂಕಣಾಂ ಚಲವ್ನ್ ವರ್ತಾ. ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿನ್ ಪರ್ಗಟ್ ಕರ್ಚಾ ’ಶೆಕ್ಡ್ಯಾಚ್ಯೊ ವಿಂಚ್ಣಾರ್ ಕೊಂಕ್ಣಿ ಮಟ್ವ್ಯೊಕಾಣ್ಯೊ’ ಬುಕಾಚೊ ಸಂಗ್ರಹಕ್.
ಮಟ್ವಿ ಕಾಣಿ ’ಏಕ್ ಭಾಶಣ್ ಸ್ಪರ್ಧೊ’ ಚೆರ್ ಮಂಗ್ಳುರಾಂತ್ ಯುವ ಬರವ್ಪ್ಯಾಂನಿ/ವಿಮರ್ಶಕಾಂನಿ 2004 ಇಸ್ವೆಂತ್ ಸಂವಾದ್-ಸಮೀಕ್ಶಾ ಚಲವ್ನ್ ವೆಲಾಂ.
ಮಟ್ವ್ಯಾ ಕಾಣ್ಯಾಂಕ್ ತೀನ್ ಪಾವ್ಟಿಂ ರಾಕ್ಣೊ ಸಾಹಿತಿಕ್ ಸ್ಪರ್ಧ್ಯಾಂತ್ ಇನಾಮಾಂ ಲಾಭ್ಲ್ಯಾಂತ್. ಕೊಂಕ್ಣಿ ಕಾಣ್ಯೊ ಮಾಂಯ್ಭಾಸ್.ಕೊಮ್, ಮ್ಯಾಂಗಲೋರಿಯನ್.ಕೊಮ್, ದಾಯ್ಜಿದುಭಾಯ್.ಕೊಮ್ (ಕಥಾಮೃತ್), ಕೊಂಕಣ್ಫ್ರೆಂಡ್ಸ್.ಕೊಮ್ಚೆರ್ ಪರ್ಗಟ್ಲ್ಯಾತ್. ಕನ್ನಡ ಕಾಣ್ಯೊ ’ಪ್ರಕಾಶಕ.ಕೊಮ್’, ’ಕನ್ನಡಧ್ವನಿ.ಕೊಮ್’ ಚೆರ್ ಪರ್ಗಟ್ಲ್ಯಾತ್.
ವಿಮರ್ಶ್ಯಾಕ್/ಸಮೀಕ್ಶಾಕ್ ಆಧಾರ್ ಘೆತ್ಲ್ಲ್ಯೊ ಕಾಣ್ಯೊ:
ಏಕ್ ಕ್ರಿಕೆಟ್ ಹೀರೊ, ಬಾಂಯ್, ಕುಡ್ಡೊ, ಖಣ್, ಜಾಂಬ್ಳಾಂಚೊ ರೂಕ್
ಕಥಾಪಾಠ್ - 1 [ಮಯ್ನೊ: ಜುಲಾಯ್, ವರಸ್: 2006, ಜಾಗೊ: ಕುವೇಯ್ಟ್ ]
ಸಂಸಾರಾಂತ್ ಕಸೊ ಮನಿಸ್ ಸುಖಿ ಜಾವ್ನಾಸಾಗೀ ತೆಚ್ಚ್ಪರಿಂ ದುಃಖಿ ಜಿವಿತ್ ಸಾರ್ಚೆಯ್ ಧಾರಾಳ್, ಗ್ರೇಸ್ತ್ ವರ್ಗಾಂತ್ ಜಿಯೆತೆಲೆ ಜಿತ್ಲೆಕೀ ತೆಚ್ಚ್ಪರಿಂ ದುಬ್ಳ್ಯಾ ವರ್ಗಾಂತ್ ಜಿಯೆತೆಲೆಯ್ ಧಾರಾಳ್. ಹಾಂಚೆಮಧೆಂ ಆಸ್ಚೆಂ ಸಾಮಾನ್ಯ್ ಸಂಗತ್ ಜಾವ್ನಾಸಾ ’ಜಿವಿತ್’. ಜಶೆಂ ಮನಿಸ್ ಆಶಾವಾದಿ ಜಾವ್ನ್ ಜಿಯೆಂವ್ ವಾ ನಿರಾಶಾವಾದಿ ಜಾವ್ನ್ ಜಿಯೆಂವ್, ಪುಣ್ ಮನಿಸ್ ಜಿಯೆತಾ.. ಜಾವ್ ಬರೆಂ ಯಾ ವಾಯ್ಟ್.
ಹ್ಯಾ ತಾಚಾ ಜಿವಿತಾಚಾ ಆವ್ದೆಂತ್ ಜಾಯ್ತ್ಯೊ ಅಸಲ್ಯೊ ಸಂಗ್ತ್ಯೊ ತಾಚಾ ಜಿಣ್ಯೆ ಪಯ್ಣಾರ್ ಪಾಶಾರ್ ಜಾತಾತ್, ಥೊಡ್ಯಾಂಚೆಂ ಗಣ್ಣೆಂ ತೊ ಕರ್ತಾ ತರ್ಯ್ ಸಭಾರಾಂಚೆಂ ಗಣ್ಣೆಂಚ್ ತೊ ಕರಿನಾ ತರ್ಯ್ ಸಂಸಾರ್ ಚಲೊನ್ಂಚ್ ಆಯ್ಲಾ ಆನಿ ಚಲೊನ್ಂಚ್ ವೆತಲೊ. ಆಯ್ಚೊ ಮನಿಸ್ ಫಾಲ್ಯಾಂ ಆಸ್ಚೊನಾ ಜಾವ್ಯೆತಾ, ಕಾಲ್ಚೊ ಮನಿಸ್ ಆಜ್ ನಾ ಜಾವ್ಯೆತಾ ತರ್ಯ್ ಕೊಣ್ ಗಣ್ಣೆ ಕರುಂದಿ ವ ಕೊಣ್ ಕರಿನಾ ಜಾಂವ್ - ಸಂಸಾರಾಂತ್ ವಾರೆಂ ಆಸ್ತೆಲೆಂಚ್, ಉದಾಕ್ ಆಸ್ತೆಲೆಂಚ್, ಹಿ ಧರ್ತಿ ಆಸ್ತೆಲಿ, ತೊ ಸುರ್ಯೊ ಆಸ್ತಲೊ ತಶೆಂಚ್ ತೊ ದರ್ಯೊ ಆಸ್ತಲೊ..
ಕೊಣಾಕ್ ಸಾಹಿತ್ಯ್ ಪಸಂದ್, ಕೊಣಾಕ್ ನಾ ಪಸಂದ್ - ಪುಣ್ ಸಾಹಿತ್ಯ್ ಏಕ್ ಮನ್ಶಾಕ್ ಗರ್ಜೆಚೆಂ ಮಾಧ್ಯಮ್, ಸಾಹಿತ್ಯಾಕ್ ಮನಿಸ್ ಖಂಚಾರ್ ಲೆಖಾರ್ ಘೆಂವ್ದಿ, ಜಾಂವ್ ಮನರಂಜನಾಕ್, ಜಾಂವ್ ಜಾಣ್ವಾಯೆಕ್, ಜಾಂವ್ ವೇಳ್ ಪಾಶಾರ್ ಕರ್ಚಾಕ್ ವಾ ಜಾಂವ್ ಅಪ್ಲ್ಯಾ ಮತಿಚಾ ವಿಕಾಸಾಕ್, ಪುಣ್ ಸಾಹಿತ್ಯ್ ಸಂಸಾರಾಚಾ ಖಂಚಾಯ್ ಭಾಸಾಂನಿ ಆಸ್ಚೆಪರಿಂ ಆಮ್ಚಾಯ್ ಭಾಸಾಂನಿ ಆಸಾ - ನವಾಲಿಕಾ ರುಪಾರ್, ಕವಿತಾ ರುಪಾರ್, ಕಾಣ್ಯಾಂ
ರುಪಾರ್ ವಾ ಹೆರ್ ರುಪಾಂನಿ..
’ಕಥಾಪಾಠ್’ಚ್ಯಾ ಸುರ್ವಾತೆರ್ ಹಾವೆಂ ಸ್ವಷ್ಟ್ ಕೆಲಾಂ - ಹಾಂಗಾ ಎಕಾಮೆಕಾ ಫುಲಾಂಚೆ ತುರೆ ಘಾಲ್ಚಿ ರಿವಾಜ್ ಭಿಲ್ಕುಲ್ ಆಸ್ಚಿನಾ. ಆಮಿಂಯ್ ಜರ್ ಆಮ್ಚಿ ಪುಜಾ ಕರ್ಚಾಂಕ್ ಕುಪಾಂಚೆರ್ ಚಡಂವ್ಕ್ ಲಾಗ್ಲ್ಯಾಂವ್ ತರ್ ಆಮ್ಚೆಮಧೆಂ ಆನಿ ಹೆರಾಂ ಮಧೆಂ ಅಂತರ್ ತರ್ಯ್ ಕಸಲೊ? ಹೊ ಕಥಾಪಾಠ್ ಖಂಡಿತ್ ಜಾವ್ನ್ ಖುರ್ಸಾವಾಟೆಚೆಂ ಎಕೇಕ್ ಸ್ತೆಸಾಂವ್. ಜರ್ ತರ್ ಆಮ್ಚಾ ಕೊಂಕ್ಣೆಂತ್ ಸಾಹಿತ್ಯಾಚೆಂ ’ಮಟ್ಟ್’ ಚಡಾಜಯ್ ಮ್ಹಳ್ಳೊ ಖರೊ ಹುಸ್ಕೊ ಆಸಾ ತರ್ ಹರ್ಯೆಕಾ ಬರಯ್ಣಾರಾನ್ ’ಆಪ್ಣಾನ್ ಕಿತೆಂಯ್ ಬರವ್ಯೆತ್’ ಮ್ಹಳ್ಳ್ಯಾ ಬೇಜವಾಬ್ಧಾರೆಥಾವ್ನ್ ಭಾಯ್ರ್ ಯೇಂವ್ಕ್ ಜಾಯ್. ಅಪ್ಣಾನ್ ಶೆಂಭೊರಾಂ ವಯ್ರ್ ಕಾಣ್ಯೊ ಬರಯ್ಲ್ಯಾತ್, ಆಪ್ಲೆ ಕೇಸ್ ಪಿಕ್ಲ್ಯಾತ್ ವ ಝಡ್ಲ್ಯಾತ್ ದೆಖುನ್ ಅಪುಣ್ ಮಹಾನ್ ಸಾಹಿತಿ ಮ್ಹಳ್ಳೆಂ ಚಿಂತಾಪ್ ಭಿಲ್ಕುಲ್ ಬದ್ಲಿಜಾಯ್. ದೆಖುನ್ ಹ್ಯಾ ಖುರ್ಸಾವಾಟೆಚೆಂ ಪಯ್ಲೆಂ ಸ್ತೆಸಾಂವಾಕ್ ಹಾವೆಂ ವಿಂಚ್ಲ್ಲೊ ಬೂಕ್ ಮ್ಹಜೊಚ್ಚ್. ಆನಿ ಹ್ಯಾ ಬುಕಾಚಿ ಶಿಫಾರಾಸ್ ಕರ್ಚಾಂಕ್ಚ್ ವಿಂಚಿಜಾಯ್ ಮ್ಹಳ್ಳೆಂ ಚಿಂತಾಪ್ ಮ್ಹಾಕಾ ಆಸ್ಲ್ಲೆಂ ತರ್ ಖಂಡಿತ್ ತಸಲೆ ಧಾರಾಳ್ ಮ್ಹಜಾ ಸಂಪರ್ಕಾರ್ ಆಸಾತ್, ಪುಣ್ ಮ್ಹಜಾಚ್ಚ್ ಸಾಯ್ಟಿಚೆರ್ ಮ್ಹಜ್ಯೊಚ್ ತಾರೊಫೊ ವಾಸ್ಚೊ ಹೊರ್ಭೊಸ್ ಮ್ಹಾಕಾ ತರ್ಯ್ ಸದ್ದ್ಯಾಕ್ ನಾ. ದೆಖುನ್ ತಾಕಾ ಜೊಕ್ತೆಂ, ಪ್ರಾಮಾಣಿಕ್ ಪ್ರೇತನ್ ಕೆಲಾಂ ಆನಿ ಹ್ಯಾ ಎಕೆಕಾ ವಿಮರ್ಶ್ಯಾ ಲೇಖನಾಂಕ್ ವಾಚ್ತಾನಾ ತುಮ್ಕಾಂ ತೆಂ ಗೊಮ್ತೆಲೆಂ.
ಅಶೆಂ ಮ್ಹಣೊನ್ ಹಾಂಗಾಸರ್ ಖಂಚಾಯ್ ಎಕಾ ವಿಮರ್ಶಕಾನ್ ಕಿತೆಂಯ್ ಬರಯಿಲ್ಲೆಂ ಸಗ್ಳೆಂ ಸಾರ್ಕೆಂ ಮ್ಹಳ್ಳೊ ಅರ್ಥ್ಯ್ ನ್ಹಂಯ್. ಪುಣ್ ಸರ್ವಾಂಕ್ ತಾಂಚಿ ತಾಂಚಿ ಅಭಿಪ್ರಾಯ್, ವಿಚಾರ್ ವೆಕ್ತ್ ಕರ್ಚೊ ಆವ್ಕಾಸ್ ಜರೂರ್ ದಿಲಾ. ಆನಿ ಏಕ್ ಭೋವ್ ಗರ್ಜೆಚಿ ಸಂಗತ್ ಹಾಂಗಾಸರ್ ಉಗ್ಡಾಪಿ ಕರುಂಕ್ ಆಶೆತಾಂ - ಹೆ ವಿಮರ್ಶಕಾಂಚೆಂ ಚಿಂತ್ಪಾಚೆಂ ಮಟ್ಟ್ ಭಿಲ್ಕುಲ್ ಸಂಪಾದಕಾಕ್ ಪತ್ರಾಂ ಬರಂವ್ಚಾ ತಿತ್ತುನ್ ಮಾತ್ರ್ ಸೀಮಿತ್ ನಾ. ಪಯ್ಲ್ಯಾಂತ್ ಪಯ್ಲೆಂ - ಹೆ ಕಾಂಯ್ ಕೊಂಕ್ಣಿ ಪಂಡಿತ್ ನ್ಹಂಯ್ ಆಸ್ಯೆತ್ ಪುಣ್ ಹೆ ಸಗ್ಳೆ ಕಾಣ್ಯೆಗಾರ್ ಆನಿ ಕಾಣಿ ಮ್ಹಳ್ಯಾರ್ ಕಿತೆಂ ಮ್ಹಳ್ಳೆಂ ’ಆರು ಮೂರು’ ಕಳಿತ್ ಆಸ್ಚೆ. ಕೊಂಕ್ಣಿ ಸಾಹಿತ್ಯಾಚೊ ಖರೊ ಹುಸ್ಕೊ ತಾಂಕಾಂ ಆಸಾ, ಗರ್ಜೆಭಾಯ್ಲಿ ಧುಂಪವ್ನ್ ಕರ್ನ್ ಫಾಯ್ದೊ ಜೊಡ್ಚೊ ಅಂಗಲಾಪ್ಯ್ ತಾಂಕಾಂ ನಾ ದೆಖುನ್ ಖರೆಂಚ್ ತಾಂಕಾಂ ವರ್ತ್ಯಾ ಗೌರವಾನ್ ಆನಿ ಮಾಯಾಮೊಗಾನ್ ಹೊ ಆವ್ಕಾಸ್ ಫಾವೊ.
ಎಡ್ವಿನ್ ಜೆ.ಎಫ್.ಡಿ’ಸೋಜ್ ಆಪ್ಲ್ಯಾ ರಾಟಾವಳೆಮಧೆಂ ಸಯ್ತ್ ದೋನ್ ಸಬ್ಧ್ ಹ್ಯಾ ಬುಕಾಚೆರ್ ತಶೆಂಚ್ ಕೊಂಕ್ಣಿ ಕಾಣ್ಯಾಂಚೆರ್ ಜೆರಾಲ್ ಅಭಿಪ್ರಾಯ್ ಉಚಾರ್ಚೆಂ ಖಾಲ್ತೆಂಪಣ್, ಸಿಜ್ಯೆಸ್ ಪಯ್ಸಿಲ್ಯಾ ಗಾಂವಾಂತ್ ಆಸೊನ್ಯ್ ಹ್ಯಾ ಬುಕಾಚೆರ್ ದೋನ್ ಉತ್ರಾಂ ಬರಂವ್ಕ್ ವೇಳ್ ಕೆಲ್ಲೆಂ ನಿಜಾಯ್ಕ್ಯೀ ಉತ್ತೇಜನಾಚೆಂ. ಕಿತ್ಯಾಕ್ ಮ್ಹಳ್ಯಾರ್ ಅಜಿಕ್ ಚಡುಣೆಂ ಪಂದ್ರಾ ವರ್ಸಾಧಿಂ ಮ್ಹಜ್ಯೊ ಕಾಣ್ಯೊ ’ಉಮಾಳೊ’ ಪತ್ರಾಚೊ ಸಂಪಾದಕ್ ಜಾವ್ನ್ ಆಸ್ಲ್ಲೆವೆಳಾರ್ ತಾಣೆಂ ಕೆಲ್ಯಾತ್ ದೆಖುನ್ ಏಕ್ ಕಾಣ್ಯೆಗಾರ್ ಜಾವ್ನ್ ಮ್ಹಜಿಂ ಎಕೆಕ್ ಪಾವ್ಲಾಂ ತಾಣೆಂ ಮೆಜ್ಲ್ಯಾಂತ್ ದೆಖುನ್ ತಾಚಿ ಅಭಿಪ್ರಾಯ್ ಮ್ಹಾಕಾ ಭೋವ್ ಮೊಲಾಧಿಕ್.
ಆಸ್ಟಿನ್ ಪ್ರಭುನ್ ಮಟ್ವ್ಯಾನ್ ತರ್ಯ್ ಜೊಕ್ತ್ಯಾ ರಿತಿನ್ ಎಕೆಕಾ ಕಾಣ್ಯಾಂಚೆರ್ ಸಮೀಕ್ಶಾತ್ಮಕ್ ರಿತಿನ್ ವಿಶ್ಲೇಷಣ್ ಕೆಲಾಂ - ಭೋವ್ ಸಂತೊಸಾಚೆಂ.
ಮಿತ್ರ್ ಸ್ಟೇನ್ ಅಗೇರಾ ಅಪ್ಲ್ಯಾಚ್ ಶೈಲೆಂತ್ ಕೊಂಕ್ಣೆಂತ್ ಪರ್ಜಳ್ಚೊ ಸಾಹಿತಿ - ಭಿಲ್ಕುಲ್ ಕಸಲಿಚ್ ದಾಕ್ಶೆಣೆಕ್ ಪಡೊನ್ ಬರಂವ್ಚೊ ನ್ಹಂಯ್, ತೆಚ್ಚ್ ಪರಿಂ ಎದೊಳ್ ಮೆಳೊಂಕ್ ನಾ ತರ್ಯ್ ಮ್ಹಜಾ ಕಾಳ್ಜಾಚಾ ಎಕೆಕ್ ಉಡಿಯೆಕ್ ಪಾರ್ಕುಂವ್ಚೊ ಕ್ಲೆರೆನ್ಸ್ ಕೈಕಂಬ ಸಯ್ತ್ ತೆಚ್ಚ್ ಪ್ರಕಾರಾಚೊ ಪ್ರಭುದ್ದ್ ಚಿಂತ್ಪಿ/ಕಾಣ್ಯೆಗಾರ್. ಹಾಂಚೆ ವಿಮರ್ಶೆ ಖಂಡಿತ್ಯ್ ಜಾವ್ನ್ ತುಮ್ಕಾಂ ರುಚ್ತೆಲೆ ಮ್ಹಳ್ಳಿ ಮಹ್ಜಿ ಪಾತ್ಯೆಣಿ. ಮಿತ್ರ್ ಮೆಲ್ವಿನ್ ಜೆ. ವಾಸ್ ಹಾಣೆಂ ಬರಯಿಲ್ಲ್ಯೊ ಕಾಣ್ಯೊ ಕಾಂಯ್ ಪಂಚ್ವೀಸ್ ಜಾತಿತ್ ಪುಣ್ "ಹಾವೆಂ ದೊನ್ಶಾಂ ಲಾಗಿಂ ಕಾಣ್ಯೊ ಬರಯ್ಲ್ಯಾತ್ ದೆಖುನ್ ಹಾಂವ್ ಮಹಾನ್ ಸಾಹಿತಿಂಚಾ ಪಟ್ಟೆರ್ ಆಸಾಂ" ಮ್ಹಳ್ಳೆಂ ಚಿಂತಾಪ್ ತಾಕಾ ದಿಲ್ಲೆಂ ತರ್ ಭೊವ್ಶಾ ತೊ ಮ್ಹಾಕಾ ಹರ್ಸುನ್, ಮ್ಹಜಿಂ ಕಿರ್ತನಾಂ ಗಾಂವ್ನ್, ಮ್ಹಾಕಾ ಕುಪಾಂಚೆರ್ ಚಡವ್ನ್ ಬರಯ್ತೊ ಕೊಣ್ಣಾ. ಪುಣ್ ನಾ - ತಸಲೆಂ ಕಾಂಯ್ ನಾ, ತಾಚೆ ಬದ್ಲಾಕ್ ತಾಕಾ ಹಾವೆಂ ಖಾಸ್ಗೆನ್ ಹಿ ವಿನತಿ ಕೆಲ್ಲಿ; "ತಿಕಾಂತ್ ತೀಕ್ ವಿಮರ್ಸೊ ಕರ್" ಆನಿ ಭೊವ್ಶಾ ಹ್ಯಾ ತಾಚಾ ಪ್ರಾಮಾಣಿಕ್ ಪ್ರೇತನಾಂತ್ ತೊ ಜಿಕ್ಲಾ ಸಯ್ತ್.
ಬಾಯ್ ಅಶುಂತಾ ಪಿರೇರಾ ಲಂಡನ್ ಥಾವ್ನ್ ಮ್ಹಜಾ ಕಾಣ್ಯಾಂಚೆರ್ ದೋನ್ ಸಬ್ಧಾಂಚಿ ಅಭಿಪ್ರಾಯ್ ಬರಯ್ಲ್ಯಾ ತೆಚ್ಚ್ಪರಿಂ ಬಾಯ್ ಪ್ರಿಯಾನ್ ಸಯ್ತ್. ಹಾಂಗಾಸರ್ ಬಾಯ್ ಪ್ರಿಯಾನ್ ಲಿಖ್ಲ್ಲ್ಯೊ ಹ್ಯೊ ದೋನ್ ವೊಳಿ ಮ್ಹಜಾ ದೊಳ್ಯಾಂಚ್ಯೊ ಆಸ್ಡ್ಯೊ
ವಯ್ರ್ ಕರ್ತಾತ್;
ಖಣ್ ಚಡಾವತ್ ಆಸ್ತಾ ರಸ್ತ್ಯಾಚಾ ದೆಗೆನ್, ಆನಿ ರೂಂದ್ ರಸ್ತ್ಯಾಚಿ ಅಶೀರ್ ವೋಣ್- ಜಾವ್ನಾಸಾ ಖಣ್! ಮ್ಹಣ್ಜೆ ಹ್ಯಾ ’ಖಣ್’ ನಾಂವಾಂತ್ ದೋನ್ ಮನೋವರ್ಗ್ ಮಿಸ್ಳಾತಾತ್ - ಏಕ್; ವಿಶಾಲ್ ಮನೋಗತ್ (ಸಾಂಕೇತಿಕ್ - ರಸ್ತೊ) ಆನಿ ದುಸ್ರಿ ಅಶೀರ್ ಮನೋಗತ್ (ಸಾಂಕೇತಿಕ್ - ಖಣ್).
ವಿಮರ್ಶಕ್ ಕೊಣ್?
ವಿಮರ್ಶಕಾಕ್ ಏಕ್ ನದರ್ ಖಂಡಿತ್ ಗರ್ಜೆಚಿ,
ತೆಚ್ಚ್ಪರಿಂ ಪ್ರಭುದ್ದತಾ, ಪರಿಪಕ್ವ್ (Matured) ಭಾಸ್ ಆನಿ ವಿಶಾಲ್
ನದರ್ (Vision). ಏಕ್ ಖರೊ ವಿಮರ್ಶಕ್ ಜಶೆಂ ಹೆರಾಂಚಾ ಬರ್ಪಾಂಚೆರ್ ವಿಮರ್ಸೊ ಕರ್ತಾ ತೆಚ್ಚ್ಪರಿಂ ಅಪ್ಣಾಚೆರ್ ಕೊಣ್ಯ್ ವಿಮರ್ಸೊ ಕರಿತ್ ತರ್ ತೆಂ ಸ್ವೀಕಾರ್ ಕರ್ಚೆಂ ವಿಶಾಲ್ ಚಿಂತಾಪ್ ಆಸ್ಚೆತಸಲೊ ಜಾಯ್ಜಯ್.
ಜೆದ್ನಾಂ ಹಾಗ್ತಾನಾ ಭಾಕ್ರಿ ಖಾಂವ್ಚಾ ಎಕಾ ಭುರ್ಗ್ಯಾಕ್ ಎಕ್ಲೊ ’ಹಾಗ್ತಾನಾ ಭಾಕ್ರಿ ಖಾಯ್ನಾಕಾ’ ಮ್ಹಳ್ಳಿ ಬೂದ್ ದಿತಾನಾ ಜರ್ ತೊ ’ಬುಡವ್ನ್ ಖಾತಾಂ ಕಿತೆಂ ಕರ್ತಾಯ್?’ ಮ್ಹಣ್ ವಿಚಾರಿತ್ ತರ್ ತಾಕಾ ಬೂದ್ ಸಾಂಗ್ಚಾಪ್ರಾಸ್ ತಾಕಾ ತಾಚೆಯಿತ್ಲ್ಯಾಕ್ ಸೊಡ್ಚೆಂಚ್ ಬರೆಂ
ನ್ಹಂಯ್ಗಿ??
ಅಖ್ರೇಕ್ - ಹಿ ಏಕ್ ಸುರ್ವಾತ್ ಮಾತ್ರ್.. ಕಾಣ್ಯಾಂಚಾ ಸಂಸಾರಾಂತ್ ಖರೆಂಚ್ ಆಮ್ಚಿ ವ್ಹಾಡಾವಳ್ ಜಾಯ್ಜಾಯ್ ತರ್ ಹರ್ಯೆಕಾ ಕಾಣ್ಯೆಗಾರಾಕ್ ಹ್ಯಾ ಸ್ತೆಸಾಂವಾಕ್ ತಯಾರ್ ರಾವಾಜಯ್ ಮ್ಹಳ್ಳೊ ಉಲೊ ದಿತಾಂ. ತೆಚ್ಚ್ಪರಿಂ ತುಕಾ, ವಾಚ್ಪ್ಯಾಕ್ ಹ್ಯಾ ಖಂಚಾಯ್ ಸಮೀಕ್ಶಾ/ವಿಮರ್ಶ್ಯಾಂಚೆರ್ ತುಜಿ ಅಭಿಪ್ರಾಯ್ ಉಚಾರುಂಕ್ ಮನ್ ಆಸಾ ತರ್ ಕಸಲಿಚ್ ದಾಕ್ಶೆಣ್/ಮುಲಾಜ್ ಕರಿನಾಸ್ತಾನಾ ತಿ ಬರವ್ನ್ ಧಾಡ್ನ್ ದೀ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications