ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಂಕರ್ - 1
ಮಟ್ವಿ ವಳೊಕ್: ಕೊಂಕ್ಣೆಂತ್, ಕಾನಾಡಿಂತ್ ತಶೆಂಚ್ ತುಳು ಭಾಸೆಂತ್ ಎದೊಳ್ಚ್ ಹಿಣೆಂ ಪಂಚ್ವೀಸಾಂ ವಯ್ರ್ ಕವಿತಾ ಬರಯ್ಲ್ಯಾಂತ್ ತರ್ಯ್ ಹಿ ಹಿಚಿ ಪಯ್ಲಿ ಮಟ್ವಿ ಕಾಣಿ ಜಾವ್ನಾಸಾ. ಕೊಂಕ್ಣಿ ಸಾಹಿತ್ಯಾಚೊ ಮೋಗ್ ಆಸ್ಚಿ ವಾಯ್ಲೆಟ್ ಬಾಯ್ ಅಪ್ಲ್ಯಾ ಕುಟ್ಮಾಸವೆಂ ದುಭಾಯಾಂತ್ ವಸ್ತಿ ಕರುನ್ ಆಸಾ ತರ್ಯ್ ಕೊಂಕ್ಣೆಖಾತಿರ್ ತಿ ಸದಾಂಯ್ ಕ್ರಿಯಾತ್ಮಕ್.
ಹಿಚಾ ಬರ್ಪಾಂನಿ ಸಾಮಾಜಿಕ್ ಸಂಗ್ತ್ಯೊ ದಿಸೊನ್ ಯೆತಾತ್, ಹಿಚಾ ಕಾಣ್ಯಾಂನಿ ಸಯ್ತ್ ತಿಚ್ಚ್ ಸಾಮಾಜಿಕ್ ಸಂಗತ್ ವಾಚುಂಕ್ ಮೆಳ್ತಾನಾ ವಾಚ್ಪ್ಯಾಂಕ್ ಹಿ ಫಕತ್ತ್ ಏಕ್ ಕಾಣಿ ಮಾತ್ರ್ ಮ್ಹಣ್ ಭೊಗಾನಾ. ಸಾದಿ ಭಾಸ್ ಅಪ್ಲ್ಯಾ ಬರ್ಪಾಂನಿ ಪಾಚಾರ್ಚಾ ಹಿಚಿ ಹಿ ಮಟ್ವಿ ಕಾಣಿ ತುಮ್ಕಾಂ ಜರೂರ್ ರುಚ್ತೆಲಿ ಮ್ಹಣ್ ಪಾತ್ಯೆತಾಂ.
ವಾಯ್ಲೆಟ್ ಜೆ. ಪಿರೇರಾ
ಕಥಾಂಕರ್ - 1. ಕುಟ್ಮಾಚಿ ವಿದ್ವಾವ್ಳ್
ಸ್ಟೇನಿ ಎಕ್ ಗುಣೇಸ್ತ್
ಭುರ್ಗೊ, ಪಯ್ಸಿಲ್ಯಾ ಫಜಿರಾಂತ್ ತೊ ಜಲ್ಮಾಲ್ಲೊ, ತಾಕಾ
ದೊಗಿ ಭಯ್ಣಿ ಆನಿ ಎಕ್ ಮಾಲ್ಘಡೊ ಭಾವ್ ಆಸ್ಲ್ಲೊ. ತೊ
ಕೊಡಿಯಾಳಾಂತ್ ಎಕ್ ಲ್ಹಾನ್ ಬಿಡಿಯಾಂಚಿ ಅಂಗಡ್ ಘಾಲ್ನ್ ಜಿಯೆತಾಲೊ.
ಆನಿ ಭಯ್ಣಿಂ ಬಿಡಿಯೊ ಭಾಂದುನ್ ಆಪ್ಲಿ ಜಿಣಿ ಸರ್ತಾಲಿಂ. ಕಷ್ಟಿ
ಜಿಣಿಂ ತಾಂಚಿ ಜಾವ್ನಾಸ್ಲ್ಲಿ. ತಾಂಚ್ಯಾ ಲ್ಹಾನ್ಪಣಾರ್ಚ್ಚ್ ಆವಯ್
ಬಾಪಯ್ ದೆವಾದೀನ್ ಜಾಲ್ಲಿ. ತಶೆಂ ಜಾಲ್ಲ್ಯಾನ್ ಚಡ್ತಿಕ್
ಶಿಕಾಪ್ ತಾಕಾ ಮೆಳೊಕ್ ನಾತ್ಲ್ಲೆ. ದಿಸ್ಪೊಡ್ತೊ ಗ್ರಾಸ್
ಜೊಡ್ಚ್ಯಾ ಖಾತಿರ್ ಭಯ್ಣಿಂ ಬಿಡಿಯೊ ಭಾಂದ್ತಾಲಿ. ಆನಿಂ ಸ್ಟೇನಿ
ಆಪ್ಲೊ ದಿಸ್ಪೊಡ್ತೊ ಗ್ರಾಸ್ ಜೊಡುಂಕ್ ಮೆಸ್ತಾಚೆ ಕಾಮ್ಯ್
ತೊ ಕರ್ತಾಲೊ. ಆಶೆಂ ತಾಂಚಿ ಜಿಣಿಂ ಕಷ್ಟಾಂಚಿ ತರ್ಯೀ ತಾಂತುಂಚ್ಚ್
ಸಂತೊಸ್ ತಿಂ ಪಾವ್ತಾಲಿ.
ಆಶೆಂ ಆಸ್ತಾಂ ವಡ್ಲ್ಯಾ ಭಾವಾಕ್ ಪೀಟರಾಕ್ ತಾಚಾಚ್ಚ್ ಅಂಗ್ಡಿಕ್
ಬಿಡಿಯೊ ಹಾಡ್ಚ್ಯಾ ಎಕಾ ಚೆಡ್ವಾಚಿ ಸಳಾವಳ್ ಜಾಲಿ. ಆನಿಂ ತಾಂಚಿ
ಸಳಾವಳ್ ವೆಗಿಂಚ್ಚ್ ಲಗ್ನಾಂತ್ ಸಂಪ್ಲಿ. ಆಶೆಂ ಕೊಡ್ಯಾಳಾಂತ್
ವಾಡ್ಲ್ಲೆಂ ಚೆಡುಂ ಕೊಡ್ಯಾಳಾಂತ್ಚ್ಚ್ ರಾವೊಂಕ್ ಆಶೆಲೆ.
ಪೀಟರಾಕ್ ದುಸ್ರೊ ಉಪಾಯ್ ನಾಸ್ತಾ ಬಾಯ್ಲೆಖಾತಿರ್ ಎಕ್
ಬಾಡ್ಯಾಚೆಂ ಘರ್ ಕೆಲೆಂ. ಆತಾಂ ಸ್ಟೇನಿಚೆ ಸಗ್ಳೆಂ ಕುಟಾಮ್
ಕೊಡ್ಯಾಳಾಂತ್ ವಸ್ತಿ ಕರುಂಕ್ ಆಯ್ಲೆ. ಬಾಡ್ಯಾಚ್ಯಾ ಘರಾಂತ್
ವಸ್ತಿಂ ಕರ್ತಾನಾ ಸ್ಟೇನಿಕ್ ಸೆಜಾರಾ ಥೊಡ್ಯಾಂಚಿ ವಳಕ್ ಜಾಲಿ.
ಆಶೆಂ ಸ್ಟೇನಿಕ್ ವಿಕ್ಟರ್ ಬರೊ ಲಾಗ್ಲೊ ಅನಿಂ ಹಾಂಚಿ ಇಶ್ಟಾಗಾತ್
ವಾಡ್ಲಿ. ಸಾಂಜೆಚೆ ಕಾಮ್ ಸಂಪ್ಲ್ಲ್ಯಾ ಉಪ್ರಾಂತ್ ವಿಕ್ಟರ್
ಅನಿಂ ಸ್ಟೇನಿ ದೊಗೀ ಇಗರ್ಜೆಚ್ಯಾ ಗೇಟಿಲಾಗಿ ಬೊಸೊನ್ ಅಪ್ಲೊ
ವೇಳ್ ಪಾಶಾರ್ ಕರ್ತಾಲೆ. ದೀಸ್ ವೆತಾಂ ವೆತಾಂ ಸ್ಟೇನಿ
ವಿಕ್ಟರಾಚ್ಯಾ ಘರ್ಚ್ಯಾಂಕ್ ಚಡ್ ಲಾಗಿಂ ಜಾಲೊ. ಆಶೆಂ ಸ್ಟೇನಿಕ್
ಹರ್ಯೇಕಾ ರಿತಿನ್ ವಿಕ್ಟರಾಚ್ಯಾ ಘರಾಥಾವ್ನ್ ಕುಮೊಕ್
ಮೆಳ್ತಾಲಿ.
ಎಕ್ ದೀಸ್ ಸ್ಟೇನಿಕ್ ಶಕ್ತಿನಗರಾಂತ್ ಖಾಲಿ ಜಾಗೊ ದಿಸ್ಲೊ,
ತಾಣೆಂ ವಿಕ್ಟರಾಲಾಗಿಂ ಆಪ್ಣೆ ಸರ್ಕಾರಿ ಜಾಗ್ಯಾರ್ ಎಕ್ ಘರ್ ಬಾಂದ್ಲ್ಯಾರ್
ಕಶೆಂ ಜಾಯಿತ್ ಮ್ಹುಣ್ ಅಪ್ಲಿ ಅಭಿಪ್ರಾಯ್ ವಿಚಾರ್ಲಿ. (ಆದಿಂ
ಸರ್ಕಾರಿ ಜಾಗ್ಯಾರ್ ದುಬ್ಳ್ಯಾಂನಿ ಘರಾಂ ಬಾಂದ್ಲ್ಯಾರ್ ತಿಂ ಮಾಗಿರ್
ತಾಂಚ್ಯಾ ನಾಂವಾರ್ ಸರ್ಕಾರ್ ಕರ್ನ್ ದಿತಾಲೊ). ವಿಕ್ಟರಾನ್
ಆಪ್ಲ್ಯಾ ಘರ್ಚ್ಯಾಂಲಾಗಿ ಸ್ಟೇನಿಚ್ ಆಲೋಚನ್ ಸಾಂಗ್ಲಿ. ವಿಕ್ಟರಾಚಾ
ಬಾಪಾಯ್ನ್ ಆಪುಣ್ ಕುಮೊಕ್ ಕರ್ತೊಲೊ ಮ್ಹುಣ್
ಫಾತೊರ್ ರೇಂವ್ ಸಿಮೆಂಟ್ ಆಶೆಂ ಸರ್ವ್ ಗರ್ಚೆಚೊ ವಸ್ತು
ಒದಗ್ಸುನ್ ದಿಲ್ಯೊ. ಸ್ಟೇನಿ ಖುದ್ದ್ ಎಕ್ ಮೇಸ್ತ್ ಜಾಲ್ಲಾನ್
ವಿಕ್ಟರ್ ತಾಕಾ ಮಜತ್ ಕರ್ತಾಲೊ. ಹಾಂಚಾ ದೊಗಾಂಯ್ಚಾ
ಮಿನ್ಹತೆನ್ ಘರ್ ವೆಗ್ಗಿಂಚ್ಚ್ ಉಬೆಂ ಜಾಲೆಂ. ಯೆದೊಳ್ ಮ್ಹುಣಾಸರ್
ವಗೆಚ್ಚ್ ಅಸ್ಲ್ಲ್ಯಾ ಭಾವಾಕ್ ಆನಿಂ ಬಾವ್ಜೆಕ್ ಆತಾಂ ನಿಜಾಯ್ಕಿ
ಹ್ಯಾ ಘರಾಚೆರ್ ದೊಳೊ ಪೊಡ್ಲೊ. ಬಾಡ್ಯಾಕ್ ರಾಂವ್ಚಾ ಬದ್ಲಾಕ್
ಆಮಿಂ ಸ್ಟೇನಿ ಸಾಂಗಾತಾ ರಾವ್ಯಾ ಮ್ಹಣೊನ್ ಬಾವ್ಜೆನ್
ಭಾವಾಕ್ ಫುಂಕ್ಲೆ. ಸ್ಟೇನಿ ಆಜೂನ್ ಅಂಕ್ವಾರ್ ಜಾಲ್ಲ್ಯಾನ್
ತಾಚಿ ಕಾಂಯ್ ಆಡ್ಕಳ್ ನಾತ್ಲ್ಲಿ. ಆಶೆಂ ಸ್ಟೇನಿಚೆ ಸಗ್ಳೆಂ ಕುಟಾಮ್
ನವ್ಯಾ ಘರಾಕ್ ವರ್ಗ್ ಜಾಲಿ.
ಸ್ಟೇನಿ ತಾಚಾ ನವ್ಯಾ ಘರಾ ರಾವ್ತಾಲೊ ಜಾಲ್ಲ್ಯಾನ್ ವಿಕ್ಟಾರಾಕರ್
ಯೇಂವ್ಕ್ ತಾಕಾ ಜಾಯ್ನಾತ್ಲ್ಲೆಂ. ವಿಕ್ಟರಾಗೆರ್ ಯೇಜಾಯ್
ತರ್ ತಾಣೆಂ ಮಧೆಂ ದೆವಾಜಯ್ ಪಡ್ತಾಲೆಂ. ತಶೆಂ ಆಯ್ತಾರಾಚೆಂ
ಮಾತ್ರ್ ಸ್ಟೇನಿ ವಿಕ್ಟಾರಾಚಾ ಘರಾ ಯೆತಾಲೊ. ಘರಾಂತ್
ಬಾವ್ಜೆಚೆಂ ಇಲ್ಲೆ ಕಿರಿಕಿರಿ ಸುರು ಜಾಲ್ಲೆ. ದೊಗಾಂ ಅಂಕ್ವಾರ್ ಭಯ್ಣ್ಯಾಂಚೆ
ಬೊರೆಂ ಫಾಲೆಂ ಆಜೂನ್ಯೀ ಜಾವ್ನಾತ್ಲ್ಲೆಂ. ಭಾವ್ಜೆನ್
ಹ್ಯಾ ದೊಗಾಂಯ್ಚೆರ್ ಆಪ್ಲೊ ಅಧಿಕಾರ್ ಚಲಂವ್ಕ್ ಸುರು
ಕೆಲ್ಲೊ. ಥೊಡೆ ಪಾವ್ಟಿಂ ತಾಣಿಂ ಬಾವ್ಜೆಚೆ ಮಾರ್ ಪಡ್ತಾಲೆ.
ಘರ್ಚಾ ಕರಾಂದಾಯೆ ಮಧೆಂ ರೀಟಾಕ್ ಆಪ್ಣೆಂ ಕಾಜಾರ್ ಜಾಯ್ಜೆ
ಮುಣ್ ಭೊಗ್ತಾ. ಎಕ್ ದೀಸ್ ತಾಕಾ ಎಕಾ ಚೆಡ್ಯಾಚಿ ವಳಕ್
ಜಾತಾ. ಆನಿಂ ಹಾಂಚಿ ಹಿಂ ವಳಕ್ ಮೊಗಾಂತ್ ಬದ್ಲಾತಾ. ರೀಟಾ ಘರಾ
ಸಾಗೊಂಕ್ ಭಿಯೆತಾ ಕಿತ್ಯಾಕ್ ಮ್ಹುಳ್ಯಾರ್ ತಾಣೆಂ ಮೋಗ್
ಕರ್ಚೊ ಚೆಡೊ ದುಸ್ರ್ಯಾ ಜಾತಿಚೊ ಜಾವ್ನಾಸ್ಲೊ. ಹಾಂಚೊ
ಮೋಗ್ ಆಸೊಚ್ಚ್ ಮುಕಾರ್ ಗೆಲೊ. ಎಕ್ ದೀಸ್ ರೀಟಾಚಾ
ಭಾವಾಕ್ ಕೊಣೆಂಗೀ ಖಬಾರ್ ದಿಲಿ. ಹೆಂ ಆಯ್ಕೊನ್ ಬಾವ್ಜೆನ್
ರೀಟಾಚೆರ್ ಮಾರಾಂಚೊ ಪಾವ್ಸ್ ವೊತ್ಲೊ. ಹೆಂ ಸರ್ವ್
ಸೊಸುನ್ ಥಕ್ಲ್ಲೆಂ ರೀಟಾ ಎಕ್ ದೀಸ್ ಫಾಂತ್ಯಾರ್ ಘರ್
ಸೊಡ್ನ್ ಆಪ್ಲ್ಯಾ ಮೊಗಾ ಸಂಗಿ ಫೊಳ್ನ್ ಧಾಂವ್ತಾ. ದಾಕ್ಟೆಂ
ಭಯ್ಣ್ ಜೂಲಿ ಮಾತ್ರ್ ಬಾವ್ಜೆ ತಾವ್ನ್ ಮೆಳ್ಚೆ ಕಷ್ಟ್
ಸೊಸುನ್ ಮರ್ಯಾದೆ ಖಾತಿರ್ ಜಿಯೆತಾಲೆ.
ಎಕ್ ದೀಸ್ ಸ್ಟೇನಿ ಅಪ್ಲೆಂ ಕಾಮ್ ಸಂಪವ್ನ್ ಘರಾ ಪಾಟಿಂ
ಗೆಲ್ಲೊ. ರಾತಿಚಿ ನೋವ್ ವೊರಾಂ ಜಾಲ್ಲಿ. ಕಾಮಾಚೆ ವಸ್ತುರ್
ಕಾಡ್ನ್ ನಾಂವ್ಕ್ ಮ್ಹಣ್ ತೊ ಆಯ್ತೊ ಜಾಲ್ಲೊ, ತೆದ್ನಾ ಕೊಣೆಂಗೀ
ಪಾಟ್ಲ್ಯಾನ್ ಸೊಂಟ್ಯಾನ್ ತಾಚಾ ತಕ್ಲೆಕ್ ಮಾರ್ಲ್ಲೊ ಆನ್ಬೋಗ್
ಜಾಲೊ. ಪಾಟಿ ಘುಂವೊನ್ ಪಳೆತಾನಾ ಅಪ್ಲ್ಯಾ ಭಾವಾನ್
ಆನಿಂ ಬಾವ್ಜೆನ್ ತಾಚೆರ್ ವಾರ್ ಕೆಲ್ಲೊ. ತಕ್ಲಿ ಫುಟೊನ್
ರಗಾತ್ ದೆಂವ್ತಾಲೆ, ಆನಿಂ ಆಪ್ಲಿಂಚ್ಚ್ ಸ್ಟೇನಿಚಿ ದುಸ್ಮಾನಾ ಜಾಲ್ಲಿ.
ಕಶೆಂ ಪುಣಿಂ ಅಪುಣ್ ಜೀವ್ ವಾಂಚಯ್ತಲೊಂ
ಮ್ಹಳ್ಳಾ ಇರಾದ್ಯಾನ್ ಸ್ಟೇನಿನ್ ಥಂಯ್ ಥಾವ್ನ್ ಫಳಾಪೊಳ್
ಘೆತ್ಲೆ, ಅನಿ ಭಿತರ್ಲ್ಯಾ ವಸ್ತುರಾರ್ಚ್ಚ್ ಸ್ಟೇನಿ ವಿಕ್ಟಾರಾಚಾ
ಘರಾ ಧಾಂವ್ಲೊ.
ರಾತಿಚಿ ಧಾಂ ವೊರಾಂ ಜಾಲ್ಲಿಂ, ವಿಕ್ಟಾರಾಗೆರ್ ಸಗ್ಳಿಂ ನಿದೊನ್ ಆಸ್ಲ್ಲಿಂ.
ತಿತ್ಲ್ಯಾರ್ ಕಾಂಪಿಣ್ ವಾಜ್ಲಿ. ವಿಕ್ಟರಾಚಾ ಬಾಪಾಯ್ನ್ ದಾರ್ ಉಗ್ತೆಂ
ಕೆಲೆ, ತ್ಯಾ ವಗ್ತಾ ಸ್ಟೇನಿ ವಿಕ್ಟರಾಚಾ ಬಾಪಾಯ್ಚಾ ಅಂಗಾರ್
ಕೊಸಾಳ್ಳೊ. ತಕ್ಷಣಾ ದಾಕ್ತೆರಾಕ್ ಹಾಡವ್ನ್ ಸ್ಟೇನಿಕ್
ಪ್ರಥಮ್ ಚಿಕಿತ್ಸಾ ದಿವಯ್ಲಿ. ಅಂಗಾರ್ ಕಾಂಯ್ ವಸ್ತುರ್
ನಾತ್ಲ್ಲ್ಯಾನ್ ವಿಕ್ಟರಾಚೆ ವಸ್ತುರ್ ತಾಕಾ ಘಾಲುಂಕ್
ದಿಲೆಂ. ಸ್ಟೇನಿಕ್ ಬರೊ ಮಾರ್ ಜಾಲ್ಲ್ಯಾನ್ ಕಾಮ್ ಕರುಂಕ್
ಜಾಲೆಂ ನಾ. ಆಶೆಂ ಪಂದ್ರಾ ದೀಸ್ ತೊ ನಿದ್ಲ್ಲೆ ಕಡೆಚ್ಚ್ ಆಸ್ಲ್ಲೊ.
ವಿಕ್ಟರಾಗೆಲ್ಯಾಂನಿ ಸ್ಟೇನಿಚಿ ಬರೀ ಚಾಕ್ರಿ ಕೆಲಿ.
ಆಶೆಂ ಎಕ್ ದೀಸ್ ವಿಕ್ಟರಾಚೊ ಬಾಪುಯ್ ಸ್ಟೇನಿಚಾ ಭಾವಾಕ್
ಮೆಳೊಂಕ್ ತಾಚಾ ಘರಾ ಗೆಲೊ. ಕಿತ್ಯಾಕ್ ಮ್ಹಳ್ಯಾರ್ ಸ್ಟೇನಿಕ್
ಚಡಾವತ್ ವಸ್ತುರ್ ವಿಕ್ಟರಾಗೆಲ್ಯಾಂನಿ ದಿಲ್ಲೆಂ. ಆನಿಂ ತೊ
ಸರ್ವ್ ತಾಂಚೆಲಾಗಿ ಆಸ್ಲ್ಲ್ಯಾನ್ ವಿಕ್ಟರಾಚೊ ಬಾಪುಯ್
ವಸ್ತುರ್ ಹಾಂಡುಕ್ ಗೆಲ್ಲೊ. ಪೂಣ್ ವಸ್ತುರ್ ದಿಂವ್ಚಾ
ಬದ್ಲಾಕ್ ತಾಚೊ ಅವ್ಮಾನ್ ತಾಣಿ ಕೆಲೊ. ವಿಕ್ಟರಾಚಾ ಬಾಪಾಯ್
ಮುಕಾರ್ಚ್ಚ್ ಸ್ಟೇನಿಚೆ ಸಗ್ಳೆಂ ವಸ್ತುರ್ ಬಾವ್ಜೆನ್
ಉಜೊ ದೀವ್ನ್ ಹುಲ್ಪಾಯ್ಲೆ. ಹೆಂ ಪಳೆವ್ನ್ ವಿಕ್ಟಾರಾಚಾ
ಬಾಪಾಯ್ಕ್ ಬೆಜಾರಾಯ್ ಭಗ್ಲಿ, ಅನಿಂ ತೊ ಖಾಲಿ ಹಾತ್ ಪಾಟಿ
ಆಯ್ಲೊ. ತರೀ ವಿಕ್ಟರಾಚಾ ಘರ್ಚಾಂನಿ ಸ್ಟೇನಿಕ್ ಸೊಡ್ನ್ ಘಾಲೆಂ
ನಾ.
ಸಭಾರ್ ತೇಂಪ್ ಜಾಲ್ಲೊ, ಸ್ಟೇನಿ ಆಪ್ಲೆಂ ಕಾಮ್ ಕರ್ನ್
ವಿಕ್ಟರಾಚಾ ಘರಾಚ್ಚ್ ರಾವ್ತಾಲೊ. ವಿಕ್ಟರ್ ಗಲ್ಫಾಕ್ ಭಾಯ್ರ್
ಸರ್ಲೊ. ಸ್ಟೇನಿ ಆತಾಂ ಎಕ್ಸುರೊ ಜಾಲೊ, ಹೆಣೆಂ ಸ್ಟೇನಿಚಾ
ಭಾವಾನ್ ಕಠೀಣ್ ಪಿಯೆಂವ್ಕ್ ಸುರು ಕೆಲ್ಲೆ. ಬಾವೊಜ್
ಇಲ್ಲಿ ತಕ್ಲೆಂತ್ ಆಸ್ಕತ್ ಜಾವ್ನ್ ಆಯಿಲ್ಲಿ. ಆಶೆಂ ಸುಮಾರ್
ದೋನ್ ವರ್ಸಾಂ ಪಾಶಾರ್ ಜಾಲಿ. ಸ್ಟೇನಿಚಾ ಭಾವಾನ್ ಮಾಂದ್ರಿ
ಧರ್ಲಿ. ತೊಡ್ಯಾ ತೆಂಪಾನ್ ತೊ ದೆವಾದೀನ್ ಜಾಲೊ, ಬಾವೊಜ್
ಆಪ್ಲ್ಯಾ ಪತಿಚಾ ಮರ್ಣಾನ್ ಚಡ್ ಖಂತಿನ್ ಬುಡ್ಲಿ. ತಿಚಿ ಚಾಕ್ರಿ ಕರುಂಕ್
ಕೊಣೀ ನಾ ಜಾಲಿ. ಜೂಲಿ ಆಪ್ಲಾ ಭಯ್ಣ್ ರೀಟಾ ಸಾಂಗಾತಾ ಗೆಲ್ಲೆ.
ಹೆಣೆಂ ಸ್ಟೇನಿಕ್ ವಿಕ್ಟರಾನ್ ವೀಸಾ ದಾಡ್ಲಿ. ಆನಿಂ ತೊ ಗಲ್ಫಾಚಿ
ವಾಟ್ ಧರ್ನ್ ಗೆಲೊ. ಬಾವ್ಜೆಚೆ ಪಿಶೆಂ ದೀಸ್ ವೆತಾ ವೆತಾ
ಚಡ್ ಜಾಲೆ, ಕಾಂಯ್ ಉಪಾಯ್ ನಾಸ್ತಾ ತಿಕಾ ಪಿಶಾಚಾ ಆಸ್ಪತ್ರೆಂತ್
ಭರ್ತಿ ಕರಿಜಯ್ ಪಡ್ಲೆಂ. ದುಡು ಆಸ್ತ್ ಭಾಂಗಾರ್ ತಿಣೆಂ ಆಶೆಲ್ಲೆ,
ತಿಣೆಂ ತಿಚಾಚ್ಚ್ ದೇರಾಕ್ ಆನ್ನ್ಯಾಯ್ ಕೆಲ್ಲೊ. ಆಜ್ ತಿ ಎಕ್ಸುರಿ
ಪಿಶಾಂಚಾ ಆಸ್ಪತ್ರೆಂತ್ ಆಪ್ಲ್ಯಾ ಮರ್ಣಾಕ್ ರಾಕೊನ್ ಆಸಾ.
ಪುಣ್ ತಿಕಾ ತಿಚಾ ಕರ್ನಾಂಚೊ ಉಗ್ಡಾಸ್ ಕಿತ್ಲೊ ದೊಸ್ತಾ ಕೊಣ್ಣಾ.
ತ್ಯಾ ಘರಾಂಖಾತಿರ್ ತಿಣೆಂ ಸ್ಟೇನಿಕ್ ಜಿವೆಶಿ ಮಾರುಂಕ್ ಪರ್ಯಾಂತ್
ಚಿಂತ್ಲೆಂ, ಪುಣ್ ಆಜ್ ತೆಂ ಘರ್ ಫಣ್ಗಿಲ್ ಪಡ್ಲಾ. ಸ್ಟೇನಿನ್
ಆಪ್ಣಾಕ್ ಜಾಯ್ ತಿತ್ಲೆಂ ಜೊಡ್ಲಾ. ದೆವಾನ್ ತಾಚೆರ್ ಧಾರಾಳ್
ಆಶೀರ್ವಾದಾಂ ವೊತ್ಲ್ಯಾಂತ್.
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
