ಕವಿತಾकविताPoem
ವ್ಹಾಳೊ?
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಹ್ಯಾ ಸಂಸಾರಾಂತ್ ಆಮಿ ಜಿಯೆವ್ನ್ ಆಸ್ಚಾ ವಗ್ತಾಂ ಆಮಿಂ ಕೊಣಾಯ್ಚೆಂಯ್ ರೀಣ್ ಫಾರಿಕ್ ಕರ್ಯೆತಾ ತರ್ಯ್ ಋಣ್ ಫಾರಿಕ್ ಕರ್ಚೆಪರಿಂಚ್ ನಾ. ಭುರ್ಗ್ಯಾಪಣಾರ್ ಥಾವ್ನ್ ಮಾತಾರ್ಪಣಾ ಪರ್ಯಾಂತ್ ಮನ್ಶಾನ್ ಖೆಳೊಂಕ್ ಆಸ್ಚಾ ವೆವೆಗ್ಳ್ಯಾ ಪಾತ್ರಾಂತ್ ಜಾಯ್ತ್ಯಾ ಸಂಗ್ತ್ಯಾಂಕ್/ವಸ್ತುಂಕ್ ಗಳ್ಸಿತಾ, ವಾಪಾರ್ತಾ ತರ್ಯ್ ಏಕ್ ಘಡಿ ಪುಣಿಂ ತಾಂಚೊ ಉಪ್ಕಾರ್ ಬಾವ್ಡಿನಾತ್ಲ್ಲೆ ಸಂದರ್ಭ್ಯ್ ಧಾರಾಳ್ ಮಾಪಾನ್ ಆಸಾತ್. ಜಶೆಂ ಪಾನೊ ದಿಲ್ಲ್ಯಾ ಆವಯ್ಕ್ ಜಾಂವ್, ಪೋಸ್ ಕೆಲ್ಲ್ಯಾ ಬಾಪಾಯ್ಕ್ ಜಾಂವ್, ಉಸ್ಕ್ಯಾರ್ ಖೆಳಯಿಲ್ಲ್ಯಾ ಸಯ್ರ್ಯಾಂಚೊ ಜಾಂವ್ ಆಮಿಂ ಉಪ್ಕಾರ್ ಬಾವುಡ್ತಾಂವ್?
ಇಸ್ಕೊಲಾಂನಿ ಶಿಕಯಿಲ್ಲ್ಯಾ ಮೆಸ್ತ್ರಿ/ಮೆಸ್ತ್ರಿಣಿಂಚೊ, ಆಮ್ಚಾ ಬರ್ಯಾ ವಾಯ್ಟಾಂತ್ ಸಾಂಗಾತ್ ದಿಂವ್ಚಾ/ದಿಲ್ಲ್ಯಾ ಇಶ್ಟಾಂಚೊ, ಜಿಣ್ಯೆಂತ್ ಕಸಲೊಚ್ ಸಂಬಂದ್ ನಾಸ್ತಾಂ ಸಯ್ತ್ ಸಯ್ರ್ಯಾಂಚಾಕ್ಯಿ ಚಡ್ ಮಾಪಾನ್ ಮೋಗ್ ಕೆಲ್ಲ್ಯಾ/ಕರ್ಚಾ ಮಿತ್ರಾಂಚೊ ಉಪ್ಕಾರ್ ಬಾವ್ಡುಂಕ್ ಚಡಾವತ್ ಜಾವ್ನ್ ಆಮಿಂ ವಚಾನಾಂವ್. ತರ್ಯ್ ಅಪ್ಣಾಚೊ ಉಪ್ಕಾರ್ ಕೊಣ್ಯ್ ಬಾವ್ಡಿನಾಂತ್ ದೆಖುನ್ ಸುರ್ಯೊ ಕಾಂಯ್ ಅಪ್ಲಿಂ ಕಿರ್ಣಾಂ ಲಿಪಯ್ನಾ, ವ್ಹಾರೆಂ ವ್ಹಾಳ್ಚೆಂ ರಾವಯ್ನಾ, ಉದ್ಕಾ ಝರ್ ಲಿಪೊನ್ ಬಸಾನಾ, ಹಿ ಭುಂಯ್ ವ್ಹಾವಂವ್ಚೆಂ ರಾವಯ್ನಾ.
ಪುಣ್ ಥೊಡೆಪಾವ್ಟಿಂ ತರ್ಯ್ ಹೆಂ ಉಪ್ಕಾರಾಚೆಂ ವೊಜೆಂ ಚಡ್ ಜಾಲೆಂ ಮ್ಹಣ್ ಭಗ್ತಾನಾ ಏಕ್ ಘಡಿ ತಸಲ್ಯಾಂಚೊ ಉಪ್ಕಾರ್ ಬಾವುಡ್ಚೆಂ ವಾಜ್ಬಿ. ಆಂಡ್ರು ಡಿ’ಕುನ್ಹಾಕ್ ಕೊಂಕ್ಣಿ ವರ್ತುಲಾಂತ್ ಜಡಾಯೆಚೊ ಮಾನ್ ಆಸಾ - ಸಭಾರ್ ಕಾರಾಣಾಂಕ್, ಥೊಡೆ ತಾಚೆಂ ’ಸದಾಂ ಹಾಸ್ಕುರೆಂ’ ತೋಂಡ್ ಪಳೆವ್ನ್ ತಾಕಾ ಮಾನ್ ದಿತಾತ್ ಆನಿ ಕೊಣ್ ತಾಚೆಂ ಸಾಹಿತ್ಯ್ ವಾಚುನ್ ತಾಕಾ ಮಾನ್ ದಿತಾತ್, ಆನಿ ಕೊಣ್ ತಾಚೆಂ ವೆಕ್ತಿತ್ವ್ ಪಳೆವ್ನ್ ಆನಿ ಕೊಣ್ ತಾಚಾ ಖಾಲ್ತ್ಯಾ ಶೆಗುಣಾಂಕ್ ಭುಲೊನ್. ಹಾಂವ್ ಹ್ಯಾ ಸರ್ವಾಂಸವೆಂ ತಾಚಾ
’ಕಿತ್ಲೆ ಕಸ್ಟ್ ಆಯ್ಲ್ಯಾರ್ಯ್ ತೆ ಸೊಸುನ್ ಹೆರಾಂಕ್ ಸದಾಂಚ್ ಸಂತೊಸ್ ದೀಂವ್ಕ್ ಪೆಚಾಡ್ಚಾ ತಾಚಾ ’ಮನಾಕ್’ ಮಾನ್ ದಿತಾಂ. ಆನಿ ಸಪ್ತೆಂಬರ್
23 ತಾರಿಕೆರ್ ಅಪ್ಲೊ ಜಲ್ಮಾದಿವಸ್ ಆಚರಣ್ ಕರ್ಚಾ ಸಂದರ್ಭಾರ್ ತಾಕಾ ಮೊಗಾಚಿ ಕಾಣಿಕ್ ಜಾವ್ನ್ ತಯಾರ್ ಕೆಲ್ಲೆಂ ಹೆಂ ಪಾನ್ ಕಾಂಯ್ ಅತಿಶಯೋಕ್ತಿ ಜಾಂವ್ಚೆಂನಾ ಮ್ಹಣ್ ಚಿಂತಾಂ.
ಆಂಡ್ರುವಿಶಿಂ ಅಶೆಂ ಚಿಂತ್ಚಾಂತ್ ಹಾಂವ್ ಎಕ್ಲೊಂಚ್ ನ್ಹಂಯ್,
ಬಗಾರ್ ತಾಚೆಥಾವ್ನ್ ಪ್ರೇರಣ್, ಸ್ಪೂರ್ತ್ ಘೆವ್ನ್ ದಿಸಾನ್ದೀಸ್
ಕವಿ ಜಾವ್ನ್ ಫಾಮಾದ್ ಜಾಲ್ಲೊ ಕವಿ ಆರ್ಥರ್ ಜೆ. ಪಿರೇರಾ
ಸಯ್ತ್ ಅಪ್ಲ್ಯಾ ಖಾಲ್ತ್ಯಾ ಶೆಗುಣಾಂನಿ ಅಪ್ಲಿಂ ಭಗ್ಣಾಂ/ಸಿಂತಿಮೆಂತಾಂ
ಹ್ಯಾ ಕವಿತೆಂತ್ ಅಪುರ್ಭಾಯೆನ್ ಪಿಂತ್ರಾಯ್ತಾ.
ಆಂಡ್ರುಚಾ ಎಕಾ ಫಾಮಾದ್ ಕವಿತೆಕ್ ಹಾಂಗಾಸರ್ ದಿಲಾಂ. ಸಮೇಸ್ತ್ ದಾಯ್ಜ್ ವಾಚ್ಪ್ಯಾಂ ತರ್ಫೆನ್ ಆಂಡ್ರುಕ್ ಜಲ್ಮಾದಿಸಾಚೆ ಉಲ್ಲಾಸ್.
ಆರ್ಥರ್ ರೋಶನ್ ಪಿರೇರಾ, ದುಭಾಯ್
ವ್ಹಾಳೊ?
ವ್ಹಳೂ ವ್ಹಳೂ ವ್ಹಾಳ್ಚ್ಯಾ ವ್ಹಾಳಾಕ್
ಹಾಂವ್ಯ್ ಪಾವುಲ್ಲೊಂ ಪಾಗುಂಕ್
ಇಮಾಜಿ, ಪ್ರತಿಮಾ ಶಿರ್ಕಾಯ್ಲ್ಯೊ ಗರಿಯೆಕ್
ಅಲಂಕಾರ್ ಪಾಗ್ತಾಂ ಪಾಗ್ತಾ
ಉಪ್ಯೆಂವ್ಕ್ ಲಾಗ್ಲೊಂ ಪ್ರಾಸಾಕ್
ಗುರ್ಪುರ್ಚೊ ವ್ಹಾಳೊ ವ್ಹಾಳ್ತಾ ಖಾಡಿ ಶ್ಹೆರಾಂತ್
ಉದ್ದೇಶ್ ಘೆವುನ್ ಎಕ್ಚ್ ಮನಾಂತ್,
ತುಂಯ್ ವ್ಹಾಳ್ ಹಾಂವ್ಯಿ ವ್ಹಾಳ್ತಾಂ
ಅಮಿಂ ವ್ಹಾಳ್ಯಾಂ ಸಂಗಿಂ, ಸಂಗಿಂ
ಆಜ್........
ಕವಿತೆಂಚೊ ನವ್ಯೊ ಝರಿಯೊ ಉಮಾಳೊನ್ ವ್ಹಾಳ್ತಾತ್
ಫಕತ್ತ್,
ಉದಾರ್ ದಿಲ್ಯಾ ಹ್ಯಾಚ್ ವ್ಹಾಳ್ಯಾಚ್ಯಾ ಉದ್ಕಾಂತ್
ಹ್ಯಾ ವಾಳ್ಯಾಕ್ ಹಾಂವ್ ಕಿತೆಂ ಮ್ಹಣೊಂ
ತಾರಾಂ ಮಧ್ಲೊ ಚಂದ್ರ್ ಮ್ಹಣೊಂ
ಯಾ ಎಕಾಚ್ ಲ್ಹಾರಾಚೊ ದರ್ಯೊ ಮ್ಹಣೊಂ
ಪುಣ್ ಹೆಂ ಸತ್,
ಕವಿತಾ ಶೆತಾಂತ್ ಹೆಂ ಖಣಜ್
ಆಸಾ ಭರ್ಪೂರ್ ಭರೊನ್
ಹೊ ವಿಮರ್ಶಕ್ ಭಾಂಗಾರಾಚಾ ತಾಲ್ವಾರಿಚೊ
ಬರವ್ಪಿ ಮನಾಂತ್ ಉರ್ಚ್ಯಾ ಪಾನಾಂತ್ಲೊ
ಸಂಪಾದ್ಪಿ ಕೊಂಕ್ಣಿ ಉಮಾಳ್ಚ್ಯಾ ಉತ್ರಾಂಚೊ
ಹಾಸೊ ಮ್ಹಾಕಾ ತುಕಾ ಹಾಸಂವ್ಚೊ
ಮುಖೆಲಿ ಕಾಳ್ಜಾಂ ಏಕ್ ಕರ್ಚೊ
ವ್ಹಾಳೊ ಕೊಂಕ್ಣಿ ಬಾಸೆಚ್ಯಾ ಅಂಗ್ಣಾಂತ್ಲೊ
ಸುಪುತ್ರ್ ಕೊಂಕ್ಣಿ ಅವಯ್ಚೊ
ಕವಿಬಾಬ್ ಆಂಡ್ರು ಡಿ’ಕುನ್ಹಾ ನಾಂವಾಚೊ
ಕವಿತಾ ಶೆತಾಂತ್ ಹಾಂವ್ ಶಿಸ್ ತಾಚೊ
ಆಂಡ್ರು ಎಲ್. ಡಿ’ಕುನ್ಹಾ, ಶಾರ್ಜಾ
ಹಾಂವ್ ಆನಿ ತೊ
ಎಕಾಚ್ ಗರ್ಭಾ ವಾಂಟೆ ಆಮಿ
ಎಕೆಚ್ ಮತಿ ಫಾಂಟೆ ಆಮಿ
ತರ್ಯ್ ಮ್ಹಜೆ ಆನಿ ತಾಚೆ ಮಧೆಂ
ರಾತ್ ದೀಸ್ ಫರಕ್
ತೊ ಮೊಳ್ಬಾಕ್ ಚೊಯ್ತಾ
ಹಾಂವ್ ಪಾತಾಳ್ ಸೊಧ್ತಾಂ
ತೊ ಚಾಂದ್ನ್ಯಾಂತ್ ತಾರಾಂ ಮೆಜ್ತಾ
ಹಾಂವ್ ಚಂದ್ರಾ ಖತಾಂ ಮೆಜ್ತಾಂ
ತೊ ತುಪೆಂ ಬಾಂಧ್ತಾ
ಹಾಂವ್ ನಲಿಯೊ ವಿಂಚ್ತಾಂ
ತೊ ಉಜೊ ಜಾವ್ನ್ ಉಜ್ವಾಡಾಯ್ತಾ
ಹಾಂವ್ ಉಜೊ ಜಾವ್ನ್ ಭಸ್ಮಿತಾಂ
ತೊ ಸತಾಕ್ ವೆಂಗುನ್ ರಾವ್ಲಾ
ಹಾಂವ್ ಘಾತಾಕ್ ತೆಂಕುನ್ ರಾವ್ಲಾಂ
ತೊ ಖುರ್ಸಾರ್ ಮೊರೊಂಕ್ ತಯಾರ್
ಹಾಂವ್ ಖುರ್ಸಾರ್ ಮಾರುಂಕ್ ತಯಾರ್
ಮ್ಹಜೆಂ ಪೊಕೊಳ್ ಮ್ಹನ್ಶಾ ಸಂಯ್ಬ್
ತಾಚೆಂ ಕಾಂಯ್ ದೈವಿಕ್ ಸಂಯ್ಬ್?
ತೊ ವ್ಹಾಳಯ್ತಾ ಕಾವ್ಯಾ ವ್ಹಾಳೊ
ಹಾಂವ್ ಉರ್ಲಾಂ ಕೊಂಡಾಂತ್ ಮ್ಹೆಳೊ
ಸಮನಾಂತರ್ ಗೀಟ್ ಆಮಿ
ಉಲ್ಟೆಚ್ ಉರ್ಲ್ಯಾಂವ್ ಘಡ್ಸನಾಂವ್ ಕೆದಿಂಚ್
ಎಕಾಚ್ ಗರ್ಭಾಚೆ ವಾಂಟೆ ಆಮಿ
ಎಕೆಚ್ ಮತಿಚೆ ಫಾಂಟೆ ಆಮಿ
ಪುಣ್ ಮ್ಹಜಾ ಭಿತರ್ಲ್ಯಾ ಕವಿ ಆನಿ ಮ್ಹಜೆ ಮಧೆಂ
ದುದಾ ದಿಕಾ ಫರಕ್
ತರ್ಯ್ ಆಮಿ ಏಕ್!
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.