ಕವಿತಾकविताPoem
ವೆತಾಂ
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕವಿತಾಮೃತ್:
’ಹಾಕಾಚ್ ಜಿಣಿ ಮ್ಹಣ್ತಾತ್ ತರ್ ಅಶೆಂಚ್ ಜೆಯೆತೆಲ್ಯಾಂವ್
ಅಯ್ಯೋ ಮ್ಹಣ್ಚೆಂ ನಾಂವ್, ಓಂಟ್ ಶಿಂವ್ತೆಲ್ಯಾಂವ್, ದುಃಖಾಂ ಪಿಯೆತೆಲ್ಯಾಂವ್’
ಸಾಹೀರ್ ಲುಧ್ಯಾನ್ವಿಚಾ ಕವಿತೆಂತ್ಲಿಂ ಹಿಂ ಉತ್ರಾಂ ಪರತ್ ಪರತ್ ವಾಸ್ಚೆತಸಲಿಂ ನ್ಹಂಯ್ಗಿ? ಹಿಂ ಉತ್ರಾಂ ಕೊಣಾಕ್ ನಿರಾಶೆಚಾ ಕೊಂಡಾಂತ್ಲಿಂ ಉತ್ರಾಂ ಮ್ಹಳ್ಳೆಪರಿಂ ದಿಸೊಂಕ್ ಪುರೊ ಪುಣ್ ಕವಿಚೊ ಬಂಡಾಯ್ ತರ್ಯ್ ಕಸೊ ಪಳೆಯಾ, ಜಿಣ್ಯೆಸವೆಂ ಝುಜ್ ಮ್ಹಾಂಡ್ಚೆಂ ಸಾಧನ್ ಕವಿಚೆಂ?
ಖರೆಂಚ್ ಜಾವ್ನ್ ಜೆದ್ನಾಂ ಕವಿ ಅಪ್ಲ್ಯಾಚ್ ಜಿಣ್ಯೆಚೆರ್ ಗುಂಡಾಯೆನ್ ಪಳೆಂವ್ಚೆಂ ಪ್ರೇತನ್ ಕರ್ತಾ, ತೆದ್ನಾಂ ತಾಕಾ ಥಂಯ್ಚರ್ ಎಕಾವರ್ನಿಂ ಏಕ್ ಕವಿತಾ ಝಳ್ಕತಾ. ಖರೆಂಚ್ ಮ್ಹಣ್ತಾ ಪಂಜಾಬಿ ಸಾಹಿತಿ/ಕವಿ ಜಸ್ಭೀರ್ ಸಿಂಘ್ ಧಿಮಾನ್ "ಹ್ಯಾ ಸಂಸಾರಾಂತ್ ಜಿಯೆಂವ್ಚೊ ಹರ್ಯೆಕ್ ಮನಿಸ್ ಕವಿ. ಥೊಡ್ಯಾಂಚಿಂ ಕವಿತಾ ಹೆರಾಂಕ್ ಪಾವ್ತಾ, ಥೊಡ್ಯಾಂಚಿ ಕವಿತಾ ವೊಂಟಾರ್ಚ್ ಸುಕ್ತಾ ತರ್ ಕೊಣಾಚಿ ಕವಿತಾ ಕಾಳ್ಜಾಂತ್ಚ್ ಮೊರ್ತಾ. ಕೊಣ್ ಉತ್ರಾಂಚೊ ಜಾದೂಗಾರ್ ಅಪ್ಲ್ಯಾ ಉತ್ರಾಂನಿ ತಿ ವ್ಹಾಳಯ್ತಾ ಆನಿ ಹಾಕಾ ಕವಿತಾ ಮ್ಹಣ್ ಲೋಕ್ ಮ್ಹಣ್ತಾ"
ಸಿಜ್ಯೆಸ್ ತಾಕೊಡೆ ಎಕಾ ವೆಗ್ಳ್ಯಾಚ್ ವರ್ಗಾಚೊ ಕವಿ. ವ್ಹಯ್! ಹಾಕಾ ಕವಿ ಮ್ಹಣ್ಚಾಂತ್ಲೊ ಎಕ್ಲೊ ಹಾಂವ್!!
ಜೆರಾಲ್ ರಿತಿನ್ ಹಾಚ್ಯಾ ಎಕೆಕಾ ಕವಿತೆಂನಿ ವಯ್ಲ್ಯಾನ್ ಪಳೆತಾನಾ ಹಾಸೊ ಮಾತ್ರ್ ದಿಸ್ತಾತ್ ತರ್ಯೀ, ಮಾತ್ಸಿ ಗುಂಡಾಯೆಚಿ ನದರ್ ಘಾಲಿ ತರ್, ಹೆರಾಂಚೆರ್, ಸಮಾಜೆಚೆರ್ ಹಾಚೊ ಕಠೀಣ್ ಹುಸ್ಕೊ, ನಿರಾಶಾ, ದೂಕ್ ಎಕಾಚ್ ಮಾಪಾನ್ ಉಮಾಳೊನ್ ಯೆಂವ್ಚೆಂ ದಿಸೊನ್ ಯೆತಾ. ಕವಿಚಿ ಖರಿ ಜವಾಭ್ದಾರಿ ಜಾಗ್ವಣ್ ದಿಂವ್ಚಿ ಮಾತ್ರ್, ಮ್ಹಳ್ಯಾರ್ ಗೊಡ್ಯಾಕ್ ಉದಾಕ್ ಧಾಖಂವ್ಚಿ ಮಾತ್ರ್ ಶಿವಾಯ್ ತೆಂ ಉದಾಕ್ ಪಿಂಯೆಂವ್ಚೆಂ ವಾ ಸೊಡ್ಚೆಂ ತ್ಯಾ ಗೊಡ್ಯಾಚೆಂ ಹಕ್ಕ್. ತಿ ಜಾಗ್ವಣ್ ಪಾಳ್ಚೆಂ ವಾ ಸೊಡ್ಚೆಂ ಸಮಾಜೆಚೆಂ ಹಕ್ಕ್.
ದಿಸಾನ್ದೀಸ್ ಮನ್ಶ್ಯಾಚಿ ಜಿಣಿ ಸಂಕೀರ್ಣ್ ಜಾತೇಚ್ ಆಸಾ. ಹಿ ಪ್ರಗತಿ, ಹಿ ಬದ್ಲಾವಣ್ ಮನ್ಶ್ಯಾಕ್ ದಿಸಾನ್ ದೀಸ್, ಪೆಲ್ಯಾಂ ಖಾತಿರ್ ಸೊಡ್ ಖುದ್ದ್ ಅಪ್ಣಾ ಖಾತಿರ್ಯೀ ವೇಳ್ ದೀಂವ್ಕ್ ಕಶ್ಟ್ ಮ್ಹಳ್ಳೆಪರಿಂ ಜಾತಾನಾ, ಮನಿಸ್ ಚಿಂತುಂಕ್ ವಚಾನಾ - ಭಿಲ್ಕುಲ್ ವೇಳ್ ನಾ. ಅಸಲ್ಯಾ ಪರಿಗತೆಂತ್ ಅಪ್ಲ್ಯಾ ಭಂವ್ತೊಣಿ ಪಳೆಂವ್ಕ್ಯೀ ಕಸೊ ಸಕ್ತಲೊ? ದೆಖುನ್ ಜೀವ್ ಆಸ್ತಾನಾ ಮನ್ಶ್ಯಾಚೆಂ, ವಸ್ತುಚೆಂ ಮೋಲ್ ಸಮ್ಜೊಂಕ್ ತಾಣೆಂ ಮೊರಾಜಯ್. ಆನಿ ಮೊರ್ತಚ್ ಎಕ್ಚ್ ಪಾವ್ಟಿಂ ಮೆಲ್ಲ್ಯಾ ವ್ಯಕ್ತಿಚೆಂ ಬರೆಂಪಣ್ ವಯ್ರ್ ಯೆತಾ. ಪಾವ್ಸಾಳ್ಯಾ ದಿಸಾಂನಿ ಗುಡ್ಯಾಂ ಝರ್ ಫುಟೊನ್ ಆಯಿಲ್ಲೆಪರಿಂ.
ಆತಾಂ ಕವಿ ಸಿಜ್ಯೆಸ್ ತಾಕೊಡೆಚೆಂ ಹೆಂ ಕವಿತಾ ಚೀತ್ ದೀವ್ನ್ ವಾಚ್ಯಾಂ - ಎಕೇಕ್ ಉತಾರ್ ಕಾಳ್ಜಾಕ್ ಲಾಗಾನಾ!? ಎಕೇಕ್ ಉತಾರ್ ಆಮ್ಚ್ಯಾ ಕಾನಾಂಕ್ ಆಯ್ಕೊಂವ್ಚಿ ಶ್ಯಾಥಿ ಆಸಾ ತರ್ ಪ್ರತಿಧ್ವನಿತ್ ಜಾಂವ್ಚಿಂ ಎಕೇಕ್ ಉತ್ರಾಂ ಆಯ್ಕನಾಂತ್?
ಹಾಂವ್ ವೆತಾಂ
ವೆತಾಂ ಹಾಂವ್
ಸಂಸಾರ್ ಸಾಂಡುನ್
ಪಾಟಿಂ ಕೆನ್ನಾಂಚ್ ಯೆಂವ್ಚೊನಾ
ಮೆಲ್ಯಾ ಉಪ್ರಾಂತ್ಲೆಂ ಸುಖ್ ಸೊಡುನ್
ಪಾಟಿಂ ಘುಂವೊಂಕ್ ಜಾಂವ್ಚೆಂನಾ!
ಹಾಸೊ ಮ್ಹಜೊ ಸೊಡುನ್ ವೆತಾಂ
ದುಕಾಂ ನಾತ್ಲ್ಲ್ಯಾ ಸಂಸಾರಾಕ್
ಕೂಡ್ ಮಾತಿಯೆಕ್ ಸಾರೆಂ ಜಾತಾಂ
ರಾಕೊನ್ ನವ್ಯಾ ಆವ್ತಾರಾಕ್!
ಜಿಣಿಯೆಂತ್ ಹಾಂವೆಂ ಕೆಲ್ಲೆಂ ಕಿತೆಂ
ಭಗ್ತಾ ಮ್ಹಾಕಾ ಸಗ್ಳೆಂ ರಿತೆಂ
ಗಂಭೀರ್ಪಣಿಂ ಚಿಂತ್ಲ್ಯಾರ್ ಜಾತೆಂ
ಜಾಂವ್ಚ್ಯಾ ಆಧಿಂ ಫಾಂತೆಂ!
ಭರ್ಪೂರ್ ಹಾಂವೆಂ
ಹಾಸಯ್ಲೆಂ ಲೊಕಾಕ್
ಮ್ಹಜೆಸ್ತಕಿಂ ರಡೊನ್
ಕೊಣ್ಯೀ ಧರ್ಲೊನಾ ಮ್ಹಜ್ಯಾ ಹಾತಾಕ್
ಮೆಲೊಂ ಹಾಂವ್ ಕರ್ಗೊನ್!
ಕವಿತಾ ಮ್ಹಜಿ ವಾಚುನ್ ಜಾತಚ್
ವಾಚ್ಪಿ, ಬರವ್ಪಿ ವಾಖಣ್ತೆಲೆ
ಕೊಂಕ್ಣಿ ಮಾಯೆಕ್ ಕರುನ್ ಗಿರೇಸ್ತ್
ಅಮರ್ ಜಾಲೊ ಮ್ಹಣ್ತಲೆ!
ಕವಿತಾಮೃತ್ - 3
ಸಿಜ್ಯೆಸ್ ತಾಕೊಡೆ
ಜನನ್: 08
ಮಾರ್ಚ್ 1951
ಇಮೇಯ್ಲ್: sequeiracg@hotmail.com
ಪರ್ಗಟ್ ಜಾಲ್ಲೆ ಸ್ವತಾಚೆ ಕವಿತಾಜಮೆ:
ಇಜ್ಮೊಲಾಚಿ ವಾಟ್ಲಿ [ರಾಕ್ಣೊ ಪ್ರಕಾಶನ್]
ಕುಲ್ಕುಲೊ [ಆಶಾವಾದಿ
ಪ್ರಕಾಶನ್ - 2007]
ಹೆರಾಂನಿ
ಸಂಪಾದನ್ ಕರುನ್ ಪರ್ಗಟ್ ಕೆಲ್ಲೆ ಕೊಂಕ್ಣಿ
ಕವಿತಾಜಮೆ:
’ರವಿ ಆನಿ ಕವಿ ’ (1978,
ಸಂ: ಬಾಮ್ಸ್).
’ಕುಪಾಂ ಪೊಂದ್ಲಿಂ ಮುಖಾಂ’ (2003, ಸಂ: ಮೆಲ್ವಿನ್ ರೊಡ್ರಿಗಸ್).
’ಮೊತಿಯಾಂ ಆನಿ ತಾರಾಂ ’ (2005, ಸಂ: ವಲ್ಲಿ ಕ್ವಾಡ್ರಸ್).
’ಸಾಗೊರಾಚ್ಯಾ ವಾಟೆಚ್ಯೊ ಝರಿ’ (2006, ಸಂ: ವಲ್ಲಿ ಕ್ವಾಡ್ರಸ್).
’ಶೆಕ್ಡ್ಯಾಚೊ ಕವಿತಾ’ (2007, ಸಂ: ಮೆಲ್ವಿನ್ ರೊಡ್ರಿಗಸ್).
’ಕಾಳೊಕ್ ನಾತ್ಲ್ಲೊ ಗಾಂವ್’ (2007, ಸಂ: ವಲ್ಲಿ ಕ್ವಾಡ್ರಸ್).
ಲಾಭ್ಲ್ಲಿಂ ಇನಾಮಾಂ/ಪ್ರಶಸ್ಥ್ಯೊ:
’ದುಕಾಂ’
ಬುಕಾಕ್ 1977 ಇಸ್ವೆಂತ್, ಗೊಯ್ಚಿ ಕೊಂಕಣ್ ಭಾಶಾ ಮಂಡಳಿ ಥಾವ್ನ್ ಪ್ರಶಸ್ತಿ.
’ಪಿತುಳ್’ ಬುಕಾಕ್ 1981 ಇಸ್ವೆಂತ್, ಗೊಯ್ಚಿ ಕೊಂಕಣ್ ಭಾಶಾ ಮಂಡಳಿ ಥಾವ್ನ್ ಪ್ರಶಸ್ತಿ.
’ದಾಯ್ಜಿ ದುಭಾಯ್ ಸಾಹಿತ್ಯ್ ಪುರಸ್ಕಾರ್’ (2000 ಇಸ್ವೆಂತ್).
ಸಾಹಿತಿಕ್ ವಾವ್ರ್:
’ಕಾಣಿಕ್’ ಪತ್ರಾಚೊ ಸಂಪಾದಕ್ ಜಾವ್ನ್ ವಾವ್ರ್.
’ರಾಕ್ಣೊ’ ಪತ್ರಾಚೊ ಸಹ-ಸಂಪಾದಕ್ ಜಾವ್ನ್ ವಾವ್ರ್.
’ಉಮಾಳೊ’ ಪತ್ರಾಚೊ ಸಂಪಾದಕ್ ಜಾವ್ನ್ ವಾವ್ರ್.
’ತಾಕೊಡೆಚೆಂ ನೆಕೆತ್ರ್’ ಹಾತ್ ಬರ್ಪಾಚಾ ಪತ್ರಾಚೊ ಸಂಪಾದಕ್ ಜಾವ್ನ್ ವಾವ್ರ್.
ಸಿಜ್ಯೆಸಾಚಿಂ ಕವಿತಾ/ಕಾಣಿ/ಲೇಖನಾಂ:
ಕವಿತಾಝರ್ಚೆರ್ ಪರ್ಗಟ್ ಜಾಲ್ಲೆಂ ತಾಚೆಂ ಎಕಾ ಕಾಳಾರ್ ಮ್ಹಜೆಂ ಮಂಗ್ಳುರ್ ಕವಿತಾ.
ನತಾಲಾಂ ಫೆಸ್ತಾಚಾ ವಿಶೇಸ್ ಪಾನಾಂತ್ ಪರ್ಗಟ್ ಜಾಲ್ಲೆಂ ತಾಚೆಂ ಕುಸ್ವಾರ್ ಕವಿತಾ.
ವ್ಯಾಲೆಂಟೈನ್ಸ್ ದಿಸಾಚಾ ವಿಶೇಸ್ ಪಾನಾಂತ್ ಪರ್ಗಟ್ ಜಾಲ್ಲೆಂ ತಾಚೆಂ ಪೋಲಿ ಪಾದ್ರಿ ಕವಿತಾ.
ಸಿಜ್ಯೆಸ್ ತಾಕೊಡೆಚ್ಯಾ ಚಿಕ್ಲೆಟಾಂಚೆರ್ ಕೆಲ್ಲೆಂ ಏಕ್ ಅಧ್ಯಯನ್ ತಶೆಂಚ್ ತಾಚಿಂ ಚಿಕ್ಲೆಟಾಂ.
ತಾಚ್ಯಾ ಕವಿತಾಂಚೆರ್ ಅಧ್ಯಯನ್ ಕರುನ್ ಕವಿತಾಪಾಠ್ಚೆರ್ ಪ್ರಸ್ತುತ್ ಕೆಲ್ಲಿಂ ಲೇಖನಾಂ.
ಕಥಾದಾಯ್ಜ್ಚೆರ್ ಪರ್ಗಟ್ ಜಾಲ್ಲಿ ತಾಚಿ ಮಟ್ವಿ ಕಾಣಿ ಖುರ್ಸಾ ಗುಡ್ಯಾರ್.
ಮೊಳ್ಬಾವಯ್ಲಿಂ ಸ್ವಪ್ಣಾಂ ಬುಕಾಕ್ ಸಿಜ್ಯೆಸ್ ತಾಕೊಡೆನ್ ಬರಯಿಲ್ಲೆಂ ಸಂಪಾದಕೀಯ್.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.