ಕವಿತಾकविताPoem
’ವೇಸ್ಟ್
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ತಿಂತೆರಾಂತ್ ಪಿಂತುರ್
ಪಿಂತುರ್ - 10
ವಿಶಯ್: ನೀದ್ ಆನಿ ಗೀದ್
ಪಿಂತುರ್, ತಿಂತೆರ್ ಆನಿ ಪ್ರೇರಣಾಂ
ಜಿಯೆಂವ್ಚೊ ಹರ್ಯೆಕ್ ಮನಿಸ್ ಎಕಾ ನ್ಹಂಯ್ ಎಕಾ ರಿತಿಚೆರ್ ಆಪ್ಲ್ಯಾ
ಭಿತ್ಯರ್ಲ್ಯಾ ಚಿಂತ್ನಾಂಕ್ ಅಭಿವ್ಯಕ್ತ್ ಕರ್ತಾ ವೆವೆಗ್ಳ್ಯಾ ಮಾಧ್ಯಮಾಂ ಮುಖಾಂತ್ರ್. ಏಕ್ ಕಲಾಕಾರ್ ಅಪ್ಲ್ಯಾ ಚಿಂತ್ನಾಂಕ್ ಪಿಂತುರಾಂತ್ ಕಯ್ದ್ ಕರ್ತಾ ತರ್ ಏಖ್ ಗಾವ್ಪಿ ಆಪ್ಲ್ಯಾ ತಾಳ್ಯಾಂತ್ ತಿಂ ವ್ಹಾಳಯ್ತಾ ಆನಿ ಏಕ್ ಕವಿ ಎಕಾ ಕವಿತೆಂತ್ ತಿಂ ಪಿಂತ್ರಾಯ್ತಾ. ಆನಿ ಎಕಾ ನ್ಹಂಯ್ ಏಕ್ ರಿತಿಂತ್ ಹಿ ಅಭಿವ್ಯಕ್ತಿ ಮನ್ಶಾಕ್ ಸುಶೆಗ್ ದಿತಾ ಮ್ಹಣ್ಚಾಕ್ ಜಾಯ್ತೆ ದಾಖ್ಲೆ ಆಸಾತ್. ಫಾಮಾದ್ ನೋಬೆಲ್ ಪ್ರಶಸ್ಥಿ ವಿಜೇತ್ ಕವಿ ಟಿ.ಎಸ್.ಎಲಿಯಾಟ್ ಅಪ್ಲ್ಯಾ ಜಿಣ್ಯೆಂತ್ ಎಕಾ ಭೋವ್ ಸಂದಿಗ್ದ್ ಪರಿಗತೆಂತ್ ಸಾಂಪ್ಡೊನ್ ಹ್ಯಾ ಜಿಣ್ಯೆಚೆರ್ ಕಾಂಠಾಳೊ/ತಾತ್ಸಾರ್ ಯೇವ್ನ್ ಅಪ್ಲಿಂ ಚಿಂತ್ನಾಂ ಕಯ್ದ್ ಕರುನ್ ಜೆದ್ನಾಂ ’ವೇಸ್ಟ್ ಲ್ಯಾಂಡ್’ ಕವಿತಾ ಬರಂವ್ಕ್ ಲಾಗ್ತಾ. ಅಶೆಂ ಬರವ್ನ್ ಬರವ್ನ್ ಜೆದ್ನಾಂ ತೆಂ ಕವಿತಾ ಸಂಪ್ತಾ ತೆದ್ನಾಂ ಸಂಪೂರ್ಣ್ ಬರೊ ಜಾತಾ.
(ತಾಚಾ ಹ್ಯಾಚ್ ಕವಿತಾಜಮ್ಯಾಕ್ ನೋಬೆಲ್ ಪ್ರಶಸ್ಥಿ ಲಾಭ್ಲ್ಯಾ).
ಕವಿತಾ ಮ್ಹಳ್ಯಾರ್ ಕಿತೆಂ ಮ್ಹಳ್ಳ್ಯಾ ಸವಾಲಾಕ್ ತರ್ನೊ ಕವಿ
ವಿಲ್ಸನ್ ಕಟೀಲ್ ಅಶೆಂ ಮ್ಹಣ್ತಾ; "ಜೆನ್ನಾ ಜಿಣ್ಯೆಚೊ ಅನ್ಭೋಗ್ ಬೋಂಚ್ ಮಾರ್ತಾ, ಭಗ್ಣಾಂಚಿ ಶಿರ್ ತೊವ್ತಾ, ಥೆಂಬೊ ಥೆಂಬೊ ಪೊಂವ್ತಾ.. ಕವಿತಾ ಘಡ್ತಾ.". ಕವಿತಾ
ಅನ್ಯೇಕ್ಲೊ ತರ್ನೊ ಕವಿ ಮೆಲ್ವಿನ್ ಪೆರ್ನಾಲ್ ಕವಿತಾವಿಶಿಂ ಅಶೆಂ ಮ್ಹಣ್ತಾ; "ಮನಿಸ್ ಸುಖಾಚ್ಯಾ ಲ್ಹಾರಾಂನಿ ಉಪ್ಯೆವ್ನ್ ಆಸ್ತಾನಾ ಚಡಾವತ್ ವಾಚುಂಕ್ - ಬರಂವ್ಕ್ ವಚಾನಾ, ಬಗಾರ್ ಕಷ್ಟಾ ಅನ್ವಾರಾಂಚಿಂ ಕಾಳಿಂ ಮೊಡಾಂ ತಾಚೆರ್
ಧಾಂಪ್ತಾನಾ ವಿರಾರ್ ಜಾವ್ನ್ ಲಿಖ್ಣಿ ಹಾತಿಂ ಧರ್ತಾ."
ಏಕ್ ಕವಿತಾ ವೆವೆಗ್ಳ್ಯಾ ಸಂದರ್ಭಾತೆಕಿದ್ ಉದೆತಾ - ಕವಿಚಿ ವೆವೆಗ್ಳಿ ನದರ್ ಹ್ಯಾ ವೆವೆಗ್ಳ್ಯಾ ಚಿಂತ್ಪಾಕ್ ಪ್ರಚೋದಿತ್ ಕರ್ತಾನಾ ಉದೆಲ್ಲೆಂ ರುಪ್ಣೆಂ ಅಭಿವ್ಯಕ್ತ್ ಕರಿತ್ ತರ್ ತೆಂ ಕವಿತಾ ಜಾಂವ್ಕ್ ಸಕ್ತಾ.
ಹಾಂಗಾಸರ್ ಭೋವ್ ಗರ್ಜೆಚೆಂ ಜಾವ್ನಾಸಾ ಕವಿ ಕಶೆಂ ಅಸಲೆಂ ಚಿಂತಾಪ್ ವ್ಹಾಳಯ್ತಾ ಆನಿ ಕಿತೆಂ ದೆಖೊಂಕ್ ಸಕ್ತಾ ಮ್ಹಳ್ಳೆಂ. ಆಮ್ಚಾಚ್ಚ್ ಭಂವ್ತೊಣೆಚಾ ಸಮಾಜೆಂತ್ ಪ್ರಾಮಾಣಿಕ್ ರಿತಿನ್ ಏಕ್ ನದರ್ ಭಂವ್ಡಾಯ್ಲಿ ತರ್ ಜ್ಯೆ ಕಿತೆಂ ದಿಶ್ಟಿಕ್ ಪಡ್ತಾ ತಾಂತುಂ ಕವಿತಾಚ್ ಕವಿತಾ ಘಡೊನ್ ಯೆತಿತ್. ತಶೆಂ ಮ್ಹಣ್ ಕವಿತಾಂಕ್ ಸೊಭಿತ್ ಸೊಭಿತ್ ಉತ್ರಾಂಚೊ ತುರೊ ವಿಣುನ್ ಏಕ್ ರೂಪ್ ದಿಲ್ಯಾರ್ ತೆಂ ಕವಿತಾ ಜಾಯ್ನಾ. ಕವಿತಾಂತ್ ಜೀವ್ ಗರ್ಜೆಚೊ, ಅತ್ಮೊ ಗರ್ಜೆಚೊ, ಸಾದ್ಯಾ ಮನ್ಶಾಂಚೊ ತಾಳೊ ಗರ್ಜೆಚೊ.
ತಿಂತೆರಾಂತ್ ಪಿಂತುರಾಂತ್ ಹ್ಯಾ ಮಯ್ನ್ಯಾಚೆಂ ಪಿಂತುರ್ ಥೊಡ್ಯಾಂಕ್ ಭೋವ್ ಮಿಸ್ತೆರಾಭರಿತ್ ದಿಸೊಂಕ್ ಪುರೊ, ಥೊಡ್ಯಾಂಕ್ ಎಕಾ ವ್ಯಂಗ್ಯ್ ಚಿತ್ರಾಪರಿಂ ದಿಸೊಂಕ್ ಪುರೊ. ಆನಿ ಕೊಣಾಕ್ ಎಕಾ ಪೇಂಯ್ಟಿಂಗಾಪರಿಂ ದಿಸೊಂಕ್ ಪುರೊ. ತೆಂ ತಾಂತಾಂಚಾ ಚಿಂತ್ಪಾಸಕ್ತೆಚೆರ್ ವ ಚಿಂತ್ಪಾಚಾ ತ್ರಾಣಾಚೆರ್ ಹೊಂದ್ವೊನ್ ಆಸಾ. ಮ್ಹಾಕಾ ಕಿತ್ಯಾಕ್ಗಿ ಹ್ಯಾ ಪಿಂತುರಾಂತ್ ಗಾಡ್ ನಿದೆಂತ್ ಘೊರೆಂವ್ಚೊ ಆಮ್ಚೊ ಲೋಕ್ ದಿಸೊನ್ ಯೆತಾ. ಆಮ್ಚೊ ಲೋಕ್ ಥಕ್ಲಾ, ಪುರಾಸಾಣೆಂತ್ ಪಿಕ್ಲಾ ಆನಿ ಘೊರೆತಾ. ಸಂಸಾರಾಚೆಂ ಕಿತೆಂಚ್ ತಾಂಕಾಂ ಪಡೊನ್ ವಚೊಂಕ್ ನಾ. ಸಂಸ್ರಾಂತ್ ಬೊಂಬ್ ಫುಟ್ತಾತ್ ವೆವೆಗ್ಳ್ಯಾ ನಿಬಾಂನಿ ಗಾಂವಾರ್ ಅಜೂನ್ ರಾಗಾಚೊ-ಫಾರಿಕ್ಪಣಾಚೊ ಉಜೊ ಪೆಟೊನ್ ಆಸೊನ್ ಮನ್ಶಾಪಣಾಕ್ ಲಾಸಿತ್ತ್ ಆಸಾ. ಹ್ಯಾ ಮಧೆಂ ಮನಿಸ್ ಮನ್ಶ್ಯಾಕ್ ಜಾನ್ವಾರ್ ಜಾಲಾ. ಮೋಗ್-ಮಾಯ್ಪಾಸ್ ಬುಕಾಂತ್ಲೆ ಸಬ್ಧ್ ಮಾತ್ರ್ ಜಾಲ್ಯಾತ್. ಸಂಬಂಧ್ ಏಕ್ ಸಬ್ಧ್ ಮಾತ್ರ್ ಜಾವ್ನ್ ಉರ್ಲಾ. ವೆವೆಗ್ಳಿಂ ಆನ್ವಾರಾಂ ಆಯ್ಲ್ಯಾಂತ್. ರಾಜಕೀಯ್ ಫುಡಾರಿ ಫಕತ್ ನಿಬಾಂ ಸೊಧುನ್ ಆಸಾತ್ ಕಶೆಂ ಹ್ಯಾ ತುಟ್ಲೆಲ್ಯಾ ಪರ್ಜೆಕ್ ಪರತ್ ಆನಿ ಪರತ್ ಫುಟಂವ್ಕ್. ಆನಿ ಆಮಿಂ ಲೋಕ್ ಭೋವ್ ಸಲೀಸಾಯೆನ್ ಹ್ಯಾ ವ್ಹಾಳಾಂತ್ ವ್ಹಾಳೊನ್ ವಚೊನ್ ಆಸಾಂವ್ - ಕಿತೆಂಚ್
ಫಿಕಿರ್ ನಸ್ತಾಂ. ಹಿ ನೀದ್ ನಾಸ್ತಾಂ ಆನಿ ಕಿತೆಂ? ಕೊಣ್ ಮ್ಹಣ್ತಾ ನಿದಾಜಯ್ ತರ್ ರಾತ್ ಯೇಂವ್ಕ್ಜಾಯ್ ವ ದೊಳೆ ಧಾಂಪುಂಕ್ ಜಾಯ್ ಮ್ಹಣ್? ಹಾಂಗಾ ದೊಳೆ ಉಘಡ್ನ್ ನೀದ್ ಕಾಡ್ಚಿ ದಿಸೊನ್ ಯೆತಾ.
ಮೆಲ್ವಿನ್ ಜೆ. ವಾಸ್ ಕಿತ್ಯಾಕ್ ಏಕ್ ಪ್ರಭುದ್ದ್ ವಿಮರ್ಶಕ್ ಜಾವ್ನ್ ಉದೆಲಾ? ತಾಚಾ ಚಿಂತ್ಪಾಚಾ ಸಕ್ತೆಚೆಂ ತ್ರಾಣ್ ಪಳೆಯಾ - ತನಿಯಾಚಾ ಶೆತಾಚಿ ಕಾಣಿ ಕಾಂಯ್ ಸರ್ಗಾಕ್ ಬೋಬ್ ಘಾಲ್ತಾಶೆಂ ಭಗ್ತಾ. ತನಿಯಾಚಿ ಆಸ್ತ್ ಬದಿಕ್ ಪಟೆಲಾನ್
ಭಿತರ್ ಘಾಲ್ಯಾ ಆನಿ ಕವಿರಾಯಾಂ ಥಾವ್ನ್ ಅಪ್ಲ್ಯಾ ರಾಜ್ವಟ್ಕೆಚಿಂ ಗಿತಾಂ ಗಾವಯ್ಲ್ಯಾಂತ್ ದೆಕುನ್ ತಾಂಕಾಂ ಉಗ್ತ್ಯಾ ಮಾಟವಾಂತ್ ಗೋಡ್ ಉದ್ಕಾಚಿ ಮರ್ಯಾದ್. ಪುಣ್ ತನಿಯಾಚ್ಯಾ ಗಾಂವಾಂತ್ ಕೊಣಾಕ್ ಫೆಸ್ತ್ ಆನಿ ಕೊಣಾಕ್ ಖ್ಯಾಸ್ತ್! ಹೊ ತನಿಯಾ ಆನಿ ಪಟೆಲ್ ಆಮ್ಚಾ ಭಂವ್ತೊಣಿ, ರಾಸ್ ರಾಸ್ ಭರೊನ್ ಗೆಲ್ಲ್ಯಾ ಹ್ಯಾ ಕಾಳಾರ್ ತನಿಯಾಚಿ ಬೋಬ್ ಕೊಣಾಚಾ ಕಾನಾಂಕ್ ಘಾಜತ್ ಆನಿ ಘಾಜ್ಲ್ಯಾರ್ಯ್ ಕೊಣ್ ತ್ಯಾ ಬೊಬೆಕ್ ಲೆಖಿತ್ ಮ್ಹಳ್ಳೆಂ ಅನ್ಯೇಕ್ ಸವಾಲ್ - ಪುಣ್ ಮೆಲ್ವಿನ್ ಜೆ. ವಾಸ್ ಹಾಚೆಂ ಹೆಂ ಕವಿತಾ ಎಕಾ ಲಾಂಬ್ ಕಾಣ್ಯೆಕ್ ಸಾಂಗೊನ್ಂಚ್ ವೆತಾ.
ಬಾಯ್ ಪ್ರಿಯಾ ಸಿಕ್ವೇರಾ ಲಗ್ಭಗ್ ದೇಡ್ ವರ್ಸಾಧಿಂ ಕವಿತಾ ಬರಂವ್ಕ್ ಶಿಕ್ಲ್ಲಿ. ಹ್ಯಾ ದೇಡ್ ವರ್ಸಾಂನಿ ತಾಚಾ ಚಿಂತ್ಪಾಧಾರೆನ್ ಖರೆಂಚ್ ಸಭಾರಾಂಕ್ ವಿಜ್ಮಿತ್ ಕೆಲಾಂ. ಕವಿತಾ ಮ್ಹಳ್ಯಾರ್ ಫಕತ್ತ್ ಸಬ್ಧಾಂಚ್ಯೊ ಥೊಡ್ಯೊ ವೊಳಿ ಮಾತ್ರ್ ನ್ಹಂಯ್ ಮ್ಹಳ್ಳೆಂ ಭೋವ್ಶಾ ಹಿಕಾ ಸಮ್ಜಾಲಾಂ ದೆಖುನ್ ಹರ್ಯೆಕ್ ಪಾವ್ಟಿಂ ತಿಚಾ ಕವಿತೆಂತ್ ಪ್ರಾಮಾಣಿಕ್ ವ್ಹಾಡಾವಳ್ ದಿಸೊನ್ ಯೆತಾ. ತಿಚೆಂ ’ನಿದೊಂಕ್ ಸೊಡ್ಗಾ ಮ್ಹಾಕಾ’ ಕವಿತಾ ಹಾಚಿ ರುಜ್ವಾತ್.
ಕವಿ ಆರ್ಯನ್ ತಾಕೊಡೆ - ಆಯ್ಲೆವಾರ್ ಉದೆವ್ನ್ ಆಯಿಲ್ಲೊ ಕಾವ್ಯಾಳ್ ಕೊಂಬ್ರೊ ತರ್ಯ್ ಹಾಚಾ ಕವಿತಾಂತ್ ಆಶ್ಚಿ ಸಕತ್ ತರ್ಯ್ ಪಳೆಯಾ. ಹ್ಯಾ ಪಾವ್ಟಿಂ ಗಿದಾಚಿ ಚತ್ರಾಯ್ ದಿತಾ ಎಕಾ ಕೊಂಬ್ಯೆಕ್. ಪುಣ್ ಸಾಂಕೇತಿಕ್ ರಿತಿನ್ ಜಾಯ್ತೆಂ ಸಾಂಗೊಂಕ್ ಪ್ರೇತನ್ ಕೆಲ್ಲೆಂ ದಿಸ್ತಾ.
ಮಾಲ್ಘಡೊ ಕವಿ ಕಾವ್ಯಾದಾಸ್ ಹ್ಯಾ ಪಾವ್ಟಿಂ ಅಪ್ಲೆಂ ಕವಿತಾ ಘೆವುನ್ ಆಯ್ಲಾ ಮ್ಹಣ್ತಾನಾ ತಿಂತೆರಾಂತ್ ಪಿಂತುರಾಂ ಅಂಕ್ಡ್ಯಾಕ್ ಖರೆಂಚ್ಚ್ ನವೊ ಸುರ್ಯೊ ಉದೆಲ್ಲೆಪರಿಂ ಭಗ್ತಾ.
’ಜಿಣ್ಯೆ ಸುರ್ಯೊ ಬುಡ್ಲಾ’ ಭೊವ್ಶಾ ಕಾವ್ಯಾದಾಸಾಕ್ ಹೆಂ ಪಿಂತುರ್ ಹ್ಯೊ ಇಮಾಜ್ಯೊ ಧಾಖಯ್ತಾ.
ಕವಿ ಪ್ರಸನ್ನ್ ನಿಡ್ಡೊಡಿ ಹಾಕಾ ಹೆಂ ಪಿಂತುರ್ ’ಫುಲ್ ಆನಿ ಭ್ರಮರ್’ ಪರಿಂ ದಿಸ್ತಾ ಆನಿ ಆಯ್ಚಾ ರಾಜಕೀಯ್, ಸಾಮಾಜಿಕ್ ವೆವಸ್ತೆಚೆರ್ ಸಾಂಕೇತಿಕ್ ರಿತಿಚೊ ಅರ್ಸೊ ಧರ್ತಾ.
ಕವಿ ಆಸ್ಟಿನ್ ಪ್ರಭು ಆನಿ ಕವಯತ್ರಿ ವಾಯ್ಲೆಟ್
ಬಾಯ್ ಎದೊಳ್ ಪರ್ಯಾಂತ್ ಹರ್ಯೆಕಾ ಮಯ್ನ್ಯಾಂತ್ ಪ್ರೇರಣ್ ಜೊಡುಂಕ್ ಪಾವ್ಲ್ಲಿಂ ಮ್ಹಣ್ಚಾಕ್ ದುಭಾವ್ ನಾ. ಕವಿ ಆಸ್ಟಿನ್ ಪ್ರಭುಕ್ ಹ್ಯಾ ಪಿಂತುರಾಕ್ ಪಳೆವ್ನ್
’ಕಾಂಯ್ಂಚ್ ಸಮ್ಜಾನಾ’ ಮ್ಹಣ್ತಾ ತರ್ಯ್ ವಾಯ್ಲೆಟ್ ಬಾಯೆಚಾ ಕವಿತೆಂತ್ಲಿ ಸಾಲ್ ಕೆದಿಂಚ್ ಮುಗ್ದಾನಾತ್ಲ್ಲಿ ಕಾಣಿ ಸಾಂಗೊನ್ಂಚ್ ವೆತಾ. ಸಂಸಾರಾಂತ್ ಜಾನ್ವಾರಾಂಕ್ ಜಿವ್ಶಿಂ ಮಾರ್ಚಾಕ್ ಸವಾಲ್ ಕರ್ಚೆ ಮನ್ಶಾಕ್ ಜಿವ್ಶಿಂ ಮಾರ್ತಾನಾ ರಾವೊನ್ ತಮಾಸೊ ಪಳೆತಾ. ಮನ್ಶಾಪಣಾಚಾ ಮೊಲಾಕ್ ಹ್ಯಾ ಸಂಸಾರಾಂತ್ ಸ್ಥಾನ್-ಮಾನ್ ನಾ ಮ್ಹಳ್ಳೆಂ ಮಟ್ವ್ಯಾನ್ ಅಪ್ಲ್ಯಾ ಕವಿತೆಂತ್ ಉಚಾರ್ತಾ.
ಕವಿ ವಿನ್ಸಿ ಮೆಲ್ಕಾರ್ ಹಾಣೆಂ ಇಲ್ಲಿ ಚಡ್ ತಕ್ಲಿ ಖೊರ್ಪಿಲ್ಲಿ ತರ್ ತಾಚಾ ಕವಿತೆಂತ್ಯ್ ಕಾಂಯ್ ಇಲ್ಲೆಂ ತ್ರಾಣ್ ಯೆತೆಂ. ಫುಡೆಂ ಅಸಲೆಂ ಪ್ರೇತನ್ ಕರುಂದಿ ಮ್ಹಣ್ ಆಶೆತಾಂ.
ಕವಯತ್ರಿ ನಂದಿನಿ ಹಿಣೆಂ ಹ್ಯಾ ಪಿಂತುರಾಕ್ ನವೊ ಜೀವ್ ದಿಲಾ ಮ್ಹಣ್ಚೆಂ ’ನಿದೆಂತ್ ರಿಗ್ಲ್ಲೊ ಗೀದ್’ ಕವಿತೆಂತ್ ದಿಸೊನ್ ಯೆತಾ. ಕಾಂಯ್ ಇಲ್ಲೆಂ ಅಪ್ರೂಪಾಯೆಚೆಂ ಸ್ತ್ರೀ ಸಂವೇದನ್ ಕೊಂಕ್ಣೆಂತ್ ದಿಸೊನ್ ಯೆತಾನಾ ದೆವಾಕ್ಚ್ ಸವಾಲ್ ಕರ್ತಾ;
’ಆದಾಂವ್ಚಾ ಕುಶಿಚಿ ಬೋರ್ ಕಾಡ್ನ್ ಯೆವೆಕ್ ರಸ್ಚಾಧಿಂ ಕಾಂಯ್ ಥಂಯ್ಚರ್ ಗೀದ್ ಲಿಪೊನ್ ಬಸ್ಲ್ಲೊಗೀ?’ ಮ್ಹಣ್. ಹ್ಯಾ ಕವಿತೆಕ್ ಪರತ್ ಪರತ್ ವಾಚ್ತಾನಾ ಎಕೆಕ್ ಕಾಣಿ ದಿಸ್ತಾ ಮಾತ್ರ್ ನ್ಹಂಯ್, ಅಸ್ಕತ್ ಸ್ತ್ರೀಯೆಚಿ ಬೋಬ್ ಸ್ವಷ್ಟ್ ಆಯ್ಕಾತಾ ಆನಿ ತ್ಯಾ ಬೊಬೆಪಾಟಿಂ ಆಮ್ಚೊಚ್ ಖಾಸ್ ಭಯ್ಣ್ಯೊ, ಬಾಯ್ಲ್ಯೊ, ಆವಯೊ ದಿಸ್ತಾತ್ ತರ್ಯ್ ಆಮ್ಚಾ ದೊಳ್ಯಾಂಕ್ ಆಮಿಂಚ್ ಪಟ್ಟಿ ಬಾಂಧ್ಲ್ಯಾ.
ಇತ್ಲ್ಯಾ ಅಪುರ್ಭಾಯೆಚೆಂ ಕವಿತಾ ಬರಯಿಲ್ಲ್ಯಾ ಹಿಚೆಂ ಕವಿತಾ ಖರೆಂಚ್ ’ಮಯ್ನ್ಯಾಚೆಂ ಕವಿತಾ’ ಜಾವ್ನ್ ವಿಂಚೊನ್ ಯೆತಾಸ್ತಾಂ ತಿಕಾ ಉಲ್ಲಾಸ್.
[ವಾಂಟೆಲಿ ಜಾಲ್ಲಿಂ]
10. ಕಾವ್ಯಾದಾಸ್.
1. ನಿದೆಂತ್ ರಿಗ್ಲ್ಲೊ ಗೀದ್? [ಮಯ್ನ್ಯಾಚೆಂ ಕವಿತಾ]
ನಂದಿನಿಮಾತಿಯೆ
ಮನ್ಶಾಚಿ ಪಯ್ಲ್ಲಿ
ಪಯ್ಲಿ ರಾತ್
ನಾ ಘಡ್ಗಡೊ ಜಗ್ಲಾಣೆಂ, ಜಳ್ಚಿ ವಾತ್
ದಿಲ್ಲಿ ತಾಕಾ ಸರ್ವೆಸ್ಪರಾನ್ ತಾಚಿ ಪಯ್ಲಿ ನೀದ್
ತಾಚಿಚ್ ತಿ ಮಾಯಾ ಯಾ ಪಯ್ಲೆ ನಿದೆಚಿ ಕಾಯಾ
ನಿದೊನ್ ಪಡ್ಲೊ ಮನಿಸ್ ಚುಕ್ಲ್ಲೆಬರಿ ಮತ್
ಬೋರ್ ಏಕ್ ಕಾಡುನ್ ಅಶಿ ಏವೆಕ್ ತಾಣೆಂ ರಚ್ಲಿ ತಶಿ
ಮಿಸ್ತೆರ್ ಚಿಂತುನ್ ಮನ್ಶಾಜಾತ್ ಅಜೂನ್ ಆಸಾ ಪಿಶಿ
ಆದಾಂವ್ಕ್ ಏವ್ ಮೆಳ್ಳಿ, ತಿ ಮೆಳ್ಳಿ ಸಗ್ಳ್ಯಾ ಮನ್ಶಾಜಾತಿ
ತಿಚ್ ದೇವಿ, ತಿಚ್ ಮಾರ್, ತಿಚ್ ವೇದಿ, ತಿಚ್ ಬಲಿ
ಜಳೊನ್, ಬುಡೊನ್, ಕರ್ಗೊನ್ ಆಸಾತ್ ಭಾಯ್ರ್ ಭಿತರ್ ತಿಚಿಂ ಮೊಡಿಂ
ಉದಯಪುರಾಚಾ ಭರ್ತ್ಯಾ ಉಗ್ತ್ಯಾ ತಳಿಯೆಂತೀ
ಉಟೊನ್ ಪಡ್ಚಿಂ ಮೊಡಿಂ, ರುಪಾಂ ತ್ಯಾಚ್ ಏವೆಚಿಂ
ಪಿರಾಣ್ ದೆವಾನ್ ತಾಂಚೆರ್ ಫುಂಕ್ಲ್ಲೊ ವೊಡ್ಲೊ ಖಂಯ್ಚಾ ಗಿದಾಂನಿ?
ಮಾತಿಯೆ ಕೂಡ್ ಖಾಂವ್ಚೆ ಗೀದ್ ಉಪಾಶಿಂ ಉಬ್ತಾತ್ ಆಕಾಸಾರೀ
ಏವಾಂಚೆ ಪಿರಾಣ್ ಖೆಲ್ಲೆ ಗೀದ್ ಬಸ್ಲ್ಯಾತ್ ಲಿಪೊನ್ ಮನ್ಶಾರುಪಾರೀ.
ಬಾಪಾ ತುಂವೆ ಮನ್ಶಾಕ್ ರಚ್ಲೊಯ್
ನಿತಳ್ ನಿಸ್ಕಳ್ ಮೂಟ್ ಮಾತಿಯೆನ್
ಪಿರಾಣ್ ತುಜೊ ಫುಂಕುನ್ ತಾಚೆರ್
ಮಾತಿಯೆ ಮುದ್ಯಾಕ್ ಜೀವಂತ್ ಕೆಲೊಯ್
ಪಯ್ಲೆ ನಿದೆಂತ್ ಕುಡಿಂತ್ ತಾಚಾ... ಕಾಂಯ್ ರಿಗ್ಲ್ಲೊಗಾಯ್ ಗೀದ್?
2. ಶ್ಶ್! ಜಾಗ್ರುತ್!! [ಆರ್ಯನ್, ತಾಕೊಡೆ]
ಅಗೇ ಕೊಂಬಿಯೆ...
ಮೊತಿಯಾಂ ಮಾಣ್ಕಾ ಸಾರ್ಕ್ಯಾ ಪಿಲ್ಕಾಟಾಂಕ್
ಘೆವುನ್ ಸೆಜಾರಾ ಸವಾರಿ ವಚುನಾಕಾಯ್!
ತಾಳೊ ಪಿಂಜುನ್ ಘೀಳ್ ದಿಂವ್ಚ್ಯಾ ಗಿದಾಕ್
ಪಿಲ್ಕಾಚಾಂ ಫುಕಟ್ ಉಂಡಿ ಕರಿನಾಕಾಯ್!
ಅಗಾ ಮನ್ಶ್ಯಾ...
ಊಠ್, ದೊಳೆ ಸೊಡ್ ಜಾಗೊ ಜಾ
ಅಂತಿಮ್ ಕಾಳ್ ಉಂಬರ್ ಉತ್ರೊನ್ ಆಸಾ!
ನಿಸಣ್ ತರೀ ಅಶಿರ್, ಲಾಂಬ್ ದೀಗ್ ಆಸಾ
ಸಂಕಟ್ ಯೆತಾನಾ ವೆಗಿಂ ಯೆಂವ್ಚೊನಾ ವೆಂಕಟ್ರಮಣ!
ಅಳೆಗಾ ಗಿದಾ..
ಕಿತ್ಯಾಕ್ ತಿತ್ಲೊ ಊಂಚ್ ಉಭ್ತಾಯ್?
ಸುರ್ಯಾ ದಾವೆಕ್ ರಗತ್ ದಿತಾಯ್..?
ನಾಕಾತ್ ತುಕಾ ಮಾಸೂಮ್ ಪಿಲ್ಕಾಟಾಂ!
ವ್ಹಚ್ಗಾ ಏಕ್ ಪಾವ್ಟಿಂ ಇರಾಕಾಕ್!
ಅಳೆಯಾ ಕಿಡ್ಯಾನೊ..
ಆತಾಂ ತರೀ ಮ್ಹಜೊ ಜೀವ್ ಸ್ಥಬ್ಧ್ ಜಾಲಾ!
ಸಾಸ್ಣಾಚ್ಯಾ ನಿದೆಕ್ ಮೊಡೆಂ ಜಾವುನ್ ನಿದ್ಲಾಂ!
ಹಳ್ತಾರ್ ಪೊಕುರಾ.. ಹಳ್ತಾರ್ ಭೊಕಾಯಾ!
ಕುಶಿನ್ ನಿದ್ಲೆಲ್ಯಾಕ್ ಉಪಾದ್ರ್ ಜಾಯ್ತ್..!
3. ತನಿಯಾಚಾ ಶೆತಾಂತ್! [ಮೆಲ್ವಿನ್ ಜೆ. ವಾಸ್, ಕೆಲರಾಯ್]
ಗಾಂವಾಂತ್ ಮಿಸ್ತಾ ಫೆಸ್ತ್
ದೆಕುನ್ ದಿಸ್ತಾ ಸಗ್ಳೆಂಚ್ ದುರುಸ್ತ್!
ತನಿಯಾಚಾ ಶೆತಾಕ್ ಸೊಭಿತ್ ತಾಸುನ್
ತರ್ನಿಂ ಪಾನಾಂ ವಿಣುನ್ ತೋರ್ಣಾಂ ಬಾಂದ್ಲಾಂ
ಪಟೆಲಾಚಾ ಘರ್ಚಾ ಆಂಗ್ಣಾಂತ್ ದಿವೆ ಚಡವ್ನ್
ಶ್ಹೆರಾ ಥಾವ್ನ್ ಬೊಂಬ್ಯಾ ನಾಚವ್ಪ್ಯಾಂಕ್ ಹಾಡ್ಲಾಂ.
ಚಾಮ್ಡಿಂ ವೊಡುನ್ ಮೊಡ್ಕೆಚಿಂ ತೊಂಡಾಂ ಬಾಂದ್ತೆಲೆ
ಗುಮ್ಟಾಂ ಘೆವ್ನ್ ಮಾಂಚಿಯೆರ್ ಚಡ್ತಾತ್
ಗಾನಾಂ ಗಾಂವ್ಕ್ ಕವಿಂಕ್ ಜಮಯ್ಲೆಲೆ
ಘೊಂಕ್ಚಾ ಸೊಣ್ಯಾಂಕ್ ಧಾಂವ್ಡಾಂವ್ಕ್ ದಾರು ಲಾಸ್ತಾತ್.
ಗಾಂವಾಂತ್ ಮಿಸ್ತಾ ಫೆಸ್ತ್
ದೆಕುನ್ ದಿಸ್ತಾ ಸಗ್ಳೆಂಚ್ ಗಡ್ದ್!
ಸಗ್ಳ್ಯಾ ಗಾಂವ್ಚಾ ಲೊಕಾಕ್ ಫೆಸ್ತಾಕ್ ಆಪಯ್ಲಾ
ತಾಸ್ಲೆಲ್ಯಾ ಶೆತಾಕ್ ವೊಡ್ಲೆಲ್ಯಾ ರಂಗಾರ್ ಬಸಯ್ಲಾ
ಕಾನ್ ದೊಳೆ ತೋಂಡ್ ಉಗ್ತೆ ದವರುಂಕ್ ಲಾಯ್ಲಾ
ಗುಮ್ಟಾಂಚಾ ತಾಳಾಕ್ ಬೊಂಬ್ಯಾಂಚೊ ಮೇಳ್
ಕವಿಂಚಾ ಕಾವ್ಯಾಂನಿ ಪಟೆಲಾಚಿ ದಯಾಮಯಾ
ಗಾಂವಾಂತ್ ಮಿಸ್ತಾ ಫೆಸ್ತ್
ದೆಕುನ್ ದಿಸ್ತಾ ಸಗ್ಳೆಂಚ್ ಗವ್ಜ್!
ವೇಳ್ ಮಧ್ಯಾನೆಚಾ ಉಂಬ್ರಾರ್ ಪಾವ್ಲಾ
ಶೆತಾಚೊ ರಂಗ್ ಮಾಜ್ವೊನ್ ಆಯ್ಲಾ
ಥಕ್ಲೆಲ್ಯಾ ಬೊಂಬ್ಯಾಂಕ್ ಮಾಟೊವಾ ಪಾಟ್ಲ್ಯಾನ್ ಮಾಂದ್ರೆರ್ ನಿದಾಯ್ಲಾ
ತೋರ್ಣಾಚೆಂ ಪಾನ್ ಫಾಂತ್ಯಾ ದೊವಾಕ್ ಮುರ್ಗುಟೊನ್ ಆಂಕುಡ್ಲಾಂ
ಮಾಂಚಿಯೆರ್ ಗುಮ್ಟಾಂ ಚಾಮ್ಡೆಂ ಏರೆವ್ನ್ ಯೆತಾ
ಕವಿರಾಯಾಂಕ್ ಗೋಡ್ ಆನಿ ಉದ್ಕಾಚಿ ಮರ್ಯಾದ್ ಚಲ್ತಾ
ಗಾಂವ್ಚಾ ಆವಾಜಾಕ್ ಘೊಂಕುನ್ ಥಕ್ಲ್ಲೆಂ ಸುಣೆಂ
ರಾಂದ್ಣಿಮುಳಾಂತ್ ಗೊಬ್ರಾಕ್ ಉಸ್ತುಂಕ್ ಲಾಗ್ಲಾಂ
ಇತ್ಲೆಂ ಸಗ್ಳೆಂ ಜಾಲ್ಯಾರ್ಯ್
ಪಟೆಲಾಚಾ ದಭಾಜ್ಯಾಕ್ ಆಪಯಿಲ್ಲೊ ಗಾಂವ್ಚೊ ಲೋಕ್
ಅಜೂನ್ ತನಿಯಾಚಾ ಶೆತಾಕ್ ವೊಡ್ಲೆಲ್ಯಾ ರಂಗಾರ್ ಬಸ್ಲಾ
ಕಾನ್ ದೊಳೆ ತೋಂಡ್ ವಿಸ್ರೊನ್ ಪಳೆಂವ್ಚಾರ್ಚ್ ಪಡ್ಲಾ
ಗಾಂವಾಂತ್ ಮಿಸ್ತಾ ಫೆಸ್ತ್
ದೆಕುನ್ ದಿಸ್ತಾ ಹಿ ಸದಾಂಚಿ ಖ್ಯಾಸ್ತ್!
4. ನಿದೊಂಕ್ ಸೊಡ್ಗಾ ಮ್ಹಾಕಾ [ಪ್ರಿಯಾ ಸಿಕ್ವೇರಾ, ಫೆರಾರ್ ]
ಪಾಕ್ಯಾಚೊ ತೊ ಕೊಲು
ಆಧಾರಾಕ್ ಘಾಲ್ಲಿ ಫಳಿಂ
ಕುಂಬು ಜಾವ್ನ್
ವಾಳಯ್ ಯೇವ್ನ್ ಮುಸ್ಕರಾರ್
ಚರ್ತಾ ಮ್ಹಣಾಸರ್
ಹಾಂವ್ಗಾ ಸಾಯ್ಬಾ
ನಿದೊನ್ ಘೊರೆತಾಂ ಹಾಂಗಾಂ!
ಪಾವ್ಸ್ ವೊತ್ಲೊ
ವಾರೆಂ ವಾದಾಳ್ ಆಯ್ಲೆಂ
ಘಡ್ಗಡೊ ಝಗ್ಲಾಣೆಂ ಘರ್ಜಾಲೆಂ
ಉಜೊ ಪೆಟೊನ್
ಲಾಸ್ತಾ ಮ್ಹಣಾಸರ್
ಹಾಂವ್ ಗಾ ಸಾಯ್ಬಾ
ನಿದೊನ್ ಘೊರೆತಾಂ ಹಾಂಗಾ!
ಕೆದ್ನಾಂ ಜಾಗ್ ಜಾಯ್ತ್ ಮ್ಹಾಕಾ
ಪಾಕ್ಯಾಚಿ ಆಡಿಂ, ಕುಲೊ ನಪಂಯ್ಚ್ ಜಾಲ್ಯಾಂ ಉಪ್ರಾಂತ್?
ಘಡ್ಗಡ್ಯಾ ಝಗ್ಲಣ್ಯಾನ್ ಘರಾಚೆಂ ಪಂಚಾಂಗ್ ಪರ್ತಿಲ್ಯಾ ಉಪ್ರಾಂತ್?
ಜಾಪ್ ಆಶಿಗಾ ಮ್ಹಜಿ
"ಹಾಂವ್ ಗಾ ಸಾಯ್ಬಾ ನಿದೊನ್ ಆಸಾಂ ಸೆಜಾರ್ಯಾಚ್ಯಾ ಘರಾಂತ್
ಕುಂಬು ಜಾಲಾಂ ತಾಚೆಂ ಪಾಕೆಂ
ಘಡ್ಘಡೊ ಮಾರ್ಲಾ ತಾಚ್ಯಾ ಘರಾಕ್
ತರ್ ಹಾಂವ್ ಕಿತ್ಯಾಕ್ ಗಾ
ನಿದೆಂತ್ಲೆಂ ಉಟೊಂ
ಮ್ಹಜ್ಯಾ ಘರಾಕ್ ಆಸಾ ಟೆರೆಸ್
ಪಂಚಾಂಗ್ ಮ್ಹಜೆಂ ಭಾರಿಚ್ಚ್ ಬಳಿಷ್ಟ್
ತುಂಮಿಂ ಕೋಣ್ ಗಾ ನಿದೆಂತ್ಲೆಂ ಉಟಂವ್ಚೆಂ ಮ್ಹಾಕಾ
ತುಂಮಿಂ ವಚಾ ನಿದಾ ಸುಶೆಗಾತ್
ಆನಿಂ ಮ್ಹಾಕಾಯಿ ನಿದೊಂಕ್ ಸೊಡಾ ಗಾ!!!
5. ನೀದ್ ಆನಿ ಗೀದ್ [ವಾಯ್ಲೆಟ್ ಜೆ. ಪಿರೇರಾ]
ಸಂಸಾರಾರ್ ಆತಂಕಾಚೆ ಗೀದ್ ಕಿತ್ಲೆ ಭರ್ಲ್ಯಾತ್
ರಾಷ್ಟ್ರಾಂಚೆ ಮುಖೆಲಿ ದೊಳೆ ದಾಂಪುನ್ ನಿದ್ಲ್ಯಾತ್
ಧರ್ತಿ ಮಾಂಯ್ ತಿಂ ದುಃಖಾ ಕಿತ್ಲಿಂ ಗಳಯ್ತಾ
ಅಪ್ಲ್ಯಾ ಭುರ್ಗ್ಯಾಂಕ್ ಹರ್ಯೆಕ್ ಘಡ್ಯೆ ಹೊಗ್ಡಾಯ್ತಾ
ಆತಂಕವಾದಿ ಗೀದ್ ಉಭ್ತಾತ್ ಕರುಂಕ್ ಸಂಸಾರ್ ನಾಸ್
ಹಾಂಕಾರಾನ್ ಫಾರಿಕ್ಪಣಾಕ್ ರಾಕೊನ್ ಆಸ್ಚೆ ಖೊಟೆ ಮನಿಸ್
ನಾ ಹಾಂಚೆಲಾಗಿಂ ಕಾಳಿಜ್, ನಾ ಉಲವ್ಣೆ ಮೊಗಾಳ್
ಆಸಲ್ಯಾ ಮನ್ಶ್ಯಾಂ ಮಧೆಂ ಉರ್ತಲೊಗೀ ಸಂಸಾರ್ ಜಿವಾಳ್
ಟ್ರೇನಾರ್, ಪ್ಲೇನಾರ್ ಸಾಂಖಳ್ ಬಾಂಬ್ ದವ್ರುನ್
ನಿರ್ದೋಶ್ಯಾಂಕ್ ಪಾವಯ್ತಾತ್ ಮರ್ಣಾನ್, ಸಾಸ್ಣಾ ಫೊಂಡಾಕ್
ತಾಂತ್ಲೆ ಥೊಡೆ ವಾಂಚ್ತಾತ್ ವಿಸ್ವೆ ಹೊಗ್ಡಾವ್ನ್
ಕಶ್ಟಾರ್ ಘಾಲ್ತಾತ್ ನಿರ್ದೋಶಿ ಮನ್ಶ್ಯಾಂಕ್
ಮನ್ಶ್ಯಾ ಮಾಸಾಕ್ ಗ್ರಾಸುಂಕ್ ಆಯ್ತೆ
ಭರ್ಲ್ಯಾತ್ ಸಂಸ್ರಾರ್ ಗೀದ್ ತೆಂ ಕಿತ್ಲೆ
ಗೊರ್ವಾಂ ಹತ್ಯಾ, ಮಾಸ್ ಖಾಂವ್ಚಾಕ್ ಉಳ್ಟೆ
ಪುಣ್ ಮನ್ಶ್ಯಾ ಹತ್ಯಾಕ್ ಪಳೈನಾಂತ್ ಪಾಟಿಂ ಫುಡೆಂ
ದಿಸಾನ್ ದೀಸ್ ಜಾತಾ ಮನ್ಶ್ಯಾಚಿ ಹತ್ಯಾ
ನಿದೆಂತ್ ಗೊರೆವ್ನ್ ಮೌನ್ಪಣಿ ದೆಖ್ತಾತ್ ಕೃತ್ಯಾಂ
ಧರ್ತಿ ಮಾಯೆಚೆ ಉಸ್ಕೆ ಜಾತಾ ಕೊಣ್ಣಾ ರಿತೆಂ
ಬಾಳಾಂಕ್ ಹಜ್ರಾಂನಿ ಹೊಗ್ಡಾವ್ನ್ ದಿಸಾನ್ ಪುರ್ತೆಂ
6. ಮ್ಹಾಕಾ ಕಾಂಯ್ಚ್ ಸಮ್ಜಾನಾ [ಆಸ್ಟಿನ್ ಪ್ರಭು]
ಸಗ್ಳೊ ದೀಸ್ಸ್ ಕಾಮ್ ಕರುನ್ ನೀದ್ ಮ್ಹಾಕಾ ಯೆತಾನಾ
ಘಡ್ಯೆ ಘಡ್ಯೆ ತೋಂಡ್ ಮ್ಹಜೆಂ ವ್ಹಡ್ ಜಾಂಬಾಯ್ ಕಾಡ್ಟಾನಾ
ನಿದೆಕ್ ಆನಿಂ ತೋಂಡಾಕ್ ಮ್ಹಜ್ಯಾ ಕಿತೆಂ ಸಂಬಂಧ್ ಆಸಾಗಾಯ್
ಚಿಂತಾಲೊಂ ಹಾಂವ್ ಸಂಶೋಧನ್ ಹಾಚೆಂ ಕರುಂಕ್ ಜಾಯ್
ಪೆಟೊ ಕಸೊ ಸುಸು ಕರ್ತಾಂ ಅಪ್ಲೊ ಪಾಂಯ್ ಆಪ್ಸೊಚ್ ಉಕಲ್ತಾ
ಕಾತ್ತೆಂ ಕೋಣೀ ಪಾಟ್ಲ್ಯಾನ್ ಆಯ್ಲ್ಯಾರ್ ಪಾಂಯ್ ಉಕಲ್ನ್ ಧುಂಕಳ್ತಾ
ರಾತ್ ಜಾಲ್ಲಿಚ್ ಕಾಜುಲ್ಯಾಚ್ಯಾ ಕುಲ್ಯಾಂನಿ ಪ್ರಕಾಸ್ ಉಜಳ್ತಾ
ಸಾಂಜ್ ಜಾತಚ್ಚ್ ಲಜೆ ಕಾಂಟಿ, ಪಾನಾಂ ದೊಡುನ್ ನಿದೊಂಕ್ ವೆತಾ
ರಾತ್ ಜಾವ್ನ್ ಯೆತಾಂ ಕಿಡಿ, ಕಿರಿ ಕಿರಿ ಆವಾಜ್ ಕರುಂಕ್ ಲಾಗ್ತಾತ್
ರಸ್ತ್ಯಾವಯ್ಲೆ ಭಿಕಾರಿ ಗ್ರೇಸ್ತಾಂಕ್ ಪಳೆಲ್ಲ್ಯಾಕ್ಷಣ್
ಭಿಕ್ ಮಾಗ್ತಾತ್
ಗಡಂಗಾ ಥಾವ್ನ್ ಭಾಯ್ರ್ ಯೇವ್ನ್ ಬೆಬ್ದೆ ತಾಂಚ್ಯೆಇತ್ಲ್ಯಾಕ್ ಉಲಯ್ತಾತ್
ಪಾವ್ಸ್ ಪಡ್ತಚ್ ಗಾಂಯ್ದೊಳ್ ಸಗ್ಳೆ ಧರ್ಣಿ ವಯ್ರ್ ಯೇವ್ನ್ ಹುಳ್ವುಳ್ತಾತ್
ಈಟ್ ನಾಸ್ತಾಂ ತಾಯ್ಕುಳೊ ತೊ ರಸ್ತ್ಯಾ ದೆಗಾಂನಿ ಬರೊ ಸೊರ್ಕೆತಾ
ಪಯ್ಸೆ ನಾಸ್ಲ್ಲೊ ಎಮ್ಮೆಲ್ಲೆ ವರ್ಸಾ ಭಿತರ್ ಬಂಗ್ಲೊ ಬಾಂಧ್ತಾ
ಆಕಾಸಾವಯ್ಲೊ ಗೀದ್ ರಭಸಾನ್ ಕೊಂಬ್ಯೆ ಪಿಲಾಕ್ ಘೆವ್ನ್ ಧಾಂವ್ತಾ
ಕಾಳೊಕ್ ಜಾತಚ್, ದೊಳೆ ಧಾಂಪ್ತಚ್ ಬಾಯ್ಲ್ ಮ್ಹಜಿ ತಿ ಘೊರೆತಾ
7. ನೀದ್ ಆನಿ ಗೀದ್ [ವಿನ್ಸಿ, ಮೆಲ್ಕಾರ್]
ಹಾಂವೆಂ ಮ್ಹಜೆ ವಯ್ಲೆ ಕಷ್ಟ್
ಸಾಂಗ್ಲೆ ಹೆರಾಂಕಡೆ
ಥೊಡೆ ಘುಂವೊನ್ ಗೆಲೆ
ಕಾನ್ ಧಾಂಪ್ಲೆ ಥೊಡ್ಯಾಂನಿ
ಹಾಂವ್ ಆತಾಂ ಕಿತೆಂ ಕರುಂ?
ಹಾಡಾಂ ಪಿಟೊ ಕರುನ್ ಘೊಳ್ಲ್ಲೆಂ
ಸರ್ವಸ್ವ್ ಮ್ಹಜೆಂ ಖಂಯ್ ಗೆಲೆಂ?
ಮ್ಹಜ್ಯಾಂನಿ ಮ್ಹಾಕಾಚ್ ಸಾಂಡುನ್ ಘಾಲೆಂ
ಜೆದ್ನಾಂ ಉಜ್ವಾಡಾಚ್ಯಾ ವಾಟೆನ್ ಚಲ್ತಾಂ
ಅಂಧ್ಕಾರ್ ಯೆವುನ್ ಆಡ್ ರಾವ್ತಾ..
ಬರ್ಯಾ ನಿತಳ್ ವಾಟೆನ್, ಕಾಂಟೆ ತೊಪ್ತಾನಾ
ದೊಳ್ಯಾಂನಿ ಝರಿಚ್ಯೊ ನಂಯೊ ವ್ಹಾಳ್ತಾತ್..
ಆಶೆವ್ನ್ ಆಸ್ತಾಂ ತ್ಯಾ ಸಮಧಾನೆಕ್
ಥೊಡೆ ಪಾವ್ಟಿಂ ಉಸ್ವಾಸ್ ವೊಡ್ತಾ
ವಯ್ರ್ ಸಕಯ್ಲ್ ಭಿರಾಂತಿನ್ ಹೆಂ ಚಿಂತುನ್
ನೀದ್ ಫಾರ್ಲೆಲ್ಯಾ ತ್ಯಾ ಗಿದಾನ್?
8. ಫುಲ್ ಆನಿ ಭ್ರಮರ್ [ಪ್ರಸನ್ನ್, ನಿಡ್ಡೋಡಿ]
ಭ್ರಮರ್ ತುಂ, ಭಂವರ್ ಮಾರುನ್ ಫುಲಾಂಕ್ ಭುಲೊನ್..
ಲೆಕಿನಾಸ್ತಾಂ ಕಾಂಟೆ, ನಾಂ ಲೆಗುನ್ ಫಾಂಟೆ-ಕುಂಟೆ
ಮಸ್ತಿ ಫುಲ್, ಚಿಂವೊನ್ ಮೇಲ್, ಪರ್ವಾನಾಸ್ತಾಂ ಮೋಲ್
ಮೊಂವ್ ಖಾಲಿ, ಫುಲ್ ಭಾಲಿ, ತುಂ ಸತತ್ ಆಮಾಲಿ..!
ಜಲ್ಮಾಂಗ್ಣಾಂತ್ ಕಾಡುನ್ ಬಿಳ್ಕೆಂ, ವೊಂಪುನ್ ಭಿಂ ಉಗ್ತೆಂ..
ಭಾತಾ ಸಾಲ್ ಮೊಸ್ಳುನ್, ಕರುನ್ ಪಿಡ್ಡ್ಯಾರ್ ಪುರ್ತೆಂ
ಏಕ್ ಸೊಡುನ್, ದುಸ್ರೆಂ ಮಸ್ತುನ್, ಆಂಬೊರ್ಪಿಕೊ ಹಾಸೊನ್
ಘೊಟ್ಟಾ ಸೊಭಾಯ್, ದಿತಾ ಆರಾಬಾಯ್, ಮಾರುನ್ ’ಗಿದಾ-ರಾಯ್.!’
ವ್ಹಾ.. ರಚ್ಲಾಂ ತುಕಾ ಕರುಂಕ್ ಫಕತ್ತ್ ನಕ್ಲಾಂ..?
’ತಾಣೆಂಯೀ’ ಚಿಂತ್ಲೆಂನಾ ಆಸ್ತೆಲೆಂ, ನವಾಲ್ ಕಿತೆಂ ಮುಖ್ಲೆಂ
ಖೆಳ್ಕುಳಾಂನಿ ನಾಚೊನ್, ಚಂಚಲ್ ಉಡಿಯೆರ್ ವಿಭಾಡ್ತಾಯ್ ಸುಖ್
ಭಗುನ್ ಕಾಮುಕಿ ಭುಕ್, ’ನಿದೆಂತ್’ ಉಪ್ಯೆಂವ್ಚ್ಯಾ ಫುಲಾಂಚಿ..!
ಪಳೆ.. ಆಯ್ಚ್ಯಾ ಸಂಸಾರಾಚಿ ಪರಿಗತ್.. ಅಶಿ..
ಪರಿಸ್ಥಿತೆಕ್ ಆದ್ಳೊನ್ ದುಬ್ಳೊ ದಾಕ್ಟೊ ಕಾಡ್ತಾ ’ನೀದ್’
ಗ್ರೇಸ್ತ್-ರಾಜಕಾರಣಿ ಸಂದರ್ಭ್ ಘೆವ್ನ್ ಜಾತಾ ನ್ಹಂಯ್ಗಿ ’ಗೀದ್’..
9. ಸುಶೆಗಾತ್ ನಿದಾ [ವಲ್ಲಿ ಕ್ವಾಡ್ರಸ್]
ಚೋರ್ ಆಯ್ಲಾ ಚೊರುಂಕ್ ಲಾಗ್ಲಾ ಜಾಗೆ ಆಸ್ಚಾಂನೊ ಸುಶೆಗಾತ್ ನಿದಾ
ಕಿತೆಂಯ್ ಬಾಕಿ ಸೊಡ್ಲ್ಲೆಂ ವಿಸರ್ನ್ ಸೊಡಾ ಆನಿ ಸುಶೆಗಾತ್ ನಿದಾ
ತಿಂತೆರಾಂತ್ ಪಿಂತುರಾಂನಿ ಆಯ್ಚೊ ಸಂಸಾರ್ ಕಂಯ್ ಲಿಪ್ಲಾ
ಸಂಸ್ರಾಕ್ ಗುಳೆ ಘಾಲಾ ಸರ್ವ್ ಕವಿಂನೊ ತುಮಿ ಸುಶೆಗಾತ್ ನಿದಾ
ಗಾಂವಾಂತ್ ಬೊಂಬ್ ಫುಟ್ಲ್ಯಾತ್ ಗಾಂವಾರ್ ಗಾಂವ್ ಲಾಸ್ತಾ
ವಂದೇ ಮಾತರಮ್ ಪದಾಂ ಗಾಯಾ ಆನಿ ಸುಶೆಗಾತ್ ನಿದಾ
ಕೊಂಕ್ಣೆಕ್ ’ಏಕ್ ಲಿಪಿ’ ವಾದ್ ಮಾಂಡ್ತೆಲ್ಯಾಂಕ್ ಆತಾಂ
ಬಾಪುಯ್ ಕೊಣ್ ವಿಚಾರ್ನ್ ಸೊಡಾ ಆನಿ ಸುಶೆಗಾತ್ ನಿದಾ
’ಕುರ್ವೆಂ’ ಪತ್ರಾಕ್ ತುಜ್ಯೊ ಕವಿತಾ ಸಮ್ಜನಾಂತ್ ಕಂಯ್ ’ಕ್ವಾಡ್ರಸ್’
ಬೆಕೂಫಾಂಕ್ ಸಂಪಾದಕ್ ಕರಾ ತುಮಿ ಆನಿ ಸುಶೆಗಾತ್ ನಿದಾ.
10. ಜಿಣ್ಯೆ ಸುರ್ಯೊ ಬುಡ್ಲಾ [ಕಾವಾದಾಸ್]
ಥಂಯ್ಸರ್ ವಡಾ ರುಕಾ ಮುಳಾಂತ್, ದೊನ್ಪಾರಾಂಚ್ಯಾ ವೊತಾಕ್
ನಿತ್ರಾಣ್ ನಿರ್ಗತ್ ಬಸ್ಲಾ ಪಳೆ, - ಲುಗ್ಟಾಂ ಪಾಂಯಾಂಕ್, ಹಾತಾಕ್
ಭುಕೆನ್, ತಾನೆನ್ ಕಾಣ್ಶಿರ್ತಾ ತೊ, ದೊಳೆ ಗೆಲ್ಯಾತ್ ಫೊಂಡಾಕ್
ಸುರ್ಯೊ ಬುಡ್ಲಾ ತಿಸ್ರ್ಯಾನ್ ತಾಣೆ ಹಾತ್ ವ್ಹರ್ನಾಸ್ತಾಂ ತೊಂಡಾಕ್
ಭಂವ್ತಿಂ ತಾಚ್ಯಾ ಸುಣಿಂ ಮಾಜ್ರಾಂ, ತೊಂಡಾರ್ ಮೂಸ್, ಜಳಾರಿ
ಮೊನ್ಯಾ ಜಾತಿಕ್ ಸಾಂಗಾತ್ ತಾಚೊ, ಮನ್ಶ್ಯಾಂಕ್ ನಾಕಾ ತರೀ
ತ್ಯಾ ಖರ್ ವೊತಾಕ್ ದೊಳ್ಯಾಂ ಮುಕಾರ್, ತಾಚೆ ಜಿಣಿಯೆ ವೊತಾಂ
ದಿಸ್ತಾತ್ ತಾಕಾ - ಘರಾಂ ತಾಚಿಂ, ಭುಂಯ್ ಭಾಟ್, ಬಾರಾ ಜೊತಾಂ
ಗಾಂವಾರ್ ಆಸ್ಲೊ ಸಾಯ್ಬ್ ಗುರ್ಕಾರ್ ತೊ - ಪರ್ಬುಲು, ನಾಗೆರೆ
ದುಡ್ವಾಚೆಂ ಮೊಲ್ ನೆಣಾಸ್ಲೊ ತೊ - ಜಶೆಂ ಪಾವ್ಸಾಂತ್ ಘರೆ
ಸೊರೊ, ಮಾಸಾಂ, ಫೆಸ್ತ್ ಪಕ್ವನಾಂ, ಸಕ್ಕಡ್ ಸುಕವ್ನ್ ಗೆಲಿಂ -
ಭುರ್ಗಿಂ ತಾಚಿಂ, ಆವಯ್ ಸಂಗಿಂ, ಸೊರ್ಯಾನ್ ಅಕಾಲ್ ಮೆಲಿಂ
ನಿರಾಧಾರ್ಯಾಕ್ ಕೊಣೀ ತಾಕಾ ದಾಕಯ್ನಾ ಆಜ್ ವಳೊಕ್ -
ಜಿಣ್ಯೆ ಸುರ್ಯೊ ಬುಡ್ಲಾ ತಾಚೊ - ಸಗ್ಳ್ಯಾನ್ ಆಂಧ್ಕಾರ್ ಕಾಳೊಕ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.