ಕವಿತಾकविताPoem
ವರ್ಸಾಂತ್
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕವಿತಾಪಾಠ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳ್ಯಾಚಾ ಸವಿಸ್ತಾರ್ ವಿವರಾಂಕ್ ಹ್ಯಾ ಪಾನಾಕ್ ಭೆಟ್ ದಿಯಾ
ಕವಿತಾಪಾಠ್ ಎಕಾ ವರ್ಸಾಂತ್ ಚಲೊನ್ ಆಯಿಲ್ಲಿ ರೀತ್
ಕವಿ - ಕವಿತಾ - ಆನಿ ಪಾಠ್
[ಕೊಂಕ್ಣಿ, ಇಂಗ್ಲೀಶ್, ಹಿಂದಿ ಭಾಸಾಂನಿ ದೊನ್ಶಾಂ ವಯ್ರ್ ಕವಿತಾ ಬರಯ್ಲ್ಯಾಂತ್. ’ಚಾರ್ ಮುಖಾಂ’, ’ಕಟ್ಪುತ್ಳಿ’ ಮ್ಹಳ್ಳೆ ದೋನ್ ಕವಿತಾಜಮೆ ಪರ್ಗಟ್ಲ್ಯಾತ್, ’ದರ್ಭಾರಾಂತ್ಲಿ ಫಿಂರ್ಗೊಣ್’ ವೆಗಿಂಚ್ ಪರ್ಗಟ್ಚಾರ್ ಆಸಾ. ತಾಚಿಂ ಕವಿತಾ ’ಕುಪಾಂ ಪೊಂದ್ಲಿಂ ಮುಖಾಂ’, ’ಕಾಳೊಕಾಂತ್ಲಿಂ ಕಾಂತಾರಾಂ’ ಆನಿ ’ನವರತ್ನ’ ಬುಕಾಂನಿ ಪರ್ಗಟ್ಲ್ಯಾಂತ್. ಆಂಡ್ರು ಎಲ್ ಡಿ’ಕುನ್ಹಾಚಾ ’ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ’, ಎಚ್ಚೆಮಾಚಾ ’ಕಯ್ದ್ಯಾಚ್ಯೊ ಕವಿತಾ’, ಇಕ್ರಾ ಕವಿಂಚಾ ’ಮೊತಿಯಾಂ ಆನಿ ತಾರಾಂ’ ಆನಿ ಕವಿತಾ ಅಧ್ಯಯನ್ ಲೇಖನಾಂಚಾ ’ಕವಿತಾಪಾಠ್ ಬಾಗ್-1’ ಬುಕಾಚೆಂ ಸಂಪಾದಕ್ಪಣ್ಯ್ ಹಾಣೆಂ ಕೆಲಾಂ.
ವಲ್ಲಿ ಕ್ವಾಡ್ರಸ್, ಅಜೆಕಾರ್
ಮ್ಹಜಾ ಮತಿಂತ್ ಏಕ್ ಚಿಂತಾಪ್ ಆಸ್ಲ್ಲೆಂ, ಪಾಟ್ಲ್ಯಾ ಲಗ್ಬಗ್ ವೀಸ್ ವರ್ಸಾಂ ಥಾವ್ನ್ ಹಾಂವ್ ಕೊಂಕ್ಣಿ ಕಾಣ್ಯೊ, ಕಾದಂಬರಿ ಬರಯ್ತಾಲೊಂ. ಥೊಡಿಂ ರಜಿಸ್ತ್ರ್ ಕವಿತಾಯ್ ಬರಯಿಲ್ಲಿಂ ತರ್ಯ್ ತಾಂಕಾಂ ಪೋರ್ ಮ್ಹಣಾಸರ್ ಕವಿತಾಚ್ ಮ್ಹಣ್ ವೊಪುನ್ ಘೆತ್ಲ್ಲಿಂ ತರ್ಯ್ ಕವಿತಾಂಕ್ ಚಡಿತ್ ಸಮ್ಜಾಜಾಯ್ ಮ್ಹಳ್ಳಿ ಆಶಾ ಆಸ್ಲ್ಲಿ ಪುಣ್ ವಾಟೊ ನಾತ್ಲ್ಲ್ಯೊ. ಹ್ಯಾ ಖಾತಿರ್ ಕಸಲ್ಯಾಯ್ ಸಾಹಿತಿಕ್ ಸಂಸ್ಥ್ಯಾಂನಿ ಯಾ ಸಂಚಾಲನಾನಿ ಮುಖೇಲ್ಪಣ್ ಘೆತ್ಲ್ಲೆಂಯ್ ನೆಣಾಂ, ಘೆತ್ಲಾಂಯ್ ತರ್ ಫಕತ್ತ್ ವರ್ಸಾಕ್ ಎಕಾ ದಿಸಾಚೆಂ ಶಿಭಿರ್ ಕರುನ್ ಏಕ್/ದೋನ್ ವೊರಾಂಭಿತರ್ ಕಾಣ್ಯೊ, ಕವಿತಾ, ವಿಡಂಬನಾಂ, ಸಂಪಾದಕಾಂಕ್ ಪತ್ರಾಂ, ಪತ್ರಾಂಕ್ ವರ್ಧ್ಯೊ ಬರಂವ್ಚೆವಿಶಿಂ ರೈಲಾಂ ಸೊಡ್ನ್ ಬುಟ್ಟಿ ಚಾಕ್ರಿ ಕರ್ಚಾ ಶಿಭಿರಾಂನಿ ಮ್ಹಾಕಾ ಕಿತ್ಯಾಕ್ಗೀ ಪಾತ್ಯೆಣಿಂಚ್ ನಾತ್ಲ್ಲಿ. ಪಯ್ಲೆಂ ಅಸಲ್ಯಾ ಶಿಭಿರಾಂನಿ ಸಂಸ್ಥ್ಯಾಚೊ ಖರೊ ಇರಾದೊ ಕಸಲೊಯ್ ಆಸೊಂ, ಹಾಂತುಂ ಭಾಗ್ ಘೆತೆಲ್ಯಾಂಕ್ ಹಾಂತುಂ ಚಾರ್ ಸಾನ್ನಾಂ ಆನಿ ದೋನ್ ಪೊಡಿ ದುಕ್ರಾಮಾಸಾಚೆಂ ಮಂಗ್ಳುರಿ ರುಚಿಕ್(?) ಜೆವ್ಣಾಶಿವಾಯ್ ಹೆರ್ ಕಿತೆಂಯ್ ಮೆಳ್ತಾಗೀ ಮ್ಹಳ್ಳೊ ದುಭಾವ್ ಮ್ಹಜಾ ಮತಿಂತ್ ಆಸ್ಲ್ಲೊ. ಆನಿ ಹಾಕಾಚ್ಚ್ ಕೊಂಕ್ಣಿ ಸೆವಾ ಕೆಲಿ ಮ್ಹಣ್ ದಾಂಗ್ರೊ ಮಾರ್ಚೊ. ತಿತ್ಲೆಂಚ್ ಕಿತ್ಯಾಕ್ ಹಾಕಾ ವ್ಹಯ್ ಮ್ಹಣ್ ಹೂಂ ಕುಟ್ಟುಂವ್ಚಿಂಯ್ ಕಾಂಯ್ ಉಣಿಂಗಿ?
ಕವಿ ಮಿರ್ಜಾ ಘಾಲಿಬಾನ್ ಖರೆಂಚ್ ಸಾಂಗ್ಲಾಂ ’ದುನಿಯಾಮೆ ಬೇವಕೂಫೊಂಕಿ ಕಮಿ ಹೆ ಕ್ಯಾ, ಏಕ್ ಕೊ ಡೂಂಡೊ, ಹಜಾರ್ ಮಿಲ್ತೆ ಹೈ’. ಆಸೊಂ! ಗೊಂಗೊ ವರುಂ ತ್ಯಾ ಮಿರ್ಜಾ ಘಾಲಿಬಾಕ್. ಆಮಿ ಆಮ್ಚಾ ಕೊಂಕ್ಣಿ ಸೆವೆಕ್ ಪಾಟಿಂ ಯೆವ್ಯಾಂ;
’ಗತ್ ನಾತ್ಲ್ಲ್ಯಾಕ್ ಮತ್ ನಾತ್ಲ್ಲೊ ಬರೊ’ ಮ್ಹಳ್ಳೆಪರಿಂ, ಅಸಲೆಂ ಗತಿಗಟ್ಟಚೆಂ ಕಾಮ್ಯ್ ಜಾಯ್ನಾತ್ಲ್ಲ್ಯಾ ಹ್ಯಾ ಸುಡ್ಕಾಡಾಂತ್ ಕೊಂಕ್ಣಿ ಫುಲಂವ್ಚಿ ಸೊಡ್, ಆಮ್ಚಿ ಕೊಂಕ್ಣಿ ಉರಂವ್ಚಿಯ್ ತಿತ್ಲಿ ಸಲೀಸ್ ನ್ಹಯ್. ತರ್ಯ್ ಹಾಂವ್ ಕಾಂಯ್ ಕಾಳೊಕಾಕ್ ದುರ್ಸೊಂವ್ಚೊ ಆನಿ ಅಪ್ಲೆ ಹಾತ್ ಭಾಂದುನ್ ಬೊಸ್ಚೊಂ ನ್ಹಯ್, ಮ್ಹಜಾ ತಾಂಕಿಪ್ಱರ್ಮಾಣೆ ಜ್ಯೆ ಕಿತೆಂ ಆಸಾ ತೆಂ ಕರುಂಕ್ ಪ್ರೇತನ್ ಕರ್ಚೊಂ. ಬೊಂಬೊಂಯ್ತ್ ಪಾಂಚ್-ಸ ವರ್ಸಾಂ ಶಿಕ್ಶಕ್ ಜಾವ್ನ್ ವಾವ್ರ್ ಕೆಲ್ಲ್ಯಾಂತ್ ಜಾವ್ಯೆತ್, ಸಾಂಗಾತಾ ಶಿಕ್ಚೆಂ ಕಿತ್ಯಾಕ್ಗೀ ಮ್ಹಾಕಾ ಪಸಂದ್. ’ಕಾಳೊಕಾಕ್ ದುರ್ಸನಾಕಾ ಬಗಾರ್ ವಾತ್ ಪೆಟಯ್’ ತತ್ವ್ ಕಿತ್ಯಾಕ್ಗೀ ಮ್ಹಾಕಾ ಚಡ್ ಆಂವಡ್ತಾ, ದೆಕುನ್ಂಚ್ ಹಾಂವ್ ತವಳ್ ತವಳ್ ಫೊಂಡಾಂತ್ ಪಡೊನ್ ಆಸಾಂ ಆನಿ ಹ್ಯಾ ಖಾತಿರ್ ರಾಖೊನ್ ಆಸ್ಚಾಂಕ್ ತಾಳಿಯೊ ಪೆಟುನ್ ತಾಂಚಾ ದರ್ಭಾರಾಂನಿ ಹಾಸೊಂಕ್ ನೀಬ್ ಜಾಯ್ ಪಳೆ.
ಆಸೊಂ! ತಾಂಚೆಂ ದರ್ಭಾರ್ ಅಶೆಂಚ್ ಆಸೊಂ. ಮ್ಹಾಕಾ ಮ್ಹಜೆಂ ಕಾಮ್ ಕರುನ್ ಗೆಲ್ಯಾರ್ ಜಾಲೆಂ, ಕವಿತಾಪಾಠ್ - ಅಸಲೆಂಚ್ ಚಿಂತಾಪ್ ಮ್ಹಜಾ ಮತಿಂತ್ ಕಿರ್ಲೊನ್ ಯೇಂವ್ಕ್ ಪ್ರೇರಣ್ ದಿಲ್ಲೆಂ ಜಾವ್ನಾಸಾ ಈಶ್ಟ್ ಎಚ್ಚೆಮಾನ್. ತಾಣೆಂ ಫಕತ್ ಮ್ಹಜಾ ಮತಿಕ್ ಎಕಾ ಚಿಂತ್ಪಾಚೆಂ ಭಿಂ ವೊಂಪ್ಲೆಂ ಮಾತ್ರ್. ಆನಿ ತೆಂ ಭಿಂ ಮ್ಹಜಾ ಮತಿನ್ ವೊಪುನ್ ಘೆತ್ಲ್ಲೆಪ್ರಕಾರ್ ಮುಖಾರುನ್ ವರುಂಕ್ ಪ್ರೇತನ್ ಕೆಲೆಂ. ಆಜ್ ಎಕಾ ವರ್ಸಾಕ್ ಸಂಪವ್ನ್ ದುಸ್ರ್ಯಾ ವರ್ಸಾಕ್ ಪಾಂಯ್ ತೆಂಕ್ತಾನಾ ಆಮಿಂ ಕವಿತಾಪಾಠಾಂತ್ ಕಿತೆಂ ಸಾಧನ್ ಕೆಲಾಂ ಮ್ಹಳ್ಳೆಂ ಆಮ್ಚೆಲಾಗಿಂ ಸವಾಲಾಂ ಕರ್ಚಿ ಗರ್ಜ್ ಉದೆಲ್ಯಾ.
ಮಹಾಭಾರತಾಂತ್ಲಿ ಏಕಲವ್ಯಚಿ ಕಾಣಿ ತುಮಿಂ ಆಯ್ಕಲ್ಯಾ ಜಾವ್ಯೆತಾ, ತೊ ತವಳ್ಚಾ ಶ್ರೇಷ್ಟ್ ಮೆಸ್ತ್ರಿ ಜಾವ್ನಾಸ್ಲ್ಲ್ಯಾ ಧ್ರೋಣಾಚಾರ್ಯಲಾಗಿಂ ಅಪ್ಣಾಕ್ ಧೊಣ್ವಿ(ಬಿಲ್ಲು) ವಿಧ್ಯಾ ಶಿಕ್ಚಿ ಆಶಾ ವೆಕ್ತ್ ಕರ್ತಾ ತರ್ಯ್ ಧ್ರೋಣಾಚಾರ್ಯ ಏಕಲವ್ಯಕ್ ಶಿಕಂವ್ಕ್ ಕಬೂಲ್ ಜಾಂವ್ಕ್ ನಾ ದೆಕುನ್ ಏಕಲವ್ಯ ಕಿತೆಂ ಕರ್ತಾ? ಅಪ್ಲ್ಯಾ ಘರ್ಚಾ ಆಂಗ್ಣಾಂತ್ ಧ್ರೋಣಾಚಾರ್ಯಚಿ ಪುತ್ಳಿ ದವ್ರುನ್ ತಾಚೆಮುಖಾರ್ ತಿ ವಿಧ್ಯಾ ಶಿಕ್ತಾ ಆನಿ ಎಕಾ ದಿಸಾ ತ್ಯಾಚ್ ಧ್ರೋಣಾಚಾರ್ಯಚಾ ಅತ್ತ್ಯುತ್ತಮ್ ಮಿಧ್ಯಾರ್ಥಿ ಜಾವ್ನಾಸ್ಲ್ಲ್ಯಾ ಅರ್ಜುನಾಕ್ ಸಲ್ವಾಯ್ತಾ.
ಹಿ ಏಕ್ ಕಾಣಿ - ಚಡಾವತಾಂಕ್ ಕಾಂಯ್ ಏಕ್ ಪೊಟ್ಟು ಕಾಣಿ ಮ್ಹಳ್ಳೆಪರಿಂ ದಿಸೊಂಕ್ ಪುರೊ. ಪುಣ್ ಹ್ಯಾ ಕಾಣ್ಯೆಕ್ ಆನಿ ಕವಿತಾಪಾಠಾಕ್ ಕಸಲೊ ಸಂಬಂಧ್? ಅಶ್ಟಮಿ ಪರ್ಬೆಕ್ ಆನಿ ಕಾಸಿಮ್ ಸಾಯ್ಭಾಕ್ ಸಂಭಂದ್ ನಾ - ಖರೆಂ. ಹ್ಯಾ ಕಾಣ್ಯೆಥಾವ್ನ್ ಮ್ಹಜೆ ವಿಚಾರ್ ಹೆ - ಶಿಕ್ಚಿ ಉರ್ಭಾ ಆಸ್ಲ್ಯಾರ್, ಶಿಕ್ಚೆಂ ಸಾಧನ್ ಕರುಂಕ್ ಮನ್ ಆಸ್ಲ್ಯಾರ್ ವಾಟೊ ಸಭಾರ್ ಆಸಾತ್ ಮ್ಹಣ್ ಸಾಂಗ್ಚೊ. ಶಿಕ್ಚಿ ಉರ್ಭಾ ನಾತ್ಲ್ಲ್ಯಾಕ್ ಕೊಣೆಂಯ್ ಶಿಕಂವ್ಕ್ ಜಾತಾವೆ ತರ್? ಭೋವ್ಶಾ ಕವಿತಾಪಾಠ್ ಅಸಲ್ಯಾಚ್ ಕಾಣ್ಯೆಕ್ ಲಾಗ್ಸಿಲ್ಯಾನ್ ತಾಳ್ ಪಡ್ತಾ. ಅಶೆಂ ಮ್ಹಣ್ ಮ್ಹಾಕಾ ಕಾಂಯ್ ಅಸಲ್ಯಾ ಖಂಚಾಯ್ ಧ್ರೋಣಾಚಾರ್ಯನ್ ಇನ್ಕಾರ್ ಕೆಲೆಂ ಮ್ಹಳ್ಳೊ ಮ್ಹಜೊ ಅರ್ಥ್ ನ್ಹಯ್, ಜೆದ್ನಾಂಯ್ ಮ್ಹಜಿಂ ಕವಿತಾ ವಾಚುನ್ ತಾಚೆರ್ ಅಪ್ಲಿ ಪ್ರತಿಕ್ರಿಯಾ ದಿಂವ್ಚಾಂತ್ ಮಿತ್ರಾಂನಿ ಎಚ್ಚೆಮ್ ಜಾಂವ್, ಆಂಡ್ರು ಜಾಂವ್, ಮೆಲ್ವಿನ್ ರೊಡ್ರಿಗಸ್ ಜಾಂವ್ ಹಾಣಿಂ ಕೆದ್ನಾಂಯ್ ಇನ್ಕಾರ್ ಕರುಂಕ್ ನಾ. ತರ್ಯ್ ಅಪ್ಣಾಕ್ ಏಕ್ ಅಸಲೆಂ ಏಕ್ ಸಂವಾದಾಚಿ ಗರ್ಜ್ ಆಸ್ಲ್ಲಿ, ಆಮಿಂ ರಚ್ಲ್ಲ್ಯಾ ಸಾಹಿತ್ಯಾಚೆರ್ ಎಕಾಮೆಕಾ ಸಂವಾದ್ ಕರ್ಚೊ, ಎಕಾಮೆಕಾ ಸಂವಾದ್ ಕರುನ್ ಎಕಾಮೆಕಾಚಾ ಸಾಹಿತಿಕ್ ವಾಡಾವಳೆಕ್ ಕಾರಾಣ್ ಜಾಂವ್ಚೊ. ಆನಿ ಹ್ಯಾ ಇರಾದ್ಯಾನ್ ಉದೆಲ್ಲೆಂಚ್ ಹೆಂ ಕವಿತಾಪಾಠ್.
ಮ್ಹಾಕಾ ಹಾಂತುಂ ಕೊಣ್ ಆಯ್ಲಿಂ ಆನಿ ಕೊಣ್ ಗೆಲಿಂ ಮ್ಹಳ್ಳೆ ಚುರ್ಚುರೆ ನಾಂತ್, ಬಗಾರ್ ಸಂತೊಸ್ ಆಸಾ, ಕಿತ್ಯಕ್ ಮ್ಹಳ್ಯಾರ್ ಅಸಲ್ಯಾ ಚಿಂತ್ಪಾಚಿಂ ಮಾತ್ರ್ ಹಾಂತುಂ ಉರೊಂಕ್ ಸಕ್ತಾತ್, ಲಂಕ್ಡಾಕ್ ಲಂಕಡ್ ಮಾತ್ರ್ ಧರ್ತಾ ಪ್ಲಾಸ್ಟಿಕ್ ನ್ಹಯ್, ಭಾಂಗಾರಾಕ್ ಭಾಂಗಾರ್ ಮಾತ್ರ್ ಧರ್ತಾ ಲಂಕಡ್ ನ್ಹಯ್. ಹಾಂತುಂ ಕಸಲೆಚ್ ಹುದ್ದೆ ನಾಂತ್ ತರ್ಯ್ ಜವಾಬ್ಧಾರಿ ಆಸಾತ್, ಹಾಂತುಂ ಕೊಣಾಕ್ಯ್ ಕಸಲಿಚ್ ಬಂದಡ್ ನಾಂ ತರ್ಯ್ ಕಾಮಾಂ ಕರ್ತೆಲ್ಯಾಂಕ್ ಜಾಯ್ತಿಂ ಕಾಮಾಂ ಆಸಾತ್.
ಮ್ಹಾಕಾ ಭೋವ್ ಸಂತೊಸ್ ಆನಿ ಅಭಿಮಾನ್ ಭೊಗ್ತಾ ಜೆದ್ನಾಂ ಮೆಲ್ವಿನ್ ಜೆ ವಾಸ್ ಕೆಲರಾಯ್ ತಸಲ್ಯಾಕ್ ಎಕಾ ವಿಮರ್ಶಕಾಚಾ ನದ್ರೆನ್ ಹೆರಾಂ ವಳ್ಕತಾನಾ, ಜೊಮೆಲಾಕ್ ಎಕಾ ಕವಿಚಾ ನದ್ರೆಂತ್ ಹೆರಾಂ ಮಾನ್ ದಿತಾನಾ, ಪ್ರಿಯಾಚಾ ಕವಿತಾ ಬರಂವ್ಚಾ, ಉಲವ್ಪಾಚಾ ತಾಲೆಂತಾಚೆರ್ ಹೆರಾಂ ಗುಣ್-ಗಾನಾಂ ಗಾಯ್ತಾನಾ, ವೀಣಾಚಾ, ಲೆಸ್ಲಿಚಾ ಉಲವ್ಪಾವಿಶ್ಯಾಂತ್ ಹೆರಾಂ ಹೊಗ್ಳಿಕ್ ದಿತಾನಾ ಆಂಟನಿಚಾ ಮಟ್ವ್ಯಾ ಕಾಣ್ಯೆವಿಶ್ಯಾಂತ್ ಯಾ ಹೆರಾಂಚಾ ಎಕೆಕಾ ರಿತಿಚಾ ದೆಣ್ಯಾಂಚೆ ಉಲ್ಲೇಕ್ ಕರ್ತಾನಾ. ಪುಣ್ ಹಾಚೊ ಅರ್ಥ್ ಹೊ ನ್ಹಯ್ಕೀ ಕವಿತಾಪಾಠಾಂತ್ ಆಯಿಲ್ಲೆವರ್ವಿಂ ಹಾಂಕಾಂ ಹಿಂ ದೆಣಿಂ ಫಾವೊ ಜಾಲಿಂ ಮ್ಹಣ್. ಕವಿತಾಪಾಠ್ ಏಕ್ ಮಾಧ್ಯಮ್, ಏಕ್ ಆವ್ಕಾಸ್, ಜೊ ದೆಣಿಂ ಆಸ್ಚಾಂಕ್ ಆಸಾ ಕೆಲ್ಲೊ. ಹಾಂತುಂ ಕೊಣ್ಂಚ್ ವ್ಹಡ್/ಲ್ಹಾನ್ ನ್ಹಯ್, ಸಗ್ಳಿಂ ಏಕ್.
ಸರ್ವಾಂ ಎಕಾಚ್ಚ್ ರಿತಿನ್ ಚಿಂತುಂಕ್ ಸಕಾನಾಂತ್, ಸಗ್ಳ್ಯಾಂನಿ ಚಿಂತ್ಚಿ ರೀತ್ ವೆಗ್ಳಿ, ಸಮ್ಜೊಂವ್ಚಿ ರೀತ್ ವೆಗ್ಳಿ. ಹಿ ಶಿಕ್ಚಿ ಪ್ರಕ್ರಿಯಾ, ಸದಾಂಚ್ ಚಾಲು ಆಸೊಂದಿ ಮ್ಹಳ್ಳೆಂ ಮ್ಹಜೆಂ ಚಿಂತಾಪ್. ಚಡ್ ಲೊಕ್ ಯೇವ್ನ್ ಥೊಡೊ ತೇಂಪ್ ಚಲ್ಚಿ ನ್ಹಯ್ ಬಗಾರ್ ಥೊಡೊ ಲೋಕ್ ಆಯ್ಲ್ಯಾರ್ಯ್ ಚಡ್ ತೇಂಪ್ ಹೆಂ ಅಭ್ಯಾಸ್ ಚಲೊಂದಿ ಮ್ಹಳ್ಳಿಚ್ ಮ್ಹಜಿ ಆಶಾ ಆನಿ ಅತ್ರೆಗ್ ಜಾವ್ನಾಸಾತ್, ಮ್ಹಾಕಾ ಕವಿತಾಪಾಠಾಚೆರ್ ಜಾಯ್ತೆಂ ಶಿಕೊಂಕ್ ಮೆಳ್ಳಾಂ ಮ್ಹಣ್ತಾನಾ ಎಕಾ ಸತಾಕ್ ಆಮಿಂ ಮಾಂದುನ್ ಘೆಂವ್ಚೆಂ ಭೋವ್ ಗರ್ಜೆಚೆಂ;
*. ಕವಿತಾಪಾಠ್ ಕೊಣಾಯ್ಚಿಯ್ ಆಸ್ತ್-ವಸ್ತ್ ನ್ಹಯ್, ಬಗಾರ್ ಕೊಂಕ್ಣಿ ಕವಿತಾಂಕ್ ಲಗ್ತಿ ಜಾಲ್ಲ್ಯಾ ಸಂಗ್ತ್ಯಾಂಚೆರ್ ಏಕ್ ಸಂವಾದ್ ಮಾತ್ರ್.
*. ಕವಿತಾಪಾಠಾಂತ್ ಅಪ್ಣಾಚಿ ಹಾಜ್ರಿ ಶಿಕ್ಚಿ ಶಿವಾಯ್ ಶಿಕಂವ್ಚಿ ನ್ಹಯ್. ಸರ್ವಾಂಕ್ ಚಿಂತ್ಪಾಸಕತ್ ದೆವಾನ್ ದಿಲ್ಯಾ ಮ್ಹಣ್ತಾನಾ ಆಮ್ಚೆ ವಿಚಾರ್ ಹೆರಾಂಕ್ ಶಿಕೊಂಕ್ ಪ್ರೇರಣ್ ದಿಲ್ಯಾರ್ ತೆಂಚ್ ಪುರೊ, ಪುಣ್ ಕಸಲಿಂಚ್ ಪಿಸಾಂಟ್ ಸಿಂತಿಮೆಂತಾಂ ಹಾಂಗಾ ಚಲ್ಚಿನಾಂತ್.
*. ಕವಿತಾಪಾಠ್ ಏಕ್ ಉಗ್ತೆಂ ಅಧ್ಯಯನ್ ದೆಕುನ್ ಆಪ್ಲೆಂ ಚಿಂತಾಪ್ ವಿಸ್ತಾರ್ ಕರುಂಕ್ ಹರ್ಯೆಕ್ಲ್ಯಾಕ್ ಆವ್ಕಾಸ್ ಆಸಾ, ಹಾಂತುಂ ಎಕ್ಲ್ಯಾನ್ ಉಲಂವ್ಚೆಂ ಆನಿ ಹೆರಾಂನಿ ಬಸ್ವಾಪರಿಂ ತಕ್ಲಿ ಹಾಲಂವ್ಚಿ ನ್ಹಯ್, ಸಗ್ಳ್ಯಾಂನಿ ಅಪಾಪ್ಲೆ ವಿಚಾರ್ ವೆಕ್ತ್ ಕರ್ಚೆ.
ಕವಿತಾಪಾಠ್ - ಮಾಂಡಾವಯ್ಲೆಂ ಸೊಭಾಣ್!
ಕೊಂಕ್ಣಿ ಪತ್ರಿಕೋಧ್ಯಮಾಂತ್ ಹೆಳ್ಲ್ಲೊ ಓಸ್ಟಿನ್ ಪ್ರಭು, ಏಕ್ ಸಮಾಜ್ ಸೆವಕ್, ಚಿಂತ್ಪಿ, ಕೊಂಕ್ಣಿ ವಾವ್ರಾಡಿ, ಮುಖೆಲಿ ಜಾವ್ನ್ ಫಾಮಾದ್. ಅಮೆರಿಕಾಂತ್ ವಸ್ತಿ ಕರುನ್ ಆಸ್ಲ್ಯಾರ್ಯ್ ಕೊಂಕ್ಣಿ ಭಾಸೆಚೊ ಕಾಳ್ಜಾಮನಾಂತ್ ಮೋಗ್ ಕರ್ಚಾಂತ್ಲೊ ಹೊ ಎಕ್ಲೊ. ಲಗ್ಬಗ್ ಶೆಂಭೊರಾಂಲಾಗಿಂ ಕವಿತಾಯ್ ಹಾಣೆಂ ಬರಯ್ಲ್ಯಾಂತ್. ತಾಚಿಂ ಪಾಂಚ್ ವಿಂಚ್ಣಾರ್ ಕವಿತಾ ಆಯ್ಲೆವಾರ್ ಆಶಾವಾದಿ ಪ್ರಕಾಶನಾಧ್ವಾರಿಂ ಪರ್ಗಟ್ ಜಾಲ್ಲ್ಯಾ ’ಮೊತಿಯಾಂ ಆನಿ ತಾರಾಂ’ ಬುಕಾಂತ್ ಪರ್ಗಟ್ಲ್ಯಾಂತ್.
- ಓಸ್ಟಿನ್ ಪ್ರಭು, ಚಿಕಾಗೊ.
ಕವಿತಾಪಾಠ್ ಮ್ಹಣ್ಯೆತ್ ಹಾಂವೆಂ ಏಕ್ ಕವಿಂಚೆಂ ಮಾಂಡಾವಯ್ಲೆಂ ಸೊಭಾಣ್! ಖಂಚ್ಯಾಯ್ ಏಕಾ ಕಾರ್ಭಾರಾಕ್ ಆಸಾಜಾಯ್ ಏಕ್ ಮಾಂಡ್ ಅನಿ ತ್ಯಾ ಮಾಂಡಾರ್ ಸೊಭಂವ್ಕ್ ಆಮ್ಚೊ ದಾಯ್ಜಿರಾಯ್ - ವಲ್ಲಿ ಕ್ವಾಡ್ರಸ್ ಎಕೆಕಾ ಪಾಠಾಕ್ ಎಕೆಕಾ ಕವಿಕ್ ಆರಾಯ್ತಾ, ನೆರಾಯ್ತಾ ಅನಿಂ ನೆಟಯ್ತಾ. ಕವಿ ಜಾವ್ನಾಸಾತ್ ಪ್ರಕೃತೆಚಿ ಸೊಭಾಯ್ ಚಾಕೊನ್, ತಾಕಾ ಮಾತ್ಶಿ ಊಬ್ ದೀವ್ನ್ ಪಿಕೊನ್ ಹೆರಾಂಕ್ ರುಚ್ಚೆಪರಿಂ ಪಕ್ವಾನಾಚೊ ಆಕಾರ್, ಶೃಂಗಾರ್ ಆನಿ ರೂಪಾಲಂಕಾರ್ ದೀವ್ನ್ ಭುಕೆಲ್ಲ್ಯಾ ಬಾಳಾಂಕ್ ಆಪ್ಲೊ ಪಾನೊ ದೀವ್ನ್ ಥಾಂಬಂವ್ಚ್ಯೆಪರಿಂ ಸುಮಧುರ್ ಪೀವನ್ ದಿಂವ್ಚೆ ಲೇಖಕ್/ಸಾಹಿತಿ ವ ಎಕಾಚ್ಚ್ ಉತ್ರಾನ್ ಸಾಂಗ್ಚೆಂ ತರ್ ಕವಿ.
ಕವಿತಾಪಾಠಾವರ್ವಿಂ ಕವಿಂಚೆಂ ಬರೆಂಪಣ್ ಜಾತೆಲೆಂ ತೆಂ ಖರೋಖರ್. ಆಮ್ಕಾಂ ಕೆನ್ನಾಯ್ ಆಮ್ಚೆಂಚ್ ಸಾರ್ಕೆಂ; ಕಿತ್ಯಾ ತೆಂ ಆಮ್ಚೆಥಾವ್ನ್ ಉದೆಲ್ಲೆಂ, ಆಮ್ಚ್ಯಾ ತಿಂತೆರಾನ್ ಲಿಖ್ಲ್ಲೆಂ. ಅಶೆಂ ಆಸ್ತಾಂ ಆಮ್ಕಾಂ ಆಮಿಂ ಕೆಲ್ಲ್ಯಾಚೊ ಸಾರ್ಕೊ ವಿಮರ್ಸೊ ಮೆಳಾಜಾಯ್ ಜಾಲ್ಯಾರ್, ಆಮ್ಚಿ ಮುಖ್ಲಿ ವಾಟ್ ನಿತಳ್ ನಿರ್ಮಳ್ ಕರಿಜಾಯ್ ತರ್, ತಾಕಾ ಸೂಕ್ಷ್ಮ್ ವಿವರ್ಶಾಚಿ ಅತ್ಯಧಿಕ್ ಗರ್ಜ್ ಆಸಾ. ವಿಮರ್ಸೊ ಕೊಣಾಕ್ಯೀ ಆಢೂಕ್ ಲಾಗೊಂಕ್ ನಜೊ; ವಿಮರ್ಸೊ ನಾಸ್ತಾಂ ಕೋಣ್ಂಚ್ ಸುಧ್ರಾನಾ, ವಿಮರ್ಸೊ ನಾಸ್ತಾಂ ಕೊಣಾಕ್ಚ್ ಆಪ್ಣೆಂ ಚುಕೊನ್ ಪಡ್ಲೆಲೆಂ ಗಮನಾಕ್ ಯೇನಾ. ವಿಮರ್ಸೊ ಜಾವ್ನಾಸಾ ಏಕಾ ಆರ್ಸ್ಯಾಕ್ ಸಮಾನ್. ಸಕಾಳಿಂ ಉಟೊನ್ ಖಾಡ್ ಕಾಡ್ತಾನಾ ವ ನ್ಹೆಸೊನ್ ಆಪ್ಲೊ ಶೃಂಗಾರ್ ಕರ್ತಾನಾ ಆಮಿಂ ಕಿತ್ಯಾಕ್ ಆರ್ಸ್ಯಾಂತ್ ಪಳೆತಾಂವ್? ಕಿತ್ಯಾ - ಆರ್ಸೊ ಆಮ್ಚೊ ತತ್ಕ್ಷಣ್ ವಿಮರ್ಸೊ ಕರ್ತಾ ಆನಿ ಚೂಕ್ ಆಸ್ಲ್ಲಿ ದಾಖವ್ನ್ ದಿತಾ. ಕೊಲ್ಲರ್ ಚಿಡ್ಕಾಲ್ಯಾರ್ ಸಾರ್ಕೊ ಕರ್ ಮ್ಹಣ್ತಾ, ಬಾಜ್ವೆ-ಹುಕ್ ಘಾಲುಂಕ್ ನಾಸ್ಲ್ಯಾರ್ ದಾಖವ್ನ್ ದಿತಾ. ಜರ್ ಆಮಿಂ ಆರ್ಸ್ಯಾಕ್ ದುರ್ಸಾನಾಂವ್ ತರ್ ವಿಮರ್ಶ್ಯಾಕ್ ಕಿತ್ಯಾ ಕೊಡು ಕಸಾಯಾಕ್ ಸರಿ ಕರ್ಚೆಂ? ಹೆಂ ಆಮಿಂ ಘಡಿಭರ್ ಚಿಂತುನ್ ವ್ಹರಂವ್ಕ್ ಜಾಯ್. ಸುಧ್ರಾಪ್ ಜಾವ್ನಾಸಾ ಭವಿಷ್ಯಾಚಿ ಘಮಂಡಾಯ್! ತರ್ ಆಮ್ಕಾಂ ಬರೆಂ ಭವಿಷ್ಯ್ ನಾಕಾ? ಕವಿತಾಪಾಠ್ ಕರ್ತಾ ತರೀ ಇತ್ಲೆಂಚ್.
ಯೆಂವ್ಚ್ಯಾ ವರ್ಸಾಚ್ಯಾ ಕವಿತಾಪಾಠಾಚೆಂ ನವೆಸಾಂವ್ ಆನಿಕ್ಯೀ ಮಝೆಚೆಂ. ಪಿಂತುರ್ ಪಳೆವ್ನ್ ಕವನ್ ಲಿಖ್ಚೆಂ. ಕವಿ ಹಾಂತು ಭಾರಿಚ್ ಫಾಮಾದ್! ತೆ ಚಲಿಯೆಕ್ ಪಳೆವ್ನ್, ಪ್ರಕೃತೆಕ್ ಪಳೆವ್ನ್, ದರ್ಯಾಕ್ ಪಳೆವ್ನ್, ಸುರ್ಯಾಕ್ ಪಳೆವ್ನ್ ಕವಿತಾ ಬರವ್ನ್ ಜಾಣಾಂತ್ ಆಸ್ತಾಂ, ತಾಂಕಾಂ ಹೆಂ ನವೆಂ ಯೆವ್ಜಣ್ ಭಾರಿಚ್ ಲಾಯೇಕ್ ಭಗ್ತೆಲೆಂ ಮ್ಹಣ್ಚ್ಯಾಂತ್ ಕಿತೆಂಚ್ ದುಬಾವ್ ನಾ. ’ತಿಂತೆರಾಂತ್ ಪಿಂತುರ್’ ಪಳೆಯಾ ಆನಿ ಬರಯಾ ಕವನಾಂ; ತುಮ್ಕಾಂ ಸರ್ವಾಂಕ್ ಅಖಂಡ್ ಜಯ್ತ್ ಆಶೆತಾಂ!
ಉತ್ರಾಂನಿ ಪಿಂತ್ರಾಂವ್ಕ್ ಜಾಯ್ನಾತ್ಲ್ಲೆಂ ಕವಿತಾ
ದಾಯ್ಜ್ ಸಾಯ್ಟಿಚೊ ಸಹ-ಸಂಪಾದಕ್, ವಿಮರ್ಶಕ್, ಕವಿ, ಚಿಂತ್ಪಿ, ಸಮೀಕ್ಶಕ್. ಆಯ್ಲೆವಾರ್ ಪರ್ಗಟ್ ಜಾಲ್ಲ್ಯಾ ’ಕವಿತಾಪಾಠ್ ಭಾಗ್-1’ ಹಾಚೊ ಸಹ-ಸಂಪಾದಕ್, ತಾಚಿಂ ಪಾಂಚ್ ವಿಂಚ್ಣಾರ್ ಕವಿತಾ ಆಯ್ಲೆವಾರ್ ಆಶಾವಾದಿ ಪ್ರಕಾಶನಾಧ್ವಾರಿಂ ಪರ್ಗಟ್ ಜಾಲ್ಲ್ಯಾ ’ಮೊತಿಯಾಂ ಆನಿ ತಾರಾಂ’ ಬುಕಾಂತ್ ಪರ್ಗಟ್ಲ್ಯಾಂತ್.
ಮೆಲ್ವಿನ್ ಜೆ. ವಾಸ್, ಕೆಲರಾಯ್
ಕವಿತಾಪಾಠ್ ಹಾಂತುಂ ಮ್ಹಾಕಾ ಜಾಲ್ಲಿ ವ್ಹಾಡಾವಳ್ ಉತ್ರಾಂನಿ ಪಿಂತ್ರಾಂವ್ಕ್ ಜಾಯ್ನಾ ತಸಲಿ. ಹಾಂವ್ ಪಂದ್ರಾ ವರ್ಸಾಂ ಥಾವ್ನ್ ಕೊಂಕ್ಣಿ ಕಾಣ್ಯೊ/ಕವಿತಾ ಬರವ್ನ್ ಆಸ್ಲ್ಲೊಂ, ಪಾಟ್ಲ್ಯಾ ಇಕ್ರಾ ವರ್ಸಾಂ ಥಾವ್ನ್ ಕುವೆಯ್ಟಾಂತ್ ಆಸ್ಲ್ಲ್ಯಾಕ್ ಬಾಬ್ ವಲ್ಲಿ ಕ್ವಾಡ್ರಸಾನ್ ಸೊಧುನ್ ಕಾಡ್ಲೊ ಮಾತ್ರ್ ನ್ಹಯ್, ಮ್ಹಜೆಭಿತರ್ ಲಿಪೊನ್ ಆಸ್ಲ್ಲ್ಯಾ ಬರಯ್ಣಾರಾಕ್, ಕವಿಕ್ಯ್ ಭಾಯ್ರ್ ವೊಡ್ಲೊ. ದೀಸ್ ವೆತಾಂ ವೆತಾಂ ಕವಿತಾಪಾಠಾಂತ್ ಮ್ಹಾಕಾ ಮೆತೆರ್ ಕೆಲ್ಲೆನಿಮ್ತಿಂ ಜಾಯ್ತೆಂ ಶಿಕೊಂಕ್ ಮ್ಹಜಾನ್ ಸಾಧ್ಯ್ ಜಾಲೆಂ.
ಜಾಂವ್ಕ್ ಪುರೊ ಹ್ಯಾ ಕವಿತಾಪಾಠಾಂತ್ ಕೊಣ್ಯ್ ಮಾಸ್ಟೆರ್ ನಾಂತ್, ಪುಣ್ ಆಮಿ ಸರ್ವಾಂ ವಿಧ್ಯಾರ್ಥಿಂ ಖಂಡಿತ್. ಜೆದ್ನಾಂ ಆಮ್ಚಾ ಬರ್ಪಾಂಚೆರ್ ಆಮಿ ಅವಲೋಕನ್ ಕರುಂಕ್ ಪ್ರಾಮಾಣಿಕ್ ಪ್ರೇತನ್ ಕರ್ತಾಂವ್, ತೆದ್ನಾಂ ಖಂಡಿತ್ ಆಮ್ಚಾ ಮಿನತೆಕ್ ಫಳ್ ಮೆಳ್ತಾಚ್ಚ್.
ಪಾಟ್ಲ್ಯಾ ಎಕಾ ವರ್ಸಾಂನಿ ಕವಿತಾಪಾಠಾಂತ್ ಆಮ್ಚಾ ವಾಟೆಂನಿ ಜಾಯ್ತ್ಯೊ ಅಡ್ಕಳ್ಯೊ ಆಯ್ಲ್ಯೊ ತರ್ಯ್ ಆಮ್ಚಾ ಶೆವೊಟಾಂತ್ ಆಮಿಂ ಧಯ್ರ್ ಸಾಂಡಿನಾಸ್ತಾಂ ಚಲೊನ್ಂಚ್ ಗೆಲ್ಯಾಂವ್ ಆನಿ ಅಶೆಂ ಆಮ್ಚಾ ಕವಿತಾಂನಿ, ಯಾ ಹೆರಾಂಚಿಂ ಕವಿತಾ ಆಮಿ ಸಮ್ಜೊಂವ್ಚಾ ರಿತಿನ್ ಜಾಯ್ತಿ ವ್ಹಾಡಾವಳ್ ಜಾಲ್ಲಿ ಗಜಾಲ್ ಖಂಡಿತ್ ಜಾವ್ನ್ ಫಟ್ ನ್ಹಯ್ ಮ್ಹಳ್ಳೆಂ ಮ್ಹಜೆಂ ಭೊಗಾಪ್.
ಕವಿತಾ - ಪಾಠ್ ಆನಿ ಪ್ರೇರಣ್
2005 ಇಸ್ವೆಚಿ ದಾಯ್ಜ್ ಸಂಯೋಜಕಿ ಜಾಲ್ಲ್ಯಾ ಬಾಯ್ ಪ್ರಿಯಾಕ್ ಸಮಾಜ್ ಸೆವಾ ಕರ್ಚೊ ಆವ್ಕಾಸ್ ಲಾಭ್ಲ್ಲೊ ಹೊಚ್ಚ್ ಪಯ್ಲೆಪಾವ್ಟಿಂ ನ್ಹಯ್. ಪೆಜಾರ್ ವಾರಾಡ್ಯಾಂತ್, ಫೆರಾರ್ ಫಿರ್ಗಜೇಂತ್ ಏಕ್ ಮುಖೆಲ್ನ್ ಜಾವ್ನ್, ಉಲವ್ಪಿಣ್ ಜಾವ್ನ್ ತಿ ಫಾಮಾದ್ ಜಾಲ್ಲಿ. ಹ್ಯಾ ಎಕಾ ವರ್ಸಾ ತಿಣೆಂ ಬರಯಿಲ್ಲಿಂ ಕವಿತಾ ಫಕತ್ತ್ ಆಟ್ ತರ್ಯ್ ಎಕೆಕಾ ಕವಿತೆಂನಿ ತಿಣೆಂ ಚಡ್ಲ್ಲಿ ವ್ಹಾಟ್ ಮ್ಹಾಕಾ ವಿಜ್ಮಿತ್ ಕರ್ತಾ. ಬೂಕ್ ಸಮೀಕ್ಶಾಚೆರ್ ತಿಣೆಂ ’ಪಯ್ಲಿಂ ಮೆಟಾಂ’ ಬುಕಾಚೆರ್ ಸಮೀಕ್ಶಾ ಚಲಯಿಲ್ಲೆಂ ಲೇಕನ್ ಕವಿತಾಪಾಠಾಚೆರ್ ಪ್ರಸ್ತುತ್ ಕೆಲಾಂ.
- ಪ್ರಿಯಾ ಸಿಕ್ವೇರಾ, ಫೆರಾರ್
ಕೊಂಕಣಿ ಸಾಹಿತ್ಯಾಂತ್ ಮ್ಹಜಿ ಸುರ್ವಾತ್ ಜಾಲ್ಲಿ ಮ್ಯಾಂಗಲೋರಿಯನ್.ಕೊಮ್ ಸೈಟಾನ್ ಸುರು ಕೆಲ್ಲ್ಯಾ ’ಆಂಕರ್’ ಮ್ಹಳ್ಯಾ ಆಂಕಣಾಧ್ವಾರಿಂ. ಜರತರ್ ಖಂಚಾಯಿ ಏಕಾ ಝಡಾ ಥಾವ್ನ್ ಆಮ್ಕಾಂ ಬರೊ ಫಳ್ ಮೆಳಾಜಾಯ್ ತರ್, ತೊ ಲಾಯ್ಲ್ಯಾರ್ ಮಾತ್ರ್ ಪಾವನಾ ತಾಚೊ ಫಾವೊತೊ ಪೋಸ್ ಕರ್ಚೊ ಗರ್ಜೆಚೊ. ತೆದಾಳಾ ಮಾತ್ರ್ ಆಮಿಂ ಬರೊ ಫಳ್ ಜೊಡ್ಯೆತ್. ತಶೆಂಚ್ ಕವಿತಾ ಬರಂವ್ಚೆ ಏಕ್ ದೆಣೆಂ ವಯ್ ತರೀ ತಾಕಾ ಫಾವೊತ್ ಮಾರ್ಗದರ್ಶನ್, ಉತ್ತೇಜನ್, ಲಿಸಾಂವ್ ಗರ್ಜೆಚೆಂ ಮ್ಹಣ್ ಮ್ಹಾಕಾ ಮ್ಹಜೆಂ ಪಯ್ಲೆಂಚೆ ಕವಿತಾ ಬರಯ್ತಾನಾ ಬೊಗ್ಲೆಂ. ಆನಿಂ ಹ್ಯಾ ವೆಳಾರ್ ಬಾಬ್ ವಲ್ಲಿ ಕ್ವಾಡ್ರಾಸಾನ್ ಕವಿತಾಪಾಠಾಕ್ ಯೇಂವ್ಕ್ ಉಲೊ ದಿತಾನಾ ಮ್ಹಾಕಾ ಏಕಾ ಥರಾಚಿ ಕಾವ್ಜೆಣಿಂ ಸುರು ಜಾಲಿ. ಕೊಂಕ್ಣಿ ಸಾಹಿತ್ಯಾಂತ್ ಮ್ಹಜೊ ಆನ್ಭೋಗ್, ಸಮ್ಜಣಿ ಉಣಿ. ಸರ್ವ್ ಫಾಮಾದ್, ಆನ್ಭೋಗ್ವಂತ್, ಉಂಚ್ಲ್ಯಾ ಚಿಂತ್ಪಾಚೆ ಕವಿ ಆನಿಂ ಬರವ್ಪ್ಯಾ ಮಧೆಂ ಹಾಂವೆಂ ಕಶೆಂ ಪಾತ್ರ್ ಘೆಂವ್ಚೆ ಮ್ಹಳ್ಳೆಂ ಸವಾಲ್ ಬಾಬ್ ವಲ್ಲಿ ಕ್ವಾಡ್ರಾಸಾಕ್ ವಿಸರ್ಲ್ಲ್ಯಾ ವೆಳಾರ್ ತಾಚಿ ಜಾಪ್ "ಕವಿತಾಪಾಠಾಂತ್ ಆಮಿಂ ಸರ್ವಾಂ ವಿದ್ಯಾರ್ಥಿ, ಥಂಯ್ಸರ್ ಹುದ್ದೆ ನಾಂತ್, ವ್ಹಡ್ ಯಾ ಲ್ಹಾನ್ ಮ್ಹಳ್ಳೊ ಬೇಧ್ ನಾ, ಆನಿ ಸರ್ವಾಂನಿ ಎಕಾಮೆಕಾ ಥಾವ್ನ್ ಶಿಕ್ಚೆಂ ಜಾಯ್ತೆ ಆಸಾ." ಹಿಂ ಉತ್ರಾಂ ಮ್ಹಾಕಾ ಭರ್ವಶ್ಯಾಚಿಂ ಜಾಂವ್ಕ್ ಪಾವ್ಲಿಂ ಮಾತ್ರ್ ನ್ಹಯ್ ಕವಿತಾಪಾಠಾಂತ್ ಉರ್ಭೆನ್ ಪಾತ್ರ್ ಘೆಂವ್ಕ್ ಕಾರಾಣ್ ಜಾಲಿಂ.
ಕವಿತಾ ಬರಯ್ತಾನಾ ಪ್ರಾಸ್, ಪ್ರತಿಮಾಚೊ ಪ್ರಯೋಗ್, ಕವಿತಾವಸ್ತ್ (theme) ಚೊ ಮಹತ್ವ್, ಕವಿತಾಧ್ವಾರಿಂ ವಾಚ್ಪ್ಯಾಂಕ್ ದಿಂವ್ಚೊ ಸಂದೇಶ್ ಆನಿ ಕವಿತಾ ಕಶಿ ಬರಂವ್ಚಿ ಹ್ಯಾ ವಿಶಿಂ ಚಡಿತ್ ಸಮ್ಜಣಿ ಕವಿತಾಪಾಠಾಂತ್ ಪಾತ್ರ್ ಘೆತಲ್ಯಾ ವರ್ವಿಂ ಮ್ಹಾಕಾ ಫಾವೊ ಜಾಲಿ. ಚಡಾವತ್ ಜಾವ್ನ್ ಹಾಂವ್ ಮ್ಹಜ್ಯಾ ಖಾಸ್ಗಿ ರಾಟಾವಳಿಂನಿ ಮೆತೆರ್ ಜಾವ್ನ್ ಆಸ್ತಾನಾ ಕವಿತಾ ಬರಂವ್ಕ್, ವಾಚುಂಕ್ ಆಳ್ಸಾಯ್ ಭೊಗ್ತಾಲಿ. ಪುಣ್ ಕವಿತಾಪಾಠಾಂತ್ ಭಾಗ್ ಘೆಂವ್ಕ್ ಆಸಲ್ಲ್ಯಾ ವರ್ವಿಂ ಆಳ್ಸಾಯ್ ಭೊಗ್ಲ್ಯಾರಿ ಏಕ್ ನವೆಂ ಕವಿತಾ ಬರವ್ನ್ ವ್ಹರಿಜಾಯ್ ಮ್ಹಳ್ಳಿಂ ಹುಮೆದ್ ಉದೆತಾಲಿ ಆನಿ ಆಶೆಂ ಹಾಂವ್ ಥೊಡಿಂ ಕವಿತಾ ಬರಂವ್ಕ್ ಸಕ್ಲಿಂ.
ಹರ್ಯೇಕಾ ಕವಿತಾಪಾಠಾಂತ್ ಏಕಾ ಕವಿತಾಚೆರ್ ಅಧ್ಯಯನ್ ಕರುಂಕ್ ಆಸಲ್ಯಾ ವರ್ವಿಂ ಕವಿತಾ ವಾಚುನ್, ತಾಂತ್ಲಿಂ ಹರ್ಯೇಕ್ ಉತ್ರಾಂ ಶಿಂದುನ್, ತಾಚೆರ್ ಮ್ಹಜೊ ವಿಮರ್ಸೊ ಬರಂವ್ಚಾ ಹಂತಾರ್ ಹಾಂವ್ ಪಾವ್ಲ್ಯಾಂ. ಮಾತ್ರ್ ನ್ಹಯ್ ಜಿಯೊ ಆಗ್ರಾರ್ ಹಾಣೆಂ ಬರಯಿಲ್ಲ್ಯಾ "ಪಯ್ಲಿಂ ಮೆಟಾಂ" ಬುಕಾಚೆರ್ ಸಮೀಕ್ಶಾ ಚಲವ್ನ್ ಮ್ಹಜೆಂ ಲೇಖನ್ ಪ್ರಸ್ತುತ್ ಕರ್ಚೊ ಆವ್ಕಾಸ್ಯ್ ಮ್ಹಾಕಾ ಮೆಳ್ಳೊ.
ಕುವೇಯ್ಟಾಂತ್ ಹೆಂ ಕಾಮಾಸಾಳ್ ಆಸಾ ಕೆಲ್ಲ್ಯಾವರ್ವಿಂ ಖಾಸ್ಗಿ ರಾಟಾವಳಿ ಮಯ್ನ್ಯಾಂತ್ ಏಕ್ ಪಾವ್ಟಿಂ ಪುಣಿಂ ಪಯ್ಸ್ ದವರ್ನ್ ಕೊಂಕ್ಣಿ ಭಾಸೆ ಖಾತಿರ್ ಸಾಂಗಾತಾ ಮೆಳ್ಚೊ ಆವ್ಕಾಸ್ ಲಾಭ್ಲಾ. ಬಾಬ್ ವಲ್ಲಿ ಕ್ವಾಡ್ರಾಸಾಚಾ ಉತ್ರಾಂ ಪರ್ಮಾಣೆಂ "ಆಮ್ಚಾ ಮತಿಂತ್ಲೆ ವಿಚಾರ್ ರಾವ್ಲ್ಲ್ಯಾ ಉದ್ಕಾ ಪರಿಂ ಜಾಯ್ನಾಯೆ". ವ್ಹಯ್ ಉದಾಕ್ ಜರ್ತರ್ ಏಕ್ಚ್ಚ್ಕಡೆನ್ ಆಸೊನ್ ತಾಕಾ ವಾಳೊಂಕ್ ಆವ್ಕಾಸ್ ಮೆಳಾನಾ ತರ್ ತೆಂ ಥಂಯ್ಚ್ ಉರೊನ್ ಘಾಣ್ ಯೆತಾ. ತಶೆಂಚ್ ಆಮ್ಚಾ ಮತಿಂತ್ಲೆ ವಿಚಾರ್. ಹೆಂ ಕಾಮಾಸಾಳ್ ಆಸಾ ಕೆಲ್ಲ್ಯಾ ವರ್ವಿಂ ಭಾಸ್/ಸಾಹಿತ್ಯಾ ವಿಶ್ಯಾಂತ್ ಚಡಿತ್ ಸಮ್ಜಣಿಂ, ಹಾಜರ್ ಅಸಲ್ಲ್ಯಾ ಕವಿ ಕಡೆ ವಿಚಾರ್ ವಿನಿಮಯ್, ತಾಂಚಿ ಜಾಣ್ವಾಯ್, ನವೆಂ ವಿಚಾರ್ ಮತಿಂತ್ ಸರಾಗ್ ವಾಳೊಂಕ್ ಅವ್ಕಾಸ್ ಮೆಳ್ತಾ. ಹ್ಯಾ ಖಾತಿರ್ ಹಾಂವ್ ಬಾಬ್ ವಲ್ಲಿ ಕ್ವಾಡ್ರಸಾಕ್ ಖಂಡಿತ್ ಆಭಾರಿ. ಆನಿಂ ತಾಚಾ ವಿಶೇಷ್ ವಾವ್ರಾಖಾತಿರ್ ಹೊಗ್ಳಿಕ್ ಫಾವೊ. ಮಹಿನ್ಯಾಕ್ ಏಕ್ ಕವಿತಾ ವಿಂಚುನ್, ತೆಂ ಸಾಯ್ಟಾಚೆರ್ ಘಾಲ್ನ್, ಸರ್ವಾಂಕ್ ಇಮೈಲಾ, ಫೋನಾಧ್ವಾರಿಂ ಆಪವ್ಣೆ ದಿಂವ್ಚೆಂ ಆಶೆಂ ಸಭಾರ್ ಕಾಮಾವರ್ವಿಂ ಕವಿತಾಪಾಠಾ ಖಾತಿರ್ ಆಪ್ಲೊ ಮೊಲಾಧಿಕ್ ವೇಳ್ ಘಾಲುನ್ ಆಸಾ. ಎದೊಳ್ ಜಾಲ್ಲಿ ಕಾಮಾಸಾಳಾಂ ತಾಚ್ಯಾಚ್ ಘರಾ ತಾಣೆಂ ಆಸಾ ಕೆಲ್ಯಾಂತ್. ಹಾಂತು ತಾಕಾ ಫಾಯ್ದೊ ಆಸಾ ಯಾ ತಾಕಾ ದುಸ್ರೆಂ ಕಾಮ್ ನಾ ಮ್ಹಣ್ ನ್ಹಯ್. ಬಗಾರ್ ತಾಕಾ ಆಸ್ಚೊ ಕೊಂಕ್ಣಿ ಬಾಸೆಚೊ ಮೋಗ್, ಸೆವೆಚೊ ಮನೋಬಾವ್ ಆನಿಂ ಉದೆವ್ನ್ ಯೆಂವ್ಚಾ ಕವಿಂಕ್ ಫಾವೊತೆಂ ಮಾರ್ಗದರ್ಶನ್ ಮೆಳೊನ್ ತಾಂಚೆ ದೆಣಿಂ ಉಜ್ವಾಡಾಕ್ ಹಾಡ್ಚೆಂ ಬರೆಂ ಮನ್.
ಕವಿತಾಪಾಠ್ ಆಸಾ ಕೆಲ್ಲ್ಯಾ ವರ್ವಿಂ ಕೊಂಕ್ಣಿ ಸಾಹಿತ್ಯ್ ವಿಶಿಂ ಮ್ಹಜಿ ಹುಮೆದ್ ಚಡ್ಲ್ಯಾ, ಆನಿಂ ಕೊಂಕ್ಣಿ ಬಾಶೆ ಖಾತಿರ್ ವಾವ್ರ್ ಕರ್ಚಿ ತಾನ್ ಚಡನ್ಂಚ್ ಆಸಾ, ಇತ್ಲೆಂಚ್ ಸಾಂಗೊನ್ ಬಾಕಿಚೆಂ ವೆಳಾಚಾ ತಾಬೆಂತ್ ಒಪ್ಸುನ್ ದಿತಾಂ.
ಹೆರಾಂಕ್ ಶಿಕೊನ್ಂಚ್ ಆಮ್ಚಿ ವ್ಹಾಡಾವಳ್
[ದಾಯ್ಜ್ ಕವಿತಾ ಸ್ಪರ್ಧೊ 2004 ಹಾಂತು ತಿಸ್ರೆಂ ಇನಾಮ್ ಜಿಕ್ಲ್ಲೊ ಜೊಮೇಲ್ ಬೊಂದೆಲ್, ಕವಿತಾಪಾಠ್ 2006 ಹಾಚೊ ಸಂಯೋಜಕ್ ತಶೆಂಚ್ ಕವಿತಾಪಾಠ್ ಬಾಗ್-1 ಬುಕಾಚೊ ಸಹ-ಸಂಪಾದಕ್ಯ್ ಜಾವ್ನಾಸಾ. ತಾಚಿಂ ಪಾಂಚ್ ವಿಂಚ್ಣಾರ್ ಕವಿತಾ ಆಯ್ಲೆವಾರ್ ಆಶಾವಾದಿ ಪ್ರಕಾಶನಾಧ್ವಾರಿಂ ಪರ್ಗಟ್ ಜಾಲ್ಲ್ಯಾ ’ಮೊತಿಯಾಂ ಆನಿ ತಾರಾಂ’ ಬುಕಾಂತ್ ಪರ್ಗಟ್ಲ್ಯಾಂತ್, ತಶೆಂಚ್ ತಾಚೊ ಫುಡ್ಲದ್ ಕವಿತಾಜಮೊ ’ಮರುವನಾಂತ್ಲೆ ದಿವೆ’ ವೆಗಿಂಚ್ ಪರ್ಗಟೊನ್ ಯೆಂವ್ಚಾರ್ ಆಸಾ]
ಜೊಮೇಲ್ ಬೊಂದೆಲ್
ಜೆದ್ನಾಂ ಆಮ್ಚೆಂ ಜಾಣ್ವಾಯೆಚೆಂ ಕೊಪ್ ಖಾಲಿ ಕರ್ತಾಂವ್ ತೆದ್ನಾಂ ಮಾತ್ರ್ ಆಮ್ಕಾ ತಾಂತು ನವಿ ಜಾಣ್ವಾಯ್ ಭರುಂಕ್ ಸಾಧ್ಯ್ ಆಸಾ ಸಂಗಾತಾಚ್ ಜಿಣ್ಯೆಂತ್ ನವೆಸಾಂವ್ ಶಿಕೊಂಕ್ಯೀ ಸಾಧ್ಯ್ ಆಸಾ. ಆಸ್ಲ್ಲ್ಯಾಚ್ ಇರಾದ್ಯಾನ್ ಆಮಿ ಮಹಿನ್ಯಾಂತ್ ಏಕ್ ಪಾವ್ಟಿ ಸಾಂಗಾತಾ ಮೆಳ್ತಾನಾ, ಆಮಿ ಆಮ್ಚಿ ಜಾಣ್ವಾಯ್ ದೊಡ್ತಿ ಕರ್ನ್ ಘೆಂವ್ಚೊ ಅನ್ಬೊಗ್ ಮ್ಹಕಾ ಜಾಲಾ. ಹಾಂಗಾಸರ್ ಆಮಿ ಕವಿತೆಚೆರ್ ಗೂಂಡ್ ಥರಾನ್ ಅಧ್ಯಯನ್ ಕೆಲ್ಲೆ ವರ್ವಿ ಮ್ಹಕಾ ಜಾಯ್ತೆಂ ಶಿಕೊಂಕ್ ಮೆಳ್ಳೆಂ.
ಕವಿತಾಚೆ ಪ್ರಕಾರ್, ಕವಿತಾಚೊ ವಿಶಯ್ ಇತ್ಯಾದಿಚೆರ್ ಮ್ಹಕಾ ಚಡಿತ್ ರಿತಿನ್ ಜಾಣ್ವಾಯ್ ಮೆಳ್ಳಿ. ಖಂಚೆಂಯ್ ತಾಲೆಂತ್ ಆಮ್ಚೆ ಥಂಯ್ ವೃದ್ದಿ ಜಾಯ್ಜೆ ತರ್ ಆಮಿ ತ್ಯಾ ತಾಲೆಂತಾ ವಿಶೆಂತ್ ಚಡಿತ್ ಅಧ್ಯಯನ್ ಕೆಲ್ಯಾರ್ ಮಾತ್ರ್ ಆಮಿ ತ್ಯಾ ತಾಲೆತಾಂತ್ ಸಂಪೂರ್ಣ್ ಥರಾನ್ ಮಾಹಿರ್ ಜಾತಾಂವ್.
ಮ್ಹಕಾ ಕವಿತಾ ಲಿಖ್ಚೆಂ ದೆಣೆ ಆಸಾ ಮ್ಹಣ್ ಪಾಟ್ಲ್ಯಾ ದೇಡ್ ವರ್ಸಾನ್ ಮಾತ್ರ್ ಕಳ್ಲ್ಲೆಂ ಪುಣ್ ಆಮಿ ಮಹಿನ್ಯಾವಾರ್ ಸಂಗಾತಾ ಮೆಳುನ್ ಹೆರ್ ಕವಿಂಚ್ಯಾ ಕವಿತಾಂಚೆರ್ / ಕವಿತಾ ಜಮ್ಯಾಂಚೆರ್ ಚಡಿತ್ ಅಧ್ಯಯನ್ ಕೆಲ್ಲೆ ವರ್ವಿಂ ಮ್ಹಜೆ ತಾಲೆಂತ್ ಜೀವಾಳ್ ಆಸಾ ಮ್ಹಣ್ ಸಾಂಗುಂಕ್ ಮ್ಹಕಾ ವರ್ತಿ ಖುಶಿ ಜಾತಾ.
ಪಾತ್ಯೆಂವ್ಕ್ ಜಾಯ್ನಾತ್ಲ್ಲೆಂ ಸತ್ - ಕವಿತಾಪಾಠ್
[ಆಪ್ಲ್ಯಾ ಪಯ್ಲಾ ಅಧ್ಯಯನ್ ಲೇಕನಾಂತ್ಚ್ ಸರ್ವಾಂಕ್ ಅಜ್ಯಾಪ್ ಕರುಂಕ್ ಪಾವ್ಲ್ಲ್ಯಾ ರೀನಾಲಾಗಿಂ ತಾಲೆಂತಾಚೊ ಪುಂಜೊಚ್ ಆಸಾ. ಹಾಚಾಧಿಂ ತಿಚಿಂ ಸಭಾರ್ ಬರ್ಪಾಂ ’ಪಾಂಗ್ಳಾಚೊ ಪ್ರಕಾಸ್’ ಫಿರ್ಗಜೆಪತ್ರಾಚೆರ್ ಪರ್ಗಟ್ಲ್ಯಾಂತ್, ಸಾಹಿತ್ಯಾಚೆಂ ಅಧ್ಯಯನ್ ಕರ್ಚಾಂತ್, ಪ್ರತ್ಯೇಕ್ ಜಾವ್ನ್ ಕವಿತಾಂಚೆರ್ ಆಸಕ್ತ್ ಆಸ್ಚಾ ಹಾಚೆಥಾವ್ನ್ ಫುಡೆಂ ಬರಿಂ ಕವಿತಾ ಆಶೆವ್ಯೆತಾ.]
ರೀನಾ ಕ್ವಾಡ್ರಸ್, ಪಾಂಗ್ಳಾ
ಸತ್ ಸಾಂಗ್ಚೆಂ ತರ್ ಮ್ಹಾಕಾ ಕವಿತಾಪಾಠ್ ಥಾವ್ನ್ ಜಾಯ್ತೆಂ ಶಿಕೊಂಕ್ ಮೆಳ್ಳೆಂ. ಮ್ಹಜಾನ್ ಎದೊಳ್ ಪರ್ಯಾಂತ್ ಅಪುರ್ಭಾಯೆಚಿಂ ಕವಿತಾ ಬರಂವ್ಕ್ ಸಾಧ್ಯ್ ಜಾಂವ್ಕ್ ನಾತರ್ಯೀ ಮುಳಾವೆಇ ಸಮ್ಜೊಣಿ, ಏಕ್ ಕವಿತಾ ಕಶೆಂ ಸಮ್ಜಾಜಯ್, ಕವಿತಾಕ್ ಕಸಲ್ಯೊ ಸಂಗ್ತ್ಯೊ ಗರ್ಜೆಚ್ಯೊ ಮ್ಹಳ್ಳೆವಿಶಿಂ ಬರಿ ಸಮ್ಜೊಣಿ ಲಾಭೊಂಕ್ ಹೆಂ ಕವಿತಾಪಾಠ್ ಕಾರಾಣ್ ತೆಂ ಖಂಡಿತ್. ಆತಾಂ ತೆಂ ಮ್ಹಜೆರ್ ಹೊಂದ್ವೊನ್ ಆಸಾ ಹಾಂವ್ ಕಶೆಂ ಮ್ಹಜಾ ಕವಿತಾಂತ್ ಹಿ ಸೂತ್ರಾಂ ಪಾಳುಂಕ್ ಸಕ್ತಾಂ ಮ್ಹಳ್ಳ್ಯಾಚೆರ್.
ಪಯ್ಲೆಂ ಮ್ಹಾಕಾ ಕವಿತಾಪಾಠಾಕ್ ಯೆಂವ್ಚಾಧಿಂ ಉಂಚ್ಲ್ಯಾ ಚಿಂತ್ಪಾಚಾ, ಫಾಮಾದ್ ಕವಿ/ಸಾಹಿತಿಂಕ್ ಕಶೆಂ ಮೆಳ್ಚೆಂ ಮ್ಹಳ್ಳಿ ಕಾವ್ಜೆಣಿ ಆಸ್ಲ್ಲಿ ತರ್ಯ್ ದಾಯ್ಜ್ ಪಂಗ್ಡಾಚಾ ಹರ್ಯೆಕಾ ಸಾಂದ್ಯಾಂನಿ ಎಕಾಮೆಕಾ ದಿಂವ್ಚೆಂ ಉತ್ತೇಜನ್ ಆನಿ ದೇಖ್ ಹೊಗ್ಳಿಕಾಯೆಕ್ ಫಾವೊ ಜಾಲ್ಲಿಚ್. ಮ್ಹಜಿಂ ಕವಿತಾದೆಣಿಂ ಮಾತ್ರ್ ನ್ಹಯ್ ಆಸ್ತಾಂ, ಮ್ಹಜಾ ನಟನಾಚಾ ದೆಣ್ಯಾಕ್ಯ್ ವಳ್ಕೊನ್ ಉತ್ತೇಜನ್ ದೀವ್ನ್ ಜ್ಯೆಂ ಹಾವೆಂ ಸ್ವಪ್ಣಾಂತ್ಯ್ ಚಿಂತುಂಕ್ ನಾ ತೆಂ ದಾಯ್ಜಾನ್ ಫಾವೊ ಕೆಲಾಂ.
ಹ್ಯಾ ತುಮ್ಚಾ ಪಾಟಿಂಬ್ಯಾವರ್ವಿಂ ಮ್ಹಾಕಾ ಏಕ್ ಉದೆವ್ನ್ ಯೆಂವ್ಚಾ ಕವಯತ್ರಿಕ್ ಜಾಯ್ತೆಂ ಧಯ್ರ್ ಆನಿ ಆತ್ಮ್ವಿಶ್ವಾಸ್ ಲಾಭ್ಲಾ, ಹ್ಯಾ ಖಾತಿರ್ ವಲ್ಲಿ ಬಾಬಾಚೊ ಉಪ್ಕಾರ್ ಆಟಯ್ತಾಂ. ಕವಿತಾಪಾಠ್ ತುಜೆಶಿವಾಯ್ ಕಿತೆಂಚ್ ನ್ಹಯ್, ಆಜ್ ಕವಿತಾಪಾಠ್, ಹಾಂವ್ ಕಿತೆಂಯ್ ಆಸಾಂ ತರ್ ತೆಂ ಫಕತ್ತ್ ತುಜಾ ಮಿನತೆನ್ ಆನಿ ಸಹಕಾರಾನ್.
ದೇವ್ ಬರೆಂ ಕರುಂ.
ಕವಿತಾಪಾಠ್ವಿಶಿಂ ಹೆರಾಂ ಕಿತೆಂ ಸಾಂಗ್ತಾತ್? - ವಾಚಾ.
"ಕೊನ್ಶಾಂತ್ ಥಾವ್ನ್ ಮನ್ಶಾಂಚೊ ವಾವ್ರ್"
"ಕವಿತಾ ಕವಿಂಕ್ ವಳ್ಕತಾ ಆನಿ ಪಾರ್ಕಿತಾ"
"ಕವಿತಾಪಾಠ್ - ಕೊಂಕ್ಣಿ ಕವಿತಾಂಕ್ ರಾಯ್ಪಾಟ್"
- ಎಚ್ಚೆಮ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.