ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 23. ಗ್ರ್ಯಾನಿ
ಶಾಲಿನಿ ವಾಲೆನ್ಸಿಯಾ: ಕೊಂಕ್ಣೆಂತ್ ಸ್ತ್ರೀ ಲೇಖಕಿಂ ಆಸ್ಚಿಂ ಭೋವ್ ಉಣಿಂ, ಹಾಂತುಂ ಪ್ರಭುದ್ದ್ ಬರಯ್ಣಾರಾಂ ಥೊಡಿಂಚ್, ಆನಿ ಹ್ಯಾ ಥೊಡ್ಯಾಂ ಪಯ್ಕಿಂತ್ ಉಟೊನ್ ದಿಸ್ಚಾಂತ್ ಬಾಯ್ ಶಾಲಿನಿ ವಾಲೆನ್ಸಿಯಾ ಎಕ್ಲಿ. ಸಂಯ್ಭಾನ್ ಜಿತ್ಲಿ ಸಾದಿ, ಖಾಲ್ತಿ, ಖುಶಾಲಿ ಆನಿ ಮೊಗಾಳ್ಗಿ ಸಾಹಿತ್ಯಾಂತ್ ತಿತ್ಲಿಚ್ ಪ್ರಭುದ್ದ್, ಚುರುಕ್ ಆನಿ ಹುಶಾರ್. ಹಿಣೆಂ ಬರಯಿಲ್ಲ್ಯೊ ಕಾಣ್ಯೊ ಥೊಡ್ಯೊಚ್ ತರ್ಯ್ ವಾಚ್ಪ್ಯಾನ್ ಸಭಾರ್ ತೇಂಪ್ ಉಡಾಸ್ ದವರ್ಚೆ ತಸಲ್ಯೊ ಜಾವ್ನಾಸಾತ್. ’ಗ್ರ್ಯಾನಿ’ ಪ್ರಸ್ತುತ್ ಕಾಳಾರ್ ಫಕತ್ತ್ ಏಕ್ ಸಬ್ಧ್ ಮಾತ್ರ್ ಜಾವ್ನ್ ಉರ್ಲಾ? ತುಂಚ್ ಹೆಂ ವಾಚುನ್ ಪಾರ್ಕಿ.
ಶಾಲಿನಿ, ವಾಲೆನ್ಸಿಯಾ
"ಆಮ್ಗೆರ್ ಆಜ್ ಮ್ಹಜಿ ಗ್ರ್ಯಾನಿ ಆಯ್ಲ್ಯಾ"
ಭಾರಿಚ್ ಉತ್ಸಾಹಾನ್ ಆರುಣ್ ಸಾಂಗಾಲಾಗ್ಲೊ ವಿನಯಕಡೆ. ದೊಗೀ ಎಕಾಚ್ಚ್ ಇಸ್ಕಾಲಾಂತ್ ಎಕಾಚ್ ಕ್ಲಾಸಿಂತ್ ಶಿಕ್ತಾಲೆ. ಅರುಣಾಚಿ ಆವಯ್ ಬಾಪಯ್, ಜಿಂ ಬೇಂಕಾಂತ್ ನವ್ಕರಿ ಕರ್ತಾಲಿಂ ಜಾಲ್ಲ್ಯಾನ್, ಹ್ಯಾ ವರ್ಸಾ ವರ್ಗ್ ಜಾವ್ನ್ ಹ್ಯಾ ಗಾಂವಾಕ್ ಆಯಿಲ್ಲಿಂ. ವಿನಯಚ್ಯಾಚ್ ಇಸ್ಕಲಾಕ್ ಭರ್ತಿ ಜಾಲ್ಲೊ ಆರುಣ್ ಚವ್ತೆಕ್. ದೊಗೀ ಸಾಂಗಾಂತಾ ಬಸ್ತಾಲೆ ಆಸ್ತಾಂ, ತಾಂಚೆಂ ಮಧೆಂ ಭಾರಿಚ್ಚ್ ಇಷ್ಟಾಗತ್ ಜಮ್ಲ್ಲಿ.
ಇತ್ಲೆ ದೀಸ್ ಥಂಡ್ ಬಸ್ಚೊ ಆರುಣ್ ಆಜ್ ಸಗ್ಳೊಚ್ಚ್ ಹುಳ್ವುಳ್ತಾಲೊ. "ಗ್ರ್ಯಾನಿ ಆಸ್ತಾ ಪಾಸೊನ್ ಮ್ಹಾಕಾ ಗಮ್ಮತ್ಚ್ ಗಮ್ಮತ್ ಜಾಣಾಂಯ್"
ವಿನಯ್ ಕಿತೆಂ ಜಾಣಾಂ? ತೊ ಕಿತೆಂ ಮ್ಹಣ್ಚೆಂ ಮ್ಹಣ್ ಕಳನಾಸ್ತಾನಾ, ಅರುಣಾಕ್ಚ್ ವಿಜ್ಮಿತ್ಕಾಯೆನ್ ದೆಕ್ತಾಲೆ. ಅರುಣಾಚೆ ದೊಳೆ ಉಜಳ್ತಾಲೆ. ಬಸ್ಲ್ಲ್ಯಾ ಕಡೆ ಬಸೊಂಕ್ ಜಾಯ್ನಾತ್ಲ್ಲೆಂ ತಾಕಾ.
"ಗ್ರ್ಯಾನಿ ಆಯ್ಲ್ಯಾ ಮ್ಹಣ್ತಾಯ್? ಖಂಯ್ ಥಾವ್ನ್ ಆಯ್ಲ್ಯಾ? ತಿ ತುಮ್ಚೆಂ ಸಾಂಗಾಂತಾ ರಾವನಾಂಗಿ?" ತಾಣೆಂ ಸವಾಲ್ ವಿನಯಾಚೆಂ.
"ತಿ ಗಾಂವಾಂತ್ ಮ್ಹಜ್ಯಾ ದುಸ್ರ್ಯಾ ಅಂಕಲಾಗೆರ್ ರಾವ್ತಾ. ಕೆದ್ನಾಂ ಕೆದ್ನಾಂ ಆಮ್ಗೆರ್ ಯೆತಾ. ಮಸ್ತು ದೀಸ್ ರಾವೊನ್ ಪಾಟಿಂ ವೆತಾ" ಪಚಾ ಪಚಾ ವಿವರ್ಸಿಲಾಗ್ಲೊ ಆರುಣ್. "ತಿ ಯೆತಾನಾ ಮಸ್ತ್ ಖಾಂವ್ಚ್ಯಾಕ್ ಹಾಡ್ತಾ. ನಾರ್ಲ್ ರಾಂದ್ವಯ್ ಸಗ್ಳೆಂ ಹಾಡ್ತಾ. ತಿ ಆಮ್ಗೆರ್ ಆಸ್ತಾ ತಿತ್ಲೆ ದೀಸ್ ಹಾಂವೆಂ ರಾತಿಂ ತಿಕಾ ಪೊಟ್ಲುನ್ ಧರ್ನ್ಚ್ ನಿದ್ಚೆಂ, ಮಾಮ್ಮಿ ಡ್ಯಾಡಿ ತಿಕಾ ಮ್ಹಜೆಂಚ್ ರೂಮ್ ದಿತಾತ್. ತಿ ಮ್ಹಾಕಾ ಕಿತ್ಲ್ಯೊ ಕಾಣಿಯೊ ಸಾಂಗ್ತಾಂ. ಸದಾಂ ಪಾರ್ಕಾಕ್ ವರ್ತಾ. ನಮುನ್ಯಾ ನಮುನ್ಯಾಚಿಂ ಖಾಣಾಂ ಕರ್ನ್ ದಿತಾ. ಬಾಳಾ, ಭಾಂಗಾರಾ ಬಾಬುಲ್ಯಾ, ಮುನ್ನಾ ಮ್ಹಣ್ ಮಸ್ತ್ ಕೊಂಡಾಟೊ ಕರ್ತಾ. ಕೀಸ್ ದಿತಾ. ಮಾಮ್ಮಿ ಡ್ಯಾಡಿ ಕಾಮಾಕ್ ವೆತಾತ್. ಮ್ಹಾಕಾ ಬೋರ್ ಮ್ಹಳ್ಯಾರ್ ಬೋರ್ ಜಾತಾ. ಗ್ರ್ಯಾನಿ ಆಸ್ಲ್ಯಾರ್ ಬೋರ್ಚ್ ಜಾಯ್ನಾಂ. ಆಮಿಂ ಖೆಳ್ತಾಂವ್. ಟಿ.ವಿ. ಪಳೆತಾಂವ್. ಆನಿಂ ಕಿತ್ಲ್ಯೊ ಗಜಾಲಿ ಕರ್ತಾಂವ್ ಜಾಣಾಂಯ್? ಶತಾಬ್ಧಿ ಎಕ್ಸ್ಪ್ರೆಸಾಬರಿ ಆರುಣಾಚಿ ಗ್ರ್ಯಾನಿ ಮ್ಹಳ್ಳಿ ಗಾಡಿ ಬ್ರೇಕ್ ನಾಸ್ತಾನಾ ಧಾಂವ್ತಾಲಿ.
ಪಾತ್ಯೆಂವ್ಕ್ ಕಷ್ಟಾಲೊ ವಿನಯ್.
"ತುಂ ಸತ್ಚ್ ಉಲಯ್ತಾಯ್ಮೂ? ವಾ ಫಟಿ ಮಾರ್ತಾಯ್?" ವಿಚಾರ್ಲೆಂ ಮುಗ್ಧ್ಪಣಿಂ ತಾಣೆಂ.
"ಫಟಿ ನ್ಹಂಯ್ ಸತ್ತ್, ಪ್ರೊಮಿಸ್, ಗೋಡ್ ಪ್ರೋಮಿಸ್. ಮ್ಹಾಕಾ ಕೆದಾಳಾ ಕ್ಲಾಸ್ ಆಖೇರ್ ಜಾಯ್ನಾ, ಕೆದಾಳಾ ಘರಾ ವಚನಾ ಮ್ಹಣ್ ಜಾತಾ"
ಅರುಣ್ ಸಗ್ಳೊ ದೀಸ್ ಚಡ್ಪಡ್ತಾಲೊ. ಆನಿಂ ಸಗ್ಳೊ ದೀಸ್ ತಾಚ್ಯಾ ಗ್ರ್ಯಾನಿಚಿ ಶಿಫಾರಸ್ ಕರಿತ್ತ್ ಆಸ್ಲ್ಲೊ. ಆಜ್ ತಾಚ್ಯಾ ತೋಂಡಾಂತ್ ಗ್ರ್ಯಾನಿ ಮ್ಹಳ್ಳೆಂ ಉತರ್ ಸೊಡ್ಲ್ಯಾರ್ ಹೆರ್ ಕಿತೆಂಯ್ ನಾತ್ಲ್ಲೆಂ. ಉಲ್ಲಾಸ್ ತಾಚ್ಯಾ ಶಿರಾಂ ಶಿರಾಂನಿ ವ್ಹಾಳ್ತಾಲೊ.
ತ್ಯಾ ದೀಸ್ ಮಾತ್ರ್ ನ್ಹಂಯ್ ಉಪ್ರಾಂತ್ಲೊ ಹರ್ಯೇಕ್ ದೀಸ್ಯ್ ಆಶೆಚ್. ಆರುಣಾಚೊ ದೀಸ್ ಗ್ರ್ಯಾನಿ ಮ್ಹಣ್ ಆರಂಭ್ ಜಾವ್ನ್ ಗ್ರ್ಯಾನಿ ಮ್ಹಣ್ ಸಂಪ್ತಾಲೊ. ಹರ್ಯೇಕ್ ದೀಸ್ ತಿಣೆಂ ಕೆಲ್ಲೆಂ, ತಿಣೆಂ ಹಾಡ್ಲ್ಲೆಂ, ತಿಣೆಂ ದಿಲ್ಲೆಂ ಮ್ಹಣ್ ಕಿತೆಂ ನಾ ಕಿತೆಂ ತೊ ಇಸ್ಕಲಾಕ್ ಘೆವ್ನ್ ಯೆತಾಲೊ. ದನ್ಪರಾಂ ಜೆವ್ಣಾಚ್ಯಾ ವೆಳಾರ್ ತಾಂತ್ಲೆಂ ಥೊಡೆಂ ವಿನಯಾಕಿ ದಿತಾಲೊ. ಹೆಂ ಸರ್ವ್ ಪಳೆವ್ನ್ ವಿನಯಾಚಿ ಮತ್ ಗೊಂದೊಳಾನಿಂ ರೆವೊಡ್ತಾಲಿ.
"ತರ್ ಮ್ಹಜಿ ಗ್ರ್ಯಾನಿ ಕಿತ್ಯಾಕ್ ತಶಿ?" ಚಿಂತ್ನಾಂನಿ ಬುಡ್ತಾಲೊ ತೊ.
ವ್ಹಯ್ ತಾಚಿ ಗ್ರ್ಯಾನಿ ಆರುಣಾಚ್ಯಾ ಗ್ರ್ಯಾನಿಬರಿ ನಾತ್ಲ್ಲಿಚ್. ಏಕ್ಚ್ ಏಕ್ ದೀಸ್ ತಿಣೆಂ ತಾಕಾ ಭಾಂಗಾರಾ ವಾ ಪುತಾ ಮ್ಹಣ್ ಉಲೊ ಕೆಲ್ಲೆಂ ನಾಂಚ್. ತೀನ್ ಕಾಸಾಂಚ್ಯಾ, ಬೊಡ್ಕಿಚ್ಯಾ ಪುತಾ ಮ್ಹಣ್ ಗಾಳಿ ದೀವ್ನ್ಂಚ್ ತಿಣೆಂ ಆಪಂವ್ಚೆಂ. ತಿಣೆಂ ತಾಕಾ ಪೊಟ್ಲುನ್ ಧರ್ಲ್ಲೆಂ ವಾ ಕೀಸ್ ದಿಲ್ಲೊ ಉಗ್ಡಾಸ್ ತಾಕಾ ನಾಂ. ತಾಚೆ ಸಾಂಗಾಂತಾ ತಿಣೆಂ ಖೆಳ್ಚೆಂ ಸೊಡ್, ತಾಣೆಂ ಹೆರ್ ಭುರ್ಗ್ಯಾಂ ಸಾಂಗಾಂತಾ ಖೆಳ್ಳ್ಯಾರ್ ತಿಕಾ ಸೊಸನಾತ್ಲ್ಲೆಂ. ತ್ಯಾಚ್ ವೆಳಾರ್ ತಿಚೆಂ ಕಾಮ್ ದಿತಾಲಿ ತಾಕಾ. ವಿವಿಧ್ ಖಾಣಾಂ ಹಾಡ್ನ್ ವಾ ಕರ್ನ್ ದಿಂವ್ಚೆಂ ಸೊಡ್, ತಾಚೆ ಖಾತಿರ್ ಡ್ಯಾಡೀನ್ ಹಾಡ್ಲ್ಲೆಂ ಚಡ್ ವಾಂಟೊ ತಿಚ್ಚ್ ಖಾವ್ನ್ ಮುಗ್ದಿತಾಲಿ. ಹಾಂವ್ ವೆಗಿಂ ಮರ್ಚಿ ಮಾತಾರಿ. ತುಕಾ ಜಾಲ್ಯಾರ್ ಆನಿಕೀ ಮಸ್ತ್ ವರ್ಸಾಂ ಆಸಾತ್. ಹಾಂವ್ ಮೆಲ್ಯಾ ಉಪ್ರಾಂತ್ ಧಾದೊಶಿ ಖಾ ಮ್ಹಣ್ತಾಲಿ. ತಾಕಾ ತಿಣೆಂ ಭಂವೊಂಕ್ ವರ್ಚೆಂ ಸೊಡ್, ತೊ ತಾಚ್ಯಾ ಮಾಮ್ಮಿ ಡ್ಯಾಡಿ ಸಾಂಗಾಂತಾ ಭಂವ್ಡೆಕ್ ಭಾಯ್ರ್ ಸರ್ಲೊ ತರ್, ಕಿತೆಂ ನಾ ಕಿತೆಂ ಆಡ್ಕಳಿ ಹಾಡ್ನ್ ತಿ ತಾಂಚಿ ಭಂವ್ಡಿ ರದ್ಧ್ ಕರಯ್ತಾಲಿ.
ವಿನಯಾಚ್ಯಾ ಮಾಮ್ಮಿಚೆರಿ ತಿಕಾ ಕಸಲೊಯ್ ಹುಸ್ಕೊ, ಮೋಗ್ ನಾತ್ಲ್ಲೊಚ್. ಕಾರಣ್? ಡ್ಯಾಡಿ ಮಾಮ್ಮಿಕಡೆ ಗ್ರ್ಯಾನಿಚೆಂ ಆಯ್ಕಾನಾಸ್ತಾಂ ಕಾಜಾರ್ ಜಾಲ್ಲೊ. ಹೆಂ ತಿ ಸಬಾರ್ ಆನಿಂ ಸಬಾರ್ ಪಾವ್ಟಿಂ ಸಾಂಗ್ತೆ ಆಸ್ತಾ. ಡ್ಯಾಡಿ ಮಾತ್ರ್ ಗ್ರ್ಯಾನಿ ಮ್ಹಳ್ಯಾರ್ ಜೀವ್ ದಿತಾ. ಗ್ರ್ಯಾನಿಚಿಂ ದೂರಾಂ ಆಯ್ಕೊನ್ ಮಾಮ್ಮಿಕ್ ಆನಿಂ ತಾಕಾ ಜ್ಯೋರ್ ಕರ್ತಾಲೊ. ಶಿವಾಯ್ ಗ್ರ್ಯಾನಿಕ್ ಕಿತೆಂಚ್ ಮ್ಹಣಾನಾತ್ಲ್ಲೊ. ದೆಕುನ್ಂಚ್ ತಿ ಇತ್ಲಿ ಜ್ಯೋರ್ ಜಾಲ್ಯಾ ಮ್ಹಣ್ ದಿಸ್ತಾ. ವಿನಯಾಚಿ ಮತ್ ಹಜಾರ್ ಚಿಂತಾಲಿ ಆನಿಂ ತರ್ಕ್ ಕರ್ತಾಲಿ.
ಆತಾಂ ಗ್ರ್ಯಾನಿ ಸ ಮಹಿನೆ ಥಾವ್ನ್ ಬೆಡ್ಡಾರ್ ಆಸ್ಲ್ಲಿ. ತಿಕಾ ಕುಶಿಕ್ ಆರ್ ಮಾರ್ಲ್ಲಿ. ಹಾತ್ ಪಾಯ್ ಹಾಲಂವ್ಕ್ ಜಾಯ್ನಾತ್ಲ್ಲೆ. ಸಗ್ಳೋ ದೀಸ್ ನಿದೊನ್ಂಚ್ ಆಸ್ತಾಲಿ. ಜೆಂವ್ಚೆಂ, ಖಾಂವ್ಚೆಂ, ಕುಡಿಚ್ಯೊ ಗರ್ಜ್ಯೊ ತಿರ್ಸುಂಚೆಂ ಸಗ್ಳೆ ಖಟ್ಲ್ಯಾರ್ಚ್. ಸರ್ವ್ ತಿಚಿಂ ಕಾಮಾಂ ತಾಂಕಾಚ್ ಕರಿಜೆ ಪಡ್ತಾಲಿಂ. ದೋನ್ ದಿಸಾಂಕ್ ಏಕ್ ಪಾವ್ಟಿಂ ಎಕ್ಲೊ ಯೇವ್ನ್ ತಿಕಾ ತೇಲ್ ಪುಸೊನ್ ತಿಕಾ ರಗಡ್ತಾಲೊ. ಎಕ್ಸರ್ಸೈಜ್ ಕರಯ್ತಾಲೊ. ತರೀ ಕಾಂಯ್ ಬರೆಂಪಣ್ ನಾತ್ಲ್ಲೆಂ. ವಾ ತಶೆಂ ತಿ ದಾಕಯ್ತಾಲಿ. ಘಂಟ್ಯಾಕ್ ಏಕ್ ಪಾವ್ಟಿಂ ತಿ ತಾಂಕಾಂ ಆಪಯ್ತಾಲಿ. ಜೆವ್ತಾನಾ, ಖೆಳ್ತನಾ, ಟಿ.ವಿ. ಪಳೆತಾನಾ ತಿಣೆಂ ಆಪಂವ್ಚೆಂ ಚಡ್. "ಆತ್ತಾ ಪಾಯ್ ಪೂಸ್. ಆತಾಂ ಪಿಯೆಂವ್ಕ್ ಉದಾಕ್ ದೀ. ಆತಾಂ ವೊಲ್ ಸಮಾ ಕರ್. ಬೆಡ್ ಪ್ಯಾನ್ ದೀ. ನಿದೊಂಕ್ ವೆತಾ ಪಾಸುನ್ ತಿಚೆಂ ಫರ್ಮಾಣಾಂ ಜ್ಯಾರಿ ಆಸ್ತಾಲಿಂ. ಸಾಂಗಾಂತಾ ಪುರ್ಪುರೆ, ಗಾಳಿ, ದುರ್ಸೊಣೆಂ. ವಿನಯಾಕ್ ಖಂಡಿತ್ ಜಾವ್ನ್ ತಿಚೊ ಕಠೀಣ್ ರಾಗ್ ಯೆತಾಲೊ. ಘರಾ ಥಾವ್ನ್ ಪಯ್ಸ್ ಧಾಂವ್ಯಾಂ ಮ್ಹಣ್ ಭಗ್ತಾಲೆಂ. ಗ್ರ್ಯಾನಿಕ್ ರಿಸ್ಪೆಕ್ಟ್ ದೀಜೆ, ಸಾಂಗ್ಲ್ಲೆಂ ಆಯ್ಕಾಜೆ ಮ್ಹಣ್ ಮಾಮ್ಮಿ ಡ್ಯಾಡೀ ಸಾಂಗ್ತಾಲಿಂ. ದೆಕುನ್ ತಾಚೊ ರಾಗ್ ತೊ ದಾಂಬುನ್ ಧರ್ತಾಲೊ. ಸಕ್ಕಡಾಂಚ್ಯೊ ಗ್ರ್ಯಾನಿ ಆಶ್ಯೊಚ್ ಮ್ಹಳ್ಳ್ಯಾ ತೀರ್ಪಾಕ್ ಆಯಿಲ್ಲೊ ತೊ.
ತಾಂಚ್ಯಾ ಘರ್ಚಿಂ ಪರಿಗತ್ ಆಶಿ ಆಸ್ತಾನಾ, ಆರುಣಾಚ್ಯಾ ಗ್ರ್ಯಾನಿ ವಿಶ್ಯಾಂತ್ ತಾಚಿ ಮುಗ್ಧ್ ಮತ್ ಪಾತ್ಯೆಂವ್ಕ್ ಸಕಾನಾತ್ಲ್ಲಿ.
ಆಶೆಂ ಆಶ್ತಾನಾ, ರಜೆಚ್ಯಾ ಎಕಾ ದಿಸಾ ಆರುಣಾನ್ ವಿನಯಾಕ್ ತಾಂಗೆರ್ ಆಪಯ್ಲೆಂ. ತಾಚ್ಯಾ ಗ್ರ್ಯಾನಿನ್ ಆಪಯ್ಲಾಂ ಮ್ಹಳ್ಳೆಂ ನೀಬ್ ದೀವ್ನ್. ತ್ಯಾ ದೀಸ್ ವಿನಯಾನ್ ಖುದ್ಧ್ ತಾಚ್ಯಾ ಗ್ರ್ಯಾನಿಚಿ ಚಾಲ್ ಚಮ್ಕಾಣ್ ದೆಕ್ಲೆಂ.
’ಕಿತ್ಲಿ ಮೊವಾಳ್, ದಯಾಳ್, ಮಯ್ಪಾಸಿ ತಿ? ಆರುಣಾಚೊ ಕಿತ್ಲೊ ಕೊಂಡಾಟೊ ಕರ್ತಾಲಿ. ತಾಕಾಯ್ ಪುತಾ ಪುತಾ ಮ್ಹಣ್ ಪೊಟ್ಲುನ್ ಧರ್ನ್ ಕೀಸ್ ದಿಲ್ಲೆ ತಿಣೆಂ. ಕಿತ್ಲಿ ಲಜ್ ಜಾಲ್ಲಿ ವಿನಯಾಕ್. ಮತಿಂತ್ ಮಾತ್ರ್ ಖುಶಿ ಜಾಲ್ಲಿ. ಸಗ್ಳೊ ದೀಸ್ ತೆ ಖೆಳ್ಲ್ಲೆ. ಮಧೆಂ ಮಧೆಂ ಕಿತ್ಲೆಂ ಖಾಂವ್ಕ್? ದೀಸ್ ಕಸೊ ಪಾಶಾರ್ ಜಾಲೊ ತೆಂ ವಿನಯಾಕ್ ಕಳ್ಳೆಂಚ್ ನಾಂ. ಪುರ್ಪುರೆ ಧೆಂಕ್ಣೆಂ ನಾತ್ಲ್ಲೆಂಚ್. "ಆಜ್ ರಜಾ ನ್ಹಂಯ್. ಎನ್ಜೋಯ್ ಕರಾ" ಮ್ಹಳೆಂ ತಿಣೆಂ. ಘರಾ ಪಾಟಿಂ ಯೇಂವ್ಕ್ ವಿನಯಾಕ್ ಮನ್ಚ್ ನಾತ್ಲ್ಲೆಂ. ತರೀ ಯೇಜೆ ಪಡ್ಲೆ.
ಮಾತ್ರ್ ತಾಣೆಂ ಏಕ್ ಘಟ್ಟ್ ಆಲೋಚನ್ ಕೆಲ್ಲಿ. ಸದ್ದಾಂ ರಾತಿಕ್ ನಿದೊಂಕ್ ವೆತಾನಾ ತೊ ಜೆಜು ಲಾಗಿಂ ಮಾಗ್ತಾಲೊ. "ಜೆಜು ಹ್ಯಾ ಗ್ಯ್ರಾನಿ ತಸಲಿ ಏಕ್ ಬರಿ ಗ್ರ್ಯಾನಿ ದೀ" ಹೆಂ ಮಾಗ್ಣೆ ಮಾತ್ರ್ ತೊ ಘುಟಾನ್ ಕರ್ತಾಲೊ.
ಸಭಾರ್ ದೀಸ್ ಪಾಶಾರ್ ಜಾತಾನಾ ಆರುಣಾಚಿ ಗ್ರ್ಯಾನಿ ತಿಚ್ಯಾ ಗಾಂವಾಕ್ ಪಾಟಿಂ ಗೆಲಿ. ತಾಚೊ ಹುರುಪ್ಯಿ ತಿಚ್ಯಾ ಸಂಗಿಂ ಗೆಲೊ. ಸಗ್ಳೊ ದೀಸ್ ತೊ ಉದಾಸ್ ಆಸ್ತಾಲೊ. ತಾಚೆಂ ತೋಂಡ್ ಬಾವೊನ್ ಆಸ್ತಾಲೆಂ. ಗ್ರ್ಯಾನಿಕ್ ಬಸ್ಸಾಕಡೆ ಪಾಯ್ತನಾ ಆಪುಣ್ ಮಸ್ತ್ ರಡ್ಲೊಂ ಮ್ಹಣ್ತಾಲೊ ಆರುಣ್. ಬಿರ್ಮೊತ್ ದಿಸ್ಲಿ ವಿನಯಾಕ್ ತಾಚಿ. "ಫಾಲ್ಯಾಂ ರಜಾ ನ್ಹಂಯ್? ತುಂ ಆಮ್ಗೆರ್ ಯೇ. ಆಮಿಂ ಗಮ್ಮತ್ ಖೆಳ್ಯಾಂ" ಇಷ್ಟಾಕ್ ಆಪವ್ಣೆಂ ದಿಲೆಂ ತಾಣೆಂ. ಖುಶೆನ್ ಒಪ್ಲೊ ಆರುಣ್.
ಭಾಸಾಯ್ಲೆಲ್ಯಾಬರಿ ಆರುಣ್ ವಿನಯಾ ಘರ್ ಆಯ್ಲೊ. ತಾಂಣಿ ದೊಗಾಂಯ್ನಿ ಖೆಳೊಂಕ್ ಸುರು ಕೆಲೆಂಚ್. ಪುಣ್ ಏಕ್ ಬೋಲ್ ಘಾಲಿಜೆ ತರ್ ಗ್ರ್ಯಾನಿನ್ ಆಪಯ್ಲೆಂ. ಪಿಯೆಂವ್ಕ್ ಉದಾಕ್ ದಿಂವ್ಚಾಕ್. ತಾಣೆಂ ಬ್ಯಾಟ್ ಧರ್ನ್ ಏಕ್ ಬೋಲ್ ಮಾರಿಜೆ ತರ್ ಪರತ್ ಗ್ರ್ಯಾನಿನ್ ಆಪಯ್ಲೆಂ. ಹ್ಯಾ ಪಾವ್ಟಿಂ ವೋಲ್ ಸಾರ್ಕಿ ಕರ್ಚ್ಯಾಕ್. ತಿಚೆಂ ಕರ್ಕರೆ ಸೊಸುಂಕ್ ಜಾಯ್ನಾಸ್ತಾನಾ ತಾಂಣಿಂ ಖೆಳ್ ಬಂದ್ ಕೆಲೊ ಆನಿಂ ಟಿ.ವಿ. ಓನ್ ಕೆಲಿ. ’ಪೊಗೊ’ ಪಳೆಂವ್ಚಾಕ್. ಟಿ.ವಿ. ಕಾರ್ಯಕ್ರಮಾಂನಿ ಮಧೆಂ ಮಧೆಂ ಬ್ರೇಕ್ ಆಸ್ಲ್ಲ್ಯಾ ಬರಿ ಗ್ರ್ಯಾನಿಚ್ಯಾ ಕುಡಾ ಥಾವ್ನ್ ಮಧೆಂ ಮಧೆಂ ವಿನಯಾಕ್ ಫರ್ಮಾಣ್ ಯೆತಾಲೆಂ. ಮೊಗಾಚಿ ನ್ಹಂಯ್ ರಾಗಾಚಿಂ. ಸಾಂಗಾಂತಾ ಗಾಳಿ ಆನಿಂ ಪುರ್ಪುರೆ. ಪಳೆಸರ್ ಪಳೆಲೆಂ ಆನಿಂ ಆಯ್ಕಾಸರ್ ಆಯ್ಕಾಲೆಂ ಆರುಣಾನ್.
"ತೂ.....ತೂ....ತುಜಿ ಗ್ರ್ಯಾನಿ ಮ್ಹಾಕಾ ಕಾಂಯ್ ಲೈಕ್ ನಾಂ. ಶಿ ಇಸ್ ವೆರಿ ಬ್ಯಾಡ್." ಕಾಂಟಾಳೊನ್ ಮ್ಹಣಾಲೊ ತೊ. "ಮ್ಹಜಿ ಗ್ರ್ಯಾನಿ ಕೆದ್ನಾಂಚ್ ಆಶೆಂ ಕರಿನಾ. ತಿ ಸಕ್ಕಡಾಂಚೊ ಕಿತ್ಲೊ ಲವ್ ಕರ್ತಾ. ತುಜಿ ಗ್ರ್ಯಾನಿ ತುಜೊ ಕಾಂಯ್ ಲವ್ ಕರಿನಾ. ತಿಕಾ ಕಶೆಂ ಉಲಂವ್ಚೆಂ ಮ್ಹಳ್ಳೆಂಚ್ ಕಳಿತ್ ನಾಂ. ಆನಿಂ ಮುಖಾರ್ ಹಾಂವ್ ತುಮ್ಗೆರ್ ಯೇನಾ. ಹೆಂಚ್ ಲಾಸ್ಟ್. ತೂ..ತೂ" ತಿರಸ್ಕಾರ್ ತಾಚ್ಯಾ ಉತ್ರಾಂನಿ ನಿಶೆತಾಲೊ.
ಕಿತೆಂ ಜಾಪ್ ದಿತಾಲೊ ಬಾವ್ಡೊ ವಿನಯ್.
ಲಜೆನ್ ಆನಿಂ ಬೆಜಾರಾಯೆನ್ ಥೊಡೊ ವೇಳ್ ತೊ ಉಲಯ್ಲೊಚ್ಚ್ ನಾಂ. ಆರುಣಾಚೆಂ ಹರ್ಯೇಕ್ ಉತರ್ ಆಯ್ಕಾಲ್ಲೆಂ ಬಿತರ್ ಆಸ್ಲ್ಲ್ಯಾ ಗ್ಯ್ರಾನಿನ್. ಆತಾಂ ವಿನಯ್ ಥಾವ್ನ್ ಕಿತೆಂ ಜಾಪ್ ಯೆತಾ ಮ್ಹಣ್ ಆಯ್ಕೊಂಕ್ ಆತುರಾಯೆನ್ ರಾಕೊನ್ ರಾವ್ಲಿ.
"ತಿ ಕೆದ್ನಾಂಯ್ ತಶಿಚ್. ಕಿತ್ಯಾಕ್ ಮ್ಹಾಕಾ ಸಮ್ಜಾನಾ. ಮ್ಹಾಕಾಯ್ ತಿ ಲೈಕ್ ನಾಂ. ತುಜಿ ಗ್ರ್ಯಾನಿ ಮ್ಹಾಕಾ ಮಸ್ತ್ ಲೈಕ್ ಜಾತಾ. ದೆಕುನ್ಂಚ್ ಹಾಂವ್ ಸದಾಂ ಜೆಜುಕಡೆ ಮಾಗ್ತಾಂ" ಹ್ಯಾ ಗ್ರ್ಯಾನಿಕ್ ವ್ಹರ್ ಜೆಜು. ಆನಿಂ ಮ್ಹಾಕಾ ತುಜ್ಯಾ ಗ್ರ್ಯಾನಿ ತಸಲಿ ಗ್ರ್ಯಾನಿ ದಿ ಮ್ಹಣ್". ಎಕ್ ದೀಸ್ ಖಂಡಿತ್ ಮ್ಹಜೆಂ ಪ್ರೇಯರ್ ಆಯ್ಕಾತಾಲೊ" ಘಟ್ಟ್ ಭರ್ವಶ್ಯಾನ್ ಸಾಂಗ್ಲೆಂ ತಾಣೆಂ.
ಉಪ್ರಾಂತ್ ತೆ ಕಿತೆಂ ಸಕ್ಕಡ್ ಉಲಯ್ಲೆಗಿ? ಹೆಂ ಖಂಚೆಯ್ ತಿಚ್ಯಾ ಮತಿಕ್ ಗೆಲೆಂ ನಾಂ. ತಿಕಾ ಮಾತ್ರ್ ಭುರ್ಗ್ಯಾಂಚಿ ಉತ್ರಾಂ ಆಯ್ಕೊನ್ ಶೆಳೊ ಘಾಮ್ ಸುಟ್ಲ್ಲೊ. ಆಜ್ ಪಾಸೊನ್ ತಿಚ್ಯಾ ನಡ್ತ್ಯಾ ವಿಶ್ಯಾಂತ್ ತಿಣೆಂ ಜಾಂವ್ ಹೆರಾಂನಿ ಜಾಂವ್ ವಿಮರ್ಸೊ ಕೆಲ್ಲೊ ನಾಂ. ಪುತಾನ್ ಜಾಂವ್, ಸುನೆನ್ ತಿಚಿ ಚಾಲ್ ಚಮ್ಕಾಣ್ ತಿದ್ವುಂಚೆಂ ಧೈಯ್ರ್ ಘೆತ್ಲ್ಲೆಂ ನಾಂ. ಆಜ್ ಹ್ಯಾ ಲ್ಹಾನ್ ಭುರ್ಗ್ಯಾಂನಿ ತಿಚೆ ದೊಳೆ ಉಗ್ತೆ ಕೆಲ್ಲೆ. ಫಿಜಿಯೊ ಥೆರಪಿ ವರ್ವಿಂ ತಿಕಾ ಮಸ್ತ್ ಬರೆಂಪಣ್ ಜಾಲ್ಲೆಂ. ಪ್ರಯತನ್ ಕಲ್ಯಾರ್ ಲ್ಹಾನ್ ಲ್ಹಾನ್ ಸಂಗ್ತಿಂ ಕರುಂಕ್ ತಿ ಸಕ್ತಾಲಿ. ಥೊಡ್ಯಾ ತೇಂಪಾ ಉಪ್ರಾಂತ್ ಪಯ್ಲೆಂಚ್ಯಾಬರಿಂ ಜಾಂವ್ಚೊ ಭರ್ವಸೊ ದಾಕ್ತೆರಾನ್ ದಿಲ್ಲೊ. ದೆಂಕ್ಣೆಂ ಘಾಲಿನಾಸ್ತಾನಾ, ಗಾಳಿ ಸೊವನಾಸ್ತಾನಾ ಉಲಂವ್ಚಾ ವಿಶ್ಯಾಂತ್ ತಿಣೆಂ ಚಿಂತ್ಲಾಗಿ? ಖಂಡಿತ್ ನಾಂ. ಮೋಗ್ ದಿಲ್ಯಾರ್ ಭರ್ಪೂರ್ ಮೋಗ್ ಪಾಟಿಂ ಮೆಳ್ತೊ, ಭಗ್ಲೆಂ ತಿಕಾ. ಚಡ್ ಶಿಕ್ಲ್ಲೆಂ ಚಡ್ ದೋತ್ ಹಾಡ್ಲ್ಲೆಂ ನವ್ಕರಿ ಕರ್ಚೆಂ ಸುನ್ ಹಾಡ್ಲ್ಲೆಂ ತರ್ ಆಪ್ಣಾಚಿ ಸೆವಾ ಚಾಕ್ರಿ ಆಶಿ ಕರ್ತೆಂಗಿ? ಆಪ್ಣಾಚೊಚ್ ನಾತು ಆಪ್ಣಾಕ್ ಕಿತ್ಲೆಂ ಕಾಂಟಾಳ್ತಾ? ನಾ, ಆಪ್ಣೆಂ ಬದ್ಲುಂಕ್ ಪ್ರಯತ್ನ್ ಕರಿಜಾಯ್. ತಿ ಚಿಂತಾಲಿ ಆನಿಂ ಚಿಂತಾಲಿ ದೀಸ್ಭರ್ ಆನಿಂ ರಾತ್ಭರ್.
ಹಾಚೆಂ ಫಲಿತಾಂಶ್ ಸವ್ಕಾಸ್ ದಿಸೊನ್ ಯೇಲಾಗ್ಲೆಂ. ತಿ ಥೊಡಿ ಥೊಡಿಚ್ ಬದ್ಲೊನ್ ಯೆತಾಲಿ. ದೀಸ್ ಪಾಶಾರ್ ಜಾತಾನಾ ಹೆಂ ವಿನಯಾಚ್ಯಾ ತಾಚ್ಯಾ ಮಾಮ್ಮಿ ಡ್ಯಾಡಿಚ್ಯಾ ಗುಮಾನಾಕ್ ವಚನಾಸ್ತಾನಾ ರಾವ್ಲೆಂನಾ. ಪುರ್ಪುರೆ ಉಣೆಂ ಜಾಲ್ಲೆ. ಗಾಳಿ ನಾತ್ಲ್ಲ್ಯೊ. ದುರ್ಸೊಣೆಂ ದೂರಾಂ ನಾತ್ಲ್ಲಿಂಚ್! ದೀಸಾಂತ್ ಸಭಾರ್ ಪಾವ್ಟಿಂ ’ಪುತಾ’ ಮ್ಹಳ್ಳೆಂಯ್ ಆಯ್ಕೊಂಕ್ ಮೆಳ್ತಾಲೆ.
ತಿ ಧರ್ನ್ ಉಟೊನ್ ಬಸೊಂಕ್ ಸಕ್ತಾಲಿ. ಆತಾಂ ಉಬೆಂ ರಾಂವ್ಚ್ಯಾಕ್ ಮೇಟ್ ಕಾಡ್ಚ್ಯಾಕ್ ಉತ್ಸುಕತಾ ದಾಕಯ್ತಾಲಿ. ಟಿ.ವಿ. ಪಳೆತಾನಾ, ಖೆಳ್ತಾನಾ ತಿಚೆಂ ಥಾವ್ನ್ ಕಸಲೀಂಯ್ ಫರ್ಮಾಣಾಂ ಯೇನಾತ್ಲ್ಲಿಂ. ವಿನಯ್ ಸಂತುಷ್ಟ್ ಆಸ್ಲ್ಲೊ. ಉಲ್ಲಾಸಿತ್ ಆಸ್ಲ್ಲೊ.
ದೆಕುನ್ ವಿನಯಾನ್ ತಾಚ್ಯಾ ಮಾಗ್ಣ್ಯಾಂತ್ ಬದ್ಲಾಪ್ ಕೆಲೆಂ.
"ಜೆಜು ಮ್ಹಾಕಾ ಹಿಚ್ ಗ್ಯ್ರಾನಿ ಆಸೊಂದಿ. ದುಸ್ರಿ ದಿಂವ್ಚಿ ನಾಕಾ. ಹಿಕಾಚ್ ವೆಗಿಂ ಬರಿ ಕರ್" ಪಾತ್ಯೆಣೆನ್ ತೊ ಮಾಗ್ತಾಲೊ ಸದಾಂ.
ಕಥಾಝರ್
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
