ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ದೇವ್ ಸರ್ವ್ ಜಾಣಾರ್, ಪುಣ್ ದೆವಾನ್ ಇತ್ಲೆಂ ಜಾಣಾಂ ಆಸೊನ್ಯೀ ಕಸೊ ನೆಣಾರಿ ಜಾಲೊ ತೆಂ ಕಳಿತ್ ನಾ. ದೆವಾಚ್ಯಾ ಮನ್ಶಾನ್ ರಾನಾಂ ಖಾತರ್ಲಿಂ, ಹಸ್ತಿಚೆಂ ಧಾಡೆಂ ವಿಖುನ್ ಆಸ್ತ್ ಆನಿ ಪೊಯ್ಶೆ ಜೊಡ್ಲೆ. ತರ್ನ್ಯಾ ಜನಾಂಗಾಕ್ ಪಿಶೆಂ ಕರುಂಕ್ ಮಾಧಕ್ ಪಿಡೆಚಿಂ ಝಡಾಂ ಲಾಯ್ಲಿಂ, ಮನ್ಶಾನ್ ನಾಕಾ ಜಾಲ್ಲೆಂ ಸರ್ವ್ ಕೆಲೆಂ. ತಾಕಾ ಹೆಂ ಪಳೆತಾನಾ ಕಶೆಂ ಜಾತಾಗೀ?
ಪ್ರಸ್ತಾವನ್ ಆನಿ ವಾಚ್ಪ್ಯಾಲಾಗಿಂ ಸಂವಾದ್
ಸತಾಂತ್ಲಿಂ ವಿಚಿತ್ರಾಂ - 1
ಜೆಮ್ಮಾ ಪಡೀಲ್
ದೆವಾನ್ ಹೊ ಸಂಸಾರ್ ರಚ್ಲೊ, ಹ್ಯಾ ಸಂಸಾರಾಕ್ ಸೊಭೀತ್ ಕರುಂಕ್ ಫುಲಾಂ ಝಡಾಂ ರಚ್ಲಿಂ, ರಾನಾಂ ಕೆಲಿಂ, ರಾನಾಂತ್ ಸಾಂಗಾತ್ ದೀಂವ್ಕ್ ಮನ್ಜಾತಿ ರಚ್ಲ್ಯೊ, ಉದಾಕ್ ರಚ್ಲೆಂ, ಉದ್ಕಾಂತ್ ಖೆಳೊಂಕ್ ಮಾಸ್ಳ್ಯೊ ಕೆಲ್ಯೊ, ಕಾವ್ಳೆ ರಚ್ಲೆ, ಉಲಂವ್ಚೆಂ ಕೀರ್ ಆಯ್ಲೆಂ ಹೆಂ ಸರ್ವ್ ಸಾಂಭಾಳುಂಕ್ ಅಧಿಕಾರ್ ಕರುಂಕ್ ದೆವಾನ್ ಮನಿಸ್ ರಚ್ಲೊ.
ದೇವ್ ಸರ್ವ್ ಜಾಣಾರ್, ಪುಣ್ ದೆವಾನ್ ಇತ್ಲೆಂ ಜಾಣಾಂ ಆಸೊನ್ಯೀ ಕಸೊ ನೆಣಾರಿ ಜಾಲೊ ತೆಂ ಕಳಿತ್ ನಾ. ದೆವಾಚ್ಯಾ ಮನ್ಶಾನ್ ರಾನಾಂ ಖಾತರ್ಲಿಂ, ಹಸ್ತಿಚೆಂ ಧಾಡೆಂ ವಿಖುನ್ ಆಸ್ತ್ ಆನಿ ಪೊಯ್ಶೆ ಜೊಡ್ಲೆ. ತರ್ನ್ಯಾ ಜನಾಂಗಾಕ್ ಪಿಶೆಂ ಕರುಂಕ್ ಮಾಧಕ್ ಪಿಡೆಚಿಂ ಝಡಾಂ ಲಾಯ್ಲಿಂ, ಮನ್ಶಾನ್ ನಾಕಾ ಜಾಲ್ಲೆಂ ಸರ್ವ್ ಕೆಲೆಂ. ತಾಕಾ ಹೆಂ ಪಳೆತಾನಾ ಕಶೆಂ ಜಾತಾಗೀ? ದೆವಾಚ್ಯಾ ಮನ್ಶಾನ್ ಹ್ಯಾ ಸಂಸಾರಾಂತ್ ಅಜ್ಯಾಪಾಂ ಘಡ್ಲಿಂ, ಮೊಳ್ಬಾರ್ ಪಳೆಂವ್ಚಾ ಚಂದ್ರಾರ್ ಪಾಂಯ್ ದವರ್ಲೊ. ಉಭಾರ್ ಉಭಾರ್ ಕಟ್ಟೊಣಾಂ ಭಾಂದ್ಲಿಂ, ಮೊಳ್ಬಾಕ್ ಲಾಗೊಂಕ್. ಪಿಡೆಕ್ ವಕಾತ್ ಸೊಧುನ್ ಕಾಡ್ಲೆಂ, ಸಂಸಾರಾಚ್ಯಾ ಅಜ್ಯಾಪಾಂತ್ ಏಕ್ ನಾಂವ್ ವೆಲೆಂ, ಎಜಿಪ್ತಾಂತ್ ಪಿರಮಿಡ್ ಬಾಂದ್ಲೆಂ. ಚೈನಾಂತ್ ದೊರೊ ಬಾಂದ್ಲೊ. ಬಾಬಿಲೊನಾಂತ್ ಫುಲಾಂಚೆಂ ವೊಡ್ತ್ ವಾರ್ಯಾರ್ ಬಾಂದ್ಲೆಂ, ದೆವಾ ತುಜ್ಯಾ ಮನ್ಶಾನ್ ಕಿತೆಂ ಸರ್ವ್ ಕೆಲೆಂ? ಹ್ಯಾ ಸಂಸಾರಾಕ್ ನವೊ ಜೀವ್ ದೀಂವ್ಕ್ ಕೆಲೆಂಯ್. ತುಕಾ ತುಜ್ಯಾ ಕಿರ್ಕೊಳ್ ರಚ್ಣಾಂಚಿ ತಕ್ಲಿ, ತಕ್ಲೆ
ಭಿತರ್ಲೊ ಮೆಂದು ಚಿಂತುನ್ ತುಂ ಸಂತೊಸಾನ್ ಹಾಸ್ಲಾಯ್ ಆಸ್ತಲೊಯ್.
ಪುಣ್!..
ದೆವಾ ತುಜ್ಯಾ ಮನ್ಶಾನ್ ಕಿತೆಂ ಕರುಂಕ್ ನಾ ತೆಂ ತುಕಾ ಕಳಿತ್ ಆಸಾ, ಮನ್ಶಾನ್ ಝುಜ್ ಮಾಂಡ್ಲೆ, ದುಬ್ಳ್ಯಾ ದಾಕ್ಟ್ಯಾಂಕ್ ದುಕಯ್ಲೆಂ, ತಾಂಚೆಂ ರಗಾತ್ ಚಿಂವ್ಲೆಂ, ರಾನಾಂತ್ ಆಸ್ಚಿಂ ಕಾನೆಟಾಂ ತುವೆಂ ಮನ್ಶಾರುಪಾರ್ ರುಪಾರ್ ಪಳೆಲೆಂಯ್. ತುವೆಂ ತಾಂಕಾಂ ಮನ್ಶಾಂಕ್ ಜಿವ್ಶಿಂ ಮಾರ್ತಾನಾ, ಖುನಿ ಕರ್ತಾನಾ, ಅನಿಸ್ಕಳ್ ಜಿಣಿ ಜಿಯೆತಾನಾ, ಮರ್ಯಾದ್ ಆನಿ ಮಾಣ್ಸುಗಿ ಹೊಗ್ಡಾಯ್ತಾನಾ, ಪೊಯ್ಶ್ಯಾಂ ಖಾತಿರ್ ಪೊಯ್ಶ್ಯಾಂ ವರ್ವಿಂ ಆನಿ ಪೊಯ್ಶೆ ಮ್ಹಳ್ಳ್ಯಾ ನಾಂವಾನ್ ಹ್ಯಾ ಸಂಸಾರಾಂತ್ ಜಾಲ್ಲಿಂ, ಜಾಂವ್ಕ್ ಆಸ್ಚಿಂ ಅತರ್ವಣಾಂ ತುಕಾ ಕಶೆಂ ಭೊಗ್ತಾಗೀ? ದೆವಾ ತುಜೆಂ ಮನ್ ಜಾವ್ಯೆತ್, ಎಕ್ ಚುಕ್
ಕರ್ ಏಕ್ ದೂಕ್ ಗಳಯ್ ಸರ್ವ್ ತಿರ್ಸಾಲೆಂ. ತುಂ ತಶೆಂ ಕರ್ತಾಯ್ ಮ್ಹಣ್ ತುಜೆ ಮನಿಸ್ ತಶೆಂ ಕರ್ತಾತ್?
ನಾಂ.. ನಾಂ.. ತಾಂಕಾಂ ತುವೆಂ ರಾಗ್ ದಿಲಾಯ್, ಮೊಸೊರ್ ದಿಲಾಯ್, ಜಿದ್ದ್ ದಿಲಾಂಯ್,ಫಾರಿಕ್ಪಣಾಚೊ ಉಜೊ ದಿಲಾಯ್, ಆಕ್ರಮಣಾಚೊ ತಾಪ್ ದಿಲಾಯ್, ಪುಣ್ ತೆಂ ಭೊಗ್ಸುಂಚೆಂ ಕಾಳಿಜ್ ಕಿತ್ಯಾಕ್ ದೀಂವ್ಕ್ ನಾಂಯ್ ದೆವಾ? ತುವೆಂ ಕೆಲ್ಲ್ಯಾಬರಿಂ ತುಜೆ ಮನಿಸ್ ತಶೆಂ ಕರ್ತಾತ್ ಮ್ಹಣ್ ಚಿಂತ್ಲೆಂಯ್ಗೀ?. ಮ್ಹಾಕಾ ದಿಸ್ತಾ ಹ್ಯಾ ಸಂಗ್ತಿಂತ್ ತುಂ ಚುಕೊನ್ ಪಡ್ಲಾಯ್. ಇತ್ಲೊ ಜಾಣಾರಿ ತುಂ ಹೆಂ ಕಶೆಂ ಜಾಲೆಂ ಸೊಮ್ಯಾ?
ಹೆಂ ಸವಾಲ್ ತುಕಾ ಹಾಂವ್ ಕರ್ತಾಂ ಧನ್ಯಾಂ, ಕಿತ್ಯಾಕ್ ಮ್ಹಜೆಲಾಗಿಂ ಇತ್ಲಿಂ ಸವಾಲಾಂ ಆಸಾತ್, ತಾಕಾ ಜವಾಬ್ಯೊ ನಾಂತ್. ಹಾಂವ್ ಏಕ್ ಕಿರ್ಕೊಳ್ ಮನಿಸ್ ರಗಾತ್ ಆನಿ ಮಾಸ್ ಆಸ್ಲ್ಲೊ. ರೂಚ್ ಆನಿ ತಾನ್ ಆಸ್ಲ್ಲೊ. ಆಶಾ ಆನಿ ವೊಡ್ಣಿಂ ಆಸ್ಲ್ಲೊ, ಭುಕ್ ಆನಿ ಉದ್ವೇಗ್ ಆಸ್ಲ್ಲೊ.
ಹೊ ಸಂಸಾರ್ ಇತ್ಲೊ ಸೊಭಿತ್ ಸಕಾಳಿಂ ಉಟ್ತಾನಾ ಸುರ್ಯಾಚಿಂ ಕಿರ್ಣಾಂ ಮ್ಹಜ್ಯಾ ತೊಂಡಾರ್, ಆಂಗಾರ್ ಖೆಳ್ತಾನಾ ಕುಚುಲ್ಯೊ ಜಾತಾತ್. ಸಕಾಳಿಂಚ್ಯಾ ಧೊವಾಂತ್ ಮ್ಹಾಕಾ ವಜ್ರಾಂಚೊ ಉಜ್ವಾಡ್ ದಿಸ್ತಾ. ಮೊಳ್ಬಾವಯ್ಲ್ಯಾ ಮೊಡಾಂನಿ ತುವೆಂ ದಿಂವ್ಚೊ ತೊ ಪಾವ್ಸ್ ಚಿಂತಾನಾ ಕಾಳಿಜ್ ಪಾಲೆತಾ. ಸುಕ್ಣ್ಯಾಂಚೆಂ ಚಿಲಿಪಿಲಿ ಆವಾಜ್ ಆಯ್ಕತಾನಾ ಕಸಲೆಂಗೀ ಸಂಗೀತ್ ಕಾರ್ಯೆಂ ಉಭೆಂ ಕೆಲ್ಲೊ ಅನ್ಭೋಗ್ ಜಾತಾ. ರುಕಾ ವಯ್ಲಿಂ ಪಿಕ್ಲ್ಲಿಂ ಫಳಾಂ ಪಳೆತಾನಾ ಲಿಪೊನ್ ಗೆಲ್ಲಿ ರೂಚ್ ಜಿಬೆರ್ ಉದೆತಾ. ಹೆಂ ಸರ್ವ್ ತುವೆಂ ಮಾತ್ರ್ ಕರ್ಯೆತ್. ತುಕಾ ಮಾತ್ರ್ ಹೆಂ ಕರುಂಕ್ ಜಾತಾ. ತುವೆಂ ಮಾತ್ರ್ ಕೆಲಾಂ.
ಹಾವೆಂ ಕಿತೆಂ ಕೆಲಾಂ ಸೊಮ್ಯಾ?
ತುವೆಂ ಕಿತೆಂ ಬರೆಂ ಕರುಂಕ್ ಉಭೆಂ ಕೆಲ್ಲೆಂ ತೆಂ ಹಾಂವೆಂ ನಾಸ್ ಕೆಲಾಂ. ಮ್ಹಜಾಚ್ ಫಾಯ್ದ್ಯಾಕ್. ಹಾವೆಂ ಜಿಯೆಂವ್ಚಾಕ್ ಹೆರಾಂನಿ ಮೆಲ್ಯಾರೀ ವ್ಹಡ್ ನ್ಹಯ್. ಮ್ಹಜಾ ಪೆಲ್ಯಾಂನಿ ಪೊಟಾಖಾತಿರ್ ಭಿಕ್ ಮಾಗ್ಲ್ಯಾರೀ ಮ್ಹಾಕಾ ಕಾಂಯ್ ಪರ್ವಾ ನಾ. ಹೆಂ ಸತ್ ನ್ಹಯ್ಗೀ ಸೊಮ್ಯಾ?
ಹೆಂ ತುಂ ಕಶೆಂ ಪಳೆತಾಯ್? ಹೆಂ ತುಂ ಕಶೆಂ ಸೊಸ್ತಾಯ್? ಮ್ಹಾಕಾ ದಿಸ್ತಾ ತುಕಾ ಕೂಡ್ ನಾ, ಕುಡಿಂತ್ ಮಾಸ್ ನಾ, ಮಾಸಾಭಿತರ್ ಹಾಡ್ ನಾ, ಆಂಗಾಂತ್ ರಗಾತ್ ನಾ, ಕಿತೆಂಚ್ ನಾ!
ಹಾಕಾ ಸರ್ವ್ ಆಸಾ ದೆಕುನ್ ಹೆ ಉಪಾದ್ರ್ ದೆಕುನ್ ಹೆಂ ಸರ್ವ್ ಕಸ್ಟ್. ಧಾ ಬೊಟಾಂ ಝರವ್ನ್ ಪಾಂಚ್ ಬೊಟಾಂನಿ ಖಾಂವ್ಕ್ ದಿಲ್ಲೆಂ ಹೆಂ ತುಜೆಂ ಕಸಲೆಂ ರಾಜಾಂವ್ ಯಾ ಸೂತ್ರ್? ಧಾ ಬೊಟಾಂ ಝರಯಿಲ್ಲ್ಯಾಕ್ ಪಾಂಚ್ ಬೊಟಾಂ ಖಾಂವ್ಕ್ ಸಾಂಗ್ಚಿ ಹಿ ತುಜಿ ಕಸಲಿ ನೀತ್?
ಹೆಂ ವಯ್ಲೆಂ ಸವಾಲ್ ಆನಿ ಚಿಂತಾಪ್ ಮ್ಹಜೆಥಂಯ್ ಉದೆತಾನಾ ಏಕ್ ಮಾತ್ರ್ ಹಾಂವ್ ಖಚಿತ್ ಸಾಂಗ್ತಾಂ, ಚಿಂತುನ್ - ಧಾ ಬೊಟಾಂನಿ ಖಾಂವ್ಕ್ ದಿಲ್ಲೆಂ ತರ್ ಆಜ್ ತುಜೊ ಸಂಸಾರ್ ಆಸ್ತೊನಾ, ಪಾಂಚ್ ಬೊಟಾಂನಿ ಖಾಂವ್ಕ್ ಕೆಲ್ಲಿಂ ಕಾರ್ಭಾರಾಂ ಪಳೆತಾನಾ ಮ್ಹಾಕಾ ದಿಸ್ತಾ ತುಜ್ಯಾ ಸಂಸಾರಾಂತ್ ಫಕತ್ತ್ ಹಾಂವ್ ಆಸ್ತೊಂ, ಮ್ಹಜಿಂ ಬಾಯ್ಲ್ ಭುರ್ಗಿಂ ಚಡ್ ಜಾಲ್ಯಾರ್ ಆವಯ್ ಬಾಪಯ್. ತಾಚ್ಯಾಕೀ ಮುಖಾರ್ ಕಿತೆಂಯ್ ಆಸ್ತೊನಾಂ. ಮುಕಾರ್ ಹ್ಯಾ ಲೋಕ್ ನಾತ್ಲೆಲ್ಯಾ ಸಂಸಾರಾಂತ್ ಹಾಂವ್ ಮ್ಹಜೆಂ ಕುಟಾಮ್ ಜಿಯೆಂವ್ಕ್ ಸಕ್ತೆಂ?
ಮ್ಹಜೆಂ ಕುಟಾಮ್ ಕುಟ್ಮಾಚೆಂ ನಾಂವ್ ಖಂಯ್ ಲಿಪ್ತೆಂ. ಹೆಂ ಸತ್. ದೆವಾ ತುಂ ನಿಜಾಯ್ಕೀ ಜಾಣ್ವಾಯೆಚೊ ಸುರ್ಯೊ. ಕಿತೆಂ ತುವೆಂ ಕೆಲಾಂಯ್ ತೆಂ ಸಾರ್ಕೆಂ ಕೆಲಾಂಯ್. ಸರ್ಪಾಚೆಂ ವೀಕ್ ಕಾಡುಂಕ್, ಸರ್ಪಾಚೆಂ ವೀಕ್ ಆಂಗಾಂತ್ ಗಳ್ಸುಂಕ್ ಕೆಲಾಂಯ್. ಪಿಡೆವಿರೋದ್ ಕಾಡುಂಕ್ ಮನ್ಶಾಚ್ಯಾ ವಿಗ್ಯಾನಿಂಕ್ ತಾಂಚಾ ಪಿಡೆಚಿಂ ಪಿಲಾಂ ಕುಡಿಂತ್ ಭರ್ತಿ ಕರುಂಕ್ ತಕ್ಲಿ ದಿಲ್ಲಿ ಪಳೆತಾನಾ ಕಳ್ತಾ; ತುಂ ಕಿತೆಂ ಮ್ಹಳ್ಳೆಂ.
ಮ್ಹಾಕಾ ಇತ್ಲೆಂಚ್ ಪುರೊ. ಮ್ಹಜ್ಯಾ ಬಡ್ಡ್ ತಕ್ಲೆಕ್ ಇತ್ಲೆಂ ಭಿತರ್ ಗೆಲ್ಲೆಂ ವ್ಹಡ್ ಮ್ಹಣ್ತಾಂ ಹಾಂವ್!
ಸದೆಂವ್ ಜಾಂವ್ ತುಜೆಂ ನಾಂವ್! ಹಾಚ್ಯಾಕೀ ವರ್ತೆಂ ಉಲಂವ್ಕ್ ಯಾ ಚಿಂತುಂಕ್ ಹಾಂವ್ ಸಕಾನಾ.
ವಾಚ್ಪ್ಯಾ, ತುಕಾಯ್ ದೇವ್ ಬರೆಂ ಕರುಂ, ತುವೆಂ ಹಾವೆಂ ಲಿಖ್ಲೆಲ್ಯಾ ಚಿಂತ್ಪಾಚೊ ಅರ್ಥ್ ಕೆಲ್ಯಾರ್ ದೆವಾಕ್ ಆರ್ಗಾಂ.
ದೇವ್ ಬರೆಂ ಕರುಂ,
ಜೆಮ್ಮಾ ಪಡೀಲ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
