ಕವಿತಾकविताPoem
ಉತ್ರಾಂಕೀ
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
"ಸ್ವಾತಂತ್ರ್ ದಿವಸ್ ಮನ್ಶಾಕುಳಾಕ್ ಸ್ವಾತಂತ್ರ್ ಹಾಡುಂಕ್ ಸಕೊಂದಿ, ಪುಣ್ ಹೆರಾಂಚೆಂ ಸ್ವಾತಂತ್ರ್ ಲುಟಾನಾಂ ಜಾಂವ್!"
ಎಚ್ಚೆಮ್
[ಕವಿ ಜಾಲ್ಲ್ಯಾ ಕರ್ಮಾಕ್ ದೆವಾನ್ ವಿಚಿತ್ರ್ ನದರ್ ದಿಲ್ಯಾ ವಾ ಅಸ್ಲಿ ನದರ್ ಆಸ್ಚೆ ಮಾತ್ರ್ ಕವಿ ಜಾತಾತ್?]
ತೆ ಕವಿ - ಹೆ ಕವಿ
ಭಾಗಿ ಆಸ್ಲೆ ತೆ ಕವಿ - ರಾಯಾಂಚಾ ದರ್ಭಾರಾಂತ್ಲೆ
ಪಾಟಾಚಾ ರಾಣಿಯಾಂಚಿ ಅಪುರ್ಭಾಯೆನ್ ಸೊಭಾಯ್ ವರ್ಣಿತಾಲೆ
ರಾಯ್ ಆಂಗಾ ವಯ್ಲೆಂ ಭಾಂಗಾರ್ ಮುದಿಯೊ ಇನಾಮ್ ದಿತಾಲೆ
ಹಾಂವ್ಗಾ ಏಕ್ - ಗುಲೊಬಾ ವೊಡ್ತಾಂತೀ ಮ್ಹಾಕಾ ಪಯ್ಲೆಂ ತೊಪ್ತಾತ್ ಕಾಂಟೆ
ಭಾಗಿ ಆಸ್ಲೆ ಕವಿ - ಗೊರ್ಯಾಂಚಾ ಕಂಪೆನಿಂತ್ಲೆ
ಸುರ್ಯೊ ಬುಡಾನಾತ್ಲ್ಲ್ಯಾ ರಾಜಾಚಿ ರುಂದಾಯ್ ವಾಖಣ್ತೆಲೆ
ಮದಾಮ್ ಸಾಯ್ಬ್ ತಾಂಚಾ ನಾಂವಾರ್ ವಾಡೆ ಬರವ್ನ್ ಘಾಲೆ
ಹಾಂವ್ಗಾ ಏಕ್ - ಮೀಟರ್ ಸೆಂಟಿಮೀಟರಾಂ ಲೆಖಾನ್ ಮ್ಹಾಕಾ ಘುಸ್ಪಡಾಯ್ಲೆಂ
ಸುಭಾಗಿ ಆಸಾತ್ ಹೆ ಕವಿ - ಎದ್ಯಾ ವ್ಹಡಾ ಪ್ರಜಾ ರಾಜಾಂತ್ಲೆಂ
ಸರ್ಕಾರಿ ಕಾಮಾಂಚೆರ್ ಕವಿತಾ ಕರ್ತಾತ್ ಯೆವ್ಜಣಾಂಚಿ ಗಾಣಾಂ ಗಾಯ್ತಾತ್
ಲೊಕಾ ಸರ್ಕಾರ್ ಹಾಂಕಾಂ ಪ್ರಶಸ್ಥ್ಯೊ ವಾಂಟ್ತಾ ಅಕಾಡೆಮಿಚೊ ಅಧ್ಯಕ್ಶ್ ನೆಮ್ತಾತ್
ಹಾಂವ್ಗಾ ಏಕ್ - ಸರ್ಕಾರಾಚಾ ಹರ್ ಕಾಮಾಂನಿ ಪಯ್ಶೆ ಗಿಳ್ಚೆ ದಿಸ್ತಾತ್
^ ವಯ್ರ್
ವಿಲ್ಸನ್ ಕಟೀಲ್
[ಕವಿತೆಂತ್ ಉತ್ರಾಂ ಉಲಯ್ನಾಂತ್, ಪ್ರಾಸ್ ಉಲಯ್ನಾಂತ್ ಬಗಾರ್ ಆತ್ಮೆ ಉಲಯ್ತಾತ್ - ಅಶೆ]
ಉತ್ರಾಂಕೀ ಊಂಚ್.
ಲಿಕ್ಣಿ ಮೊಲಾಂವ್ಚಿ
ತಾಂಕ್ ಆಸ್ಚೆ ಪೂರಾ
ಬರ್ಪಿ ಜಾಲ್ಲ್ಯಾ ಗಾಂವಾಂತ್
ಹಾಂವ್ ಎಕ್ಲೊಂ ದಳ್ಡಿರ್ ಕವಿ
ತಿಂತಾ ಥೆಂಬ್ಯಾಕ್ ಗತ್ ನಾತ್ಲ್ಲೊಂ
ಪಾಕಾಂ ಘೆವುನ್ ಭೊಂವ್ತಾಂ
ರಗ್ತಾಂತ್ ಲಿಕ್ಲ್ಯಾರ್ ಹಿಂಸಾ
ಮ್ಹಣ್ತಾತ್
ಘಾಮಾಂತ್ ಲಿಕ್ಲ್ಯಾರ್ ಚರಬ್
ಪಿಕಾಂತ್ ಲಿಕ್ಲ್ಯಾರ್ ಉಶ್ಟೆಂ
ಮ್ಹಣ್ತಾತ್
ದುಕಾಂತ್ ಲಿಕ್ಲ್ಯಾರ್ ನಿರಾಸ್
ಉತ್ರಾಂಚೆಂ ಮೋಲ್
ಕಳಿತ್ ನಾತ್ಲೆ ಪೂರಾ
ಕವಿತಾ ವಾಚ್ಚ್ಯಾ ಗಾಂವಾಂತ್
ಹಾಂವ್ ಎಕ್ಲೊಂ ಮೊನೊ ಕವಿ
ತಿಂತಾ ಥೆಂಬ್ಯಾಕ್ ಗತ್ ನಾತ್ಲ್ಲೊ
ಪಾಕಾಂ ಘೆವುನ್ ಭೊಂವ್ತಾಂ
ಉತ್ರಾಂ ರಾಯಾಂನೊ ಚುಪ್ ರಾವಾ
ಪಾಕಾಂ ದಿತಾಂ ದಾನ್
ಉತ್ರಾಂಕೀ ಊಂಚ್ ಕಾವ್ಯೆಂ ಆಯ್ಕಾ
ಸಾಫ್ ಕರಾ ಕಾನ್.
^ ವಯ್ರ್
ಆಂಡ್ರು ಎಲ್. ಡಿ’ಕುನ್ಹಾ
[ಆಯ್ಲೆವಾರ್ ಫೆಸ್ತಾಂ ಪರ್ಭೊ ಉದೆಲ್ಯೊ ಮ್ಹಣ್ತಚ್ ಆಂಗ್ಣಾಕ್ ಶೆಣ್ ಝಾಡುಂಕ್ ನಿಜಾಯ್ಕೀ ಬರ್ಗಾಲ್ ಆಸ್ಚೊ ಖುಂಟ್ಯಾಂಕ್ಚ್]
ಸಾರ್ಣಿ ಕುಂಟೆ
ಆಮಿ ಸಾರ್ಣಿ ಕುಂಟೆ
ಪಿಟೊ ಜಾಂವ್ಚೆ ಮಾತಿಯೆ ಘೆಟೆ
ಮ್ಹೆಳೆಂ ಖಾಂವ್ಚೆ ಕಾಟ್ ಪೆಟೆ
ನಾಗರಿಕ್ ತುಮ್ಕಾಂ ತೊಪ್ಚೆ ಕಾಂಟೆ
ಕರುಂಕ್ ಸುಲಭ್ ಆಮ್ಕಾಂ ವಾಂಟೆ
ಆಮಿ ಸಾರ್ಣಿ ಕುಂಟೆ
ತುಮಿ ಶಿಂಪ್ಚಾ ಕೊಯ್ರಾ ಮಧೆಂ
ತುಮಿ ಚೊಡ್ಚಾ ಮೆಳ್ಯಾ ಮಧೆಂ
ತುಮ್ಚಾ ಮೊಚ್ಯಾಂ ಧುಳಿ ಮಧೆಂ
ತುಮ್ಚ್ಯಾ ಚಿಂತ್ಪಾ ಧುಂವ್ರಾ ಮಧೆಂ
ಆಮಿ ಸಾರ್ಣಿ ಕುಂಟೆ
ಪೊಟಾ ಖಾತಿರ್ ಕಸ್ತಳ್ ಝಾಡ್ತಾಂವ್ {ಕಸ್ತಳ್}
ಜಲ್ಮಾಲ್ಲ್ಯಾ ಚುಕಿಕ್ ಮ್ಹೆಳ್ಯಾಂತ್ ಲೊಳ್ತಾಂವ್
ತುಮ್ಚಿ ಸಾವ್ಳಿ ಚುಕೊನ್ ಧಾಂವ್ತಾಂವ್
ಉಶ್ಟ್ಯಾಕ್ ತುಮ್ಚ್ಯಾ ವೆಂಗುನ್ ನಿದ್ತಾಂವ್
ಆಮಿಂ ಸಾರ್ಣಿ ಕುಂಟೆ
ಆಮ್ಚೆಂ ಪೋಟ್ ಮೆಳ್ಯಾಂತ್ ಲೊಳ್ತಾ
ಆಮ್ಚೊ ಸ್ವಾಸ್ ಮೆಳ್ಯಾಂತ್ ಲಿಪ್ತಾ
ಆಮ್ಚಿಂ ಬಾಯ್ಲಾಂ ಮೆಳೆಂ ರಾಂದ್ತಾತ್
ಆಮ್ಚಿಂ ಬಾಳಾಂ ಮೆಳೆಂಚ್ ಗಿಳ್ತಾತ್
ಆಮಿ ಸಾರ್ಣಿ ಕುಂಟೆ
ರಗತ್ ಆಮ್ಚೆಂಯ್ ತಾಂಬ್ಡೆಂ ವ್ಹಯ್
ಆಮ್ಕಾಂ ಕಾಳಿಜ್ ಕಿತ್ಯಾಕ್ ಹಾಯ್
ಪೊಟಾರ್ ನಾಚ್ತಾತ್ ಮುಣ್ಕುಟೆ ಪಾಯ್
ಮ್ಹೆಳ್ಯಾಂತ್ಚ್ ಆಮ್ಚೆಂ ಮರಣ್ ಸಯ್
ಆಮಿ ಸಾರ್ಣಿ ಕುಂಟೆ
ದಯೆನ್ ಆಯ್ಕಾ ಆಮ್ಚೆಂ ಮಾಗ್ಣೆಂ
ಕಾಡಿನಾಕಾತ್ ತುಮಿಂಚ್ ತುಮ್ಚೆಂ ಮೆಳೆಂ
ಖಾಲಿ ಪಡಾತ್ ಆಮ್ಚೆಂ ಪೋಟ್
ಆಸ್ಚಿನಾ ಆಮ್ಕಾಂ ದುಸ್ರಿ ವಾಟ್
ಆಮಿ ಸಾರ್ಣಿ ಕುಂಟೆ
^ ವಯ್ರ್
ಅವಿನಾ, ಮಿಯಾರ್
[ಹಿಚಿಂ ಸವಾಲಾಂ ಚಿಂತುಂಕ್ ಸಕ್ತೆಲ್ಯಾಂಕ್ ಉಭಿಂ-ಆಡ್ ಚಿರ್ಚೆ ತಸಲಿಂ]
ಸವಾಲ್
ದೆವಾ,
ತುಂ ಆಸಾಯ್ ಜಾಲ್ಯಾರ್
ಏಕ್ ಸವಾಲ್
ಮನ್ಶ್ಯಾಂಕ್ ರಚುಂಕ್ ಮಾತಿ ಮೊಳ್ತಾನಾ
ವಾಪಾರ್ಲೆಂಯ್ ಕಿತೆಂ?
ರಗತ್ ಯಾ ಉದಾಕ್?
ಬರೆಂ ಜಾಲೆಂ ರಗ್ತಾಂತ್ ಮೊಳ್ಳೆಂಯ್
ಚಿಂತಾಂ ಜರ್ ಮನ್ಶಾ ಕುಡಿಂತ್ ಉದಾಕ್ ವ್ಹಾಳ್ಳೆಂ
ಖುನಿ ಜಾತ್ಯೊ ಉದ್ಕಾ ಖಾತಿರ್
ರಗ್ತಾಚಿ ತಾನ್ ಇತ್ಲಿ ಆಸ್ತಾನಾ
ಉದ್ಕಾಚಿ ತಾನ್ ಸಾಂಗ್ಚಿ ಕಿತ್ಲಿ?
ಅನಿಕೀ ಮೊಳಿತ್ ಆಸಾಯ್ ತರ್
ದಯಾ ಕರ್ನ್ ಧರ್ತೆಕ್ ಯೇ ದೆವಾ
ಹಾಂಗಾ ನಂಯ್ ಸುಕೊನ್ ರಗತ್ ವ್ಹಾಳ್ತಾ
ರಗತ್ ಆಟವ್ನ್ ಮನಿಸ್ ಪಿಟೊ ಜಾತಾ
ಪಿಟೊ ಖಿರವ್ನ್ ರಗತ್ ಪಿಯೆವ್ನ್
ದೆಂಖ್ ಕಾಡ್ಚಿಂ ತೊಂಡಾಂ ಘಾಣ್ತಾತ್.
ಅರೆ! ಬೆಜಾರ್ ಕರ್ನಾಕಾ, ರಾಗಾರ್ ಜಾಯ್ನಾಕಾ
ಕಿತ್ಯಾಕ್ ತಾಕಾ ಅರ್ಥ್ ನಾ
ತ್ಯೊ ದೋನ್ ಮನ್ಶ್ಯಾ ಶಿರೊ
ಆಜ್ ಸುಕೊನ್ ಗೆಲ್ಯಾತ್.
ದೆಕುನ್ ಆನಿ ಮೊಳ್ತಾಯ್ ತರ್..
ರಿಸರ್ಚ್ ಕರ್, ಥಿಸೀಸ್ ಬರಯ್
ಪುಣ್ ಜಾತಾ ತಿತ್ಲ್ಯಾ ವೆಗ್ಗಿಂ
ಕಿತ್ಯಾಕ್
ಮನಿಸ್ ಲಂಕಡ್ ಮೊಡಿತ್ ಆಸಾ
ಆಪ್ಲ್ಯಾಚ್ ಪ್ರತಿರುಪಾಕ್ ರಚುನ್ ಆಸಾ
ತುಜ್ಯೆಪರಿಂ..
ಹೊ ನವೊ ಮನಿಸ್ ಪಿಟೊ ಜಾಯ್ನಾ
ತಾಕಾ ಮಾರ್ಲ್ಯಾರ್ ರಗತ್ ವ್ಹಾಳಾನಾ
ಥಂಯ್ ಕಾಳಿಜ್ಚ್ ನಾ
ದೆಕುನ್ ರಾಕೊನ್ ಆಸಾ ತುಜ್ಯಾ ಜಾಪಿಕ್
ಕಶೆಂ ಮೊಳ್ತಾಯ್ ದೆವಾ?
ತುಂ ಆಸಾಯ್ ತರ್,
ಸಂಸಾರಾಚ್ಯಾ ಮುಖ್ಲ್ಯಾ ಮನ್ಶ್ಯಾಕ್?
^ ವಯ್ರ್
ಮೆಲ್ವಿನ್ ಪಿಂಟೊ, ನೀರುಡೆ
[ಖಂಯ್ ಆಸಾ ಸ್ವಾತಂತ್ರ್! ತೆಂಚ್ ಪಾಟ್ಲ್ಯಾ ಸಾಠ್ ವರ್ಸಾಂ ಥಾವ್ನ್ ಸೊಧುನ್ ಆಸ್ಚಾಂತ್ಲೊ ಕವಿಯೀ ಎಕ್ಲೊ]
ಖಂಯ್ ಆಸಾ ಸ್ವಾತಂತ್ರ್!?
ಭುಕೆಲ್ಲ್ಯಾ ಬಾಳ್ಕಾಚ್ಯಾ
ನಿತ್ರಾಣಿ ಕಿಂಕ್ರಾಟೆಂತ್
ಸುಣ್ಯಾಕ್ಯೀ ಮಾಸಾಂ ಒತ್ಚ್ಯಾ
ಅಮೀಗ್ ಕುಳಿಯೆ ವೀದ್-ವಾವ್ಳೆಂತ್
ಸ್ವಾತಂತ್ರ್ಯ್ ಆಮ್ಚೆಂ ಜಿರೊನ್ ಗೆಲಾಂ
ಝೊಪ್ಡೆಂ ಮುಲ್ಯಾಂನಿ
ಧುವ್ನ್ ವೆಚ್ಯಾ ಸ್ವಪ್ಣಾಂ ಆಸ್ತಿಂನಿ
ರಾವ್ಳೆರಾ ಮಹಲಾಂನಿ
ಧಾಂಪುನ್ ವೆಚ್ಯಾ ಹುನೊನಿ ಖ್ಯಾಸ್ತೆಂನಿ
ಸ್ವಾತಂತ್ರ್ಯ್ ಆಮ್ಚೆಂ ವಾಳೊನ್ ಗೆಲಾಂ
ಕುಟಾಮ್ ಸಾಂಬಾಳುಂಕ್
ವಿಕುನ್ ಸೊಡ್ಚ್ಯಾ ಮಾನ್ಸುಗೆಂನಿ
ಖರ್ಯಾಮಸ್ತೆಕ್ ಬಲಿ ಜಾಂವ್ಚ್ಯಾ
ಎಕೆಕ್ ಪಿಂಪ್ರ್ಯಾ ಉಸ್ವಾಸಾಂನಿ
ಸ್ವಾತಂತ್ರ್ಯ್ ಆಮ್ಚೆಂ ಲಾಸೊನ್ ಗೆಲಾಂ
ಮೆಜಾ ಪಂದಾ
ಜೀವ್ ಘೆಂವ್ಚ್ಯಾ ನೊಟಾಂ ಅಟ್ಟ್ಯಾಂನಿ
ಅನೀತ್ ಅಕ್ರಮಾಂಕ್
ಬಲಿ ಜಾಂವ್ಚ್ಯಾ ತಕ್ಲೆ ಕಟ್ಟ್ಯಾಂನಿ
ಸ್ವಾತಂತ್ರ್ಯ್ ಆಮ್ಚೆಂ ಫಾಸ್ಳೊನ್ ಗೆಲಾಂ
ಹ್ಯಾ ಸರ್ವಾ ಮದೆಂ
ತುಕಾ ಮ್ಹಾಕಾ ಹ್ಯಾ ದೇಶಾನ್
ವಾಗಯ್ಲಾಂ, ಸೊಸ್ಲಾಂ, ರಾಕೊನ್ ವೆಲಾಂ
ಸ್ವಾತಂತ್ರ್ಯ್ ಮ್ಹಳ್ಳ್ಯಾ ಮಾಯಾವಿಕ್
ನವೊ ಜೀವ್ ದೀಂವ್ಕ್ ಆಪವ್ಣೆಂ ದಿಲಾಂ!
^ ವಯ್ರ್
ವಿನ್ಸಿ, ಮೆಲ್ಕಾರ್
[ವ್ಹಾ! ಹೆಂ ಚಿಂತಾಪ್ ಪಳೆಯಾ! ಹೆಂ ಆಯ್ಚಾ ದಿಸಾ ಪ್ರಸ್ತುತ್ ನಾಸ್ತಾಂ ಆನಿ ಕೆದಾಳಾ? ಆಸೊಂ! ನಿದೊಂದಿ - ಆಮಿಂ ಫೆಸ್ತ್/ಪಿಕ್ನಿಕಾಂ ಕರ್ಯಾಂ]
ಹಾಂವ್ ನಿದ್ಲಾಂ - ಉಟಯ್ನಾಕಾತ್!
ಹ್ಯಾ ದೇಶಾಕ್ ಸ್ವತ೦ತ್ರ್ ಮೆಳ್ತಾನಾ
ಫುಲ್ಲ್ಲ್ಯಾ ಫುಲಾ೦ ಬರಿ೦ ಹಾಸೊನ್, ಉಭೊನ್ ಆಸ್ಲ್ಲೊ೦
ತುಮ್ಚಿ ಸ೦ಸ್ಕ್ರತಿ ಪಳೆವ್ನ್ ತುಮ್ಕಾ೦ ಸಲಾಮ್ ಮಾರ್ತಾಲೊ೦
ಕಿತ್ಯಾ ತುಮಿ೦ ಅತಾ೦ ಬದಲ್ಲ್ಯಾತ್?
ತೀನ್ ರ೦ಗಾನಿ ಸೊಭಯ್ಲಾ೦ ಮ್ಹಾಕಾ ತುಮಿ೦
ಶಾ೦ತಿಚೆ೦, ನಿತಿಚೆ, ತ್ಯಾಗಾಚೆ ಮ್ಹಣೊನ್
ಝಜೊನ್ ಸ್ವಾತ೦ತ್ರ್ ದಿಲ್ಲೆ ಸರ್ವ್ ಫೊ೦ಡಾಕ್ ಗೆಲ್ಯಾತ್,
ನಾ೦ ಉಗ್ಡಾಸ್ ತಾ೦ಚೊ, ನಾ ತುಮ್ಕಾ೦ ಮ್ಹಜೊ
ತುಮ್ಚಾ ಫಾಯ್ದ್ಯಾ ಖಾತಿರ್
ಮ್ಹಾಕಾ ಕಾಣ್ಗೆವ್ನ್ ಝುಜ್ ತುಮಿ೦ ಮ್ಹಾ೦ಡ್ಟಾತ್
ದುಬ್ಳ್ಯಾ೦ಚೆ೦ ರಗಾತ್ ಚಿಂವೊನ್, ಮೊಸ್ರಾನ್ ಭರೊನ್
ಹೊ ದೇಶ್ ತುಮಿ೦ ಕೆಲಾ ವಿ೦ಗಡ್, ವಿ೦ಗಡ್
ಆಜ್ ಹಾ೦ವ್ ಜಾಲಾ೦ ಮೊನೊ
ಫಕತ್ ಸ್ವಾತ೦ತ್ರ್ ದಿಸಾ ಕಿತ್ಯಾ ಮ್ಹಾಕಾ ಉಟಯ್ತಾತ್?
ಮ್ಹಾಕಾ ನಿದೊ೦ಕ್ ಸೊಡಾ.......
ದೆಶ್ಯಾಚೆ೦ ಬರೆ೦ಪಣ್ ತುಮ್ಕಾ ನಾ೦ ತರ್
ಹಾ೦ವ್ ಕಿತ್ಯಾ ತುಮ್ಕಾ೦.......
^ ವಯ್ರ್
ಮೆಲ್ವಿನ್ ರೊಡ್ರಿಗಸ್
[ಧಾ ಬೊಟಾಂ ಘೆವ್ನ್ ದೋನ್ ಹಾತಾಂನಿ ಭಾರಾಂ ಜೊತಾಂ ಘೊಳ್ಚೊ ಇಕ್ರಾ ಶಿತಾಂ ಘೆವ್ನ್ ತೆರಾಂ ಜಣಾಂಕ್ ಪೊಸ್ಚಾ ಘಡ್ಯೆ ಏಕ್ ಘಡಿ ಆಮಿಂಯೀ ಉಭಿಂ ರಾವೊನ್ ಮೇರಾ ಭಾರತ್ ಮಹಾನ್ ಮ್ಹಣ್ಯಾಂಗಿ?]
ಮೇರಾ ಭಾರತ್ ಮಹಾನ್
ಖುನಿಯೊ, ಝಗ್ಡೆಂ, ಮರ್ಣಾ ವ್ಹೊರಾಣ್
ಮೇರಾ ಭಾರತ್ ಮಹಾನ್
ಘೊಳ್ಟಾ ಎಕ್ಲೊ ಬಾರಾ ಜೊತಾಂ
ಸಾಂಜೆರ್ ಬೊಶಿಯೆಂತ್ ಇಕ್ರಾ ಶಿತಾಂ
ತ್ಯಾಯಿ ಶಿತಾಂಕ್ ತೆರಾ ಹಾತ್
ದುಬ್ಳಿಕಾಯೆಚಿ ಆಜೂನ್ ರಾತ್
ಕಾಳ್ಕಾಂತ್ ಎಕ್ಲೊ ಕಾಮೆಲಿ ಉಟ್ತಾ
ಖೊಂಕ್ಲಿ ಕಾಡ್ತಾಂ ಕಾಡ್ತಾಂ ಮ್ಹಣ್ತಾ
ಮೇರಾ ಭಾರತ್ ಮಹಾನ್
ಬೆವಾರೀಸ್ ಭುರ್ಗಿಂ ಬಾಳಾಂ
ಜಲ್ಮಾಕ್ ಯೆತಾತ್ ಬೊಲ್ಯಾಂ ಬಿಳಾಂ
ಜಿವಿತಾಚಿಂ ಶಿಕಂವ್ಕ್ ಮೊಲಾಂ
ಕೊಣೆ ಧಾಡ್ಚೆಂ ತಾಂಕಾಂ ಶಾಳಾಂ
ಮೊಲಾಂ ಶಾಳಾಂ ಮಾರ್ಲಿ ಶೆಂಡಿ
ಮ್ಹಣ್ರೆ ಬಾಳಾ ವೊಳಾವ್ನ್ ಸೊಂಡಿ
ಮೇರಾ ಭಾರತ್ ಮಹಾನ್
ಪಂಜಾಬ್ ಸದಾಂ ರಗ್ತಾನ್ ನ್ಹಾತಾ
ಬೋಡೊ ಆಸ್ಸಾಮಾಚೊ ಬುಕಾಂಡೊ ಧುತಾ
ಗೊರ್ಖಾ, ಜಾರ್ಖಂಡ್ ಲಾಂಬ್ ಶಿಮ್ಟಿ
ಧರ್ಮ್ ಜಾತಿ ಲುಂವ್ತಾತ್ ಗೊಮ್ಟಿ
ಭಾಶೆನಾಂವಾನ್ ರಗ್ಳೆ ವೆಗ್ಳೆ
ತರ್ಯೀ ಬೊಬೊ ಮಾರ್ತಾತ್ ಸಗ್ಳೆ
ಮೇರಾ ಭಾರತ್ ಮಹಾನ್
ನಾರ್ವೇಕರ್ ಧರುನ್ ಪಟ್ನಾಯಕ್
ರಾಜಕೀ ಫುಡಾರಿಚ್ ನಾಲಾಯಕ್
ಪಾವ್ಲಾಂ ಪಾವ್ಲಾಂಕ್ ಬಾಯ್ಲಾಂಕ್ ಭಂಯ್
ಲಗ್ನಾವೆಳಾರ್ ದೊತಿಚಿ ವೋಂಯ್
ಫೊಂಡಾಂತ್ ನಿದ್ಲ್ಲಿ ಸಮಾನತಾ
ಭಿಯಾನ್ ಭಿಯಾನ್ ತಾಳೊ ಉಬಾರಿತಾ
ಮೇರಾ ಭಾರತ್ ಮಹಾನ್
ಆಗೊಸ್ತಾಚಿ ಪಂದ್ರಾ ತಾರೀಕ್
ಗಾಂವಾಂತ್ ಬಾವ್ಟೆ ಉಮ್ಕಾಳಾಯ್ಲೆ
ಭಿರ್ಮತ್ ಎಕಾ ನಾಗ್ಡ್ಯಾಬಾಳಾನ್
ಖಾಂಬ್ಯಾರ್ ಚಡೊನ್ ಘರಾ ವೆಲೆ
"ಆವಯ್ ಮ್ಹಜ್ಯೆ ಮೆಳ್ಳೆಂ ವಸ್ತುರ್
ಸ್ವಾತಂತ್ರ್ಯ್ ಜೊಡ್ಚಿ ಅಸಲಿ ದಸ್ತುರ್
ಸಾಂಬಾಳ್ಟಲೊಂ ಜ್ಯೊರಾನ್"
ಮೇರಾ ಭಾರತ್ ಮಹಾನ್
^ ವಯ್ರ್
ವಿಲ್ಸನ್ ಕಯ್ಯಾರ್
[ವ್ಹಾ! ಇತ್ಲ್ಯಾ ತರ್ನೆ ಪ್ರಾಯೆರ್ ಕವಿಚ್ಯಾ ಚಿಂತ್ಪಾಚಿ ಸಕತ್ ಮೊರ್ನಾಕ್ ಪಾಂವ್ಚೆಂ ಕಾಂಯ್ ನಿರಾಸ್ ಪಾಚಾರ್ತಾ?]
ಮರಣ್
ಹಾಂವ್ ಜಿಯೆಂವ್ಕ್ ಆಶೆತಾಂ.. ಹಾಂವ್ ಜಿಯೆತಾಂ..
ಮರ್ಣಾಕ್ ಹಾಂವ್ ಭಿಯೆತಾಂ; ಮರ್ಣಾಕ್..
ನಾಕಾಕ್ ಲಾಗೊನ್ ಪೊಟಾ ಪರ್ಯಾಂತ್ ತೊಪ್ಲ್ಯಾತ್,
ಕೃತಕ್ ನಾಳ್, ಪೊಟಾ ಭಿತರ್ ವ್ಹಕ್ತಾಜಾಳ್,
ಬಳ್ ನಾ ಕುಡಿ, ಶಿರಾನ್, ಹಾಡಾಂ, ಕಾತಿರ್,
ಫಕಾತ್ ಮತಿ ಪಡ್ದ್ಯಾರ್ ಚಿಂತ್ನಾ ಹಾಜಾರ್..
ಥೊಡ್ಯಾಚ್ ವೆಳಾರ್ ಪರತ್ ಕಾಳೊಕ್,
ತರೀ ದಿಸಾ ಝಳಕ್,
ದೊಳೆ ಮ್ಹಜೆ ದಾಂಪ್ಲೆ ತರೀ, ಖರಿ ದಿಸಾ ವ್ಹಳೊಕ್,
ಧೊವೆಂ ಮ್ಹಾಕಾ ನೆಸಯ್ತ್ ಗೆಲೆ, ಘಾಲ್ಲೆ ನಾಳ್ ಹುಮ್ಟುನ್ ವೆಲೆ,
ಲೊಟುನ್ ಗಾಡಿ ಕುಡಾಕ್ ವೆಲೊ, ಧುರಿ ಮಧೆಂ ಉಡಯ್ಲೊ,
ಥಂಡ್ ವಾರೆಂ, ನಿತಳ್ ಧುರಿ, ಧವ್ಯೊ ಸಾವ್ಳ್ಯೊ ಉದೆಲ್ಯೊ..
ಆವಾಜ್ ನಾ, ರಡ್ಣೆ ನಾಂ, ಜಡಾಯ್ ನಾಂ, ದೂಕ್ ನಾ,
ಫಕತ್ ಶಾಂತ್, ಥಂಡ್ ಧುರಿ, ಫಕತ್ ಶಾಂತ್,
ವೇಳ್ ನಾ, ಕಳಾನಾ, ಚಿಂತುಂಕ್ ಮತ್ಚ್ ಉದೆನಾ,
ಹಿಂವಾನ್ ಕೂಡ್ ಜಾಲ್ಯಾ ಥಂಡ್, ವೊಲಿಕ್ ಹಾತ್ ಘಾಲ್ತಾನಾ,
ನಾ- ಮೆಳಾನಾ, ಹಾತಾಕ್ ಕಿತೆಂಚ್ ಮೆಳಾನಾ, ಕುಡಿ ಹಾತ್,
ಹಾಲಾನಾ, ಧುರಿರ್ ಕೀರ್ಣ್ ಝಳ್ಕಾನಾ, ವಾರೆಂ ಸಯ್ತ್ ಹಾಲಾನಾ,
ಥೊಡ್ಯಾಚ್ ವೆಳಾನ್ ಪರತ್ ಗಾಡ್ಯೆರ್ ಹಾಡ್ಲೆಂ ಮ್ಹಾಕಾ ಭಾಯ್ರ್,
ಬಾಯ್ಲೆ, ಭುರ್ಗ್ಯಾಂಕ್ ಪಳೆವ್ನ್, ಉಟೊಂಕ್ ಗೆಲೊಂ ಮುಖಾರ್,
ನಾ-ಜಾಲೆಂನಾ, ಕೂಡ್ ಮ್ಹಜಿ ಹಾಲಾನಾ, ಜಾಲ್ಯಾಂ ಹಿಂವಾನ್ ರೂಕ್,
ಬಾಯ್ಲ್ ಭುರ್ಗಿಂ ಕಿಳಂಚ್ ಮಾರಿತ್ ಯೇವ್ನ್ ಪಡ್ಲಿಂ ಆಂಗಾರ್,
ಪೊಟ್ಲುಂಕ್ ಗೆಲೊಂ ತರೀ, ವಚಾತ್ನಾಂತ್ ಮುಖಾರ್,
ಹುನ್ ದುಃಖಾಂ ಗಳ್ಳಿಂ ತರೀ, ಲಾಗ್ಲಿಚ್ ನಾ ದುಃಖಾಂ ಊಬ್...
ಲೋಕ್ ಸಬಾರ್ ಪಳೆಂವ್ಕ್ ಆಯ್ಲಾ, ಥರಾ ಥರಾನಿಂ ಉಲಂವ್ಕ್ ಲಾಗ್ಲಾ,
ಸಯ್ರಿಂ, ಧಯ್ರಿಂ, ರಾಗಿಷ್ಟ್, ಮೊಗಿಷ್ಟ್, ದುಃಖೇಸ್ತ್ ದೊಳ್ಯಾಂನಿ ಪಳೆಂವ್ಕ್ ಲಾಗ್ಲಾ,
ಉಲಂವ್ಕ್ ಹಾಂವ್ ಸಕಾನಾ, ಕಿತೆಂ ಗಜಾಲ್ ಸಮ್ಜಾನಾ,
ಥೊಡ್ಯಾ ಜಣಾಂಚೆಂ ಉತಾರ್ ಆಯ್ಕಾತಾ, ಕಾಳಿಜ್ ಮ್ಹಜೆಂ ಹಾಲ್ಲೆಂನಾ,
ದೊಳ್ಯಾನ್ ದುಃಖಾಂಯಿ ವ್ಹಾಳ್ಳಿಂ ನಾಂತ್. ಕಿತ್ಯಾಕ್ ಕುಡಿಂತ್ ಮ್ಹಜ್ಯಾ ಪ್ರಾಣ್ ನಾ,
ತರೀ ಮತ್ ಮ್ಹಜಿ ರಡ್ಲಿ, ನ್ಹಂಯ್ ಚಿಂತುನ್ ಮ್ಹಜೆಂ ಮರಣ್,
ಬಗಾರ್ ಚಿಂತುನ್ ದುಬ್ಳ್ಯಾ ಮ್ಹಜ್ಯಾ ಕುಟ್ಮಾಚೆಂ ಮರಣ್.....
^ ವಯ್ರ್
ಆಸ್ಟಿನ್ ಪ್ರಭು
[ಆಮ್ಕಾಂ ಆಜ್ ಸ್ವಾತಂತ್ರ್ - ಅನ್ಯೇಕ್ ನೀಬ್ ಆಸಾ ದೆಕುನ್ ತಯಾರ್ ಜಾವ್ಯಾಂಗೀ ಗ್ಲಾಸ್ ಆಧ್ಳಾಂವ್ಕ್? ಚಿಯರ್ಸ್ ಮ್ಹಣೊಂಕ್? ಕುಲೆ ಧಲಂವ್ಕ್!?]
ನೆಕೆತ್ರಾಂಚ್ಯಾ ಮುಳಿಂ
ನೆಕೆತ್ರಾಂಚ್ಯಾ ಮಾಳಾ ಮುಳಿಂ
ಪಾಂಯ್ಜಾಣಾಂಚೊ ಆವಾಜ್ಗೊ
ಅಗೊ ತುಜೆಂ ನಾಚಾಪ್ ಮ್ಹಜ್ಯಾ
ಹ್ಯಾ ಕುಡಿಕ್ ಏಕ್ ಮಾಧಕ್ಗೊ
ತುಕಾಚ್ ಪಳೆವ್ನ್ ರಾವ್ಲಾಂ ಹಾಂವ್
ಹಾತಿಂ ಬಿಯರ್ ಗ್ಲಾಸ್ ಘೆವುನ್
ದೊಳ್ಯಾಂತ್ ಮ್ಹಜ್ಯಾ ತುಜಿ ಸೊಭಾಯ್
ಆನಿ ತೊಂಡಾಂತ್ ತಿ ಬಿಯರ್ ಸೆವುನ್
ನಾಚ್ತಾಂ ತುಜೆ ಕುಲೆ ಹಾಲ್ತಾತ್
ಕುಡಿಕ್ ಮ್ಹಜ್ಯಾ ವೀಜ್ ದಿತಾತ್
ಸದಾಂಚ್ ತೊಂಡಾರ್ ಹಾಸೊ ತುಜ್ಯೊ
ಮುಖಮಳಾರ್ ಪ್ರಕಾಸ್ ಹಾಡ್ತಾತ್
ಎಕ್ಲೊ ಎಕ್ಸುರೊ ಆಸಾಂ ಹಾಂವ್
ತುಜ್ಯೆ ತಸ್ಲ್ಯಾಕ್ ಸೊಧುನ್ ಆಸಾಂ
ಜರ್ ತುಂ ಜಾಯ್ತ್ ಮ್ಹಣ್ಶಿ ಜಾಲ್ಯಾರ್
ಸದಾಂಚ್ ತುಕಾ ಆರಾವ್ನ್ ಧರ್ತಾಂ
^ ವಯ್ರ್
2006 ಇಸ್ವೆಚೊ ಸ್ವಾತಂತ್ರೋತ್ಸವಾಚೊ ಅಂಖೊ
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.