ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ತವಳ್ತವಳ್
ಹೆಂ ವಾರ್ಜಿಕ್ ಹರ್ಶೆಂಚೆಂ, ಕಾಲ್ಚೆಂ, ಆಯ್ಚೆಂ, ಫಾಲ್ಯಾಂಚೆಂ, ತವಳ್ತವಳ್ ಮತಿಚಾ ಪಡ್ದ್ಯಾಚೆರ್
ಖಂಚೊನ್ ಯೆಂವ್ಚೆಂ ಲಿಸಾಂವ್, ಬೆಸಾಂವ್ ಯಾ ತೆಸಾಂವ್...
ತವಳ್ತವಳ್ - 6 . ಊಣ್!
ಮೆಲ್ವಿನ್ ಜೆ. ವಾಸ್
ಮನಿಸ್ ಆಪ್ಲ್ಯಾ ಚಿಂತ್ಪಾಕ್ ಇತ್ಲೆಂಯ್ ಲಾಚಾರ್ ಕಿತ್ಯಾಕ್ ಕರ್ತಾ?
ಉಣೆಂಪಣ್...., ಮೆಟಾಂ ಮೆಟಾಂಕ್ ಉಣೆಂಪಣ್. ಪಾಂಯಾಚಾ ಹರ್ಯೆಕ್ ಪಾವ್ಲಾಂನಿ ಉಣೆಂಪಣ್ ಆಸ್ತಾನಾ ತ್ಯಾ ಬೊಡಾಂತ್ಲ್ಯಾ ಮೆಂದಾಚಾ ಶಿರಾಂನಿಂ ಉಣೆಂಪಣ್ ಆಸ್ಚೆಂ ಕಾಂಯ್ ನವೆಂಸಾಂವ್ ನ್ಹಂಯ್. ಶಿರೊ ಅಸ್ಕತ್ ಜಾತಾನಾ ತಿಂ ಪಾವ್ಲಾಂಯ್ ಅಸ್ಕತ್ ಜಾತಾತ್. ಪುಣ್ ತೆಂ ಅಸ್ಕತ್ಕಾಯೆಕ್ ವಾವೊಂವ್ಚೆ ಪಾಂಯ್ ಮಾತ್ರ್ ಘಟ್ಮುಟ್...!
ಸದಾಂಚ್ ಘಟ್ಮುಟ್....!!
ತರ್ ಹಿ ಅಸ್ಕತ್ಕಾಯ್ ಕಿತ್ಯಾಕ್....!
ನಾಂವಾಕ್....?
ಹೊಗ್ಳಾಪಾಕ್...?
ಯಾ ಖಾಕಿಯೆಂತ್
ಲಿಪಯಿಲ್ಲ್ಯಾ ತ್ಯಾ ಸ್ವಾರ್ಥಾಕ್......?
ಚಿಂತಾಪ್ ಆನಿ ಮನಿಸ್... ಎಕಾ ಕುಡಿಚೆ ದೋನ್ ಪಾಂಯ್. ಹೆ ದೋನ್ಯ್ ಎಕಾಮೆಕಾ
ಸಾರ್ಕೆಂ ನಾಂತ್ ತರ್ ಕೂಡ್ ತಿ ಥೊಂಟಿ ಜಾವ್ನ್ ಸಂಸಾರ್ ಮುಕಾರ್ ಆಪ್ಲ್ಯಾ ಊಣಾಕ್ ಉಗ್ತ್ಯಾನ್ ದಾಕಯ್ತಾ.
"ಚಿಂತಾಪ್ ಮನ್ಶ್ಯಾಕ್ ಗರ್ಜೆಚೆಂ ಚಿಂತ್ಪಾಕ್ ಮನಿಸ್
ನ್ಹಯ್’. ಬಹುಶ: ಮಾಡಾ ವಯ್ಲ್ಯಾ ಕಿರಾನ್ ಫಾಲ್ಯಾಂ ಚಿಂತುಂಕ್ ಆರಂಭ್ ಕೆಲ್ಯಾರ್ ತೆಂ
ಪಯ್ಲೆಂ ಮನ್ಶ್ಯಾಕ್ ಜಾಳಿಚಾ ಪಿಂಜ್ರ್ಯಾಂತ್ ಕುಡಾಯ್ತೆಲೆಂ. ತಾಚಾ
ಸ್ವಾರ್ಥಾ ಖಾತಿರ್ ನ್ಹಯ್ ಬಗಾರ್ ಸಂಸಾರಾಚೆ ಬಚಾವೆ ಖಾತಿರ್ ಆನಿ ತೆ
ವಾಂದೊರ್ ಆತಾಂ ಆಮಿ ಕೆಳಿಂ ಖಾವಂವ್ಚೆ ಜಾಳಿ ಭಿತರ್ ಮನ್ಶ್ಯಾಕ್ ಕೆಳಿಂ
ನ್ಹಯ್ ಬಗಾರ್ ಕೆಳ್ಯಾಂಚಿ ಸಾಳ್ ಖಾವಯ್ತೆಲೆ.
ಸಂಸಾರಾಂತ್ಲ್ಯಾ ಖಂಯ್ಚಾಚ್ ವಸ್ತೆನ್ ಮೋಲ್ ಭಾಂದುಂಕ್
ಸಕಾನಾತ್ಲೆಲಿ ಚಿಂತ್ಪಾ ಸಕತ್ ಜರ್ತರ್ ಮನ್ಶ್ಯಾಚಾ ಬೊಡಾಂತ್ ಆಯೆರ್ ಜಾವ್ನ್
ದಿಲ್ಯಾ ತರ್ ಮನಿಸ್ ಹ್ಯಾ ಆಯೆರಾಕ್ ಖಾಕಿಯೆ ಪಂದಾ ಯಾ ದೊಂಪ್ರಾಕ್
ಬಾಂದುನ್ ಕಿತ್ಯಾಕ್ ಲಜ್ಮಾಡ್ಯಾಚೊ ಹಾಸೊ ಹಾಸ್ತಾ?
ಧನಿಯಾನ್ ಶಿಕಾರೆಕ್ ವರ್ಚೊ ಪೆಟೊ ಉಡ್ಡೊನ್ ಮೊರೊನ್ ರಾನಾಂತ್ಲ್ಯಾ
ಸೊಂಶ್ಯಾಕ್ ಧರುನ್ ಆಪ್ಲ್ಯಾ ಸಾಯ್ಬಾಚಾ ಪಾಯಾಂಮುಳಾಂತ್ ಥಕೊನ್
ಹಾಡುನ್ ದಿತಾ ತರ್ಯ್ ಆಪ್ಲ್ಯಾ ವಾವ್ರಾಚಾ ಬದ್ಲಾಕ್ ಏಕ್ ಕುಡ್ಕೊ
ಸೊಂಶ್ಯಾಚಾ ಆನ್ಕಿಟೆಚೊ ಪಾಸೊನ್ ಮಾಗಾನಾಸ್ತಾನಾ ಆಶಾ ಕರಿನಾಸ್ತಾನಾ ಆಪ್ಲ್ಯಾ ಗುಡಾಂತ್
ವೊಗೊ ನಿದ್ತಾ ಜಾಲ್ಯಾರ್ ಹಿ ಆಶಾ ಮನ್ಶ್ಯಾ ಜಾತಿಕ್ ಮಾತ್ರ್ ಕಿತ್ಯಾಕ್? ಕಾಂಯ್
ಮನಿಸ್ ಮನ್ಚಾತಿಚ್ಯಾಕ್ಯ್ ನೀಚ್ ಮಟ್ಟಾಚೊ ಪುಣಿಂ
ನ್ಹಯ್? ಯಾ ಆಪುಣ್ ಮನ್ಜಾತಿಚ್ಯಾಕ್ಯ್ ಊಂಚ್ ಮ್ಹಣೊನ್ ರುಜ್ವಾತ್
ದೀಂವ್ಕ್ ಪೆಚಾಡ್ತಾ?
ಆಜ್ ಮನಿಸ್ ಆಪ್ಲ್ಯಾ ತೊಂಡಾರ್ ಹಾಸೊ ಪಾಸೊನ್ ಮತ್ಲಾಬಾ ಶಿವಾಯ್
ಪಾಟಯ್ನಾ. ತ್ಯಾ ಪಾಟಯಿಲ್ಲ್ಯಾ ಹಾಸ್ಯಾಂಚಾ ಪಾಟ್ಲ್ಯಾನ್ಯ್ ಕಾಂಯ್ ತರೀ ಆಶಾ ಖಂಡಿತ್ ದವರ್ತಾ.
ತರ್ ಏಕ್ ಗೊಬ್ಳೊ ಉದಾಕ್...?
ಬಹುಶ: ಏಕ್ ಗೊಬ್ಳೊ ಉದಾಕ್ ಪಿಯೆಂವ್ಚಾ ಪಯ್ಲೆಂ ದೋನ್ ಗೊಬ್ಳೆ ರಗಾತ್ ದಿಂವ್ಚೆಂ ಚಿಂತುನ್ ಉಪ್ರಾಂತ್ ಉದಾಕ್ ಪಿಯೆಂವ್ಕ್
ಪಡ್ತೆಲೆಂ. ಕೊಣಾಯ್ಕ್ಯ್ ಪಾಪ್ ಬಾವ್ಡ್ಯಾಕ್ ಕಾಂಯ್ ಕುಮಕ್ ತರ್ ಕೆಲಿ ತ್ಯಾ
ಬಾವ್ಡ್ಯಾನ್ ಮರ್ಣಾಚಾ ಪೆಟೆಂತ್ ನಿದ್ತಾ ತರ್ ಕುಮಕ್ ಕೆಲ್ಲ್ಯಾಚೆಂ ಗುಣ್ ಗಾವ್ನ್ ದುಗ್ಗು
ಸಲಾಮ್ ಮಾರುನ್ ದೀಸ್ ಕಾಡ್ಚೆ ಪಡ್ತೆಲೆಂ. ಹ್ಯಾ ಜಿವಿತಾಚಾ
ವಾಟೆರ್ ತಾಚೆಂ ಜೀವನ್ ಕಿತ್ಲೆಂ ಸಂಕೀರ್ಣ್ ಜಾತಾ ತೆಂ ಸಾಂಗೊಂಕ್
ಸಾಧ್ಯಾ ನಾಂ.
"ಉಜ್ವ್ಯಾ ಹಾತಾನ್ ದಿಲ್ಲೆಂ ದಾವ್ಯಾ ಹಾತಾಕ್ ಕಳಯ್ನಾಕಾ....." ಉಪದೆಸ್ ತೊ ಖುರ್ಸಾರ್ ಉಮ್ಕಾಳ್ಲ್ಲ್ಯಾಕ್
ಮಾತ್ರ್. ಹಾಂಗಾಸರ್ ದಾವ್ಯಾ ಹಾತಾಕ್ ಮಾತ್ರ್ ನ್ಹಯ್ ಕಾಲ್
ನಾಣಿಯೆಂತ್ ನ್ಹಾತಾನ್ ಝಡೊನ್ ಗೆಲ್ಲ್ಯಾ ಕೆಸಾಂಕ್
ಪಾಸೊನ್ ಸೊದುನ್ ಆಪ್ಲೆಂ ಉದಾರ್ಪಣ್ ಧಾಂಗ್ರೊ ಮಾರುನ್
ಸಾಂಗೊಂಕ್ ಆಶೆಂವ್ಚೆಂ. ಆಪ್ಣಾಕ್ ನಾಂವ್ ಜಾಯ್. ಚ್ಯಾರ್ ಜಣಾಂ
ಮುಕಾರ್ ಉಬೊ ರಾವೊಂಕ್ ಜಾಯ್, ಕೊಣೆಂ ಝೆಲೆ ಘುಂತೊಂಕ್ ಜಾಯ್, ಕೊಣೆಂ
ಪುಲಾಂ ಮಾಳುಂಕ್ ಜಾಯ್, ಆನಿ ಕೊಣೆಂ....!
ಆಶಾ.....! ಫಟ್ಕಿರಿ ಆಶಾ ಮನ್ಶ್ಯಾ ಜಾತಿಚಿ. ಮನ್ಜಾತ್ಯ್ ಆಶೆನಾ ತಸಲಿ. ಅಸಲೊ
ಮನಿಸ್ ಅಪುಣ್ ವ್ಹಡ್ಲೊ ಚಿಂತ್ಪಿ, ಯಾ ಘಡ್ಪಿ ಯಾ ದಿವ್ಪಿ, ಬರವ್ಪಿ ಯಾ ಝರವ್ಪಿ ಕಸೊ ಜಾತಲೊ?
ಜೊ ಕೋಣ್ ಕಿತೆಂಯ್ ದಿಂವ್ಚಾ ಪಯ್ಲೆಂ ಪಾಟಿಂ ಯೆಂವ್ಚಾ ವಿಶಿಂ ಚಿಂತಾ ಯಾ ಆಪ್ಣೆಂ
ದಿಲ್ಲೊ ಯಾ ಕೆಲ್ಲೊ ಮನಿಸ್ ಆಪ್ಣಾಕ್ ಗುಲಾಮ್ ಜಾವ್ನ್ ರಾವೊಂಕ್ ಜಾಯ್
ಮ್ಹಣೊನ್ ಚಿಂತಾ ತರ್ ಅಧಿಕ್ ಬರೆಂ ತಾಣೆಂ ಆಪ್ಲೆಂ ಚಿಂತಾಪ್ ದರ್ಯಾಂತ್ಲ್ಯಾ
ಮಾಸ್ಯಾಚಾ ತಕ್ಲೆಂತ್ ಭರ್ಲ್ಲೆಂ. ಮಾಸೊ ತರೀ ಕಾಂಯ್
ಪುಣಿ ಬರೆಂಪಣ್ ದರ್ಯಾ ವೆಂಗೆಂತ್ಲೆಂ ಉಸ್ತುನ್ ಕಾಡುನ್ ತಡಿ
ವಯ್ಲ್ಯಾ ರೆಂವೆರ್ ಹಾಡ್ನ್ ವೊಂಕ್ತೊಲೊ.
ಹ್ಯಾ ರೆಂವೆ ಥಾವ್ನ್ ತರೀ ಖರ್ಯಾ ಚಿಂತ್ಪಾ ಝರಿ ವಾಳ್ತೆಲ್ಯೊ.
ಮನಿಸ್ ಹರ್ಯೆಕ್ ಘಡಿ ಸ್ವತಂತ್ರ್ ಪಣಾಕ್ ಆಶೆತಾ. ಹಿ ತಾಚಿ ಚೂಕ್
ನ್ಹಯ್. ತರ್ ತಾಚ್ಯಾ ಸ್ವತಂತ್ರ್ಪಣಾಚಾ ಚಿಂತ್ಪಾಕ್ ಖಾಡುಂ ಘಾಲ್ಚೆಂ
ಹಕ್ಕ್ ಕಿತ್ಯಾಕ್? ಹೆಂ ಹಕ್ಕ್ ಕೊಣೆಂ ದಿಲಾಂ?
ಫಕತ್ತ್ ತುಂ ಥೊಡೆಂ ಚಡ್ ಜೊಡ್ತಾಯ್, ತುಕಾ ಥೊಡೊ ಚಡ್
ಮಾನ್ ಆಸಾ, ತುಕಾ ಥೊಡಿ ಚಡ್ ಪದ್ವಿ ಆಸಾ.... ಅಸಲ್ಯಾ
ಹಲ್ಕ್ಯಾ ಚಿಂತ್ಪಾನ್? ತ್ಯಾ ರಾನಾಂತ್ಲ್ಯಾ ಮೊಲ್ಯಾಂನಿ ದೀಸ್ ಕಾಡ್ಚೊ ಕೊಲೊ
ಪಾಸೊನ್ ಸಕಾಳಿಂಚಾ ಆದೇಸಾಕ್ ಸಾಂಜೆಚೆಂ ಚಿಂತಿನಾ ತರ್ ಹೆಂ ಏಕ್ ಕ್ಷುಲಕ್ ಚಿಂತಾಪ್ ಜಿವಿತಾಂತ್ಲೆಂ
ಮನಿಸ್ ಮಾತ್ರ್ ಕಿತ್ಯಾಕ್ ಚಿಂತಾ?
ಫುಡಾರ್ ಖಂಡಿತ್ ಜಾಯ್.....! ಬೊರೊ ಫುಡಾರ್ ಆಪ್ಲೊ ಆನಿ
ಪೆಲ್ಯಾಚೊ, ಫಾಲ್ಯಾಂಚೊ, ಪೊರ್ವಾಂಚೊ ಆನಿ ಸಾಸ್ಣಾಚೊ
ಪಾಸೊನ್ ಖಂಡಿತ್ ಗರ್ಜೆಚೊ. ಪೂಣ್ ಹ್ಯಾ ಫುಡಾರಾಚಾ ಪಾಟ್ಲೊ
ಹರ್ಬೊಸ್, ಆಪ್ಲ್ಯಾ ಪೆಲ್ಯಾಕ್ ತರ್ ಕಾಂಟೆ ತೊಪ್ಚಿಂ ಚಿಂತ್ನಾಂ ಜಾತಿತ್ ತರ್ ತೊ ಖಂಡಿತ್ ಚಿಂತಾಪ್
ಸಾರ್ಕೊ ನ್ಹಯ್.
ಆಪ್ಣಾಚ್ಯಾಕ್ಯ್ ವ್ಹಡ್ಲೊ (?) ಆಸ್ಲ್ಲ್ಯಾಕ್ ಖಂಡಿತ್ ಕಿತೆಂಯ್
ಬೊರೆಂ ಕರ್ಚೆಂ ಭಾಗ್ ಧಾಕ್ಟ್ಯಾಕ್ ಮೆಳಾನಾಂ. ಹೆಂ ಮ್ಹಳ್ಯಾರ್ಯ್ ತೆಂ ದೊಡ್ಯಾನ್ ಖಂಡಿತ್
ಪಾಟಿಂ ಮೆಳ್ತಾ. ತರ್ ಮನ್ಶ್ಯಾಚೆಂ ನೀಜ್ ಭಾಗ್ ಜಾವ್ನಾಸಾ ಆಪ್ಲ್ಯಾ
ಲ್ಹಾನಾಂ ಭಾವಾ ಭಯ್ಣಿಂಕ್ ಪಾಂವ್ಚೆಂ. ತೆಂಯ್ ನಿತಳ್
ಮನಾನ್, ನಿತಳ್ ಇರಾದ್ಯಾನ್.
ಹೆಂ ನಿತಳ್ ಮನ್, ಹೊ ನಿತಳ್ ಇರಾದೊ, ಕೆನ್ನಾಂ ಉದೆತಲೊ
ಮನ್ಶ್ಯಾಚಾ ತಕ್ಲೆಂತ್? ತಕ್ಲೆಂತ್ ಭರ್ಲೆಂಲೆಂ ತೆಂ ಉಣೆಂಪಣ್ ಕೆನ್ನಾಂ ಭರ್ತೆಲೆಂ? ಆನಿ ತಿಂ
ಮನ್ಶ್ಯಾಜಾತಿಕ್ ಲಾಚಾರ್ ಕರುನ್ ಉಡಂವ್ಚಿ ಚಿಂತ್ನಾಂ, ಉಣೆಂಪಣ್ ಉಕ್ಲುನ್ ದಾಕಂವ್ಚಿಂ ತಿಂ
ಮೆಟಾಂ, ತ್ಯಾ ಮೆಂದಾಚಾ ಶಿರಾಂಚಿ ಅಸ್ಕತ್ಕಾಯ್ ಜೀವ್ ಬರೊಂಕ್, ಚಡ್ ಕರುನ್
ಮನ್ಶ್ಯಾಜಾತಿಚಾ ಹ್ಯಾ ಊಣಾಕ್ ಗೂಣ್ ಕರುಂಕ್ ಹಾವೆಂ ಆಶೆಂಚ್ ಕಿತ್ಲೆ
ಶೆಕ್ಡೆ ಪಾಶಾರ್ ಕರುಂಕ್ ಪಡ್ತೆಲೆ?
ತವಳ್ ತವಳ್ ಹಾಚಾಧ್ಲೆ ಅಂಕ್ಡೆ: 1, 2, 3, 4, 5
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
