ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ತವಳ್ತವಳ್
ಹೆಂ ವಾರ್ಜಿಕ್ ಹರ್ಶೆಂಚೆಂ, ಕಾಲ್ಚೆಂ, ಆಯ್ಚೆಂ, ಫಾಲ್ಯಾಂಚೆಂ, ತವಳ್ತವಳ್ ಮತಿಚಾ ಪಡ್ದ್ಯಾಚೆರ್
ಖಂಚೊನ್ ಯೆಂವ್ಚೆಂ ಲಿಸಾಂವ್, ಬೆಸಾಂವ್ ಯಾ ತೆಸಾಂವ್...
ತವಳ್ತವಳ್ - 10. ಉದೆಂತ್
ಮೆಲ್ವಿನ್ ಜೆ. ವಾಸ್
ವ್ಹಳೂ ವ್ಹಳೂ ನಿಶ್ಯಬ್ದ್ಪಣಿಂ ವಾಳ್ಚೆಂ ಉಭಾಳ್ ವಾರೆಂ ಆಪ್ಲೆಂ ಆಸ್ಥಿತ್ವ್ ಸಂಸಾರಿ ದೊಳ್ಯಾಂಕ್ ದಾಖವ್ನ್ ದೀಂವ್ಕ್ ಆಪ್ಲೆಂ ವಾಳೊನ್ ಗೆಲ್ಲ್ಯಾ ಕುಶಿನ್ ಆಪ್ಲ್ಯಾ ಪಾಲ್ವಾ ಭಿತರ್ ಆಯ್ಲೆಲ್ಯಾ ಸಕಾಳಿಂಚಾ ದೊವಾಂತ್ ನ್ಹಾವ್ನ್ ಸಂತೊಸಾನ್ ಸಕಳಿಂಚಾ ಸುರ್ಯಾಕ್ ಆತುರಾಯೆನ್ ರಾಕೊನ್ ರಾವ್ಲೆಲ್ಯಾ ತ್ಯಾ ರೂಕಾ ಝಡಾಂಚಾ ನವ್ಯಾಚ್ ಅಂಖ್ರೆಂಕ್ ಮಧುರಾಯೆನ್ ಪೊಶೆವ್ನ್ ವೆತಾನಾ ಆಪ್ಲೆಂ ಮೌನ್ ಸಾಂಡುನ್ ಘುಣ್ಗುಣುಂಕ್ ಲಾಗ್ತಾ ತರ್ ಸಂಸಾರ್.......?
ಸಂಸಾರಾಕ್ ಆನಿಂ ಉದೆಂವ್ಚಾ ದಿಸಾಂಕ್ ಕಾಂಯ್ ಸಂಬಂಧ್ ನಾಂ. ಸಂಬಂಧ್ ಆಸಾ ಜಾಲ್ಯಾರ್ ಫಕತ್ತ್ ಹ್ಯಾ ದೊನಾಂಯ್ ಮಧೆಂ ಮೌನ್ಪಣಿಂ ಧಾಂವ್ಚಾ ವೆಳಾಕ್ ಮಾತ್ರ್. ಹರ್ಯೇಕ್ ಉದೆಂವ್ಚೊ ದೀಸ್ ಸಂಸಾರಾಕ್ ಬರೆಂ ಕಾಂಯ್ ಹಾಡುನ್ ಯೇನಾ ಕಿತ್ಯಾಕ್ ಸಂಸಾರಾಂತ್ ಪಯ್ಲೆಂಚ್ ಸಗ್ಳೆಂ ಬರೆಂಚ್ ಆಸಾ. ಹ್ಯಾ ಬರ್ಯಾಕ್ ವಳ್ಕೊಂಚಿ ಮನ್ಶಾ ನದರ್ ಮಾತ್ರ್ ಕುಡ್ಡಿ ಜಾಲ್ಯಾ. ಹ್ಯಾಚ್ ಖಾತಿರ್ ಸಂಸಾರಾಕ್ ಸಭಾರ್ ಮಹಾತ್ಮ್ ಜಲ್ಮೊನ್ ಆಯ್ಲೆ. ಸಬಾರ್ ವಾಯ್ಟಾಚೆ ತರ್ ಥೊಡೆ ಬರೆ.
ಸಂಸಾರಾಂತ್ ಸಗ್ಳೆಂ ಬರೆಂಚ್ ಆಸ್ತಾನಾ ಬರ್ಯಾಂಚಿ ಗರ್ಜ್ ಕಿತೆಂ? ಜಶೆಂ ತೆಂ ವ್ಹಾರೆಂ ಸಗ್ಳ್ಯಾ ಪ್ರಥ್ವೆಕ್ಚ್ಚ್ ಆಪ್ಲ್ಯಾ ಪಾಲ್ವಾಂತ್ ಕೊವ್ಳುನ್ ಆಸ್ತಾಂ ಆಪುಣ್ ಆಸಾಂ ಮ್ಹಣೊನ್ ದಾಖಂವ್ಕ್ ತ್ಯಾ ರೂಕಾ ಝಡಾಂಚಾ ತರ್ನ್ಯಾ ಆಂಕ್ರೆಕ್ ಹಾಲಂವ್ಚೆ ಕಿತ್ಯಾಕ್?
ಪೃಥ್ವೆಚೆಂ ಆನಿಂ ವಾರ್ಯಾಚೆಂ ಮಿಲನ್ ಪಳೇವ್ನ್ ತರ್ನ್ಯೊ ಆಂಖ್ರ್ಯೊ ಹಾಸೊನ್ ಧಲ್ತಾತ್ ತರ್ ಆಪ್ಲೆಂ ಪಯ್ಣ್ ಸಂಪಯಿಲ್ಲ್ಯೊ ಖೊಲಿಯೊ ತ್ಯಾಚ್ ವಾರ್ಯಾ ವೆಂಗೆಂತ್ ಆಪ್ಣಾಕ್ಚ್ ಸಮರ್ಪುನ್ ವಾರ್ಯಾ ಸವೆಂ ಉಬೊಂಕ್ ಲಾಗ್ತಾತ್. ತ್ಯಾಚ್ ವಾರ್ಯಾ ಸವೆಂ ತಾಚ್ಯಾ ತಾಳ್ಯಾಕ್ ತಾಳೊ ಮೆಳವ್ನ್ ಗುಣ್ಗುಣೊಂಕ್ ಲಾಗ್ತಾತ್.
ತರ್ ಮ್ಹಜ್ಯಾ ಸಂಸಾರಾಂತ್ ಹೊ ತಾಳೊ ಕಿತ್ಯಾಕ್ ಉಟೊನ್ ಯೇನಾ?
ಮ್ಹಜ್ಯಾ ಸಂಸಾರಾಂತ್ ತಿ ಫಾಂತ್ಯಾ ದೋವ್ ಪಡಾನಾ?
ತೊ ಸುರ್ಯೊ ಉದೆವ್ನ್ ಯೇನಾ?
ಯಾ ತೊ ಪಾಲಂವ್ ತ್ಯಾ ಆಂಕ್ರ್ಯಾಕ್ ಮೊವಾಳಾಯೆನ್ ಪೊಶೆನಾ?
ಕಾರಣ್ ತರಿ ಕಿತೆಂ?
ಭೋವ್ಚ್ ಸುಲಭಾಯೆಚೆಂ ಆನಿಂ ಚಡ್ ಸಂಪಿ ಜವಾಬ್ ಹಾಂವೆಂಚ್ ಸೊಧ್ಲಿ ಜಾಲ್ಯಾರ್ ತ್ಯೊಚ್ಚ್ ಅಂಖ್ರ್ಯೊ ಫಾಂತ್ಯಾ ಧೊವಾಂತ್ ನ್ಹಾಂವ್ಚಾ ಪಯ್ಲೆಂಚ್ ಮ್ಹಜ್ಯಾ ಘರಾಚಾ ಪಾಟ್ಲ್ಯಾ ಸೊಪ್ಯಾವಯ್ಲ್ಯಾ ವಾನಾಂತ್ ಪಿಟೊ ಜಾವ್ನ್ ಆಪ್ಲಿ ಜಿವ್ಸಾಣ್ ಸಾಂಡ್ತಾತ್ ಜಾಲ್ಲ್ಯಾನ್......? ಯಾ ಭಾಗಿಂತ್ ಪಾಸಾಯೊ ಮಾರ್ಚೆಂ ಬಾರೀಕ್ ಬೊಟಾಂಚಿ ಚಲಿ ಪಿಸೊಳ್ಯಾಂ ಬರಾಬರ್ ಖೆಳ್ತಾನಾ ಕಾಂಯ್ ಆಪ್ಲ್ಯಾ ಮೊವಾಳ್ ಹಾತಾನಿಂ ತ್ಯಾ ಆಂಖ್ರೆಕ್ ಮೊಡುನ್ ಮತಿಂತ್ ರಂಗಯಿಲ್ಲ್ಯಾ ಸ್ವಪ್ಣಾಂಕ್ ಉಗ್ಡಾಸ್ ಕಾಡ್ತಾನಾ ಕಾಂಯ್ ಪುಣಿಂ ಆಪ್ಲ್ಯಾ ಸೊಬಿತ್ ಝಳ್ಜಳ್ಚಾ ದಾಂತಾಂಕ್ ಖಾಣ್ ಪುಣಿಂ ಬಾಸಾಯ್ನಾಮೂ?
ಹರ್ಯೇಕ್ ದೀಸ್ ಆಶೆಂಚ್ ಮಾಕಾಚ್ ಸವಲಾಂ ಕರ್ತಾಂ ಆನಿಂ ಹಾಂವ್ಚ್ ಜವಾಬ್ ಸೊದ್ತಾಂ. ಮ್ಹಜ್ಯಾ ಸವಾಲಾಂಚಾ ಜವಾಬೆಕ್ ಸೊದ್ತಾಂ ಸೊದ್ತಾಂ ಹಾಂವ್ ಖಂಯ್ಚರ್ ಪಾವ್ತಾಂ ತೆಂ ಮ್ಹಾಕಾಚ್ ಕಳೊಂಕ್ ಯೇನಾ. ಕೆದ್ನಾಂ ಕೆದ್ನಾಂ ಬಾಮ್ಣಾಂಚಾ ನಾಣಿಯೆಂತ್, ಮ್ಹಾರಾಂಚಾ ಕೊಡ್ಕ್ಯಾಂತ್ ಪಾಸೊನ್ ಪಾವ್ಲ್ಲೊಂ ಆಸಾ.
ಸಂಸಾರಾಚಾ ಉತ್ಪತ್ಪಿಂತ್ ಏಕ್ ಫಳ್ ಜಾವ್ನ್ ಆಯ್ಲೆಲಿ ಖಂಯ್ಚಿ ಜೀವಿ ಜಿವಾಕ್ ಆಶೆನಾಂ? ಖಂಡಿತ್ ಹರ್ಯೇಕಾಕ್ ಜೀವ್ ಜಾಯ್. ವ್ಹಾಳೊನ್ ವೆಚಿ ಝರ್ ಆಪ್ಲಿ ವಾಟ್ ಅಪುಣ್ಚ್ ಸೊಧುನ್ ಭಂವ್ತಾನಾ ತ್ಯಾಚ್ ಉಭೆಕ್ ನಿವೊಂಕ್ ಆಮ್ಚಾ ರಸ್ತ್ಯಾಂ ದೆಗೆನ್ ರೂಂದ್ ರೂಂದ್ ಗಲ್ಲ್ಯೊ ಕಿತ್ಯಾಕ್ ಗಳೊ ಭರ್ ವ್ಹಾಳೊ ಘೆವ್ನ್ ವ್ಹಾಳೊಂಕ್ ಲಾಗ್ತಾತ್.......ಹ್ಯಾಚ್ ಗಲ್ಲ್ಯಾಂನಿ ಬುಡೊನ್ ಕಿತ್ಲೆಂ ಉಪೆಲ್ಯಾರ್ಯ್ ಕಿತ್ಲೆಂ ಸೊಧ್ಲ್ಯಾರ್ಯ್ ಮ್ಹಜ್ಯಾ ವಯ್ಲ್ಯಾ ಸವಾಲಾಂಕ್ ಜವಾಬ್ ಮೆಳ್ಲ್ಲಿಚ್ ನಾಂ. ಆಶೆಂ ಮ್ಹಣೊನ್ ರಾತಿಚಾ ಮಂದ್ ಉಜ್ವಾಡಾಂತ್ ವಾಳ್ಚ್ಯಾ ಸಂಗೀತಾಕ್ ಭುಲೊನ್ ಮೊಣ್ಕ್ಯಾಚಾ(ಸೊರ್ಯಾಚಾ) ಆಮಾಲಾಂತ್ ಆಪ್ಣಾಕ್ಚ್ ವಿಸ್ರೊಂಕ್ಯ್ ಕಶೆಂ ಸಾಧ್ಯ್? ತ್ಯಾ ಬೊತ್ಲಿಂತ್ಲೆಂ ಆಮಾಲ್ ಗ್ಲಾಸಾಚಾ ಸೊಬಾಯೆಕ್ ರಂಗಯ್ತಾನಾ ಆಯ್ಕೊಂವ್ಚೊ ತೊ ಆವಾಜ್ ಘಡ್ಗಡ್ಯಾ ಪರಿಂ ಕಾನಾಂಕ್ ಮಾರ್ತಾ ಆನಿಂ ಗ್ಲಾಸಾ ಬಿತರ್ ಸೊರ್ಯಾಕ್ ಉಜೊ ಪೆಟ್ಲ್ಲ್ಯಾ ಪರಿಂ ಮ್ಹಜ್ಯಾ ಪಾಂಯಾಂ ಪಂದಾ ಖೆಂಡಾಂ ಝಳ್ತಾತ್ ಆನಿಂ ಹಾಂವ್ ಉಸ್ಮಡ್ತಾಂ, ದಡ್ಬಡ್ತಾಂ ಆನಿಂ ಚಡ್ಪಡ್ತಾಂ. ಉಪ್ರಾಂತ್ ಮೌನ್ಪಣಿಂ ವೊಂಟಾ ಬಿತರ್ಚ್ ರಡೊನ್ ಮಾತಿಯೆಕ್ ಸಾರೆಂ ಜಾವ್ನ್ ಗೆಲ್ಲ್ಯಾ ತ್ಯಾ ಪಾಂತ್ಯಾಚಾ ದೋವಾ ಥೆಂಬ್ಯಾಕ್ ಸವ್ಕಾಸ್ ಮೆಜುಂಕ್ ಲಾಗ್ತಾ.
ಹ್ಯಾಚ್ ಖಾತಿರ್ ಜಾಂವ್ಕ್ ಪುರೊ ಆಜ್ ತ್ಯಾ ಗ್ಲಾಸಾಚಿ ಸೊಬಾಯ್ ಮಾಜ್ವೊನ್ ಆಯ್ಲ್ಯಾ ಆನಿಂ ಬೊತ್ಲಿಚೆ ಪಾಂಯ್ ಆಡ್ ಪಡ್ಲ್ಯಾತ್. ಮಾಜ್ವಾಲ್ಲಿ ಸೊಭಾಯ್ ಆನಿಂ ಆಡ್ ಪಡ್ಲ್ಲೊ ಪಾಂಯ್ ಆಪ್ಲ್ಯಾ ಜಿವಿತಾ ವಾಟೆರ್ ಕಿತ್ಲೆಂ ಹಾಸೊಂಕ್ ಪಾವ್ತೆಲೆ?
ಭೋವ್ಶಾ ಹ್ಯಾಚ್ ಖಾತಿರ್ ಮನಿಸ್ ಆಪ್ಲಿ ವಾಟ್ ರಚ್ತಾನಾ ಸೊಬಾಯೆಕ್ ಆನಿಂ ನಿಟಾಯೆಕ್ ಚಡ್ ಧ್ಯಾನ್ ದಿತಾ. ಆಪ್ಲೆಂಚ್ ರಚ್ಲ್ಲ್ಯಾ ಸೊಬಾಯೆಂತ್ ದೀಸ್ಭರ್ ಲೊಳೊನ್ ರಾತ್ ಭರ್ ನಾಚ್ತಾನಾ ಉಟೊನ್ ಆಯಿಲ್ಲ್ಯಾ ಘಾಮಾ ಥೆಂಬ್ಯಾ ವಾಳಂವ್ಕ್ ವಾಟೆ ದೆಗೆನ್ ರೂಂದಾಯೆಚಿ ಗಲ್ಲಿಯ್ ರಚ್ತಾ.
ಮನಿಸ್ ಸ್ವತಂತ್ರ್ ಜೀವಿ. ಜಲ್ಮಾ ಥಾವ್ನ್ ಸ್ವತಂತ್ರ್ ಸೈಂಬಾಚೊ ಆಪುಣ್ ಸ್ವತಂತ್ರ್ ಜಾವ್ನ್ ಜಿಯೆತಾನಾ ಆಪ್ಣೆಂ ಜಿಯೆಲ್ಲ್ಯಾ ಮೆಟಾಂಕ್ ಮಾತ್ರ್ ಸ್ವತಂತ್ರ್ ಬಿಲ್ಕುಲ್ ದೀನಾ. ತ್ಯಾ ಮೆಟಾಂಚಾ ಅಸ್ಥಿತ್ವಾಕ್ ಪಳೆಲ್ಲ್ಯಾ ಕಡೆನ್ ಪುಸುನ್ ಕಾಡ್ಚೆಂ ಪ್ರಯತ್ನ್ ಕರುನ್ಂಚ್ ಆಸ್ತಾ.
ಹ್ಯಾ ಪುಸುನ್ ಕಾಡ್ಚಾ ಪ್ರಯತ್ನಾಂತ್ ಥಂಯ್ ಹಾಂಗಾ ಪಾಪುಡ್ನ್ ಆಸುಡ್ತಾ ತರ್ ಆತ್ತಾಂ ಮಾಗಿರ್ ನ್ಹಾಂವ್ನ್ ಪುಸ್ತಾ. ಆಶೆಂ ಕರ್ತಾನಾ ಕಿತ್ಲೆಂ ಪಾಪ್ಸಾತಾ ಕಿತ್ಲೆಂ ಉಸಳ್ತಾ ಕಿತ್ಲೆಂ ಜಿರ್ತಾಂ
ಆನಿ ಕಿತ್ಲೆಂ ಕಿರ್ತಾ ತೆಂ ಭೋವ್ಶಾ ಪಳೆಂವ್ಕ್ ಮನ್ಶಾಕ್ ವೇಳ್ಚ್ ಮೆಳಾನಾ. ಕಾರಣ್ ಮನಿಸ್ ವೆಳಾಚೊ ಪಯ್ಲೆಂ ಥಾವ್ನ್ ಗುಲಾಮ್ ಜಾಲಾ.
ಪಯ್ಲೆಂ ಥಾವ್ನ್ ......!
ವೇಳಾಚಾ ಆರಂಭಾ ಥಾವ್ನ್ ಮನಿಸ್ ವೆಳಾಂಚೊ ಗುಲಾಮ್...!!
ಅಂತ್ಯ್ ವರೇಗ್...!!!
ಗುಲಾಮ್ ಕೆದ್ನಾಂಯ್ ಸ್ವತಂತ್ರ್ ಜಾಂವ್ಕ್ ಪಾವ್ತಾ? ತೊ ಸ್ವತಂತ್ರಾಕ್ ಜರ್ ತರ್ ಪಾವೊಂಕ್ ಜಾಯ್ ಜಾಲ್ಯಾರ್ ತಾಣೆಂಚ್ ವೆಳಾಕ್ ಸೊಡುಂಕ್ ಪಡ್ತೆಲೆಂ. ವೆಳಾಕ್ ಸೊಡ್ಲಲೊ ಮನಿಸ್ ಖಂಡಿತ್ ಸ್ವತಂತ್ರ್. ತಾಕಾ ಧಾಂವ್ಚಿ ಗರ್ಜ್ ನಾಂ. ಧಾಂವ್ ನಾಂ ಮ್ಹಣ್ತಾನಾ ತಾನ್ ಭುಕ್ ನಾಂ. ತಾನ್ ಭುಕ್ ನಾಂ ಮ್ಹಣ್ತಾನಾ ಆಪ್ಣೆಂ ಚಲ್ಲ್ಲಿ ಖಂಯ್ಚ್ಯಿ ವಾಟ್ ಸಾರ್ಕಿಚ್ ಆನಿಂ ಆಪ್ಣೆಂ ಚಾಕ್ಚಿ ಹರ್ಯೆಕ್ ಸೊಬಾಯ್ ಸೊಬಿತ್ಚ್.
ಆಶೆಂ ಜಾಂವ್ಕ್ ಪಾವ್ತೆಲೆಂ....?
ವೆಳಾಚೊ ಹಾತ್ ಕೊಣ್ಯಿ ಸೊಡುಂಕ್ ಪಾವ್ತಲೊ?
ಉದೆಂವ್ಚಾ ಫಾಲ್ಯಾಂಚಿ ಆಶಾ ಕರ್ಚಾ ಬದ್ಲಾಕ್ ಆಯ್ಚಾ ಉದೆಂತಿಕ್ ಮನಿಸ್ ವೆಂಗುಂಕ್ ಪಾವ್ತಲೊ? ವೇಳಾ ಪಾಟ್ಲ್ಯಾನ್ ವೇಳ್ ದಾಂವ್ಲ್ಲ್ಯಾ ಪರಿಂ ದಿಸಾಂ ಪಾಟ್ಲ್ಯಾನ್ ದೀಸ್ ದಾಂವ್ತಾತ್. ರಾತಿ ಪಾಟ್ಲ್ಯಾನ್ ರಾತ್ ಆನಿಂ ಉದೆಂತಿ ಪಾಟ್ಲ್ಯಾನ್ ಉದೆಂತಿ. ಜಶೆಂ ಆಜ್ ಆಸಾ ತಶೆಂ ಕಾಲ್ ಆಸ್ಲ್ಲೆಂ. ಜಶೆಂ ಕಾಲ್ ಆಸ್ಲ್ಲೆಂ ತಶೆಂಚ್ ಫಾಲ್ಯಾಂಯ್ ಆಸ್ತೆಲೆಂ. ಹ್ಯಾ ಕಾಲ್ ಆನಿಂ ಫಾಲ್ಯಾಂಚಾ ಮಧೆಂ ವೆಳಾ ಪಾಟ್ಲ್ಯಾನ್ ದಾಂವ್ಲ್ಲೊ ಮನಿಸ್ ಆಪ್ಲ್ಯಾ ದಾಂವ್ಣೆಕ್ ಮಾತ್ರ್ ಬದ್ಲುಂಕ್ ಪಾವ್ಲಾ. ಹಾಕಾಚ್ ಲಾಗೊನ್ ಹ್ಯಾ ಮನ್ಶಾಕ್ ತ್ಯಾ ಉದೆಂತಿಚಾ ವಗ್ತಾ ವ್ಹಳೂ ವ್ಹಳೂ ವ್ಹಾಳ್ಚಾ ವಾರ್ಯಾಚೆಂ ಮಧುರ್ ಗಾಯನ್ ಆಯ್ಕೊಂಕ್ ಯೇನಾ ಆನಿಂ ಮ್ಹಾಕಾ ತ್ಯಾ ಮಾತಿಯೆಂತ್ ಜಿರೊನ್ ಗೆಲ್ಲ್ಯಾ ದೊವಾ ಥೆಂಬ್ಯಾಂಕ್ ಸೊಧುನ್ ಸೊಧುನ್ ನೀದ್ ಪಡಾನಾ.
ವೆಳಾಚಾ ಆರಂಭಾ ಥಾವ್ನ್ ಹರ್ಯೆಕ್ ದೀಸ್ ಪರ್ತ್ಯಾಕ್ ಮನ್ಶಾ ದಾರಾರ್ ಆಪ್ಲೊ ತೊಚ್ಚ್ ರುಪ್ಕಾರ್ ದಾಖವ್ನ್ ಗೆಲ್ಲ್ಯಾ ಕಾಂಯ್ಚ್ ಬದ್ಲಾನಾತ್ಲ್ಲ್ಯಾ ತ್ಯಾ ಉದೆಂತಿಕ್ ಫಾಲ್ಯಾಂ ಹೆಂ ಸಗ್ಳೆಂ ಮನ್ಶಾ ಕುಳ್ ವಳ್ಕೊನ್ ಘೆತೆಲೆಂ
ಆನಿಂ ಭೋವ್ಶಾ ತ್ಯಾ ಉದೆಂತಿಚೆಂ ಮಧುರ್ ಗಾಯನ್ ಸಗ್ಳ್ಯಾಂಚಾ ಕಾಳ್ಜಾಂತ್ ರಾಜ್ ಕರ್ತೆಲೆಂ.
ಹ್ಯಾ ಖಾತಿರ್ ಆನಿಂ ಕಿತ್ಲೆ ದೀಸ್ ಆನಿಂ ರಾತಿ ಹಾಂವೆಂ ತುಮ್ಚಾ ದಾರಾರ್
ಆಶೆಂಚ್ ದೀಸ್ ಮೆಜುಂಕ್ ಪಡ್ತೆಲೆ?
ತವಳ್ ತವಳ್ ಹಾಚಾಧ್ಲೆ ಅಂಕ್ಡೆ: 1, 2, 3, 4, 5, 6, 7, 8, 9
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
