ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಜೆಮ್ಮಾ ಪಡೀಲ್ ಹಾಚಿಂ ಅಂಕಣಾಂ:
ಉಡಾಸಾಂತ್ಲೆ ಫಾತೊರ್ [ಉಮಾಳೊ]
ಭಗ್ಣಾಂ [ದಿವೊ]
ಚಿಂತಾಪ್ [ರಾಕ್ಣೊ]
ಆಮ್ಚಿಂ ಸಂಸ್ಕೃತಿ [ದಿವೊ]
ಸತಾಂತ್ಲಿಂ ವಿಚಿತ್ರಾಂ [ದಾಯ್ಜ್]
ಜೆಮ್ಮಾ ಆನಿ ಜೆಮ್ಮಾವಾದ್
ಜೆಮ್ಮಾ ಪಡೀಲ್
ಅಂಕಣ್ಕಾರಾ ವಿಶ್ಯಾಂತ್:
ಸಂಸಾರಾಂತ್ಲ್ಯಾ ಖಂಚಾಯ್ ಭಾಸಾಂನಿ ಸಿಂತಿಮೆಂತಾಳ್ ಬರ್ಪಾಂಕ್ಯ್ ಜಿತ್ಲೆಂಚ್
ಸ್ಥಾನ್ ಆಸಾ ತಿತ್ಲೆಂ ಹೆರ್ ಪ್ರಕಾರಾಂಕ್ ಆಸ್ತಾ. ತ್ಯಾ ತ್ಯಾ ಭಾಸೆಂಚಾ
ವಾಚ್ಪ್ಯಾಚಾ ಚಿಂತ್ಪಾಸಕ್ತೆಚೆರ್ ಹಾಂಚೊ ಮಾಪ್ ಹೊಂದ್ವೊನ್
ಆಸ್ಯೆತಾ. ಜಾಂವ್ ಅಸ್ತಿತ್ವ್ವಾದಿ (Existence),
ವಾಸ್ತವಿಕ್ (Reality), ಬಂಡಾಯ್, ಕ್ರಾಂತಿಕಾರಿ (Revolutionary),
ಶೈಕ್ಶಣಿಕ್ (Educational),
ನೀತಿಭೋಧಕ್ (Moral), ದಾವ್ಯಾಪಂತೀಯ್ (Leftist),
ಹಾಸ್ಯ್, ಕಾಲ್ಪನಿಕ್ (Imaginary/Fantasy), ತಾತ್ವಿಕ್ (Philosophical),
ಮನೋವೈಗ್ಯಾನಿಕ್ (Psychological),
ವೈಗ್ಯಾನಿಕ್ (Scientific) ಯಾ
ಹೆರ್.
ಪುಣ್ ಕೊಂಕ್ಣೆಂತ್ ಸಿಂತಿಮೆಂತಾಳ್ ಬರ್ಪಾಂನಿ ಭೋವ್ ಫಾಮಾದ್ ಜಾಲ್ಲೊ
ಮಾಲ್ಘಡೊ ಸಾಹಿತಿ ’ಜೆಮ್ಮ ಪಡಿಲ್’ ಮ್ಹಣ್ಚಾಕ್ ಕಾಂಯ್ ದೋನ್ ಉತ್ರಾಂ
ನಾಂತ್. ಹಿಂ ಸಿಂತಿಮೆಂತಾಂ ತಾಕಾ ಲಾಗ್ಶಿಲ್ಯಾನ್ ವಳ್ಕಾನಾತ್ಲ್ಲ್ಯಾಂಕ್
ಸಯ್ತ್ ರುಚ್ತಾತ್, ಕಿತ್ಯಾಕ್ ಮ್ಹಳ್ಯಾರ್ ಹಾಂತುಂ ಬರವ್ಪ್ಯಾನ್ ಜಿಯೆಲ್ಲ್ಯಾ ಜಿಣ್ಯೆಚಿಂ
ಸತಾಂ ಆಸಾತ್, ಹಿಂ ಸತಾಂ ಹೆರಾಂಕ್ ಲಿಸಾಂವಾ ಜಾಂವ್ಕ್ಯ್
ಸಕ್ತಾತ್.
ಜೆಮ್ಮಾ ಪಡೀಲ್ ಮ್ಹಾಕಾ ಸಭಾರ್ ಕಾರಾಣಾಂಕ್ ಲಾಗೊನ್ ಭೋವ್
ಮೊಗಾಚೊ, ತಾಂತ್ಲೆಂ ಪಯ್ಲೆಂ ಕಾರಾಣ್ ತಾಚೆಂ ಸಾದೆಂಪಣ್, ಖಾಲ್ತೆಂಪಣ್, ಮೊಗಾಳ್ ಮಾಯ್ಪಾಸಿ ಉತ್ರಾಂ,
ವಯ್ಲ್ಯಾ ನದ್ರೆಕ್ ತೊ ಏಕ್ ಸಮ್ಜೊಂಕ್ ಕಶ್ಟಾಂಚೊ
(ಕೋಂಪ್ಲೆಕ್ಸ್ ಕ್ಯಾರಕ್ಟರ್) ದಿಸೊಂಕ್ ಪುರೊ ಪುಣ್
ಲಾಗ್ಗಿಂ ಯೇವ್ನ್ ಪಳೆಲ್ಯಾರ್ ಶೀದಾ ಸಾದಾ ಮನಿಸ್. ಜ್ಯೆ ಕಿತೆಂ
ಸಾಂಗ್ಚೆಂ ಶೀದಾ ಸಾಂಗ್ಚೊ, ಕಾಳ್ಜಾಂತ್ ಏಕ್ ತೊಂಡಾಂಯ್ ಅನ್ಯೇಕ್
ಸಾಂಗ್ಚಾ ವರ್ಗಾಂತ್ಲೊ ಭಿಲ್ಕುಲ್ ನ್ಹಯ್. ಭೋವ್ಶಾ
ಹ್ಯಾಚ್ ಕಾರಾಣಾಂಕ್ ಲಾಗೊನ್ ತಾಚಿಂ ಬರ್ಪಾಂ ಮ್ಹಾಕಾ ಚಡ್ ಆಂವಡ್ತಾತ್.
ತಾಚಾ
ಆಯ್ಲೆವಾರ್ಚಾ ’ವಿಂಚ್ಣಾರ್ ಚಿಂತಾಪ್ ಆನಿ ಭೊಗ್ಣಾಂ’ ಬುಕಾಕ್
ವಾಚ್ಲ್ಲ್ಯಾ ಜಾಯ್ತ್ಯಾಂನಿ ಹ್ಯಾ ಬುಕಾವಿಶ್ಯಾಂತ್ ಬರಿ ಪ್ರತಿಕ್ರಿಯಾ
ದಿಲ್ಯಾ, ದಿತೇಚ್ ಆಸಾತ್, ಹಾಚಿಂ ಹೆರ್ ವಿಂಚ್ಣಾರ್ ಬರ್ಪಾಂಚೊ
ಬೂಕ್ ಫುಡ್ಲ್ಯಾ ವರ್ಸಾಂನಿ ಪರ್ಗಟ್ಚೆಂ ಯೋಜನ್ಯ್ ಆಸಾ. ಜೆಮ್ಮ
ಪಡೀಲ್ ಕೊಂಕ್ಣೆಂತ್ಲೊ ಏಕ್ ಮಾಲ್ಘಡೊ ಸಾಹಿತಿ, ಹಾಣೆಂ ಲೆಕಾಚೊ ಕಾಣ್ಯೊ ಬರಯ್ಲ್ಯಾತ್ ಜಾವ್ಯೆತಾ,
ಪುಣ್ ಕೊಂಕ್ಣಿ ಭಾಸೆಚೊ ಕಾರ್ಯಾಳ್ ರಿತಿನ್ (Practically)
ಮೋಗ್ ಕೆಲ್ಲ್ಯಾಂಪಯ್ಕಿ ಎಕ್ಲೊ ಮ್ಹಣ್ ಪರ್ಗಟುಂಕ್
ಹಾಂವ್ ಚಡ್ ಸಂತೊಸ್ ಪಾವ್ತಾಂ.
ಹೆಂ ಅಂಕಣ್ ಎಕಾ ಅಥ್ವ್ಯಾಚ್ ವರ್ಗಾಚೆಂ ಮ್ಹಳ್ಳಿ
ಮ್ಹಜಿ ಅಭಿಪ್ರಾಯ್, ಹಾಂತುಂ ಬರವ್ಪಿ ವಾಚ್ಪ್ಯಾಚಾ ಮತಿಂತ್
ವಿಶೆವ್ ಘೆಂವ್ಚಾ ಸವಾಲಾಂಕ್ ಕುಟ್ಟುನ್ ಯಾ ಥಾಪುಡ್ನ್ ಉಟಾಶೆಂ ಕರ್ತಾ. ಎದೊಳ್ ಆಮ್ಚಾ
ಜಿಣ್ಯೆಂತ್ ಚಿಂತಿನಾತ್ಲ್ಲ್ಯಾ ಚಿಂತ್ಪಾಕ್ ಆತಾಂ ಚಿಂತುಂಕ್ ಪ್ರೇರಣ್ ದಿತಾ. ಇಲ್ಲೆಂ ಕೊಡು
ದಿಸೊಂಕ್ ಪುರೊ, ಪುಣ್ ಬರವ್ಪಿ ಖೈಂಸರ್ಯೀ ರೀತ್ ಚುಕೊಂಕ್
ನಾ ವ ನೀತ್ ಚುಕೊಂಕ್ ನಾ. ಹಿಂ ವಿಚಿತ್ರಾಂ ಬರವ್ಪ್ಯಾನ್
ಸತಾಂತ್ ಸೊಧ್ಲ್ಲಿಂ ಯಾ ಸೊಧ್ಚಿಂ. ವಾಚ್ಪ್ಯಾಕ್ ಖಂಡಿತ್ ರುಚ್ತೆಲಿಂ ಮ್ಹಳ್ಳೆಂ ಚಿಂತಾಪ್ ಆಮ್ಚೆಂ.
ವಾಚ್ಪ್ಯಾಲಾಗಿಂ
ಸಂವಾದ್:
ಮೊಗಾಳ್ ವಾಚ್ಪ್ಯಾ,
ವತ್ತಾಯೆಚಾ
ಖರಾಯೆನ್ ಆನಿ ಮೊಗಾಳ್ ಈಶ್ಟ್ ವಲ್ಲಿಚಾ ಪುಸ್ಲವ್ಣೆನ್
ಹಾಂವ್ ಮ್ಹಜಿಂ ದೋನ್ ಉತ್ರಾಂ ಬರಂವ್ಕ್ ಆಯ್ಲಾಂ. ಆಜ್ಕಾಲ್
ದೋನ್ ಉತ್ರಾಂ ಸರಾಗ್ ಕೊಂಕ್ಣೆಂತ್ ವ್ಹಾಳೊನ್ ಯೆಂವ್ಚೆಂ
ಪಳೆತಾನಾ ಮನಾಕ್ ಖುಶಿ ಜಾತಾ ಕಿತ್ಯಾಕ್ ಮ್ಹಳ್ಯಾರ್ ಏಕ್
ಪುಸ್ತಕ್ ಯಾ ಎಕ್ ಪ್ರತಿ ಕೊಂಕ್ಣಿ ಭಾಶೆಂತ್ ಉದೆತಾ ಮ್ಹಣೊನ್.
ಮ್ಹಜಿಂ
’ಸತಾಂತ್ಲಿಂ ವಿಚಿತ್ರಾಂ’ ಲೇಖನಾವಳ್ ಬರಂವ್ಕ್ ವಲ್ಲಿಚ್
ಕಾರಾಣ್. ಬರಂವ್ಚೆಂ ಮ್ಹಳ್ಯಾರ್ ಮ್ಹಾಕಾ ತಾಪ್ ಯೆತಾ.
ಪುಣ್ ವತ್ತಾಯ್ ಕೆಲ್ಲ್ಯಾ ವೆಳಾರ್ ಉತ್ರಾಕ್ ಮಾನ್ ಆನಿ
ಸನ್ಮಾನ್ ದಿಂವ್ಚಾ ಹಾವೆಂ ಮ್ಹಜಾ ದೋನ್ ಉತ್ರಾಸಂಗಿಂ
ಹ್ಯಾ ಲೇಖನಾವಳಿಥಾವ್ನ್ ತುಮ್ಕಾಂ ಸಾಂಗೊಂಕ್ ಅಪೇಕ್ಶಿತಾಂ.
ಹ್ಯಾ
ಸಂಸಾರಾಂತ್ ಆಮಿ ದೆವಾಲಾಗಿಂ ಕಿತೆಂ ಮಾಗ್ತಾಂವ್ ತೆಂ ಆಮಿ ಸಕಾಳಿಂ ಥಾವ್ನ್ ರಾತ್
ಪರ್ಯಾಂತ್ ಎಕ್ ಲ್ಹಾನ್ ಟೇಪ್ ರೆಕೋರ್ಡರ್ ದವರ್ಲ್ಯಾರ್ ಕಳಿತ್
ಜಾಯ್ತ್. ಪುಣ್ ಜಿವಿತಾಂತ್ ಥೊಡ್ಯೊ ಸಂಗ್ತಿ ಆಮ್ಕಾಂ ಪಾತ್ಯೆಂವ್ಕ್
ಕಶ್ಟ್ ಜಾತಾತ್. ತರಿಕ್ಯ್
"ಆಮಿ" ಪಾತ್ಯೆತಾಂವ್. ಸಾಂಗಾತಾಚ್ ದೆವಾಲಾಗಿಂ ಎಕ್ ಉಲವ್ಣ್ಯಾ
ರುಪಾರ್ ಸಭಾರ್ ಸವಾಲಾಂಕ್ ಆಮಿ ಜವಾಬಿ ಸೊಧುಂಕ್
ಪ್ರೇತನ್ ಕರ್ತಾಂವ್. ಅಸಲ್ಯಾ ’ವಿಚಿತ್ರ್’ ಚಿಂತ್ಪಾನ್ ಹಾವೆಂ
ಹೆಂ ಲೇಖನ್ ತಯಾರ್ ಕೆಲಾಂ, ಕರುಂಕ್ ಪ್ರೇತನ್
ಕರ್ತಾಂ. ಬರಂವ್ಚಾ ಹಾತಾಕ್ ವೊಳ್ ಯೆತಾನಾ, ಮತ್ ಖಂಯ್ಗೀ
ಪಾವ್ಲ್ಲ್ಯಾ ವೆಳಾರ್ ಲೇಖನ್ ವಾಟ್ ಚುಕೊನ್ ಪಯ್ಸ್
ಪಾವಾನಾ ಜಾಲ್ಯಾರ್ ಪುರೊ.
ಹಾಂವ್
ಸದಾಂ ದೆವಾಲಾಗಿಂ ಮಾಗ್ತಾಂ, ತಾಚಾಕೀ ಚಡ್ ಕಾಂಯ್ ನಾ.
ದೆಕುನ್ ತುಮಿ ಮ್ಹಾಕಾ ’ವಿಚಿತ್ರ್ ಕ್ರೀಸ್ತಾಂವ್’ ಮ್ಹಳ್ಯಾರ್ಯ್ ಕಾಂಯ್
ಬೆಜಾರ್ ನಾ.
ತುಮ್ಕಾಂ ದೇವ್ ಬರೆಂ ಕರುಂ,
- ಜೆಮ್ಮಾ ಪಡೀಲ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
