ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ತವಳ್ತವಳ್
ಹೆಂ ವಾರ್ಜಿಕ್ ಹರ್ಶೆಂಚೆಂ, ಕಾಲ್ಚೆಂ, ಆಯ್ಚೆಂ, ಫಾಲ್ಯಾಂಚೆಂ, ತವಳ್ತವಳ್ ಮತಿಚಾ ಪಡ್ದ್ಯಾಚೆರ್
ಖಂಚೊನ್ ಯೆಂವ್ಚೆಂ ಲಿಸಾಂವ್, ಬೆಸಾಂವ್ ಯಾ ತೆಸಾಂವ್...
ತವಳ್ತವಳ್ - 1 . ಉದಾಕ್
ಮೆಲ್ವಿನ್ ಜೆ. ವಾಸ್
ಕುವೇಯ್ಟಾಂತ್ ಎಕಾ ದಿಸಾ, ಮೈಕ್ ಹಾತಿಂ ಘೆವ್ನ್, ಕ್ಯಾಮೆರಾ ಖಾಂದಾರ್ ಬಸೊವ್ನ್ ಜರ್ ತರ್ ಹಾಂವ್ ಹಾಂಗಾಚಾ ಕಾಥೆದ್ರಾಲಾ ಮುಖಾರ್ ರಾವೊನ್ ಉದ್ಕಾಚಾ ಮಹತ್ವಾ ವಿಶಿಂ ತುಜಿ ಅಭಿಪ್ರಾಯ್ ಕಿತೆಂ ಮ್ಹಣೊನ್ ಕಾಥೆದ್ರಲಾಚಾ ಗೇಟಿ ಥಾವ್ನ್ ಭಾಯ್ರ್ ಯೆಂವ್ಚ್ಯಾ ಎಕೆಕ್ಲ್ಯಾಕ್ಚ್ಚ್ ವಿಚಾರ್ಲ್ಯಾರ್ ಬಹುಶಃ ಥೊಡ್ಯಾಂಚಾ ಜಿಬೆರ್ ಕಾಂಯ್ ಜವಾಬ್ ಆಸ್ಚಿ ನಾಂ. ಥೊಡಿಂ ಭೆಷ್ಟೆಂ ಹಾಸೊನ್ ಆಪ್ಲ್ಯಾ ಕಪಾಲಾರ್ ಗಳ್ಚ್ಯಾ ಕೆಸಾಂಕ್ ಪಾಟಿಂ ಕರ್ತೆಲಿಂ. ಆನಿಕ್ ಥೊಡಿಂ ಗರ್ಜೆ ಬಾಯ್ಲ್ಯೊ ಜಾಪಿಯೀ ದಿತೆಲಿಂ.
ಜರ್ತರ್ ಹೆಂ ಸವಾಲ್ ಮ್ಹಜ್ಯಾ ಮೊಗಾಳ್ ಇಷ್ಟಾ ತುಕಾಚ್ ವಿಚಾರುಂ ತರ್? ಆಸೊಂ, ತುಜಿ ಜವಾಬ್ ತುಜ್ಯಾ ಮತಿಂತ್ ಎಕಾ ಕೊನ್ಶ್ಯಾಕ್ ದವರ್, ನಿಮಾಣೆಂ ಗರ್ಜ್ ಪಡ್ತೆಲಿ. ತುವೆಂ ಹ್ಯಾ ಉದ್ಕಾಕ್ ದಿಲ್ಲ್ಯಾ ಮಹತ್ವಾಚಿ ಝಳಕ್ ಖಂಡಿತ್ ದೊಳ್ಯಾಂ ಮುಖಾರ್ ಉಭಿ ಜಾತೆಲಿ.
"ಉದಾಕ್ ಆನಿಕ್ ಉದ್ಕಾಚೊ ಜಲ್ಮ್..." ಕಿತ್ಲೊ ನಿತಳ್... ಕಿತ್ಲೊ ನಿರ್ಮಳ್...! ಮ್ಹಜ್ಯಾ ತಸಲ್ಯಾಚಾ ಸ್ವಾರ್ಥಾ ಖಾತಿರ್ ಮ್ಹಜೆಂ ಮ್ಹೆಳೆಂ ಧುವ್ನ್ ಉಡಂವ್ಚ್ಯಾ ಖಾತಿರ್ ಹಾವೆಂ ಮೆಳಂವ್ಚೆ ಉದಾಕ್ ಬಹುಶ: ಮ್ಹಜ್ಯಾ ಚಿಂತ್ಪಾ ಪರ್ಮಾಣೆ ಉದಾಕ್ ಮ್ಹಜಿ ಗರ್ಜೆ ಸಂಗಿಂ ಮ್ಹಜೆಂ ಸ್ವಾರ್ಥ್....! ನಿತಳ್ ಝರಿ ಥಾವ್ನ್ ವಾಳೊನ್ ಯೆಂವ್ಚೆ ಉದಾಕ್ ನಿಜಾಯ್ಕಿಯೀ ಸರ್ಗಾ ವಯ್ಲೆಂ ದೆಂವೊನ್ ಆಯಿಲ್ಲೆಂ ಮಾನ್ನಾಂ. ಹ್ಯಾ ನಿತಳಾಯೆಕ್ ಹಾಂವೆಂ ಕರ್ಚೆಂ ಮ್ಹೆಳೆಂ....! ಹ್ಯಾ ಮ್ಹೆಳ್ಯಾ ಆನಿ ನಿತಳಾಯೆ ಪಾಟ್ಲ್ಯಾನ್ ಚಿಂತುಂಕ್ ಗೆಲ್ಯಾರ್ ಸಬಾರ್ ಅರ್ಥ್ ಆಸಾತ್. ಸಬಾರ್ ಥರಾಂಚ್ಯೊ ಇಮಾಜ್ಯೊ ಉಬ್ಯೊ ಜಾತಾತ್, ತಾಚೆಸವೆಂ ಸಬಾರ್ ಸವಾಲಾಂಯ್ ಉಬಿಂ ಜಾತಾತ್.
ನಿತಳಾಯೆಚಿ ರುಜ್ವಾತ್ಚ್ ಉದಾಕ್, ಜಾಂವ್ ತೆಂ ಎಜಿಪ್ತಾ ಥಾವ್ನ್ ಬಾಸಾಯಿಲ್ಲ್ಯಾ ಗಾಂವಾಕ್ ದೆವಾಚಿ ಪರ್ಜಾ ಪಾಟಿಂ ಯೆತಾನಾ ರಾನಾಂತ್ ವ್ಹಾಳ್ಲ್ಲೆಂ, ಜಾಂವ್ ತೆಂ ಸ್ನಾನಿಕ್ ಜುಂವಾವ್ನ್ ಪಾತ್ಕ್ಯಾಂಕ್ ಬುಡವ್ನ್ ಕಾಡ್ಲ್ಲೆಂ, ಜಾಂವ್ ತೆಂ ಖುದ್ಧ್ ಸರ್ಗಾ ಸಂಸಾರಾಚಾ ಧನಿಯಾಕ್ ಜೆಜು ಕ್ರಿಸ್ತಾಕ್ಚ್ ನವ್ಯಾನ್ ನಿತಳ್ ಕೆಲ್ಲೆಂ, ಜಾಂವ್ ತೆಂ ಹರ್ಯೆಕಾ ಜಲ್ಮಾಲ್ಲ್ಯಾ ನವ್ಯಾ ಜಿವಾಕ್ ಕ್ರಿಸ್ತಾಕ್ ಸಾಕ್ಸ್ ಕರಂವ್ಚೆ...! ಉದಾಕ್ಚ್ ತೆಂ...!!! ಬಿಲ್ಕುಲ್ ನಿತಳ್ ಉದಾಕ್....!!!
ನ್ಹೆಸೊಂಕ್ ವಸ್ತುರ್ ನಾತ್ಲೆಲ್ಯಾಕ್ ವಸ್ತುರಾಚೆಂ ಮೋಲ್ ಕಿತೆಂ ತೆಂ ಕಳ್ತಾ, ತಶೆಂ ತಾನೆಲ್ಲ್ಯಾಕ್ ಮಾತ್ರ್ ಉದ್ಕಾಚೊ ಮಹತ್ವ್ ಕಳ್ತಾ. ತಾನ್ ತಿ ಕಸಲಿಯ್ ಜಾಂವ್ದಿ, ಪೂಣ್ ತಿ ತಾನ್ ಬಾಗಂವ್ಚ್ಯಾ ಹರ್ಯೆಕಾ ರೂಪಾನಿಂ ಉದ್ಕಾಚೊ ಥೆಂಬೊ ಖಂಡಿತ್ ಆಸಾ. ಜಾಂವ್ ತೊ ಗೊಡ್ಸೊ, ಜಾಂವ್ ತೊ ಮಿಟಾಚೊ, ಜಾಂವ್ ತೊ ರಗ್ತಾಚೊ...! ಹೆಂ ಕೋಣ್ ಚಿಂತುಂಕ್ ವೆತಾ. ಆಪ್ಣಾಚಿ ತಾನ್ ಬಾಗ್ಲಿ ಮ್ಹಳ್ಯಾರ್ ಕಾಮ್ ಜಾಲೆಂ, ವಯ್ಜ್ ಮೆಲೊ. ಪೂಣ್ ಹ್ಯಾ ವಯ್ಜಾಚಾ ಪಾಟ್ಲೆಂ ಉದಾಕ್, ತ್ಯಾ ಉದ್ಕಾಚಿ ಬೋಬ್ ಕೊಣಾಯ್ಕ್ ಆಯ್ಕಾತಾ? ಯಾ ಕೊಣೀ ಆಯ್ಕೊಂಕ್ ಖುಶಿ ವ್ಹರ್ತಾ? ಕೋಣ್ಂಚ್ ನಾ...!
ಕುವೇಯ್ಟಾಂತ್ ಹಾಂವ್ ಕಾಂಯ್ ನವೊ ನಹಿಂ, ಮನ್ಶ್ಯಾನ್ ಜಿಯೆಂವ್ಚೆ ಪರಿಂ ಜಿಯೆಂವ್ಚೊ ಹಾಂವ್. ಪೂಣ್ ತಾನ್ ಬಾಗಾಯಿಲ್ಲ್ಯಾ ಉದ್ಕಾಕ್ ವಿಸ್ರೊನ್ ವೆಚೊ ನಹಿಂ ತಸಲೊ. ಕಿತ್ಯಾಕ್ಗೀ ಹ್ಯಾ ಉದ್ಕಾಚಿ ಬೋಬ್ ಮ್ಹಾಕಾ ತ್ಯಾ ಕಾಥೆದ್ರಲಾ ತೆಂವ್ಶಿಲ್ಯಾನ್ ವೆತಾನಾ ಚಡ್ಚ್ ಆಯ್ಕೊಂಕ್ ಯೆತಾಲಿ. ಬಹುಶಃ ಸಬಾರಾಂನಿ ದೊಳೆ ದಾಂಪ್ಲ್ಲ್ಯಾ ಪರಿಂ ಹಾವೆಂಯ್ ದೊಳೆ ದಾಂಪುಂಕ್ ಪ್ರಯತ್ನ್ ಕೆಲ್ಲೆಂ, ಪೂಣ್ ಜಾಯ್ನಾಂ, ಕಿತ್ಯಾಕ್...?
ಆಜ್ ಮ್ಹಾಕಾ ಹೆಂ ಉದಾಕ್ ರಗ್ತಾಚ್ಯಾ ಥೆಂಬ್ಯಾ ಪರಿಂ ದಿಸೊನ್ ಮ್ಹಜ್ಯಾ ಕಾನಾಂತ್ ಬೋಬ್ ಮಾರ್ತಾ ತಶೆಂ ದಿಸ್ತಾ. ಉದಾಕ್ ಕಿತ್ಯಾಕ್ ಬೋಬ್ ಮಾರ್ತಾ? ತೆಂಯ್ ಕಾಥೆದ್ರಾಲಾ ಭಂವ್ತಿ? ಸಗ್ಳ್ಯಾ ಕುವೇಯ್ಟಾಕ್ ಪೈಪಾಂನಿ ವಾಳೊನ್ ವೆಚಾ ಉದ್ಕಾಪರಿಂ ಹಾಂಗಾ ಕಾಥೆದ್ರಾಲಾಚಾ ಪೈಪಾನಿಂಯ್ ಉದಾಕ್ ವಾಳ್ತಾ. ಹೆಂ ಖಂಡಿತ್ ಸೊಂಪೆಂ. ಹಾಂಗಾಚ್ಯಾ ರಸ್ತ್ಯಾಂನಿ ರಸ್ತೆ ಧುಂವ್ಕ್ಯಿ ನೆಣಾರಿ ಉದ್ಕಾಕ್ ವಾಳಯ್ತಾತ್. ಹಾಂಗಾಚಾ ಕುಜ್ನಾಂನಿ ವಾಳ್ಚೆಂ ಉದಾಕ್ ಬಹುಶಃ ಆಮ್ಚಾಚ್ ಥೊಡ್ಯಾ ಗಾಂವಾನಿಂ ವಾಳ್ಲ್ಲೆಂ ತರ್ ಸಬಾರ್ ಜಣಾಂ ಹಫ್ತ್ಯಾಕ್ ಏಕ್ ಪಾವ್ಟಿಂ ತರೀಯ್ ನ್ಹಾವ್ನ್ ನಿತಳ್ ಉರ್ತಿಂ. ಹಾಂಗಾಚಿ ಜಲಾಂ ಧುಂವ್ಕ್ ವಾಪಾರ್ಲೆಂ ಉದಾಕ್ ಬಹುಶಃ ಆಮ್ಚಾ ಥೊಡ್ಯಾ ಶೆತಾಂನಿ ವಾಳಯಿಲ್ಲೆಂ ತರ್ ಕಿತ್ಲೆಶ್ಯಾ ಲೊಕಾಂಚಿ ಭುಖ್ ಥಾಂಬ್ತಿ. ಪೂಣ್ ಭುಖೆಚಿ ಆನಿ ತಾನೆಚಿ ಬೋಬ್ ಹ್ಯಾ ಗಾಂವಾಂತ್ ಆಯ್ಕಾತಾ ತರೀಯ್ ಕೋಣ್? ಹಾಕಾ ಕಾರಣ್ ಸೊದುಂಕ್ಯಿ ಖಜುರಾಚಾ ಮಾಡಾಕ್ ಚಡ್ಚಿ ಗರ್ಜ್ ಆಸಾ ಮ್ಹಣ್ ಮ್ಹಾಕಾ ದಿಸಾನಾ.
ಪೂಣ್ ಕಾಥೆದ್ರಲಾಚಾ ಗೇಟಿ ಮುಖಾರ್ ಆಯ್ಕೊಂಚ್ಯಾ ಬೊಬೆಕ್ ಕಾರಾಣ್ ಸೊದ್ಚಿ ಖಂಡಿತ್ ಗರ್ಜ್ ಆಸಾ?
ಬಹುಶಃ ತಿ ಗರ್ಜ್ ನಾ ಮ್ಹಣೊನ್ ಕೊಣಾಯ್ಕಿಯ್ ಭೊಗ್ತಾ ತರ್ ತಾಂತುಂ ತಾಂಚಿ ಕಾಂಯ್ ಚೂಕ್ ನಾ. ತಶೆಂಚ್ ಹಾಚಿ ಖಂಡಿತ್ ಗರ್ಜ್ ಆಸಾ ಮ್ಹಣೊನ್ ಹಾಂವ್ ತಾಳೊ ಪಿಂದುನ್ ತರ್ ಬೊಬಾಟ್ಲೊಂ... ಮ್ಹಜಿ ನೀತ್ ಕರ್ತಲೊ ಕೋಣ್ ತೊ ಮ್ಹಾಕಾ ಕಳಿತ್ ನಾ.
ಜೀವ್ ದಿಂವ್ಚೆ ಉದಾಕ್ ಸಾಂಬಾಳ್ಯಾಂ...! ಉಜ್ವಾಡ್ ದಿಂವ್ಚಿ ವೀಜ್ ಸಕತ್ ಸಾಂಬಾಳ್ಯಾಂ....! ಹರ್ಯೆಕಾ ದೇಶಾಂತ್ಯಿ ಪಳೆಂವ್ಕ್ ಮೆಳ್ಚೆಂ ಇಸ್ತಿಹಾರ್ ಹೆಂ ಹ್ಯಾ ಹಾಂವೆ ವಸ್ತಿ ಕರ್ಚ್ಯಾ ಗಾಂವಾಂತ್ಯೀ ದಿಸೊನ್ ಯೆತಾ ತಾಚ್ಯಾ ಪುರ್ಸತೆ ಪರ್ಮಾಣೆಂ. ಉದ್ಕಾಕ್ ಆನಿ ಉಜ್ವಾಡಾಕ್ ಸಂಬಂಧ್ ಕಾಂಯ್ ನವೊ ನಹಿಂ. ಉದ್ಕಾ ಥಾವ್ನ್ ಉಜ್ವಾಡ್ ಆನಿ ಉಜ್ವಾಡಾ ಥಾವ್ನ್ ಉದಾಕ್....!
ಆತ್ಮಿಕ್ ರಿತಿನ್ ಯಾ ಸಾಮಾಜಿಕ್ ರಿತಿನ್ ಆಮಿಂ ಪಳೆಂವ್ಕ್ ಸಕ್ಲ್ಯಾರ್ ಹೊ ಸಂಬಂಧ್ ಕಿತ್ಲೊ ಗೂಂಡ್ ಆಸಾ ತೆಂ ಖಂಡಿತ್ ಕಳ್ತಾ. ಪೂಣ್ ಆಯ್ಚಾ ಬದ್ಲಾಪಣಾಚೆಂ ನ್ಹೆಸಾಣ್ ನ್ಹೆಸ್ಲ್ಲ್ಯಾ ಮ್ಹನ್ಶ್ಯಾಲಾಗಿಂ ಹ್ಯಾ ಸಂಬಂಧಾಕ್ ಪಳೆಂವ್ಕ್ ವೇಳ್ ನಾ. ಹ್ಯಾಚ್ ಖಾತಿರ್ ದಿಸ್ತಾ ಮ್ಹನ್ಶ್ಯಾ ಮ್ಹನ್ಶ್ಯಾ ಮಧ್ಲೊ ಸಂಬಂಧ್ಯೀ ಉಣೊ ಜಾವ್ನ್ ಆಜ್ಕಾಲ್ ರಗ್ತಾ ಸಂಬಂಧಾಚೊ ಪರ್ಮಳ್ಯೀ ಮಾಯಾಗ್ ಜಾವ್ನ್ ಯೆತಾ.
ತರ್ ಹೆಂಯ್ ಏಕ್ ಕಾರಣ್ ಜಾವ್ಯೆತ್.... ಕಾಥೆದ್ರಾಲಾಚಾ ಮುಖಾರ್ ಮ್ಹಾಕಾ ಆಯ್ಕಾಲ್ಲಿ ಬೋಬ್ ಪೆಲ್ಯಾಕ್ ಆಯ್ಕೊಂಕ್ ಯೇಂವ್ಕ್ ನಾ ಜಾಂವ್ಕ್? ಹೆಂ ಕಸಲೆಂ ಜಿವಿತ್? ಅಕ್ಲಾಸಾಚಿ ಬೋಬ್ ಆಯ್ಕೊಂಕ್ ಸಕಾನಾಸ್ಲೆಲೆಂ
ಹೆಂ ಕಸಲೆಂ ಜಿವಿತ್? ಹೆಂ ಕಸಲೆಂ ಸೈಂಭ್? ಹೆಂ ಕಸಲೆಂ ಮ್ಹನ್ಶ್ಯಾಪಣ್? ಹೊ ಕಸಲೊ ಧರ್ಮ್? ಹಿ ಕಸಲಿ ಜಾತ್?
ವ್ಹಯ್, ಆಶೆಕ್ ತಾಚೊಚ್ ಏಕ್ ಸಂಸಾರ್ ಆಸಾ. ತಾಚ್ಯಾ ಸಂಸಾರಾ ಭಾಯ್ರ್ ತೊ ನಿರಾಶಾ ಜಾವ್ನ್ ಬದ್ಲಾತಾ. ದೆಕುನ್ಂಚ್ ವಯ್ಲ್ಯಾ ಜಾತಿಚೆ ಮನಿಸ್ ರಂಗೀನ್ ಮ್ಹಳ್ಯಾರ್ ಪ್ಯಾರಿಟಸಿಚಾ ಸಂಸಾರಾಂತ್ ಜಿಯೆತಾತ್. ಜಶೆಂ ಮಾಜಾರ್ ದೊಳೆ ದಾಂಪುನ್ ದೂದ್ ಪಿಯೆತಾ. ಜಿವಿತಾಚಾ ವರ್ತುಲಾ ಭಿತರ್ ಯೆಂವ್ಚಿಂ ವಯ್ಲಿಂ ಸಗ್ಳಿಂ ಜಿವಿತಾಚಿಂ ಸವಾಲಾಂ ಜಾಪಿಕ್ ಉಡ್ಡಾಲ್ಯಾರ್ ಭೋವ್ ತಾನೆನ್ ಉದ್ಕಾಕ್ ಆಶೆವ್ನ್ ಆಸಾತ್ ತರ್....?
ಜಿವಿತ್ ಆನಿ ಉದಾಕ್....! ಎಕಾಚ್ ದೊಳ್ಯಾಂತ್ಲೆ ದೋನ್ ರಂಗ್. ಹಾಚೊ ಸಂಬಂಧ್ ಬಹುಶಃ ತುಟಂವ್ಕ್ ಸಾಧ್ಯ್ ನಾತ್ಲ್ಲೊ. ಜಿವಿತ್ ಉದ್ಕಾ ಥಾವ್ನ್ ಆನಿಕ್ ಉದಾಕ್ ಜಿವಿತಾ ಥಾವ್ನ್...! ಜಿವಿತಾವಿಣೆಂ ಉದಾಕ್ ನಾಂ, ಉದ್ಕಾವಿಣೆಂ ಜಿವಿತ್ ನಾಂ...!!
ತರ್ ಹ್ಯಾಚ್ಚ್ ಉದ್ಕಾ ಥಾವ್ನ್ ಜಿವಿತ್ ಘೆವ್ನ್ ಆಯ್ಲೆಲೆ ಆಜ್ ಕುಡ್ಡೆ ಕಿತ್ಯಾಕ್ ಜಾಲ್ಯಾತ್? ಹ್ಯಾಚ್ ಜಿವಿತಾ ಉದ್ಕಾಕ್ ಪಾಯಾಂ ಪಂದಾ ಕಿತ್ಯಾಕ್ ಮ್ಹಸ್ತಿತಾತ್?
ಉಗ್ಡಾಸ್ ದವರ್ ಮ್ಹನ್ಶ್ಯಾ, ರಗ್ತಾಚೆ ಥೆಂಬೆ ತೆ. ರಗಾತ್ ಮ್ಹಳ್ಯಾರ್ ಜೀವ್. ತುವೆಂ ಉರಂವ್ಚ್ಯಾ ಹರ್ಯೆಕಾ ರಗ್ತಾ ಥೆಂಬ್ಯಾಂತ್ ಜೀವ್ ಆಸಾ. ತುವೆಂ ವಾರಯಿಲ್ಲ್ಯಾ ಥೆಂಬ್ಯಾಚೆಂ ಮೋಲ್ ತುವೆಂ ಖಂಡಿತ್ ದೀಂವ್ಕ್ ಆಸಾ. ತುಜೆ ಕಾನ್ ಉಗ್ತೆ ಕರ್ ಆನಿಕ್ ವಳೂ ಆಯ್ಕ್ ತ್ಯಾ ರಗ್ತಾ ಥೆಂಬ್ಯಾಚಿ ಪಿಂರ್ಗೊಣಿ ತುಜ್ಯಾ ರಾವ್ಳೆರಾಂತ್ಯೀ ತುಕಾ ಆಯ್ಕಾತೆಲಿ.
ನಿದೆಕ್ ರಾವ್ಳೆರ್ ಗರ್ಜ್ ನಹಿಂ, ರಾವ್ಳೆರಾಕ್ ನೀದ್ ಗರ್ಜ್ಚಿ...!
ಪಾಯಾಂಪಂದಾ ಮಸ್ತಿಲ್ಲೆಂ ತೆಂ ಉದಾಕ್ ಆಜ್ ದರ್ಯಾಕ್ ಹಾಲಂವ್ಕ್ ಲಾಗ್ಲಾಂ. ಉದ್ಕಾಚೊ ಸಾಗೊರ್ ತೊ ಉಚಾಂಬಳ್ ಜಾವ್ನ್ ತೊ ಆಜ್ ಕ್ರಾಂತಿಕ್ ದೆವ್ಲಾ. ತೊ ರಗಾತ್ ವ್ಹಾರಾಯ್ನಾ, ಉದ್ಕಾ ಥೆಂಬ್ಯಾಂಕ್ ಪಾಯಾಂನಿ ಮಸ್ತಿನಾ, ಬಗಾರ್ ಪಾತ್ಕಾಂಕ್ ಖಾಡುಂ ವೊಡ್ತಾ. ಕಿತ್ಲೆಂ ನಿತಳ್ ಉದಾಕ್...! ಆಪ್ಲ್ಯಾ ಕ್ರಾಂತಿಂತ್ಯೀ ಆಪ್ಲ್ಯಾ ಫಾರಿಕ್ಪಣಾಂತ್ಯೀ ಜಿವಿತಾಚೆಂ ದೆಣೆಂ ಹ್ಯಾ ಉದ್ಕಾ ಶಿವಾಯ್ ಕೋಣ್ ದೀಂವ್ಕ್ ಸಕ್ತಾ?
ಏಕ್ ತೊ ಪಾತ್ಕಾಕ್ ಖಾಡುಂ ಘಾಲ್ಲೊ ಕ್ರೀಸ್ತ್, ಉಮ್ಕಾಳ್ಲ್ಲೊ ತುಜ್ಯೆ ಮ್ಹಜ್ಯೆ ಖಾತಿರ್ ತ್ಯಾ ಖುರ್ಸಾರ್. ಆನಿಕ್ ತ್ಯಾ ಖುರ್ಸಾ ಥಾವ್ನ್ ವಾಳೊನ್ ಆಯಿಲ್ಲಿ ಜಿವ್ಯಾ ಉದ್ಕಾಚಿ ಝರ್. ಹಿಚ್ಚ್ ಝರ್ ಆಜ್ ಪಾಟ್ಲ್ಯಾ ತ್ಯಾ ಕಾಥೆದ್ರಲಾಚಾ ದಾರಾರ್. ನಿತ್ಳಾಂವ್ಕ್ ತುಕಾ ಆನಿಕ್ ಮ್ಹಾಕಾ ಬೊಸೊನ್ ಆಸಾ ತಿ ತ್ಯಾ ದಾರಾಚಾ ಕೊನ್ಶ್ಯಾರ್....! ತ್ಯಾ ಪವಿತ್ರ್ ತಾಂಬ್ಲೆರಾಂತ್...!!!
ಮೊಲಾಧಿಕ್ ಸುಗಂಧ್ ತೆಲಾಂಚಿ ಗರ್ಜ್ ಕುಡಿಕ್ ಮಾತ್ರ್. ಅತ್ಮ್ಯಾಕ್ ನಿತಳಾಯೆಚಾ ಉದ್ಕಾಚಿ ಗರ್ಜ್. ಉದ್ಕಾಕ್ ನಿತಳ್ ಅತ್ಮ್ಯಾಚಿ ನಹಿಂ. ಅತ್ಮ್ಯಾಕ್ ತುಜ್ಯಾ ಪಯ್ಲೆಂ ನಿತಳ್ ದವರ್ ಉಪ್ರಾಂತ್ ಜೊರ್ಡಾನ್ ನ್ಹಂಯ್ತ್ ಉಡ್ಕಿ ಮಾರ್.
ಕೂಡ್ ಭರ್ ಮ್ಹೆಳೆಂ ಘೆವ್ನ್ ತ್ಯಾ ತಾಂಬ್ಲೆರಾಂತ್ಲ್ಯಾ ಉದ್ಕಾಕ್ ಹಾತ್ ಘಾಲುನ್, ಸಗ್ಳ್ಯಾ ಕಪಾಲಾರ್ ವೊಡುನ್ ಜಾಂವ್ಚೆಂ ಕಾಂಯ್ ನಾಂ. ತಿ ಏಕ್ ದಾಖವ್ಣ್ ಮಾತ್ರ್. ತುಂ ದಾಖವ್ಣೆ ಖಾತಿರ್ ಕರ್ತಾಯ್ ತರ್ ಕರ್, ಪೂಣ್ ತ್ಯಾ ಥೆಂಬ್ಯಾಂಕ್ ತುಜ್ಯಾ ಹಾತಾ ಥಾವ್ನ್ ಸಕಯ್ಲ್ ಗಳಯ್ನಾಕಾ. ತುಜ್ಯಾ ಹಾತಾ ಥಾವ್ನ್ ದೆಂವ್ಲ್ಲೊ ಥೆಂಬೊ ಹಜಾರಾಂಚಾ ಪಾಂಯಾ ಪಂದಾ ಚಿರ್ಡೊನ್ ಉರ್ಡೊನ್ ಮುಡ್ಡಾತಾ. ಉಗ್ಡಾನ್ ದವರ್ ಉದ್ಕಾಚಾ ರೂಪಾರ್ ಆಸ್ಚೆಂ ರಗಾತ್ ತೆಂ....! ರಗಾತ್ ತೆಂ ಕ್ರಿಸ್ತಾಚೆಂ...!!! ರಗಾತ್ ತೆಂ ಜಿವಾಕ್ ಜೀವ್ ದಿಂವ್ಚೆಂ....!!!
ಜೀವಾಕ್ ಜೀವ್ ದಿಂವ್ಚಾ ಉದ್ಕಾಂತ್ ಪಯ್ಶೆ ಗಳಯ್ನಾಕಾ. ಪಯ್ಶೆ ತೆ ರಾಯಾಚೆ. ರಾಯಾಚೆಂ ರಾಯಾಕ್ ದೀ, ದೆವಾಚೆಂ ಮಾತ್ರ್ ದೆವಾಕ್ ದೀ. ಜೀವ್ ದಿಂವ್ಚ್ಯಾ ಉದ್ಕಾ ವಯ್ರ್ ಪಾತ್ಯೆಣೆಚಿ ಏಕ್ ದೀಶ್ಟ್ ಸಗ್ಳ್ಯಾ ತುಜ್ಯಾ ಕುಡಿಕ್ ಜೀವ್ ದೀಂವ್ಕ್ ಸಾಸ್ಣಾಚಾ ಸಾಸ್ಣಾಕ್ ಪುರೊ. ತರ್ ಅಸಲೆಂ ಫಿತಿಸ್ಪಣ್ ಅಸಲೆ ಆಚಾರ್ ಕಿತ್ಯಾಕ್?
ಖುರ್ಸಾಚಾ ಮುಳಾಂ ಥಾವ್ನ್ ವಾಳೊನ್ ಆಯಿಲ್ಲ್ಯಾ ಉದ್ಕಾಕ್ ಖುರ್ಸಾಚೊ ಮಾನ್ ಫಾವೊ ಜಾಂವ್ದಿ. ಖುರ್ಸಾಕ್ ವಳ್ಕಾನಾತ್ಲ್ಲ್ಯಾಂಚಾ ಕಪಾಲಾರ್ ತೆಂ ವಾಳೊನ್ ವಚೊಂದಿ ಆನಿಕ್ ಸಂಸಾರಾಚಾ ಕೊನ್ಶ್ಯಾ ಕೊನ್ಶ್ಯಾಕ್ ಪಾವೊಂದಿ.
ಬಹುಶಃ ಆಜ್ ಮ್ಹಜ್ಯಾ ರಾವ್ಳೆರಾಕ್ ಸಮಾಧಾನೆಚಿ ನೀದ್ ಪಡ್ತೆಲಿ. ಆಜ್ ಮ್ಹಜೆಂ ಹಾಂವೆಂ ವಳ್ಕಾಲ್ಲೆಂ ಪಾತಕ್ ಆಯ್ಕಾಲ್ಲೊ ಸಮೇಸ್ತ್ ತ್ಯಾ ಕಾಥೆದ್ರಲಾಚಾ ತಾಂಬ್ಲೆರಾಂತ್ಲ್ಯಾ ಪವಿತ್ರ್ ಉದ್ಕಾಕ್ ಮಾನ್ ದೀವ್ನ್ ತ್ಯಾ ಧರ್ಣಿರ್ ಗಳ್ಚ್ಯಾ ಥೆಂಬ್ಯಾಂಕ್ ವಾಂಚಂವ್ಕ್ ಸಕ್ತಾ ತರ್ ಕಾಥೆದ್ರಲಾಚಾ ಗೇಟಿ ಮುಖಾರ್ ತ್ಯಾ ಉದ್ಕಾ ಥೆಂಬ್ಯಾಚಿಂ ಬೋಬ್ ಸಾಸ್ಣಾಚಾ ಸಾಸ್ಣಾಕ್ ಶಾಂತ್ ಜಾತೆಲಿ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
