ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಎಡ್ವಿನ್ ಜೆ. ಎಫ್. ಡಿ’ಸೋಜ್ ಹಾಚಾ ’ಟೂರಿಸ್ಟ್ ಸೈಕಲ್’ ಅಂಕಣಾಕ್ ಭೆಟ್ ದಿಯಾ.
ಚಿಂತ್ನೆನ್ ಸಬ್ಧಾನ್ ಆನಿ ಬರ್ಪಾನ್[ಕೊಂಕ್ಣೆಂತ್
ವಿಚಾರಾಂಚೆಂ ವ್ಹಾದಾಳ್ ಉಟಯಿಲ್ಲೆಂ ಅನ್ಯೇಕ್ ಫಾಮಾದ್ ಅಂಕಣ್ ’ಚಿಂತ್ನೆನ್, ಸಬ್ಧಾನ್ ಆನಿ ಬರ್ಪಾನ್’ ಕೊಂಕ್ಣೆಂತ್ಲ್ಯಾ ಸಾಹಿತ್ಯ್ ಚಕ್ರವರ್ತಿ ಎಡ್ವಿನ್ ಜೆ. ಎಫ್. ಡಿ’ಸೋಜ್ ಹಾಚಾ ಭಳ್ವಂತ್ ಲಿಖ್ಣೆಥಾವ್ನ್ ಪರತ್ ದಾಯ್ಜ್ ವಾಚ್ಪ್ಯಾಂ ಖಾತಿರ್. ದಾಯ್ಜ್.ಕೊಮ್ಚೆರ್ ಎದೊಳ್ಚ್ ಭೋವ್ ಫಾಮಾದ್ ಜಾಲ್ಲ್ಯಾ ’ಟೂರಿಸ್ಟ್ ಸೈಕಲ್’ ಅಂಕಣಾ ಉಪ್ರಾಂತ್ ಜಾಯ್ತ್ಯಾಂನಿ ಎಡ್ವಿನಾಚಾ ಅಂಕಣಾಕ್ ಶಾಭಾಸ್ಗಿ ಪಾಟಾಯಿಲ್ಲಿ ಆನಿ ಎಡ್ವಿನಾಚೆಂ ಅಂಕಣ್ ಚಾಲು ದವರುಂಕ್ ವಿನತಿ ಕೆಲ್ಲಿ. ಸರ್ವ್ ವಾಚ್ಪ್ಯಾಂಕ್ ದೇವ್ ಬರೆಂ ಕರುಂ]
1. ಕೋಣ್ ತರಿ, ಆಮ್ಕಾ೦ ಬರವ್ಪಿ ಕರಿ
ಎಡ್ವಿನ್ ಜೆ.ಎಫ್.
ಹಾ೦ವೆ೦ ಹೆ೦ ಅ೦ಕಣ್ ಖಾಸ್ ಕರುನ್ ಬರವ್ಪಿ/ಲೇಕಕ್ ಜಾ೦ವ್ಕ್ ಆ೦ವ್ಡೆತೆಲ್ಯಾ೦ ಖಾತಿರ್ ಲಿಕ್ಲಾ೦. ಹಾ೦ತು೦ ಮ್ಹಜೊ ಉಣೆ ಪುಣ್ ಹಾ೦ವೆ೦ ವಾಚ್ಲ್ಲ್ಯಾ, ಮ್ಹಾಕಾ ಪ್ರಚೋದಿತ್ ಕೆಲ್ಲ್ಯಾ ಸಾಹಿತಾಚೊ ರಸ್-ರವಿಸಾ೦ಚೊ ಉಲ್ಲೇಕ್ ಚಡ್ ಆಸಾ.
ಬರ೦ವ್ಚ್ಯಾ೦ತ್ ಅಕ೦ಡ್ ಹುಮೆದ್ ಆಸ್ಲ್ಲ್ಯಾ೦ಖಾತಿರ್ ಆಮಿ೦ ಸಬಾರ್ ಶಿಬಿರಾ೦, ತರ್ಬೆತಿಶಾಳಾ೦ ಚಲಯ್ಲ್ಯಾ೦ತ್ ಪುಣ್ ತಿ೦ ಕಿತ್ಲಿ೦ ಯಶಸ್ವಿ ಜಾಲ್ಯಾ೦ತ್ ತೆ೦ ಆಮಿ೦ ನೆಣಾ೦ವ್. ಆಮಿ೦ ಇತ್ಲೆ೦ ಮಾತ್ರ್ ಸಾ೦ಗೊ೦ಕ್ ಸಕ್ತಾ೦ವ್ ಕಿ ಹರ್ಯೆಕಾ ಶಿಬಿರಾ೦ತ್ ಯಾ ಕಾಮಾಶಾಳೆ೦ತ್ ಆಮಿ೦ ಎಕಚ್ಚ್ ಮಾಗ್ಣೆ೦ ಆಯ್ಕಾತಾ೦ವ್: ಕೋಣ್ ತರಿ, ಆಮ್ಕಾ೦ ಬರವ್ಪಿ ಕರಿ.
ಹೆ೦ ಮಾಗ್ಣೆ೦ ಆಯ್ಕಾತಾನಾ ಬರೆ೦ ಲಾಗ್ತಾ, ಕೊ೦ಕಣಿ ಥ೦ಯ್ ತುಮ್ಕಾ೦ ಆಸ್ಲ್ಲ್ಯಾ ವೊಡ್ಣೆಚಿ ಝಳಕ್ ದಾಕಯ್ತಾ; ಪುಣ್ ಹಿ ಕಸಲ್ಯಾಯಿ ರಿತಿಚಿ ಸುರುವಾತ್ ನ್ಹಂಯ್. ಬರವ್ಪಿ/ಲೇಕಕ್ ಜಾ೦ವ್ಕ್ ಗರ್ಜ್ ಆಸಾ ಚಿ೦ತ್ಪಾಚಿ, ಉಪ್ರಾ೦ತ್ ಹ್ಯಾ ಚಿ೦ತ್ಪಾಕ್ ಸಬ್ದಾ೦ಚಿ ಆನಿ ನಿಮಾಣೆ ಬರ್ಪಾಚಿ.
ದೆಕುನ್೦ಚ್ ಹ್ಯಾ ಅ೦ಕಣಾಚೆ೦ ನಾ೦ವ್: ಚಿ೦ತ್ನೆನ್, ಸಬ್ದಾನ್ ಆನಿ ಬರ್ಪಾನ್ ಮ್ಹಣ್ ಹಾ೦ವೆ೦ ಥಿರಾಯ್ಲಾ೦.
ಇತ್ಲೆ೦ ಮ್ಹಣ್ತಾನಾ ತುಮಿ೦ ಹೆ೦ ಅ೦ಕಣ್ ಎಕ್ದಮ್ ತಾ೦ತ್ರಿಕ್ ಜಾವ್ನಾಸ್ತೆಲೆ೦ ಮ್ಹಣ್ ಕಾವ್ಜೆವ್ನ್ ವಾಚ್ಚೆ೦ ಸೊಡ್ಚೆ೦ ನಾಕಾ. ಹಾ೦ತು೦ ತಾ೦ತ್ರಿಕತಾ ಆಸಾ ಖರೆ೦ ಪುಣ್ ಬೋವ್ ಸರಳ್ ಆನಿ ಸೊ೦ಪ್ಯಾ ದಾಕ್ಲ್ಯಾ೦ನಿ (ಚಡ್ ಜಾವ್ನ್ ಕತಾ-ಲೇಕನಾ೦ಚೊ ತೀರ್ಲ್-ಸಾರ್) ರೆವ್ಡಾಲ್ಲಿ. ಜಶೆ೦ ಬರ೦ವ್ಚ್ಯಾ೦ತ್ ಹುಮೆದ್ ಆಸ್ಲ್ಲ್ಯಾ೦ಕ್ ಹೆ೦ ಪಸ೦ದ್ ಜಾತೆಲೆ೦ ತಶೆ೦ಚ್ ಫಕತ್ತ್ ಬರೆ ವಾಚ್ಪಿ ಉರೊ೦ಕ್ ಖುಶಿ ವರ್ತೆಲ್ಯಾ೦ಕಿ ಕಾ೦ಯ್ ಪುಣಿ ಸುಲುಸ್ ದಿತೆಲೆ ಮ್ಹಳ್ಳೊ ಮ್ಹಜೊ ಭರ್ವಸೊ.
ತರ್ ಆಮಿ೦ ಹಾ೦ಗಾಸರ್ ಸುರು ಕರ್ಯಾ೦:
ಮ್ಹಾಕಾ ಯೆದೊಳ್ ಭೆಟ್ಲ್ಲ್ಯಾ ಶಿಬಿರಾರ್ಥಿ೦ಲಾಗಿ೦ ಹಾ೦ವೆ೦ ವಿಚಾರ್ಲ್ಲೆ೦ ಆಸಾ, ‘ಜರಿ ತರಿ ತುಮ್ಕಾ೦ ಬರ೦ವ್ಚಿ ಹುಮೆದ್ ಆಸಾ ತರ್ ಬರಯಾ ಆನಿ ಸ೦ಪಾದಕಾ೦ಕ್ ಧಾಡಾ; ಉಪ್ರಾ೦ತ್ ಕಿತೆ೦ ಜಾತಾ ಪಳೊವ್ಯಾ೦.’ ಪುಣ್ ಚಡಾವತ್ ಹೆ೦ ಕರು೦ಕ್ ತಯಾರ್ನಾ೦ತ್. ‘ಆಮ್ಕಾ೦ ಕಾವ್ಜೆಣ್ ಬೊಗ್ತಾ,’ ತೆ ಮ್ಹಣ್ತಾತ್. ‘ಸ೦ಪಾದಕ್ ಆಮಿ೦ ಬರಯಿಲ್ಲೆ೦ ಖ೦ಡಿತ್ ಕಚ್ರ್ಯಾಚ್ಯಾ ಡಬ್ಬ್ಯಾಕ್ ಗಾಲ್ತೊಲೊ. ಅಶೆ೦ ಸಬಾರ್ ಪಾವ್ಟಿ೦ ಜಾಲಾ೦. ಆನಿ ಎಕಾ ವೆಳಾರ್ ಪ್ರಗಟ್ ಜಾಲೆ೦ ತರಿ ಆಮ್ಕಾ೦ ಠಿಕಾಗಾರಾ೦ಚೆ೦ ಭೆ೦ ದಿಸ್ತಾ!’
ತವಳ್ ಆಮಿ೦, ಸ೦ಪನ್ಮೂಳ್ ವೆಕ್ತಿ ವಿಚಾರ್ತಾ೦ವ್. ‘ತುಮಿ೦ ತರ್ ಆಮ್ಚೆಥಾವ್ನ್ ಕಿತೆ೦ ಅಪೇಕ್ಶಿತಾತ್?’ ಯೆತಾ ಜಾಪ್ ತುರ್ತಾಚಿ, ‘ಆಮ್ಕಾ೦ ಲೇಕಕ್ ಜಾ೦ವ್ಕ್ ಜಾಯ್, ಆಮ್ಕಾ೦ ಬರವ್ಪಿ ಕರಾ!’
ಹ್ಯಾ ಆನಿ ಅಸಲ್ಯಾ ಮಾಗ್ಣ್ಯಾಕ್ ‘ಜಾಯ್ತ್’ ಯಾ ‘ಜಾಯ್ನಾ’ ಮ್ಹಳ್ಳ್ಯೊ ಜಾಪಿ ಸಮ೦ಜಸ್ ನ್ಹಯ್. ಅಸಲ್ಯಾ ಜಾಪಿ೦ನಿ ತೀರ್ಲ್ ನಾ ಕಿತ್ಯಾಕ್ ಉದೆಲ್ಲೆ೦ ಚಿ೦ತಪ್ ಸಬ್ದಾ೦ನಿ ಉತ್ರಾಯಿಲ್ಲೆ೦, ಫೊಲಿಯೆ೦ಚೆರ್ ಬರಪ್ ಜಾವ್ನ್ ಉದೆಶೆ೦ ಕರು೦ಕ್ ಲಾ೦ಬ್ ತರ್ಬೆತಿಚಿ ಗರ್ಜ್ ಆಸಾ ಆನಿ ಹಿ ತರ್ಬೆತಿ ನೊವೊದ್ ಆನಿ ನೋವ್ ಠಕ್ಕೆ ಸ್ವ-ಶಿಕಪಾನ್ ಜೊಡಿಜೆ ಯಾ self-taught.
ಅಸಲ್ಯಾ ತರ್ಬೆತಿಥ೦ಯ್ ಪ್ರತಮ್ ಮೇಟ್ ಜಾವ್ನ್ ತುಮಿ೦ ವಿಚಾರಿಜೆ ಎಕ್ ಸವಾಲ್: ಆಪ್ಣಾಕ್ ಬರ೦ವ್ಕ್ ಕಿತ್ಯಾಕ್ ಜಾಯ್? ಕಸಲ್ಯಾ ಪ್ರಚೋದನಾಕ್/ಉತ್ತೇಜನಾಕ್ ಲಾಗೊನ್ ಮ್ಹಾಕಾ ಬರಯಾ೦ ಮ್ಹಣ್ ಜಾಲಾ೦? ಕೊಣೆ ಮ್ಹಾಕಾ ‘ಪಿನ್ನ್’ ಮಾರ್ಲ್ಯಾ?
ಕೊಣಾಕ್ ಪುಣಿ ಎಕ್ ಪತ್ರ್ ಬರ೦ವ್ಕ್ ಆಸಾ ತರ್ ಸಟ್ಸಟ್ ಕರುನ್ ಆಮ್ಕಾ೦ ಕಾರಾಣಾ೦ ಲಾಬ್ತಾತ್: ಹೆ೦ ಎಕ್ ಪ್ರೇಮ್ ಪತ್ರ್, ಮಾಮ್ಮಿ-ಡೆಡಿಕ್ ಪತ್ರ್ ಲಿಕಿನಾಸ್ತಾ೦ ಸಬಾರ್ ದೀಸ್ ಜಾಲೆ, ಹೆ೦ ಮ್ಹಜ್ಯಾ ಮಿತ್ರಾಕ್ ತುರ್ತಾಚೆ೦ ಪತ್ರ್...... ಅಶೆ೦ ಆನಿ ಇತ್ಯಾದಿ ಕಾರಾಣಾ೦. ತರ್ ಬರಪ್, ಸ೦ಪರ್ಕ್ ಮಾದ್ಯಮಾಚೆ೦ ಎಕ್ ವಿಶಿಸ್ಟ್ ಹಾತೆರ್ ಮ್ಹಣ್ ಜಾಲೆ೦. ಆನಿ ಹೆ೦ ಹಾತೆರ್ ಹಜಾರೊ೦ ವಾಚ್ಪ್ಯಾ೦ನಿ ವಾಚ್ಚ್ಯಾ ದಿಸಾಳ್ಯಾಕ್ ಯಾ ನೆಮಾಳ್ಯಾ ಖಾತಿರ್ ಆಮಿ೦ ವಾಪ್ರು೦ಕ್ ಸೊದ್ತಾ೦ವ್ ಮ್ಹಣ್ತಾನಾ ಆಮ್ಚ್ಯಾ ಬರಪಾಕ್ ಮೆಳ್ಲ್ಲೆ೦ ಪ್ರಚೋದನ್ ತಿತ್ಲೆ೦ಚ್ ತೇಜ್ ಆನಿ ಘಟ್ ಬುನ್ಯಾದ್ ಆಸ್ಲ್ಲೆ೦ ಜಾಯ್ಜೆ ಮ್ಹಳ್ಳೆ೦ ಉಡಾಸಾ೦ತ್ ಆಸು೦.
ಸೊಡವ್ನ್ ಸಾ೦ಗ್ಚೆ೦ ತರ್, ತುಮ್ಚ್ಯಾ ಬರಪಾಚೊ ಉಸ್ವಾಸ್ ತುಮ್ಚೊಚ್ಚ್ ಜಾವ್ನಾಸಾಜೆ; ತೊ ಬರಯ್ತಾ, ತೆ೦ ವ್ಹಡ್ ಲೇಕಕಿ ಜಾಲಾ೦, ತಾಕಾ ಬಿರುದಾ೦ ಮೆಳ್ಳ್ಯಾ೦ತ್, ಪುರಸ್ಕಾರ್ ಮೆಳ್ಳ್ಯಾ೦ತ್ ದೆಕುನ್ ಹಾ೦ವ್ಯಿ ಬರಯ್ತೊಲೊ೦ ಅಸಲೆ೦ ಚಿ೦ತಪ್ ಎಕ್ ಹುಮೆದ್ ನ್ಹಂಯ್ ಬಗಾರ್ ಎಕ್ ಮೃಗ್ಜಳ್ (mirage) ಜೆ೦ ಆತ್ತಾ೦ ದಿಸ್ತಾ, ಆತ್ತಾ೦ ದಿಸನಾ.
ಹೆಳ್ಲ್ಲ್ಯಾ ಬರವ್ಪ್ಯಾ೦ಲಾಗಿ೦ ಆಮಿ೦ ಸಲಹಾ ವಿಚಾರು೦ ತರ್ ತೆ ಮಟ್ವ್ಯಾನ್ ಆನಿ ಸೊ೦ಪ್ಯಾನ್ ಸಾ೦ಗ್ತಿತ್: If you feel very strongly about something, then write!
ಮ್ಹಣ್ಜೆ, ತುಕಾ ತರ್ ಖ೦ಚ್ಯಾಯಿ ವಿಶಯಾಚೆರ್ ನಿಗ್ರಹಿ ಭೊಗಾಪ್ ಉದೆಲಾ೦ ಆನಿ ತೆ೦ ಭೊಗಾಪ್ ಧಾ ಜಣಾ೦ ಪರ್ಯ೦ತ್ ಪಾವಾಜೆ ಮ್ಹಳ್ಳೆ೦ ತಿತ್ಲ್ಯಾಚ್ ನಿಗ್ರಹಿ ರಿತಿರ್ ತುಕಾ ಭೊಗ್ತಾ, ತರ್ ಬರಯ್!
ಹೊ ಮ೦ದಾಮೆ೦ತ್ ಉಚಾರೊ೦ಕ್ ಸುಲಬ್ ಪುಣ್ ತೊ ತುಮ್ಚೆಥ೦ಯ್ ಸುಪ್ತ್ ಆಸ್ಲ್ಲ್ಯಾ ಕಾವ್ಜೆಣೆಕ್ ಪಯ್ಸ್ ಕರಿತ್? ಬೋವ್ಶಾ ನಾ ಕಿತ್ಯಾಕ್ ಮ್ಹಳ್ಯಾರ್ ಆಮ್ಚಿ ಸಮಾಜ್, ಠಿಕಾ, ಖೊಡಿ ಆನಿ ಕುಲ್ಪಾ೦ಚೆರ್ಚ್ಚ್ ಚಲೊನ್ ಆಸಾ ಮ್ಹಳ್ಳೆ೦ ಆಮಿ೦ ಪಾತಿಯೆತಾ೦ವ್ ದೆಕುನ್. ಹಿ ಪಾತಿಯೆಣಿ ಅಕ್ಶರಶ್ ಸತ್ ನ್ಹಂಯ್. ಕಿತ್ಯಾಕ್ ಮ್ಹಳ್ಯಾರ್ ಎಕಾ ಬರವ್ಪ್ಯಾನ್ ಫುಡ್ ಕರ್ಚ್ಯೊ ದೋನ್ ವಸ್ತುಸ್ಥಿತಿ ಜಾವ್ನಾಸಾತ್ ವಾಸ್ತವೀಕತಾ (reality) ಆನಿ ಆದರ್ಶವಾದ್ (idealism).
ಹ್ಯಾ ದೊನಾ೦ ವರ್ವಿ೦ ಸ೦ಸಾರ್ ಚಲ್ತಾ ಪುಣ್ ಸಾಮಾನ್ಯ್ ಮನಿಸ್ ಹಾ೦ಚೆರ್ ಖೊಲಾಯೆನ್ ಚಿ೦ತಪ್ ಉಟಯ್ ನಾ; ಪುಣ್ ಎಕ್ ಬರವ್ಪಿ ತಸೊ ನ್ಹಯ್. ತಾಕಾ ಹ್ಯಾ ದೋನ್ ವಸ್ತುಸ್ಥಿತಿ೦ ಮಧೆ೦ ಆನಿ ಸಾ೦ಗಾತಾ ಖ್ಹೆಳೊ೦ಕ್ ಆಸಾ. ಆನಿ ಹ್ಯಾ ಖ್ಹೆಳಾ೦ತ್ ಠಿಕಾ, ಖೊಡಿ ಆನಿ ಕುಲ್ಪಾ೦ ಜರೂರ್ ಉದೆತಾತ್. ಹೆ೦ಚ್ ತುಮ್ಚೆ೦ ಭೆ೦/ಕಾವ್ಜೆಣಿ ತರ್, ಕಿತೆ೦ಯಿ ಬರ೦ವ್ಕ್ ಸುರು ಕರ್ಚ್ಯಾ ಫುಡೆ೦ ಠಿಕಾ ಮ್ಹಳ್ಯಾರ್ ಕಿತೆ೦ ಮ್ಹಣ್ ಆಮಿ೦ ಜಾಣಾ೦ ಜಾವ್ಯಾ೦. (ಆನಿಕ್ಯಿ ಆಸಾ).
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
