ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮ್ಹಾಕಾ ಹೆಂ ಚಿಂತುಂಕ್ ನಾಕಾ. ಮ್ಹಣಾ ನಾ ಆತುರಾಯ್ ಯಾ ಸಪ್ಣಾಂ. ನಾ ಭಗ್ಣಾಂ ಯಾ ಆಶಾ, ನಾ ಫುಡಾರಾಚಿ ವಾಟ್ ಯಾ ಸಂತೊಸಾಚಿ ದಿವ್ಟಿ. ಹಾಂವ್ ಜಿಯೆವ್ನ್ ಮೆಲಾಂ. ಎಕಾ ಥರಾಚಿ ಆಳ್ಸಾಯ್. ನಾ ಸಂತುಷ್ಟಿ. ’ಹೊ ಸಂಸಾರ್ ಭೆಷ್ಟೊ’ ಮ್ಹಳ್ಳೆಂ ಚಿಂತಾಪ್. ದೆವಾ ತುಂ ವೆಳಾಧ್ವಾರಿಂ ದೀವ್ನ್ ಆಸಾಯ್. ಹಾಂವ್ ದೊಳೆ ರುಂದಾವ್ನ್ ಕೆಲೆಂಡರ್ ಪಳೆತಾಂ, ತಾರಿಕ್, ಮಯ್ನೊ ಆನಿ ವರಸ್
ಸತಾಂತ್ಲಿಂ ವಿಚಿತ್ರಾಂ - 11. ವೇಳ್
ಜೆಮ್ಮಾ ಪಡೀಲ್
ಏಕ್ ಸೆಕುಂಡ್; ಏಕ್
ಮಿನುಟ್ ಯಾ ವೋರ್. ಏಕ್ ದೀಸ್, ಏಕ್ ಮಯ್ನೊ ಯಾ ಏಕ್
ವರಸ್. ನಾಂತರ್ ವರ್ಸಾಂ..
ದೆವಾ ತುವೆಂ ತುಜ್ಯಾ ರಚ್ನೆಕ್ ಸರ್ವ್ ಕರುಂಕ್ ತಕ್ಲಿ ದಿಲಿಯ್. ಧರ್ಣಿಂ
ಪಂದ್ಲೆಂ ಭಾಂಗಾರ್ ಆನಿ ಇತರ್ ಖನಿಜಾಂ ಕಾಡುಂಕ್. ಧರ್ಣಿಂ ಭಿತರ್ಲೆಂ ಯಾ ದರ್ಯಾ
ಭಿತರ್ಲೆಂ ತೇಲ್ ಕಾಡುಂಕ್. ವಾರ್ಯಾರ್ ಸುಕ್ಣ್ಯಾಬರಿ ಉಭ್ಚ್ಯಾ
ವಿಮಾನಾರ್ ಪಯ್ಣ್ ಕರುಂಕ್; ಸಬ್ಮೆರಿನಾಂತ್ ಮಾಸ್ಳೆಬರಿ ಉದ್ಕಾಭಿತರ್ ಜಿಯೆಂವ್ಕ್.
ಮನಿಸ್ ಚಂದ್ರಾಕ್ ಗೆಲೆ. ಅಂತ್ರಳಾಂತ್ಲೆ ಸಭಾರ್ ಘುಟ್ ಆನಿ ವಿಚಿತ್ರಾಂ ತುಜ್ಯಾ ರಚ್ನೆನ್
ಸೊಧುನ್ ಕಾಡ್ಲೆ. ದೆವಾಚೆರ್ ಪಾತ್ಯೆಣಿ ಆಸ್ಲೆಲ್ಯಾಂಕ್ ಪಾತ್ಯೆಣಿ ಚಡಂವ್ಕ್.
’ದೇವ್ ನಾ’ ಮ್ಹಳ್ಳ್ಯಾ ಚಿಂತ್ಪಾನ್, ಜಿಯೆಂವ್ಚಾ ಮನ್ಶ್ಯಾಂಕ್
ಹ್ಯಾ ಸರ್ವ್ ವಿಚಿತ್ರಾಂಚೊ ಸೂತ್ರ್ದಾರ್ - ಹೆಂ ಚಿಂತಾಪ್ ಮತಿಕ್ ಯೇವ್ನ್ ದೇವ್ ಮ್ಹಳ್ಳ್ಯಾ ’ಸಕ್ತೆ’
ವಿಶ್ಯಾಂತ್ ಗಿನ್ಯಾನ್ ದೀಂವ್ಕ್ ಸಲೀಸ್ ಜಾಲಾಂ. ತುವೆಂ ಮೊಗಾನ್ ಆನಿ
ಮಾಯ್ಪಾಸಾನ್ ಉಭೆಂ ಕೆಲ್ಲೊ ಹೊ ಸಂಸಾರ್ ನಾಸ್ ಕರುಂಕ್
ಸಯ್ತ್ ಪಳೆವ್ನ್ ಆಸಾತ್. ದೋನ್ ಚ್ಯಾರ್ ಹೈಡ್ರೋಜನ್
ಬೋಂಬ್ ಉಡಯ್ಲ್ಯಾರ್ ಜಾಲೆಂ. ತುಜೊ ಸಂಸಾರ್ ಮುಗ್ಧಾಲೊ.
ಜಾಲ್ಯಾರೀ ತುಕಾ ಕಾಂಯ್ ಖಂತ್ ನಾ?. ತುಂವೆಂ ತುಜ್ಯಾ ರಚ್ನೆಕ್
’ಕ್ಲೋನ್’ ಕರ್ಚಿ ತಕ್ಲಿ ದೀವ್ನ್, ತಾಂಕಾಂ ಜಾಯ್ ಜಾಲ್ಲ್ಯಾಬರಿ ಎಕಾ ರಚ್ನೆಕ್ ರಚಿತ್ ಕರುಂಕ್
ಸಾಧ್ಯ್ ಕರುಂಕ್ ತುವೆಂ ’ನಾ’ ಮ್ಹಣೊಂಕ್ ನಾಂಯ್ ತರೀ,
ಹೊ ಏಕ್ ’ವೇಳ್’ ಮ್ಹಳ್ಳ್ಯಾ ಸಂಗ್ತೆಕ್ ತುಂವೆಂ ತುಜ್ಯಾ
ಮುಟಿಂತ್ ದವರ್ಲೆಲೆಂ ಪಳೆತಾನಾ, ಹಾಕಾ ಕಸಲೊಗೀ ಏಕ್
’ಅರ್ಥ್’ ಆಸಾ ಮ್ಹಳ್ಳೆಂ ’ಮ್ಹಜೆಂ’ ಚಿಂತಾಪ್. ಆಮಿಂ ಕಿತೆಂಯ್ ಕರುಂಕ್
ಸಕ್ತಾಂವ್ ತರೀ, ಏಕ್ ಸೆಕುಂಡ್ ಏಕ್ ಮಿನುಟ್ ಮೊಲಾಕ್ ಯಾ
ವಾಡಿರ್ ದೀಂವ್ಕ್ ತುವೆಂ ಮನ್ ಕರುಂಕ್ ನಾಂಯ್. ಹೆಂ ಕಿತ್ಯಾಕ್ ದೆವಾ?
ಹಾಚ್ಯಾ ಭಿತರ್ಲೊ ಘುಟ್ ಮಹಾ ಘುಟ್ ಕಸಲೊ?
ತುಂವೆಂ ಮೊರ್ಚ್ಯಾಂಕ್ ಮೊರ್ಚೊ ವೇಳ್ ದಿಲಾಯ್. ಜಿಯೆಂವ್ಚ್ಯಾಂಕ್ ಜಿಯೆಂವ್ಚೊ ವೇಳ್
ದಿಲಾಯ್. ಪಿಡೆಸ್ತಾಂಕ್ ಬರೊ ಜಾಂವ್ಕ್.. ಹರ್ಯೆಕ್ಲ್ಯಾಕ್ ತಾಂಚೊ ತಾಂಚೊ ’ವೇಳ್’
ದಿಲಾಯ್.
ದೆವಾ.. ಆಜ್ ಹಾಂವ್ ಮ್ಹಾತಾರೊ. ಮ್ಹಜೆ ಕೇಸ್ ಪಿಕ್ಲ್ಯಾತ್.
ಮ್ಹಜೆ ದಾಂತ್ ಹಾಲ್ತಾತ್. ತಕ್ಲಿ ಕೆಸಾಂವಿಣೆ ಹಾಳು ಜಾಲ್ಯಾತ್. ಕಾತಿರ್
ಮಿರಿಯೊ, ಭಳ್ ಉಣೆಂ ಜಾಲಾಂ. ಕಾಮಾ ಥಾವ್ನ್ ನಿವೃತ್ತಿ. ಆರ್ಸ್ಯಾ
ಮುಕಾರ್ ರಾವೊನ್ ಮ್ಹಜೆಂ ಮುಖಮಳ್ ಪಳೆತಾನಾ
ಹಾಂವ್ ಕಂಗಾಲ್ ಜಾತಾ. ಹೊ ಕೊಣ್? ಮ್ಹಳ್ಳೆಂ ಸವಾಲ್ ’ನಾಕಾ
ನಾಕಾ’ ಮ್ಹಳ್ಯಾರೀ ಉದೆತಾ. ಮ್ಹಾಕಾ ನಾತ್ರಾಂ ಆಸಾತ್. ಭುರ್ಗಿಂ ’ವ್ಹಡ್’ ಜಾಲ್ಯಾಂತ್. ಎಕಾ ತೆಂಪಾರ್
’ತೆ’ ಆಯ್ಕಾತಾಲೆ. ಆತಾಂ ಹಾಂವ್ ಮ್ಹಜ್ಯಾ ಭುರ್ಗ್ಯಾಂಚೆಂ ಆಯ್ಕಾತಾಂ.
ನಾಕಾನಾಕಾ ಮ್ಹಳ್ಯಾರೀ, ಮ್ಹಜ್ಯಾ ಆವಯ್-ಬಾಪಾಯ್ಚೊ ಉಡಾಸ್ ಯೆತಾ. ತಾಂಚೆಂ ರುಪ್ಣೆಂ
ಮತಿಕ್ ಯೆತಾನಾ ದೊಳೆ ಥಂಡ್ ಜಾತಾತ್. ನಾಕ್ ಉದ್ಕಾನ್
ಪಾಚಾರ್ತಾ. ತುವೆಂ ’ವೇಳ್’ ಕಸೊ ಪಾಶಾರ್ ಕೆಲೊಯ್
ಸೊಮ್ಯಾ ಮ್ಹಾಕಾ?
ಎಕಾ ತೆಂಪಾರ್ ಹಾಂವ್ ಭುರ್ಗೊ ಆಸ್ಲ್ಲೊಂ. ಸೆಜಾರ್ಯಾಂಚ್ಯಾ ಹಿತ್ಲಾಂತ್ಲ್ಯಾ
ಪೆರಾಂಚೆರ್ ಯಾ ಆಂಬ್ಯಾಚೆರ್ ದೊಳೆ
ವೆತೆಲೆ ಮ್ಹಜೆ. ವ್ಹಡ್ ಜಾಯಿತ್ತ್ ವೆತಾನಾ ಸೆಜಾರ್ಚೆಂ
ಮಿಲ್ಲಿ, ವೀರಾ, ಸೆಲ್ಲಿ, ನೊರಾ, ಅಲ್ಲಿ, ಕಲ್ಲಿ, ಸಿಂತಿ ಆನಿ ನಿರ್ಮಲಾ
ಹಾಂಚೆರ್ ದೊಳೆ ವೆತಾಲೆ. ತಾಂಚ್ಯಾ ಎಕಾ ದಿಷ್ಟಿ ಖಾತಿರ್, ತಾಂಚ್ಯಾ ಎಕಾ
ಹಾಸ್ಯಾಖಾತಿರ್ ತುಂವೆಂ ರಚ್ಲ್ಲೆ ಪರ್ವತ್, ಉದ್ಕಾ ಸರೋವರ್ ಯಾ ಖಂದಕ್ ಉತ್ರೊಂಕ್ ತಯಾರ್ ಆಸ್ಲ್ಲೊ. ರಾತ್ ನಿದೆವಿಣೆ
ಫಕತ್ತ್ ಸ್ವಪ್ಣೆಂವ್ನ್ ಪಾಶಾರ್ ಜಾಲ್ಲೆ ವೇಳ್ ತರೀ ಕಿತೆಂ ಸೊಮಿಯಾಂ?
ಜೀವನಾಂತ್ ವೃದ್ದಿ ಜಾಂವ್ಕ್ ಏಕ್ ’ಮನಿಸ್’ ಜಾಂವ್ಕ್ ಹಾಂವ್
ಶಿಕ್ಲೊಂ. ರಾತ್ ಆನಿ
ದೀಸ್ - ಮಿಲ್ಲಿಕ್ ಆನಿ ಸರ್ವಾಂಕ್ ವಿಸ್ರೊನ್. ಶಿಕಾಪ್ ಜಾಲ್ಲ್ಯಾ
ನಂತರ್ ಕಾಮ್, ಉಪ್ರಾಂತ್ ಕಾಜಾರ್. ಹಾಸ್ಚೆಂ, ರಡ್ಚೆಂ, ಹಾಸಂವ್ಚೆಂ, ರಡಂವ್ಚೆಂ,
ಪುಸ್ಲಾಂವ್ಚೆಂ, ರಾಗಾನ್ ಪುಸ್ಪುಸ್ಚೆಂ,
ಮೊಗಾನ್ ಪೊಶೆಂವ್ಚೆಂ. ಮಂಗಾನೆನ್ ಹಾಸ್ಚೆಂ ಸರ್ವಾಂತ್ ತುಂವೆಂ
ಭಿಕಾರಿ ಜಾಲ್ಲ್ಯಾ ಮ್ಹಾಕಾ ಕಾಜಾರಿ ಸಾಕ್ರಾಮೆಂತಾಂತ್ ಕಾಜಾರಿ ’ಬಾಯ್ಲ್’
ದೀವ್ನ್ ಗ್ರೇಸ್ತ್ ಕೆಲೊಯ್. ಹ್ಯಾ ಗ್ರೇಸ್ತ್ಕಾಯೆಂತ್
ಹಾಸೊನ್ ಖೆಳೊನ್ ದೀಸ್ ಗೆಲ್ಲ್ಯಾಬರಿ ಆಮ್ಕಾಂ ಪ್ರತಿಫಳ್ ಜಾವ್ನ್ ಭುರ್ಗಿಂ ಜಾಲಿಂ. ತುಂವೆಂ
ಹ್ಯಾ ವೆಳಾಚೊ ಬರೊ ಪ್ರಯೋಗ್ ಕರುಂಕ್ ಮ್ಹಾಕಾ ಆನಿ ಆಮ್ಕಾಂ ದಯಾಳ್ ಜಾಲೊಯ್.
ಭುರ್ಗಿಂ ಜಾಲಿಂ. ವ್ಹಡ್ ಜಾಂವ್ಚ್ಯಾಕ್ ಪಿಡೆಂತ್ ಪಡ್ಲಿಂ. ತಾಪ್, ಶೆಳ್,
ವೋಂಕ್, ಉದ್ಕಾಡೆ, ಪಿಡಾ ಆನಿ ಸರ್ವ್ ದೀವ್ನ್ ಹ್ಯಾ ವೆಳಾಚೆಂ ಚಿಂತಾನಾ ಆತಾಂಯ್
ಹಾಂತ್ ಪಾಂಯ್ ಕಾಂಪ್ತಾತ್. ಇತ್ಲೆ ಕಷ್ಟಾಂಚೊ ವೇಳ್ ಯೇತ್ ಮ್ಹಳ್ಳೆಂ
ಪಯ್ಲೆಂ ಕಳಿತ್ ನಾತ್ಲೆಲೆಂಬರೆಂ ಜಾಲೆಂ, ನಾಂತರ್ ಏಕ್ ಜೀವ್, ಸದಾಶಿವ್ ಮ್ಹಳ್ಳೆಂ ಬಿರುದ್ ಬಗ್ಲೆಕ್ ಘೆವ್ನ್ ಜಿಯೆತೊಂ ಕೊಣ್ಣಾ! ಭುರ್ಗ್ಯಾಂಕ್
ವ್ಹಡ್ ಕರ್ನ್ ಆಮಿಂ ಮ್ಹಾತಾರಿಂ ಜಾಲ್ಯಾಂವ್. ಕೇಸ್ ಝಡ್ಲೆಂ. ತೊಂಡ್ ಚಿರ್ಮುಟ್ಲೆಂ. ಏಕ್ ದೋನ್ ದಾಂತ್ ಝಡ್ಲೆ.. ಮಿಶಿಯೊ, ಖಾಡ್ ಆನಿ ತಕ್ಲೆವಯ್ಲೆ ಕೇಸ್ ಪಿಕೊಂಕ್
ಸುರು ಜಾಲೆ. ಪೋರ್ ಮ್ಹಣಾಸರ್ ಆರ್ಸ್ಯಾ ಮುಖಾರ್ ರಾವೊನ್
ಮ್ಹಜೆಂ ಮುಖಮಳ್ ಸಂತುಷ್ಟಿ ದಿಸ್ಚ್ಯಾ ಮ್ಹಾಕಾ ತುವೆಂ ಚಿಂತುಂಕ್
ಏಕ್
ನವೊ ’ವೇಳ್’ ದಿಲೊಯ್. ತೆಂ ಕಿತೆಂ ಸೊಮ್ಯಾಂ? ಕಿತೆಂ ತುಜಿ ಅಲೋಚನ್? ವೆಳಾಕಾಳಾತೆಕಿದ್ ತುಂ
ಮ್ಹಾಕಾ ’ನವೆಂ ನವೆಂ’ ಚಿಂತಾಪ್ ದಿಂವ್ಚೊ ವೇಳ್ ದಿತಾಯ್?
ಆತಾಂ ಮ್ಹಾಕಾ ನವೊ ’ವೇಳ್’. ಜಿವಿತಾಂತ್ಲಿಂ ಸರ್ವ್ ಕಾಮಾ, ಅಂತಸ್ತ್ ಆನಿ
ಮೆಟಾಂ ಚಡೊಂಕ್ ಯಾ ಕರುಂಕ್ ತುಂವೆಂ ವೇಳ್ ದಿಲೊಯ್.
ಹಾಂವ್ ಎಕಾ ಕೊನ್ಶ್ಯಾಂತ್ ಆಸಾಂ. ಖಾಂವ್ಕ್ ಆಶೆನಾ. ತೊಂಡಾಕ್ ರುಚಾನಾಂ.
ಪೊಟಾಕ್ ಭುಕ್ ನಾ. ಖೆಲ್ಲೆಂ ಜಿರಂವ್ಕ್ ಆಯ್ಕಾನಾ. ಎಕಾ ತೆಂಪಾರ್
ಸಗ್ಳೊ ಪೊಣೊಸ್ ಖೆಲ್ಲೊ ಹಾಂವ್ ಏಕ್ ಗರೊ ಖೆಲ್ಯಾರ್,
ಮ್ಹಜೆಂ ವಸ್ತುರ್ ಘಾಣೆತಾ. ತುಂವೆಂ ಕಿತೆಂ ಕೆಲೆಂಯ್
ಸೊಮ್ಯಾ? ಸುಗ್ಗೆಚ್ಯಾ ಗಾಂವಾ ಥಾವ್ನ್ ಉದಾಕ್ ನಾತ್ಲೆಲ್ಯಾ ರೆಂವೆಂತ್ ಭರ್ಲೆಲ್ಯಾ ಗಾಂವಾಕ್ ರವಾನ್ ಕೆಲೊಯ್? ಏಕ್ ತೇಂಪ್ ಆಸ್ಲ್ಲೊ
ಹಾಂವ್ ’ಮ್ಹಜ್ಯಾ’ ವಿಶ್ಯಾಂತ್ ತಶೆಂ ಮ್ಹಜ್ಯಾ ’ಕುಟ್ಮಾ’
ವಿಶ್ಯಾಂತ್ ಚಿಂತುನ್ ವೇಳ್ ಪಾಶಾರ್ ಕೆಲ್ಲೊ ಹಾಂವ್ ಹಾತಾಂತ್ ಕೋಂತ್ ಘೆವ್ನ್
ಮಾಗ್ಣೆಂ ರಜಾರ್ ಕರ್ತಾಂ. ಮ್ಹಜಿಂ ನಾತ್ರಾಂ ಭುರ್ಗಿಂ ರಾತಿಂ ಟಿವಿಕ್ ಸೀರಿಯಲಾಂ ಪಳೆತಾತ್. ಸೀರಿಯಲಾಂ ಖಾತಿರ್
ನೀದ್, ವೇಳ್ ಪಾಡ್ ಕರ್ತಾತ್. ಕ್ರಿಕೆಟ್ ಮೇಚ್ ಆಸ್ಲ್ಯಾರ್
ಮೀಸ್ ರಜಾರ್ ವಿಸರ್ತಾತ್. ಮ್ಹಾಕಾ ಹೆಂ ಚಿಂತುಂಕ್ ನಾಕಾ.
ಮ್ಹಣಾ ನಾ ಆತುರಾಯ್ ಯಾ ಸಪ್ಣಾಂ. ನಾ ಭಗ್ಣಾಂ ಯಾ ಆಶಾ,
ನಾ ಫುಡಾರಾಚಿ ವಾಟ್ ಯಾ ಸಂತೊಸಾಚಿ ದಿವ್ಟಿ. ಹಾಂವ್ ಜಿಯೆವ್ನ್
ಮೆಲಾಂ. ಎಕಾ ಥರಾಚಿ ಆಳ್ಸಾಯ್. ನಾ ಸಂತುಷ್ಟಿ. ’ಹೊ ಸಂಸಾರ್ ಭೆಷ್ಟೊ’ ಮ್ಹಳ್ಳೆಂ ಚಿಂತಾಪ್. ದೆವಾ ತುಂ ವೆಳಾಧ್ವಾರಿಂ
ದೀವ್ನ್ ಆಸಾಯ್. ಹಾಂವ್ ದೊಳೆ ರುಂದಾವ್ನ್ ಕೆಲೆಂಡರ್ ಪಳೆತಾಂ, ತಾರಿಕ್,
ಮಯ್ನೊ ಆನಿ ವರಸ್ ಪಳೆತಾನಾ ಯೆಂವ್ಚಾ ವರ್ಸಾ ಹ್ಯಾ
ದಿಸಾ ಹ್ಯಾ ಮಯ್ನ್ಯಾಂತ್ ಹಾಂವ್ ’ಖಂಯ್’ ಮ್ಹಳ್ಳೆಂ ಚಿಂತಾಪ್
ಮ್ಹಾಕಾ ಖೊರ್ಪಿತಾನಾ ಹಾಂವ್ ಚಿಂತಾಂ. ದೆವಾ ತುವೆಂ ’ವೇಳ್’
ದಿಲೊಯ್. ಹಾವೆಂ ವೆಳಾಫರ್ಮಾಣೆ ಧಾಂವ್ಲೊಂ, ಉಡ್ಲೊಂ,
ಪಡ್ಲೊಂ.. ಆತಾಂ ಖಂಯ್ ಆಸಾ ಮ್ಹಾಕಾ ವೇಳ್?
ಮ್ಹಜೊ ವೇಳ್ ಉತ್ರೊನ್ ಆಯ್ಲಾಂ. ಹಾಂವ್ ತುಜ್ಯೆಲಾಗಿಂ ಏಕ್
ಸೆಕುಂಡ್ ದಿ ಮ್ಹಜ್ಯಾ ನಾತ್ವಾಕ್ ಪೊಟ್ಲುನ್ ಧರ್ತಾಂ, ಏಕ್
ಮಿನುಟ್ ದಿ ಮ್ಹಜ್ಯಾ ಭುರ್ಗ್ಯಾಕ್ ಬರಿ ಬೂದ್ ಸಾಂಗ್ತಾಂ.
ಮ್ಹಾಕಾ ಏಕ್ ವೋರ್ ದೀ ಬರೆಂ ಕುಮ್ಸಾರ್ ಜಾತಾಂ ಮ್ಹಳ್ಳೊ
ಸಭಾರ್ ಅರ್ಜ್ಯೊ ವಿನತಿ ಆನಿ ಉಲೆ ತುಕಾ ಪಾವಿತ್ ಕೆಲ್ಯಾರೀ, ತುಜೆ ಕಾನ್
ಬಂಧ್. ಯೆದೊಳ್
ಪರ್ಯಾಂತ್ ಚೀತ್ ದೀವ್ನ್ ಆಯ್ಕೊನ್ ಆಸ್ಲ್ಲೊಯ್ ತುಂ ತುಜೆ ಕಾನ್ ಬಂಧ್ ಕರ್ನ್ ದವರ್ಲ್ಯಾಯ್. ತುಜೆಂ ಉತಾರ್ -
’ತುಜೊ ವೇಳ್ ಜಾಲೊ’.
ಹಾಂವ್ ದೊಳೆ ಧಾಂಪ್ತಾಂ. ಕಾನ್ ಕೆಪ್ಪೆ ಜಾತಾತ್. ದೊಳೆ ಕುಡ್ಡೆ ಜಾತಾತ್. ಕಾಳಿಜ್ ಧಡಧಡ ಆವಾಜ್ ಕರ್ಚೆಂ ರಾವ್ತಾ. ಗರಮ್ ಆಸ್ಲ್ಲೆಂ ಕೂಡ್ ಥಂಡ್ ಜಾತಾ.
ತುಜೊ ವೇಳ್ ಸೊಮ್ಯಾ ಆತಾಂ!
ತುವೆಂ ಹೊ ’ವೇಳ್’ ಮನ್ಶ್ಯಾಂಕ್ ಸೊಡ್ಲ್ಲೆಂ ತರೀ ಕಿತೆಂ ಜಾತೆಂ?
ತುವೆಂ ಮಾತ್ರ್ ಜವಾಬ್ ದಿವ್ಯೆತ್. ಧಾಂಪ್ಲೆಲ್ಯಾ
ದೊಳ್ಯಾಂನಿ ತುಕಾ ಪಳೆತಾನಾ
ಹಾಂವ್ ಸಮ್ಜತಾಂ - ವೇಳ್ ತುವೆಂ ತುಜ್ಯಾ ಮುಟಿಂತ್ ದವರ್ಲ್ಲ್ಯಾಚೊ ಘುಟ್!
ಆಧ್ಲೆ ಆಂಕ್ಡೆ: ಸಂವಾದ್, 1, 2, 3, 4, 5, 6, 7, 8, 9, 10
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
